DEAR DIARY-11

DEAR DIARY-11

Zunin aţanga ka chhuah rual chuan "Haw mai ka duh" ka ti nghal thawr a, Zualtea lo thlen hmaa ka thlen hman loh chuan min lo rinhlelh palh ka hlau ve a ni. 

"Sangsangi pawn haw a ngen reng tawh mai. Ti rawh u ka thlah ang che u" U Tluangtea chuan a lo ti ve nghal a, eng chiah nge an lo sawi dun hre lo mah ila ngaih a ţha duh lo khawp mai. Zonunmawia phei chu en pawh ka en duh lo, ka va haw ta viau tihna a ni lo a, keimah hi ka inzahpui a, kan awmdan avang khan ka zak a ni ber. 

"Keichu motor kher a ngai lo. A hla chuang lo a, kein ka haw thei mai ang" ka tih rualin Zonunmawia chuan "Lut rawh ka thlah ang che" a lo ti nghat a, a hma lama ka chuan hreh a ring ve deuh nge seat hnunglam kawngkhar min hawn sak zui zat bawk.

Hreh viau mah ila ka ţhu lut ve ta nge nge a, Sangsangi chu a hmaah ţhuin hla mak deuh a sa a, kei ve chuan zam luatah ka kutţang ka khal neuh neuh a, a fanu hriatah chuan thil thleng kha a sawichhuah loh ka beisei tlat a ni. 

"Inchhung thlenga thlah i ngai em?" a tih chuan lu ka thing a, hma lam darthlalang aţangin min en reng tho a, chhang lo mah ila ka chezia a hmu thei vek tho ang. 

"Remruat, lo leng ziah rawh aw. I kawm rual pawh kan nei a nia, a lo la haw lo mai mai a nih kha. Inkhawm puiah te lo sawm ţhin rawh" tiin U Tluangtea chuan min thlah a, Kimkimi leh U Marti te ţhiandun kha chu ka hmu leh tawh lo. 

Motor a tlan chhuah rualin Sangsangi chu seat nghenchhan bawh meuhin ka lam a lo hawi a, a mitmeng chu a pa chiah chiah a ni. Thil dangah erawh a nu a chhun zawk an ti vek ang.

"A u, kan inah i lo haw ve dawn mi?" a tih chuan "Dawn lo e..kan inah" ka lo ti a, biak zawm vak ngaihna ka hre lo. Min u thlap reuh lehnghal a. 

"A u hi kan hruai haw ve daih mai dawn mi?" ti a Zonunmawia a lo fiamthu ve chuan rum deuhin ka melh a, min hmu thei chuang lem hlei lova. 

"Ţhu ţha tawh rawh le" tih paha a fanu ban a vawn chuan "Seat belh hren tir tlat zel rawh. A him bik alawm" ka lo ti ve zauh a. 

"Nia..a pawimawh nen hian mi tam zawk hi chuan kan ngaipawimawh vak lem lo va. Keipawh a tel ang" a ti a, a nuihza aw mai mai te chu keichuan ngaihthlak nuam ka lo ti viau zel. 

Kan inluahna zawna Zualtea ka hmuh avang chuan "Kan in aţanga in lina bawr vel kha i hria tiraw? Khami bula dawr bulah khan ka lo chhuk ang aw. Ka muhil thei ngai lo a, zana eitur thil lei ka duh" ka ti vat vat a, a din ka hlau lutuk chu nge a darah te ka va khawih ta in ka hria. 

Min chhang lem lovin Zualtea chu a tlan pel a, ka khawngaih angreng. Dawr kawta ka chhuk dawn chuan "Naktukah ka rawn hmu ang che" a ti hram a, zanin a kan thil tih khan min la ti zakin lokal rih lo tawp mah se pawi tihna ka nei hran lo. 

Dawr kawta rei mawi tawk ka awm hnuah kan in lam panin ka phei a, min hmuh ruala "Khawiah nge i kal daih?" a lo tih chuan "Ka nu i zawt lo mi?" ka ti let a.

"A hre bik lo alawm. Khawiah nge i kal?" khauh zet hian a ti leh a, a zawna kan tlan lai te khan min hmu miah lo tihna a ni mai. 

"U Tluangtea a lokal a, inneihna lama chaw ei turin min hruai lui tlat a" tiin thudik tak ka hrilh a, min rinhlelh hmel deuh nain engmah a sawi zui lo. 

