VANMALSAWMA-6

VANMALSAWMA-6

Ka phone number nei hauh lo mah se Vanmalsawman min lo biak takin tiin nitin ka ngaichang a, kan in lamah an lokal ngun a, duh ngat se chu min biak theihna hun ţha a tam lutuk tlat a ni. Hriat chian duh a ngah ka ring a, chungte chu min lo zawt chiang anga ka ti ve rauh rauh ţhin a, mahse a reh hmak a, thawm engmah a rawn nei lo. 

U Daizaui peih lo chung chung sawm chhuak luiin an in lamah ka kal pui fo a, beidawngin kan haw leh nge nge ţhin. Chaw ei dawhkan kan kil bial laih lai chuan Tintin-an ka nu hnenah "Pa Muana te hian fa engzat nge an neih?" tiin ka nu chu a zawt a, a la vei ve ngang a nih hmel. 

"Pali..nangpawn i hre reng alawm. Boomer kha i ţhianţha ber a nia, nang aia hrechiang tur an awm a mi? Zawhna ho deuh deuh hi min zawt a" a ti hlak hlak a, antui a hawp rik te chuan Vanmalsawma te ina thingpui ka in rik kha hre chhuak vel nia mawle. 

"Boomer kha kan khuaa piang a ni lo tiraw?" a ti leh a, a thutak vei reuh lutuk te chuan awm a ti nuam lo. 

"Adika leh Puipuii chiah kan khuaah an piang. Boomer leh a u chu hmun dangah" a ti a, ka u chu a lo bu nghat a, a lungawi ta aniang chaw a ei zawm leh a.

"Nu tih tur a awm lo thei sia, dawr kai ve ang u" ngenngawl tak hian ka lo ti a, U Daizaui pawh a lo phur khawp mai. A sap hming hi Daisy a nia, len a cheh ve reuh bawk nen, Daizaui tih hi mitinin kan hriat dan zawk a ni. 

"Eng nge kan zawrh ang a?" a ti a, rin aiin a phur hmel daih mai. Kan khua angin tih tur a tam lova, huan siam na tham hmun awl a awm bawk si lo, tih tur zawng reng chi a nih ve bawk avang hian a remtih mai ka ring.

"Eichawp dawr kan siam ang a, kuhva leh meizial zuar tel ngei ngei bawk ila" ka tih chuan Tintin-a a lo nui hawk a. 

"Nang aiin eichawp dawrin mipa a hip ah i ngai a ni maw?" min ti pek a, mitmei a ka khap vat hnuah ka nu lam hawiin ka nui sang a, ka duh ngawih ngawih thil chu tih hlawhtlin ngei an duh ţhin tih ka hre miau alawm. 

"Vawiinah i pa leh i ute ho ka rawn ve ang a, an remtih chuan kan siam dawn nia" a tih chuan ka phur khawp mai.

"In neitute bia ula, inchhunga bungraw kawl tawp chuan kan in hi a puk ve deuh sia, kawtah sawn dawr tur in lian vak lo kan khawr pum ve ang a, min dawr tu te tan pawh a awlsam zawk dawn a" ka ti zat zat a, "In neitute chu i pa'n be rawh se" a ti leh mai a, mithmul kan ralh ralh chungin ka hmaa ţhu U Daizaui ke ah phur zetin ka tlawh pawp pawp a, ka pi a lo irh awk thung a. 

"Tintin khatin min tlawh min tlawh suh..ka ke ruh a nuam lo ka tih ka tih ţhin hi" a ti bauh bauh a, ka ke ka thukru rang nasa mai. 

"Ka tlawh awzawng lo che..ni lo lo in min puh ziah lo zawk teh" a ti hluk a, an thusawi chu hre lo ang hmiahin ka awm a, chaw ka eizawm mawlh mawlh a, ka phur lutuk tih an hriat chuan min ringhlel ang a, dawr siam an phal loh leh mai ka hlau a ni. 

"Ka beng hi a ţha tawh lo na a min vin vak vak hi chuan a ring ka ti ţhin khawp mai Tintin" muang ban charh hian ka pi chuan a ti leh a, "Sual zawng zawng hmuchhuak tu ah min ngai hek che. A chhia apiangah min mawhpuh ziah alawm" ti hluk hluk chungin chawhmeh te chu a suah sak leh ang lawi a. 

"Savun kan kha min lo pe tel teh" ka pi'n a tih chuan phawk hrain ka u in a en a, "Han la teh" a tih leh te chuan "Vir viau suh. Heng te chu i ei ve theih chi a nih loh hi..ka nu pawh ka pi ei theih loh zawng i siam ziah a, a ei ve chak ţhin si a khawngaihthlak" a han ti vel a, ka pi lah a lo meng khup deuh lap a, "Nakinah i ei theih hlang kan la siam dawn nia, ka pi nizana ka thil hrilh che kha i la hria em?" a ti a, an in man a nia aw. 

