DEAR DIARY-10

DEAR DIARY-10

"In chawhmeh zawrh chu kan lo dawr ve ang che u" U Tluangtean a tih chuan Zualtea nen kan inmelh ralh a, a lawm chiah lo tih ka hriat avangin chawhmeh pawh hi ka en tir ngam bik chuang lem hlei lova. 

"Naktukah lei a ngai dawn tho a, tlawmngaih vang ni lovin a ţul vang zawkin kan lo lei ve ang" U Tluangtea bawk chuan a ti leh a, lak nachang ka la hre chuang lo chu ka nu'n "A mak thei a nia" min tih khumin chawhmeh la bang zawng chu an hmaah a chhawp sawk sawk a, chah tawh lo tawp mai se a ţha zawk tur a nia. Kan chhungten a tlawm lutuk an rawn tih chuan a it nghal zel sia, ka buai tel leh nge nge ţhin. 

"Kan duh ang kan lei ang a kan haw nghal mai ang" Zonunmawian a tih chuan 'Engati nge?' lo tih hluai ka chak khawp mai a, mahse ka bialpa a awm ve reng avangin a rem ţeuh si lo. Ka awmdan aţang chuan a lo hrethiam nge min rawn en pah hian "In zawrhna kan dal ang che u" a ti leh a, nupui lo la nei lo se aw ka la ti vang vang ţhin. 

"Thawhţanah hian ka nauin pasal a nei dawn a, lokal ve rawh u aw. Midang chu an inah kalin ka hrilh thlap lo a nia, nangni chiah hi ka hrilh che u aw Nu Hmingpui" a tih hnuah ka pa lo lut chu hmuin "Ka sawi chu aw Pa Ram" a ti leh lauh a, "I sawi ka hre pha hleinem" ka pa'n a lo tih chuan ka nu nen a min hrilh ang bawk chu lo hrilh vein keini ang lo takin ka pa chu a phur khawp mai. 

"Ka rawn fatu ang" a ti vel a, chung te chu a mipa lam ten ruai an buatsaih leh buatsaih loh a thu a ni tawh sia, a phur thlawn dawn a nih hmel. 

Fiamthu duh tih takah U Tluangtea chuan "I fatu loh kan hlauh nak laia, i siam sa kan ei ang chu le" a lo ti vat a, a pasal tur pawh hi kan venga mi tho a ni awm e. 

"Tluangtea hi naktuk man hlan i ti sia, a karah chawlhni a tla ang a thawhţan ah an innei dawn tihna mi?" ka nu'n a lo tih chuan "Thawhţan mawle..thawhţan hi manhlan a nia thawhlehah an innei ang. Ka sawi sual te chuan min lo tih dik sak tur che alawm Pa Ram" a ti a, ka pa bawk chu chhaih lehin za lo deuh deuhin ka lo nui ve a, Zonunmawia chu ka melh leh zeuh ţhin a, chawhmeh a thlang uluk khawp mai. Ka nu kawh apiang chu a en a, a dang nen a enkawp vel ţhin a, thil ho mai mai a ti lai pawh chu hmuhnawm ka lo ti tho. 

Ka nu hnena pawisa te an pek fel hnu chuan an insawi ang tak takin an haw nghal a, thingpui pawh an in hman lo. Ka nu zawkin a thlah a, an thil khai haw lah chu anmahni nen hmehbelin a nuihzatthlak duh lutuk ringawt.

"A la hma bawk a zuar kual leh mai ang. Kan zuar hman tho ang ka tih reng kha" ka tih chuan Zualtean "Naktuk zingah i tih kha. Zanin a kan hralh bang chu naktuk zingah nangmahin i zuar dawn nia" min lo ti a, em ah chuan a vawm lut hmawk hmawk a, lo chelh tlat lo phei ila chu a tlu daih tawh ang. 

"Chawhmeh i ti chhia anga sin mawle" ka lo tih leh chuan "Tlai rah chiah a nih kha ka vawm luh. A chhe thei chi chu ka hre ve bawk" a ti leh nek a, a lungawi loh hmel viau tak tak mai. 

Em ka phurh veleh bag lian ve tak hi a chungah a rawn nghat chawrh a, ka nghing lawih thei hialin ka hria. Tlaiah kha chuan amah hian a ak ve mai kha a nia, ka haw dawna min phurh tir pawh khan rit ka tih hlaua min zawt reng chungin dim deuhin a rawn chherchhuan a, tuna a chet dan nen chuan inthlau tak a ni.

"I ak dawn lo em ni a? Keimah hian ka phur vek dawn mi?" ka ti ha a, hnam ka vuan ţai a, hawi pawh ka hawichhuak hleithei lo.

"I phur ang chu le..ka dar a na" a ti hmak a, ka nu lah chuan "Kal vat vat ta che u..in inhnial chhungin mi an mu zo mai dawn" a lo ti ve sek a, tum burin ka chhuak a, ka thiam loh a ni tih chu hre tho mah ila hetianga intih ai chuan min hau hrep se pawi ka ti lo zawk. 

