VANMALSAWMA-20

VANMALSAWMA-20

Ka class bang chu scooty tharin min lo hmuak a, ka phur vak awm pawh ka hre lo. Ka nu leh pate lo in video call ve mek chu ngawi renga kal pelin pindanah ka lut a, Vanmalsawma te rawn haw ni tur a ni tawh a, mahse thawm a la rawn nei lo. Message ka thawn ţeuh tawh a, min chhang lo zel a, ka thawn peih tawh lo. 

Min koh hmain bualin ah ka lut a, hruai tu hranpa ka neih loh chuan ka ţhiante rualin ka haw ve mai zel tawh a, vawiin pawh nidang aiin ka tlai deuh. 

Bualin aţanga ka chhuah chuan ka nu'n ka pa be turin min hrilh a, phur vak lo chung chuan ka call a, scooty an la lui ţalh chu ka ngaihdan a ni lo lek lek a ni. Mahse ka pa chuan "Daizaui pawh khan khalh zir ve se la, dawr bungrua lak a ngaih thutah pawh taxi kher lovin a phur ţeuh thei dawn tho a" a rawn ti a.

Pawnah ka chhuak a, intuam bur chungin Tintin-an a thlek kual vel a, U Daizaui a ko deuh reng bawk a, misual ang maia intuam bur chung hian scooty la turin a chhuak a ni awm sia, ka u mah nise zahpui chang ka nei ţhin a, a zia lo tak tak a ni. 

"Ka pi lo ko teh" a tih chuan ka pa be reng chungin inchhungah ka lut a, "Pi, Tintin-an a ko che" ka ti a, pindanah lut lehin ka pa nen a kan inbiakna pawh chu ka ti tawp a. 

Phone ka en leh a, Vanmalsawma message hmuh tur a awm lova, U Vanneihi takngial pawhin min lo la be lo. Ni Mami leh Pa Muana te ka rinhlelh sa tawh vang nge ngaihţhat lohna ka nei tlat a, a nu nen a kal an nih avangin ka call tlut tlut ngam bawk si lo, kap tu nei ranin ka awm nileng ţhak ti ila ka sawi sual lo khawp ang. 

"Sensiar" an tih leh takah chuan "Ninawm e" ti nang nang chungin ka chhuak a, rilru buai ru deuha kan awm hi chuan thinchhiat a lo awl khawp mai.

"Chaw lo chhuang rawh" a ti a, dawr lamah a kal zui nghal a, Tintin-a lah chuan ka pi chu "Chuang rawh le. Scooty tharah hian i chuang hmasa ber ang, i phu tlat" a ti a, ka pi tih lawm a tum viau chuan pawisa a dil duh a ni ţhin. 

Ka nu min tirhna a kal ta mai lo chuan ka ding ve rih a, Tintin-a vuan ţung chunga scooty a ka pi lawn chu ka en a, a lawn pawh a ni lo, an inhlang a ni zawk mah. Engtik laiin nge ka nuih pawh ka hre lo ka pi a ţhut fel meuh chuan za deuhin ka nui chhuak hak hak tawh a, "Ka pi hian khalh zir hmasaber rawh se aw" fiamthu a Tintin-an a tih chuan ka lo bu nghat nghat a, thil dang vangin hlim lo mah ila chhungte bula kan awm tam chuan hlimna tur tawk a lo awm ve zel. 

Ka pi chu thla te laksakin ka u chuan a pawm thla a, khalh em in zirtir lo mah se ka pi pawh a lawm hmel khawp mai. Tar hi chu an lawmna a chhe tawh a, thil ho tein an lawmna a siam a, an thinrimna pawh a ho tho a, an naupang ţha leh an tih hi a dik khawp mai. 

Chaw ka chhum zawh veleh dawrah ka phei a, ka nu chuan "Ţhenawmah ka kal lawk dawn. Chawhmeh siam ngai a awm lova, chaw hmin hunah i lo chhuang lum tawp dawn nia" a ti a, min kalsan zui nghal a. 

"I va ngui ber bur ve..in inbe thei nange?" awmze nei deuh a U Daizauin a lo tih chuan ka bu nghat a, "Chanchin tal min lo hrilh tur a nia, ka ngaihtuah zia a hrereng awm sia" ka ti zuai raih a, hneh zet a a kuhva thel ka en reng lai chuan a kut a chep a, ka mit ka hup rang rapthlak lutuk. 

