VANMALSAWMA-8

VANMALSAWMA-8

Kan inleng te haw tur chu ka nu phalna thlapin ka zui chhuak a, amak lutuk, ka nu hian kan khuaa kan awm lai kha chuan min khuahkhirh ve viau zel a, ka uten len tir suh an tih chuan dil ngang ngang mah ila chhuah a phal ngai lo. Class ban a in ka thlen tlai te hian min hau hrep a, hrem nan ti ni awm hrimin tih tur min pe hnuk zel bawk a, inah a awm reng ţhin bawk nen, ka tan chuan len khawthawn mai mai chu thil tihtheih loh ang tluk a ni. 

Aizawlah kan han awm a, ka ute chuan ral aţangin min khuahkhirh turin an hrilh ţhin dawn tih pawh ka hria, Tintin-a nen a kan chanchin an zawt awl lo bawk ang a, ka ban hun te, ka len leh len loh thlengin an zawt vek ang a, zep thu cheng lo, ka ute chuan U Daizaui pawh hi kan hnena chen ve an phal chiah lova, a nundan an hrechiang a, min hruai sual an hlau a ni. Ka ţha famkim bik lo a, chu chu hrereng chungin min hmangaih em avangin min hmu famkim thung a ni. 

Chhungkaw inhmangaihna hi chu a lo thuk bik khawp mai, kan bialnu/bialpa te hian kan tlin lohnaah hian min hmu tling lui thei kher lo maithei a, kan tih sualah vawi tam min ngaidam thei kher lo ang. Chhungte hian min lo hmangaih bik khawp a, hei vang tak hian ka dah pawimawh ţhin. Tintin-a ngei pawh a fello viau chung hian a fel na lai kan hmuh sak thei a, min hmangaih tak tak tute chuan kan sualna aiin kan felna a tlem a nih pawhin kan felna lai an hmu lian tho a, hmangaih tu ber chuan kan ţhat lohna aia ţhatna a tam zawk a nih pawhin kan ţhat lohna tereuhte kha lian puiin an hmu a, an kher nget nget peih ţhin. 

Ka chhungte, ka ute ngei pawhin min hmangaih a, tawp chin awm lovin min hmangaih a, ka ţhat lohna an hmu duh lova, thil ţha lo ka tih ve theih an ring lova, an hmangaih loh leh an tana pawimawh ve lo U Daizaui erawh an hmu sual viau thung. Puitling an nih avang hian an dik reng thei bik lova, a fate a ţan lutuk kan tih ţhin te pawh hi an mahnia inchanin a awm lutuk tlat a ni. 

An fate sualna an thup a, midang an mawhpuh a, chu chuan a hruai sual a, a tih tir a, an han ti a, hemi kawngah hian nu leh pate hi an dik ka ti lo a, a ţha hauh lo bawk a, mahse ka hrethiam thung. Thil dang zawng zawng aia an hmangaih an fate sualna hi hmuh chat a har dawn lutuk tlat a ni. An han en ţhin ang a, rinchhiat harsa an ti dawn bawk si, fate sualna hmu duh lo ho pawh hian a ruk chuan an hre ran awm tho si a, an khawngaihthlak zawk ka ti. 

Ka nu pawh hian university lai a kal ve tawh a min ti deuh aniang min thlah zalen lui ve niin ka hria a, mi bula an sawi chuan kan naute min la ti ţhin, nu leh pate hian fate hi an ngai naupang rei a, mihring chu kan ţhang lian ve zel bawk si, hmeichhe fa ngat phei hi chu ngaihtuah kan na a, chhungte rilru kan ti hah lehzual ţhin viau ang. 

Ka uten min khuahkhirh tura an tih pawhin ka nu hi tunah chuan a danglam ve deuh tawh a, fate khuahkhirh leh lutuk pawh hi a ţha chuang lo tih a hria a ni mahna le. Ka dawr kal ka reiin min hau ngai lo a, tlaia ka haw har pawhin khaw thim hnua ka haw te a nih loh chuan min hau ngai chuang lo, hetiang a nih avang hian min thlah zalen lutuk e ka tihna a ni chuang hauh lo a nia, ţullo a chhuah a phal lova, awmdan phung min hrilh awl lo bawk. Ka nu hi nu hi lehkhathiam lo leh nu mawl mang ve tak mah nise ka ute ho hna ţha tak tak nei thei turin a chher chhuak a, fa enkawl hi a lo har aniang, mark pe ţhin ta se full mark pawp hmu chu an vang viau ang. Enkawl inang dawn reng siin mihring rilru a inang lova, ka nu pawh a hlawhtling vek bik lo, Tintin-a a buaithlak a, mahse unau zinga pakhat sualna avangin nu laktlak loh a nih phah chuang lo. 

Nu te hi lehkha an thiam emaw, thiam lo emaw, hnathawh a zir zel a hlawh neih tawp theih chu nise hlawh an hmu sang viau ang. An hnathawh hi a ropui a, engkim phenah an awm ka ti mai. Lehkhathiam tak phenah a nu a awm a, mi hlawhtling tak phenah a nu a awm a, mi fel leh ngaihsanawm phenah a nu a awm bawk a, khatiang kha a ni mai. 