Ka ţawng duh tak lohah chuan ani pawhin ngawi rengin ka bag phurh tel chu min laksak a, a ti zâng ve deuh nain ka la phur tam tho avangin a zang tak tak thei rih chuang lo. Mi ina kan luh apiangin "In va tlai ve" an lo ti zel a, an enchhung nen phei chuan rei kan zuar hman lo. 

"Zo vek thei tur kan nih laiin inleng i nei khanglang a" min ti a, ka la ngawi reng tho.

"Naktuk zingah hma tawkah tho la kawngthlang lamah zuar kual rawh. Mi bazar tura an chhuah hma i nan hman a ngai a, a nih loh chuan kawnah ţhutpui mai rawh. Keichu ka mu rei dawn" a ti nghut nghut a, min hrilh pawh ni lovin thu min pe a ang zawk mah. 

"A chhe vek anga ni mai. Keimah chauh chuan ka ţhutpui peih lo" ka tih veleh "U Tluangtea te ţhian dun kha sawm rawh" a ti hmuk a, ka va han ngei mai mai tak. 

"An lo leng ve em em a chhuahsan daih a mawi hleinem. Hmeichhia ka nih hi, hmanlai phei kha chuan hmeichhiain a inleng biak ţhat bik a nei thiang reng reng hleinem" tiin ka insawithiam ve pang pang a, a lo ngainep khawp mai. 

"Tunlai a nih tawh hi. Tuai pawn langsar deuhin bialpa an nei ngam tawh. Hmeichhe tan inleng zawng zawng biak ţhat vek tur tih dan a awm tawh lo" a lo ti ve zel a, chhan ngaihna ka hre lo chuan "I mawng a nih chu" ka ti hlak a, a reh zui leh vang vang a, a sawi dik lo bik chuang lo, hmanlai nun leh tunlai a kan nundan hi chu a inthlau tawh em a, tehkhin theih a ni lo tak tak. 

"Kan hralh zo titih tho a, a bang hi chu keimahnin ei mah ila a pawi hleinem. Nangpawn i hawn ve dawn nia" ka ti ta daih a. 

An inkawtah a nu'n min lo nghak a, min ngaihtheih lohna hi a ti langsar tial tial a, haider tum ngial mah ila haider luih theih a ni lo. 

"Remruat, i nu leh pate hi an inhau reng a, mi hriat atan a mawi lo ţhin emai. Ţhenawmte pawn an sawisel ţan tawh a, hetiang a nih reng chuan kan la inchhuah tir ang tih te pawh a hlauhawm" a ti hlak hlak a, ka lo ngawi reng a, chutah Zualtea bag khai chu enin "Pe let la lo lut rawh" a ti a, inchhungah a lut zui nghal hmak bawk. 

"Va lut rawh" tih paha bag chhuh sak ka tum chu lo phallo in "Kal rawh ka thlah ang che" a ti a, ka dara vuanin min kuai her zui nghal a, "I nu kha a rawn chhuak leh ange aw. A hau leh vak mai ang che" ti ve bawk mah ila kan in panin min kai thla a, a ngaihpawimawh loh zel chuan keimahni tan hian a pawi zawk ang. 

Kan inchhung chu a lo reh ţhiap a, ka pa hnar ri ka hriat takah chuan ka nu pawh a mu tawh a nih ka ring a, "An inhau zo tawh aniang" ka tih chu a hre pha kher lo ang. 

Kan indah fel hnuah kan ţhu chawl a, thingpui pawh in lova tuivawt kan in chuan ka harh sawng sawngin thei mai. 

"Han chho tawh rawh" ka ti leh a, chhan pawh min chhang lem hlei lo hian a tih ziah danin ka sam chu ka bengah a zep a, "I tih thinrim zel chuan min hnawtchhuak mai ang. Hmanni a a ruala ka kal pawh khan kan luah lai bik hi kan chei ţha dawn a a tia. Kan chhuah tho chu ngai dawn mah se tun rum rum a min chhuah tir loh nan an thu awih rawh. In luah tur a vang si, min hrechiang apiangin an kan luah an duh lo ang a, a buaithlak dawn lutuk" ka ti zat zat a, lehkha zir zel turin an duh a, keiin a rilru ka pawt peng ve reng hi an ngaithei lo ber niin ka hria. 

"Afeli ba kan rulh zawh hunah zir leh turin rilru ka siam fel tawh ang. Chu chu i duh dan a nih chuan" a ti a, "Aw..i nu leh pate duh dan pawh a nia. I tana ţha tur a ni bawk a, thu i awih chuan nakinah i inchhir lo zawk ang. Nang phei chu i thiam thei ang, nu leh pa dang pawh nei la sang deuh thlenga zir turin an duh tho ang che. Hna ţha deuh i la nei ang a, i hlawh ngeia i inenkawl theih hunah chuan tuman an thunun thei tawh lo ang che" ka ti dap dap a, ka rilru chu a na ve tho. Min kalsan tawh lo turin ka duh. Ka bialpa a nih vang a ni lo, ka ţhian a nihna a la bo lo a, kan inlaichinna ai mah hian ka dah sang zawk bawk. Ka ţhian neihchhun nia ka ngaihin min liamsam vang vang tur chu ngaihtuah chian chuan a huphurhawm ve thlawt a ni. 