"A thi em?" ka ti a, ka mit hup reng chung chuan ka ţhutna aţangin ka tho a, "Thi nasa, tui min lo suah teh" a tih chuan pawnah ka tlanchhuak a, thisen hi ka hmu thei lova, ka nu leh pate ngei pawh thisen chhuak khawpin lo inhliam ta se ka buaipui hleithei chuang lovang tih tur a ni. 

"Chhuatah a far a nia tui chu lo suak vat teh" vin zeta a tih chuan Tintin-a ka au a, dawr kawta awm ka nih tawh avangin kawngpuia lirthei vei vak chu chiang takin ka hmu thei a, Vanmalsawma pawh ka hmu chiang khawp mai. Hmeichhia a phur a, biak ka tum nasat tehreng nen, an rawn haw thu takngial pawh sawi lovin hmeichhia a phur a, kan in lam a rawn hawi eih lo lehnghal. Min tlan pel hma viau na a rilruah an cham zui veng veng a, hmeichhia kha a nu a ni lo tih ka hre bawk. A hmel ka hmu chiang lova, a sam sei buang thang erawh ka hmu chiang ngang mai. 

"Sensiar" U Daizauin a tih laiin Tintin-a chuan "Ngatinge i au vak vak a Lawmnasangzual?" a rawn ti vin nghek thung a, hamhaih zetin dawr ka kawk a, "U Daizaui a inchep" ka ti mawl tawp a, kawngpui leh kan in chu ka en tawn reng a, nichin lawka min tlanpel tu te khan rilru an luah hneh takzet a ni. 

Thisen ka hmuh theih loh zia hriain ka u chu a lo tlan vat a, ka nu a awm bawk si lo nen U Daizaui chu dawr aţangin a hruai chhuak a, tih tur ber pawh hre lovin inchhunga an lut chu ka zui lut veleh tawp a. 

U Daizaui kut a sil sak lai chuan "First aid box kha lo la teh. Lapua a tlem chuan ka nute pindan a mi kha lo la tel la" a ti zung zung a, first aid box leh lapua dawhkana ka dah hnuah gas ka ti hniam a, tukverh aţangin pawn lam ka thlir leh zeuh ţhin a, Vanmalsawma mai mai chu rilru a ti buai vek alawm le. 

"I va â ve Daizau..mahni kut te cheh tur em ni? I kuhva thel hi i inla pro mah mah zel a, midang hmuh turin en loin i thel leh vel a ni maw?" a ti a, thisen hmuh tur a awm tawh lova, U Daizaui kut a tuam sak lai chuan ka ding hnai ve a, "Thisen hi ka hmu hleithei lo a, a na viau em?" ka tih chuan Tintin-a zawkin min melh rum viau mai. 

"Nimin tlaia min hrilh i tum kha eng nge?" a ti ţha leh a, lu ka thing mai a, sawi chakna pawh ka nei tawh lo. 

"I tuam rek lutuk tuam ţha leh teh" U Daizauin a lo ti ta hlauh a, ţha deuhin an intuam ţhat sak a, an zawh hnuah thisen vel chu U Daizaui bawkin a ti fai a, keiin chawhmeh ka chhuang lum thung a.

Chaw ei khama Vanmalsawman min lo call chuan ka chhang duh bik lo. Khumah ka ţhu a, phone chu ka bulah dahin ka en tawp a, be chak viau mah ila ka la dawn lo ka ti ve tlat. A rawn call tlut tlut takah phei chuan phone ka switch off daih a, duh viau mah ila a awmdan angin ka awm ve thiam tho tih hre ve rawh se. 

"Sensiar hei Ropuia a lo leng" an tih takah chuan pindan aţangin phone pawh keng lovin ka chhuak a, "Dawrah i awm si lo a" a lo tih chuan "Nia ka la awm lo mai mai" tih pahin a bulah ka ţhu a. 

"Thawhţan zanah inkhawm ang aw ka lo sawm ang che. Kan group a inang a, kan inthurual vek thei ang" a ti a, inkhawm vel lo chu sawi tur a hre ve mang ngai lo. 

"Naktuk inrinni a ni chauh a, i sawi hla emai" ka tih chuan "Inhrilh lawk zel a ţha" a ti mai a, Ropuia hmel chu ka en ţhin a, Vanmalsawma runluih ve ka chak a, a awm ang chiah a awm ve ka duh lutuk chuan Ropuia chu hmuh ţhat ka tum a, ka ţha tih zawng a ni der bawk si lo. 

"Inleng dang i nei dawn em?" awmze nei deuha a tih chuan lu ka thing a, ka nui tawi tak ringawt a, chung lama a tarmit nawr chhoh pahin ka lam a lo hawi a, hmelchhia ti a sawi tur a ni hauh lo na a ka ţha tih zawng tak nise ka va ti tak. 

