VANMALSAWMA-16

VANMALSAWMA-16

(Boruak dangin min deng a, story mood a chen a har khawp mai. Zantin dah ngei ngei ka duh bawk si a, in beisei ka pha kher lo ang a, kap tu nei ran chunga ka tih luih hram hram a nih avangin ka ziah chhiat deuh pawn tunlai chu min lo hrethiam hram hram dawn nia aw)

"In va ti ti muk hmel ve" ban charh a tih pahin Vanin ka vun a piai zeuh a, a thip zek lehnghal. 

Hlauthawng deuhin ka enkual a, ka thinphu lah chu a rangin an hmel en mai pawhin thu lawmawm an khel lo tih a hriat a, min hrethiam ber tur Tintin-a chu ka mitmei ve ngial na a hmui phunin "I chawh" min ti duh lek chauh a, a upa pahnih, U Mala leh U Mama te mawlh chu a ni ka hlauh ni. 

"Ţhu rawh u" ka nu chuan a ti a, an awmna lamah tak phei chuan kan leng tawh lo. Ţhutkhawmna pindan kan hman khat zawk lamah kan inzui phei a, rilruin ka uten min hauh nasat loh nan ka ţawngţai mawlh mawlh a, tih theih dang ka nei tlat lo a ni. 

"Keichu ka hlau e..ngaihtuah lo che ila chu ka haw daih ang" Zualin a ti sa sa a, kan inmelh hrek hrek hlawm a, sawi tur a vang duh ngei mai. 

"A ho e..ngaihzawng nei lo rual pawh i ni tawh lo a, phallo mah se keimahni ang rual chuan kan nei tho tho. Phal se chu vawiin pawh pawn lamah in inhmu kher lo ang a, inchhungah, an hmuh phakah in inkawm thei zawk tur a nia. Pawn lama inhmuh ai chuan a him zawk daih sia" Vanin a lo ti a, ka thlawp zawng tak a ni. An hmuh phak a inkawm phal mai se an rilru pawh a nuam zawk tur a nia. 

"I ute hi chu an hlauhawm ve e, anni pawn mi fate an ngaizawng ve awm tho sia, Sensiari chu ni ila pasal ka nei daih ang" Thartein a lo ti ve thung a, ani hi chu buai buai ai chuan a tawp thlen nghal mai duh chi a ni. 

"Hetiang a nih chuan Vanmalsawma pawn a ning vat ang. Insawiţhaihna lam a ni lo a nia aw, hmeichhe chhungte an khirh viau a, duh huna bialnute an hmuh theih loh chuan mipa hian an ning ve ţhin" Zualin a tih lai chuan kan ţhutna lamah Tintin-a a vei thauh thauh a, a bengah meizial a zep va a, nui ruh ruh chung hian min lo en leh ţhin a, hlauthawng deuh a ka awm chuan a ti lawm zawk emaw tih tur a ni. 

"Laltinkhum rawn intithei vel suh. Engmah i nih bik loh kha. Hauh sim theih a an ngaih tawh loh che avangin an hau ve ngai lo mai mai che a nih kha. Naute rilru hah laia lo nuih vel kha a rilru chhiat thlak lutuk" Vanin a ti hlak hlak a, a sawi dik chiah, ka u awm duh dan chu ka ngei zawng tak a ni. 

"Vanrami hi kawm suh, Vanrami a nih angin a hming chiahin vanram a hnaih a kan ti kan tia lawm, a kawm lui zel che a" ka u in a tih chuan Vani a inpet ruh ţeuh a, fiamthu a inngaizawng der mai mai an nih ka ring. Ka chik ru ran a, in ngaizawng tak tak pawh an ang lo. 

"Laltinkhuma ni ve si eng lal mah i khum awm ka hre lo. Lerh si, rui peih si" Vanin a tih chuan "Vanrammuani i nia, Vanram i han muan bik lo. Vanram a awm sa te i han ti ral ţi zawk ang. Chuvang chuan dam reng rawh" pakhatin a ti let a, an inhnialna naupangchhia lutuk chu ka ngaithla peih tawh lo. Ka ţhutna sofa nghenchhan chu nghengin mit ka chhing a, hlauhna ka nei tlat a, thil ţha lo a thleng dawn niin ka hre tlat bawk a, ka awm a nuam thei lo.

"Daizau thingpui in ila..hei tlangval um hrat ho pawh hian an duh ang. Tui deuhin lum rawh aw Vanrami lerhna thlarau tleuh fai vek thei khawp a tuiin" ka u chuan a ti lung lung a, "A ngai rih lo" ka lo ti vat thung. 

