VANMALSAWMA-2

VANMALSAWMA-2

"Min sawi ţhaih tum vak duh suh aw. A thi lo tih te chu kan hre vek alawm. A sualpui te a hneh loh lutuk avangin a thi lek lek a kan lo kan dawn zawk a nih hi" Vanin a ti hlak hlak a, a nui rah rah bawk a, Daizaui thusawi chu a awih loh hmel khawp mai. 

"Chutiang a ni bawk lo. Ka awki kha ni Mami awki ang chiah a nih kha. 'Vanmalsawma chu a thi tawh' a ti chiang alawm. Hre fuh chat lo ila chu phuah chawp ngaihna ka hre dawn lo hrim hrim" uar fe hian a lo ti a, a thinrim lek lek niin a lang.

"Engpawh chu nise lut phawt teh ang u" an ti a, kan kal tur chu ka hreh leh deuh a, "Lokal mai mai rawh a zahthlak loh" tih pahin ka kawr an han pawt a, Daizaui pawh chuan "In awm chuan ka ngam a, mahse ni Mami thusawi ka hriat hnu kha chuan ka ţih ru deuh tlat a" a lo ti ve bawk a, kan sirah a kal ve zel a, ka duh ruk zia an hre ve vek bawk nen, ke pen a sak duh khawp mai. 

Inchhung kan han lut chu a lo reh ţhiap a, choka bik phei chu a thim deuh ruih a, Daizauin a hlau pawh hi a awm lo lem lo.

"Inchungah a pindanah a mu ang. Ni Mami leh ka pu chu sawtah sawn an ti ti a" tih pahin choka lam a kawk a, thutak viau mah se nuih a za tlat tawh. 

Ka u nen an inkawmna a rei tawh a, Vanmalsawma anga lemchang mai mai chu nise ka hre daih tawh ang. Pawl 11 ka nih lai aţangin ka duh ve ngar ngar tawh a, danglam chu awm se ka hmuh hmaih ka ring lo. Ka hmuh hnuhnun ber pawn a khuavang awmna thlengin a la pangngai vek a, a sam kir dan thlengin ka byheart vek tawh a, a mizia lah kei aia hrechiang an tam lo khawp ang. Chuvang chuan midang daih a nih ka ring ta hauh lo. Daizaui hi a rui pek ang a, ni Mami te thusawi a hresual mai mai zawk a nih ka ring. 

"In lokal duh kher a a ţha tawh lutuk tho a sin mawle. A damloh awm pawh kan hre ngai tawh lova, nizan kha chu a hlau ve deuh aniang mah se tunah chuan a pangngai leh vek tawh" a ti mawlh mawlh a, inchung a chhoh loh dan phet a ngaihtuah niin ka hria. 

"Ţha tawh pawh nise kan hmu ve duh alawm. In kanna pawisa pawh kan pe ve ang chu" Vanin a tih chuan kan in melh hrek hrek a, week kan hman zawhna a la rei lo a, pawisa kan nei lo tlang bawk nen, haw na tur kan nei lo mai ang tih te pawh a hlauhawm alawm le. 

Daizauin hma a hruai a, inchung lamah kan inzui chho ţhâm ţhâm a, ka awmdan ka sawithiam lo. Ka phur a, ka huphurh tho bawk sia, ka zun lah chu a chhuak deuh tlat a, min kam deuh run ni berin ka hria, a nawm tur ang pawn a nuam thei lo. 

"Ehe..a awm miah lo. Pawnah a lo chhuak mang bawk si lova, ava mak ve" pindan kawngkhar hawn pah hian a ti deuh hlut a, a awm leh awm loh en tumin kan dak lut ve a, a lo awm lo tak tak reng bawk a. Khum a ruak a, rizai lah chu khum mawngah hnawk deuh hian a awm hlawm tawp a, duhdah deuh a tlawh hlim tawp tih a hriat reng mai. 

"Khawiah emaw a kal lawk aniang U Daizau keichu ka zun a chhuak e" inhup chaih chaih chunga ka tih chuan "Saw, saw lai a saw zunna tur a awm reng alawm..va kal mai ta che" tih pahin kan dinna piah deuh hi a kawk a, inpaih thawl tumin keipawh chu ka tlan phei vat a. 

Engkhaw sawi set set lova kawngkhar ka nam hawng chu ka thil hmuh avang chuan ka che a tawp chiang kher mai. 

Kan damlo kan tum ber chu a lo ding run a, a zung ve niin ka hria, a zung zo tawh zawk nge pawh ka hre lo. Ka thawm a hriat chuan ka dinna lamah a lo inher a, ka zak lutuk chu awm dan tur ber pawh a hre lo. 

"I va pawt kawh cute deuh ve" ka ti a, ka biang leh beng a sa hat hat bawk a, nui lui hak hak pah a ka kalsan tur chuan "Ka seh tir dawn che mawni le" a ti thum bul bul ri chu ka hre pha hram a, min seh thei lo tih hre mah ila ka hawi let ngam tawh ţhak lo. Ani pawh ka lam a lo hawi hma khan bilh luh nawk mai tur a nia, thawm ka nei thut khan a ti phu ve ang a, a theihnghilh palh a nih ka ring hmiah mai. 

