VANMALSAWMA-13

VANMALSAWMA-13

"Nu, ni Mami kha i lo hmu ve em?" ka nu dara dawm chung meuhin ka zawt a, "I ko ri kha chu ka hria a, ngawi rawh hei Bawihtei te unau kawr tur ka en lawk" a ti a, Boomer te chhungkua engahmah an ngaih loh zia chu ka nu awmdanah hian a hriat mai awm e. ICU a a awm tawh hnuah pawh U Maman min inkhawm tir duh zawk kha a nia. 

"Ka hmu a, mahse min hre lo reng reng. Mipui zingah a bi bo daih a" ka tih chuan "A hmu lo der che a nih chu. Chutiang te chu au au duh mah ta che" a ti na chungin Ni Mami zawngin ka mit ka len ruai reng a, a vahpa duat ve ngawih ngawih boralna chuan a nghawng awm bik hle mai, a taksa chhe lutuk te kha a khawngaihthlak zawk alawm le. 

"A mak e..khaw mite hmuh chu a nuam ve a sin le. Thil ei puiah ka sawm ang ka ti a nia" pawisa an inpek lai pawh chuan ka la ti nang nang a, dawr chhunga mi kan lei na a mi an tam em avangin pawn aţangin kan indawr a ni ber. Inchhunga an khai leh pawna an khai chhuah a inang ţhum vek a, man to tak leisak tum a chhuak kan ni lo hrim hrim bawk. 

Ka thawmhnaw tur kan han en te chu dawr nghak tu chuan min lo fak chiam a, min fak dan lah chu keimah a sawina tih hre lovin ngaihthla tawp ila chuan tu a sawina ber nge ka hre hauh lo ang. A hna a tlin a, a che zung zung a, a fel khawp mai. Sumdawng chu hetiang tur hi a ni reng a ni. 

"Khilai a leather jacket inkhai khi i u in a duh ang a" a ti a, mipa thawmhnaw bik an zawrhna dawr chu a thlek vang vang a, bike khalh pui atan chuan a ţha viau tak tak ang. A man a to deuh na a ka nu chuan Tintin-a tan a lei ta tho a, a hak tawk tur awm ang phei chu kei aiin a hre daih zawk. 

"U Daizaui ta tur kan la lei ve lo a nia, thawmhnaw thar kan nei vek dawn sia, a neih loh bik chuan hrehawm a ti ang" ka lo ti zeuh a, min hnial ngam chiah lo aniang jacket kan leisak ve a, kan ipte ah ve ve chu a puar ţha tawh khawp mai. 

Kan awm hahdam hnua kan thil hawn kan phawrh chu rin ang ngeiin U Daizaui a lawm thiam ber a, Tintin-a chuan engah vak a ngai lo, "Ruat ţahbelhi nalh hriat zia hi chu..ka piai deuh sawk dawn mawni aw" a ti hlawi hlawi a, ka nu chu a lawm em em tho a, U Daizaui chu thil pek dawng ngai lo ang maiin a awm a, a jacket thar chu a enkual sek a, a ha chhin a, a hlip a, a ha chhin leh ţhin a, a khawngaihthlak zawk. 

"Daizaui jacket hi nalh ka ti zawk..khawi inthleng teh ang" Tintin-an a tih te chuan nghet deuhin a pawm bet a, kan lo nuih hak hak hlawm a. 

Kan pahnih chiah a pindan a kan awm hnuah midang hriat loh turin ni Mami ka hmuh dan chu ka hrilh sar sar a, hmeichhia hi chu kan va ţawngthei tak. 

"A va mak ve..kan inbe ve ziah sia, kan thlalak dunna ka status ngun ropui si, a hai che aniang" a ti a, ka landan a danglam loh nen, ka ko ring ropui sia, keichuan min hai lui a nih ka ring zawk mah. 

"A cher tawh te chu mak ka ti e, ani hi a khua a har lutuk a ni lo maw le..thau vak chi a ni lo na a i sawi ang em em chu a ni ngai si lo a" a ti a, awm hmun aţang ringawt chuan engmah a hriat theih mang si lo a, thawk ka la halh a, "La leng ila a ţha ang" ka ti a, damlo nasa deuh te pawh a ang alawm. 

"Haw hunah kan leng dawn nia, kal chilh rap ila a be tawh ngei ngei ang che" a ti ve ngei a, min kalpui tak tak ngam lo maithei a ni, U Daizaui hi chuan a ţawng a um pha lo ţhin a. 

Vanmalsawma pawhin min lo be leh tawh a, ka chhanna a la nghak reng bawk. Lehkhazir ka ngaih nasat zual lai kha chuan a reh ve hmak a, kan chawl ta tih a hre chiah chu min lo be ngun khawp mai. Vawi hnih vel chu a lo leng leh tawh a, ka nu a lo meng tum thei khawp mai. Vanmalsawma a duh loh vang ngawr ngawr ni lovin bialpa ka neih a hlauh vang zawkin a ni. 

