VANMALSAWMA-4

VANMALSAWMA-4

"Sensiar kan pass ve ta mai chu a nia tiraw? A lawmawm e kan thiam theih loh bakah kan zir peih lo tehreng nen" Vanin a ti sap sap a, ka pindan chhuat a pher chungah kan mu diai hlawm a, hun hi a kal chak takzet a ni. 

"Vanmalsawma lah hi a reh ta vang vang mai sia maw..a taksa phei chu a ţawih chhe vek tawh ang a, ţawih lo pawh nise vur angin a vawt vek tawh ang a, rial angin a dai bawk ang a" Zuali chuan a ti deuh kher a, a mak ngawt mai, naupangte ka nih lai aţanga ka nun a tel ve tlat tawh a nia, tikhan hun lo deuhah min kalsan ta mai chu a ni sia, khawvel tak hi chu a..rin loh deuh deuh a thleng a, thil thleng thei lo pawh a awm tawh lo. Na tuar miah lo a min la bo daih thei te hi awm se la ka ti rum rum zel. 

"Han graduate takah chuan kekawrte ha lo a inkawibah hunlai te kha ka ngai thar riau" Thartei chuan a ti ta daih a, Boomer an sawi zawm lo chu ka lawm ru angreng hle. 

"Aizawl a in luah chu in tum ta em?" ti a min zawh chuan ka nu ho a awm kan tum thu ka hrilh hlawm a, diktak chuan an fa tlum ber ka nia, min ngaihtuah bakah zir zawm zel turin min duh bawk a, Aizawl a awm peih lo viau ţhin mah se keimah vang a nih chuan ka nu pawn peih lo a sawi tawh ngai lo. 

"Keini hi engtin nge maw kan awm ve dawn ni. University a luh vek tum ila, kan chhungte inah ka awm dawn nge hostel ah min dah dawn tih pawh ka hre lo" Varin a tih chuan "Keipawh" an lo ti sap sap a, nun ho zia hre chung hian hmasawn tumin khawpui pan kan tum ţang ţang tho a, thi thut thei reng kan ni tih inhre reng chungin midang phak loh bik kan hlau ţheuh bawk a, mihring nun tak hi chu a..lehlam zawnga ngaihtuah chuan kan khawngaihthlak zawk alawm le. 

"Boomer kha nang angin ngaizawng ve lo mah ila ruah a sur chuan ka ngai ve ţhin" Vani chuan a ti leh hlut a, a tho nalh a, tukverh lam pana a phei chu zawi deuhin kan zui ve a, chhum a zing phui luk a, ruah a tla charh charh reng bawk a, nun ho zia bak rilruah a awm thei lo. 

Naupan lai aţanga ka hriat tawh a nia, a nu'n a thihsan lai pawhin kan unauin a bulah kan awm reng zel a, u anga en ve mai ţhin si kha pawl 11 ka nih a, mipa ka hriat ve tirh aţang khan ka ngaizawng ta tlat a, a engkimin min hip ka tih tawh kha. A tak ramah nei thei lo mah ila ka suangtuah naah chuan ka bialpa a ni ţhin a, a chang leh ka pasal ka nih tir a, duh hunah ka ban a, duh hunah ka la let leh a, ka suangtuahna zawng zawng luah khat a nei tu a ni ve ţhin. Rin loh deuhin a ţhianţhaber nen an innei ta thut a, a natna in zual lam a pan leh ta zel bawk a, nupui a neih hnu khan ka hmu duh ta miah lo kha a nia. A thih thlengin ka hmu leh ta reng reng lo a nih kha. Kan thawnthu inţan dan kha a hlimawm a, mahni chiah a nuih ver ver theihna tur tam tak a awm bawk a, mittui nen a tawp ka khar thung. Mahse, mittui hian tawpna tak tak a siam ngai lo tih ka hre ran a, bung laklawhah ka awm mek a, ka thih hma chu tawpna tak tak a awm dawn lo. Chuvang chuan ţap ve ţhin mah ila ka nui leh dawn tih ka hria a ni. Boomer a awm tawh lo a, la dam mah se naupangtein nupui a nei a, engtikahmah ka ta a ni ve ngai dawn chuang lo a ni. Mihring hi kan ta tur bik liau liau an awm ve a, kan ta tur ni lo chu eng ang pawn duh ila, an mit lak tum a awm luiin han beisei ve bawk ţhin mah ila kan ta an ni thei chuang lo. Kan ta tur diktak chu kawng a awm lo emaw kan tih tawh hnuah pawh kawng a inhawng leh zel mai a ni. 

"Kan vai hian kan kal ho leh thei angem le?" an ti a, tukverh darthlalang paw ruai chu ka tuai fai a, ka kutphah pawh a hnawng deuh chap mai. 

