VANMALSAWMA-25

‘VANMALSAWMA-25

"Nu tunlaiah dawithiam an la awm em?" ţhutthleng a ka bag dah paha ka tih chuan mak min lo tih hmel khawp mai. 

"Engatan nge i tih a?" a ti ban charh a, a thil tih lai thlengin a chawl vek hial a ni.

"Dawithiam hlauhawm deuh an la awm leh awm loh ka hre chak" ka tih leh phei chuan ka pi nen an pahnihin chik deuhin min en a, an ngaih a ţhat loh hmel viau na a ka nui duh lo lui tlat a. 

"Mizoramah chuan an awm tawh lovang. Mahse ramdangah chuan kristian lo an tam a, milem bia mai bakah setana be duh thlengin an awm tawh a, ram dang daihah chuan an la awm ang. I u Mama tan em ni i tih a? A ngaihtuah vang chein alawm a hauh ţhin che. A duat vak thiam lo che a, i ţhatna tur a duh ber tho a nia. Thil ţha lo deuh te i lo ti ange" min ti a, nuih a za duh kher mai.

"Ram dang a mi pawh mamawhna kan neih chuan kan pan thei tho ang chu. Ka sam zai emaw ka thisen tlem ka pek chuan ka duh duh min tihsak theih ka ring" nuihza insum zet a ka tih chuan "Chutiang ngaihtuah reng reng suh. I u ngei ngei dawi tir duhna i nei te kha sual hnathawh a nih kha aw. I rilrua a awm chang apiangin ţawngţai la, hneh tum ngei ngei ang che" min ti a, ka nui chhuak ta nge nge a. 

"An la awm leh awm loh ka hre duh ringawt a, hman ţangkai duhna ka nei hleinem. Kan rindan nen a inkalh tih ka hre ve vek a, mahse an lo awm tak tak a nih chuan ka hlau a, hmeichhe pakhatin min sawi ţhaih alawm" ti a thudik ka sawi  takah chuan "Hlau reng reng suh. Setana be ţhin tu pakhat an kawmna te kha en ta che mizo ţawngin an leh vek kha. Thil a ti thei a, setana puihnain mi a that thei hial a, mahse kristian pakhat that tura an tih chuan a thei reng reng hleinem. A hlawhchham ţhak a sin. Nangpawh Pathian ring tlat la, tuman an ti na thei lo ang che" tiin min ţawng thlamuan a, nu te nge nge a hahdamthlak ţhin khawp mai. 

Ka inthlak laiin U Vanneihin min lo bia a, ni Mami hetiang a nih takah chuan kan inbe ngun khawp mai. A chang chuan vanduaina hian mi a hruai khawm ve ţhin a, kan inbe fo a, ţhianţha tak ang mai kan ni tawh. 

"Aizawlah ka pa a lokal leh tawh a" a tih chuan "Vanmalsawma bawk a mi?" ka lo ti a, hmu reng thei tho siin an ta a ni thei tawh lova, ngai viau mah se an la let thei tawh lo. An khawngaihthlak ngawt mai.

"A ni ber ang chu. A buaipui lehzual a, a nu leh pate i ti thinrim ange ka tih pawn awmzia a awm lo. 'Hmuh ringawt chu a pawi hleinem' a ti mai zel a, a buaithlak tak tak a ni. Chhungte kan neih tho avangin a thlen chilh em lo ang a, mahse an lo nin ka hlau a. Tunah pawh an inah a awm leh daih tawh maithei a ni" a ti a, Vanmalsawma hi kan buaipui tlang a ni.

"A fapa a nia, hmu thei turin dikna a nei ve alawm. Dang reng reng suh, hmuh phaka a awm chhung chu a duh hun hunah hmu rawh se" ka lo ti a, hmun danga awm bo pui leh daih an tum thu erawh ka sawi tel duh lem lo. 

"Ni ve tho mai. Mahse an sen laiin engkim an ti fel vek tawh a, an phal lo chung a hmuh luih chuan buaina a tawh ka hlau a, ni Mami awm loh hnu phei chuan ka buai lehzual a, ka vil chawt hman bawk si lo a, a hahthlak tak tak a ni. Ka pa pawh ka chah tho a, phone a biak ka hreh rih sia, Vanmalsawma chu i hmuh leh veleh min lo biak dawn nia" a rawn ti a, a aw aţang ringawt pawhin a chauh zia chu ka lo hre ve thei alawm.

