VANMALSAWMA-17

VANMALSAWMA-17

"Ka lokal ve lovang" ka tih chuan ka lam lo hawiin mit hmul a kan uk a, "Ka lokal ve dawn lo" ka ti nawn leh a, motor hnung aţanga pot a lakchhuah leh hnuah "I thu alawm" a ti hmuk a, bathlarah pot chu a va dah a. 

An ţhian ho jacket chu gate ah a inbang far a, an thiar zawh hnuah U Rinhlua chuan "A lawmawm hle mai thingpui te lo in ula" a ti mawi ve a, ka u in pangai deuha a bia chu ka lawm tak tak a ni. 

"I nau thingpui lum a thlum thei emai" Pekan a tih chuan ka u pawh a nui ve tawp a, a sawm nawn leh a, an lo hnial leh takah chuan inchhungah min luhsan a, ka hoin pawnah chuan kan ding ran mai.

"Sensiar zanin chu?" Pekan a tih leh chuan "Ka lokal ve lo mai ang" ka la ti tlat a, an sawmna apianga ka kal chuan min ngaihnep phah ka hlau ve a ni. 

A ţhiante gate bula an phei laiin ani chu ka bulah motor nghengin a la ding ve a, sawi tur leh zawh duh nei ţeuh siin sawi hmasak tur leh zawh hmasak ber tur pawh ka hre chuang lo. 

"Thil ka hria a mah se nakinah ka hrilh ang che" ka tih chuan "I chhuichhuak tawh mi?" nuih hawk pah hian a lo ti a, a aw a elsenna langchhuak te chu hre ve bawk mah ila ka haw hran lo. 

"Chutiang lam a ni lo. Lo ni ta pawh nise ka sawi ngai lovin thudik chu i hre sa reng alawm" tih paha ka han melh chuan hmui a lo pet sawi zauh a, engmah phei chu a sawi lo. 

"Thudik in min den dan hi a danglam bik ţhin a, i nu leh pate hian engvanga hrilh lo che nge an nih ka hre lo, mahse engmah an sawi lo chung pawh hian thudik chu i hre lutuk tlat" inrintawk ve hmel zet hian ka ti a, ni Mami a hmuh hnu leh Boomer te in a ka hruai hnu ah ngat phei hi chuan a hrechiang tawh dawn lutuk tih ka hria. 

"I chau em?" a ti ta daih a, ka lo nui chhuak hak a, a chanchin sawi hi a duh lo ve thei khawp mai. 

"Chau em em lo..kan khua chu a hnai a, kan thleng zung zung zel a" ka tih laiin Ropuia a lokal a, a nui sang hmel chu hmuh a nuam takzet a ni. 

"In lo haw kha ka hmu cheu a, ka thil tih lai ka tih zawh veleh ka lokal nghal a nih hi" a ti nghal var a, Vanmalsawma chu enin keimah min en leh a, "I chau em?" a ti veleh a, chhanna ngai bawk ka lo pek hnuah "Inchhungah ka nu te an awm a lo va lut rawh keipawh ka lo lut ang, thingpui kan in dawn nia" ka ti zung zung a.

"Aw le..i thingpui lum in leh te pawh a chakawm tawh alawm i bo rei vang vang bawk a" a ti luam a, min kalsan zui nghal a.

"A melh dan che kha a dik lo" Vanmalsawma chuan a lo ti ve khauh a, "Engtin nge min melh?" ti a zawh paha amah ka en chuan rum zetin min lo melh a, thikthu chu a pe chhe ve hle mai, ka haw miah lo lehnghal. 

"Lokal ru thingpui chu va in ang u Peka" a ti lauh a, a hui pah bawk a, "In duh lo a ni lawm ni?" ka tih chuan "Kan in lui thei mai ang" a ti sam then a, min pawt lawkin ka dar tawn tawnah a dawm a, kan in lamah min nawr phei nghal dawt dawt a, "Lawkin Rohlua vang em ni thingpui in in tum leh si a?" ti a din ka tum pawh chuan min nawr kal zel a, "I thingpui lum ka in khat tawh, chuvang zawk chu" a ti ve tak na a ka awih lo nasa mai. 

