VANMALSAWMA-26 (LAST)

VANMALSAWMA-26 (LAST CHAPTER)

(A tawp der dawn a, Vanmalsawma bik ka ziah hian buaina hrang hrangin min tlakbuak a, mumal tak pawn kan ziak thei lova, Darxika thlengin a chawlh phah ve ţhak ţhak fo a, rilru pek hleihtheih loh chang a tam na na na chuan a phuai luai lai a awm lo thei lo a, chuti chung pawh a he thawnthu in lo tuipui tho hi in fakawm a, in fel a, ka lawm thlawt a ni. Darxika hian a hmel en aiin hriatthiamna a ngah a, ka hausak veleh cheese ka leisak ang😂 a nih u aw🤣🤣)

*Tintin-a story chu a nghak peih te tan aw😉*

Ka class kal tur chu phur deuhin ka insiam a, ka bialpa nen veng khatah kan awm rei tawh dawn lova, duh duh hunah in ka chhuahsan ve thei lo bawk nen, hmuh theihna hun tlem te ka neih ve chhun hi bawhpelh ka tum lo. 

"Taxi fare a ngai em? I u lo chhuah hunah chuan nitin in inthlah leh thei tawh ang. I ţhiante awmna veng a hla lutuk a, han inthurual thei ula a ţha tur a nia" pawisa min pek paha ka nu'n a tih chuan "Pek tam ka ngai lo. Vanmalsawman min thlah dawn a" ka ti a, tlem chuan sawi a nuam lo ve deuh.

"A ţhat hlauh chu mah se class kal lovin i lo leng kual vel mai mai ange aw. Min bum vaih chuan nangman i tuar zawk dawn a nia" a ti leh ţan tawh a, class ţhulh duh mah ila ka thil tum hre vek tawh tu ka bialpa hian a phal teuh lo mai.

"Vanmalsawma hi in ngaih ang a ni lo a nia" chiang deuha ka tih hnuah ka chhuahsan a, dawrah kawiin eitur ka lak lai chuan U Daizauin "Khawiah nge in innghah dawn a? Nichin khan kan in hi a lo tlan tlang tawh, a bike ri ka hria" a lo ti a, a beng hi a ţha a nia. 

"I va hre thei ve..min phurh ngun tawh nen ka hmuh loh chuan ka hre ve thei reng reng hleinem. Turning point ah bawk min lo nghak dawn aniang" ka tih hnuah "A nih aw" tih pahin uangthuang deuhin a sam ka tuai a, ka tlanchhuak nghal daih chu thinrim ni awm takin eng eng emaw sawiin min au zui lang lang a, keipawh turning point lam panin thawveng deuhin ka kal phei a, ka inti hlim lui a ni ber. Ka chheh vel a mi awm ve ho, ka ţhiante ngei pawh hian min hrechiang viau na a hlim rawh min ti reng kher dawn lova, kan awm ho tlem ţhin em avang leh mimal thil an neih ve tho avangin min ti hlim reng hman bik lo. Keimah leh keimah tal ka intih hlim luih loh chuan hmun danga awm tura min kalsan tak tak hunah hrehawm ka ti lehzual lutuk palh ang. 

"I va hma ve" kan inti ve ve a, kan sawi rual chiah lehnghal, in nuihzat tawnin kan han nui dun leh rih a, ka chhungte khirh lutuk avangin kan pahnih chauha hun hman dun kan nei tlem a, chuvang chuan khawi hmunah pawh inhmu ila kan pahnih tan chuan a pawimawhin hriatreng tlak leh kan theihnghilh tawh loh tur vek a ni.

"Chuang la" a tih takah chuan ka bag ah lai ka siam ţha a, "Zei loh sa nak laiin ak lo la nuam i ti zawk ang" lo tih hluk pahin bag chu min chhuh sak a, a awrh leh ta daih a. 

Bike a ka lawn laia min lo pui ziah te hi a bike kher lo a ka lawn hunah pawh ka hrechhuak ziah tawh ang. Ka hriat chian lehzual theih nan tunah pawh nghet deuha vuanin ka che muang lui a, min kalsan hun tur ngaihtuah chung zelin rilru no zawk na na na chu ţah a chhuak nghal ţeuh thei mai. 

"Tlanchak suh aw" ka tih laiin "Hahdam rawh" a lo ti ve thung a, ka khup ah a rawn dawm a, tlan chhuak ta mai lo chuan a ding vang vang a, in aţangin chhuak hma hlauh lo ila chu ka tlai ngei ngei ang. 

"Kal tawh ta che" ka ti bak hlar a, ka vin lui a ni. A kawr ka ţham rualin ka kut pahnih chu a lo man a, a kawngah min suih beh tir leh salh tawh a, a hnungah ka bei lo chauh a ni ber. Khawpui chhung lun lai tlanpelh tur a tam em avangin ka hnaih lutuk loh nan ka inveng ve ţang ţang a, ani pawh ka thusawi zawmin a tlan chak ta bik lo. 

"Ka pua ang che" a tih chu 'ka hnungah khan bei rawh' a tihna ang vel a nia, mite angin awmdun tam thei lo mah ila kan in man viau tawh. 

"Hmun reh lai kan thlen veleh min paw dawn nia" ka ti a, ka hnaih lutuk loh nan ţang ţeuhin a hnungah chuan ka ţhu a, ka bag kha la daih lo se ka hmaah dah ila a awlsam zawk maithei a ni. 

"Kan tawpna tur a ni lo ka tih kha aw" dam thlup a tih pahin ka khup bawk chu a rawn tawk zauh a, za lo deuhin ka lo nui a, mi hnem thiam teh chiam lo mah se a tum ve ţhinna ringawt pawh hi ka tan chuan lawmawm tak a ni. 

