VANMALSAWMA-21

VANMALSAWMA-21

"Sensiar engtin nge a tih che? Khawih che a tum maw?" Ropuia chuan a ti ţha leh a, a hmel a la phawk hra a, mak a tih hmelin a beisei loh tawp thil a thleng a ni tih a hriat reng mai. 

"Aw..zu min pe a, ka in duh lo a" ka ti khur dar dar a, khatiang reng reng khan ka mihring pui hlau a thlaphangin ka la tlanchhe ngai lo. 

Vanmalsawma chuan a awm si chet a min pawm bet lehin min kuah hlu hlu a, min venhim tum ni awm taka min kuah tu lungphu dup dup chu hre theiin mak tak maiin chu chuan thla a ti muang a, ka hlauhna te ti nepin hah a ti dam sawng sawng mai. 

"Sawmte, lo han haw pui rawh. Nakinah ka lo zui ve ang che u. A zia lo hle mai Sensiar, i hahdam deuh theih ringa hruai che ka ni a sin mawle" Ropuia chuan a ti charh charh a, a inthiam lo takzet tih ka hria a, thil thleng tur hi a hre lawk lo tih ka hre bawk. Chuvang chuan "Inthiam lo duh suh" ka lo ti a, in aţanga min hruai chhuah lai te chuan Ropuia chuan min en reng a, kawngpui kan chuan chhuah tawh hnuah pawh a la rawn hawi chho a, a rilru nawm deuh theih nan ka kut ka vai a, nuih luih ka tum a, ka thei ngang lo. Ka ţah a la chhuak a, ka hlauhna a reh fel hlei thei lo bawk. 

Ka bag ah lai chu min laksakin Vanmalsawma chuan a nghawngah a uai tir a, a awrh a nih ber chu. Bike a tih nun tawh hnu pawh a ka la ding zum zût reng chu "Chuang la" sir lama thlek vut paha a tih chuan ka lawn ve vat a, ka ban rek a lo hmer chuan na tiin ka rak ţhat a, ka ţhut fel hnuah kan han en dik leh rih a, Ropuia u pasal khan min hmer na viau aniang a duk chur lo na a a na ve reuh khawp mai. 

"Chupa mai mai chu" a ti hluk a, an kal leh mai hlauin "Kal tawh suh u" ka lo ti vat a, a kawngah ka kuah zui zat bawk a, an khawih na tawk tawh viau a, tunah phei chuan Ropuia leh a u an awm tawh lehnghal, hrehawm ti viau mah ila min ti na ve lo tu ten nuam lo an tih ka hlau a ni. 

A ţhiante hnungah kan zui a, a kawnga ka kut suih beh tlat chu a rawn vuan leh ţhin a, min hnem ve na aniang chu ka ti mai. Muangchangin a tlan a, tumah an awm ve lem lo bawk a tiin a hnungah chuan ka bei a, khua a la lum em em lova, kan awmna hmun phei chu dâm lam a nih avangin a taksa lumnain min ur mai mai te chu mak tak maiin nuam ka ti riau a, ka him tawh tih ka hriat phah a, ka thla a muang takzet bawk. 

A laka ka thinrim ve na te kha engtik laiin nge an bo zawh pawh ka hre lo, lak bo ang duak a ni ringawt tawh a, ka tih tauh avang maiin min rawn ngaihven duh lo se chu ka chungah thil pawi lutuk a thleng hial maithei a ni. 

"Engati nge min rawn ngaihven a?" ka ti ta nge nge a, a dar a ka khabe ka nghah lai chuan "Ka tih tur alawm" a ti awlsam mai a, kawng kual deuh lai kan tlan pelh hnu chuan ka kut a rawn vuan leh a, "I hahdam tawh em?" tiin min zawt zui zat bawk a, tun hi min ngaihsakna a tih lan nasat ve ber ţum niin ka hria. 

"Aw..ka hlau tawh lo" ka ti ve na a ka hlauhna chuan min kiansan mawh khawp mai. Khapa tak phei kha chu hmu leh ta ila ka thawk thlengin a buai leh vek maithei a ni. 

"I awm chuan ka hlau tawh lo ang" tiin ka thusawi tawh chu ka ti dik a, a taksa a chet dat danah a nui tih ka hria. Min chhan lawk lohah chuan ka zak leh hnuhnawh a, mahse "Ka awm reng ang ka tih ţhin kha" zaidam deuha a tih takah chuan ka thaw huai mai. 

