VANMALSAWMA-11

VANMALSAWMA-11

"Ka enchimlohi chiuna a nih kha" a ti a, min rawn hnaihin syringe chu min laksak a, a ak nghal daih bawk. 

"Ka awih lo..ka enchimlohi a damlo hleinem. Lo damlo ta tehreng pawh nise angphah hnuaiah i thukru kher lo ang" ka ti ve tlat a, ngaihţha deuhin a pindan chhung ka tifai a, ka thil hmuh hi ka beisei loh ber te zinga mi a ni. A sual a, a awmţha duh lo a, ruih a hrat zia thlengin hre mah ila damdawi kher kher chu a tih ve turah ka dah ngai lo hrim hrim. 

"I thluak tereuhteah hian thil ni lo lo khung suh" ka lu a khawih pah a a tih te chuan "Kha thil kha ka nu phei chuan hmu se kan ute zawng zawng a hrilh nghal ang. Aizawl a i awm ve pawh an phal tawh hauh lo ang" ka lo ti a, a ban te chu chik deuhin ka en a, a inchiu leh chiu loh ka hre thei bawk si lo, ka hah takzet a ni. 

"Vawikhat tihin vawihnih a hring an tih kha aw, i tih chhin chuan tih leh zel i chak ngei ngei dawn a nia, i inchhir meuh chuan a tlai tawh dawn lutuk. Sim duh ngawih ngawih pawn an sim hleithei lo chu a nih hi" ka ti hlak hlak a, ţawng zawih a ngai bawk nen, ka tawt ţun mai.

"Ka enchimlohi chiuna ka ti ka tia lawm. Ran ho hi i hmuh ang syringe hian an chiu ţhin. An vun an pawt fan a an vit sâwt zel. Awii..a na vawt vawt dawn lutuk" a ti vel a, a thusawi te chu a mumal lo riau hian ka hria a, ka ngaihbel nge pawh ka hre lo dik lo vek tawh angin ka hmu alawm mawle. 

"Ka pindan i tihfai pawn tifai ringawt rawh. Enkual de de zel a ngai lo. Suk tur te i dahchhuak em?" zangkhai vahin a ti leh tawh a, keimah zawk chuan a thil ah bo tak chu ka hre ran reng mai. 

"I dik lo tlat" pindan chhunga a vei kual vel chik deuha en paha ka tih chuan "Ţha lo leh fello a min ngaih chhung chu min hmu dik thei lo ang" a ti ve ngei a, workshop ah ka thawk a ti ve a, a duh duh hunah a kal a, kal loh chang lah a ngah, engtin nge a thawh reng theih zawk ni?

"En rawh..ka hmuh dik loh vang che a ni lo. I nau ka nia, zilh zawk tu tur che pawh ka ni lo a, mahse kawng thim lam hlir a nia aw i zawh mek hi. Vanmalsawma ten an tih hmuh che em ni?" ka ti nawn leh a, puhmawh tur ka zawng reng mai hi dik ka inti bik lo, mahse a ţhian dangte ka hre tlat lo a ni. 

"Dak zet zet reuh lo teh. Tu tihdan mah ka zir ngai lo. I rilru a hrisello tlat i lerh ve ta deuh aniang" min ti let zawk a, "Ka u i nih vang chauh a sawi ka nia lawm. Ni lo la chu ka sawi ka sawi peih bik lo" ka tih chuan "I u ka ni lo ka tih loh kha" a ti a, lunghnur deuhin ka chhuahsan a, rilru a kap run a, ka enchimlohi chiuna ringawt a nih ka ring lo bur a, ka nu ka hrilh ngam lo thung. 

Inrinni a nih leh tawh avangin zing aţangin ka insu a, chhunah ka nu leh U Daizaui te bungraw dawr bungraw la a chhuah an tum thung a, ka pi lah chuan "Machine saw va herh zawi deuh teh..ka milem enlai hi an ţawng ka hre thei lo" a lo ti ve sek a, theih chu nise herh zawih sak a chakawm khawp mai. 

"Ti ring deuh mai rawh machine te chu a herh zawih ve theih loh alawm" ka ti a, darthlalang ka nawt pah a, ni a sat tak tak hmaa nawh zawh hman ngei tumin ka ţang hle nghe nghe a ni. 

Tv leh machine a ri reng a, chu chuan lu a ti na bur thei a, sawisel mah ila awmzia a awm dawn lo tih hriain ka sawi buai peih vel lo law law. Remote hi ka piin a chang deuh rawt a, mizo channel bak a en peih lo a, heivang hian Tintin-a remote a bel var luk a, ka piin a duhzawng chauh a hmeh chhuah theih nan a thiam ang tawkin a siamrem sak ve ngei a, lawmmanah pawisa an inpe ta velin ka hria. Ka pu pension a la la a, tuman kan chuhpui ngai loh rualin pawisa hi chu kan lakchhuahsak a, a kutah kan hlan thlap ţhin. Hlawh lak hun te chu a hrethei rapthlak lutuk ringawt. 