"Eng nge a?" ka nu'n a lo tih chuan "Ruat ţahbelhi hriat ve chi loh" a ti a, ka pi lam hawiin a nui vur vur a, a nuih tlawn a ni ber zawk. 

Ka class kal tur min thlah dawnah ka pi chuan a pawnfen ipte a zen rak rak a, pawisa a la chhuak lai pawh ka hmu reng a, ka nu a awm ve avang chuan "Tintin ka khup ruh a na emai min kaitho mai teh" a ti a, na tih hmel deuh hian a awm zui nghal bawk a. 

Tintin-a chuan a pawisa kenna lam tak chu a vuan chat a, a kaihthawh veleh ka pi chuan "Ngawi teh ngawi teh..a na emai ka ţhu leh zawk teh ang" a ti deuh chul a, "Puak i ngaih pawhin sawi zel rawh aw ka pi" tih pahin a ţhut tir leh a, ka pi pawisa ken kha ka u in a hum daih tawh.

"Ka hmu reng che u nia aw" in aţanga chhuah paha ka tih chuan a ţhen suk a, ka darah min kuah thuk bawk a. 

"Ruihhlo pawh hi pitar ho hian zuar se man an har ber ang an tih kha, thil inpek ruk ţat ţat an thiam tlat a" min sawi deuh nawk chung a a tih chuan ka lo nui hak hak a. 

"Nui ringawt suh ka thlah man che hi min pek ziah loh chuan ka pi hi ka standing tir dawn a nia aw. Meng zak zak chungin a'n hralh ru ţat ţat anga" a ti a, a la hma viau na a kan unau thawm chu a ţha khawp mai.

"Kal thuai ta che u i tlai anga sin Sensiar. Nangpawh Laltinkhum rawn haw tlang ang che" ka nu au lang lang ri chu ţhenawm te pawn an hre thei maithei a ni. 

"Kan khuaah i au ring ber a, hetah pawh i au ring leh ber dawn a nih hi. Ka hming pum hi hmang common miah suh aw ka duh reng reng lo a nia" a tih hnuah ka u bawk chuan "Lo va chhuak rawh" a ti leh tawh a, gate pawn a ka chhuah chuan ţhenawmpa in min lo nuih vur vur mai.

"I nu leh Laltinkhuma te inhau ri ngaihthlak hi a nuam a ni..tukin an va inkaitho lo ve" a ti a, kha maw..ka tih reng kha.

"Nia tukin chu ka u a tho hma a" za vak lo a nuih pah hian ka ti a, inhau ring ţhin larin an lar leh ngei ang. 

Campus a ka lut chiah chu mipa pakhat hian "Lokal teh" tih leh min kaih a rual a, ka banrek a nghet deuh a hmer chung hian min tlanpui hlawk hlawk a, a palianin a pen zau bawk si, tawi te chauh la tlan mah ila hah tak ka ni tawh. 

Ngawi rengin ka tlan ve mawp mawp a, min en tur takngial pawhin a lo hawi let bik lo. Min dinpui rualin lehkha intar chu a kawk a, "Ka hming hi i hmu em? Vawiin a ka chet tlatna hmun tur hi han thlir teh..pa min ti viau ang" tih paha min rawn en chuan a nui tawp chiang kher mai. 

A meng zau kawk a, ka ban a paih lawp bawk a, volleyball court ah a hmelhriat ni miah lo min tlan luh pui miau a ni. 

"Ka cousin a maw ka ti che" a lu a tuai vut a, za lo deuhin a nui ro hak bawk a, a lem lem pawn ka nui ve peih lo, bang nghengin ka ding a, ka hah lutuk chu ka thaw hle hle ringawt. 

"Tu in maw pa ti ang che?" ka tih chuan a hmui hnuai lam a liak zauh a, a chhip sam buk lai chu a ţhamin a ţham tawh.

"E..i hre pha elo?" a ti leh ang lawi a, ka hriat ngei tur a sawi chu a nih si kha. 

"Hriat loh ten kan pahnih chiahin kan awm a, i ţawng rin em kha" ka tih leh chuan "Engmah ka sawi lo" a ti leh daih a, mi fing vak lo ka tawng leh tawh a nih hmel. 

"Ţha deuhin i khel dawn nia" ti a kal mai ka tum chu "Ka pi" tiin min la au zui a, a inzuah buk nasa mai bawk si, a khabe hmu tur chuan a khabe hmul hai fe a ngai ang. 

"Engtin maw min koh?" awki sang angreng taka ka tih chuan "Ka pi ka ti. In mawl biak tawp a nuam lo a" a la ti zui. 

"Ka la upat loh em hi...i khabe hmul chhep chhup kha nangpawh misual pawl zinga mi i ang ve tho" ka ti a, ka pi intih tak kha ka la na deuh tlat. 

"A lem a nih hi...tlan pah pawn ka dawm beh char char kha" a ti a, a khabe hmul chu awlsam deuh hian a pawt thla a, "Awii..engati nge i vuah kher a?" ka ti hluai a, ka rap zawk e a. 