"Ka hria alawm. Chawlh apianga min lo hmuh dawn kha tiraw?" ti a awmze nei zeta ka zawh chuan "Lutuk tlat" a lo ti vat a, ka kut chu la letin ka hawi kual thuak a, traffic a jam nasain four wheeler ho phei chu an ding vek a, "Thi lek lek a i damlo a nih loh chuan ţhulh a thiang lo" khauh angreng deuh a ka tih leh chuan a lo nui hawk a, thawk lak halh pahin na vak lovin a helmet ah ka beng dat a, ka hmuh phak lohah a awm vat dawn chu a ni sia, lungawi deuha pawm mai har deuh a sin. 

Hmun reh lai kan thlen takah chuan a kawngah bawk kuah bet lehin a hnungah ka bei a, in a awm pheuh pheuh ringawt tawh a, mipui hmuh tur an awm loh chu thuhran, helai kawngah hi chuan lirthei vei vak pawh a awm mang ngai lo. 

"Kan in video call ţhin anga" ka ti a, reh viau mah se ka awm danin a zir loh miau avangin ka ţawng ring khawp mai. 

"Zing i thawh veleh hmai phih hmain min lo call ziah dawn nia" nuihza aw zet a a tih chuan "Thawh hlim a in call kher chu eng nge a ţulna?" ka ti leh ang lawi a.

"Mizia leh hmelah a chhe lai ti lang hmasa ila, inneih hnuah a ţha lai kan ti lang ve thung ang a" a ti a, a hmel hmu lo mah ila a nuih a za tih a aw aţangin a hriat theih vek.

"Tun aţanga a chhe lai kan tih lan chuan inneih hnuah lo ti lang leh zeuh pawh ni ila kan hmu mam vek tawh ang" ka lo ti ve thung a, fiamthu a sawi mah nise a thusawi chu a dik ve tho mai. Kei chuan inngaihzawn lai emaw, inneih hnu pawh nise kan nihna ang angin inpawm tawn thiam ila ţha ka ti ber thung. Mihring kan nih chhung chuang engtikah mah kan ţha famkim thei dawn si lo a, hriatthiamna kan neih vek loh chuan nun ho a har dawn emai. 

University pawh kan thleng thuai a, nidanga min thlah aiin a tlan muan ber ţum hian kan thleng hma ka ti ber. Bike aţanga ka chhuk rualin helmet a phelh a, a bul lawkah dingin ka bag a awrh lai chu ka lo laksak ve bawk a, helai hmunah hian duty awm se chu meizial thlengin an indil ngam tawh ang, chutiang khawp chuan ka class kal tur hi chu min thlah ngun ve a ni. 

"Tlaiah min lo hruai hman ang tiraw?" bag ah ţhat mawlh mawlh paha ka tih chuan "Hun ka lo insiam ang" a ti a, kal mai lovin a bike a darthlalang ah chuan ka in en leh rih a, ka hmai ka tuai thuak thuak lai te chuan "I nalh em kha" a lo ti ve reng a, a hmel a min nuihzatna langchhuak te chu hmuh hmaih theih a ni lo. 

"Kal tawh rawh i tlai ang" lo ti ve bawk mah se ka din dan siamremin ka sam ka chul a, a dik leh dik loh ka en pah reng bawk a, a ning nge min fiam tih pawh ka hre lo; ka chul mam loh na lai apiang a lo ti pawr zel a, a tuai thur vek hlauin ka tawlh hla thuai a, tum bura ka en laiin a lo kiai suk a, a nui hmel hi ka ngaih ber tur te zinga mi a ni. 

"Tlaiah chuan min lo hruai ngei ngei rawh aw" ka tih chuan nuih suk pahin lu a lo bu nghat a, a kianga awm nilen chak viau mah ila ţha deuha lehkhazir hi kan pahnih a kan nawmsak vat theihna tur zawk a nih avangin la inthlahlel viau mah ila kan invai liam a, class lam pana ka kal te chu ke pen a sak ţalh mai. 

Zirlai tibuai vek khawpa nasa a ngaihzawng neih ka duh lova, nei mah ila mahni ka intihchhiat phah lo ang a, zirna ka ngaihthah phah lo ang tih hi hman aţanga ka lo tum tawh ţhin dan a ni. A chhe ber dâwn a ngai ve a, ngaihzawng te nen chuan inţhen thei kan nih laiin thiamna ka neih tawh nen chuan ţhen hran theih kan ni ve dawn lo tih ka hria a ni. Nakin lawkah chuan 'I ute i tluk lo' tih thu hi ka dawng leh tawh ngai lovang. Hetiang hian fuihtu ka neih loh chang pawhin mahni ka infuih ve ţhin. 

Ka ţhianten ka chanchin an hriat chuan an ngui ve bar mai. Kei ai aiin an tuar emaw tih tur a nia, hnemtu zawkah ţang lehin "A sawi dan takah a tawpna tur a ni hleinem. Kan inţhen dawn tihna a ni lo a, zirna avangin hmun dangah min awm san dawn a ni mai a, kei aiin in tuar thiam lo zawk daih" ka ti a, ka nuih takah chuan za lo deuhin an lo nui ve a. 

Zuali leh Thartei te zun hlanin Vani nen canteen ah kan lo lut hmasa a, inhma tawn a kan ţhut rualin ka kut a rawn vuan a, kan ţhianho hi chu kan inpawh a, kut invawn sak chawt chawt te hi kan ching riau a, hmeichhe tih dan a nih deuh bik avangin ngaih loh lama ngai pawl pawh an awm kher lovang. 

"Hrehawm i ti a nia aw ka hre vek" a tih chuan "Ti ve tho e. Mahse kal suh ti mah ila a kal a ngai tho sia, kei ang lo takin a pian dan a hnawk a, siamţhat ngai a tam a, ding lam a puih dawn chuan vei lam a tih lungawi hmasak a ngai a, chutiang deuh chu a ni mai. Ani pawh a inngaihtuah fe hnuah thutlukna a siam chauh ka ring a, pumpelhna kawng a awm lova, chuvang chuan awmze nei lova lungngaih chiam ai chuan ka pawm thlap mai. Tunah innei ringawt ila kan la naupan bakah ka chhungte phei chuan min ngaihsak dawn lo hrim hrim a, hma hun a thim lutuk. Thil ţangkai leh nakin zel thlenga kan ţangkaipui tur kan ti ve ve dawn a, kan inţhen dawn lo. Hei hi a pawimawh ber" ka ti a, tawitein min lo nuih a, min khawngaihzia ka hai bik lo. 