"U Daizau lokal lawk teh" ka tih zawm zat a, kan awmna lai hi a puk deuh a, ka uten min hmu thei chuang lo bawk a tiin ka bula a lo ţhut rual chuan "Ni Mami sawn eng nge a lo tih?" ka ti a.

"Aa..kan inah an lokal a, a bialpa a lo hruai a, an che mawi vak lo bawk a tih vel a sawi" ban charh a tih pahin ka malchunga ka kut dah chu a rawn hum a, "Engtin chiah nge in awm a? Buaina te in va chawk chhuak em ni a?" hlauhthawn hmel tak hian a ti a, ka nuih a za zawk, engtin chiah nge maw min lo sawi ni. 

"Amah zawk a nih kha rawn thinrim chu. Buaina kan siam reng reng hleinem. Thil hriatchian duhin kan kal a, puitling zawk chuan ţha deuhin min lo dawngsawng se engkim a fel ni mai tur a nia" ka tih bai bai laiin U Mala a lo lut a, U Daizaui tho nghal sawk sawk chu ka pawt ţhu leh a, kan chhungkaw zinga mi a ni tawh a, a inthiarfihlim zel kher a ţulin ka hre lo.

"U Mami thusawi kha a dik em?" a ti ram hmak a, kan hmaah dingin kan ţhianho chuan min enkual den den a, police ve si engmah chhui chhuak thei mang si lo a inti khirh ve em em ringawt a.

"Eng nge a sawi pawh kan hre hleinem" ka ti a, ka hlau lo lui ve a ni. 

"I lo va chhuahchhal em ni? I bialpa hian chhungte a nei miah lo tihna em ni a? An chhung zinga va tel tir ţalh i tum em ni?" a ti bawrh bawrh a, nui hak chungin ka ţhiante ka enkual a, U Mala an hlau chu za vak loin an lo ţhen ve a, an hmel a pha dai thung. 

"Chu chu ka kal chhan a ni hleinem. Chhungte chu a nei a, Ni Mami te chhung aiin an awhawm zawk daih. Boomer a boral tawh a, a phir pui tal an hmuh leh theih chuan an awm a nuam sawt anga ka tia anmahni ka ngaihtuah vang liau liauin ka hruai a nih kha" ka ti pang pang a, dawt tlem ka belh hlek hlek na a nuam lo ka tih phah lo nasa mai. 

"Thu i awih loh chuan Aizawlah i awm tawh lo ang" tih zawngin min vau leh tawh a, ka thin a rim leh hlar tawh. 

"Ka pa thu thu a ni mai" ka ti let a, ka u nen a kan inhnial ta reng chu nuam an ti lo aniang chhuanlam fahrah te te siamin ka ţhiante chuan min haw san a, kan gate pawh an la pel em lo ang tihah ka chhungte ho chuan min hual nghal ţhap a, min lainat hmel pu chu tlemte chauh an ni. 

"Hetiang a nih reng chuan kut kan la thlak nge nge ang che. Kan duat che a, i duh apiang kan tih sak che a ngaiah min nei a nih hi. Thu ţha kan hrilh chung che pawh a thu i awih loh luih zel chuan ţawngkamin a daih lo thuai ang. I ţhatna tur a nih phawt chuan kutthlak che ka hreh lo a nia" inla mi tak zet a U Maman a tih chuan hnuai lam bihin hmui ka ti pawrh a, ka samin ka hmai a hliah daih avangin ka hmel a hmu lo thung. 

"Thuawih rawh ka tih kha. Phir an lo nih tak tak phei chuan nang aiin Mami ten an hre zawk daih ang a, ţul an tih leh anmahni'n an ngaihsak mai ang chu. I lo tel ve reng chuan mi pawi i sawi mai dawn a sin" dam thlapa tih pahin ka nu chu ka bulah a lo ţhu a, "I ute hian i tana ţha tur an hre ber a, ka sawi ţhin kha, nakin zela i nawmsak theih nan ngaihzawng nei lova zirlai chiah ngaihtuah rih turin an duh che a" a tih zawm leh a, ka darah a dawm a, ka mit sir zeuh zeuh avangin min en ran tih ka hre thei. Engati nge maw mahni fate a hlauh em em ni? Ka ute nen a inkhat a kan awm leh meuh chuan an thu thuin a awm leh tawh a, an thlem nge an vau pawh ka hre lo ka nu hian an thu hnial a hreh tlat a, ka tawrh phah fo mai. 

