VANMALSAWMA-7

VANMALSAWMA-7

"Nu Ruat, tukin dawra ka va kal chu Sensiari hmelţha an tih zia an lo sawi nasa mai" pads hum ţat chunga U Daizauin a tih chuan ka lo lai ve ringawt a, class kal turin ka insiam peih diam tawh bawk. 

"Ka fanu hi chu hmelţha deuh a sin..inti no chawp hauh si lo hian a nu hnâp a, a pa nen pawh kan chhuang ve alawm" ka nu chuan a ti a, Tintin-a pindan bulah dingin an thusawi chu ka ngaithla a, nuih loh a va han har tak. 

"Awii...sawi lo mai teh dawrah pawh a hming hi a inhmeh e te an lo tia, a vun a no si, a hmel a ţha reuh bawk si an tih nasat kha" U Daizauin a tih chuan "Mahse a hnar hmul a lawr tet zel an ti" pindan chhung aţanga Tintin-a a lo au leh lauh takah chuan ka nui tawp hmak a, ka hnar ka hup nghal vat bawk a, inringtawk lo deuha min siam hi a thiam ve a nia aw. 

"Chutiang chuan an ti lo nasa mai, a hmelţhat thu hlir an sawi tak tak alawm. Sensiari hre lo tur deuh a ka ngaih lo awm ve pakhat pawn a fak ve chiam kha" tiin U Daizaui chuan a lo hnial vat a, keipawh ka nui veleh tawh a, ka hnar ka la hup ţat reng thung. 

"Ruat dulkiari fanu a ni thei lo an ti" Tintin-a bawk chuan a lo ti leh a, ka nu thinin a tuar tawh lo aniang "Laltinkhum" a ti leh ţan tawh a, a vei kual pah turh turh a, ka nu hi chu a awm mai mai thiam lo reng reng. 

Tintin-a pindan kawngkhar a inhawn rualin uite hmelchhe deuh, pug kan tih ang chi kha a lo tlan chhuak terh terh a, tupawn mak kan ti vek. Zanah kan mut vek hnuah a lo haw a, uite a lo hawn tih tunah kan hre chiah vek a ni. 

"Hei hi eng nge?" ka nu'n a tih deuh hlut chuan "Pangang" ka u chuan a ti hmuk a, a nur nang mai bawk a, a lungawi lo ve ringawt em maw ni?

"In neitute phalna la lovin ui kan vulh ringawt thiang hleinem. Dah let leh vat ang che" a tih te chuan "In neitute min pek a nih hi. Zantin ka leng a, hei min nel em hi..tun hi lak hran hun chiah a nia, an to nak laia pawisa chawi lova ka nei thei hi lawm hle rawh u" a ti hluk hluk a, a hma ai mahin kan phawk zawk emaw tih tur a ni. 

"In neitute inah i leng ţhin a maw?" ka nu bawk chuan a ti leh a, "Ehh..mak i va ti awm ve. Tlangval ta na fam chuan nula kan rim ve bawk ang chu" a ti hem mai a, ka nu pawh a ka hau mai. 

"Ka nu..i tupa hian in neitute fanu a lo han rim ţhin a nih chu. Zahthlak hian..hei an uite pawh a lo hawn daih alawm. Laltinkhum, rui chung ten i leng ţhin em? Min ti mualpho lutuk ange aw" biak bik pawh nei lovin ka nu chu a phun mawlh mawlh a, "Dawr kai pawh an phal kha. In enkawl ţhat dawn te chuan in duh duh siam rawh u an ti, ka sawifel vek tawh. Ka pa'n a biak chawp an ngai tawh lo" ngaihsam zet hian a ti a, mi pakhat chu a ni ve chiang a ni. 

"I leng ţhin tih an va sawi lo ve..niminah pawh in neitunu nen kan inhmu reng sia" ka nu'n a tih chuan "Aww..chhungkhat kan la ni dawn a ti tawp duh bik nang mawle. I ril a ţam tawh em ka enchimloh?" a ti a, a uite luah chuan a chul hliau hliau bawk a, a hahthlak bet bet khawp mai. 

"I nau sawi ang khan dawr tur chu a hranpa a sak an phal maw?" ka nu'n a ti ţha leh ngat a. 

"A va mak e aw..an phal ka tih tawh kha. Zuin leh mut bak thiam nei lo chu min ti tawh miah suh. Sawi ngai lo hian thil ka ti fel zung zung ţhin tih hre ta che u" a tih hnuah "Chhuak lawk ang aw Ka enchimloh, zun te i duh ve tawh ang" a ti leh a, a uite chu a pawm chhuak a. 