Kan haw hma ngeia chhanna pek ka duh a, ka enthla ve ngat ngat a, langsar taka hmeichhia a phur ka hmu tawh ngai lo a, a dawr kal pawh hmeichhiain an zui tawh ngai lo. Inkhawm a la ngaihsak lo reng a, a la rui zeuh zeuh ţhin tih pawh ka hria. Mihring siamţhat chawp ngai nen a inlaichinna neih hlawk loh zia ka hria, a ţha sa neih a hahdamthlak zia te nen lam ka hria, mahse ka duh tlat sia, midang nei daih mah ila ka hlim chuang lo ang. 

Kan haw hma zan chuan ka chhungte mutthilh hun nghakin ka mu meng kar a, phone ka en leh zeuh ţhin bawk a, an muttui huna chhuah ruk ka tum a ni. Vanmalsawma ka hmuh chak bakah kan awm loh vang vang hma ngeia ka rilru put hmang diktak hrilh ka duh a, inthup leh inzep ţit ţet ka peih tawh lo. Ka lo chhuak ru ang ka tia, ţha a ti chiah lo na a kan pahnih chiaha kan awm lai lo chuan a hrilh chi si loh a, phone a sawi lah a chiang lo ka ti deuh tlat a, zak viau mah ila ka zahna aiin ka duhna a nasa zawk aniang hei chhuah ruk tumin ka inring ran mai. 

'Ka awm tawh' ti a message min lo thawn hnu phei chuan thawm ka ngaithla uluk lehzual a, U Daizaui takngial pawh ka hrilh lawk duh lo, a ţawng sual palh vaih chuan ka ute an sa dawn lutuk tlat a ni. 

Dar11 velah khum aţangin ka tho ţhem ţhem a, a vawt rapthlak mai lehnghal a, ka mut kawr pawh chu thlak lovin a chungah kawrlum phiar lian hnek hnuk tak mai ka ha tawp a, darthlalang ah pawh in en tawh lovin thawm dim thei ang berin pindan aţang chuan ka chhuak a. Zan a ni tho a, ka hmel a hmuchiang dawn chuang lo. 

Kan dawr kawt a êng kan chhit chuan gate bul vel chu a ên pha a, dawr ka thlen phei chuan gate pawn lama Vanmalsawma lo awm pawh chu ka hmu thei tawh a, dawhtheih loh hmel zetin a tei kual sek lehnghal. 

"Min nghak rei em?" ka tih chuan min lo en vut a, gate aţanga ka chhuak chu min lo hnaih nghal ruak a, min nghahhlelh tawh hmel nasa mai. 

"A vawt e awm rei lo ang aw" ka ti a, sawm chhuak tu zawk mah ni ila pawn phei chu a vawh dan a turu bik lutuk ringawt. 

"Naktukah maw i haw dawn?" tiin min zawt ve thung a, "Ni e..kan khua chu Krismas a nuam bik ţhin teh mai a nia" ka tih chuan a nui hawk a, "Bengchheng suh" ka lo ti vat a, ka nu a harh vang si a, thawm bengchheng a hriat chuan a lo tho ngei ngei ang. 

"I cham rei angem?" a ti a, ka ngaihbel nge a aw te chu a zuai ruih hian ka hria a, min ngai ve a nih chuan a lawmawm ngawt ang. 

"Kumthar ah chiah ka lo let tawh ang" ka ti a, kan ngawi dun rauh rauh a, ka rilru put hmang diktak ka hrilh ang a, ka lut daih ang, ka haw san nghal dawn tho a min chhaihna hun a nei dawn chuang lo ka ti rilru a, aw ka thian zui kharh bawk a. 

"Ka hrilh ve tawh ang che" ka ti deuh tawp a, ka thusawi chu a hrethiam chiah lo tih a hmelah a lang reng bawk. Ka nu leh ka ute ho an lo lang zut zut a, an hriatchhuah huna an thinrim dan tur pawh ka hre vek. Mahse, ka huaisenna zawng zawng sawmkhawmin "Ka bialpa nih i duh kha, i ni thei tawh ang" ka ti a, ka duh che tih dawt chu ka ngam lo a ni. 

"Ka lut mai aw" tih leh inher ka rual a, gate pawh ka thleng hman lo; ka darah hmerin a lamah bawk min kuai her leh a, bangbo deuha ka en ha lai chuan rawn kun hniamin a hmuiah a fawp ta mai a, chet nachang pawh ka hre lawk lo, ngaihtuahna a chawl duk a, hrehawm ka ti hauh lo tih erawh ka chiang khawp mai. A lei chuan ka hmui rawn nawr kauin ka kâ chhungah a rawn hawl lut a, chhan let dan ka thiam ve lo chuan ka dawh mawl tawp a ni ber. 

