VANMALSAWMA-18

(Boruak dangin min tlak buak reng a, chhungkaw lam a nih ţhin avangin story ah rilru pek a harsa a, zantin chhiar tur in neih loh ka hlau bawk si. A phuai luai deuh anih pawhin min hrethiam hram mai aniang chu)

VANMALSAWMA-18

Ka ţhiante hoin mi bo thlalak min lo thawn ve chu ka'n en ngial pawhin ka hriat zawng a ni tlat lova, ka hmuh awm pawh ka la hre lo. U Daizaui takngial pawhin "Ka hrengai lo" a ti ve a, Thartein a hre viau thung. 

"Ka hre lutuk keichu kan vengah pawh a lokal fo mai" a ti deuh reng a, mi bo chanchin kan sawi nin deuh hnuah pawh "A fawr aniang, a kawlhrawng a, mahni chauh pawh a khawhar lo chi a nia, a fawr a nih ka ring ber. Nula pahnih lai an bo tawh sia a chhungten a bo ve turah an ngai ringawt aniang" a ti leh ţhin a, keinin engahvak kan ngaih loh laiin Thartei rilru a luah hneh khawp mai. 

"Sawi tawh lo teh ang u, duh leh naktukah class ah kan sawi dawn nia" ka ti a, mi bo chanchin ringawt sawi chu ka hne riau a ni. 

"Kan khuaah khan awm reng ta ila kan bo ve mai angem le?" te a tia, Zuali chuan a ning deuh aniang "Keichu ka dah rih dawn..nakinah kan inbe leh dawn nia" a ti ta nge nge a. 

Class kal tura ka insiam laiin ka nu'n ka u a lo kaitho a, "Ka inherh, bike ka khalh thei lo" a tih tlat avangin U Rinhlua zawk chuan "Ka thlah mai ang" a lo ti a, ka nu chu a ang zui hlak hlak tho a. U Rinhlua pawh Atc ah a lut chho ve ţep tawh a, a tluan phei chuan thla ruk hnu velah chuan a zo ve thei mai ang. 

"Heti reng hi a nia a hahthlak a sin. Tuktin kaihthawh a ngai a, a nau class kal tur thlah hi a tih ve theih tawk a ni chung pawhin a la peih lo zui a nia, ka kham tak tak a ni" ka nu chuan a ti a, ka pa bulah a la ang tan tan mai. 

"Awm ve lo angah min ngai la min kham lo a ni mai" Tintin-an a ti lung lung a, kan hmanhmawh deuh avangin U Rinhlua nen chaw kan ei hma bik a, ka nu erawh a thinrim a la insawh nghawng nghawng mai. 

"Scooty la ve ila a ţha ang. I zir ang a, mi pawn an thiam theih chuan i thiam ve thei em em ang" ka pa chuan a ti a, cycle takngial pawh ka khalh thiam si lo a, ka zir hreh deuh chuan ka peih lo ti tawp lovin "Ka khalh chhuak ngam lovang. Tintina pawh tuk tin a tho tlai bik lo a, la duh suh u" ka ti a, an la ve uk ang a, ka thiam leh theih loh phei chuan pawisa a uiawm mai mai. 

"I zir dawn reng alawm. I khalh thiam chuan i tan pawh a awlsam ang a, Tintin-a nghah reng a ngai dawn lo bawk a" ka pa chuan a ti ta tho a, diktak chuan pawisa ka renpui ve ţhin a, ţul tawp khawk lo chu ka lei mai mai ngai lo. Zirlai pahnih kan la awm a, Tintin-a lah workshop a a thawh loh phei chuan kei aiin a hautak a, dawr bungrua lah nise a hlawmin kan la hnuk a, tlem tlemin a rawn lut a, eichawp dawr ngat phei chu hlep a tlemin a hlawk lo khawp mai. Pawisa hi awlsam deuh a thawhchhuah theih a ni ngai lova, chuvang chuan ka nu leh pate thawhchhuah hi ka ren pui ve ţhin. 

U Rinhlua nen a kan chhuak chuan Vanmalsawma kan hmu fuh a, vengchhung mite sa a pe a nih ka ring. Motor kan ken avangin min rawn hmu ve lo a, a zawn kan thlen dawnah ka u chu a tlan muang deuh a, biak a phal aniang chu tiin ka dak chhuak a, ring zetin "Hey" ka ti vak a, a rawn hawi ve nghal vut mai. 