"Tehreng mai..ka lo hrilh ngei ngei ang. Awmpui la mai la, thawmhnaw dawr bakah hotel a nia, in ti tawp hmak phal awm bik si lo a" ka ti a, thil rapthlak tak thlenna hmun a nia, tunah chuan mikhual neih an la phal rih lo. An khar vek rih a, mahse hawn leh an la phal sak leh tho ka ring a, chutih hunah chuan a lun zual sauh ang. Thil thleng tawh avang tak khan rap chung chung a thleng duh te, eng eng emaw hmuh chak avanga thleng duh te an awm ang a, hlau chung chunga thlahrang film kan en lui ţhin ang deuh hi a ni mai. 

"Kan nei alawm. Khawthlang lam mi a nia, a fel reuh lutuk. Hotel chu kan chhunzawm lawk thei lo ang. Kalpui zui zel an phal angem tih a hriat bawk si loh a, han ngaichang phawt ila. Vanmalsawma kha hman zanah fiamthuin hotel hi hawn leh an phal chuan min enkawl pui la ka tia, kum5 vel min nghah phawt a ngai ang a rawn ti vel a" nuih hak hak paha a tih chuan ka lo nui ve ringawt a, kum5 a liam hnuah chuan Vanmalsawma pawh a nu leh pa telloin amahin a in enkawl ve thei tawh ang chu.

"Nia, a en liam tawp bik lo ang che u. Engtik niah emaw chuan hna in la thawk dun thei maithei a sin. Mihring hi chu vanduaina tawk thei vek kan nia, vanduaina hian tumah a kal kan ngai lo. In hun a thleng ve rihah ngai tawp la, hnual phah nan hmang lovin chhel nan hmang daih la" ka ti ve mawlh mawlh a, ka nep tehreng nen midang ka fuih ve hi chuan ka zak zawk ţhin. 

"A dik alawm..hun ţha a la rawn herchhuak ve mai ang. Vanduaina hi kan ta a ni ve tho sia, nakinah a la kiang ve mai ang. Puipuii leh Adika te ril a ţam tawh aniang nakinah ka lo be leh ang che" tiin kan inbiakna chu a ti tawp a, U Mama pawh a lo haw tawh a, bualin pakhat chiah a awm bawk nen, towel keng chung ve ve in kan intawk a, "Va inbual hmasa rawh keichu ka rei dawn" ka ti tak na a "Inbual rawh ka lo nghak ang che" a ti deuh tlat a, haw vat vat se ka ti a nia. 

Ka inbual zawh hnuah ka nu ka pui a, U Mama inbual hlan chuan "Zan reiah bak lehkha ka zir dawn lo a nia aw" ka ti sar sar a, min melh rum khawp mai.

"Eng nge tih tur dang i neih chuan a?" a ti hmuk a, min en ran bawk a, "Ka ţhiante an lo leng dawn" nui var var chunga ka tih chuan "I u in a hau leh che ange aw. A awm chhung chu lo leng rih lo mai rawh u ti rawh" a ti a, min ngaihtuah vang tih hre tho mah ila "Vanmalsawma pawh Aizawlah a awm rei tawh dawn bik hleinem" ka ti a, mak a ti ve deuhin ka hria.

"Kan khuaah a awm dawn mi? I pa Muana ten an awmpui tawh dawn em ni a?" a ti a, pot a dah tur cocopeat a buaipui pah mawlh mawlh bawk a, khua a thim dawn ruai tawh a sin mawle. 

"Teuh nang..mizoramah hrim hrim hian a awm rei tawh dawn lo. Chuvang chuan lo leng deuh ziah rawh ka ti" ka ti fiamthu a, kan inhmu lo ringawt ang a, kan inţhen tak tak chuang lo ang ka ti tlat a, indawm kun tlawk tlawk ka tum lo. Inhmu reng thei lo mah ila tunlaiah chuan phone leh social media kan hmang ţangkai tawh a, ka be reng thei tho ang ka tia, a êng zawngin ka thlir lui ve tlat a ni. 

"Engati teh thut nge?" ka nu pawh chuan a ti a, a hmel landan chu a phawk hra a, mak a tih zia hai theih a ni lo. 

