DEAR DIARY-12

DEAR DIARY-12

Ka phone hlui aţanga call ka dawn chu Zualtea emaw tiin ka la vat a, mahse Afeli pawisa batna nu zawk kha a lo ni. 

"Ka rawn bia ang che ka ti reng a, kan pa a ţha lo zual zel sia, biak tum reng chung chein ka ţhulh leh ţhin a, ka rawn be hman chauh che a nih hi" a rawn ti a, rilru buai lai a ni bawk nen "Eng nge i la duh?" ka ti a, ka aw pawh a nem hran lo. 

"Eng lo a nia, ka nawr lutuk cheuin ka hria a, ka inthiam lo angreng a, kan mamawh lai a lo ni kher bawk nen, tikhan police hming lam tel hial khawpin ka nawr cheu a" a tih chuan "Police a report ah min vau maw?" ka ti hluai a, chu thil chu ka hre ve hauh lo. 

"Aw in reh ta vang vang sia, keini lah damdawi pakhat ringawt pawh a to a, ka mangang lutukin khatiang khan ka rawn ti ta mai a. Kan inhuat zui phah em lo ang chu tiraw? Afeli khan u ang tak takin min en ve a, pawisa vang mai mai a inhuat zui chu ka duh hauh lo. A ţulna in min nang ngang a ni" a tih chuan khawngaih viau mah ila Zualtea ka khawngaihna a zual a, bike pawh kha hralh lo thei lo dinhmunah a ding a lo ni zawk a, amahin a tuar vek lehnghal. 

"Engatana a puk nge ni reng reng a?" ka tih chuan "Aa...a mamawh thu a sawi a, tlem tlemin a la a, khami tling khawm kha a ni ber a. Sawi tak ang khan kan pa hi damlo kher lo se la chuan ka dil lo ang che u. Ka fate an la te a, thawkchhuak thei berin kan pa ka buaipui a ngai bawk si a" a ti dam thlap a, a aw aţang phei chuan a chauh hmel lutuk ringawt. 

"Tikhan kan rul zo tawh che a, a tawk tawh mai em?" ka tih leh chuan "Tawk mai e. Mahse ka chet dan kha a mawi lo em a tih thuah ka rilru fim hnu khan inhriatthiamna dil ka duh a, kan buai leh ta sia, ka lo be hman ve chauh che a, kan pa chu kar hmasa khan a boral a" a ti a, ngei ru viau mah ila ka tawrhpui zia te chu ka hrilh leh ang lawp lawp a, nu sual tak a ni lo a, a mamawh tawpkhawk tihna a ni mai. Mahse Zualtea a lo vau avang chuan ka ngei ve deuh. 

Zan rei tak thleng ka meng a, phone ka ngaichang reng bawk a, Zonunmawia chuan min lo be ngei a, Zualtea a reh hmak thung. 

Ka mangan tawpah ka phone hlui aţanga biak ka tum a, topup ka thun ngai loh avangin a biak theih loh a, ka nute pindanah lutin thawm dim thei ang berin ka che a, ka nu phone ka lak ruk hnuah ka chhuak leh zal zal a, ka nu phone aţanga ka call hmain beidawn nan hrim hrim tiin ka phone aţangin ka call leh phawt a, vawikhat a ring hnuah busy a inti nghal zel a, ka nu phone aţang chuan ka call phah ta nge nge a. 

"Hello" a tih rual chuan "Eng nge awmzia ni a?" ka ti a, a thil tih dan khan min ţhawngin dawn sawn dan ka thiam lo a ni. 

"Inţhen ka duh" a tih hnua a a thawk la ri thleng chuan ka hre pha a, a duh vang ngawr ngawr a inţhen rawt a nih ka ring thei lo a ni. 

"Lo chhuak rawh ka lo chho ang" ka ti a, min hnial hmain phone ka dah daih a, kan inţhianţhatna thlenga a chhe tel chuan ţah te pawh a ti chhuak thei alawm le. 

An inkawtah ka ding vang a, ka nu hnenah engmah ka zawt chhuak thei lo a, Zualtea talin min hrilh thei ang chu. 