"Fang-a...Fangzau" ti a hmeichhe au lang lang ri kan hriat rual chuan a khabe hmul lem bawk chu a vuah leh sawk sawk a, a la bei nghet thei tawh lo zui. Tlanchhiatsan duh deuh a nei a nih ka ring. 

"Ramfangzau" hmeichhia chu a rawn thleng chawpchilh nghal a, kan mi maksak pa lah khan kun ngul chungin a khabe hmul a dawm a, "I nghawnga Ding Dong tih inziak kuau kha ka hmuh loh ring suh" a tih rualin a nghawnga tattoo chu a hup nghal vut a, Ramfangzaua ni si a Ding dong tih tattoo han neih daih chu mak ka ti angreng hle. A zahmawh hming riau te hian ka hria a, a mawi chiah lo khawp mai. 

"Lo va kal rawh hei ka ţhiannu nen kan inbe lawk" a ti a, a khabe hmul lem hraw zet chu a hmet hrual a, nuih pawh a nui tawh lo. 

"Rei suh ang che" a ti hlak a, tur zet hian keimah zawk min melh bawk a, "Ka endik thlap dawn che nia" a la ti zui a, henu ngei tlanchhiatsan duh hian a nih hi khabe hmul lem a lo vuah ni. 

"Min pui lawk teh" ngenngawl taka a tih chuan "Ding dong chu eng nge a awmzia ni a? Sana rik dan maw? A chungah khan sana lem ziah tel tir law law ta che" ka lo ti thung a, khabe hmul a neih loh hnuah chuan a sual hmel tawh lem lo. 

"Tleirawl sual laia ka ţhianpa min tih sak a nih hi. King kong ziak rawh ka tia, Ding dong a ziak daih a, ruih vang mawle" a ti nuah nuah a, a nghawng a tuai pah reng bawk a, a palen tehreng nen a zaidam hmel phian mai. 

"Eng kawngah nge puih i ngaih a?" tih pahin kut ka kuang kuah a, dak deuh vah hian ka en a, Vanmalsawma nen an inchen tawk viau ang, hepa hi rilruah a awm reng mai. 

"Ka bialnu angin mawle..mahse kawlh a ngai thung a, pawisa ka pe ang che. Insual bap bap mah ula na i tuar thlawn lo ang" min ti a nih chu mawle. 

"I zak lo e a(h). Pawisa hman chawp tur te chu ka nei ve tho. Mahni inzuar ţhin pawh ka ni lo" ka ti a, ka kalsan hmak bawk a. 

"Ka pi" ti reng chungin min um zui a, hawi let meuh a "Sensiari" ka tih hnuah chak deuhin ka pen leh hlawk hlawk a, a cousin zawk kha hruai lut ta se a bialnu lem a chang turin a sawm awm tawp si lo a, pawisa hmangin min la thlem zui; eng angah nge min ngaih le?

Ka chhuah rualin ka ţhiante nen kan inhmu hlawl a, "Kan zawng nasa lutuk che" an lo ti a, ka hnung lawka Fanga a lo chhuah ve phei chuan kan pahnihin min en tawn zak zak a, "Eng nge in tih a?" tih pahin min ringhlel awm hrimin kan kal tawhna lam an en kher lehnghal. 

"Senior Fang, kan Sensiari nen eng nge in lo tih ruk a?" Mai-an a rawn ti ve nghal zat bawk a, ka ţhiante ho zinga a awm ve daih dante hi hriat a chakawm khawp mai. 

"Lo ngawi rawh" a ti nghut a, ka ţhiante chu mitmeiin ka kalpui ta daih a, min tlan pui thut lai aţanga sawi ţanin a vaiin ka hrilh ta vek a, min la nuih zui. 

Class chhunga Maia lo lut chuan kan ţhian ho min pan ding chat a, "Khapa kha a upa tawh teh mai a nia aw..a naupan lai thlalak pawh black&white vek" uar zeta a tih chuan "Awihawm loh e..university khatah kan kal a, keini aia a upat pawn kum khat vel bak a ni lo ang" ka lo ti a. 

"Ni lo nasa mai..KG-I a nih aţangin pawl tinah a ţhu nawn zel a, pawl10 bik phei chu kum3 hnuah a zo chiah. A fate rual lek lek in nih kha" min ti a, kan hma chiah ţhutthlengah kan lam hawiin a ţhu a, kan inzawn chiah bawk nen, kan inhnaih bik khawp mai. 

"Hmeichhe hmelţha chu an tam, nang anga tak deuh ngâk hi ka la hmu lo" a tih chuan ka nui phuh deuh ţhat a, tum loh lutuk a ka nuih vang a ni. Ka sweet hmuam lai a thlawk chhuak daih lehnghal.