Ka insuk zawhah dawrah ka awm a, lokal neuh neuh an awm ve reng a, ka nu leh U Daizaui te chhuak tur chuan "Tintin-a lo lenchhuah tir suh aw. Dawr bungrua kan la dawn sia, mipa an awm loh chuan a buaithlak ţhin" an ti a, ka lo bu ve nghat nghat a. 

Rin loh deuhin Vanmalsawma a lokal a, inrinni ah tak hi chuan ka hmu ngai vak lo a sin mawle. Cigarette a lo lam chu "Lo chawl la" ka lo ti a, "Zanah i chhuak thei em?" a ti daih thung a. 

"Aw chhuak thei e" ka ti ve mai a, eng emaw sawi tuma an zuau lai chuan "Dawr thleng hi ka kal thei" ka lo ti leh a, a lungawi loh hmel nasa mai. 

"Zanah tih tur eng nge awm a?" ka tih lehzel takah chuan dawr chhungah a lo lut a, "Hna ka thawk a" a ti a, min ţhut hnaih duh lo. 

"Kan ţhianpa piancham kan ur lawk dawn a, lokal ve la" ngaihsam hmel tak hian a ti a, "Tuman piancham an ur lawk ngai lo. A hun takah lawm mai mai rawh u" ka tih sak a, a hmui a pet sawi zauh a, ka thusawi chuan a ti lawm lem lo tih a hriat khawp mai. 

Phone hmet mawlh mawlh paha a mei zu lai chu ka en ru zauh zauh a, damdawi ti hmel a pu mang si lo, ka u lah chu rinhlelhna hlirin ka khat tawh a, anni hian an tih hmuh tak tak a nih chuan amah ngei pawh hian damdawi ti hmel a put ka ring a, ka zawng a, ka duh ang ka hmu lo thung. 

"I lokal ve duh nge duh lo" a ti zet a, amah bawk chuan "Hmeichhia chu zanah chhuak leh lo ang" a ti leh a, "Chhuak lovin lo leng zawk ula" ka lo ti ve a, a nuih a za viau lehnghal. 

"Ka bialnu lo chu ka rim tawh dawn lo. Petrol a hek" a ti mauh mai a, sawm zui zel chi ni pawn ka hre lo. 

"Naktukah inkhawm ve tawh rawh aw" ka ti ta zawk a, ţum dang ang bawkin ka sawm chhuak leh chuang lo. 

Rei pawh awm lovin min chhuahsan a, biakin aia khawlai a ngaina zawk tlat te, inkhawm aia party leh ţhianho intih hlimna lam a ngaina zawk tlat te hi kan inan lohna a ni. Han sawm lui dawn ila a thu a duh ve reuh phian bawk sia, hmeichhe thua awm hreh chi a niin ka hria. 

U Daizaui takngial pawn "In nun duh dan a inang lo. Boomer a ni chuang lo a, theihnghilh tum la midang ţha deuh nei zawk rawh" min ti ve hial a, ani ngawt khan rilru a luah thung. 

Pathianni tukah chuan ka pa'n min lo bia a, Tintina chanchin min zawt luam na a ka man dan kha a chian loh em avangin ka sawi duh rih lo a, "Ţha deuhin zir la, krismas dawnah ka lo hruai dawn che u nia. Mamawh te i nei em?" a rawn ti a, ka neih loh thu ka hrilh hnuah "I nu kha lo dil zel mai rawh aw. A hau hmasa che ang a, mahse a lei tho ang che" a ti a, kan nui dun hak hak a, nu leh pate danglamna a nia, pate hi chuan min lei loh leh pawisa min pe mai a, nu te zawk hi chuan min hau hrep phawt zel a, ngawi renga min leisak an nei ngai lo reng reng. 

"Tintin tho rawh i pa'n a be duh che" ka nu'n a ti leh lung lung tawh a, ka pawh a nuih a za viau mai. 

"Ka dah rih lawk ang aw" ka tih laiin Tintin-a chuan "A duh chuan ka phone ah min lo be mai rawh se" a ti a, a lo tho dawn chuang lo tih hriain ka pa nen a kan inbiakna chu kan ti tawp a, ka nu telloin a awm rek rek awm sia, a khawngaihthlak reuh. 

"Zing han thawh hreh em em zel mai hi a mak ve thlawt a ni" a ti a, an inkaitho khat tawh viau asin mawle. 

"Mak vek hleinem..zing thawh bak thawh hreh ka nei chuang lo a, ka thawh hreh chhun hi i hre hlur a" thophang aw zet hian a ti a, chawhmeh ka lo chhuang lum ve mek bawk a, kan ei rual leh thei pek lo ang. 

