VANMALSAWMA-23

VANMALSAWMA-23

"Tho rawh a tlai tawh a nia" ka taksa a chet dat datah chuan ka phu deuh zawk a, ka harh chiang hle bawk. Ka meng kawk a, tukverh aţanga ni êng lo lut chuan ka hmaiah tak chhunin ka chhing leh vat a, ka mit a vai ram ram hman tho. 

"Dar 9 a ri tawh" U Daizauin a tih chuan meng mang lovin ka ţhu a, rizau lian ka sin mai bakah a hnuaiah kawmawl ka sin tel bawk a, a lum duh kher mai. Khawvawh vanglai a la nih avangin khum aţanga ka chhuk chuan a vawt leh nghal seng seng tho a. 

Lukham bula kawr lum phiar lian hlup ka dah chu banin ka inthawlh sawk sawk a, ka mit men nuam lo lutuk avang chuan mit ka nuai leh rih a, zanah ka muhil hleithei lo a, varţianah ka muhil ve chauh a, ka lu a nain ka rit bur a, mit pawh a kham ţhum mai. 

"Chaw kan ei tawh dawn" a lo ti leh a, ka chapal chu rawn chhir hnai pahin ka lo bun vat a, ka din rualin ka zi mar al al a, sam ka tuai mam thuak thuak hnuah pindan aţangin kan inzui chhuak a.

"In thawm ka hre miah lo" phak chuap hian ka ti a, mu tho hlim tih takah ka aw pawh a pâwr khawp mai.

"Zanah in ti ti rei em a ka kaitho duh lo che u a nih kha" ka nu'n a tih chuan U Daizauin "Keipawh dar8 velah ka tho" a lo ti a, kan han in nuih leh rih a. 

"Dawr kan hawng si lo a inah kuhva an lo lam a, in inkhawm peih ang tiraw? Tho tlai mah ula inkhawm ţhulh su aw" ka nu'n a lo ti zung zung a, inkhawm pawh a phurawm loh. 

Tukţhuan ei lai chuan Ni Mami chanchin bawk kan sawi leh a, rin aiin miin an lo hre darh chak a, tu te pawn an ngaichang a, a chanchin hriat chakin mitinin beng an chhi a ni ber. Chanchinthar an ngaihven a, an rinthu an sawi nasa tawh bawk a, a inpuan hma aţangin haw tu a ngah khawp mai. 

"A chhungte ang em chuan tuar lo mah ila kan chhung hian kan tuar ve khawpin ka hria" ka pi'n a lo ti ve bauh a, a sawi dik chiah. Kan tuar tlang khawp mai, nunphung a buai a, mut kan hmu ţha lo a, rilru a kai pengin eng tih mah kan phur lo a ni ber. A chhungte ang emin kan tawrhna a nasa lo mah se kan tawrh dan a nep chuang lo. Eng emaw zep an nei tih hre mah ila hetiang em hian min nghawng ka lo ring lo a, nunphung a ti khaihlak ti ila a dik ber ang. 

Phur lo chung chungin kan inkhawm a, kan han bang a, ţhenkhat ti ti chu Ni Mami tho a ni. Tuin nge thu ti darh ka hre lova, tunah chuan hmun kilkhawr ber a thil thleng pawh kan hre zung zung tawh chu a nih hi. Ka rin ai daihin a darh chak lehnghal a. U Vanneihi te unau ka khawngaih zual khawp mai, U Daizaui hnenah "U Vanneihi hi a bialpa nen khan innei tawh mai se la ka ti. An unau tan pawh a nuam zawk ang. Keimahah ka inchan a, an thlaphan dan tur te ka hriatthiampui" ka ti leh ringawt ţhin a, bialpa nghet a nei tih ka hria a, amah ka hriatchian ang em chuan ka hrechiang ve lo thung. 

"Mi fate hi chuan bialpa ţha leh rintlak deuh deuh an nei thei bik a, min ngaizawng ve tupa lah hi a perfume rim aiin meizial rim a na tawh zawk a" a lo ti daih a, mak ti deuha a lam ka hawi chuan ka banah lo kuahin "Vei run duh suh. Nangmah i inti hrehawm mai mai. Kan khaw zimtea khatiang thil rapthlak lutuk thleng an chhuichhuak vat lo kha a mak zawk ngawt alawm. Tunah a ruka hektu an awm avangin an hrechhuak ve chauh a, thil dik lo hi thup reng thei a ni lo reng a sin. Pathianin a rem ti lo" a ti a, a thusawi ngaihtuah lem lovin ka lo bu nghat nghat a.