"Kan tum ang chu..keini pali chu pawh hran theih kan ni hleinem" ka ti a, ţhian hi an hlu a, ţhianţha phei chu zawn hmuh an har takzet a ni. Chuvang chuan ka ţhianţha neihchhun te hi ka hlut a, engmahin ka thleng phal lo ang. 

"I ute helamah an awm vek dawn sia, i nu leh Tintin-a te nen in awm ang a tiraw?" Zualin a tih chuan ka lo bu nghat a, "Daizaui ka sawi tel ve a, ka pa kha chuan Pa Muana te mitmei a veng deuh a, mahse amah ber hian chhuahsan a chak ropui sia, ka nu'n a phal chuan a lokal ve ang. Aizawl a kan chhungten in luah tur min zawn sak mek a, kan hmuh hunah kan vaiin kan chho thei ang a, mahse kan ţhian ho chu kan kal hmasak a ngai dawn hrim hrim a" ka ti malh malh a, engmah kan la tifel si lo a, tihfel tur kan ngah lutuk tlat a ni. 

"Ti daih ila Sensiar, i u hian damdawi a khawih ve em ni a? Piana te ho zingah a awm ve fo tawh a, no4 a lo ti ve ange aw. Tunlai chu inven nasat a ngai tehmai a nia" Thartein a ti deuh hlut a, Boomer-a thihna khan a la tibuai a, harhfimin a awm mang ngai lova, a khua a har tih pawh kan hre vek a, han tih vak ngaihna kan hre si lo a ni. 

"Ka hre lo le..Aizawl a kan awm chuan boruak dang te a hip ang a, a zia chho ve mai ang" ka ti a, ruah a han veleh an haw diak a, khua a har nghal ruih mai. 

"I ni Ngaihtei te ka bia a, lo chho rawh se an ti a nih chu. Tintin, zir peih ve tawh lo mah la i nau zir zelna tur buaipui a ngai a, Aizawlah kalpui rawh aw" ka pa'n a tih chuan "Ka peih mai mai lo" a ti hluk a, sofa ah a mu nghal duai a, a ţul hunah a induh tlat zel a, ka chhuih awk chak rum rum zel. 

"A ţhiante nen ringawt chuan an ngaihtuahawm alawm. Ţhenawm dawr a ţhut nilen bak hna i nei lo. Hruai ngei ngei ang che" ka nu'n a ti ve hlak hlak a, "Nilengin meizial i pet kawh pawt reng a, i thin leh lung te pawh hian an ning tawh ngawt ang che. Tintin-a hian min dim ve deuh se an ti ve vawng vawng zel ang chu. Han damlo vaih teh aw...ka buaipui dawn reng reng lo se a nia" a tih zawm leh a, a duhthaw khawp mai. 

"Mi hi vin hluk hluk ţhin lo teh. Miin fa sual i nei a maw an ti reu reu ang e" a ti a, nui deuh put put chung hian ţhutthleng nghenchhan lamah a inher a, min hruai loh chuan puitling deuh zawkin min hruai a ngai dawn a, ka peih teuh lo mai. 

"Fa sual chu ka nei alawm. Awm ţha duh lo...zu rui chhur reng ţhin fapa ka nei alawm" a ti tan tan a, hnial an hrat dun lutuk hi keipawn ka hrat ve phah vek tawhin ka hria. 

"Zu ka in lohin thil dang rui emaw min tia, min khawng luhai ziah tho alawm. Na tawrh hrep hnua luhai ai chuan na tuar lo a lu hai ka duh zawk" pakhat lah chuan a la ti bul bul a, "Bible in 'Naupang thunun tim suh, tiangin vaw mah la a thi dawn si lo va' a tih kha i la fuh leh lutuk a, i hmanraw ken ang ang a min khawn hnuah pawh ka la dam ve luau chu a nih hi" a tih zawm leh chuan ka nu ber a nui leh huau huau tawh a, a nuih lah hian a su dulh dulh a, a dul a che hluk hluk zel bawk a, keini chhung chu in ţha vak lo a awm chi pawh kan ni ve lo. 

Peih lo viau mah se Aizawl ah chuan min hruai tho a, a ţul ang ang kan tih hnuah kan haw leh a, kan han nghak deuh a, ţhianho a kan lut khawm vek thei dawn tih kan hriat phei chuan ruai kan ţheh hut hut lo chauh a ni. Daizaui pawh a lo leng reng a, ka nu hnenah kan hnen a awm ve a dil nasa ţhin hle. 

"Naupang an fel tawh a, Ni Mami te an awm tho bawk a, ka tello pawn an awm thei lutuk alawm, awmpui anga lut ka ni chuang lova" a ti ţhin a, ka nu nen an in ngam ve em avanga dil ngam a ni. 