Ka ţhiante bul ka thlen chuan "I va zo hma ve" an lo ti deuh ha a, "Ka zung lo" zawi sap hian ka ti ve thung a, min en ţhap a, mak min tih hmel lek lek niin ka hria. 

"I hlau a mi a?" Thartein a tih chuan lu ka thing a, "U Daizau inhnuaiah ka zung mai ang min lo hruai teh" a ban a vawn chawt pah a ka tih chuan min thlek ha a, a ngaihna an hre lo takzet a ni. 

"Hmanhmawh rawh" tih pahin a ban chu ka thing nawk nawk a, zun chhuak nen, zah bawk nen, ka awmdan chu a hrehawm vel vek a ni ber. 

Engmah sawi tawh lovin inhnuaiah chuan min hruai ve mai a, bualin chhunga ka awm lai chuan "Hlauh i nei tiraw?" tiin pawn aţangin a rawn au a, "Nei lo..inchungah khan ka zung peih lo" ka ti daih a, ka biang leh beng vel hi a sen nasa viau ang ka ring. Ni sa hnuai a ka awm chang leh zah deuhna ka neih chang chuan ka sen vek zel hrim hrim. Ka hming nen hian a inhmeh tak tak a ni. 

"Keichu inchhung te hi ka rap vek tawh. Boomer-a nu lah kha a thihna a la rei bawk si lo a, zana keimah chauh a mut te hi ka hlau a maw..hrehawm tak a ni. Awmna tur dang chu hria ila ka insawn chhuak daih ang" a la ti mawlh mawlh a, kan rilru kap tu inang lo lutuk chuan nuih a ti za zawk alawm le. 

Ka zun zawh hnuah inchungah kan chho leh a, ka ţhiante hmuh tur an lo awm tawh lo. Pindan chhungah an lut tawh a nih ringin kan lut ve rawih a, khum bul a an ding ţhap kan hmuh rualin Boomer pawh chuan kan lam a lo hawi a, ka zahna ngai bawk kha lo let lehin "Haw nghal mai ang u" ka ti lawi rut a. 

Ka awmdan chu amah chauhin a hrethiam aniang chu awmze nei deuh hian a nui a, a la mawi em em zui a. 

"A mak e..kan thleng ve chiah alawm. Lokal rawh khumah hian lo ţhu mai rawh. Keini chu kan ţhu chak vak lo a" ka ţhiante lah chuan thil awmzia engmah an hre lo. An la inti zei ve zawk zui em maw ni?

"Damlo i kan dawn kha" nuihza aw tak hian a lo ti a, a mit chu a sen deuh rum a, meng dul chi nih tawh sa nak laiin a damloh vang em maw ni a mitmeng chu a dul deuh ruihin ka hmu bawk a, ka khawngaih ve reng mai. 

"Lokal teh" a tih rual chuan a mitmeiin a lam a kal turin min sawm tel ka ti mai; hreh viau mah ila muangchangin ka pan phei chhat chhat a, "I va fel ve" khum tlanga ka ţhut rual chuan a lo ti a, a awmdan a pangngai vei reuh lutuk te chuan min ti zam daih zawk. 

A ţhut dan siamrem ni awm tak a awm chung hian min rawn hnaih a, "I biang a hmui vek a nia" zawi deuh sup a a tih phei chuan chhuat hi inhawng thut se, min lem daih se ka ti. 

A hmui lah chuan ka beng a nul tel kher lehnghal a, tih luih ni lo mah se ka zak chem chem tho. Ka naupan deuh lai chuan ka biang hi a tai hlar zel a, hei vang hian fiamthuin i biang a hmui min ti ţhin a, Boomer chuan ka zah apianga min chhaih nan a hmang thung. 

"I dam em hi a" tih hluai pahin a malpuiah ka chum ţawlh a, na ti ang pawn a awm duh lo. A hmaiah lah chuan pem a awm a, a duk bawk a, an sawisa nasa viau a nih hmel e. 

"Nizan khan i thi dawn maw ka tia" ka tih chuan a ner sawk a, "Min lo chhan ta che" a ti vel a, kan inbiak dan leh awmdan hi inngaizawng te pawh kan ang alawm. 

"Ngati nge an khawih rawn ringawt che a?" ka ti a, en pawh min en tawh lovin khum a ka kut dah zawk chu a en daih a, ka zungbun a la tuai zui, nuam ve tak chu a ni. 

"Ka dup hmel aniang" nuih hawk pah hian a lo ti a, ka enchian takah chuan a hlim loh hmel riauin ka hre tlat lehnghal. 

"I dam tawh a maw ka tia" ka tih chuan min en zawk a, min en dan chu hriatthiam a har khawp mai. 