Vanmalsawma te ţhianho chuan min en ţhap a, min ngaichang ni awm tak a ni. Kei hi ka ngaihtuahna ka kawm nasa thei lutuk a, hetiang chuan mi â nih ka la hlawh mai ang. 

"Min en ţhup mai" ka ti chhuak hlawl a, an lo nui hawk a, "Kan bia che" Vanmalsawman a lo tih chuan "Eng nge in sawi?" ka ti he haw a, a va zahthlak ţhin tak. 

"Naktuk zanah lokal ve la" Peka chuan a lo ti a, Vanmalsawma bike nghengin a ding a, thla eng chuan a hmel a chhun chiangin kan in a an awm lai ang em kha chuan a mitmeng pawh a buai tawh lo. Zu rui satliah ringawt a ang lo ka ti deuh a, mahse ka hre chuang lo le.

"Pathianni zanah te chuan ka inkhawm daih ang chu" ka tih chuan Vanmalsawma chuan a hmui a lo ti sawi zauh a, an awmdan leh inchei duh dan te en hian biakin an ngaina dawn lo tih chu hriat sa a nia, kan khuaa Boomer zawk kha chu a inkhawm hram hram zel a sin mawle. 

"Sawmtea te inchungah hian ka piancham kan lawm dawn. Lokal ve zawk rawh" Peka chuan a ti leh puat a, Sawmtea an tih chu ngaithei lovin "Boomer alawm" ka lo ti vat a, an nuih a za viau mai. 

"Boomer ti tawh rawh u aw...Boomer a nih hi" ka ti a, ka nui var var a, a engkim hian ka ţhamama kha min hriatchhuahtir a, a hminga ka koh leh ngat phei chuan ka awm a nuam veng veng thei ţhin. 

"Ka ţhial nghe nghe dawn mi?" Pektea chuan a ti a, Peka thung chuan an hnena kal ve turin min la sawm ngat ngat a.

"Lo inkhawm ve zawk rawh u..inkhawm zawk ang u" ka ti a, tuman min chhang lo.

"Kan lo va kal ang..ţhenawmah hian len leh kan ngai a" an ti a, min kalsan nghal daih a, ţhenawmah hian an kal ziah a, thil lei tur pawhin ţhenawmte hi an rawn pan kher zel bawk a, kei mi dil chhut ve tak chuan "Ţhenawmte nen hian in inchhung em ni?" tiin ka piah a ding pa chu ka zawt ta tawp a. 

"Hruaipuii te" a tih chuan mithmul ka lo kan ak a, "Tu nge Hruaipuii" ka ti ha bawk.

"Kan ina i lokal ţum a nula awm ve kha" a ti a, an nula kha a ni tih ka hrethiam mai a, chuvang chu a ni maw an lo dawr bik ţhin ni? Kei lahin min dawr turin ka lo nawr ve sek bawk a.

Kan ngawih dun vang vang hnuah "I hre lo der thei angem?" min ti a, hrethiam lo deuhin amah chu ka en a, hmun hla tak thlir ni awm tak hian hma lam a en ngur thung a. 

"Eng maw?" ka ti a, eng ber nge sawi a tum ka hre tlat lo a ni. 

"In khuaa mi kha..kan inang a ni ve mai a, sawi reng suh. Min hmuh pawhin min endan danglam tawh suh se" a ti nghut nghut a, ka ţhiante vang kha a ni chiang mai. 

"In inang em alawm..nangpawn ka nau i tih kha" ka tih chuan "Tu nge a nih ka hre lo. Hriat ka tum lo bawk. Nu leh pa ka nei a, midang fa ka ni lo" a ti khur khur tawh a, a thinrim lutuk te chu ka khawngaih zawk. Keichuan nu leh pa anga a lo ngaih ve char char te fa a ni lo tih a hriatchhuah vangah ka ngaihsak daih.

"Chulam chu sawi lo teh ang" ka tih laia a nui suk ri chu a ngeiawm lek lek a ni, min deusawh ni tlat te hian ka hria a, chuti chung chuan "Tunah chuan ka tihna a nia, sawi lang rih lo teh ang" ka tih chuan "Nangmahah danglam awm tawh lo se a tawp a ni mai" a ti bul hmuk a.

Bike a a lawn te chu a hnehsawh khawp mai, a palen chu thuhran, a chuang ţhang tih a hriat lutuk a a(h). 

"Naktuk zanah chuan i lokal dawn em?" helmet khum pah hian a ti a, a aw pawh tlem chuan a dam ta deuh. 

"Kal lo mai ang..inkhawm ve zawk la" ka lo ti leh a, a ner sawk mai. 

Bike headlight in min rawn chhun chuan ka mit hliah turin ka mut pahnih ka phar chhuak a, ka dah kawkalh ţât bawk a, "Nunhlui intih buai tir suh..mi hnungah hlir i kal bik mai ang" ring leng lawngin a han ti a, "Sensiar" a tih zawm zat a. 