An inkawtah a ding dat a, keipawh ka tho nghal uaih a, a ţhiante pahnih chu lo awm reng tawhin an ui lian pawn min lo bauh leh tawh. 

"Snoop dog kha kalsawn pui teh u" a tih chuan Pekan inhnuai lamah a kaithla a, "Kan haw tlang dawn lo a mi?" ka ti hmasa te te a, bike aţang chuan ka la chhuk lawk lo. 

"Lut phawt ang" a tih tak tlatah chuan ka chhuk a, kan thawm hriain a nu pawh inchhung aţangin a lo chhuak a, a hmelah chuan engmah ka hre thei lo, a thinrim nge a hlauthawng tih takngial pawh. 

Bike aţanga a chhuk ve chu a nu hmuh lai rengin ka darah min kuah salh a, a awmdan a hmuh chuan a nu chu a meng phawk deuh a, ka bag a la awrh reng bawk si, a inthlahrunawm lek lek a ni. 

"Engati nge nichin khan in tlanchhuah daih a?" a ti a, a aw chu a nelawm tehchiam lo. A fapa a be nain keimah zawk min en reng thung a, a lungawi chiah lo niin ka hria. 

"Mi vawk a chhuak a hei Sensiari ka hruai pah a nih hi" na vak lo a min sawi dat pah hian a ti a, a ngaih a sam leh hmel tawh em em mai lehnghal. 

"Lo lut rawh u" tih leh inher a rual a, min luhpui mai a tum chu "I nu kha a thinrim em?" ka lo ti leh a.

"A thinrim loh pawn a thinrim hmel reng. I hmuh tawh kha" a ti mai a, Pa Hriata ai pawhin a tawhkhirh hmel daih zawk. 

Tim daiin inchhungah chuan ka lut a, nula sam buang thang lo awm ve ka hmuh chuan bike a a phurh nu kha ka hrechhuak a, a hmel ka hmu chiang lova, mahse henu ngei hi a nih ka ring. 

Min hmuh chuan a nui sang a, a hmelţha khawp mai. A vun a no nalhin kan khuaah phei chuan awm se tlangval rim tu a ngah viau maithei a ni. 

"Lawmtei a nih hi..Lawmte hei ka bialnu Sensiari" Vanmalsawma chuan a ti nghal zung zung a, a ţawng ring nasa mai si, kan piah lawka ţhu a nu chu ka lo veng thawng khawp mai. 

"I hming chu ka hre ngun" a tih hnuah Vanmalsawma darah chuan namin "Nang hi hmanhmawh deuha i tlanchhuah chhan kha ka hrethiam mai. A hmelţhat danah i ngaihtuah viau pawh kha a awm lutuk alawm" a ti vel a, an infiam dan chu ka tih ve ngai loh thil a nia, ka laiin awmdan ka thiam lo lek lek a ni. 

"Nizana a thinrim chhan pawh kha Sensiarin a biak duh loh vang" Pektean a lo ti fiamthu ve a, beisei nei deuhin Vanmalsawma chu ka melh a, ka biak duh loh vang khan a lo thinrim tak tak em maw ni?

"A ni maw? Nizan chuan tuman kan be ngam hleinem Sensiar, lo be duh lo tawh suh aw" Lawmtei chuan zangkhai vah hian a ti a, a nu a awm ve reng sia, engmah sawi ngam ve lovin za lo deuhin ka nui ka nui ringawt a. 

"Inhnuaiah an la awm nual a, i pa pawh a awm. Sa pek chhuah tur ho zu enfel pui lawk rawh" thupe aw zeta a nu'n a tih chuan "Lokal ve rawh ka enkual pui ang che" ti a min hruai ve a tum chu a nu bawk chuan "Tikhan lo awm ve rawh se. Nangmahin kal la i rei lo zawk ang" a lo ti leh a, a ţhiante an nui tawh bawk si lo, a nuam lo duh takzet a ni. 

"Min tibuai rual a ni tawh lo" a ti a, ka ţang deuh na a min hruai lui ta tho a, pawn a kan chhuah hnu chuan a nakah na lo tein ka nghawk a, "Min hruai ve kher a, i nu khan min ngei ange aw" ka ti nang nang a, min endan velah khan min ngaina vak lo niin ka hria.

"Ngei lo ang" a ti liam satliah a, step ah kan chhuk a, an ui bawk khan min lo bauh leh a, laksawn tir tur a ti tawh lovin "A mei a then chuan thinrim a bauh a ni lo tihna a ni mai. In ngainat tum teh u in hahthlak" a ti a, nui ruh ruh chung hian ka kutah fimkhur deuhin a kai a, inhnuaiah chuan min kalpui a. 

