DEAR DIARY- 1

DEAR DIARY-1

(Hei hi 2020, october a ka ziah, thawnthu tawi, thawnthu puitling a ka siam thar a ni a. Ka ziah hmasak kha ka delete a, an nihna leh thil dang danglam a awm tehchiam lo nain a thawnthu hi ka belh ţeuh a, a thar ang diam tho a ni aw. Chhiar tawh tan pawh chhiar nawn leh a sual lo ang)

Hmanhmawh baklengin inchung zawl lam panna kailawnah ka tlan chho hlawk hlawk a, ka bân ka vaina lamah ka bag khai lai chuan bang a tauh leh dawt ţhin. Bang leh bang inkar kailawna tlanchho ka nih avangin a thim deuh mup a, boruak a lum huam a, thawm a reh dûk bawk.

Inchung zawl ka chuan chhuah veleh bang nghengin ka maimitchhing a, ka awm dawmin ka thaw pah hlawp hlawp a, ka hmai thlan hluam a ka sam chhawl leng bet thlap te chu hui kiang hmasa lovin ka ding vang vang a, ka dang ro huam mai tih hnâwm tumin chil ka lem leh khalh ţhin a, ka him tawh tih hriain ka thaw a pangngai ve tial tial a, min zui tu an awm em tih hriat tumin ka beng ka chhi ru ran thung.

Khua a thim thet thet tawhin inchung zawla an êng dah pawh chu a rawn phe zawk zawk a, rei vak lo hnuah ţha deuhin a êng a, chumi lam pan chuan ka sam hui pah hian ka kal a. Ka him tawh tih inhre mah ila ka tha erawh a la khur der der reng mai. 

Êng hnuaiah chuan ka ţhu hnawk a, ka bag chu hawngin ka rawmawl pai nem thep chu ka phawrh a, ka tarmit ka lak thlak leh hnuah ka hmai thlanin a bual huh hliam chu ka hru a, thawk ka la leh halh halh a. 

Ka bag aţang vêk chuan ka kalna apianga ka pai ţhin ka diary ka phawrh a, ka tan chuan diary hi a hlu takzet a, tunlai ţhalaite ang lo takin phone aiin ka bih ngun zawk a, ka tlei pui ber te zinga mi a ni. Ka tarmit vuah ţha lehin ka ţhutdan ka siam rem a, êng hnuaiah chuan diary chu ka keu a, ka ziak hnem tawh a, ka khal nasa bawk nen; a chhah tap tawh mai. 

Dear Diary,

Ka nunah hian hlimnain hmun a chang ve thei hlawl lo a nih hmel. Thlipui nasa deuh hnuaia kal mawp mawp leh tuifawn sak lutuk aţanga thliarkar kai tum ang mai ka ni. Thlipui in nuai chhiat tir ka tum loh em avangin ka damkhawchhuak hram hram zel chauh a nih hi. Ruah a lo sur dawn hian vanah chhum chhah tak a lo awm khawm tuau ţhin a, la hlawm angin nem hmel deuhin an lang a, mahse khawpui ri leh ţek ken tel chang a neih miau avangin a hlauhawm ru hle thung. Ruah a baw hawk hawk a, thlipui leh ţek te nasa taka an thawh pawhin leilung chuan a lo tuar ngawt ngawt a, engkim a ţha leh vek dawn tih hriain a lo pawm thlap vek zel a.

Ka nunah hian fimkhur tura hrilhlawkna awm hauh lovin buaina leh harsatna te a lo thleng ţhin a, chhumin eng hlauhawm nge a rawn ken dawn sawi lawk lo a min ţhawn thut chang a nei ţhin ang hian ka thinlung hi buainain a nghawr nghing leh dawt ţhin a, chuti chung chuan beidawn mai ka tum hauh lo thung. Chak taka ka awm a ţul a, leilung angin ka chunga thil lo thleng apiang ka pawm thiam a, ka tawrh ngawt ngawt zel a ngai a,  beidawng mai mai thei ka ni ve lo. 

Ruah chu sur buan buan mah se la ban hun a nei leh mai ţhin a. Chutiang bawkin hlauhna min siam ţhin tu chhum pawh vanah mawi deuhin a kal zawm leh delh delh ţhin tho a, hei hi ka inhnem ve na a ni mai. Lungngaihna kan chunga lo thleng ţhin ah te hian malsawmna a lo inphum ru ve thei a, thlipui nasa deuh hnuaia kal mawp mawp ang ka ni ka tih tawh kha, mahse thlipui a thawh zawh hnuah ni a sa leh ţhin tih ka hriatna hian min thlamuan leh ţhin. 

Ka diary duhtak chu khupin muangchangin ka ding chhuak a, nilengin mawng hung hman lek lovin ka phar buai a, ka taksa na lutuk chu a zia deuh beiseiin ka zi mar ţalh ţalh a, nidang ang lo takin kan buai nileng zak mai. 

Diary chu bag ah ka la khung lo tih hre mah ila inchung zawla tlak dal an dahah chuan ka lawn kai a, êng an dahna ban chu ka kuah bet tlat bawk a, kawngpuia lirthei insulpel zut zut reng te chu ka awmna hmun a san em avangin tereuhte angin ka hmu a, lirthei ho ah khuan tu tu te emaw chu an chuang ngei anga, eng rilru nge an put ve ang le? An hlim angem? tih te ka ngaihtuah pah rauh rauh a, mi hi kan landan ang ngawt kan ni ţhin si lo, keiai maha buaina ngah pawh an tam ka ring. 

Thlifimin ka hmai a rawn chhem vawt sang sang a, ka taksa a dai deuh huai bawk a, khua lah chu a thiangin 'ka thil tawn nen a inrem lo hle mai' ka ti rilru a, loh theih lohin ka thil tawn ka ngaihtuah let leh a, ka thinrim thar ta riau bawk. 