"In inţhen em ni? I va ngui ve" min ti a, "Ţhen lo ang" ka ti a, ka inringtawk vak tawh lo. Dawr ngaihven turin ka nu a chhuak a, Ropuia nen hi chuan kan inngaizawng lo tih an chiang bawk a min veng ru deuh ran ngai lem lo. 

"Naktukah kan huanah kal ila" a tih chuan "Khawi laiah nge?" ka lo ti vat a. 

"Huan han tihah zau tak phei chu a ni lo..kawmthlang a vulh tawp aiah kan tia vawk te kan vulh a, thlai tlem a awm bawk a" a ti a, a awmna te chu min hrilhin a ute nupa ruihhlo duh ve tak ten an awm chilh thu min hrilh tel bawk a, Vanmalsawma te in kan kalpel ngei ngei a ngai dawn tihna a nia, hmanni tlaia Ropuia ka hmu hlawl pawh kha a huan kal haw a nih hmel. 

"Ka nu ka lo dil ang. Nangmah nen a nih chuan a phal mai ang" ka tih takah chuan a phur ve khawp mai. 

Zingah ka nu ka dil a, a lo phal ve mai a, "I pa'n scooty khalh zir rawh se a tia, lo haw har lo la, tlai daiah Tintin-a nen inzir dawn nia" a tih te chuan ka aw liam mai mai a, huan kal tur chuan ka insiam nghal mawlh mawlh a. 

Lukham hnuaia ka phone dah chu lain ka charge a, ka la switch off ta reng a, kan kal hunah bak ka on lo ang ka ti ve tlat a ni. Ka dawhtheih viau lai hian ka luhlul tel tho a, midangin ho an ti a, min ngaihvenpui duh miah lo chung pawhin keimahin Vanmalsawma te chungchang pawh hriatchian tumin ka bei lui ngat ngat a, phone pawh ka dah tawp a, zan mut hmaa online ve zuai zuai te chu chak viau mah ila ka insum ţang ţang a, ka lungawi lo tih a hriat loh ka hlauh luatah tun thlengin min biak theih loh turin ka la awm. Duh huam anga ka lan a, a tih apiang awih a ka aw liam zel chuan ngaiah min nei ang a, ka mitmei ven nachang a hre lo thuai ang. Hmeichhe pakhat ve mai anga min ngaih ka duh lo a ni ber. 

Ropuia lokal pawh chuan "I biak theih loh a" min ti a, ka inpeih ţep tawh thu sawiin pindanah ka luh san leh rih a, thawhţan zan a inkhawm ve tura ka u a sawm ri ka hriat chuan mahniin ka nui vur vur mai. An insawm chhuak awm der si lo. 

"Member kan tam ang huin inkhawm kan tam ţhin lo a, inkhawm hram hram tum ila aw" a ti a, Ropuia hi chu mi ţha duam mai a nia, guest lecturer a ni ka tih tawh kha. Amah hi a chut ka ti dawn nge sawi dan vak ka thiam lo. A dawhthei a, zawhna ho te te pawh zawt ila min chhang vek peih a, keiphei chu awm thar deuh kan nih avang hian min ngaihtuah a, Vanmalsawma te inah pawh min zui tlat duh hial a, induh leh inla ti a sawi tu tumah an awm lovang. 

"Hnatlan naah te hian lokal ve ziah rawh. Kan hnatlang ho dial dial ţhin dawn nia" a ti a, kţp ah pawh hian hruaitu ţha, mi inngaitlawm leh dawhthei te hi an pawimawh ve tho a, Ropuia hi chutiang mi chu a ni. 

"Ka lo tum ang" ka u chuan a ti a, midang a fiam angin a fiam ve dawn lo emaw ka tih tawh hnuah "Fel deuhin awm phawt ula ka la rawn telpui em em ang che u. Min hmu duh a min zawng tu te ka hnar ngai hleinem" a tih chu za lo deuha Ropuia nui riin a zui a, keipawh lukhum khumin pindan aţang chuan ka chhuak ve a, phone ka pai ve thlap na a ka la on duh chuang lo. 

"Vawk chaw pe tur si i va inchei ve" ka u chuan min lo ti a, Ropuia te vawk ka en dawn tiin ka nu ka dil tak alawm. 

"Lo buai ve lo mai teh" ka ti hlak a, a nui vur vur lai chu naupangchhia zetin lei ka chhuah khum a, Ropuia chu kaiin ka chhuahpui zui a.