"Mipa vanga hauh i ngai ta fo mai hi thil zahthlak tak a ni, ţhenawmten an lo hria ang tih te pawh a hlauhawm alawm. Mipa fel a nih hmel loh lehnghal a, bansan vang vang rawh. A chanchin i lo chhui ve pawh a ngai lo" U Mama bawk chuan a ti leh a, duh aiin thil an hre hnem mah mah tawh. 

"Duhtawk tawh rawh u. A ţul chuan keiman awmdan tur ka hrilh mai ang. Vau vak vak khan awmzia a nei lo. Kal tawh rawh u" tiin ka pa a lo inrawlh a, U Daizaui thawh rualin ka bulah, ka nu ţhut lohna lam zawkah a rawn ţhu a, thla a muang huai huai thei alawm mawle. 

Lungawi lo deuha ka ute an kal darh hnuah ka pa chuan "I nu sawi hmangah in inhriatna a la rei lo a ni awm a, a harsat hmain bansan la a ţha ang. Keichuan ngaihzawng neih ka khap ve bur hran lo a, mahse mi ţha leh fel chauh ni rawh se" a ti ve ta nge nge a, ngaihzawng chungchang min sawipui vawikhatna a ni. Ka pa, pa dam leh ţawng tlem lutuk tak maiin fate hriata chutiang a sawi ve chu a ruk chuan ka zak chem chem a, ka pa ngei pawh hian sawi nuam a ti hauh lo ang. Mahse min hauh hian Vanmalsawma ka ngaihtuah nasa zual sauh zel a, mitthlaah a hmel a cham reng zawk ţhin. Ka chhungte khirh lutuk avang hian hnualin tawt ţun ţhin mah ila an thusawi zawm diak diak tumna ka nei lo thung. Ka thu thu ka ti ve tlat a ni. Midang aia a sual bik vakna ka hre lo bawk. 

Sofa ah chuan ka lo muhil aniang ka harh chu zing a ni tawh emaw tiin ka tho thut a, ka lu lah chu a na em em mai lehnghal a, ka bek dawmin ka ner nang nang a, sana ka en rualin zanriah ei hun vel chiah a ni tih ka hre zui vat bawk a. 

"Luhlul rual an nia, in tih pung pung chuan a hel sauh zawk ang. Kutthlak mah ula awmzia a awm dawn chuang lo. Ţha deuhin thlem ula, zilh ula a zawm zawk ang" ka pa ţawng ri ka hriat chuan ka mu ţha leh sawk sawk a, mitchhingin ka muhil der zui bawk. 

"A zahpuiawm hrim hrim. Naupang emaw kan tih laiin ngaihzawng a nei a, hotel mai bakah Pu Muana te inah te a kalpui duh a nia. Thu ţha dawng ngai lo ang maiin alawm a khawsak ni" U Maman a ti bawrh bawrh a, ka chanchin an lo sawi zui nasa hle a ni. 

"Mizo hian kan ching vak lo na a a kawp luih zel chuan pasal neih tir daih ila a ţha ang. Mi fello a zui reng chuan neih ngei ngei ngaiin a awm dawn a, chu ai chuan kan duhthlan mi fel deuh nei zawk rawh se" U Mama bawk chuan a ti leh a, ka harh tih hriain chu thil chu a sawi chhuak lui vel emaw tih mai tur a ni. An ti tak tak dawn hauh lo a, a thinrim ang vel mai mai a ni tih hre tho mah ila ka thinrim chuan ka kawr hmawr ka ţham khawm a, ka nute telloin Aizawlah ka let daih dawn em maw ni ka ti hial a ni. 

Ka phone nghawr det chu ka en vat a, U Vanneihi hnen aţangin message ka dawng a lo ni, 'Naktukah min lo hmu leh lawk rawh. Thil hriat ka nei' a rawn ti a, ka chhuah theih ka ring chiah tawh lo chuan 'Nangman min lo hmu zawk mai la, ka uten chhuah an phal tawh loh takin' ka tih chuan a remti ve mai a, zanah lah chuan Thartein Vanmalsawma leh hmeichhe pakhat thlalak min lo la thawn zui a, a va hahthlak tak. 

Min lo call nghal zat bawk a, "An inhuat loh hmel ka ti..an thlalak ka enkual a, hmeichhia a tag apiang ka en tel ve zel a, khanu kha ka hmu fuh a" a rawn ti a, phone chu nghet deuhin ka hum a, ka thinphu te chu a dik lo nghal vek a ni ber. 

