VANMALSAWMA-12

VANMALSAWMA-12

Patling mangang aw zetin "Snoop dog" a tih tuar tuar lai te chuan hlau baklengin ka tlanchhia a, mihring hian hlauh kan nei hian kan chakna a pung sawt ţhin aniang hetianga ka tlanchak awm ka hre ngai lo. 

Ui lian lehnghalin min van umpha har ti a ngam leh ngam lova ka hawilet chuan ui a lo awm tawh lova, a neitupa khan a ko let tawh a nih ringin ka khup dawmin ka ding a, ka hah lutuk chu ka thaw a hah mai dawn in ka hre hial a ni. Ka pum pup pup a, ka lu a hai muai muai bawk a, ka khup te lah chu a khur deuh reuh ka ti mai din ngheh pawh har tak a ni. Engtia rei nge ka awmdan ngaia ka awm tawh pawh ka hre lo, ngaihtuahna a tawi turh a, khua a thim tawh bawk a, ka dinna bul lawk thing bana light an tih beh aţanga êng lo chhuak bak chu êng dang pawh a awm tawh lo. Ka tlanchhiat tirh khan khua a thim lek lek tawh a, chawlh khawmuan leh phei chuan hlauh ang ngeiin khuain min thim hnan a nih hi. 

"A hlauhawm tawh loh" ka hnungzanv a rawn dawm rual chuan kun reng chungin ka en chho a, ka kiangah Vanmalsawma a lo ding reng mai. Ngaihtuah hmel deuh hian min en ve ngei a, chhang mai lovin ka hawi let leh a, an in kha ka hmu hma tawh lo. Ka tlan thui viau tawh emaw ka tih laiin min lo umpha rang nasa mai sia, inchhungah khan a awm a ni phawt ang. 

"In ui lianin min um" ka ti a, tun ang renga mangan hi ka la nei ngai lova, ţah te lam lam a chhuak alawm le. 

"Kan talh daih dawn mi?" a ti dam vei thlup a, a thusawi leh a awki chu a inmil hlawl lo. A ngaihna hre lo zet a ka awm lai te chu min en vung vung a, "A chi dawn mi?" ban charh a ka tih chuan nelawm zet hian min lo nuih a, ka hah te a dam tawh bawk a keipawh chu ka ding ngil ve ta nge nge a. 

"Let leh ila bike in ka thlah ang che" a ti a, ka che mai duh lo. An in lama let leh chu ka tim tlat a, a pa min endan lah kha mitthlaah a cham zui reng a, Vanmalsawma a awm ve tawh chung pawh hian ka hlauhna a reh hleithei der lo.

"I pa kha ka hlau a" ka tih chuan a lo kiai suk a, ka inthlahrung leh deuh chuan a mitah pawh en ngam lovin ka hawi kual sek a, a pa lah kha tunah pawh kan hma lawka ding ve ang reng a ni. Ramhuai tih vel aiin kan mihring puite an hlauhawm zawk tih ka hria a, pawna a lo la awm phei chuan ka tlanchhe leh mai lo ang tih pawh a sawi theih loh. 

"Ka veng ang che" thutak zet a a tih chuan en loh theih a ni tawh lo. Kan mit a intawng chiang hle a, min ngaichang ran a, hlauhna ka neih chu a hrethiam aniang min tur duh bik hauh lo. 

"Chutiang a tih kher pawh chu a ngai chuang lo, ui kha a nia ka hlauh" ban vai vak vak pah hian ka ti a, ka nui lui hak hak bawk a, ka ţap daih ang tih te ka hlau. 

"Talh i phal bawk si lo a" a lo ti khauh a, sa a sah thiam zia hre mah ila ran vulh lai han talh daih chu ka ti ve deuh a ni. 

"Ka pi te inah kan dah daih dawn nia, a um tawh lo ang che" amah bawk chuan a ti leh a, "I ui lo mi? In in zawn a ka lokal apiangin min bauh ziah a, ka hriat tirh che aţang tawhin in bulah char char a la awm a, i ngai dawn lo mi?" ka tih bawrh bawrh lai te chuan a lo nui suk suk a, hmuhnawm tih hmel deuh hiam min en bawk a, min chhang lova a thaw hawk ringawt te chu "Kha i ui a nih kha" ka lo ti a, a nuih a za viau mai.

"Ui lo e..a kawlh ka ti ve tho a" a ti awlsam mai a, ţul hauh loah ka thawmhnaw hak lai te chu ka beng fai a, ka pawt mar zui thuak thuak bawk a, "Kal ang..rei an lo ti ang che" a tih leh takah chuan an in lamah kan inzui thla a, kawtlaia an ui thlun ka hmuh chuan ka ding chawt a, ka hnaih zui ngam tawh lo. 

"Sawmte lo lut teh u" a pa lah chuan a lo ti leh tawh a, bathlarah min lo la nghak reng ni awm tak a ni, lut tura min hrilh hnuah amah zawk chu a lut tharh lehnghal a. 

