VANMALSAWMA-24

VANMALSAWMA-24

Tintin-a chhuah hnu lawkah chhuanlam siamin dawrah ka phei a, Vanmalsawma te ţhian ho pawh hmuh phak an ni tawh lo. Ka u hoin an kal bo diak a, Zodina lo len thu ka hrilh lawk lo kha ka inchhir leh hnuhnawh a, awmzia a nei tawh der mai si lo.

"An lo leng a mi?" ka ti lut thawr a, U Daizaui chuan min lo en zawkin panhnah a buaipui zui a, "Leng reng e. Rawn luh an chak a, U Mama an zah ve deuh sia" panhnah a chinai tah pah hian a lo ti a, "Zodina kha an hmu em?" ka ti leh vat a.

"Hmu ang chu mawle. Khatiang hmuh loh theih a nih loh kha. Kawtkai maiah bike a hung bawk sia, a lo leng tih an hre vek alawm. Pektean 'nula rim tur a hre thei' a tih kha. A lerh ve viau aniang" a ti a, ka ngaihdan chiah a ni. Keimah lo pawh nula dang a rim tel ve nual tho ang.

"A lo leng kher kher a ka ngei tak tak a ni. Vanmalsawma lah kha ka ute nen an awm ho leh tawh sia, ka u awm laia biak chu ka hreh deuh a" ka ti a, kuhva rah nawi chu banin a hlangin ka ei a, a bulah chuan ţhu ve in ka thiam ang angin ka tihpui a, U Mama a rawnkal ve zawk bawk a, min rawn endik a nih ka ring.

"I ngaih ang em chuan a ngai thutak lo ang. Nang aiin Zodina zia an hrechiang zawk a, Vanmalsawma phei chuan nangmah pawh a hrechiang che a, inhmuh thiam lohna tham a ni lo ang" a tih laiin ka phone a ri a, "Sawi lai mek mekin" ka tih chuan U Daizaui a lo nui hak a, phur deuhin ka lo chhang bawk.

"Eng nge i tih?" a rawn tih chuan ka thil tih lai pawh hrilh mai lovin "Zodina kha leng turin ka sawm lo a nia aw. A rawn leng ve tawp a, ka hre lawk lo hrim hrim a nia" ka ti a, keipawh ni ila insawifiah ka phut dawn hrim hrim a. 

"I sawm aniang" a rawn ti vel a, a nuih a za tih hrereng mah ila "Ka sawm lo chiang e. A rawn lang hlawl a, mak ka tih nak laiin" ka ti tan tan a, inleng ka neih laia amah chiaha a lo awm te kha ka khawngaih ve reng. 

"Aaa..i duh ber ka hrechiang tho alawm" a tih chuan ka nui ta var var a, amah bak duh dang ka nei lo tih a hrechiang leh lutuk a, mipa nazawng a thik ve hauh lo. A hahdamthlak phian mai. 

Rei deuh kan inbiak hnuah "Naktukah chuan kan in bulah ni lo turning point ah zawk ka lo awm ang" ka ti a, a lo aw veleh mai a. 

Kan inbiak zawh chuan dawr kharin inchhungah kan lut a, an lo la meng ţhap a, min en uluk riauin ka hre lehnghal. 

"Ka mu nghal dawn nia" ka tih laiin ka u chuan "A la hma..dar 10 pawh a la ri lo a lehkhazir rawh" min ti a, a bula awm hrehawm lutuk hian thil ni lo lo min ngaihtuah tir a, tlanbo te ka chak phah hial a ni.

"Aw ti rawh..lehkhabu i bih khat emai. Mamin boruak a nei lian a, a ti buai pha ve bawk si che a, tunah chuan a nih tur ang ang a ni tawh alawm..ţha deuhin zir leh tawh rawh" ka nu'n dam deuha a tih hnuah Mama lam hawiin "Zantin a zir ve ziah mawle. Lehkhazir tur a nawr luih a ngai ngai lo. Mahse, Mami boruak siamin min chiah hneh a, a zir lo mai mai a nih hi" a tih zawm leh a, ka nu hi chuan min hmangaih em a, min han hau ve bawk ţhin mah se ka hrehawm a phal chuang lo a, ngaihzawng chungchangah pawh a ni tho, Zodina min duhpui rualin Vanmalsawma hi ţhen turin min ti ve chuang lo. Ka nat a hlau tlat a, ka u te hnenah ka chungchang engmah a thlen ngai lo reng a ni. 