Maia hmaiah tak a fu keuh a, bet mai lovin dawhkanah a tla leh tap a, ka zah ruk viau laiin "A ban deuh a nih hi" a ti mai a, a hmai chu a tuai puat a.

"Tihpalh lutuk" tih sawk sawk pahin tissue ka phawrh a, ka pek pawh nghak lovin nui vur vur chung hian a lo ban a, a hmai a hruk zawhah dawhkana sweet tla chu tissue chuan a fun a, bawlhhlawh bawmah a va peih vel thlap bawk a, hepa pui pawh hi kan ngaih anga hlauhawm a ni lo maithei a ni. 

In ka thlen ruala ka nu'n "I pa te chuan an phal aw..awm mai mai i nin ka ring reng a a rawn tia, in neitute pawh ka lo bia ang a tih kha. Inchhungah hian kawl tawp mah ila kan inhralh tho ang" a lo tih chuan ka kuah chuk chuk lo chauh a ni. 

Ka inbual zawh chuan tshirt leh pyjama ka ha tawp a, ka nu min leisak a nih avangin inhmeh min tih thu a lo sawi chiam a, bazar a an sale a hmu fuh a, lei fuh a inti khawp mai. Kan suk fai hnua ka vawikhat hakna chauh a nia, duh aiin a te na a ka sawisel sak lem lo. 

Chaw ka chhuan zawh chuan "Chini leh alu va lei lawk rawh aw, zingah i kal hma duh ţhin sia, alu siam ila a awlsam ber" tih pahin dawhkanah pawisa a dah a, puanpho seng turin a chhuak nghal bawk a. 

Phone ka khawih hmasa a, thawmhnaw ro ho ka nu'n a thleh fel diam hnuah ka chhuak ve chauh a, dawr kawt a Vanmalsawma te ţhian ho ka hmuh chuan ke pen a ban charh mai. Dawrah pawh a kal reng tho chuan min hmu thei reng tihna a nia, hriatchian chak a ngah ka rin tehreng nen min zawh chian tumna a nei mang si lo a, thudik zawn chhuah a tum ngei ngei ang ka ti kha a nia, ka ring sual hret a nih hmel. 

Min en ţhap a, tumah an ţawng bawk si lo, ka lai lutuk chu ka ban vai dan te a buai a, ka ke pen te chu a dik lo, ka pen rual lo chauh a ni. 

"Alu hi ka thlang dawn aw" ka tih chuan "Thlang rawh polythene pawh a awm kha" dawr neitu chuan a lo ti vat a, Vanmalsawma te ho hma lawkah alu leh purun vel an chhawp ruih a, thlang tur a ka ţhut rual chiah chuan a ri ţêt a, thawm reh lai chuan a ring duh viau mai. 

"Awii.." ka ti hluai a, ka mawng ka hup chawih bawk a, ka ţhut dan chu a mak viau ang ka ring. 

A zinga pakhat chuan "A vawih" a ti sup a, ţawng zawih a tum viau na a ka hre pha vek, an nui huk huk hlawm lehnghal.

"Ka vawih bawk lo aw..ka kekawr mawng a ţet a nih kha" ka ti hlar a, ka hawi let pah bawk a, ka nu khan a man a tlawm a ti reng a ni. Vanmalsawma tih loh chu an nui ţha a, ka ngei hlawm tak tak a ni. 

Alu ka buk zo te chu ka tho hreh kher mai, a ţet kaw huau ang tih ka hlau sia, ka ţhut ngaiin ka ţhu ta reng a, ka nu ka ko mai dawn em ni aw ka tih rilruk lai mekin "Hei hi i kawngah suih rawh" tih pahin jacket in min rawn khuh a, kan inhnaih a, a rimtui tak pawh chu chiang takin ka hre thei a, min puihna avanga lawmthu sawi tur takngial pawhin ka hawi let ngam tawh lo thung. Lu ka bu zeuh ringawt a, ţhu reng chungin jacket ban chu ka kawngah ka suih bet a, ka ding ve ngam chiah a ni. 

Pawisa ka pek fel hnuah ka tlan haw chawn chawn a, ţah a chhuak ţun thei alawm mawle. Tintin-a bike dah ţha lai chu "Nangmah vang" ka ti ringawt a, a hawi á nasa khawp mai.

"Ringawt zel che hian..i hnar dum bik te kha eng nge awmzia ni a?" min ti let a, ka hrechhuak chiah. Alu khai reng chungin pindanah ka tlan lut a, ka hnar bik a lo la dum reng tak tak a, ka inbual hma deuh a mi tawh kha a nia, ka lu ka su lo a, haw veleh a hmai ka phih hnuah charcoal in ka ziah a, inbual paha hmai ka phih tel ţhin loh vang vek a ni. Hnar chiah dumin dawrah ka kal a, ka la che chhe em em zui a, ka tawt deuh ţun mai, ka au vak vak mai dawn em maw ni?