"Hnial khan lah hi i hre sia maw..mi nu ang chu ni se ila ka vaw tho zawt tawh ang che" ka nu'n a tih chuan "Mi nu ang i nih ve loh rau rau chuan min lo malis teh" a lo ti ve nghal zat a, a duh hunte ah lo chuan a tho dawn chuang lo tih hriain ka nu chu kaitho tawh lo mai turin ka hrilh a, tunhma anga awm awl tawp a ni tawh bik lova, mu rei deuh mah se tlem chuan a hriatthiamawm ve ta deuh. 

"Inkhawm te hi a thlahdah sawt lutuk a, hetiang tur a ni lo reng reng. Mipa dang an awm lo a tumah min hlau bawk si lo" a ti nang nang a, ka pi chuan ka u a ţan a, an thu a inhmu lo ve thei ţhin khawp mai. 

Inkhawm kan bang chu Ropuia kan tih mai ţhin chuan "Haw rual ang u" a ti a, kan rualin a lokal ve nghal bawk a, kan awmna lama awm tho a nia, kţp ah pawh a inhmangin college pakhatah guest lecturer angin a thawk tih thlengin a chanchin kan hre nal tawh. 

"Vawiin chu scooty i keng lo ve teh tlat a ni maw?" ka lo tih chuan "Ka hralh a, a thar ka la la lo deuh" a ti ţha ve mai a.

Mipa na na na chu a sang ve tho nain Vanmalsawma ang em chuan a sa a ţha ve lo a, cher lam a pawl zawk mah a, a hang lo a, fresh deuh kan tih ang chi kha a ni. 

"Nangpawh i kalna a hla angreng sia, scooty te la ve ula" a ti a, ka tlaw ve zia an hre lo mai mai a ni.

"Ka chhungte pawn an sawi ţhin a, mahse ka khalh thiam lo a" ka tih chuan za vak lo hian a lo nui a, mak ti hmel a pu bawk. 

"I khalh thiam lo maw?" a ti nawn veleh kher a, lu ka lo buk nghat hnu chuan "Zir rawh..tereuhte te pawn an khalh zaih zaih zel hi, nakinah ka la zirtir ang che" a tih leh lai chuan U Daizauin min lo kheuh zeuh a, mitmeiin chhak lam hawi turin min hrilh pah zeuh zeuh bawk a.

Ropuia hriat hlau takin ka hawi chho a, kan zawn a inchhawng chung ber aţang chuan Vanmalsawma te hoin min lo thlir a, Tintin-a pawh a ding ve run mai. Kan kal dawn thleng kha chuan a la tho lo a, dar rik hma zawng a mu lui vel mai mai a nih dawn kha. 

An dinna chu chhawng thum lai a nih ve avangin ka hmu chiang lutuk thei hlawm lo a, Vanmalsawma ah chuan ka mit a fu bik a, petrol a uihawm a tih vang mai mai a a lo leng duh lo kha ka ngei ve deuh a, runluih ka chak ve deuh avang chuan Ropuia ka hnaih sauh a, a hmel awmdan ka hmu chiang chak tak tak a ni. 

An awmna in kan kal pel hma lutuk te chu pawi ka ti ru veng veng a, chau hnap khawpin han runluih ve thei ila ţha tur a nia. Ka hawi let leh hram a, an la ding far a, min duh rukna a neih tak tak chuan a thik ve khawp ang. 

"Ropui thingpui lo in kawi rawh aw" U Daizaui chuan a ti ngei bawk a, Vanmalsawma te lo awmna in kha ngaihtuah ran chungin "Kan kal pelh tak in hring kha tu te in nge a?" ka lo ti ve thung a. 

"I thlir chhoh dauh dauh kha maw?" a ti kher a, za vak lo a ka nuih luih hak hak lai chuan "Pu Peka te in a nih kha. A chung ber kha anmahnin an luah a, a hnuai kaw hnih kha midangin an luah a, mi in va hre lo ve" a tih takah chuan "Kan pawn chhuak tam lo ve lutuk a, puitling ngat phei chu hriat mang ka la nei lo" ka ti a, in awmna lamah bawk chuan ka hawi thla leh zauh a. 

"Pektea te in a nih kha, a inkhawm ngai mang lo a mah se in inah chuan an lo leng ţhin" a tih leh chuan "Ehe...kha kha Pektea in maw?" ka lo ti he haw a, Vanmalsawma te in lamah chiah khan ka hmu ţhin a, khami veng bik a mi turah khan ka ngai ve tawp a, an lo awm laili angreng hle mai. 

"Ni e...mah se a chapal in a ai a awh zo a, a pa tih dan takah a fapa aiin inah a chapal a awm tam zawk. An chhungkua hi an mak ve reng reng a, an hmingah Pek tih a awm vek a, an chhungkaw zinga mi i hmuh chuan Peka i tih loh leh Peki ti la, an êi nalh nalh mai ang" a ti a, U Daizaui nen kan lo nui kar kar a. 