Ka nu chuan ka pa be nghalin "Laltinkhuma leng chhuak ţhin hi tlangval dangte nen an theu leu mai mai ang chu tih nak laiin in neitute fanu a lo rim zantin ţhin alawm mawle. Tukin ah a sawi a kan hre ve chiah a, dawr pawh i sawi ngai lovin a lo sawifel vek tawh. Thawk ţha a la inti em em zui a" a ti bawrh bawrh a, speaker a on avangin ka pa nui hawk hawk ri pawh chu ka lo hre pha ve a, "Ka fapa hi chu a" a ti a, a chhuang zawk mah emaw tih tur a ni. 

"Ui hmelchhe deuh a rawn hawn a, ka enchimlohi a tia, an in pawm chhuak ta a nih kha. Veng chhungah hian Tintin-a hre lo mang an awm leh tawh lovang. Awm ţha duh se chu tunah chuan MA a zo ve tawh ang a, a zir duh tawh der mai bawk si lo" a ti tan tan a, a beidawn ţhin zia hriatpuitu ka nia, ka nu hi khawngaih chang ka ngah mai.  

Ka class kal tur min thlah te chuan ka enchimlohi chanchin ringawt a sawi a, keiin thil dang daih ka ngaihtuah thung a, "I ngaihthlak ţhat loh chuan ka thlauh lui ang che" tiin min vau deuh reng a, "Ui chanchin ringawt sawi chu a ninawm e" ka ti nang nang a, kan inhnial zui bap bap reng a, "Ka rilru buaina hi thutakah i la ve lo alawm" ka ti chhuak ta nge nge a. Ka u a nia, ka inbunruahna ber a ni bawk a, ka nu ai pawh a min hrechiang zawk tu a nih laia ka buaina a ngaihven duh hauh lo hi ka vuina ber chu a ni. 

"I rilru a lo buai elo? Thutak deuhin mental hospital ah ka dah dawn che mi?" a ti duh lek chauh a, "Kha tikhan fiamthu nan min hmang zel a, Boomer-a nu kha a thi tawh a, ni Mami hian a hrechiang ber a, kei ai chuan i be thei zawk daih dawn a, han zawt chiang ve zung zung la chu engkim kan hre fiah vek tawh ang. I rui reng a, thil ti tak tak turin i laktlak loh alawm. Ruihhlo nen a ho deuh a i nun reng chuan ka zah lo zo vek mai dawn che a sin" ka ti tan tan a, ka thutak tehreng nen "Aia upate zahthiamin" tih hla kha min sak khum a, ring deuh deuhin kan university lama tlanpah chuan a zai a, min nuih tu pawh an tam mai. 

"Ngaihven ve deuh teh..keichu college kan kal ve ţan tirh a Kimkimi bo daih te khan ka ngaih a la ti ţha lo riau a nia. Ka awm mai mai te hian ka rilru a hah ringawt zel" ka tih te chuan "Awm mai mai pawh a i hah chuan i va chhawr tlak awm loh ve" a ti daih a, a nâkah ka sik a, tih dan dang ka hre bawk si lo chuan "I hmelchhia nih chu a" ka ti ta ringawt a. 

"Ehe..saw mite saw eng nge an tih a?" a ti deuh hlut a, office kal tur ho chhuah vanglaia kan chhuah ve avangin traffic jam ah kan tang a, two wheeler khalh ho tan pawh kal luih hleih theih a ni lo. 

En mai mai a duh tawk lo aniang chu ka tlai leh tlai loh tur pawh ngaihtuah lek lovin a hmelhriat te awmna lamah chuan a peng phei ta daih a, ka nu khan hmalamah chauh tlan rawh ti a a chah thlap chung pawhin kan peng hram dawn a nih hmel. 

Workshop kawta a din dat rual chuan "Ka tlai ang e" ka lo ti a.

"Kan din reng tho kha, ni sa hnuaia din reng i peih a mi?" min ti a, ka chhan hma hmain "Tintin" an lo ti a, nuih suk pah hian workshop chhungah chuan a lut a. 

"In nu mi?" min kawh zauh paha an lo tih chuan a ner sawk a, "Nupui ka la nei leuh..nei pawh ni ila hei ai hian a ţha daih ang" a ti vel a nih chu mawle. 

"Ka nau a nih hi" a kawr phelh pah hian a ti a, "I gym ve ţhin a ni maw?" a awm ruak kung mai ben thuk paha an zinga pakhatin a tih chuan "Teuh nang..Pathian min siam dan liau liau a nih hi" intithei zet a tih pah hian a taksa chu a en vut a, workshop chhunga awm ve ho chu an lo nui huk huk a. 

"I lo lut hlawl a, tuk dangah i lo lut ngai mang si lo a, i lo kal hun chu tlai lam a ni chauh zel sia" an tih chuan "Jam ah kan tang a, nisa hnuaiah ka ding reng peih lo. Ka vun rawng a inang lo palh ang" a ti hluk hluk a, a taksa chu chhuan hmel tak hian a en leh a, kekawr em chu a phelh bik lo e. 