A vawt nghal sang sang a, rin ai daihin a thianghlim bawk a, hnathawk ţhenkhatin min lo en chuan tawi te tein ka lo nuih a, kut han vai chi niin ka hre si lova, ka lai em em ringawt. 

"Sawmtea chu nuam leh tawh awm ve" an lo ti a, Pu Hriata pawh chuan "I va fel ve a" a ti ve luam a, "Nia" tih bakin chhan ngaihna ka hre lo. 

Hnathawk an awm ve nual tawh avanga in la awl ve deuh a nih ka ring a, sem chhuah tur ho chu enkualin a pe chhuak a, a che vel chu ka lo thlir reng a, tun thlengin a tuina hi mak ka la ti. Zir zel duh pawh nise a zirna man tur chu a chhungten an neih dawn tehreng nen. Ka u nen ka tehkhin a, an inrual chiah a, lehkha zir ngawr ngawr an peih lo ve ve a, pakhatin sa talh a duh laiin pakhatin mechanic ţha deuh nih a duh a, an inmil phian mai. An inkawm ta chawt pawh hi thil mak niin ka hre tawh lo. An nun hi ho viau mah se zir tur a awm tel tho ka ti ve tlat. Ţhalaite hi sawrkar hna hmuh tumin kan zir a, hna ruak tlemte tam takin kan dil a, dik lo deuh a hna hmu lah an tam. Mahse sawrkar hna chauh lo pawh ţhalaite tan hian hna a lo tam khawp mai. Hna neih loh ai chuan sa talh mai hi a zahthlak loh a, pawisa neih loh ai chuan mi motor chhe siam lawp lawp a pawi lo. Tu te pawh hian sawrkar hnathawk thei chin hi kan ngaisang a, an ngaihsanawm reng bawk a, chutih rual chuan kut hnathawk te kan endan hi thlak danglam a ţul khawp mai. En hniam tlat lo ila tuman kut hnathawh kan hreh lo ang a, ţhalai hna nei lova then mai mai pawh an tlem sawt maithei a sin. Sawrkar hna hi engtikahmah kan indaih thei dawn si lova, kan thlir dan tal ti danglam thei ila a ţha ber. 

Inhnuaia hnathawk ho chu an infiam bawrh bawrh a, Pu Hriata lah a phawk ber berah ţangin hnathawkte a be thiam a, ka ngaih ang ngawt a pa tihmawh a ni lo tawp mai. Kuhva leh meizial an inchhawp ka hmuh chuan ka nui hak a, hnathawh a tih nawm phah ngei ang. 

Inchunga kan chhoh leh chuan noodles rim ka hre hmasa ber a, Lawmtein "Noodles ka chhum a nia" a lo ti chiah bawk a, eitur ka pai ve ţeuh a, Ropuia nen khan tlemte chiah kan la ei thung a, thil thleng vel kha ka ngaihtuah let leh chuan ka la ţim uai uai thei hial a ni. 

"Sensiari maw i nih?" ka hnunglam aţanga aw lo chhuak chuan min ti phu nasa kher mai, rang deuhin ka inher a, Vanmalsawma nu nen kan inhmachhawn ran a, a mitmeng lah chu a hriam chi a lo ni bawk nen; chil lem khalh pahin ka bu nghat a, ka hlauh zia hria se chu min hnaih lui tlat lo maithei a ni. 

"Lokal teh" min tih chuan tim daiin Vanmalsawma ka melh ţawk ţawk a, lu min lo buk khum nghut a, engmah a sawi lo na a a nu chu zui turin min ti ah ngaiin ţhutkhawmna pindan lamah ka zui phei a, ni Mami ai pawn ka hlau daih tawh zawk. 

"In khuaah kan kal a" ban charh a a tih chuan "Eee..." ka lo ti a, thil danga chhan vak ngaihna a awm lo. 

"Unau engzat maw in nih?" a ti leh daih a, paruk kan nih thu leh keimah chiah hmeichhia ka nih thu ka sawi chuan a nui ve mial a, a rei lo hle thung.

"Ka hre tawh tho a" a ti leh ang lawi a, a va mumallo reuh tak. Ni Mami hnena ka chanchin a zawh chuan a hre tam thei ngawt ang.

"Kan khua chu a nuam i ti em?" ka ti a, ngawi renga ţhut tlawk tlawk nuam ka tih loh vang a ni. 

