VANMALSAWMA-14

VANMALSAWMA-14

Helmet a phelh lai chuan "U" ka lo ti ringawt a, min melh dan te chuan min ti zam chhe nghal der mai. 

"Hetah eng nge i tih?" a ti bul hmuk a, Vanmalsawma min kuahna chu a en uluk viau lehnghal. 

"Hei ka ţhiante an lo zin a, ka hmuak a" ka ti a, ka aw a zamna langchhuak chu a hrethiam aniang Vanmalsawma pawh chuan a ban a la sawn ve ta nge nge a. 

"Lo chuang rawh" ka bula ding pa zawk en ran chung hian a ti a, midang angin mak ti hmel a pu ve lo a, a huat hmel zawkin ka hria. 

"Hei ka ţhiante pawh an awm a nakinah kan lo haw ang" ka tih chuan "Lo chuang rawh ka tih chu" vin zet hian a ti a, ka ţah a chhuak ţun tawh mai.

"Khaw thim hmain ka lo thlah ang" Vanmalsawman a tih ve chuan "Lo inrawlh suh" a ti hmuk a, ka u ka hlau a, ka rilru a na bawk a, ka bula ding pa pawh chu a ngaihdan a ni vak lo tih hriat zetin a hmel a dur khup a, a meng nur nasa hle bawk a, ka u in "Lokal vat rawh" a tih leh takah phei chuan Vanmalsawma  chuan thaw ipik hmel zet hian boruak a thaw chhuak ham ham a, thinrim insum te pawh a ang a, a hrehawm duh khawp mai. Kei tak pawh ka tawt a, awm dan tur ber pawh ka hre lo. 

"U Mal kan lo haw rual ang. Kal hmasa la i hnungah kein kan lokal ang" ka ţhianten an lo tih ve te chuan "Sensiari hi leng turin rawn sawm ve tawh suh u. Inchhung aia khawlai nuam a tih zawk kan duh lo" a ti a, bike a lawn tur chuan min hrilh zui leh nghal zat bawk a. 

"Kal rawh..ka lo bia ang che" ka beng bulah a phun sup a, ka hnungah na lo tein min nam bawk a, ka u ka hlauh avangin a hmel pawh ka en ngam tawh lo. 

Ka u hnungah chuan tim daiin ka ţhu a, bike a tih nun veleh ka ţhiante ho chu ka en a, min khawngaih hmel hlawm khawp mai. An kut an lo vai a, an mitmeng te chu a ngui riau niin a lang a, kan tlan chhuah hnuah pawh ka hawi let ţawk ţawk a, min lo thlir ve ţhap a, Vanmalsawma te ţhian dun chu ka khawngaih a, ka inthlahrung bawk. 

Min hau hrep dawn emaw ka tih laiin U Mala chuan engmah a sawi rih lo a, kei lahin ka ţhiante leh ka bialpa thar ngawt chu ka ngaihtuah a, in pawh kan thleng hma reng a ni. 

Inchhunga kan luh rual chuan "Sensiari hi engati nge in chhuah tir?" a ti lut nghal a, ka nu leh ka piin min lo melh ralh a, ka pa erawh chu a awmdan a danglam hran lo. 

"A ţhianten bazar kal puiah an sawm a, i pa'n kal ve rawh se a tih a nih kha" an lo tih chuan "Bazar ah an kal hleinem. Hotel bulah mipa nen an lo awm alawm. Tintin-a ţhianpa bik a nih pawh ka ring lo, i ngaihzawng em ni a?" a ti a, ka ngawi reng a, ka nu tak pawh a mangan hmel khawp mai.

"Tu mipa nen nge in awm a?" min ti a, din dun leh inkuah mai mai te chu a ho tehreng nen an la thutak zek lehnghal a. 

"Vanmalsawma te an lo zin alawm" ka ti a, ka ţawngzawi viau na a ka thusawi chu an hre pha vek tho ang. 

"Eng nge an lo tih?" a ti lehzel a, an mit chu keimahah a fu ţhup a, U Mala lah chuan min en rum em em mai lehnghal a. 

"An lo zin ve mai mai. Hotel chhaka kal kan tum a, kan inhmufuh a nih kha" tiin dawt ka sawi a, an awih hmel vak lo na a thudik sawi ka tum bik lo. Kan inkawp tih chu hria se kan inţhen theih nan engpawh an ti duh ang chu mawle. 

"Aizawl a kan inleng te ber an nia, hmelhriat tiin an lo be ding ve a nih dawn chu. Engahmah ngai duh suh ngaihzawng a nei hleinem" ka nu chuan a ti a, zaizirin ka pindan a lut turin min hrilh nghal zat bawk a. 

