VANMALSAWMA-9

VANMALSAWMA-9

"Sensiar, i u hi lo enteh hei a hliam nasa lutuk...awii ka rap emai a" ka nu thlabar chu a rak chel chul a, mut ka lo tum tawh a nia, peih lo deuhin U Daizaui nen kan chhuak a, chaw ei dawhkan bulah ka u chu a ţhu a, a bulah ka nu a ding bawk a. 

"Kan khuaa awm angah in ngai tawh mah ta che. Aizawl ah kan awm a, khawpui mite chuan insual buai an hrat ve lo" ka nu'n a tih lai chuan a hmel chu ka lo en a, a khabeah chuan thisen ni awm tak hi a kai a, a kamsir vel aţanga thisen chhuak a tuai pherh a nih ka ring. 

Lapua ka chiah huh hnuah "Ka lo hru ang" tih pahin a hmaah chuan ka ţhu a, an sawisa nasa tih a hriat khawp mai. Thisen ka hrukfai hnuah a pemah te chuan damdawi ka hnawih a, ka nu chuan "Ching tawh miah suh. Damdawi kawl remchang lo phei ila chu na i tuar reng dawn tihna a nia, i thin hi a chhe lutuk reng reng mai, mihring i nia sakawlh i ni lo tih hre rawh. Pawn lama va inlak pa vak kha a ţullo" a ti hlak hlak a, ka u lah chuan nachhawkna min dil a, thil dang engmah a sawi duh bawk si lo a, tu te nen nge an insual tih takngial pawh kan hre lo. Mahse rindan chu ka nei. 

Ka u zing tho chu zan lam ai khan a hmel hmuh a hrehawm zawk a, a hmui te phei chu thlawh chhuah daih tum ni awm tak hian a kawh luah a, mihring hmui lo vun len theih zia hi ka ti ta alawm beisei phak bakin a hmui chu a kawh a, a hmel pawh a lang danglam vek. 

A mit veilam chu a duk vung churh a, a mitmu pawh a sen ram mai. A hmai vun a pilh thliah thluah a, a duk bawk a, hetiang a nih chuan ka class kal tur pawh min thlah peih kher lovang. 

"Awii..Tinkhuma chu le(h). Khawi khati khan thla la ang, kan zuar ang a, naupang hlauh atan an duh dawn lutuk kan inhralh thei viau ang hei dawr kan siam tawh lehnghal a" U Daizaui ţawng zat zat chu ner nûng hian a lo en a, a ngaihtheih loh hmel khawp mai. 

"A mawi lo hran hleinem..i pu pawh kha a hmui a lian a, ti kha chuan i pu i ang lek lek alawm" ka pi'n a lo tih ve hnuah phei chuan "Ka pu chu a va hmelchhe awm ve" uar zet hian a ti a, a vin ti ila a dik zawk daih ang. 

"Hmelchhe nang aw..kan khaw nula hoah phei kha chuan a tla na ţhin teh a sin" a ti vel a, putar leh pitar hi chu han kawm ila, an nulat tlangval lai chanchin kan zawh chang te hian nuam an ti a, an insawi luck thei lutuk. 

"Engati nge nizanah an sawisak che a? Kha i mit te kha a turu lutuk ringawt. Khatia duk reng tur khan tih tir law law la, thla khatah vawikhat tal a duk ngei ngei ziah tho a, tattoo ang deuh hian i mit kha chhut dum tir law law rawh. Duh leh a pahnih khan tih tir la, tarmit dum i vuah reng a ni mai a, an hnek chawrh che pawhin a duk a lang lo deuh ang" ka nu'n a lo ti ve thung a, ka pa chu awm se hau lovin damdawi leina tur a pe leh zawk mai ang. A duat bik em em chhan hi tuman kan hre lo, Tintin-a lah midang han tlawn chi a ni mang bawk si lo a, a mak ve ngawt mai. 

"Min hau reng mah ta che...chhan pawh ka chhan theih loh che hi" a ti a, a ţawng zawng te chuan a ka chu a ang zau ngam lo. A na viau tak tak a nih hmel. 

"Min thlah hman angem?" ka lo tih ve chuan lu a thing a, na nei ni awm tak hian a ţhen zui sawk a, a lu te a hai deuh em maw ni?

"Va mu rawh..i palen avang ringawtin buaina i cho a, kha tlem a tlemah i piangsual lo chauh a nih kha" a ti a, tlai ka hlauh deuh avangin in aţang chuan ka chhuak a, Vanmalsawma te ţhian ho ka la tawk zui. Kein an kal a, thophang hmel pawh an pu tawh lo, an tho hma viau zel a nih hmel e.

Anni pawh chu harh ţha viau tawh mah se an hmel hmuh a nuam lo khawp mai. An hmui a kawh ve lo a, an mit a duk ve lo bawk a, mahse kan indin chilh tak hnu chuan an hmaia pilh awm chu chiang takin ka hmu thei a ni. 