Restaurant pangngai takah ka thawk ve a, a chung chiah hi hotel a ni. A lian lova, pindan pawh a tam lo. Chhawng hnih lek a ni nghe nghe a, restaurant nen a vaiin chhawng thum chiah a ni. Restaurant leh hotel hnuaiah hian kaw hnih a la awm a, chu chu wholesale dawr atan an hmang thung. Ka thawhna dawr leh hotel enkawl tute hi nupa an ni a, an eizawnna ber a ni ve. Ţhahnem an ngai a, hei vang tak hian kan hah lehzual phah ţhin reng a ni. 

Kan dawr bulah eng emaw thil tih khawm an neih avangin nilengin ka phar buai a, thawk tu kan tlem si, ţhalai tam tak an rawn lut chhuak zut reng mai bawk nen, eitur sem kual reng chungin thil ei ve na hun takngial pawh kan nei thei der lo. Restaurant bikah hian hotel neitupa, Pu Sena nupui a awm ţhin a, counter nghakin a ţhu tawp a, kan buai viau chang pawhin min puih a tum ngai lo. Min vin hlak hlak reng zel zawk a, a duh dan lo a thil tih a hlauhawm ţhin hle. 

Dawr chhung vel kan tihfai laiin kan pi ber, Pi Awmpuii chuan beer a rawn phawrh a, "Kawngkhar saw va khar fel rawh u" a tih hnuah beer chu dawhkanah a hung a, kan hah deuh chang chuan beer vawt raih mai hi min in tir fo ţhin. 

Ka ngaihtuahna chu hria ni awm takin "In hah emai..hei beer hi in rawh u. A dang pawh a la tam a nia. Amaherawhchu rui khawpin in lo ula. Rui chunga in haw chuan in chhungten heta hna in thawh an phal tawh lovang" a ti siam siam a, a khirh a, a thin a chhe em em bawk a, mahse midang hriatthiamna a ngahin amah hi a zau a, hnathawh hunlai leh hnathawh hun a pelh hnua a mizia hi a hrang hlak ti ila a dik ber awm e. 

Beer chu kan vaiin kan in a, tih ţhanah ka nei tawh a, in harsa ka ti lem lo. Whisky leh rum tih vel ho aiin a khâk dan a nep zawk a, inkawm hlim nan mai mai kan hman ţhin avangin sualah pawh ka ngai lem lo. Ka pa zu rui erawh ka hne viau ţhin thung. Dawhkan pakhat kan kil bial laih a, kan thil in chuan ţawng a ti kalin chauh lutuk avanga ngui nghiai si kha beer bur ruak a awm tak ruihah chuan ţawng kan inchuh bawrh bawrh hlawm a, midangin kan thawm an hriat hlauin Pi Awmpuiin min khap hial a ni. 

Dawr kan khar fel hnua haw mai ka tum chu Pu Senan hotel hnathawk pakhat rawn tirin min hmuh a duh thu a rawn sawi a, 'ka hnathawh danin an mit a tlung lo em maw ni le' ti rilru nauh nauh chungin hotel lamah chuan ka pen chho a, thil chhe ber thlengin ka dawn a, pheikhai a zâng lovin ka thleng chho har khawp mai. 

Hotel chhung ka luh chuan innghahna pindan (lobby) a Pu Sena leh patling dulkiar zet pahnih lo ţhu te chu ka hmu hmasaber a, 'eng emaw tih dik loh ka nei chiang alawm' ti reng chungin ka pan hnai a, rilru a nuam lo tial tial bawk. 

"E..lokal rawh Remruat, hei ka ţhiante an nih hi" tih hlut pahin Pu Sena chuan a ţhiante lamah kut a phar chhuak a, nuih luih seih pahin ka bu nghat a, a awmzia ka la hrethiam chuang der lo.

"Lo ţhu rawh" a tih leh chuan kal mai ka tum a, hmun danga ţhut remti lo ni awm takin kan pu ber chuan ka banrekah a chelh a, min pawt ţhu zui hnawk a, kan insi chaih nghe nghe a ni.

"Ehe..rim dang i lo nam tawh a ni maw?" a tih chuan ka zak lutuk chuan chhuat ka bih a, ka bula ţhu te ho lah chu an nui huah huah a, ka beer in chuan a ti lawm zawk emaw tih tur a ni. An awmdan chuan ngaih a ti ţha loin Pi Awmpuii lo lang thut se ka ti kher mai. Mahse rawn lang pawh nise a che hi a tawp chuang lovang, a tih loh dan a ni tlat lo. 

Pu Senan ka khup a a kut a rawn nghah rual chuan rang lutukin ka hawi chhuak a, "Ih..engatan nge min tih? Min ko bawk sia" zam angreng tak hian ka ti bah nawk a, ka thlabar zia an hmuh hmaih ka ring hauh lo. 

"Zanriah min kilpui turin kan duh che a" tih pahin ka khupa a kut dah chu a chet a, ka ten kher mai. Min melh dan lah chu nidang a min melh ţhin dan aiin a danglam a, a pangngai hlawl lo a ni ber. 

"Ka hman lo. Dawr kan khar tawh tho a, ka haw tawh mai ang" ka tih chuan ka khup chu a hmer salh a, chhantu melhin ka hawi kual ruai thung. Mipa pakhat, thawmhnu dum vek ha inher vut chu ka hmu hman a, min lo thlir reng a ni maithei. A hmel ka hmu lo na a 'a palen tehreng nen min rawn ţanpui se aw' ka tih laiin counter hnung lama pindan pakhatah a lut a, he thil hi ruahman lawk nge, counter nghak tu takngial pawh a awm lo. 

"Ka ţhiante pahnih hian min rawn ţhawng thut a, midang an haw rem tawh bawk si nen nang tal i awm loh chuan" min ti a, hotel hi a len lem loh avangin zan lamah chuan hnathawk an awm mang ngai lo. 