"Engtin nge pawisa chu i neih theih a?" ka ti ve thung a, varanda a êng an chhitin a chhun phak lohna lamah min kai phei a, kan din fel ruala "Bike ka hralh" a tih chuan ka phu deuh uihin ka hria. 

"Engmaw?" ka ti nawn leh ngat a, "Bike ka hralh" a lo tih nawn leh chuan za lo deuhin ka nui hul hak mai. 

"I thil neih hralh turin ka ti che em ni? Zawi zawiin kan rul anga kan rulh thei ngang lo a nih leh ngaihdam kan dil mai dawn alawm" ka tih lai chuan min lo pawt chatin "A hlui tawh em kha. Ka lo haw apianga ka hawl chhuah a nia, ka awm loh hlanin ka nu'n ka cousin te a lo hman tir reng bawk a, kan leina a rei tawh lutuk. Ka hralh to thei lo reng alawm" inven tum tak hian a ti a, chupawh nise bike em hralh chu a ti mah mah deuh chu a ni. 

"A hlui loh kha..chhiat pawh a la chhe hleinem" ka tih chuan "Chhia e..a leitu pawh khan rim deuha a hman dawn chuan workshop a a dah hmasak phawt a ngai maithei. Bike ah i chuang ţhang lo a a hlui leh hlui loh i hre lo a nih kha. Nula tam tak chu an chuang duh teuh lo" min ti let zek a, a hralhna zat ka zawh chuan pawisa a la ban thu chauh min hrilh a, a zat tak min hrilh duh lo. 

"Hlui deuh pawh nise bike ve lai chu to deuh a hralh tur che alawm" ka la ti ţalh a, "Siam ngai a tam dawn a, a part thlak ngai te a awm ang. Ka hralh tlawm lutuk hran lo a, a to vak lo bawk" a ti leh ringawt a, a nu'n a hriatchhuah hun chuan a sa viau ang le. 

"I nute hnenah engtin nge i sawi dawn?" ka tih leh chuan "Ka hralh ka ti mai ang" a ti sam et a,  ka kutphah a eng emaw min rawn hmeh bel chu hmu chiang lo mah ila ka phone hlui kha a ni tih ka hria. 

"Kawl leh tawh rawh. Keichuan mamawhna ka nei ve tawh lo. Lo ngaichang deuh reng la, rul fel tawh mah ila nangmah a be duh che" a ti a, kal mai a tum chu lo phallo in "Chaw i ei tawh em?" ka ti hmasa a, kan veng kawna a ţhianpa te ina a ei thu a sawi chuan "Lo chhuk rawh. Thingpui ka lo lum ang che" ka ti a, min hnial lem lo. 

Ka nu chu a lo mu tawh a, ka pa ka hmu lo thung. A la haw lo a ni phawt ang. Thawmhnaw ţha ka hak chuan loh avangin inthlak lem loin Zualtea bulah chuan ka ţhu a, a phone la chhuakin a en thuak hnuah a malchungah dahin a tuai let a tuai let a, a zam ve deuh niin ka hria. 

"I tana pawi tur chu tih kher a ngai hleinem. I nuten an hau che ang a, bike pawh i nei tawh dawn lo a sin. Lo hlui deuh tawh pawh nise vei vahna tur lirthei neih hrim hrim kha a ţha ve a" ka ti leh tawh a, amah ai mahin ka lo hlauthawng zawk a ni. 

"Ka sawifel mai ang lo hlauthawng suh. Hlawh ka neih hunah phei chuan duh duh huna hralh turin bike pathum vel kan lei dawn nia" a ti vel a, ka hlauh loh phah chuang lo. 

"I â emai..thutlukna i siam hma khan min hrilh hmasa la ţha tur. Puk tur te pawh kan zawng mai tur a nia" ka tih chuan "Rulh a ngai leh tho dawn. Damchhungin ba kan rul mai tur a sin. A vaia pek hmak a ţha ber, min lo hau pawh nise a rei berah darkhat khat bak min hau peih nang" a ti mai a, zial a ţan zui zat bawk a, a vei loh hmel bik hle. 

"Thingpui ka va lum ang" ti a ka tho chu ka mawngah a lo beng a, phawk hra a ka hawi let chuan hre lo ang hmakin a awm a, nui tet tet chungin choka ah ka lut a. 

