VANMALSAWMA-22

VANMALSAWMA-22

"Ka theihnghilh vek tawh alawm" za lo deuh a nui chunga tih pahin Ropuia chu ka ţhut hlat deuh a, ka sam huh ka dar a uaithla chu towel in ka hru pah bawk a, ţhian ang chauha ka en lai hian min lo ngaizawng daih ang tih ka hlau. 

"Ruihhlo hian a ti â tawh a, anni pawh an nupain ka hauh hrep kha. Nangmah chiaha kalsan che kha ka hreh ve tho a, inah ka chhoh pui a, ka nute an lo awm lo lehzel nen keiman damdawiinah ka hruai tlang a, an chiu zawh veleh ka rawn let pui lehnghal a, a pawi vek hman tawh tho a nih kha" a ti a, a inthlahrungin nuam lo a tih zia a lang reng a, a hmel pawh a pha dai mai. 

"Engtinmah min ti hman hleinem. Vanmalsawma te ţhian ho an lokal hlauh a, kawngkhar te an tichhe vek zawk a" ka tih chuan "A pawi reng reng lo. Ka nu leh pate pawh ka hrilh ang a, anni pawn zilh ve rawh se" a lo ti a. 

Kan ti ti lai te chuan ka nu chu kan ţhutna bul velah a lokal sek a, nidanga Ropuia a biak ţhat theih nen tun ţum chu a lo be duh hauh lo. Ropuia pawn a hriatthiam ka ring tho a, khatiang thil kha a thleng dawn tih hria se min kalsan awm bik tawp si lo, ka khawngaih letling zawk. 

"Sensiar i u nen scooty khalh in zir dawn ni lawm ni?" vin deuh tak hian a ti a, Ropuia nen pawh in zir thei tho ang a a ti ţhin kha a nia, kan in a awm reng nuam a ti lo aniang chhuanlam fahrah te te siamin min haw san a, hrehawm a tih lutuk hlauin a haw tur pawh gate thleng ka thlah thlap a ni. 

"A tlai tawh em hi scooty zirna hun a awm tawh hleinem. Athu hrimah Ropuia thiam loh a ni lo ka ti vek tawh a, ţha deuh a lo biak tho tur che alawm. Khang thil kha a thleng dawn tih chu hria se min hruai ve tawp nang. I ti mak thei emai a inthiam loh ve em kha" ka ti nang nang a, ka nu pawh hi a fel viau na a a chang chuan ka ute nen inang ka ti ţhin. 

"Inven zawh dawn loh chuan hruai loh mai tur che alawm. A u pasal mizia pawh a hrechiang ang chu, khang thil kha a ti duh dawn tih hrereng chungin alawm a kalsan che. Damlohna pawh nise a hruai chhuak che a nih chuan a ngaihven tur che a ni. A pawngsual teuh zia che i hre ve reng alawm. Tlem a tlemah i chhe vek lo chauh a nih kha. Hepa pawh hi a chut lutuk reng reng mai" a ti hlak hlak a, chhuat dungah a vei turh turh a, a insawh nghawng nghawng reng mai.

"I pa ka hrilh a nia" a tih leh phei chuan ka lo sawichhuak kher kher kha ka inchhir takzet tawh a, thusawi tawh a lak let leh theih tawh ngai si lo. Hei vang hi nia ţawng fimkhur a ngaih ţhin. 

"A mak thei e..hrilh kher a ngai hleinem. Engtin nge a tih a?" ka tih chuan "A thin a rim khawp kha" a ti a, ka rindan vel a ni. 

Tintin-a takngial pawhin "Ropuia dem daih suh u. A u pasal alawm dem tur. A hlim chhawnah rawn hmu ve ila chu a thil tih kha a inchhir khawp ang" a lo ti ve a, mi pangai lo bera kan ngaih pawn Ropuia demawm loh zia a hrethiam a nia, ka nu te hian eng nge maw an hriat ţhin ni?

"Nangpawh pindanah hmeichhia kawm tawh suh ang che. Vawiin a in awmdan te kha a mawi lo lutuk. I pa pawn ti reng reng tawh suh se a tih cheu kha" ka nu chuan a la ti zel a, kan chhungkua hi chuan buaina kan va han ngah bik tak. Fel fai leh awhawm deuha lang chung hian kan buai ru zek a, kan chhung ang hi chhungkaw tam tak an awm ve ka ring bawk. 