"Ka u in lo sawisa a ni maw?" ka ti nghal thawr a, Vanmalsawma lo nui vel te chu ngei duh tan chuan ngeiawm tak tur a ni.

"Kan chhan zawk a nih kha. A ţhianpa nen veng dangah buaina an lo siam a, an rawn umzui a nih kha. An tam tham sia, pui lo ila chu an na viau ang" Pektean a lo ti khar khar a, an nih lohna anga ka puh chu a ngaihdan a nih loh hmel nasa mai. 

"Khawiah nge in kal a?" ka ti leh ta zawk a, insual hrim hrim hi ţha ka tih loh avangin an thil tih chu ka fak sak duh lem lo. Chutih rualin U Daizauin Vanmalsawma hnaih sauh sauh tur a min tih kha ka hre ran bawk. 

"Ka pite ina ka ui dah ka la" Vanmalsawman a tih takah chuan a ui kaih lai chu ka hmu ve chauh a, an in a an kawl lai ang em chuan a lian lova, mahse a mawi reuh lutuk ringawt. 

"Kan ţhian zinga mi a nih hi. Sawmtea oh Boomer" Pektea chuan a ti vel a, "A nu tlawh a a zin dawn khan a pite inah a dah a, tunah kan la let chiah a nih hi" a tih zawm leh a, "Kan ţhianţha ber" Pekan a lo ti ve zauh bawk. 

"Tu nge a hming ni a?" ka tih chuan Vanmalsawma a lo nui a, "Tintin" a ti pah sup bawk a, "I uite hi Tintin-a maw?" phawk hra a ka tih chuan a bu nghat a, an ţhian ho chu an nuih a za viau mai. 

"I u hi a inla mi tak thei sia chhaih thinrim nan a ţha viau ang" an la ti tak deuh deuh a. 

"Tintin-a a inla mi tak maw?" ka ti leh a, ka nui ve thung a, pawnlamah hian engtiang chiahin nge a awm ţhin tih hi ka nu leh pate pawn an hriat chak ber a ni. 

"Class i kal dawn mi?" Vanmalsawma chuan a lo ti a, a thutak ve ta deuh e. 

"Aw..taxi ka chang ang a, bus kan nei a, bus stand thleng taxi in ka kal mai ang. Tintin-an min thlah hman loh chang chuan kan bus in ka kal ve mai zel" ka ti deuh duah a, ka thusawi an hriatthiam loh hlau hian thil hi ka sawikual duah zel hrim hrim. 

"Nihliap i pai em? ruah a sur dawn a nia aw" Vanmalsawman a tih chuan van lam ka hawi kher a, nidang aiin khua a duai a, a sur tak tak maithei a ni. 

"Pai lo..ka thleng hman tho ang" ka tih chuan "Hruaipuii te inkawt a ka bike saw i hmu thei em?" a tih veleh a ţhiante chuan "Tintin tlan ang le" an ti a, Vanmalsawma ui kaih lai chu laksakin an tlanpui ta daih a, an va han inla zei thei tak. 

"I bike chu ka hmu a mah se engatinge? I chei danglam tir a mi?" ka lo ti he haw a, Hruaipuii te hi kan ţhenawm maia dawr kai te kha an nih avangin kan inkawt kawngpui aţang chuan a langsar viau a ni.

"Ka thlah ang che" min ti a, a bike a chuan ka hreh zia chu ka sawi tawh kha. Chu ti ang a ni chung chuan U Daizaui sawi kha hrerengin "Min thlah ringawt dawn a nih te chuan a pawi hleinem" ka ti a, a lo ner deuh sawk chu ka hmu ru reng a, ka hre lo der hmak thung. 

"Thil dang eng nge i beisei a?" bike awmna lama kan phei pah chuan a ti a, "Aa..nangmah zawk khan min thlah vang maiin duh duh a tih kawi theih a min ngaih ka hlau" tiin tlang takin ka rilru a thil awm chu ka hrilh a, a nuih a la za em em zui a. 

"Nang hi duhsakna i dawngsawng thiam dawn lo tlat" min ti a, Hruaipuii te dawr chhunga a helmet dah chu lain a khum nghal a, bike a tih nun hnu lawkah chuan lawn ve mai tumin amah chu dimte hian ka vuan a, ka vuan nghet ngam tlat lo. Ka ke lehlam ka khai chiah tihah chuan hmalamah a tawlh a, ka vawnna ka thlah chawpchilh nghal bawk a, ke ka khai hman uk tawh bawk si, a seat ah ka hlang hman lo hlauh zawk a, ka awmdan chu a mawi lo ve ngawt ang. A lo hawi let rualin ka ke ka dahthla a, hepa hian ka inrin loh lai takin min fiam ve ziah. 

"I mawl a mi? A seat ah hlang chho hman ila chu ka tlu dawn a nih kha" ti pang pangin ka pan hnai a, helmet phui deuh zawk kha a khum lo a, a nuihza insum hmel chu ka hmuchiang kher mai. 