Dawr a kan kal dun zeuh zeuh avang leh kan awmdan avang te pawh aniang vengchhungah hian kan chanchin sawi peih deuh deuh an awm tawh a, chubakah Zualtea hian vawikhat chu uangthuang deuhin status a lo nei a, kţp ah a lo inhmang ve a, a phone number nei an lo awm nual bawk si nen khami hnu phei kha chuan khawlaia min chhaih duh tawk te an awm pheuh pheuh tawh a, ţhenawmte lahin kan ina a lokal ngun zia an sawi nasain dawra ka kal apiang hian kan chanchin miin an sawi dan min hrilh duh tawk an lo awm zel a, ka ngaithla duh lo ti mah ila min hrilh tho ang tih vel a ni. Tlangval lehkhathiam leh veng va, hmelchhe lo leh khawsa thei ve tak an lo ni bawk nen, kan pahnih a kan han inzui mai hi tam tak chuan mak an ti a ni ber. Mahse kan ţhenawm chiaha dawr nei tu Nu Dini hian min lo chhanin ka hmelţhat zia min hrilh ţhin a, eng he hu ah ka ngai lem lo. Amaherawhchu, miin chhe deuh deuh a min sawi hian ngaia neih a har khawp mai. 

"I nuten an tih dan che min hrilh ve vek rawh aw. A nih loh chuan ka rilru a nuam dawn miah lo a nia" thingpui pek pah hian ka ti a, "Min hau ang a chuzawng chu a ni mai. Tih dan dang vak an hre dawn lo" a ti liam satliah a, engah vak a ngai lo niin a lang. 

A nute chuan an hauh ngei thu min hrilh a, inkhawm tur baka chhuah an phal loh thu min hrilh pahin thunun an tum lutuk chu a ngaihdan a nih vak loh thu a sawi tel a, mahse an thu thuin a awm tho si. Ber thla kan chuang kai a, ni lah chu a ral zung zung a, Zualtea a lo len khat sawt viau laiin Zonunmawia nen erawh kan inpawh sawtin phone number thlengin kan inpe tawn tawh a ni. 

Hunpui pawh a hnai ve zel a, kan inneitute ina awm, min ngaina vak ngai lo tu Rengi nen pawh kan inngaina ve tawhin thil tam tak kan sawi dun ţhin a, "Zualtea chu..thu a awih loh chuan nangmahni hian in tawrh a hlau a, anu'n a hnawhchhuah cheu a hlau ţhin a" a ti fo a, inkhawm puiah min sawm awl lo bawk. 

Tlai khat dawr aţanga ka haw chu kawtah min lo chang a, bike a hralh hnu kha chuan ka kal tur min thlir liam tawh ngai lo va, ka haw tur pawh min rawn hruai chu sawi loh, an kawtah pawh a lo ding lang tawh ngai lo kha a nia. 

"Eng nge min lo hawn?" a lo ti fiamthu a, ani te in lamah a awm phei a, thla khat dawn kan inhmu tawh lo a ni. Ka ngaihbel nge a cher riauin ka hria a, a hmel hmuh a nuam fahran lo.

"I va cher ve" ka ti nghal thawr a, nui hawk chung hian min kuah a, "Ka ngai che a, chuvang chu aniang" a ti vel a, ka hmin thei chuang lo.

"Nang hi zu i in nasa a ni lo maw?" ka ti a, ka dara nghawk pahin ka thlek ha a, a hmel hi a dik lo reng reng. 

"In nasa lo e...min lo ngai ve em?" a ti daih a, keipawh chuan zak ru deuh tak hian ka ngaih ve thu ka lo hrilh a, Zualtea a awm loh chuan a ruak huai a ni ber. Rengi thu min hrilh kha hre reng mah ila ka awih lem lo a, anuten min hnawhchhuah a hlauh vanga an thu thu a awm pawh nise Rengi a hriattir kher ka ring lo. 

"Ngai tho che mah ila zu in vak vak ai chuan lehkha zir leh tawh zawk rawh. I tan a ţha zawk daih a nia aw" ka ti a, bike pawh a la nei leh lova, a nu leh pate hian hna ţha tak an nei ve ve chung hian mi inren chi an nia, a pa'n 'in kan sa bawk si. Bike lei lehna tur pawisa kan nei rih lo' a tih sak a ni awm e. 

"Hna ka zawng ang ka ti tak nain reilote ka zir leh ang a, hna ţha deuh hlek ka beisei ve thei ang a. Min lo nghak peih angem?" a tih lai mekin a nu a rawn chhuak a, lehkha ip sem tur ni awm tak a keng bawk. 

"I ni te ina phei i tum tawh lo em ni?" tiin Zualtea zawk chu a rawn bia a, lai deuhin ka lo ding ve ringawt a, boruak a awm deuh hnu hian amah hi ka zah zo vek tawh. 