"Bye bye" ka ti leh tawp a, mawi deuh a nuih pahin a bu nghat a, ka nur deuh nang chu a hmu aniang tlai khawhnu ah a kut a vai ve a, motor chu mihring kal mai mai ai pawhin a tawlh muang zawk a, biak na hun tam viau mah se thil dang ka sawi tawh lo. U Rinhlua a ni miau a, ka zah deuh tlat. 

"Tlan chak tawh rawh" ka tih chuan ka thu zawmin motor chu a ti chak a, "An inang hle tak tak mai" a ti ve sup a. 

"Aizawl a kan thlen ni pawn i hmuh tawh reng kha, tunah an inang tih i hre ve chiah maw?" ka lo tih chuan "Kan thlen ni aţang khan" a ti a, danglamna an nei vak lo reng a ni. 

"Phir an nih dawn kha" a ti ţha veleh a, ka lo nui vak chu min rawn melh zawkin "Phir ni lo se chu in anna lai an nei ang a, in an lohna lai a tam thung ang a, danglamna hmuh tur a awm lo a, phir an ni ngei ang. Nu leh pa hran hlak an nei hi a mak hle mai" a ti ve tawh a, mak an ti ang ka tih ţhin reng kha. 

"U Vanneihin Boomer kha shillong ah a piang a tia, tun a Vanmalsawma hi shillong a piang leh sei lian a ni bawk a" ka tih chuan "An sen laiin an la hrang nge an ru bo?" a lo ti ve khauh a. 

"Ka hre bik lo..ni Mami kha ka hrilh ve a, a ngaithla duh lo alawm. Thudik tak hre hoin engmah an sawi duh lo miau chuan ka tan hriat ngaihna a awm hleinem" ka ti a, diary kha chu ka sawichhuak duh lo, hria an tam chuan a buaithlak mai mai, sawichhuak duh pawl an awm leh ţhin bawk si. 

"A buaithlak ve bawk a nih chu mawle" a ti a, kan inbe zawm tawh lo. 

University kan thlen hnuah "Lo haw tlai suh aw" a ti leh tawp a, thil dang han sawi tur vak a hre chuang lo. 

Ka ţhiante nen a kan inhmuh chuan "Latei bo daih kha a mak e..Aizawl ka chhoh hma lawk pawn bazarah ka hmu sia, kan ti ti deuh reng lehnghal a, mak ka tihna a bo thei lo. Fawr mai mai ni se ka ti, midang anga a bo ve a nih chuan a thi daih tawh awm sia" Thartein a lo ti leh mawlh mawlh tawh a, kan bengkhawn tehchiam lo. 

"I vei leh lutuk a nih kha..a bo a, an report tawh a, police in an chhui zui mai dawn alawm. Police kutah dah tawp rawh, kan lo sawi ve sek hian awmzia a nei lo" Zualin a tih chuan "An chhui chhuak leh awm lo emai" a ti hmak a, Kimkimi leh Ngaihtei te pawh ti hian a zuzi chu a ni mai a, Latei pawh an ngaihven rei lo ang tih a hlauhawm khawp mai. 

"Vei lutuk kher lo la, mipui pawn a hlimchhawnah kan sawi vak ang a, tuman an ngaihven rei leh peih chuang lo ang" beidawn hmel zet hian Vanin a lo ti a, tun dinhmunah ngat phei chuan tuman kan khuaa let kan chak lovang. Mi bo te lah keimahni ang rual vek an nia, sawichhuak lo mah ila bo ve daih kan hlau deuh furin ka ring. 

"Vanmalsawma chu i follow ve ta em?" Thartei chuan a ti ta daih a, lu ka thin rualin "I van mawl tak" a ti hlak a, ka lo nui ringawt a.

Zuali pawh chuan "Mahni bialpa pawh follow ngam lo" min ti a, "Aw..social media thleng thleng a ka ta a nihna lantir ka duh lo alawm" tiin ka lo insawithiam a, an awih loh hmel nasa mai.

"Hmeichhe dang nen a an thlalak i hmuh duh loh vang a nih kha" an tih laiin Vani chuan "In ho emai..follow kher tur tih dan a awm hleinem" a lo ti a, kan thusawi pawh ngaithla tawh lovin Thartei chuan phone a khawih a, thil dang daih sawia kan ti ti lai chuan "Hei a nu leh pate" tiin kan hmuh theih turin phone a rawn dah hnai a, kan en rang hlawm khawp mai. 