"Min hrilh ta che" ka nu melh ram ram chunga ka tih chuan "Engmaw ka hrilh ang che? Engati nge i kekawr i thlak daih a? I inhmeh em kha" a lo ti he haw a, a mawng, a inţhuina bul deuh a thler a, hak luih chi pawh a ni lo.

"Ka hnar dum lûk hi min hrilh ta che. Bakah ka kekawr kha ka ţhut pahin a thler daih alawm" ka ti vin hlar a, Tintin-a nuih a za ngang mai. 

"Aizawl i ngeih ka tih kha. I ei vak vak a, i khal ţang a, i kekawr hlui ho chu i la ţhut ţet vek ang" chhang ei mawlh mawlh pah hian a lo ti a, a mitmeng a dik lo leh tawh. Ka nu hrilh ila a rilru a hah dawn bawk si, kan bula awm turin ka duh bawk sia, ka hmuh phak loha a awm chuan ka ngaihtuah dawn lutuk tlat a ni.

Zanah pindanah lehkha ka zir a, U Daizaui a inchei malh malh bawk a, a inchei zawh chuan a biang dawmin a thle kawi ngâih a, darthlalang hma a ţhu a ni bawk nen, a chang leh a nui a, ţha a intih hmel khawp mai. Current a la thim daih zui a, phone light ka ti eng a, U Daizaui chu bati la turin a chhuak thung.

"Emergency light kan ken theihnghilh a, kan la lei bawk si lo, bati eng ringawt hi chu a hahthlak asin mawle" ka nu'n a ti lang lang a, U Daizaui pawh bati pahnih kengin a lo lut leh a, darthlalang hmaah bawk a ţhut leh laiin kei chuan phone ka khawih a, ka ţhiante pali bak biak tur ka nei chuang lo. 

"Ka pi kan lo leng a" ti tu aw ka hriat rual chuan ka ţhu ngil nghal awt a, U Daizauin min lo en vat bawk a, pindan aţang hian ţawng ri a hriat theih vek ka tih tawh kha, ka nu ţawng ri erawh hriat tur a la awm lo. 

"Kan lo leng dawn a" a ti nawn leh a, Tintin-a lah a lengchhuak leh daih tawh bawk si, ka pi leh ka nu chuan mak an ti khawp ang. 

"Bati eng bulah hian lokal teh" ka nu chuan a ti a, a kal ve mai aniang a reh leh vang vang phawt a, "Ka pi, ralthuam kan pai lo. Vanmalsawma phei kha chu dap duh suh" mi pakhat hian a lo ti a, a vawih min ti tu aw kha a ang khawp mai. Ka nu reng reng pawh chu a lo dap vel em maw ni?

"Vanmalsawma maw i nih?" a ti leh vak a, a ri chuan a chhang lem lo a, a aw aţang chuan mak a ti tih a lang reng mai. 

"In fanu nula kha a awm em?" mipa aw ka la hriat ngai miah lohin a tih chuan "Daizau inleng i nei" ka nu chuan a ti zui zat a, a au ring thei mai bawk sia. 

"Engati nge keimah zawk min koh daih le? Inleng i neih ve an phal lehpek lo aniang chu" ti hlak hlak chungin a tho a, pindan aţanga a chhuah chuan "Nula kha a nia kan tih" an lo ti leh a, ka nui chhuak hak mai. 

"Sensiar lo chhuak teh" ka nu'n a tih chuan huphurh bawk si, phur tho si hian ka chhuak a, kawngka bula a ţhiante an din laiin Vanmalsawma chu ka nu hmaah a ding a, a kawrah a la pawh sak tlat zui a. 

"Notebook chu nakinah ka pe ang che" Vanmalsawma en reng chung chuan ka ti a, a jacket ka hawn kha ka nu'n a hriat ve kher ka duh lo. 

"In inhre tawh maw?" mak ti zeta ka nu'n a tih chuan tualthattu emaw ka tih thu te kha ka sawi chhuak leh a, ka nu hmel a la dik theih loh laiin Vanmalsawma ţhiante an lo nui huk huk thung a, an hre ve chiah a ni ngei ang. 

"Vala chu i thi tawh emaw kan tia, Patea zawk em ni thi kha? Tintin-a a awm mang si lo a, lo nghak rawh u a lo haw ţep tawh ang" ka pi chuan a ti a, mak ti hmel a pu lo ka ti reng a ni. Thil hi chiang takin a hre ve ţhin lo a, Boomer ang tak a hmuh leh takah chuan Tintin-a ţhian dang zawk an thi emaw a ti a ngei ang. 

"Khawiah nge i awm ve a? I lo va leng har ve, i ţhianpa lah chuan zantin a len na tur a hre leh tawh a, in chhungte inah i awm nge i ni in a awmpui che" te chu a la ti tak deuh deuh a, "Ka pa nen kan awm" a ti bul hmuk a, a nin tawh hmel nasa mai.