"Nuam e..ka vawikhat kalna a ni lo bawk a, tun hma chuan ka awm ve ţhin" a ti a, a nui pah bawk a, tlemin a hmel hmuh pawh a nuam ve ta deuh. 

"Min hlau deuhin ka hria, min hlau duh suh. Kei aiin i chak zawk daih ang" a ti fiamthu leh a, ka nuih a za lo viau na a ka nui lui nasain ţap tur ka ang viau zawk maithei a ni. 

"I awmna a rei tawh em?" ka ti mawi ve a, a awm hunlai ngaihtuah let ni awm tak hian a awm a, "Ka tleirawl lai a nia, a rei tawh angreng. Tun ang hian a la changkang lo bawk a, khaw dang daih a zin te pawh ka ang alawm" a ti a, ka nu leh pa a hriat leh hriat loh ka zawh chuan a hriat loh thuin min chhang a, ka nu phei chu khaw dang daih a mi a ni hrim hrim a, ka pa a hriat loh danah chuan a awm tam vak lo a nih ka ring. 

"Ni Mami pawh hi kan khuaah a awm tam lo an ti" ka tih chuan hriatthiam loh hmel zetin min en a, "Faktei ka tihna" ka ti leh hnuhnawh a, "Aw..Aizawlah an awm ţhin a, lehkha kan zir dun ţhin alawm" a ti a, ka hriat belh chak chuan "Shillong ah pawh a lo awm ve ţhin tiraw?" ka ti leh a, a aw liam mai a, mak ti hmel a pu hran lo. 

"Zirna a chawlh san hma a, hna ka neih hnuah ka fapa min awm sak ţhin a" a tih laia ka lo ner deuh chu a hmuh hman loh ka beisei. A fapa a ni tawp si lo a, ka insum thei ngang lo a ni. 

Lawmtei thil siam ka ei zawh chuan haw ka rawt a, a nu nen khan engmah kan sawi kaw lo. Mi hnen aţanga ka chanchin a hriat tawh ho thudik leh a nih leh nih loh finfiahna niawm takin min zawt nawn sek ringawt a, a fapa kawp tur a duhtui viau nge an hun kal tawh hriat ka nei nual tih a hre zawk pawh ka hre lo. 

Lawmtei chuan min zui chhuak a, ka bag theihnghilh la tura inchhunga Vanmalsawma a luh leh hlan chuan "Hetah hian i awm ve mi?" ka ti a, a nui a, min chhang tawh dawn lo emaw ka tih hnuah "Duh duh hunah ka riak mai zel. Ka tih loh dan pawh a ni lova, shillong a kan awmlai aţanga ka chin ţhan a ni hrim hrim a" min vengthawng lo tak hian a ti a, a ti lui zawk nge pawh ka hre lo. 

"In naupanlai aţanga inkawm tawh maw in nih?" ka tih leh chuan "Ni e..i bialpa hi kei aia hrechiang an awm kher lovang. Hriat duh i neih chuan min lo zawt zel dawn nia" nui har har chunga a tih hnuah "Maimawm leh chukchu a hlau a, chu aia hlauh chu a nei lo" a ti fiamthu a, kei aia a san avangin a bulah pawh ding duh lovin a sang laiah ka ding a, ka en ran a, ka huat vang phei chu a ni lo. 

"In inpawh dawn hle mai" ka ti ban charh a, a sam hui pahin ka lam a lo hawi a, za vak lo a ka lo nuih lai chuan "Kan inpawh lutuk tlat. Sawi lo mah se amah a danglam awm ka hre chat thei zel a, kei aia hrechiang tu a nei lo ang. Engkimah ka rawn a, Aizawla amah chiaha a awm chuan a khua a har ka hlau a, ti hian ka rawn zui leh a, naupangte kan nih lai aţang tawh khan engkim kan ti dun ţhin. College kan kal hnu phei chuan chhaih fiamtu kan ngah a, Vanmalsawma awm naah chuan i awm ve zel min ti tu pawh an tam ţhin. Chutiang vel chu" a ti bawrh bawrh a, min insawitheih khum nge a ţawng duh ve hrim hrim pawh ka hre lo. Kan nghah pa lah chu a rei hrep lehnghal.

"A nawm dawn chu" ka tih chuan a meng kual ralh a, "Teuh lo mai" a ti zui hap a. 