"Kumin ah chuan ka hman tawh lo ang" a tih chuan ka lo bu nghat a, "Tlai tak tak a awm hleinem. Nakumah a ni mai alawm" ka ti vat a, ţhian ang chauha awm leh ka duh zawk thu hrilh ka tum ut ut lai chuan ka hmuiah a rawn fawp a, ka nu leh pa pindan kan hnaih deuh avangin a inla hrang leh vat thung. 

Inrinni tukah chuan hma deuhah Zualtea a lo chhuk a, mahse ka nu'n kan zawrh a lo phal tawh lo a, "Keiman ka lo buaipui tawh mai ang. Tam pawh a awm tawh lo hi. Zualte, i nu khan kan nei a ti tho nain hawn ve la, i zawrh hah man a ti mai alawm" a ti ta zawk a, Zualtea lah chuan a thlawn tawpa hawn chu a lo duh lo ve nasa mai. 

"Ka lo lei ang" a ti ve tlat a, pek luih theih a ni lo. Pawisa a neih dawn loh tehreng nen ka nu chu chawhmeh man a pe ţalh a, ka inbual san a, bualin aţanga ka chhuah chuan a lo awm tawh lo. 

"Mate, fel viau mah se Zualtea hi bansan rawh aw. I nuna inrawlh ka duh lo a, i kawppui tur ngat phei chu thlanpui che ka tum lo. Mahse, kan dinhmun a inthlau em a, i bansan mai loh chuan kan chep lutuk ang" ti a ka nu'n aw dam deuha min hrilh lai chuan muangchangin sam ka khuih a, ka nu meuhin bansan tura min hrilh a nih chuan inchungnuin eng emaw a sawipui tawh a ni ngei ang. Ka nu hian Zualtea hi a ngaina takzet a, chhan awm lo chuan bansan turin min ti ngawt lo ang. 

"Ka la bansan ang" ka ti tawp ringawt a, keimahin Afeli ba ka rul thei dawn lo a, kan rulh zawh hun nghah ka tum ve tlat a ni. Ka hma ka sial ngai mang lova, tun ţum chauh chu mahni hmasial ka tum ve a ni. 

"A nu hmuh laiin inzui tawh lo ula, Zualtea hi lokal tam lo bawk se la, a nu mit ti kham lo zawnga awm tum hram hram rawh u" tih pahin ka hak tur khuma ka dah thlap chu min lo pe a, "Nih leh Zonunmawia nu leh pa hi eng nge an an ve? Ka ngaizawng dawn e ka tihna a ni lo a nia, mi hausa ţheuh ţheuh an rilru put hmang hriat a chakawm alawm. Inchungnu aiin an danglam deuh em?" ka tih chuan a hamhaih deuh niin ka hria. 

"Mi hausa ve ve an nia, engtiang chiahin nge mi hausa te hi an danglam theih hriat ka chak alawm" ka tih leh takah chuan "Anni chu an fel. Ka awm ve hnuah pawh miin thil an rawn zawrhin kutruakin an haw tir ngai lo a, eng emaw tal an lo lei sak ngei ngei ţhin. An in pawh a ropui lutuk bik lo a, mahse an inngeihin an hlim thung. An thil lo tawn tawh leh an nunhlui te hre lo mah ila tuna an awmdan ah ngau ngau chuan sawisel tur ka hre lo. Mi tam tak inah ka inhlawh ve tawh a, tuna ka kalna hmun hi nuam ka la ti ber" phur zet a a tih takah chuan ka lo nui hak a, a hah thei em a, a awmna tur takin a rawn zawng hmu ve taah ka ngai. 

"Nidang aiin i tlai, ka thlah ang che" ka hnial hma hauhin Zualtea chuan helmet a khum a, ka nu takngial pawhin sawi a neih tawh chuan an inchhungah phei chuan an sawi nasa thei ngawt ang ka ring. 

"Taxi in ka kal mai dawn alawm" ka ti nang nang a, a nu a lo chhuah thut hlauin kawngkhar ka melh sek a, an hauh nasat ve dawn nen ti hian langsar deuhin min la kawp lui zel chu a nia, mipa nge nge kei aiin a huaisen daih zawk a nih hi. 

"Lawn rawh le" a tih te chuan phur lo deuhin ka lawn kai a, an kawngkhar ka la melh ran lai chuan a nauin a rawn hawng zawk a, rang deuhin a pawt phui lehnghal a, inngaihzawn hi thil sual a nih loh nen misual ang maia kan tlanchhiat reng a ngai si a nih hi. 