"Mipa khan a lo kuah vel a, khaw laiah lehnghal. Motor vei vak a awm reng a, mi hmai eng pawh an zah lo tihna a nia" a tih chu ka hre hman a, kailawnah ka tlan chho zawt zawt a, ka pindanah lutin khumah zangthal duaiin ka mu a, ngaihtuahna a kal thui duh ngei mai. 

Khua a thim thet thet tawh tihah ka ţhianten min lo bia a, "Haw lehnghal duh suh u kan tia, hotel a tihfel ngai te kan tih fel pui a, an ngaihtuah khawp mai che" an ti a, kan khuaa an lo la kal ngai loh avangin keiman ka ngaihtuah zawk daih sia. 

"A ţhat chu...inhmuh leh dan chu a awm mai ang. U Mala phei chu kan inah a lokal reng lo a, bum theih dan a awm ang" ka ti ve tak nain ka bum theih ka ring vak lo thung a, nuţa ngah leh lutuk pawh hi a lo nuam chuang lo a nih hi. 

Chaw ei tura ka nu'n min rawn koh chuan "Ka ei chak lo..bakah U Mala a la awm awm sia, min hau ang" ka lo ti a, ka nu leh pate ai pawhin ka ute ho hi ka hlau zawk. 

"Chaw nghei tawp a ţha hleinem..tlem tal rawn ei rawh. I u Mala pawh chaw ei turin a haw phei ve ţep tawh ang" a ti a, pindan chhungah a lo lut ta nge nge. 

Khuma ka mu min hmuh chuan khum tlangah a ţhu a, min endan chu ka hrethiam lo, min khawngaih nge min dem a hriat theih loh a, a mitmeng chu hriatthiam harsa tak a ni. 

"Engati nge i lo han hmuah a? Kan khua angah chuan mi kan la inhrechiang angreng sia, i uten hmu lo che u mah se midangin an hmuh cheu chuan an beng a thleng tho tho ang. Hostel ah an dah daih mai tur che a sin" tiin min sawi ţhaih a, engtin pawn min ti se ka duhna a bo phah awm tawp si lo a. 

"An lo zin chuan ka hmuak ve bawk ang chu. Kan khuaah an la kal ngai lo a, thlenna tur hotel te kan khawhmuh alawm. Bakah mahni leh mahni inveng thei rual ka ni tawh a" ka lo ti ve thung a, engahmah hmaa an ngaithei lo ringawt chu ka haw hlur mai. 

"Inveng thei mahla i uten ngaihzawng neih an la remti lo alawm" a tih leh chuan "Anni pawh keimah ang rual an nih chuan an nei ve tho ang. Ka graduate tawh a, naupangchhia ka ni tawh bik hleinem" ka ti nang nang a, ka ute hi ka nu leh paten an khuahkhirh ve lem lo a, zalen deuha nun an hman laiin kei ve chu jail zau deuha tang ang mai ka ni. 

"An phal loh miau chuan tih theih a awm chuang hleinem. Thu awih la i na lo zawk ang. Vanmalsawma nen pawh in lo inngaizawng ve tak tak a nih chuan in kal thui hma hian ţhen rawh. A nih loh chuan i ute thinrimin a mah thleng thlengin an tawng mai ang. Chutiang chu a thlen i duh lo ang tiraw? Tlawm leh zak deuha an siam loh nan ţhen daih rawh" a ti sap sap a, a aw pawh a nem ve lutuk. 

"Aww...ka pa nen ţang dun ula engtinmah ti suh u ti ve ula a ni mai alawm. In fate vek an nia, in tan an hlauhawm ve hleinem" ngenngawl zet a ka tih pawh chuan "Keini pawn ngaihzawng i neih kan la phal bik lo. Vanmalsawma te ang ngat phei chu kan phal lo lehzual. Hna chu thawk ve bawk mah se chak deuh deuhin bike a khalh a, intlansiak an ti thul, in aiin khawlai nuam a ti zawk a, insual buai naah lah a tel ve ziah ţhin niin an sawi a, ruihhlo a ti bawk a, pasal tlak a ni lova, ngaihzawn chi pawh a ni lo. Boomer pawh tih tawh nak laiin Vanmalsawma phei hi chu a bawraw lehzual a, tunah hlim viau mah la i hlim chhung a rei dawn lo. I zirlai thlengin a tuar ang a, zir zo phawt la, nangmaha i in enkawl theih hunah duh leh ngaihzawng chu i nei dawn nia" a ti leh dap dap a, khawlai mi ve tak pawh nise a rilru chhiat loh zia chu rawlthar pakhat a hum dan aţang khan hriat ve tawh tur a nia. 

"A rilru a chhe hleinem. Ka rilru natna turin a awm duh lo hrim hrim ang" tih zawngin ţan ka khawh a, beidawn hmel zet hian a lo thaw halh a. 