"Phei tawh lo ang. Hetah ka awm veleh tawh dawn" a tih lai te chuan a nu hmel chu a hmuhnawm lem loh khawp mai. 

"I awm dawn a nih chuan lenchhuah reng ka remti dawn lo a nia. Inchhungah lut a, Rengi va pui rawh" thupe aw tak hian a ti a, keichu awm ve lo ang hmakah min ngai niin ka hria. 

A nu kalsawn veleh "Ka thlah thla ang che" tih pahin min kuah leh a, kan in lam pan a min chhukthlak pui lai te chuan engmah ka sawi ve tawh lo. 

Kan in lah chu tala in a lo la inkalh a, inchhung kan luh veleh ka bag dahin cooker ka la nghal a, chaw tal chhum hma loh chuan chaw kan ei tlai lutuk ang. Tui lah chu a herh haw theih leh tawh lo lehnghal a, tunlai chu tui kan haw khat a, kan ren viau chung pawhin kan nghei hman leh nge nge ţhin. 

"A va ninawm tak" ti a ka phun hlak lai chuan "Khawi bucket kha lo la rawh pawna mi saw ka va khai ang" a lo ti a, hnial ve mah ila hnehna ka chang leh chuang lo. Bucket khaia pawnlam a pan chu ka thlir reng a, a ruk tak chuan ka khawngaih a, hrilhfiah dan ka thiam si lo a ni. Min duh takzet tu te hi an rilru ti na miah lo a hnar dan a awm tlat lo a ni. 

Chaw ka chhuan zawh hnuah thingpui ka lum leh a, dawhkan bula a ţhu chu ka thil chhuan vil pahin ka melh ran a, "Mipa dang biak lo nei ta ila engtin nge i tih ang?" fiamthu deuha ka tih chuan "Engtin mah" a ti sam et a, ka hrilhhai letling zawk alawm le. 

"Engtin mah i ti miah lo ang maw?" ka ti ha a, "Ka insualpui dawn mi?" tiin nui hawk chungin min zawt let a, "Tunlaiah mi an insual mai mai duh tawh hleinem. Midang i biak leh biak loh chu i thu a nia, ka inrawlh lo ang" a ti hmak a, phone dah mai mai ka ching ta miah lo te chu a hriatthiam ve vek ka ring. 

"Min ring em?" ka tih chuan "Ring ţhin" a ti leh tawp a, ngawih mai a ţha zawk tih hre tho mah ila hmeichhia tih takah "Tunah min ring tawh lo tihna mi?" ka ti leh ţalh a. 

"Rin reng che chu ka la duh alawm" a ti ban charh a, ţhutthleng nghenchhan a ngheng a, kut kuangkuah pahin gas bula ka ding chu min rawn en a, "Ka bula awm reng chung hian midang daih i ngaihtuah ţhin. A dik em?" zawi si, chang zet si hian a ti a, ka dang der mai. 

"I thingpui chhuan a so" a tih leh takah chuan inher vatin thingpui chu ka siam a, ka lo sawichhuak kher kher kha ka inchhir ram ram mai. 

"Ka nu'n in hi kan chei ţha dawn a, a dang melh rawh u a ti em?" thingpui ka pek laia a lo tih chuan "Chu te chu a sawina a rei tawh. Hmanah tawh khan a nia, kan inkawp tih an hriat hlim khan" ka ti a, ţhutthleng pawt tawlhin a bulah chuan dim daiin ka ţhu ve a, inţhen a rawt ka hlau khawp mai. Ka bialpa a nih na laiah hian min kalsan hlen hlauhna ka nei ve tho a, ka tana engkim tih huam awmchhun a nih vang te pawh a ni mahna le. 

"In luah hma lawk khan an chei ţha a, chei ţhat a ngai tawh rih lo ang. Chutianga a hrilh chhan che chu i hria em?" a tih chuan "Eng nge maw i hriat le?" ka lo ti vak a, a ţawng fek fek reng mai, hetiang hian ţum dangah a awm ngai lo.

"Midang duh i nei tiraw?" rum zeta a tih chuan ka meng khup nghal zal zal mai awm e. 

"I nu hnathawhna te, pathlawi fa nei tawh, professor ni bawk" a tih chuan rilruah Rengi a lo lang zawk a, "Rengi min dawp tir a ni maw? Hman aţang tawh khan in lo inthurual tihna a ni em?" lungawi lo zet hian ka ti a, za lo fein a lo ţhen suk a, a ngeiawm lek lek a ni.

