VANMALSAWMA-19

VANMALSAWMA-19

"Khaw nge Sensiari kha?" ka nu'n a tih chuan ka pa'n "Chak deuha a lo tlan luh kha" a ti a, a aw aţang chuan a nui deuhin ka hria. 

Mawipuii tih hming inziahna chu ka thai a, a pawimawh ka rin loh avanga chhiar chiang mang hlei lova ka kalsan kha a nia, mahse tunah chuan a pawimawh ber pawl a ni tih ka tawh a ni. 

Ka inthlak zawh chuan dar5 a lo ri der tawh a, khua a thim hma bawk nen ka nu chuan "Sensiar i inthlak zawh chuan min rawn pui rawh. Daizaui nen dawr bungrua kan la a keini pawh kan haw na a la rei bik hleinem. I peih loh viau leh dawrah va awm la, a nih loh chuan maian te hi lo va hik teh, chaw takngial pawh kan la chhum lo" a ti lang lang a, lehkha chu bawmteah chuan khung lehin midangin an hmuh ve loh nan ka kalh hmak a, khum hnuaiah chuan ka nawr lut leh a. 

"U Daizaui chu dawrah awm zawk rawh se" pindan aţanga chhuah pah hian ka ti a, ka class kal hlanin engkim a lo ti vek zel a, in a ka awm ve chhunah chuan ka awl ve hram hram ţhin. Mi ina awm ţhang a nih vang ngawt a hah thei lo a ni bik lo va, kan in bak awmna tur a neih loh vang ngawt a lo chhawr chiam ringawt chu ţha ka ti chiah lo bawk.  

Maian ka hih laiin Tintin-a leh Vani te an rawn inzui haw a, mak ti a kan lo en ţhap laiin Vani chuan "Lokal ka tum a, kawnah Tintin-a hi ka hmu fuh a" inthlahrun hmel zet hian a ti a, U Daizaui pawn a lo hmu fuh aniang pawn aţangin a lo ko lauh lauh a, ka ţhiannu chu a chhuak leh rih a. 

Kawngka a pel fel ta maw tihah Tintin-a hnung a ri thlawp a, ka nu chuan rum zetin a melh bawk a, "Nupui i rawn ru ve ringawt em ni a? A mimal ang zawng pawn enkawl i hahthlak a, ngah nge hmeichhia i rawn hruai haw a? Fa nei thei pawh i la nih loh hi aw, a rai te kha i tia nge" a ti a, ka pa a lo nui huk huk thung a. 

"A mak ţhin..i ngaihtuahna hi a dâm emai aw..khatiang kha Pathianin a phal lo a nia" tih pahin Tintin-a chuan a kuah a, an inlen hleih si, ka nu lu a chul pah hian "Aizawl boruak hi i lo zo lo ber a nih hi. Naute te i ti mai mai, hetiang chuan i fate min hruai sual vek ang" a ti a, a nui ruh ruh bawk a, an in nufa ve ngawt mai.

"Khawi nge min thlah teh. Mawl bet but lutuk i lian ropui si. Fimkhur thuah sawn te i lo thlak ange ka tia ka hrilh che a nih chu" tih hlak hlak paha ka nu kalsawn tum chu a kuah bet lui a, a chhipah te a tuai sak a, an inchai bat bat hnua ka nu talchhuak chu a hah hmel nasa mai. 

"Vani hi i nau ţhiannu a nih hi aw..engtin mah ti reng reng suh ang che. In lo inngaizawng vel ange" la hah hmel zeta ka nu'n a tih chuan "Tunlaiah fate kawppui tur an thlan sak tawh ngai lo. Hmangaihnain ţhian a thliar lo a, naute ţhian phei chu thliar lo tak a ni" ka u in a lo ti ve thung a, ka nu chuan a chhang tawh lo nain a ei loh hmel khawp mai. 

Vani chu dawrah a va awm bo rei lem lova, inchhungah rawn lut leh vatin ka bulah a rawn ţhu a, maian ban pah hian "Chaw i chhum tawh em?" a ti zawi sap a, nuih a za duh khawp mai. 

"La chhum nang...Vanmalsawma te inah ka leng kawi a, ka haw ve deuh chiah" a ţawng ang chiaha zawi hian ka lo ti ve a, a awm pawh a nuam deuh sawt ang ka ring. 