"Mahse hnuchhuina hmanrua te kan la nei ţha ve vak lo a, an ti lai an man a nih loh chuan hriat a har ve ngawt ang. Rinhlelhawm ngawih ngawih te hi an awm ve bawk a, ruang hmuh loh phei chuan chhui zui har deuh tur a sin. Mizoram rau rauah pawh kan khua a thleng a nia, theih tawp chhuah a an chhui ve tho kha. Hotel ah khan an kal fo an ti na a an mizia nen a ngaihtuahin chhui zui vak ngaiah an ruat lo a ni awm sia, an chhui deuh lo kha chu an inchhir ve tho maithei a ni" ka ti a, U Mala khan hotel chu an dap ve tho niin a sawi ţhin a, mahse a thawk te pawhin officer, chu pawh pawmlai nei ho nen a zan an riah thu bak an sawi ngai lo. Cctv lah ni se ka u hnen aţanga ka hriat dan thoin rinhlelh awm an hmu ngai lo aniang, ni lo se chu an manchhuak daih tawh ang. A neitute ngat phei chuan cctv in a cover loh chin an hre dawn ropui si. 

"A hahthlak a nih hi. Khawvel chu sawi loh, Mizoram ngeiah pawh thleng thei lo a awm tawh lo a nih hi. Mihring sa ei ţhin thlengin an awm tawh ang. Kan hriat kher loh a tualthahna thleng te pawh a tam tawh viau maithei a ni" a ti a, thui pawh kan kal hmain Ropuian min rawn umpha a, kan khua a thil thleng min zawt nghal chat a, hrilh tur kan nei tam lo viau thung. 

"Ramhuai a pai an tia" a tih chuan kan lo nui tawp a, a awm ang lo thei leh lutuk. Thu leng vak tam thei lutuk hian thudik ber hriat a ti harsa ţhin. 

"Sensiar" ti a min ko tu aw lo chhuahna lam chu ka hawi vat a, Zodina a lo ni. Inkhawm banah hian min be ve leh khauh ţhin a, zaithiam a nia, kan veng chuan an chhuang ve hle a, a chanchin hi ngaihven lem lo mah ila ka hre tam khawp mai. 

"Chawhnu i inkhawm dawn em?" a ti a, a helmet la kangin min en reng a, "Ka hre lo le" ti a ka chhan pah chuan Zodina hnung a ka nu lo chho mek nui var var chu ka hmu tel a, a ţhiante nen an ni.

"Inkhawm ila..ka rawn sawm dawn che mi?" pangai tak hian a ti a, nidangah pawh ka hnar fo mai.

"Ka hre lo..ka awmdan tur ka chiang lo a, min lo sawm lo phawt rawh" inthlahrung ru deuha ka tih chuan nuih pah hian "I ti ve ziah" a ti a, keichu ka nui tawi tak a, sawi tur ka haihchhamin lai deuha ding chung hian a lam ka hawi reng ringawt a.

"Kan kal phawt mai ang..ka inkhawm loh tak leh i lo leng mai dawn nia" ka ti ta ringawt a, a lungawi hmel ve tho mai. 

"Min sawm apiangin ka hnar ve ziah a, a nuam lo ve reuh" ka tih chuan "I hnar loh tawp kha leng turin i sawm zawk a nih kha" U Daizauin a lo ti a.

"Khatianga ka tih mai loh chuan ka hnar ngun tawh sia, mak min ti ang tih te a hlauhawm a" tiin ka insawithiam a, Pektea te in zawn kan thlen chuan ka hawi chho a, tumah ka hmu lo. Ţum dang ang chu nise an lo ding leh ţhap awm sia.

"Zaithiam bialnu i ni duh lo mi?" ti a min fiam zui chuan ka ner nang nang a, tunlaiah chuan mi lar an tam tawh lutuk a, lar sa te pawh ka hmu ho zo vek tawh. Mi lar lo nih hi a dangdai tawh zawk. 

Ka sawm ngial pawhin Ropuia chu a lo peng kawi duh lo a, ka nu a hmu hreh a nih ka ring. 

"Nih leh zanah lo leng rawh aw" ka ti a, "Ka lo leng ang" a ti ve tak na a a lokal ka ring chuang lo. 

Inchhung kan luh chuan ka piin "Tv hrui in phawi vek a ka en thei lo" a lo ti a, kan pheikhawk te kan phelh a, kan ngaihsak lawk loh avang chuan "Tintinte-a a ngaihawm khawp mai" a ti a, a intih khawngaihthlak nasat hmain tv ka on sak vat a, inthlak turin ka luh san a. 

Ka puan bih lai ka thleh ţhat hnuah phone ka en a, Vanmalsawma message lo awm chu ka hawng vat a, missed call pawh a awm nual mai. 

'I inkhawm a mi? In khuaah ka awm' tih a lo ni a, ka call vat a, amah zawk a biak theih loh veleh thung a, ngaih a ţha lo leh ringawt tawh. 

"Vanmalsawman in khuaah ka awm a tia, eng nge a tih ang le?" U Daizaui lo lut mek hnena ka tih chuan "A kal a ngai a ni mai alawm. Ka hre bik lo" a ti a, ka sawi chhuak leh ţhin chu a ning tih ka hria, sawi loh a har bawk si, thil hrechiang chak reng reng a awm ţhin tih takah hrechak ber ka ni hial maithei a ni. 