"Vanmalsawman an thlalak a post maw?" hlauthawng ru taka ka tih chuan "Pakhat chiah, mahse khanu kha chuan a tarlang nasa. Caption zawng zawng nen phei chuan in ngaizawng an ang lutuk" a ti a, amah vangin ka buai em em a, chhungte lahin min hau reng a, rinawm deuh anga insawi chunga midang a lo neih chuan a chak lo khawp ang mawle. 

"Nakinah kan hrechiang mai ang" ka ti a, thil dang sawipui ka tum chuan "Ngaihven ţha rawh aw mipa hi an sual a nia, Vanmalsawma hi i tan a danglam bik tih hre tho mah ila a lerh chuan i natna tur mai mai a nih hi. Ka lo chik ve ţhin a, ngaihven dang nei a ang tih chang ka ngah mai" a la ti zel a, bang nghengin thawk ka la ham ham a, ka ngaihtuahna a buai leh vek tawh a, ka duh ve em avangin Thartei thlalak min lo thawn kha hmuh nuam tak chu a ni lo, finfiahna awm hawt lovin ka hlauthawng ru ngawih ngawih a, zawi deuhin khumah ka lawn kai a, ngaihzawng neih hi ka lo ngaih ţhin dan anga nuam a ni lo tawp mai.

"Zawt kher suh aw...kan inhre ve tawh ting tang sia, min huat phah ang" a tih chuan ka ţhen sak a, chhang lo a ka ngawih tak vang vangah chuan "Ka hlauhthawn pui che a, ka duhsak vang chauh che a hrilh che ka nih hi" a tih leh chuan "Ka hria alawm" ka ti sap a, Vanmalsawma leh kha hmeichhia kha, inhaw lo deuh a an awmdun tur vel ka ngaihtuah te chuan ka chhungril hi a ni ţeuh ka ti mai, a hahdam hlawl lo. 

Thartei nen kan inbiak hnu lawkah min lo call a, "Tu nge i biak?" a rawn ti hmuk a, thikthu nei ve ni awm taka a awm te chu khanu nen an thlalak ka hmuh hma kha chu nise ka lawm ngawt ang. 

"Thartei nen kan inbia, thawm a va tam ve, i lengchhuak em ni a?" ka ti a, rinhlelhna hlirin ka khat tawh a, zawhfiah nghal zel mai ka duh tawh. Khanu chanchin erawh kha chu hmaichhana zawh atan ka khek thung.

"Inah ka awm. I mu tawh em?" a tih chuan "Mu mek" ka ti mawl tawp a, a kalsan ta aniang thawm a reh dûk a, "I ţha em?" a rawn ti a, "I damloh hmel" a tih zawm leh zat a, a aw a min ngaihtuahna langchhuak ve hial te chu hrereng mah ila kha thlalak khan min tibuai zawk tlat tawh. 

"Aw ţha e.." ka tih lai mekin hmeichhe aw hian "Vanmalsawm ka koh vak vak che kha" a rawn ti a, ka inhumruh nghal ţeuh mai.

"Peka te an awm kha" ti a a lo chhan hnuah "Sensiar" a rawn ti leh a, "Umm" tih bakin ka chhang lo. Hmeichhia te, Peka te an awm chuan an inah eng emaw tih khawm an nei tihna a ni mai. Kan khua aţangin an haw chauh a, a peih pawh an peih zawk e a. 

"I biang kha vurin dep rawh a zia deuh ang" min ngaihsak ve ni awm taka a tih te chuan "Engvang ngawtin maw? Khawvawh lai laiin" ka ti vin hlar a, a nui hawk thawm te chuan min ti thinrim zual sauh a ni ber. 

"A sen vek kha..an beng che tih ka hria alawm" a ti a, hepa hi a va mak tak. A hlimchhawnah khan hria angin a awm duh miah lo a tun a taka han sawichhuah leh vel te chu a. 

"Min hrilh vat ta che" vin zetin ka la ti tho a, thikna hian mihring a sawisa hneh thei khawp mai, an hlim poh leh kan lo thinrim a, awmzia a awm ngai der si lo. Mahni inhremna chauh a ni. 

"Ka hrilh che hi" nuihzat hmel taka a tih chuan "In haw hnuah chauh alawm min hrilh. In tlan rei em?" ka ti a, ka aw pawh a la dam chuang lo.

