VANMALSAWMA-15

VANMALSAWMA-15

Kan kal dawn tak takah chuan ka kut a vuan a, "Lo haw vat rawh aw" min ti a, thlakhlelh hmel deuh a min en vang nge a thusawi tawi te chuan min fan dan a dang bik hle a, "Ka lo haw vat ang" ka ti chhuak sap a, ka ţhiante nen chuan kan kalsan a. 

In a ka haw chuan U Mama a lo awm tawh a, min melh no lo viau lehnghal. Ka lo leng rei mah mah a ni.

Be lova kalpelh mai ka tum chu "Khawiah nge i kal?" min ti a, ka thin a ur em em nghal ringawt a, puppet angah min ngai ni berin ka hria. 

"Park tharah" ka ti mawl tawp a, en pawh ka en duh lo. 

"Aizawl a in bungraw dah ho la turin kan kal dawn a, nakum aţangin phaiah zir zawm mai rawh. I ţhiante aiin hniam zawk mah la a pawi lo kum khat bakin in inthlau dawn chuang lo" a ti a, a vin lo na a a thusawi chu ngaihthlak a nuam chuang lo.

"Ka nu leh pate pawh rawn ve ta che u. U Mala nen hian in thu thuin thil inti ringawt zel. Vairama awm ai chuan zir tawh loh ka duh zawk" ka ti ve tan tan a, ka zir loh an hlauh ka rin viau laiin "I zir tawh lo anga a ni mai alawm" a ti sam et a, ka dang a ni lehnghal der tawh. 

"I sual ka ti e" ka ti a, thil dang sawi tur ka hre lo, ka ruak vek a, ka khua a har bawk. 

"I ţhatna tur a nih hi" a tih laiin ka pa a lo haw a, U Mama nen a min en tawn zak zak hnuah "Buaina in lo nei leh tawh em ni?" a ti a, U Mama bulah a ţhu nghal zat bawk a. 

"Aizawl a kan bungrua lak an tum ve ringawt a nih kha. Bakah min thunun an tum mah mah a, naupangchhia pawh ka ni tawh lo" ka ti leh tan tan a, ka pa a awm chuan ka ţawng huai ngam ve viau zel. 

"La lo e le...i nu hoin an awm leh mai dawn alawm. Ngaihtuah vak duh suh u, i nu hi a rinthlak viau a nia" a ti a, ka thawveng huai thei alawm le. U Mama erawh a ngaihdan a nih loh hmel khawp mai. 

"Aizawl ah a zir ve uk tawh a, hmun dang hmun dang tih leh a ţul lo. Sensiari awm ngaihna in ti hre lo mai dawn alawm. Thil ţha leh ţha lo thliar thiam rual a ni tawh a, nangni pawn en liam luih chin in neih a ngai tihna a ni mai" a ti a, ka u chu a ngawi reng a, naupang ang tak takin min la en a, mipa ka hnaih an la phal lo a ni ber. Mahse ka pa ka lama a ţan chhung chu hmun dangah min dah thei bik hauh lo ang.

Krismas kan hman zawh chuan Aizawl a chhoh nghal rum rum ka duh a, U Daizaui nen pawh "Kumthar chu Aizawlah hmang thei ila aw" kan ti fo a, remti lo tur an tam leh dawn si, ka nun hi chu a hahthlak ve ngawt mai. Kei aia lal leh thu nei zawk vek an nia, tawn tlang luih chi an ni bawk si lo, a chang chuan ka ute ho hi ka kham hluah hluah ţhin. 

Vanmalsawma chu "Lokal leh rawh" ti a ka sawm ngun em avangin kumthar ni tukah ka lokal ang a ti a, riah an tum tawh lo thung. 

An lokal dawn ni chuan ka ţhiante ka pun leh a, chhuanlam tur ţha deuh ngaihtuah turin ka hrilh hlawm a, ka ute lah chu ina an awm tam ve hun lai a nia, min veng run reng a ni ringawt a, chhuanlam ţha tawk tello chuan ka chhuah theih ka ring lo a ni. 

"Ka pum ka ti na der ang a, casualty kan thlen hunah thla ka lak tir ang a ka lo thawn ang che" Vani chuan a ti hem mai a, chu em em chu ţha ka ti si lo, ka ute lah kil tinah an awm a, an tam ropui si.

"An chiu dawn che a sin" ka tih chuan "Min chiu hmain a dam tawh ka ti mai dawn alawm. Chhuanlam tur dang ka hre hleinem" a ti a, a vin khawp mai. Inchunga ka pindanah ka tawm bo daih a, keipawh chuan thawm ka dim vak bik lo. 

"Vani remruat dan chu a ţha ber ang. Vani damlo kan kan dawn kan tia nga kan lo sawm ang che" Zuali chuan thutak zet hian a lo ti ve a, ka thaw hak ringawt a. 