Thawhţanni a class ka kal te chu a nuam lo ngei mai, tupawn kan khuaa thil thleng rapthlak an tih zia an sawi a, kan ţhianho chu nidanga min be ngai hlei lo te pawn min biain zawhna min zawt seuh seuh reng a, chhan sen a ni lo, a ninawm lek lek zawk a ni.

Ni Mami chanchin kan hriat lah a mak, a vahpa a dam reng theih nan mihring vek hlan a ngaiin a hria a, a ngaihdan chu kaltlang puiin khang hmeichhe pathum te kha a that a nih chu. A vahpa chu a awm len Vanmalsawma ngei hi a ni. A rapthlakin kum tam tak liam ta a ram pakhat a thil thleng min hriatchhuah tir a, khanu pawh khan indona a a fapa a thih hlauin hmeichhia a that vak a nih kha, mihring rilru hi a lo piangsual thei khawp mai. A chang leh that tur a min tir tu a awm a, ka beng bulah hian a rawn phun ţhin a ti an tia, kan thuhriat chu a dangdai a, a mumallo a, rilru buaina thuk tak a nei tih a chiang viau thung. 

Ni Mami an man aţanga kar khatna chiah a ni. Vanmalsawma nen kan inbe zeuh zeuh nain kan la inhmu leh lo a, ni Mami chuan schizophrenia a nei an tia, jail ah pawh awm lovin mental hospital ah an dah a, lo ţha chhuak leh pawh nise inah a haw theih chuan a rinawm loh. Jail ah damchhung hun a hman a ngai tawh ngei ang. Miin a chanchin an sawi ka chhiar ngai lova, ka ute hnen aţanga ka hriat loh chu ka ring thlap thei lo. That tura min hrilh tu a awm a ti reng a, an ti a, a mi thah ho te ruang erawh hmuh tur a awm lova, a thah dan leh an ruang a dah bo zui dan engmah a sawi duh lo. Mi pathum lai hmeichhe pakhat chauhin a dah bo hmak thei chu a nia, a mak tih mai loh chu sawi tur a awm lo. 

"Puitu an awm i ring em?" rizai pawh parh paha U Daizauin a tih chuan ni Mami chungchang a sawina a ni tih hriain ka hriat bik loh thuin ka lo chhang a, "Ka vahpa damreng theih nan ka hlan a tih kha ka awih lo bawk" a ti leh a, kan inang chiah a nih hmel. 

"Mahse rilru buaina nei ho hi chuan rindan mak deuh deuh an nei ţhin a, an rin dan a taka kalpui ţhin ho phei chu an hlauhawm thei viau a nih hi" ka lo ti a, ni Mami an man hnu hian kan mut apiangin min kuah bet tlat zel tawh a, tunah pawh min khan a, min kuah bawk a, a thlamuang hlawl lo. 

"Min hrilh tu a awm a tih kha a dik ka ring. U Vanneihi sawi ang khan amaha phun melh melh te a ching alawm. Mahse Pa Muana ka lo ringhlel zawk tho a. Ram dang daiha thleng chu a ni tho a, ni Mami ang chiahin khapa pawh kha schizophrenia an tia, a mi thah te kha ui in that turin min hrilh a tia, an in a ka awm laia kan zawhte vulh ho te kha ka hlau leh hnuhnawh" a tih chuan ka lo nui hak hak a, ani pawh a nui ve tho. 

"Rilru buai tak tak hi chu enkawl vat loh chuan an lo hlauhawm em a nih hi" ka ti leh ringawt ţhin a, hetiang lam hi ka chhiar nasa viau zel a, serial killer rapthlak deuh deuh te chanchin pawh ka chhiar fe tawh, tual an that mawlh mawlh a, an thah chhan a ho thei viau thung. An naupanlaia an thil tawn vang te a ni duh bik a, lehlam zawnga ngaihtuah chuan an khawngaihthlak zawk.

Kan khuaa thil thleng ngaihven loh ka tum hram hram laiin Tintin-a lo haw niah U Vanneihin min rawn be hlawl a, a aw aţang ringawt pawhin a hlim loh hmel a, a chau tih a hriat khawp mai. 

"Ka pa hnen aţangin hriat ka nei nual a, ka ni chungchang ni lovin Vanmalsawma zawk a nia" a tih chuan "Eng nge a?" ka lo ti vat a, a insut hraih a, a hritlang hmelin a aw te chu a phui deuh niin ka hria. 

"Ka ni kan lo hrechiang lo lutuk hi a mak ngawt mai. Ruang a dahna a sawi duh bawk si lo, inchhungah te a awm hlauin kil tin ka en a, inhnuai lah nitin ka endik ziah bawk a, thla a muang lo. In chhuahsan ka sawi lahin ka pa'n a remti bawk si lo" a rawn ti hmasa te te a, ka hriat duh loh lam bawk a rawn sawi takah chuan ka ngaihven teh chiam duh lo a, ka hne tawh a ni ber. 