A kal liam hnu chuan a thim deuh ruih a, thawm a reh diak bawk a, ngei tur tawka a awm thiam viau chung hian a ngeiawm pha chiah ţhin bawk si lo a, tuna a awmdan avang khan ngei ngawt ila rilru te chan ka chang daih tawh a, ka hmuh theih a awm Vanmalsawma hi hriatthiam a har khawp mai. Ka hriatchian leh ka fiam bawrh bawrh ngam, ka u ang maia ka ngam tlak kha chu vanah a awm ta daih si a. 

"I va rei ve..thlah mahla khawlaiah awm rei kher loh tur a sin, zan a ni lehnghal" ka nu'n a lo ti a, a uchuak chu a phal chuang lo ka tih reng kha. 

"He tlangval hi a mikhual loh viau rualin a hla tlat a ka hriat chu. Hmuh phaka awm reng, khawih ngam miah loh ang vel a ni" U Daizauin a lo ti ve ngei a, a thutak ve reuh em em mai lehnghal. 

"Ka la hrechhuak dawn khawp alawm. Naktuk inkhawm banah biakin bul lawk a awm, Mathani te inah khan chawl kawi ang u kan tia, chipchiar deuhin kan zawt ange" ka nu in a lo ti a, amah ang chiah an nih phei chuan engkim an sawi uar vek dawn a, a ţhiante sawi, ka nu'n a sawichhawn leh phei chu a rintlak loh viau ang. 

Pathianni tuk a ni a, tukdang aiin kan inpeih hma a, inkhawm ţan hun a hma deuh avangin U Daizaui nen pawh kan tho tlai ngai lo. 

"Tintin chaw ei ka peih tawh a nia" ka nu'n a ti lang lang a, an tuktin danin an inkaitho leh ţan dawn a nih hmel. Ţhenawmpain a lo ngaithla uluk leh viau ang. 

"Tintin chaw ei ka peih tawh ka tih chu" a hma ang chiah a ring hian ka nu chuan a ti leh a, "I peih chuan ei mai ta che..ka la peih ve lo" pindan chhung aţang chuan a lo ti a, inchhang tawk thei sia. 

Nui tet tet chungin hmarcha ka rawt a, thak kan ngam loh avangin hmarcha tak hi chu kan ei tlo ţhin khawp mai. 

"Inkhawm i tum lo em ni? I ute hoin an rawn hau ang che ange aw" ka nu'n a tih chuan "Ka block vek..min hau tura rawn kal vang vang peih an awm lo ang" ngaihsam zet hian a lo ti leh a, ka nu'n bang a beng ri bur a, chhunglam aţangin pakhatin a rawn beng ve bur bawk a. 

"Intichhia anga sin mawle...in inkaihthawh pawn bang tal hi chu zuah rawh u, in in vin pawh tih tawh mah nak laiin" ka lo tih chuan "Lo inrawlh suh mawngtam hriam nu" min ti a nih chu mawle. Ka chip hmak a, hmanni deuha ka kekawr mawng ţet kha a la hrereng aniang chu, a duh naah chuan thil a hre rei thei a nia. 

"Umm...eisan ang...chawhmeh ţha zawng zawng kan ei zo vek anga a ni mai alawm. Pakhatmah dah ve reng reng suh u, a enchimlohi nen sawn rilţamin mu nileng rawh se" ka nu'n a ti ta hlak hlak a.

Chaw ei kan siam zui a, chaw kan ei lai te chuan "Kan burma vawk vulh lai chuan chaw a ei ţha em?" ka u chuan a lo ti leh ţhin a, pindan chhungah a tawm tlat bawk nen, ka nu tan chuan tihngaihna a vang ve khawp ang. 

"Ehe..Sensiar, tui ka herh haw thei lo reng reng. Pipe ah hian hnawh tu a awm nge eng nge a chhan ni ang le?" ka nu chuan a ti a, a mangang nghal der ni maiin a lang. 

"Enfiah a ngai a nih chu...inkhawm a ngai bawk sia, ban hunah U Valtea kan hrilh dawn a nia" ka lo ti a, ţhenawm tlangval hi kan tan chuan a ţangkai khawp mai. 

"Thleng sil te a ngai dawn sia, bualin a mi in hmang tim leh deuh awm sia, pawn a tuizem ah sawn tlem chu a awmin ka hria, sawta mi saw kan khailut mai dawn a nia, lo ti fel ula ka va khai lawk ang" a ti nghal zung zung a, pawnah hian tuizem lian vak lo a awm a, a hlui deuh tawh na a a la pawp em lova, tui a haw changin ka nu'n a dah khat kher zel a, ţangkai hun a awm ve mai alawm. 

Bucket khaia bualin aţanga ka nu a lo chhuah chuan Tintin-a pawh a tho ve chiah a, ka nu bucket kenlai chu chhuhsakin thophang deuh hian pawnah a chhuak a, "Bucket tê khan thal chhuak la a lianah khan chhung zel rawh aw" ti a ka nu'n a auh zui te chuan "A khai tur ka nia ka thu thu" a ti a, ka enzui a, ka nu sawi ang chuan a ti ve thlap a, nu te em tui han khai tir chu a ngaingam lo a ni ngei ang. 