"Afeli ba rulh dan tur ka hre tawh" a tih veleh "Engtin?" ka lo ti vat a, kan rulh zawh hun hi kan inţhen hun tur a ni tih a hre hauh lo ang. 

"A chian hunah ka hrilh ang che. Hahdam tak khan lo awm tawp rawh" min ti vel a, dawr kawta ka chhuk lai chuan Rintluangi lo nui sang mai chu ka hmu hmasaber a, ka laih deuh avangin ka hmu lo der tlat thung. 

"Tlaiah hruai ka ngai lo ang aw. Duh leh in ka thlen hnuah ka lo hrilh zawk ang che" tih leh kal ka rual a, "Nuam awm bik ve" Rintluangin a tih chuan ka zak ve deuh a, lei ka chhuah zauh hnuah ka lut hmawk hmawk a, indahţha thuai thuaiin hnung lam bawk chu ka pan leh a. 

Chhunah chuan Zonunmawia nupui hlui Kimkimi leh U Marti te inpawh hmel deuha an ti ti chu ka en reng a, customer ngah viau lo ila chu Rintluangi phei chuan a ngaithla ru leh daih tawh ang. 

"Higher zirtirtu a ni an tia, en en duh suh. I hrehawm phah mai mai" Rintluangin a tih lai mekin Zonunmawia a rawn lang hlawl a, Pu Sena a tel ve lehnghal. Rang deuhin chhuar phenah ka biru a, customer lokal te chu ka ngei riau mai a ni. Kan dawr hi inhmuhkhawm nan an hmang ti ngawt dawn ila ţhianho awmkhawmna tlak khawpa hahdam a ni bawk si lo. 

"Thlai kha i hralh zo thei em?" amah zawkin min rawn pan leh tawh a nih hmel. Min duh ve deuh em mawni tih theih tur hian a awm leh khauh ţhin.

"Tlem a chuang" tiin customer buaipui pah hian ka chhang a, ani pawh a dinna bul vel a mi an en takah chuan a kil lamah a rawn phei a, a lian bawk nen, awm a ti nuam lo khawp mai. 

"Pu Sena saw engati nge i rawn hruai ve?" ka tih chuan a hamhaih deuh niin ka hria. A ţhutna lam chu thlek vutin thil hrechhuak leh ni awm tak hian "E..i thawk tawh tak e" a ti duh lek chauh a, ka hlauh zia a hre lo a ni phawt ang. Mipa hmuh laiin ka mal a chul thuak thuak ngam a nia, hlawh min pek tam tur thu a sawi pah zuah zuah lehnghal a, a tenawm ngawt mai. 

"Khami zan khan min lo enreng a, Pu Sena min tih dan pawh i hmu ve vek sia engati nge engmah i tih loh? Inthah tum emaw min tih hnuah chauh min ţanpui a, khatiang khan hmeichhe pawisawi lo tam tak pawh a lo chul kual vel tawh maithei a sin" ka ti sar sar a, customer buaipui pah ngai bawk nen, ka indaih lo khawp mai. 

"Sena hotel ah chuan pawisawi lo an awm lo ti ila a dik zawk ang" a tih ruala ka melh tak hrakah chuan "I ban hnuah chuan" a lo ti leh vat a. 

"Chu i lo dawr ve fo tawh ang a" ngainep zeta ka tih chuan "Chutiang ti duh tur khawpa hmeichhe mamawh ka ni lo ve" a ti nghut a, a lungawi loh hmel nasa mai.

"Ka uang a nih kha. Min rawn ţanpui kha ka lawm khawp mai. Kha zan khan intihhlum ka tum miah lo a, chuti chung chuan min lo pui tho a" nui chunga ka tih chuan "Ka pui ziah ang che, i mamawh phawt chuan" a ti a, a rawn kalpui pa ngaihtuah ran chung hian "Pawisa a ţanpui chu ka ngai kher lovang. Ka mamawh chu ka nei ve thei zel a, hotel tereuhte, thianghlim lo ru zek bawk si kha ka awt tehchiam lo" ka tih chuan a nuih a za khawp mai. Keipawh chuan ka thuchham chhuah hoin awmzia an neih loh zia ka hre leh hnuhnawh a,  zak ru viau mah ila ka sawi zo vek tawh. 

"Khami zan khan hotel ah khan eng nge i tih ve?" ka tih chuan "Kan ţhianpa ka rawn ngaihven a nih kha" a ti mai a, ka hriatthiam loh zia a langchhuak a ni ngei ang ram dang aţanga an ţhianpa lokal chu Pu Sena te hotel a a thlen thu min hrilh zawm a, ka var kuar mai.

"I nu a lokal nitin a, kei ka lo leng tawh bawk a, engtik nge i rawn len ve ang?" a tih chuan nui var varin customer ka buaipui a, counter bula a ţhiante an ti ti bawrh bawrh laiin a ni chu ka bulah a awm a, dawr tu kan neih pawhin ka buaipui chhung zawng min lo nghak peih. 