Chhungkaw thlalak a ni mai ang chu ka tia, a laiah Vanmalsawma a ding a, a sir tawn tawnah a nu leh pa chu an ding ve bawk a, midang hrin a ni tih rei deuh chhung a hre lo a, a khawngaihthlak zawk. Phir tih velin a rilru a tibuai pha ve tak tak a nih chuan tu hriatpui si lohin an inchhung boruak a nuam tawh lo viau maithei a ni. A chhan chu Vanmalsawma hi a tawp thleng lo a bansan duh chi a nih loh vang a ni. 

Kan bang hma dawn tho a tiin Vanmalsawma chu min lo hruai turin message in ka hrilh a, 'Ka peih angem aw" a rawn ti vel a, ka nuih a za angreng. 

'Min lo hruai loh chuan ka lo leng lo mai ang' ka tih takah chuan 'In ban dawnah lo sawi rawh' a ti a, a rawn uang kual vel ta bik lo. 

Engkim a ţha vek tawh ang chu tih laiin Thartei chuan a hmaa min hmuh tir nu account bawk kha a endik leh a, "Ka rin dan vel a ni" a tih chuan kan melh ţhap a, "Vanmalsawma hi ring suh ka tih kha" a ti vin hlar tawh mai a, tur khaiin min melh bawk. 

"Eng nge a?" ka tih chuan phone bawk chu min hmuh tir leh a, Vanmalsawma nen a an thlalak bawk chu mi tam tak hmuh theih turin a lo pho lang leh tawh chu niin. Darkar chanve hmalamah chauh a ni lehnghal. 

Vawiin chu ka chhuahchhal tawh ngei ngei ang ka ti a, thlalak chu ka en nawn leh a, Vanmalsawma chuan a kuah vel a, chu nu chu Lawmtei a ni tih a hriat a, a thlalak aiin ka bialpa nen a an lak dunna hmuh tur a tam zawk a, Vanmalsawma lerh zia an sawi nasa bawk nen, ţhian chauh an nih ka ring ta lo a, hriat loh karin ka lo inhum ruh nasa tawh hle a, an awm dan chuan min tih nat lutuk vang a ni. 

Thawk ka la hap a, ka ţhiante chuan min en ţhap a, mak an tih rualin min khawngaih takzet niin ka hria. 

"Min hruai turin ka lo ti ve laklawh tawh sia, min lo hruai sela ka sawipui ang. Ka ţhen daih maithei a ni" ka tih chuan an pawm hmel hlawm khawp mai.

"Vanmalsawma hian a thlalak a dah chhuak ve ngai lo a, mahse mipa hi chuan hmeichhia angin an ti langsar ve vak ngai lo a a awm tho mai. Henu hian a ti lang sar a, mipa chhelo ve pangai tak nen a an thlalak tar lan hi a nuam tih zawng tak a ni tih a hriat. Hmeichhia zawkin tim miah lo a an thlalak a pho lan ngam chuan eng emaw a awm tihna a ni mai. Ţhen daih rawh ka hrilh lawk vek tawh che kha" Thartei chuan a ti tan tan a, "Chhe lo nazawng hi an rilru a ţha tel kher ngai lo. Tintin-a takngial pawn lerh a tih kha. I bialpa hmasa ber a nia, a bum reng che chuan mipa rin lohna i nei tlat ang a, i leng tar daih mai ang" min ti a, min tih hlim an tum viau na a ka nui hleithei der lo. 

"Mipa ţhenkhat hi chuan hmeichhe bum nuam an tia, ngaihzawngte hi an kawp ţeuh zel a, chutiang chi chu a lo ni ve maithei a sin" Thartein a tih leh chuan Pektea thusawi kha ka hrechhuak a, a uang tih hre mah ila dawt muhlum tawp chu min hrilh ka ring lo, mahse rinhlelhna ka neih tlat hi ka dah bo thei chuang lo a, ngaihzawng neih hian rilru hahna a lo keng tel a nih hi, ho te te ah kan hlauthawng ţhin bawk nen, a buaithlak emai. Thil hriatchian tum mang hlei lovin a thusawi apiang ka awih zel a, thlalak kan hmuh hma pawh hian min lo bum fo tawh maithei a ni. 

"A rawn hruai che pawn kal pel lui rawh. Naupangchhia deuh mah se kal pel lui la engtin nge a tih hriat a chakawm alawm" Thartein a tih chuan nui hakin ka lo bu nghat nghat a, ke chuan ka haw thleng thei dawn lo hrim hrim a, reilote chhung chauh ke a kal chu ka huam viau thung. 