"Muana chu kan khuaah khan office a kal emaw tia Aizawlah te a awm ve thei a ni maw? Ţhu rawh u..Ruati nangpawh pawt bet tlat mah ta che, dam chuan a lo leng ziah thei tawh ang chu. Khaw khatah kan awm char char zel sia, I nu Ruati khan a ngai ve che a nih kha" ka pi chuan a ti a, hriat lohna hian mihring hi min ti danglam thei khawp mai. Ka nu leh thil hrechiang lo ka pi ten Vanmalsawma an lo dawn sawn dan pawh a danglam em hi.

Ka nu chuan muangchangin a thlah a, "Ţhu rawh u" ţhutthleng kawh paha ka tih hnuah pawh a che vel chu ngun deuhin a la enzui reng a, rin aiin a lo dawng sawng ţha zawk. Current thim lai kherin an lokal bawk nen, a vuak thluk tawp duh ka ring a nia. 

An ţhian ho chu pathum niin ţhutthleng pakhatah an ţhu tlar ţhap a, "Eng nge in lo tih a?" tih paha an ţhutna piah ţhutthleng a ka ţhut chuan Vanmalsawma chu za lo deuhin a lo kiai suk a, ka zawhna pawh chu min chhang chuang lo.

"Sa i sat lo em ni?" ka ti leh a, a hnathawh duhzawng hi dangdai ka ti tlat pek a, sa hel phei chu a thang si, nilenga han sah chawrh chawrh reng mai chu a ninawm duh viau ang. 

"Sat bik lo e" a ti a, a ţhiante lah chu an nui tak ang vur vur a. 

Kan ngawih ţhap lai chuan "Tlaiah khan tun a ka jacket hak ang chiah hi ka ha, a rawng a danglam thung a" a ti a, lerh viau tur a ka ngaih laiin sawi tur a va hre lo reuh tak. 

"A mawi khawp alawm" ka ti ve mai a, "I kekawr mawng ţet kha i ţhui tawh em?" a tih leh chuan a ţhiante an lo nui uar sauh a, ani pawh a nui ve tawh alawm. A nuih hian a hmelţha sual a, nui reng mah se hmuh ninawm ka tih ka ring lo. 

"Ka paih daih" ka ti hmak a, a ţhianpa pakhat chu bazar a ka hmuh pa kha a ni tih ka hria a, pakhat zawk pawh hi Vanmalsawma dawr kawta ka hmuh apiangin a lo awm ve ziah. 

A ţhiante ka en leh ţhin tih a hria nge mawni "Hei hi Pektea a nia tih pahin bazar a ka hmuh ve pa zawk khupah a beng deuh chawrh a, a piah zawk a mi hi Peka" a ti a, an hming a inang viau mai.

"In hming a inang a ni maw?" intih nelawm tum taka ka tih chuan "Vanlalpeka leh Lalpekhlua" Pektea zawk chuan a lo ti a, a danglam leh tlat. 

"Thingpui kan lum ang aw" ka ti a, inleng te thingpui lum sak loh em chu ka tih deuh vang a ni. 

"Thingpui paw a nih chuan plastic no ah chuan kan in duh lo aw" Pektea bawk chuan a ti leh a, plastic no kan hmang lo na a "Engati nge?" ka ti he haw a. 

"Hmeichhe hnute tui rim a nam duh" tiin Peka a lo inrawlh a, plastic no ah thingpui ka in ve fo tawh a, rim danglam ka hre ngai hauh lo, an dangdai hlawm khawp mai. 

"Plastic no loah ka lo siam ang" tih pahin ka tho tharh a, "A tho hne hne lo tlat..nupui tlak" ti a Peka phun sup ri chu ka hre pha a, a rukin ka nui var var a, ka mizia hriatchian tum a lo leng an nih ka ring ber tawh.

"A thlum nge a hang in duh?" ka tih chuan "A thlum rawng kai" an ti a, a thlum pangngaiah ka ngai ve ringawt a, Vanmalsawma ţawng ve mang lo chuan min kap run a, a ţawng tam lo nge a zak tih lah ka hre der lo, ka nu awmdan khan a ti lawm lo zawk nge maw ni?

An thingpuiah chuan chini fian hnih ţheuhin ka telh sak a, ka nu leh ka pi ka siam kep bawk a, ka nu phei chu pindanah a awm daih tawh. Ka nu ka pe hmasa ber a, khumah ngil auhin a ţhu a, thingpui no ka dah hnua chhuah leh mai ka tum chu "A mak ka ti emai. I pa leh i ute hrilh ve a ngai a ni. I u Malan chhui chiang rawh se" a ti mawlh mawlh a, phung hmu ang mai a ni. 

"A ngai lo..a rukin ka thli thlai ve reng a, nakinah ka la hrechhuak mai ang. Hrilh reng reng suh ang che" tiin ka khap a, midang ka la pek ve loh avangin ka chhuahsan thuai a. 

Ka pi ka pek hnuah an ţhian thum chuan ka pe leh a, an han in chiah chu Peka a nui put put a, ka ngaih a ţha lo hman lek lek tihah "A thlum tui hle mai" a ti a, ka awm a nuam suai suai mai.