"Ka hre lo le...lo len tumna rilru ka la pu chhin ngai lo" ka tih takah chuan "Keimah zawk ka lo len a ngai a nih chu" a ti a, mak ti deuh tak hian ka lo en a, ka hmuh hlim hlawt aţanga ţha ka tih ruk leh vei zui em em reng kha a ni a, an khawsak leh a hnathawh ngaihtuah phei chuan ani meuhin hetianga min bia hi a mak zawk a, midang phei chu hrilh ila an awih hauh lo ang. 

A ngai lo tih ngawt chi a ni si lo a, "Lo la leng rawh" ka ti ta ringawt a, min pawh viau si hi tun thlengin phone number min la dil lo a, a mamawh lo aniang chu ka ti mai zel a, a ţhiante zinga a va tel leh te chu a rukin ka en zeuh zeuh a, a nupui hlui Kimkimi saw hmeichhe vannei tak chu a ni phawt mai. Mahse a vanneih zia hrethiam lovin mipa ţha leh rintlak  a kalsan ta chu a ni sia. 

An nupa chuan an inhlat angreng a, an inbe ve pawn ka hre lo. Ka hmuh loh laia an lo inbia a nih chuan thuhran a nia, ka hmuh lai chuan an inbe lo tih theih a ni. Zonunmawia sawi hmangah U Tluangtea te inah an kal dawn a nih hmel a, a ţul ang anga puih ve an tum a ni. A nau pasal neih ni leh man hlan niah khan chawlh ve kher a tum lova, tlai lama a kal ve tur thu erawh min hrilh thlap. 

Pu Sena nen a an chhuah hnuah Kimkimin kan thil zawrh ho a rawn enkual a, Zonunmawia angin bakilh a en ve lo a, hmai hnawih chi lam hlir a enkual a, ţhenkhat phei chu chah chawp zel a nih avangin stock a tlem hlawm khawp mai. 

"In zuar ţha vak lo hlawm a nih hi" a tih chuan "I duh zawng a nih loh chuan thuhran a nia, mahse original vek a nih hi. Ah..kei aiin i hre zawk ang" ka ti nawi niaih a, a vun rawng nen a inhmeh zawk tih a hre ve aniang a sam chu a ti dum hlap a, rawng dang a lang tel lo. A hmui pawh a hnawih sen em em lova, dal riaia a hnawih ve te chu khawlum lai chuan hmuh a nuam zek a, "Zonunmawia nen khan in inhria em ni?" ti a min zawh hnuah chauh amah aţangin mit ka la sawn a ni. 

"Hre lutuk lo. Dawrah hian a lokal ve ţhin a" ka tih chuan "Eng nge a lo tih a? Hman lo a inti thei hle sia" a ti a, a aw chu a tham deuh chhal a, amah nen a inhmeh lo ka lo ti ru ve em em a, aw tliang ralh nei se a inhmeh zawk ngei ang. 

"Eitur an lam khawl ţhinin ka hria. A chang chuan hmeichhe naupang a lo hruai a" ka ti a, nichin lawka an chhuak tur kha ka lo hmu ve reng a, Kimkimi hi vawikhat pawh a melh lo. A rilru a let hmak tawh te pawh a ni maithei a ni. 

"Helai hmunah hian engtia rei nge i thawh tawh?" a tih leh chuan pangngai deuhin ka lo hrilh a, ţhian an nih hnua innei an nih chuan Zonunmawia nen an inrual vel ang a, mahse hmeichhia tih takah Kimkimi hi a lang upa zawk a, ka nu tihdan takah in enkawlna tur pawisa nei lo se chu tun ang hian a lang ţha bik kher lo ang. 

Tlaiah Zualtean min lo hruai lui leh tho a, amah ang lo takin a zia a zawi a, biak hmasak loh chuan min biak pawh a tum lo. Zonunmawia kha a lo hmu fuh em maw ni ka ti hial a, mahse a tan rawn hmuh daih ngaihna a awm lo. 

U Tluangtea nau pasal neih ni chuan dawr kan khar hma a, U Marti a kal ve duh vang a ni. A pasal te vengchhung mi tho an nih avangin chaw ei ve turin min sawm nasa viau na a ka lo hnial fithla ţhak a, kan ban hma ve ni hi chuan in lamah a ţul ţul tiin ka mu hmak zel a, kartluana kan hnathawh hi chauh pui tham a ni ţhin bawk si, mut hahdam hun mawlh ka nghakhlel ţhin. 

Nidang ang lo takin Zualtean min lo hruai lo a, biak takngial pawh min be lo. A buai aniang ka ti mai a, ka ngaihven teh chiam bik lo. In ka thlen chuan a bike pawh a lo awm lo a, kawtlaia a nau puan pho seng mek chu "Khawiah nge i u?" tiin zam chung chungin ka zawt a, min hrilh duh pawh ka rin loh laiin "Chhunah khan a chhuak daih a, a lo la haw lo. I va bang hma ve?" min lo ti a, ni chhunna lama ding a nih avangin a meng zim sun a, a nur deuh nang bawk a. 