Thawnthu ah chuan hmelma tam takin tihchhiat tuma an beih hnuah pawh hmangaihna chuan hnehna changin a tawpah hlim deuhin an awm a, an innei ţhin a ni ngai a, ka nun hman dan hi chu ka thawnthu chhiar letling thawk vek a ni. Dawhtheih a ngai a, Vanmalsawma bula awm hlen thei tur chuan kum tam tak ka nghah a la ngai bawk ang. Chutiang tur chuan ka inpeih thlap thung. Ka bialpa hmasaber hi a hnuhnung ber nih tel tir ka tum tlat a ni. 

"Tinkhuma a lo chhuak tawh em?" tiin Tintin-a chungchang min zawt ta daih a, ka ngaihtuah char char hnuah "Vawiin hi zirtawpni tiraw?" ka ti a, "Ni e" a lo tih chuan "Aw vawiinah a lo chhuak ang" ka ti ve mai a, rilru hah hmel deuha a thaw deuh hak chu "Eng nge a?" ka lo ti thuai bawk a. 

"Engmah a ni lo" a ti a, min hrilh a tum loh hmel em avang chuan ka zawt lui duh ta bik lo. Ka u a nia, a tan chuan a harsa ve ang. A zak dawn bawk si. 

Tlaiah ka ţhiante hoin min lo nghah pui a, rin aiin a rawn thleng har zek lehnghal. Kan nghahna hmun ka hrilh chian tawh tho avangin a lo thlen chuan a rawn pan ding ve nghal mai a, kan zawnah a rawn ding a, jacket chu a ha pangai ve mai a, kekawrbul a ha kher chu ka hrethiam lo. Mawza telloin sneaker a la bun zui. A va han ţhing tak.

"Chhunah inhnuai kan suasam a, ka lo muhil a" a ti bul bul a, a hmanhmawh ata langin a inha ţha mumal hman lo a nih hmel. 

"A ho lutuk bus chhuak tur a la awm a, keini pawh kan la tlai lo. Inthlahna kan siam dawn em?" zangkhai vaha Vanin a lo tih chuan za lo deuhin a ţhen suk a, "Zawt ula" bul zet a tih pahin min kawk zauh a, min en tak ţhupah chuan "Ţul kher lo" lai deuh hian ka ti a, an hriat hnu mah nise ka ţhiante chuan a awm zel dan tur te an zawt a, ţha deuhin a lo chhang ve zel a, darkar chanve dawn lai kan din leh hnuah kan kal ve thei chauh a ni. 

"Inhnuai chu inti ruak tihna mi?" hmalama awn phei paha ka tih chuan "Aw a ruak vek tawh. Pektea te pawh an la mu" nuihzat hmel fahran hian a lo ti a, ka lo chek tlak thung a. 

"Paw phukin khumah in mu dawn ni maw?" ka ti a, ani lah a balh hmel mang bawk si lo a, "Chhuatah kan mu. Kan chau ve a, min rawn call harh hnu khan ka inbual a, ka inha ţha hman tawh lo a nih hi" a ti ve duah a, tur hmanhmawh a che buai ve chi a nia, fiamthu nan ka hmang fo reng a ni. 

"Naktukah hun lo insiam rawh bazar ah kal ang" amah bawk chuan a ti leh a, kan tih tur ka zawh chuan a sawi duh tlat lo. 

"Kan kal mai mai dawn nia" a ti a, U Mama haw hman hlauh chu ka tan vanneihna a ni ringawt. 

Sawi tur ka ngahin ka ti ti bawrh bawrh reng a, anin a lo ngaithla a, zawhna ka zawhin ţha deuhin min chhang a, a ţawng ve bawrh bawrh lem lo. 

"Pektea te an lokal ve chak awm" ka tih chuan "Pektea chu coaching a kal dawn" a ti a, mak ti deuh taka "Eng ber?" ka tih leh chuan "Bank" a ti mawl tawp a, an rui ve reng emaw tih pawn hmalam hun chu an lo thlir ve tho a nih hmel. 

"Peka ve hi" ka ti leh a, "Ka tih ang hi a ti ang" a ti a, Peka pa leh a pa an inbiak thu sawiin sa khawihna tur bik a an sak pawh kha Peka pain a leichhawng maithei a, mi hausa leh rethei te dinhmun inthlauh zia min ngaihtuah tir daih alawm le. Kan ramah chuan danglamna a awm vak loh zia an sawi fo laiin mi hausa te hi chuan lei theih an ngah bik a, an tan chuan thil tih a awlsam bik chiang a ni. Peka pa pawn a lei to viau ang, Nu Mawipuii duh angin an hralh dawn a nih hmel, hmeichhia ve siah chuan thiltithei tak chu a ni. 

Dawra kan inzui lut chu U Daizauin a lo fiam hlut a, meizial vel a lei hnuah rei pawh awm lovin min kalsan leh a, "Zanah reilote ka lo leng ang" a ti ngei a, min thlahlel ve tih ka hre reng, hmuh phah lohah a awm ţep tawh a, keipawn awm dun reng ka chak ve tho mahse ka thei ve tlat lo a ni. 

"Tintin-a a lo haw dawn tiraw?" ti a ka nu ka zawh chuan "Naktuk zingah" a lo ti mai a, tlaiah an chhuak ţhin emaw ka lo tia, an tih dan a inang vek lo a nih hmel.

"Ka hrilh sual a nih chu" ka ti niah niah a, "Engmaw?" a lo tih chuan "Engmah a ni lo" ka ti leh ang lawi a, Vani khan chhuak turah a ngai ngei ngei ang. 