"Len mai mai an phal lo a, kan chhuak harh ve dawn ti mah ila 'a ţullo' an ti leh bur ang a, Vani hi damlo der mai rawh se" Thartein a tih lai chuan tukverh lamah ka phei a, ka dah chhuah rualin hnuai lam ka bih a, zuanthlak nan chuan a sang hret a ni. Na nei miah lo a zuangthla thei pawh ni ila ka lawn chho leh thei tawh kher lovang. 

"Vani an chiu ţalh che ange" hlauthawng deuh taka ka tih chuan "Difen bak a ni lo ang. Inchiu ka hlau vak hleinem. Chhuanlam tur dang i hriat chuan sawi la" a ti pang pang a, ka ngaihtuah chhuak thei mai bik bawk si lo, thil awm ang deuh hlek ka ngaihtuah kualna lamah ka thluak a na vek tawhin ka hria. 

"Min lo sawm tawp mai rawh u" ka ti a, damloh der ngat phei chu a malsawm lo a, ţhianţha te vanduaina thlen tu nih ka hlau a ni. 

Vanmalsawma te ţhian dun lo thlen hun awmah ka ţhiante an lokal a, U Mama an hmuh ngat phei chuan an zam zia an hmelah a langchhuak thei hial a, U Mala phei chu lo awm se an let leh duh ang.

"U Mama, ka u in eitur tui deuh min siamsak a, Sensiari hi kan lo sawm ve dawn a" tiin Vani chuan bul a ţan a, a kuttin a kheuh niap niap a, tim daiin ka u chu a en bawk. 

"In rei dawn em?" ti a a zawh chuan lu an thing sap sap hlawm a, "In inah bak kal suh u" a tih leh hnuah keichu min rawn enin "Va ei ve la lo haw lehnghal ang che" khauh zet hian a ti a, haw vat ka tum lo thung. 

Vani te ina kal tur anga ka insawi avangin thawmhnaw ka thlak lo a, kawrlum lianpui leh pyjama ka ha a, ka inchei ve hlekin ka ute ngaih a ţha lo zel a, tunah pawh inchei lo bawk a chhuah a ngaih phah. 

Rickshaw kan hmuh rualin kan phar a, Vanmalsawma te min lo nghahna lam kan pan ding nghal a. Hotel awmna hi a fal deuh hlek a, a remchang zawk kan tih avangin hotel hnuaia restaurant ah min lo nghak a ni. 

Ka hmuh duh ber pain jacket a lo phelh lai mekin kan lut ve a, a hmel ka hmu chiah chu ka ner nang mai. Hmu reng tawh mah ila min lo hui a, Pektea lah chu a tho nalh a, ka ţhiante ho chu "Lokal ru" a ti a, ţhutna ruak dangah a ţhutpui ta daih a. 

"Ţhu ta che" nuihzat hmel taka a tih chuan a epah pawh ţhu lovin a bulah ka ţhu a, ka kut a lo hum nghal chawt lehnghal. 

A hmai vel chu chek tlak tlak chungin ka thlek kual a, a mitko ah plaster a inbel var vu a, a biang ki lai vel te chu a duk kual raih a, a mit a plaster inbelna lam phei chu tlem a vung deuh a, hmuh a nuam hlawl lo, "I insual em ni a?" ka ti hluai a, min chhang lem lovin a ţhen suk duh chauh a, a ban lah chu a bel kang nasa a, a hmaia hliam hi a la rei loh hmel viau laiin a ban erawh a tih natna a rei tawh tih a hriat lutuk tlat. 

"Krismas i hmang nasa awm hle mai" ka tih chuan a nui hawk a, min chhang ve tawh ang chu tih nak laiin min melh run ringawt a, kan eitur chah an lo dah laiin Ni Mami a lo lut a, kan hmuh chian tehreng nen min hmu ve lawk lo a, "U Fakte" ti a Vanmalsawma au lauh ri a hriat chuan kan lam a rawn hawi vut a, a hamhaih lutuk vang nge min en ngawt ngawt ringawt a, a tih tur pawh ti hman lovin a chhuak ta daih a. 

Vanmalsawma lah chuan "Lo ei rawh" tih leh thawh a rual a, Ni Mami chhuak ta kha a umzui a, ka ţhiante chuan mak an lo tih hmel nasa mai, mitmeiin thil thleng mek chu min zawt a, lu ka lo thin san mai a, Vani chauh lo chuan thil nihna diktak an hre lova, mak an ti pawh chu a awm lutuk tlat. 

A lo luh chuan a hmel chu ngui riau hian ka hmu a, ka bula a rawn ţhut leh rualin "A la hria che em?" ka lo ti var a, min en reng chungin lu a thing a, "Natna a nei aniang" a ti sup a, "A va pawi ve" ka ti tak na a a hre lo der a nih ka ring. 