"Darkar thum pawh a tling lo" a ti a, kalkawnga an chawlh loh phei chuan a ni tak tak ang, an tlanchak thei ropui mai sia, him dam taka an thleng thei pawh hi a ţha ve hrim hrim. 

"Tikhan nuam deuhin hmang rawh. Ka mu tawh dawn" ka tih te chuan min dan pawh a tum lo, "I hmai chu dep rawh aw" a ti a, ngaihţhat lohna nei ang pawn a awm lo. Ka lungawi lo tih chu a hriat ruk tho ka ring, ka biang thip leh sa hat hat pawh hre lo ang hmakin a awm a, a lo hre ran tho a, a rukin min chik viau ţhin em maw ni te ka ti. 

"Englo" ka ti leh ang lawi a, "Eng nge?" a tih chuan Thartein a bialpa nen an tih ţhin dan hman a min hrilh tawh kha hrechhuakin "Ka ţhiante chuan bialpa an neih hian instagram leh facebook thlengin an email leh password te an inhrilh vek zel a, ti ve ang ka tihna ni lovin eng nge i ngaihdan?" ka ti a, he thil hi ka ţhiannuin min hrilh tirh khan mak ka ti viau a, tih ve ka beisei avanga hrilh ka ni lo tak tak a, ţul ka tih vak loh thil te zinga mi a ni. 

"A ţha lo..chubak ngaihdan dang ka nei lo" a ti a, ka inlet thak a, bang en ran chung chuan "Eng nge in tih hrim hrim a?" ka ti leh a, thinrim mah ila phone ka la ti tawp phal chiah lo a, ka thlalak hmuh erawh kha chu ka la zawt dawn khawp. Hmeichhe dang nen min han kawp vel se chu thih chak hial khawpin na dawn mah ila ka ţhen lui tho ang. 

"Ka ţhiante hian lenna tur dang an hre lo" nui hawk chung hian a ti a, eng engmaw kan sawi kual a, a tawpah phei chuan "Allergy i nei em?" te ka ti ta vel a. 

"Pa ka ei thei lo" a tih chuan ka nui hak a, phir pawh hian danglamna an lo nei ve ţhin tho a nih hi. Boomer kha chuan pa (mushroom) hi a duhin ni Mami pawhin a leisak fo ţhin kha a nia, Ni Mami ka ngaihtuah chhuah chuan thawk ka la halh a, a hmel rapawm zet leh verther deuh a a nui vel te kha mitthlaah a cham reng mai. 

Ka mut meuh chuan dar12 a ri thuak tawh a, U Daizaui pawh a muttui tawh khawp mai. Tukverh inkalh ţhat leh ţhat loh endik pahin Ngaihtei pindan chu ka thlir tel pah leh kher a, a la eng ut a, awm an la awm a nih ka ring. A ruang tal hmuh tur awm se chu a chhungte rilru pawh a dam deuh tur hi a nia, ruang takngial pawh hmuh tur awm lovin a reh vang vang mai chu a nia. An sawi hrang viau na a kan pindan a inzawn chiah chung hian eng thlahrang mah ka hmu ve thei lo thung a. 

Ka mu ţha hle hle lai chu tuemaw hian hnunglam aţangin nghet deuhin min kuah a, thei leh thei lo min kuah tu ka en chuan Ngaihtei a lo ni. A nui sang na a a hmel chu ka rap deuh tlat a, mangang zetin tal chiam mah ila min kuahna aţang chuan ka tal chhuak thei lo. Ka au vak vak a, ka nu ka au a, ka au ri te chu tuman an hre thei lo. Ka harh fim vek a, ka taksa a che thei miah lo thung a, hrehawm tih ringawt hian ka awmdan chu a sawifiah zo kher lovang. 

"Sensiar" ti a min ko mawlh mawlh chungin U Daizaui chuan min sawi nawk nawk a, ka mumang nge a tak tak ka ti dawn zawk? Kha thil hrehawm lutuk ata kha ka harhchhuak chiah chu boruak ka hip kawk a, "I rum nasa lutuk a" ngaihţhat loh hmel zetin lo ti mah se U Daizaui ngei ka hmu ta chu ka hahdam nghal sawng sawng thei hial a ni. 

Ka mut lah chu a chhuak em em a, ka muhil ngam tawh bawk si lo, U Daizaui pawh chu a hlauthawng aniang mit ka chhin hlek chuan min ko nghal zel a, ka kawr awma ţhamin hneh zetin min sawi leh nawk ţhin bawk. 