"U Mala te hi min khuahkhirh lo deuh turin hrilh ve la, hetiang ringawt chu a ninawm emai, jail zau deuhah ka tang a ni ringawt alawm" ka ti a, a malchunga ka bawh takah chuan ka sam a chul a, nu te nge nge hi chuan min khawngaih mai zel, ngaihzawng neih hi sual a ni lo miau a ni. 

"Engtia rei nge in inkawp tawh?" a tih chuan "Min bemna chu a rei tawh a, mahse kan khuaa kan haw dawn ţepah khan kan ni ve chiah. Min bem laia dawra a lokal chang leh, an in bula kan pahnih chiaha kan awm pawn engtin mah min ti ngai lo. Ka zahawmna min tihchhiat sak a duh bik lo ang" ka lo ti a, ka zep buang bar peih lo, mi kâ aţanga thudik lo an hriat leh ai chuan hrilh nghal vek ka duh zawk. 

"Sawi ve mah ila i ute hi chuan an duh dan an kal tlangpui dawn tho tho. Tintin-a anga ngaihsam leh thil ţha lo ni a an hriar en liam mai mai thei chi an ni ve lo a, i ţhen loh chuan Vanmalsawma tak pawh hian hrehawm a ti dawn a nia, hrehawm a tawrh i phal lo ang tiraw?" a ti a, kan ni ve chiah a, ţhen nghal mai ka duh bik bawk si lo, ka nu malchungah chuan che chang lovin ka mu a, thil thleng thei zawng zawng te ngaihtuahin ka thaw hle hle a, tun ţum chu ka ute thu zawm nghal mai ka tum lo. Ka hnial anga, a theih chhung ka do let ang ka ti ve tlat a, ka ngaihtuahna ringawt vang chuan ka inpet ruh ţeuh a, hrehawm a tawrh ka phal loh rualin ka rilru ngheh zia hre ve turin ka duh a ni. 

"Nang pawh i nuten ka pa hi neih phallo tlat ta se hrehawm i ti ve tho ang. Khatiang chiah kha a ni mai, in fate kan nih vang ngawtin in tawn ang tawng ve lo turah min ngai a, duhzawng kan nei hi mi pangai kan nih ve na zawk alawm. Mi â kan tih ţhin ho takngial pawn ţha tih zawng an nei a nia" ka ti niah niah a, an neih tur ni miah lo a duh an thlang ţhin hi alawm ka ngei chu. 

"Chaw ei phawt teh ang. I uten an hauh che pawn chhang let lo la, an hau lui reng peih lo ang che" a ti a, keipawh chu ka tho ve ta nge nge a. 

Ka nu nen kan inzui thla chu U Mala ka hmu hmasaber a, a landan chu a nelawm hlawl loh a ni. 

"Boomer ang chiah chiah intih chu a lo zin em ni? Sensiar, i lo hmuak vel a maw? Ka pi hnen aţangin nun a uluk loh zia kan hre vek tawh a, in lo inkawp ve a nih phei chuan ţhen hmak ang che. Naupang i nia, ngaihzawng nei rual i la ni lo, i zakthei lo emai" U Maman a lo ti nghal a, a thinrim hmel em em mai lehnghal. 

"Khawlaiah te i inkuah tir a, hmelhriat hmuh te in hlau lo'm ni? Khatianga khawlaia i awm an hmuh che chuan keimahni a nia min dem dawn ni. Aizawl ah i awm ve dek dek a ngaihzawng i nei nghal ringawt a, hostel ah pawh awm la in inhmu ru thei tho ang, lehkha zir tawh lo mai rawh" U Mala pawhin a ti fak fak a, min hauh ngai loh vang nge ka mittui a tling pam tawh mai. 

"Thil ţha lo kan ti chuang hleinem. Dawr a a lo len loh leh inah a lo leng a, khawlaiah pawh min ko chhuak ngai lo hrim hrim" ţap ţiau hian ka ti a, thudik ka sawi bawk. Keima thua ka chhuah pawn min hau zawk ţhin a nih kha.

"Boomer nen an inan vang ringawtin i duh tihna mi? Phir an lo nih a, Pu Muana fapa a nih leh lek phei chuan kan duh lo lehzual. Tunah khan bia la, min beisei tawh suh ti rawh" U Mala bawk chuan a ti leh a, chhan beiseiin ka nu leh pa leh Tintin-a te chu ka melh nghal ruai a, ka ţap tak tak tawh bawk. 

"Min beisei ngai lo ka tih tawh kha. Engtin mah min ti ngai lo" ka ti a, insut hraih pahin ka bianga ka mittui luang thla chu ka kawrbanin ka hru a, chhungte hmaa han ţah tawp mai chu ka zak ve reng, mahse min hau ngai miah loin min hau a, Vanmalsawma ka khawngaih bawk nen, rilru a na duh em a ni. 