"Midang rual khan i kal ve ngei sia, i leng kawi ve tho a mi? Chhuna i hak ang chiah i la ha a" ka lo ti vel a, "I lenna ah chuan tu tu nge lo awm?" a ti ve thung a,ka nu te hriat hlau tak, chipchiar angreng tak si hian ka hrilh a, maian hih chhung a rei duh khawp mai. 

"Maian i la hik zo nange? I ţuan a muang lutuk emai, engtikah nge chaw min eipui i tum a? Maian tlemte pawh hik zo hleithei lo, rin tum che pawn ka tel ve a ngai leh tho zel" ka nu'n a ti hlawih hlawih a, cooker a phawrh chhuak zui zat a, "Vanram chaw i ei dawn tiraw? No 1 i kham angem?" a ti zui lang lang a, ka ţhiannu zak hmel chu hmuin "Em em a che..chutiang te inzawh tur em ni?" ka lo ti hlak a, Vani lah chu za lo deuh deuh hian a nui a nui ringawt a. 

"No 2 vel lawih tih kep rawh" Tintin-a ber chuan a rawn ti a, boxer chauh hain a pindan aţangin a lo chhuak a, duhdah deuhin towel a keng bawk a, Vani chu a lum ve pup pup ang ka ring, "Keipawh ka zak zo chiah a nia aw" ka ti ta ringawt a. 

Ka chhungte kan ei hmasak tir hnuah Vani nen kan ei ve chauh a, ti ti paha ei kan ni bawk a kan ei rei phian mai. Vanmalsawma nu leh pa nelawm loh zia ka sawi lai mekin Tintin-a chu kan chaw eina bul velah a vei kual sek a, chhuah mai inringin a inchei leh thlup tawh. 

"I chaw ei a va tui awm ve Vanram, puak pawp khawp te khan i lo ei ange aw, rin aiin chaw i heh zek a" a ti lung lung a, Vani chaw bar tum pawh a tawp chawt mai. An inngaizawng ve ngei sia, ka ţhiannu zawk chu a zak khawp ang. 

"Khatiangin bialnu te tih tur em ni?" ka tih chuan Vani hnungah dingin a beng pahnih a khawih sak a, a khai tho mai dawn emaw tiin ka hlauthawng viau hman, mahse khai em lovin "E..i zak a nih hi hei a sa vek alawm" a ti ta zawk a. 

Chaw ei khamah Vani chu diary chungchang ka hrilh ve thuak thuak a, Vanmalsawma nu leh ni Mami te inţhianţhatna ka sawi chuan a lo meng phawk ve nasa mai. 

"Keipawn mak ka ti lutuk. Chuvang chuan chhiar vat vat ka duh a, ka lo hrilh ve zel ang che" ka ti a, chhuatah ţhuin bawm chu khumah kan dah chhuak a, "I chhiar tawh hnu hi ka lo kawl ve" a ti hial a, mahse ka lo phal lo thung. 

"Ka chhiar nawn leh vek dawn. Nakinah i chhiar ve dawn nia" ka tih lai mekin Tintin-a a lo lut a, bawm chu ka chhin nghal daih a. 

Ka chet dan chu a lo hmu hman tho aniang "Buaipui tawh suh ka tih kha" bul zet hian a ti a, ka ngawi reng ringawt.

Vani hnungah chuan ţhuin ka bawm chu a en a, "In buaipui reng chuan in bo ve daih mai tur a sin" tiin min sawiţhaih a, tawp san ka tum lo thung. 

"Ka chhiar chhuak ang a, dan kalha chetna lam a inziah chuan U Mala ka pe vek ang" ka ti a, Vanmalsawma nu nen khan midang fa an lo la hrang ve tawp a nih chuan an thiam lo hul hual tihna a nia nga, dan anga hrem theih an ni bawk ang. A unaute takngial pawn phir pui a nei tih an hriat loh chuan a rukin thil an ti tihna a ni mai a, an tih chhan a inziah ngei ka ring tlat a ni. 

"Kal teh ang" ka u'n a tih takah chuan Vani chu a tho a, insiamţhat nghal mawlh mawlh pahin "Min lo hrilh che zel rawh aw" a ti a, ka lo bu nghat nghat a.

"Enchimlohi hmul i kai nasa nia, ngah nge maw chhuatah te i ţhut nuai le?" tih pahin Tintin-a chuan Vani kawr hnung leh kekawr vel a ben fai sak mawlh mawlh a, kal vat vat se ka ti ru khawp mai. 