"Ka duh lo" tih leh din ka rual a, tuna ka chunga thleng mek ang hi hmeichhe dang chungah pawh a thleng ve ţhin ang ka ring. Min endan hi a dik hlawl lo a, rilru ţha tak an put loh zia a lang tlang vek. Chu chuan keimahah hlauhna min siam a, mi chak lo zawkte hman ţangkai hi tam tak chuan an hreh tawh lova, an pawisa hmang hian engkim ti theiah an in ngai ţhin. 

Kan kawmthlang lawka awm, hotel a hnathawk ve pakhat a lo luh chuan Pu Sena awmdan chu a danglam leh daih a, a ţhiante nen chuan ti ti dang an vawrh a, keichu min ngaihven tawh lo. Duh duh a an tirh kual tura ding ve reng ka ang mah tawh zawk ang. 

"Remruat ka haw thei ţep tawh a, min lo nghak rawh aw" zangkhai fe hian a ti a, ka lo bu nghat a. Engtin phei chuan ka chhang lo. 

"Kha phone hi min lo ah rawh. Ka ipte a pawn lang lutuk a, nichinah ka thlauh lehnghal a, ka leina a la rei loh nen a khi nasa mai. Ka ui tak tak a ni" tih lang lang paha phone min rawn pek chu bag ah ka lo ak ve mai a, zai rat rat chungin inchung lamah a chho ta daih a. 

"Khawi pindan berah nge in awm duh? Remruat, ka ţhiante hi an pindan turah lo han hruai rawh aw" Pu Senan a tih rual chuan ka che phut a, ka inher thut a ni mah zawk. Kan veng nu, Biaktei chhohna lamah khan ka tlan chho ve hlawk hlawk a, ka hmu mai lo lehnghal. Rilrua a thawh dan danin ka che tawp mai sia, a hming lama au chiam chiam chi a ni mang bawk si lo, zawnna tur ber ka hre der lo. 

Hnathawk an la awm ve pheuh pheuh reng avangin helai thleng thleng chu min rawn umzui dawn lo tih ka hria. An mitmeng tenawm lutuk lah kha mitthlaah a cham zui reng mai; Pu Senan ka khup a zût kual vel laia a ţhiante lo nui hmel nen khan. Khatianga min tawk vel kha hnathawk ţhenkhat chuan rawn hmu se engahmah an ngai kher lovang. Pu Sena a ni miau a, tupawh mai hi min nel angin a awm a, min kuah thuak thuak a, tam tak chu min khawih ang khan khawih ve se ngaihţhat loh nachang an hre kher lovang. Mahse keichuan a mitmeng tenawm leh verther zet kha ka hmuh hmaih lova, min nel leh duhsak vanga zan lama hnathawh tur min pek belh a ni lo tih chiang takin ka hre tlat a ni. Hnathawk ho hmuh laiin min kuah hreh hauh lo na a min umzui erawh a duh dawn hauh lo a, rawl ka chhuah ngat phei chuan mikhual te thlengin ngaihdan dik lo an nei thei a, chung zawng zawng thleng chuan a chhut pha vek ang. 

Biaktei ka hmuh zawh tak lohah chuan inchung zawl hi ka pan ta tawp a, hetah hi chuan ka him tih ka hria. Ka kal fo na hmun a ni a, a hmun hian rilru a tih thawven ve ţhin avangin diary kengin ka chho ţhin a, heivanga hna kal naa diary pai ziah kher pawh ka ni pakhat a, hotel neitupa rilru put hmang diktak ka hriat hma kha chuan he hmun hian thlamuanna min pe ţhin. 

"He hmun ka chhuahsan rual hian hna aţangin ka bang nghal ni rawh se" keima hriat tham lek tura ka phun sap hnuah am zetin boruak ka hip lut a, muangchangin ka thaw chhuak leh riai riai a, rethei te mah ni ila ka him lohna hmunah chuan thawh zui zel ka tum bik lo. 

Ka dinna lam hawi zawnga thlifim a rawn thawt leh takah chuan ka invawn beh lohna lam kut zawk chu ka phar chhuak duai a, ka kawr puan tawn tlanga ka taksa a chhem daih rual hian buaina chi hrang hrang alh but but ţhin te hi chhem dai tel ve thei se ka ti ţhin. Ka din rei deuh hnu chuan ka thawmhnawin a khuh loh chin: ka hmai leh ka kutphah te chu a vawt thlar tawh a, ka sam lah chu mumal lo zetin a hnawk niai a, ka mit a rawn hliah changin ka bengah ka zep a, thli thaw chu dam viau mah se min chhem dam zo tak tak lo a ni ber. 

"Eng teh hrep nge i hriat a?" mipa aw vin zet ka hriat rual deuhthaw chuan tuemaw hian ka kawngah rawn manin dim lo zetin min pawt let nawk a, ka khek deuh ţhat nghe nghe a ni. Na taka lei ka rah chawrh avangin ka ke a na zawk a, ban ka vawnna lam zawk ka bân phei chu na tak a ni ringawt. 

Min kuah bet tlat chung hian thawk a la hawk a, thil thleng thutin min ţhawn em avangin keipawh chuan chet nachang ka hre mai bik lo. A lungphu ri dawt dawt leh lungawi loh hmel fe a a thaw ri te chu hrechiang tak ka ni ringawt. 

"Mimawlnu, mahni nunna lak hian eng buaina mah a ching fel lo tih i hria em?" a ti leh nghek a, inla hrang hlekin nghet zetin ka darah a hmer a, a na mah mah deuh chu a ni. A thusawi lah chu ka hrethiam der lo. 

"I chhungte i ngaihtuah miah lo em ni? I ruang an hmuh huna an awmdan tur te ngaihtuah nachang hre ta che" a ti vin leh tuar a, min au khum chiam chiam chu thuhran, ţawng paha min sawi nawk nawk tel kher zel hi ka hrethiam lo. 