"Ruhro chiah pawh nise pangai deuha vui ţhat leh an phu a sin mawle. A zahthlak bawk si, pawn chhuah chu sawi loh, mamawh lama dawr a kal ringawt pawh a nuam lo a, in a tawm a ngai a, inchhung lah ka hlau zo vek tawh bawk si" a ti a, a ţap ti tih der tawh a, an khawngaihthlak takzet a ni. 

"Ka pa chuan Boomer leh Vanmalsawma te chu an pian hlimah an la hrang a tia, a hriatpui thlap bawk. Ka nu ţhianţhaber a nia, kum7 an inneih hnuah pawh fa an nei thei lo a, Nu Ma-i te ang deuh a ni mai" a rawn ti a, Nu Ma-i a tih te hi kan khuaa dawr kai hlun an ni. Fa anneih theih loh avangin a pasal a nau fa kha fa atan an la a, a khawngaih avangin a phal sak a ni. Nu Ma-i te a tehkhin takah chuan hrilhfiah leh chuan ka ngai tawh lo. 

"Vanmalsawma tih hming an put tir ve ve pawh inthuruala an duh ang thlap a an tih a ni. Ka pa hian a lo remtih pui ve zel bawk. An mak thlawt a ni" vin lek lek hian a ti a, "An thil tih hi ka hrethiam thei hlawl lo. Kan pian hma aţang daih khan a dik lo zo vek tawh" lungchhe tak hian a ti leh a, rin loh lam aţangin min deng dawt thei thil ka tawng a, ka hre mawlh mawlh bawk a, lung natna nei ila chu enkawl ngaiin ka awm tawh maithei a ni. Chutiang bak chuan ka awmdan hi ka sawifiah thiam tawh lo. 

"Ka nau a thih khan ka pa hian a fapa pakhat zawk tal hmuh leh a inbeisei a, mahse ni Mami bawk khan a thih tawh thu a lo hrilh zel a, a ţhianţhaber te fa neihchhun a ni tawh a, ka pa'n a chhuh let leh daih a hlau aniang Boomer ang chiah khan Vanmalsawman lung lamah harsatna a neih ve thu leh a thih daih tawh thu ngawt a hrilh a" uar zet hian a ti a, amah hmu thei lo mah ila a lungawi loh zia erawh chiang takin a hriat theih a ni. 

"Ka pa fa ve tho a nia, ka nau a ni bawk a, midang fa ni tawh mah se hmuh ringawt chu kan tan a thiang ve tho. Awi..keichu awmdan tur pawh ka hre tawh lo. Thil thleng zawng zawng hi remkhawm dan pawh ka hre zo zai tawh lo. Ka ni ngeiin hmeichhe pathum a that a, an ruang hmuh tur a awm miah lo lehnghal a. Chutah nau dang ka lo la nei reng tih ka hria a, ka nau boral ta nen an inang chiah bawk a. Ka ni mah nise tualthattu kan lo chenpui reng tih hriat te hi a rapthlak lutuk" mumallo zet hian a ti nawk nawk a, keichuan U Daizaui ang deuh khan hotel khawi emaw laiah a phum ka ring a, police te rindan pawh niin an la zawng mek zel bawk. U Vanneihi hnenah ka sawichhuak duh kher lo a, ni Mamin pa Muana a ngaihzawn thu pawh ka sawi chhuak duh chuang lo. Ni tak tak anga a en fa lak a nih thu te hi a hre ve kher lo ang. Rilru kap tu leh delh rit tu a ngah rih em a, hre lo se a ţha zawk. Mahse miin mualphona a tawh meuh chuan a chanchin an ngaihven lehzual ţhin a, mi tam takin an chhui a, hei chu an hre lo ang kan tih te hi an lo hre leh ţhin. U Vanneihi pawh hian a hre daih tawh maithei tho a ni. 

"Vanmalsawma chuan in inhmu niin a sawi a" ka tih veleh "In hmu e" a rawn ti a, ipik hmel zetin thawk a la halh a, "Kan hnenah a cheng ve thei si lo a" a tih hnuah "I rawn hruai ţum ang lo tak khan min be ve mial a, cham rih turin kan ti na a a thei bik si lo a, ka ni vangin kan buai nuai nuai bawk si nen, kan hun tawnin a zir lo rih em a, inhmuh hun a awm leh mai ang" a ti a, kei ang lo takin ţhian a kawm tam lo a, an thil tawn hi hrethiam vak lo sawipui chi a ni lo bawk nen, a inbunruah theihna tlemte zinga mi ka nih ka ring. 

"Ka pa phei chu a buai lutuk a, Aizawl pawh a rawnkal reng a, ruang awmna a sawi duh loh vang tak khan ka pa a awm pawn zanah ka muhil thei lo a nia, a awm loh phei chuan hrehawm tak a ni" a rawn ti a, ka thiam dan danin hlau lo turin ka lo hrilh ve a, luhlul chhuahin a sawi duh lo a ni maithei mah se a vahte ho a hrem mai mai zawk a ni. 