Ngaihtei ka ngaihtuah nasat lutuk avangin ka mang phan a nih ka ring a, ngaihtuah vak loh ka tum ruh tawh hle nghe nghe a ni. Thawh veleh a ka nu hnena ka awmdan ka sawi chuan "I maimizial a nih chu" min ti a, "Mumang ti ila a tak tak a ang lutuk a, a  tak a thleng ang vekin a awm na a ka au ri in hre thei lova, ka tal chiam lahin ka talchhuak thei mang si lo a" ka tih leh pawh chuan "Aw..maimizial a nih chu. Taksa chak loh lai te hian a awm duh bik a, thil ei ţha la, thau hlauh vanga eitur a inhrek vak vak te hi a ţha lo" a ti a, thingpui ka siam malh malh lai chuan "Kezungpui tih chet a ţha an tia, nizan anga i awm leh a nih chuan i kezungpui i ti che vat dawn nia" a lo la ti zel a, ka vawikhat awmna takmeuh a nia, ka hlau takzet a ni.

"Keipawh ka awm tawh alawm. Kei phei chu dek ka haw sia, i pa hian min lo dek vak tawh a, a hrehawm duh teh a nia. Mut hlum a awl te an tia, ka sawi ang chuan ti ziah tawh rawh" a ti leh a, khatiang khan ka awm leh ang tih mawlh mai chu ka hlau a, a tak tak a ang ropui bawk si nen, Ngaihtei ngat phei chu ka hmu duh tawh lo hrim hrim. 

Chhunah U Vanneihi chu a lo leng ngei a, vanneihthlak deuhin ka ute ho an awm lo hlauh. Ka pa hoin U Mala te inah an leng phei a, U Mala nupui te chhung lamin chhiat an tawh vang a ni. Khawdang a mi daih mah nise a mawiah an ti aniang an vaiin an kal a, ka nu leh ka pi nen chiaha kan awm chu ka zangkhai ve vah mai. 

"Lo kal rawh ka pindanah kal daih ang, hetah chuan ka pi'n tv a en ring emai" ka ti ve zaih a, a kutah ka kai nghal zat bawk a. 

Kailawn a ka chhohpui lai te chuan "Pawnah tal kan awm lo a ni. Mi pindan a luh tawp chu a nuam lo e" a ti nang nang a, "Nangpawn pindanah min luhpui tho kha" naupangchhia zet hian ka ti a, a thil lo ken ka enchak tawh lutuk chu ka za zek zek a ni ber.

"Heng ho hi Ni Mami thingrem mawnga ka hmuh a nia, nizan hotel a a kal hlanin ka hai nasa alawm" tih pahin bag chu khumah a bun a, thlalak leh notebook te, naupang thawmhnaw te a ni nawk mai.

"A hrechhuak palh ange aw" ngaihţha zan lo a ka tih chuan "Hrechhuak vat maithei mah se heng ho hi lo dahţha tlat rawh. Hei bak hi hmuh theih ka nei lo" a ti a, thlalak bik chu lek kan pahin khumah a ţhu a, keipawh a bulah amah si chet a ţhu ve nghal vatin thlalak chu ka en ve a. 

"Hei hi Ni Mami a nia" tih pahin a lai taka ding chu min kawhhmuh a, "Dinglama ding te hi ka nu leh pate an nia, vei lama ding te pahnih hi tu te nge an nih ka hre lo" a tih chuan uluk deuhin ka lo en ve ngial a, thlalak chu a hlui tawhin Pa Muana te pawh chu thlalak a an hmel leh tuna an hmel chu inang tawh lo tak a ni. 

"Nangpawn i hriat loh chu kei phei chuan ka hre awm lo" ka ti a, a thil lo ken ho chu enkual lehin "Awlsam deuh a i nei thei hi a mak e" ka ti chhuak sap a. 

"Ka hmu fo tawh alawm..ngaihţhat lohna ka nei ngai lem lo a, diary hi chu ka vawikhat hmuhna a ni ve tho a, mahse thil dang hi chu ka hmu ngun mai. Ni Mami nen hian a pindan kan tifel dun ţhin a, ka lo en liam mai zel a, naupang kawr pawh hi Adika te nausen lai kawr a nih ka ring a, mahse i rawn hruai pa kha ka hrechiang chak tlat a, ka ngaihtuah nasat luatah nizan phei chu mumangah ka hmu nasa mai. Engkim hian ţangkaina a neih vek ka ring a, ka hmuh theih ang zawng zawng ka lo la a nih hi. A ţangkai kher lo maithei bawk a" inringtawk lo zet hian a ti a, a thil lo ken hlui deuh deuh tawh ho chu ka enkual a, ka beisei a pha bik lo, thuruk zawng zawng pho lang vek thei thil a neih ka ring a nia. 