"Kar khat vel kan lo len tlauh tlauh chuan kan zun pawh a thlum tui ngawt ang" Pektean a tih chuan ka nui hak hak a, min fak se min sawisel tih pawh ka hre lo. 

"Tlawmngaia thingpui kan siamsak che u chuan phun phun lo khan in mai mai rawh u. Thingpui no7 vel lekin in zun a ti thlum tham lovang" U Daizauin a lo ti hlak hlak a, a chhut vel thlap a nih hmel.

"Misual ah ka puh che sia, i pa khan FIR a theh lut duh mai ang tih ka hlau lutuk a" ka tih chuan a nui chhuak hawk a, "Pa Hriata maw i sawi a?" Pektean a lo tih chuan ka bu nghat a, FIR theh luh na thamin ka che alawm le. 

"Pa Hriata te chu a hlauhawm asin. Khatiang khan a fapa puh tawh reng reng suh. A lehpek a awm a nih chuan FIR ka thehlut ang a tih kha" tiin Peka chuan min han sawi ţhaih a, kha thil kha chuan tun thlengin awm a la ti nuam lo reng mai. 

"In inchhung chu a nawm reuh hi" Vanmalsawma chuan a tih lai mekin current a rawn eng a, "Fak fuh chaih chaih ve" a ţhianten an lo tih chuan a ha var nalh zet lang chuan min lo nuih a, tawi te hian ka nui let ve a, êngah chuan tlemin ka zak ve deuh. 

"Ka nu a awm chuang lo a, jacket chu ka va la ang aw" ka ti a, "A ngai chuang hleinem" a ti na a pindanah ka tlan lut ta tho a, bati pahnih kan lo kalsan chu niin, ka hre chang tawh lo reng reng. Ka chhem hlum ve ve a, ka jacket dah ţhat chu ka la chhuak bawk a, a pan hling hleng hle a, khawvawh lai phei chuan ha ila vawt kan ti zual viau ang tih tur a ni, khawlum lai chuan a hak tlak viau thung.

"Kha le" a malchunga ka dah chu a lo la vat a, a keng ţha ve hle hle dawn maw ka tih laiin a hak thuah daih, a lian ţha ve bawk em a ni. 

"I hming pawh kan la hre ve lo" Pektean a tih chuan "Kan hriat kha..a nu'n Sensiar a tih kha, Sensiari tiraw i nih?" Pekan a lo ti ve thung a, ka buk nghat rual chuan "Kha maw" a ti leh hram a, an thawven dun hmel khawp mai. 

"Sensiari" Vanmalsawma pawn a lo ti ve sup a, Boomer nen an inan lutuk vang nge a fel viau chang hi chuan ka ngaina nghal ţhin in ka hria, mahse a sual thiam ve em a. 

"Ka duh leh" tih pahin thingpui no ruak min pe a, mak ti zet a ka lo en lai chuan no chu a ti che det det a, "No khat chiah ka kham lo" a ti leh a, a nui duh mang bawk si lo, "Aw..ka lo siam leh ang" ka ti ban charh a, no ka laksak hnuah a ţhiante leh ka pi no ka khawm a, thingpui lum leh tum a ka kal chu "Ka uang a nih kha" a ti a, ka haw viau na a a nui hmel chu hmuh nuam ka tih loh phah chuang lo.

"Nupui tlak" a ţhianten an lo tih leh te chuan current thim lai ai khan ka zak daih zawk a, no ruak te chu ka sil sual velin ka hria. 

An piaha ka ţhut leh hnu chuan "Nang chu Sensiari i nia, pakhat hi i nu khan Daizaui a tia, Nu Daizau kan ti mai dawn che mi?" Pektean a tih chuan U Daizaui lung a awi loh hmel kher mai. Mahni tawka ţha intih ve nak laiin an nu rual emaw an ti chu a nia, a rilru a na ngawt ang. 

"I nu rual ka ni em ni? Pawl sawm bak ka ni lo" a ti hlak a, mak an ti hmel nasa mai, an hrilh a hai a ni zawk mahin ka hria.

"Pawl sawm chiah maw i nih?" an tih chuan "Ni e..pawl sawm thleng chiah ka kal a, pitar ka nih hunah pawh pawl sawm ka ni dawn tho" a ti a, uar zeta a nui chu nur nangin an en ve thung a. 

Vanmalsawma chuan haw a rawt a, "Min thlah rawh" a tih deuh tlat avang chuan ka zui chhuak a, ka nu a tawm bo daih tho a, ka pi chuan min hau lo ang.

"Bike ka ngai tawh lutuk" an ti a, a ţhiante pahnih chuan min tlansan daih a, gate bula kan ding dun chu sawi tur a vang duh khawp mai. 