Inchhunga kan inzui lut ve si chu min lo en ţhap a, U Daizauin thingpui a lo lum mek a, choka lama ka phei chu an ţhianho chuan min zui ve zelin chaw ei dawhkan bulah an ţhu ţhap a, thu an awih ve hmel reuh lutuk chuan nuih te lam lam a ti za thei alawm. 

"U Daizau thingpui khan an pathum hian a la daih em?" ka tih chuan "I lum kan duh" Pektean a lo ti khauh a, an awm duh dan chu naupangchhia viau mah se ka tih sak ta nge nge a. 

Vanmalsawma bulah ka ţhu a, ti ti ho lam te te vawrhin kan nui leh hak hak ţhin a, Rohlua lo ţhu phei ve chu fiamthuin an lo kâp deuh reng a, a huat duh miah loh vang te pawh aniang kan hlim dar dar khawp mai. Kan khuaa kan inchhung boruak uap churh ai chuan a nuam zawk daih. 

Ka inleng te haw hnuah Tintin-a a lo thleng ve a, ka nu'n vin deuha a kalna a lo zawh chuan "Kawngah bak ka kal lo ngaihţha deuh khan awm rawh" a ti a, a pindan a pan zui nghal a. 

"Zu dawrah i chawl kawi em ni a?" tiin ka nu chuan a au zui a, "Nutling pui si zu ringawt ngaihtuah suh" a ti let a, an inhnial zui reng lai chuan dawr bungrua ka buaipui a, muangchangin U Daizaui nen dawrah kan thiar lut a, ka ute khan dawr siam an phal tawh lo na a min rawn hmu pha chuang lo a, min hmu pawh nise ka pa'n a phal chhung chu tih tawp ka tum lo. 

"Rohlua hian a ngaizawng deuh chein ka hria, a fel sia, nei la chu i ti sual lo ngawt ang" dawr chhunga bungraw rem ţhat paha U Daizauin a tih chuan ka lo ner deuh nang a, a fel viau na a Rohlua berkher hi chu ka duh chi a ni lo nasa mai. 

"I ti ang lo e..Rohlua hi chu a fel leh lutuk a a bulah hian inveng ran a awm a ngai a, ani ang fel lutuk mah mah bula awm chu a hrehawm alawm. Chet sual hlau reng rengin ka awm ang a, kawm zeuh zeuh chu a nuam a, mahse a bula awm reng chu a peihawm loh" ka ti a, a lo bu nghat nghat a. 

"Ni ve tho mai, inven chu a ngai nasa ve khawp ang. Tam tak phei chuan fel lutuk ho hi chu an khirh an tia, mahse an ni vek chuang lo a, Rohlua pawh i ngaih anga khirh a ni maithei a sin. Vanmalsawma hi chu duh aiin a hawi harh mah mah a, a khawvel riauin ka hria. A lerh ru viau maithei bawk a, siamţhat chawp ngai tur ang kha a nia, i hahdam reng lo maithei a ni" a ti mawlh mawlh a, ngawi rengin chhuarah thil ka rem a, engamah hmaa min duhpui lo vek ringawt chu ka lawm chiah lo. 

Zana dawr a ka awm laiin Vanmalsawma a lokal a, a inchei vak lo chu "Engati nge?" ka lo ti ringawt a. 

"Engmaw?" tiin min zawt let a, kan meng phawk dun viau maithei a ni.

"Aw..Pektea te inah inkal dawn a ni lawm ni?" ka tih chuan lu min thin khum nghutin "Kal lo mai, zanin chu i bulah awm ka duh" a ti a, dawrah chuan a rawn ţhu ve ta reng a. 

"I ţhianten an lo beisei awm che sia" ka ti leh ţhin a, "Ho mai mai" a ti mai zel a, diktak chuan kan pahnih chauh a kan awm lai hian thlalak chungchang kha sawi chhuah ka chak a, ka zawt chak bawk a, mahse tunah hian ka hlim a, kan boruak ţha lai tihchhiat ka hreh rih a ni. 

"Zanin chu mi an reh tak tak a ni..dawr kan hawng tawh tih an hre lo em maw ni?" pawn lam en ran chung hian ka ti a, thawm hriat tur pawh a awm lo a, a reh tlawk tlawk ringawt mai a ni.

"I nu a lo haw em?" ka ti leh tawl a, be ngam dawn lo mah ila hmuh ve hrim hrim ka chak ru riau. 