"Ti hian lo awm la inhnuaiah inchungah ka han hruai chho ang" a tih lai te chuan a pa chu kawngkaah a lo dak leh tawh a, a va han dawhthei lo reuh tak. A meng rum nasa mak bawk si, mahni chauh a lo din pawh a nuam lo. 

Uiin min lo hnaih ruak chuan ka ţe ţhat a, tum lawk ni hauh lovin Vanmalsawma ka kuah chawt bawk a, min lo pawm bet thlawp mah se min um hrep tawh tu a nia, ka hlau a ni satliah lo; a ţihin ka ţih a ni ber. 

"Sawmte" a pain a lo tih leh phei chuan ka ţap deuh pur tawh a, a pa leh an ui chu ka rap dan a inchen vel ang. Thlahrang pawh hmu ila an ni ai hian ka rap bik kher lovang. 

"Engmah hlau suh" zawi sup hian a ti a, min kuahna pawh a la thlah dul chuang lo. 

"Min thlah hmasa mai rawh i pa chu nakinah i be mai dawn nia" ka ti deuh tlat tawh a, chumai chu la duhtawk lovin "Nitin in inhmu tho alawm" te ka tia, an ina luh loh dan phet ka zawng a ni ber. 

"U Sawmte, ka puin lo lut vat rawh u a ti, saw theitui pawh ka siam kep cheu a" an awmpui, Hruaipuiin a rawn ti a, ka hawichhuak lo na a a aw ri lo chhuahna chu kan hnaih takah a ni. 

"Aw..kan lo lut. E, Hruaipui snoop dog hi inchungah hruai chho daih teh" a ti zung zung a, inla no min tih palh ka hlau khawp mai. Diktak chuan min um lo se chu heti lutuk hian ka hlau bik lo ang. A pa min endan pawh kha a dik lo hrim hrim a, ka hlau lutuk chu ka ke artui thlengin a za ti hial mah ila sawi uar ka inti chuang lovang. 

"An kal tawh..a hlauhawm tawh lo" a ti a, a aw ah chuan nuihzatna a tel deuh tlat niin ka hre bawk a, kuah reng chung chuan a hmel en tumin hnung lamah ka eu deuh a, nuihza insum zet hian min lo en chiah reng bawk a. 

"Lut ang" a tih rual chuan ka phone a ri lehnghal a, min thlah a, ka phone ah lai chu phawrhin ka chhang thuai a. 

"I va rei ve..Marini phone pe rawh ka tia leng nghal rawh ka ti hleinem che. Khawlai boruak hi a nuam in ti nge a tui inti zawk? A thlum dep dep em ni a?" engmah pawh ka sawi ve hmain ka nu a rawn ang nghal buan buan a, ka la tih danglam loh avangin a ring ţha a, Vanmalsawma pawh chuan a hre phak aniang a lo nui hawk mai. 

"Ka lo haw ţep tawh, ka lo haw hunah ka hrilh vek ang che" tih leh phone dah ka rual a, "Lut kher lo mai ang. Thei tui chu nakinah nangman i in mai dawn nia, ka nu'n min hau palh ang" phone ah ţhat leh paha ka tih chuan "Chahbi ka va la ang" a ti awlsam leh mai a, mahse a pa bawk kha lo chhuak lehin "In va rei ve" a ti ve thung a, ngah nge maw luh kher pawh chu a phut viau le? Puitling ho hi a chang chuan an ninawm ţhin tak tak a ni, an intithu tlat zel.

"Va in pawp pawp mai ang" ka ti leh ang lawi a, inchhung a luh ka hreh zia hriain min kai a, kan kut insuih rial chu a jacket ipte a thun daih a, amah chu melh ralhin ka nui a, min en ve tawh lem lo thung. 

"In va rei ve" a pa, Pu Hriata ngei mai chuan a lo ti leh a, "Ui i tlanchhuah tir a, mi pawi kan sawi lo chauh a nih kha" a ti bul bul a, a pa min lo nghahna, ţhutkhawmna pindanah chuan min phei pui a, a ruka ka kut a vawn chu a ti nghet salh a, min thlamuan a tum ve naah ka ngai. 

"Nang hi ka hmu tawh che em? Hmanni daih tawh a ka fapa misual emaw ti tu kha i ni em?" sofa a kan ţhut rual chuan a lo ti a, chhan pawh ka chhang thei lo, ka bu nghat ringawt a. 

"Tarmit tello hi chuan mi ka hmu fiah thei vak lo a, i kal muang lui deuh bawk nen, enchian che ka tum laiin i tlan phut a, snoop dog lah a che ve phut a, ka vuan nghet hman tawh si lo a" a ti a, a va han ro reuh e aw..kei lahin ngaihdan ni lo lo ka lo nei leh hman tawh chu a nia. 