"Eitur pai ve ang" ka ti deuh tlat a, dawr a mi eitur ka lak lai chuan "I ngaih anga ropui a ni dawn lo a nia" a lo ti ve sek a, in a awm a rilru kawm melh melh ai chuan a nuam tho ang. 

"Sangha a awm em?" ka tih chuan "Aw..awm e mahse" a tih lai chuan lo pawt chatin "A ţhat chu..kal vat vat ang. Thla kan la chuai chuai dawn nia" tih paha phone ka hmuh tir chuan a lo nui ve ta ringawt a. 

Kan kal tur chu "Lo haw har suh u aw..sangha dil a awm phei chuan tuiah te i tla ange fimkhur hle ang che u" tiin ka nu'n min au zui a, kan ţhian dun chuan kan lo nuih nasa mai. 

Vanmalsawma te in kan thlen hma aţang tawhin kawt laia a awm chu ka hmu thei a, an ui lianpui kha kuahin an in luh hma a step tawite awmah chuan a ţhu a, "Tlan pel rawh aw" ka tih laiin Ropuia chu an in zawnah a ding a, tlanchhiatsan ka tum pa chuan min rawn en chiang khawp mai. 

"Sawmte thawhţan zan kha aw..joint group night a nia, lo inkhawm ve rawh aw. Kan lam suau suau dawn nia" a ti leh tawh a, Vanmalsawma chu a meng nur nasa mai. Ka en reng duh loh avang chuan a piah lawka a bike inhung chu ka en daih a, chhanna kan dawn loh avang chuan Ropuia chu a tlan leh a. 

"Tlanpel nghal mai ta che inkhawm turin i sawm ve kher a. Bakah i mi hmuh apiang inkhawm tur a sawm vek a ngai hleinem" lungawi lo ru tak chunga ka tih chuan "Thlarau bo pakhat tal hruai lovin kan thi ang tih a hlauhawm alawm. Awm hmunah pawh kan missionary thei tih hriat tur a nia, ram dang daihah kal lo mah ila kan hmuh phakah hian thlarau bo, Pathian belh nachang hre lo tam tak an awm a, an nun tuihal zia sawi chhuak lo mah se min mamawh teh a nia. Inkhawm te hi ho viauin a lang a, mahse Pathian bia a darkar tlem te chauh biakin chhunga an awm ve pawh an tan chuan a ţha lutuk. I hmuh chuan nangpawn sawm zel rawh. Ţhenkhat chu inkhawm ve chak, kan sawm loh avanga inkhawm ngam lo, kan sawm hun nghak ran te an awm ve ţhin a, kan sawm chhuak vek thei lo a nih pawhin biakin chhunga hruai luh theih chin chu kan nei ngei ngei ang" a ti a, kan thusawiin a zir bawk a kan hnunga bike tlan ve reng chu kan lo hre lawk lo. 

"Kawng a zau a sin mawle" Ropuia chuan a ti a, min tlanpel duh bawk si lo, kan hnungah chuan a tlan ve reng a, Vanmalsawma a ni tih ka hria a, Ropuia chuan a hriat leh hriat loh ka hre lo. 

"Tlan chak deuh mai rawh" ka tih lahin "Scooty hi ka neihna a la rei lo a, tlan pui vak vak a tan chuan ka la ui deuh. Mahni thawhchhuah ngeia kan lei hi chu kan lo dim nge nge a nih hi. Ngaihtuah vang vang teh, i chhungten thil man to an leisak ang chiah che kha i pawisa thawhchhuah liau liauin lei ve ta la, nangman i lei zawk chu i dim viau ang. Chutiang chiah chu a ni mai, kan thawhchhuah a kan lei hi chu a hlu bik a, kan dim lo phal hleinem" a ti leh tawh a, thil sawi hlekin zirtirna min pe zel bawk sia, ţawng ve ngam pawh a ni lo. 

Hawilet lem lo hian "Ţhianpa min tlan pel mai rawh" a ti ţhin a, kan hnunga tlan pa chuan a hre thei awm tawp si lo. 

"Tlemin tlan chak deuh la kan tlanmuang leh mai dawn alawm" a tshirt hmawra ţham paha ka tih chuan "Ka nakah khan khawih suh aw dek ka hua a nia" a ti duh lek chauh a, ka thin a rim lek lek tawh a ni. 