"I beng fai vek em?" ka ţhiannu'n a tih chuan "Ben nuam deuh lai i kekawr mawng a mi chiah a fai" nui ruh ruh chung hian a ti a, ka lo ner nasa mai. 

"Khawimaw i awm bawrah te khan hmul a kai ţeuh lo maw?" a ti vel a, ka en peih tawh lo chuan bawm tlang chu ka zut ka zut a, "Nih leh aw Sensiar, ka lo bia ang che" Vani chuan a ti ta nge nge a. 

"Ka lo thlah ang che" tih leh thawh ka rual a, dawr thleng ka zui phei a, "I duh leh chhang leh chips vel hi zan rilţama ei atan hawn rawh. I awmpuite an inren bawk sia, zan rei a eitur awm lo chu a hrehawm duh emai" ka tih chuan "Ka lo lei ang" a ti deuh tlat a.

"I ho mai mai e..lei kher a ngai hleinem" ka tih ţang ţang pawhin "Hlep a tlem alawm" a ti a, pawisa a dah lui tlat a. 

"Workshop ah i thawh leh tawh kha, Vani eitur te chu leisak ve la, workshop a lokal kher lo te pawhin an ko ţhin che tih ka hria a nia" ka ti a, ruihhlo ti lo phei se chu pawisa a nei ve reuh ngawt ang.

"A ei tlem leh ber dawn. Zuali leh Thartei ten an eisak leh vek ang a, anni tan ka phal lo" a tih chuan "I van uikawm tak. Zirlai kan nia, nang te chuan thawhchhuah i nei a, i tuina ber i thawk bawk a, mi motor siam a pawisa hlawh ţeuh kha a ni mai a, a awlsam e" ka ti a, a nur nasa ngang mai.

"Kawr ruak tungin mi motor hnuaiah ka mu huang a, hmai dum nian nuanin hna ka thawk a, a awlsam chu ti reng reng suh" min tih khum hrep a, chhan chi pawh a ni tawh lo. Vani pawisa dah chu ngawi rengin ka la a, ka kir fel hnuah an pahnih chuan min kalsan a, "Thinchhe si..engtin nge maw Vani hian a duh zawk ni?" ka ti a, U Daizaui a lo nui hak a. 

"Keipawh ka ti...Vani te unau hi chu an hmelţha a, an te chhe lo vek bawk a, Tintin-a lah a thinchhiat chu thuhran, ruihhlo a la duh em em zui a" a lo ti ve a, inchhunga ka luh leh hmain Vanmalsawma te ţhian ho an lo la kal zui.

"Zanin chu dawrah ka awm dawn lo a sin" ka lo ti nghal tawng a, Vanmalsawma chu dawr chhungah lo lutin ka bulah a ding a, zu rim a nam lo na a a mit a sen ram mai. 

"I pa a haw dawn tawh em?" a tih chuan "Dawn ţep ang..engati nge?" ka lo ti a, ka en chho deuh ha a, engthawl hmel zet hian meizial a pet kawh va a, "Ka lo leng chak tawh" a mei zuk lai lakthlak pah hian a ti a, ka lo en reng ringawt. 

Ka insum theih loh tawpah "I rui a mi?" ka ti a, min lo en vein a hmui a pet zawi zauh a, engmah phei chu a sawi lo. 

"Pathianniah inkhawm ang aw..chhun lamah i peih loh pawhin zanah tal inkhawm ve la" ka tih chuan ngaihnep hmel zet hian a ner sawk a, "I inkhawm tawh ngai em?" ka tih chuan lu a thing a, a ţawng ţha duh lo khawp mai. 

"I upat tawh tehreng nen inkhawm miah lovin engtin nge i awm theih zawk a? I nu leh paten an tir lui ngai lo che mi?" U Daizauin a lo ti ve vak vak a, mak tih hmel zet hian a en bawk a, "I bula a ţhut theih dawn chuan ka inkhawm ang" a ti a, ka ngawi ta reng a, an hausak avangin mi in an hre bel viau na a kohhran an bel vak lo niin ka hria. 

"I inkhawm ngai lo tak tak maw?" ka ngawih reng hnuah ka ti leh a, "Khawm ngai lo" a ti hmuk a, han tih vak ngaihna pawh ka hre tawh lo. Kohhran inkhawm pangaiah ngat phei chuan kan ţhudun thei dawn lo chiang sa a, naupanlaia zirtir loh pawi zia a langchhuak mek ni berin ka hria. 

