VANMALSAWMA-3

VANMALSAWMA-3

Ka muhil ta kha ka thawh hunah thil ţha deuhin min lo hmuak ang ka ti kha a nia, chutiang chu a lo ni teuh lo mai. 

Vanin min lo call harh a, Vari rai thu min lo hrilh lehnghal a, ka inperh tho chiang ngang mai.

"Engtin nge i hriat bik?" ka ti hluai a, thawhphan pawh a awm lo, ka phawk hra ringawt mai a ni. 

"Ka u in a sawi alawm. Vari kha rai chungin class a kal a nih kha. Thla hmasa pawh khan a rai daih tawh an ti. An pahnih khan an lo inzep a, i Ţhamama pawh dan pawnah a awm ve zan dawn a nih kha" uar zet hian a rawn ti a, sawi ve tur pawh ka hre lo. 

"Hman aţang tawhin an inngaizawng ang kan tih ziah kha. I awih duh ngai lo a, a ţhatna chiah i hmu a, an in lah a free ropui si, Vari a leng ziah kan tih kha. Class kal loh ni phei chuan an pahnih chiaha awm nilen chang te pawh an ngah alawm" a tih te chuan ngawi rengin ka ngaithla a, ka bialpa a ni hauh lo, mahse ka duhna a rei tawh em avangin ka inti ta tu ve a, ka nat dan a nep phah chuang lo. 

"Sensiar" ring angreng taka a tih chuan "Missionary in ka kal daih mai dawn mawni" ka ti chhuak sap a, a lo nui hak hak a. Vari ute leh Vani ute hi an inkawm ţhin a, tuna a thu lo sawi hi a dikah ka ngai hmiah bawk. 

"Tintin-a lo zawt ve chhin rawh. A thu hrimah Vanmalsawma pawh hi i duh zia a hre reng a" a tih lai chuan ka lo pawt chat a, "Chu chu lawm..min duh ve deuh anga ka lo ngai ţhin te kha ka zak. Min duh loh zia chu ti hian a hriat mai a, kohhran pawn phuar ngei ngei rawh se, phuar hlawm tawl rawh se" ka ti tan tan a, ka ngei dan chu pui tak a ni. Ka rilru a na tel tho bawk si. 

Tintin-a lo haw chu pindanah ka zui lut a, a rui lehpek khawp mai. A tshirt hlipin khumah a vawm hlawm tawp a, computer dawhkan hmaa chair a a ţhu hnawk te chu ka en reng phawt a, meizial a ţan chuan sawi ngai lovin tukverh ka hawng thuai thuai a, khum a ka ţhut veleh ka lam hawiin chair chu a her tir a, kan inhmachhawn ran mai. 

"Eng nge min zawh duh?" a ti nghut a, meizial a pak khu zui tual tual bawk a, nuţa te bula mipa chanchin sawi hi a nuam hauh lo; laizawn ka awt ve ţhin viau reng a ni. 

"Vari a rai a mi? Lo rai ta tehreng pawh nise a fa neihna pa hi Boomer a ni em?" hlauthawng chung chunga ka tih chuan lu a lo bu nghut a, hriat sa mah nise ka phu zawk thei tho nia mawle. 

"A ni maw?" ka ti nawn leh ngat a, "Ni e. Ţha deuha lehkhazir a ngai tihna a ni mai" a ti dam vei thlup a, inti fel vel lutuk hian ka chhipah a kut a rawn nghat a, zawitein a kut chu a ti che zui det det a. 

"Engtin nge i hriat? Vari sawi nge Vanmalsawma sawi i hriat?" ka tih chuan "Vari" a ti phawt a, chumi hnuah "Hmeichhe ri thawt thawt leh ţawng tam lo a nia, a lerh lo bawk a, dawt a sawi lovang. Dik lo deuh a puh ngam ka ring lo. Boomer pawn phat ngaihna a hre chuang lo a. An lo in vawrh ve zak zak tawh tihna a ni mai" a ti a, ka tawt nghal ţun ni berin ka hria. 

"A van mak em em" ţah aw ţuau hian ka ti thei ţawk a, ka u chuan nur nang a min lo enin "Star mai mai ţah pui suh. Nakinah arsi lem lem ka la leisak ang che. Krismas a ni mai dawn a, kawtlaiah kan khai eng uarh dawn nia" a ti mawlh mawlh a, ka khawhmuh a phe deuh a, ka mittui a tling pam tawh ngei ang. Ka duh ve em a ni. 

"An innei dawn em?" ka ti leh ţiau a, hahthlak tih hmel zet a min en vang vang hnuah a thaw hawk a, "Nei ve ang chu..ka hre lo le" tih hluk pahin a dar a kan uk a, ka biangah ka mittui a luang thla tawh tih chu a lum pap danah ka hre thei a, ka va han over ve chiang tak. Mahse kum3 dawn a rukin ka duh ve ngat ngat tawh a, ka inthiam ve tho. 