"Haw e..a kal leh ţep" a ti mai a, eng emaw sawi tuma ka an zuau zuau laiin dawr hmaah Tintin-a a lo ding a, bur inhung thluah chu bawhin tum hmukin a rawn dak lut a, a ruih hmel nasa mai. 

"Vanmalsawm eng nge i lo tih?" bul zeta a tih chuan "I hmuh reng hi" a lo ti a, a chhang duh dah khawp mai. 

"Ka nau hi i rawn rim ve deuh tihna a ni maw?" inla puitling zet hian a ti leh a, Vanmalsawma chu a melh run run a, a huat leh huat loh pawh a hriat theih loh. 

"Pektea te inah zu kal rawh" Vanmalsawma chuan a lo ti ta daih a, "Sensiari hi rim kan la phal chiah lo a, i rim a nih pawhin ţhut hlat deuh la, melh rai te kha i lo tum ang e" a tih chuan ka lo nui hak a, a fiamthu emaw ka tih laiin ka nui chu rum zetin min melh a, a thutak phian lehnghal. 

"Kal mai mai teh" tih pahin a hmaiah ka nam a, min seh tum ang deuhin a la awm zui, eng nge maw a ruih lehpek tawh ni. 

Dawhkana a phone dah a rik chuan ka lo en ve vat a, hmeichhe hming ka hmuh chuan ka nui hmel a ral riai riai ang ka ring. Pangai deuhin a be tak na a ka awm a nuam thei chuang lo a, hmeichhe pakhat nen induh hmel taka thla an lak dunna ka hmuh hnu ngat phei kha chuan ho te teah ka hlauthawng zel tawh. Ka lo van duh awm em em te ka tia, ka indem viau dawn lahin ka duh vanga ngaizawng alawm maw ka nih le ka ti leh ţhin a, mi kan duh tak tak a nih chuan thikthu kan nei ngei ngei turah ka ngai, uchuak tak ni lo thung se la. 

"Eng nge i ngaihtuah?" a rawn tih takah chuan inthing harhin ka nui lui a, an inbiak dan kha ka hre vek a, ngaihţhat lohna tur a awm hauh loh laiin khanu turah khan ka ngai a, thlalak ah hmeichhe hmel kha chiang deuhin a lo lang reng mai. 

"I awmdan a dik lo" ka kut vawn paha a tih chuan "Awihawm loh e" nui hak hak chung hian ka lo ti a, inthup tum viau mah ila "I dik lohna a rei tawh" a ti leh a, chik deuhin min en a, dawt sawi mah ila ka mit aţang ringawt pawh hian a hre thei ang tih tur vel a ni. 

"Engtik aţangin nge ka dik loh a?" ka tih chuan "In khuaa i awm lai aţang tawhin" a ti khauh a, thlalak ka hmuh ni kha a nih ka ring. Min chik ţhin hle si hi ngati nge maw min ngaihsak vul chuk anga a lan duh ngai miah loh le. 

Naupangin thil a rawn lei a, a kalsawn veleh ka kut bawk chu vuan lehin "Han sawi teh" a ti dam thlup chung pawhin ka hre lo der a, "Engmaw?" ka la ti tlat a. 

"I dik loh chhan hi" a ti a, ka kut a vawn lai chu la kangin a fawp zauh a, chu ringawt te chuan min ti lawm a, hmeichhe lungawina hi chu ho deuh a sin. 

"Ngawi reng lovin sawi vat vat rawh" a ti a, a dawhtheihna a tlem leh tawh viau a nih hmel a ţawng pawh a hma aiin a bung leh tawh a, mahse a nui tho. A mizia hi a mak ve ngawt mai. 

"Min thlah phawt la" ka tih te chu min vuan nghet sauh rawh tih ang vel a ni. Min vawnna a thlah dul ruala ka kut lak let ka tum apiangin a vuan nghet leh sauh zel a, kan inpawt tawn reng mai.

"Sawi mai a har viau a mi?" vin lek lek hian a ti a, hreh viau mah ila "Thlalak ka hmu a" ka ti ta nge nge a, tun hnai a an lak tih a hriat a, an inhuat loh hmel hle nghe nghe a nih kha.

"Eng thlalak?" a ti nghut a, a dawhtheih loh zia ka hre tawh a, hmun fal deuhah chuan awm ila min vin nasa viau maithei a ni. 