A rawn chhuak chu chik deuhin ka lo en a, mu tho hlim hlawt ang maiin a sam chu a pawr phang a, a mitmeng a zuai raih mai bawk a, a duh vang a nih ka ring lo reng a ni. 

"Dawrah ngaihţha deuhin ka awm nileng a, chhan pawh awm lovin tikhan min ţhen tawp a, eng nge thleng a?" ka ti leh ngat a, ka darah dawmin thim chinah min nam lut a, inhmachhawna kan din tak hnuah phei chuan a hrehawm zual duh khawp mai. 

"In luah tur a vang alawm. Ka thusawi hi huatah la lo la, i pa ngat phei chu ka chhungte aia dawhthei tu an awm lo ang. In mal ding in luah a nih ngawt loh chuan an ning thuai cheu nga, warning pawh pe lovin an hnawtchhuak zel ang che u. Kan ina thlamuang deuha in awm theihna tur a nih chuan inţhen a pawi lo" a tih chuan ka lo nui hak a, ka rin aiin a ho daih. 

"In ina kan awm theih nan kan inţhen tihna maw? Chuvang mai mai chuan maw min block a?" ka tih chuan lu a thing a, a hmel ka hmu thei lo thung. 

"Ka biak che chuan ka ţhen thei dawn lo che a" zawi te tak tak hian a ti a, "Phaiah khan in ka luah a, naktukah ka pite inah ka phei ang a, karlehah ka let tawh ang. Helai ai chuan ka inluah kha a nuam zawk" amah bawk chuan a ti leh a, ka ipik a, ka tawt ve ţun mai. 

"I nu chuan min ngaithei tawh hlawl lo a ni maw?" thinrim vanga aw khur dar dar hian ka ti a, keini ai chuan an khawsa thei daih tih chu ka hria, mahse mi inkawp ţha hle hle lai pawt hrang tur khawpa inchhuang thei chu an ni bik lo. 

"Tun ţum chu a ti tak tak niin ka hria. I nu hi a khawngaihthlak a, hriatthiam tum rawh. Keimah zawk hian lo ngaihtuah chiang hmasa ila ţha tur a nia. Hrehawm ti lutuk suh aw ka haw miah lo che" tih paha a nui te chu lem tak a ni. 

 "Ka zir leh ang a, ka hlawhtlin thleng kan inah hian lo awm rawh u. Chhungkua hi chuan tih dan phung kan nei a, ka chhungte hian zirna an ngaisang a, an duh ang ka zir thlen hunah chuan keipawh min dah lal ve deuh ang. Thu ka neih ve hunah chuan pasal pawh nei la i nu leh pate chu an duh phawt chuan kan inah ka awm tir reng ang" a ti duah a, a ngaihtuah kim lutuk avang chuan ka lo nui hak a, pasal neih te chu ka la hlat lutuk. 

"Kan inţhen chiah a pasal nei turin min beisei nghal a" ka ti a, a hmel ka hmu chak a, a thim em avangin a hmuh theih loh thung si a ni. 

"Duh i nei a, ka hria alawm. Ka chhuah zalen phal lo zawk che a. Tun hi i zalen theih hunah ngai la keichu min vengthawng suh. Ka inpeih hunah ka lo bia che ang a, ţhianţha kan ni leh dawn nia. Kei aia i duh zawk kha keimah vangin i lo hnaih tim ange, hnaih la, a duh takzet che a nih phei chuan tu mitmei mah veng lovin hnaih zual zel la, nangmah mai bakah i nu leh pate vanneihna tur pawh a ni maithei. Ani chuan hna ţha deuh a neih tawh kha" tiin thik awm deuhin ţawngkam a nei a, ka ngaihtuahna hria ni awm takin "Ka thik lo a nia. Min nghak thei a nih chuan duhthusam a nia, i thei ta lo a khapa kha i nei a nih pawhin ka lawmpui tho ang che. Pasal i neih niah chuan keini pahnih chu ţhian tur chauh a duan kan ni tih ka pawm ve tawh ang" a ti a, a rilru nat lai a ni bawk nen, ka pasal neih hun tur thlenga a ngaihtuah tel vek chu ka nuihzat tawh lem lo. 