"A va mak..ţap suh ka tih kha. A chhiatna lai ngaihtuah rawh, a tlu tur meng phar vel lai te mitthla la, a ham bui bui lai te, a chhe lai hlir ngaihtuah la i tuar dam thei mai ang" a tih pawhin awmzia a awm lo. Ka u bula ka awm vang nge mawni ka rilru a no tlat a, Tintin-a ngat phei hi chu englai pawh a ka zui a nia, a inkhawm tur te, a inkhel tur te ka zui a, ka nu sawi dan phei chuan school ka luh ve hma pawhin a school bang ka nu rualin ka hmuak ve ziah a, ani hian rit min ti viau mah se min paw haw pur pur tho ţhin a ni awm e. Ka u dangte ka hlauh em em laiin Tintin-a bulah chuan ka pangchang ţhin a, chuvang chu aniang tunah pawh ka ţah a chhuah tak tlat ni. 

"Engtin nge maw ka tih dawn che le?" a ti hulh a, a beidawn hmel viau a ni. 

"Ţap tawh lo la zanah a ha hmai ka lo hawn ang che. An inneih niah nui kaw phût rawh se" uar zet hian a ti leh a, ka insut hraih a, ka kawr ban chuan ka hnar leh biang ka hru tawn zak zak bawk a. 

"Vari nen an inngaihzawn te chuan a hma daih khan min hrilh tawh ta che. Min be ţha thei si, beisei nei deuhin ka lo awm ve char char zel a" ka tih chuan "Aa..i chhe per pur emai a" a ti deuh hlut a, meizial a nawr hlum a, dim lo deuhin ka biak a rawn tuai tawk tawk a, ka hmai puma a tuai tawk tawk hnu phei chuan ka hmai vun a thip hlar mai. 

"Lehkha ţha deuhin zir la, nakinah school ah te i la thawk ve ang a, a fate zirtirtuah i la ţang ang a, i vaw zawt zawt zel dawn nia" a ti a, pangngai deuh a min hnem dan pawh a thiam lo. Kan inhau ngun a, huat chang ngah viau mah ila ka pangchang na ber a ni leh tho ţhin si. 

"Keichu ka rilru a na e" ka ti a, hmeichhe dang tana phal loh sa nak laiin kei ni lo hmeichhe dang nupuiah a nei ang a, a'n kuah vel dawn chu a nia, ngaihtuah zawng ringawt pawn ka rap lutuk ringawt. 

"Ka kawchhung a na vek" ţap pur a ka tih leh chuan "Pum damdawi ei a ngai a nih kha. A dam mai ang" a ti awlsam et a, nuih pawh a za thei lo. 

"Engtikah nge an inneih dawn?" ka ti leh hram a, a hriat loh thuin min chhang a, eng eng emaw sawiin ka in ngaihtuah lungpuam a, ka u hmaah ka ţap hliam hliam mai. 

"College te han zo la, Aizawl ah i awm daih ang a, i hre zui tawh lo hrim hrim ang" a ti a, chu chu ka duh dan chiah a ni.

"Tuna insawn nghal ka duh. Kan veng a inhnaih si, ka insawn vat loh chuan ka hmu reng mai dawn a sin" ka tih chuan "A thu lo ber min dil a, ţap reng kher lo teh. I mittui i tih tlak nasat chuan ors i in tluk tluk mai tur a sin" a ti a, keini ang rual hian atchilh zawng kan lo pe na phian a nih hi, ka theihnghilh leh vat theih pawh ka ring lo. Mipa han inthup thiam zia hi chu aw..a bialnu rai veleh ka hrechhuak ve chauh chu a nia. 

Tintin-a nen a kan inzui thla chu ka nu'n "I va bui lek luk ve..in inhau em ni a? Laltinkhum, engtin nge i nau i tih a?" a lo ti nghal tan tan a, ka u chu a lo ner sawk mai. 

"Ka chokeslam a nih hi" ngaihsam hmel fe a a tih chuan "Engtin a?" a ti hlar a, kan unau chuan min en tawn zak zak bawk. 

"Ka rek kang a, chhuatah ka paih chawrh" a tih chuan ka pi nen ka hauin min en a, ka sam a pawr angreng bawk nen, insual buaiah min ngai a nih hmel. 

"I va rapthlak em em ve le. I nau a nih bakah hmeichhia lehnghal, i nasa emai. Kan kohhranah camping a awm dawn a lut ve ngei ngei ang che. Zu i heh si, insual i hrat si, i leng reng a, inkhawm ţha peih bawk si lo, hetiang a nih chuan thi thut ta la a rapthlak lehzual dawn lutuk. Vanramah chhungkuain thla kan la ve thei nang" a ti hlaih hlaih a, ka ţah chhan sawi a rem loh miau avangin ngawih ka chuh a, engmah ka sawi ve duh ta lo. Sawi mah ila ka nu chuan a hau dawn tho tho. 