"Lo luh tir suh ka tia i rawn luh tir ţalh a nih kha. Min puh daih suh" ka u'n a tih chuan "Lo chhuak duh hek lo che" ka nu'n a lo ti ve thung a. 

"Chhuak duh lo reng ang chu ka hmu peih hleinem" ka u in a tih laiin ka nu chuan "I lo chhaih nuih hawr hawr tho kha" a ti a, ka pi pawn a ning aniang tv a en ring tawh khawp mai. 

"Ka chhaih nuih mai loh nakah i rawn luh tir lui ţalh sia. Ngah nge kan thawm i lo ngaihthlak a? Tunlaiah mi bihthlak leh thawm ngaihthlak ruk an ching tawh hleinem" inla thupui fun fahran a a tih chuan "Ka fapa i nia, thil pawi a thlen hlauin ka ngaihven che u a nih kha. I retheih ka hlauh zia hre ta che" a ti a, chhuat a nawt pah sawk sawk bawk a, a fai ţha duh khawp ang. 

"Mi thawm ngaihthlakin retheihna a veng thei tihna mi?" a tih chuan ka nu'n chhuat nawhnain a tin ur ur tawh a, a tupa chuam chu a nat hlauin ka pi a ding nghal uaih bawk.

"I ţawngtheih dan em em hi a turu lutuk. Ka hau che a nih chuan ngawi ve mai rawh. Nu te pawh hnial char char duh mai, rilru buai nak laiin i rapthlak lutuk emai. Gospel camping a awm dawn a lut ve ngei ngei ang che" an inti leh ţan tawh a, an sawi thawm ka hria a, keipawn lut se ka ti ve tho. Inchhung boruak a zangkhai deuh ang.

"Pathian thu ngaihthlak tluka nuam a awm hleinem. Mut bu ka va tel nghal ang e" tih leh a pindan a luh a rual a, ka zui lut vat bawk. 

Guitar a ban lai chuan thil dang a tih hlauin guitar chu ka lo chelh ve a, Ropuia te chhungkaw chanchin sawi tawh lovin Vanmalsawma nu leh ni Mami chungchang ka sawipui a, a ţhianţha ber a nih angin a ngaihven ve ngei ring a hrilh ka ni. 

"Ni Mami hi mi â a nih hi. Mahni hmasial" a ti nghut a, khuma a ţhut rual chuan a hmazawn chhuatah ţhu vein hnung lama bang chu ka ngheng a, diary chungchang pawh ka sawichhuak ta vek a, Pa Muana a ngaihzawn thu thlengin. 

"Ka sawi tawh kha. Mi â a nia, ngaihven tawh suh" a tih chuan "Mi â a nih loh hi" ka ti vin hlar a, guitar chu kuahin chik deuhin min en a, "Duh ai chuan i buaipui mah mah a ni" a ti fan ruih a. 

"Thil pakhat ka hria a, hriat zel ka chak a, mi â in felfai deuhin diary a ziak thei lo bawk a" ka ti a, diktak chuan ka diary xerox hi u Mala hnen a pek ka rilruk tawh a ni. 

"A rilru a buai alawm. Vani a lokal dawn rawng va bawl rawh" a ti liam puat a, "Eng nge a lo tih dawn?" ka lo ti he haw a, min hrilh lawk ve mang si lo. 

"Min rawn kek anga a haw lehnghal ang" a tih chuan ka nui hak a, "Daizauin vawiin a ka inleng neih a hrilh a" nuihza aw zet a tiin a hnar a chuar zauh a, "Daizaui hi chu kan thil hmuh leh kan hriatte hi sawi lovin kan awm thei lo tih zawng zawng a nei zo a" a ti a, thinrim hmel a pu lo chu thaw a veng huai thei alawm. Ka chhungte inhnial vel hi ka thil nin ber pawl a ni. 

Rawng ka bawl mawlh mawlh laiin ka pa'n ka nu a rawn bia a, a thu rawn sawi chuan tu te pawh min ţhawng a ni ber. Ni Mami an man thu a rawn sawi a, miin an la hre tam vak lo a, hre hmasa pawl tak kan ni awm e. 

"Nula pathum chin chiat loh a an bo daih chungchangah khan hek tu an awm a, nichin lawk khan an man a, a mak khawp mai" a ti a, U Vanneihi a reh ka ti reng a, an lo buai ruk vang a nih dawn hi. 