"Ka dam tawh alawm" a ti tak nain zanah khan a hlauthawng hmel chiang takin ka hmu ve a, thisuk nei kher lo ila chu ka nu mitmei veng lek lova ka buaipui ka ring bawk. 

"Nihchuan engati nge thawhah ang deuh khan i awm si a?" ka ti leh zel a, ka mitah tak min en chung hian "Ka ti der a nih kha" a ti a, a nui pah bawk a, mahse tun hi Boomer ka hriat ve tawh hnua a la inrintawk loh ber ţum niin ka hria. 

Ka zawt lui duh ta bik lo a, a bul a awm chak viau mah ila ka chhungten min hauh hlauin haw ka rawt leh a, ka dinhmun hrechiang tu ka ţhiante pawh chuan min hnial tawh lo. Ka haw dawn chuan thlakhlelh hmel tak hian min en ve niin ka hria a, ka hmu sual zawk nge pawh ka hre lo mah se a mitmeng a danglam awm chu ka hmu thei chiang a ni. 

Pawn kan chhuah dawnah Tintin-a te nen kan la intawk zui a, a pawi lutuk ringawt. Min hmuh a inbeisei bik lo aniang mak ti hmel a pu a, a rei lo thung. 

"E..e..e..tlangval i rim ngam tawh a ni maw? U Mala chuan hria se case a siamsak ngei ngei ang che" a ti deuh hlut a, nui ruh ruh chunga min thlek vung vung hnuah "Khai a..i biang a fawp tu che hi a hmui a vung a ni maw?" nui reng chung hian a ti leh a, ka insawifiah hun nghak ni awm tak hian a khabe a dawm a, nuam a tih hmel phian mai. 

"Tuman min fawp lo e a. I zakthei lo ve sia, ţawngthei ropui si" tih tan tan pah a kal mai ka tum chu ka darah a lo vuan vat a, chek tlak chung hian na deuhin a kut chu ka vai thla a, a nui hmel a la paih bo duh chuang lo reng reng. 

"Eng nge Laltinkhum?" ka ti vin hlar tawh a, ka thinrim ringawt chhan pawh ka hre lo, min endan vel chu ka hua a ni ber. 

"I ha ah eng emaw ni a bet. Mahse ka sawi dawn lo..duh leh Boomer zawt rawh" ngeiawm zet a a tih hnuah a ţhen suk a, ka hmui ka hup chawih a, ani erawh inchhungah a lut nghal nulh a, ka thil ei ho ngaihtuah kual vak vak chungin ka ţhiante ka zawm ve a, ka inhup tlat chu mak min lo tih hmel nasa mai. 

"I lei i seh mi?" ti a min zawh pahin Thartei chuan uluk deuhin min en a, Nu Puitein a kuhva chhuanvawr min ei luih tir ve tlat kha a nia, chinai telloin ka ei ve ngei a, mahse chinai aiin panhnah a langsar zawk bawk si, Boomer-a hmuh lai khan ka la nui lui nasa em em zui a. 

"Eng nge i hriat a?" an tih chuan "Han ţhen vek teh u" la inhup ţat chung hian ka ti a, mak an tih hmel deuh na a ka sawi ang chuan an ti ve mai a, chinai tello in kan ei vek a, an ha ah engmah a bet ve lo. 

"Min lo en ve teh u aw" ka tih hnuah muangchuangin ka kut ka dah thla a, hlauthawng chung chungin ka ţhiante hmaah chuan ka ţhen a, uluk deuh a ka ha an en hnuah "Eng ber nge kan zawn a?" an ti hu hlawm a, ka thin a rim lehnghal hlur mai. 

"Ka ha ah engmah a bet lo a mi?" ka tih chuan lu an thing vek a, an hrilhhai hmel lek lek zawk alawm le. 

"Laltinkhuma hi chu aw" vin angreng taka ka tih chuan an nui hak hak a, sawi lo mah ila min tihder lehpek tih an hre nghal vek. 

Haw kawngah chuan ka awmdan danglam thut chhan min zawt ta ngei a, hreh viau mah ila min zawh luih tlat avang chuan "Aw..Boomer kha a lo zung ve a" ka ti sa sa a, nuihzatthlak a awm loh nen an nui uar khawp mai. 

"Engtin nge i tih?" an ti lehzel a, "I pawt kawh cute ka ti" zawi sap a ka tih meuh chuan an nui tlawrh tlawrh hlawm a, ka zak thar leh viau thung. 

"Naute cute deuh in nei dawn a nih chu" Vani chuan a ti a, min chhaih zawm deuh reng bawk a. 

"Lawiţhat zanah a thar biaiin i hmu ve dawn lo a ni mai alawm" te an tia, an hram tla hawlh hlawm khawp mai. 

Kan khua a bazar pui ve ber kan kaltlang dawn lai chuan Kimkimi nu kan hmu a, kan venga pa zahawm deuh nen an ni nghe nghe. 

