VANMALSAWMA-5

VANMALSAWMA-5

"A kut kha i lo hmu ve em? Thisen kai kha i hmu em? Khapa kha ka rap riau mai" U Daizaui chuan a ti mawlh mawlh a, ka ban kuah bet ţang chungin a pen hlawk hlawk bawk a, rapawm ve deuh chu a ni. A awmna lah kha tlemin a fal bik deuh lehnghal a. 

"Kan awmna veng hi a tir phat aţang khan ka ringhlel tawh. Kan inluah te lah hi a ţhat tehreng nen a neitute pawn an luah duh lo a nia. Hringei awmkhawmna te hi a lo ni reu reu ange" a tih chuan ka nui chhuak hak a, khapa kha ringhlel viau mah ila vengchhung mite chu ka ringhlel tel ve lem lo. 

Bike chak deuhin min tlanpel te chuan kan au ring khawp mai, kawng sirah kan tawm chawih a, dawih mi nih nak laiin ka thil hmuh zet chuan min ti dawih lehzual sawt niin ka hria. 

In kan thlen veleh a rukin Tintin-a ka hrilh veleh a, ani chu a upa deuh hlek tawh a, a finfiah ngam zel ka ring a ni. 

"Zombie a nih chu" a lo ti then a, hepa pui hian tun thlengin min la awih sak duh lo. 

"Kan khuaa haw leh daih ka chak. Hostel ah te lo awm ve mai mai ila ţha tur a nia" ka ti nang nang a, ka mi hmuh khan min rap a, thisen a tel kher bawk nen, ka chhungte awm ve lai pawn ka hawi zak zak reng mai. Boomer nen inang viau mah se a landan kha a hlauhawm bik tlat a, khatiang misual kha kan vengah a lo awm ve reng tihna a nia, a rapthlak takzet a ni. 

"Engati nge i hawi zawk zawk reng a? Daizaui lah kil khatah a tawm tlat a, eng thil sual nge in tih a?" ka nu pawhin a ti ve ta nge nge a, min en ran a, a ngaih a ţhat loh hmel khawp mai. 

"Zombie an hmu a nih hi. Anni pahnih pawh hi zombie ah an chang ve vat mai ang" Tintin-an a tih laiin ka thil hmuh chu ka lo sawi ta vek a, Boomer a an thu erawh ka sawi tel duh lo thung. 

"Chutiang te chu yma lam hriattir vat a ngai a nih chu. An nin ţul an tih leh police an hrilh ang a, ţhenawmah ka va kal ang e" tih leh chhuah a rual a, a thang vang vang hnuah patling pahnih nen an lo inzui lut a, min zawt chik viau na a mipa pakhat kut a thisen kai hnuang tih bak sawi tur ka hre lo.

"I nu sawi ang kha thil thlen dan a ni em?" an tih chuan "Aw" ka ti leh tawp a, han sawi belh vak tur pawh a awm chuang lo. 

"Khawi lai hmunah nge?" an tih lah chuan "Inchhuk char char ang a, kawng thlang lamah a nia, exer la ho kalna ţhinah. Ui an nei bawk a" tih bakin ka sawithiam lo a, "Min hruai mai thei angem? Hriatthiam a va har ve, ui lah intin deuhthawin an nei bawk sia" an tih veleh "Ka pum a na lutuk" ti chung rengin U Daizaui chu bathroom ah a tlan lut daih a, keimahah an mit a fu ţhup mai. 

"Aw ka hruai ang che u" ka ti a, ka hreh em avang chuan muangchangin ka tho ţuah ţuah a, "I lo luh ve kher pawh a ngai lo. An in min kawhhmuh la a tawk mai. I sawina lamah chuan fal deuh deuhin in a awm fur a, tu in ber nge a hriat theih si loh a" an ti a, Tintin-a ka sawm ve zet na a min hnial fithla ţhak a, ka nu chu kal ve turin ka duh lo thung. Khapa kha a hmuh ve chuan mak a ti lutuk anga kan buai vak phah ka hlau a ni. 

An hming te min hrilh hnuah U Daizaui nen a kan kal naah khan ka hruai a, Vanmalsawma ka hmuhna in ka kawhhmuh chuan "Pu Hriata te hi maw?" an ti a, mak an tih hmel viau lehnghal.

"Ni e..helai step aţang hian a rawn chho a, chem chu a keng lo mah se a kut pahnih ah khan thisen a kai a" tih pahin an inbul a step chu ka kawk va a, min rin loh hmel deuh tawh niin ka hria. 

"I mi hmuh chu a pian hmang i sawi thei em?" an tih lai mekin kan thawm hriain ui lianpui kha a lo chhuak a, min bauh vak vak bawk a, khua a thim lek lek tawh avangin an bathlar a êng ut tawh bawk.