"Mami te chuan chutiang a ti duh dawn em ni? A huaisenna pawhin a tlin lo hrim hrim ang. Tuin nge hek a?" a tih chuan "Ka hre bik lo le. Police ho pawhin an sawilang kherin ka ring lo. A ti tak tak a nih chuan amah Mami inpuanna aţangin thil tam zawk a hriat theih ang chu" a ti a, Vani lo thleng pawh chu tuman kan lo ngaihven lo a, ka bulah lokalin a ding ve ta reng a. 

"A va mak em em ve mawle. Vawiin chu ngati nge maw thu thinţhawng deuh ka hriat reng mai ni. Fihlim hram se a va ţha ve. A vah te ho an khawngaihthlak dawn emai" ka nu chuan a ti ve mial a, Boomer a boral kha ka lawm zawk hial tawh. La dam ni sela chuan mualphona leh zahna an tawh tur zawng zawng hi a hmachhawn ve vek a ngai dawn sia, ni Mami chungchang hre hman lova a awm te hi a lawmawm zawk lek lek tawh alawm mawle. 

"Mala hnen aţang chauh a ka hriat a ni rih a, Mami hek tu chu a sawi lang duh chuang lova" a tih chuan Nu Mawipuii kha ka hrechhuak zawk mai, Vanmalsawma nu kha. Kan khuaa an kal khan Vanmalsawma khan ka u a hmuh thu min rawn hrilh a, ni Mami hektu chu an nufa hi an ni thei angem le tih thlengin ka ngaihtuah leh hman tawh. 

Ka pa nen an inbiak zawh veleh Tintin-an "Kawngkhar kha kalh ru. Ka nu kha ni Mami chanchin sawi turin ţhenawmte inah a kal palh ang" a lo ti lauh a, nuih a za lo khawp mai. 

"Eng nge a awmzia ni ang aw? Kimkimi lah Sensiari te college kal laia bo daih tawh a nia, Mami ruk bo a nih ka ring thei lo reng reng" ka nu chuan a ti a, miin an la hre tam si lova, ţawngthei bik nih ka duh loh avangin Vanmalsawma pawh ka hrilh ta bik lo. 

Pindan a kan luh rualin Vani chuan "Daizauin sa kan hmeh dawn a tia, Zuali te nen sa kan ei khat sia, sa ei turin ka lokal" a ti nghal zung zung a, ka u vanga lokal a ni tih ka hre ru reng sia, an inlaichinna hi min hrilh hreh tlat a, eng nge maw a hriat ni? Lo in ngaizawng pawh nise engahmah ka ngaih dawn loh tehreng nen. 

"Bawng sa kan hmeh dawn a, i ei ţeuh dawn nia" ka tih laiin Tintin-a a lo lut a, "A mak e tiraw?" ka lo ti ringawt a. 

"A rilru a buai ka tih zawh chiah kha" a ti a, min vengthawng lo zetin Vani kut pahnih a man bet a, a chhipah a khabe a nghat zui a, hmuh hrehawm pawh ka ti chuang lo.

"Ngaihsak lo deuh angin i awm a i ngaihven ru reng a ni maw? U Mala pawh i hrilh ţhin ang ka ring" ka tih chuan "I hriat ve zel a ngai hleinem. Phir te chiah i ngaihven a" a ti bul bul a, engmah min hrilh ţha duh bawk si lo. Nu Mawipuii bak khan a hek dawn lo hrim hrim. 

"U Vanneihi ka be chhin dawn mawni le ka khawngaih reuh e. A bula awm tur a mamawh ngawt ang" ka tih chuan "A ngai lo" tiin ka u in min lo khap vat a, Boomer a awm tawh lo bawk nen, ni Mami ah hian an innghat ve sia, hrehawm a van ti dawn tak. 

"Keipawh U Vanneihi te unau ka ngaihtuah hian ka ţah a chhuak. Adika leh Puipuii lah an la naupang ropui si, engmah tak tak an hrethiam dawn bawk si lo a, an hrilhhai dawn e" Vani pawh chuan a lo ti ve a, pindan zim te a awm ho chu kan ngui bur a, chhun a ka thil tawn pawh ka theihnghilh phah lek lek hial a ni. Hei hi a ni angem le Vanmalsawman chiang lo deuh a min hrilh kha ni ang le tih mai mai te ka ngaihtuah a, rilru a vak kual thui nasa leh tawh khawp mai. 