"Kan dawr neitu hian inneih naah chaw a ei ve dawn a" ka tih chuan "Inkhawm lovin a ei tawp mai dawn a ni maw?" nui chung hian a lo ti a, Zualtea nau chiah niin college a kal ve tawh a, a unaute zinga ka hmuh khat ber a ni. A te pahnih hi chuan kan ina a lo leng hi an rawn ko ngun a, ka hmu ngun khawp mai. 

"Aw chutiang vel chu a ni mai. I u chu khawiah nge a kal daih ang le?" ka ti ţha leh a, hrereng si a min hrilh duh lo mai mai a nih te ka ring hial mai. 

"Engmah sawi lovin a chhuak a, ka nawm sam loh deuh avangin inchungah ka mu daih bawk sia, bia la i biak theih loh leh a lo haw hunah ka lokal tir ang" a ti reuh a, rin aiin a fel zek. 

"Aw ka lo be mai dawn nia" ka tih hnuah ka chhuk a, tumah an lo awm lo. Ka nu chu a hnathawhna hmunah a kal ngei ang a, ka pa chu inneihnaah a nih ka ring. 

Ka inbual te te hnuah inchhung ka tifai a, chhuat ka nawh zawh hnua mut mai ka tum chu tu emaw hian kawngkhar a rawn kik a, Zualtea a nih ka rin nen U Tluangtea leh Zonunmawia te pafa zawk an lo ni. 

"Ehe...nangni ho chu" ka ti hluai a, sawm chawp pawh ngai lovin an rawn lut a, ka lo zam leh tawh khawp mai. Khaw en lai phei chuan kan inchhung ruak lutuk hi ka zahpui ve ţhin a, kan bungraw neihchhun te hi an ţhat loh em avangin ka uluk viau ţhin. 

"I la insiam nange?" U Tluangtean a tih chuan "I nu ka hrilh kha" a ti a, ka nu chuan min hrilh a tum ngei ang a, phone ka ngaihven lehpek tawh lo zawk a ni. Sawi takah chuan Zualtea pawn min rawn biak a tum ve reng tho maithei a sin. 

Pindanah tlan ruk rawk rawkin phone chu ka en a, ka nu missed call a tam nen Zualtea hming a awm ve hauh lo. Ka ngaih a ţha lo takzet a ni. Ani hi a nu leh patean an hau ang a, a lo tlan bo daih aniang a tih mai mai ka ngaihtuah kual lai chuan "Insiam rawh Remruat" U Tluangtea bawkin a rawn ti leh tawh a, hnial tum viau mah ila a beidawng duh chuang lo. Thawmhnaw hak tur ţha ka nei lo tih ka hre ran a, Afeli thawmhnaw hial ka hai phah a, ka buai rukna chu hria ni awm takin "Inchei suh aw..chhuna inchei vur ho pawh an inthlak vek tawh ang" a ti lung lung a, inthlak eng ang mah se kei ai chuan an nalh tho ang. 

Pindan aţanga chhuah paha "Ka lokal lo mai ang" ka tih leh chuan "I lokal ang. Hruai chhuah luih i duh loh chuan min zui rawh. Pawn i chhuak tam lo lutuk a hruai harh i ngai tlat" a lo ti khauh bur mai bawk si, a hahthlak tak tak  a ni. Hetiang tur tih chu hria ila U Marti ban hma a tih khan ka phur lo ngawt ang.

Ka din reng lai chuan Zonunmawia fanu in ka kutah a rawn kai a, a kutphah tereuhte chu ka lo hum let vat a, kal mai ka la tum chuang lo thung. 

Min tur char char hnuah chak lo chung chungin ka kal ve a, mi an tam em em mai lehnghal. Kimkimi leh U Marti pawh ka hmu a, an chhe lo kher mai. Min hmuh chuan mak ti hmel an pu deuh a, an demawm lem loh. Mi hausa tam tak kalkhawm na a min hmuh ve chu an beisei loh ber te zinga mi a ni ngei ang. U Marti sawmna ka lo hnar kher bawk nen, Zonunmawia nen min la hmu dun zui a. 

Chaw kan dawh lai chuan a fanu a pawm a, a hnung chiahah kei ka ding a, ka hnungah U Tluangtea a ding ve bawk. Mi aia kan tlai deuh avangin chaw dawh an tam tawh lova a tih chi phian mai. Vengchhung mite lah chuan min han en duh khawp a, tuman ka kal ve an beisei lovang. Ka inkhawm ngai bawk si lo, mahse mihring chuan rindan kan nei ţheuh a, ka rindan a danglam bik avanga ka inkhawm lo hi chu dem ngawt theih ka ni lo. 