"Chuang rawh" a ti leh tawp ringawt a, sawi hranpa ngai lovin a kut min pe a, min tlansan leh daih mai ang tih hlauin nghet deuhin ka lo vuan a, ka ţhut fel hnuah a kawrah ka ţham thung a, keima thu chuan ka kuah ringawt ngam bik lo. 

Veng chhung kan pel dawn tawh tihah a ding thut a, kei a inring lo chuan tum lawk ni miah lohin mawng ka kan awk a, helmet ah ka intauh bur bawk a, sawi tur a va vang ţhin tak. 

"Engati nge i din thut?" ka ti bak hlar a, mi hi hauh chiam duh mah ila hauh chiam dan tur ka hre ngai lo tlat a ni. 

"Zawhte kha i hmu lo mi?" a tih chuan ka hawi kual nghal vat a, engmah ka hmu lo. 

"Sir lam ka en char char a, ka hmu ve lo aniang" ka ti a, a tlanchhuah leh hma chuan ka kut pahnih chu a la a, a kawngah a suih bet leh hmiah tawh bawk a, "A na em?" a la ti zui a. 

"Nat ve bawk loh ten ka intauh bur kha" vin lek lek hian ka lo la ti a, a nui tih hriat zetin a taksa chu a che dat a, "Min kuah tlat la i intauh lo a ni mai" a ti ta vel a, zawhte a hmuh tak tak pawh ka ring lo e a(h). 

Ka hrilh lawk angin ka ţhiante chu gate pawnah an lo ding ţhap a, tun hma kha chuan veng khatah awmin duh duh hunah kan inhmu thei a, tunah lem kan awm darh ta vek sia, la inhmu thei tho mah ila khawvel hi chu ţhenna ram a ni an tih ţhin hi dik ka ti khawp mai. Thihna avang chauhin kan inţhen lo a, zirna leh hna te, nupui pasal neih tak avang ten kan inţhen a, kan ţhianho pawh tunhma angin kan inkawm tam theih loh phah bawk. 

"Boomer, class i kal tawh ngai lo mi?" hre lo awm taka Thartein a tih chuan "Ka zo tawh" a ti hmuk a, "Boomer ka ni lo" a tih zawm zat bawk a, phirpui a nei tih chu a inhre ru ran awm tho sia. 

Min kalsan hnu chuan ţhianhoin classroom lam kan pan a, kan ti ti nasain ţawng kan inchuh a ni ber. Nitin inhmu ve bawk mah ila sawi tur kan ngah em em reng a, Vanmalsawma chanchin an sawi nasa hle ţhin bawk. 

Nilengin kan ţhian ho chuan kan inzui a, tlaiah a ngai te bawkin kan inţhen hrang leh a, Vanmalsawma sawi ang tak tak khan ruah a sur a, a sur tam lo thung a, tlaia ka haw dawn phei chuan a lo han vek tawh. Thartei nen kan haw rual a, "Vanmalsawma kha duh miah suh aw. Kan Boomer ang kha a ni lo a nia, a lerh hmel ka ti tlat a, hmeichhe kawp kual vel mai mai a hrat ngawt ang, a tan chuan hmeichhia hi infiamna bak an nih ka ring lo. Hmelthar a hmu a, ti hian a ngaina che a, a nin hunah che chuan a hawisan hmak ang che. Neih let tumin eng hmanrua pawh hmang la i neih let theih ka ring lo. Hei hi ka hmuh dan a nia, a dik ngei pawh ka ring" a ti sa sa a, ka thin a rim lo a, ka u ngei pawhin min hrilh tawh avangin hnaih mah ila inveng ran a awm a ngaiin ka hria. 

In a ka haw chu Tintin-a pindanah ka lut tlang a, a lo mu tum bur mai. Biak a huphurhawm viau na a "Hrilh tur che ka nei" ka ti ta tho a. 

"Eng nge?" a ti hmuk a, a lu zawna a phone ken chuan a tlak zui. Phun hluk pahin a hmai a hup a, hmaia phone in min tlak hian a na duh a nia aw. 

Khum tlangah ka ţhu hmasa te te a, phone a en leh hnu chuan "Ih maw..Boomer te hian Jim twins kha min hriatchhuah tir tak tak asin. Anni pawh kha an nupui hluite leh an pawm lai mekte hming thlengin a inan kha maw..Boomer-a ţhianţha ber Tintin-a i nia, Vanmalsawma pawh hian ţhianţhaber Tintin-a a nei a" ka ti a, ţha deuhin a lo ngaithla ve mai a, "Mahse ui a nia" ka tih chuan a inperh tho zawt ni mai hian ka hria. 

"Ui nen min tehkhin maw?" a ti a, a kut a lek zauh te chuan min hnek bur mai dawn emaw tiin ka lo indang a, vanneihthlak takin chutiang em chu a thleng lo. 