Ka nu'n min rawn koh chuan "Nakin deuhah ka lo lut ang" ka ti a, ţhutna tur la chhuakin Vanmalsawma nen chuan kan ţhu leh rih a, a ţhiante pahnih chu pawnah an awm thung. 

"I nu kha a hmelţha ka ti" ka tih chuan ti lui tih hriat zet hian a ţhen suk a, amah hi ka chik ve ţhin hrim hrim a, a pa nen chauha an awmlai khan a bula awm a nuam a, a nu an hnena a awm ve hnu hi chuan a nguai riauin ka hria, ka ngaihbel mai mai a ni thei tho bawk. 

Ka kut chu lain a lamah a pawt phei a, a hum lum zui vang vang a, midangin an hmuh loh nan a jacket in a khuh a, a rukin kan invuan ta reng a. 

Ropuia thil rawn lei chu a lo melh no lo khawp mai. Ropuia lah chuan "Sensiar hla zir naah lokal ve tawh la" a ti a, chhan tuma ka an zuau lai chuan Vanmalsawman "A hman ve lo. Zir chawp ngai chu sa ţalh lo mai rawh u" a lo ti hluk a, ka nuih a za a ka nui ngam bawk si lo, U Daizaui lah chuan nuih insum zet hian min lo melh leh ţhin a, biakin a kal ngai miah lo tan chuan hriat a har ve khawp ang. 

"Zai ţhat dawn chuan zir a ngai ve ţhin alawm. Mimal anga zai tur kan ni lo a, zaipawl a nia, keini veng phei hi chuan kan zir nasa viau zel" Ropuian a tih chuan "Zir ngai lovin in hla thiam rual sa ţhap ţhap mai ta che u" a lo ti leh a, Peka leh Pektea te pawh nui ţhawin an rawn hawi a, an ţhianpa chu â an ti ve ngawt ang. 

"Nangpawn lo zir ve la kan tih dan ţhin chu i hre mai ang. Pathian faka zai tluka nuam a awm hleinem" Ropuia chuan a ti a, pawisa te min pek fel hnuah "I zir ve duh chuan min lo hrilh rawh aw" a ti a, min hawsan zui nghal a. 

"Kohhran zaipawl awmzia pawh i hre nange?" ka tih chuan "Naa..ka hre lo der a nih kha" a ti awlsam mai a, a ţhiante pahnih pawn a hriat zia an sawi a, "Ţum khat pawh kan rui phurin kan zir ve ringawt tawh alawm" an ti a, Ropuia a chhaih buai chak vang mai maiin a hre lo der a nih ber chu. 

"Sensiar thil ka lo lei aw" rawn ti tu chu ka lo en vat a, dawr hmaah a ding a, engin a chhuh fuh takah chuan kan in neitute fanu Madiki a ni tih ka hre chawpchilh nghal a, "Aw..i duh duh lo lei rawh" ka tih lai mekin a bulah Tintin-a a rawn ding lang ve a, ka ţhiannu a thlah fel tawh a nih hmel. 

"Eng nge i duh ve a?" ti a Madikin a lo zawh chuan "Ka lei ve mai ang" a ti bul hmuk a, a kun hniam a, hahdam hmel deuhin Madiki darah a khabe a nghat vel a, a awmdan chuan min ti thinrim khawp mai. 

"Vanmalsawm nau i pai a mi? I jacket chhunga puar luah kha eng nge?" a tih chuan ka kut ka la let zawk lo chauh a ni. A rukin kan inkai ve emaw tih laiin ka u in a rawn hmu tho a, a sawi ang em em a puar lian a ni lo bawk. 

"Kha i meng ţha leh peih tawh lo a i hmu sual a nih kha" nui chunga Vanmalsawman a tih chuan a nur nasa khawp mai. 

"Sensiar" hnai deuh aţanga ka nu aw lo ri chhuak ka hriat chuan ka kut ka pawt let nghal vat a, kan chevel min thlir reng tu Tintin-a ngeiawm deuha a lo nui vel te chu ka haw hlur mai. 

"I pa'n Tluangpuii te han phone lawk teh se a ti a nih chu. Mawza an kawl leh kawl loh a hre duh a" tumah pawh en mang hlei lovin a rawn phul lut a, "Phone nghal teh" a tih leh hnuah kan inleng ho chu a enkual ve chauh a, Madiki leh Tintin-a te pawh a hmu chiang tawh khawp ang. Thil tlem te an lei a, an ding ve ta reng sia. 