"Apa, a thau ka duh lo. Hei pawh ka duh lo, apa Rema hnar a ang emai" a fanu in a tih lang lang chuan min rawn enin zah hmel deuhin a nui a, ka nuih ţhat ngam loh laiin U Tluangtea erawh a nui huk huk mai. 

"I pa Rema a awm hnai a nia aw" a lo ti zauh a, U Tluangtea kawhna lam ka en takah chuan ama u ngei, kan naupanlai aţanga zu in ngar ngar tawh an sawina a ni tih ka hre ve chauh. 

"Kan duhsak cheu a, mawi leh mawi lo pawh sawi lovin a kawchhung kan lo dah cheu a nih hi" tih pahin fatu zinga an hmelhriat ţha ni awm takin Zonunmawia fanu Sangsangi thlengah berkher vawksa thithun a dah a, a pa Rema a au ruai mai. 

"Bengchheng suh an en ţhup che a nia. I awm ţhat duh loh chuan kan kal tawh lo ang" ti ve bawk mah se a fanu chu a khap dai thei chuang lo. A thleng hial paih a tum takah chuan amah zawkin a thleng min rawn pe vatin a fanu thleng chu a keng zui a, "Eng nge Bawihte min va ko nasa ve" U Rema chuan rawn tiin kan boruak chu hrethiam thei hmel pawh a pu tawh lo. Chaw dawh mang an awm tawh lo hlauh zawk a, la intlar put ila chu a hrehawm zual duh viau ang. 

"Hei hi apa Rem i hnar hi ka duh lo" tih pahin Sangsangi chuan a thithun bawk chu a kawk a kawk a, Zonunmawia meuh pawh insum thei lovin a nui chhuak ta hawk hawk a, U Rema lah chuti bawk. 

"Ei rawh Bawihte, kan inrawlh ve vak a mawi lo chung chungin ka lo dahţhat tir a nih hi. Ka hnar sial hi ka lo khilai ang che, hmawm hmak rawh" a tih phei chuan "Aih..a khawngaihthlak" tih leh ţah a rual ta mai a, a aw a lian em em mai lehnghal. U Rema hnar chu a hmu ve awm reng sia, kum5 lai a ni tawh lehnghal, mak ka ti lek lek a ni. 

"Kha kha ni mai..Tluangtea leh Rema zek zawk hi alawm. Rema hnar ţawk vang maiin a naupanlai aţangin Rema hnar in tia, in hrilh dik loh avangin tun thlengin a la hlau a nih hi. Zonunmawia pawh naupang thlengah sa kawchhung dah ve zel a ngai hleinem. Dawh vat vat ru midang inti tlai vek. Tluangtea te in lama chaw ei kan nih loh hi, inthlahrung ve ta che u" tih hlak hlak pahin Kimkimin a fanu a rawn la a, a mi hauh te lah an naupangchhe zawk zawk tawh bawk si lo, thinrim ai chuan nuihzat lamah a kal zawk. 

Sa kawchhung min lo dah tu chu U Rema nen an inbe ru sar sar a, U Tluangtea chu an melh deuh reng bawk a, eng emaw an inpe dawn a nih ka ring. A thleng a lak let leh hnuah chaw kan dawh zawm a, hun kan hmang rei kher mai. Kan hnunglama ding te pawhin kan din lohna lam aţangin an dawh a, an kal kiang duak tawh. 

Chaw eikhamah chuan an meizukna bulah ka ding ve reng a, Sangsangi chu a nu bulah a la awm. Tluangtea te in lama phei an tih chuan "Keichu ka haw tlang ang" ka ti vat a, mahse U Tluangtea chuan a lo remti awzawng lo. Zu an in ve loh avang erawh chuan ka hlau lutuk bik lo a, an in a kal veleh zel chu ka hreh viau mai thung.

Sangsangi an koh let hnuah U Tluangtea motor ah kan ţhu lut a, a hmaah tumah an ţhu lo nain a hnungah an pafa chuan an ţhu ve a, a fanu chu a lam hawiin a malchungah a ţhuttir a, "Apa Rema hnar chu i ei lui thei meuh nange?" tiin a fiam zui a, U Tluangtea te chhung nen hi chuan an inpawh ngang aniang Kimkimi pawn a vin hlak hlak ngam tlat. 

"Apa, haw tawh ang. Apiin min ngai tawh ang" tih pahin a pa awmah chuan a bei a, keichu min lo en kiau a, a lawmawmin a ţawng pawh a fel fai khawp mai. 

"Kan haw thei ţep tawh. I pa Tluangtea te inah motor ka dah a, kan la anga kan haw daih dawn nia. I pa Rema a â si, a hnar te a khilai mai mai che a" a fanu hnung zawng chul hliau hliau pah a a tih chuan U Tluangte bawk chu a nui leh hawk hawk a, kei aiin an upa daih na a ka bula awm dan tawk an thiam khawp mai. Hrehawm ka ti hauh lo. 

U Tluangtea chhungte chuan min lo lawmin a nu phei chu ka u sunday school kal ve laia an leader ţhin a ni. 