"Palian pui mai" ka tih rualin kan tlangvala ngei kha a lo chhuak a, hoodie dum hain a lukhum a khum bawk a, kekawrbul a ha thung. 

"Sawmte vawiinah in inbulah hian misual ni awm tak kan nula hian a hmu a, rinhlelhawm deuh hmuh te i nei em? An sawi hmangah han palzam mai mai chi a ni si lova, mi a that lai an hmu ni awm tak a ni" an tih chuan keipawn ka lo en ha mai. 

Mi an that lai ka hmu ka ti der si lova, ka nu'n a sawi uar lehpek tawh a ni ngei ngei ang. Hetiang hunah chuan a diktak chauh sawi tur a sin mawle. 

"Tuin nge hmu a?" thum deuh ruih hian a ti a, ka kalpuite a be na a keimah ber chu min en chikin ka ngaihtuahna thlenga hriat a tum ni hian a lang a. 

"Aa..hmu tu an awm a, kan hnenah an rawn thlen a, tunlaiah tualthahna rapthlak tak tak a thleng ngun sia, veng chhung mite tan pawh a hlauhawm thei a tiin kan lokal a nih hi" Pa Rama chuan a ti charh charh a, kan tlangvala lah chuan min le en reng a, a hmel a dur ţha khawp lehnghal. Chung te mai mai chuan min rinhlelh zual tir a, mahse a hriatah chuan amah a ni tih ka sawi ngam teuh lo mai. 

"An hmu sual a nih chu" a ti bung nghut a, min en dan chuan min ti zam hle bawk. 

"Snoop dog chu a va bauh nasa em em ve" tih lang lang paha patling lo chhuak chuan "Ehe..Pu Rama te chu..kha khawi lamah nge?" a ti dam thluam a, a pa ni awm tak a ni, a fel hmel phian bawk sia. 

Pu Rama ten thil awmzia an han sawi chuan "Ti ru lo lut ula sawiţha teh ang u. Kei tak phei chu ka haw na a la rei lo a, chutiang an hmuh chuan a ţha lo tawp a nih chu" a ti zung zung a, tlangval-a chu ka hmuh tur ngeia a kiai suk hnuah a inher a, a ui lu a tuai zauh hnuah inchhungah a lut a. 

"Lut lawk ang u Mami, an inbul ngei a i hmuh a ni sia, a landan te chiang deuhin i sawi ang a" an tih chuan "Khapa kha alawm. Tlangval kha a nia ka hmuh chu" ka ti sa sa a, ka ţawng ring ngam hauh lo.

"Sawmtea kha maw? Nghal viau mah se tual em chu a that lovang. Nang hi a sa talh zo i hmu a ni lo maw?" Pa Zaia zawk chuan a ti ta mai a, in neitupa lah chu pawnah lo chhuak lehin "Lo lut rawh u..thingpuite lo in rawh u" a rawn ti leh tawh a, a kutin min hui zuk zuk bawk a, ka kalpuite pawh chuan an hnar hreh tawh aniang inchhungah chuan min luhpui a, pawn lama en aiin a nuam daih lehnghal. 

"Tu in nge misual chu hmu a" kan hmazawna ţhut pah chuan a han ti a, kan tlangvala lah chu bang nghengin a lo ding ve reng a, tennis ball ni awm tak hi a vawr a, a dawng leh ţhin a, hawi pawh ka hawi chhuak ţha ngam tawh lo. 

"Hei kan ţhenawm nula hian a hmu a, a hmu sual pawh a ni zawk maithei a" Pa Ruata chuan a ti a, hnar hmuh len a awl khawp mai. 

"Han sawi hrim hrim ula..chutiang an awm a nih chuan kan tan pawh a hlauhawm thei a, keini lah kan nula nen mi pathum chiah kan khawsa bawk si a, kan in bawr vel hi a falin sual rawngbawl nan a remchang bawk nen; hriat ve a chakawm alawm" a ti charh charh a, ka meng zawk zawk tawh ang ka ring. 

"A sawi dan hmangah Sawmtea hi a mi hmuh chu a ni awm e" an tih chuan tlangvala chu ka en kher a, lu thin vut pah hian a nui hawk a, a theng thawngah a thawh lo hmel nasa mai. 

"Vanmalsawma hi maw?" Pu Hriata chuan a ti deuh hluai a, a hming pum a han lam chhuak chu ka lo ip chawih thei, an hmel a inang bawk si a, a landan hrim hrim hian awm a ti nuam lo ve tawp. 

"Aw..a sawi dan chu a nia" Pa Zaia zawk chuan a ti a, kei aimahin nuam lo an tih hmel zawk. 