A sawi ang hi a ni tak tak a, Pa Muana nupui thih hnu lawkah a nu nen an lut a, a nu leh Pa Muana hi nupa ang deuh reuhin an awmin ka hria. Mahse an pawt ţhen a, an chhuah leh hnuah Daizaui nu hi chuan luh khung tur a hre leh mai a, Daizaui zawk hian awmna tur a nei ta lo a, Ni Mami ten an khawngaih a an la lut ta kha a nia. A thlawn tawp a awm aiah tiin hlawh tlem an pe ve a, an chhungkaw boruak a nin tawh avanga kan hnena awm duh a ni. Boomer te chhung hian thuruk an lo ngah ru phian maithei a ni. 

"Aizawl ah chuan mi in a card den mai mai ka phal dawn hauh lo a nia" ka nu'n a tih chuan "Ka bansan daih tawh alawm. Bakah hmasawnna zel te a ni ve a, hetah chuan ka awm peih tawh lo. Boomer a thih hnu kha chuan ka pu Muana pawhin zu a in nasa leh tawh a, Ni Mami nen an inhau reng a, thu mak pui pui an sawi ţhin lehnghal a, ka thla a muang hlawl lo alawm. Engtin phei chuan min ti pawh a ni lo a, mahse keimaha hriatna awm hian thil engemaw a awm ang tlat a hriatna min neih tir a, ka ngaih a ţha thei lo reng reng. A rang lam a chhuahsan vat ka duh" a ti bawrh bawrh a, muk deuh a kan ti ti lai chuan eng khaw sawi set set lovin Tintin-an a tukhumah a rawn beng bu lawp a, dawhkanah a intauh chawrh lo chauh a ni. 

"I va mawl tak Laltinkhum..engah nge ka inrin loh lai taka min nam kher a?" a ti vin nghal hlar a, ui leh kel thlun pawlh ang chauh an ni. 

"I rawn awm duh pawn ngawi ve mai mai rawh. Boomer a hrang te i lo tia, ka eizawh tir vek mai tur che a sin" a ti leh khur khur tawh a, U Daizaui pawh hi a ţawng tam ve ţhin a, a khawngaihthlak tho bawk sia. 

"A hrangin ka hria ka ti a nih kha. A thih lai khan boruak a vawt thei em alawm. Thla awmna chu a vawt var zel an tih kha" a tih chuan "A vawt ve bawk ang chu december thlaah mizoram a lum ngai a mi? Nang hi chu i mawl hlum lo chauh a nih hi. Aizawl ah awm ve mahla min chawk ho zo leh vek ang" a ti a, a kalsawn hmain a nam nawn leh hram a, inrawlh tumna pawh kan nei lo. Anni pahnih inhau hi chu en tawp ila a fuh ber zel. 

Aizawl a kan kal hma zanah chuan ţhenawm khaw vengte an lo leng lut a, U Daizaui pawh a bungrua nen a lo lut tawh a, ka nu leh pate Pa Muana te inah an kal a, chumi hnuah a nu, Nu Hriatpuii an hmu leh a, an phal vek hnua rawn lut chauh a ni. 

Thingpui kan lum deuh reng a, ka nu awm lo tur chu a mihlim puiten an uiin ţawngţaina hun te an hmang a, an au vak vak a, an ţap bawk a, "Tintin te-a pawh a kal ve daih dawn sia, kan hmuh phak loh a a awm tur phei chu a ngaituahawm emai khawi ka'n ţawngţaisak ve reng reng ang che" an ti a, a lu chunga kut an nghah dawn lai chuan "In va ho e aw" a tih loh leh "Na ka nei hleinem...min khawih kher lo mah ula in thu chham ka hre pha tho alawm" a lo ti bui bui a, an ngaipawimawh lo nasa mai. A lu chunga kut nghatin an ţawngţai a, duhsak tu a ngah a, keini pawh kan lawm khawp mai. 

Bungraw ken tur a tam deuh avangin motor lian kan hmang a, ka uten in an nghak thei tho bawk a tiin ka pa leh ka pi ten min thlah a, ka pi tak phei chu ka nu a ngaih em avangin Aizawlah a awm rih dawn a ni awm e. Bungraw phur tu motor nen kan inzui a, mahni motor a kal kan nia, kan hmanhmawh vak lem lo. Tintin-a leh ka pi an inkhak deuh reng a, ka u motor rui chu biak ţhat ngam pawh a ni lo. 

"In awmna tur chu a veng a mawng deuh na a inmal ding a nia, a neitute nen inhmu phak reng a awm ai chuan nuam in ti zawk ang. Tintin-a leh i nu pawh duhtawkin an inhau thei dawn a ni mai" ka pa chuan a ti a, motor a kan len vek loh avangin U Daizauin bungraw phur bo bulah ka chuang ve mai ang a tia, tlemin a bengchheng nep deuh e. 