"Sensiar scooty chu la ve rawh aw, i thiam vat thei ang. Ka zirtir dawn che nia" a tih zawm leh zat bawk a, min ngai hausa reng reng; duh duh huna scooty la mai theiah min ngai a nia. 

Kan in lama kan phei chu bike chak deuhin min tlan pel a, Ramfangzaua lokal zan ang bawk khan an inzui leh tawh a, maimitchhing tlat mah ila Vanmalsawma te ţhian ho an ni tih ka hre tho ang. 

"An va tlan chak ve le..inkhawm ban hunlai a ni si a, mi an ti palh ang tih te pawh a hlauhawm alawm" Ropuia bawk chuan a ti leh a, mipa dang a thik deuh avangin a rang a rangin bike in min lo umzui em maw ni dawn le tih te ka ngaihtuah leh hman tawh a, mahse ka ngaih ang a ni lo ziah a, duh thu ka lo sam vel vak vak peih tawh lo. 

Kan inthlen hma deuha an zawngte khawi kan enkawi leh vel a, U Daizauin a lawm viau laiin kei tak chuan ka hlau deuh a, "Kal tawh ang" ka tih ngang ngang hnuah a kalsan ve thei hram chauh a ni. 

Kan inkawtah bike a lo ding tlar ţhap a, a vaiin panga a ni. An tlanchak bawk a min thlen khalh rang hle mai. Kawng sirah a intlar thla a, kalna tur lai bik zuah nachang an hre ve thlap bawk a, anmahni lah chu hmuh tur an awm mang si lova, kan inah nge Hruaipuii te inah zawk an awm tih pawh ngaihven lem lovin inchhungah kan lut a, Hruaipuii te inah zawk an awm tih kan hre ta chiah bawk. 

Kan inah chuan ka pi chiah a awm a, "Thingpui han lum nghal rawh u" a lo ti a, ka inthlak lai mekin pawn lamah thawm ka hria a, ka che vel chu ka tawp nghal chawt a ni ber. 

"Pi khawnge Sensiari?" an ti a, ţawng ring hlawm viau mah se hriat chian tumin ka beng ka chhi kar a, ka ngaithla ran bawk.

"A inthlak a nih kha..lo ţhu rawh u. In inkhawm ve na nge?" ka piin a tih chuan "Aw..vawiin chu kan ti ta lo mai" Vanmalsawma ber chuan a lo ti a, a pangngai ve hmel lutuk te chuan nuih a ti za thei hial mai. 

"Lo nghak rawh u a inthlak zo ţep tawh ang" ka piin a tih leh te chuan "A va rei ve..a inlip a mi?" Pektean a lo ti lauh a, ka hriat phak ngei tura sawi a ni. An lo leng ngun a, an aw aţang ringawt pawhin tu nge an nih ka hre ve tawh viau mai. 

Pindan aţanga ka chhuah chuan ka pi bula Vanmalsawma lo ţhu chu ka hmu hmasaber a, ka mitah chuan midang zawng zawng aiin a ţha a, a langsar bawk a, han hmuh vat loh ngaihna a awm lo reng reng a ni. Min lo en run a, a meng dur hle bawk a, ka nuih sang laiin a hmui a ti sawi zauh a, a tum leh nghal hmuk a, a pawi sawi te pawh ka ang alawm le. 

"Thingpui in duh vek ang tiraw?" ka tih te chuan tuman min chhang lo a, U Daizauin min chhawk a tum viau naa ka lo ti ang ka ti deuh tlat a, ka class kal hlanin nitin ka nu nen an buai nileng zak zak zel a, in a ka awm chhunah chuan ka chhawk ve hram hram ţhin. 

Phone khawih malh malh paha ka thingpui chhuan ka vil lai chuan Vanmalsawma hnen aţangin message ka dawng a, ka melh zauh a, min en ve duh ţhak lo lehnghal a. 

{I meng no lui} tih zawng te hi min la thawn zui a, ka nuih a za angreng. 

Ka nu a awm lova, Pektea te pawh ţum danga an lo len ai ngawt chuan an ţawng duh a, Vanmalsawma pawh a insum thei tawh ngang lo aniang chu ka bulah a lokal hnai a, "Petrol i ui lo mi?" ka lo tih chuan za lo deuhin a kiai suk a.

"Kha a so" a ti thum dut a, gas lama ka inher chuan ka hnungah a lo ding a, kan inlen hleih angreng sia, hnunglam aţanga min han khuap run chu eng tin min ti lo mah se ka mur chem chem thei hialin ka hria. 

"I duh ve tiraw?" ti a zawh pah hian amah chu ka thlek deuh ha a, min lo la en reng a, a mitmeng te chu mawi ka ti thar leh riau tawh lehnghal a, hepa hi chu ka ta tur hrim hrim a Pathian ruat a nih ka ring, ka hmu chhe thei hlawl lo a ni ber. 