"I status ve te lah hi thu ţha pui pui, i tih theih loh tur hlir a nia, hetiang hmang hmang ve suh, i inhmeh ve lo" ka nu'n a tih chuan a ning ta deuh aniang. 

"Nangpawn pangpar lem i hmang chuai chuai alawm. Leiah ka phun che ang a i par thei bik dawn a mi?" a ti hluk hluk a, ka nu meuh pawn chhan ngaihna a hre tawh lo aniang "I chhe liau luau" a ti hlak a, pawnah a chhuak ta daih a. 

Ka pi in "Khatiangin i nu ti ve ziah suh" a lo tih ve dek dek te chuan "Nangpawh thingkung lawn lai te i hmang ziah a, khatiang kumah khan thingkung i la lawn thei a mi? Kawmthlang thingkungah khuan han lawn teh, ramhuai hnathawh emaw an tia nga an vaw thla tawp ang che chu" a lo ti leh hluk hluk a, "I putean ka sim chât a hmang daih ka tih kha mawle" a ti niah niah a, chhan vak ngaihna a hre bik lo. 

"Sim chât pawh a ni lo. Mi i biak theih loh lahin ka phone tui a zo i tia, mi hi zuam bik viau suh u. In ţhat lohna lai sawi tur ka ngah ve tho a nia" a ti khur khur tawh a, Boomer vangin a mood a dik chiah lo tih ka hrereng a, ka piin a chhan leh hmain chokaah ka nawr lut ta daih a. 

Ni a liam ve zel a, Krismas te kan hman zawh chuan ka Ţhamama te pawh an insawifel ta der a, ka u hnen aţangin chanchin ka hre ve ţhin si a, a hrehawm duh khawp mai. 

Class kal leh inkhawm tih lohah chuan inah ka inkhung chawt a, Boomer chu a status takngial pawh ka en duh ngai lo. Ka ţhiante lah hian sawichhuah leh zeuh an ching a, diktak chuan a hming ringawt hriat pawh nuam ka ti rih tlat lo a ni. 

Kumthar kan han chuankai meuh chuan Kimkimi chanchin pawhin ngaihven a hlawh zui tawh lova, tuman engmah an sawi tawh ngai lo. 

Pangngai takin class kan kal a, nupui nei tur e ti lo chuan Boomer pawh nitin a lokal ve ţhin. An la naupang a, zirlai an ni bawk nen, man in hlan a inhruai tawp an ti deuh niin ka hria a, han innei se, mo ţhianah han ţang vel se a tih avangin ka u phei chu a phun nasa hle nghe nghe a ni. 

Pa Muana chanchin pawh sawi a awm tawh ngai lova, police hoin an chhui ta nge chhui ta lo pawh kan hre lo, ka nute ţhian ho lahin engmah an sawi tawh ngai si lova, thil sual a ti lo nge amah aia tang tur nei khawpin a inrawlh thuk tawh zawk tih te chu amah Pa Muana chauh lo chuan a hre lovang. A pa berin thubuai a neih tak lohah chuan Boomer pawh a thawveng ve hawkin ka ring a, nupui pawh tluang deuhin a nei thei ang. 

"Hman aţangin ţhian an ni tawh a, mipa leh hmeichhia chu ţhian an ni reng thei lo an ti ţhin a, Boomer leh Vari ah hian a chiang khawpin ka hria. Keichu hmangaihna hi nupa a insiam hnuah bak a awm theih ka ring lo a, mahse i duh viau tho bawk sia. Tunah hian Boomer pawhin a duh ber a nei dawn a, a hlim viau ang. Nangpawh Sensiar, a hlim chuan i hlim ve ang tiraw?" Vani chuan a ti seuh seuh a, ka ţhian dangten min en ţhap bawk a, sawi tur a vang duh khawp mai. 

Ka ngawih vang vang hnuah "Ka hlim pawh ka hre lo" ka ti ban charh a, tui ka in leh te te a, ka hmui ka tuai thuak bawk a. 

"Mahse tihbuai tumna pawh ka nei chuang lo. An innei rau rau a nih chuan chhungkaw hlim tak din se ka tia, inţhen tawh lo se ka ti bawk a, ka rilru a na viau na a awm hrang leh tur chuan ka duh chuang lo" mumal lo deuh hian ka ti a, hrehawm ka tih rualin mi inkawp ţha lai pawt ţhen tur em chuan ka huaisen tawk lo a ni. 

"Hmabak kan la ngah alawm. Kan hma hun a êng vek a, min duh tak tak tu kan la tawng dawn chauh. Pasal neih phei chu kan la hlat lutuk ringawt. Vari te pawh hi rai lo se chu an inneih ka ring lo. Boomer hian tlangval a kham dawn lo a, an la inţhen leh maithei a ni" Zualin a lo ti ve sep sep bawk a, ka ngui em a, ka ţhiante pawh an ngui ve vek niin ka hria. 