Inkhawm banah Vanmalsawma te in lamah kan haw kual a, pathianni a nih vang nge mawni a lo reh diak a, "Amah hmuh tur awm mang si lo hian an in chauh hi kan en reng mai a" U Daizaui chuan a ti niah niah a, a la mu hnur aniang chu. 

An uite min bauh vak vak ţhin khan min bauh leh tawh a, an thlung tho bawk a tiin ka pan hnai lui a, "A seh ang che aw...i â daih mai tur a nia, chhuichhuah ngai kan la ngah a, â phan pawh i la ni lo" U Daizauin a tih takah chuan ka tawlh hnung leh a, a kawlh ve ngawt mai. Min hmuh ngun tawh tehreng nen tun thlengin min la bauh chu a nia. 

Ka chhip huh dap chu ka khawih vat a, ka kut ka en leh vat a, eng rawng mah a kai lo. A huh tam lo viau na a ka chunglam en tumin ka hawi chho vat a, water pistol kengin Vanmalsawma a lo ding reng mai. A la nui zui a, min fiam kual vel hi nuam a ti viau aniang chu ka ti mai. 

"Sava in min ek khum amaw ka ti alawm" ka tih chuan "Sava ek a vawt ngai a mi?" a ti a, a nui hmel a la paih bo duh hauh lo. Balcony ah a awm a, water pistol a min lo kap vel te chu huat vak chi loh, ngeiawm tak tho si a ni. 

"I uite hi engati nge a bauh reng a? Hrisel lohna a nei a ni lo maw?" thutak deuha ka tih chuan "In rilru a chhia aniang" min ti a, tlak dal chu bawhin a la nui sawng a, a tho hlim sam phei chu a kir ţha khawp mai. 

In chung lama ka hawi chhoh reng lai chuan tu emaw hian ka khup tawn tawn hi na deuhin a rawn nam a, ka tlu ţhelh nghe nghe a ni. Pektea nui hawk hawk ri ka hre zui zat a, "I va mawl ve..ka tluk ţep kha" ka ti deuh chiam a, thawm a siam bawk si lo, U Daizaui lah a ding ngawi reng ringawt a, tlem a tlemah ka ţhingţhi rawp lo chauh a nih kha. 

Ka hawi chhoh leh chuan Vanmalsawma a lo awm tawh lova, kawngkapui aţangin pawnah a lo chhuak ve thung a, a lo nui chhuak vur vur lehnghal. 

"I hlau hmel i pe chhe ve hle mai a" nuihza aw zet a tih pah a ka hmaa a lo din chuan ka bag khai laiin a darah ka vaw pawp a, ka banrekah a lo man a, na ti ang pawhin a awm lo. 

"Nula inkhawm bang i tih duh dan mai mai chu a" a ti a, nui hawk hawk paha a ţhianpa en chung hian ka kut chu min dahthlaksak a, weed rim a nam a, college kan kal lai khan mipa hoin an zu ru ţhin a, weed rim hi chu min kalpel fua mah se ka hre tho ang. Zing aţanga han zuk mai chu a ţha lo viau ang le. 

"I rui a ni maw?" ka tih chuan "Aniang a ka hmuh dan che a dik lo. I phir a nia kha i chalah i hnar a bet" a ti vel a, kei chuan ka nel nghal mai hi ka indem hran lo a, anpui a nei a, ka lo nel deuh tawh a ni bawk a, U Daizaui sawi kha a dik chiah; keimahniah hian a mikhual lo riau a ni. Amah lah hian min ngaithei lo viau dawn emaw ka tih laiin min nel ve nghal mai a, vengchhunga kum2 kum3 vel chauh a la awm laiin hmelhriat a ngah hmel viau tawh a, inhmuam up leh kawm nel har tak a ni hran lo a nih ka ring. Mahse hriatthiam har ka la ti reng tho mai. 

"Pekte khawilai aţangin nge i lokal a?" ka ti ta daih a, a hminga ka koh vawikhatna a ni hial ang chu. 

"Inhnuai aţangin" a ti mai a, leng lut turin min sawm na a kan hawsan ta tho a. 

Zana Tintin-a chhuak tur chu ka pindanah a lo lut a, kan khuma Ka enchimlohi dah pah hian "Lo awmpui rih rawh" a ti a, ţha deuhin ka lo pawm ve mai a. 

"Vanmalsawma a lo leng ţhin a mi?" a ti a, a thutak phian lehnghal. Ka hmaah a ding run a, chhan loh ngam chi pawh a ni lo. Ka piin a lo hrilh leh vek tawh aniang. 

"Zan hnih bak a lo la leng lo" ka tih chuan "Ngaizawng suh ang che" min ti a, a ţhianpa ka ngaihzawn nasat ţhin zia a hre miau a ni. 