Tarmit a vuah tawh bawk a min hmufiah thei tawh dawn sia tiin Vanmalsawma ipte aţang chuan ka kut ka la chhuak a, a vawt deuh huai a, nakinah ka la zen leh ang. 

"Khami hnu khan helamah i lokal leh ta miah lo em ni?" a tih chuan "Kal e..ka lokal ziah a, ka lo lut lo mai mai alawm" ka ti a, min koh luh tlat chhan a ho ve bawk sia e. 

"Lo luh tur alawm. Kan chhung kan tlem a, kan hnathawk ten min hawsan phei chuan a reh tlawk tlawk zel a. Min hlau niin ka hria a, insawifiah ka duh vangin ka ko lut che a nih hi. Thei tui kha in rawh i tlan hah awm si" min ti a, "Snoop dog lah khan a um hman zuau che a, a zia lo khawp mai. A pawi thui hmain ka ko let hman hlauh a" a tih zawm leh a, min seh vaih sela chu min chiu tlauh tlauh dawn tihna a nia, damdawi man a to an ti lehnghal a, ţul tawpah lo chuan pawisa ka hmang mai mai phal ngai si lova, rilru a na ve duh ngawt ang. 

Pu Hriata chu phone biain a kalsawn hlauh a, chu chu remchangah la in ka tho nalh a, no ka chawi tel bawk a, an inah hian ka lut leh ta miah lova, ka kal pel ringawt ngam chauh a, luh ve chhunah tiin banga thlalak intar chu ka enkual a, Vanmalsawma thlalak lo chu hmuh tur a awm lova, a nu leh pa tel ve na takngial pawh an dah chhuak lo. 

"A ţullo a sin aw..an tar lui tlat sia" a ti dût dût a, ka bulah a awm reng a, a palen vang hrim hrim pawh hian thlamuanpui tham a ni. 

"I cute em hi" ka tih chuan "Naaa" a lo ti nang nang a, Boomer pawh kha a naupanlai thlalak ka lo hmu fo tawh a, amah chhaih nan hrim hrim ka u in a kawl ţeuh bawk a, an piancham pawh an naupanlai thlalak hmang kherin an in wish ţhin a nih kha. Anni pahnih kha chu ţhen hran theih loh ang mai an ni a, inkawm tawh suh u an tih pawhin an inkawm lui zel a, pakhat hmuh chuan pakhat kan hmu ve nghal a, tuman an inţhen hran kan rin loh laiin thihna chuan a ţhen hrang ta si a, naupan tet lai aţanga inzui chawt an nih avang te hian Tintin-a a khawngaihthlak lehzual a, hmeichhia angin a natna te sawi ve chiam lo mah se a na dawn tih ka hria a ni. 

Phir tih takah an naupan lai pawhin Boomer nen an inang khawp mai. Tunge upa zawk a tunge naupang zawk hre lo mah ila phir an ni tih hi ka ringhlel tawh lova, ka pawm hmak a, ka chiang bawk. Han inhmu hman tal se la a ţha tur a nia.

"I nute hian nangmah lo fa an nei miah lo em ni?" ka tih chuan a nu hrisel loh avanga amah bak fa an neih theih loh thu min hrilh a, amah ang tak ka hmuh tir tawh chung pawha ngaihţhat lohna a la nei hauh lo hi mak ve tak a ni. 

"Vawiin i piancham a ni sia, i ţhiante an va reh ve" ka tih chuan za lo deuh hian a nui hul hak a, "Ka lawm ngai lo" a ti zawi sup a, sawi nuam a tih chiah loh hmel kher mai. 

"Engati nge?" ka lo ti ha a, thlalak pakhat chu kawkin "Hei hi a tawp berna..kum10 ka tlin kum bak ka lawm leh tawh lo" a ti a, mak ka ti khawp mai, a ţhiante lah an piancham lawm chu sawi loh, an ur lawk hial a, nuam ti ber berah a ţang tho si. 

"Tinge i lawm tawh ngai loh a?" ka ti nawn leh a, "Nuam ka ti ve lo" a ti a, a sawi thui duh chuang lo. 

"I ţhiante piancham pawh in lawm phur theih em hi..piancham chu a hlu ve a, lawm tur che alawm" ka tih chuan "Nuam ka ti ve lo" zawi si, chang zet si hian a ti nawn leh a, a thinrim mai hlauin ngawih ka chuh ta rih a. 

"I nu ka la hmu miah lo" inthlahrung ru taka ka tih leh chuan "Shillong ah a awm. A lo haw ţep tawh ang" a ti a, thlalak intar ngawt chu a melh bawk a. 

"I bulah an awm tam em?" ka ti a, "Hna an nei a, nau awm tu an ruai ţhin. Kan awm ho khat" a ti nghut nghut a, ţawng bung viau mah se a aw ah chuan khawharna a tel tlatin ka hre pek a, kan rilru put hmang diktak leh kan natna te thup nan hian ţawngkam vin hman mai a awl lutuk tlat a ni. 