"An pahnih sawn an inngaizawng an ti. Kimkimi khan a duh pui lo lutuk an ti bawk a, tam tak chuan Pa Thianga sawn Kimkimi kha a dah bo a nih an ring a" Thartein a ti sar sar a, Kimkimi te nen an veng a inang a, a ni hian a hrechiang khawp ang. 

"Chutiang mi chu a niin ka hre lo. Pa Thianga tak phei chu kan veng a mi a nia, tupawn an chung en vek alawm" Vanin a lo ti ve thung a, an che vel chu kan thlir reng a, an inhuat loh hmel khawp tak tak mai. 

"Mi hi kan ngaih ang an ni ngai lo. Fel deuh emaw kan tih te hi an lo tenawm ru zek thei a nia" Zuali chuan a ti veleh a, an thusawi chu ka lo ngaithla kar a, ngaihdan ka nei ve lo. 

"Kimkimi nu saw zanah amahin a awm ngam lo. Kimkimi a che nasa an tia, pa an nei tawh bawk si lo a, Kimkimi u pasal nei tawh kha anmahni awmpui rih turin a sawm tawp alawm. Nakinah ka la hrilh ang che u, a hlauhawm a, a rapthlak bawk a" Thartein a tih hnu lawkah an veng peng kan thleng chawpchilh ve nghal a, kan invai liam hnuah inkai rialin kan veng lam panin kan kal leh a. 

In ka thlen chuan ka nu'n "I va rei ve" a lo ti vin hlar a, chhuanlam ka siam nasa mai. 

Inbual hmain phone ka en leh hram a, Boomer tih inziak kalh ka hmuh chuan ka thinphu a rang nghal hle. Kan inhriatna a rei tawh tehreng nen a message ka hmuh chuan ka awmdan a danglam nghal vek zel hrim hrim. Ka duh lutuk hi a chang chuan ka inkhawngaih zawk ţhin a, ka u nen an inkawmngeih avang chauh a a rilru put hmang lantir ve lo a nih ka ring ţhin bawk. Ka la naupang a, mipa leh hmeichhe inlaichinna lamah hian tawn hriat la nei lo viau mah ila min huat bik loh zia ka hmu thiam ve tho a, a ţhianpa nau ang ringawt chuan min en lo tih pawh ka hria, min bem loh chhan hi chu ka hre bik lo. Ka duh nghal dawn tih a hriatchian awm tehreng nen hma rawn lak vat mai tur a nia. 

Ka ngaihtuahna chuan min ti nui ver ver a, hmangaihna awmzia hrethiam lo mah ila a hming ringawt pawhin hlim deuh a min nuih tir theih chuan phat rual lohin ka duh tihna a ni mai. 

A thlalak min lo thawn chu ka download a, ka bag ngei a ni. "I theihnghilh" tih zawng a ziak a, engtin nge class kal na a ka ah chhuah ngei kha ka theihnghilh theih zawk le? Ka lehkhabu ah ho phei kha chu keu chi pawh a ni lo; a hming leh thiam lo tawka ka ziah ama lem a tam rapthlak lutuk. 

{A mak e} tiin ka chhang let a, ke in kan haw a, ka bag ah lehkhabu bak pawimawh ka dah bawk si lo. Naupangte siin rapthlak khawpin ka haihawt a ni. Aman min tihbuai hneh lutuk vangah ka puh ta ber. Ka ţhianten an hre hauh lo kha a mak bawk a, kan ţhian ho ngaihsam zia chu ti hian a hriat mai ang. Lehkha han thiam fal pawh kan awm lo reng a ni. 

{I u ka lo hawn tir ang} a rawn ti ve thlap a, lawmthu ka hrilhna lah chu min chhang let tawh lem hlei lova. 

Inbual zawh a inhnuai ka chhuk leh pawh chuan ka nu a lo la ang hlak hlak a, a chang chuan a bula awm ka nin phah ţhin. Ngam loh an neih loh vang maiin nu te hi inchhungah an ang buan buan zel a, an faten inchhunga awm kan peih loh phah ţhin tih te hriat ve tur a nia. Ka nu hi nu thau ve deuh mai a nia, kawng kawiah pawh tawk dawn ila a hmel aiin a dul kan hmu hmasa zawk ang, chutiang chi chu a ni ve a, a hnar a mawi lo ve reuh hle bawk. 

"Naupang te si tui vang mai maiin min rawn kawk sawk sawk ngam a nia, tui a haw reng rengin midang line hi off ţhin suh ka ti mai a, khati tehchiam a min ankhum a ngai lo reng reng" a ti hlak hlak a, ka piin a lo tui hnih ve zat bawk a, an thin a rim duh kher mai. 

Tintin-a lo haw chu ka lo mitmei vat a, hrethiam tak hian pawn lam a kawk zeuh a, ka nu ten min man hi chu a hlau ve viau zel. Inchung a chhoh nghal mai a tum chu ka nu ang ri a hriat chuan a ding veleh rih a, "Rintluangi nasat em em zia hi chu" ka nu'n a tih chuan "Eng nge a?" a lo ti ve vat mai. 