Hawilet meuhin Vanmalsawma chu rum deuhin ka melh a, helmet chhungah chuan a la nur nang maithei a, min nuihzat viau maithei bawk. A hmel ka hmu ve thei tlat lo a, kan inhnaih viau tawh thung. 

"Min tlanpel duh chuang bawk si lo a min hnaih tawh teh mai a nia" ka ti chul a, a nak a khawih fuh palh hlau deuhin a kawr hmawrah bawk ka pawt leh a, dek haw lo se han kuah vel ila ţha tur. Min rawn hnaih tawh tho bawk a Vanmalsawma hmuh ngei turin ka kut awl lam zawk chuan Ropuia darah ka vuan a, a lo che zawk a.

"Awii..a za lutuk..Sensiar ka darah khawih suh" a ti lehzel a, hepa hi a va maksak tak. 

Ka kut ka la let vat a, kan hnunga tlan pa chuan min nuihzat tawh ngawt ang. Ropuia lah chuan "Sa huat ka ngah angreng a, dek haw mi nih chuan khawi lai pawh hi a za hma a, keimah bikah chuan ka zakhnuai leh ka nak te, ka dar te hi a ni deuh ber a" a ti a, hetiang chuan kan in runluih thei lo tawp ang. Lehkhathiam deuh...â deuh phuang si hi a ang ka ti ber. 

"Chupawh nise i tlan chak deuh thei mai lo mi? I khalh thiam tho a, eng em kan tawk nang" ka tih te chuan "Tlan chak loh a him ber. Eng emaw pawh tawk palh ila kan tlan chak chuan miin min thiam lo nghal ringawt ang. Tlan chak lo mah ila kan thleng dawn tho a, vanduaina thleng thei tam tak kan pumpelh bawk ang a" a ti a, ka ngawi reng ringawt tawh. 

Ropuia din rualin kan hnunga mi chu a ding ve a, hawi pawh ka hawi let duh tawh lo. Ka chhuk rual chuan "Sensiar" a lo ti a, hre lo der hmakin Ropuia banah chuan ka kuah a, a sa huat lo lai ka chuh a ni. 

"Ehe..Sawmte i lokal ve dawn mi?" Ropuian a tih chuan tum loh deuhin ka hawi phei veleh tawh a, "Lokal ve la" ti a a sawm leh laia ngaihnep hmel zeta a lo ner sawk te chu ka ngei lutuk ringawt. 

Bike aţanga chhuka min rawn pan chuan Ropuia ka kuah nghet sauh a, thil ti sual tu a nia, ka sawi ngai lovin a thil tihsual a hre vek ang a, hetianga ka awm chhan pawh hi keimah ang bawkin a hrechiang ang. 

"Tah khuan i kal dawn maw?" a ti a, Ropuia te huan lam a kawh lai chuan ka lo bu nghat a, ka tumruh zia a hmu thei ngei ang.

"Kal suh" a tih laia Ropuian "Ka tel ve dawn alawm" a lo tih chuan ka ngaih a ţha lo ţan a, huan chhunga a ute chenna tih loh in dang a awm lo bawk nen an awmdan chuan min ti hlau ti tih der mai.

"Huanah khuan eng nge awm a?" ka ti a, Ropuia zawk chu ka en ran bawk a. 

"Vawk a awm. A hlauhawm reng reng loh. A chhak lawkah in a awm a, helai bik hi a fal deuh a, a thlang lawkah khuan in a ding thluah alawm. I hmu pha lo mai mai a nih kha. Tlai lamah phei chuan exer la ho an rawn inzui leh duah duah mai ang" a ti a, ngaihţha vak lo chung chuan huan chu ka en a, hetiang hmun chu nei ve ila ka pa'n in ţha deuh a sa daih tawh ang. Kan veng hi a mawngin chhuah vah a harsa a, nuam sa deuha chhuah duh phei chuan pawisa sen ţeuh a ngai. Mahse hmun rem deuh deuh a tam lutuk ringawt. Helai hmun te hi nakinah chuan a la lun leh awm tho sia, hausa tawk chu ni ila ka lei hmiah hmiah ang mawle. 

Ropuia te huan pawh chu kawngpui aţangin a hla lem lo a, tlem kan chhuk a, a ute in kan thleng a ni mai a, kawngpui lam ka hawi chhoh chuan Vanmalsawman min lo la thlir reng chu ka hmu a, ka khawngaih ve lek lek a ni. Phone a phawrh a, keimah bawk min biak a tum aniang beidawngin a ak leh a, kan che vel min thlir lai reng chuan inchhungah kan lut ta daih a. 