"Aw ka zir ang" tih leh pindana luh ka rual a, titau deuh chungin lehkhabu ka phawrh a, dawhkana ka nghah chawrh hnuah ka keu zui a, rilruah a lut mawh em em mai lehnghal. 

Ni Mami diary ka xerox kha phawrh chhuakin ka lehkhabu chungah ka dah a, amah an man tawh nachungin ka chhiar leh ta daih a, a fel fai danah a rilru buai tak tak hmaa a ziah a nih ka ring. 

Nau vawi hnih a chhiat thu a lo inziak lang a, Vanmalsawma chanchin a ziah laia a zeh tel a ni. 

'Phir te chiah hi ka hlimna awmchhun an ni tawh. Vawihnih lai nau ka chhiat a, rei deuh ka lo kawp tawh mipain min ţhen phah bawk a,  depression in min umzui a, Mawipuii mangangin an hnena awm turin shillong ah min hruai ve a, ka u Muana fapa hmu reng thei lo mah ila Mawipuii fapa nen nitin kan awm dun a, Vanmalsawma hi ka fa ang mai a ni. A damreng theih nan chuan engpawh ka ti duh ang. Dam loh ka phal lo a, a nat ka duh lo bawk. A tet deuh lai chuan ka awm nghengin a muhil ţhin a, a len deuh hnuah chuan ka malchungah tui deuhin a muhil ţhin a, ka thlir reng ţhin a, a hmuhnawm a, a muhil lai ka thlir chang hian khawvel hrehawmna leh vanduaina lo thleng thei laka venhim duhnain ka khat ţhin. Phir te hi awm lo se chu ka pum chhunga naute a thih rual khan ka thi ve daih maithei a ni. Mawipuii te nupain nitin an chhuahsan a, kan pahnih a in lo nghakin kan inti hlim ve ţhin a, ka khawvel a ni' tiin a lo ziak a, a ngaihdan leh rin dan mawl mang tak kaltlangpuiin a takin a che chhuak a, Vanmalsawma te pahnih dam reng theih nan hmeichhe pathum a hlan hial a, Boomer zawk a boral hnuah pawh a la beidawng duh chuang lo. Man hlauh lo se la chu tual a thah belh zel ka ring bawk. 

Ni Mami an man ta daih hi U Vanneihi te ang bawkin Vanmalsawma hian a tawrh ve ka ring. A tan chuan nu leh pa nih a fawm a, nu Mawipuii ai pawn a ngai zawk daih maithei a ni. Boomer zawk pawh khan a ngaina takzet a, an tan a pawimawh ang bawkin ni Mami tan pawh phir te hi an pawimawh a, thil sual tih phah ta hlauh a, ngaihtuah chian poh leh a rilru a buai nasa tih a hriat. 

Ka thawh rualin U Maman "Vawiin chu ka thlah ang che" a lo ti a, Vanmalsawma nena kan thusawi lo hre ru reng ang maiin alawm a awm le. 

Sana ka en vat a, thawh ka hai lekpek tawh tih hriain ka che zung zung a, tunlai chu ka muhil lawk thei ngai lova, duh aiin ka tho tlai ziah. Ka nu pawhin min hrethiam aniang min kaitho lui ţang ţang tawh ngai lo.

"Ka ţhiante nen bus in kan kal dawn" chaw ei siam paha ka tih chuan "Bus a kal a ngai lo. I thleng har mai mai" a lo tih ve pawh chuan "Class ţan hmain ka thleng dawn tho alawm" tiin ţan ka khawh a, inthlah tir ka tum lo nasa mai. 

"Zirlai nih chuan ţhian kawm tam vak loh a ţha. Chaw kha ei la kan kal dawn nia" a ti a, chaw tlangin ka vawm lo chauh a ni. 

"Keiman ka thlah mai ang. University thlen hma workshop ah ka kal dawn tho" tiin Tintin-a a lo inrawlh a, ka lawm ru kher mai. U Mama pawh chuan min thlah a tum lui ţalh ta bik lo. Chaw ka ei sawk sawk a, Tintin-a rualin ka chhuak nghal vat a. 

"Workshop hi nangma pualin nei ve la, pawisa lut pawh a ţha deuh ang chu" ka ti a, mi hnuaia thawh reng chuan mitmei ven tur a tam a, amah hian nei ve se a hlawk zawk ka rin avanga sawi ka ni.