An ti ti chu ngaihven zui lovin pawn lam ka thlir a, college ka kal ve ţan ni te kha a la rei loh tehreng nen ka graduate ve ta der a, khang hun reilote chhung khan thil tam tak, min sawi nghing dawt thei thil te ka tawng a, ka tuarchhuak ve zel thei bawk a, kum naupangtein tawn hriat ka ngah tawh viau a ni. 

Tunah chuan university ah ka kal ve tawh dawn a, college naupang chu kan naute tiin ka sawi ve thei tawh a, chuti chung chuan ka rilru hian puitlin lam a pan pawh ka hre lo. Boomer-a nupui nei thut leh a thihna khan min ti na ngei a, mahse ka ho ngaiin ka la ho reng ni maiin ka hria. Kan ute ho an fel tehreng nen Tintin-a nen hian hma kan sawn mawh bik khawp mai. 

"I pa nen kan inawm chhawk ang a, i pa'n a awmpui hman chang cheu chuan kei khuaah ka haw ang a, Aizawl a awm tlawk tlawk pawh a peihawm chuang loh. Tintin-a ho a awm tur chuan ka ngaihtuah bawk si cheu a, Daizaui lah a laktlak mang bawk si loh. A vanduai a, a khawngaihthlak reuh em a, ni lo se chu hruai ve kher pawh a ngai lo tur a nia. A nu nen ţhian kan lo ni leh zel a, Hriatpuii kha chuan a fanu hi min papek deuh tawp ni berin ka hria" a ti dap dap a, kuhva a en sen suah a, a tep chuap chuap bawk a, a tui hmel ţhin a nia. 

Aizawl kan lut a, kan awmna tur veng lamah kan tlan zel a, kei tak chuan ka la hmu ve lova, ka nu leh pate erawh ka niten in neitute an biak fel hnu khan vawikhat chu an kal tawh a, ka pa sawi ang ngeiin veng mawng ve tak chu a ni. In ţha tak tak a ding ve thluah a, chu chu tlanpel zetin dawr te pakhat piah lawka inkawtah chuan a ding a, lei dep a sak a ni a, an chei ţha aniang a thar var mai. Compound zau vak lo a nei a, gate chhe deuh a awm bawk. 

"Hetiang te chu a neituten an va luah lo phal zawk em em. A hrang te a ni lo maw?" ka tih chuan ka pa nuih a lo za khawp mai. 

"Veng tawn tirh a in ţha deuh kha a neitute in a nia, ka lo kawhhmuh lo che u a ni maw?" a ti a, ka ni fate ho nen bungrua kan thiar lut a, inchhung pawh rin aiin a nuam daih mai. 

"I nu leh i piin pindan inţawm se la, nang leh Daizauin in inţawm leh ang a, kan mipa ber hi amahin awm rawh se. Pindan pathum a awm a, a lian vak lo hlawm a, Tintin-a awmna tur phei chu kan sawi hnua an pin dan chawp a nia" ka pa'n a ti zung zung a, Aizawl a awm peih lo tura ka rin ber ka pi a phur khawp mai. 

"Daizau engati nge tukverh i lo chhiar mai mai a? min lo pui ve ta che" ka nu'n a tih chuan "Tukverh nawhfai tur a tam dawn em tih te ka en ve alawm" a ti a, a vin khawp lehnghal. 

Ka ţhiante ka bia a, Thartei leh Zuali te hostel ah an awm anga, Vani chu a pi leh pute bulah a awm thung ang. Anni chu kan khuaah an la awm a, class ţan dawnah an lo chho chauh dawn a ni awm e. 

U Mama pawh a lo thleng ve chiah a, ani hian Tintin-a bike a khalh a, zu in mi na na na chuan zu zawrhna hmun an hre thei sia, kalkawngah a din kawi hlauin Tintin-a an khalh tir ngam lo a ni. 

"Bawiha chu i lokal ve dawn lo amaw ka ti hman alawm" tiin a bike chu paw deuh phuk mah se a lo chul hliau hliau a, thil dang pawh a ngaihsak leh tawh lo. 

Chau viau mah ila zanah chuan U Daizaui nen kan mu meng kar tho a, "Mutna ngai loh a mut thut chu mutthilh a har e" kan tih deuh reng laiin thlang lam tukverh a ri karh karh a, êng la ti thim em lo mah ila kan hawi tang hra mai. 

"Chu eng nge?" a ti deuh hlut a, a tho nghal uaih bawk a, "Engmah a ni lo ang. Hnahthel tla vel mai mai aniang" ka ti tak na a ka awm a nuam zan bik lo. 

"Thlang lamah thingkung a awm hleinem mawle. Vawiin a tukverh ka chhiar lai pawn thingkung ka hmu lo" a tih lai mekin tukverh darthlalang chu a ri leh a, keipawh ka ţhu chhuak ve luau tawh.