Ban veleh ka ţhiante nen chuan insiamin kan chhuak nghal a, gate pawn a kan chhuah meuh chuan Vanmalsawma pawh a lo awm tawh. Kawr sirah bike din tirin helmet pawh phelh lovin bike ah a ţhu a, hmuh loh der ka tum nen min lo en run mai. 

"Sensiar" a tih tak lauhah phei chuan chhan sawi tur ber awm hauh lo hian ka thinphu a rang dawt dawt a, "Kalsawn daih ang u. Tawi te chu kan lo kalpui ang che" an ti a, ka ţhiante nui deuh tet tet melh kual ralh pahin thawk ka la a, a rawnkal ve vang vang sia, ka khawngaih leh tlat tawh. 

Ka awmdan chu a hrethim aniang Thartei chuan "Thinrim rih rawh kan tih kha aw" a ti a, ka banah kaiin min kalpui hlawk hlawk a. Ka ţhiante pathum hian in an inluah ţawm a, tumah hostel a awm an awm tawh lo. Mahse bus a haw an ngai ţhin a, kal lamah phei chuan kan inthurual thei ngai lo. 

Bike na na na chuan min umpha hma khawp mai, "Eng nge i hriat a?" a ti vin tuar a, kan kal rualin bike chu a tawlh ve zel a, a mitmeng lah chu a rumin hre ngai lo tan phei chuan hlauhawm tham a ni. A hmel ka hmuh lah chuan thlalak kha ka hrechhuak zel a, ţhian satliah an nih ka ring thei tawh lo a ni. 

"I rawn lawn loh chuan ka su ang che" sehchilh zetin a ti tawh a, kawngpui hnaih ber a kal ka nih avangin ka hlau ru angreng hle. A tih tak tak duh ka rin vang a ni. 

Ka ţhiante lah chu an ngawi hmak a, "Ka ţhiante rualin ka haw leh si dawn..duh leh Lawmtei phur mai rawh" ka tih chuan a nui chhuak hawk a, hmun reh deuh lai chu ni lo se motor dang horn a ri tuar tuar tawh ang ka ring. 

"Nangmah alawm ka phurh duh che" a tih chuan "Ka duh ve lo..lerh deuh bika a ka chuan chuan ka khua a sik zel. Nachhawkna i pai te a nih loh chuan min sawm tawh suh" ka ti a, thinrim ka tum tehreng nen ka fiamthu pah daih.

Ka ţhiante pawh chuan min lo en ţhap a, an beidawn hmel nasa mai, mahse "Sensiar" ti a min rawn ko leh tu chu a beidawn hmel fe zawk. 

"Eng thil nge i hriat a?" a ti a, a thaw zui hawk a, ka ţhiante aiin a beidawn hmel zawk ka tih reng kha. 

"Bus in kan haw dawn a" ka ţhianten an lo tih chuan "In ţhiannu telloin haw rawh u" a ti hmuk a, keimah ngawt min en thung a, kawngsir ah chuan kan ding reng ringawt a, kan ngawih vang vang hnuah Thartei chuan "Kal tawh rawh" ka hnunga nam pah hian a ti a, amah ka hmuh lek hian thlalak kha mitthlaah chiang deuhin a lang ve kher zel lehnghal a, ka thin a rim ţun mai. 

A kut min lo pek te chuan vuan duh lovin ka beng pawp a, a nuih a la za zawk zui. 

"Tlanchak reng reng suh ang che..i tlan chak vaih chuan ka zuang thla ang" ka tih chuan a rawn thle deuh a, a kawngah ka lo kuah ve nghal zat bawk a. 

"Kan hria ang u" a ti a, kan university awmna hi a fal deuh hlek a, kawng a ţha bawk nen chak deuhin min tlanpui a, ka hlau lutuk chu ka mawng thlengin a za a, "Tlan chak suh ka tih kha" ti tuar tuar mah ila awmzia a awm hauh lo. 

Hmun lun deuh lai kan thlen dawnah a ding dawt a, ka la kang awk zui. Ka lama rawn thlek leh deuh pahin "E..i la awm ve maw?" nuihza aw zet hian a ti a, ka thinrim chuan a vunah ka ţham vak a, ka thlah leh vat thung. 