"Kan la nei ve ang chu" a ti duh lek chauh a, bike a ti nung vut vut a, dawr a eitur ka lak leh zawk hnuah bike hnungah ka ţhu kai tharh a, university thleng pawh min thlah dawn se Mama a nih loh chuan a nuam tho. 

Mahse ka u chu turning point ah a ding a, Vanmalsawma pawh a lo awm reng tawh a, kan thil tum an lo inhrilh ve hman emaw ka tih laiin ka u chuan "Thlah i tum a mi?" a ti lauh a, sir lama thlek deuh pah hian "Thlah che a tum a mi?" a ti bawk a, "Aw" tih bakin kan chhang lo ve ve. 

"Chhuk rawh" min ti a, rang deuh a chhukin Vanmalsawma dinna lamah ka phei a, hneh sawh ve tawh viau mah ila bike a ka lawn tur chu a tih ziah danin min lo pui a, "Ka hmaah tlan rawh u in hnung chiah zelah ka rawn tlan ang" tiin Tintin-a chuan hriatthiam harsa deuhin min en a, "Mawng er tarh khawpin han chuang vaih teh, ka rawn su lui ang che u" a tih zawm leh a, a uang nge thutak deuhin min vau tih pawh a hriat theih loh. 

Kan tlanchhuah veleh kan hnungah a lo tlan tak tak a, min ngaihtuah vang pawh a ni lo, Vanmalsawma chhaih kual vel hi nuam a ti ni berin ka hria. 

Kawng chho ulh lutuk chin kan pelh hnuah ka ţhutdan siamremin a jacket hmawr ka vuan a, chu chu lo ngaithei lovin zawl laiah a ding dat a, ka kut pahnih chu lain a kawngah a suih bet hmiah a, ka kuah leh takah chuan a lung a awi aniang a tlan veleh mai a. 

Workshop ah ka u in min pen san a, ka u a awm tak lohah chuan "Shillong ah i lokal ve daih duh em?" min ti a, ka rindan vel a ni. Thu thin ţhawng tak tak ka hriat zui zel ka ring sa hrim hrim. 

"Deuh teh phawng che chuan..shillong ah i awm leh tawh dawn mi?" ka ti a, a dara khabe nghatin a lamah ka thle a, aih  tiin min chhang se ka tih viau laiin "Maithei" a ti a, la sawi chiang chiah lo mah se ka hnual rawih rawih a ni ber. Vanmalsawma te pahnih hi chu ka bula reilote chiah awm tura Pathianin a duan lawk an nih ka ring.

"I lo let leh angem?" ka ti chuai raih a, a taksa chu a ţang ţeuh ni maiin ka hria a, hrehawm a ti ve tihna a ni.

Min kalsan pawhin lo let leh tur chiahin min kalsan rawh a ti kha a nia, mahse ani chuan "Let kher lo ang" a ti a, min kalsan chuan lo let leh tawh lo turin min kalsan dawn tihna a ni. 

"A fair lo e" ka tih chuan a taksa, thlahlel deuha ka kuah lai chu a che dat a, a nui tihna a ni. A la nui thei te chu mak ka ti zawk a, kei lah chuan hrehawm ka ti nghal et et a ni sia. 

"Khawvel hi a fair lo reng a sin. Nun hi ka tihna" mumallo zet hian a ti a, a fair hlawl lo tak tak a ni.

"I pa chiah in dah dawn tihna mi?" ka tih chuan a pension ţep tawh thu min hrilh a, a pa pension hnuah Aizawlah hian awm ngheh an tum a, mahse a nu leh paten an rilru an thlak thu sawiin shillong a awm hlen an duh thu thlengin min hrilh a, a nu leh pate thu hnial turin ngen lui tlat ila chu shillong a kal ve lovin Aizawlah amah chauhin a awm duh maithei, mahse a nu leh pa kalsan tur em chuan ka nawr lui duh bik bawk si lo, amah hring tu anga a ngaih char char ţhin an nia, enkawl seilian tu an ni bawk a, kei aiin a hmangaih zawk daih dawn tih pawh ka hre tel. A nu leh pate nen hian ţhen hrang lui tlat ila chu malsawmna ka hlat viau ang. Chuvang chuan "Kan inbe thei tho ang chu tiraw?" ka ti a, min chhang lo thung. 

"Engtikah nge shillong ah chuan i let ang?" ka tih chuan "Ka nu rualin" a ti a, ka kuah nghet sauh a, ani pawn ka huphurh zia a hriat ka ring. 