"Ţhenawm nula in i nu hi burma vawk i an an nen a ti pek a nih kha" ka piin a lo ti hlak a, kan dinna lama ka nu lo hawi phei huau chu en loh luih hram hram ka tum nasa hle. 

"Chunu mai mai chu ka va ngei e..nitin chaw ei hun apiangin an kawtah va ngûk vak zel rawh" Tintin-a chuan a ti pek a, a thutak run na a a uang tih ka hria a, ka nuih a za angreng, ka nu'n min en reng lo se chu ka nuichhuak hial ang chu.

"Hnar kaw vang zawng zawng hi vawk nen a tehkhin tur an ni ngai lo" ka nu'n a tih lai mek chuan a lo pawt chat leh a, "Chuvang chu a nia ka huat em em ni. Burma vawk a tih rau rau che chuan chaw in pek tir ziah la, an buhfai tih hek nan i hap buan buan zel dawn nia" nui hauh lo a a tih hnuah inchungah a tlan chho a, ka nu pawn tih vak ngaihna a hre bik lo. Ka pi nen chuan u Rintluangi rel pahin Kimkimi chanchin an sawi pah zeuh zeuh a, a ţha lam an sawi mang chuang lo. Ka nu hi chu a mak ve ngawt mai, piangthar, mihlim inti chung hian mi a rel reng a, a englai ber nge entawn tur pawh ka hre lo. 

Pawnah ka bag ka zawng a, ka hmuh mai loh avangin garage ah ka lut a, a lo inkhai va mai. Boomer khan ka chhungte hlauhawm zia a hria a, ka mamawh dawn tih a hre bawk a, ni lo se chu lam leh turin keimah ngei min beisei hrim hrim ang. Midang lo haw hmain ka la thla a, ka nu leh ka pi hmuh lohin inchungah ka chhoh pui a, u Rintluangi an rel tui a, ka kalpelh lai chu hria ang pawhin an awm lo. 

Tintin-a pindan a ka luh chuan ka ner nang nang mai. Meizial rim a nam huam a, a hnawk em em mai bawk si, computer hmaah a ţhu leh ran tawh bawk a, engtin nge a awm theih zawk ni. 

"U Daizauin thil min hrilh a" ka tih chuan computer screen en ngur chung hian "Sawi rawh" a ti mawl tawp a, min ngaihven lo ve khawp mai. 

"Ni Mami'n Vanmalsawma a thi tawh a ti a, a ti" ka tih leh chuan nui hawkin min lo en ve ta hram a, "Laltinkhuma pawh a thi tawh ang chu. Awi..Laltinkhuma tih phei chu hmanlai kan pi leh pute hunlai khan an thi ţeuh tawh ang" uar zet hian a lo ti a, a hming hi hmanlai a ti em a ni.

"Ni lo e..tun a kan Vanmalsawma hi alawm thi tawh a tih chu" ka ti a, ner nawk pah hian dar a lo kan uk a, "A thi dawn a ti niang" a ti deuh tawp a, a thil tih lai a chhunzawm ta daih a. 

"A la na reng a mi? A la dam tak tak lo tihna mi?" hlauthawng tak hian ka ti a, a hlau mitmeng leh inrintawk loh hmel taka min en te kha mitthlaah a awm reng mai. 

"Dam ţha pangngai ni se damdawiinah an hruai nang" nin hmel zet a a tih chuan zawt zui lovin ka chhuahsan a, a ţhianpa ka duh tih hi a hre na a min hau ngai hauh lo. Ka u dangte chuan hria se min hau ang a, min khuahkhirh zual sauh bawk a, hetiang kawngah hian Tintin-a hi a fel phian a, min hrethiam lutuk ringawt. Mahse, a thu lo ve em a ni. 

Bag ka hawn chuan chocolate ka hmu a, mahniin ka nui var var mai. Boomer hian chocolate a ei ngai lova, a damloh avanga midangin an pek min pe chhawng leh pawh nise a lawmawm tho tho. Lukham hnuaiah ka rawlh lut a, a chhiat dawnah ka ei chauh ang. 

A ngai te bawkin class kan kal leh a, Boomer a lo la kal ve chuang lo. Keini aiin an sang zawk na a canteen a hmuh tur a awm lo ringawt pawh hi a khawharthlak a, chanchin ka zawt ngam mang bawk si lo. A damlo zui ta mai emaw ka ti rum rum hial a ni. 

"Min lo ngai em?" min nam rualin ka tawlh dawrh a, kan ţhian ho chu kan lo chiau hlut mai. Ka bula a lo ţhut te chuan a rim tui tak chu ka lo hip vang vang a, kar khat hnuah ka hmu leh ta hlawl chu a nia, a nawm dan a dangdai thlawt a ni. 

"I va reh rei ve" ka ţhianten an lo ti a, sawi tur ka hre lutuk hauh lo na a a hlim ber ka ni tho ang ka ring. A hmai a dam vek tawh a, amah pawh hmuh a nuam lehpek khawp mai. 