Zankhat chu {I lo chhuak ngam em?} tiin Boomer chuan min rawn bia a, chhuah loh ka tum zet na a 'naktukah chuan Vari nen an inhruai tawh awm sia' ka tih deuh avangin inhnuaiah ka chhuk a. 

Ka chhungte an lo la meng ţhap a, rin ang ngeiin "Khawiah nge i kal dawn?" an lo ti a. 

"Dawrah ka kal lawk dawn. Pen hman tur ka nei mumal tawh lo a, ka va lei teh ang" tiin dawt ka sawi a, ka pa'n pawisa min pe vel a, ngah viau mah ila ka lei ngei a ngai ang. 

Gate aţanga ka chhuah chuan Boomer hmuh tumin ka hawi kual a, "Helamah" tih ri ka hriatna lam chu ka hawi vat a, a thim chin aţanga lo chhuah a tum chu "Lo chhuak suh. Ding lang lovin ti khan awm rawh" ka ti vat a, keimah zawkin ka va pan a. 

"Dawr kal tur angin ka lo chhuak a, rei thei pawh ka ni lo" a hma a din pah hian ka han ti a, a thim em a, a hmel pawh ka hmu thei lo. 

Thim a ti deuh nge ni ţhenawmte in lamah min kai phei a, thawm siam lovin ka zui ve zel a, an bang nghengin a ding a, eng a dul deuh ruih na a a hmel ka hmu chiang thei tawh khawp mai. 

"Eng nge i lo tih a?" zawi te a ka tih chuan "Ka lo nghak che" kei aia zawi mah zawk hian a lo ti sup a. 

"Engati nge i lokal thut a? Min ti hlauthawng zawk dawn alawm le" ka ti a, ka kut a la vuan reng a, nuam ka tih lohna te chu ngaipawimawh lo deuhin min pawt hnai a, kan insi lo chauh tawh. 

"Min pehhel char char chhan hi ka hre duh. Ka rindan hi a dik ang tiraw?" ka banrek a hum run chung a a tih chuan "I rindan kha a dik ni a i hriat chuan min zawh kher a ngai tawh hleinem" ka lo ti a. 

Hneh zetin min kuai her lawp a, bangah min nam bet zui nghal rawk rawk ni berin ka hria, a taksain min khuap nghal run bawk a, nupui nei mai tur chu ni lo se nuam ka ti ngawt ang le. 

"Engtin mah min ti suh aw..nupui i neih tawh dawn kha" amah pawh ka en ngam lo. Chu chu a ngaithei lo aniang ka khabe ah dawmin min kuai dak a, "Min en rawh" a ti zawi sup bawk a, mipa in hetiang em em hian min la hnaih ngai lova, ka zam takzet a ni. 

"Thuruk a tam a, lang lo tur a thuhruk a awm thei lo tak tak a nih chuan i la zawng chhuak dawn nia. Chuan ngaihdam ka dil che a, mahse ngaihdam kher ka phut lo" a ti a, hriatthiam a har khawp mai. 

Ka khabe la dawm reng chung chuan a kutzungpuiin ka hmui a nul a, "I nundan ngai khan nung leh rawh. Keimah vang mai maiin hmuh hrehawm khawpin nguai tawh suh" min ti a, a mitmeng thim khup leh dul ruih a beidawnna langchhuak chu ka hmu ve theiin ka hria a, a hrehawm a, ka lanchhuah tir vak ngam bawk si lo, nupui a nei dawn rau rau a nih chuan min kalsan vat vat zawk se la ka ti. 

"Kal tawh rawh" ka tih chuan rawn kun hniamin ka hmuiah a fawp a, ka tan chuan a vawikhatna takmeuh a ni. Chhan let ngaihna ka hre lova, engtia lo dawnsawn tur nge pawh ka hre lo. Ka la tih ngaih loh a nih avang chuan ka tha thlengin a khur der der thei hialin ka hria a, a inlak hran hnuah pawh ka la meng ngam chuang lova, a nui ri te pawh hrereng mah ila ka che ngam tawh der lo.

"Mangţha aw" a ti a, rilru hrehawm ţeuh a ka awm lai chuan min kalsan a, pen ri ka hriat loh hnuah ka meng a, ka ţap vak chak lutuk ringawt. 

Dawrah kalin pen chu ka lei ngei a, inchhunga ka luh leh laia ka nu'n "Naupangte a nupui pasal in neih hi chu a ţha lo a sin. Inţhen an awlsam bik a, rilru a puitlin hma chu nupui pasal neih loh tur" a tih te chu ngaihthlak a hrehawm leh zo vek tawh. 

Inchungah ka chho a, a thusawi ho kha ka hrethiam hauh lo. Thuruk te kha a tia, thudik inphum ru te, mahse ka hriat tur a nih loh chuan eng thudik mahin min rawn pan tawp lovang. 