"I nu aiin nau awmtu bulah i awm tak zawk a ni maw?" ka tih chuan min lo enin lu min buk khum nghut a, "Chutiang deuh chu" a ti sup bawk a, Boomer kha chuan naupanlai hun duhawm tak a hmang a, lung natna a nei chung chung khan naupang dang nen an infiam a, a kiangah a nu a awm reng bawk. Panlai nun an hman dan a danglam viau a nih hmel khawp mai. 

"Shillong a i awm lai khan ţhian i kawm ngai em?" ka tih leh te chuan ka zawhna chu atthlak a tih hmel viau tawh a, mahse "Kawm ngai e..Pektea te" tiin min chhang tho a. 

"Pektea te shillong ah an awm ţhin maw?" ka ti vak a, mak ka ti bawk a ka awki a ring kher mai.

"Awm ţhin ang chu. Inhmun thleng hian Pektea pa min ngaihtuah sak alawm" a ti a, a awki a zangkhai deuh ta bawk a keipawh chu ka nui ve ta nge nge a. 

"Nih chu mawle..keipawh ka ţhiante ho nen hian school kan kal lai aţanga inkawm tawh kan nia" ka tih laiin a pa a lo let a, a thu hmu lo a haw ka hreh si, a lo let har ka ti reng a ni. 

"Kan nu'n min lo bia a, kan inbe rei zek alawm mawle" a ti a, thupha a chawi tawh na a Vanmalsawma chu awm lo se ka la hlauh tho ka ring. 

"Ka kal tawh mai ang hei thei tui pawh ka inzo tawh a" tih paha no ruak ka hmuh tir chuan Vanmalsawma a lo nui hawk a, ka kiuin ka nghawk vat a, min kal tir thuai se ka duh ber. 

"Lo leng ţhin rawh aw. Hei i hmuh ang hian kan khua a har a, Hruaipuii hi lo pui ţhin nghe nghe la a ţha ang. Duh leh langin lokal la, buai tak tak phei chuan nikhat lek rawn inhlawh te an awm ţhin a" a ti a, engang chiahin nge min ngaih ang le? An pafa hian ka chanchin an sawi dun ngai lo tih a hriat a, class ka kal ziah tih te pawh a hre lo a ni phawt ang. An inchhungah mihlim an awm lova, ka nu hming a sawi lang lo erawh mak ka ti tehchiam lo thung. 

Pawn kan chhuak chiah chu vanram kai ang vel ka ni. Ka zi mar al al a, am zetin boruak ka hip hap hap bawk a, "Thlamuanthlak awm ve" nuihza aw zet a lo ti tu chu ka melh hrak a, "I pa hmaah khan inring ran a awm reng a ngai a, lo leng ziah phei ila chu ka ruh ka sawi sel vat ang" ka tih chuan a lo nui hawk a, "Ka ti tak tak alawm. Ka ţhu ngil awt reng a, ka ke takngial pawh ka chet ngam bawk si lo. Uiin min um lehnghal a, ka sil ngawt ang" ka ti leh a, dak meuh a a nui chu hmuhnawm ti zet hian ka lo thlir ve thung a, "Min bem kha i la hria em?" tih mai te pawh ka chak rum rum alawm. 

Kan inkawt thleng min thlah a, ka chhuk ruala "Zanah i lo leng dawn em?" ka tih chuan "Lehkha zir rawh" min ti a, exam a hnaih tawh avangin leng turin ka sawm lui bik lo. 

Ka nu'n a lo ang hlak hlak a, min hmu chiah phei chu "Khawiah nge i kal kawi?" a ti bak hlar a, rin aiin a hlauhawm daih mai. 

"Uiin min um alawm" ti ve mah ila ka chhuanlam siam chu awih loh hmel deuh hian min en a, kei lah ka fai leh puak tawh awm bawk sia. 

"Laltinkhuma lah kan luikal sakeiin min um ka chau a tia a mu nghal hmak a, uiin min um i rawn ti veleh a, Aizawl boruak in zo lo a nih hi. Ka haw ang a, i u Mama hoin awm rawh u" a ti a, tui deh naah thir bel a nghat chawrh a, a khu zui muai muai mai. 

"Khawia sakei mahin a um lovang. A mut duh chhuanlam a nih chu. Sakeiin um se damin a lo haw tawh nang. Vanmalsawma te uiin min um a, mahse Pu Hriatan a ko let hma hlauh a, thupha chawi nan thei tui min intir a, chuvang chuan ka rei alawm" ka ti a, dawhkan bulah ngil deuhin ka ding a, ka nu ka en ran bawk a, a nuam lo ve reng. 

"Engati nge uiin a um ngawt che? Vanmalsawma nen pawh hian inkawm reng suh u, i u rual a nia i kawm rual a ni lo hrim hrim. I pi pawn 'ka bulah a lo ţhu a zu rim a nam lutuk' a tih kha" a tih chuan awih lo lutukin ka pi ka en a, pathianni kha a lo len tawp ber a nia, kan ding dun reng bawk a, zu rim a nam awm ka hre hauh lo. 