"Sensiar i thil kan hi a ut vek a nia" ka nu'n a tih takah chuan ka tlan chhuak vat a, ka thil kan ka chawk nghal mawlh mawlh a, a ut vek lo nasa mai. A hmin hnuah pindanah bawk ka lut leh a, khumah ka ţhiannu leh ka ute an ţhu daih sia chair pawt hnaiin an bulah ka ţhu ve a, chaw ei kan chak lo aniang tuman chaw ei an rawt lo. 

Diktak chuan Boomer leh ka u te inkawm nasat avang hian kan chhungkua hian inpawhna riau kan nei a, inbe ţha luam ngai lo mah ila kan inhre ţhain Boomer a boral pawn kan chhungkua min nghawng ve viau tho. Ni Mami an man leh ta zel a, police man nih ngat phei chu a rapthlakin in nghawng tir loh tum pawn a theih loh. 

"An chhungkua hi an vanduai ve ngawt mai. Nu ber a thih aţang khan buaina hrang hrang an nei a, vanduai ka inti ve te hi chu nep tak a ni ringawt" Vani chuan a lo ti leh a, pahrawn an hrawn hnu hian Vani te pawh buaina neuh neuh an nei reng mai. 

"Nang chu i nu in a la dampui cheu a, hna ţha deuh a nei bawk a, hna nghet nei lo zawk i pahrawn te chu a in luling vak ngam nang. U Vanneihi te chu a pa awm ţhat duh loh lai phei chuan an khawngaihthlak theih em kha. Fahrah ah pawh an fahrah ngawih ngawih a, nu anga an en ber ni Mami lah heti hi a ni leh sia" ka ti a, phone ka en zeuh zeuh a, Vanmalsawma a la reh hmak a, chanchin chu an hriat ve tawh tho ka ring. 

"Lo chhuak teh u, tih theih engmah in nei chuang lo. Daizaui pawn dawr khar se la chaw ei fel phawt teh ang u" ka nu'n a rawn tih leh takah chuan ka tho vat a, Vani tho ve tur chu tih hlim tum ni awm takin Tintin-a chuan zo deuhin a pu nawlh a, ka nuih mai mai laiin Vani a khek ţhat a, "Laltinkhum i ninawm lutuk" ring zeta a tih takah chuan Vani aia ring mahin "Laltinkhum eng nge ka sawi kha" ka nu'n a lo ti veleh a, an in dah thla rang khawp mai. 

"Hei pawh mi rilru buai" tih pahin kei chu a darah min pu leh a, Vani ka chhaih lo ti ni awm hrimin ka nu hmuh turin pindan aţangin min pu chhuak a, ka tlak daih hlau a ka hah lutuk chu thaw a sa bat bat mai. 

Chaw chu kan ei mai chuang lo a, Tintin-a pawh Vanneihin rawn biain pawnah a chhuak daih a, midang chu chanchin ngaichangin kan ţhu ţhap a, eng emaw tal sawi tur a min lo biak ka rin nen Vanmalsawma pawh a reh hmak a, an inchhung boruak a uap ve churh tho maithei a ni. 

"Ruati engmaw an man chhan ni a? Pawisawi lo an man ringawt thei em ni?" ka piin a tih chuan "Rinhlelh zawng te chu man thei e. Kan khuaa hmeichhe bo ţhin kha Mami ruk bo a nih an ring a, a thah an ring tel bawk aniang an man a, an dawp ang a, hotel leh a chheh vel an dap vek bawk ang a, finfiahna an hmuh phei chuan damchhung jail tan a ni mai" ka nu'n a tih zet tawh hnuah "Mahse chutiang em chu Mami'n a ti lovang. Hmeichhe pathum ngawt that tur chuan huaisen a ngai dawn emai. Mipa pangai tan pawh a harsa dawn a nia, hmeichhe tan tih theih a ni lo" a ti pang pang a, U Daizaui lo lutin chanchin a hriat ve chuan keini ai daihin a ţhawng zawk emaw tih tur a ni "Vanneihi chu min rawn hrilh ve tur a nia" a ti a, in khat a lo khawsa ho reng tawh an nia, a rinhlelh loh zawk an la man daih zui. 