"Tlaiah sa i khawih em?" tiin a fapa chu a han zawt a, a lo bu nghut a, a hmelah chuan nuihzatna a la chambang a, hlau hmel a pu ve hauh lo.

"A va zia lo ve aw..i hmu sual a nih dawn chu a. Vanmalsawma hi a tuina lam a dang deuh a, BBA a zawh khan MBA a ti leh mai dawn emaw kan tia, keini pawh kan beisei a sang ve viau a, mahse tum dang a lo nei a, sa talh a, thar lam leh tui hnai bik taka semchhuah a, hralh char char theih a chak zawk a, a zirpuiten MBA an zawh hnuah pawh hei keini chuan bul kan ţan ve mek chauh a nia, Aizawl chhungah chuan kan pe chhuak tam ve tawh viau a, steak te, a dang te pawh order kan hmuh chuan kan pe ve reng mai. Bazar a mi aia kan ta duh zawk te pawh an awm fur tawh a, chung vel chu a buaipui ţhin a, veng chhung mite chuan an hre tawh viau a sin" tiin zirna lam thleng chuan chipchiar deuhin min hrilh a, ka kutphah a thlan huh deuh dap thei hialin ka hria. Ka zak khawp mai. 

An nula in thingpui a lo dah chu ţi zet hian ka ban a, bawnghnute a pawlh hnem deuh nge ni a sa vak lo a, a la hang zui. 

"Chuan Mami thil dang hmuh i nei lem lo maw? Inhnuaiah khuan sa chu a buaipui ţhin a, ram kan lei a, chutah chuan sa buaipui na tur bik kan sa mek a, vengchhung a tih a ngai lo ţep tawh ang" a tih te chuan ka thingpui hmuam lai chu ka lem khawlh a, "Aw..nei lo...boom...boom" te ka tia, Boomer-a hming ka lam chhuak lo chauh a ni.

"Vanmalsawma chiah hi ka hmu" ka ti a, Pu Hriata chu a thaw a ven hmel huaiin ka hmu bawk. Kei erawh ka zak chem chem a, i nu sawi ang vek hi a ni em an tih te khan engtin nge a sawi lo ti hmasa ila ţha tur a nia. 

Inchhung aţanga kan chhuah dawn chuan "Mawl reuh lutuk thingpui a in ri nasa si" a ti bul bul ri chu ka hre pha reng a, ka hawi let ngam tawh ţhak nang. Zam lutuk te chuan chawhmeh kan hawp pawn a ri hruih zel alawm. Ka thingpui in ring mai mai kha chu ka indem lutuk bik lo. 

"An hnathawk te awm loh lai tak i nang fu a nih hmel. Lo awm tam deuh se chu thisen kai hnuang mah se ngaihdan i nei nghal mai tur a nia. Tikhan thil awmdan kan hrechiang a a ţha zawk alawm" Pa Zaian a tih te chuan ka lo la zak. 

"Engati nge misualin tual a that lai ka hmu anga i sawi a" tiin inchhung ka luh rualin ka nu ka chhuahchhal a, chaw ei an lo siam mek a, min melh zawk duh chauh a, nu ho thil sawi uar thei lutuk hi chu a. 

"Hmuhchhuah in nei em?" U Daizauin a tih chuan "Tualthattu a ni lo..sa sat a nih kha kan hmuh pa kha" ka ti vin hlar a, ka zahna kha ka chhungte ka hmuh meuh chuan thinrim naah a inthlak ka ti mai chaw ei thlengin ka châk loh phah vek. 

"I mawl vangin nangmah leh nangmah i inti mualpho ringawt a nih kha" Tintin-an a lo tih te chuan ka ţeu hlar a, veng khatah kan awm kher bawk nen, ka hmuh leh hunah chuan engtin pawn awm se ka hmu lo der ang tiin ka intiam ru mawlh mawlh a, Pu Hriata an tih phei kha chuan min ngainat loh hmel riauin ka hria a, hrechiang hawt lovin a fapa tualthattu ah ka puh a, ka chungah thinrim pawh nise ka hrethiam lutuk tlat a ni. 

Ka ţhiante hnen a ka sawi chuan "Finfiah ang u" an ti a, an phur viau lehnghal a, keipawh ka bang bik chuang lo, hmuh leh chu ka hreh a, mahse a chanchin ka hrechiang chak viau thung. 

Zana ka nu'n dawr a min tirh chuan dawr kawtah a lo awm a, amah chiahin a ni lo lehnghal. Bike bulah dingin meizual a zu a, hoodie bawk a ha leh a, a hring a ni thung a, a ngaina viau aniang. 

Ka lei tur ho lakkhawm pah chuan ka mitmei ru zeuh zeuh a, min enreng ni a inhriatna ka nei leh tlat tawh. 