"An ţhianţha berte hming a inang ka tihna alawm. Ui nen ka tehkhin che pawh a ni lo, mak ka ti em a mak i tih ve ka ring a" ka tih te chuan "A mak loh chu. Vanmalsawma chuan a phuah chawp a nih chu. Hnaih lo tura ka hrilh hnuah che i lo hnaih leh a ni maw?" a ti khur khur a, khum aţang chuan thochhuakin tukverh a hawng a, pawn lamah a dak chhuak a. 

"Hriatchian tumna i nei ve miah lo mi?" ka tih chuan "Zanin hi ruah a sur angem aw" a ti daih a, min ngaihsak duh ţhak lo.

"Boomer leh Vanmalsawma tih vel ka kham tawh. Ka hmui kawh lai a nia, in neitute fanu han chuk fawk fawk ila ka hlawk zawk fe" a ti a, vei zui loh hmel viau mah se "Ni Mami tal min biaksak rawh" ka ti ta tho a. 

"Mi hranah ngai la a dik a ni mai" a tih lai mekin U Daizaui a lo tlan lut a, "News kha in hria em? Enteh u kan khuaah bo a awm leh tawh a nia aw. In ţhenawm nula kha a ni lehnghal, in hria em Ngaihtei kha?" a rawn ti nawk nawk a, a thu rawn sawi chuan beng a verh kher mai.

"Kimkimi ang thoa fawr hrat a nia, Pa Siama te ina card ka den ţhin lai pawn a lokal ve zeuh zeuh ţhin a, awii keichu mak ka ti e. A chhungte pawn a fawr mai mai a nih an ring aniang kar khat hnu velah police an hrilh chauh a, kan khua chu a lar leh tawh lutuk" a ti a, a phone laksakin a thil sawi chu hriatchian tumin ka chhiar ve ngat a, thudik a lo sawi ve ngei a ni. 

"Tintin" ka ti a, amah ka en veleh "Duh leh U Mala be rawh" a ti hluk a, a ţhianpa ber boralna khan a la nghawng vang nge luhlul a chhuah tlat chhan hi ka hrethiam bik lo. 

"Ni Mami tal chu min biaksak la, thil dang ti rawh ka ti chuang hleinem" ka ti a, Ngaihtei bo mai chu mak a tih zia ka nu'n a sawi lang lang ri chu pindan aţangin kan hre pha a, thil inti hre fe fe an tam leh ang chu aw. 

"Boomer-a u nen kan inbe ve ţhin a, Ni Mami chu Aizawl a lokal zeuh zeuh alawm. Leng turin kan la sawm dawn nia" U Daizaui zawk chuan a lo ti a, "Engmah i ti lovang. Buaipui tur pakhatmah in nei lo. Mihrang hlak inzawm tir ţalh tum suh u" Tintin-an a ti ve thung a, a thinrim hmel em em mai lehnghal. 

"Ka hrechak alawm" ka ti a, Ni Mami min biak sak theih nan ka ţap der mai dawn emaw ni ka ti rum rum. 

"Chak kha a tawk. I ninawm dawn tlat va mu mai teh" min ti a, ka ding mai mai lai chu na taka min hnawl sawnin pindan aţang chuan a chhuak a, ka nu'n "Laltinkhum" a lo ti lehnghal, diktak chuan chawh ka ti ve reng. 

"Dawr siam a hnathawk tur zawng rawh ka tih che kha, i thawveng leh lutuk hi a buaithlak emai, uai rit tu eng emaw nei la a ţha ang. Ti rawh kan tih i ti duh lo a, ti suh kan tih lah i ti lui ţalh a" a ti hlak hlak a, "Uai rit tu chu nei ve e..hei ka hmuiin min uai alawm..a nat nak laia, heti liau luau hian ka chhuah peih i ring a mi?" a ti a, a vin khawp lehnghal..an inbe hlek a an inhau a ni nghal zel a, an hahthlak ve det. 

"I cho chhuah a nih kha..i hna i ţhulh thei tihna mi?" ka nu'n a tih chuan U Daizaui ka en vat a, "Workshop ah ka thawk a tia" a lo ti a, a ţhat phian chu, a tuina a nih phawt chuan thawk rawh se, pawisa a la lut ve thei ang a, ka nu nen an inhau khat deuh bawk ang a, amah pawh a hlim sawt ka ring. 

Dawr tur pawh chu kan siam zo a, bungrua zawng zawng nen a chhung chu a khat ve dul a, a nuam reuh tak tak a ni. Ngaihtei chanchin kan ngaichang reng a, Kimkimi ang bawk khan a ruang hmuh tur a awm lova, a ţhiante leh bialpa thlengin thu an zawt fiah a, a bo ni ni awma an ngaihah chuan Ngaihtei an hmuh loh thu sawiin an awmna hmun te an sawi a, hriatpuitu an awm zel bawk nen, tumah hreng lovin an chhuah leh vek a, a zuzi leh mai ang tih a hlauhawm khawp mai. 