"Ih maw..mizoramah hian an awm tam lo a, nuam an ti lo aniang shillong a awm an tum leh zawk si a, Vanmalsawma leh a nu chu shillong ah an let vat ang a, Pu Hriata chu helama an sawn miau avangin hetah a awm rih ang. A pension hma chu amahin a awm ang ka ring" tiin khunkhan deuh takin ka hrilh a, ka nu hi chuan min hau bawrh bawrh ţhin mah se ka uten min hauh a hlau a, a lung ka tih awi loh pawhin ka ute hriatah a sawi lang duh ngai lo. Vanmalsawma pawh min duh pui hauh lo na a ti hian ka hrilh vek tho a, ka uten min hauh pawha ka thlavang a hauh theih nan a ka tih a ni. 

"A va mak awm ve..mahni ram aia midang ram ngainat zawk mai chu. An inkhawm ve ngai lo em ni? An chhungkua hi biakin ah ka hmu ve ngai lo" a tih laia "An sakhaw mi vak lo a" ka lo tih leh phei chuan a meng nur nasa khawp mai. 

"Mizo chu kristian Pathian nung bia a pathianni apianga inkhawm ţhin kan nia, neih chi a nih loh tawp chu. Inkhawm ngai lo mi nen chuan Kristian chhungkua in din lo tawp ang. Ka sawi tawh ang khan i luh thuk zel hmain bansan hmak rawh. Ka thusawi hi zawm la i inchhir lo zawk ang" a ti hlak hlak a, inkhawm ngai lo hi chu ka nu ngaihsan loh zawng tak a ni. 

"Kristian nih vanga inkhawm kher tur tihna a ni hleinem. Thinlung zawng zawnga Pathian kan rin chuan a tawk mai alawm" ka ti a, min melh rum ngang mai. Vanmalsawma pawh inkhawm tura tih luih ţalh ka tum tawh bik lo. Ka nunah hian Kristian ka nihna lanchhuah tir tum tlat ila, chu chu ka inkhawm thuam aiin hmu tam zawk se, a hlawk pui zawk ang. Ka inkhawm lai min hmu zut reng se emaw, biakin ah hruai lui tlat reng ila, ka nunah ka Kristianna a lanchhuah chuan loh chuan kan inhruai thlawn tihna a ni tho ang. 

"Inkhawm hi a pawimawh. Kristian kan nih chuan biakinah kan inkhawm ngei ngei tur a ni. Mi chu zing ţawngţai inkhawm thlengin an kal a nia, in unau hian in peih ve lo zawk a" a ti chho ţan a, "Inkhawm chu ka sawisel chuang hleinem. Mahse piangthar lo a inkhawm ve mai mai an tam lutuk. Inkhawm hi a ţha a, inkhawm lo mah ila thinlung zawng zawnga Pathian kan rin chuan kan Kristian piangthar ţha pangai tho kan ni tihna" ka ti a, "Chawhmeh chhuang lum rawh" a ti hmak a, min sawizui pui chak vak lo aniang a cocopeat dahna chawhtawlh a chawi chhuak ta daih a. 

Tintin-a leh Madiki te an rawn inzui haw a, ka nu ka chhun zo tawh aniang ka ngaih a lo ţha lo ve ringawt a. Madiki phei chuan 'min van melh rang nasa em em' a ti rilru ngei ngei ang. 

"Chaw ei a hun dawn tawh hi chhuah leh i tum a mi?" ka lo ti a, ka aw pawh a nem fahran lo. Dawhkan bula dingin ka melh ran reng a, Vani hian engmah min hrilh ngai lo na a ka ţhiannu lam ka lo ţang ve em em ringawt a, Madiki hi a nasain zakthei lo ve tak mai a nia, kan in neitute fanu pawh nise ka ţha der thiam chuang lo.

"Tum nang ka insiam dawn" a tih chuan phawk hra hian "Khawnge i kal dawn?" ka lo ti leh a. 

"Gospel camping ah ka lut dawn" a tih chuan insum hman loin ka nui vak a, "I tum ve tak tak maw Tintin?" U Mama pawhin a rawn ti ve a, anni pahnih hi chu an inmil lehnghal zel thei a, keimah tak nen chuan kan inbe khat khawp mai.

"Mipain a pi hnena thu a tiam chuan a ti hlawhtling tur a ni" tih hluai pahin ka pi bulah a ţhu a, U Mama hawi sawn veleh ka pi chuan pawisa a pe ru zauh a, ka hmu chiang thei mai bawk sia. 