Ka nu min tirhna anga pindan chhung ka tihfel laiin Tintin-a phone zawk a ri a, phone a neih hlim aţangin pattern ngai hlir a hmang a, a thar lei ve eng ang pawh nise a thlak hlek chuan a theihnghilh zel avangin a ngai hlir a hmang ţhin. Keipawn ka hre bel viau na a phone chu ka charge full sak tawp a, data ka off leh hnuah ka lukham hnuaiah ka dah a, ka en ruk sak lem lo. 

Vawikhatna ka la hman lo a, phone ka lak chhuah mek laiin a rawn ri leh a, Vani thlalak lo lang ka hmuh chuan ka nui chhuak a, hemite pahnih hi inthup an tum ve khanglang a, ka hre vek tho sia. Vani pawh ti lovin 'Heaven' a ti ngei a, ve lutuk chuan a. 

Ţawng pawh ka ţawng hmain ka lak rual rual chuan "Ngaihawm pa, i mitthlaah Bible bak awm tawh suh se. Awii..a nawm tawh dawn zia hi" a rawn ti chiam chiam a, ka nui ri chhuak hman ţhelh a ni. Ani Vani lah chu a nui bâwk bâwk reng lehnghal a. 

Ka aw ka ti danglam a, "Ve vak vak a" tiin nuihza ru tak chungin ka chhang a, "Tu nge aw?" a rawn tih chuan "Tu nge i nih zawk?" ka ti let a, ka ute ka bum nasat ţhin avangin aw tih danglam chu ka hnehsawh lutuk ringawt. 

"Tinkhuma a awm hnai em?" chang deuh tak hian a rawn ti tawh a, "Engatan nge i tih?" ka ti ve zel a, a thin a rim tawh viau ang. 

"Ka lo be lawk ang" pangai deuha a rawn tih hnu pawh chuan "Tu nge i nih? I hming pawh a lang lo" ka ti vel a, "Tintin-a nu ka nia, phone kha pe vat rawh" a ti a, ka nuih tak hakah chuan "Lawmnasangzual" min rawn ti a, "Ka zak e" a tih leh phei chuan nui nasa tawh tak ka ni. 

"Min bem nasa em a nih kha. Zep ka tum pawh a ni lo. Aa..sawi lo mah ila i hre vek tho ang" a ti a, nuam lo a ti lutuk chu ka khawngaih deuh a, naktuk a a rawn haw chauh tur thu ka hrilh hnuah thil ho deuh deuh sawi zui puiin kan inbiakna chu ka ti tawp ta ringawt a. 

"Eng nge i nuih chiam chiam a? Phone hi in nei leh lutuk a, mi â ang maiin mahni chauh pawn in nuihpui vak zel mai" ka nu'n a lo ti hlak hlak a, a eirawngbawl puih pahin ka ngaihtuah let a, keimahin ka nui leh ţhin a, ka sawisel hauh lo na a inkawp lo thei se chu duhthusam a ni. 

Zanah dawrah ka awm a, ka nu chuan engkim a hrethiam ve vek tho nain min hau ta bik lo a, Zodina lah chuan ka phone number a lo nei a, min rawn be reng a, chhang ţha lo mah ila min biak a ţhulh phah ngai chuang lo. 

U Daizaui nen a kan ti ti bawrh bawrh laiin a rawn lut a, a incheina pawh a pangai ta deuh alawm. Kan chhungte ve ve an hel tlat avangin hun fal nei thei ţhin lo mah ila reilote inhmuh zeuh zeuh pawh a nuam a, an ina leng turin min sawm ngai tawh lo ka ti rilru ve ţhin kha a nia, Lawmtei hnen aţangin min duh bik loh thu ka hre ta hlauh a, kan induh tawn tlat si chuan chhungte vang mai maia inţhen ringawt chu harsa kan ti ve tlat tawh a ni. 

"Karleh engtik hunah nge in kal ang?" U Daizaui zawkin a lo tih chuan "Nilaini" a ti a, an kal dawn tak vang hi aniang ni leh zan te hi a rei lo riauin ka hre tawh a, a liam zung zung a ni ber. 

"I ngaihawm dawn hle mai. Thla tam deuh chhung Sensiari ţap thlem a ngai dawn a, ka peih lo lawk" ner nang nang chung hian a ti vel a, "Ka ţap awm kher lo e" uar zetin ka lo ti ve thung a, inleng dang kan nei lo a, pathum chauh mah ni ila kan khua a har lo khawp mai. 

Inrinni zingah chuan Tintin-a lo haw tur hmuah tumin chaw ei lo in ka nu a chhuak a, gate an lo lut te chu mihlim tih takah ka nu a bengchheng nasa mai, a nui var var reng bawk a, a hlim takzet tih a hmuh theih a ni. Puanthuah vel pawh Pektea leh Peka ten an rawn dah thlap a, an hmuak ve ngei tihna a nia, an fel ve reuh a sin aw. 

Ka nu kaihna aţang chuan tal hrangin "Khapa kha ka hmuh leh hun chu aw ka khawih na ngawt ang. A dawih de du nen a ţhiante rawn lan hnua min tih dan kha ka duh lo" tiin Pektea te bulah chuan a phun sup sup a, kan chhung chuan piangthar hlim kan neih loh hmel hle mai. 

Ka nu'n a thawmhnaw vel a buaipui lai chuan "Khawnge ka phone?" a rawn ti leh a, pindana tlan lut thuaiin ka laksak vat a, "Tintin-a chu a buaithlak lutuk. Hnehna puanga au chhuah tur an tih te khan a au ve ngai lova, a chhan an zawh lahin 'ka zakzum a, rilruin ka lo puang ve char char' a ti mai zel a an tia. Maipawk-a phei chuan a inhlan hmasaber a ti che a nia aw" ti a Peka ten an chhaih chuan phone tuai nauh nauh pahin a nui ruh ruh a, "Zu rim in nam. Ka hre lo rei a, ka ti thei der lo a nia" a hnar hup pah a a tih te chuan a ţhiante nuih a lo za a, ka nu a lawm viau thung. 