Thil kan ei zawh chuan Boomer te veng lamah ka kalpui a, kan ţhiante chuan min zui ve tawh lo. Hotel hnuaiah tho khan min lo nghak dawn a, miin min hmuh loh nan Pektea helmet ka khum ve hmak bawk. 

"Tah hian ding rawh" ring leng lawnga ka tih chuan a ding dat a, "Bike chu hetah hian dah mai rawh kan awmrei dawn chuang lo" ka ti a, ka sawi ang chuan a ti ve zel a, Boomer te inah kan kal dawn tih a hre lo thung. 

Boomer-a naute pahnih, Adika leh Puipuii te chu kawtah an lo infiam a, an bulah zawhte a awm bawk a, "Puipui, Ni Mami a awm em?" ka tih chuan an lo hawi chhuak a, an mitmeng pawisawi lo zet chu hlauhna leh mak tihna in a thlak thleng thuai a, Ni Mami a awm lo tih ka hre ru reng tho a, min ngaihven theih nan a zawt ka ni. 

"Boomer" an ti a, ka zawhna pawh min chhang lo. Puipuii chu inchhungah tlan lutin rei vak lo hnuah nula pakhat nen an lo chhuak leh a, Boomer-a u a nia, kan inhre ve vak lo thung. 

An unau a an en ţhap lai chuan "Mi en nawm turin a mi min chah thlak a?" ka beng zawnah a rawn phun bul bul a, tur khaiin kan hmaa mite chu a melh a, Adika te unau chuan chet sawn nachang pawh an hre lo. 

"Lo lut rawh u" an upa ber nula in a tih takah chuan Vanmalsawma chu ka pawt a, a ţang ve deuh na a min zui ve dat dat tho a. 

Inchhunga kan luh ve chuan Adika u nula, Vanneihi chuan phone a hmang a, a biak tur awm ang pawh ka hrethiam mai. Vanmalsawma a hmuh ruala a ţap hauh lo te kha mak ka ti lehling zawk a, keimah anga ţah mai awlsam chi a ni lo a nih hmel. 

Sofa ah kan thu dun ral a, a u Faktei te ina hruai tur angin ka insawi a, Boomer te inah ka hruai dawn tih a hre hauh lo. Thinrim angin a awm duh lo na a sir lam aţang ringawt pawhin a hmel chu a lang chang rut a, min en duh lova, a ţawng duh tawh lo bawk. 

Kan kalna ber te lah chuan min en ţhap reng a, a naupang zual pahnih phei chu kan hmazawnah an tei sek a, ka bula ţhu pa hi an pawh chak a, an ngam chiah si lo a nih hmel. 

Puipuii chu a men deuh par a, puitling tumah an awm si lo, min dawng sawng thiam lo a ni ber e. Kan ngawi tlawk tlawk hlawm a, kan ngaihtuahna ţheuh kan kawm ang ka ring. Boomer-a u chiah Vanneihi pawh chuan a lo en uluk khawp a, a phone a rik leh tak avangin min kalsan leh rih a, kan hriat laia a biak ngam loh danah a pawimawh viau aniang. 

"Kal ang" a din rualin ka ban rek a rawn hmer chawt a, a thinrim hmel lehzual tawh a, kan awmna hmun chu a ngaina lo tih a hmel en ringawt pawhin a hriat theih. 

"A ngai lo..i u Faktei pawh a lo haw ţep tawh ang" ka ti ve tlat a, ka kut awl lamin a ban ka vuan bet tlat a, ka tho mai duh lo. 

"I duh leh awm rawh keichu ka kal dawn" a ti rum ul tawh a, a mitmeng thip ram te chu ka hlau seng tawh lo, "U Faktei tal nghakchhuak ang" ngenngawl takin ka ti a, beisei nei zet a ka en laiin ka kut a thlah a, a kal chhuak nghal nul nul bawk.

"Vanmalsawm" tih vak pah a umzui ka tum chu Boomer-a u Vanneihi chuan "Engtin maw i koh?" tih leh ka kawr a pawh a rual a, phawk hrain min en a, thil thleng mek chu mak an tihzia an hmelah a lang reng a, ka lo hrilh lawk lo kha ka inchhir rum rum mai. 

"Tuna mi kha Vanmalsawma a nih kha" zawitea ka tih chuan a kut awl lamin a hmui a hup a, a mittui pawh a tling pam tawh mai. 

"Khawia mi nge? Engtin nge a nih theih? Khawiah nge amah kha?" a ti mawlh mawlh a, a chiai ti tih der ni maiin ka hria. 

"Khapa kha tu nge?" a ti leh a, Adika leh Puipuii phei chu pawnah an tlan chhuak leh daih tawh. 