Zu rim lo nam huam chuan pum a ti let but a, ka luak a chhuak nghal ut ut a, chutiang hmuna min kalpui chu Ropuia pawh ka hmu dik lo lek lek a ni. Mahse "Ruihhlo an duh nupa ve a, veng dangah an awm ţhin a, ka nuten an ngaihtuah deuh vangin hmuh phakah kan awm tir a nih hi. Anni nupa hi buaipui ngai lo se chu helai hmunah hian in kan sa rup tawh ang mawle" a ti ta hlauh a, no a let rem rum a, mei vap a tamin meizial bung a tam viau bawk a, inchhung chu a ţawp a ni tawp mai. 

"Khawiah nge sangha chu?" ka tih chuan kil khata aquarium tetakte chu a kawk a, chu pawh chu tihfai ngai loh tih hriat zet hian a bal khawp mai a, ka hnual rawih thei alawm mawle. 

"Ka nu'n dilah in tla ange a tih te khan i nui ve sia" lungawi lo ru taka ka tih chuan "A fiamthu emaw ka tia..helai hmunah sangha dil a awm thei nang" a ti a, aquarium chu enin ka chek tlak tlak a, vawk an awm pawh ka ring tawh lo. 

A ute nupa chu kan thawm hriain pindan ni awm tak aţangin an rawn chhuak a, an pawr fap mai. Mipa zawk chu a hmaiah ser lian tawk a awm a, chu chuan a ti rapawm a, Ropuia chuan hmeichhia chu kawkin "Ka u a nih hi" a ti a, hmeichhia a nih vang aniang a chhungte pawn an ngaihtuah em em ni. 

An nupa chuan tum burin min en a, an hming takngial pawh min hrilh lo. A pasal ni awm tak phei chuan min en duhin ka mangang lutuk chuan phone ka on ta ringawt a, Vanmalsawma kha ka lo sawm ve lo a ni ka ti rum rum tawh. 

"Vawk chaw ka pe tawh ka tih kha, ka nuten an lo tir leh ţalh che mi?" phak chuap hian hmeichhia chuan a ti a, a hmai a tuai puat a, a biang te chu a vung deuh luk ni maiin ka hria. 

"Ka ţhiannu ka lo kalpui mai mai a nih hi" a ti a, ţhutthleng a ţhut pah chuan ţhu ve turin min sawm zui zat a. Phone ka bih a, message a tam khawp mai. Ka ţhiante pawn min biak theih loh vanga an mangan thu te min rawn hrilh a, message ka en lai chuan Vanmalsawman min lo call a, ka chhang rang khawp mai.

"Lo chho rawh" bul zet a a tih chuan ka lo hnial a, Ropuia lah chu thlamuang deuhin a ţhu a, thlang lama vawkin chu a thlir a, hlau angin a awm lo a, nuam lo ti hmel pawh a pu lo. 

"Ka hawsan dawn che" a rawn tih chuan "Haw rawh" ka ti leh tawp a, phone ka on tawh chuan duh duh hunah ka ko thei tawh ang. An in a han hla lutuk chuang hleinem. Phone a dah hmak a, min haw san duh tak tak ka ring bawk. 

Pawnah chhuakin thlanglamah kan chhuk a, "Kan hmangaih sia, ani lah hian zu a in reng a, amah ang tho pasalah a nei a, ţhen rawh kan tih lahin a ţhen duh bawk si lo. Ngaihngam deuhin awm rawh aw engtinmah an ti lo ang che" a ti a, kan hmangaih tak te ruihhloin a tihbuai chuan hlimna famkim a awm thei lo, kan chhungkua pawhin a kan tawn lai mek a nia, a dinhmun chu ka hriatthiampui khawp mai. 

Vawk chu pathum chiah an vulh a, thlai pawh a awm lo. Engkim mai chu a roin enkawl uluk loh tih a hriat ngawih ngawih a, a ţawp hle bawk. Ti ti pahin kan kal kual a, ka eitur pai kan ei dun pah bawk a, kan awmna hmun hnawk viau mahse kan ei tui ve tho. Vanmalsawma kha chu a let na a rei tawh ang ka ring. Tikhan rilru nuam lo deuhin awm ve rawh se. 

"Heta an awm hma hian khawiah nge an awm ţhin?" ka tih chuan "Veng hrang hrangah an awm kual. Tu in mah an luah rei thei lo. Nileng zankhuain an rui a, harh fim lai an nei mang lo tih theih a nia, mi pawi an sawi ang tih te kan hlau ţhin a" a tih laiin "Ropui i u pum a na leh tawh" a u pasal khan a rawn ti lung lung a, inchhung rimchhe deuhah chuan kan lut leh ta nge nge a. 