"I nu chu sawi lohah dah ta ila, min ţhen chhan hi ka duh tawk lo che ni a i ngaih vang a ni tiraw?" ti a ka zawh chuan a ngawi vang vang a, thudik a ni tih ka hriat phah a ni. 

"Ka enthla che a, ka chik che a, a dik alawm. Keimahah rilru i pe ngai lo a, i ngaihtuah chu midang daih a ni. U Tluangtea nau pasal neih zana rawn thlah tu che kha" a ti ta chiah a, an kawt êng laiah a lo a ding a, motor darthlalang a in hawng vek bawk a, min hmu lo anga a awm kha mak ka ti reng a ni. 

"Kan inţhen hi a ţha zawk. I duh tak i pan thei ang a, insawn chhuah a ngai lo bawk ang. Ka nu chu ka hmin theih mai ka ring. I nu pawh lo hrilh la, thlamuang deuhin lo awm phawt rawh u. A duh ang ngeiin lehkha ka zir leh dawn alawm. A chhuah tir ngam lo ang che u" a ti charh charh a, ka ti na chung pawh a min ţanpui a duh zel hi ka hrethiam lo. 

"Haw tawh rawh nakinah i ţhian angin ka rawn be leh ang che" tih pahin ka darah a nam a, amah zawk chu a kalsawn nghal bawk a. Inchhung a lut tur chu che chang lovin ka lo thlir reng a, zanin a Zualtea kalsawn tur ka dang lo hi ka la inchhir maithei, mi tam tak ka lo tawng ve tawh a, ani chauh hi a tak taka min hmangaihtu ka tawn awmchhun a ni. 

Khumah ka let ka let a, ani pawh a la mut bik ka ring lo. Ka nu phone bawk chu la chhuakin ka en vang vang a. 

'Mi ţha deuh i tawn ka beisei tlat a nia. Kei aia ngaihsakna leh hmangaihna lanchhuah tir thiam zawk, kei aia ti nui hnem thei zawk tu che leh ka hmangaihna aia thuk zawk a hmangaih thei tu che i la tawng ngei ang' tiin message ka thawn a, ka message thawn chhuah chu a number chawpin ka delete nghal a, kan inkawp lai khan kim lo riauin ka inhre ţhin a, inţhen pawh ni ila ka na vak lo ang ka ti ţhin kha a nia, ka ngaih ang ngawt a lo ni lo. Rin aiin ka na daih. 

Ka mut zangthal reng lai chuan ka bek a lum thla pap a, Zualtea vangin ka mittui a tla ve tihna a ni. Ka ngai a, a hma ai mahin ka ruak zawk a, ka thlamuan ţhinna zawng zawngte kha thawklehkhatah an kiang duak a, vengtu nei tawh lo ang maiah in ngaiin ka chheh velte chu a vawt riauin ka hre tlat a, ka duh ang chiahin amah zawkin min ţhen a, ka zalen ngei a, mahse ka ngai veng veng thung. 

"Nizan khan Rintei a rawn chhuk a, pawn lama a ang ri pawh inchhung aţang hian ka hre pha. An chhungkua an inhau a nih hi ka tih rilruk laiin a rawn lut a, min rawn ankhum chiam a, inluah tur zawng a chhuak nghal turin vawi tam tak min hrilh a, a fapa i fuih khaw lo zo ah a ngai a" ka nu'n a tih chuan "Kan inţhen tawh alawm. In luah tur zawn a ngai lo ang" ka ti ram hmak a, Zualtea sawi ang tak tak kha a ni. Tu in mah kan luah rei ve thei ngai lo. 

"A ţhen che tihna mi?" a tih chuan ka lo bu nghat a, "Hetiang hi a ni ziah. An nute kan ngei vangin an fate hi fuih ve bawk ţhin mah ila a tawpah chuan an nute tho an thlang ţhin. Hmeichhia chuan hriatreng a ţha khawp mai. An nute hi haw viau mah ila an fate bulah a chhe zawnga sawi loh a ţha" a tih chuan "A chhe zawngin vawikhatmah ka sawi ngai lo" tiin ka lo inveng ve a, ka sawichhe ngai lo miau a ni. 