"Vanmalsawma a ni tih ka hria a, a chanchin ka hre tam lo. Aizawla kan inluahna vengah an awm ve a, shillong ah an awm ţhin" tih thleng chiah ka sawi a, thil dang chu sawi tel kher a ţulin ka hre lo a ni. 

"Inang i ti ve em?" a ti sep a, a mittui a tlak mai hlau niawm takin a khap sak sak a, an khawhar zual lai tak tur a ni bawk nen, a khawngaihthlak takzet a ni. 

Kei ai maha mak a tih hmel zawk avang chuan "Eng emaw hriat i nei miah lo mi?" ka ti ta thlawt a, lu a thing a, pawn lam bawk chu a melh leh ţhin a, i unaupa alawm ka ti dawt ngam bik si lo chuan "Ni Mami pawh a hria" ka ti ta ringawt a. 

A hma ai mahin mak a tih hmel lehzual zawk a, "Engmaw?" a ti tak na a ka thusawi chu a hrechiang lutuk tlat a ni.

"Vanmalsawma hian ni Mami hi a hria a, mahse Ni Mami zawk hian a hre tawh lo a nih ka ring. U Faktei a tia" ban deuh charh a ka tih chuan ka banah a pawt lawk a, min hnuk nghal dawr dawrin pindan pakhatah min luhpui a, U Daizaui pindan ţhin kha a ni tih ka hre nghal mai. 

"Ni Mami chu engtin nge a hriat?" zawi angreng tak hian a ti a, thu thin ţhawng tak takin a deng ngun tawh nge ka hre lo rin ai takin a inthunun thei a, a vai ve ruai tho nain nikhaw hrelo a a tlu tawp lo hi a hahdamthlak hrim hrim. 

"U Faktei a ti" ka ti nawn leh ngat a ,ni Mami hmingpum ka hriat duh vang a ni.

"Lalfakawmi alawm..engtin nge ka ni a hriat daih theih? Boomer nen lah an inang ropui si, inang satliah ringawt a ni lo, ka hmuh phat aţang khan keimahah hian engemaw awm a awm. Mi chuan in ang ti tho siin an kal pel thei zel ang a, mak an tih pawhin reilote chhung chauh a ni ang, mahse ka nau nen an hmel a inang chiah a, ka ni a hre bawk a, a mak hle mai" a ti a, chhuat dungah chuan a vei tawn sek a, a chang leh a sam a hui a, a chang leh a hmai a tuai a, ka ban a a vawn khan a tha khurh nasat zia ka hre thei bawk. A aw pawh a pangai chuang lo. 

"Nichin khan tu nge i biak?" a rilru lak pen nan ka lo ti a, tukverh bulah dingin ka kawrlum ipte ka zen a, a che vel chu ka en ran a, Vanmalsawma kha chu ka ngaihtuah hran lo; ka telloin a let dawn lo tih ka hrechiang lutuk tlat. 

"Ni Mami" a ti mawl tawp a, kei hi dil chhut ve tak mai ka nia, chuvang chuan "I hrilh em ni?" ka lo ti leh a, a bu nghat a, ka bulah a rawn ding ve ta nge nge a. 

"Restaurant ah ka hmu a, min hai aniang a ti" a ti a, "Nih chu mawle" ka ti ve tak na a kum 15 ngawt a lo awm tawh chuan a hai ka ring thei hlawl lo a ni. Vanmalsawma berkher a ni lehnghal. 

"Sensiar ka rindan hi a dik tiraw?" a ti teh ngawt a, a rindan min hrilh kher lo mah se lu ka bu zauh a, a lo thaw hak ringawt a. 

"Hriat i nei miah lo em ni? Eng emaw hriat belh ka neih theih mial takin tiin ka lo hruai a nih hi" ka tih laiin ka phone a ri a, phun hlak chungin ka en a, Vanmalsawma a lo ni. 

"Minute 5" a rawn ti bul hmuk a, "Eng nge chu chu?" a ngaihna hre lo zet a ka tih chuan "Minute 5 ka nghak ang che, i lo chhuah loh chuan ka haw ang" a ti nghut a, phone a ti tawp zui nghal a, U Vanneihi chu beisei nei deuhin ka en a, a la chiai nasa bawk nen, lu a lo thing ringawt a. 

"Boomer chu a ni lo, mahse Vanmalsawma tho a nia, phir an ni. Hriat belh zel ka chak a, chhui zui pawh ka duh. Mahse tih theih ka nei tlem sia class ţan hunah phei chuan Aizawlah ka awm leh daih ang a" ka tih laiin Ni Mami a lo lut a, engkhaw sawi set set lovin ka hmaiah min beng sawk mai. A thinrim hmel em em mai lehnghal a, a awm chet dan hmangah a thaw a rang hle tih a hriat a, a kut a hum ruh nasa viau bawk.