"Awihawm loh e...ka hnaihah pawh a awm alawm. Pi zu rim a nam loh kha" chhuahchhal awka zet a ka tih chuan "A nam ka ti hleinem...zu rim a nam ţhin ang ka tia nih kha" a lo ti charh charh a, ka nu lahin "Chutiangin i ti lo reng reng" a ti ve thung a, an inhnial chu a ni mai. 

"A engapawh chu nise nuamsa deuh a lehkha i zir theih nan ti hian Aizawlah ka awmpui che a, mipa i kawm theih nan a awm kan ni lo. I ute phei chuan hria se hostel ah an dah che ang a, kei leh i pi chu min hruai haw daih mai ang. Dawr siam i rawt lahin peih lo chung chungin ka siampui che a" a ti leh daih tawh a, a thu a zuk leh hma thei a nia. 

"A awihawm loh e...nangpawn 'dawr siam chu nulat lai aţanga ka tuina a nia' i tih kha" ka ti a, "Ka ti lo...i duh ang apiang kan tihsak che tih ka sawina zawk a ni. Ngaihzawng neih lam chu la ngaihtuah lo la a ţha ang. MA hi ţha deuhin zo la, hna i neih hunah ngaihven chauh rawh. Ngaihzawng neih nan khua a tlai dawn lo" a tih chuan "Ka ching anga sin" ka lo ti a, hmeichhia chuan fa neih kan tum ţheuh a, neih theih loh hrehawm tur zia ka ngaihtuah thiam bawk. 

"Aw i ching hman bik nang mawle" ka nu'n a tih lai chuan Tintin-a pindan aţangin nui hawk hawk thawm a lo chhuak a, a muhil nghal lo tawp a nih chu. 

"Hna ţha deuh nei la mipa pawn an hmu zahawm zawk ang che. Chutiang bawkin pasal pawh nei la hna i neih ţhat chuan i pasal chhungten an zah che ang a, hrehawm i tuar lo ang. Tunlaiah chuan chutiang chu a ni vek tawh, chhungkaw fel taka i mo a nih loh chuan mo hna nei leh nei lo an en dan hi a inthlau teh mai a nia. Chhungkaw felah pawh thawhchhuah i neih loh chuan i inthlahrung tho ang. Ka thusawi dik zia hi i la hre dawn chauh a, chuvang chuan thuawih rawh. In enhranna a awm lo pawh ti se mo chu mo an nia, tlem a enhranna lai an nei tho ţhin a, mo kan nihna kan inhre ran zel bawk. Inthlahrun a na duh teh a nia, thawhchhuah i neih loh ngat phei chuan hrehawm i ti dawn lutuk" a tih bawrh bawrh laiin ka pi chuan "Ruati inthlahrung turin kan siam ţhin che em ni? I nu hi chu a nuam sa teh a nia, kan mo hmasaber a ni bawk a" a lo ti hmanhmawh a, ka pi hi ka pa nu zawk a ni miau a ni. 

"Kha maw..i pi pawh a lo inngaihbel chat mai kha. Fanu anga min en tu pawh mo sawi chuan a beng a chhi ran mai alawm. Kan fanu neihchhun liau liau i nia, i hrehawm kan phal dawn lo tih hre reng la, hna te i neih ve hunah duh leh ngaihzawng i ngaihven chauh dawn a nia" a ti a, tunah MA ka zir ve chiah a, kum zat ka han chhut ţhin a, private school a ka thawk duh lo ve ting tang a nih phei chuan sawrkar office ah hna hmuh a har nasa dawn mai sia, ngaihzawng ka neih ve theih hun tur a la hla lutuk a ka chhut thleng pha lo zawk. 

"I ni pawh professor a nih hnuah pasal a nei a, a ching lo. Fa a neih duah tawh hi. I hriselna a ţha a, khalam kha chu lungngai duh suh" min ti a, ka ţhiante lahin be tu an nei reng a, Zuali takngial pawn bialpa a nei tawh. Lerh vang em em ni lo mah se keimahni ang rualah chuan bialpa neih chhin chakna a awm ve ţhin a, mi pangngai ka ni ve tih hriatna a ni mai. 

Chaw ei kham hnua lehkhazir ka tum lah chuan Vanmalsawman 'Ţha deuhin zir rawh aw' tiin message min lo thawn a, 'Dp ah hian i sa sat lai lo deuh te dah ve la' ka lo ti thung a, ka nu'n a phal loh hnu hian ka duh zual sauhin ka hria. 

Reilote hnuah dp chu thlakin pangpar sen a dah a, ka hming a save pawh khan pangpar sen a dah tel tak e. 'Ka duh che' ti reng lo mah se hetiang thil ho te te pawh hian min ti lawm tawk em em mai a ni. 