"Tukin zing hma lutuk a Zualtea lokal kha mai ka ti reng a ni" a ti a, keipawh chu ka hawi phawk leh tawh khawp mai. 

"A lokal a maw?" ti a ka zawh chuan "Kal ang chu. Min rawn kaitho a, kaihthawh che ka tum lahin a ngai lo a tia. Thingpui pawh a in duh lo, insawn chhuak lo turin min hrilh a a kal lehnghal a nih kha. Ani hi chuan pawi a sawi lo mawle..a nu hi chu fel se a khawngaihthlak lutuk lo tur a nia" a ti vang vang a, engmah ka sawi ve tawh lo. 

"Ka lo chik nasa ve ţhin a, fate tan hian mi ţha kan duh a, nu te hi chu kan duh tui ţhin tlangpui a, chuti chung chuan Zualtea kha sawiselna tur ka hre ngai lo. A hmangaih takzet chein ka hria" a ti leh a, ka nu hi ka ţhianţha a ni ţhin a, a la ni reng bawk. Engkim ka sawipui a, anin a ţha leh ţha lo min lo thliar pui ţhin. 

"Sawi tawh lo teh. Nakinah kan la sawi leh zawk dawn nia" ka ti ta ringawt a, a ţhatna lam phei chu sawi vak ka duh rih lo, ka ngaih tawh sa nen ka ngai lehzual vek ang. 

Hna kal tum âwm a a awm tak lohah chuan "Hna i kal dawn lo em ni?" ka ti hlut a, a ţhu muang sar sar reng a, nidang a a kal hun a ni daih tawh.

"Zonun-an vawiin chu chawl ve rawh min ti alawm. Sangsangi piancham a nia, an lawm ve dawn aniang" a ti mai a, kan boruak teh nuaih hian kal ve min ti phur lo zo vek tawh. 

"Ka kal ve dawn a" ka tih chuan "Khawiah maw?" a ti hu a, a bo lutuk chu ka lo nui tawp. 

"Zonunmawia te inah ka kal ve dawn ka ti a nih chu. Niminah min sawm a, chawlh pawh min dil sak vek alawm" ka tih te chuan a awih loh hmel nasa mai. 

Dar11 vel bawra amah ngei a rawn lan takah chuan ka thusawi chu a ring ve thei chauh a, insiam tuma pindana ka lut chu min umzuiin "Zualtean a hmu cheu nge aw. Inhmuh tir miah suh u a khawngaihthlak" a la ti lawm lawm a, "A awm tawh lo ang. A pi te inah a phei dawn alawm" ka tih chuan ka banah a beng sawk mai.

"Zonuna te in aţanga in thumna vel lekah khan Zualtea pite an awm alawm. A sawi ngai lo em ni? An pahnih hian an inhre pawh miah lo em ni a?" a ti zui bawrh bawrh a, khawvel zim lutuk hi chu a buaithlak a nih hi. 

"A pi te inah chuan a kal zeuh zeuh ringawt a, inhriat pawh vak ngaihna a awm hleinem. Min sawm ve laklawh tawh sia, chawlh min dil sak bawk nen, fimkhur deuhin ka kal ang. Keipawn Zualtea hmuh ka duh bik hleinem" ka ti ta nge nge a, inhmufuh lo ila ka ti tak tak. 

Zonunmawia nen a kan inphur chhuak chu nuam ka tih tehreng nen ka ţawng tlem khawp mai. Amah zawkin min be zeuh zeuh a, pa ţawngtam lo tih takah zawhna ka zawh let ve loh chuan min biak sawm vak ngaihna a hre bik lo. 

"I zia a va dang ve" a ti deuh reng a, a tawpah phei chuan ka bialpa neih a hre tho alawm tiin "Kan inţhen a" ka ti ta ringawt a, pawi a tih thu min hrilh ve luam mai. 

"Mi in sawm tam lo tak tak maw?" a lam a hawi phei paha ka tih chuan "Tam lo e" a lo ti mai a, Zualtea nu ngaihtuah ran chungin "I nu'n min lo lawm lo viau angem? Min hau vel angem le? Ka sawi awmzia chu nu te chuan fate an hauh na thei sia" ka ti niah niah a, hlauhna bawk a lo let leh tawh. 