"Lawmtei kha a lo let ve dawn em?" ka tih leh chuan "Ka hre lo le" a ti mawl tawp a, ka neihchhun i nih hi min ti chung rengin loh theih lohna avangin kan inhlat a ţul maithei a, inhmu reng thei lo mah ila kan inhmangaih tlat chuan nakinah kan la innei thei tho ang ti rilru rauh rauh chungin a hnungah ka bei a, ni a sa vur a, chutih rual chuan thlifimin min chhem pah reng bawk a, a vawt lo a, a lum lo bawk a, khaw awmdan a nawm tawk chiah rualin rilru a hrehawm ru viau thung. 

"I muhil ange" a rawn tih chuan tawi tein ka lo nui a, khawvel hi chu ţhenna ram mai a ni an tih ţhin hi a dik khawp mai. 

University kan thlen chuan muangchangin ka chhuk a, kal mai ka tum chu min ti dingin a jacket ipte aţangin chocolate a phawrh a, "I ngaina sia" tih leh min pek a rual a, helmet a phelh rual chuan a biang ki laia bandaid inbel va chu khawih zauhin "Engtik a mi nge?" ka ti a, nizan khan a hmel ka hmu lova, turning point ah kha chuan band aid inbel hi chu ka hmu ngei, mahse a belna bul vel duk thluah hi ka lo hmu tel lo a nih hmel, ka enchiang tlat lo a.

"Nizanah" tiin a nui hawk a, ka lo chek hlak thung a, "I mak thei e..buaina chu hlat zel rawh ka tih tawh kha. Nitin ka hrilh theih loh hunah che pawh buaina tawh phawt chu lo tlanchhiatsan zel ang che" ka tih chuan a hmui lo pet sawi zauhin "Veng dang tlangval ruiin Pektea an lo khawih rawn a" a tih lai chuan lo pawt chatin "I va chhan a?" ka ti a, lu min lo buk khum nghut pahin "A ni ber ang chu" a ti a, thli in ka sam a chhem pawr aniang min rawn banin ka sam chu a kutin a khuih mam a, kan bul velah vei vak awm reng mah se a thil tih lai chu a tawp duh chuang lo. 

"Nui rawh..thutlukna ka la siam hleinem" zaidam deuh hian a ti leh ringawt a, shillong chu hnai viau mah se ka tan chuan a hnai ve chuang lo. Vengkhatah awmin kan duh phawt chuan nitin deuhthaw kan inhmu thei a, hmun dangah min awm san daih chuan hrehawm ka ti dawn lutuk ringawt. Ka ngaihtuah thui ngam lo zawk e a. 

"I nu te chuan engati nge an rilru an thlak leh daih a? Sa buaipui na tur hmun pawh in lei a, in sa mek niin i pa khan a sawi si a" ka ti a, a pa hian a nu a ngam vak lo a nih ka ring tlat. 

Min chhan lawk lohah chuan "Ni Mami vang a ni em?" ka ti chhuak phawng a, "Maithei" a ti leh tawp a, min chhang bung thei si, sawi zui pui zel dan tur a vang thei khawp mai. 

"Kal tawh rawh i tlai palh ang" a tih pawh chuan bike bulah ka la ding reng a, "Kal rawh" tih paha helmet khum a tum chuan helmet chu lo chuh vatin ka lak sak a, keimah zawkin ka keng ta daih a. 

"In tlanchhe dawn nge shillong nuam in ti zawk?" a mit a en reng chunga ka tih chuan "Ka let a nih chuan ka chhungte ka zui tihna a ni mai. Thil dang a awm lo" khauh zet hian a ti a, "I chhungte pawh an lawm zawk ang" tih pahin helmet chu a rawn ban thut a, min chhuh let lehin a khum nghal daih a, bike a ti nung zui vut vut bawk a, "Ni Mami vang vek. Kan lo tuar ve vek a" tiin dem tur ka zawng a, ni Mami hre ngai miah lo mihran hlak fa lo ni zawk se ţha tur. 

"Tlaiah hruai i ngai dawn em?" zangkhai deuh hian a ti a, a insiamrem zung zung thei bik te chu ka ngei lek lek a ni.

"Aw" tih leh inher ka rual a, a nui ri te chu hre ve bawk mah ila ka hawi let tawh lo. Gate ka lut fel chiah tihah ka phone a ri a, phone ka en chiah chu ka hawi let leh ta nge nge a. 