"Ka reh thawm a ring em?" te a ti vel a, hmeichhe ţhenkhat pawh chuan kan lam an lo hawi a, a ţhen chu min enreng chungin an han inhrilh ru ngei bawk a, hmeichhia hi chu kan zia a inang deuh ţham ni maiin ka hria. 

"Kan lo ngai tehmai che a nia" ka ţhianten awmze nei deuh taka an tih chuan a mawiah ka lo zak der ve vel a, ka duhna a rei tawh vang aniang ka zak tehchiam tawh lo a ni. Hmanni a ka hmuh kha chuan ka zak takzet a, chuti tih lohah chuan amah hrim hrim hi chu ka zah bik vak lo. Inhmuh loh vang vang hnua hmuh thut hi ka ngam chiah lo bawk a, hetianga amah berin min rawn pawh chuan zahna tur vak a awmin ka hre lo. 

"Ngati nge i lokal loh char char a? Na i nei leh tawh mi?" amah ngaihtuah deuh a ka tih chuan "Nei mai mai lo" a ti hluk a, "A dang chah leh mai rawh" tih zawm lehin ka thil ei lai chu a lamah a pawt phei a, a ei nghal daih bawk a. 

"Vanmalsawm ka ei lai a nih kha. I va han ţhing tak" ka ti hlar a, min enin a nui suk a, ka thusawi lai chu engahmah ngai lo ni awm takin a ei zawm leh a. 

Ka la puar bik loh avang chuan ka chah leh a, thil ei pahin min nghawk tel kher zel lehnghal a, a chimawm ve thei ngawt mai. 

A eizawh hnuah pawisa a dah a, a chhuak nghal nulh bawk a. A pawisa dah kan han en chu kan ka hau mai. Kan vaia min pek kep vek a tum emaw tih mai tur a ni. 

Pawisa ka ken reng lai chuan "Huh..no4 hralhna a nih kha. La duh suh Sensiar..an chhungkua hi maw i ute hoin an chhui ţep tawh ang. An thawmhnaw dawr pawh no4 dawr an tih kha" Pianan a lo ti a, an ţhian ho chuan an nui ham ham a, an ngaihnep zia hrilhfiah chawp ka ngai bik lo. An thusawi chu ka awih hauh lo na a keimahni kan inhriatchian tluk zetin miin min hrechiang a, min chik bawk ţhin tih chu chiang takin ka hria. 

"Hrechiang hawt lovin thil an sawi ngai lo. No4 te chu nangmah khan i vawrh a ni lawm ni? Hmanah pawh an man tawh che kha" ka ti let ve salh a, kan veng a mi a nia, ka hrechiang ve tlat. Midang ta angin sawi lo se chu jail a tang daih ang chu. 

"A zuar tu chu a ti ţhin te bawkin kan hria. Ruihna tur kan neih nan kan vawrh ve mai mai zawk alawm. I pawisa ken lai neitu te kha chuan an kawl hnem viau ang" a ti a, Piana chauh lo pawh hian an sawi tawh a, ruihhlo vanga hausa thutah an ngai vek a, Tintin-a chuan Pathian malsawmna an dawn vang a nia, midang ai chuan ka u ka ring daih zawk. 

"I sawi ang kha lo ni ta tehreng pawh nise mi zawng zawng hriat a sawi kher a ngai lo. I tluk loh vang a sawichhe chak i nih kha. Huat nachhan ţha deuh i nei tih ka hre bawk a. Nang angin meng hleithei lo khawpin a rui ve ngai chuang hleinem. Ang phuau a i mutthlu lai hi mi ka thawn darh vak mai tur a nia" Varin a rawn ti ta hlauh a, ani pawh hi ka ute nen school an kal lai aţang a inkawm tawh an nia, Boomer thlavang hauh chu a pe na khawp ang. 

Piana pawh a ngawi ve ta kur a, tui tih loh hmel zetin a eitur hmuam lai a ţhial a, kan tan a hmuhnawm takzet thung. 

Nitin class kan kal a, ber thla a nih tawh hnuah pawh kan khua chu a la lum viau tho a, Boomer nen pawh kan inhmu ve reng a, a graduate hma chu min bem a tum lo aniang min bia a, min fiam a, thil dang engmah a thlen tir ngai lo. 

Mut mai mai pahin phone ka en a, Boomer-a status ka hmuh chuan ka nuih a za angreng hle. 

{Vei loh theih loh,

Neih theih si loh.

Hnar phal miah loh,

Pawm theih si loh.

Kalsan theih loh,

Hnawl ngam si loh.

Awmpui theih loh,

Kuah phâk si loh. 

Thlah theih miah loh

Phuah zawm ve tawh mai ru}  a ti ve ngei a, inhmeh lo hi kan ti khawp a. 