"Puanthuah vel in siam fel vek tawh em?" U Maman a tih chuan "Chhunah hei Madiki hian min siam pui a" tih paha a piah chiaha ţhu Madiki mal a ben te chuan ka lo ngei khawp a, midang chuan an ngaimawh ve em em lo thung. 

"Zu in suh ka tia a lo in ţalh a ka ngei tak tak a ni. A mamawh vel leia bazar ka kal lawk hlanin Vanmalsawma te nen an lo inhmu a, kalsan lo ila chu harh fimin a lut tur a nia" Madiki chuan a lo ti a, U Maman dawhkana an thil dah rum chu a lo en ve vat a, "Heng ho hi i leisak maw? Min hrilh mai lo a nih chu mawle. A vai hian engzat man nge? Ka lo pe ang che" ka u in a tih te chuan inla fel tawkin "A ngai reng reng lo. Ka tih theih ve tawk a nih kha. A fel theih nan chuan ka inseng hreh lo hrim hrim alawm" a ti a, an thil lei ho chu en pawh ka en sak peih ve lo.

"Dawrah ka va kal lawk" ti a Tintin-a a chhuah hnuah "Vanmalsawma te hmu kher loin lut rawh ka ti mawlh mawlh a a lo hmu ţalh pek a nih kha. Anni lah hian zu leh ganja an nei reng mai sia, kha a ruih em kha" Madiki chuan a ti hlak hlak a, U Maman a ngainat loh sa nen a ti awm ang lo tak tak a ni. 

"Nilenga in inzui pawn a rui tho alawm. Bakah Vanmalsawma te chuan zu an tulh lui lo a, ganja zuk luih tirin an si luih tir lo bawk a, Tintin-a sual naah a ţhiante dem reng reng suh. I infak duh a nih pawhin midang sawisel loin infak rawh" ka ti a, an ngawi ţhap hlawm a, min hnial peih chhung ka hnial ang ka ti tak nain tuman engmah an sawi tawh lem lo. 

Tintin-a rawn lut chuan "Ka inbual dawn" a ti a, a pindan a a luh hnuah bualinah a lut leh a, sana kan en sek tawh hlawm mai.

"Ti ve vat vat la aw..i tlai ange" U Maman a ti lung lung reng a, pakhat lah chu bualinah a inkhung tlat a, chaw ei ka peih vek hnuah pawh a la rawn chhuak chuang lo.

Eitur pawm bawr lukin ka nu a rawn lut ve a, "Ruihhlo nghei tirh hi chuan chaw ei a tui lo duh a, heng ho hi ţam hnemah keng tel rawh se" a ti a, a hnungah U Daizauin rambo polythene khat ţun a rawn khai lut bawk a, nuih a za duh viau mai. 

"Engati em em nge?" ka tih chuan "Nu Ruati hian min khai luh pui rawh a tia" U Daizaui chuan a ti then a, ka nu em em hi chu a(h).

"A chaw ei a tui dawn lo a, eitur dang tal a ken loh chuan a ril a ţam dawn lutuk a sin. Ruihhlo nghei tuma rilru a siam ve na hmasaber a nia, theih tawpa kan puih a ngai alawm" a ti mai a, dawhkanah eitur a dah ruih a, phur deuha bag a a khung lai ka hmuh meuh chuan ka mittui a hnai nghal thei hial a, chhungten nghei tur a kan duh zia hi hria se chu tum tak takin an tum ve ang mawle. Mahse ruihhlo zunzam hian mihring taksa a lo fan na thei em a, talchhuah harsa an ti tawh ţhin si a ni. 

Ka nu chuan ka pa a bia a, ka pa'n "A va lawmawm ve aw. Kan lo ţawngţai ve reng ang a, a lo ţha chhuak ve em em ang" a tih laiin ka u pawh bualin aţangin a rawn chhuak a, "Camping boruakin min khawih ţan a, ka rawn vir haw nasa viau ang. Cyclone lo beisei rawh u" uang zet mai hian a ti a, "Eng thlipui pawh rawn hawn la kan lo hel tuar ang. I duh duh danin rawn che rawh" tiin ka nu'n a lo fuih sauh sauh a, inchhung boruak chu nuam tak a ni. 

Chaw eikham veleh Tintin-a kan dah lut a, team dangin an ti ve ţhin em ka hre lo, tuna kan venga lokal te hi chuan campers ho chu phone ken luh an phal tlat lo a, ka u chuan ka kuta phone min rawn hmeh bel chawt chawt pahin "En suh ti mah ila i en ru dawn tho sia, min rawn bia an awm chuan raldo in a kal ti ang che" min ti a, "Raldo in a?" ka lo ti vat a. 