"Laltinkhum i pa bulah mawza lei i ngen a ni maw hei mawza zuar an awm leh awm loh a ngaihven leh chung tawh hi. Ka lei ngun tehreng nen i mawza hi engtin nge i tih bik ţhin a? I ei ţhin em ni?" ka nu'n a ti bawrh bawrh a, U Daizaui nen a kan hriat ţhan a nih laiin Vanmalsawma te ţhian ho nuih a za viau a, Madiki bik phei chuan mak a tih hmel khawp mai. 

"Mai mai ţhin a...ar ek ka indaih lo i ti reng a, i ei ţhin bik a mi?" a lo ti let a, zah hmel pawh a pu lo. Ka nu chu a dang a ni leh der tawh a, "Khawnge Vani kha? I thlah fel der tawh tihna mi?" a ti a, pawi tih hmel deuha Tintin-a lo chhing sawk ka hmuh chuan Vani leh Madiki te a kawp tih ka hrethiam nghal.

"Tu nge Vani?" Madikin a tih veleh "Vanmalsawma cousin a nia, an hming bulah Van tih a awm ve ve. Sensiari ţhiannu a ni bawk a" a ti zung zung a, ka nu kalsawn hnuah Madiki chuan "I cousin maw? Nangman i thlah thei lo mi?" tiin Vanmalsawma chu a rawn en a, a meng thip ram tawh a, a thikthu a chhiat hmel khawp mai. 

"Ka bike a chhia" ka bula ţhu pa chuan a ti thum dût a, a nin hmel em em mai lehnghal. 

"Ka nghak reng a, a lokal har ka ti reng a ni. I ţhiante pawh an awm reng a, tirh zawk tur che alawm" a ti a, a zam lo lutuk chu Vanmalsawma pawh a nui ve tawp a, "Ka cousin khan Tinkhuma thlah a duh ber a" a ti ta ringawt a. 

"Ţullo emai" a ti hlak a, Madikin thip zeta a melh tak rengah chuan "Min melh puak ange..ka sa ţan tawh a nia" nuihza aw zeta tih pahin a kutin a lo indang a, a chhaih thinrim zel hlauin a kut chu ka lo lakthlak sak vat thung a. 

"Ka ţhiannu a nia, chaw a lo ei a, a tlawngawl ber Tintin-a ka tir tawp a nih kha" ka ti a, keichu min chhang let ve lo.

"Lehkha zir rawh" a tih deuh tlat avangin an haw tur chu gate thleng ka zui phei a, a ţhiante an kal hla ta maw tihah "Naktukah ka zin dawn" a ti a, min tihder emaw ti a ka lo nuih hak hak laiin "In khuaah" a ti leh a, ka nui hmel ral riai riai chu a hmuh theih ka ring. 

"Eng nge i tih dawn?" ka tih chuan "Ka nu ka zui dawn" a ti leh tawp a, a nu'n eng nge tih a tum ka zawh chuan a hriat bik loh thuin min chhang a, a ţhianţhaber a tlawh dawn a ni mahna. 

"I nu kha a fel em? Vawikhat chiah ka la hmu a, ka la nel lutuk lo a" ka tih chuan "Fel e" a ti mawl tawp a, hreh viau mah ila a sawi duh tak mialin tiin "Tunlai chu i hlim loh hmel" ka ti a, ka ngaihtuah viau laiin nuihza insum tak hian min en a, "I ngaihbel a nih chu" a ti awlsam then a, ka ngaihbel vang a ni tak tak maithei a ni. 

"I cham rei angem?" ka tih chuan "Lehlangin" a ti leh tawp a, a phone ri mek a lak chhuah lai chuan ka lo en ve vat a, Lawmtei hming a lang kalh a, ka sawichhuak lo na a thikna a lo awm leh ringawt tawh. 

Lawmtei chu chhang lovin phone a ak ţha leh a, "I chhang dawn lo mi?" ka ti leh ang lawi a, "I phal loh kha" a ti a, a la nui zui. 

"Engtin nge i hriat?" ka tih chuan "Hrilh tu ka nei" a ti fiamthu a, ka ner nang nang lai chuan "Lut rawh lehkha va zir rawh" a ti a, ka dara kuahin ka chhipah a fawp zauh a. 