Dawr aţanga ka chhuah chuan a ţhiante hnenah "Henu hi kalna apiangah hmuh tur a awm mawle" a ti lung lung a, ka hriat phak ngei tura sawi a nih ka ring.

"Kan in bulah i lokal zawk a nih kha" ka ti ve hram a, ngawih liam san mai mai harsa ka ti ve tlat. 

"Khawi lai nge in in?" pangai zet hian a ti ve reuh a, "Helai lawk hi..gate chhe deuh hi" ka tih chuan "A va ţha ve..ka lo leng dawn, i phal em?" ka mit a min en ran chung hian a ti a, a lerh hmel khawp mai.

"Vanmalsawm nula zawng zawng rim vek tum suh. I lerh lutuk chuan nakinah i la dawng lel mai ang aw" dawr chhung aţangin hmeichhe pakhat a lo au lang lang a, keipawh chu bike bulah ka ding ve ta reng a. 

"Tlangval inleng i nei ngam tawh em?" min ti a, "Ka nei duh lo" rang lutuk a ka lo tih chuan a nui a, a la mawi em em zui a.

"Thisen ka kai tawh lo a nia, min la hlau tho a mi?" awmze nei deuh taka a tih chuan ka ner nang nang a, "I hmel ang chiah pu hi hriat ka nei a, nang angin a lerh ve lo thung a" ka ti a, a lo chek tlak a. 

"Hmelţha chuan an kan ngah ang chu" uang zeta a tih leh chuan ka din hnaih lehzual a, "Phir pui i nei em?" ka ti deuh tawp a, ka hrechak em a, ka zak lui vel peih lo. 

"Nei mai mai lo" a ti hluk a, a mit a sen ram a, zu rim a nam bawk si lo, mahse eng emaw ruih chu a nei chiang alawm.

"Eng nge kan vengah hian i lo tih a?" ka tih chuan "Ele..ka rawn rim dawn che" engthawl hmel zet hian a ti a, a mitmeng dul deuh raih te chuan Boomer kha min hriat chhuah tir a, hepa hi hlau viau mah ila hmuh a nuam ka ti tlat a, ka awmdan hi ka hrethiam tawh bik lo, ka â deuh tawh aniang.

Chhan let ka tum laiin bike thawm a awm a, ri lo chhuahna lam ka hawi rual deuhthaw chuan bike pathum hian chak deuhin min tlanpel fua a, an tlan chak dan chu rapthlak tak a ni, motor dang nen insu se chu an na viau ang.

"Kal ang u" a ţhianten an tih veleh meizial a paih a, "Haw rawh..kan vengah hi chuan zanah hmeichhia chhuah ve loh a him ber" a ti dam vei thlup a, min tlanpel tu te kha um tum ni awm takin chak deuhin an tlanchhuak ve a, kan Boomer khan bike lo khalh ve pawh nise tuna a speed ang chuan a tlan ve thei dawn lo hrim hrim. 

"Tu nge maw i nih le?" an tlan liamna lam en reng chung hian ka phun chhuak sap a, tupawh lo nise ka zawng chhuak tho ang, Boomer nen a kan thlalak te pawh ka la kawl ţeuh a, a ţul chuan a ruang thlengin ka hmuh tir vek mai ang.

Zanah Pa Rama a lo leng a, thingpui ka pek hnuah an bulah ka ţhu ve a, ka nu'n tlaia kan kalna lam chanchin a lo zawt chik leh tawh hle. 

"Pa Ram, kan kalna a mi te kha engtik aţangin nge hemi vengah hian an lo awm?" tiin ka lo inrawlh a, thil eng emaw inphum ru chu a awm chiang a ni, hriatchhuah vat ka tum bawk.

"Kumin hi kum thumna chiah a nia, an lo awm hma lawkin tun a an chenna in khu an sa a, an sak zawh rualin an luah lut nghal a" a tih chuan "Tunhmain khawiah nge an awm?" ka lo ti leh a. 

"Shillong ah an awm ţhin. Pu Hriata nupui phei chu hna vangin tunah shillong ah a la awm nghe nghe a, Pu Hriata lah Mizorama a awm ngei ngei a ngai tawh a, mahni chiaha awm ai chuan tiin a fapa a rawn hruai ve ni awm tak a ni. An nupa hian officer an nia, an awmna a la rei lo viau na a vengchhung mi te hi chuan an hre bel tawh khawp mai" a ti a, "An fapa hi an fa tak tak a ni em?" ka lo ti leh vat a. 