"Engvang ngawtin maw?" ka ti a, a hmel kha ka mitthlaah a awm reng lehnghal. 

"I ngaihzawn chi a ni lo. Boomer a ni lo a, an mizia pawh a inang lo. Chu chu hrereng la a ni mai" a ti a, a aw pawh a nem hran lo. 

"A ni lo tih te chu ka hre ve tho alawm. Engati nge ngaihzawn i phalloh? a fel em kha" ka ti a, a rilru hriatchian tuma zawt ka ni pakhat. 

"A lerh..ngaihzawn a ngai lo. I ţap leh bui bui ang a, ka bulah i ţap kher zel lehnghal" uar zet hian a ti a, ka piin tv en ring hlauh lo sela chu ka nute pawn an hrevek hial ang chu. 

"A lerh leh lerh loh i hre lo ang" ka ti leh vel a, a run khawp mai. Tur khaiin min melh a, min chhuih awk duh hmel te pawh a pu alawm le. 

"Ka hria a ka sawi chu a nih hi. Ngaihzawn a ngai lo a ni tawp mai. I ngaihzawn luih chuan ţap mah la" a ti a, a ngawi daih a, "Eng nge?" ka lo tih chuan "Ka velh ţah belh ang che" a ti bul hmuk a, a thutak vei reuh phian mai. 

"I hrechiang viau tawh em ni a?" ka ti a, beisei nei deuh a ka en laiin ani chuan "I hriat duh zawng ang zawng kha chuan a ni lo. A chhungkua hre lovin amah ka hria. Ngaihven lo la a ni mai, Boomer chu a thi tawh. Hepa hi midang a nih hi, a lerh a, ngaihzawng a la thutak lo bawk. Thu i awih loh chuan i mawl hle tihna a ni mai. A bum a bum mai ang che" a ti hluk hluk a, a duhthaw khawp mai. 

"Thu awih la kumtluanin i muttui a ni mai" min tih pahin ka ke a chhir zauh a, mut hi a thupui a nia, muttui loh a hlau ber. 

"Fel deuhin lo awm rawh aw ka enchimloh, nangpawh Sensiar, Vanmalsawma a lo len chuan tarmit dum lo vuah tawh ang che" a ti a, engthawl hmel zet a a chhuak chu ka thlir zui vang vang a, a lerh viau tak tak em maw ni le? Ţhian chu a ngah ka ring a, a lerh hmel chu ka ti chiah lo. 

Ramfangzaua hnen aţangin message ka dawng a, hmuihmul lem a vuah ni a min kaih sual aţang khan kan inkawmngeih zui ta phian a, min lo be ve zuk zuk reng mai. 

{In vengah kan lokal a, khawi lai tak nge in in?} a ti a, hetiang te chu min lo call mai awm ka tih lai mekin min lo call chiah reng bawk a. 

A awmna hmun a sawi chuan "Lo chhuk zel rawh..turning point a lo awm anga, tah chuan ka lo ding ang" ka ti a, ka tho nghal uaih bawk a. 

Ka nu hnenah "Kan ţhianpa a lokal a, university a mi a nia, a lo leng dawn niang kan in a hrechiang si lo a kan hmuak lawk ange aw" ka ti a, a lo phal ve mai bawk a. 

Turning point lamah ka phei a, ka thlen hnu lawkah ka hmaah bike a lo ding dat a, "In veng a va mawng ve..hmelţha deuh tan chuan rawn len vak chi a ni dawn lo a nih hi" helmet phelh pah hian a han ti vel a, a sam a tuai zui vak a, a lu te a thing a, ruah do hrep ang mai alawm a nih le. 

"Chuan khawiah maw in awm a? Insawn rawh u..hmelţha leh veng mawng a inrem lo" a ti zuah zuah a, street light hnuaiah kan awm a, bike a a ţhut laiin keichu amah hnaih deuhah ka ding a, a helmet lah chu a lawk rapthlak lehnghal a, khum chiah ila chu ka lu a na bur thei ang. 

"Sawlamah sawn phei a la ngai a, i hmaah ka kal ang a ka hnungah min zui mai la" ka tih chuan "Chutiang te chuan miin ka hau che amaw an ti mai dawn a sin. Lo chuang rawh" a ti a, ka va han hreh ngang ngang tak. Ka u bakin min la phur ngai lova, mipa dang bike a chuan chu ka tim tlat. 

"Aa...i hmaah kein ka kal zawk mai ang" ka ti ta tlat a, bike ri kan hriat hnu deuh lawk a chak zet a min tlanpel tu helmet khum chu ka tan a mikhual lo nasa mai. Rawng chi li velin a ţial ka ti mai a, a mawi zek lehnghal a, a neitupa pawn a duh viauin ka hria. A hnungah bike pahnihin an zui a, rawng dum hian sual rawng a kai ber aniang chu thawmhnaw dum vek an ha a, a hmasa ber a tlan erawh kha chu a helmet tih loh chu ka hmuchiang hman meuh lo. 