"Workshop kawt a lo ding te kha i hmelhriat an ni nange?" ka lo tih ve chuan "Chutiang ka hmu lo" a ti leh ang lawi a, hepa hi chu a chang chuan a khamawm ţhin tak tak a ni. 

Hmanrua a la a, a ţhiante bike lo siam mek chu a pui ve a, "Keipawh tukin chu min tur nasa viau lo se chu ka kal hma lo ang..ka tho peih lo lutuk a a(h)" a ţhianpa pakhat chuan a ti a, an hming pawh ka la hre hlawm lo. 

"Khawih ve ringawt suh i ti sual hlauh ange aw..a pawi nasa dawn a nia" Tintin-a banrek a vawn chawt paha ka tih te chuan a ţhiante zawk nuih a lo za a. 

"Keini ai pawn a thiam zawk ang chu..mechanic tur diktak a nih hi" an tih chuan min lo enin mithmul a kan ralh a, a intithei nasa mai. 

Sana ka en sek tawh a, ani lahin tu tih hriat loh bike chu siamţhat tumin a khawih tui nasa mai bawk si a, tur ve engang mah ila awmzia a awm mawh khawp mai. 

"Hman zan chuan tu nen maw in han intlansiak vel a?" an ti a, ka hriat hlau tak hian "Vanmalsawma" a ti deuh sup a, ka din hnaih angreng a, ka hre pha tho tho. Anni pahnih hi an lo inhaw chhunzawm em maw ni dawn le?

"I chak lo maw?" a ţhianpa in a tih leh chuan "Ka chak thei a mahse ka chak tir. Nakin zel atan elpui tham a ni dawn em ka enchhin vel a nih kha" a ti pang pang a, ka lo ngei zawk. Vanmalsawma ngaihsak lo hmak ang khan a awm a, kan Vanmalsawma lo midang a sawina a ni lo tih ka hrechiang viau bawk. 

A duh dan taka a khawih hnu a min thlah chuan ka tlai chiang khawp mai. A inthiam loh ve ka rin laiin "An ţan hma lui" a ti tlat a, ka han hnial ve deuh te chuan "Min puh chhiat i tum?" a ti a, a nuih a la zat hmel em em zui a. 

"Fel deuhin awm la ţha deuhin zir ang che. I tlai sia pawisa ka laksak lo mai ang che" a ti a, dim lo zet a min nam dawrh hnuah chak tawkin a tlanchhuak leh a, bike chhe siam te kha engtin nge a lo thiam ve reng reng ni? A chimawm a, a nghal bawk a, mahse tuina chu a lo nei ve a nih dawn kha. 

Class banah lehkhazir ang deuha awmin lehkhabu ah thil dang ka ziak a, ka nu leh U Daizaui te rawngbawl pawh ka pui ve lo. Chhunah ka ţhiante nen eng eng emaw kan sawi chhuak a, chuta ţang chuan ka thil hriat ang ang te ziah chhuah duhna ka neih phah a ni. 

"Sensiar engtikah nge dawr bungrua kan lak ang? A la tlai chhe lo a, ni a rei tho bawk a, bazarah kan kal lawk dawn em ni?" ka nu'n a rawn tih chuan lehkhabu ka khup thawk a, pawisawi lo awm deuh hian ka lo en ha a. 

"Dawr tur pawh kan la sa si lo a, bungraw lak nghal rum rum i duh tho a mi?" ka tih chuan ka bulah a lo ţhu a, muk deuh tak hian "I pa sawi hmangah i uten an remti chiah lo a ni awm e. 'Pathian zarah hna kan nei vek a, an mamawh kan tih sak thei a, dawr siam kher a ţul lo' an ti e a tia, awm mai mai turin min duh a nih ber chu. Kei lahin dawr siam ka lo chak ve tho bawk si a, nilenga tih tur nei lo a ka tawm reng ringawt chuan ka damlo zawk mai ang" a ti a, kut awl a awm thiam lo chi a ni bawk nen, hrehawm a ti ang ka tih reng kha. 

"Min khap tak tak hmaa bungraw lak i duh tihna maw?" ka tih leh chuan "A ni mai ang chu. I ute hi chuan hna ka thawh ve an phal tawh lo a, helama dawr ka lo siam khan anmahni an hmingchhiat daih an hlau bawk ang a, nangpawn hre reng rawh. Inchhungah nu ber kan chet reng a, engkim kan la tih vek chuan kei ni lovin nangmah i hmingchhe dawn a, inchhung a balh a, miin ţawp min tih pawhin kei ni lovin nangmah tho i mualpho dawn a, inchhung a fai a, a felfai reng chuan 'a taima' tiin an fak che ang a, inchhunga che rual i ni tawh a, kan in a lo chuang kai te reng reng hian inchhung awmdan a zirin kei ni lovin nangmah hi a nia an teh dawn che ni. Nula in la nih lai hi pasal awp bettu in neih loh lai mah ni se mitmei ven tur tam ber hunlai, fimkhur a nun uluk a ngaih ber hunlai a ni tih hriat reng a ţha" a ti duah a, dawr bungrua aţangin inchhung chetah kan pakai leh daih tawh. 