"Ni ang chu ka ti mai..fa dang an nei lova, an neihchhun hi chu theihtawpin an duat ve a, a upa ve viau tawh na a an la naupang chei tlat bawk a" a ti a, shillong ah an awm char char ţhin a nih phei chuan kan tan hmuh mai mai ngaihna a awm dawn hauh lo a, ti hian Aizawl a an awm hnu leh keipawh zirna avanga khawpuia ka awm ve hnuah mak tak maiin kan inhmu thut a, thil thleng palh a nih pawh ka ring lo, Pathianin chhan nei a a thlen tir a nih ka ring mah zawk. U Daizaui sawi dan takah Pa Muana leh Pu Hriata te chhungkua hian thuruk eng emaw chu an nei chiang a ni.

"Laltinkhum tho tawh rawh. I nau thlah a ngai a, nangmah vangin a tlai leh ange aw" bang a ri bur bur a, ka nu a au lung lung reng bawk a, ka hre ţhang a an thawm hian min tibuai tehchiam tawh lo. Ka insiam mawp mawp a, Vanmalsawma ringawt rilruah a awm bawk.

"Fa te mu ţha hle hle lai kaihthawh ching chuan vantirhkoh hnen aţangin pawisa an dawng ve dawn lo an tih kha" pakhat pawh pindan chhung aţangin a au pawr khawp mai. 

"Thu lawi lo sawi reng lo khan tho la a nih chu" ka nu'n a tih chuan "Kalsawn rawh i rethei bik lutuk ang" ring zet hian a lo ti leh a, an tuktin dan a ni ve hrim hrim a, kan thawm hre pha an awm pawhin ngaiah an nei thuai mai ang.

"Vantirhkoh hnen aţanga pawisa dawn leh dawn lohin min tibuai lo. Tho hle hle la a nih chu..delh hlum sa ei tum ang mai tuk pum a mut tum ziah ringawt" ka nu'n a tih lai chuan pindan aţangin ka chhuak a, chaw ka ei tawh bawk a ka inpeih at tawh. 

"Eng sa mah ka delh hlum lo..rilţam deuhin ka mu mek aw" a tih chuan ka lo nui hak hak a, a la hma deuh bawk a keimah pawn ka kal thei mai ang.

"Bus leh taxi a awm tho a kaitho duh lo mai rawh. Keimahin ka kal mai ang" ka tih hnuah pawh ka nu chuan thinrim deuhin bang a la beng ri bur bur a, "A va mak e aw..ka thawh hma chuan ka vual vek zel. Amaha a kal a inhuam chuan kal tir mai mai rawh. Nau awm tu pawh ka ni hleinem" a ti hluk hluk a, pindan hi plywood chauhin a inping dang a, kan phun ser ser a nih loh chuan pawn lam aţangin ţawng a hriat vek ţhin. 

"Laltinkhum motor hran hran a beh kual tir ai chuan thlah rawh ka ti alawm mawle. Mu tur ringawtin kan hruai ve hleinem che" a tih pawh chuan "Zing thawh hi ka allergy a nia, damdawi an hmuh chhuah hma chu min muttir mai mai rawh" a ti ţang ţang a, ka nu lah chu a beidawng duh bik ţhak lo a, rei ngial bang a ben hnuah ka u chu a lo tho ve ta hram a. 

"Naktuk aţang chuan Sensiari thlah man pawisa ka la ziah tawh ang. Vawiin chu ka ngaidam rih ang che u" a ti a, thlak pawh inthlak lem lovin helmet leh chahbi a la a, kan unau chuan kan inzui chhuak a. 

"Gate pawnah lo awm rawh" a tih avangin ka kal tlang a, kawngpui ka thlen rual chuan mipa aw tih hriat zet hian "Nang nu kha" a rawn ti lauh a, ka hawi let rang kher mai. 

Vanmalsawma ngei khan bike a ţhu reng chung hian min lo en a, dawr kawt a awm a nih avangin thil lei tur a lokal vang vang a ang a, duh ai chuan kan inhmu ngun mah mah deuh chu a ni. 

"Sa sat ila" nuihza aw zet hian a ti a, ka thil hriat sual lah kha min fiam zui nan tak a hmang lehnghal a, ka rin aiin a induh lo. Induh leh inti vei ve tak a nih ka rin laiin min fiam zuk zuk reng chu a ni sia. 

"Sa ka sat hman lo class ka kal dawn" ka tih te chuan "Min thlah rawh tihna a ni em?" a ti vel a, ve lutuk hian a. 

"Keimah ang deuh i tih chu tu nge?" bike chu a tawlh riai riai a, ka zawnah tak a ding dat a. 

"Min hmuh tirh aţang khan dik lo a awm tih ka hria" a ti a, a ţawng pawh a zawi tawh khawp mai. 

"Nakinah ka la hrilh ang che" ka tih te chuan "Tunah sawi rawh" a lo ti bul hmuk a, a ngaih ti ţha lo khawpin ka lo awm chu a nia, an inang bawk em a ni.