"Duh ve lo" a ti leh tawp a, no ban ka tum chu "Engzat nge ngai?" a lo ti leh a. 

"Chhiar rawh" ka ti a, inchhunga awm te chhiar tuma a inher rual chuan ka ţhu hniam a, gas hnuai chu hawngin chini bur ka la chhuak nghal zat a, inchhung an tih dan hi a rem chiah lova, cabinet mumal a awm lo bawk nen a rem dan danin bungrua kan dah a, ka pa'n kan siam dawn nia a ti tak na a hun a la nei lo aniang tun thlengin a la ngaihven hman lo. 

"Bawnghnute dai ka telh chuan thingpui a ti dai vek dawn a, ka chhuan lum chhungin lo chawk rawh aw" ka tih chuan a ner sawk na a "Aw le boss" a ti veleh mai tho a, a ţhiante lah chuan an rawn ngaihven tawh der lo. 

"Naktukah tu rualin nge i kal dawn?" a tih chuan ka melh zawk a, a thingpui chawh lai bawk ka en leh chuan a kutţanga silver zungbun a bun chu ka hmu a. A zawhna pawh chhang ta lo chuan "Zungbun i va nei mawi ve" ka ti a, thikna bawk a lo let leh a, hmeichhe pek a nih ka rin nghal hmiah vang a ni. 

Ani lah chuan "I duh em?" a lo ti sam et a, ka hrilhhai let zawk lek lek alawm le. 

"Miin an pek che a ni lo mi?" ka ti deuh ha a, ka mak ti hmel a hmu aniang min en run run hnuah a nuichhuak ta hawk a. 

"Ni mai mai lo, i duh chuan ka pe phal che" zangkhai deuh taka a tih hnuah a fiante hmanlai chu ka hmai zawnah a rawn lek chhuak a, "Ka zo" a tih zawm nghal zat a. 

"Lawkin aw..bawnghnute hi so se, ka telh rualin i lo chawk zel dawn nia" ka tih chuan "Hmp..min phut" a ti bung nghut a, ka nuih liam san mai a, no a bawnghnute ka chhun luh veleh a lo chawk nghal zel a, a chawk uluk bawk si, a tui ngawt ang. 

Fiante min pek rualin kan inkarah Tintin-a a rawn inzep a, kan pahnih chuan kan darah a kuah ve ve a, "Eng nge in lo tih a?" min ringhlel ni awm taka tih pah hian min en tawn zak zak a, sawi tur a vang duh khawp mai. 

"In thingpui siam hian ka pi mit a ti ui hlit angem?" te a ti vel a, Vanmawlsawma lo nui chu "Vanmalsawm i pi kawm ang u i ti sia ka pi bulah i va awm ţha leh duh si lo ve" a ti a, Tintin-a chhuak lo haw lehnghal kha mak ka ti reng a ni.

"Ka pi kawm turin maw i lokal?" ka ti a, a meng nur angreng hle a, ka u chu a nin hmel takzet bawk. 

"In inkhawm bang a hmuh rual khan i pi ka hmu chak tlat, in inah let ang u a ti alawm. Vun chuar lo zawk i hnaih leh hrut hrut sia, a ţha vek e, inkawm mai mai teh u a hunlai alawm" a tih hluk hluk hnuah Vanmalsawma lam chu hawi lehin "I lerh chuan kan inchal tauh ang. Chal ka nei chang ţha a nia, naupan laiin school ah chalk ka tauh keh ngun a, ka chal hi a chawmawlh tawh, na a hre tawh lo" a ti leh duah a, Vanmalsawman a lo kuk fawk a, "A na" a ti leh tho sia. 

Thingpui ka sem lai chuan Pektea ten min lo fiam reng a, Ropuia a ţhu fel than bawk a, ka sem zawh hnu chuan a mawiah tiin Ropuia bulah ka ţhu a, kan ep chiah, ka pi bulah Vanmalsawma leh ka u an ţhu thung. 

"Lo leng ziah rawh aw..kan inhnaih tehreng nen i lo leng khat lutuk a" ka tih chuan "Nia..hman leh hman lo a zir a ni mai. Scooty pawh chu ngaihven la, ka zirtir dawn che nia" a ti a, tv an off avangin a ţawng chu an hre pha vek a, Vanmalsawma min endan chuan awm a ti nuam lo ve ringawt a, pawm lai nei rinawm lo deuh ka ang berin ka hria. 

"Sensiari ai chuan ka pi hian a thiam hma zawk ang. Zirtir buai duh suh i thin a rim mai mai" ka u in a lo tih chuan Vanmalsawma a khi suk a, an inkawm dan hi ka hrethiam tawh lo, inngeih loh hmel deuha lang siin an inngeih ru phian ka ti mai, chutiang bak chuan ka sawifiah thiam lo. 