"Aw...ruihhlo hi ral a nia, ka do dawn a nih hi" a tih takah chuan ka lo bu nghat nghat a, "Vanmalsawma te lo tel ve thei se ţha tur a nia, ţha deuhin lo haw rawh aw" ka tih chuan ti lui tih hriat zet hian a lo ţhen suk a.

"Vanmalsawma hi chu a hming ringawt pawh hian min ti da. Ruih tur a awm miau loh chuan fim kurin ka rawn haw thei ang" a ti fiamthu a, rin aiin amah hre tu an lo tam a, camp a luh ve tum apiang chuan a hmingin an rawn ko thei zel a, tihfel tur ang ang an tihfel hnuah a kal mai dawn emaw kan tih laiin a ding tlat a, beisei nei ni awm taka a hawikual lai chuan kan thlang lawkah bike pahnih a rawn ding a, Vanmalsawma te ţhian ho hmuh ka lo inbeisei hauh lo. 

Kan zinga motor khalh thiam awmchhun U Mama a lokal ve lo thei lo a, bike khalh tute a hmu chiah chu "Lut rawh kan tifel vek tawh" a ti hmuk a, a ngainat lohna a la lanchhuah tir zui zel a ni ber. 

Pektea a rawn tlan chho a, cigarette a rawn pe ngei a, U Maman a lo endik thlap a, dik lo a awm lo aniang ngaihţha deuhin Tintin-a a pe a, phone ken phal si lovin cigarette ken an phal te chu a mak khawp mai. A ţhiante an tlan liam hnuah "Khawvel sual hnuchhawnin" tih pahin Tintin-a a pen lut a, kan haw lam chu rilru a zangkhai khawp mai.

Kan let hnuah Vanmalsawma te ţhianho leh Pa Muana te an rawn lut hlawl a, anni ţhian ho hi chu leng tura ka sawm an nia, Pa Muana lehzel hmuh ve ka lo inring hauh lo. 

Ka nu te pawn ţha deuhin an lo dawng sawng a, puitling leh puitling han inbiak duh loh ngawt thu a awm si lova, U Mama pawn Pa Muana chu a lo be ve mial a. 

"Aizawl ka lokal zeuh zeuh a, ka tlawh ngai lo emai khawinge zanin chu tlawh ve reng reng teh ang ka tia, in pawh in lo luah nawm khawp hi" a ti a, kan inchhung vel en tum ni awm takin a hawi kual a, a palian si a, a nupui thih hlim khan zu a in vak a, a nghei tak hnu hi chuan a ţha vuah mai. A landan pawh a zahawm leh thlup tawh. 

"I va ti lawmawm ve. Aizawl i lokal tih kan lo hre miah hleinem. Min rawn tlawh ziah rawh, duh leh i rawn in nghat anga" ka nu chuan a ti a, puitling an han ti ti tak hi chuan mut a chhuak rawih rawih zel. 

Tintin-a nen an pindan inţawma U Mama a luh veleh ka nu chuan "Mami in hmu em?" a ti sap a, Pa Muana ţhutna lamah a kun deuh bawk a, a fimkhur ve khawp mai.

"Hmu lo..a hmuh theih rih loh a" Pa Muana chuan a lo ti mai a, "Vanmalsawm i pa a ni tih i hre tawh tiraw?" ka nu'n a tih chuan "Hria e" a lo ti vat a, a chhang tawi viau na a duhdah deuhin a chhang chuang lo. 

"I zui haw dawn em? I unaute ngaihtuah an ngai nasa a nia aw. Hei i pa hi nitin hna a kal a ngai a, i awm ve chuan an thlamuanpui khawp ang che. Kan khuaah awm ve daih mai rawh" ka nu chuan fiamthu ti tak deuh tak hian a ti a, nutling ţhenkhat hi chu ka nu ang an nih ve tho ka ring. An huang chin an pel fo a, thil ţha tiah an inngai tlat thung.

"Ka la kal leh ang chu" nui deuh chung hian a ti a, ka nin deuh hnuah U Daizaui message ka thawn ru a, 'Min lo ko daih teh. An ti ti hi a ninawm ka mut a chhuak mai dawn' ka ti a, a online lai ka nang aniang a hring nghal vât mai. 