"Parda khu zu hawng rawh" min ti a, ka ngam ţhak lo. Hlau thaw dep dep a tukverh lam kan en reng laiin a hma aia ring zawk mah hian darthlalang chu a ri leh a, kan au nasa dun ngang mai. 

Khum luah kan ţhu tawm tlat a, kan inkuah tlat bawk a, kan thawm hria a ka nu lo lut chu kan en a, kei phei chu ka ţah a chhuak leh ţun tawh. 

"Eng nge a?" tih pahin U Mama a lo lut ve bawk a, ani phei chuan kawr pawh a ha hman lo ni awm tak a ni a kawng a chin chunglam chu a ruak kung mai. 

"Thawm kan hria" U Daizauin a lo ti a, a hlau hle aniang a aw pawh a khur deuh alawm. 

"Eng thawm mah a awm lo ang" an tih laiin tukverh bawk chu a ri leh a, U Daizaui nen a kan tawm chawih laiin ka nu leh U Mama te chuan muangchangin an pan hnai a, fimkhur deuh a parda an han keu chu keini ai mahin an au nasa zawk maithei a ni. Khum lamah an rawn tawlh let dawrh bawk a, mipa nui thawm kan hriat chu thinrim a phun riin a zawm a, ka thla a muang huai thung. 

"Laltinkhum lo lut nghal rawh" U Mama chuan a ti hluk a, kan pindan aţangin an chhuak zui nghal a, Tintin-an min lo tih ţhaih lek chu niin. Ka nu leh U Mama te au vak chhan pawn hmaikawr rapawm deuh nen a pawn lama a lo din vang a nia, an han hauh rawn tak tak chu pui tak a ni, sawi vek sen pawh a ni lo. 

Zingah phak chualin ka tho a, ka nu leh U Daizaui ten eirawng an lo bawl a, "Tv min leisak teh u. Mama i pa'n min leisak loh pawn nang talin min lei teh. Hetiang chuan ni a rei duh dawn emai. Nangni angin phone ka tuai ve zeuh zeuh thiam bawk si lo a" ka pi'n ngenngawl takin a lo ti ve bawk a, "Lokal ve suh kan ti kan tia lawm. Khawpuia awm i chak hawrh a nih kha. I nulat lai pawhin radio bak i ngaithla ngai chuang lo, pawih sumdawng an lokal hunah radio kan lei dawn nia" Tintin-an a lo ti hmanhmawh a, tui bottle nen a pindan tur bikah a lut leh a, a mu leh dawn aniang. 

"Vawiinah kan en dawn nia. Lian hluai a ngai hran lo a, man to vak lo pawh a tam ang" U Maman a ti ve thung a, "Min hruai ve rawh" ka lo ti vat chu U Daizauin a lo tuihnih leh zat bawk. 

"Kan pathumin kan kal dawn nia" U Mama chuan a ti leh mai a, a zaidam viau rualin a thu a duh a, a thin a rim phei chuan a hlauhawm rapthlak lutuk. 

Tihfel tur a la tam deuh avangin kan chhuak mai hman lova, tlai lamah U Mama hoin kan chhuak a, ka pa motor kan keng bawk. Ruah lah chu a tla cherh cherh reng a, kan khua chhuahsan chak viau siin ka lung a leng leh vel a, ţek a tel loh chuan ruah sur hian lunglen a kaitho ve ţhin hrim hrim.

Hmun remchanga motor kan dah hnuah bazar chhungah kan lut a, mipui tam loh naah pawh kan en thei reng awm sia. 

"U Mama hmun dangah en zawk ang u" ka tih chuan "Thawmhnaw lei ka duh. Aizawl kal manah ţha deuh hlek ka lei ve ang chu" a ti a, a khirh bawk si, tawnzau mai mai a enchhung pawh a rei leh viau ang. 

U Daizaui nen nihliap kan inzawn a, "Thawmhnaw i enchhung kan kal kual ve dawn a nia aw. Motor bulah kan lo nghak ang che" kan tih chuan a remti ve mial a, phur deuhin kan kal hrang a, bazar chhunga let zel lovin mipui thawlna deuh turah kan kal a. 

"Vanmalsawm" ring leng lawnga au ri ka hriat chuan ka ke pen a tawp chiang kher mai. Bazar ah kan la awm a, ka Ţhamama an ko lo tih hre mah ila parking area lamah chuan ka hawi let dawrh a, bike chunga ţhu run pa ka hmuh phei chuan mak ka ti takzet a ni. Vai film phei chu nise ka mittui a tlak rualin thliin ka nihliap kenlai a len thlawk nal nal maithei a ni. 