"Ka bialpa emaw an ti zel a, keini pahnih lah hian inkuah thuak thuak kan hrat a, khawlaia kan kal lahin ka him nan min kai tlat zel bawk sia..tun thleng pawh hian a la ni" a tih chuan ka nui tawi tak tawh a, a ni lah chuan "Ka nat a hlau a, chutiang chiah chuan kei pawn ka hlau ve a, kan inveng tawn a, kan inhrethiam tawn a ni ber. Hun thim ber ka tawn ţum pawha min kalsan ngai lo tu a nia, ka tan a hlut ang bawkin a tan ka hlu tih ka hria" a la ti zel a, sawi nuam a ti mai bawk sia, ţawngkam lah chu a thiam zek a. 

Vanmalsawma a lo chhuah chuan "He mi mawl pa hi lo duat rawh aw. Bialnu a neih loh chuan ka bulah a tawlh hrut hrut reng a, ti hian ka tan a hahdamthlak a ni mai" a ti lang lang a, a nui pah vak vak bawk a, hmeichhia chu ni lo ila ka hrethiam kher lo maithei mahse hmeichhia ka nih ve na angin a hlim tak tak lo tih ka hria. Min lawmpui viau anga awm chung hian min lawmpui tak tak lo ni a hriatna ka nei tlat a ni. 

"I va rei ve" ka lo tih chuan "Ka zawng alawm. Kil khatah a lo tla a nih kha" a ti bul hmuk a, bike lam pana a kal chu Lawmtei nen kan zui ve zel a, an chanchin sawia a ţawng zat zat reng chu ngaihthlak a ninawm ţan tawh. 

"Khawimaw i ban kha" tih pahin ka kut a la a, ka ban rek chu a en a, a duk lai a lo awm ţan tawh a, a na em a duk lo se chu a mak ngawt zawk ang. 

"A na em?" a ti thum dut a, a kutzungpuiin a duk lai chu dimtein a khawih a, "Na ve e..ka hmai a him hlauh zawk a" ka tih lai reng chuan min rawn enin ka kut a la kang a, ka banrek na lai chu a fawp a, a la nui zui. 

Lawmtei awm ve bawk si chu "Awii..i zakthei lo e" ka ti hluai a, a ruk chuan ka nuih a za tho. 

"Ka bialnu i nih kha" a ti a, a nui hmel hmu reng mah ila a thutak viauin ka hre tho bawk sia, "Ka hria alawm" ka ti ta ringawt a. 

"Kal mai mai teh u in tenawm emai" nui har har chunga Lawmtein a lo tih chuan fiam let zauh pahin ka bag chu a awrh leh a, bike a tih nun rual chuan sawm nawn ngai lovin ka lawn vat a, kan kal dawn tak takah chuan "A nih aw Lawmte" ka ti a, a mawiah ka kut ka vai ve a, kei aiin a chhe lo zawk daih na a ka awt lo khawp mai. A hmelţha, a chhe lo, ka awt e, kan tih ţhin te hi han belchiang ila, hmelţhatna bak chhuan tur nei lo te an lo ni ve ţhin a, chhe lo deuh chunga mal tak an ni thei a, an nun aiin kan nun a hlim zawk daih thei bawk a, chantawk a lungawi thiam zel hi a ţha ber mai. 

"Sawi tawh la" kan tlanchhuah hnua a tih chuan bo deuh hian "Engmaw?" ka ti hu a, a darah bawk khabe nghat lehin amah en tumin ka thlek deuh a, min rawn en ve zawk a, rang deuhin hmalam a en leh a.

"Min biak duh loh chhan" a ti a, sawi pawh a zahthlak rum rum tawh. 

"A ngai tawh lo" ka tih pawhin "Sawi rawh" a ti deuh tlat a, "Phone i chhang thei lo a, message i en duh bawk si lo a, hmeichhia i phur ka hmu leh tho sia" ka tih chuan "Lawmtei chiah ka phur" a lo ti nghut a, a lungawi loh hlauin "Ni reng e..ka hmuh cheu khan Lawmtei tih ka hre hleinem" ka lo ti vat a, a ni pawh chu a nui chhuak ve ta hawk a. 

"Ka phone ka ti bo alawm. Ka silent daih a, rei deuh kan zawn hnuah kan hmu ve chauh. Counter ah a lo awm a, thil dangin a lo delh a" a ti a, "Engtin zel?" ka tih chuan a nu nen an zawn thu min hrilh a, an hmuh hnua an lo haw nghal thu leh in a thlen ruala Lawmtei hruai tur a a kal lehnghal thu te min hrilh a, Lawmtei nen pawh a nu phone hmang thoin an inbia a ni awm e. A hman veleh min lo bia a, keiin ka lo be duh lo a, chutiang vel chu a ni mai. Ka thinrim lai kha chuan rawn insawifiah pawh nise ka lo awih sak kher lovang. Phone ka off daih pawh kha a lo ţha phian a nih hi. 