"In inngaizawng em?" a ti ram hmak a, zepin awmzia a neih tawh chuan loh avangin lu ka bu zauh a, ka tawt ţun mai.

"Tunah khan call rawh inţhen ang ti rawh. Aizawl ah i awm tawh dawn lo" a ti a, ka hmaah dingin min en ran a, "Nangman i hrilh loh chuan keimahni'n kan hrilh mai ang. A thlenna kan hria a, zawn hmuh a har lo ang" U Maman a lo ti ve bawk a. 

Hreh deuhin phone ka phawrh chhuak a, ka lek kan lai te chuan ka tha a khur a, phone ka kenna kut khur nasa lutuk te chu an hmu thei vek ang. An thil min tih tir tum hi ka hreh em a ni. 

"Eng nge maw in hriat le? In thu khel a hmeichhia emai, hmeichhe ta ang hi tereuhte in nei ve a ni lo maw? Hetiang te chu khap sen an ni ngai lo. Nei suh pawh ti ula a rukin an nei tho ang. En liam mai mai rawh u" tiin Tintin-an ka thlavang a lo hauh a, ka ute pahnih chuan an ngaipawimawh lo viau thung. 

"Be vat la a zo a ni mai. Phone kha han la teh, keiman ka lo bia ange" tih leh U Mama chuan phone min chhuhsak a rual a, "Screen lock hi hawng rawh" tih hmuk pahin phone chu ka hmai zawnah a dah a, zah pawh ka dawn thei lo, ka ute ka hlau lutuk leh Vanmalsawma hrilhhai lutuk tur chu khawngaihin ka ţap chhuak hial a, min en tawp a, hrehawm ti ang pawn an awm lo. 

"Ti lui suh u" Tintin-an a lo ti chang fak a, a aw a ring lo na a hlauhawm tak chu a ni. 

"Hawng vat rawh" U Malan a ti vin tuarh a, Tintin-a a che phut a, "Ti lo tur a ka hrilh cheu kha" a ti bung nghut a, U Mama kut aţangin ka phone chu a phih thla sawk a, bang vawm nan a hmang zui a, ka lo khek deuh ţhat nghe nghe a ni. A vawm na bawk si, a chhe hneh viau ang.

"Laltinkhum lo inrawlh ve suh. Inchhungah i ţhiante hruai lut suh kan ti mawlh mawlh a, nangmah vang a nih hi" U Maman a tih chuan "Nia min puh vek rawh" a lo ti then a, a duhtawk mai dawn emaw ka tih laiin "Hmeichhe ta ang nei ve pa..tereuhte cute deuh i nei ang" nuih sawh pah hian a ti a, U Mama thinrim chu a inhum ruh nasa mai. 

Tintin-a pawhin a hmu ve aniang "Tharum hmanga chinfel lam kha chu ngaihtuah lo law law rawh. Naupang zawk mah ila min hneh lo ang. Sensiar, Daizaui nen chaw ei va siam rawh u" a ti a, ka dar tawn tawn a dawmin min kuai her a, choka lama min nam phei dat dat chu U Daizauin min lo zui vat a, hrehawm a tih hmel takzet a ni. 

"Ka phone i vawm chhe daih alawm" choka a kan luh ruala ka tih chuan nur nangin min en a, lawmthu sawi zawk turah min ngai a ni maithei mah se "U Mala ten an ngaihsak loh phah che ang e" ka tih zawm a, lawmthu sawi aiin a pawimawh daih zawk. 

"Ka inngaihtuah thei. Ka vawm chhiat loh chuan i bialpa an be dawn a sin. A hlim pawn a chhia a, a hrehawm tuar lai hmel phei chu ka hmu peih lo. Vanmalsawma ka ţan avanga vawm chhia ka ni lo tihna a nih chu. A hmelchhe deuh nur kual vel ka hmuh peih loh vang liau liau a nih kha" a ti daih a, thawven hmel zet hian choka chu a chhuahsan a, keichu ka rit tulh tulh mai. Ti kha chuan ka ţhiante nen pawh kan inbe thei tawh lo ang. Phone thar lei lah an phal dawn lo nasa a, nei lo law law ila an duh zawk ang. 

"I phone kha a la hman tlak i ring em?" U Daizauin a tih chuan lu ka thing a, chaw ka khawrh pah bawk a, ka che te chu a zangkhai tawh lo reng reng. 

"Ka hlawh ka khawl ţhin a, i nu leh pate dil la, a thar lei an phal loh chuan ka leisak ang che" a ti a, "A ngai lo..neih theih dan a awm ve zel mai ang" ti mah ila "Tuman lei an tum loh che chuan keiman ka leisak ang che" a ti deuh tlat a, aw ka pawh ve ta nge nge a. 