Ka kut awl lamin phone ka ban a, Thartei thlalak min lo thawn kha a screenshot ang ang khan ka hmuh tir a, chik deuha a en lai chuan keiin a hmel ka en ve thung a, "Hei chiah hi maw?" a ti sup a, ti lui tih hriat zet hian a ţhen suk bawk a. 

"Ni e..ka rin loh vang che a ni lo a nia, hmeichhia chuan thil mak deuh deuh ngaihtuah kual chiam kan hrat a, ka ring che ti reng mah ila hetianga hmeichhe dang nen a in thlalak ka hmuh meuh chuan hlauhthawnna ka nei tho a, ka awmdan tak chu sawifiah turin min ti lui lo la, keipawh hian ka inhrethiam bik lo" mumal lo deuh hian ka ti nawk nawk a, min hnaih zetah ţhuin min en run reng a, zam mai awl ve deuh a sin. 

"Ka ţhiannu a nih hi" zaidam deuh hian a ti a, ka awih chiah loh avang chuan "Kan la hria ang chu. Rin che chu ka duh alawm" ka ti halh a, ka ring pumhlum thei rih lo a, chu erawh ka sawi chhuak duh lem lo thung. 

Min ring rawh pawh ti lem lo chuan "Ropuia kha zui duan duan tawh suh ang che" a ti hmuk a, thu min pe a ni ber.

"Ani chu a inkhawm ţhin a, inkhawm pui tur dang ka nei hleinem. Bakah huat loh hmel deuhin hmeichhia thla a lakpui ve ngai lova" ka tih chuan min melh hlum tum ni awm taka rum hian min melh a, pawisawi lo awm zet hian dar ka lo kan ak ringawt a. 

"Ti tawh suh ti ve mai rawh mipa dang biak ţhat hluak kher a ngai lo" a ti hluk hluk a, ka nuih a za angreng.

"Takzet che hian Vanmalsawm i naupangchhia lutuk" ka ti hluai a, tum bur a min en lai chuan ka lo chek tlak tlak a. 

"Ropuia ka kalpui i duh loh chuan inkhawm ve ţhin mai la" tih zawnga ka kar chuan a kiai suk a, a tum leh vat thung a, "Chhe lo deuh hi chu ngaihtuah in na riau" a ti fiamthu a, kan thusawi inzawm lo lutuk avang te chuan ka nui ta hak hak a, thlalak a hmeichhia chu tu nge a nih ka zawh chuan "Hlutei" a ti a, shillong a chhungkua a awm ve tho an ni a, a chanchin leh an inţhianna chuan min ti buai lem lo, mahse "Aizawlah hian amahin in a luah" a tih takah chuan chu chuan tlemin min ti buai ve deuh a, sawi chhuak lo mahin tun a ka ngaih anga min chik ţhin a nih chuan ka hmel landan aţangin a hrethiam tho ang. 

"Engpawh chu nise ball ka ni lo tih hria la aw" ka tih chuan a hriatthiam loh hmel viau a, "Ball anga pet kual mai mai tur ka ni lo tihna a nih chu" ka tih leh chuan a nui chhuak ta hawk a. 

"Ka taksa hi football khelhna field a ni lo bawk a, dik lo deuh a min chhaih kual chuan red card ka pe dawn che a nia" ka ti fiamthu a, dak meuh a a nui phei chu hmuhnawm tak a ni. 

"I ţhiante bulah chuan i kal dawn lo tak tak a mi?" ka tih chuan "I bulah ka awm duh zawk ka tih tawh kha" a ti a, ka pa a lo la lut chiah zui. Vanmalsawma lei chhuah zawk chu ka hmu hman a, a zak ve viau ang mawle. 

"I inhralh hnem tawh em?" a rawn ti a, bungrua te chu a enkual ve vel a, kan khuaa kan awm rei avangin dawr chhung chu a ruak angreng hle. 

"Kan inhawng tih an hre lo aniang mi an vang lutuk" ka lo ti a, thinrim hmel a pu lo na a Vanmalsawma ţhu ve reng chu hmu ang pawn a awm lo. Pa ţhenkhat hi chuan fate inleng an lo be ţha hluak ngai lo hrim hrim. 