"Sensiar panhnah ah hian chinai tal min lo tah sak teh. Mahni chiaha tih chuan a rei duh emai naktuk zing hralh tur a tlem lutuk ang" pawn aţangin a rawn ti lang lang a, "Chu puih a ngai" tih hluai pahin ka tho thut a, tumah pawh en chuang lovin ka chhuak nghal daih a, bawm tawt deuh aţanga pawh chhuah ang mai ka ni.

Dawr chhung a ka luh rualin "Zei min van ti tak" a lo ti a, fak tum rilruin ka lut a nia, a ngai lo a nih hmel. 

"Pa Muana lokal ve nawlh saw mak ka ti tawp. A rawn hmu che em? Nidangah min tlawh ngai mang si lo" ka ti a, chinai ban nghal vatin U Daizaui panhnah cheh mekah chuan tah nghal mai ka tum a, mahse "Lo tat rih suh ka chep zo law law ang" a ti a, chinai ka dah leh rual chuan "Hmu ang chu mawle. Aizawl ah i awm a i no surh tawh alawm min tia, ka van lawm tak ka lo tia. Min fiam zui luam hnuah a rawn lut chauh a nih kha" a ti a, a sawi chipchiar thei ţhin khawp mai. 

Vanmalsawma lo lut chu "I ning ve tawh tho a ni maw?" nui chung hian ka lo ti a, ani pawh a nui ve vur vur mai. Ka bulah lo ţhuin "Chaw a rawn ei a" zawi deuh sup hian a ti a, Pa Muana a sawina a ni tih hriain "I thlah dawn mi?" ka lo ti vat a.

"Ka tum a, in in luah a hmuchak deuh a, Daizaui hi a hmuchak deuh ber zawkin ka hria" U Daizaui en paha a tih chuan lai deuhin a lo nui a, ţul mang hlei lovin a bengah a sam a zep sek a, Vanmalsawma nen chuan nui hak hak chungin kan en reng a, a sam a zeh sek tawh chuan a lai hle tihna a ni mai. A chang chuan rilru a ti na zawk ţhin a, miin an dah pawimawh khat a, an inhnawn kual a ni ber zel a, pawimawh deuh anga kan lantir hian ţawngkam ho te pawh nise a lai vak ţhin.

"Pa Muana tak hi chu a fel tiraw? An ina i awm lai khan a sual ţhin em? A fel viauin ka hria a" ka tih chuan "Zu a in lai kha chuan a ruih sual chang hian a buaithlak ţhin a, Boomer nen pawh khan an intawng ngun lutuk. Mahse a nghei hnu khan a zia chho a, hrawn a hrehawm hran lo. Vanmalsawm i awmpui daih duh lo mi? I thisen zawmpui tak tak te an nia, i unaute an khawngaihthlak e" a ti veleh a, "Kan tum ang chu" a lo ti leh ringawt a, U Daizaui pawh chhanna mumal a pe bik lo. 

U Mama haw zana a rawn leng chu tlemin ka lo kawm ngam ve deuh a, "Tintin-a chu a la awm ve zel em?" nuihzat hmel deuha a tih chuan "A rawn chhuak ru lo chu a ni phawt a" ka ti a, chawei dawhkan bulah kan ţhudun a, ka piin ring deuhin tv a en a, ka nu chu Nu Mathani nen Nu Marini damlo kan tumin an chhuak thung. 

"Karleh ah ka nu nen kan let ang" a tih chuan "A va hma leh si ve" ka ti mawl tawp a, ka inring lawk hman lo tak tak a, amah tak pawh chuan min khawngaih hmel ve thoin ka hria. 

"Dam chuan Delhi ah ka awm ang. Ka zir zawm leh dawn" a ti a, a ţawng zawi viau na a ka hrechiang khawp mai. Ka pi hnungchhawn zawngin ka ţhu a, ani pawh min si deuh thawin a ţhu ve bawk a, tv aţanga ri lo chhuak chu ring viau mah se au vak vak a ngai hran lo. 

"MBA maw?" ka tih chuan "Umm" a lo ti leh ringawt a, sawi lo mah se tum dang a nei tih ka hriat theih phah a ni.

"June thla velah class an ţan ka ring. Nang aiin ka hniam zawk dawn a nih hmel" a ti fiamthu a, kei aiin kum khat laiin a hniam dawn tihna a ni mai.