"Bungrua chu kan la dawn em?" ka lo ti ve thung a. 

"Wholesale dawr inhawng a la awm chuan lak a pawi lo. Gate bulah sawn Sensiari nepnawi dawr tih tar ila, ualau deuhin awm lo mah se lokal tawk chu an awm tho ang" a ti pek a, "Ka hming ziah tel kher a ngai lo" ka ti vin hlar mai. 

"Tintin store; stayfree leh diaper tlawmna kan ti mai dawn mi? Nge Tinkhuma store kan ti zawk ang?" a ti a, kan nui dun hak hak a, Tintin-a lawm lo hmel tur mitthla phei chuan a nuih loh theih loh. 

Kan nufa chuan kan inzui chhuak ta ngei a, atm ah kan kal hmasa a, dawr a inkhar hman kan hlauh avangin taxi kan hmang a, bus service na chin kan thlen hnuah pawh a rei loh zawk nan tiin bazar thleng a kan hman duh thu kan hrilh a, wholesale dawr awmna te kan zawt pah bawk a, ka nu hi chu rilru hmanhmawh chi a nia, a chak zawng tak a lo ni kher bawk nen, ka uten phal thlap mah se tun ang hian a ti rum rum tho ang. 

"Kan khuaah te khan eichawp dawr siam hi chu ka chak ve ţhin mawle. I pa leh i ute bawk khan an phal lo a, eichawp dawr siam hi chu ka nulat lai aţanga ka tuina a nia" a ti a, a phur hmel khawp mai.

"Tam kan inla thei chuang lo ang. Bakah kuhva leh panhnah tih vel phei chu a ngaihna ka hre lo a nia aw. A chehna te a ngai ang chu..mahse ka chep thiam lo a" tiin ka intlawh khalh nghal zung zung a, dawr siam ka chak a, thiam ka nei tlem bawk si, inchhung chet a ka rintlak viau laiin thil dangah chuan ka rintlak viau lo a ni. 

"Dawr bungrua in lak tumna leh kuhva leh panhnah an zawrhna chu a inhlat ve deuh a, taka, kuhva zawrhna chhak lawkah pawh wholesale dawr chu a awm ve thoin ka hria, a tam mai zawng chawp ve mai rawh u" driver chuan a lo ti a, sawi ber tur a hre lo ni awm tak a ni. 

"Mi zawh chawp dawnin a tlai ruai tawh si a, nangmah hian min hruai vek thei mai lo em ni?" ka nu chuan a ti a, hmalam a thlek deuh ha bawk a, a awmdan chuan nuih a ti za angreng hle.

"Aaa..ka pi te bungrua lakpui an ngai dawn a, mahse vawiin hi chu ngaizel lam a kal an tum a, hruai an ngaih hmel sia, ka dah cheu nga ka let lehnghal ang" a ti a, ka nu'n an bungraw lak tum te a zawh hnuah a pi te chu a zawt leh ta vel a, kan ţhenawm lawk a dawr siam ve tho te makpa a lo ni. 

"Bungraw lakna hmun i hria ka ti reng a ni. Dawr hi chu tupawn kan siam thei a, bazar ah pawh inzawm putin dawr a awm a, kan siam ve chu a pawi lo ang chu tiraw? Kan veng a lun zawk ang a, i pi te pawh an lun zawk daih ang" a ti leh vel a, driver pawh chu a nui ve huk huk a, ţhenawm dawr te kan ti chhe thei reng tih hre ranin a insawi thiam nghal zung zung tih hriat reng reng. 

Bungrua te kan han la khawm ve a, lak ka phal loh pawh ka nu chuan "Tlem te tal" a ti zel a, vai ho lahin min buaipui phurin an che zung zung a, rate an sawi zung zung bawk a, mizo aia dawr an nuam daih zawk chu mak ka ti viau mai. An vai chuan ka ti chuang lo a, mahse tam tak hi chu an dawr a kan lut ve chu an thinrim zawk emaw tih tur hian an lo awm ţhin a, an tum bur a, zawhna kan zawh lahin peih loh hmel deuh a min chhan loh leh vin deuh deuhin min chhang a, dawr chakawm loh deuhin an awm ţhin. Ka awh ngawih ngawih pawh nise dawr nghaktu in a zir loh avanga lei loh phah ţhak ka nei nual tawh a, an pawimawh zia hria se, an hna hi ţha leh tlin takin thawk ţhin se ka ti khawp mai. Nitin a hlim hmel put reng chu a harsa dawn lutuk a, mood fuh loh deuh chang leh taksa a nawm vak loh te hi chuan hlim luih a harsa ve a, chutiang a nih lem loh a englai pawh a tum reng mai chu dawr an phur awm hlawl loh ţhin. 