Amah en reng chung chuan ka chhang a, "Ka tlai dawn a nia" ka ti hmak a, ka thinrim bawk si lova, ka lung a awi lutuk chuang bawk si lo, ka awmdan hi keimah pawn ka hrethiam lo a ni ber. Nichina a ţawng dan hmangah khan ka uten an phal lo bur reng ringawt hi tlawmah a la ve tih ka hrethiam bawk.

"Ka fawh theihnghilh daih che" a tih chuan ner nang chung hian "Mi an tam em hi. Hetiang hmunah tumah an infawp ngai lo" ka ti hlak hlak a, ka ding leh rih a, min tibuai thiam ve khawp mai.

"Kal i phal loh chuan kal suh ti ta che" a rawn ti ţha leh a, "Kal lo ta la i nu leh paten engtin nge an tih ang che?" ka ti let a, rin ang ngeiin chhanna a nei lo. 

"Ka kal phawt anga tlaiah min lo hruai dawn nia" dam deuh zawka tih pahin a rilru nawm theih nan ka nui lui a, a kut a lo vai pawhin ka vai let ve vat a, a nu kha a hmel en khan a mizia tur awm ang chu a hriat. A duh loh zawnga awm a hlauhawm ngawt ang. Ka nu angin a ang tun tun lo na a ka nu aiin a hlauhawm daih zawk. Vanmalsawma hian a thu hnial ngam miah lo mah se ka hrethiam ngawt ang. 

Ka rilru a buai ruk em avang chuan ka ţhiante ka hrilh ve a, "Ni Mami anga an man ve an hlau anga shillong a awm hlen daih an tum aniang. A hek tu kha anmahni hi an nih ka ring bawk" Vanin a lo ti a, kan ngaihdan inang lutuk chu a mak zawk. 

"Aizawl a an awm chuan Vanmalsawma thlengin miin an en deuh bik an ni tawh a, bakah i sawi hmangah hian an chhungkua hi mahnia awm nuam ti chi an niin ka hria. Midang ngaithei vak lo, chhungkua tawp chauh a tlei chi. Chuvang chuan mi en bik nih hi an ning aniang. Vanmalsawma te chu an fa tak ni lo mah se an fapa tho a nia, ţawngkam ţhain a daih loh chinah an vau ang a, nu leh pa te do tlat hi har deuh a sin" Zualin a lo ti ve bawk a, rin thu bak sawi tur an hre bik lo. 

"Kan khuaa an kal hnu lawkah an man a, an hek tih chu chiang sa a nia. A tawp nghal mai dawn emaw an tih laiin an rin aiin boruak a alh nasa a, an mahni thlengin a kang kai ta sia, in sawi kha ka pawm thlap. Mipuiin an ngaihven leh lutuk hi hrehawm an ti aniang. Thil hre ber nih an inchuh luih luih tawh a, thlalak thlengin an pho lang ta sia, an rin anga thil kal ta lo hi tlanchhiatsan an tum a nih ka ring ber. Pawi sawi ve miah lo Vanmalsawma leh Boomer ten an tuar ve zel hi ka khawngaih lutuk bawk a" Thartei pawn a lo ti a, an nu leh pa leh an ni, anmahni hmangaih ber ber tu ni a an hriat te avangin an tuar ve mek chu a ni sia, Boomer chuan engmah a hre ve tawh lo va, Vanmalsawma hi a lainatawm khawp mai. 

"Kan inhriat tirh kha chuan a thawveng a, a nui te kha a tak tak vek a nia. Tunah chuan a nui te hi a lem riauin ka hre tawh a, a danglamna tih lan loh hram hram a tum na a a thup vek thei bik lo. Hriat theih chin leh hmuh theih chin ka nei a, a la upa lutuk bik bawk si lo a, nuihzat a fiamthu thawh nana hmang tu an tam rualin khawngaihtu pawh an tam" ka ti a, a thlalak an tar chhuah te hi an hmuh ve ţhin vang alawm ka ute pahnih pawh an hel zual nasat phah ni. 

"Hmanni ah pawh mihring zinga dam rei ber tur tih velin fiamthu thawh nan an hmang alawm. Thil awmzia ngaihven chiam peih lo tleirawl ho lahin hmelţha an tiin a thlavang an lo hauh sak thung a,  heng avang te hian a nu leh pa hian an khawngaih a nih ka ring. Anmahni ai mah chuan Vanmalsawma an ngaihtuah vanga let tum te pawh an ni thei tho a" Zuali chuan a ti leh ang lawi a, Vani pawhin "Ni tho mai. Chhan hrang hrang a awm ve thei a" a lo ti a. 