"Tunah chuan engkim a langchhuak vek tawh a, Vanmalsawma lah ka pa nen pawh an inhmu tawh a, kei leh ka naute nen kan inhmu tawh bawk a, Boomer ka ngaih loh deuh phah ka rin laiin ka ngai zual zawkin ka hria. Awm ve se chu ka ti zel a, mahse amah ang chiah nau ka nei hi ka lawm lutuk. I lo hruai avang pawn ka lawm. A nih leh phawt aw ka tibuai rei lutuk palh ang che" tih leh phone dah a rual a, a la mumallo sia, message hmang tala be zui turin U Daizaui ka hrilh a, a la peih lo zui. A sual vang a ni hran lo, a ning tawh a ni ber, keimah ang chiah hian. 

"Zodina a lo leng leh dawn em?" ka nu'n a tih chuan "Ninawm khapa kha sawi ve ziah suh" ka ti hlak a, chaw ei lai hi a sawi duh hun a ni bawk si, ka kham tawh takzet. 

"A fel alawm mawle. Ruih theih thil a ti bawk si lo, inkhawm a taima a, vengchhung mite lahin an fak. Zodina hi chu a bu ang thlap a ni mai" a ti ţalh a, hmui ka lo tih pawrh te chuan "Khatin ti ve ziah suh. Nu leh pate chuan a ţha ber kan duh pui ţhin che u alawm. Ngaihzawng i nei dawn rau rau a nih chuan mi ţha leh fel fai law law nei rawh" min ti a, chhang let tawh lo mah ila ka ngaihdan a ni lo viau a ni. 

"A duh duh a nei ve bawk ang chu mawle. A nun a chhiat phah a nih loh chuan en liam mai mai teh u. Sensiari hi thunun in tum leh lutuk a a ninawm tawh" Tintin-an a lo ti hluk hluk a, Zodina hi chu Ropuia ang lo takin in lak fel a tum leh lutuk a, a tenawm lek lek ţhin.

U Mama lo chhoh ni chuan class banah Vanmalsawma ka hmu kawi a, ka hmuh loh rei vang nge ka hmu cher riau lehnghal a. Kan in thlen hma deuh, zawng khawi tute in kawtah khan min lo nghak a, a ţhiante an nih tho avangin an bathlarah kan ţhu a, sawi hmasak ber tur hre lovin kan in en a, kan nui leh ringawt ţhin a. 

"Mi chuan an sawi tel tho tho che sia, i thlalak pawh ka hmu nual mai. Mitthi tawh Boomer takngial pawh an zuah lo a, in thlalak an tarlang tel ve ve a, a ninawm duh ngawt ang" phone a ka mal thai pah hian ka ti a, a hmel chu ka en ţhin a, mut a hmu ţha lo aniang a tla dûk mai. 

"Milar ka ni tawh sia induh lo min ti em?" fiamthua a tih chuan ka lo nui hak a, zawngte kha a awmna aţanga rawn chhukin ka darah a rawn ţhu a, ka sam a la khawih zui. Ka hlauh chi tak a ni chungin ka che ngam bawk si lo, ka kut vai ruai chungin ka ţe chel chul ringawt a, Vanmalsawma lah mi nep, a tho uaih uaih ringawt a, a meng tal tap ringawt a, hnaih pawh min hnaih ngam lo. A neitute an lo chhuak hma hlauh zawk a, min rawn pui vat a, an lak hran theih hnua rum deuha ka melh chuan "Ka rap tlat a" a ti thum dût a, ti lui tih hriat zetin a ţhen suk a, nuih a za mawh khawp mai. 

"Kan khuaah i kal leh dawn em?" ka ti ta daih a, "Kal zeuh zeuh ang" a ti a, a hmui a pet sawi zauh a, ni Mami erawh Aizawl ah an rawn phur chho daih tawh thung.

"I nu nen in ţha tawh em?" ka tih chuan "A zia deuh" a ti leh ringawt a, midang hnen aţanga chanchin ka hriat hnem tho avangin ka zawt zui duh ta bik lo.

"Kan inhmu tawh bawk a naktukah min thlah thei" ka tih chuan nuih hawk pahin lu a bu zauh a, "Lutuk" a ti zui sup a. 

In a ka haw chuan U Mama'n kawtah min lo nghak a, Vanmalsawma chu a kaltlang nghal na a a hmu hman tho tih a hmel awmdanah a hriat. Inchhunga ka lut pawh min zui lut nghal a, Tintin-a ka hmu hlauh a ka awm a nuam huai mai. Min hau mah se min lo chhan dawn tlat a.

"Khapa kha a ni tiraw Boomer-a phir pui pa kha?" a tih chuan "Ni e" tih pahin dawhkanah bag ka dah a, U Daizaui dawrah a awm daih a, ka nu leh ka piten min melh ralh a, thil thleng tur hre lawk vek ni awm tak an ni. 