"Biakin bulah zu kal lawk teh aw. I pa'n thlai hnah a lo thawn tam mah mah a, kan eizawh hmain a chhe dawn tho tho a, i nu Mathani te zu pe ve rawh" tih pahin ka nu chuan thlai hnah chu bag ah a khung mawlh mawlh a, ruah a sur cherh cherh bawk nen, a peihawm loh khawp mai. 

"Tintin-a a awm lo mi? Bike in zu kal lawk se la" ka tih chuan "Min phut viau suh..ka tello a thil tih zir ve rawh u" pindan chhung aţangin a lo ti a, a va han zak lo tak. 

"Kan lalpa a nih saw..engahmah phut loh tur..mu sela, a hunah ei leh tawp rawh se. Duh leh a kut te kan sil sak anga" mei nei zeta ka nu'n a tih chuan "A ngai lo mai in silfai ţha lo palh ang" a lo ti leh a, a ke a bai leh suih suih tawh a, tu tu emaw chu a ti buai leh tawh chiang a ni. 

Biakin kawnga ka chhuk lai chuan dawr pakhat aţangin Vanmalsawma a lo tlan chhuak a, hoodie var a ha a, nihliap khum lem lovin a kawr a lukhum bet chu a khum a, "Khaw nge i kal dawn?" tih pahin nihliap min chhuh sak a, kan pahnih chuan kan inzawn a. 

"Nu Mathani te chawhmeh ka pe lawk dawn" ka ti a, kan inhmu tam lova, phone ah phei chuan min lo la be lo hrim hrim. Ka u hmuh laia min lo call rawh a tih ve te kha chu ka u runluih nan mai mai a nih ka ring a, ka ring dik bawk ang.

"Engati nge ka ruala i kal ve zel a?" ka ti a, ka thlek deuh ha a, ani pawn min lo en chhuk ve in "I bulah ka kal chak a" a ti a, a kiai suk bawk a, a hmel hi englai pawn a ţha vawr reng mai. A ngo hluak lo a, hei hian a ti pa lehzual ka tia, mipa ngo leh lutuk hi chu a mawi lo tlat alawm. 

"Hmm" ka ri ringawt a, ka chapal chhungah lah chuan tui a lut a, a nal zuih tawh a, a ri leh thlerh ţhin bawk a, nuam lo tak a ni. 

"Class i kal ţhin em?" a ti a, ka kal ţhin thu ka sawi veleh "Lehkha i zir ţha em?" inla thupui fun fahran hian a ti a, "Zir ţha ve e..kan exam ţep tawh a, zir loh theih pawh a ni lo a, ka zir" ka tih lai mek chuan ka tawlh zawt ka ti mai, mawng sawh dawt hian ka tlu a, ka mawng leh mal vel a vawt nghal sang sang bawk a, "A na em?" tih pahin ka ban a lo vuan vat a, "Na lo" ka ti zawi sep a, zak lutuk a amah ka en chuan a hmui pet tlat chung hian thlang lam a hawi daih a, a nuih a za a, a nui ngam chiah bawk si lo a ni. 

"Min lo kaitho teh" ka tih chuan hneh zet hian min kaitho a, a nuihza insum hmel lah chu chiang deuh hian a hmuh theih a, min nuih ve hle hle se a thawl hawk mai tur a nia. 

"Ngawi teh...hei ka chapal hi ka chawnah a tang daih a, sawlai step ah sawn kal lawk ang" ka ti a, zah pawh ka dawn thei lo. Ka bun tawk aia lian ka bun ve khanglang zel a, ruah sur lai chuan a lo bunchhuah chi vak loh a nih dawn hi. Ka tawlh thluk hlim kha chuan a tla chhuak emaw ka ti hman a, mahse ka chawnah a tang ta daih sia. 

"Step a i ţhut chuan i bal vek ang, nihliap hi keng teh" a ti a, keipawh chuan rang takin ka lo ban ve mai a, a ţhu hniam a, a tan a awlsam deuh ringin ka ke chu ka khai a. Ka chapal a pawh tawlh dawn lai chuan a luah ka lo dawm a, lukhum khum tlat lo se chu a samah ka invuan tang thei tur a nia. 

"Ka zo e..ruah sur laia bun chhuah tawh loh tur tihna a nih kha" a ti a, ka che chhe fo bik hi eng nge a chhan pawh ka hre lo, ka kekawr mawng lah chu a huh deuh hlup tawh bawk sia, kei hi, ka kekawrte a lang thei ngei ngei ang. Ka kekawr hak hi cotton a ni sia, a var lam a la ni zui a, a huh chuan a langtlang dawn chiang lutuk. 

Nihliap chu amah bawkin a keng leh a, kei chuan ka mawng ka khawih zeuh zeuh a, ka kekawr chu ka vun a a beh loh nan ka pawt zeuh zeuh a ni ber. 

"I ke a na mi? Engati nge i kal bai suih suih a?" ka bula kal pa lah chuan a lo ti ve sek a, kekawr mawng pawt zeuh zeuh reng chunga pangai deuh a kal chu har deuh a sin. 