Vai ho lahin kan duh loh thleng thleng min kawhhmuh a, zawhna kan zawh loh pawhin kan hriat duh tur awm ang an sawi zung zung a, an inhralh thei reng bawk a, anni chuan sumdawng an nihna hriain an hnaah an chiang a, an tlin hle bawk. 

Ka nu nen chuan kan bawr haw kher mai. Kan tual zawl zau vak loah chuan taxi kan tlan luh tir a, a hnung seat an kuai thlu daih sia, kil khatah a te thei ang ber hian ka ţhu a, taxi a din veleh "Lo chhuak vek rawh u, kan thil lei hi min thiar pui rawh u" ka nu chuan a ti lang lang a, Tintin-a leh U Daizaui te an lo tlanchhuak thuai a, ka nu pawh a chhuak ve nghal zat bawk. 

"Khai a...alu bag emaw tih nak laiin Sensiari lek lo niin" tih deuh hlut pahin ka u chuan ka ţhutna lam kawngkhar a hawng a, ka tlak a hlau ve aniang hawng nghal huai lovin tukverhah a kut a lo rawlh lut a, min dawm bet ran chung hian fimkhur deuhin a hawng a, ka chhuah veleh bungrua a lo tlak thlak hlauin a khar leh vat bawk. 

"Alu leh purun tih vel kha chu Daizauin pu lut rawh se. A bialpa pawh a paw nawlh zel a, khatiang mai mai kha chu a pu zo viau ang" a ti lung lung a, driver in motor hnung a hawn veleh amah zawkin alu bag chu a pu lut leh tho sia. 

"Sensiar engatinge alu leh purun te hi in lo lak a? Miin min la hre vak bawk si lo a, a chhe hman ngei ngei ang. Purun phei chu a ţawih duh ropui si" U Daizauin a lo tih chuan "Ka nu hi alawm...a ngai lo ka tih pawn a ti lui tlat a, a thu a duh lutuk a" ka ti nang nang a, "Phun phun lo khan che ta che u" ka nu'n a tih chuan Tintin-a pawh a lo let leh tawh a, a rit zual a thiar a, keinin zang te te kan thiar ve thung a.

Ka pi lah chu engmah ti thei ve tawh mang si lo pawnah a lo chhuak ve a, "In keng tlem thei lutuk a nih kha. Tam deuh deuhin keng ula in zo vat mai dawn alawm. Tlaiah in kal a, chaw ei hun pel duai tawhah in lo haw a" a lo ti ve reng a, "Tintin tlem te te keng mah ta che..mipa te chuan taxi chawp khan chawi nawlh mai tur alawm" a lo ti sek te chu a ning deuh aniang ka u chuan taxi ni lovin ka pi chu a pawm nawlh a, inchhungah an va indah ta aniang amahin a lo chhuak a, thiar tu kan tam a, thil nawi te te tam viau mah se kan thiar zo thuai mai. 

"Purun leh alu khan hmun a awh a ni maw kan thiar zawh meuh chuan a tlem hle sia" U Daizauin a tih chuan "Naktukah Sensiari class kal hlanin nangmah nen kan kal dawn nia. A hmun ka hre tawh a, kuhva te pawh kan la ve ang chu" ka nu'n a lo ti a, a phur viau lehnghal. 

Zanah ka thil ziah lai bawk kha ka chhunzawm leh a, Vanmalsawman min lo biak beiseiin phone ka en zeuh zeuh reng bawk a, ka nghak thlawn leh dawn niin a lang. 

U Daizaui mu tur a lo lut chuan "Eng nge i en reng?" min ti a, lehkhabu kha ka lo la en miau a ni. 

"Lokal teh" ka tih veleh ka bulah a lo ţhu a, ka thil ziah chu ka entir a. 

"Boomer kha naupanlai aţanga hrisel lo, lung natna nei a nia, ka u nen an inkawm ţan tirh khan ka nu sawi hmangah kum7 vel chiah an la ni. Inngaizawng ang maia inzui chawt an nih laiin ka u hian Vanmalsawma a hmuh kha chuan mak a ti ve hle a, a beisei bik hauh lo tihna a ni mai. A awmzia chu kan khuaa Boomer Vanmalsawma khan tun a kan venga Vanmalsawma hi a awm ve tih a hre lo. Hria se chu ka u a hrilh ang a, an pahnihin mi inang chiah chiah an awm theih dan hi an zawng chhuak daih tawh ang" ka tih chuan a lo bu nghat nghat a, lehkhabu pawh en tawh lovin keimah chu min en a, ka thusawi a ngaihthlak ţhat ber ţum a ni hial awm e. 