"I u vangin buaina hrang hrangah a inhnam hnawih a, a natna pai hriatpui thlap chungin buai naah a hnuk lut fo a, a tih atana rem lo a tihpui chang a tam lutuk. Tunah amah ang tak i rawn hruai a, kan rilru hneh tumin em ni heng thil hi i tih a? Ka u lo haw hmain kalpui vat rawh" sehchilh zet hian a ti a, ka hmuh dan a dik tawh lo a, dawtsawiah ka ngai vek tawh. 

"A hria che alawm" ka ti ve tlat a, a kut a lek chhuah leh rual chuan ka lo indang ve nasa a, mahse min khawih tawh em lovin a sam a tuai a, a hmui a pet zauh bawk a. 

"Ani pawn anpui a nei a, keipawn anpui ka nei ve tihna a ni mai alawm. Kal pui la lo let tawh suh u" a ti a, ka mit a min en te chuan hlauhnain min ţhâm a, ka sawithiam lo, amah tawp hian awm a ti nuam lo a ni ber. 

"Nî, engati nge i thinrim ringawt a? Ka nau khan phir pui a lo nei reng a ni thei a, eng emaw hriat i nei ve a nih chuan sawichhuah hun tak zawk a ni. Sensiar, Aizawlah maw an awm? A nu leh pate hian a sen laiin an ru tihna a ni em? Awii keichu ka ngaihtuahna a buai vek tawh" U Vanneihi zawk chuan a ti nawk nawk a, a mitmeng te chu a ruak huai a, ţap mai tur te pawh a ang. 

"Engmah sawi tur ka nei lo, haw la lokal leh tawh suh. In unau hian ka hmu peih hlawl lo che u" ni Mami chuan a ti a, kawngka lam a kawk va bawk a.

"Kan chhungkaw chunga vanduaina thlentu ang riakah a nia ka ngaih che u. Hriat duh engpawh nei la kan inchhungah chuan rawn zawng tawh suh, hriat kan nei lova, i duh ang hrilh tur che kan nei lo" huat hmel zet a min en chung hian a ti leh a, "Chhuak rawh" tih paha ka kawr a pawh leh dawrh takah chuan min ben leh mai hlauin ka chhuak a, U Vanneihin min umzui thung a. 

Kawngkapui ka pelh rual a "I phone number min pe rawh" a rawn tih chuan ka hawi let a, a phone chu ka kutah min hmeh bel chawt chawt a. 

"Ni Mami hi a dam lo. Tun hma a ang tawh lo, amaha phun mawlh mawlh te a ching a, i rawn hruai pa pawh kha amah zawk hian a hre tawh lo aniang. Lo ngai haw lo ula, dam ţha se chu kei aiin a lo lawm zawk ang che u" tiin thupha a chawi mawlh mawlh a, Boomer-a thihna khan a la nghawng a nih ka ring a, kan hmangaih tak te thihna hi chu damloh pui tham a ni reng a ni. 

"Ka lo call nghal ang che" tih pahin phone ka pe let a, ka phone ka phawrh ve thung a, a ring veleh ka hmet tawp a, "Ka number kha lo save ve rawh" ka ti zui zat a. 

"Mamawh leh hriat duh ka neih chuan ka lo be ţhin ang che. Sawichhuah ka hreh viau na a a pawimawh bawk sia, U Daizaui in hnena a awm lai khan ni Mami leh Pa Muana te inhau thawm a hre ru ţhin a, i nau damlai reng pawh khan 'Vanmalsawma a thi tawh Ni Mami'n a ti ţhin' a ti a" ka tih lai mekin ni Mami chu kawngka bulah a rawn ding a, a mithnuai val kual raih chuan a ti hlauhawm a, ka phu zawk nghe nghe a ni. 

Awmze nei deuhin U Vanneihi chu ka melh a, a hrethiam kher angem phei chu ka hre lo. A kut ka vawn lai chuan "Ka tha a khur nasa lutuk a, gate pawnah chuan ka lo chhuak ve kher tawh lo ang" a ti a, a nui hul hak a, ka khawngaih reuh kher mai. 

"Hotel kan ti tawp ţep tawh a, mikhual kan thleng thei tawh lo" Ni Mami'n a lo tih ve chuan ka melh ralh ngam chauh a, U Vanneihi kut chu thlahin gate pawnah ka chhuak ta nge nge a. 

Ka thil hmuh avang chuan ka ding chawt mai!

Kawngpui chhak lam leh thlang lamah rin ngil a awm a, a lai takah rin bial a awm thung a, rin bial chhungah chuan bucket tui chhun khah vek a inhung a, a bulah Vanmalsawma chu a hmel lang thei lo khawpa helmet phui khumin a kun ngul a, tiang a keng bawk. 