"Nghak tawp mai rawh u..mi pawn an hre thuai ang a, a darh leh chuai chuai mai ang" ka nu'n a lo ti a, chaw ei kan ngaihsak lo rei lutuk chu dar7 velah Ropuia nu leh pa an lokal a, an thil rawn tih tur awm ang chu ka hrethiam nghal. 

"Vawiin thil thleng kha pawi kan ti lutuk a" an ti a, ngaihdam chu min rawn dil ta ngei a, chhungkaw pangai an nia, an fanu a awm ţha duh lo a, an buaipui ber a ni reng bawk a, mahse an fanu pakhat vang maiin an pangai lo e tihna a ni lo. Kei takngial pawn kristian chhungkaw ţha tak an niin ka hria. 

Ka nu pawh chuan rin ai takin a lo dawngsawng ţha a, a duh ang ngeia ngaihdam min rawn dil vang te pawh a ni mahna le. A lo hrethiam chu ka lawm rilru khawp a, ţhenkhat mi dang hriatthiamna nei miah lo hi an awm ve a, Ropuia pawh mi ţha a nia, tihsual nei ve thei lo, ţha reng turah ngai se chu ka nu hi ka dem zawk ngawt ang chu. Tupawn tih sual kan nei thei a, harsatna kan tawk thei a, mi harsatna hrethiam ve thei miah lo mihring hi chu an khawngaihthlak zawk. Midang hriatthiamna nei lo leh sawisel tur zawng reng ţhin ho hi chu an hah thei ngawt ang. 

"Ruihhlo hian a ti buai a, englai pawn a nu phût reng a, inţhen ula in zia deuh ang kan tih lahin duh inang ta na na na chu an inţhen hleithei bawk si lo. Miin engahmah an ngai tawh lo tih hrereng chung hian an sim thei chuang si lo a, vawiin a thil thleng pawh tum lawk vang a ni lo tih min hriat sak hram ula, ruihhlo hi chuan kan duh loh deuh deuh min tih tir chang a tam a, keini tak pawh kan zak khawp mai. A pawi tak tak a ni" Ropuia nu chuan a ti a, ruihhlo ti ţhin fa nei ve tho ka nu chuan a hrethiam kher mai. Hma hun hre lawk kan awm lova, kan harsatna tawh tur kan hriat lawk loh chu thuhran, kan duh reng vanga harsatna tawk kan ni ngai lo a, lo hriatthiam duh loh a, sawiselna tur lo zawn ţalh a ţul ber lo reng a ni. Keipawh khatiang thil kha ka chungah a thleng dawn tih chu hria ila ka kal tawp nang. 

Ropuia nu leh pa chu rilru nuam deuhin kan haw tir a, ka nu pawh a awm a nuam huai maithei a ni. Mahse Ropuia leh an makpa thil tih sual kha a hriat reng chuan a hah ţun reng tho ang, amah hian a tuar ber dawn a, a paih bo theih ka beisei tlat a ni. 

Chaw kan eikham chuan ka u in "Vani thlah pahin ka tlang mai ang" a ti a, ka hriatthiam loh viau laiin ka nu chuan "Engtikah nge i lo let ang?" a lo ti a, a hriat loh thu a chhangin pindanah a lut a. 

Pindan a ka luh ve chuan a lo insiam mawlh mawlh tawh a, a kalna tur ka zawh chuan "Kan khuaah" tih ringawtin min chhang a, tun ang reng hian kan khuaa haw ve ka chak ngai lo. 

"Engati nge?" ka tih chuan "Vanneihi te an khawngaihthlak alawm" a lo ti mai a, a chiai lo a, a hlauthawng ve hauh lo bawk.

"Ni Mami chanchin engmah an la hre bik lo a mi?" ka tih chuan an hriat loh thu bawkin min chhang a, "Lo meng reng rawh chanchin ka rawn hrilh ang che" jacket hak paha a tih chuan ka bu nghat nghat a, ka mutthilh theih ka ring lo sa hrim hrim a, pawimawh tawpkhawk lo ah ka u hian a zan a zan a kan khua a pan ka ring lo bawk. 

Vani nen a an kal chu an tlan liam thlengin ka thlir zui a, phone hum ran chungin gate pawnah ka ding reng a, dawr kan hawn tak loh avangin kawt lai chu zan dang aiin a thim deuh a, tumah an lokal dawn lo tih hrereng chungin nghah ka nei a, ka hmu chak a, biak ka chak bawk. 