"Diaper trio an ni maw?" Ramfangzau-an a tih chuan ka lo melh ha a, ka hrethiam lo tih a hria aniang chu "Super trio chu an zaithiam a,tlem a an upat deuh tawh bakah mi piangthar vek an nih hmel a, khang ho kha chu piangthar lo chiang kuang tur an nia, tlemin an la nau deuh bawk a, diaper trio an ni mai" a ti a, ka hrethiam chuang hauh lo. 

"I hriat ngai pawh an ni lo" ka tih lai mekin bike pakhat a lo tlan chhuk a, helmet ka hmuh chuan engati nge a lo let leh niang le tiin ka lo ngaihtuah leh hman a, kan piah deuha zawlah a ding dat a, bike ri pawh chu a ti tawp chuang lem hlei lo a, ka ring dik chiah; Vanmalsawma ngei a ni.

"Khaw nge in kal a?" ka lo tih chuan min chhang lem lo hian bike accelerator chu a pump ri ta vak a, a ring duh ngei mai. 

"I mawl a mi?" tih vak pah hian a taksa chu ka emergency light ken ngei mai chuan ka chhun a, street light mai mai ka ring zo tawh lo. Ka nu lei thar hlim a nia, a la eng ţhain a hmaiah tak chhun lo mah ila a hmel chu chiang deuhin ka hmu thei tho a, a nui tih hriat zet hian a mit bul vun chu a chuar phei raih a, an rawn tlan tawhna lamah khan a tlan phei a, a ţhiante nen an awm khawm dawn lo em maw ni? Zanin phei chu Peka piancham an lawm dawnin ka hre sia. 

"Diaper trio leader ve deuh a ni maw?" Ramfangzaua chuan a lo ti leh pek a, "Nang pawh chu i mit a la ţhat awm tehreng nen emergency light nen meuh a min lo hmuah a ngai hleinem" a tih zawm zat a, a va han ţawng hnem tawh tak. 

"I lo len dawn chuan lokal mai mai rawh" ka ti vin deuh hrak a, "Chuang rawh" min ti leh tawh a, tunlai bike hnung an ti sang deuh zel mai hi chu a zia lo tak tak a ni, kan ţhu ar zel a, bihruhsak duh kan neih ngat phei chuan a buaithlak bik. 

"Bullet te rawn khalh tur che alawm...i bike hi a sang si" lawn pahin ka ti a, a kawrah ka pawt pah ţang bawk a, bike lawn ka hnehsawh lo lutuk zahzel a ni reng sia. 

"Bullet te chu patlingin an inhmeh ber. I ţhu fel tawh em? Bike chuan lamah chuan pitar ang vel i lo ni reng a nih kha" min ti a, Tintin-a ang mai, ka ţhatna lai sawi tur a hre hlawl lo. 

Kan in ka hrilh hnuah gate pawn lama bike dah turin ka hrilh tel a, Vanmalsawma te pawn an dah mai zel a, tuman an khawih chhe ngai lo. 

Ka inleng pa chu ka nu pawn a lo be ve luam a, a la tlangnel hma em em zui a, zawh hmasak ngai hauh lovin thingpui min lum tir a, "Thlum lo, hang loin aw" a ti a, chini pawlh dan thiam a har khawp mai. 

A haw dawn pawhin ka thlah leh thlap a, "Naktukah class kal ngei ngei rawh aw. Inchei vak pawh i ngai lo, i hmelţha kha a tawk mai" tih mawlh mawlh paha bike seat a chul vel chu a che tawp deuh thut a, ipte zen deuh chawt chawtin phone a phawrh chhuak a, bike seat chu a ên kual a. 

"Helai chu tlem a khem a nih hi. Ka kal dawn kha chuan a him pial sia, i ţhut khem ti dawn ila a ni thei mang si lova" a ti nuah nuah a, a tet tehreng nen engtin nge maw a dap fuh zawk ni?

A thlek kual vut vut hnuah bike seat ben thlawp pahin a rawn hawi chhuak a, "Sensiar, in veng ho hi an va vir ve" a ti hluai a, a ţawng ring khawp mai. 

"Eng nge an vir na? Kan veng mite tihchhiat a ni kher nang..a khemna a rei tawh te pawh a ni thei a" ka tih te chuan "Hei en rawh in veng mite ei khem a nih hi" a ti a, ei a har duh viau ang le. 

"Tak taka ka uang a nih kha. Naktuk chu aw" a ti a, a kut chuan ka ban a rawn tawk zauh a, bike ah a lawn zui nghal zat a.

Inchhung ka luh veleh ka nu in "I inlengpa ţawng duh em em zia kha, a ţawng ring bawk si, ka lu a hai vek alawm. A lo len leh dawn hunah chuan min hrilh lawk tawh ang che. A rukin beng ka hnawh tawh dawn" a lo ti lang lang a, ka nuih a za ngei mai. 

"Kan vengah a lokal remchang a min lo tlawh ve mai mai a nih kha...a lo leng tawh kher lo ang. Bike seat lah chu an lo khawih chhiat sak hman em maw ni kha a lungawi lo khawp mai" ka ti a, vengchhung tlangval ho sual zia ka nu'n a sawi zui hrep a, ka rin aiin hriat a lo ngah tawh lehnghal. 