"Pathian chhiahhlawh pa kha hnaih lutuk lo ang che aw" a ti ve tak na a thu min pe a ni ber. 

"Ropuia kha maw?" ka tih chuan lu min buk khum nghutin "A endan che kha ka duh lo" a ti a, hrethiam lo deuh a "Engtin nge min en?" ka tih leh chuan "A en che a ni mai" a ti deuh tawp a, min thlah hmain ka hnungzang a chul thuak a, "Thudik a lanchhuah hma hian thu leng vak tam tak a awm hmasa ţhin a, thudik ka hriat chat hunah zep ţhen nei lovin ka hrilh ang che. Ka zawng mek a, lo nghak rawh" thutak zeta a tih hnuah min kalsan a, thudik tak hriat a tum chuan a ngaihsak miah lo emaw ka tih lai te khan a lo ngaihven ve char char tihna a ni mai.

A kal liamna lam chu enin keimahin ka nui var var a, hmelhriat loh chuan min hmu se min hlau maithei; ka thil hriat duh ber ka bialpa lehnghalin a ngaihven ve chu lawmawm tak a ni. A naupanlai chanchin a sawi ngai lova, a nawm leh nawm loh takngial pawh min hrilh lo na a nuam tak a nih ka ring lo ve tawp a, a khua a har ţhin ang ka ring. Chuvang chu aniang tun thleng pawh a ţhian a ngainat em em ni. 

Inchhunga ka luh veleh ka pa'n "Ka bulah lo ţhu teh" a ti a, a hmel thutak zet leh a ţawng dan te chuan min ti hlau a, ka thinphu pawh a rang nghal vekin ka hria. 

Ka pa bulah chuan tim daiin ka ţhu a, zawi deuh a ka hnung a ben thak hnuah "Lehkhazir nachang i va hre lo ve" min ti a, chhuanlam tur ka ngaihtuah kual laiin "Naktukah ka haw tawh dawn a, ka lokal leh lawk theih loh takin thu ţha ka hrilh mai mai ang che" a ti a, ka intih nulat ve tawh nen, naupang ang maiin min la cheibawl a, hei hi ka thil nin ber a ni hial ang. 

"Sawi la" ka ti tawi tak a, vin lo mah ila ka ning tih chu an hria ang. In khuahkhirh leh lutuk hi chu a ninawm ve em a ni.

"Ngaihzawng neih hian neih chintawk hriat tur a nia, zirlai nghawng khawp a neih loh tur. I ngaihzawng hian damchhung a daih kher lo thei a, hmangaihna takngial pawh hian tawp chin a nei ve ţhin a nia, thiamna chuan dam chhung a daih dawn a, i thiamna a san chuan hna sang vuanin hlawh ţha deuh i nei thei dawn bawk a, ţhenkhat phei chuan an fate zirlai an nih chuan kţp vela inhman te pawh an khap hial ţhin. Nangchu engmah kan khap sak lo che a, kţp a inhman kan phal a, ngaihzawng neih kan phal bawk a, mahse uchuak taka inhman leh mi aia nasa bik a ngaihzawng neih loh tur. In bul vela mite mit tikham khawp te khan in lo awm ange" a ti charh charh a, ka ute angin min vin pung pung lova, dawnsawn a nuamin a thusawi chu zawm vek theih a chakawm zawk. 

"Lehkha ka zir ţha alawm. Lehkhazir hun ka bituk a, chumi chhung chuan phone pawh ka khawih ngai lo" ka ti a, a lawm hmel vur vur khawp mai. 

"Tintin-a mawza chu?" a tih veleh "Awii ka theihnghilh" ka ti hluai a, ka nu'n rum deuhin min lo melh a, biak tum reng chungin ka lo biak theihnghilh palh a ni. Haihawt lutuk hi chu buaithlak ve det chu a ni. 

Tlai khawhnuah ka phone leh a, an la kawl nual thu an lo sawi a, anni hian china a mi an la ţhin a, an bungrua hi a nalh hlawmin mi pawn an zuar chhawng nasa ţhin. Mawza chiah ka zawt a, anni chuan an bag lak thar te chu en ve turin min hrilh a, ka lo aw liam vel mai mai a, a ţha pahnih khat ka neih chuan ka duhtawk mai zel a, ah sen loh khawp a tam ka kawl ve ruih ngai lo. A dang pawh nei ila ka thlakthleng reng peih dawn chuang lo. Eitur leh lehkhabu velah hian pawisa ka ui vak lo a, thil dangah chuan ka uikawm ve reuh khawp a, min ngei phah pawh an awm hial a ni. 