A haw tur thlah tuma ka ding chu ka bek tawn tawnah dawmin min fawp a, reilo viau mah se ka thinphu a rang leh nasa tawh. Vawikhatna a ni lo chung pawh hian ka danglam ve ziah a, hetianga danglamna min thlen thei mipa hi alawm hman aţanga ka lo duh ţhin chu.

"Min thlah kher lo mai rawh an hau ang che" a ti a, a dik ve tho mai. Dawr aţanga ka chhuah chuan ka chhungten min hmu ngei ngei dawn a, ka zui chhuah chuan ka pa ngaihdan a ni lo maithei a ni. 

Dawr kawngka bul thleng chu ka thlah ta tho a, keipawh chuan dawr ka khar ve nghal a, inchhunga ka luh chuan an lo ngawi ţhap a, a nuam lo duh angreng. 

"In va meng rei ve" ka ti thla rawk a, ka pa ka en bik a, min hauh ka rin tehreng nen engtinmah min ti lova, "I pi duhzawng a chhuak a nih pek hi" dam thluam hian a lo ti zawk a, ţhu ve rih turin min ti na a chauh chhuanlamin pindanah ka lut a, U Vanneihi thil min kawl tir ho kha la chhuakin khumah ka bun a, a ho hlawm lutuk chu mahniin ka nui vur vur mai. 

Khum a ka ţhut fel hnuah diary chu ka keu a, a chhe tawh viau na a a indawt thlap a a awm tho ka ring a, ka remfel thlip thlep peih ta lo. A indawt a a awm loh leh ka zawng chawp tawh mai ang chu. 

Tlem chu ka chhiar a, pawimawh em em a awm hran lo, a hawrawp lah chu chhiar a harin diary a hlui ve tawh bawk si a, bih uluk a ngai hle a, tam deuh hlek chu chhiar ila lu a na vek thei ang. 

Class kan la ţan chiah lo avangin tukţhuan eikhamah ka zirlai xerox tur angin ka chhuak a, kan vengah hian xerox dawr pakhat chiah a awm a, a hla deuh na a chulai hmun chu kein ka pan vang vang a, ka thil vei tawh hi chu ka vei tlut tlut bik zel a, Vanmalsawma te pawh midang chuan phir an ni tih an hriat chuan an buaipui zui chiam lo maithei a, mahse keichuan lak hran an nih dan leh a chhan ka hre vek chak a, a hre tur ho lah han zawh chhuah theih chi an nih miau loh avangin keimaha ka zawn chhuah a ngai a, thudik tak ka la hriat ngei pawh ka ring tlat a ni. 

Diary chhunga thu inziakte xerox tir ka tum chu mak min tih hmel kher mai, "A vaiin" ka ti lehnghal a, a tirah khan diary hi ka ngaihven lem lova, mi thuruk tam tak a chuan ţhin avangin mi diary chhiar phei chu ka duh lo lehzual. Mahse U Vanneihi khan min nawr nasa em a, Vanmalsawma te chanchin a nih loh chuan a chhunga thu inziak dang chu min hrilh duh suh a ti a, a hre vek duh lo a nih ringin ka lo remti thlap a nih kha. Ni Mami'n a zawng tih ka hriat ngat phei chuan ka phur lehzual a, a chhiat tawh tehreng nen a thingremah a awm lo tih a hre chat thei a, a pawimawh viau a nih ka ring.

An xerox zawh veleh taxi ka hmang a, kan khaw counter ka pan leh vang vang a, ka ute an awm hnaih loh phawt chuan duh duhin ka tal ve ngam. Diary chu ka fun ţha a, sumo chhuak hmasaber turah ka thawn a, driver nen kan inhre ţha a, thawn man pawh min laksak lo hlauh. 

U Vanneihi chu biain diary ka thawn let chu ka hrilh a, "A ţha hlauh a nih chu nizan pawn a zawng nasa a, hmuh tur a awm bawk si lo, a thin a rim a" a rawn ti a, ka rilru hria ni awm takin "A pawimawh viau aniang a ro emai" a tih zawm zat bawk a, a pawimawh leh pawimawh loh chu kan la hre em em ang.

Taxi bawkin ka haw leh a, chhungte pawisa ka dil ngai bawk si lo, ka pawisa neih chhun ka hmang zo deuh vek a, thudik tak ka hriat theihna tur a nih phawt chuan ka ui lo nasa mai. 