Kan kal lehnghal mai dawn emaw ka tih laiin Peka a lo lang hlawl a, min hmuh chuan nelawm tak hian a nui a, tawi te a lo nuih let ve pahin "Helamah daih daih eng nge i tih?" ka tih chuan kan ep chiah a hotel chu a kawk a, a tih tur awm ang chu ka hre ve nghal mai. 

Pawisa te an inpek fel hnuah kan kal leh a, "Kan inah ka haw hmasa leh zawk mai ang, min thlah tlang mai rawh" ka tih chuan "Kalna tur dang kan nei" a ti a, ngei viau mah ila inbiak a awlsam zawk nan a darah ka khabe ka nghat a, "Khawiah nge kan kal dawn?" tiin ka zawt zui zat a. 

"Rv ah" a tih chuan ka phu deuh zawk mai. 

"Rv ah maw?" ka tih chuan "I hre ve mi?" min ti a, ka lo nui hak a, Rv hre lo turah min ngai em maw ni? Rv ah chuan thil danglai leh hlu a awm lo a, thlalak pui chakawm khawp a hmun nalh leh mawi a awm lo bawk. Chuti chung chuan Aizawl a veng lar leh lun ber a ni hial maithei a ni. Ruhna leh luna nei te pawh hian Rv an pan chuan an an lâm haw zak zak tawh zel an tia, sap ţawng zirna thlengin a awm a, a kal te reng reng hian sap ţawng an thiam haw viau zel.

Ka ngaihtuahna ka kawm vang vang hnuah "Vanmalsawm, Rv a min hruai chuan kan inţhen ang" ka tih chuan a nui tih hriat zet hian a taksa chu a che dawt a, "A va buaithlak duh awm ve Peka khan pawisa min thawn bawk sia" a ti vel a, kalkawng pangai kan la zawh zel tih ka hriat chuan ka thaw huai mai. 

"Min thlah phawt la duh leh kal leh zawk mai rawh" ka tih chuan "Ka uang a nih kha ka kal ngai hleinem" a ti leh ang lawi a, hepa pawh hian thutak a pai hlawl lo. Mipa ho deuh deuhin min hual vel tihna a nih ber chu. 

Kan inpanna kawng ni lo kawng hnuai zawk a zawh chuan "Khawiah nge min la kalpui i tum?" ka ti a, kawng a chhuk deuh bawk nen a hnungah ka nam ţung a, ka kekawr hak nal lutuk avang chuan ka tawlh leh ţhin bawk si, ke a kal te ai pawhin ka hah zawk daih ang. 

"A ţha lawm...vawiin bak ka lokal tawh lo ang aw. Lawmtei lung ka ti awi lo palh ang" ka ti vel a, min chhang lo. 

An inkawtah a ding a, "Chhuk rawh" bul zet hian a ti leh tawp a, tumah an awm lo em maw ni an in chu a reh ruih mai. 

Ropuia ka hmu lehnghal a, scooty a lo la leh tawh bik a, Vanmalsawma te in kawta min hmu chu mak a tih hmel deuhin ka hria. 

"Helam daih daihah eng nge i tih?" a ti a, scooty chu ka dinna zawn chiahah a din tir bawk a, garage aţanga Vanmalsawma lo chhuak chuan a melh no tehchiam lo khawp mai.

"Kan bang hma tho a, ka peng kawi lawk a" nui sang chung hian ka ti a, "I haw tawh dawn nge?" a ti leh zel a, ka thlen chiah thu ka hrilh chuan "I haw lam chu nise scooty khalh kan zir tur a nia" a la ti tak deuh deuh a, "Nia nidangah a ni mai" ka tih laiin ka bula ding pa zawk chuan ka banrek a rawn hmer a, a na kher mai. 

Ropuian kan kut a en lai chuan ka lo zak chem chem mai. Kţp hruaitute zinga mi a nia, fel min tih avangin mi bulah pawh min fak nasa a, tuman min mikhual en loh chu thuhran, mi fel tak angah min ngai vek a, chutiang a nih laia inkhawm tur pawh a an sawm chhuah zawh loh ka inkaih tir vel chu a ruk chuan mak min ti maithei a ni. 

"I chhungte an awm em?" tiin Vanmalsawma chu a bia a, ani lah chuan "Awm lo" a ti hmuk a, min kalpui nghal mai a tum chu Ropuia chuan "Ka lo hruai haw ang" a ti a, scooty chu dah remin kan hmazawnah a rawn ding ve ta nge nge a. 