"Vawi sawm vir tur aw Boomer" Adikan a ti lauh a, Vanmalsawma lah chuan tiang chu leiah a nghat a, kun reng chung chuan tiang bul lam leh helmet chu a nawr si ve thung a, "Hmawlh kha i lu in a sik reng loh chuan i vir ţha leh ang" Puipuiin a lo ti ve a, a nui har har bawk. Boomer-a naute an nia, an sang ve viau tawh na a an kum a la tlem khawp mai. 

Vanmalsawma pawh chu a vir ve nghal mai a, vawi sawm an tih lauh hnuah a ding ngil a, a pai khut khut mai. Tiang a paih a, bucket chu khai ve thungin thlang lam zawka rin ngil chu a pan a, a kal pai nasa lutuk chu enin Adika leh Puipuii te an nui bawk bawk a, rilru kap tu nei lian viau mah ila keipawh ka nui ve tawp. 

A rawn let lamin min hmuh theih nan ka lo ding lang ve a, min hmu ta aniang bucket chu paihin chak deuhin min rawn pan a, kal pawh a kal pai tawh lo. 

"Eng nge i lo tih?" mitmenga chhaih paha ka tih chuan helmet hma chu a nawr chho a, min melh no lo nasa mai. 

"Nau awm turin em ni helai hmunah hian min hruai?" zawi si, chang zet si hian a ti a, Puipuii leh Adika te lah chu a bulah an rawn ding ve vat a. 

"Puipui, i nau hi lo va luhpui la nakinah kan lo leng leh ang aw. Tunah chuan Boomer hian haw a duh tawh a" ka tih chuan tlem a la nau lehzual zawk Adika chuan "Hei hi kan in alawm" a ti a, an in chu a kawk a, ning tih hriat zeta Vanmalsawma lo thaw hak chu ka melh hrâk a, "Nau awm turin ka zui lo che" a ti hmak a, a bike dahna lamah a kal ta daih a. 

Puipuii leh Adika te unau inkai chu enin za lo deuhin ka nui a, an hrilhhai lutuk hmel chu hmuh a hrehawm takzet a ni. Adika zawk phei chuan Vanmalsawma chu a enzui tlawk tlawk a, a ţah a chhuah hmel bawk si, nichin lawka an hlim hmel kha tunah chuan hmuh tur a awm tawh lo.

"Adik nakinah kan lo leng leh ang aw. Boomer kha a buai deuh hlek a, Aizawl a kal a ngai a, mahse a lo haw leh vat ang" ti a thiam dan tawk a ka thlem laiin "Puipui i nau nen khan lo lut nghal rawh u" Ni Mami'n a rawn ti a, a vin em em mai lehnghal. 

"Naktukah a lo haw lehnghal dawn em?" Adika chuan a ti ta reuh a, beisei nei zet a min en avang chuan lu ka bu zauh a, naupang dawt ka hrilh ta ringawt chu a nia, a zia lo lam hret chu a ni. 

"Boomer a ni lo" Puipuii chuan a ti ve thung a, thil a hrethiam deuh hlek tawh a, a u chu a thi tawh tih chiang takin a hre bawk. 

"Boomer alawm" Adikan a tih chuan "Boomer chuan min hau ngai lo" a ti a, a nau chu gate chhungah luhpuiin gate chu a kalh nghal a, Adika mawlh chu ka lainat khawp mai. 

"Ka rawn chhuah hma zawng pawn i lo infiampui a, min hmuh veleh a khatianga tih hmuk hmuk kha a ngai kher hleinem" bike a a ţhu lai chu a ngal ah ka tlawh a, ka awki pawh a sang ţha khawp mai. 

"Lawn rawh" a ti hmuk a, bike a ti nung zui nghal a, "Ka hmuh laia naupang infiampui i zak em ni a? An u nen in inang em a an ngaina ve che a nih kha. Khawngaihna nei lo lutuk mai" ka tih chuan ka thusawi chu hrechiang lo ang hrim hian a mit a kan uk a, "Ka awm loh lai zawng pawn i lo infiampui a, min hmuh veleh i kalsan hmak a, i la vin em em zui" ka ti nawn leh a, ka ngaihdan a ni lo tak tak a, amah ang tak a awm ve tih a hre thut a, a tan chuan pawm a har dawn. Chuta karah a hmel anpui pa te in ngeiah ka hruai a, awm thiam a har ve viau ang mah se ka awm tak avanga bucket a paih bur te kha ka ngaithei lo. 