"Zir rawh..i tih ţhat loh chuan i uten keimah min puh leh vek dawn a nia" U Daizauin a lo ti leh a, lehkhabu ka inchhawp ve ran a, zir a har viau thung. 

"Ka zir dawn alawm. An puh lo ang che..ka chhan dawn che nia" ka ti a, phone chu ka khawih chhunzawm a. 

U Daizaui bawk chu ka bulah lokalin "Krismas dawnah in haw vek ang tiraw?" a ti a, "Haw ang chu" ka lo ti mai a. 

"Ih maw..keichu hetah in ka lo nghak ang" a ti a, phone dah meuhin a hmel ka en a, a thutak lutuk ringawt. 

"I lo haw ve ang chu le" ka tih chuan "Haw na tur mumal ka nei chuang lo a, in inah lah i ute ho, Tintin-a tih loh chuan tuman min ngaithei lo a, ka nu lah pasal neiin khaw dangah an pem daih a, a pasal a thikthu a chhe bawk si. Boomer te inah let leh dawn ila an in kha nuam lo tihna riau ka nei tlat tawh a, zanah pawh thinthiin ka mu ngam ngai si lo a, hetah keimahin ka lo awm ang" a ti a, keichuan kan chhungkaw mi ah ka ngai nghet hmiah tawh a, laizawn ka neih loh vang te pawh aniang ka laizawn tak tak angah ka ngai a, heti tak maia inthlahrung a an siam avang hian ka ute ho ka dem takzet a ni. 

"I haw loh chuan ka haw dawn bik lo. Hetah krismas kan hmang mai dawn nia, Vanmalsawma te an awm a, a nuam ting a ni mai alawm" ngaihsam hmel zet hian ka lo ti a, nasa deuh a krismas hmanpui kher tumna ka nei lo thung. Hmeichhia ka nia, chak lo te mah ni ila mahni inven duhna chu ka nei ve alawm. 

"An phal dawn lo sa. U Mala phei chu a thin a chhe sia, kut a thlak duh ang che" a tih chuan "Ka pa a awm chhung chu tuman kut min thlak lo ang. Rilru nuam deuhin awm rawh, indah hrang lo la, i haw an phal loh chuan ka haw bik lo ang" tiin ka ţawng thlamuan a, dawr nghah a ngai sia a ti aniang a hmai a chei leh te te hnuah min chhuahsan a. 

U Daizaui chhuah hnua Tintin-a lo lut chuan "A haw hreh mi?" a rawn ti a, ka lo bu nghat a, ka nu dawrah a awm tho a tiin thawm kan dim lo a, a lo hre pha ve a nih hmel. 

"Mama ten an lo bia mi a?" a tih chuan lu ka thing ve thung a, ka hriat loh thu ka sawi pah bawk. 

"Daizaui haw an phal loh chuan min hrilh ang che u. U Mala pawh nise keiman ka lo bia ang" thutak zet hian a ti ve ngei a, "Ni Mamin ngaihven tawh suh u a ti" a tih zawm zat bawk a. 

"Engmaw kan ngaihven loh tur chu?" ka tih chuan "Vanmalsawma te hi..mihring inang chu an tam alawm a thih hnuah lehzel chuan min tibuai suh u a tih kha..ve lutuk a" a ti hluk a, ka ţhu ţha rang nasa mai. 

"I sawipui ta mi? An lak hran nachhan pawh a sawi duh lo maw?" ka tih chuan "Sawi pui rawh i ti a ni lawm ni?" nur nang hian a ti a, min melh no fahran lo lehnghal.

"Hmuh chakna chhe te tal pawh an nei lo maw?" ka ti ha a, an mak ve thlawt a ni. Keichu ni ila ka pan nghal ruak ruak duh ang chu. 

"A hmu daih tawh ang" a ti a, darthlalang chu pan pheiin a sam a siam ţha thuak thuak a, "Engtin nge i hriat? Vanmalsawma hian a hre tawh angem? Ni Mami hi a hria ang tiraw?" ka ti mawlh mawlh a, hriat chak nak laiin "Ka sawi peih tawh lo, ka kâ a kham" a lo ti daih a, chhuah nghal a la tum zui. 

"Sawi ve mai la, i va sual e aw" ka ti a, a nui ruh ruh a, "Ka lei leh hrawk na te han dam se, lehkha zir ţha la, i exam zawh lamah kan la sawi dawn nia" a ti a, min chhuahsan tak tak mawle. Ka nu khan leng lo turin a chah thlap sia, bike chahbi pawh dawrah a keng phei daih a, ani lah kha a inchei thlup bawk sia. Hre chak deuhin min siam a, min hrilh chiang leh duh mang bawk si lo va, Ni Mami lah ka be ve ngam tawh der lo lehnghal. 

"Ka nu i lu i su duh em ni? A zan tawh sia, naktukah kan su mai dawn a mi? Nge tui ka lum lawk dawn?" ka nu'n a rawn ti lang lang a, a lo luh thut hlauin lehkhabu ka lo chuh ve sawk sawk mai. 