Ka class bang chu bus in a thlen theih chin thleng busah ka chuang a, bus aţanga ka chhuk hnu chuan taxi la buai lovin kein ka haw a. Vengchhung ka lut tawh tihah "Dawheh nu" tiin Vanmalsawma chuan min lo au lauh a, a aw ringawt pawh ka hre leh vek tawh mawle. Ti danglam mah se ka hriat theih tho ka ring. 

Thu pawimawh a sawipui theih tak tak ngai chuang loh ti rilruin ka ding duh lo a, ka u thusawi kha ka vawng ve kiau bawk a, chak deuh a ka pen hmawk hmawk hnua ka hawi let leh chuan bike ah a lo ţhu tawh a, min umzui dawn tih chu chiang sa a ni. A thu anga kan awm loh te, a duh anga thil a awm loh te hian a lung a awi lo ţhinin ka hria. 

Rin ang ngeiin min umpha hma khawp mai, motor tam lohna chin ka thleng tawh a, ka zawnah zawi muangin a tlan ve zel a, "Min zui reng suh" ka ti a, ka din rual chuan bike a lo ti ding ve nghal bawk a. 

"Kan sawmna hnawlin Fizz-a bulah khan i awm a" muang ban charh hian a ti a, a nui deuh nain a thutak hmel viau a, eng nge maw a lo ngaihtuah leh tawh ni?

"Ramfangzaua nen khan in inhria maw?" ka tih chuan "Tu nge Ramfangzaua?" a ti leh ang lawi a. 

Motor a lokal takah chuan "Kalsawn suh ang che ka um zel tho dawn che a nia" a ti a, kawngpuia ding tawp lovin kawngsirah a bike chu a ding a, amah ka en rualin a kutin min lo hui zauh a, keipawh chu ka kal veleh mai a. 

Bike ah chuan hahdam hmel deuhin a ţhu a, min en danah chuan pawi nasa deuh khawih te pawh ka ang alawm. Ka bialpa a ni lova, tupawh awm ila a haw ve ngawt thei lo hrim hrim. 

"Nizana ka lo dinpui kha a nih kha Ramfangzaua chu? Fizz-a i tih kha" ka tih chuan "Fizz-a alawm a nih" a ti leh a, ka chau ve deuh bawk nen, ka ning angreng hle. 

"Ka hre lo i tih si" chhuahchhal awka zet a ka tih leh chuan "Ka phuahchawp a nih kha. Fizz cheng-10 man chi hi i in tawh em?" a ti leh daih a, nuihza hmel a pu bawk a, hepa hian min fiam kual leh mai mai tawh aniang ti chung reng hian "In tawh e..a rimchhe emai ka tui tih chi a ni lo bawk a" ka ti a. 

"I ţhianpa lu um nen danglamna a awm lo. Fizz-a a nih kha" a ti a, nizan khan Ramfangzaua khan helmet a phelh tak e. Fizz bottle leh a lu um chu ka han mitthla tawn vel chhin a, ka nui chhuak kar kar mai. Fizz bur chhinah hian sam lem vuah ta ila, chu chu Ramfangzaua a ni mai. 

"Lo chuang teh" bul zet hian a ti leh tawp a, Ramfangzaua ka mitthla a, ka nui tawp hleithei der lo. Vanmalsawma lah hian Fizz-a a ti ve vel a, ani pawh hi Diaper trio leader a ni reng sia, an insawichhe hneh sawh dun tak tak a ni. 

"Chuang vat rawh" a ti leh a, a dawhthei lo lutuk hi Vanmalsawma ka hriat ţhin nen a an danglamna pakhat a ni. 

"In bike hi a sang thei hlawm sia" ka tih chuan a kut min lo pe a, "Ka lo vuan ang che" a ti sup a, a kut ka vawn te chuan engtin emawni ka awm; ka sawifiah thiam lo. Ka thil duh deuh nei thar hlim ang vel ka ni. 

Ka u bike ah ka chuang ţhang tawh a, harsa vak lovin ka lawn thei a, tim deuh taka a kawr ka ţham rual chuan dim vak lo hian ka kut pahnih chu a la a, a kawngah a suih bet zui a, "Tlan chak suh aw" ka tih chuan a nui nghawr dat a, "Ţhu er lui suh ang che..mi nuihzat hlawh ka duh lo a nia" min ti ve thung a, a sawi awmzia chu ka hrethiam khawp mai. Hmeichhe ţhenkhat hi chu engtin nge an inherh loh zawk le tih theih khawp a er hian an ţhu thiam a, khatiang em kha chuan ka ţhu duh lo ve tlat. 

Bike a tawlh riai riai rual chuan "I awmah khan eng nge i hnawh a? A va chang ţha ve" ngeiawm fahran hian a ti a, a la tlan chak lo a, ka kut a la vuan tlat bawk nen, a hnungzang chu ka si lo thei bawk si lo a, kan tlan ţan chiah a, ka hah nghal em em ringawt. 