Ka thluak a fim deuh hnu chuan a awmah ka nam dawt a, ka thle sawn nghal bawk a, mahse ka biang tawn tawnah dawmin am zetin min fawp leh a, thinphu a rang duh zaih zaih khawp mai.  Ka ke te chuan min zo lo mai dawn ni ten ka hria a, nam tawh lovin a kawr awmah ka ţham ta zawk a, ka taksa ţang ţeuh pawh chu ka thlah dul ve riai riai bawk. 

"Miin min hmu anga sin" a inlak hran rual chuan ka ti hlak a, min fawhna avang a danglam miah lo anga awm ka tum a, ka thaw erawh a la rang viau thung. 

"Sensiar ka duh lutuk che a nia..lo haw leh vat rawh aw" zawi ruih hian a ti a, kan la inhnaih em avangin ka hmai zawnah a thaw lum ham ham a, "I lokal ve dawn kha" ka lo ti vat a, a nui hmel te chu a mawi zual ta riauin ka hria. 

"Ka lokal ang" a ti a, thaw ham ham chungin ka chal chu a hmuiin a rawn nul a, kan awmdan engkim chu a nuam vek mai.

"Krismas hmain" a kutphah a ka biang khuap pah hian a ti a, ka hmui a fawh leh mai a tum chu "Kan awmna a khawlai emai miin min hmu ang" ka lo ti a, a awmah ka nam pah bawk a. 

"Naa..ka fawh chakna che a rei tawh a sin le" a ti fiamthu a, a kutzungpui a ka hmui a nul chuan mit ka lo chhing ta ringawt a, min fawp zauh a, a inla hrang leh vat bawk.

"Kan rual chuan i lokal hman tawh dawn lo a ni maw?" ka ti a, ka kut a lo ban chuan ka lo pe vat a, bike ah chuang dawn lo mah ila a lo hum vang vang a, a kut a lum vang nge kan thil tihin a zir lo zawk pawh ka hre lo, vawt ka hre tawh lo reng reng. 

"Hman kher lo ang. Mahse Krismas chu kan hmang dun thei ang" a ti nghet churh a, ka lo ring nghal em em mai bawk a. 

"Naktukah min lo thlah dawn em?" ka ti a, a nui ri suk thawm ka hriat chuan ka thlek deuh ha a, beisei nei ran a ka en reng takah chuan "An lo hruai dawn cheu em?" a ti a, thlakhlelh hmel tak hian min lo en let ve a, tuna a awmdan leh a lo awm tawh ţhin dan zawng zawng te ka remkhawm vel a, min duh ve tak tak niin ka hria. A mitmeng ka chhiar thiam lova, min haw lo takzet tih erawh a hriat viau thung.

"Aw..kan khua chu darkar thum vel lek kal a nia, zingkarah ka pa leh U Mama an lokal ang a, chawhnu lamah kan haw chauh ka ring" ka tih chuan "Ka lo en liam ang che. Liam hlen daih lo la aw" nuihza aw zet hian a lo ti a, min kaihna lam zawk kut chu ka then nelh nelh a, ka hlim zia min hriatpui ni awm takin thla chuan mawi deuhin eng a chhuah a, tun a ka hlimna hian rei a daih loh ka hlau viau thung. 

"Min lo thlah pawh ni la ka pa leh ka u inhmuh tir suh aw..i hmel thup tlat rawh. Ka zahpui vang che ni lovin i lo len hmasakber zan chuan ka nu pawn a dap ruk ruk che kha" ka ti a, a lo bu ve nghat nghat a, an deuh a nei tih a hre tawh a, fimkhur nachang a hre ve em ang chu. 

"Lut tawh rawh" a tih rualin ka kut a thlah a, "Pawnah ka awm rei pui lo ang che, ka duh ber ka hre tawh a" a tih zawm leh a, a nui a, keipawh ka lo nui ve var var a. 

Ka nghawng hnung lamah dawmin ka chhip a fawp a, "Muttui aw" a ti leh sup a, gate chhungah ka lut a, thawm dim tak siin kan in lamah ka tlan phei a, bathlar aţanga ka hawi let leh pawhin gate bulah a lo la ding a, a kut a lo vai chuan rang takin ka vai let ve vat a.

U Daizaui tih harh hlau deuhin rizai chhungah ka inthawlh a, keimah chiahin meng tawh mah ila ka nui reng mai. Hmelţha ka tih leh ka duh ber ţhin, ka neih ve theih ka rin ngai loh kha ka bialpa a ni ta mai sia, ka hlimna hi rangkachak hlawm pawn ka thleng phal kher lo ang. Vanmalsawma ringawt ka ngaihtuah a, thinlung leh mitthlaah a cham zui veng veng a, ka ngai nghal ringawt bawk. 

"Sensiar tho rawh u..i pa te pawh an lo chhuak tawh a, thawmhnaw te kha enfel leh teh u" bang a beng ri zui pawp pawp a, mut luih tum mah ila a theih loh ang. 

"An lo la thleng har dawn tho alawm. Nu keichu zing thawh hma hi ka ning tlat" ka ti bai bai a, rizaiin inkhuh phui hlun mah ila thawm a zawih phah chuang lo. 