Ka nuten taxi ka hmang tih an hriat loh nan turning point ah ka chhuk a, kan in pana ka phei laiin Pektea ka la tawk zui. Ka chhuak tih an hriat ve zel ka duh lo a sin mawle zingah tih tur ngah deuh angin an ţhianpa hnenah ka insawi lehnghal.

"Khawnge i kal?" zangkhai vaha a tih chuan "Kawnah" ka ti mawl tawp a, min kalsan mai dawn maw ka tih laiin min rawn hnaih a, kan indin chilh ran mai.

"Hlutei i thik a mi?" ring angreng tak hian a ti a, ka mitmeng a buai nghal nak maithei a ni. 

"Ka thik lo reng reng" ti mah ila "I thik a nih kha. Thartein min hrilh alawm" a la ti tak deuh deuh a, "Thartei nen in lo inkawm nel hman amaw?" ka ti hu a, lo inkawm pawh nise engatinge Pektea berkher a hrilh le?

"Pathian zarah hmeichhia hian min bawh riau a" a ti vel a, kawng dawm meuhin chiang zet hian min en a, "I thik a mi a?" a ti leh a, a va han ninawm tak.

"Ka thik lo ka tih chu mawle..in ţhian ho hi naupangchhia viau suh u. Hlutei nen te chuan ţhian alawm an nih" ka ti zung zung a, a kiai suk a, "I thik a nih kha" a la ti tho a. 

"I ninawm emai a..Vanmalsawman a sawi a mi a?" ka tih ve lahin lu min thin khum nghut a, "Chutiang te chu mipa in an sawi an sawi ve ngai hleinem" a tih chuan "I sawi kha" ka lo ti vat a. 

"Aww..Thartei sawi ka sawi chhawng a nih kha" a ti leh ang lawi a, "Kal teh" tih paha nam sawn ka tum chu ka kutah a lo dawm a, ner nung chungin a paih dawrh kher lehnghal a. 

"Hmeichhe khawih ka duh vak lo a nia" a ti vel a, hmui ka tih pawrh khum a, kal nghal mai ka tum chu ka hmaah lo dingin "Lo thik tawh suh ang che. Vanmalsawma hian nang aia duh a nei lo" a ti a, a uang emaw tiin ka nui vak a, a nui ve duh hauh lo. 

"Ka ti tak tak a nia aw. Langsar deuhin mi a duat thiam lo na a a ngaihsak che. Hmeichhe dang chu a kawp tawp a, a bialnu an ni ngai lo. A bialnu awm chhun i nih hi aw biang taituk" min ti a, a ţawng hi a zangkhai thei khawp mai.

"Chu chu engati nge min hrilh a?" ka tih chuan "Thikthu avanga in inhauh loh nan. Vanmalsawma mood fu lo chu sa sah pui a hahthlak a, lo thik duh tawh suh. Mipa hian duh kan neih chuan kan nghet a nia. Hmeichhia in min thin thlak an tum pawhin kan inseh tang ţang ţang zel. Nih leh aw Sensiar" a ti a, min kalsan hmain mit a siai vel kher lehnghal a, hepa pawh hi ka u ang chiah, thutak a pai hlawl lo.

In ka thlen chuan ka pa'n "I ti thei em?" a lo ti a, ka pa a awm hi chuan in a haw a nuam ţhin. Aizawl ah hian awm ve reng thei se la ka ti a nia. 

"Aw thei e..a tam deuh a ka rei phah vek. Ka ţhiante ka hmu leh kher bawk sia" ka ti a, counter a kal chhung kha a rei ve a, kan vengah bialpa ka nei kher bawk nen, ka rei chhan chhuanlam dang ka siam loh chuan min ringhlel palh ang.

"Khawia i ţhian nge?"ka nu'n a tih chuan "University a ka kalpui" ka ti hmak a, min zawh zui hmain pindanah ka lut thek a. 

U Daizaui a lo luh hlauin kawngka ka kalh a, ka thil xerox chu lungawi deuhin ka en a, ka nui chhuak lo chauh a ni. 

Vanmalsawman min lo call takah chuan ka thil hawn chu bag in ka hliah a, ka chhang zui nghal a. 