"Ring suh a ţawngthei ka tih ziah kha. Mi ţha lo ho hian mi hneh theihna riau an nei a, ţhat rawn chhuah huam mah se engmah sawipui suh ka tih kha" a ti leh ang lawi a, "Ka sawi pui pawh a ni hran lo" ka ti a, sawifiah vak ngaihna ka hre lo. Vawikhat kan awmdun ţumin min rawn bia a, tu nge a nih min zawhin ka nu hnathawhna te an nih thu ka hrilh a, a hnathawh thlengin min zawt a, keichuan a hranpa a han sawipui em em ka nei lo. 

"A lokal leh chuan Zualtean kawm che a phal tawh lo lo ti ang che" a ti hmuk a, "Engati nge?" ka ti thei ţawk a, amah tak pawh chu ka en ţha ngam lo a ni der tawh.

"Rengi hi ka nu tih lawm loh hlau reng renga khawsa ţhin a nih hi. Haw tir dan ka ngaihtuah mek a, chumi hma chu hel dan lo zawng rawh. I sawi loh pawh i sawi ang chiahin a sawi thiam a nia" tiin min han sawi ţhaih leh rih ţhin, kan buai nuai nuai khawp mai. 

"Min ring tihna tiraw?" fiah nan a ka lo tih leh chuan "Rin leh che ka tum mek" tih chiahin min chhang leh a, a hma ang khan min ring tawh lo tih ka hrethiam ve nghal mai. A hmingin ka bialpa a la nia, ngaihzawng dang ka neih loh zia a hrechiang bawk a, chuvang chauh chuan ka bulah a la awm a nih ka ring. 

Min rawn awm hnaihin ka biang a dawm a, a mitkhur tla deuh dâk te chu ka lo khawngaih ru hle. Ka hmuia duhthaw zeta min fawh ngawng ngawng chuan ka thiam dan tawkin ka lo chhang let ve a, a landanah ringawt pawh keimah leh kan inzawmna avang hian buaina eng emaw tak a tawk ve a ni tih a hmuh theih a, mipa dang ka ngaihven tih hre ru reng chung pawn ka bulah awmin min la ţanpui zel tho a, min duh hneh viau lo se la chu min kalsan na a rei tawh ang. 

Ka nu rawn haw pawn "Zualte, i va cher em em ve. Reilote chiah i awm bo a, khati taka cher tur em ni? Thil ei ţeuh ţeuh rawh" a ti bawrh bawrh a, zep ve ţang ţang mah se keichuan a ţhiante ho nen zu an tlan a nih ka ring ber. 

"Ka thau luah ţep tawh ang. I chau em? I va tlai ve a" a lo ti ve a, ka nu thil khai te chu laksakin dawhkanah a dah a, kan inkawp rei ve tawh bawk a kan inah na na na hi chuan a tlangnel tawh khawp mai.

"Pangpar khawih pahin kan lo ti ti tui lutuk a, ka tlai duai phah a nih hi. Chaw lo ei ve la, rawtuai rep bawl kha i duh a ni lawm ni? Hei ka lo hawn a kan bawl dawn nia" ka nu'n a tih leh zung zung takah chuan Zualtea pawh a nui ve hawk hawk a, "Nidangah ka lo ei dawn nia. Ka han chho phawt ange" tih paha ka lama ban a rawn phar chhuah chuan ka lo hnaih vat a, min lo kuah nghalin kan in aţang chuan kan inzui chhuak a, pawn lam kan la ti eng lo bawk nen step pawh chu a la thim khup mai. 

"Zanah ka lo chhuk ang" tih sup pahin min kuah nghet sauh a, ka chalah a fawp zui vang vang a, a kawnga kuah bet tlat chung hian a kawr ka lo ţham tel pah ve a, mipa dang vei ngawih ngawih chu ka nei teh meuh mai. Zonunmawia hi ka hnaih tur a ni lo ti ve ţhin mah ila min hip ber tu a ni. Mahse, Zualtea hi ka ţhatna tur chauh duh tu awmchhun a ni. 

Chaw eikham a pindan a ka luh chuan phone ka en ve mial a, professor nen phone number kan han inpe tawn chiah chu phone ngaihven ngai hlei lovin ka en ka en ve tawh mai. 

'Chaw i ei tawh em?' tiin message min rawn thawn a, ho te te min lo thawn chang a ngahin ka nuihpui nasa ve viau ţhin. 