Chaw ei khamah U Mama a chhuak a, keichu pindanah ka tawm nghal daih a, thil hrang hrang ka ngaihtuah kual a, ka uten an lo vau te ka hlau a, phone neih loh chuan rilru kawm melh melh a awl sia, ka uten engmah an sawi tawh lo na a ka la ţhu hle hle thei chuang lo. 

"Kha phone..ka phone hlui kha a nia, i ţap hmelchhe thei si, mumang duk dak lo ka neih phah ziah a, tikhan hmang rawh. U Mala leh Mama te hmuhah keng lang lo la" tih zung zung pahin Tintin-a chuan khumah phone a rawn theh tla a, ka kuah chawih lo chauh a ni. 

"Naktukah min hauh leh i ring em?" ka tih chuan "Ka hre nang..zawlnei ka nih loh hi. Pi Dengmawii zu thlen hun bik chu min zawt la chu ka chhang thei ang che" zangkhai vah hian a ti a, min chhuahsan zui nghal a. 

Ka phone chhe ta a sim card invuah chu ka phawi sawk sawk a, Tintin-a phone hluiah chuan vuahin ka charge zui nghal a. A zawh hun pawh nghak zo lovin Vanmalsawma ka bia a, a phone number hi chu hre nal tawh tak ka ni, maimitchhing chung pawn ka chhu dik thlap thei ang. Thil ho te te sawiin kan nui dun leh hak hak ţhin a, ka ngai che a ti deuh reng bawk. 

"Lo leng thla rawh ti dawn ila i thlenna leh kan in a inhlat bawk sia" ka ti a, ka uten min hauh phah ka la ti lo hrim hrim a, a hriat ka hlau lutuk zawk. 

"Inleng i neih ngam ka ring chiah lo" a ti a, fiamthu a an rualin a thutak hmel tho bawk sia, chhan dan thiam a har ţhin a nia. 

"Ka ute an awm vek chuan ka ngam chiah lo tak tak a" ka ti a, a thinrim ka rin tehreng nen "Ka lo leng lo ang, an hauh phah ang che" a ti a, ka khawngaih reuh tak tak a ni. 

"Eng nge i tih?" ka ti hmasa leh te te a, "Arsi ka chhiar" nuih hawk paha a tih chuan "Ka ute hian phal lo ta se min ţhen daih angem? Ka sawi awmzia chu tham lo deuh deuhin ţawngkhum ta che sela ka tihna a nia" tim dai hian ka ti a, kut pawh min thlak se a tawpkhawkah lo chuan keichuan ka ţhen lovang. 

"An hau che mi?" a ti a, hmu lo mah ila min ngaihtuah tih ka hria, a aw ah a lang tel tlat a ni. 

"Hau lo e..ta se ka ti ringawt a nih kha. Hmeichhe awmchhun ka nia, bialpa neih an phal loh avangin nangmah kha tham lo deuh deuhin lo ţawngkhum ta che sela ka tihna zawk" ka ti deuh duah a, a lo nui ri suk na a a nuih a zat vak loh hmel khawp mai. 

"Ţhen daih lo ang" tih chiahin min chhang a, tukverhah ka dak chhuak a, Ngaihtei pindan bawk chu ka en leh ran tawh a, zan dang ang bawkin thil pangai lo ka hmu leh chuang lo.

"Bialpa ka nei ngai lo a, tun hi a vawikhatna liau liau a nia" ka tih chuan "Kan inang a nih chu" a lo ti a, awih lo lutuk a ka nuih hak lai chuan a lo chek hluk a, nuihsawh chu a duh lo ve hle mai.

"Dawheh viau suh aw Vanmalsawm, nei ţeuh tawh mahla ka hrethiam lutuk che. Mipa i nia, an khuahkhirh ve vak lo bawk che a, i bialnu hluite avangin ka ngei dawn lo bawk che a" ti ve zat zat mah ila "Ka nei lo" a ti leh hmuk a, a nui thawm pawh hriattur a awm tawh lo. 

"Lerh an ti zel che a, hmeichhia i phur ziah bawk a, i inzep a nih ka ring" ka la ti ve ţang ţang a, ani ang mipa chhe lo leh hleitling, hausa bawk si chu tun thlenga ngaihzawng nei lova a awm theih ka ring lo. Kei ve lem min hmuh aţanga thla reilote ah min bem nghal der sia, a hmeichhe phurh ţhin ho aia ka ţhat bik loh zia ka hrechiang viau bawk. 

"Ţhian leh ngaihzawng hi a danglam. Ka hmeichhe phurh apiang ka bialnu an ni lo" a ti a, a thutak viau tawh. 