"Khawvel hi a hrang a nih hi. Thlahrang hlir kan nih hi. Saw pa saw chu a thi daih tawh. Kuang an chhin lai pawh ka hmu. Kan hrang vek a nih hi" U Daizaui chuan a ti mawlh mawlh a, phawk hrain ka en na lam a en ve reng bawk. 

"Vanmalsawm min nghak ve mai ta che" mipa aw bawk hian a ti leh a, kan en reng pa chuan "Ka la kal thei lo. Scooty hian min dal" tiin a au let a, a aw chu ka Ţhamama aw aiin a thum daih zawk. 

A awmna lamah chuan ka pen chho hlawk hlawk a, nihliap keng tu zawk ni siin U Daizaui pawh ka kalsan daih. Lirthei ding thluah karah chuan ka inzep lut a, "Vanmalsawma maw i nih?" ka tih chuan mak tih hmel deuh a min en chung hian "Ka hria che em?" a ti fan ruih a, ani ai hian mak ka ti daih zawk ang chu. 

A mit leh a sam te, a hmui leh hnar te, Boomer nen khan an inang lutuk ringawt!

Hnai set sawt a ka din hnu chuan ka insum thei tawh ngang lo, a tak a nih leh nih loh hriat tumin a biangah ka piai ta vak a, a mithmul buk tak leh a mitkhur thuk lam lek lek te chu ka hmuh tawh hnu ang vek a ni. 

A biang ka han piai meuh chuan a meng tal tap a, mak min tih hmel takzet tawh a ni. 

"I uang a mi a?" ka kut lak let pah a ka tih chuang 'eng nge sawi i tum?' ti ni awm hrim hian a mithmul a lo kan uk a, "Boomer" ka ti chhuak phawng a, ka awki a sang angreng hle maw. 

Zah pawh dawn lova "Boomer" ka tih leh chuan "Jelly" nuihza aw zet hian a lo ti a, game ka khelh pui emaw a ti a ni ngei ang. 

"Mami ka infiam hman tawh tlat lo" min ti a, nuihza hmel la pu reng chung hian helmet a khum a, ka dinna ngaiah ka la ding reng thung. 

"Khilamah khian kan buai rei lutuk a, ka tihpalh lutuk. Scooty hi kan nawr sawn lawk ange" parking fee khawn tu ni awm takin a tih chuan a lo bu nghut a, ruahin a nan te chu ngaipawimawh ang pawn a awm lo. Boomer nen an hmel a inang chiah chiah ti ila ka sawisual lo khawp ang. Mahse kan Boomer ai kha chuan a sa a ţha zawk a, mitthi tho leh a nih si loh chuan tu nge a nih tak ang le?

"Ka lei fel thei e..a nei tu tur video call ngai bawk, a hahthlak hle mai" a ţhianpa ni awm takin a rawn tih bul bul lai chuan scooty nawr sawn tu kha pawisa a pe a, wallet a ah ţhat leh hnuah min en zawk a, nui ruh ruh chung hian bike a ti nung zui a, "Tlanchhuak hmasa phawt leh si teh. A buaithlak dawn tlat" a ţhianpa ni awm tak bawk khan a ti leh a, an piah a ka din ngawih ve reng lai chuan a helmet hma a tuai thla a, a hmel ka hmuh theih loh hnuah pawh a lam ka hawi reng tho a, hepa hi chuan bike a khalh a, Boomer kha chuan a natna avangin college a kal hnuah bike a khalh leh tawh lo hrim hrim a, lirthei a khalh laia a na a chhuah thut a hlauh ţhin vang a ni. 

Min tlansan tawh hnuah U Daizauin min au a, a dinna a ka let leh chuan "Eng nge awmzia ni a? Khapa kha tu nge? Kan Boomer kha a ni em?" a lo ti mawlh mawlh a, ruah a sur tam lo na a nihliap ka keng daih sia, a hnawng chap thoin ka ring. 

"Ni lo...kan Boomer te chu a thi daih tawh alawm" ka ti a, an tlan liamna lam kan thlir dun reng a, mi ţhenkhat kawng kan lo kian tih loh chu kan che sawn lo reng reng a ni. 

"A mak ka ti e...khapa kha eng rannung nge niang le? Boomer ang chiah siamchhuak thei tur khawpa mi thiam kan la nei bawk si lo" a ti a, mak kan ti a, kan hrilh a hai takzet bawk. 

"Doppelganger ti dawn ila a ni thei chiahin ka hre bawk si lo" ka tih chuan "Sap ţawng hmang ziah lo teh" min ti a, lu ka thin san a, Aizawl ah ka awm ve chiah tihah ka hmu kher bawk si nen, Pathian remruat nge ka rilru tibuai turin Setanan a rawn tir pawh ka hre tawh lo. 