Chhum chhah deuhin min tuam hlup ang mai a ni. Thaw a pik a, khaw hawi a tawi a, rin loh leh beisei hauh loh thil a thleng zut zut a, ka awmdan hi eng nen a tehkhin tur nge pawh ka hre tawh lo. A duh vang ni hawt lovin Vanmalsawma an hnuh luh ve ka hlau bawk si, thlaphanna, lungngaihna, hlauhna leh ipikna te a inpawlh nuk a, van lam ka thlir leh tawp ţhin a, Boomer a boral ta kha vannei ka ti takzet tawh. Ni lo se chu a unaute hrehawm tuar lai rilru na deuh a a thlir leh a ngai awm sia. Tunah chuan vanah a awm tawh anga, a ţhianpa ber ka u in a ai a awh thei dawn tih hriain kan thil tawn mek hian a tihbuai ve loh ka beisei tlat a ni. 

Ka phone nghawr dat dat chu ka en thuai a, ka mi nghah ngei a ni. Tun ang em em hian ka la chhang rang ngai lo.

"I va reh ve" ka ti chu nui thawmin a zui a, a la nuih theih chuan buaina a tawk lo a ni phawt ang a, mahse ka awm a nawm phah chuang lo.

"I rilru a buai a ni maw? I va in ngaihtuah nasa awm ve" a tih chuan ka hawi kual a, mihring chu sawi loh, hlim thla takngial pawh hmuh tur a awm lo. 

"Min hmu reng a mi?" ka tih chuan "Hmu lo e" a ti awlsam mai a, duh duh huna chhuak thei chu ni ila ka ko ngei ngei ang. A bula awm ka chak tlat a ni. 

"Engtin nge ka rilru ka kawm nasa tih i hriat a?" ka ti a, ka la hawi kual zak zak reng a, min enthla emaw tih mai tur a ni.

"I aw aţangin ka hria. Mak i ti em?" a tih chuan "Min lo va be har ve" ka ti ta daih a, ka vin hlar bawk. 

Ka nu min ko ri ka hriat chuan "Heta hi ka awm" ka ti vak a, kut vai pahin gate chhungah ka lut a, a hmuh phakah ka ding a, inchhungah ka lut lo thung. 

"In ngaihtuah nawn leh i duh ang ka tih reng kha" a tih chuan "Khatiang lam kha a ni lo. Thil dang zawk alawm ka ngaihtuah chu. Mihring chuan tlin lohna kan nei vek a, midang te tlin lohna ka hmuh len sak ve chiam ngai lo" ka ti mawlh mawlh a, thawk a la hawk ri te chu chiang takin ka hre thei a, ipikna nei a ang ve ka ti reng a ni. 

"In inpiahah ka awm" a rawn ti ta nge nge a, ka hmu lo pawh kha a mak lem lo. Dawr bulah hian kawng kawi a awm a, chumi piah lam daih chu a nih ka ring. 

"Lo phei rawh" ka ti a, ka nu dawt hrilh ai chuan tiin engmah sawi lovin gate pawnah ka tlanchhuak leh a, thim chinah ka ding daih bawk.

"I awm hnaih chuan bike in lo phei kher suh" keimah bawk chuan ka ti leh a, phone a tawp zui nghal a. 

Ka dinna hmun chu a reh tlawk tlawk a, dawr kan hawng lo bawk a mi vei vak pawh an awm mang lo. Ţhenawmte hi chu an dawr leh in a inzawm na a zanah chuan inleng an nei vak ngai lo a, keini chu U Daizaui avangin dawr a rawn ţhu tawk an awm reng ţhin. 

Pen thawm ka hriat chuan ka lo ding lang a, min rawn hnaih rualin a kutah ka lo vuan a, ţhenawmte in lama ka hnuh phei te chuan engmah sawi lovin min zui ve dat dat a, dawr kal pelin tlem a puk deuh laiah ka dinpui a, an pindan aţanga eng lo chhuak chuan min chhun pha a, vei vak tan chuan hmuh kan har maithei an lo hawi phei kher a nih loh chuan. 

Inhmachhawna kan din hnu chuan a helmet a phelh a, a hmel chu hlim lo riauin ka hria a, ka ngaihbel mai mai pawh a ni thei tho. Sawi tur ka ngah tehreng nen kan inhmuh takah chuan a bo vek a, sawi tur ka haihchham leh der tawh. 