'Aw ei tawh e' tih chiahin ka chhang let a, 'I puar em?' a rawn tih leh chuan zawitein ka nui a, a message mai mai pawh ka hlimpui em em chu a ni sia, ka inkhawngaih zawk. 

'Puar tehreng mai' ka tih chuan 'Hei Sangsangi khua a sik ser ser reng a, kan mu der tawh' a rawn ti a, ka lo hlauthawng ve em em ringawt a. 

'A va zia lo ve. Damdawiinah kal ula an lo chiu ang a' tiin thurawn ka pe ve ngei a, 'Damdawi a ei tawh a, han ngaichang phawt ila' a rawn tih chuan 'Aw le' ka ti mai a, phone ka hmet ve ta mual mual mai hi keimah ber hian inhmeh lo ka inti a, Rintluangi phei chuan hria se fiamthu nan min hmang ngei ngei ang. 

A mu ve ta mai emaw ka tih laiin thlalak a lo thawn a, ka'n en chiah chu mit laksawn a har ngang mai. Sangsangi tê chuan a pa chu a kuah bet ve ţai a, mit a chhing tlat na a a muhil nge muhil lo ka hre thei lo. Zonunmawia hmel chu a lang ve chiah lo a, chuti chung chuan a hmel ka lo mitthla thei tho a, ka bulah awm lo mah se min biak phawt chuan ka tlei tawk em em a, min ti kim hliah hliah a ni ber. 

'A khawngaihthlak reuh e' ti a ka thawn hnu chuan a reh leh vang vang a, khum aţanga thawh ka tum uaih tawh chu ka phone bawk chuan min pawt ţhu lehin 'A dam leh mai ang. Eng nge i an zawk a?' a rawn ti a, ka chhan let leh hmain Zualtea thawm a awm a, rang deuhin pindan aţang chuan ka tlanchhuak a, phone ka kengchhuak lo thung. 

Chhuak tur ni awm taka a lo inthuam thlap chu thlek ha pahin "Khawiah nge i kal dawn?" ka ti nghal thawr a, "Ka pu nikhaw hre loin a tlu thut a, damdawiinah ka kal dawn a nih hi. Lokal ve la" a tih chuan ka nu ka melh a, ka phur tehchiam lo. 

"Va kal pui la rei awm a ngai chuang nang. Zualtea pawhin a ţawiawm zel che alawm. Kalpui ve rawh" ka nu'n a tih takah chuan ka insiam a, hreh deuh chungin ka zui chhuak a. 

A ţhianpa bike in kan kal a, an chhungte pawh an lo tam tawhin a pa pa zawk a ni tih damdawiin kan thlen hnuah ka hre chiah bawk. Kil khatah ţhuin zahzelah phone ka khawih a, Zonunmawia nen pawh kan inbe tawh lo. An muhil ta a nih ka ring. 

A chhungten min endan ka hrethiam thawkhat tawh bawk a kan haw lam chuan ka ngui nghiai a, nuih luih a titi bawrh bawrh chu har tak a ni tawh. A cousin te ni awm tak lah khan ka chhip aţanga ke ler thleng an en dik thlap a, inhrilhru zuiin an nui tet tet hlawm a, damlo ngaihvena damdawiin a kal pawh an ang lo zawk hial a ni. 

Bike aţanga ka chhuk ruala haw nghal mai ka tum chu "I nuam lo mi?" a lo ti a, min endan kha ka phu tawk chiah a, vui thei ka ni lo tih hre tho mah ila "In chhungte tamna hmunah chuan min hruai tawh suh. Min sawm leh mahla ka lokal tawh dawn lo" ka ti a, ka chhuk thla zui hmawk hmawk a, puitling hoin min endan lah kha sawichhawn leh tlak pawh a ni lo. An fate chuan anmahni aţang khan thil ţha an zir chhuak lo tawp ang. 

Hunpui kan hman zawh chuan dawr pawh kan kal pangngai leh tawh a, inngaizawng ve lem chu awmdun tam awm tak kan nih laiin a pu vangin an buai a, kei lah ka kal duh tawh der si lo, inmil viau ţhin si kha thu inhmuh loh leh inhnial bap bap chang kan nei fo tawh a, chuti chung chuan kan la inkawp ve zel a, a nu pawh buai viau lo se chu min khak leh tawh ang ka ring. 

"I hmang nuam em?" rawn ti tu chu ka lo en ran a, tun ang hunah hian hmuh ka inring hauh lo. 