A ţhiante hnena sawisak hual a neih thu a sawi laiin an haw veleh a ka pi bula a ţhu tur chuan "Pi ka lo ţhu ve aw" a ti hmasa a, "Lo ţhu rawh chanchin te min han hrilh teh" ka piin a lo tih chuan "Amen" tih pahin a ţhu a, lemchan na na na hi chu a thiam ve a ni. Ka nu leh ka pi lah a chhaih thinrim awlsam ang bawkin thlem lungawi leh pawh a hnehsawh a, tunah ngat phei chuan duat rawn a ni rih dawn chiang. 

A khum a mutbu fai phah sak pahin Vanmalsawma chanchin ka sawipui a, "I hriat tawh ka ring tho a" ti a bulţanin an kal ni tur thlengin ka hrilh a, "Ka hre thuak a, ka chiang lo" a tih hnuah tukverh dalna nam pahin "Peka te an va khawngaihthlak dawn ve. Kei lah kan khuaah ka awm tawh dawn sia" a tih chuan ding meuhin "Engati nge?" ka ti a, an mak thei thut thut a nia. 

"Tum ka nei alawm" a tih chuan sumdawnna lam a ni tih hre mah ila "Eng ber?" ka ti ta tho a. 

"Ka tih hlawhtlin hunah i hre mai ang" min ti a, camp a a luh hma khan ka pa nen a rukin an sawi dun ţhin a nih ka ring nghal hmiah. 

"Aizawl ah eng chen che i la awm ang?" ka tih chuan "A rei berah kumin bak ka awm tawh lo ang. Kumin chhung ringawt pawn ka haw ngun maithei" a ti a, lunglen awmchhun ka ni dawn lo tihna a ni mai. 

Tintin-a lo haw avangin inleng nei ve reng mah ila chhuah tumin ka insiam lui ta tho a, ka nu chuan min rawn hmu se min ngei viau maithei a ni. Thingpui a chhuan lai takin "Nu ka kal aw" tih leh tlanchhuah ka rual a, ka hmanhmawh lutuk chu dawrah pawh ka peng lo. 

Turning point lamah ka kal phei hlawk hlawk a, ka hah zualpui a reh hnuah bike ah chuan lawnin bazar chu kan kal dun a, thawmhnaw dawr pakhatah min luhpui a, dawr neitunu nen chuan inhriat ţhan hmel deuha an inbiak hnuah "I duhzawng thlang rawh" min ti a, hamhaih deuha ka en lai chuan "Engmah ka la lei lo che a" a ti ban charh a, nui tho mah se inngaihhruina ang deuh ni a ka ngaih avangin ka nuih a za ve chiah lo. 

"Thlang rawh" a ti nawn leh a, che chang lo a ka din tak rengah chuan ka hnungah rawn dingin ka koki tawn tawnah a dawm a, ka ngaihtuahna hria ni awm takin "Ngaihhruina a ni lo a nia" a ţhiannu hriat hlau tak chuan a rawn phun sup a, kawr pakhat ka thlang a, ka hak chhin hnua a hmaa ka din chuan lungawi hmel deuhin min lo en a, "I en ho kha ka chhinchhiah a, kawr ngau ngauah chuan i duh zawng ka hre tawh. Ka lo hawn ţhin ang che" a ti a, ka ngaihţhat nan a sawi mai mai a ni lo ang chu maw. 

Restaurant ah te thil eiin bazar ah chuan hun kan hmang rei a, kan haw leh meuh chuan a tlai ruai tawh. 

"Ka nu'n zanah inkhawm tur a tia" ka tih chuan "Dawr bulah ka lo nghak ang che" a ti a, hman zana kan inhmuhna kha a ni tih hriain ka lo remti ve nghal mai a, a nihna diktak ka hriat hnu hian a bula awm a hahdamthlak lehzual a, Vanmalsawma hi tu nge a nih hrechiang chak reng reng a min kap run tu ang kha a awm tawh ngai lo. 

Kan intihfel zung zung hnuah inkhawm turin kan chhuak diak a, ka u pawn thuawih deuhin min zui ve mai a, campers ho zaipawl an tih ah te chuan tel ve duh lem lo mah se ka nu chu a lungawi em em reng tho a, a phut sang tlat lo a ni. A rui lo ringawt te hi a lawm tawk a, amah pawh a fai vung mai. 

Inkhawm banah chuan ka nu hnenah "U Daizaui nen kan peng kawi lawk dawn" ka ti a, kan kalna hmun tur min zawh hmain U Daizaui chu Vanmalsawma min lo nghahna lamah ka kalpui a, Pektea nen an lo awm ran mai. 

"Kan inah kal ang u khawlaia din reng chu a ninawm" Pektea chuan a ti deuh tlat a, ka hnial viau na a U Daizauin "Kan rei dawn lo a nia" a tih takah chuan kan inzui phei a, inkhawm bang an haw rem deuh tawh bawk a mi kan tawk mang lo.

"Ehe..Sensiari ve teh hlawl chu" Pektea unaute chuan an lo ti hluai a, mak min ti deuh niin a lang. 

"I lo leng khat lutuk a an hmu thiam lo che a nih hi. Lo leng ziah tawh rawh" Pektea chuan lo ti zung zungin inchungah min chhoh pui a, an inchhung ka vawikhat luhna a ni tak tak a, a nuam zek lehnghal. 

Pindan chhungah kan pali chuan kan ţhu a, theitui te in in U Daizaui pawn nuam a ti leh tawh khawp mai. 

"Awm rei thei kan ni lo a nia aw" ka tu deuh sek a, an tan a ninawm tur zia ka hria, chuti chung chuan an haw lem lo a, kan kal vat dawn nia an lo ti mai zel a, chhungte mitmei ven hi tih ţhanah ka nei tawh a, bet deuha ţhut ve reng harsa ka ti ţhin. 