"Naktukah amah han kal rawh se" ka nu'n a tih takah chuan pindanah ka lut a, bawmte bawk kha ka phawrh leh a, ka chhiar ţan lehnghal a. Vanmalsawma nu Mawipuii nen an inkawmngeih zia a ziak nasa a, mi khawsa thei tak an nih thu a inziak bawk a, ţhenkhatah chuan Mawipuii ang nih ve a chak thu te, pawisa in thil a tih theih zia te a ziak lang nasa a, a indawt a chhiar vek duh mah ila ka thei hlawl lo ţhin. Ka en diat diat a, 'Ka u pawh nise ka hmangaih a, a bula awm reng ka chak. Ani chuan nupui a nei a, a nupui leh ka ţhiannu Mawipuii te pawh an inkawmngeih viau tawh. Ka u nupui, kan monu hi ka ngaina tawh lo' ti a inziak ka hmuh chuan ka tawp leh chawt a, a buaithlak hle mai. Ţawngka a min hrilhfiah tu an awm loh phei chuan engmah ka hrethiam tawh lo. Diary lah hi a mumallo in a ziak khat tih a hriat a, tuna ka chhiar lai phei hi chu rapthlak tak a ni. Nau tak tak anga en tu Pa Muana a ngaizawng ve ţhin tihna a nia, Ni Mami hi taimak vang liau liau a hausa ti a ka lo ngaihsan ve theih nen, ka ngaihsanna zawng zawng a bo vek tawh. A thu ziah hi tak tak a nih chuan Boomer-a nu thi ta leh tun a Vanmalsawma nu pawh hi an lo inhre ve reng tihna a ni mai. 

Pa Muana nen an chanchin inziahna chu en kanin a pawimawh deuh lai leh ka hriatthiam ve theih tur chin ka zawng kual a, ka pa a rawn lut thut a, ka phu nasa lutuk chuan a nuih ti za in "Thil sual ti ang mai alawm i nih le" a ti a, khuma lehkhapuan in chap darh nuaiah chuan eng nge inziak pawh en si se lovin "Lehkhazir hi a ţha a nia, kha i thiamsa i thliar nge pawimawh tur chin i en?" a ti a, "A pawimawh deuh tur awm ang ka zawng a" ka ti a, ka pa hi dawt ka hrilh hreh a, tunah pawh khan dawt ka sawi lo. Ka thil tih lai diktakin ka hrilh a, zirlai a ni lo tih ka sawi tel lo mai zawk a ni. 

Ka pa chhuah hnu a ka enkual chuan hawrawppuia phir te pian ni tih inziak a hmu a, a hnuaiah ni leh thla leh kum a inziak bawk a, diary min xerox sak tupa khan chiang deuh a hmuh chin a nei mial angem le tih te ka ngaihtuah a, keipawn a xerox lai khan ka lo en reng a, hei hi ka hmu hauh lo. En bik nei lova ka phek en vek vang a nih ka ring. 

"Phir chu an ni chiang alawm" tih pahin phone ka khawih a, an hming inziak lo mah se an pian ni leh thla te, an pianna hospital hming thlenga a inziahna lai chu thla ka la a, U Vanneihi hnenah ka thawn a, tihian a ni pawn a nauin phir pui a lo nei reng tih a hre ve thei tawh ang. 

"Mu ang..zan dangah chhiar zawm leh mai rawh" U Daizauin a tih takah chuan ka indahfel a, phir an nih zia ziak ngeia ka hmu ta chu ka zang hawkin ka hria. Tunah chuan sawi mah ila tuman rinthu mai mai an ti thei tawh lo ang. 

Kan khua an thlen hnuah Vanmalsawma chuan min lo bia a, canteen a ţhiante nen kan awm laiin a ni nghe nghe. 

"In thlen chauh te chuan in va chhuak tlai awm ve. Lehlang tur te chu chhuah hma zawk tur cheu alawm" ka ti nang nang a, "Nia" a ti ringawt a, ka hnen bika sawi tur a hre lo thei lutuk hi a chang chuan min hne emaw ka ti rum rum zel.

"Kan riak leh si dawn a nih hmel" a ti ban charh a, a hreh tih ka hrereng.