"In pindan lam tukverhah khan lo dak teh" a tih phei chuan rang lutukin ka tho a, tukverh chu hawng sawk sawkin ka dak chhuak a, kan inhnung lamah hian hmun awm tlem a awm a, chumi thlangah chuan kawng a awm phei a, chu kawngah chuan a lo ding a, mawi ka tih dan deuh a nuih pahin a kut a lo vai lauh lauh a. A awmna kawng aţang chuan an in pawh a pawh theih a, a kual deuh tih lohah chuan a reh nuam lutuk ringawt. 

"Khatah eng nge i tih?" ka ti lauh a, ka bengah phone chuktuah reng mah ila ka au vak tho. 

"Au vak vak suh" nuihza aw zet a a tih hnuah "Ka pite inah ka kal" a ti a. 

"Kawng pangaiah haw ve mai la mawle" ka tih chuan "Ka hmu thei nang che" a ti a, chu mai mai te chuan min ti hlim a, a mawl thlak ţhin a nia. 

"Zanah lo leng rawh aw" ka ti leh lauh a, kan pindan piah chiah hi ka nute pindan a nia, tumah an awm chuan loh avangin thawm ka dim peih lo. Ka pa leh ka pi te tv en an mutthlu ngei ngei a, ka nu chu a ang ri hriattur a awm loh chuan dawrah a awm tihna a ni mai. 

"Ka lo tum ang" a ti liam satliah a, a awki a san ve vak kher lo bawk.

"Tum ringawt lo in lo leng la a ni mai. Dawr min rawn nghahpui leh ang chu. Zanin phei chu kuhva kheh tur a awm tawh dawn a nia. I lo len loh chuan a khawharthlak alawm" ka ti lang lang a, "Nia" a ti ringawt a, min chhang ţha peih lo lutuk chu ka haw deuh tlat. 

"Nia i lovin lokal ang che. Ka lo nghak reng dawn che nia aw" ka tih chuan "Tukverh piah kha en rawh" zawi sup hian a ti a, "Engati nge?" ka la ti kher zui a.

"Tukverh pakhat zawkah khan ro min sel sak tu tur a awm" a tih takah chuan tukverh ban ka vuan a, Tintin-a a nih ringin nui har har chungin ka dak chhuak a, ka nute pindan lam ka hawi phei chiah chu tukverh a dak ve tho ka pa nen kan in en ran mai. 

"Au vak vak lo tur a ka tih che kha" tiin pakhat lah chuan min lo chhuah chhal a, ka pa chu enin ka nui tawi tak a, ani phei chu a nui lo hrim hrim. 

"Ka dah phawt" tih leh phone dah ka rual a, tukverh ka khar nghal daih bawk a, tv en a a mutthluk ka rin tehreng nen a zia lo tak tak a ni. Min koh hma chu ka chhuak lo mai ang. 

Diary bawk chu ka bih leh a, zak chem chem chung chuan tuipui a har tawh khawp mai. Ka nu chu nise ka pal zam thei mai ang a, ka pa berkher a nia, a zahthlak bik tlat alawm. 

Diary ah chuan Ni Mami chuan a hun hman dan ai mahin a nun dan a ziak lang tam zawk a, hringnun diary diktak a nih hmel. Fahrah, Pa Muana nu leh paten fa atana an lak mai mai a nih thu inziak te chu ringhlelin ka chhiar nawn leh ţhin a, kum 9 lek ka nih laiin fa atan min la a tih chu a inziak chiang viau mai bawk si. Mak ka tih lutuk vang nge ka thinphu te chu a phut dan tur pangai aiin a phu rang zawk tlat te'n ka hria a, U Vanneihin a hria angem le tih te ka ngaihtuah a, rilru a hruai peng nasa khawp mai. 

"Sensiar" ti a U Daizauin kawngkhar a rawn ben rik chuan ka phu zawk a, ka thil chhiar lai nen a inrem aniang ka awm chhung su dawt dawt chu a zia deuh theih nan ka awm ka dawm vang vang a, kawngkhar ka hawn hnuah pawh ka kut chu ka la la thla chuang lo.

"Kal leh rawh" tih leh inher ka rual a, khumah bawk chuan ka ţhu leh a. 

"Min va hlauh hmel ve eng nge i lo tih a?" khum bulah dingin min thlek vel a, dawt sawi chi a ni mang si lo, a tir aţanga ringhlel tu zawk a nih avang chuan "Ni Mami diary ka chhiar" ka ti a, min rawn hnaih nghal ruak a. 