"Haw tlang rawh" Vanmalsawman a tih chuan "In hnathawk te tumah an awm tawh lo a, in nula takngial pawh a awm si lo. Ka kal lamah khan Pektea ka hmu a, rui deuhin inhnuaiah khuan a chhuk a, ka haw dawn tho a, Sensiari hi chu ka lo haw pui ang" tih pahin Ropuia chuan ka darah a rawn vuan a, chu te chu a lo ngaithei lo aniang Vanmalsawma chuan hneh zetin a kut chu a phih thlaksak a, a dim lem lo khawp mai. 

"Buaina i nei em?" Vanmalsawma bawk chuan a ti leh a, Ropuia zawk chuan mitmeiin eng emaw hi min hrilh a, ka hrethiam der si lo. Lu a thin tak nawk nawkah chuan inchhunga lut lo turin min duh a nih ka ring a, a hlauhthawn hmel em em mai lehnghal. 

"Buaina chu ka neih loh bakah ka duh lo a, Sensiari hi nau ang chiahin ka en a, chuvang chuan ka haw pui ang chu ka ti" a ti a, a aw pawh a dam thlap mai. Mahse U Ropuia awmdan chuan ngaih a ti ţha lo a, mi fing leh fel pangai tak a ni a, hna ţha deuh a nei bawk a, tun a ka hmuh ang a hlauthawng hian a la awm ngai lo. 

"Lokal ve zawk la" ka tih chuan lungawi lo tih hriat zetin Vanmalsawma a lo rum nghut a, ka kut a vawnna chu a thlah dawn lo tih a hria aniang chu Ropuia pawh chuan a lo remti a, keini aia kal hmasa zawkah a la ţang zui a. 

Kan pathumin kan inzui lut a, inchhung chu a daiin a reh ruih a, a nuam angreng reuh hle. 

"Tah khan lo ţhu rawh" ti a Ropuia a hrilh hnuah Vanmalsawma chuan ka kut bawk rawn vuan lehin kailawnah min chhohpui a, "Rei suh u aw" Ropuian a tih te chuan hawi let meuhin ngeiawm zetin a nui a, keiin "Kal chak rawh" tih pahin ka lo nam ve thung a. 

Pindan a kan luh rual chuan "Nichin khan i titau ve deuh em?" min ti a, kawngkhar nghengin ka ding chu ka hmaah a rawn ding a, a taksa chuan min khuap leh run tawh. 

"Aw" ka tih rualin "Engatinge?" a lo ti ve nghal zat a. 

"Hmeichhe pakhat vang vel" ka tih chuan "Sawifiah rawh" a ti hluk a, chil ka lem khalh a, inti huaisen chawpin a mitah tak chuan ka en a, "Lawmtei nen hian ţhianţha satliah in nih ka ring lo. In thlalak hmuh tur a awm reng a, ka ţhiante pawn an ringhlel vek tawh che" ka tih chuan nin hmel zetin a thaw hawk a, "Kha hmeichhia kha ka ţhian chauh a ni ka tih tawh kha" inlak hran pah hian a ti a, tukverh lam a pan chu umzuiin "I hrilh thei reng alawm. Ka hmuh turin a ti lui a nih te i ring ve lo mi?" tih pahin a hnungah chuan ka nam a, rawn hawi let a chik zet a min en lai chuan "Thartein a hmu vek zel" ka lo ti leh a, a nui suk a, insawifiah vak a tum loh hmel nasa mai. 

"A hre lo che" min ti a, chubak engmah a sawi lo. 

"A duh che em? Ţhian bakin a en ţhin che em?" ka tih chuan "Ka hre lo" a ti mawl tawp a, ka ngei reuh hle mai.

"I sawi ţha duh si lo ka haw dawn" tih paha kal ka tum chu ka ban a vuanin min pawt let a, closet ngheng chuan min nawr bet nghal rawp bawk. Ka biang tawn tawnah dawmin min fawp a, a awmah nam ve ţang ţang mah ila a che sawn eih lova, ka rilru chuan a fawh theih a awm nghal mai chu a dik lo tih ka hria, a insawifiah duh miah lo lehnghal a. Mahse ka rilru chu ka taksa in a phatsan a, zawi zawi a inpein min fawhna chu ka chhang let ve a. 