"I lawn dawn nge dawn lo" a ti nghut a, duhthlan tur dang nei ta lo chu bike hnungah chuan ka lawn ve mai a, ka ţhu fel awrh tihah chak tawkin min tlanchhuahpui a nih chu mawle! Ka ţe ţhat a, a kawngah nghet zetin ka kuah bawk a, ka sam te chu thliin a chhem phe hlawp hlawp ni berin ka hria. Hotel awmna lah chu a fal deuh avangin khualzin phur sumo tih loh chu motor vei vak a tlem a, zan lamah truck an tlan leh tawp a, "Tlan muang rawh" ti engang mah ila ka thusawi chu hre lo ang hmakin a awm a, a tlanmuang duh chuang lo. Men pawh ka meng ngam tawh lova, ka hlau lutuk chu ka za chhuak vek ni berin ka hria. 

A ding thut a, ka la kang awk zui. Nghet deuhin ka la kuah reng a, chet sawn mai nachang pawh ka hre lo. Ka meng chiah tihah bike chu a tawlh leh a, nghet deuhin ka chhing lehnghal a, hetiang a nih chuan vawikhatmah a bike ah ka chuang tawh lovang ka ti rilru mawlh mawlh bawk. 

"Chhuk rawh" a tih rualin bike chu a ding a, thawm a reh nghal dûk bawk a, muangchangin ka che a, ka hlauhnain min la kiansan lo a, ka tha pawh a la khur nasain ka thin a rim hlur mai a ni.

"I va mawl ve" tih vin hlar paha chhuk ka tum chu min lo pui a, a puihna tello a chhuk ka tum nen amah vuan lo chuan ka chhuk hleithei chuang lo. 

"Hrilh lawk lo chein Boomer te inah ka hruai che a, ka thiam loh a ni tih ka pawm hmak. Mahse i awmdan hmuk hmuk khan naupang a ti hrilhhai alawm" ka la ti a, bing deuhin hmalam a thlir a, min chhang tawh dawn lo emaw ka tih hnuah "Ka tel ve duh lo ka tihin an men pur pur zel a, an thu anga ka awm a ngai a nih kha. Kha hmunah khan min hruai dawn tih chu hria ila ka lokal lo ang" helmet phelh pahin a ti vin hluk hluk a, min rawn en a, bike hnung a en leh a, "Khaw nge Pektea helmet?" a tih chuan ka ding ngil nghal awt ni maiin ka hria. 

"Ka theihnghilh daih..kan kalnaah khan a la awm ang inchhungah ka keng lut alawm" ka ti chul a, let leh mai ang a tih ka rin laiin a hmui a pet sawi zauh a, "Zuk la rawh" a ti a, ama helmet zawk chu bike hmaah dahin min en run a, min ti hamhaih lek lek zawk a ni. 

"Keimahin ka kal thei tawh nang a hlat em kha" ka tih lai mekin ka ţhiante thawm ka hria a, ka hawi kual nghal ruai a, thawm awmna lam chu ka pan bawk a, hotel phen aţangin nui har har chungin an lo chhuak a, phone an hum far danah thla an la a nih ka ring. 

Ka rin ve ber Vani chu ka pawt hrang a, midangin ngaihţhat loh hmel taka min lo en te chu hmu reng mah ila ka ngaihven hman rih lo. 

"Boomer te inah ka hruai a, a thin a rimin ka hria. Ka nawr lutuk tih chu ka hria mah se thudik hriat ka duh bawk sia. Adika leh Puipuii te lahin inchhunga ka awm hlanin infiam puiah an lo sawm a, a hnialin Adika a ţap dawn zel sia khawlaiah a lo infiam pui a, min hmuh hnuah naupang pahnih te chu a ti lunghnur ta tho a, kan inhau ve deuh a. Chuan Pektea helmet ka theihnghilh bawk a, min lampui duh tawh lo. Boomer te ina let leh a duh tawh lo ni berin ka hria. Engtin nge maw ka tih dawn ni?" ka tih chuan midang awmna lam a thlek zeuh a, chumi hnuah "Ka sawi duh lo na a keipawn i nawr nasa ka lo tia. Diktak chuan phir pui a nei tih hre lovin kum tam tak chhung a awm a, a hriat ve hnuah lah a phir pui a thi leh tawh bawk si. Vanmalsawma tan hian Pa Muana te chhungkua hmachhawn hi a nuam dawn miah lova, tuna a nu leh pate hi nu leh pa tak tak anga a lo ngaih an ni bawk sia, ka sawithiam lo na a a awmdan tur chu ka hrethiam lutuk. I hrilhfuah fum fe lo lehnghal a, keipawh ni ila ka thin a rim ngawt ang. Engtin lo ti lo mahse nuam lo tihna a nei ngei ngei dawn a, thiam deuhin thlem la, a inpeih hunah a remtihna thlapin hruai zawk la ţha tur a nia" a tih ve chuan "Ni ngawt mai..mahse a thleng vek tawh tho sia, helmet ber chu a ni" ka lo ti a, a let duh tawh dawn lo bur a, bakah a lungawi loh lai chuan ka inphurh tir duh tawh bik lo hrim hrim.