Canteen a kan kal te chu phawk zual deuhin "Raltlan" min lo ti a, kan khuaah tualthahna rapthlak tak a thleng a, keini lah zirna avangin Aizawlah kan awm a, in khaw ralmuang lo in rawn tlanchhiatsan min ti a, kan hmelhriatte ni miah lo ho pawhin "Raltlan" tiin min fiam zuk zuk reng a, ka haw hran lo na a a ninawm duh khawp mai. 

Ban hmain number hriat loh hnen aţangin message ka dawng hlawl a, ka ţhiante hriat lohin ka en ru dek dek a, 'Lo chhuak lawk teh university bulah ka awm' tih zawng a lo ni. 

'Tu nge aw?' ti a ka chhan let rualin a dp ka hmu a, Lawmtei bawk a ni. 

'Lawmtei' a rawn ti chiah reng a, class ka neih loh lai a nih bawk avangin ka ţhiante chu "Sawtah ka va kal lawk" ka ti a, zawhna min zawh hmain ka tlan nghal daih a, a thu min hrilh a zirin ka ţhiante chu ka hrilh chhawng ve tawh mai aniang chu. 

Gate pawnah a lo awm a, scooty sen no seat a lo bawh ar ar a, rawng sen no hi chu hmeichhia mah ni ila ka ngaina lo khawp mai. Min hmuh rual chuan nui var varin min lo hui a, gate hlat lo tak daihlim hnuaiah kan ding dun a, class ka neih leh tur nghak thleng lovin ka haw tlang daih maithei a ni vawiin chu nuam ka ti hlawl lo. 

"Zirlai lo tan a luh theih ka ring si lo a, ka ko chhuak tawp che a nih hi. Class ka ti buai em?" zangkhai deuh hian a ti a, min tihbuai loh thu hrilh pahin "Engtin nge ka phone number i neih?" ka ti a, "Pektea" tih pahin min melh ralh a, a pawimawh awm hle mai.

"Engthil nge?" ka tih chuan "Vanmalsawma nen hian in inngaizawng ve tak tak em ni?" a ti a, nuih hak pahin hnuai lam ka bih a, ka hawi chhuah leh pawh chuan ka nui hmel ka paih bo thei chuang lo.

"Eng nge nuihzatthlak?" a lo ti he haw a, "Min zawt ho em a" ka ti vat a, min ko chhuak ve chu a ni sia, a sawi ho si.

"Ngaihzawng nei lova hmeichhe kawp kual mai mai ching a nia, a bansan hmak kha mak ka ti reng a ni. A duh ve tak tak chein ka hria" nui sanga a tih chuan "Ka hria alawm" inringtawk tak hian ka ti a, kan hun hman dun tawh te leh min ngaihsak thiam lutuk lo chunga min ngaihtuah tho zia te ka chhui let a, min duh tak tak lo se chu ka tan thil tam tak a ti lovang. 

"Shillong ah ka let tawh dawn a" a tih laia a lam ka hawi chuan "Naktukah" a lo ti sap a. Ka rin loh lam daih a ni.

"Chu chu min hrilh turin i lokal vang vang tihma mi?" ka ti a, ka nelawm viau lo maithei, an awmdan teh nuai hi ka hrethiam lo em a ni. 

"A ni pakhat a, ka let hmaa hmuh che ka chak ve hrim hrim a" a ti a, kan la inkawm nel loh nen, nuih a za ru viau mai. 

"Tluang deuhin i haw dawn nia" ka ti a, kan ngawih dun vang vang hnu chuan "Zirna ka chawlhsan ve ringawt a, hnathawh mai tur a vang sia ka zir chhunzawm leh ang ka ti deuh a" a lo ti leh a, min hrilh chiam chhan hre lo mah ila "Zir na tur pawisa in neih chuan zir zawm chu a ţha lutuk alawm" ka ti ta tho a, a ţhianpa a rawn zui a, a rin aiin khawsak a lo harsa si a nih hmel. 

"Anni pawh rawn let leh an tum a, an vaiin, awm hlen tawh turin" tiin Vanmalsawma a rawn sawi chhuak ta nge nge a, a lo hre leh vek tawh a nih hmel.

"Nih chu mawle" ka ti ringawt a, ka sawi chak zia hria se chu hetiang lam min sawipui tur hian a lokal kher lo ang mawle.