"Boomer kha a natnain a tibuai nasa ţhin a, phaiah an kalpui fo a, amah enkawl ber tu a nu lah khan a boralsan leh ta daih sia, a pa lah a rintlak hmel vak bik bawk si loh a, tun hnu a ka ngaihtuah chian hian ka khawngaih ţhin. Ni Mamin a awm pui leh ta hlauh zawk a, nupui a neih hma zan khan ngaihdam min dil a, thudik zawng chhuak turin min hrilh bawk a, a chhungte hian thu zep ruk an nei tih a hria a nih ka ring. A ringhlel a, thudik a hre bik lo thung a, a thih thleng khan amah ang chiah a lo awm ve reng tih hi a hre hauh lo ang" ka ti a, ka ngaihdan chiah ka sawi na a "A dik chiah. Chutiang chu a ni ngei ngei ang" a lo ti thei zel a, ka inrintawk phah sawtin ka hria. Mahse, "Ţawng zawi deuh rawh"  ti a khap fo a ngai a, midangin an hriat ve ka duh lo a ni. 

"Kan venga Vanmalsawma pawh hian engmah a hre lo a, phir pui pawh ka nei lo a ti mai zel a, an nausen laiin an la hrang ang a, an inhmuh tir leh ta miah lo tihna a ni mai. Phir an ni tih ka pawm thlap a, an ni lo pawh ti se ka awih tawh kher lo zawk ang. Chuan tuna mi hi chu a hrisel zawk a nih hmel bawk a" ka tih chuan a lo nui hak hak a, "A ruh te a lo sawisel ru ve maithei a sin" a lo ti hram a, lu ka thin san daih thung. 

"Kan khua a Boomer ang kha a ni ve lo tihna a nih chu. Bike a khalh thei a, ţhenawm dawr kawt a ka hmu zawk tih loh chu ka hmu ngai mang si lo a, Tintin-a nen pawh bike in an lo intlansiak vel ni awm tak a ni. Hepa lah hian engmah a sawi si lo a, mahse belhchian a tum ve deuh chuan ka hria. Chuan tun a Vanmalsawma hi bike intlansiakah te a tel thei a nih chuan kan khuaa Boomer ang khan lung ţha lo a nei ve lo tihna a nia, a hrisel ţha tihna a ni mai alawm. A sa pawh a ţha zawk a, an san zawng chu a inang viau thung, ka bula a din khan ka hrethiam vek. Hmanni tlaia an in a kan kal kha i la hria ang tiraw? Khatah khan a pa chuan a ţhianten MBA an zawh tawh thu a sawi a, Vanmalsawma hian zir duh se chu MBA a zo ve tawh dawn tihna a nia, kan khuaa Boomer pawh kha chutiang tho chu a ni. Tintin-a nen an inrual chiah a, a kum min hrilh lo mah se Boomer leh tun a Vanmalsawma hi an inrual ve chiah dawn tih ka hre bawk. Ka sawifiah thiam lutuk lo a, ka rilrua a chian ang hian sawichhuak thei ila ka ti" ka ti halh a, a lo nui var var mai.

"Ka hrethiam alawm..tuna Vanmalsawma leh kan Boomer kha phir an nih i ring a, chu chu i sawi tum a ni lawm ni? Phir, an nausen laia lak hran an nih i ring ber a nih kha" a ti a, ka lo buk nghat nghat lai chuan "Mahse Ni Mamin Vanmalsawma chu a thi tawh a tih ţhin kha eng nge awmzia ni ta ang?" tiin min zawt a. 

"A ti mai mai aniang. Vanmalsawma hi pahnih bak an awm dawn lo hrim hrim a, ni Mamin a sawi kha chu tu emaw zawk zawk hi an ni ang. Tuna kan venga awm hi a thi tawhah an ngai te pawh a ni maithei a" ka ti a, rindan kan neih ve te hian thudik tak hriat min ti chak zual sauh a, engtik niah emaw chuan ka la hre ngei dawn tih chiang takin ka hre bawk. 

Inrinni tukah chuan ka nu nen kan bazar a, sa sat ho ka hmuh te chuan Vanmalsawma ka hrechhuak a, kan indin hnaih viau chang te hian sa rim a nam ang a, a thang huam ang ka ti rilru ţhin a, mahse a fai a, a rimtui thei hle bawk a, mipa in enkawl peih tak chu a ni phawt ang. 

Kan bazar haw chuan kan in bulah ka hmu lehnghal a, ka nu'n min ngaihsak lo hlauh a keimah zawk chuan ka va pan hnai a, tawnzau chiah a ha na a a kutah thisen leh bal engmah a kai lo. 

Min lo en ran a, ka nui a, a nui ve mang bawk si lo a, sawi tur ka hre lo lutuk chuan "Dawr kan kai ve dawn a" ka ti ta ringawt a. 