"Ngah nge maw min rawn vin chiam chiam le" ti nang nangin ka dar a hmerna kut chu hnawl sawn mai ka han tum a, min hmer nghet zual sauh emaw tih tur a ni.

"Mahni hma an sial viau ngai lo" a ti deuh nghut a, a aw chu a thumin a zawi hle tawh a, keipawh ka hriatna a fim tial tial a, ka hriat ngai hauh lohin min rawn vin vak chhan hi ka hrethiam ta uarh uarh bawk. 

"Êng awmna banah sawn ka invuan bet tlat alawm. Nang hi, ka pu, inchhawng sang aţanga zuangthla turah min ngai elo?" ka ti a, nuih te lam lam a za alawm le. 

Kei aia a san zawk miau avangin dâk deuh hlek hian ka en a, uluk zetin min lo en ve ngur a, a la lungawi loh hmel takzet. A hmel pawh ka hmu chiang ve thei ta, a naupan hmel lutuk tawh lova,  hnar ngul sang vah, mitmeng thip lam deuh a ni. A hmelţhat mai bakah a pa tel a, tlem a ka din hlat leh hret hnu chuan a thawmhnaw hak pawh ka hmu chiang lehzual a, a dum vek a ni. A palian ve tho bawk sia, Pu Sena bula ka awm laia min lo en reng tu, puih ka ngaih laia min hawisan daih tu kha a ni thei mai angem le?

"I hriat sual palh a nih kha aw. Intihhlum ka tum reng reng hleinem. Thlifim ka dawng a nih kha, i rawn rik phut hma khan min enchiang hmasak phawt tur che a nia" pangai deuhin ti ve bawk mah ila min ngaihtheih loh hmel fe hian a ner nawk a, engmah a sawi ve tawh lo.

Ka hmaah tak chuan kuangkuah hlunin a ding run a, tur fein min melh khui bawk a, tlak dal a ka ding mai mai chuan a pawi a sawi nasa viau a nih hmel e. Sawi tur ber ka hre tawh lo chu ka hawi kual ruai a, palian-a lah chuan min kalsan mai duh bawk si lo, hnuailam ka bih chiah chu ka meng deuh kawk ang ka ring. 

"Ka pu, ka diary i rap" ti chul chungin a ke bulah ka ţhingţhi rawk rawk a, ka nu leh ka u tih lohah chuan ka thil neih hlu ber a ni. Pawh chhuah chawp ngai lovin a ke a lo dah sawn a, a rap paw phuk lehnghal. 

Diary hum bet tlat chungin ka ding mar leh a, a kawm bal lai chu ka kawr bânin ka hru fai pah thuak thuak bawk a, êng hnuaiah ka hnutchhiah mai kha a ni a, ka zuangthla dawn emaw a tih avangin palian-a hian a chhir sawn a ni ngei ngei ang.

"Helai hmunah hian eng ber nge i thawh?" diary ka tihfai mawlh mawlh laia mipa aw thum leh zawi ruih mai ka hriat chuan ka phu zawk thei. Ka hlauthawng hma lutuk hi a mak hran lo, min ţhawng dawt dawt thei thil ka tawng ngun tawh em a, ho deuh deuhah pawh ka phu zawk zawk tawh mai zel a nih hi. Ka awmdan a hmuh chuan a khi suk a, a nuih a za tak tak lo tih erawh a lang reng. 

"Restaurant ah ka thawk a, nilengin eitur ka sem kual ţhin a" ka ti liam puat a, min kalsan ve nghal mai ang chu tih nak laiin ka chhanna chu duhkhawp loh hmel zetin min lo la en run a, Pu Sena bula ka ţhu lai kha min hmu chiang lutuk tih ka hriat phah ta chiah bawk.

"I ngaih ang kha a ni lo a nia. Hotel ah hian i thleng ţhang a nih chuan a hnuaia restaurant an siam tel khu i hria anga, tah khuan ka thawk a, tlaiah ka haw ţhin. Mahse zanin tlai chu min pawt peng a" ka ti a, ka thusawi tawp lamah chuan ka aw a zawi hle a, a ri chhuak chang chang chauhin ka ring. 

"Police i ni em?" ka tih chuan lu a thing a, a dilchhut angreng sia, hotel hi a chhui ru em maw ni tih mai awl tak a ni. 

"Ka kal tawh mai ang" ban charh a ka tih hnuah ka bag la kangin diary chu ka thun nghal hmak a, pen erawh ka zawng buai peih tawh lo. 

"Min ţanpui duhna rilru puin i rawn che chhuak a, a lawmawm hrim hrim e" thutak deuha tih paha kalpelh ka tum lai chuan ka ban bulah a lo man a, kan inhnaih leh tawh viau mai. 

"Helai hmunah hian kal tawh suh" zawi te tak tak hian a phun sup a, min duhsak vanga min hrilh a nih ring mah ila mak ka ti deuh tlat. Âng deuh pham chung hian ka bu nghat a, amah chu ka melh reng bawk a, ka thil in rim hria niawm takin hnar a tum dat a, ngeiawm zet a min ner khum leh sawk hnuah ka ban a vawnna chu a thlah a, en pawh min en tawh lovin tlak dal an khamna lam chu a pan ta daih a. 

Inhnuaia ka chhuk leh chu Biaktein min zawng nasa tawh hi a lo ni a, midangin min lo hrilh mek laiin a rawn lang hlawl a, "Min hawsan ta daih emaw ka ti alawm" a ti a, ţap mai tur te pawh a ang alawm le. 

"Inchungah ka kal lawk a" ka tih lai mak chuan Nguri lo inrawlh vein, "Remruati chu inchungah zawng hmasaber zel rawh u. Mi dangdai a nia, a thawhna hmunin a zir loh tehreng nen diary a pai tlat zel a. I mak ve e, lehkhabu dawr leh library velah chuan ni se ka hrethiam a, kan thawhna hmunah lehzel diary i keng peih hi i dangdai ve thlawt a ni" a ti lang lang a, min nuihzat viau bawk. 