"I tho ve bawk ang chu nula an mu rei ngai hleinem. Ţhenawm ten zing thawh nachang a hre lo, a nu a pui ngai bawk si lo an tih chuan vengchhung mipa te hian neih enah an en lo ang che"  a ti leh tawh a, ka mutna bul ka dap a, U Daizaui pawh a lo la mu lui ve ngar ngar mai. 

Peih lo deuhin ka ţhu chhuak a, ka mut hma aiin ka mut a chhuak zawk daih lehnghal a, pindan aţanga ka chhuah rual rualin thingpui lum turin min ti nghal a, kan inchhungah ve chuan thawh phan pawh a sawi theih ngai loh. 

Ka nu hi mi taima ngang a nia, awmpui lak a duh lo bur a, U Daizaui pawh hian awmna tur dang nei se chu kan awmpui kher lo ang. Keipawh fa tlum ber leh hmeichhe awmchhun ka ni na a min chhawr ţawk ţawk tho a, buhthlei ka thiam loh te a hlau a, keiin harsa ka ti si, ka zir peih lo chung kha min zirtir lui a, ţap zawih zawih mah ila 'i thiam loh ai chuan' a ti a, min tih tir lui zel tho a, ţap chunga buhthlei chang ka ngah hle ţhin. Insuk, rawngbawl, chhuat nawh leh darthlalang nawh thlengin min tih tir vek a, ka rualpuite aiin min chhawr nasa zawk pawh ti ila ka sawi sual kher lo ang. Bungbel lah hi tle hlarh reng turin a duh a, U Mala fate an harh viau na a kan inchhung a hnawk ngai mang lo. 

"Dawr saw chu hawng tawh lo law law ila, bungraw tam zawk saw inchhungah thiar luh tur aw. Hunpui kan hmang dawn sia, kan awm loh phei chuan an lo rawk palh ang" a ti a, U Daizaui nen a kan hna leh tur bawk aniang chu.

"Rawngbawl thuai thuai ila, tukţhuan ei zawhah in ti dawn nia" a tih zawm zat a, a vei turh turh a, tih tur a sawi reng bawk a, a phili nasa tawh bawk nen hmai phihna hun takngial pawh ka la nei lo. 

Chawhmeh chhuan vil pahin phone ka khawih a, Vanmalsawma message a lo awm daih tawh a, ani chu a tho hma ţhin a, a rawn thawn hun pawh dar5 chiah chiah a ni. 

'Kawngpui aţangin i hnar ri ka hre pha' a rawn ti a, kan in ep chiahah hian kawn a thingpui dawr siam an awm a, kawn a kal kher lovin tuktin an inah a rawn dah ţhin. 

'Min thlah hman lo ange aw' ka tih chu a seen lo vang vang a, chaw kan ei dawn ţep tihah 'Hman ang' tih chauhin min rawn chhang a, "Phone ringawt ngaihtuah suh. Tih tur a la tam a nia" ka nu'n a lo tih leh tak avangin chhang let lovin phone ka ak a, ka che vel te chu a zangkhaiin nidang angin ka phun reng lo a, ka nu pawn min hau mang lo. 

"Tintin-a chu kaitho lo mai ang i pa ten ti sawn rawn hmu rawh se. An hau hrep anga a ni mai" ka nu'n a tih lai mekin bualin aţangin a lo chhuak a, a inbual diam tawh a nih hmel. 

"Ehe..engtik laiin nge i thawh a?" ka lo tih chuan "In hnar burh burh laiin ka tho ziah alawm" a ti awlsam mai a, ka pa te lokal vang bak a nih ka ring lo. 

"Tikhan tuk tin tho hma ziah la mi fel leh ţha i ni mai tur a nia" ka nu'n a lo tih chuan "Thawhhma vang ngawr ngawr a vanram kai ka la hre love" a ti a, ngaihsam hmel zetin a pindanah a lut zui nghal a. 

Chaw ei lai te chuan ka nu'n a zilh mawlh mawlh a, bialpa ka nei ve ringawt hi hria se chu keipawh min zilh tel ve tho ang. 

Ka pate an lo thlen chuan kan ri hlut a, ka hmuh lohna a rei ve deuh ta bawk a ka ngai khawp mai. A bulah ka ţhu a, U Mama a insil nghal thung a. 

"Sensiari pawh aizawl nuam a ti aniang min lo be khat emai" tih pahin ka pa chuan ka hnungzang a beng thuk thuk a, min ngaih naupanchhia ang hu hian ka rilru a naupangchhia tawh bik si lo a, hei vang hian alawm ngaihzawng neih pawh an phal loh, kum10 mi vel lekah min la ngai ka ti mai, a chang chuan a ninawm ve lek lek ţhin.