"Bag hi min lo kensak lawk teh ka kawrlum hi kan hlip lawk" ka tih chuan mak ti hmel deuh hian min lo en a, ka bag pek chu lo lain a ak ve mai bawk a. 

Kawr lum ka phelh sawt sawt hnuah ka kawngah ka hreng a, "Ti hi chuan ka kal bai tawh lo ang" ka ti hluai bawk a, duh aiin ka ţawng ring lehnghal. 

"Vawt i ti lo mi?" min ti a, ka chezia chu mak a tiin a meng tal tap a, ka huh bawk nen, vawt chu ka ti viau mai mah se, "Vawt ti lo e..ka kekawr mawng a balh takin ti hian hreng ila ka confi zawk" ka ti a, Nu Mathani te in pawh chu kan thleng chawpchilh nghal a.

Chawhmeh ka pe chu an lo lawm thiam khawp mai. An nupain lawmthu min hrilh a, a tui tur zia te an sawi mawlh mawlh bawk a, thingpui min lum sak an tum chuan ka hnial ţang ţang a, in chak viau mah ila pawnah Vanmalsawman min nghak a, awm khawmuang rei thei pawh ka ni lo. 

Kan chhoh leh lamah chuan "In khuaa bo kha i hre ngai em?" a ti chhuak hlawl a, ka rin loh deuh min zawt ve tlat.

"Aw..kan ţhenawm lawkah an awm. A fel reuh a sin mawle..mi sawi zawng zawng kha a dik vek lo a nia aw, a lerh ve tih lohah chuan sawiselna tur a awm lo, nui reng thei ang chi kha a nia" ka ti nghal zung zung a, "In lerh dan chu a inang vel ang" ti a ka fiam chuan a hmui a lo ti sawi zauh a, "Chu lerh min lo ti a ni maw?" a ti a, a ţawng nem lem lo na a thinrim hmel pawh a pu chuang lo. 

"I hming hria apiangin a lerh an ti zel che a?" ka ti a, graduate ve lai tawh si hian bialpa ka la nei ngai lova, mipa bula sawi chi leh chi loh pawh ka hre lo, ka ti lunghnur em lovang chu. 

"Min hai aniang" a ti a, a aw thum leh thuk deuh ruih hi a hmel pa tak nen hian a inrem ka ti ţhin. Chutah hnuai lam a en a, keichu min lo en lehin "I kezungte hi i modi em?" min ti a nih chu!

"Chutiang an ti ngai a mi? Kezungte a modi theih tih pawh ka hre lo" ka tih chuan "A ute rualin a ţhang ve lo a nih dawn kha" a ti leh a, ka kezungte te bik lutuk hi Tintin-a phei chuan amah ngau ngau hi damdawi hmanga enkawl a ngai a ti ţhin a, mahse ka ke nalh ti tu chu an awm ve zel tho. 

"A tet bik vang alawm kezungte an tih reng ni" ka tih chuan "A hming a pu zo bik a nih kha" a ti a, ka ngawih tak vang vangah chuan hrehawm ka ti emaw a ti aniang "Tak taka i hmelţha, i ke pawh a mawi a, i hming hi i inhmeh bawk a" a ti leh vel a, a lo awmna dawr kan thlen dawn ţepah motor pakhat a lo tlan a, tape an play ringin an thawm a ţha khawp mai. Hmeichhe nui ri ka hriat rualin min lo vawm a, kawngpui hnaih lama ka kal lai tak a ni bawk nen, min vawm fuh chiang hle. Balloon chhungah tui an thun ni awm tak a ni; balloon chu a keh a, ka kawr hma a huh hluam a, kan kal tawhna lamah khan an tlan thla a. 

Vanmalsawma phun hluk ri pawh ka hria a, a hmel a dur nghal khup ni mai hian ka hria a, a mitmeng pawh nalh viau mah se a hlauhawm takzet a ni. 

"A vawt em?" a tih chuan lu ka thing a, a ruk tak chuan vawt ka ti reng mai. 

"Ka thlah thleng lo mai ang che" tih paha nihliap min pek chu ka lo vuan vat a, thui pawh ka la kal hmaa bike ri ka hriat chuan ka hawi let thuai a, chak deuh a Vanmalsawma tlanchhuak chu ka hmu hman a, khang ho kha a umzui dawn a nih ka ring, ruah sur hnuaiah lehnghal an tlan na lamah khan a tlan a, a hmelhriat tawh sa te an nih ka ring a, enzui mai loh chu tih theih ka nei ve lo. Kan inhmuh leh hunah chanchin ka zawt leh mai ang. 

Rin loh deuhin zanah an lo leng a, a ui Tintin kha a lo la hruai zui a, an rawn inkai lut te chu an lo en duh nasa mai a, nula lenna a ui kaih chu an ti deuh aniang "A damlo em ni?" ka nu'n a lo ti a, a dam thu an lo sawi vat a, Tintin-a a la lengchhuak lo bawk a, pindanah tawm tlat se ka ti khawp mai. 