"I rin dan kha ka ngaihtuah dan a ni lo" ka tih chuan a lo kiai suk duh chauh a, amah zawk hian eng emaw tal sawi se ţha tur a nia. 

"Engmah i la hre hleinem" kan ngawih vang vang hnua a tih chuan "Rindan ka nei alawm" ka ti a, mit ko san ralh a min en chuan "Ni Mami an man tur kha i hre lawk a, chu chu aniang tlaia i sawi kha" ka ti a, a hmui hnuai a pet sawi zauh a, engmah phei chu a sawi lem hlei lova. 

"I hre tawh tiraw?" ka tih chuan lu min buk khum nghutin "Ka hria alawm" a ti leh tawp a, min hrilh chiang deuh ang chu ka tih laiin min kuah a, ka chhipah a khabe nghatin "Ka neihchhun i nih hi" a ti zawi ruih a, ka hrethiam lo khawp mai.

"Ni e..ka ta alawm i nih" uang zetin ka ti ta ringawt a, a nui nghawr dawt a, engemaw tal sawi leh se ka tih laiin a inla hrang a, ka biangah dawmin ka mitah min en a, keipawn ka en let ve ran mai. 

"Ka hming a lang ve a nih pawhin ka tih tir a ni lo aw. Ka inhnam hnawih lova, in khuaa ka kal hnuah ka hre chiah. Engpawh thleng se hlauthawng lo la, i ta ka nih tak tak chuan min ring tlat ang che" a ti a, a ţawng zawi viau na in a khauh bur a, thu min pe a ang ber. 

A kawngah ka kuah a, a hmel tak run chu enin ka nui lui a, "Kalsan tur chein min hrilh lo tal a a zia alawm" dar kan ak pah a ka tih chuan min lo nuih let a, a nui hi mawi ka ti em em reng mai. 

"Min kalsan dawn pawn lo let leh tur chiahin min kalsan rawh" thum deuh dut hian a ti a, lungawi hmel deuh a min en te chuan thinrim luih pawh tum ila ka thei bik lo ang. 

Mi tana hmuh awlsam deuhah awm mah ila rawn kun hniamin ka hmuiah a fawp a, a la duhthaw em em zui a. Ka inlak hran rual chuan nui sukin a hmui huh chu a tuai zauh a, kei lahin lai ru deuhin ka hmui ka seh a, kan lung chu a awi dun viau tho ang. 

"Let tawh rawh i nu'n a lo hau ang che" a tih takah chuan ka bo rei tawh zia ka hrechhuak a, min hau nasa tak tak ang. 

"Ka thlah phei ang che" a tih chuan ka dinna piah lawka thing inphun a a helmet khai chu ka la sawk sawk a, a kawr awma ţhamin ka kuai kun a, ka khum tir rawk rawk a, ka chet dan chuan a nuih a ti za viau mai. 

"Dawrah mi an la awm maithei a, i hmel an hmuh chuan ka nu an hrilh palh ang" ka ti a, ka kawr a lukhum chu khum vein ka pawt chip a, ka landan chu mak deuh dawn mah se hetiang hi chuan zanin bak min hau lo ang. Miin min lo hmuh chuan naktukah min hau leh dawn tihna a nia, a peihawm loh emai.

"Kal ang le" zang vaha tiin a banah ka kuah a, kei aia a lian daih te hi nuam ka ti, him bik riauin ka inhria a, pa te ai chuan nghen pawh a nuam deuh alawm. Gate a ka luh dawnah ka kut ka vai a, ani pawh chutiang tho chu. 

Inchhung ka luh chuan ka chhungten min lo en ţhap a, ka nu hmel phei chu en rei ngam pawh a ni lo. U Daizaui zawk chuan "Chanchin kan la hre lo" a lo ti a, ka bu nghat a, pindana luh mai ka tum chu "Khawiah nge i kal?" ka nu'n a ti hmuk a, ka hawi let leh rang nasa mai. 

"Pawnah phone ka hmang" tih paha pawn lam ka kawk chuan "Ka awih lo rapthlak lutuk" a ti a, zaizirin ţhu turin min hrilh a, let lehin tim daiin U Daizaui bulah ka ţhu a, ka nu'n kuangkuah meuh a min en chuan thil ţha a ni lo tihna a ni mai. 