Vari nen in khata an chen dun hnuah pawh class a lo la kal reng a, ka tih ziah danin ral aţangin ka thlir ţhin a, a awmdan pangngai viau mah se min fawh hnu phei kha chuan ka pangngai ve hleithei meuh lo. 

Varin naute a neih chuan kan en ve a, ka ţhiante ho chuan a sam te an han khawih vel a, hmuh hmelţhat ka tum lutuk nge an naute chu rin aiin a hmelchhe reuh a, a hmuh dan an zawh lahin Boomer chuan "Hmel pawh a la neih loh kha" a ti mai a, a ţhiante ho pawh an nur nang mai. 

"Vari chu i ţhat phuk phuk nen aw" an ti a, an demawm hran loh an kum a la nau bakah puitling lo chi an ni ve hrim hrim. 

Pawn a kan chhuah hnuah pawh Tintin-a chuan "Ţhianpa fapa chu a..a ţah phei kha chuan chanchinbu hmeh chuar a ang" a ti mauh mai a, Vani te hoin "A sam a kir miah lo. Boomer te chhungkua hi an sam a kir vek sia" an lo ti ve bawk a, a fa a nih an ring chiah lo niin ka hria. 

"A nu a chhun aniang chu" ka lo ti a, fa neih pawh hi a hahthlak ang, a pa a chhun lo an tih chuan a inthlahrunawm dawn emai. 

"Tum loh dan deuhin ka hmu a, an siam laiin inrawlh ve lo mah ila thin a rim ţun mai" Patean a lo ti ve bawk a, an va han mawl tak em. 

Varin naute a neih hnu thla tam pawh a liam hmain ka ute ho chu an graduate a, pass ţha lem lo mah se a pass ve avang hrim hrimin ar an talh hial a nih kha. Tintin-a phei chuan bawng talh a ţhenawm khawveng leh yma hruaitute chaw eia sawm a beisei a, mahse chu em chu an ti deuh aniang bawng talh aiah tiin bawng sa leh bawng sa tin an lei a, ţhenawmte chu chaw eiah kan sawm ta tho kha a nia. 

An ţhian ho chuan tuman zir zawm an tum lo a, Boomer chuan an dawrah a u a pui dawn an ti a, midang chuan engmah an la ti lo. Keini ţhian ho pawh nitin class kan kal a, mipa ka ngaihven duh tawh lo. Ka ţhianten mipa hmelţha an sawi te hian en loh luih tlat ka tum ţhin a, midang an neih a a nat theih zia ka hre tawh a, ka duh tawh lo reng reng. Pasal nei lo law law tur a inserh thianghlim ka duh rum rum a nih kha. 

"Sensiari pawh a graduate ve hunah chuan Aizawl a awm a ngai ve ngei ang a, mahni a in luah kan phal dawn der si lo a, hostel a i awm a la ngai ang" ka pa'n a tih chuan ka ţeu nghal hlar mai. 

"Ka duh reng reng lo. Hostel a awm ai chuan mahni chauh a in luah ka duh fe zawk" ka ti tan tan a, "Ka awmpui dawn che nia" Tintin-an a lo tih ve vat laiin U Mama chuan "In sawi hla emai" a ti duh lek chauh a, ni leh thla a ding reng ngai lova, ka kal tluan chuan ka graduate ve thuai ang. 

Phaiah Boomer an hruai leh tawh tih ka hriat chuan ka ngaihtuah ve khawp mai a, Tintin-a a buai lehzual a, a be deuh reng a, chanchin ka zawh lahin "Ani Mami nen an kal a, a ngaihtuahawm loh" a ti mai zel a, a chanchin ka ngaihven lo lui char char a, a lo damlo leh vak em maw ni. 

"An fanu saw Boomer a chhun pawh ka ti lo. Vari vun a var tehreng nen a hang reuh bawk sia" ka tih chuan "Ngawi mai mai teh" a ti hluk a, Boomer biak a tum a, a biak theih loh avangin a vin hlur reng a, a bula awm a hahthlak tak tak a ni. 

"Nau an neih hnuah an vengah i kal leh tawh mi?" a ti ve ngei a, "Kal lo mah ila U Daizauin thlalak min lo thawn ziah alawm" ka ti a, amah ka hmuh hian ka rilru a la na deuh tlat zel a, chuvang chuan hmuh loh tawp rih ka duh. Ka awmdan hi a hrethiam ve aniang ani pawh kan inah a lokal tawh ngai lova, ka hmuh turah a in lan ţalh ngai lo. A chang chuan 'Min ngai ve ţhin tho em?' tih mai te ka duh rum rum zel a, mahse ka bialpa a ni miau lova, ngai anga ka awm chuan zakthei lo min ti viau ang. 