"In insiam peih vek tawh em?" U Mama chuan a ti nghal pang a, kan inpeih tawh thua kan chhan chuan "Chhuak tlai lo ang u" a ti a, bialpa neih meuh chuan mahni khua ngeia haw pawh ka hreh mai dawn alawm. Bul ţan tirh, a nawm lai leh in ngaih zual hunlai tak a la ni zui.

"Khaw nge Tintin-a?" an ti a, ka pa te lo thlen hnuah ka la hmu miah lo tak tak a, "Ani hi a mu leh em maw ni le?" ka nu'n a tih niah niah lai chuan a pindan aţangin a rawn zai chhuak a, Pathian hla a la sa kher zui lehnghal a, ka pa bulah rawn ţhu vein a bek bawr nghal sar sar a, pawisa an inpe leh tawh. 

"Ka va chhuak lawk aw nu" a tih chuan ka nu a hawi sawn deuh hmak a, "Ruat ţahbelhi nghawng nghawng hi chu a" tih fiamthu pahin a chhuak a, "Vengchhungah ţhian te i nei ve tawh em?" ka pa in a tih leh chuan chhang lawk lovin ka nu ka melh ralh a, min lo en ve veleh lu ka thing a, "Nei lo" ka ti sap bawk a. 

"A leng ngai mang lo a, mi biangbiak thiam lo chi a ni bawk si, ţhian pawh a la nei lo" ka nu chuan a ti ta hlauh a, ka thaw huai mai. 

"Tintin-a lo haw sela bungrua hi motor ah kan hlang lut zung zung ang a, thim hmaa thlen hman tum ang u" tiin U Mama bawk chuan ro a rel a, hnial theih pawh a ni lo. 

'Kan kal har tawh dawn lo' ti a Vanmalsawma message ka thawn chuan 'Ka awm tawh' a lo ti a, a bei hma leh si khawp mai. 

"Dawr ka va enfiah leh lawk" tih leh din ka rual a, tuman min ringhlel hmel an pu lo bawk a dawr chahbi chu lain ka chhuak a, khawlai ka en ngar ngar thung a. 

Dawr pawh hawng lovin gate thleng ka phei a, bike a ţhu reng chung hian a ban a lo vai a, helmet full face a khum a, an hmuh loh nan a ti nge thawmhnaw dum vek a inbel a, a pheikhawk thleng chuan dum lo a awm lo. Chhun ni sat lai pawh a helmet phui lutuk khum a ngai chu ka khawngaih reuh lutuk ringawt. Khua a lum lo hlauh zawk a, nipui lai phei chu nise hrehawm a ti ngawt ang. 

Dawr ka kawk a, a lo bu nghat a, lokal rawh tih tum pawh ka ni lo, dawr aţanga biak tum ka ni. 

Ka luh rualin ka call nghal a, a lo la hma khawp lehnghal.

"I awmna a rei tawh em?" ka ti deuh thawr a, "Ka thleng deuh chiah" a ti a, ani pawh a aw te chu a zangkhai ve tlatin ka hria, kei ang em chuan hlim lo mah se tlem te tal chuan a hlim ve tho ang. 

"Tintin-a a chhuak lawk a, a lo let leh hunah motor ah bungrua an hlang ang a kan kal thei a ni mai. Nghah rei ka ngai tawh lo ang" tim dai hian ka ti a, ka u chhuak te chu rei ka ti thar riau tawh.

"En liam che ai chuan nghah reng che hi a nuam zawk" a ti a, a nui tih hre turin amah ka hmuh kher a ngai lo. Min fiam zeuh zeuh a hrat avang hian ka nel lehzual phah a, bakah kan lo inkawm sil tawh a, Ropuia ai chuan ka ngam tlak daih zawk. 

Ho mai mai sawiin kan inbe ta reng a, "I lo chhuk ve hunah park nuam deuhah kan kal dawn nia" ka tih lai mekin "Aw pa" mi pa aw tih hriat zet hi a au lauh a, ka u a ni tih ka hre nghal chat bawk. 

"Dawr kawtah ka awm reng alawm min lo call duh kher a nih kha" a ti a, keipawn phone ka la hmang a, Vanmalsawma chu "Nakin deuhah dawr a kal tur angin i lo phei dawn nia, khalaia ţhut reng ai chuan a nuam zawk ang" ka ti a, pawn a mi lah chuan phone a be ring nasa mai.

"Ka lo lut thei ţep hei Sensiarin a bialpa ni awm tak a be mek a" a tih chuan ka hawi tang hra a, phone pawh chu ti tawp lovin dawhkanah ka dah tawp a, misual chu um lohin an tlanchhe ţhin tih zawng zawng kha ka nei zo vekin ka hria. An phal lo chung bialpa ka nei a, ka hlau leh tho sia, tlanchhiat mai loh tur tih theih dang a awm lo. 

"A biak dan dik leh dik loh ka ngaithla mek a nih hi. Tunah chuan dawr a kal turin an insawm mek. E..ka hmu chiah e, sawlaia meihawl tlang lianpui saw a bia a nih hmel" a tih leh phei chuan ka tho tharh a, chhuak lem lova ka bih thlak lai chuan "Hei kawngka bulah a biru mek" a ti ta mai sia, din lan lohna chi pawh a ni tawh lo. Ka pa kher a hrilh lehnghal. 