"Tum dang i nei tiraw?" a mita en reng chunga ka tih pah chuan danglam ka zawng a, ka hmu lo thung a, a mitmeng a buai lova, chiai hmel pawh a pu lo. 

"MA i zawh hunah eng nge i tih ang?" tiin min zawt let daih a, ka inngaihtuah vang vang a, ka tum ruk reng a nia, tuma hnenah la sawi chhuak lo mah ila "NET exam ve ka duh" ka ti chhuak sap a, min nuih ka rin tehreng nen min nuih bik hauh lo. 

"Engati nge Delhi kher i thlan?" ka ti ve thung a, "Ka ţhiante an tam ber a" a ti a, a nui pah hawk bawk a, a thlan chhan a ho ve khawp mai. 

"Coaching kal ngei ngei ngai chi exam dawn ila chu Delhi ah ka lokal ve ngei ngei ang. Mahse Net exam tur chuan coaching kher a ngai hran lo a, kan inhmu lo rei dawn hle mai" ka ti chuai raih a, dawhkana ka kut dah chhuah chu a lo khawih zauh a, a kut a la let leh vat thung a. 

"Chawlh ka neih apiangin hmu tur chein ka rawn haw zat zat ang" a tih chuan "Tak tak?" ka lo ti vat a. 

"Tak tak" nuihza aw taka a lo tih ve pawh chuan la duhtawk mai lovin ka kutzungte ka ti pir a, "Ti ve rawh" ka tih chuan "Naupangchhia e" ti nuah nuah chungin a ti ve tho a, a kutzungte chu ka kutin ka lo kuai vat a, "Ka hre reng dawn nia, i lo haw loh vaih chuan ka lawm lo ngawt ang" ka ti nghal kha kha a, a nuih a za viau mai. 

"Eng nge nih i tum a?" chik deuh a min enreng chungin a ti nawn leh ngat a, rilru ka siam felna a la rei loh em avangin tumah ka la hrilh lo. Bakah ka nih theih loh palh takin a zahthlak mai mai ka tia, ka chhungte takngial pawh ka la hrilh hre lo. 

"Lehkha ka thiam vak lo a, ka rilru a chak lo a, ka unaute aiin engkimah ka hnufual a ni ber mai. Ka nu hian i ute i tluk lo min ti fo a, insiamţhat nachang ka hriat phah chuang lo. Mahse ka uten min hauh vak vak an chin hnu hian rilru ka siam a, ka hming bulah doctor awm ve ngei se ka duh a" tiin peh hel deuhin ka hrilh a, ngaihtuahna dang a nei thut nge a ding hluai a, ka kut chelh pahin "Pi, Sensiari hi bathlarah ka ţhutpui lawk dawn. I phal em?" ring leng lawng hian a ti a, ka pi pawh chuan tv ti zawi vatin "Engmaw i sawi a?" a ti a, kan han nui leh rih ţhin, a hahthlak khawp mai. 

"Bathlarah ah pawh a êng lai bikah hian Sensiari ka ţhutpui dawn...i phal chuan" a ti a, ka pi chuan awlsam deuhin min lo phal sak a, inkai rialin kan inzui chhuak a. 

Ţhutthleng sei inhung sa a ka ţhut fel at hnuah ani chu ka malchunga a kut dahin ka hmaah a ţhingţhi a, "Chawlh apianga hmuh che ai chuan i hlawhtlin tak tak hnua hmuh che ka chak zawk" a ti mauh mai. Beisei nei deuhin min en a, chhanna a duh tih hre mah ila "I rilru i thlak thut chhan hi eng nge ni a?" tiin ka lo zawt let a, ka hmuh hnuhnun ber kha chuan mipa satliah mai mai a la nia, tunah chuan ka hmu puitling vek tawh. 

"Naupang hrehawm tuar enliam mai mai thei khawp a sual ka ni lo aniang" a kut lak let pahin a ti halh a, a dar a kan uk bawk a, "Ka pawimawh alawm...tiraw?" a tih leh chuan ka lo bu nghat nghat a, ka lawm a, ka hlim bawk a, mahse inţhen hran kher a ngaih avangin hrehawm ka ti takzet thung. 