{I inhmeh lo vel e} ka va tih chuan {Min ngai a ni maw?} a rawn ti daih a, hetiang mai mai te hi alawm ka tan a lawmawm em em ţhin chu. 

{Ngai mai mai lo} ka ti na a ka ngai tih chu amah pawn a hre tho ang. 

Ho mai mai sawiin rei tak kan inbia a hriat loh karin ka lo muhil aniang ka harh leh meuh chuan pindan chhung a eng uarh tawh. Ka lu bul lawkah ka phone a let ngat a, ka hmuam lo chauh a ni ber. 

Ka nu'n tih tur a sawi nghal zung zung a, thawhphan pawh a sawi theih ţhin loh. U Mala lah chu an in a thingpui in ve mai lovin kan inah kher a rawn in a, a ţhu tum bur lehnghal a, be chak viau lo mah ila "Kimkimi chu engtin nge ni zel?" ka ti hram tho a. 

"Ka hre bik lo le" beidawn hmel zet hian a ti a, police te ber an beidawn chuan kan tan beisei leh chuan tur a awm tawh lo tih a hriat reng mai. 

"Ruang takngial pawh in hmu si lo a, ruang chu hmu ula a thihchhan in hre thei ang a, thil dang pawh hriat theih a awm nual anga" ka tih chuan a bu nghat a, ka hriatah chuan a sawi thui duh chuang lo. 

"Kimkimi kha a hrang nasa lutuk an tia" ka tih chuan rum deuhin min melh a, "A nu takngial pawh amahin a awm ngam lo an tih kha" ka tih zawm leh phei chuan "Thu mak pui pui an sawi ngai lo" a ti hluk a, ka nu leh ka pi ten an ngaihven viau thung. 

"A hran rau rau chuan a ţangkai zawngin hrang se, a thattu te puang se ţha tur a nia" ka tih leh chuan "Ni e..ţawngţai mite hi min rawn tlawh se ţha tur a nia. A ngam awm der si lo a" ka nu'n a lo ti a. 

Ka nu hi lehkha thiam lo a nia, nu mawl mang ve tak leh taima tak mai a ni. Chutih rual chuan zirna a ngaisang a, ka ute ho pawh Tintin-a tih loh chu lehkhathiam vek an nia, U Zira phei chu computer engineer niin phaiah company ah a thawk daih nghe nghe a ni. Ka nu tak hi chuan a chhiar thiam a, a ziak thiam a ni leh mai a, sap ţawng phei chu a ngaihna a hre bik ţhak lo. Mahse, tawp chin nei lova hmangaihtu kan neih awmchhun a ni tho a ni. 

Insiam tur a inchunga ka chhoh chuan ka nu leh Tintin-a an lo inkaitho leh tawh a, an bei rei leh viau ang. 

Pakhat lahin "Laltinkhum i harh tawh reng kha. Eng nge i la tih?" pawn lam aţangin a ti lang lang a, kawngkhar a beng bur bur bawk. 

"Intih harh nan ka mu" Tintin-an a ti lauh a, nui tet tet chunga ka kalsawn hnuah pawh ka nu au ri chu ka la hre pha tho. 

Class kal tur a ka chhuak chu kawtah ka ţhiante leh Daizaui te an lo ding khawm laih a, an phawk hra hlawm a, eng emaw hriat an nei leh tawh ni awm tak a ni. 

"Vanmalsawma a thi tak tak a nia aw. Nizanah ni Mamin a sawi leh tawh alawm. Tunlai chu ka muhil thei ngai lo reng reng. Eng emaw thleng thut turah ka ngai ţhin a, thawm ka ngaichang reng zel" a lo ti leh tawh a, ka ngaihven tehchiam chuang lo. 

"Chubakah nizanah a nuam lo deuh a, pindanah a tawm tlat a, tuman kan kaitho thei lo. Tunah pawh a la tawm reng" tiin Boomer chanchin chu a sawi zawm a, ni Mami tih vel ai chuan ka beng a verh daih zawk.

"A bialnu chu ni tawh ila class kal lovin a bulah ka awm ang mawle" ka ti nuah nuah a, ka uang hauh lo bawk. 

"I zakthei lo" min tih te chuan ka pawm hmak a, ka nihna diktak a nih avangin thinrim thei pawh ka ni lo. Hmeichhe dang tan ka phal hlawl lo a ni mai. 

"Mipa ka hre hma lutuk hi ka inhaw ve ţhin tho" ka ti ta ringawt a, kal pahin kan thawnthu chhiar lai te kan sawi vel mai mai a, Thartei chuan "Keichu ka chhiar lai hi changtupa a pa mah mah a, a vin reng a ni tawp mai. Changtunu bulah khan 'ka hmangaih che' a ti vin sup a" a ti a, ho viau mah se kan nuih pui uarh uarh tho. 