Pektea leh U Daizaui te chu chhuanlam siamin an chhuak a, an inla zei ve lutuk chuan nuih te lam lam a ti za, Vanmalsawma nen pawh sawisa zuiin kan nui dun hak hak a, kan pahnih chiaha kan awm chang pawhin a ni lo zawnga min khawih a tum tawh ngai lo. A bialnu ka nih miau avangin tum chu a tum ve tawh tho a, a ngaihthlak nin hnawk thlengin ka zilh a, Ropuia u pasalin min khawih a tum aţang phei kha chuan ka hlauh zia hriain a tum veleh tawh ngai lo. 

"Delhi ah i kal nghal dawn em?" ka tih chuan "Kal mai lo ang" a ti a, hrehawm a tih loh nan huphurh angin ka awm duh lo lui tlat a, "I unaute an ni tawh sia, i kal daih hunah pawh Puipuii leh Adika te ka lo duat ang" ka ti a, harsa viau mah se ka nui lui reng a, nithum lai kan la nei alawm tiin ka infuih sauh sauh reng bawk. 

"Fel deuhin lo awm la, nitin ka rawn be dawn che a nia" a ti fiamthu a, ka lawm zawng tak tak a ni.

"Ka thawh veleh ka lo video call ziah ang che" ka ti ve thung a, hma hun kan hriat lawk loh miau avangin sawi tur kan nei tam lova, "Ka ngai ngawt ang che" ka ti ta ringawt a, he thu hi ka sawi khat khawp mai. 

"Nangte pawh hi i ngaihawm tham dawn" ka bianga dawm pah hian a ti a, "Tunah chuan engmah ka la ni lo a, i unaute pawn min hmuh tlin theih miah loh hi. Ka zir zel phawt anga, nakinah i pa hnenah ka lokal ang. I fanu hi nupuiah min neih tir rawh tiin ka la rawn dil ang" a ti a, ka benga ka sam a zeh lai chuan dak deuh vahin ka lo en a, ka nui deuh reng bawk a, in awm hnaih viau mah ila a hmel chu chiang takin ka hmu thei tho a ni.

"Ka ute hnenah i thlen chin i hrilh ang a" beisei nei deuhin ka lo ti ve a, "Ni chiah e..kan inneih hnuah sa ka sat leh ang a" fiamthu ti tak deuha a tih chuan ka lo nui hak a, sawrkar hnathawh aia a chak kha a nia, nuam a ti ber tlat alawm. 

"Nakinah chuan thawh chhuah te ka la nei ve anga, phal lo mah se ka ti lui ngam tawh ang. Hrehawm ka ti lo a nia" tih pahin uang zetin a sam ka tuai a, kir viau si hian a nem angreng a, ka khawihsak fo mai. 

"I tuar thei dawn..ka en che hian ka hre mai. Kum10 pawh inhmu lo ila i awm thei tho ang" min ti vel a, "Em em a che..chawlh apianga min rawn tlawh chuan ka awm thei mai ang" ka ti ve nghal vat a, inţhen chungchang chu muk deuha sawi ka peih lo. Hlim deuhin hun hmang reng ila, a hunah kal tawp se la, rinawm zui em em ila a ţha a ni mai. 

Ka hmuia min fawh chuan ka lo chhang let vat a, mi pindan a awm mah ni ila a duhthaw khawp mai. Ka kawr chhunga a kut a lo zen luh pawh chuan ka dang ka dang lova, ka inveng ru ran thung. 

Kan inthlah rualin U Daizaui te an lo lut a, a rukin ka kawr ka siam rem sat sat reng a, rei pawh awm lovin kan haw a, ka nu'n min lo hau nasa ngei mai. Ngawi rengin ka ngaithla a, zana chhuah ţhat loh zia te, a fala mipa hmuh ţhat loh zia te a sawi a, ka hmu zo chiah tho a ka tia ka ngaithla uluk em em lo. 

Vanmalsawma te kal dawn ni chuan thlah ve ngei kan duh sia, an in chhakah U Daizaui nen kan ding reng a, min lo call sek a, ka kal ngam ngang loh avangin min rawn hruai ta ringawt a. 

Nu Mawipuiin min hmuh chuan "Bawiha hmanhmawh teh chhuah hma ka duh a nia" a lo ti nghal hlak hlak a, ka chhungte phal lo chungin ka chawl a, amah vangin dan ka bawhchhe ngun malh malh tawh hle. 

Kan pahnih a kan din dun hlek tawh chuan a lo tur nghal chung ţhin a, Pu Hriata pawn annu chu a kam khat nghe nghe a ni. Mak tak maiin Tintin-a a lokal ve duh lo a, mipa leh mipa an inthlah ţut ţut ngai lo a ti tlat a, Boomer nen an inan em avangin a ţhianpa thlah nawn leh turah a inngai a nih ka ring. 

Kawt a motor a din vek tawh hnuah inchungah min kai chho a, darthlalang hmaa min din tir hnuah ka hnungah a rawn ding a, ipte aţanga silver ţhi phawrhin min awrh tir a, ţhiin ka taksa a sikna lai chu a dai seng seng a, a locket chu B niin "Eng nge awmzia?" tih pahin darthlalang aţangin ka hnunga ding chu ka en a. 

"Boomer" zawi deuh supin a ti a, a hoodie hak lai chu a phelh a, ka ţhi ang deuh chiah a tawi ţhi a lo awrh ve bawk a, a locket chu J a ni thung. 

"Kal mah ila bul kan ţan ţha dawn chiah tihna a nih hi. Boomer ti a min koh duh chuan ka phal sak tawh ang che" thutak deuh a a tih chuan ka inher a, harsa viau mah se ka la nui lui hram hram thei zel a, a hmuh lai chuan chhel tak anga lan ka tum a ni. 

"Hei hi eng nge ni ve?" ti a zawh paha a ţhi locket ka khawih ve chuan "Boomer ka nih chuan jelly i nih ve a ngai. Kan inhmuh hmasak ber ni ang khan" a ti a, rilru a kir a, ka hrechhuak uar uar mai. 