Chhang lem lovin ka chhuak tlang nghal daih a, Pu Sena te ţhian ho kha ka hmuh leh ka hlauh vang a ni pakhat. Biaktei chuan min rawn zui chhuakin kan thawhna building thlang deuhah bus kan nghak a, a vang tawh viau maithei a ni. Chuti chung chuan bus nghak ve midang pawh an awm nual a, din leh nge nge a ngai dawn a nih hi. 

Bus a van viau laiin lirthei dang erawh chu a insulpel zut zut reng a, mipui pawh an la ţhahnem khawp mai. Nitin mi hrang hrang ka hmu ţhin a, chhungkaw hlim tak ka hmuh chang hian ka awt ve ţhin. Ka hriat ve theih chinah chhungkua hlim tlang taka kan awm âwm ka la hre lo. Hma kan sawn ve thei lo bawk. 

Ambulance rawn tlan ka hmuh rual chuan ka rilruin 'ti dam ang che' ka ti veleh ringawt tawh a, ka ţawngţai ngai lova, Pathian hi a awm tak tak ka ring lo a ni mah zawk. Tu hnen berah nge midangte dam nana ka dil ţhin ka hre lo, mah se ambulance in min tlanpelh apiang hian a chhunga chuang chu tupawh nise, an dam nan ka lo dil sak ţhin. 

"Remruat lokal rawh lut vat vat ang ţhutna awl a awm ţeuh mai" tih pahin Biaktei chuan min kai chawt a, kan hah tlang tawh bawk aniang ţhutna tlem awlah chuan ţhut hman loh kan hlau a, luh hmasak kan inchuh a ni ber. 

Keini ţhiandun chuan ţhutna kan chang ta hlauh a, hahdam zawka ţhut tuma ka insiamrem lai mekin ka ţhutna hma deuha pitar ding ka hmu leh si a, ka ţhutna aţang chuan thoin pitar chu ka ţhuttir ta zawk a. Ţhutna ka ken (kian) phal avang chuan a lawm thiam viau nghe nghe a ni. 

Sikulpuikawn kan thlen chuan a tlai ruai tawh. Kan hlawh a bei tham ve si a, taxi hmang phal lovin Biaktei nen bawk chuan ke in kan haw hnak hnak a, a ţawng char char a, kalkawng pawh a tawi phah vek ni maiin ka hria. 

Kei hi Lalremruati ka ni a, kum23 ka pum ve chiah. Mi inhnuai luahin chhungkuain kan khawsa ve a, pa berin nupui fanaute aia zu a thlan zawk miau avangin kan rethei berh ve hle. Pawl 12 thleng chiah lehkha ka zir a, ka u a laktlak vak loh avangin nei lo chung chung a lehkhazir luih ai chuan pawisa ka thawhchhuah ve theih nan a hnathawh ka thlang zawk a, ka nu hi a changin mi inah lehlangin a kal a, a changin chawhmeh a zuar kual leh ang lawp lawp a, khawsak a hautak bawk si nen, ka nu nen a kan thawhchhuah ringawt hi chu kan kham lo a ni ber. Rilru hah reng rengin hun ka hmang a, taksa a hah tel tho bawk si a, ka nu phei chu a tar bawih bawih thei hial a ni. 

In ka thlen chuan ka u in kan bathlar zimteah mei a lo zu a, ka thawm a hriat veleh min rawn enin mei chu a ti hlum a, a nui zui var var a, "Ka lo nghak che a" a lo ti lauh a, hauh hrep ka tum tehreng nen min chhawk tum ni awm taka ka bag min laksak tak sawk sawkah chuan ka nui ve ta ringawt a.

"Afel, engati nge nizan i lo haw loh a? Ka nu a mu ngai miah lo a nia aw, zanah tal a hahdam ve theih nan ţha deuhin awm tawh teh" ngenngawl zet a ka tih chuan "Ka fel tawh dawn lawm" a ti liam satliah a, han hau ila a haw duh ngai bawk si lo, min chhang let ngai lova, kan thusawi a zawm ngai lo bawk.  

"I mak ka ti tak tak a ni. Ka ring ngam che a, i kutah ka dah thlap a. Lo pek ve mai tur che alawm. Engati nge zu manah i lo hman vek?" ka nu'n a lo ti tan tan a, ţhutthleng seia ka pa mu zawi nguai chu a inbengtho ţuah ţuah a, a thinrim hmel em em mai lehnghal. 

"Ka rul leh ang che. I pawisa tlem te kha i ui viau a nih chuan a let thawkin ka rul ang che" a ti a, a ţawng te chu a sehchilh nawk nawk a, a rui em a a ţawng hleithei lo a ni ber. 

"Eng nge ni a?" ka tih chuan ka nu zawkin "In luahman thla hnih lai kan ba tawh a, tukinah in neitute an awm bawk si lo. Ka chhuah hma khan i pa hnenah 'an lo haw veleh lo han pe rawh' ka tia, in luahman lehzel chu a tih ri ral duh ka ring lo a sin mawle" rilru na tih hriat zet a a tih hnuah ka pa chu en in "I lo laktlak loh takzet a nih hi. Hetiang a nih reng chuan i fate hi ka la indan pui daih ang" a ti a, ka pa chu a ţhu tum bur a, a awm mai mai pawh hi ka ngei hluah hluah mai a ni. 

"A kutah pawisa dah mah ta che. Fate pawisa khawl pawh ruk sak duh tu chuan engah nge a tih riral loh tehlul ang ni? Pawisa a hmuh tawh chuan a rilruah zu bak a awm hleinem, a â vek tawh zel alawm" ka ti hlak hlak a, Afeli a ngawi reng thung. 