"Daizaui khan ka pa leh ka ni ten Vanmalsawma chanchin an sawi a hre ţhin i ti tiraw?" a tih chuan ka lo buk khum nghat a, "A nih chuan hre tur an awm reng alawm" a ti awlsam et a. 

"Tu nge?" ka lo tih ve chuan "Ka pa" a ti leh mai a, a ngai awlsam angreng khawp mai. 

"I pa hian a hria ang maw?" ka ti nawn leh ngat a, Pa Muana berkher chu ka ring lo nasa mai. 

"Thil zawng zawng a hre lo a nih pawhin fa phir a neih leh neih loh chu a hria ang chu. Aizawl a in awm tirh a Vanmalsawma i tih pa i hmuh hlim khan chanchin min lo hrilh nghal ni la chu kan hrechhuak vek tawh ang" min dem ni awm taka a tih chuan "Ni Mami ka hrilh chiang alawm" ka lo ti vat a, mak a tih hmel deuh avang chuan ka hrilhfiah a, "Hun kal tawh chu tih danglam theih a ni tawh lo a" a ti ta ringawt a. 

"Boomer kha khawiah nge a pian?" ka tih chuan awlsam deuh hian "Shillong ah" a ti a, ka mak ti hmel te chu a hmu lo aniang a thil lo ken, naupang inkhualtelemna tur ni awm tak tak ho chu a khawih kual a, diary chu a hlui deuh tawh vang nge keu kan tum lo ve ve a, mimal thil deuh ni a kan hriat vang te pawh a ni mahna. 

"Engtikah nge Aizawlah in chhoh ang?" a tih chuan "Karlehah chuan a ngai tawh ang" ka ti a, kan thil tih dun zel dan tur te kan ti ti dun reng hnuah min haw san a, a thil lo ken ve ho deuh deuh ho lah chu ka kutah a dah vek lehnghal a, ni Mami kan hlau viau tak na a hrechhuak mah se heng ho kher hi chu a ui lo viau maithei, kan lo kawl ve duh hi a lawm zawk ang tih tur khawpa nawi a ni. 

Aizawl a kan chhoh dawn ni chuan Vanmalsawma ka hrilh a, "Ka lo hmuak ang che" a ti ve ngei a, keipawh ka phur khawp mai. Kan khuaa ka ute uapna hnuaia awm ai chuan Aizawl a kan in luaha zalen deuh a awm ka chak tawh zawk. 

'In chhuak tawh em? Diary kha ka niin a zawng a, a pawimawh deuh aniang ka lo la leh lawk dawn mawni le ka hlau deuh a' ti a U Vanneihin message min lo thawn chuan thui deuh kan tlan hman tawh. Keini pahnih thil chhui tum hi kan va han nawi dun tak. Lehlam zawnga ngaihtuah chuan a nuihzathlak zawk. Kan zawnchhuah awlsam theihna tur ber min dil let leh chu a nia, a thil rawn ken zinga lak tlak ve ber a ni lehnghal. Kan detective dan hi a ho riau a ni. 

'Kan thleng thui tawh lutuk chhuanlam lo siam mai rawh. Ka xerox tir ang a ka lo thawn let ang che' ka ti a, amah ber berin chhiar turin min hrilh a, a tlak nasat tawh em avangin ka la chhiar peih lo kha a nia. Min sawi hmuh reng a, chhiar chakna ka neih veleh min dil leh a, ka chhiar ve tur a awm hma loh chu thawn let ka tum lo bur. 

'Aw...ka lo zawnpui zel rih mai ang. Min ringhlel deuh a, min en uluk thei tehmai a nia. I thlen veleh xerox la naktukah lo thawn rawh' a ti a, a indawt dana remkhawm fe a ngai dawn a, a chhah ţha angreng si, a hautak viau ang le. 

Aizawl a kan veng kan tih ve kan lut chiah chu car tukverh glass ka down a, thlifim te chuan dam deuhin ka hmai vun an chhem vawt seng seng a, min hmangaih bik riau ni tein ka hria a, a hahdamthlak a, ka thlamuang huai huai bawk. 

"Khawpuiah kan awm leh tlawk tlawk dawn chu a nia a peihawm loh khawp mai" ka nu'n a tih te chuan "A nuam ber alawm" ka lo ti vat a, ka pi pawhin min zui veleh a, motor ka chuang thei tawh lo ti reng si hian motor chuan vanga a insawisel awm ka la hre hauh lo. 