Min hmuh chuan ngeiawm zet hian a kiai suk a, phone a ak nghal daih bawk a, "I va ţawngthei ve" ka tih laiin ka pa ber chuan "Tintin i lo haw tawh chuan bungrua hi hlang lut nghal mai rawh u, i u Mama a hmanhmawh tawh sia" a lo ti a, "I lo haw na a rei tawh em?" a tih zawm zat bawk a, a lo haw tawh tih a hre lawk lo a ni phawt ang a, min tihder leh tawh tihna a ni mai, ka hlauh hman nen aw. 

"Min tihder a ni maw? Phone kha i hmang der tiraw?" ka pa hriat hlau zeta ka tih chuan "Misual chu um lohin i tlanchhe chawn chawn mai alawm" min ti a, ka pa dinna lamah a phei a, min en reng chungin eng emaw a hrilh a, ngaih ti ţha lo tawk lek a awmdan a thiam kher mai. 

Kan kal dawn tak takah phei chuan Vanmalsawma chu ka melh ru reng a, kan in lam a lo hawi ve reng bawk. 

"Sensiar motor ah lut rawh kal vat teh ang u" U Maman a tih chuan hreh deuhin ka lut a, min thlah tupa ber chu chiang tak pawhin ka hmu thei tawh lo. Ka lung a leng nghal ringawt a, tukverh bulah ka ţhu a, kan tlan chhuah takah chuan tlemin ka hmu chiang leh deuh a, a rei lo thung. Kan tlanpel thuai a, tukverh a dakchhuak meuhin ka hawi let a, min lo la thlir reng a, theih se chu ka aizawl ah hian ka awm hlen daih mai tur a nia. 

Ka chhungte an ti ti bawrh bawrh laiin keichu ka ngawi reng a, bialpa ka neih hmasak berna a nia, la lungrun rual lek ka la ni bawk si, ka ngai veng veng a, U Mama lah chuan "I va ţawng duh lo ve" min ti reng a, ka awmdan chu ka nu chauhin a hrethiam maithei a ni. 

In kan thlen chuan U Mala fate pahnih an lo ri chel chul a, ka lawm theih tehreng nen an bengchheng te chu ka ning tlat tawh. Kan thlen thu ka hrilh chuan 'I chau em?' te a rawn ti ve a, lokal vat a tum thu a sawi leh bawk. 

Ka u te chhung chuan chaw an lo ei a, "I zia a zawi tlat" an ti leh zeuh ţhin a, an ngaih a ţhat loh hmel hlawm khawp mai. 

"Aizawl ah i awm a i mizia a dang vek mai. Ngaihzawng te hi i lo nei ve a ni lo maw?" U Rinhlua, Tintin-a chhang tu chiah hian a ti a, a nui ruh ruh bawk a, midang chuan min melh no teh chiam lo.

"Nei lo rapthlak..ka chau ve rih mai mai a nih hi" uar zet hian ka ti a, ka thin a rim deuh reuh nghal ringawt lehnghal. 

"Lehkhazir tur a aizawl a awm i ni tih hrereng rawh. Thil dang ngaihven kan rem ti lo a nia, sawrkar hnathawk lo phei chu neih tum reng reng suh" U Malan a lo ti ve nghal zat a, "Khawlai mi deuh phei chu kawm lo tawp la a ţha a ni mai. Be tu i neih pawhin ka chhungten neih an la phal lo lo ti zel rawh" fiamthu deuh hian a tih zawm leh a, midang lah chuan an lo tuihnih ve sap sap a, a ruka neih nachang ka hre tho sia, inkhap beh ringawt pawh hi a ţha ber lo mawle. 

"Mala aizawl a kan awmna vengah khan Boomer ang chiah chiah alawm. Danglamna an nei lo a tih theih ang. Tintin-a nen an inkawm avangin a lo leng ve zeuh zeuh a, eng nge a awmzia ni ang le?" ka nu'n a tih te chuan pawi ka lo ti khawp a, Boomer ka star theih zia an hre thawi ve vek tawh a, min dan chep phah ka hlau a ni. 

"Hmel inang deuh te chu an tam alawm" ka u chuan a ti awlsam mai a, ka nu lah a thuhriat leh hmuh te zep thei lo chi a ni kher bawk nen, "In ang satliah an ni lo. Phir pawh ti se ka pawm hmak ang. Chuti khawp chuan an inang tlat a ni. An sam leh hmel vel zawng zawngte inang lo lai a awm lo" a ti a, a thutak em avang chuan mak tih hmel deuhin an en ţhap a, an ngaihven tawh hlawm khawp mai.

"Nu leh pa a la nei em?" ka u chuan a ti a, ka nu chu chik deuhin a en bawk a, chaw ei pawh a tui thei tawh lo. 