Ka pa lah chu keini ai aiin a pawr leh tawh a, a inchhir ve ang chu tih nak laiin kan fel lohna lai a sawi chhuak a, hmelhriat a neih ţhat zia thlengin a sawi kai leh tawh a, "Officer tam tak hi ka sikul kalpuite an nih hi. Vawikhat lek ka hmuh pawha contract min pe thei nghal vek an ni. Naktukah ka chhuak ang a, in pawisa chu ka rul em em ang che u" a ti a, ka thinrim lutuk tihngaihna hre lo chu ka nui tawp. 

A tih ziah dan a ni hrim hrim. A ruih lai chuan 'ka ţhiante ka hmu ang a, hna ka dilpui ang che. Ţhian ka nei ţha a, i thawh awm tawk hna an pe mai ang che' a ti ziah a, tun hma kha chuan ka ring a, zanrei tak tak thleng kan sawi dun a, 'hna sang chu ka thawk thei dawn lova, min pe ringawt mah se ka thawk thiam kher lovang. Peon tal pawh min dilsak rawh aw' ka ti chamchi a, hna ka hmuh har loh tur thu min hrilhin min insawitheih khum chiam ţhin. Mahse, zing khua a lo var a, a zu ruih a reh a, zan lama kan thil sawi kha ka sawichhuah apiangin chhuanlam fahrah te te a siam a, tun thlengin eng hna mah min la hmuh sak lo. Keimahin ka inzawn chawp a, thla khatah sang ruk ka hlawh ve. Ka nu thawhchhuah a beitham bawk nen, mi in kan la luah zui a, kan ei ţawk ţawk a ni ber mai. 

"I ţhiante hi sawi thla zen suh. I zirpuiten hna ţha deuh deuh an neih laia thawhchhuah nei lo bik nih te hi zak ta che. I nupui fanaute thawhchhuah hmangin i la rui ve reng lehnghal a, i an a la chhe thei em em zui" ka ti hlaih hlaih a, a zahawm loh em a, a fate pawh hian kan zah zo tawh lo chu a nih ber hi. 

"Inchhung bungrua hi ka lei vek a nih hi, pakhatmah in lei ve lo. Ţawng ţawng suh u, ka hrai hlum phiar mai ang che u" a tih phei chuan rapthlak ka ti lutuk chu ka chek tlak tlak ringawt a, chhan ngaihna pawh ka hre tawh lo. 

"Mate, va inthlak la chaw ei kan lo siam ang" Afeli chuan a ti ta hlauh a, diktak chuan a zu rui a sual chang phei hi chuan kutthlak ka chak zek zek ţhin. Tu dawhtheihna mah hian a tlin bik lo vang. A zu rui ţawng te hi ka ngaithla kham hluah hluah a, amah hi ka hne ngawih ngawih a ni ber. 

Pindan chhung ka luh rualin khumah ka ţhu hnawk a, ka thaw hle hle a, lung a zing duh map map khawp mai. Hna a kal ka tum tawh lova, thla a la tawp bawk si lo, hlawh min pe pawh nise a chanve bak min pe lo vang a. In luahman lah sangnga lai a ni ve a, kan bat belh leh chuan luah chhunzawm zel an phal tawh lo hial emaw a nia nga. Thla tin pe zat zat thei luah duh an tam dawn lutuk. Keini chhung phei chu nitin zantin kan inhau buai ziah lehnghal a, min ning ru viau tawh zawk maithei a ni. 

Ka hmai ka tuai puat a, ka thaw a chham thei mai dawnin ka hria. Chaw ei an siam thawm hre reng mah ila khumah chuan ka mu hnawk a, engtia awm tur nge ka hre tawh lo. Ka thawhna ngaiah thawk zawm dawn ila thil pawi lehzual a thlen ka hlau ve tho bawk si. Tun hun hi Pu Sena tlanchhiatsan hun ber a niin ka hria a, a hmuh phaka ka awm reng chuan ka tlanchhiat hmain damchhung a ka hriat reng tawh tur ser min hnutchhiah ka hlau a ni. 

Ka inlet thawk a, khumah Afelin ka bag a lo dah diam tawh a, a chhung ka zen rak rak a, phone phawrh chhuakin whatsapp ka en a, message engmah ka dawng lo. Bialpa ka nei ve reng sia. 

'Rilru hah changa biak tur i awm ţhin lo' tiin ka thawn a, min chhan let hun ka ngaichang ran bawk a, private school ah a thawk a, min zahloh phahna tur pawh nise pawisa puk ka dil tawh mai aniang chu. 

'Ka buai em a ni. Lo hah tawh suh' tih zawng chauhin min chhang. Ka chhiar nawn tlut tlut hnuah ka nui chhuak hak a, diktak chuan ka ţap lo chauh zawk a ni. 

"Mate, chaw a ei theih aw" Afelin a rawn tih takah chuan phur lo deuhin ka tho a, beisei tur zawng chawp zel lo ila chu ka thi daih tawh tak tak ang. 

Chaw kan ei lai mekin in neitunu a rawn lut a, a hmel ka hmuh ringawt pawhin ka ip chawih a, ka ţang nghal ţeuh mai. 

"In va ei tlai ve" a ti dam thlap a, pindan tih loh chu kan inchhung hi kan ping dang ve lem lova, ţhutkhawmna pindan aţang hian choka a hmuh tlang theih vek a, in neitunu pawh tv hmaah a ţhu tharh a, chaw ei a tawp nghal vek thei mai. 

"Matei a lo haw tlai deuh a, lo ţhu rawh. Kan eikham ţep tawh, thingpui te kan in dawn nia" ka nu'n a lo ti sawk sawk a, ka pa'n in luahman lo pe se chu zanin hian a rawn inlan hauh lovang.