"Daizaui ka va thlak ang e..zanah pawh kuhva lam duh te an awm ve reng a" tih leh ka nu chuan chhuah a rual a, rei vak lo hnuah U Daizaui a lo lang hlawl bawk.

Pindan aţanga ka u a lo chhuah rualin Vanmalsawma chuan "Tintin" a ti lauh a, ka u lah chuan "Eng nge?" a ti deuh hluk bawk a, a ngaina lo nge ngainat loh a tum ka hre hrang thei lo. 

"I ke hnuai a va bal ve..ţhenawmte bawlhhlawh bawm i lo hai leh tawh a ni maw?" Vanmalsawman a tih laia ka u hmel chu hmuhnawm loh tak a ni, en thuak pawhin a thinrim zia a hriat theih hial ang chu. 

Vanmalsawma chu chhang let lo mah se pindanah a lut leh a, a lo chhuah chuan tarmit dum hi lo kengchhuakin "Vuah rawh" tih hmuk pahin ka malchungah a lo theh thla a, ka va bun awm lo tak. 

"Tintin ka mal vel nul nul suh..mipa i nih kha" ngeiawm fahrana Vanmalsawman a tih leh te chuan ka u chu a hah tawh ngawt ang. Thawk chhuah hawk pah hian a nghawng a chul thuak a, Tintin tih chu a ui hming a nih miau avangin han huat vak chi a ni bawk si lo, a sa huam huam ang chu. 

"Vanmalsawm, pathianni zanah a ngaiah aw. Bike ka nei ţha tawh teh a nia" a tih hnua chhuah mai a tum chu, "Tintin hrik i ngah hle mai a, i paw phuk bawk sia i inbual ngai lo a mi?" pakhat lah chu a lo au leh lauh a, mitmeiin ka lo khap a, ka u dawhtheih loh chin a thlen vaih chuan kan inchhungah ngei pawh hian a khawih duh mai ang. 

"I tlangnel tawh pang pang hle mai maw..Pathianni zanah chuan lokal ang che" a ti a, hmeichhia kan awm ve reng laiin Vanmalsawma ber chu mit a siai khum zauh zui a, insual chiam se an inkawmngeih thei mai ang. 

"Vawiin khan khawiah nge i kal? Chak deuha i tlan chhuah khan" ka pi hriat hlau taka ka tih chuan "Ele..ramhnuaiah ka bethel" a lo ti a, ka awih lo nasa mai. 

"Ka u nen khan in inhriatna a rei tawh em?" ka ti a, kan thusawi chu ka pi chuan a ngaithla reng tih ka hria a, thil pawi thei tur sawi lan loh hram hram ka tum bawk. 

"Kan lenna ah a lo awm ve ţhin a, kan hriatna a rei tawh" Peka zawkin a lo ti a, ka ute nen an tal duhna a inan chuan mifel leh thuawih, Pathian ţih tak an ni lo tihna a ni mai. 

Mut hmuna phone ka khawih mai mai lai chuan number hlang aţangin message ka dawng a, tu nge a nih hrelo mah ila rindan ka nei a, chu chuan min ti phurin nui var var chung hian ka hawng a, "Sensiari a mu tawh em?" tih hi a lo thawn a, hre sa reng mah ila "Tu nge i nih?" ka ti vel a, a ngei tawk a tling leh viau ang chu. 

"Nakin lawka i bialpa tur" a rawn ti a, nuam ve duh tak a ni. Ka nui hawr hawr a, U Daizaui lah chuan "Nuam awm hawr hawr ve, rawn be tu che ka hre mai. Sam kir-a a ni maw?" a lo ti ve sek a, a lam hawiin ka nui a, engmah ka hrilh rih lo thung. 

"Hriat ngai loh bialnu ka ni duh ngawt lo" ka ti a, thawnthu ka chhiar nasa a, bialpa la nei lo mah ila ka zei ve viau tho a nia. 

A dp ah lah chuan a sa sat lai kher a dah a, mawi pawh ka ti lo mah se a inhmeh viau thung. 

"A nuamah emaw a hrehawmah emaw, hrisel lai leh bawrhsawm lai pawh a sa min sah pui zel turin i intiam em?" a rawn ti vel a, "Eng nge a awmzia?" ka tih chuan "Ka bem mek che a nih hi" a ti a, hmui chip luih hmak a va han har tak em.

"I tihdan a dangdai emai min duhchhan pawh i sawi lo a" ka ti a, a lerh tih mai mai te chu midang a biak chuan ka titau zel mai dawn alawm..mahse ka chhang dawn chuang lo. 

"Khati tawp khan ka duh che" a tih phei chuan ka mu ngil awt a, ka keţang zawng zawng ka ti kak vek a, vanram kai ang vel ka ni.

"Ngah nge maw i ke pawh chu i tih arh vak vak mai le? Phone in i bia tih hi Tinkhuman a hriat chuan a haw ngawt ang che aw" a tih lai te pawh chuan phone screen ringawt ka en a, Vanmalsawma status ka hmuh phei chuan ka nui chhuak leh hak hak tawh. 