"Ka sawi tur a ni em tih ka hre lova, lo sawi ve ngawt hreh viau mah ila awmdan tur i hriat phah theih nan hrilh che ka duh bawk sia" a tih chuan thudik min hrilh ring vak lo chungin "Sawi la" ka lo ti a. 

"Tunlai chu an chhungkua an buai reng mai. U Faktei kha keipawn ka hre ve a, Vanmalsawma nen kan inrual chiah a, kan naupanlaia kan infiam dun ţhin lai pawhin ka lo nam tluk palh te, tih luih ni miah loha ka lo tih nat palh te hian min beng hrep zel a, a chhan thei lutuk. Mahse U Faktei vanga let pui tum an ni ber lo, a nihna chen chu a awm tho ang a, a fapa a hmingchhe tel ve te hi Nu Mawipuii chuan a khawngaih a, let pui leh an tum chhan tak zawk chu a pa tak takin a rawn ngaihven reng vang a nia. Thisen hi chu a danglam a, chuvang chuan a rilru a hneh sak an hlau a, a lung a tih lensak ang a, a hruai daih ang tih an hlau bawk. U Faktei vangin midang rinna an nei tawh lo a, Nu Mawipuii a hlauthawng tlat tawh a, let pui leh a, zawn hmuh mai mai theih loh a awm tir daih a duh a ni ber. Ka sawi awmzia chu shillong ah a awm reng kher lovang ka tihna a nih chu" a ti duah a, sawi hnem viau mah se a thusawi chu a vaiin chiang takin ka hre vek a, ka sawi chhawng leh thei hial maithei a ni. 

"Puitling a ni tawh a, an duh duh naah an awm tir thei bik nang. A pa nen pawh an inhmu ve bawk ang chu, misual pawh a ni lo a" ka tih chuan "A nu'n a tih chuan a hnial ngam kher lovang. Nu Mawipuii hi a hnute a cancer a, nikum khan an zai nghe nghe a, a natna a hmang ţangkai a, an rilru hneh thei tura ţawng a thiam lutuk. Ka ţhianpa nu mah nise ka ngaina hlawl lo" a ti a, a dam vek tawh phei chuan a duh duh a a tih kual theih ka ring lo bur thung. 

"Bakah a thinrim chuan a hlauhawm lutuk. A thu zawm mai hi a fin thlak ber. Nu Mawipuii aia hmeichhe nasa an awm kher lovang. A nun a rawng bawk si. Bakah an duh lo che" a tih chuan phawk hrain ka en a, an inah a tal tam bawk a thil a hre hnem khawp mai. 

"U Faktei hnen aţangin in chanchin a hre ţeuh a, i chhungten Vanmalsawma an duh lo ang bawkin nang pawh an duh lo che. Ţhian angah ka ngai che a, tihian engkim ka hrilh che a nih hi" a ti vel a, a nui hmel aţang chuan min duhsak tak tak loh zia ka hre thei thung. 

"In inkawp hnu hian amah kalh zawnga a nu leh pa an awm hlek chuan inchhungah buaina a chawk chhuak nghal zel a, i fuih pawrh a nih an ring. A pa diktak leh nangmah an duh loh vanga kal bo pui tum an ni ber. I sawi ang khan puitling a ni tawh a, engkimah an thunun thei kher lo ang. Mahse thunun theihna chin an nei a, amah chawi lian tu an nihna laiah a chak lohna an hre ber bawk. Mihring chu midangin kan chak lohna lai an hriat chuan min thunun thei tawh ţhin. Chutiang vel chu a ni mai. I rilru tih hrehawm phah lo la, nu Mawipuii hian pawisak a nei vak lo tih hria la a ni mai. Thi daih mah la pawi a ti lo ang a, hrehawm deuha siam che a thiam lutuk dawn bawk a, tih thinrim loh a ţha ber. Tualthattu ţhianţha ber a nih hi. Ka thusawi hi hrereng rawh" a tih hnuah "Dawithiam an la awm tih te i hria em? Black magic tih angreng te" a ti leh daih a, a ngaihna hre lo zetin lu ka thing a, a nuih a la za em em zui a.