"I nei ngai lo tak tak maw?" ka tih chuan "Umm" a lo ti leh ringawt a.

"Nih chuan engati nge min bem si a? Kei ai ţha an tam dawn nen" ka ti a, van lam hawiin ka nui var var a, a nuam dangdai ve em a ni. 

"Ka duh takzet che tihna a nih kha. Tunah te hian ka bulah awm la chu ka kuah hmin ţhak ang che" a ti a, ka nuih a za kher mai. Nui hak hak chung hian "I over thei bik sia aw" ka ti a, a thusawi khan min ti lawm hle tho sia. 

"Ka bialnu hmasaber i nih hi. A tawpna ni bawk ang che" a ti khauh bur a, min hrilh pawh a ang lo, thu min pe a ang zawk mah. 

"Naktukah chhuah dan ka lo zawng ang. Ka ute hi an khirh lutuk a, len mai mai an phal lo a, mahse chhuanlam ţha deuh ka siam ang a, bazar ah te ka kalpui ang che" ka ti a, a phur thiam khawp mai. 

Ho mai mai sawi a rei deuh kan inbiak hnuah kan in mangţha ve thei hram a, ka ngai nghal veng veng mai. Kan thusawi ho tak tak te kha ngaihtuah letin keimahin ka nui ka nui a, inngaihzawn ţan tirh hi a nawm hunlai ber an ti ţhin a, ka uten min hau tih lohah chuan a nawm lohna sawi tur ka la hre lo reng a ni. 

Ka ute ka ngaihtuah thlen takah chuan ka tawt up up a, ka thaw a ipik takzet. Vanmalsawma thleng thlenga an hauh ve ka hlau a, min huat hlen theihna tur ţawngkam an neih ka hlau bawk a, a hnathawh an hriat ringawt pawhin an nuihzat a, ka pi hnen aţanga a chanchin an hria a nih lek phei chuan a nihna bak bak a belh chin a awm leh ngei dawn a, ka kawp lui zel a nih chuan rin phak bak a nasain an che mai ang. Chutiang zawng zawng hre lawk vek chung pawh chuan ţhen duhna ka la nei lo a, hrehawm chu ka hmachhawn ve phawt ang ka ti tlat a ni. 

Vanmalsawma ngaihtuah reng chunga mu ka ni bawk a ka mumangah ka hmu nasa a, ka thawh rualin a tam zawk ka theihnghilh nghal vek. Sana ka en a, dar8 a lo ri tawh a, zana ka muttheih loh a ring aniang ka nu'n min kaitho hma lo emai. 

Inhnuaia ka chhuk veleh U Maman "Vawiin chu lengchhuak suh aw. Kan pindan lo ti fai vek rawh. Rinhlua pindan pawh a hnawk leh nuai tawh a, ka tirh loh che chuan tirh nachang che a hre lo ang. Pindan zawng zawng ti fai vek la suk tur pawh a tam ang" a lo ti nghal zawt zawt a, chhuah ka tum ve nen aw. 

"Ţhianho a lenchhuah ve kan tum a sin. Park thar an tihah khan kan kal ve chak a, nidangah ka ti fai mai ang" tim deuh dai hian ka ti a, Tintin-a leh ka pa hmuh tur an awm lova, thlavang hauh tu tur pawh ka nei lo. 

"Lenchhuah a ngai lo..park a kal tih mai mai a ho lutuk. Ruaiţheh niah ka hoin kan kal dawn nia, ka hruai ang che u" a tih chuan "Ka ţhiante pawh an duh duh hunah an chhuak thei alawm. Krismas a hnai tawh a, an chhungten lenchhuah an khap ve tlat ngai lo" ka ti a, ka tum zui bar bawk a, min hauh hrep avang khan ka la na veng veng thei hialin ka hria. 

"I ţhiante chu duh leh chhuak se la i kal ve zel a ngai hleinem. Tih tur ka sawi chu lo ti rawh" a tih hnuah "Ka pi, lo chhuah tir suh u aw" a tih zawm zat a, nupui nei se vairamah awm daih se ka ti ţhin. 

"A phal dawn lo tih i chian sa chuan dil lo mai la, i na mai mai" U Rinhluan a lo ti ve a, U Mama kalsawn hnuah chauh a rawn ţawng ve ngam a ni ber. A ngawichawi hrim hrim a, kan biak chuan min chhang tawp a, a tawng duah khat khawp mai. College a kal hnuah BD a zir a, a zir tlai deuh avangin tunah pawh a la zo lo a, u pastor ka la nei dawn tihna a nih ber chu. 