"Ka thlah dawn che a nia, min thlah ve kher rawh tihna ni lovin" a ti a, kawng chhuk deuh kha kan thleng tawh dawn sia, a kut pakhat chiah a hmang ngam bik lo a nih ka ring.

"Tlan chak suh aw" ka tih nawn leh hnuah keima thuin a kawngah chuan nghet deuhin ka kuah a, ka kekawr hak a nal nge bike seat a nal pawh ka hre lo, ka duh vang ni miah lo hian hmalamah ka tawlh riai riai a, ka ţhu ţha ngam rih bawk si lo, ka ţang lutuk chu ka thlan te a tla thei mai dawnin ka hria. 

Turning point kan thlen chuan ka tawlh hnung sawt sawt a, amah tak pawh hi a hah viau ang. Ka u anga ka ngam tlak loh miau avangin ka ţang si a, a tlan chak hauh lo na a keipawh ka duh danin ka chuang bik lo, min chhaih zui ang tih hlau em em chungin chhaih ngai khawpin ka chuang zei lo a ni. 

Kan inkawtah ka chhuk a, taksa sil ţhem ţhum ni awm tak hian a ban chu a ti che kual vel a, "Ka pua che a ni ringawt alawm" a tih te chuan ka lo zak chem chem mai. 

Gate pawnah Tintin-a a lo chhuak ve chiah a, hlauh ang ngei ngeiin Vanmalsawma hmel chu a dur khap khup ni hian ka hmu a, ka u chu a en run a, "Sensiar lo lut rawh" a tih te chuan ngeiawm zet hian a lo kiai suk a, an inhaw viau em maw ni dawn le?

"Ka lawm lutuk a nia" ka tih chuan a bu nghat a, min lo be rawh ti ni awm tak hian a kut chu a beng bulah a dah a, ka u bawk a en leh hnuah chak deuhin a tlanchhuak a, Tintin-a tak pawh chuan min melh no lo khawp mai. 

"Thu i awih dawn lo tlat..kan khaw school ah hna a ruak an tia dil la a ţha ang" min ti a, a la phak chual a, a mu tho chiah ni awm tak a ni.

"Ka nu ten zir zel turin min duh alawm. I duh duh a min awm tir tum suh" ka tih chuan "Hna aiah naute i nei ang tih ka hlau a nih hi" inti puitling fahran hian a ti a, ka lo ner nang a. 

"Naute ka nei awm kher lo e..i bialnu te ang ka ni ve kher hleinem" ka tih leh chuan "Min hnial min hnial suh" a ti hmuk a. 

"Ka hnial che a ni hran lo, engahmah hmain min ringhlel nghal ringawt a, nangpawh zantin i lengchhuak a, ka sawi ve ziah chuang hleinem" ka ti a, min chhang tawh lo, mahse aia upa te zahthiamin tih hla a "An hnial ngai lo aia ute" tih lai bik kha min sak khum a, lungawi lo ru viau mah ila ngawi hmasa zawkah ka ţang leh tawh. 

"Tintin i bialnu hlui khan pasal a nei dawn asin. Ka ţhiannuin min lo hrilh a, Partein pasal a nei dawn a nia" U Daizauin a lo ti a, ka nui ve leh ta nge nge a. 

"Parmawii mai mai chu(h). Ka hmangaihna leh ka pawisa a bat kha min rul phawt sela pasal nei chauh rawh se" thawven hmel takin a ti na a U Partei a duh zia chu kan chhungkua chuan kan hre vek. 

"Hmangaihna chu bat thiang alawm" ka nu'n a lo tih chuan "Ani pasal nei tur kha ka bat tir phal teuh lo. Midang pek ve duh te ka nei a, ka pawisa a bat nen khan min rawn rul rawh se" a ti leh a, a phone a hmeh mawlh mawlh hnuah "Hei en ta che u. Pawnchhe zawrhna group a nih hi min add vel mai mai tawh. Parmawiin a pasal neih hma a ka pawisa min pek let a ngai. Pawnchhe zawrhna group a awm tlak chauhah min siam a nih hi" a ti a, phone kan en sak a, an lo add tak tak a, eng rilru pu in nge pawnchhe zawrhna group chu an siam ang le?

U Daizaui hnenah Vanmalsawma nen a kan haw dun dan ka hrilh sar sar a, ţawng zawih a ngai bawk si, kan inhnaih khawp mai. 

"Hnaih lui char char rawh..a biak ţhat phawt che chuan hnaih sauh sauh rawh" a ti hem mai a, "I hlau emaw tia" ka ti a, hnaih tura min duh lo tu tur ber a ka ngaih a ni miau a ni. 

"Thudik tak i hre duh a ni lawm ni? Kan khuaah kan awm tawh lova, mahse Vanmalsawma te inchhungah hian thudik tam tak a biru tho ang" a tih takah chuan ka ngaihtuah kual vel a, U Daizaui remruat dan chu a ţha phian maithei a ni.

CONT...