"Pawi i sawi lo reuh mawle..i rilru a chhe lo tih ka hre mai. Mahse dawithiam hlauhawm tak tak an la tam a nia, fimkhur hle rawh. I chik peih phawt chuan khawvelah hian mi maksak pui pui leh thil mak tak tak a tam zia i hria ang. U Faktein Vanmalsawma a atchilh aia nasa hian Nu Mawipuii hian a fapa hi a atchilh a nia" a ti a, ka dar a vuan chung meuhin "Kan duh ber te hi kan ta tur an ni kher lo a nia, ka kal dawn. I phone number ka nei tawh a, ka lo be ţhin ang che" tih leh scooty dahna lama phei a rual a, umzui vatin a kal tak tak hmain "Vanmalsawma chak lohna chu eng nge?" ka ti a, ka thutak tehreng nen min lo la nuih zui.

"Nangmah kha mawle. Kan mimawla hian a duh ber che alawm. I inhre nange? Thuawih rawh ti ang che, a nih loh chuan i chungah thil ţha lo deuh a thleng mai ang" a ti a, min kalsan veleh Vanmalsawma biain min lo hruai mai turin ka hrilh a, gate pawnah chuan ka lo nghak a, Nu Mawipuii chu ka rap sa tehreng nen ka rap lehzual vek alawm le. 

Keimah chauha ka lo nghah laiin Vanin min rawn call a, "Khawiah nge i awm? Kan zawng nasa lutuk che" a rawn ti lang lang a, "Ka lu a na lutuk a ka haw daih" tiin dawt ka hrilh a, min rawn hmuh mai theih lohna turah ka ding vat bawk a, ka rilru a dawih tawh sa tehreng nen thil hlauhawm deuh deuh hian min hmuak reng a, min venghim thei khawp a tam u mipa lehnghal ka nei a, an hnenah ka harsatna chhe pawh ka thlen ngam lo chu a nia. 

"Ti nge min hrilh loh a? Khawiah emaw i lo tlu sual palh a nih kan ring tawh a" a rawn tih chuan "Teuh lo mai. In bula ka awm laia ka sawi chuan min ngaihtuah dawn lutuk a, chhuanlam dang ka siam daih a nih kha. In ka thlen hunah ka rawn hrilh ang che u" tih leh phone dah ka rual a, min ring chiah lo niin ka hria. Ka dawt sawi hi a awihawm loh ve bawk em a ni. 

Rei deuh ka nghah hnuah a rawn thleng a, "I va rei ve" ka lo ti bak hlar a, "Tlaiah chauh lokal tur amaw ka tia" a ti a, a inthiam loh ve hmel reuh lutuk. 

"Ni lo nasa mai..vawiin chu haw hma ka duh a" ka ti a, Lawmtei rawn kal thu leh thil mak deuh deuh a sawi te kha ngaihtuah zui reng mah ila ka hrilh ve duh lem lova. Kan university awmna thlengin a hria a nia, min lo chik awm hle mai. Rawnkal nachang a hria te kha mak ka tia, a hlat tham ve tehreng nen. Thu awihawm loh deuh deuh a la sawi zui a, midang ti na zawnga dawi hmang thiam phei chu an awm ka ring lo hrim hrim a, in a ka inkhung chawt ţhin avangin ka hre ve lo a ni thei tho bawk a. Lo awm ta tehreng pawh nise tunah chuan an rem vek tawh ang. 

"I va ţawng duh lo ve" tih pahin ka khup a rawn tawk zauh a, a kawngah ka kuah ţha sauh sauh a, "Ka nuam vak lo a" ka ti ta ringawt a. 

"A va pawi ve..damdawi kan lei dawn mi?" a tih chuan a ngaih loh thuin ka lo chhang a, thu ho mai mai sawiin kan ti ti zui a, shillong tih vel chu kan sawi chhuak lo hrim hrim. 

Kan in thlen hmain ka chhuk a, ţha deuh a inthlahin kan invai liam a, ka bialpa a nia, inhmuhna hun kan nei tlem a, kan inhmuh zeuh tawh chuan rilruah a cham zui veng veng zel. Hei tak hi a nia mipa dang aia a danglamna chu, Boomer tih loh kha chu mipa ngaihtuah zui ka nei ngai lo. 

Lawmtei pawh kha Nu Mawipuiin a rawn tir a nih ka ring mah tawh zawk a, Vanmalsawma pawh zana lo leng turin ka sawm lui ve ngat a, an duh duh chu ti mai rawh se ka ti tawp tawh. Min ngaina lo tute avanga in dawm kun ka tum lova, ka hlim hmel hmu duh tam tak an awm laiin min haw tute hi ka hlimna lak bo tir ka tum lo bur bawk. 

CONT..