Game ka khelah a ngai a, Boomer ti a ka auh veleh Jelly min lo ti ve a nih kha. Mitthlaah chewing gum kawr hring ngei mai kha a lang tel bawk a, "Ka mitthlaah boomer jelly cheng 1 man chi kha a awm" ka ti a, kan han nui dun leh rih a. 

"In zawrh ţeuh kha" a lo ti ve vat a, miin kan chanchin hria se chu kha chewing gum, boomer jelly ngei mai kha an hmuh hunah kan pahnih hian min lo hrechhuak ve rauh rauh ţhin ngei ang. 

A tawp nan ti ni awm takin duhthaw deuhin min fawp leh a, min thlakhlelh zia pawh ka hai lo kher mai. In kai rialin kailawnah kan chhuk thla a, ka ţhi locket chu ka hum leh ţhin a, ka hum apiangin Vanmalsawma chuan awmze nei zet hian min lo nuih ţhin a, Boomer jelly ang chiah kan ni, inkawp tur a duan kan ni a, mahni chauha kan awm aiin kan pahnih a kan awm hian miten hmuh nuam min ti zawk ngei ang. Boomer leh jelly pawt ţhen tawk awm ţhin mah se awm kawp tura siam an ni a, keini pawh chutiangah chuan ka inchan a, tunah min la hrang rih mah se, nakinah kan la awm dun leh ang. Chhan awm lovin phir te hi ka tawng lo tih chiang takin ka hria a ni. 

Motor a a ţhut luh hnuah pawh "Lo kun teh" a la ti a, inţhen dawn meuh chuan harsa a ti ve khawp mai. Ka biang tawn tawnah dawmin tu mitmei mah veng zo lovin ka hmui a fawp zeuh a, ka zak chu ka lum pap pap a, nuam ka tih loh phah chuang si lo. Keipawn kal tir mai chu harsa ka ti khawp mai, tuman boomer leh jelly hi cheng khat man pawh nise lo pawt hrang tawh suh se. 

An tlan liam thlengin ka kut ka vai a, an liam chiah chu ka ruak huai a ni ber. Ka lung a leng nghal veng veng a, Pu Hriatan leng turin min sawm nasa viau mah se ka lut duh tawh lo. Hrehawm ka tihna chu a langchhuak ve ta aniang Peka zawk chuan "Ka thlah ang che" min ti a, ka ban a kaiin a bike dahna lamah min kai phei a, kan in pana kan tlan laite chuan kan inbe lo. Kawt a ka chhuk rualin Pektea bike aţangin U Daizaui a rawn chhuk ve a, min rawn zui tih ka hre chiah a ni. 

Ka nu pawn chanchin min lo zawt luam a, Tintin-a chu a ţhianpa boral hlim ang chiah khan pindanah a inkalh khum a, mipa hi an lung a leng ve thei tih ka hriatchian phah khawp mai. 

A sawi ang tak takin nitin min lo bia a, keipawn ka thawh veleh video call hmangin ka be ve ţhin a, a chang chuan mut hmunah, khum ka thawhsan hma ten ka bia a, chhuna min lo biak chang chuan Lawmtei thawm hriat chang ka nei ţhin a, ka haw lo thung. An inkawmngeih zia ka hria a, Vanmalsawma ka ring tawk bawk. Amah kawm hlim tura Lawmtei a lo awm ve chuan min ti lawm zawk a, keipawn ţhian ka nei a, mal deuha khawhar a tawrh bik chuan a tan a fair dawn lo emai. Thil hi a dam zawng leh a eng zawng hlirin ka ngaihtuah ţhin a, hei hi tun thlenga ngil taka ka la din theih chhan a ni. Inhlat viau mah ila kan inhlat na hian nasa lehzual a kan induh thiam theih zawk nan min ţanpui ka ring tlat a ni. 

Ni a liam ve zel a, thla a vei zung zung bawk a, ka nun ngaiin ka nung a, nitin ka peng pakhat Vanmalsawma nen kan inbia a, hman lo chung chunga min lo biak chang phei chuan ka lawm lehzual ţhin. Min ngaipawimawh takmeuh tihna a ni. 

Tunah chuan ani pawhin pangai deuhin class a kal ve tawh a, engkim min rawn hrilh ve ţhin a, a ţhiante thlengin min hmelhriattir a, hnam dang ţhian a la ngah em em zui a. 

Kan ti nek nek a Krismas chawlh kan thleng der a, keipawh kan khuaah hawin U Vanneihi nen Boomer-a thlan te kan tlawh a, in upat hleih viau mah ila ţhianţha tak kan ni tawh. 

Vanmalsawma chu a intiam tawh anga min tlawh tur a lo kal vang vang a tum laiin ka chhungten thu thar an nei a, ka pa u, nupui pawh nei lo, mahni a awm ve naw naw hi a insawisel reng a, a inentir satliah kha doctor ten an lo ngai serious a, ka piin phaia kal a rawt vat a, a fapa a nia, a ngaihtuah em em hi a awm lo hran lo. 

"Delhi ah Zira a awm tho a, Delhi ah kalpui ula a ni mai alawm" an tih chuan ka beng a verhin ka ngaihsak hawrh a, kalpui rawh min ti se ka hnial lo khawp ang. 

Midang ngaihsak peih vak lo ka ute chuan chhuanlam an siam liam liam a, kan chhehchhawl ve ber Tintin-a chu "Nangman hruai la a ţha ang. I tlawng awl ber a, duh leh ka nu emaw ka pa an tel ve ang a" an ti a, U Mama leh U Mala te chu an pha fel diam tawh. 

Tintin-a chuan min rawn melh zawk a, Vanmalsawma awmna ka ute hoin an hre lo hlauh bawk a ka kal chak tih a hria aniang "Nula rim tur list ka chhawp chhuak ruih tawh. Tlawng awl deuhah min ngai ţhin suh u. Ka pa a kal ve dawn tho chuan Sensiari kal rawh se" a ti a, ka thinphu a rang nghal ringawt a, ka hlauhthawn vang a ni ber. 