"A ninawm e..keichu inchhung hi ka ning tlat, inhmuh phak loh a tlan bo daih mai te ka duh ţhin. Vairamah kal ve tawp ila hnathawh tur te zawng ila, min ngaihsak miah lo mah ula ka awm thei tho ang. Ţhiante tih ang ti ve thei lovin min siam ziah a, park a ka kal vang khan ka zahawmna a bo dawn tihna pawh ni hlei lo" ka ti bawrh bawrh a, ka thinrim lutuk avang chuan thawk ka la kawk kawk a, ka ipikna te pawh a kian phah chuang lo. 

"Kal rawh ka lo phal sak ang che" a ti a, ka ngam chuang der si lo a. 

"Chaw eikhamah kal ula lo haw leh har lo ula" a ti a, "U Mama kha" ka tih chuan "Hlauhawm loh..min mawh puh dawn nia" a ti sam et a, phur ru deuh chungin chaw ei ka siam a, a tawp a tawpah chuan phalna nei thlapin ka hmu ve thei dawn ta alawm. 

Ka insiam lai te chuan ka zai rat rat a, ka ţhiante ho pawn min lo call deuh reng tawh a, park ah kan kal dawn nia ka tia an lo phur em em a, sawm nawn an ngai lo hlawm nasa mai. 

Hotel chhung kan luh chuan ka hawi kual nghal ruai a, hotel nei tute ka hrechiang viau na a hotel ah tak hi chuan ka la kal bik lo hrim hrim a, tun hi ka kal vawikhatna chiah a ni. Rin ai daihin a lo nuam lehnghal. 

An pindan ka hriatchian avang chuan kan tlang a, double room ah an awm a, tih tur an hre ngang lo aniang an ţhiandun chuan an lo insiam peih diam tawh. 

"Engin nge in lokal?" an tih chuan "Vani leh Thartei te scooty ah an inphur a, Zuali nen chuan rickshaw in kan lokal" ka lo ti vat a, Vanmalsawma nuih a lo za nasa mai. 

"Scooty khalh zirtir tu tur che i hun fel thlap tawh kha. In la inzirtir nange?" nuihza aw tak hian a ti a, a mit chuan min chhaih pah bawk a, ka inleng pa thusawi a lo la hre reng a nih hmel. 

Bazarah ka hruai a, min kaih a tum chuan ka lo duh lo a,  a thinrim ka hlau leh si chuan "Kan insan hleih emai i kal bai palh ang" ka ti ta ringawt a. 

"Ka ban hi lo kuah rawh" a ti na a hmelhriat ka hmuh palh hlauin ka kuah duh chuang lo a, a meng nur nasa ngang mai. 

"Aizawl ah lo let leh vat rawh. In khuaah chuan kan chep" a tih lai mekin tleirawl pakhat, kan venga mi ngei mai hian min lo bia a, a thusawi nen a inrem lutuk chu amah pawh a nui ve tawp a, "Kan chep tak tak tihna a nih kha aw" awmze nei deuh hian a ti leh a, a sawi dik lo chuang lo, U Mala chuan min hmu fuh leh se chu kut min thlak duh tawh maithei a ni. 

Kan sawi lawk tawh angin park ah chuan kan kal a, kan ţhiante ho an infiam nuih har har laiin keini pahnih chu grass chungah kan bawk a, kan taksa a insi a, ka kut a vuan tlat bawk a, ka mipa hmelţha tih ber Vanmalsawman ka kut a vuan chu rilru a nuam veng veng mai. 

"Tlaiah kan haw ang" a tih chuan hamhaih deuhin ka en a, a fiamthu a nih ka rin nen a thutak vei phian bawk sia.

"Engati nge?" ka ti hlut a, a rilru leh tum dan a thlak hma lutuk chu ka ngaihdan a ni chiah lo.

"Ka pa a khuahar ang. Min lo bia a, haw lehnghal a ngaih hmel. Hnathawk an awm chung pawhin an indaih lo a" a tih chuan ngun deuhin ka lo en a, dawt a sawi chiang a ni. Amah hi a ho ve ţhin viau na a hna a ngaipawimawh a, a lokal hma khan hna lam chu a tifel vek dawn tih ka chiang. A nu a awm miau avangin a pa lah a khua a har dawn lo tih a chiang bawk a, 'ka nu a lo haw' tiin min hrilh tawh a, ka la hmu ve lo thung a, a pa leh hna berkher a chhuanlam avang chuan dawt a sawi tih ka hre thei a ni.

"In haw lehnghal dawn lo emaw ka tia, hre lawk ila chu park a kal loin hmun pawimawh deuhah ka hruai tur che a nia" ka tih chuan "Thlanmual a ni em?" a lo ti a, lu thin pahin "Ka ţhiante inah zawk mawle" ka ti a, Boomer-a te ina hruai ka tum ruh viau a, kan inhruai leh hman dawn ta lo a nih hi. 