"Nei chu an tia lawm. Kan awmna vengah khian an la awm rei bik lo a, a pa hna avangin shillong aţangin an lo insawn a ni awm e. Hrilh che ka duhna a rei tawh a, hmaichhan ngei a a chian zawk ka ring bawk sia, mak ka ti tak tak a ni. Pu Muana fapa hian phir pui a lo nei reng em mawni te ka tia" a ti a, phir an ni tih hre tawh tu tan chuan an thusawi chu a ninawm lek lek a ni.

"Ka lo ngaihven chhin ang" ka u chuan a ti mai a, a duhtawk mai dawn emaw ka tih laiin "I u ţhianpa a nih hmel a, nang chu mipa ţhian la nei lo mahla a pawi lo a nia aw. An lo in ang viau a nih pawhin kan khuaa mi kha a ni lo tih hria la, kawm nel tum ve ţalh suh" a tih leh hnuah "Eng rual vel nge?" tiin ka nu chu a zawt leh a. 

"Tintin-a te rual vel tur tho chu a ni. Sa a sat ţhin an ti mai a" ka nu'n a tih chuan an lo nui huk huk hlawm a, "Tintin-a kawm awm tawk lek a nih chu" an ti a, engamah hmaa an nuih sawh nghal ringawt chu ka lung a awi lo kher mai. 

"Sa pawh sat se pawisa a la lut tho alawm. Hna hniam leh sang tih vel a ho emai. Hna chu a thawk tu a zir zel zawk a ni" ka ti a, ka insum thei thlawt lo a ni. 

"A pawisa lak luh a tlem awm emai. Tintin-a nen an inkawp nghal chat phei chuan a fel lo ang. Ka nu chutiang mi chu inchhunga len tir ziah chi pawh a nih loh chu. In hmeichhe rual dawn si, zu inkhawm nan te an rawn hmang ange" U Mala bawk chuan a ti leh a, nghet deuhin fian ka hum a, ka ute chapo lutuk hi chu a ngaithei lo ber te zinga mi ka ni. 

"Inleng lo hnar ngawt chi a ni hleinem. An leng rei ngai lo a, dawrah meizial leh eitur neuh neuh an rawn lam ve ţhin bawk a" ka nu'n a tih chuan "Dawr chu ti tawp mai rawh u" a ti bul hmuk a, Tintin-a ngaihdan a ni bik lo aniang "Lo inrawlh ve suh" a ti ram ve ta hmak a. 

"Nau hmeichhia i nei a, i ţhian ruihhlo khawih ve ho inchhungah hruai lut suh. I nau hian a tawrh phah mai tur a sin" ka u in a tih chuan "Naupang a nih tawh loh hi. A tana ţha leh ţha lo hre rual a ni tawh. Induh ang diak diak khan a awm thei tawh bik lo. In vau ţhin avang hian a hlau cheu a, Sensiari nun in ti chep lutuk alawm. Ka ţhiante phei chu sawisel reng reng suh, ruihhlo pawh ti se nang angin mi nun an kher ve nget nget ngai lo. Vanmalsawma pawh a duh chuan a lo leng ve bawk ang chu, rilru chhia i put chuan i hah mai mai, en liam tawp rawh" ngaihsam hmel fe hian a ti a, U Mala erawh a thinrim hmel khawp mai. 

"Inchhungah ruihhlo ti ho an lo chuan kai sek chuan in zahawm lo thuai ang. I ţhiante hruai lut lo la dawr ti tawp bawk rawh u. Sensiari hian ţha deuhin lehkha zir rawh se. A nih loh leh hostel ah awm sela nangni chu aizawlah awm ve tawh suh u" a tih leh chuan Tintin-a a ding uaih a, a rui tawh bawk nen U Mala pawh hi ngawih ve mai mai tur a nia. 

"I duh leh i inchhungah ro va rel rawh. I chhuak tawh a, kan inchhungah hian rorel tum suh. Fel ber ang hrimin midang ka sawisel e i tia, in thil man ho in tih ţhin dan ka sawi ve dawn mi?" a ti khur khur a, ka pa'n lo khap ve mah se awmzia a awm lo. 

"I ţhiante i dah pawimawh tlat hi alawm kan buaina ni ţhin. Sensiari tana a ţhat ka rin loh vang zawka sawi ka nih kha. Tleirawl a ni ve tawh a, i ţhiante ho a hnaih kan remti hleinem. Ka sawi ang khan hostel ah awm tawh rawh se, chu chu thu tawp a ni" a ti a, hostel a min dah tak tak hlauin ka ţap pur tawh mai. 

"Hostel ah a awm lo ang. I duh leh i tum chhin dawn nia, upa ber pawh nila ka kalh hreh reng reng lo che" a ti a, fian la kangin U Mala vawm tum ni awm tak hian a tin uaih a, kan lo ţe ţhat hlawm a, U Mala pawh a indang vek tawh tihah "Dawih ropui si" a ti a, a vawm ta chuang lem hlei lova. 