"Zualtea a lo haw dawn a, leng reng hman pawh ka ni lo" a tih chuan "A lo haw tawh dawn maw? Hmuh a va chakawm tawh ve" ka nu chuan a ti hlut a, an fapa neihchhun a nia, kei nen tak phei chuan kan inhmu tam lo. He in kan luahna hi a la rei lova, phaiah lehkhazir a hun a hman tam zawk avangin kan inhmu ngai lo pawh ti ila ka sawi sual kher lovang. 

"Haw dawn e..a lo thleng tawh zawk a, mah se api ten an pawt peng a, chaw an ei tir nghal a, an rawn thlah ţep tawh ang. Ka rawnkal chhan tak zawk chu in luahman in remchang em ka ti deuh a, in hi kan sak zawm leh bawk sia, pawisa induhthaw a na riau a" a ti ta chiah reng a, ka nu hmel chu a khawngaihthlak zawk.

"Naktuk tlaiah rawn pe che ila a pawi em? Tunah kawl lai ka nei miah lova, naktukah ba ka dil kual ang a, tlaiah ka rawn dah mai dawn em ni ang?" a ti ban charh a, a thusawiah chuan a inringtawk lovin chawhmeh ba an awm mang lo tih chu kei ngei pawhin ka hriat pui.

"Pawi love, in remchan dan ang angin a ni mai. Ei rawh u..ka han chho phawt ange. Mampuia chu neet a exam kha rin ai daihin a ti ţha a, BDS ka zir chhunzawm leh ang a tih kha. A lo thlen hunah thingpui lo in chho zawk rawh, chhang nen kan lawm dawn nia" phur sarh a tih pahin a nui hak hak a, a fapa a chhuan zia lah a hmelah a lang vek a, a dem awm loh khawpin ka hria. Chhuantlak fapa a nei miau alawm. 

In neitunu kal hnuah Afeli chuan "A zahthlak thei e. Nangpawh lo pek ve mai tur che a nia. Ka nu bawk a buai phah leh dawn a nih hi. Pawisa i neih loh pawn in tur i hmu reng tho sia" a ti ve nang nang a, ka haw hnua ka pa a khak ve vawikhatna a ni. 

"Khanglang che hian..min demna zawng chhen lovin nangmah khan ngaihtuah ta che. Pawisa hlawh lo pawhin mipa hmaah i kar huang huang tho a, pawisa hlawh zawngin kar law law la" a ti a, a an a chhia ka tih tawh kha. Sawi chhawn tlak loh tam tak a awm ţhin reng a ni. 

"Khati khan min ti ve ziah suh. Engmah i hre lo" ka u in a tih laiin ka pa bawk chuan "Ka hria, mifel tak ni la yma leh jac tih vel te pawn an man reng lo ang che. Nikumah pawh i sam an ziat kawlh lo chauh a nih kha. Ks ve mai mai hian ka khak e min tia" a lo ti leh hmanhmawh a, a ri nghal bur a, ka pa hmaah chaw mal a darh nuai a, chhuatah Afeli thleng a let thla rawng rawng bawk. 

"I pa hi kut min thlak a maw?" tih leh din a rual a, Afeli thinrim pawh a ding ve nghal zat a, a thlenga ka pa vawm ringawt chu duhtawk lovin bowl a la kang lawk a, bai thak zet mai chuan a theh zui a, ka nu'n ka pa a la hrang thuai a, keiin Afeli ka hnuk sawn bawk a, kan chhung buai a ni leh der tawh. 

Ka pa thinrim a inhrosa kuk kuk reng a, Afeli chu pindanah ka luh bo pui a, ka thlah rualin thawmhnaw bawm a hai chiam a, ka dang duh lo. 

"Ka leng dawn..ka rawn haw lovang. Kan inchhung hi chu ka kham ngawih ngawih. Zu ngawlvei kan kawl a, chawhmeh pakhat pawh lei ngai lo hi a la pawr ber reng zui a, ka thang bo vang vang dawn. Kan in ai chuan zu zuar in pawh a nuam zawk. Duh leh ka sam chu an ziat kawlh vek anga a ni mai alawm. Min man ţhin tute hi e..an fate fel bik loh zia ka hrechiang emai. Mi fel ber ang zia zangin ka man e min tia, ţhenkhatin kut min thlak an tum a, a tam zawk hi chu an piangthar hlawl lo. Vanram an kai chuan keipawh ka kai ve ang" a ti pah bawrh bawrh a, tukverh bula stool inhungah chuan ţhuin thawk ka la leh halh ţhin a, hremhmun a kal tur hian thih kher a ngai lo. Kan chenna khawvel ngei hi hremhmun a nih hi. 

"Sual viau mah se pate kut an thlak ngai lo. Malsawmna i dawng lovang" ka tih chuan "Pawi ka ti reng reng lo. A fanu ngei ks anga min ngai tu sawn malsawmna a dawng bik lo vang. Thi daih mah se pawi ka ti lo. Khawvelah hian ka pa aia mihring huat ka nei lo" a la ti hlak hlak a, a insiam zui mawlh mawlh bawk a, tihngaihna tak pawh ka hre lo.

"Afel, nang lehzel hetianga i awm chuan ka nu hi a damrei miah lo ang aw. Chhuak ve kher suh, a ruih a reh hunah a ţi leh dâk mai ang. Ka nu tal hi khawngaih ta che" ka ti a, a ngenin ka ngen a ni ber tawh. 

"Ka khawngaih alawm. Chuvang tak chuan ka len san dawn. Mi tlaktlai lo lutuk tih lawm loh hlau reng renga a phar buai vel hi ka hmu peih lo" luhlul zet hian a ti a, phone hmangin a ţhian pakhat chu amah hruai turin a hrilh a, a pawisa neih ve ang ang min pek hnuah a chhuak lui ta tho a, rilru hlauthawng reng rengin ka nu nen kan awm leh dawn tihna a ni mai. Ruang an chhar hlek lahin Afeli a nih hlauin kan ngaihven nghal thuai zel a, inchhung aţanga ke a pen chhuah tawh chuan kan be thei tawh ngai lo. 