"Kumtharah i lokal leh zawk thei angem? Lehlang tal pawhin" ngenngawl taka ka tih chuan "Ka lo tum ang" a ti a, rem lo deuh hian ka sam a tuai thuak a, a bawh dan ngai bawkin a bawk leh a. 

"Haw lehnghal lo ula ka tih nen aw" ka tih chuan "Min ngai a ni maw?" a lo ti a, a nui zui hawk bawk a, "Ngai e" ka ti a, dawt ka sawi lo bawk. Englai pawhin ka rilruah a awm a, amah ka hmuh hian Boomer hmu angah ka in ngai a, a la dam ve reng angah ka ngaih theih phah ţhin. 

"I u khan a hau miah lo che maw?" a ti nawn leh a, a rilru nawm loh hlauin "Hau nang..thil ho deuh vanga hauh vak vak rual ka ni tawh hleinem" ka ti a, dawt ka sawi thung. 

Ni a nem deuh takah chuan zangthalin kan mu a, ka nuam huai huaiin ka hria. Ka mutdan siam rem a amah si chet a ka mut rual chuan ka kut bawk a lo vuan leh a, "Hmeichhe hrang hrang nen an hmu ţhin che a, bialnu ka la nei lo i ti tlat bawk sia, friends with benefits ang hi a ni maw?" ka tih chuan a nuih a za viau mai. 

"Chu min ring nange a?" a ti a, amah rinna tlachham deuh anga min ngaih hlauin "Ring tehreng mai. Mahse hmeichhe ho kha ka ring lo" ka ti a, midang an awm ve lo bawk a ka dul zawn a kuahin ka lam hawiin a saisir a, ka bek zawnah a thaw lum ham ham a, kan inhnaih khawp mai. 

"Min ring rawh ka ti dawn lo, tih luihna hmangin min ring turin ka ti lo ang che. Min rin leh rin loh chu i thu" a ti a, a thinrim ve deuh emaw ti a a lam ka hawi chuan ka hmuiah a lo fawp zauh a, reilo viau mah se a nawm loh phah hauh lo.

"Hotel nei tunu kha nizanah ka hmu a, min hre tawh lo aniang" ti a a thuphunga a sawi chu ka beng verh zawng tak a ni. 

"Ni Mami maw? In inhria mi? Engtin?" ka ti mawlh mawlh a, mi thawm kan hriat zui tak bawk si avangin kan ţhu leh daih a, a hma aiin kan inhlat hret bawk. 

"Mami a ni lo" a ti leh ang lawi a. 

"Ni Mami alawm hotel neitu ber chu. A nei tu anga i ngaih chu tu nge ni a?" ka tih chuan awlsam deuh hian "U Faktei" a ti a, a hming a dang leh daih bawk sia, ni Mami hming pum lah ka hre ve der lo lehnghal. 

"A cher em?" ka tih leh chuan "Cher e..khatiang kha a ni ngai lo" a ti a, phone ka phawrh sawk sawk a, ni Mami whatsapp dp chu hmuh tir pahin, "Hei hi a ni em?" ti a ka zawh chuan mit ti zim deuh sun hian a lo en a, a enchik kher mai. 

"Aw..U Faktei a nih hi. Ka naupanlaiin min awm ţhin" a ti ta reuh a, hrechiang a inti sia, han awih sak loh ngawt chi lah a ni mang si lo a, "I chiang maw?" te ka ti leh hram a, "Chiang e..ka nu aiin ka bulah a awm tam zawk" a ti a, ka phone kenna kut dawm meuhin thlalak chu a en leh a, "U Faktei a nih hi" a ti leh sup a, ni Mami ngei hian a awm ţhin a nih phei  chuan phir, an sen laia lak hran an lo nih chian dawn chu. 

"Engtik thleng nge in bulah a awm?" ka tih chuan "Kum15 ka tlin kumah mi thil thawn tur angin a chhuak a, a lo let tawh lo. Ka nute hnenah ngaihven turin ka hrilh a, an khuaah a haw an ti mai zel a" a ti a, "A la ngaihawm reng" zah ve hmel deuh hian a ti leh a, hei hi ka hriat duh tak a ni reng a ni. Ni Mami hian Pa Muana hriat ve a duh lo a nih ka ring a, chuvanga thi anga sawi a nih ka ring. 

Kan tlai lutuk hlauin haw ka rawt a, bike chuan hotel thleng bak kan kal lo. Rickshaw kan hmang mai ang kan tia, ka uten min lo hmuh ka hlauh vang a ni pakhat. 

"Kumtharah lokal leh la i u Faktei te inah ka lenpui ang che. Mahse i nu te bulah i hmu tawh tih sawi lo la" tiin ka chah ve thlap a, ani pawn a lo aw ve zel bawk. 

CONT..