"Pektea nen kan zu lam lawk ang" Vanin a tih chuan ka thawveng huai mai. Pektea a sawm hnuah Vanmalsawma helmet an hawh veleh chhawng a, Vani lah keimah anga haihawt ve tho a nia, "Ipte ka nei si lo, lo keng lawk teh" ti a bike a a lawn hmaa phone min ken tir chu la let lovin an kal ta daih a.

Bike a ţhu chunga min lo la en reng chu "Eng nge?" ka ti bak hlar a, a hmui tih sawi zauh pahin dar a kan uk a, "Min en dan kha ka duh lo" a la ti zawk zui!

"Engtin nge ka en che? Nangmah a nih kha rum deuh a min melh run reng chu" ka tih chuan "Nang ka ti lo che" a ti leh ang lawi a. 

"Kan kalna te min endan kha" a tih chuan "Engtin nge an en che?" ka ti a, a vin tawh lo na a a hmelah chuan a la lungawi loh zia a lang thei tho a ni. 

"Mitthi tho leh angin. Vanram fang tawh hmuhin min hmu" a ti a, a thutak phian lehnghal. 

"Hrethiam ve mai la bangah pawh i hmel ang deuh deuh a intar thluah kha" ka lo tih chuan "Umm..hmuh a nawm lem loh kha" a ti awlsam mai a, "Midang daih min nih tir tum suh" a ti bawk. Mahse, a awmzia ka hre lo thung. 

Vani phone ri chu ka en vat a, Pektea phone aţangin a lo call a nih ka rin laiin 'sakawlh' tih zawng ka hmu a, a lo call tu hming mak lutuk avang chuan ka la duh lo a, a biak duh loh deuh a nih ka rin vang a ni tel bawk. A rawn call nawn leh takah chuan ka la ve ta nge nge a, "Vani, Vanram, ka mut a tui te chuan min ţhen lovin i ngaih ti ţha zawk ta che. Bialpa te muttui lai an ţhen ngawt ngai lo Vante" a rawn ti lung lung a, a aw chu ka hre lutuk, tu nge a nih chian tumin lo call tu number chu ka en nawn ngat a, mahse number aţang ringawt chuan ka hre thei lo. 

"Hmeichhe mut duh chu mipa te hian sleeping beuty kan ti mai zel cheu a, mipa mut duh ve chu min ngaihsak lo in tih loh leh i rui min tia, inţhen a ni zel a" nuihza aw zeta a tih chuan "Tintin" ka lo ti a, ka aw aţang chuan min hriat ve ngei ka ring.

"Min star tawh suh ang che Vanram" a ti a, phone a tawp zui nghal a, an lo in ngaizawng ru ve deuh em maw ni ka ti rilru a, mahniin ka nui deuh put put a, Vani te an lo thlen chuan engmah sawi lovin phone ka pe let a, a inpeih hunah min hrilh ve mai ang chu. Ţhianţha tak tak te inkarah pawh hian thuruk a awm lo thei lo a, zep ruk tlem te an neih avang hian min ring tak tak lova, ţhianţha an ni  lo tihna pawh a ni chuang lo. Tupawh hian eng emaw, midang hriat ve loh tur a zep pakhat tal kan nei ţheuh maithei. Mi kan hriattir duh loh thil hi a awm ve ţhin tlat a ni. 

Vanmalsawma te haw tur kan enliam hnuah kan ţhian ho chuan kan in lam panin ke in kan kal a, kan ti ti pah reng a, kawng pawh a thui lo deuh.

"Tikhan i inhmuh tir tawh a, tun atan chuan a tawk lutuk ringawt. Vanmalsawma pawh khan a ngaihtuah zui reng dawn a, mipa a nia, a sawi reng kher dawn lo a, a ngaihtuah zui dawn tih hre tawp rawh. U Vanneihi pawn a theih ang angin thil awmdan a lo chik ve ang a, nu leh paten sawi duh lo mah se in hre vat thei tho ang" tiin Vani chuan ka hnual loh nan a eng zawngin thu min lak pui tlat a, Ni Mami hian engkim a hriat ka ring a, ka ringhlel tial tial mai. Hotel a ama pindan bik a luh ruk duh hial khawpin a nia ka rinhlelh tawh ni. 

Kan in kan thlen dawn chuan "Min luhpui lawk rawh u. A nih loh chuan min hau ang" ka tih avangin ka ţhiante nen chuan inchhungah kan lut a, ka ute ho leh ka nu leh pate an lo ţhu ţhap a, an zingah chuan Ni Mami pawh a lo tel ve a, an veng leh kan veng a inhlat lo a, min hek turin a lokal a ni ngei ang ka chhungten thinrim hmel taka min en laiin Ni Mami chuan min lo nuih var var a. 

CONT..