"Khawiah nge in riah dawn?" ka tih chuan "U Faktei hotel ah" a ti a, ni Mami hotel tihna a ni. 

"Pindan awl a awm em ni?" ka tih chuan "A thawl lai tak zawk aniang" a tih hnuah Ni Mami chanchin ka zawt a, "A bia che em?" ka ti a, a biak ţhat thuin min chhang a, a mizia a lo mak reuh hle mai.

"Engtinge min hre lo anga i awm ti rawh" ka tih chuan a nui hawk a, ka nuih a za ve lo nasa mai. A chanchin mak pui pui, ama ziah ngei ka hmu tawh bawk nen, ka ngainat ve na ţhin te kha a bo zo a, nau tak tak anga en tu a ngaizawng daih thei te kha mak ka tiin ka ten deuh tlat a ni ber. 

U Vanneihi pawh khan a pa a zawh chian tur thu min hrilh a, chanchin min la hrilh lo thung a, diary hmangin thubuai tam tak an chingfel tawh a, tualthattu tawrawt tak tak an manchhuah phah bawk a, keipawn diary hlui lam tawh, hman rim leh khawih chet ngun tih hriat zet aţangin mi chhungkaw thuruk ka hriatchhuah phah ţeuh dawn a nih hmel. 

"I nu chuan ţum dangah a tlawh ţhin em?" ringhlel deuh tak hian ka ti a, tun a taka ni Mami hmu tura a kal rum rum hian chhan engemaw a neih ka ring. A hriat bik loh thu bawkin min chhang leh a, kan thusawi nen a inrem lo lutukin "Min ngai em?" a rawn ti ta daih a, a naupangchhia lutuk chuan nuih a ti za. 

"Ngai ve bawk ang chu mawle" ka tih chuan ka ţhianten hmui an lo ti pawrh nasa a, min ei lo ni awm taka an awm vel chu nuih pahin "I lo haw vat dawn nia" ka ti a, inhmu reng thei lo rau rauah pawh khaw dang daiha awm chu a dan a dang bik. 

"Ka pa pawh a lo haw thla a, mahse hotel ah khan an lo lut ve kher lo ang" ka tih chuan "I lo leng thei tawh ti mai la" a ti a, a hmel hmu kher lo mah ila a nui tih ka hre thei. 

"I u pawh ka hmu. Hmanni a phur haw tu che kha" a tih chuan U Mala a nih ka ring nghal a, "Eng nge a lo tih?" ka ti vat bawk.

"Ka zawt lo" a ti liam satliah a, form a hak loh thu a sawi bawk a, a ţhiante a hmu a nih ringin ka ngaihven tehchiam lo. U Daizaui sawi ang khan hotel ah chuan thil inphum ru eng emaw a awm maithei. Mahse ruang ni lovin ruihhlo a nih ka ring. Aa...chuzawng ka buaina tur a ni lo, ka hriatchak ber ka hre tawh a, thil dang intihbuai tir ka tum tawh lo. 

In a ka haw chuan Tintin-a ka zawng nghal a, zanah ka mut hnuah a lo haw a, zingah ka kal hmain a tho leh bawk si lo, a pindanah ka lut tlang a, khumah chuan mask leh tarmit dum vuahin a lo mu a, "I mut dan chu a va mak ve. Hrilh tur che ka nei ania" tih paha a taksa a ka nam chu a phun hluk a, na zeta ka banrek a hum hnuah a paih lawp a, a kut chang te chu a pilh nasa mai. 

"I dam hunah ka hrilh mai ang che" tih leh a pindan aţanga chhuah ka rual a, a insual leh pek tawh a nih hmel.

"Nangni pahnih inngaizawng hi in romantic lo ve e. Nang lah a chanchin hriat tum reng rengin i hmanhlel a, pakhat lahin phir pui a nei tih reng reng a hre bawk si lo" U Daizauin a tih chuan ka nuih liam mai a, tunah chuan min phuar tu a la awm a, ka hnaih viau emaw ka tih chang pawhin amah hi ka hrechiang tak tak loah ka ngai tlat a, inkawp reng siin kan inkarah hian min daidangtu bang a awm tlat a, ani pawh keimah ang chiah a a awm ve ka ring. Bang hi kan ţhiah hunah kan inpawh thei chauh ang. Chuvang chu alawm midangin an nin khawpa a chanchin ka ngaihven ni.

CONT..