"Eng emaw hriat i nei em?" ka tih chuan "Ka vak chhuak tam lo. Kan thlen tukah phone zawngin ka buai a, kan lo haw lehnghal. Ka nu leh U Faktei te hnenah ka awm ve lo. Pindana an inkhung chhung phei chuan ka tibuai lo" a ti ve duah a, ka hriat duh ber ka hriat tawh vangin ka zawt zui lem lo. 

Mahse amah zawkin "Minute tlemte a ka u a nih kha" a ti a, kan in kan thlen zui nghal a. 

Bike aţanga ka chhuk hnu pawh chuan amah chu ka la en ran a, "Tu maw i u?" ka ti zawi sap a, a lo nui suk duh chauh a.

"I naupang zawk maw?" ka ti leh a, a nu lah khan pianpui nei lo ang maia ngai luiin ka fapa te a tia, dawheh leh lutuk mai. 

"Aw..Boomer kha ka u a nih kha" a ţawng zawi viau na a ka hre chiang lutuk ringawt. Mak ka ti hran lo, bazar a ruah sur hnuaia ka hmuh tirh aţang khan phir an nih rinna ka nei daih tawh. Amah ngeiin a sawi ve ta mai chu a ni mak ka tih zawk chu. Hriat a neih ţeuh ka ring bawk. 

"Thil dang pawh i la hre ţeuh ang. Min hnaih hi i inchhir maithei. I inngaihtuah nawn rum rum duh maithei bawk" a tih chuan ka hrethiam lo ta viau a, a hmel chu ka en nawn leh ţhin a, fiamthu thawh hmel a pu bawk si lo. 

Kan dawr a a thil lei hoin min fiam zuk zuk lai chuan midang hriat ve loh turin "Vanmalsawma i nih chhung chu ka inchhir lo ang. Danglam lo la, tuna i awm ang hian awm reng rawh" ka ti deuh tawp a, kan awmna hmunin a zir lo bawk nen, ka sawi ţeuh chak a, a theih si loh a ni. 

"I ngaihtuah chian deuh a ngai ang. Keimah vanga thil thleng a tam a, i in ngaihtuah nawn leh hunah pawh ka duh a ka tih tir a ni lo tih hre tel la. Min duh tak tak chuan chung thil chuan a ti buai lo maithei che a, a ti buai thei tho bawk che a, ka hriat miah loh laiin veng tu ka nei rengah ngai tawp rawh" mumallo zet hian a ti a, a mitmeng dul ruih ah chuan engmah ka hmu thei lo a, ka hrethiam lo a ni zawk mah. 

"Engin nge veng che? Pathian maw?" van lam kawk kher paha ka tih chuan ti lui tih hriat zet hian a ţhen suk a, ka ngaih a ti ţha lo lehpek tawh. Ka thil tawn avanga ka hlauhna pawh a la reh em loh laiin ti hian thu mak pui pui min hrilh leh chu a nia. 

"Min ngaihtuah tu ten thil ţha lo an tih hian Pathianin kan tih angah a ngai ve zel em?" tiin min zawt let khauh a, lu ka thin mat mat lai chuan "Kan tih anga a ngai ve zel a nih chuan Pathianin min veng ve lo ang" a lo ti leh a, inkhawm ngai lo, sakhaw ngaihsak vak lo chhungkua a seilian a ni tih chu ka hria, mahse tuna a thusawi tak hi chu ka hrethiam lo a ni. 

"Eng nge sawi i tum a?" vin lek lek a ka tih chuan "Keimahah hian bet tel a tam, ka nun leh keimahah" a dar a kan ak a, a nui lek lek bawk a, min fiam ti dawn ila fiamthu thawh hmel a pu bawk si lo, ţah te lam lam a ti chhuak alawm le. 

"I hlau dawn che tihna maw?" ka tih chuan a mit ko a lo kan uk a, ka thusawi chu a hrethiam lo a nih ringin "Ka hriatchian che chuan ka hlau ang che i tihna mi?" ka tih leh chuan thawk a la hawk a, "Chutiang deuh chu" a ti hap a, tunah chuan ipik rukna deuh nei a ang ka ti tawh zawk. 