"U Rinhlua pawn a hmu vek a engtinmah min ti hleinem" ka ti nghal ringawt a, U Mama leh U Mala hi chu an hahthlak lam hret a ni. Min thunun an tum leh lutuk hi runluih sak sak min ti chak ţhin. 

"Rinhlua ka ni hleinem. Kan hriat phat aţangin kan phal loh zia kan sawi vek tawh. Krismas hmang tura i rawn haw lahin kan khua thleng thlengin a rawn umzui che a, i khawsak dan hi a dik lo. Ka nu lahin engkim hrevek chungin chanchin a rawn sawi ngai lo. Rawn sawi se chu kan hruai thla daih tawh ang che" a ti hluk hluk a, boruak ţha loin min tlakbuak mawlh mawlh lai a ni bawk nen ka thin a rim kher mai. 

"Thil ţha lo ka ti chuang hleinem. Ruihhlo ka tih phah lo a, ka khawsa ho lo a, lehkha zir pawh ka ţhulh chuang lo. Hetianga min hauh vak vak hian lehkhazir a tui lo vek zawk zel" ka ti a, kan inmelh ran a, kut min thlak dawn lo tih hriain ka hlau peih tawh bik lo. Kan thil tawnin min ti chau zo tawh a, heng lehzel hi ka mamawh belh lo. Thinrim a min tawng an chin chhung chu ka hmu lui char char tho ang. 

"An mualpho zia i hre vek a ni lawm ni? Khawlaiah i la zui zui a nia. Tualthah vangin an thlalak a darh chuai chuai a, mi fing chuan kalsan nachang an hria ang. I mualpho tel ve dawn tih hre ta che" vin angreng taka a tih chuan "Mawl min ti mai rawh" ka ti a, ka bag la a pindana luh mai ka tum chu "Ka pa ka sawi pui anga hmun dangah i zir tawh tak tak ang. Daizaui pawhin awmna tur dang zawng tawh rawh se" a ti nghet charh a, U Daizaui a sawi tel ve chuan min vaw na kher mai.

"Khawiah nge a awm chuan anga? Keimah vang a nih hi i thin a rim, U Daizauin tel ve na a nei hleinem. A nu pan ta se a pahrawn baw raw lutuk a hrawn a ngai dawn tihna a nia, a nun a chhe leh vek mai dawn a sin. Siamţhat kan tum mek zel a nih hi. I duh leh min hau la, duh leh hmun dangah min dah la, U Daizaui hi ka nu lak aţangin la hrang reng reng suh" chang zet hian ka ti ve a, a awm ve hlek tawh chuan hetiang hi kan ni zel ţhin. Ka ute pahnih an ve chuan in a haw ka chak ngai lo. Min hmangaih inti viau chung hian ka ngainat turin an awm ngai lova, ka naupanlai chiah kha U Mama leh U Mala te ka ngainat ve tak tak hunlai a ni awm e.

"Daizaui kan hnawhchhuah i duh loh chuan khapa kha i kawp tawh loh a ngai a ni mai" a ti a, sawi fuh a intih hmel em em mai lehnghal. 

"Ka nun in ti chep. Ka u te pawh in ang lo" ţap ţiauin ka lo ti a, pindan luhna kawngkhar vuan reng chungin ka lut lawk thei bik lo. 

"Mama duhtawk tawh rawh. A ţul chuan keimahnin kan hau mai ang. I nau hi hauh ngaiin a awm ngai hleinem" ka nu'n a lo ti dek dek a "Hauh ngaiin a awm a ka hau mek a nih hi" a ti hmuk a, keichu min la en reng a, mittuiin ka khawhmuh a ti phe vek tawh. U Daizaui an hmusit lutuk leh bungrua ang leka an ngai te hian min ti na tel ve ţhin. Ka hmangaih ang hian tuman an hmangaih ve lo niin ka hria. 

"Haw rawh" Tintin-an a lo ti ve thung a, a vin lo na a a ţawng chu a khauh viau thung.

"Engmaw i sawi a?" Maman a tih chuan "Haw rawh ka ti a nih chu. Aizawlah tih tur i la neih leh hmun dangah thleng la, i thuhnuaiah tumah kan kun lo a nia. Min ngaihsak lo hmak mahla kan sawi buai lovang. Naute hriatthiamna nei lo inluling satliah bulah kan awm reng peih lo" a ti duah a, U Mama a thinrim hmel kher mai. A bul ber chu keimah bawk a ni, mahse ka awm sual loh phawt chuan tihsual neiah ka inngai lo. Duh zawng te chu kan nei thei vek alawm. 

"Lo inrawlh suh. Zing aţangin i rui a, i nau tana entawn tlakin awm ta che" bul zeta a tih leh chuan "Sensiari leh Daizaui te hi i ngam chuan hmun danga awm tir chu i tum chhin dawn nia. Thil dang ka sawi ve duah lo ang" a tih tak hnuah chuan boruak a san zel hlauin ka pi ka lo inrawlh a, "Ka awm lai rengin in inhau a, ro in rel zawt zawt ngam a nia. Sensiari chuan tihsual lo nei pawh nise min zah ve ta che u. Kei ber emaw in in ti vek ringawt mai. Ngawi vek tawh rawh u" a ti a, ka lungawi lo leh ţah insum nasa lutuk chu ka thaw te hi a sak ţalh ni maiin ka inhria. 