Zanah hunawl ka neih veleh Vanmalsawma ka bia a, min la chhang lawk lo zui a, mut san mai ka tum tawh laiin zanreiah min lo call a, "Biak i va har ve" bak hlar a tih pahin ka tho a, ka pindan tukverh chu hawngin pawn lam ka thlir a, ka taksa a vawt nghal sang sang mai. 

"Ka lengchhuak a" zep buang bar lo hian a ti a, Pektea ţawng lung lung pawh hriattur a la awm. 

"Krismas a hnai tawh sia" beisei nei zet a ka ti chu nui thawmin a zui a, "Min ngai nghal der a ni maw?" ti a min chhaih hmasak hnuah "Ka lokal ang" thutak zetin a ti leh ang lawi a. 

"Engtia rei nge i cham theih ang?" ka tih chuan "Chhungte ka bum dawn a, a rei berah ni hnih" a ti a, phur viau mah ila a cham rei thei lo tur chuan min ti hnual tel tho. 

"Ka lo hmuak dawn che nia..thlenna tur i hre tawh em?" ka tih chuan a hriat loh thuin min chhang a, ni Mami hotel hming ka hrilh hnuah "Kan khuaa hotel ah chuan a nuam ber a, i lokal niah hotel bulah ka lo hmuak ang che" ka ti a, thil ni lo lo ka mitthla leh tawh. 

Min ngaih ve zia a sawi lai te chuan a thusawi ngaihthlak pahin Ngaihtei pindan lam ka thlir reng a, an sawi hrang viau na a zan reiah pawh thil danglam hmuh ka nei lo. Kan pindan a inzawn chiah a, min biak duh chang te hian a pindan aţangin min ko mai zel a, in ţhenawm tih takah kan inkawm veleh zeuh ţhin. Tunah chuan a reh ţhiap tawh a, Ngaihtei thlahrang hmuh tur a awm lo. 

Vanmalsawma lokal ni chuan ka ţhiante pahnih, Vani leh Zuali ten "Bazar ah min kalpui rawh" an rawn ti a, ka chhungte an dil pah bawk a, keimah chauh a chhuah an phal dawn loh vang a ni. 

"Hmeichhia hi chu chhuah tam loh tur a sin. Inah tih tur neuh neuh a tam a, ţul tawpah lo chuan chhuah a ngai lo" U Maman a lo ti na a ka pain "Kal ve rawh se. Inah a awm reng a, chhuah harh te pawh a chak ve ang chu" a lo ti hlauh a, insiam turin pindan ka pan nghal a, ka duh ber ka hmuh dawn miau avangin ka inchei uluk ve hle. Ka sam sei ve tak erawh tih danglam vak ngaihna ka hre lo a, ka khuih tawp a, makeup tlem ka hmaia ka bel kai ve hnuah inhnuaiah ka chhuk a. 

Hmun danga kal lovin auto rickshaw in ni Mami hotel lam kan pan a, kawngsir langsar laiah kan ding ţhap a, ka ţhianten ka hmel an lo en dik ve sek bawk a, ka nalh loh an hlau khawp mai. 

"Ni Mami hotel kher a thlen tir i tum hian chhan a nei tiraw?" an tih chuan ka lo bu nghat a, U Daizaui takngial pawhin a rinhlelh chuan eng emaw hriat theih ngei ka inbeisei a ni. Phir te leh hmeichhe pahnih bo ta hian inzawmna an lo nei a nih ngat phei chuan a manhla viau ang. U Daizaui sawi kha a dik a nih chuan he hotel hian thuruk a keng tam viauin ka ring a, Vanmalsawma a thlen chuan hotel a luh theihna hun ka nei dawn tihna a ni mai. 

An lo thleng chu lai ru deuh chung hian ka lo nuih a, Pektea nen an lokal a, Peka a tel ve lo thung. Kan khaw kawng chhiat zia sawiin an nui huk huk a, Vanmalsawma chu ka bulah lokalin ka darah min kuah a, ka hnaih a a awm hi chuan kim riauah ka in ngai ţhin. 

"Pindan awl a awm ang maw?" hotel lam thlek vut paha a tih chuan "Awm ang..mikhual an tam lutuk ngai hleinem" ka ti a, lirthei vei vakin min tlan pel reng a, "Ka cham chhung chu cham ve thei la ka ti a sin le" tih paha a kawnga ka kuah ve lai tak chuan kan lam panin ka bike hmuh ţhan lutuk tak mai a lo tlan a, kan dinna a langsar si, kei leh ka ţhiante phei chu khawiah pawh min hmu se min hai dawn lo hrim hrim. 

Ka hlau lutuk chu ka thinphu a rang nghal hle a, ka kut ka la let vat bawk. Vanmalsawma lah chuan min la kuah tlat a, kan hma zawna U Mala bike rawn ding dat chu tim daiin ka lo en a. 

CONT...