"Nakinah" ka tih leh lai mekin Tintina a lo tlanchhuak a, Vanmalsawma nen an inhmu ve ta chiah e. 

"Tu nge i nih?" ka u chuan a ti a, a aw leh hmel a mak tihna langchhuak chu tupawn an hmu thiam ang. 

"I hmuh ang hi" tih chiahin a chhang a, ka u chu bike aţangin a chhuk a, ka rin loh dan lutukin a la che phut zui a. 

Bike a Vanmalsawma ţhu chu engkhaw sawi set set lovin a tlawh thla tawp a, bike in a la delh zui a. An thawm hriain dawr nei tute an lo chhuak a, Vanmalsawma chu an buaipui nghal vat vat a. 

"Eng teh hrep nge i hriat a?" sehchilh zet hian a ti a, kekawr dum a ha bawk nen, a paw phuk mai. 

Ka u bawk chuan a pan hnai leh a, buaina a chhuah hlau ni awm takin rawn buaipui tu te khan an hnaih ve nghal ruak bawk a, Vanmalsawma chu palian zawk daih mah se ka u chuan a nghawngah a kuai kun a, kuah bet reng chungin a hmai leh nghawng te chu a nuai tawk tawk a, "Duhtawk rawh u helaiah buaina siam kan phal lo" an tih te chuan "Lo inrawlh suh u" ka u chuan a ti hmuk a, Vanmalsawma hmai duhtawka a a tuai hnuah a sam a kek leh a, "Duhtawk tur a kan tih cheu kha. Hmeichhe insual ang maiin a sam i kek vak vak lehnghal a" an ti a, an pawt ţhen thei hram a, ka u in mak ti hmel a put laiin Vanmalsawma chu a thin a rim takzet tih hriat takin a hmel a dur khup mai. 

"Hmai kawr leh sam lem a ni lo a, tu nge i nih?" vin lek lek a ka u in a tih chuan "Tu nge ka nih?" a lo ti nawn ve sup a, puitling chu awm lo se kut a thlak let ve ngei ngei ang. 

"Kal ang" ti nghutin ka u chuan bike lam a pan a, nidanga ti ti nasa ţhin hle si kan kal tumna hmun kan thlen thlengin kan inbe tawh lo. 

Classroom a ka luh rualin ka ţhiante min lo bawr nghal a, zawhna bak dawn dang ka nei lo, ka chhan sen loh khawp a tam zawhna ka dawng a, chhanna nei mah ila a hrilhfiahna ka nei tel chuang lo. 

"Tintin-a pawn chutianga a ti duh a nih chuan a ang tak tak a nih dawn chu. Jim twins ang deuh kha an lo ni ve ang e. Kha phir te pawh kha kum tam tak hnuah an inhre chauh a, an hming mai bakah an nupuite hming pawh a inan vek kha. Khatiang deuh kha a ni ve maithei a sin. Ka va han hmu ve chak tak aw" Vanin a ti vang vang a, ka chetchhiat dan te kha sawichhuak lehin an nui uar uar a, ka rilru ang tuman an pu ve lova, an vei zui hauh lo bawk. 

"Aizawl a an awmna a la rei bik lova, shillong a seilian a nih avangin amah kha kan hmu lo ţhin zawk a ni ngei ngei ang. Phir an nih loh chuan an inan em em chhanah hian puh tur dang ka hre lo. Boomer-a thlalak en ula, Vanmalsawma in hmu tihna a ni mai. An danglamna chu tlem te chauh a ni" ka tih chuan "Ka hmu ve chak" an lo ti leh a, a hma ang bawkin an ngaihsak zui leh chuang lova, keichuan Ni Mami te biak a, ka mi hmuh pa chanchin hi hrilh vek mai ka duh rum rum a, chutiang khawp chuan rilru a tibuai tawh a ni. 

Ka insum thei ngang lo chuan in ka thlen rualin ni Mami ka bia a, "Boomer ang deuh ka hmu. A hming tak pawh Vanmalsawma tho a nia" ka tih chuan phone a dah hmak a, ka tih der mai mai emaw a ti ngei ngei ang. 

Ka call nawn leh ngat a, amah zawk ţawng chhuak hmasaah ţangin "Thu lawi lo pui pui i sawi dawn chuan lo call tawh suh" a ti deuh hmak bawk a, "Ka hmu tak tak alawm. Kan awmna vengah hian a pa nen an awm ve a, ih Boomer khan phir pui a nei em?" ka tih chuan vawihnih nan a dah leh hmak a, Ni Mami awmdan chuan min ti hamhaihin ka ringhlel tial tial a, zep ruk tlat chu nei lo se a ngaihven hawrh ang a, Aizawl pawh a lokal rum rum duh maithei a ni. A lo hre lawk vek tawh tihna a ni thei angem le? U Daizaui lahin Vanmalsawma an ti reng a tia, an pianhlima lak hran an lo ni reng angem le tih te ka ngaihtuah a, rilru leh thluak a chawl lo a ni ber. 