Ţhutthleng seiah a lo bungbu kût a, a pasalin a biak pawh chuan a chhang peih lo, "Zingkar aţangin kan buai tawh. A na riai riai reng a tia, a kal (kidney) bawk a ni leh ang. In han chiu tir leh dawn nge?" rawn ti tiha a tih chuan Ropuian min rawn en a, min rawn ve deuh niin ka hria. 

"Kal hi chu a na a chhuah chuan tawrh hrehawm khawpin a na ţhin a" a u pasalin a tih leh te chuan hlau viau mah ila "Scooty a a chuan theih chuan kalpui la" ka lo ti a, pawnah ka awm char char mai ang ka ti rilru a ni. 

A u chu scooty a a chuan theih leh theih lohte a zawt a, "A rem remah a ni mai" a ti a, a na ti chu a ţhen tlawk tlawk a, a ti der nge a ti tak tak hriatthiam a har khawp mai. Kal lamah harsatna a neih chuan zu in tawh miah loh tur a nia, hna a thawh theih loh chinah phei chuan thih a hnai nghal ruak zel. 

"I lo awm lawk thei ang tiraw Sensiar? Ka nute bulah ka han dah anga, kan in aţangin motor in a kalpui theih mai ang" a ti a, nuam lo a tih hmel takzet bawk.

"Aw awm thei ang..ka lo nghak ang che" ka ti a, a u chu a pasal nen an hruai chhuak a, ka hmuh theih chhung zawng ka thlir a, ka hmuh theih loh hnu chuan ka thaw halh a, ka beisei ang a ni lo tawp mai.

Huan zau leh nuam deuh, hring dup hmunah kan kal dawn emaw ka tia, thlam pangai leh thianghlim deuh hmuh ka beisei a, mahse kan kalna ve chu a chul rup a, hawina lam apiang a ţawp em em vek a, nupa mak deuh an la awm zui. A u kha Ropuia nen inang lo tak an ni. An awmna hmun a fal a, an tan chuan duhthusam a ni ngei ang. In neitute mitmei ven a ngai dawn lo a, in luah man chawi a ngai dawn lo bawk a, ruihhlo lah eng chi pawh zalen deuhin an ti thei ang a, hrisel ţha phei se chu an pui khawp ang. 

A u pasal a lo let leh chuan ka ding uaih a, chhuah nghal mai ka tum chu "Ţhu rawh thingpui kan in dawn nia" a ti a, ka ţhu duh chuang lo. 

"Pawnah hian ka kal kual mai mai dawn" ka ti a, a ruih hmelin amah a bal bawk si, ka nel hlawl lo a ni.

Pawn a rei mawi tawk ka awm hnuah min rawn ko a, "Thingpui ka siam kep che" a ti a, "Ka in chak lo a" ti mah ila "Ka siam tawh a, lo in rawh" a tih tak tlatah chuan inchhungah ka lut a, dawhkana no lo inhung chu ka enchiang a, thingpui a ni awzawng lo. Ka thin a rim nghal ţeuh a, amah theh nan ka hmang lo chauh a ni. 

"Zu ka in ngai lo" ka ti hmak a, zak lo ka ti ru kher mai. A la nui sawng zui a.

"Zak duh suh...helai hmuna hmeichhe lokal chu an zu in ruk duh vang a ni ziah. Ropuia te chu chhuanlamah an hmang mai mai alawm. Ropuia ţhiante lokal reng rengin zu an in lo ngai lo. In mahla a sawichhuak lo ang" a la ti tak deuh deuh a, mifel hi bum an nuam a, mahse Ropuia hi mi â let tawp a ni bik lo. An kal dawnah pawh 'midang ka ko phawt dawn mi?' a la ti tho a, a u kha na viau lo se chu keipawn ka kal tir kher lovang. U Mama hi kal na nei a nia, a na a chhuak thut ţhin tih te, a nat tawh chuan tawrh a har tih te ka hriat ve vanga kal tir mai chauh ka ni. Zu in tura min hruai ka ring hauh lo bawk a, chutih rualin an duhthlanna ngeia miin zu an in chuan a sawisel lo bawk ang. Keimah chauh a min kalsan hi chu loh theih loh thil liau liau a ni. Thil ho te te ka sawi pawn min zilh nan a hmang nghal zel a, kei berkher chu thil sual ti turin hmun falah min hruai lovang. 