Ka u in min hrilh ţha duh mang si lova, inrinni chhunah Daizaui leng turin ka sawm a, ka ţhiante pawh an lokal ve a, veng danga awm chhun Thartei pawh a rawn tel ve a, hrehawm tih viau chang pawhin ţhiante bulah chuan kan nui reng thei zel tho chu a nih hi. 

"Boomer chu a lung bawk kha em ni?" kan tih chuan Daizaui chu rilru hah hmel tak hian a thaw deuh halh a, "Ni e mawle. Ka lo hre ve miah lova, ka ţha tawh a tih ţhin lai pawh khan an lo buai ru viau zel tho aniang ka ring. Zan lama a buai phei chuan inhnuaia ka mut daih avangin thawm ka hre ngai lo hrim hrim a, mahse a nasa leh tawh aniang phaiah an kalpui leh tawh chu a nia. Hetiang ho hi chu an ri thut zel a, ka hlauthawng tak tak a ni. Tunlai chu card den pawh a lang lo reng reng" a ti mawlh mawlh a, a meng khup lap a, a rilru a hah hmel viau tak tak mai. 

"Ka khawngaih e..diktak chuan nupui a nei tawh na a ţhalai a la nia, lung lam ţhat lohna in a tibuai reng bawk si, a kum a la tlem vang tak hian a lainatawm lehzual a" Zuali chuan a ti a, kan lo pawm pui hlawm khawp mai. 

"A nupui nen hian nupa pawh an ang lo. Han induat hliau hliau te hi an nei ngai lo reng reng. An zak nge pawh ka hre lo, kan inmelh a, an nui leh ringawt zel a, dawih deuh ţum phei chuan an awmdan hi ka hlau zawk ţhin. Ni Mami te lah hi kan inchhungah Vanmalsawma a awm reng chung pawhin ka pu nen an inbiak hian Vanmalsawma an ti ziah lehnghal a, kan Vanmalsawma hi chu Boomer tih bakin an sawi ngai si lo, ka chhungte ho hi dam reng chung hian an hrangin ka hria" a ti bawrh bawrh a, thu chiang engmah a hre bawk si lo, kum khat tal tawp chu hrechiang chak deuhin kan awm reng tawh. 

"Laltinkhuma saw ţhutthlengah a mu leh tawp tawh a, a rui lehpek a ni maw? Zan pawh hi a nghak thleng hman lo reng reng, tlai aţangin a rui chhur zel a" ka nu'n a ti hlak hlak a, chhang lem lovin kan nui tet tet hlawm a, ka nu kalsawn veleh Zuali chuan "Tintin-a hi chu a hmel hian a chhan ka ti mai. Hmelţha viau lo se chu kan ten ngawt ang. Rui peih si, hnial hrat bawk si" a ti a, dik an tih zia an lo sawi sap sap hlawm a, fak tel lovin rel ringawt se chu a rukin nuam lo ka ti leh ngawt ang. 

"Tintin-a awmdan saw a dik lo a nia" ka nu'n thlaphang taka a tih chuan kan tho nghal dual a, hrilh chawp ngai lovin a mutna lamah kan tlan phei a, a hming a kan koh te chuan a meng kuau na a min hmu ang pawn a awm lo. 

A ban vai vak vak pah hian "Vanram ka hmu..vanram" a ti chul reng a, awih lo mah ila "Vanram i hmu maw?" kan ti tho a, kan thusawi engmah a hre lova, "Vanram ka hmu" tih ngawtin a rak a. Diktak chuan thi dawn pawh nise vanram berkher chu a hmuh kan ring lo tlang a ni. 

"Tintin..min hmu thei em? Min han en teh le" hnai taka bih chunga ka nu'n dam deuh a a tih chuan "Hnar kua ka hmu..hnar kua" a lo ti leh a, ka nu hnar vang ve hriain Daizaui a nui duai duai mai. 

"Laltinkhum, lem i chang leh pek tawh a ni maw?" ka nu'n a tih lai chuan ka nu bula Vani kun ve chu a nghawngah a kuai a, "Vanram ka hmu hei Vanrami ka hmu" tih pahin a tho a, tal chhuah a tum nasat lutuk na lamah Vani hmai pawh a sen hlar mai. 

"I u hi chu ka ning tlat..ka hming hi nalh ka tih vak loh nen min chhaih nan a hmang reng a" a ti nang nang a, "Laltinkhuma leh Vanrammuani an innei a an la ti mai tur a sin" kan tih te chuan min melh ram ram a, ka u chu a duh lo ve nasa. 

Boomer te lo haw chu ka ţhiante chuan an kan a, ka u tak pawh inah a awm tlem leh viau tawh. A ţhianpa te inah a tap chawt a, a kalsan ngai mang lo tih theih a ni. 

Keichu tlanchhiatsan duh ka neih miau avangin lehkha ka zir ngawrh a, Aizawl a awm theih ngei ka tum tlat. Boomer chu intihbuai tir loh hram hram ka tum a, ngaihtuah loh ka tum nasa ve ţhin hle. Khaw khata kan awm loh hunah phei chuan ka ngaihtuah tawh lo hmak thei ang a ka tia, kan khuaa awm reng ka tum tawh lo bur a ni. 