Tintin-a pawh pindanah a inkhung tlat a, ka nu'n a hauh vak vak pawn a ngawi ngul a, vawikhatmah a chhang let lo. 

Zanah lah chuan message mak deuh ka dawng a, {Maia ka nia, nula i la nih hmel a, ka duh reuh riau mai che} a rawn ti a, a va han hun lo lulai tak em..engtin nge maw ka phone number te a neih theih reng reng ni. 

U Daizaui ka sawm lui a, tlai tin deuhthaw an in lamah khan kan kal ţhin a, ka ute ho an awm lo a, khuahkhirh tu ka nei lo bawk nen, kha tlangval kha hmuh leh tumin theihtawp ka chhuah a, mahse hmuh turin a awm leh tawh lo. Dawrah ka kal tlut tlut a, dawr neitute lahin 'a nu a tlawh aniang' an ti mai zel a, mamawh lai taka hmuh tur a awm lo te chu thin a rim ţun thei mai. 

Chocolate lei tum a zan a ka chhuak chuan dawr kawtah ka hmu leh nawlh a, hmeichhe pakhat nen an ni ve thung a, inhnaih deuhin an ding a, Vanmalsawman wallet a ken laiin hmeichhia chuan a duh a kawk kual zung zung a, hmuh nuam lo ka ti ve ringawt a nih chu mawle!

Ka awm ve tih an hriat nan aw ka thian kharh a, ani pawh chuan min rawn en vat a, ţum dang angin a nui lova, ka u tihdan kha a la hua nge min hria ang pawn a awm lo. 

"Lokal lawk teh" a kawr a pawh pahin zawi tein ka ţawng ve tak na a a hmeichhe hruai chuan min lo en vat a, zanah pawh a inhnawih vam ham mai. A ngo lo na a a hmaifang a dik a, a awm bawr a lian bawk a, a pian pawh a nalh viau mai. Kei aiin a sang daih zawk bawk. Vanmalsawma dar thleng vel a nih laiin keichuan a dar pawh ka chen lo thung. 

"Lo dah khawm rawh" ti a hmeichhia chu a hrilh hnuah "Khawiah nge ka kal dawn?" ka lam hawiin a ti ve thung a. 

Kan in lamah ka let a, gate bulah ka dinpui a, "Nangmah ang deuh hriat ka nei a" tim deuh daia ka tih chuan "I sawi tawh" a ti hmuk a, zahzelah ka nui hul hawk a, a dawhtheih loh hmel em em mai lehnghal. 

"Engati nge i hmaiah khan duk a awm a? An sawisa che mi? I hlau em? I thaw te a hah em?" ka ti mawlh mawlh a, a nur nang a, min nin hmel viau tawh a ni. 

"Nangpawh ngati nge zanah i chhuah?" min tih chuan "Chocolate ka lei dawn a" ka lo ti vat a, ngeiawm deuhin a hmui a lo ti sawi zauh a, sawi hmasak ber tur hre lovin ka ngawi leh rih a, hmeichhia pawh kha eitur khaiin bike bulah a ding vang tawh. 

"Sawi vek dawn chuan a thui ve angreng a, eng lo a nia, kan khuaah nangmah ang deuh a awm a" ka tih lai mekin "Ehe..Vanmalsawma chu inah i awm daih tawh ang chu tih nak laiin" mi pakhat hian a rawn ti a, ti ti pui ka tum hian min lo pawt chat tu an awm ve ziah.

"Kal tlang rawh u" a ti nghut a, chung ho lah chu an nui ţhaw a. 

"Lokal har suh..saw sangtei pawh a tum bur tawh saw" ti a an han chhaih te chuan hmeichhia kha ka en leh hram a, kan dinna lam a lo hawi tawh a, a thil khai kha tum burin a then nalh nalh a, a dawhtheih loh hmel viau lehnghal a.

A ţhiante ni awm tak an kalsawn hnu chuan "Nangmah ang deuh ringawt pawh a ni lo..in inang lutuk ringawt" ka tih te chuan awih loh hmel deuhin a nui a, "Hmanni a kut min thlak tupa kha tu nge?" a ti ta daih a. 

"Ka u a nih kha, ka u chiah a nia. Nangmah ang deuh ka tih kha a ţhianţhaber a nia, a hmuh hnu che khan a mumal lo rei alawm. A nunphung a buai vek a" ka ti bawrh bawrh a, "I khawih let ve duh lo kha ka lawm teh mai a nia" ka tih zawm leh a. 