"Hau hrep ang. In inhau hrep dawn nia, a lai takah ka ţhu anga min inchuh vel anga a nuam dawn sin" a ti a, a nui hauh lo lehnghal. 

"Ka fiamthu loh hi" ka ti vin hlar a, hlauhthawn sa nak laiin min thlamuan lo ve khawp mai. 

"Hau lo ang..a duat che chu beisei lo la" a tih chuan "A nih chu" ka ti hmak a.

Tum bur a hmalam ka en lai chuan "Keiman ka duat dawn tho che a midangin an duat ve kher che a ngai hleinem" a ti leh daih a, a phakar ve reuh lutuk. 

"Nih leh i nu i hrilh lawk ve hrim hrim em?" ka ti hram a, min lo lawm loh vaih chuan a rukin hrehawm ka tuar leh tlawk tlawk dawn tihna a ni mai.

"Hrilh lawk miah nang. An lo biak duh loh che leh ka thlah lehnghal thei tho che a" thutak zet hian a ti a, ka chiai titih der tawh. 

"Aww..min sawm ve chuan i hrilh lawk thlap ka lo ring a, ka nu pawh kal lo turin i hrilh tho sia" ka ti a, ka lawm chiah tawh bik lo a, ka aw pawh a nem fahran lo khawp mai. 

"Ka ngam leh chiah lo a" a tih phei chuan ka thaw hak a, ka kawr tlang pawh ka ţham khawm tun tawh. 

"Ka lokal lo mai ang. Chiang lo nuai a kal ai chuan let leh ka duh zawk. Thlah pawh ka ngai lo keimahin ka haw thei. Ding rawh ka chhuk duh" ti chiam mah ila a ding duh chuang lo. A motor khalh lai tih buai ka ngam chiah si lo a, ka awmdan chu hrehawm ve tak a ni. 

"Kan thleng ţep" a tih phei chuan "Sawi lawk lo a kal tawp ka duh hleinem" a hma aia vin mah hian ka ti a, hrehawm rukna neih sa nen, duh anga thil a kal lo chu ka thinrim hlur mai.

"Ka tihder che a nih kha, an lo duat ngawt ang che" a ti leh ang lawi a, ka ţhu hle hle a, ţawng pawh ka ţawng peih tawh lo. 

An in a hla lo bawk a kan thleng thuai a, motor ri a hriat rualin Sangsangi a lo tlanchhuak a, hmuh ropui ka tum lutuk nge an in chu rin aiin a ropui vak bik lo. 

"Thil pek tur pawh ka lei lo" tiin Zonunmawia chu a rukin ka hrilh a, Sangsangi chuan beisei nei deuha a lo kuah ve reng avang chuan a pawm ta nge nge a. 

"A ngai lo..a piancham kan lawm ngun tawh alawm" tih pahin a fanu hnungah chuan a beng thuk a, nau lawm a thiam loh hmel lutuk chu ka lo nuih ve thung a, a sen lai phei chuan a chhaih thiam lo viau ang. 

"Nuihzatthlak a awm em?" tih pahin a kutţangin ka hmui a rawn tawk zeuh a, ka lo pet vat a. 

"Nau lawm i thiam loh hmel e" ka ti a, motor lah chu an inkawtah a la inhung tawp a, gate chu a awm ve tak nain an tual zawl chu a zau vak lem lo. 

"A sen lai phei chuan kan in en vung vung zel. Mahse hei min ngaih khawp hi" inchhuang tak hian a ti a, pa hmangaihna ka dawn ve ngai loh avangin fate ngaihsak deuh hi ka ngaisang a, Zonunmawia pawh chutiang chiah chu a ni. A fanu a hmangaihna hi a fakawm thlawt a ni. 

"Hmingtei fanu maw i nih a?" ti a min zawh pahin a nu ni awm tak chuan ka banrek a vuan chawt a, a hmel hi ka hrechiang khawp mai. Khawiah emaw ka hmu tawh a, ka hmuhna ka hrechhuak mai thei tawh lo zawk a ni. 