"Khua a vawh deuh tawh hi..tun ang hun a lu min suk sak chuan ka damlo mai ang a sin" ka piin a lo ti ve thung a. 

"Aww..Tintin-an 'a thak nasa sia i nu in lu min suk sak lawk rawh se a ti' a ti sia" a ti a, ka pi hi amahin lu kan suk tir tawh ngai meuh lo. Ka nu nen hian an inhnial fo na a ka nu hian a duat a, mo fel tak chu a ni phawt mai. 

"Ka ti awzawng lo..tuilum ip kha min han siam sak zawk teh" ka piin a tih laiin "Ehe..dawrah Tintin-a bike chahbi ka dah daih alawm. Min tihder lehpek a ni maw?" a ti a, rei pawh rial lovin ka nu bawk chuan "A tlan liam tur bak ka hmu hman lo. A chahbi la duhin min tihder leh tawh a nih kha. Thawm siam mang lovin bike a nawr chhuak leh tawh aniang. Hepa hi engtia tih chi nge mawni?" a ti a, lehkhazir turin min duh a, thawm an dim ngai chuang bawk si lo, rilruah a lut mawh thei khawp mai. 

Phone ka en leh a, Vanmalsawma status ka hmuh chuan ka hawng rang khawp mai. Mi tu tih hriat loh uiin a um lai a hmang kher a, reply ka tum zet na a lehkhazir ţha zawka hriain rilru pek luih ka tum a, ka tih chhiat chuan hostel a min dah duh tak tak ka hlau a ni. 

Ka ţhiante nen nitin a chanchin kan sawi a, ani lah chu a reh hmak a, 'lehkhazir ţha rawh' a rawn ti ziah a, chhang let mah ila min biak zawm ngai lo. 

A inlak reh tak hnu phei chuan thinlungah hian a cham ve veng veng a, ka bialpa a la ni lo a, nitin kan inhmu lo bawk a, phone ah ngat phei chuan kan inbe tlem khawp mai. Chuti chung chuan ka ngaihtuah lo thei lo a, kan khuaa a lokal ve hun tur te ka suangtuah a, lehkhazir ngai lo se, kaptu dang nei lova amah ngawt ngaihtuah veng veng ka chak khawp mai. 

Ka ţhiante lah chuan "Tunlai chu i hlim aniang, bialpa nei thar te pawh i ang, i glow tawp" min ti a, ka awih lo lutuk chu ka nui vak vak ringawt a, bialpa ka nei thar lo a, han hlim em emna tur tawn ka nei chiah lo bawk. 

Canteen aţanga kan chhuak tur chu Ramfangzauan min lo pawt hrangin "Min chhang tawh rawh" a ti deuh khawl a, min duh zia a sawi aţangin ni hnih chiah a la liam a, chhanna beiseiin darkar tin min zawt a tih theih ang chu, ka hne lek lek a ni. 

"Bialpa neih ka duh lo ka tih kha. Ka chhungte pawn an la phal lo hrim hrim a, chubakah zirlaiah hian insawrbing ka duh a, hna ka neih hma chu bialpa neih ka tum lo" ka ti a, a lo chek tlak a. 

"Min hrethiam rawh..bialpa neih tumna ka la nei lo tak tak. Min ti lui miah suh aw..u mipa panga ka nei a nia" ka tih chuan a meng phawk deuh a, "Nangmah tiam lohin panga maw la awm?" a kutţang min hmuh pah hian a ti a, rapthlak ti hmel te pawh a pu alawm. 

"Ni e..kan vaiin paruk kan nia" ka ti veleh a, "Khai le..i nu leh pate chu an va duham em em ve mawle. I ute lah chu tawn tlang an huphurhawm dawn ropui si" a ti fiamthu a, ka nu hi a insawisel ve reng tho a, mahse hmeichhia a awh ve avangin hrisello chung chungin min pai lui a ni. Ka nu hrehawm tawrhna te chu sawi chhuak chuang lo mah ila "Hmeichhia an awt ve a ni mai alawm" ka ti a, a lo bu nghat nghat a. 

"Sensiar ka duh che" a ti a, ka lo nuih liam mai a, "Ka ti tak tak a nia, i hmelţha si" min ti leh a, lawmawm viau mah se lawmthu ka hrilh hran lo. Amah hi hmelţha ka ti ve thlawt lo a, a sang ar ringawt a, Vanmalsawma angin a pian a nalh tel ve lo. Ţawng phawng phawng a hrat a, a mawl bawk si, ka duh chi a ni lo hul hual a ni tawp mai. Vanmalsawma nen lah hian ka lo tehkhin hman ziah lehnghal. 

"Engtikah nge hna i neih dawn? Hna a vang sia aw..ka va huphurh ve" a lu tuai pah hian a ti leh ţan tawh a, min nghah a tum ve ringawt te chu ka ngei deuh tlat nia mawle. 