"Keimah ang deuh chu tu nge?" a ti leh a, meizial a ţan zui zat bawk a.

"Vanmalsawma tho a nia" ka tih chuan a nui hawk a, ka ngawi ta daih chu a ngaithei lo aniang, "Sawi zel rawh" nuihza aw tak hian a ti a, a awih chiah loh hmel khawp mai. 

"A nu chu a boral tawh a, amah pawh nikum khan a boral a, a piang nawn leh ti dawn ila i lian tawh ropui sia" ka ti a, a chhan pawh ka hre lo, ka zam deuh tlat a, ka hmuh hunah chutiang chuan ka ti ang ti a sawi dan tur ka lo zir lawk ve te kha chu ka theihnghilh leh vek tawh. 

"Khawi khua nge in nih?" pangngai deuh a a tih chuan kan khaw hming ka sawi a, a lo bu nghat a, min huat ka rin tehreng nen pangngai deuh a min be thei hi mak ka ti zawk. 

"I sawi chu ka hre lo aniang" a ti fan ruih a, ka lo thaw hak ringawt a, ka hriatchhuah rual rualin phone ka phawrh a, "Lo en rawh aw" tih pahin Boomer nen a kan thlalak ka zawng nghal vat bawk a, ka hmuh tir lai chuan phone ni lovin amah ka en a, a mitmeng danglam nghal zawk te chu chiang takin ka hmu thei a, in ang a inti ve tih a hriat reng mai. 

"Ani chuan a banah tattoo a nei a, nang chuan i nei ve lo a, chak deuha bike i khalh theih laiin ani chuan muang deuh pawhin a khalh ngam lova, in aw pawh a inang lova, i sa a ţha zawk bawk a, mahse thil dangah chuan inang tak in ni. In danglamna i hre mang bik hauh lovang" ka ti dap dap a, ka ţawng nem lutuk chu keipawhin mak ka in ti.

"Chocolate chu ei ţeuh rawh" a tih hnuah min kalsan a, sawi zawm a duh rih lo a nih ringin umzui lovin gate bul aţangin ka thlir a, pawisa a pe fel a, an kal liam ta maw tihah dawr lamah ka phei ve chauh a. 

Ka chocolate lei ak ţat chungin ka haw a, mak tak maiin ka zang deuh hawk a, a hnen a Boomer chanchin sawi a thlalak hmuh tir kha ka duh ber a nia, ka duh dan a ka che thei ta chu ka veng hawk a ni ber. Tikhan ka hmuh hlima ka awmdan danglam vak chhan a hre tawh a, thudik tak hriat a tum ngei ang a, keiin a zarah thuruk tam tak ka hriat phah bawk ang a, Vanmalsawma pahnih, inang tak an awm theih chhan ka hre thuai ang. 

U Daizaui takngial pawn "Ni Mami ten Vanmalsawma an tih ziah kha hepa hi a ni thei mai angem le" a ti a, â phuang kan tih ţhin takngial pawhin a rinhlelh chuan rinhlelh awm a awm tih a a ni mai.

"Ka nu hriatah sawi miah suh aw" ka tih chuan "Sawi dawn nang..amah pawh kha rawn inlan suh se. Thlahrang emaw tiin a khawng thlu duh ang. Ka rap hrim hrim" a ti hlak hlak a.

"Enteh maw..ni Mami khan a sawi reng zel a, a chang leh a thi tawh angin a sawi a, mahse ti hian kan hmu leh bawk si. Ni Mami hian damdawi a ei ziah a, rilru buai damdawi a nih duh hmel ka ti. Keichu ka ning tlat boruak ţha lo kan tlansan thei kan tia kan lawm ve hman em em a, tunah lem mitthi tho leh ni awm tak kan hmu leh reng a" a ti a, a mumal lo khawp mai. 

"Hahdam tawh rawh..keipawh ka awm ngaiin ka awm tawp tawh dawn. Kan hriat ve chi a nih chuan thudikin min lo pan mai ang. Zanin a ka thil sawi kha Vanmalsawma khan a ngaithla liam dawn lova, ka thlalak entir kha a en liam mai mai dawn lo tih ka hria alawm. A hriat chian vek hma chu thudik a zawng hrim hrim ang. A luhlul hmel em kha" ka ti a, mit ka chhing zui a, thudik a biru reng ngai lo. Vanmalsawma khan amah ka hmuh changa ka awmdan a danglam ţhin vang ringawt pawhin min hnaih lui a, ka danglam chhan min zawt duh a nia, engtik niah emaw chuan thudik phum bo tawh hi kan la laichhuak em em ang.

CONT..