Kan tih tur ang kan tih hnuah kan haw a, kan inkawng a kan tlan lai te chuan ka mi hmuh pa hlir kha ka ngaihtuah a, a hmel ringawt ka mitthlaah a awm bawk a, ka hnawt kiang thei lo reng reng. Hman deuh a lar vak, khawvel pawhin mak a tih, Jim twins an tih te thleng khan min ngaihtuah chhuah tir a, mahse Boomer khan phir pui a neih awm ka hre bawk si lo. 

U Daizaui zawk chuan "Khawvel milar tak tak te pawh anmahni ang deuh deuh an awm ţhin hi, an thlalak hmuh tur pawh a tam alawm" ka beng bulah a rawn ti sar sar a, an aw a inang lo a, khapa khan ka hmuh lai ngeiin bike a khalh bawk a, ka hmusual ti ngawt dawn ila U Daizauin a hmu ve tho bawk si, hmalam pan ka tum ve vek tawh asin mawle. 

In kan thlen veleh Tintin-a ka ko hrang a, ka mi hmuh pa landan zawng zawng chipchiar taka ka hrilh chuan "Mitthi tawh fiamthu thawh nan hmang suh" a ti hmuk a, "Ka ti tak tak alawm. Ka hmu tak tak a nia aw...engmah danglamna a awm lo" ka tih leh te chuan "Ka hnek duh mai ang che" fiamthu hian a ti a, min lak thutak sak duh hauh lo. U Daizaui ka ko a, ani pawhin han sawifiah ve ngial mah se "Hmeichhia ka inbum tir dawn lo" a tih loh leh thlalak min dil a, entir tur mai kan nei bawk si lo chu min rin loh lehzual phah a, "Aizawl in kal khat a, in awm thiam lo a nih kha" a ti mai a, thutak hla taka min laksak duh miau loh avangin sawipui vak ngaihna a awm lo. 

Finfiah nan instagram leh facebook ah te Vanmalsawma tihin ka zawng tawp a, ka en chhuah vek pawhin khapa hmel kha hmuh tur a awm hauh lo. Aizawlah ka awm ve chiah a, rilru tibuai tur a ka Ţhamama ang chiah ka hmu lehnghal mai te hi mak ka ti a, sawifiah vak ngaihna pawh ka hre lo. Ka nun a thil thleng hrim hrim hi a mak vel vek a ni mai. 

Ka ţhiante ka hrilh ve chuan "Aizawlah mitthi tawh i zawng a ni maw?" min ti a, min nuih liam vel mai mai a, tuman min awih sak bik lo, a awihawm loh ve em a ni. 

"A thi tawh a, hmalam pan tum rawh. I duh zia kan hriatpui tho rual chein hlim la, hmalam pan la, Boomer pawh a lawm zawk ang" Vanin thutak deuhin a rawn ti a, "Mi awm ţha hle hle lai Boomer emaw i tih zel te chuan mi â ho awmkhawm naah an dah ve daih mai ang che" Zualin a lo ti ve bawk a, an hmuh ve hma loh chu an awih lo ang. Ka ngawihsan hnuah rilruah a la awm reng a, tunah chuan khapa hmuh tum khan ka hawi leh ruai reng tawh dawn tihna a ni mai. 

Ka ţhiante pawh chu an rawn chho a, class kan ţan tawh bawk a, U Mama chuan bazar kan kal ni tuk lawkah khan min hawsan a, ka pi a la awm reng thung. Khawpui nula ho nen kan han inpel suau suau chu insit a awl duh ngei mai. Insawitheih lam ni lo se kan chhungkua hi rethei zawk zawk kan ni bik lova, ka pa vang liau liauin retheihna awmzia hre miah lovin ka sei lian a, ka mamawh leh duh zawng chu ka nei ve thei zel a, Boomer pawh kha ka pa min leisak theih chi chu nise lei ka dil ngei ngei ang. Thawmhnaw ah pawh rual ka awt ngai bik lova, chuti chung chuan khawpui nula chhe lo tak tak zingah chuan kan te chem chem bik thoin ka hria. 

An ti ti duhzawng lah a maksakin party an ti deuh reng a, bike hming lah chu an hre zek lehnghal. Canteen a kan awm lai chuan hmeichhe pakhat hian "Bike hrim hrim hi chu hmu lo mah ila a ri aţangin eng bike nge a nih ka hre chat thei" a ti lang lang a, a hawi vah a, a chapo hmel takzet a ni. 

"Tun ţum weekend chu resort lamah aw" te a tia, a ţhiante lah chuan a thusawi apiang an lo pawm nghal thlap zel a, an ţawng duai duai reng bawk si, ka rilru chuan diai duaii te ho saw a ka ti a, ka mil lo nghal em em ringawt mai a ni. 