"I la hre vat ang..mahse ka duh vang a ni lo a, ka tih tir a ni lo a nia" a tih hnuah min en reng chungin helmet a khum a, "Lut phawt rawh. Nakinah kan la sawi leh dawn nia" amah bawk chuan ti lehin che chang lova ka ding reng chu min kalsan tawp a hreh deuh aniang "Vanmalsawma bak hming dang ka nei dawn lo" nui hawk chung hian a ti a, tu nge amah veng tu chu ni a, amah veng tu chuan eng thil chiah nge a lo tih tih vel chuan a ni ka rilru luah ta ber chu. 

Min kalsan hnuah phur lo deuhin gate chhungah ka lut a, dawr kan neih hnu hian mut dawnah lo chuan gate kan khar ngai tawh lo. Dawr a U Daizaui awm chuan min lo ko in "Enteh..Pi Kapţhiangin ba i ziak pung min rawn tia, ka lo liak let hrep a nih kha. Amah ngeiin chhang a rawn lak te kha zunthlum ka nei a ka ei ngai lo a rawn ti leh vel a, ţawngthei min la ti zawk zui" a lo ti tan tan a, ba bu min hmuh pah kher bawk.

"A tam a ti deuh mi?" tih paha ba bu ka en lai chuan "Ti ang chu mawle. Hmun danga kan bat pawn hetiang zat zat a ni ngai lo a tia, hmun dangah chuan ba leh rawh u ka tih kha. Naupang te te min ti lehnghal a, ka birth certificate ka hmuh lo chauh a ni. School naupang in nih lai pawn Pu Siama te inah card ka deng tawh a nia" a ti hlak hlak a, a thin a rim khawp mai. 

"A pe vek tho che em?" ka ti a, an ba ho chu a lo thai chhe ve thlap a, ba bu lak let leh pahin "Pe vek e...min pek kim loh ka hlau a min pe vek rawh ka ti tlat alawm. Ba i ziak pung min ti kher te kha ka haw lutuk a, hlep tlem te nei chungin kan bat tir a lawm nachang pawh hre lo" a ti a, ka lo nuih liam mai a. 

"A hua che anga sin mawle. Mi bulah a sawi zui che ang a, i hming a chhe mai ang" ka tih chuan "Awii...awii...awiii Pi Kapţhiangin min rel phar avang hian engtin mah ka awm dawn lo. Ka chaw ei a tui loh phah dawn lova pasal ka hmuh loh phah dawn lo bawk a, duh duh danin min rel rawh se. Hnar hawlh zat chawp ngai lovin ka hahchhiau vak vak ang a a nuam ting a ni mai alawm" uar fahran hian a ti a, ring deuhin a nui zui uar uar a, a che vel en a ka lo nuih ve lai chuan "Kuhva ei daih ang. Mi dawr a bat hrat, ba pek leh hreh si ho hi chuan min rawn dawr tawh lo se a ţha ang. Mawng mu churh churh khawpin dawrah ka ţhu a, nei reng chungin min la bat sak zui a, nei lo chu ka hrethiam, pawisa nei tih hriat rengin min han bat sak hi chu ka haw ţhin" a ti ţan tawh a, a bulah ţhuin a thusawi ka ngaihthlak sak a, a nuihzathlak deuh leh ka lo nui vak vak a.

Ka thil tawn te kha ka theihnghilh nghal vek vang a ni bik lo, ka bula awm hrehawm khawpa ka natna leh ipikna ka tih lan ka hlauh vang zawk a ni. Kan nat rukna te hi kan tih lanchhuah nasat lutuk chuan midang kan kaichhawng ve thei a, kan bula awm hrehawm ti deuh ten kan siam ve thei tho a, hlim hmel put luih te hi a har viau nain thil ţha tak a ni.

"Madiki a lokal a, Tintin-a a rawn rim a nih chu. Pakhat lah a hmai duk a la reh lo a a chhuak hreh ve deuh sia, a rawn len chilh. Tunlai hmeichhe ţhenkhat hi chuan mipa zawk an rim ngam tawh chu a nia, keichu ka ngam teuh lo mai" a ti sar sar a, "A la awm em?" ka lo ti ve bawk a, ner nang nang chung hian lu a thing a, "I nu a be ţha vel rap. Henu hi chuan Tintin-a hi a duh ve tak tak niin ka hria. Tal chhuah duh pawh nise a harsa ve khawp mai. A taksa thlengin a ui dawn lo nasa mai sia. Vani ka khawngaih reuh" a ti a, a kuhva ei lah chu a tui hmel em em mai lehnghal a. 