"Eng nge in zawrh dawn a?" ka awki ang chiah hian a lo ti ve a, a ngeiawm ve thei a nia. 

"Helai dawr a an zawrh ang hi kan zuar ve dawn. Min lo dawr ve ţhin ru aw" ka ti leh tawp a, min lo be lum lam vak ngai si lo a, sawi tur a vang duh phian zel. 

"Dawr ang" tih chiahin min chhang a, "Aw le" ka ti a, "Ka kal tawh mai ang aw" ka tih leh chuan "Chocolate in zuar tel dawn em?" min lo ti a, hrethiam lo zet a ka en lai chuan a kiai suk a, "Zuar tel suh u" a ti leh ringawt a, chocolate kan la tel hauh lo tih ka hriatchhuah phah bawk. 

"Aw..kan la tel lo a, kan zuar tel rih dawn lo aniag. Mahse vawiinah pawh a lak leh theih tho a" nawi nuaih a ka tih chuan "Nangmahni chiah ka dawr che u i duh sia" a lo ti leh a, engmah ka hrethiam tawh lo chuan ka en ha reng ringawt. 

"I chocolate ei tur in dawr a mi ka lei zel a ngai dawn tihna a nia" fan deuh ruih a a tih chuan hrethiam chiahin ka nui chhuak hak a, a ni pawh chuan min lo nuih ve a, "Mawl tirh terh lutuk" a ti hluk a, ka chhip a tuai tho avangin min fiamah ka ngai a, ka nui uar zual sauh a. 

Kan lo inchhaih nuih hak hak lai chuan dawr chhung aţangin hmeichhe pakhat a lo chhuak a, "Heng ho hi ka lei...duh leh kalkawngah kan lei belh mai dawn nia" tih pahin Vanmalsawma hmaah chuan a thil khai lai chu a lek kang zauh a, hman zan a a hmeichhe hruai kha a ni lo va, tu nge a nih ka hriat chian hmain ka thik nghal em em ringawt. 

"Lokal ve ta che?" min ti a, hmeichhia pawh chuan min en vat a, a meng no tehchiam lo kher mai. 

"Khawiah nge in kal dawn a?" ka tih chuan "Kan picnic dawn" tiin hmeichhia zawk chuan a lo chhan khalh a, a dawhtheih loh hmel viau bawk. 

"Aaa..ka nu'n a phal lo ang" ka tih te chuan "I nu chu ka va ngei reuh e. Ka hruai chak viau che a sin" Vanmalsawma zawk chuan a ti a, hmeichhe mitmei veng hauh lo a min han lem vel te chu lawm tur nge pawh ka hre lo, a bialnu a nih ka rin loh phah a, chuvang chuan tlemin ka lawm ve deuh. 

"Nidangah a ni mai" ka ti a, chunu lah chuan a lo tur ve sek a, "Kawr ha rawh...kan tlan thui dawn si i ban a dum vek ang" te a tia, min melh ralh hnuah "In inah kan kal leh dawn tho a, chutah chuan a ni mai. Tikhan tlan thla phawt ang" a ti vel a, a ţhing vel e. Vanmalsawma ngei pawh chu a nuih a zat hmel viau a, a tu zawkin nge a nuih ti za lah ka hre der lo, keimah ka ni lo turah ka ngai ve ringawt. 

"Zanah ka lo dawr ang che u" a tih hnuah min kalsan a, a hmelţha tak kha hmuh reng ka chak ve tho a sin mawle. Picnic te a tum sia, sa a sat dawn lo em maw ni? Vawiin chu buai ni tak a ni awm sia ti rilru nauh nauh chungin inchhungah ka lut a, ka duh aiin kha mihring kha ka ngaihtuah tam leh mah mah tawh. A phir pui pa lah kha vei namen lovin ka vei ţhin a, ka ban phak loha a awm chung pawhin ka bialpa ang riakah ka ngai ţhin tho a nih kha. 

Zan hun ka nghahhlelh dan lah chu pui tak a ni. Ka nu'n ti rawh a tih apiang ka ti zung zung a, ka ţhiante pathum lah chu min hrilh lawk miah lovin an lo lang thut a, "Kan lo riak dawn" an ti lehnghal a, ka nu lah chuan a phal sak ve mai a, ka phur viau rualin Vanmalsawma kha an hmuh ve ka la remti chiah lo, ka thik vang pawh a ni chuang lo, ka ţhianţha te an nia, ka duh ngawih ngawih pawh min dil se ka pe phal ang mahse ka la inpeih lo aniang ka hre bik lo, Vanmalsawma mitmei ka veng thar riau te hi ka mak ve thlawt a ni. 

"Heti lo deuh hian ti rawh u" an ti a, dawr bungrua te chu min han remţhat sak leh vel a, Vani leh Zuali ten nuam an ti fal a, ka nu hriat lohin sweet an ei ru zeuh zeuh a, an duh chi kan zuar tel kher kher a, hlep tur chu an hmawm zo vek tawh ang. 