"Zira a lo haw lohna a rei tawh a, phone a kan inbiak hi a ni mai a, ipa Puia hruai a ngaih tho chuan keipawh ka kal ve dawn" ka nu'n a lo ti a, a phur khawp mai. 

"Krismas zawh lamah a ngai tawh ang. Ticket engmah kan la ti fel bawk si lo. Zira chu bia ula, kumthar lamah kan tum mai dawn nia" ka pa chuan a ti ta tlat a, ka uten engmah an sawi buai loh avang chuan ka lawm tho tho.

"Diaper hreng rawh aw..hlauh lutuk hian zun a cheh theih a nia, thlawh naah i la chuan ngai loh kha" Tintin-a chuan a ti kher a, a va han ţullo thei tak. 

Vanmalsawma hnenah chanchin ka hrilh a, a lo phur ve khawp mai. Delhi a inhmu tur chuan thu kan ti tlu a, Krismas pawh rin ai daihin ka hman nawm phah a ni. 

Thla tam tak kan inhmuh loh hnuah a tawp a tawpah chuan kan inhmu thei dawn ta. January thla tawp lam a ni a, ka nu leh pa leh ka pa Puia te nen Delhi chu kan thleng a, a la vawt hle a, kuangkuah hlun chungin ka hawi kual ruai a, "I va hawi nasa ve" ka nu'n a lo tih chuan "Boomer leh jelly reilote a inchar leh thei dawn aniang" ka ti fiamthu a, "Chu ai tui chu a tam ang" a tih chuan ka nui hak hak a. 

Thil dang ti a ka nute an buai laiin "Zawn nei i va ang ve" hnung lam aţangin a rawn ti a, ka hawi let rang kher mai. 

A landan a danglam lova, mawi ka tih dan deuh khan min nuih a, a tak a ang lo zawk hial a ni. 

"Min hmuhna a rei tawh em? Awii a mak e" ka ti hluai a, "I lo chhuah hlim khan" a ti a, a rukin min lo thlir reng tawh a nih hmel. 

Ka hmaah pangpar bawr a rawn dah ve ngei a, phur deuha lo lain ka kuah bet tlat a, mah se rei pawh ka pawm beh hmain ka hahchhiau ţhat ţhat mai. 

"I hritlang elo?" a ti a, min ngaihtuah hmel taka min en lai te chuan ka lo hahchhiau leh ţhin a, "Khawi" tih leh ka pangpar kenlai min laksak a rual a, "I hua aniang. Kan paih daih dawn nia" tih pahin ka sam a rawn chul thuak a. Pangparah lehzel huat zawng kan nei a nia, tuna mi phei kha chu mawi ka tih tehreng nen. 

Kan lama ka nu rawn kal phei chu kan lo en ran a, Vanmalsawma phei chuan min hum tum ni awm takin ka darah a kuah hman a, mahse ka nu chuan kan thlenna tur sawiin "Ka fapain in a luah a" tiin a hrilhfiah zung zung a, "Khaw thim hmain rawn dah rawh" a ti a, awmze nei zet a min melh ralh hnuah ka pa te lamah a kal a, anni pawn min hmu reng mah se engtinmah min ti lo. 

"Lokal rawh le" tih leh ka kut a kaih a rual a, bawlhhlawh bawm kan hmuh veleh pangpar kha a paih a, min sawizui tu tur awm miah lohna hmunah chuan khaw en lai pawhin nghet deuhin kan inkai a, boomer jelly hawn loh ang maiin kan inchar nghet tlat a ni ber. 

Mak deuh maiin Vanmalsawma nen hian bazar chep takah kan intawng a, hriat chian lehzual ka duhna chuan a lamah min hnuk hnai zel a, kan inkarah induhna a lo piang a, min pawh ţhen tuma kan chhungte ve ve an hmanhlel lai pawhin kan invuan ţang ţang a, la naupang viau mah ila min vauna ţawngkam mai mai khan min ţhen hrang thei chuang lo.

Mahse kum naupangte chauh kan la nih avangin zirna leh chhungkaw thil bawk chuan hmun hran ve veah min dah a, inhuatna leh phatsanna te avanga inţhen hrang kan ni lova, hei vang tak hian nitin kan in ngai zual deuh deuh emaw tih tur a ni.

Dawhtheihna, hriatthiamna leh ngaihsakna pawimawh zia ka zir chhuak a, Vanmalsawma hi dawhthei viau lo se chu min phatsan daih tawh maithei a ni. Ka chhungte khirh zia hriain min hrethiam a, dawhthei deuhin hunawl ka neih ve theih hun a nghak ţhin a, a bula ka awm chang leh ka awm loh pawhin min ngaihsak tho ţhin. 'Ka hmangaih che' ti chamchi a an chetzia a lantir ngai lo mipa ai chuan ka ring daih zawk bawk.

In ngaihzawn vang ngawt hian awmdun reng tur tihna a ni lova, a chang chuan in kar hlatna hian inlaichinna a ti nghet zawk ţhin. Kal kawng hran kan zawh apiang hian kan thinlung hi an in ban tawn thung a, a hma aia nghet lehzualin a invuan zawk ţhin. 

Kan kal tawhna hnu ka en let a, vai ram hi chu a reh mawh khawp mai. Min vawnna aţang chuan tal chhuakin keimah zawkin a banah ka kuah a, lungawi hmel taka min lo en te chuan a tan ka pawimawh ve takzet niin ka hria. Hma hun kan la ngah a, eng nge kan tawn zel dawn hre lo mah ila ka nghak tlat ang. A tan ka pawimawh ang bawkin Vanmalsawma hi ka tan a pawimawh a, ka nghah theih loh nachhan tur a awm lo. Kum tlemte chiah alawm ka la nih. 

A TAWP TA.