"Ka sawi tawh kha zu ka in ngai lo" ka ti nawn leh a, kawngka a chhuah mai ka tum chu min pawt letin bangah min nam bet a, hnai set sawt a min enin ka biang a liak a nih chu mawle! Rilru buai ang chiaha a awm chu ka hlau a, ka ten bawk si. Zu rim a nam huam a, tal chhuah tum mah ila ka che hleithei lo. 

"Min thlah vat rawh" chang zet hian ka ti a, ka thlaphang ru hle thung a, ka biang a lum pup danah ka mittui a tla der tawh tih ka hre thei. Min rawn hnaih leh chuan ka chhing tawp a, ka ţap chhuak hial tawh bawk a, ka tha khur nasa lutuk te chu min dawm lo se chu ka ding thei tawh kher lovang. 

Ka hmai zawnah a thaw huam huam a, a rimchhe bawk si. Min pawngsual ngei dawn a nih hi ka ti tawh a, min that nghal law law se tih thlenga ka ngaihtuah laiin kawngpui lama bike ri chu chiang takin ka hre thei a, kawngpui kan hlat loh chu thuhran kan awmna hmun reh lutukah chuan thawm chhe te pawh hriat a awlsam lutuk tlat. 

Beisei ka neih san tawh viau laiin chupa chuan kawngka a kalh a, au chul chungin kei ka lo tlanchhe ve bawk a, ka taksa khur nasa lutuk chuan tlan a ti harsa a, ka thil vawn pawh ka vuan nghet hleithei lo. Min rawn hnaih chilh leh rual chuan ka lo au leh vak a, ka hminga min ko tu ka hriat te chuan lawmna ai mahin hlauhna a nasa zual sauh emaw tih tur a ni. Ka ka min hupsak tupa mitah chuan khawngaihna ka hmu lova, a hmelah ringawt pawh pawisak a neih loh zia a lang vek a, hetiang hmun fal lutuk ah hian lokal lo tawp ila ţha tur. 

Pawn lam aţangin kawngkhar a ri bur bur a, thawm te chu a hla tial tial niin ka hria a, kawngkhar chu a chhia a, ka mit hmuh lai ngeia thil thleng chu ka en mawl tawp a, thisen ka hmuh phei chuan ka vai ruai tawh a, mu leh mal ka nei lo a ni ber. 

"Engmah hlau suh" ti a Vanmalsawman min rawn hnaih chuan ka lo kuah rawk rawk a, "Kan lokal tawh hi..a hlauhawm tawh loh" a tih te chuan ka lo kuah nghet sauh sauh a, sawi duh ka ngah a, ka ţawngchhuak thei mai lo thung. A ţhianten min khawih tum tu an buaipui lai chuan ka hnung zang a chul hliau hliau a, ka dar a dawmin amah zawk chu a inla hrang hlek a, ka hmel enin a nur ve nang mai. 

"Kal lo tur a ka hrilh che kha" zawi te chang zet si hian a ti a, mittui ka biang vel a bual huh hliam a, ka thlan nasa lutuk chu ka lu lei thlengin a hnawng chap bawk a, ka bianga dawmin ka mittui luang chu a tuai a, a ţhianten thawm an neih leh takah chuan ka hlauh loh nan min kuah vat a, a awm nghengin min pawm bet a, tuman min rawn ti na thei tawh lo tih ka hria, mahse hlauhna avanga ka tha khur te chu a la reh thei chuang lo. 

Kan in buaipui laiin Ropuia te an lo thleng a, an hawihai khawp mai. A u pasal kha ka hmuh phakah a awm tawh lova, chhuat chu ka bih duh tawh lo hrim hrim a, ka awm ngaia awmin Ropuia te unau chu ka en reng a, Vanmalsawma pawh ka la thlah chuang lo. Ka hlat ngam rih lo a ni zawk mah. 

A u chu a la ding ngil thei lova, Ropuia rinchhana kal ve ţawk ţawk a ang ber. Thil awmzia min zawh chuan "Vanmalsawma te inchunga kan awm laiin in rawn chho a, Sensiari kan ngaihven nghal a, chhung lamah kawngka a inkalh a kan tlawh chhia a nih kha. I pasal hian khawih a tum a, ngaihven nghal lo phei ila chu thil pawi zawk a thleng ang chu" Pektean a ti bawl bawl a, a sawi chipchiar hle bawk. Ropuia leh a u inphur chho kha hmuin min rawn ngaihven nghal tihna a nia, awm hnai hlauh lo sela chu ka awmdan tur ka ngaihtuah ngam lo zawk. 

CONT..