"Aw nuam a ni mai. I hmang nuam zawk em?" ka tih chuan min nuih suk pahin a bu nghat a, a hmel hmuh a nuam khawp mai. 

"In nu nen in hmang dun em?" ti a ka lo fiam chuan "Hmang dun lo e" a ti a, a nuih a za khawp mai. 

Ka thil khawih lai chu lo khawih vein "Naktuk hi ka fanu piancham a nia" a ti a, kan kut a insik te chuan ka mur deuh tlatin ka hria a, kan inhmuh lohna a rei ve tawh bawk nen, ka awmdan a danglam vek thei hial mai. 

"Chuan?" ka lo ti ha a, "Lokal ve la" a tih hnua ka lo nui hak chu min lo enin a mithmul a kan uk a, "I mawl em ni?" ka ti hluai a, a ban bulah ka beng pah kher bawk. 

"Mawl nang" a ti thum dut a, a nui bawk si lo nen, naupang titau te pawh a ang alawm le.

"Eng nge ka lo tih ve anga?" ka ti a, ka nui hmel ka thup hleithei bawk si lo nen keimah hi ka mawl hmel zawk maithei a ni. 

"I lokal ve ang. Naupang chiah kan sawm a" ka tih lai chuan "Naupangah min chhiar tel tihna mi?" ka ti hmanhmawh a, a ner sawk mai. 

"Ka sawi zawh hma hmain min lo chhang zung zung lo la. Naupang chiah kan sawm a, lokal ve rawh hrehawm i ti lo ang" a ti a, keipawh chu ka nui ta bik lo. 

"Kimkimi a lokal ve dawn em?" ti a ka zawh chuan mak a tih hmel deuh a, mahse insiamţha leh vatin "Kal kher lo ang" zawi deuh sup hian a ti a, sawi nuam a tih hmel chiah lo bawk. 

"Ngatinge? A fanu tho a nia" ka tih chuan "Tih tur a nei hleinem" tih zawngin min chhang a, ning hmel a pu lo bawk a tiin "I duh tawh lo mi?" ka ti leh khawl a, "A ni mai ang chu" a ti a, min chhang tawi thei khawp mai. 

"A la duh reng maithei che a" ka ti a, hauh inpeih rana ka awm lai chuan nuih pahin "Min duh lo hmasa alawm" a ti leh mai a, bialpa nei lo phei ila chu hetianga kan titi ve thei hi nuam ka ti viau ang. Mahse bialpa ka nei tlat a, kam tu ka nei ran a, chuvang chuan U Tluangtea pindan a min fawh pawh kha thil thleng palh a nih kha tiin sawichhuah ka duh tawh loh thu ka hrilh ta a nih kha. 

"Ngati nge keimah kher min sawm a?" ka tih lai meka customer lo phei chu enin "A va hun lo tak" ka ti sap a, nuih hawk pahin a awm sawn a, an kalsawn hnuah amah bawk chuan min rawn hnaih leh a. 

"Ka sawm chak che a" a tih chuan ka melh zawk a, kan mit a intawn chat avang chuan rang deuhin mit ka la sawn leh a, "Bialnu i nei em?" ka ti leh phawng a, "Nei lo hlauh" a ti a, a hmel hmu kher lo mah ila a ţawng pah chuan a nui tel tih ka hria. 

"Lokal ve rawh aw" amah zawkin a tih leh chuan "Aa...dawr kal a ngai sia, ka chawl thei lo ang" ka ti niah niah a, diktak chuan Zualtea chhungte hian min hmusit ngawih ngawih a, Zonunmawia te hi an khawsa thei ve tho a, ka nu chungah fel viau mah se Zualtea chhungte anga min tih ve ka hlau a ni. Anni lehzelin danglam bik anga min lo en chuan ka insit lehzual dawn lutuk a ni. 

"I chawl thei ang. Marti kan dil dawn nia" a ti awlsam then a, hnial tum viau mah ila awmzia a awm chuang lo. 

"Min hauh phah vaih chuan ka mawh puh vek dawn che a nia aw. I tih tawh lah hi i ti bur zel a, naupang thil ngen ang mai. Kum engzat nge i nih tawh a?" ka tih chuan "Kum40 ka la tling bik miah lo a nia" a ti a, ka lo nui kar kar a, kan inhrechiang tial tial a, a ngainatawm ka ti telh telh mai. 