Mipa pakhat lo lut ve chu kan lo en ţhap a, ka vawikhat hmuhna a ni tawh lo na a sual hmel ka la ti tho. University ka kal ve meuh chuan mi chi hrang hrang ka tawng hnem ta malh malh khawp mai. A landan te chu tu nu mahin makpa atan an duh lo ang tih tur a ni. 

Canteen nghak tu nu pawn counter lam a pan chu ngei hmel deuhin a lo en a, "Sawpa saw kan class ah a awm ve bawk sia, keichu ka hlau tawp. Setana a biak duh hmel ka ti" Vanin a ti sar sar a, thawmhnaw dum deuh hlir a inbel ţhin a, class kan ţan hnuah rawng dang a hak chu vawi hnih vel chiah ka la hria. 

Counter a chum ri bur a, kan phu nasa hlawm hle nghe nghe a ni, pawr zet a "Vur sen" a tih chuan kan nui leh dar dar ang lawi a, "Lalmai-a hi ka ning lutuk uang reng mai" canteen a thawk pakhat chuan a ti vin hlar a, fiamthu a thawh ngai awm kan hre der si lo. Professor te lah a hlau ngai der mai si lova, mi hausa fapa awm ţha duh lo a nih kan ring a, kan ţhian ho chuan kan hlat hram hram ţhin. 

Kan veng thar a thla khat vel kan awm hnu chuan nuam kan ti ve deuh ţan a, Tintin-a phei chuan ţhian a nei der tawh. Keichu U Daizaui nen kan inkawm theih avangin ka chhuak khat leh tho a, ka pa duhdanin kohhran kan bel hram hram thung. 

Tlai khat chu U Daizauin "Kan awm deuh reng tawh dawn sia, kan la hrechiang lo emai leng harh ve ang" a tih deuh tlat avangin kan chhuak ve thawr a, kan inthlang lama step un deuhah chhukin kawngthlang lamah kan kal a, in awm ho chu a inhnaih ve hlawm viau na a in a awm tam vak lo thung. 

Exer la tur ni awm tak leh haw tur ho an in pel nawk kan hmuh hnu chuan "Helai kawng chu exer lak nan ber an hmang a nih dawn hi a" kan ti a, tleirawl te te inchei deuh deuh a kal pawh an tam mai. 

In tawp ber ni awm tak kan pel a, in a awm tawh dawn lo emaw kan tih hnuah concrete inchhawng, tunlai taka sak a lo ding luah a, compound a nei mang lo na a mawi tak a ni tho. 

U Daizaui takngial pawn "A va mawi em em ve mawle" a ti ve hial a, an kawtah ui lianpui an thlung a, min la bauh zui. 

A neitute an lo chhuah hlauin kan kalsawn vat vat a, in a awm lo leh vang vang a, kawngkawi chinah in a awm leh tuar thung a.

"Let tawh ang..a nuam reuh emai hman chang apiangin kan kal ţhin dawn nia" ka tih takah chuan kan let a, in awm tam lohna lai kan thlen chuan boruak a vawt leh deuh ruih tawh a, "Boruak awmdan aţang hian kan veng bikah rau rau pawh dam veng a nih bik duh hmel" U Daizauin a tih chuan ka lo bu nghat nghat a, engmah phei chu ka sawi lo. 

In mawi deuh zawn kan thlen leh chuan Aizawl kan awm hlima ka mi hmuh pa bawk khan in bul step a rawn chuang chhuak ve chiah a, a hma ang pawnin ka ke pen a tawp leh chawt tawh. 

A hriat hnu ka ang a ti deuh aniang ani pawh a ding a, ui bauh vak vak lai chu a hau vat bawk a, a tih dan hi an in a ang riau mai. 

"Eng nge in duh?" chang angreng tak hian a ti a, min hriatchian tum ni awm takin mit ti zim deuh sun hian min en a, min hre tawh lo zawk anih ka ring a, a ţha hlei hlei a ni mai. 

Ui lo bauh leh khap tuma a kut a phar chhuak chiah chu hnung lamah ka tawlh dawrhin ka hria. A ban tha ngah hmel zet a thisen zam lang kulh leh a tihrawl inphiar te chu chiang taka ka hmuh rualin thisen ka hmu tel a, a ban ah chuan thisen a kai nasa ti ila a dik ber zawk ang. Hmun fal deuhah a awm a, a banah lehlam lehlamah thisen a kai bawk a, mi ţha tak chu a ni lo tawp ang. 

"Sensiar kal ang" a tih rualin U Daizauin min pawt kal nghal dawr dawr a, in kan hmuh leh hma chu kan ding tawh lo. Hmuh theih khawpa langsarah inlan mah se rilru ah chuan tualthattu aniang tih te, hringei a ni mai angem tih te a awm daih a, khapa kha a maksak takzet a ni. 

CONT..