"A la rei ngawt ang. Kum sawm chuang daih a la ngai ang. Ka kal phawt mai ang aw" tih leh kal ka kual a, ka ţhiante lah chu min hmuh rualin an lo nui hak hak a, thil thleng tur an ngaihruat thiam miau a ni. 

"Vanmalsawma hi ig ah ka hmu lo i ti vel a, a awm reng hi" tih pahin Thartein a phone min hmuh tir a, a username lah chu my name is tih tawp a nia, a hming tak pawh a dah chuang lo. A ac a private ve ţât a, followers lah chu a ngah reuh phian lehnghal. 

"Awii..engtin nge i zawn hmuh a?" ka tih chuan "Kei te chuan hmuh theih loh ka nei hleinem" intithei zet hian a lo ti a, ka phone ka phawrh a, ka en vang vang a, follow ka tum uaih a, duh lutuk leh umzui reng anga min ngaih ka hlauh avangin ka follow duh ta lo a, a thlalak hmu lo mah ila a amah ka hmu reng tho alawm. 

Ka ţhiante chuan haw an chak tawh zia an sawi reng a, ka nu pawh a phur tawh khawp mai. Class kal a ngaih tawh loh hnuah phei chuan kan insiam a ni nghal der a, Vanmalsawma nen pawh kan inbe ngawrh leh tawh viau a ni. 

'I haw hmain piancham phuahchawp kan lawm dawn nia aw' tiin Pekan message min lo thawn ve ţhin a, ka number a neih dan ka hre lova, min be ţhin tih tumah ka hrilh lo bawk. 

Ramfangzaua lah chuan kan khuaa lokal ve a chak zia a sawi fo a, class kan kal tawp dawn lamah khan scooty ah min phur a, a lian nasa mai sia, scooty kha a lang te zawk a, min chhaih deuh sap sap hlawm a, khami hnu phei kha chuan ka be hreh tlat tawh a, kan inbiak apianga a rilru put hmang a sawi chhuah ţhin vang a ni pakhat bawk ang. 

'Kan khuaa chuan i lokal ve dawn em?' tiin mut hmunah Vanmalsawma ka bia a, a dp ah chuan pangpar sen kha a la dah reng a, a hmang rei tawh ngar ngar khawp mai. Nisa hnuaia i awm changa i biang awm ţhin dan nen a inang a la ti zui a, ka zah deuh te hian ka biang hi midang aiin a sen hma deuh bik ţhinin ka hria. 

'Ka pa hi hrilh ila chu a phal dawn miah lo a' a rawn ti a, ka hnual ve rawih mai. Kan awmdan tur te ka mitthla lawk nasa ve tawh ropui sia, a lokal leh si loh chuan a ho vek a ni mai. 

'A van pawi tak' ka ti a, ka tum deuh bar chu U Daizauin min nuih tet tet tih ka hrereng a, lanchhuahtir loh hi a har ve ţhin alawm. 

'A ruka ka lokal theih leh lokal ka tum ang' a ti leh a, Peka ang lo takin 'Inthlahna neih i duh chuan' a ti ve thung a. 

'Ka hre lo le..Aizawlah kan awm rei tawh dawn lo a, ka lo inngaihtuah ang' ka ti a, aw ka pawh mai duh bik tlat lo. 

'Ka nghak thei..ka nghak ţhang tho che a' min ti a, min bemna a rei tawh nen tun thlengin ka la chhang lo a, min la be ve reng tho chu a nia, a dawhthei ngat ngat khawp mai. 

"I hlim ve e..Boomer nge Vanmalsawma i duh zawk?" U Daizauin a lo ti ve khauh a, ka ngawi vang vang a, Vanmalsawma ve ve an nih tho avangin "Vanmalsawma" ka ti a, kan nui dun zui hak hak a. 

Ka zangkhai ve ta deuh, Boomer a thih khan ka rit luk reng a, rit phur lo mah ila chhunglama min uai tu avang khan ka chau vek thei tho a, mahse Vanmalsawma a lo lang a, Krismas pawh a hma ang em kha chuan ka huphurh ta lo a, tu hriatpui si lo hian ka hlim veng veng mai a ni. 

Ka nu nen a kan bazar chuan kan in lei duhthaw khawp mai. U Mala fate ho thil tur ka nu'n a enkual lai chuan Ni Mami ka hmu a, "Ni Mami" tih pahin ka kutin ka hui a, ka koh chu hria angin a awm lo a, min hmu ve ang pawn a awm lo. A la cher em em zui a, min rawn hnaih phei chuan zan mu ţha lo ni awm taka a mit hnuai val kual raih te chu ka lo hmu a, "Ni Mami" ka ti leh a, min en zawk duh chauh a, ka lo nuih var var laiin hmelhriat loh ni awm takin min kalpel a, mipui tawt tat karah a inzep lut a, ka hmu thei lo thuai a, min duat ve ţhin nen eng nge maw a hriat le?

CONT..