"Hmeichhe easy deuh chu mipa te hian an kawp a, nupui atan chuan an duh chuang hleinem. Hmeichhia chauh ni lo mipa pawh an demawm tho. Neih duh loh tur chu ţhutpui tawp mai tur a nia" ka tih chuan "Chutiang an peih teuh lo mai. Mipa hi taima deuh a sin. Engmah ti peih lo thatchhe lutuk an tih te hi a lo ni miah lo, ţhu mai mai tur a ngaihzawng neih te hi an peih lo a maw, an che sek zel alawm" a ti a, kan han nui dun leh rih ţhin a, U Daizaui hi chu zu dawr a card deng ţhin tih takah thil a hre maksak thei khawp mai. 

Inchhung ka luh veleh ka eitur pai ho ka phawrh a, pindan a dah luh a lehkhazir paha ei atan ka tih vang a ni. 

"I lo va hawn hnem ve. Ropuia nen engmah tham in ei nange?" a tih chuan ka piin "Vanmalsawma zawkin a nih kha lo thlah. Ka hmu reng alawm" a lo ti hmanhmawh a, Pathian zarah a vannei a, a kum a upat tawh tehreng nen a mit a la ţha khawp mai. 

"Eng nge awmzia ni a?" ka nu'n a tih lai chuan Tintin-a pawh pindan aţangin a lo chhuak a, kawr a hak loh takah chuan a ban bul pawh a lo intuam reng tih ka hmu a, kan hriat hauh lohin hliam a lo tuar nasa viau a nih hmel. 

"Ropuia te huanah ka awm rei lo alawm. Huan chiah pawh a ni lo, in ve tho a nia. Kan in ang lo tak hian vawk vulhna hmun a awm a, thlai chinna tur tlem a awl bawk a, hmun zau deuh a ni chuang lo" ka ti hmasa a, min en reng tu ka nu hmaah chuan ka kut dahchhuakin "Hei" tih pahin ka ban rek duk lai chu ka hmuh tir a, a lo vuan ve nghal chawt bawk.

"Engtia i tih nat nge? I tlu sual em ni?" a ti nghal ruai a, "Ropuia u pasalin tuma awm loh hlanin min man bet a, min khawih a tum a, ka hmui a hup bawk a" ka tih chuan ka sawi zawh hma hmain Tintin-an min rawn hnaih nghal ruak mai.

"Engmaw a tih? Ropuian chutiang hmunah chuan a hruai che maw? Nangmahin a dah che tihna em ni?" ka nu'n a tih laiin ţawngkam aia tharum hmang nasa zawk ţhin ka u chuan "Khawi lai nge an in?" a ti rum ul a, ka lo hrilh kher kher a ni tih mai te pawh a awl alawm. 

"Ropuia u pum a na thut a, U Mama ang tho a kal na nei a nia, Ropuia kha a mangang ve alawm. Na tuarin a u a bungbu kut reng a, keini pawh ni ila damdawiin kan pan nghal chung chung ang chu. Engtinmah min ti hman lova, in thinrimna ti lang miah suh u Ropuia phei chuan nuam lo a ti ngawt ang" ka ti leh rih ţhin a, han hrilh loh tawp kha ni theiin ka hre si lo a, ka inchhir lek lek tak tak a ni. 

"Mi pangai an nih chuan ngaihdam min rawn dil turah ka ngai" ka nu chuan a ti ta hmak a, "Min rawn hrilh nghal tur che alawm..tenawm lutuk" ka u in a lo ti ve hluk bawk a, kalsawn tuma a inherin ka pi a la su tlu ţep zui. 

"Ka sut turin i awm lui" a ti leh nghal zaih a, ka nu a la ang buan buan bawk a, "Rintlak tiin kan kal tir che a" tih zawngin thu a la a, Ropuia demna tur a awm loh tehreng nen a dem tel vek tawh.

Ka inbual zawh meuh chuan Ropuia a lo ţhu reng tawh a, tim daiin min en a, ka khawngaih let tawh zawk. Pindanah pawh lut lovin a bulah ka ţhu a, ka nu hriat hlau tak a "Tih hlim che ka duh vang a nia" a tih chuan "Ka hria alawm. Nuam lo ti duh suh" ka lo ti vat a. 

"I hlimna tur ka duh ber a, pawi ka ti khawp mai. Ka ti na ta zawk che sia, i nat ka hlauh nen" a tih leh chuan ka nui hul hak a, duh ai chuan a ti mah mah ta deuh chu a ni.

CONT..