"Lo leng ziah rawh aw..hei keini pawh kan thlenna a la rei lo a, fridge ah khan grape silfai sa te pawh a awm lo ei rawh u" a ti seuh seuh a, inthlak turin min luhsan zui nghal a. 

Grape te kan ei hnu chuan U Tluangtea pindanah kan chho a, mi an tam tawh lo bawk nen rin aiin nuam ka ti zek mai. Zaithiam zinga ka duh ber min zawh chuan Dolly Parton ka lo ti vat a, a hla ngei mai chu min play sak a, Sangsangi nin deuh hnuah U Tluangtea chuan "Lo awm lawk ru. Dawrah ka kalpui anga ka lo let lehnghal ang" a ti ta mai a, Zonunmawia nen chiaha awm chu ka hreh ngang mai. 

Kal suh ti a pawh beh ţang ţang chi a ni si lo a, Sangsangi lah a phur bawk si, tlanchhuah daih a mawi bawk si lo, tim ru deuh chungin ka en liam a, Zonunmawia nen chiaha kan awm chu boruak a uap nghal churh maiin ka hria. 

"Ka thu a sawm che kan ni lo a nia" tiin a insawithiam nghal a, a kut a inbeng khalhin khumah a ţhu awn diai a, khum bula computer dawhkan hmaah kei ka ţhu ve thung a, kan zai play a ring vak bawk si lo nen, a thusawi chu ka hrechiang thei khawp mai. 

"U Tluangtea remruatna vek aniang. Pa phawk a nia, a zia hi chu ka hrechiang alawm. Pawi ka ti em em chuang lo, ka rin ai daihin a nuam a" ti a phur deuha ka hrilh ve laite chuan hmuhnawm tih hmel takin min lo en a, chu chuan min ti leh zam leh der tawh. 

Eng eng emaw sawia kan ti ti luam hnuah pawh U Tluangtea te chu an lo la let lova, kawngkhar ka melh chhen tawh mai. Zonunmawia chu khum tlangah ţhuin ka ţhutna chu a pawt hnai ve nghal a, ţhutthleng ke lir thei kher kher a ka thu chu a pawi tak tak a ni. 

"I la naupang mah mah deuh chu a ni. Mahse min duh tho em?" amah zawk chuan a ti daih a, ka naupang chung pawha min duh tho zia a sawi dawn emaw tih nak laiin!

A bula ka awm chang apiang hian ka buai ziah a, boruak eng emaw riau a awm ţhin. Tunah phei chuan ka kut a vuan a, ka mitah a en ran bawk a, ka lungphu hi thunun hleihtheih a ni lo. Ka duh ruk em em nen hetianga inhnaih a kan awm theih ka ring ngai lo. 

A hmuiin ka hmui a sik chiah phei chuan ka lungphu ngei rawn rang nghal dawt dawt chu ka hre thei a, a hmui zawk a chet lai te chuan chhan let ngaihna ka hre lo. Ka hriat zawng chu ka mipa duh em emin min fawp tih zawng a ni mai. 

A inlak hran chuan thil tak takin min dengin ka zak lutuk chu chet ngaihna pawh ka hre lo. Ka sa pup pup a, lum ka tiin U Tluangtea pindan chhung chu a uap lehzual a, kawngkhar rik ruala "Ka zun a chhuak" ka tih chuan ngawi rengin zunin lam min kawhhmuh a, tlang lam lawka zunin lam pan chuan ka tlan nghal chawn chawn mai. 

A chhung ka luh rual chuan ka thaw ham ham a, a thusawi mek ngaithei lova ka ner nang nang laiin min fawp thut kha a nia, ka lo haw bik bawk si lo. A ruk tak chuan ka inthiam lo a, ka bialpa phatsan ah ka inngai a ni. Ka kekawr iptea ka phone ah lai chu phawrhin ka hmet eng vat a, Zualtea missed call a lo tam tawh mai.

Ka ngaihtuah ve deuh chuan ka kut lehlam tih huh pahin ka call let a, phone a rawn lak ruala "Kan ba ka rul zo vek tawh" a rawn tih chuan chhan let mai nachang pawh ka hre lo. 

"I hrethei em? Khawiah nge i awm? Ka la rawn chiah lo a, nichin khan kan inpe fel chiah. Zanah a lo bia ang che" amah bawk chuan a rawn ti leh a, "Khawia pawisa in nge i rulh?" tih bak ka sawi thei lo. 

"Nakinah ka hrilh ang che" a ti a, kan inbiakna chu a ti tawp zui nghal a, tunah meuh chuan ka inthiam lohna zawng zawng kha mahni inhuatna leh lepchiah intihna in a thlak thleng vek tawh a, ka bialpa in a ma ba pawh ni lo rulh nan a theihtawp a chhuah laiin keichuan mipa dang ka lo infawh tir a, ka ti dik lo takzet a ni. 

CONT..