"I phone number min lo pe teh" tih paha phone min pek chuan rang takin ka lo chhu kai a, ka hmuh lai rengin ka hming a type ve bawk a, Sensiari tih bulah pangpar sen an dah ngei a(h). Ka phone number min dil hlauh chu ka lawm ru angreng. Ka ngaihzawn vang leh mipa ka duh hawrh vang pawh a ni chuang lo, thil inthup eng emaw a awm ka la ring reng a, chu thil inthup chuan amah ka hnaih hian min lo hnaih ve zel niin ka hre tlat a ni. Ani pawh hian hriat chian duh a neih avanga phone number min dil a nih ka ring. 

"Pangpar hian i lungawi thei mai em? Nge ni a motor leh thlawhna vel i duh deuh zawk?" min tih chuan ka ner nang nang a, "Ka ţhiante pahnih ah kha chuan zawngte ka dah a" a tih zawm zat a, hming bulah emoji a dah tel kher zel em maw ni?

"A ho lutuk..emoji dah tel kher pawh a ngai hleinem. I dangdai ve sia aw" ka ti a, ka nui lui nasa hle bawk. 

"Tak taka engtikah nge in khuaah i haw dawn?" thutak deuh hian a ti a, eng eng emaw chu hriat a tum ve chiang alawm.

"Ka hre lo le..in kan luah bawk sia, ka haw khat ngawt ang. Krismas dawn velah daih a nih ka ring" ka tih chuan a ner sawk a, a la hla ve em a ni. 

"Engati nge?" ka tih leh chuan "Ka zawt mai mai che..mangţha muttui naktuk atan chaw ei tui class kal nuam aw" a ti deuh duah a, ka nui vak a, a ni pawh a lo nui ve a, a va han nuam reuh mai mai tak. 

Inchhung ka lut leh chuan chhuat dungah ka nu a lo vei tawn sek a, ka pi bulah thil awmdan a sawifiah mawlh mawlh bawk a, "I u Mala hrilh mai ka duh" a ti leh ţhin a, a rilru a buai hmel viau tak tak mai.

Tintin-a lo haw chu a lo hrilh veleh nghal zung zung a, ka u lah chuan "Pa Muana i ngaih vang a nih kha" tiin a lo fiam a, Pa Muana hi Boomer a pa kha a ni. 

"Thil ni lo lo sawi ţhin suh. Hmu ve la chu mak i ti ve tho ang. In in rual hmel bawk si a, police chhui chian tir te ka lo sawi hi" ka nu'n a tih chuan "E...Pathian kutah dah la, awm nawm loh nan hmang duh suh" a ti ve ngial a, pianthar ţhat ve hmel lutuk. 

"Pathian kut a kan kawltir a ngaih rualin mihring te hian tih tur tam tak kan nei ve tih hre ta che. Zu rim a nam leh ta huam e, zu zuar te lah hi i hre thei si, a tui viau em ni engati nge zu hi i in reng a?" a ti hlaih hlaih a, inhauh inringin a ding leh auh tawh.

"Thil tui lo leh hmel mawina nei lo a nih rual hian zûn a nei a, nuthlawi zûn a uai ai pawn kan uai na zawk chu a nih hi. Nuthlawi zûna uai te hi chu hmeichhe tih lawm ngai, biak seuh seuh ngai chiin an khawsa a, zu zûna uai te hi chuan kan in a, tlem kan zung chhuak a, a bak zawng kan mutpui hmak mai a, ngaihţhat thlak deuh a sin" a tih te chuan ka nu chuan "Ka nuih pawh a za lo, nuih pawh ka nui peih lo" a ti hmak a, "Dêk" tih paha Tintin-an a kheuh zeuh chuan a eu zawk a, a nui leh tho sia. 

Mut hmunah U Daizaui nen Vanmalsawma min lo biak hun kan chang ran a, ka thlah lai khan phone kengchhuak ve ila chu a number ka la ve nghal thei tur a nia, a dp te pawh hmuh a chakawm a sin mawle. 

"A lo biak hma che chu ka muhil lo ang"_ ti tu U Daizaui a mutthilh bawrh bawrh tawh hnuah pawh ka la meng kar a, thil awmdan vel ka ngaihtuah kual a, a bul te aţanga tun a kan awmdan thlengin ka ngaihtuah nasa mai. Puh tur dang ka zawng nasa a, pakhatmah ka hre lo. Kan khuaah Vanmalsawma a piang lova, ka nu takngial pawhin mak a ti ve a, rei ngial ka ngaihtuah hnuah ngaihdan nghet ka nei thei a, chu chu tun a Vanmalsawma leh Vanmalsawma thi ta kha phir an ni tih hi a ni. Hmel inang tak an awm theihna chhanah hian thil dang puh tur a awm lo. Phir an nih ka ring bur tawh a, hming inang chiah an neih nachhan chu anmahni la hrang tu an nu leh pa te bawkin an hria ang a, an lak hran nachhan thlengin an sawi thei ang, an duh phawt chuan. 

CONT..