"Ka hmaa i ţhut duh tlat chuan ţhingţhi lovin kha ţhutthleng hniamah khan ţhu rawh" tih pahin nui chungin ţhutthleng hniam chu ka kawk a, "Ka van hmu har" a ti a, a nuih a za ve tho a, ţhutthleng a a ţhut ve hnu chuan a rilru a thlak thut chhan ka zawt nawn leh a, min hrilh kim loh a nei tih ka hre ran a ni. 

A nu, Nu Mawipuii zir zawm leh tura a duh ber thu min hrilh a, sa talh a sem chhuah leh vel hi a nuam tih zawng tak a ni nain a nuin a tuipui tlat lo a, a nu tih lawm nan zir zawm leh a tum a nih ber chu. A unaute a khawngaih ve tho bawk a, a nu a tih lawm loh chuan a tan a unaute puih ngaihna a awm lo. 'A fing a, thiam deuhin kan thil tih apiang a ti chhe zel thei ang' a ti hial a ni. Chubakah a hmangaih ve tho bawk a, a thisen zawm te ai hian a hmangaih zawk hial maithei a ni. 

"An vai hian tumah ka thlahthlam lovang" a ti a, tuna a thil tih lai hi hlawk viau tawh mah se a chhungte puihna tello chuan a la ti thei tak tak bik lova, a tih lungawi loh chuan an pui duh lo ang a, reiloteah hniam lam a pan ang a, amah pawh hian a bansan tawp hreh ve tho a, "Nangmah ang lo takin ka rilru a chak a" a ti fiamthu a, "Mahse i ţha ber" ka lungawi loh hlaua a tih leh hnuah ka kut chu la kangin a fawp zauh a, ka nui var var reng tak na a hrehawm ka tihna a kiang thei lo. 

"Lehkhazir hi hrehawm ka ti hran lo bawk a, ka zir zel ang a, nakinah keima pawisa in bul ka ţan ţha ang" nghet churh hian a ti a, a tumruh hmel khawp mai.

"I nu chuan zir zel lovin tuna i thil tih hi a pawm thei mai lo em ni?" ka tih chuan "Fate ah chuan an beisei a sang ţhin a" a ti a, a hmui a pet sawi zauh a, a phur tehchiam bik lo. 

"Keichu ka duh dan a la ngai reng. Engtikah nge kan hlawhtlin dawn tih a hriat loh a, hlawhtlinna kawng hi a thui a, a bumboh bawk a, ka hlawhtlin hunah min hmu chauh dawn a nih chuan kan inhmu lo rei dawn lutuk. I chhungten an phal tho chuan chawlh i neih apiangin min lo hmu rawh" ka tih chuan min lo nuih sukin "I duh dan apiangin" a ti a, ka lung a awi viau mai.

A unaute a kalsan rei dawn em tia ka zawh chuan "Vanneihi ka be mai ang" a ti a, chhungkaw thil chu an pahniha an rel turah ka dah a, ka inrawlh buai duh lem lo. 

A haw tur chu gate thlengin ka zui phei a, kan inţhen hun a hnai tawh a, in kalsan tur rau rauah mi inkalsan tur angin hlim lo hmel kan pu ve duh hauh lo, buaina thleng thei zawng zawng chu ngaihtuah lo luiin kan tumah kan chiang a, thil dang zawng aiin kan induh tawnna kan dah sang bawk. Hmangaihna a nih leh nih loh ka hre lo. Hmangaihna an tih fo hi ka hrethiam ve chiah lova, tuna kan awmdan hi hmangaihna a nih chuan kan inhmangaih tihna a ni mai. 'Ka hmangaih che' tih te mai hi a thu tawi viau mah se a hlu a, kan la sawichhuak miah lo pawh hi a awm lo lem lo. 

"Naktuk thlah i ngai em?" a tih chuan "Ngai e" ka lo ti vat a, lehkhazir ka la ngaih avangin min haw san vat a, ka hmuh puitlin viau hnu hian Boomer kha a ang ka ti lehzual. Ani kha a puitling a, ţhiante zingah ho deuhin awm ve mah se a rilru puitlin zia ka hria a, a unaute innghahna takmeuh a ni. 

Van lam ka thlir leh ta ringawt a, awm tawh lo mah se a aiawh turin Vanmalsawma a awm tawh alawm. A fing a, tute mah thlahthlam lovin nuam sa leh hlim deuhin a la siam ngei ngei ang. Ka rilru chuan 'tumah rawn ngaihtuah suh' ka ti a, vanneihna in a chhungte hnen a thlen hunah a ri ngeiin ka la hrilh ang. 

CONT...’