"Aa..tum chuan theih loh a awm hleinem..a thiam ve mai ang" Ropuian a tih chuan keimah zawk ka lo nui ve thung a, an upa ve tawh a, naupangchhia deuha khawsa rual pawh an ni tawh lo. 

Vanmalsawma haw tur chuan "I awt a nih kha" tih leh ka malchunga zungbun rawn theh thlak a rual a, an kal nghal mai bawk sia, lo hnial ve na hun pawh a awm lo. 

Ropuia erawh chawhnu inkhawm a tum loh avangin a la awm ve rih a, mi awmţha duh lo ho kha chuan khawilai hmun kilkhawrah emaw zu an in leh mai ang. 

Ka kut zungţang zawng zawngah ka thawlh lut a, rin ang ngeiin ka thawl vek a, "Mipa hi chu kan kut a lian phian a nia" Ropuia pawhin a lo ti ve khauh a, ka hnunglamah a kut a kham phei a, ka pi chuan min kuah emaw a ti a ni ngei ngei ang min en dan a dik lo. 

"A nalh reuh sia, ti hian ka kutzungpuiah tang vel mai mai rawh se" ka ti a, a zungbun ngei ka bun ve ta te chuan awm a ti nuam veng veng mai. 

"Vanmalsawma te nen khan in inhriatna a rei tawh em? An lokal tur hi ka hmu ve ţhin a" a tih chuan "Kan lo awm tirh khan kan inhre nghal. Kohhranah a inhmang vak lo em ni?" tiin ka zawt let a, a bawp khawkherhin a ke a phût zeuh zeuh a, a ţhut nawm hmel bik khawp mai, kei lah ka ţang ţung sia. 

"Hmang lo..amah hi chu kan hria a, a inkhawm awm kan hre ngai lo. Han sawm ve mah ila 'Ka hman lo, sa ka sat dawn' a ti mai zel a, puitling a ni tawh a, an chhunghnai kan nih bawk si loh chuan nawr luih vak a nuam lo a" a ti a, pathianniah sa a sat ngai der si lo. 

"A mak e..han inkhawm duh loh tawp mai chu. Fel lo mah ila kohhran hi belh hram hram tur a nia" U Daizauin a lo ti ve ngei a, kan khuaa kan awm lai zawng khan a inkhawm awm ka hre bik hauh lo.

"Nia..an lo awm tirh ah khan sawm luih ve kan tum ţhin a, ui a nei lian bawk si, an bathlar aţangin min lo chhawn a, a nin tawpah a ui thlunna a phelh a, kan kal kiang leh nge nge zel a, han tlanchhiat vak chi a ni ngai mang si lo, amah lah hian fimkhur deuha kan kal kiang hi min thlir tawp a, ngeiawm ve thei deuh a ni. Mahse ţhalai hruai tu kan nih chuan khang kha kan tawn tur a nia, nihna duh a inhmang kan ni lo a, inkhawm duh lo te, biakin ngaina miah lo te leh chhan eng emaw neuh neuh avanga inkhawm hreh te hruai khawm tur kan nia. Ţhalai ka hmuh hi chu lo tel ve turin ka sawm deuh zel a, sawm chhuah zawh loh pawn ka hek chuang hleinem ka tia" a ti a, a fel phian bawk sia, mi fel deuh deuh hian hmeichhia hi min hip zawk zel sela ţha tur a nia, misual leh awmţha duh lo tak tak hian zûn an ngah zawk daih zel a, setana hnathawh a ang te ka ti ţhin. 

Ropuia a haw chiah chu ka piin "Tu nge a?" a ti nghal chat a, an in awmna te ka sawi chuan "Eng hna nge a thawh?" a ti leh a, ţha deuhin ka lo hrilh leh mai a, uluk deuhin min en a, "Tv on tawh rawh" a ti dawn emaw ka tih laiin "Pasal tlak a nih kha...helaia ţhu sam kir bep bup ai kha chuan" a ti ban charh a, thin pawh a rim thei lo, U Daizaui nen kan in en a, kan nui vak vak ringawt a, ka pi a thutak viau thung. 

"Sa sat in ti a ni lawm ni? Inrinni bazar ah chiah an inhralh thei a, sa sat mai mai ai chuan pawisa pawh a ngah zawk ang chu. Hmeichhia hi fin tur a nia, kan ţhat lai tak hian mi ţha leh min chawm zo ngei zawn tur" a ti lehzel a, Ropuian min duh leh duh loh pawh a hre tawp si lo.

"Bialnu te pawh a nei ve ang chu mawle..fel i tih vangin min hmeh bel ringawt a, a hriat lai phei chuan sawi miah suh" ka tih chuan "Helaia ţhu kha a lo leng zing a, kha ai khan a ţha ka ti mai alawm. Helaia ţhu kha i neih chuan pawisa aiin savun in ngah zawk ang a, in hma hun a thim lutuk" a ti a, Vanmalsawma ngaihtuah danin a ngaihtuah ve tlat lo a, kan hma hun a thim viau tura a ngai pawh hi a awm lutuk tlat a ni. 