"I zûn kha a fei em? I zûnah ka uai duh sia, ka uai chat em lo ang chu" tih hi a hmang a, mi status a status lehchhawn mah nise min hman chhan ni mai hian ka hre leh tlat tawh a, sawi ngaihna pawh ka hre lo a nuam a ni tawp mai. 

Kartluanin class ka kal a, Vanmalsawma nen pawh kan inbe zing viau na a kan inhmu khat a, hnathawk an lak belh a, chung ho chu a buaipui rih ni awm tak a ni. Chhuak vak tam lo chi nih chuan vengkhatah awm mah ila inhmuh ziah a har khawp mai. 

Ka nu nen a kan bazar haw chu ka piin "Chanchin ka lo hrilh thei lo che u a, Tintin-a leh a bialnu an chesual an tia, ţhenawm nula in a rawn sawi a, va zawt fiah teh u" a lo ti a, hlauhnain ka khat nghal a, ka nu nen chuan inthurual ang hrimin kan tlan chhuak a, "Tuin nge sawi i pi kha va zawt teh" a tih chuan ka let leh a, ka pi chuan "Pu Biaka fanuin" a lo ti a, ka tlanchhuak lehnghal a. 

Ka nu nen chuan Pu Biaka te in kan pan ding nghal a, tlai lam a ni tawh a, rawng an lo bawl mek a. Ka nu nen chuan ka pi thu lo sawi chu kan hrilh ve nghal vat a, "Tintin-a chanchin in hriat hmel sia kan lokal tawp a nih hi. Midangin an hre tawh em? Tuman min lo hrilh bawk si lo a, khawiah nge an chetsual?" ka nu chuan a ti mawlh mawlh a, a hlauthawng khawp mai. 

"Ka va hre bik lo ve" a tih hnuah Pu Biaka chuan a fate a ko khawm a, "Tintin-a leh a bialnu an chesual em ni? Hei an rawn ngaihven a, hriat in neih chuan han hrilh teh u" a tih hnuah a fanu zinga pakhat, Chawitei chuan "Keiman ka va sawi alawm. Ka lo leng ang chu ka tia, mahse ka pi chiah kha a a lo awm sia, Tintin-a leh a bialnu hi an inzui ngawrh sia, an la chesual ang ka ti a nih kha. Accident lam ka sawi reng reng lo, bed romance lam daih alawm ka sawi" a ti zat zat a, a ngaihdan a nih loh hmel reuh em em zui a.

"An inzui ngawrh a?" ka nu'n a tih leh chuan "Inzui ngawrh e..in in neitute fanu a nia, a chhungten an en liam mai mai zel bakah a nu leh pate sawrkar hnathawk ve ve an nia nitin an chhuak a, tu emaw zawk zawk an khuahkhirh loh chuan a rai mai ang. Chutiang lam daih chu ka sawi a, ka piin a hresual a nih kha" a ti a, thla a muang a, rilru a nuam huai huai mai. 

"Chawhma lamah pawh khan ka hmu a, Vanmalsawma te ţhian ho nen an inzui a, hmeichhia an phur vek bawk a" a tih chuan ngaihthlak nuam ka ti tawh hauh lo. 

"Vanmalsawma a tel ve maw?" ka ti deuh hluai a, ka nu a awm ve tih hrechhuak chawpchilh nghalin hmui ka hup vat a. 

"Tel ve e..an ţhianho leh Tintin-a te ţhian dun an nia, mipa panga leh hmeichhe panga an nih chu" a tih laiin a u chiah chuan "I thik vang mai mai a nih kha. Rai te chu nang ai pawn a hlau zawk ang chu. Vanmalsawma i tia, tunah Tintin-a i ti leh a, pa, hmanah Vanmalsawma pawh a pa bulah a hek tawh kha, chupawh a ţhiannu a phurh vang mai maiin. Ching tawh suh kan tih kha" a ti tan tan a, Chawitei lahin thinrimin a chhang let a, keimahni vangin an unau an insual lo chauh a ni ber. 

"Ka nu, Chawitei thusawi i hriat sual mai mai a nih kha. An accident hleinem. Mahse Laltinkhuma pawh engati nge mi sawi kai khawp a a lo awm aw..an fimkhur loh a a bialnu in nau a pai phei chuan an rethei dawn lutuk ringawt. Kan Tinkhuma hi ran ang hian a til lak tir ve mai ka duh rum rum zel. A til la se la, dawih dui se la, hmeichhia ngaihsak lo hmak bawk se la" a ti hlaih hlaih a, ka u a ţha tih ka hre tawh a, thawk khat chu a veng. Mahse Vanmalsawman rilru a luah ve thung a, hmeichhe dang lo phurh reng reng, min bem mek a sin mawle. Ka chhanna tur a nghah chhung lek pawh a rinawm thei lo chu a nia.

CONT..