Nilengin Boomer ka hmu lova, hetiang a nih te chuan attendance ah a tla mai anga sin mawle. Message ka thawn ve ngei a, min la chhang lo zui. Mipa hi hmeichhia aiin an lo induh thiam daih zawk a nih hi. A ţhiante ho chu an awm vek a, mahse anni ho hi chu engatanmah ka ti lo. Ka hmu hne hlei hlui zawk a, ka hmuh chak ber ka hmuh loh hi chuan ka nun a nguai nghal vek zel. 

Banah bazarah kan kal kawi a, kawrhnuai lei a ngaih avangin a zawrh naah min kalpui a, Boomer leh Vari te lo awm ve chuan mood an ti off nghal vek thei nia mawle. 

"Min zawng chiang" a lo ti a, "I zak lo e a" tih paha hmui ka tih pawrh khum chuan a lo kiai suk a, Vari nen berkher an ni lehnghal a, an inngaizawng ti tu pawh an tam mai. 

Kawr hnuai ka en kual dan dan laia "Eng nge i size?" dawr nghak tuin a lo tih chuan kuttum ka lo hmuh a, mak tih hmel deuh a min en hnuah "Ngawi teh u kan pa ka han ko lawk ang" a ti a, kal mai a tum lai chuan "Ka kuttum tiat chiah ka nei" ka lo ti sap a, ka lu tiat vel lai nei Vari a awm ve bawk nen, ka te chem chemin ka hria. 

"E..a nih chuan a hma puar a ngai a ni maw? Helaia hi a tam mai lo en rawh u. Tum burin kuttum min hmuh sia, buaina siam i tum emaw ka ti alawm" tiin dawr nghak tu chu a nui hak hak a, ka nuih a za ve viau lo. 

"Khawimaw i kuttum chu?" nuihza insum zetin Boomer chuan a lo ti sup a, lei ka chhuah a, tum barin ka kawr hnuai hak tawk tur awm ang chu ka zawng kual a, ka awm bawr a lan len theih nan a hma puar lian lian ka ha a, a tlawm thlak tak tak a ni. Dawt hmanga nung ang reng ka niin ka hria. 

Ka duh ang ka lak hnuah pawisa ka phawrh a, pawisa ka pek lai te chu min lo en reng a, min nuihzat viau mah se a hmel chu a ţha vawr tho. 

"I uite pahnih ahna tur chu a nalh bik e" tih pahin Zuali chuan ka thil lei chu a en vang vang a, ka nui ve tak na a dawr chhunga awm te khan ka rilru an la luah zawk. 

Inchhunga ka luh chuan ka nuin "Ţhenawmnu a lo leng a, police hoin Boomer-a pa an chhui dawn an ti. An enthlak rukna a rei tawh a, dap thut se ţha tur a nia. Ruihhlo zuar ho hi chu an ngeiawm ngawt alawm, chhungkaw tam tak hlim lohna thlen tu a nia" a ti zung zung a, ţhenawmah hian police a awm ve tho a, ka nu te hian an rinthu mai mai an sawi maithei bawk a, mahse ka awm a nuam chuang lo. 

Pindana ka luh rualin kawngkhar ka kalh a, Boomer ka call nghal bawk. 

"Aw kutphah tereuhte" nuihza aw taka a lo tih chuan "Miin an sawi a, ipa an chhui dawn an ti a nia aw. An enthla ru reng maithei a, form ha leh ha lo bulah pawh fimkhur hle rawh se. Lo hrilh ngei ngei rawh" ka ti a, phone ka dah nghal hmak bawk a. 

Kan vengah hian no4 vawrh ţhin man an nei tawh a, rinthu a man ngawt theih an nih bik loh avangin kha pawh kha an enthlak fe hnuah an man a, Boomer-a pa chu a lo inhnamhnawih ve emaw in hnamhnawih lo pawh ni se hrilh lawk ka duh hrim hrim. Ka nu te ţhianho hi an ţawngthei a, police in an thil tih tum an sawi lawk ka ring chiah lo bawk. Chuti chung chuan ka awm a nuam thei tlat si lova, a lo tel ve tak tak a nih chuan misual ka ţanpui tihna a ni dawn a, mahse pa ber an man chuan a faten hrehawm an ti dawn lutuk tlat a ni. Ka nu te lah hi an rindan apiang an sawichhuak a, thudik hre tak tak mang si lo hian rindan hi an thudik sawi hmiah hmiah zel bawk si, an che thei lutuk hi an ringhlel a ni ber mai. Boomer-a pa, Pa Muana hi lo inhnamhnawih pawh nise mi nawlpui rinhlelh theih a a awm ka ring lo hrim hrim a, chuvang chuan miin an ngaihdan an sawi kual mai maiah ka la ngai fan a ni. 

Thil ka ngaihtuah kual nasa lutuk leh bazar a ka mi hmuh te avang khan ka chau vek. Ka nu'n tih tur a sawi lo bawk a, intihharh nan mu hmak phawt teh ang. Buaina mut bo san ila, ka harh leh chuan a ngaiin thil a lokal leh tawh mai ang. 

CONT..(Zirtawp zanah ka zawm leh chauh ang aw. Chuan a regular tawh ang)