U Mama chuan a duhtawk tawh mai dawn emaw ti a pindan a luh ka tum chuan "Ţhen hmak ang che. Ka awm lai hian ka thu ang chuan ti ang che" a ti a, hnial buai tawh lovin pindanah ka lut a, ka ţap chhuak ta nge nge a. 

Chaw ei tura U Daizauin min lo koh te chuan "Ka ei peih lo" ka ti a, rizaiin ka inkhuh ţha sauh sauh a, ka ţahna lamah ka hnar thlengin a phui ţup thei mai.

"U Mama nen in inhau a nih chuan ka tel ve leh hrim hrim ang. Hrehawm i tih phah ţhin sia, Vanneihi te hnenah awm leh mah ila pawi ka ti miah lo a nia" tih pahin khum tlangah a rawn ţhu a, ka inkhuhna chu ka lo keu hawng a, nuam lo a tih hmel takzet a ni. An sawi tel ve ziah tih a hria a, tunah pawh rindan a nei nghal vek reng a nih hi. 

"Nangmah vang a ni lo. Midang te enhniam ching leh thuneihna lanchhuah tir nuam ti mi an nia, hetiang chhungkua a ka piang hi hrehawm ka ti. Ka ute pahnih hi an hrang hlak a, mahse ka hre lo. U Zira hi phaiah a awm deuh reng zawk a, kan boruak hi hre ve se engtin nge min tih ve ang ka hre lo. U Mama leh U Mala hi chu ka ngaina thei tawh hlawl lo, ka hlau tlat tawh a, min duat ve viau pawn ka hnaih thei tawh lo. Awm lo la chu hrehawm ka ti lehzual ngawt zawk ang" ţhutchhuah pahin ka ti a, ka che vel chu min lo en reng a, hlim lo viau mah ila ka hlim theih nan ţum dang angin fiamthu a thawh tawh bik lo.

"Ţawng ring suh an lo hre pha ange" a lo ti a, ani pawh hi u tak tak angin ka en a, ka chauh chang pawha ka hahdamna ber leh engkim ka sawi pui ngam a ni. 

"I vannei alawm le..chhungkua i nei a, in khawsa thei a, i duh apiang i nei thei a, an duat bawk che a" a tih chuan za lo deuhin ka lo nui a, "Ka duh apiang ka nei thei lo chu a nih hi. Ka duh ka neih sa pawh min paih bo tir ţalh an tum a nia, ka nun hi a awhawm hlawl loh. Hausakna hi hlimna a ni hleinem, kan chhungkuaah hian a lang chiang viau alawm" ka ti a, pawisa min pek rualin ka hlimna min lak ţhen sak zel a, chutiang vel chu a ni. 

"Chaw rawn ei rawh" U Mama aw kan hriat chuan kan phu dun nasa kher mai. Ka hawisawn hmak a, thlang lam ka en tlat laiin U Daizaui hlau chu a tho vat a, a chhuak nghal nalh bawk. 

"Mipa vanga ţap rual pawh i la ni lo. I ngaihzawng avanga hauh ngaia i awm reng hi zak viau tur zawk i ni. Nula puitling ang maiin i khawsa a, miin an lo hria ang tih te a hlauhawm" a tih lai mekin khum bul drawer chunga ka phone dah chu a ri lehnghal a, ban ka tum laiin drawer si lek lek a ding ka u chuan min lak khalh a, a la chhang zui a.

"Tu nge i nih?" a ti a, a hming pangai a ka save lo hlauh chu ka vanneihpui dawn emaw ka ti hman a, mahse "Inbe tawh rih lo ula a ţha ang. U Mami aţangin boruak a dik lo rih a, mipuiin an buaipui chhung chu inbiak loh a ţha zawk. Thu leng vak a tam a, an phuah belh zel dawn bawk a, ani lehzel an hnuh luh ve chuan lehkha a zir thei lo ang" a ti a, ţha deuhin a hrilh na a ka thinrim lutuk chu ka rizai sin lai chu ka ţham khawm a, nghet zetin ka hum a, ka u ni lo se ka ti rum rum tawh hial a ni. 

Phone a dah rual chuan "I va sual ve" ka ti a, thil dang sawi tur pawh ka hre chuang lo. Mi chhungte hi hetiang em em an nih ka ring ve thei lo, ka ute ang hi chu khawiahmah an awm ve lo ang. 

"I ţhatna tur kan duh vang zawk a nih hi. U Mami buai naah an hming a lang ve zel a, i tel ve chuan nuam i ti lo ang. Nakinah ka hrilh chiang dawn che nia. Chaw lo ei rawh" dam deuh zawka a tih hnuah min chhuahsan a, phone ka chuh vat a, a khawih danglam lo hlauh e. 