"Eng nge inziak? Kan hriat chak deuh kha a ziak em?" a ti chul a, ka pa a muhil lo tih ka hre tawh a, zaizirin thawm dim turin ka lo hrilh a.

"Ni Mami hi fa lak alawm..hei lai hi en rawh kum9 mi ka nihin fa atan min la a, min hring tu nu leh pate chu tunge an nih ka hre lo" tiin ni Mami'n a kut ngei a a ziah chu vawi nga nan ka chhiar nawn leh a, U Daizaui pawn mak a tih ve hmel tawh khawp mai.

"Dawt a sawi aniang" ka dar a ben paha a tih chuan insum zo lovin ka nui chhuak hak a, ni Mami hi a ring tawh hlawl lo a ni ber. 

Ka dar a a dawm reng lai chuan "Tlem chu ka chhiar tawh a, ka chhiar tawh ngau ngauah chuan nitin a a hun hman dan aiin a nun a ziak lang hnem zawk a, lehkhabu ah chiah a nun diktak a phawrh chhuak ngam aniang. Keichu dawt a sawi ka ring lo" ka ti a, ka bula U Daizaui ding chu ka melh chho pah reng bawk a.

"Ni Mami hi fel ka ti ţhin a, mahse a danglam zo tawh. Kha thil pawh kha rin chu ka duh a, mahse finfiahna a awm loh chuan ka ring lo" a ti tlat a, "Aww..hei bak bak a finfiahna a awm chuang a mi? A kut ngeia a ziah a nia, midang kan bum theih laiin mahni leh mahni hi a inbum theih miah hleinem. Diary hi a ţhianţha angin a lo nei ve tawh pawh a ni maithei a, bakah diary hi chu thuruk vawng tu ber a ni ve a, dawt ngial ngan lutuk chu a ziah peih ka ring lo. Thudik tak ziakin hetah hian a inbunruak zawk ang" tih pahin lehkhaphek chu ka lek kang a, a dar a a sam hui liam pahin a khap fek fek a, "I ring lo tawp tihna mi?" ka tih chuan "Ka hre lo" a ti a, a mithmul a kan ralh duh chauh a, ring lo mah se ka dem hauh lo a, rin luih tir tumna pawh ka nei lo. Mahse keichuan ka chhiar tawh ho kha thudik tak vek a nih ka ring a, rinhlelhna pakhatmah ka nei lo thung. Diary hmanga tualthattu chhuichhuah chang te an nei ţhin a, chuvang chuan mifel tak tak leh misual ber te thlenga an thuruk lo vawn sak tu a nih ka ring hmak a ni. 

Aizawl a kar khat lai kan awm leh hnu chuan kan khuaa nula bo an sawi leh tawh a, "Police ten dem an hlawh khawp mai. Sensiari te college kal laia bo pawh an chhui chhuah theih loh chu thuhran, a ruang takngial pawh an hmu lova, mipui thinrimin police an dem hi chu a awm lutuk" ka pa chuan a ti dap dap a, chanchin engmah ka lo hre ve lo. Class kan ţan tawh a, buaipui ngai neuh neuh a awm rih avang leh a ruk deuh a ngaih ţhin avangin ni Mami diary pawh kha ka la chhiar leh ta lo a, tih tur ţul ang ang ka tih zawh duak hnuah ka chhiar leh ang ka ti chauh a ni. 

"Engtika bo nge?" ka tih chuan "Zanhnih a lo haw tawh lo an tia, mi bo an awm hi chuan chanchin a darh chak a, whatsapp group ah a thlalak nen an rawn tih lan kha" ka pa bawk chuan a ti leh a, kei tak pawn police ka dem ve lek lek mai. Mipuiin kan ngaihven tawh loh hnuah pawh tha thlah lovin chhui char char se ţha tur a nia. 

Hmun kan tihfel laiin U Daizaui chuan "Ka rinhlelh kha a la ngai reng. Pa Muana a nih ka ring nghet bur. Nakin lawkah hotel an siam leh mai ang" ka beng bulah a ti sa sa a, ka lo khap vat thung.

"Mi'n an hriat chuan i tan a pawi dawn teh a nia, rin thu ringawt chu sawi duh tawh suh" ka ti a, inkar hlat deuh deuhin kan khuaa mi bo pathum lai an awm tawh chu a nia, tu tih tak ni ang maw..

CONT..