Tintin-a lo haw chu hmu ngai lo ang maiin an lo kuah chung chung a, ka ţhiante pawh hi an che uchuak ve ţhin hrim hrim alawm. Ka u chuan ning tih hriat zet hian a nam sawn hlawm a, "Nu" a ti lauh a, ka nu chuan "Eng nge ni?" a ti ţha ve mai bawk a. 

"Ka ban a mi?" a ti leh a, thutak deuh a "Ka hre nang" ka nu'n a tih chuan "Engati nge hmeichhia hi ka taksa a an beh chawt zel a?" a ti vel a, ka lo nuih hak hak laiin ka nu bawk chuan "Va inbual mai rawh" a ti a, a hrethiam lo nge a hrethiam lo der pawh ka hre lo. 

Zanah Vanmalsawma te ţhianho chu an lokal ngei a, Tintin-a nen an in nang lo leh tawh. In ngaihven lo deuh angin an awm a, a rukin an lo intlansiak leh vel tho sia. 

Ka ţhiante chuan hmuhnawm an ti ngei mai, che chang lo hian an en reng a, an thlir dauh dauh ti ila a dik ber ang. Vanmalsawma lah chuan a beisei sa tawh ni hmiang ka ti mai a awmdan a thlak danglam duh ţhak lo a, ka ţhiante en dan chu hre lo ang hmakin a awm a, a ţhiante ho nen chuan eng eng emaw sawiin an nui leh huk huk ţhin a. 

"In picnic chu a nuam em?" ka tih chuan tlemin min rawn hnaih deuh a, ka nu hriat hlau tak hian "Lokal ve la chu a nuam ang" a ti zawi sup a, ka nui a, chhan dan tur pawh ka hre lo, lum te ka ti thar ta vel a, sa sah chauh lo pawh hnathawh a lo ngah khawp mai, hei tunah pawh min thunun hna a thawk a ni ringawt tawh alawm. 

"Duh aiin kan haw hma a, lehpekah chuan lokal ve tawh rawh aw..kan nula ho pawh hi lokal ve sela, anu Daizaui pawh kal ve kan phal" Pektea chuan a ti zung zung a, kan ţhiante an nuih tet tet laiin U Daizaui chu a meng ling hlar mai. 

"Chhungte thawhchhuah a nung ve satliah, bike neih ţhat avang maia kei ber emaw inti tlat hi an awm ve a. Mi hausa fapa chuangtlai, awm ţha duh lo leh kawhmawh bawl hrat satliah hian min nu reng reng suh u" a ti hlaih hlaih a, kan inleng te nuih a za khawp mai. 

"Chutiang mi chu an va sual ve..anu Daizau kan hau dawn nia aw" Peka chuan a ti ve thung a, kan cigarette zawrh lai la tur a a thawh hnuah Vanmalsawma chu ka bulah a lo ţhu a, kan han insik vel te chuan ka hik mem memin ka hria. 

Ţum dang ang lo takin zu rim a nam a, a ţhiante ang em chuan a awmdan a danglam ve lo thung. A kawr ipte aţangin 200 a phawrh a, "Ka haw dawnah chiah min kir rawh" a ti a, pawisa dah tur a ka thawh pawh a phal lo a, tam tak tan chuan a ho viau ang a, mahse kei chuan nuam ka ti lutuk ringawt. 

Ka ţhiante chuan an be deuh reng a, ţha deuhin a lo chhang zel a, a chanchin ka hrilh thawi tawh avang chuan "Shillong ah chuan i pian hlim aţangin i awm char char a mi?" an ti a, "Ni ber ang chu" tih chauhin a chhang a. 

"I lo zin ngai em?" an ti lehzel a, hriatchian chakna in kan khat hlawm miau a ni. 

"Zin ve zeuh zeuh" a ti a, zawhna an zawt hnem tawh lutuk chu amah zawk chuan nuam lo a tih hmelin a ning tawh tih a lang reng mai. Mitmeiin ka ţhiante chu khap mah ila awmzia a awm der lo. 

"Khawiah nge i thlen ţhin?" an tih leh pawhin "Ka pi te inah" bul zet hian a ti a, ka nu pawn a la en duh a, ka pi pawn a melh ve vang vang mai. 

"Nangmah ang deuh hmelhriat kan nei a?" Vanin a tih chuan awlsam zet hian "Ka nau a nih kha" a ti a, rinhlelh na a khat ho chu awmze nei deuh hian kan inmelh ralh ralh hlawm a, an ni ţhian ho chuan an ngaihven zui lo thung. Thudik a sawi leh sawi loh hre lo mah ila hepa hian min hnaih poh leh thudikin min hnaih ve zel a ni.

CONT..