Dam ţhat chuan kum a vei ve zung zung a, hmasawn lem lova ka u a then mai mai laiin keichuan BA ka zo ve ţep tawh a, Boomer a damlo nasa telh telh bawk. Hospital leh in an kar tawn sek a ni ber a, exer takngial pawh a la peih tawh lo an ti mai a, vawikhatmah ka la kan ve lo thung. A dam leh dawn ka ti tlat a, hmuh loh dan phet ka ngaihtuah bawk a, ka hmuh chuan ka rilru a na mai mai dawn tih ka hria a ni. Mahni hma ka sial a, nakin a ka nat loh nan a mahni hmasial chu pawi tihna ka nei hauh lo bawk. 

Rilru bet lo deuh a lehkha zir chang nei mah ila ka ti lui zel a, ka beng hupin ring deuh deuh ten ka chhiar a, U Daizaui lahin leng turin min sawm reng a, ka ţhianten min nawr reng bawk a, chuti chung chuan ka hmu ngam tlat lo. 

"Hmanah pawh a damlo vak zel a, a dam leh mai ang. Thi tur chu nise hmanah khan a thi tawh ang" ka ti mai zel a, ngaihmawh lo deuh anga awm ka tum a, ka ţhiante chu sawi loh, keimah pawh ka inbum a ni. 

"Thla 6 hnuah ka graduate ve tawh ang a" tiin ka nu chu hlim deuhin ka hrilh a, inchung zawlah pangpar kan khawih dun a, khua a vawt vur tawh a, Krismas kan hnaih leh viau tawh a ni. 

"Dam chuan kum a kal chak alawm. BA chauh ni lo, MA pawh i zo ve vat mai ang" min ti a, ka kal tluan vak an rin loh laia ka tluang ta phian chu a lawm ve hmel khawp mai. 

"Aizawl a awm a ngaih hunah chuan nangman min awmpui mai rawh. Tintin-a pawn taxi te a khalh ang a" ka tih lai chuan kan ţawng a hre pha ni ngei tur a ni "Taxi khalh ai chuan parlour a thawh pawh ka duh zawk. Ka ngaih hniam vang pawh a ni lo, bike hi chu ka khalh par par thei a, ke pali nei chi ka rui ţhin tih hre ta che" min ti deuh nek a, taxi leh sumo ah kan chuang khat a, motor a rui ţhin tih ka lo theihnghilh pek a ni. 

"Parlour a hmai chul hliau hliau chi i ni lo hi a pawi ngawt alawm. Tun a i nundan hi chuan rilru a ti hah a, hetianga nun reng ai chuan tuai daih mahla pawi ka ti lo" beidawn hmel zet hian ka nu'n a lo ti a, hauh vak dawnin ka pa'n a ţan tlat zel bawk si, kan chhungkua hi inlungrual ang deuh a lang siin kan inlungrual lo khawp mai. 

"Ka awmdan apiang i hua alawm. Tuai mah ila ka mawngtamah i sik vâwt vâwt zel tho ang" a ti a, nui vur vur chung hian inher a, engthawl hmel zet a a kal te chu ka nu chuan "A khawngaihthlak zawk. A nun a siam loh chuan nakinah a la rethei dawn lutuk" tiin a sawi zui a, hlawh ka neih ve hunah ka chawm vek mai ang. 

"Boomer ICU ah an dah lut" an tih ni chu Krismas tuk a nia, chaw pawh ei lovin damdawiin lamah ka u a kal nghal a, chaw ei kham a kal ve mai ka tum chu U Maman min lo khapin "Inkhawm rawh" min ti a, ka hnial ngam bawk si lo, lunghnur takin ka insiam a, ka ţhiante ka biak lahin "Keini chu damdawiinah kan kal dawn. A chhungte pawh an thlaphang vek a, an khawngaihthlak alawm. Boomer lah hman aţanga kan hriat tawh a nia, a buai zual aţangin kum hnih dawn a ni tawh, ka rilru a na ang tih vang mai maiin vawikhatmah i la lang ve lo a, kan chhungte chuan inkhawm turin min ti ve tho a, kan hnial mai alawm" an ti a, min dem tih hai rual a ni lo. 

"Ka inkhawm phawt anga ka lokal dawn nia" ka ti a, ka sawizawh rual rualin Vanin phone a dah a, an lungawi loh hmel khawp mai. 

Inkhawm bana ka ţhiante ka biak leh chuan ţap ri ka hre hmasaber a, an ţawng hma hauhin ţap ri ringawt pawh chuan ka thauah min man a, chanchin ka hriat hma hmain ka tha a khur a, ka awm hi nain a vilh nghal ngut ngut ni berin ka hria. 