Mut hmuna phone kan khawih mawlh mawlh lai chuan U Daizauin Ni Mami status min hmuh tir a, Boomer-a piancham a wish a lo ni. Sana ka en a, dar 12 leh min 15 a ni tawh a, "I reh vang vang mai sia, i tello a i piancham hman a ngai ta mai hi" tih vel te a ziak kur duah a, Ni Mami hi chuan a duat ve em a, a ngai thei ngawt ang. 

Vanmalsawma status ka hmu leh chiah chu tum lawk hauh lovin U Daizaui hmai ka hup thawk a, ka lum chhuak pup ni maiin ka hria. 

{Vawiin ka pianchampha...phâk phâk} tih zawng hi a hmang a, uang viau mah se keichuan ka lo nuihpui ve thei lo. Ngawi rengin U Daizaui chu ka entir ve a, kan rin lawk leh hriat sa mah nise mak a ti ve aniang ngawi reng hian a en ve tlawk tlawk a, a hmuh tur ngeiin Boomer zawk thlalak chu ka status ve mai dawn em mawni ka ti rum rum a, "Ti kher suh" U Daizauin a tih avang chauh a tarlang lo ka ni. 

"Kan hriat sa tho a nia, a ţul kher lo. Boomer chu a thi tawh a, Vanmalsawman nuam lo a tih phah ang" a ti ve tlat a, a hmuh laia han hman sak ka chak a sin mawle. 

Ka wish ve ngei a, sticker hmangin min chhang let a, a beidawng ta deuh nge ni dawn min la bem leh rih lo a, kan khuaa ka haw huna hruai ve ngei ka tum ruh hle thung. 

Ka u a thawh duh miau loh avangin class kal turin hmanhmawh deuhin ka chhuak a, kan in bul lawkah Vanmalsawma ka hmu thung a, anni pahnih hi an intiam rual a nih ka ring, vawikhat bak hetianga chiang hian ka la hmu fuh ngai lo. 

"Ka lo thlah ang che" a lo ti var a, kan in zawnah a lo tawlh hnai nghal zat bawk a, "Vawiin i piancham a ni sia, engtia lawm nge i tum a?" nui sang hian ka lo ti ve a, "Ka hre lo" tih bakin min chhang lo. 

Ka pan hnai a, inbual zo hlim ni awm tak hian a sam chu a lang hnawng deuh a, hetiang a nih chuan a lo chhohna a la rei lo tawp ang. 

"Kan bus dinna thleng bak a ngai lo ang" ka ti na a "A khalh tu ka nia, ka thu thu" min lo tihsak a, a kut min pek chu lo vuan vatin nui rah rah chung hian a hnungah ka lawn kai a, a sawi ngai lovin a kawngah ka kuah nghal thlap bawk a. 

"Kan khuaah chuan lokal ve rawh aw" ka ti nawn leh a, krismas niah Boomer kha a thi a, Vanmalsawma an hmuh chuan an khawhar lutuk tur te a zia deuh ang a tih tein ka ngaihtuah a, mahse helamah chhungte a nei ve tho bawk si, Ni Mami ten hmu ve se ka ti takzet a ni. 

Min chhang dawn tawh lo emaw ka tih hnuah "Eng nge ka lo tih ang a?" a ti a, min rinhlelhna a nei lem lo ni a ngaiin "I lokal ve mai mai ang. Kan in tak tak te pawh min hmuh pui ve ang a" ka tih chuan "Chutiang a ka tih dawn chuan i bialpa ka nih phawt a ngai ang chu" a ti a, chhan dan tur ka hre mai lo chu ka nui hak hak a. 

"In khuaah hmelhriat ka nei lo" amah bawk chuan a ti leh a, "Kan awm alawm" ka lo ti vat a. 

"Khawiah nge ka thlen ang?" a tih te chuan phur tawh tak ka ni. U Daizauin hotel chanchin min hrilh kha hrereng mah ila "Ni Mami hotel ah i thleng dawn nia, kan hmelhriat a nia, Tintin-a phei chu a duat lutuk. Duh chen chen i thleng thei ang" ka ti a, "Ka lo in ngaihtuah ang" a ti ve ta nge nge a, ni hnih vel lek chauh pawh cham se ka tan chuan a lawmawm dawn lutuk tho a ni. 

Ka ţhiante chuan min hmuh rualin min lo ko vat a, Vanmalsawma ka vai liam leh te te hnuah ka zawm ve chauh thung a.

"Nizanah Ngaihtei u nen kan inbia a, min sawi ţhaih nasa sia ka mu thei reng reng hleinem" Vanin a ti zuai raih a, class a kan awm tawh avangin a ţawng zawi khawp mai. 