"Nakinah i kum zat ka la zawt ve ang che. Naktuk chu in inah ka rawn lam ang che" a ti a, ka sam a tuai thuak hnuah min chhuahsan a, che chang lova ka din reng lai chuan ka hnung a ben thlawp pahin Rintluangin "I at hmel lutuk khati khan awm reng suh. Eng nge in lo sawi vel a?" a rawn ti a, ka kuah thlawp lo chauh a ni. 

"Engvakmah" tih pahin ka inher a, Rengi ka ring sual tawh a, U Marti nen a inpawh ber ni a ka hriat Rintluangi pawh hi ka ring tawh dawn lo reng reng. 

"Sawi dun in nei chiang alawm. I nui vel te kha U Marti nen kan hmu reng che a nia aw. Nang hi pathlawi zunah i uai a ni chiang mai. I bialpa hi engtin nge ni dawn? A fel ropui si, ka khawngaih zawk e a" a ti bawrh bawrh a, "Khatiang kha sawi lo teh" tiin ka lo khap a, keipawh ka hah phah ve ţhin tho a, ngaihtuah loh hram ka duh ţhin. 

"Professor khan a hip zawk chiang che alawm. A mak ve ngawt mai. Tlangval aiin pathlawi fa nei tawh i thlang zawk a ni sia. Anmahni hre tu ten an nupui nasatzia an sawi chamchi a, i hlau lo em ni a? A hnuk hrep mai tur che a sin" ti a min sawiţhaih te chuan "Chutiang chuan movie ah bak an ti ngai lo. Movie ah te chuan mipa pawh an insual buan buan a, a tak takah te chuan mipa insual hrat hi miin engahmah an ngai hleinem. An nuihzat zawk a sin" ka tih chuan meng nur nang chung hian a chek tlak tlak a, hahthlak min tih hmel khawp mai. 

Ka haw dawnah U Martin "Lokal teh" min ti a, a hmaa ka din chuan rin lawk ang ngeiin "Naktuk i chawl thei aw" a ti a, a lawm loh hmel em em mai lehnghal. 

"In buai viau dawn chuan ka chawl bik lo mai ang" ka tih chuan "Mi an la tam lo a i duh chuan chawl rawh. Nidangah hre tawh la aw" awmze nei zeta a tih chuan ka lo bu nghat nghat a, rilru nuam deuhin ka haw a. 

Keimahin ka lo nui leh ţhin a, ke a haw mah ni ila ka hah awm pawh ka hre lo. Ka ke pen te chu a zangkhai vah a, Zonunmawia hmuh leh hlan mawlh ka nghakhlel a ni. Sangsangi thlengin ka ngaina vek tawh a, chuti chung chuan ka la chhaih thiam chuang lo. 

Ka nu pawh a lo haw tawh a, inchungnu ka hmuh chuan ka hlimna zawng zawng kha hlauhnain a thlak nghal vek ka ti mai, thil ţha a thleng lo ni a hriatna ka nei nghal a, ka nu hmel pawh a ngui khawp mai. 

"Nikum aţanga kan tum tawh a nia, mi zawt kual ula, zawng bek bek ula, luah tur chu a awm mai ang" a ti dam thluam a, thinrim anga a lang duh lo te chuan a ti hlauhawm zual zawk emaw tih tur a ni. 

"Nia..in luah tur hi a vang angreng a, kan lo zawng thuai thuai dawn nia" ka nu'n a tih laiin Zualtea a rawn lut a, "Haw ang" tih paha a nu kalpui mai a tum chu "Lo han chho rawh. Hei kan sawi fel ţep tawh" a ti a, an boruak chu ka hrethiam ve hauh lo. Zualtea ka en veleh a hawi sawn a, a nu chu kuahin "Chho phawt ang. Kan sawi ţha dawn nia" a ti a, a nu duh lo chung chu a chhoh pui a, thawm a reh tak diak hnu a ka nu thaw ham ham ri chu ka bengah a ri ring khawp mai. 

"Eng nge ni lehpek a?" ti a ka nu ka zawh chuan "Nakinah" tih chiahin min chhang a, zawh zui zel chi niin ka hre ta bik lo. 

Chaw ka chhuang a, ka inbual leh hnuah khuma bawh pahin phone ka en a, Zonunmawia nen inbiak zeuh kan chin hnua ka tih ziah danin message ka en a, Zualtea message zawk a lo awm vang mai. 

'Inţhen ang' tih zawng min rawn thawn a, a dp pawh ka hmu thei lo nghal a, min block nghal daih em maw ni ti a whatsapp aţanga call ka tum pawh chuan a theih loh. Ka hlauh ruk reng chu a lo thleng ta a ni phawt mai. 

CONT..