Tintin-a thinrim au lung lung ri ka hriat phei chuan ka ngaih a ţha lo lehzual a, phone chu ka dah a, ka tha khur zualpui a reh hnuah ka call nawn leh a, Vani bawkin min lo chhangin "A thi..nichin lawk khan a thi. A ţha zawk alawm tiraw? He natna hi a pianpui tih theih a nia, ţhiante tih ang pawh ti ve thei lovin a awm reng a, Vari fa pawh hi a fa a nih ka ring lo. A nuam tih em em inkhelh pawh a bansan a ngai a, a thi hi a ţha daih zawk alawm. Ka ţhamama i tih ve fo chu a kum tel meuh damdawiin luh reng ngaia a awm pawhin hmu miah lovin i awm thei a nia, i hmu duh lo te hi a ţha lutuk" a ti mawlh mawlh a, rilru mumal a pu lo chung pawhin min rawn dem tho a, ka dinhmunah chuan ding se hmuh loh dan an ngaihtuah ve tho ang.

Vui naah chuan ka kal ve a, a hmel chu a hma ang reng khan a ţha a, tui deuh a muhil hi a ang ber a, a ruang pawh chu ka en rei ngam leh chuang lo. Kuang a an dah hnuah chiah Tintin-an a kalsan a, a ţap hauh lo na a a na takzet tih a hriat a ni. 

Keipawh ka bang bik lo, nupui a neih ringawt pawn ka na a, a graduate hnuah ngat phei chuan ka hmu duh tawh hauh lo kha a nia. Ni Mami phei chu a ţap nasa hle a, Daizaui pawh a bang bik lo. Ka hlau ti reng siin a thih meuh chuan a tuar khawp mai. 

Lehkha pawh ka zir lui thei ta bik lo a, rilruah Boomer ringawt a awm a, Tintin a bawraw zual sauh bawk nen, hah a dam lovin kan khua chhuahsan ka chak lehzual sauh a ni. 

Daizaui lo leng pawh chu nidang angin a ţawng zuah zuah ta bik lo. Dawhkana a kut dah chu a suihzawm tlat a, an chhungkua mak a tih thu bawk a sawi leh a. 

"Thuruk an nei chiang alawm. An inah hian ka awm rei ve tawh a, eng emaw thup an nei chiang a ni. Ni lo se chu ni Mami leh ka pu te hi an inbe ru reng lovang" a ti a, Boomer ber a thi tawh a, thlanah an phum a, dam leh thei a ni tawh lo tih hriat sa a nia, chuvang chuan an chhungkua leh an buaina ka ngaihven peih tawh lo. 

"Thla 7 vel lek nghak leh la, Aizawlah ka awm dawn alawm. Ka nute kan dil anga, kan bulah i lo awm daih dawn a nia" ka tih chuan a mitmengah phurna a langchhuak thei hialin ka hria. 

"Phal se ka ti e..diktak chuan ka chhungte hi ka ţih ru deuh tlat a, ka nu a belh tlak bawk si loh. Boomer lah a thi ta daih bawk sia, mahse maw ni Mami ten Vanmalsawma tih hming an lam reng kha chu a chhan ka la hrechiang chak tho. Awii...hriatchian chak ka ngah lutuk hi ka hah vek thei" a ti malh malh a. 

Khawvel hi a mak ve ngawt mai, thil a thleng phut phut a, a ţhen phei chu awihawm loh tak tak a ni lehnghal. Ram dang a thleng ţhin kan rama thlen ve loh ngawt thu a awm bawk si lo. Tualthahna rapthlak tak tak a thleng fo a, chhungkaw ţhenkhatin thuruk mak leh 'a awihawm loh' kan tih hial tur khawp a rapthlak an kawl bawk a, reilote chauh emaw ka tih laiin kum lah chu a liam zung zung a, tunah lah rin loh deuhin Boomer a thi leh a, U Daizaui lahin Vanmalsawma a lo ti ve sek bawk a, heng zawng zawng tlanchhiatsan tluka thlakhlelh hi ka nei kher lovang. 

Heng zawng hi ka ţhamama nen a kan thawnthu chu a ni mai, a ho a, mihring nun tawi zia a lang chiang hle bawk. Ka rualpuite aia khuahkhirh bik ka ni a, a na zual an tih chang pawh khan nat zawk chang nei a dam leh vat ţhin angah khan ka ngai tlat a, hmuhna hun remchang ka neih reng pawhin ka hmu duh lo tlat ţhin a nih kha. 

Thuruk a awm tiin min hrilh a, thudik zawng chhuak turin min hrilh bawk a, mahse amah ber a awm tawh loh chuan engtin nge thuruk ka hailan ang a, thudik ka zawn chhuah theih ang. Min rawn pan tawp dawn lova, zawn chhuah tur ber lah ka hre bawk si lo. 

CONT....(Pathianni zan tih loh zantin a awm ang aw)