Kan gate bula Vanmalsawma te ţhian ho ka hmuh leh lek phei chuan nuam ka ti lehzual a, Thartei thlalak min lo thawn kha chu kan pahnih chiaha kan awm hunah ka la zawt ang. Nu te awm laia thikthu han tih lan vak chu ka hreh a, mizo chu kan rui a nih loh chuan mi hmuhah kan inhau vak ngai lem lova, hei vang hian a ţhiante awm laia han tih deuh pang pang ka hreh a, mi hmuh lohah inhau ila, mi hmuhah chuan inngeih angin awm tlat ila, miin min nuihzat lo ang a, min sawizui na tur an hre vak lo bawk ang. Mizo kan nia, kan incheina chauh lo chuan hnam dang nunzia kan la phak lo a, ruih nei ho lo hi chu khawlai leh midang awm laia inhau vak vak hmuh tur an la vang a, tlem a mi nasa ve deuh an ang tun tun ţhin hi a ni mai. 

Ka pa leh U Rinhlua chiahin min zui a, ka hlauh vak loh ve ve te an ni. Motor pahnihin kan inzui a, Tintin-a bike in a kal thung a, ani phei chu kan hlohna a rei tawh. U Rinhlua ngat phei chu engmah sawi ngai lo tawp ang chi kha a nia, pastor la ni mai tur a nih chu thuhran, mi pawisawi hlau chi a nia, hrehawm ti deuh a ka awm a hlau tih ka hre ran bawk. 

"In lo awm hlauh chu a va tihzia ve...gate kha lo hawng teh u" ka nu'n a ti lauh a, thuawih deuhin gate chu an hawng ve mai a, gate chhunga kan tlan lut chu U Rinhlua ten min zui a, Aizawl leh Vanmalsawma ka hmu leh chu nuam dangdai ve tak chu a ni. A sawi lawk ang ngeiin min lo la hmuak zui. 

"Sawmte bungrua hi min lo thiar pui lawk teh u. Pangpar te ka hawn a, ka awm loh chuan tuman an enkawl ve peih si lo a an thi mai mai dawn a" ka nu chuan a ti deuh ngei a, U Rinhlua mi ţawng mawh lutuk pawhin "Tintin-a kan hloh daih sia, awm se chu a ngai kher lo mawle. Ka nu lah pot chawpin min phurh tir a" tiin thupha a lo chawi a, mahni in a haw tur si kan bawr khawp mai.

"A pawi lo...tha bak neih kan nei hleinem" Vanmalsawman a tih chuan ka melh hrak a, U Rinhlua nui deuh suk ka hmuh phei chuan ka lo zak. 

"Ka pa hi motor a khalh rei deuh chuan a laktlak loh nghal zel a, ka nu a tel ve chuan kan bawr zel bawk si, a hahthlak a nia" ka tih te chuan "Lo va chawl rawh u kan lo ti vek ang" Pektean a lo ti ve thung a, Vanmalsawma chu a fim tih ka hria a, a ţhiante erawh chuan ruih an nei chiang a ni. 

Ka nu'n ka pi a hruai lut a, ka pa erawh chu ka ţhiante pawh be lem lovin inchhungah a lut a, U Rinhlua hoin keinin kan thiar pui ve thung a. 

"Khaw nge Tinkhuma?" an tih chuan "Ruih tur a dap aniang" ka lo ti a, an nuih a za hlawm khawp mai. 

"Zanah lokal ve la" Vanmalsawma chuan zawi sup hian a rawn ti a, "Khawiah maw?" ka lo ti he haw a, zan chhuah hi chu ka la ngam zan lo deuh chu a ni.

"Pektea te inah" a tih rualin Pektea chuan "Ka chhungte zin lawmna kan nei dawn" a lo ti ve a, thil lawm tur te hi an nei maksak thei a nia.

"Ka lo hruai ang che" Vanmalsawma bawk chuan a ti leh a, ka thil tih ţhulh meuhin an ţhian ho chu ka en a, an sual hmel em em vek a, anni ah chuan chhun leh zanin danglamna vak a nei lo a, ka tan mi ţha an ni chiah angem tih te, min ngaihsakna a ti lang khat a, min thlakhlelhna a ti lang ţhin thung a, hei vang hian min duh ve tak tak nge min lem der vel mai mai tih te ka ngaihtuah ve ta hial a. 

CONT..