"Eng nge a sawi a?" ka lo tih chuan "Ka mumangah Ngaihtei ka hmu nasa lutuk a tia, thawm te pawh an hre ţhin a ni awm e, a ngial a ngan chuan an hmu chuang lo a, a thi a nih kan ring thlap tawh a rawn tia" a ti a, dawih viau mah ila thla tih vel hi ka ring ve vak lo a, ka ţhiannu thusawi ngei pawh ni se ka ring leh chuang lo.

"Kan ţhenawm ten zan reiah min lo bia a, kan kawt an chiah an nia a rawn tia, an hming a sawi lo na a Pu Sanga te an nih ka ring a" a ti leh zel a, Ngaihtei te in ep chiahah chuan Pu Sanga te in bak a awm lo reng a ni. 

"'Ngaihtei kan vui hnu, a bungrua vel kan chinfel zanah a nia a tia, min lo bia a, in kawta satha ip in dah hi a ri reng a, sazu thawm ti dawn ila a ring angreng sia, kan en veleh thawm a reh nghal zel bawk sia an tia, keini lah kan inching chau aniang kan mut hma zan tak a nia, kawta satha ipah chuan Ngaihtei lehkhabu leh pheikhawk hlui vel kan dah a, ka awih chiah loh avangin ka ngaihven duh lo a, mahse gate pawn a kan dah chhuah thlap si kha ka nu zing thoin kawngkapui bulah a hmu a, ka nau a che ve deuh a nih kan ring a a tia'" a ti a, ka nui hak a, ka ţhiante chuan min melh ram ram a, an thlaphan hmel viau na a ka tawn ve hma chu ka awih ka ring lo. Thawm eng emaw ka hriat chuan ka hlau lutuk a, mahse miin an sawi hi chuan hmu chiang an intih poh leh ka hlau lo. Chutiang vel chu ka ni. 

"Thih dan pangai lo deuh hlek a thi an awm hi chuan an sawi hrang zel a, mi huaisen deuhin an finfiah chuan thlarau thil tih a ni ngai lo. Ngaihţha deuhin awm rawh u. Ngaihtei thihna pawh an la chhui chhuak mai ang" ka ti a, an thla a muan hmel ve huai chuan ka hria. 

"In tan chuan a ho dawn tho a, mahse Vanmalsawma kan khuaa lo zin turin ka sawm a, ni a kal chak a, kan exam zawh hnu deuh lawkah kan haw thei nghal mai ang a" ka tih chuan rin aiin an lo phur phian a. 

Tlaiah keimahin ka haw a, U Daizaui dawr a a awm daih avangin ka inbual sawk sawk hnu a ka nu rawngbawl puih ka tum chuan "I nu Marini lo lengin phone a theihnghilh daih alawm, a nikhua lo tak tak a ni. An pa phone in min lo bia a, ka lokal hman tawh si lo a a hman hmanin min lo pe lawk mai rawh u a tia, Daizauin kuhva a buaipui daih bawk si nangmah zu kal mai rawh" min ti a, Vanmalsawma te in pelh daihah an awm a, a hlat deuh avang chuan ka phun hlak hlak a, a ngaipawimawh lo nasa mai.

"Ni a rei tawh si lo a, phun phun loin khaw thim hmain zu kal rawh" min ti a, a ţhiante hi a dah pawimawh ve thlawt a ni. 

Nu Marini phone hum ran chung chuan stepah ka chhuk a, hmanhmawh deuh chuan kawngpuia kual kher lovin step ah hian kan kal mai zel. Vanmalsawma te in zawn ka thlen chuan ka hawi phei kher a, light a êng na a an reh ţhiap a, ui takngial pawhin min bauh lo. A pa nen chauh an awm bawk sia, an khua a har ve ţhin ngawt ang. 

An inthlang daih a kawngkawi laiah khan Nu Marini te chu an awm a, phone ka dah a, khua in min thim hnan hlauin ka kal leh vat a. 

Ka let leh lamah pawh Vanmalsawma te in chu ka en bik a, inkawt ah a pa, Pu Hriata kha a lo awm tawh a, vawikhat ka hmu tawh tho a tiin ka nuih a, khua a la thim chiah loh avangin ka nui hmel chu chiang takin a hmu thei ang. Min nuih let ve ka rin laiin tum hmukin min lo en vung vung a, keipawh chu ka nui hmel a ral riai riai a, hlauhnain min la man daih zui a, khap lek lova min en chu ka hlau a ni ber.

An ui lianpui kha a kai a, a hmel a rum mai bakah a ţha vak lo a, ka kalpelh hnua ka hawi let pawh chuan muangchanga inherin min lo en leh vung vung a, ka ţim sung sung a ni ber tawh. 

Vawilehkhatah ka tlan thut a, ka rilru a a thawh dan ang angin ka che a ni ber, hlauh tawh sa nak laiin an ui lianpui chuan min la um zui a..

CONT...