Vanmalsawma chu ka be lui ngat a, "U Mama a nih kha" ka ti nghal thawr a, ka van ţhen phah awm lo chiang e aw ka ti ve a ni. An thu a kawi a ngilin ka zawm ţhin a, tunah chuan ka ni tawh bik lo. Duh dan hran ka nei ve tawh a, duhthlang thei rual ka ni tawh alawm. 

"I ţap a mi?" min ngaihtuah aw zeta a rawn tih chuan "Teuh lo mai...sinus hi alawm, fan hnuaia ka awm chuan ka pik vek zel. Tlaia ka nu chawhmeh kan a khu nasa lutuk a fan on loh theih lohin" tiin dawt ka hrilh a, engtia awm zel tur nge pawh ka hriat tawh loh laiin anni vang mai maia ţhen ka tum lo bur thung. 

"Chaw i ei tawh em?" a ti a, ka ei loh thu ka sawi chuan "Ei rawh zanah ka rawn bia ang che" a ti a, min ţhen i tum em ti a zawh mai te ka chak a, ka insum thei hram zawk a ni. 

"Keimah zawkin ka lo bia ang che. Phone kha lo dah hla lo la, biak theihin awm reng bawk la" ka tih chuan uangthuang zet hian "Yes miss" a lo ti a, ka nui hak thawm chu an lo hriat phak hlauin ka kâ ka hup vat a, a mak ve ngawt mai. Chhungten an duh lohna an lantir nasat pauh leh ka duh zual zawk emaw tih mai tur a ni. 

Tintin-a mangang a rawn lut veleh a, khumah ka lo la ţhu tlat tak tak a, "Chaw va ei rawh. U Mama a au lung lung reng a hei ka enchimlohi pawh a ner nung mai" tih pahin a ui hmelchhe ve deuh hmai chuar sa chu min entir a, lungawi lo reng a ang ve hrim hrim. 

"Ka ngei em alawm. Keichu thuhran a nia, U Daizaui hi an sawitel ve ziah a. Awmna tur dang a neih loh zia an hre leh lutuk a, an awmdan hi a dik lo reng reng" ka tih chuan "Buaina tam zawk a fel tawh a, a fel leh thei mai ang. Ţawngţai ţha la" min ti ve ngial a, a thusawi ka lo nuihpui lai chuan "Chaw va ei rawh. Mipuiin ni Mami chanchin an ngaihven lo vat ang a, anni pawh an zia mai ang. A zia loh chuan hrem dan ţha deuh ka hria" zawi tein a phun sup sup a, thil ţha a ni lo tih ka hre nghal. 

Kan pahnih hi chuan kan unauah rau rau kan naupang fal deuh a, tette aţanga thil ti dun nasa leh engkima inthurual ţhin kan ni. Ka thlavang a hauhin min chhan ţhin hle bawk. Hei vang hi alawm a sual viau pawh a hauh ka hreh tlat ţhin. 

"Zun tamna i pe leh dawn mi?" ka tih chuan "Shhh" a lo ti vat a, a ninawm tawpa tih let dan tur eng emaw chu a ngaihtuah fel tawh chiang alawm. 

Zanah Zodina a lo leng a, U Mama nen pawh an inkawm theiin mak tak maiin a haw hnuah pawh min hau miah lo. 

"A fel khawp kha" a ti a, ka nu lah chuan a lo thlawpin a fak zui chiam a, inkhawm a peih zia te, eizawnna a neih that thu te a sawi phei chuan ka u pawh a lungawi khawpin ka hria. 

"Siamţhat chawp ngai ai chuan mi ţha sa neih hi a finthlak. Hmeichhe fing chuan an nawmsak theihna tur an pan chat zel" a ti a, "A hmeichhe thu hla emai. Nang hi chu tlem chuan i hmeichhia deuh chu a ni. I lo nei kawp tak tak te hi a ni lo maw? Khawmaw han keu dek dek teh" nuihzat hmel takin Tintin-an a lo ti a, keipawh ka lo nui kar kar mai. Ka nui lui a ni mah zawk. 

"Mi fel neih hi chu a hahdamthlak alawm" ka nu'n a tih laiin "Tintin" ti a ka u rawn ko lung lung ri kan hria a, Peka aw ngei a ni bawk. 

Pawn lam ka thlir vat a, dawr hmaah an ţhian thumin an ding a, êng lah chuan a chhun chiang em em mai lehnghal a. 

Peka leh Pektea ten in lam an rawn hawi laiin Vanmalsawma chuan gate lam a hawi a, hoodie var hain a lukhum a khum hlun a, min hnungchhawn zawngin a ding tlat a, ka biak hun nghak turin ka hrilh kha a nia, inleng ka nei tih a hria angem le? U Mama vang vek a ni, buaina pakhat a fel a, a dangin a zui leh ţhin a, hringnun hi chu mangchhia ang mai a ni.

CONT...