"Ka ţhianţha satliah a ni lo. Ka ţhianţha ber a nih kha" inlak hran pah a a tih chuan thaw chhuak ham ham chung hian ka lo en ran a, "Hmeichhia hi chu kan hlauthawng hma ţhin a, rin che ka duh a, ka ring bawk chein ka hria. Mahse hmeichhia bawk hian kan hmeichhiatpui ţhenkhatte zahtheih loh zia kan hria a, chu chu ka hlauhthawn chhan a nih ka ring. Nang chu ka ring che a, mahse i ţhiannu kha ka ring lo" ka ti duah a, a hriatthiam ngei pawh ka beisei a ni. 

"Ani kha chu ka ţhian a nia, nangchu ka bialnu alawm i nih. Min ring rawh, ka duh loh zawng neih tumin ka umzui ngai lo" nghet churh hian a ti a, pindan kawngkhar a rik takah chuan a phun hluk a, "Kal ang" ka tih rualin ka hmuiah bawk chuan min fawp leh a, kawngkhar chu ri dawt dawt mah se duhthaw zetin min fawp a, la thlahlel viau mah ila midangin min rawn hmuh hlauin ka thle sawn a, "Nidangah" ka ti chhuak sap bawk a, ka chhungte an khirh ve bawk nen, hun kan nei leh thei angem tih phei chu ka hre lo. 

Pindan pawn lamah chuan Ropuia a lo ding a, min ngaihtuah hmel zet a ka hmui a en rual chuan ka lo pet daih a, "I nu te an rawn haw a, mahni chauh a awm chu a nuam lo em a ka lokal ve mai mai" min enreng chung chuan a ti a, Ropuia hi kei aiin a u daih na a a la upa lutuk bik lova, fel deuh emaw ka ti ţhin a, mahse vawiin a a awmdan hi ka hrethiam lo. 

"I nu a la awm maw?" ka tih chuan a lo bu nghut a, ka mak tihna ka thup hleithei lo. Ropuia bawk chuan "Sensiar i nu'n a ngaihtuah tawh ang che" a lo ti a, ka chhan hman hma hmain nutling pakhat hmelţha zet mai hian min rawn pan zan zan a, ka nu ngaihtuah chuan sang ţha tak a ni. 

"I ţhiante an lo leng em ni a?" a ti a, keichu min en bik deuh niin ka hria a, ka tawlh hnung dat a, a nuam lo duh kher mai. Pindanah kher kan lo la awm zui. 

"Sensiari leh Ropuia" a ti hmuk a, "Helamah ka awm khat a, tumah ka hre ve lo a, in hming chu ka hre reng tawh ang" a ti a, ţawngkam a thiam vak lo te chu nuih a za a, ka nui ngam hauh lo thung. Nui sang chunga min lo chibai chuan ka nui ve a, thlasik tih takah a kut a vawt thler mai.

Vanmalsawma nen chuan ka entawn vel ţhin a, in anna pakhatmah an nei lo. Pu Hriata lah pa tawi turh mai, hnar lian zet mai a nia, a nu hi a hmelţha zek thung a, chuti chung chuan a nu leh pate hi lansan ngau ngauah chuan chhun na lai pakhatmah a nei lo. 

"Lo chhuk rawh u..vawiin chu kan nula kan hruai chhuak daih a,kan lo haw tawh tho a thingpui in ho ang u" a ti dem dem a, a ţawng dan chu ka sawifiah thiam vak lo. Mizo inla sap ţawng thiam fal deuh, mizo hlang awmkhawmna hmun a sap ţawng hmang ţalh ţhin hoin duhdah deuh, no deuh si a mizo ţawng an hmang ve ţhin nen hian ka tehkhin ber. Mizo ţawng pawh a lam sap vek a nih ber mai chu. 

Inhnuaiah kan inzui thla a, ţhutkhawmna pindan a kan phei hnuah Vanmalsawma zawk chu ko letin "Min lo zui lawk rawh" a ti a, kan hriat phak ngei tur hian "A rei lo ang aw" a ti leh lauh a, a au rin ve theih pawh ka lo ring vak lo a sin.

Kan pahnih chiaha kan awm hnu chuan Ropuia chu "I zia a va dang ve. Hlauh nei angin i awm reng a, upa zawk ve si ka lennaah min zui tlat bawk a, inkhawm tura sawm reng chungin Vanmalsawma hi enhran deuhna i nei tho em ni a?" ka ti khawl khawl a, Pektea rui deuhin inhnuaiah a chhuk a tih hnu phei kha chuan a hlauhthawn hmel lehzual a nih kha, ka ngaih a ti ţha lo ve vek thei alawm le. 