Ka pa pawh a lengchhuak zui a, ka nu erawh pindanah lo lutin ka bulah a rawn ţhu ve ta reng a. Hotel a thil thleng kha ka sawipui ang ka ti zet na a kan boruakin a zir lo em a, ka ngawi leh ta rih a. Thla a tawp ţep tawh a, ka thawk chhunzawm leh lawk mai ang. 

"I kawr hak lai hi a dar a thler tawh a nih hi. Nakinah kan ţhui dawn nia" tih pahin ka kawr chu a endik vel a, a mitmeng aţang ringawt pawh chuan a chauh zia a hmuh theih vek. 

"A ngai lo..nakinah keiman hriauin ka ţhui mai ang. Khawl hmang thiam lo mah ila hriau hmanga thil ţhuiah na na na chuan min tluk teuh lo" ka ti fiamthu a, ka nu pawh chu a nui ve ta hak hak a.

"Lehkha i thiamtheih tehlul nen i pa awmţha duh lo hi chu a pawi ngawt mai. I rualpuite angin lehkha zir la, college te kal ve la, theihtawpin duat ve thei che ila ka tih tehreng nen nitin hnathawk a i chhuah ve a ngai a, chuti chung chuan thawmhnaw ţha inbel tur pawh ila nei zo ve chuang lo a, i rualpuite hi chuan an nun nawm hunlai tak an hmang mek a, lungkham nei lovin nu leh pa thlazar hnuaiah hahdam deuhin an awm a, i awt ve ţhin ngawtin ka ring" a tih chuan "Aih, ka awt lo. Hnathawh hi nuam ka ti zawk" ka lo ti vat a. 

"I u aiin i puitling daih tawh zawk a nih hi. Hnathawk lovin awm thei la, lehkha zir ve thei la ka duh ber a, mahse min puih loh chuan kan nghei a ni nghal der dawn a. Nang hi chu i khawngaihthlak a ni" min ti a, amah a in dahţha leh hmak tawh. Kei aia tuar nasa leh khawngaihthlak zawk a ni reng sia. Nu hmangaihna tak hi chu aw.

"Ka pui zel ang che. Kan pahnih a kan thawh ţang ţang chuan kan la hausa ve mai ang" ka ti a, a kut thap deuh hrup chu ka hum sak a, a cherin a vun a zur a, a rualpuite aiin a lang upa daih zawk. 

"Nangmah enkawl thei tu mi ţha deuh tawng la ka duh ber mai" a tih chuan a der ni miah lovin ka nui a, ka bialpa ka ngaihtuah a, lu ka thing ne ne a, neih tlak a ni mawlh lo. 

"I hmel a ţha a, fel deuha i awm phei chuan i la tawng thuai ang" min ti leh a, ka ring tehchiam lo thung. 

"Nu, hmeichhia hian mipa in min lo tina palh a nih pawhin mipa zawng zawngin min ti na dawn lo a ni tih kan rin theih nan pa ţha kan mamawh a, mahse mipa ka hriat tawh ho zingah ka pa aia min ti na tu an la awm lo" tiin ka phun sep sep a, a ngawi reng a, min chhang tawh dawn lo emaw ka tih hnuah "Pathian hnenah ţhlen ţhin rawh. Pa ti a koh tur i la neih avangin lawmthu sawi la, a nun a thlak danglam theih nan dil rawh. Ţhahnemngai deuha i dil chuan a la danglam ve mai ang" a ti a, ngawih ka chuh tlat tawh thung. Mihring zawng zawng te chunga rorel a, an duh pe ţhin tu chu awm tak tak se chuan dinhmun inthlau leh lutuk kan awm theih ka ring lo tlat a ni. 

Hlauthawng ru deuhin hnaah ka kal a, nidang angin kan buai nep deuh a, Pu Sena pawh hmuh tur a awm lo. Hotel ah ka chho duh lo hrim hrim a, kal a ngai a nih pawhin kan thawhpui Faktea ka kal tir mai zel. Dawr a rawn chawl te chu nidang aiin ka lo chik a, nizana ka hmuh pa kha a lo chawlh luh ve tak mialin tih thuah an hmel pawh ka lo en chiang thei khawp mai. Kal tawh lo turin min duh a, ka kal lui tho si a, min hau tur talin a lokal leh angem tih mai mai te ka ngaihtuah a, zuangthla tura min ngai ringawt leh a hlauthawng lutuk kha a chhan ka hrechak takzet bawk. 

Kan pi ber hnenah hlawh ka dil lawk a, ka harsatna ka sawi chuan a lo remti ve mial a, ka hlawh bak chu neih belh theih dan ka hre chuang lo. Ka nu ka ngaihtuah ru em em a, a thawkrim lutuk hi a taksain tuarin khawlaiah a lo tlu mai ang tih te ka hlau. 

A hahthlak khawp mai. Khawvel hi chu hremhmun diktak a ni. Kan thih hnuah kan hahdam chauh ang. Hremhmun a awm tawh lo vang a, kan thawk tawp hun hi kan chawlh hahdam tak tak hun turah ka ngai. 

Ka hmu lo nileng dawn emaw ka tih laiin dawr khar hun awm velah Pu Sena a lo lut a, an nu hnenah chuan thiam tak maiin "Remruati hi ka lo pawt peng lawk ang chu" a rawn ti leh tawh a, mikhual zanin tlaia hotel chhuahsan an tam thu leh pindan tihfai ngai a tam thu a sawi zawm a, hnathawk an tam loh thu a sawi hmaih lo bawk. 

Pi Awmpuii lah chuan "A ţha khawp ang chu. Pawisa a mamawh zual lai a nia, hlawh pawh ka pe lawk alawm. Remruat, han pui la, hlawh ka pek belh dawn che nia" a lo ti a, min khawngaih em avangin a phur khawp mai. An pa ka hlauh zia a hre lo mai mai a ni. 

CONT..