"Vawiin maiah mipa sualin hlau hlawpin a siam che a ni lawm ni? Engati nge zanah i chhuah a? Min palzam viau a thu i awih loh chuan ka hawsan che anga i ute ka ko chho dawn a nia" a ti leh tawh a, ka chhuah chhung kha a rei lo a, dawr kal chhung lek bak a ni lo. An ti mah mah ve ţhin deuh chu a ni. 

"Ka chhuak tawh lo ang" ka lo ti vat a, pawr lo ila a sawi rei lo a ni mai. Min melh ram ram laiin ka piin "Khap lutuk suh u. Ngaihzawng neih phal lo mah ula neih nachang an hriat tawh chuan a rukin an nei tho. Khawlaia inhmuh in phal loh chuan a lo len phal ula, inchhungah kan hmuh phakah an nei mai dawn alawm. Fate khuahkhirh leh lutuk pawh hi a ţha ber lo a nia" a lo ti hlauh a, miin ka bula an sawi ţhin dan a ni. Ka ţhiante phei chuan ka dinhmun a din ve an hlau a, keimah anga u mipa tam deuh, khirh deuh deuh neih ve an hlauh ber thu an sawi ţhin. Ka duh dan ngaihpawimawh lovin an duh dana min kaltir an tum a, a hrehawm zia hi awlsam deuha sawifiah theih pawh a ni lo. Jail zau deuha khung beh ang mai ka ni. 

Ka mut fel vek tawh hnuah Pektean min lo call ve mial a, dar 10 a ri tawh a, "Kan rawn leng dawn" a ti hem mai. 

"Ţullo nasa lutuk. Vanmalsawma hoin a mi in awm a?" pawr deuha ka tih chuan "Tlaiah chiah kan inhmu" a ti a, a aw aţang ringawt pawhin a ruih zia a hriat theih alawm le. 

"An inah leng mai rawh u. In tlangnelna ber alawm" ka tih chuan "Naa..tlaiah a nu nen an inhau a, kan leng peih rih lo" a tih laiin "A nu leh pa hmuhah a thinrim ngai miah lo a nia, mak tak a ni" Pekan a lo ti ve lang lang a, ka hriat tur a sawi a ni lem lo bawk.

"Inhnuaiah hna in thawk ţhin tho a, inhnuaiah in ţhianhoin awm ula a ni mai lawm" ka tih chuan "I hre lo a nih kha. A nuam lo duh teh mai a nia aw. Center table a la tlawh chhe zui amaw..eee tlaia a chet dan kha chu hmu ve la i leng chak bik lo ang" a rawn ti bual bual a, "Engati nge chutiang chuan a awm?" ka lo ti ve vat bawk. 

"Kan hre bik lo. Lo len i phal loh chuan a pawi lo. Tintin-a kan call a, in khuaah a lo kal daih sia" tih leh phone dah a rual a, ka u nen pawh kan la inbe leh lo. U Vanneihi te unau an mu thei dawn lo a, zanin chu an tlaivar maithei a ni. 

"Ni Mami hian pawi a khawih i ring em?" tih paha U Daizaui ka kuah chuan "Ka hre lo le..chanchin kan la hre bawk si lova, a hre tur ho lah biak theihin an awm bawk si lo. An man tih chu miin an hre ţan tawh a, mahse thil dang hriat tur a la awm rih lo chu a nia" a lo ti a, pindan lehlama ka pi khuh ri pawh hriat tur a la awm a, an la muhil bik lo aniang. 

Vanmalsawma thusawi te khan ngaihtuah a ti thui a, a mualpho ve mai ang tih ka hlau a, a hming chu lo lang ve pawh nise keichuan a dik zia ka hria a, mahse mipuiin keimah angin an hrechiang ve tlat lo. 

"Rilru an ti hah e" ka tih chuan "Chu chiah..mahse hmeichhe bo tawh ho chhungte chuan an nghakhlel ngawt ang" a lo ti a, sana te chu a kalmuangin zan a rei a, khawvar hun a nghahhlelhawm chuang bawk si lo. Rilru a ţawngţai ka tum lahin eng ber nge dil tur tih te, tu tana dil tur nge tih te lah ka hre der mai si lo a, a hahthlak a ni tawp mai. Ni Mami hian lo ti tak tak ta nge engvanga a tih nge niang tih chu mitin te zawhna a nih ka ring. 

CONT..