"Ka enhrang hran lo. Inkhawm tur chuan ka duh a, min lo sawm tawp ta se lawm deuhin ka lo inkhawmpui ang. Mahse a nun duh dan kan hre vek a, i nu leh i unauten an ngaihtuah zia che ka hre bawk nen, in pahnih chauh a in awm dun ka duh loh vanga zui che u ka nih hi" a tih chuan mit tla lo lekin ka lo en a, "Ngaihdan dik lo nei suh aw Sensiar. Fa tlum ber leh hmeichhe awmchhun a nia, i nu nen a kan ti ti dun chang hian an ngaihtuah zia che a sawi chamchi ţhin a, Pektea rui ka hmu hmasa kher bawk nen, nangmaha i zui tur kha ka ngaihtuah tlat che a, Vanmalsawma pawh a rilru a chhe hauh lo ang a, mahse ruihhlo leh khawlai hian a hip ve a" a ti deuh nawk nawk a, min hmaizah ve deuh vang nge a thusawi chu a mumal lo khawp mai. 

Vanmalsawma leh a nu an rawn inzui lut a, Pu Hriata chu hmuh tur a awm ve lo. An awmpuinu thingpui rawn chawi luh ka lo ban lai te chuan ka che vel chu kan lenna nu chuan a lo en reng a, min en duh em avang chuan ka lai a, ka ni huih mai. 

"Sensiar, khawi khuaah maw in awm?" a tih chuan ţha deuhin kan khaw hming ka hrilh a, danglam a awm ringin chik deuhin lo en ve ngial mah ila danglamna hmuh tur a awm lo. 

"Chaw i ei ve hman em?" min tih chuan "Aih..ka nu leh pate an awm ve ve lai a nia, min lo nghak ang" ka lo ti vat a, hmelţha viau mahse ka rap deuh tlat. Kan bulţan danin a zir lo nge an in leh a nu leh pate hian min hip lo riau a, keimah chiah phei chuan an bulah ka awm ngam lo chiang sa ang. 

"Ka pi engtin nge kan koh ang che? Ka lokal lai hi i awm loh lai a ni ţhin a, han inmawl biak tawp chi a ni si lova" za lo deuh a nuih paha Ropuian a tih chuan "Nu Mawipuii min ti rawh" a tih chuan ka hawichhuak nghal dawrh mai.

"A nih chu...khawlaia inhmuh pawn nu Mawipui ka lo ti lauh ţhin ang" a ti a, a nui lui nasa lutuk chu a khawngaihthlak zawk. 

Thingpuite kan inzawh hnu chuan haw ka rawt a, Vanmalsawma chu ka melh zawk a, mitmeng hriatthiam harsa zet hian min lo en ve reng a, a nu lah chu a uap a na in boruak a rit churh a, ţhu mai mai chung pawhin ka hah vek tawh. 

"Sensiar lo leng leh rawh aw..kan la inkawm dawn nia" Nu Mawipuii chu kawngka bulah a ding a, Ropuia scooty a ka lawn tur chu min lo enreng a, "Ka lo leng ang" ka ti ve tak nain a awmlai berkher chuan ka kal tawh lovang ka ti rilru mawlh mawlh thung a, kan tlan liam thlengin Vanmalsawma chuan min thlir a, ka ngaihbel nge a nu te an lo haw hnu khan a hlim lo riauin ka hria a, thil ka ngaihtuah kual nasa lutuk chuan Ropuia min biakna pawh ka lo hre lo.

Kan inkawtah ka chhuk a, a kal leh hmain "In ngaihtuah vung vung tawh suh" min tih te chuan ka nui hul hak a, gate chhungah ka tlan lut zui nghal a. 

"I lo haw tawh maw? Eng nge vawiin lam te?" ka pa'n a lo tih te chuan ka chhang hman lo. Pindan kawngkhar ka nam hawng rawp a, khum hnuai a ka bawm thuhruk chu pawt chhuakin ka thil xerox kha ka hai rak rak a, pawimawh tawh lova ka ngaih chu ka enchiang ţha leh vel a, ka ţhiannu, ka ţhianţhaber Mawipuii tih vel a inziak ţeuh mai. Nakina uluk deuh a chhiar ţhat atan ka dah a, ka phur sawt mai. Vanmalsawma nu hming kha ka hriat hnu a ang ka ti reng a ni. 

CONT..