"Aw ni e" zak ru deuh taka ka tih chuan "I va fel ve a. Lokal rawh lo lut rawh" tiin inpui lamah min kai phei sawt sawt a, an pa ni awm tak pawh ţhutthlengah a lo ţhu a, en chu min en ngei a, min be lo thung. 

"Naupang chiah kan sawm a, a bengchheng deuh maithei a ni. I nu nen pawh in inang khawp alawm. Kan kum a inthlau viau nain kan inkawmngeih teh a nia" a ti sawk sawk a, ka bulah Zonunmawia a rawn ţhu a, a malchungah Sangsangi a rawn ţhu ve nghal zat a, a pa a ngai viau tak tak mai. 

"Inleng awm laiin i pa bawh ar ar zel mah ta che" ti a a khak hnuah keichu min enin "Kan inawm nasat nen nitin a chhuak zawk a pa hi a ngai tak tak a ni. Ina a awm tawh chuan a lak hran theih thlawt ţhin loh a, tunah pawh a ţhiante an awm reng, in thawm a hriat rualin a rawn tlan chhuak tho a nih kha" a ti bawrh bawrh a, sawi pui vak ngaihna ka hre lo chu ka lo nui ringawt a, ka nu sawi ang tak takin an fel khawp mai. 

"E..taka hei Bawiha ţhiannu a nih hi" tiin an pa ni awm tak chu a hrilh leh rih a, kan ep chiaha ţhu chuan "A ni maw..i va fel ve" tih pahin a kut a rawn phar chhuak a, ka ţhutna aţanga tho chhuak meuhin lai tak chung chuan ka chibai a, Zonunmawia pa a nih chuan a nu aiin a lang tar daih zawk a, an in upat hleih a nih loh pawhin a damloh vang a ni ngei ang. 

"Remruat, chaw i ei hman ang tiraw? Naupang ho hi chaw eipui ang u kan lo tia" a nu bawkin a tih leh chuan "Chaw chu ka ei thei lo ang. Ka nu hnenah ei lo tur angin ka insawi laklawh tawh a" ka ti ve tlat a, ka bialpa ni hauh lo mah se vawikhat kalna a chaw ei nghal chu ka duh teuh lo.

Zonunmawia u, Mami leh a fate an lo thlen hnu phei chuan an ri nuai nuai a, chet loh tawp chu a mawi lo deuh a hriain choka ah ka kal a, a nu chu khawr ţutin ka pui ve a, "An va phur tawh hlawm ve" ti a Kimkimi lo lut chu tim daiin ka lo en a, ani pawhin min hmuh a beisei loh hmel khawp mai. 

"Anu enteh hei ani min pek a nih hi" phur deuha tih pahin Sangsangi chuan a kawngfual hak chu a pawt parh a, a vir kual vel a, a sam kir nen chuan a inhmeh reuh phian a. 

"I van mawi em em. Ani chuan a lei thiam khawp alawm. Khawiah nge apa hi a awm a?" a tih chuan "Pindanah" a lo ti mai a, Kimkimi pawh a chhuak ve nghal a. 

"Hrehawm ti duh suh aw. Inţhen tawh mah se karah fa an awm tawh hi chuan inhmuh loh theih a ni ţhin lo a, intlawh tawn reng a ngaih chang te a awm a" a nu, Nu Hmangaihin a lo tih chuan nuih pahin ka bu nghat a, ka bialpa pawh a ni lo a, thik nachhan tur ka nei reng reng lo. Tunah ngat phei chuan Zualtea bakin rilru a luah rih lo. Keichu lo indahţha ta ila, hrehawm a ti dawn lutukin ka hria a, ka khawngaih takzet a ni. 

"Ka nu dil ţhin rawh ka tih kha. Nitin a awm ţhin tu a nia, a thu thu a ni mai" tih paha Zonunmawia lo lut chuan lawm lo hmel a pu deuhin ka hria a, a hnungah Kimkimin a rawn zui kher bawk nen, an inhnial deuh a nih ka ring ta ngawt a. 

"Ka nu, Sangsangi hi kan inah ka hruai phei lawk dawn. A pi leh puten an hmu ve chak a, a thil tur an lei ve laklawh tawh bawk sia" a ti chiah reng a, an thusawi chu ngaihthlak loh ka tum a, choka a an awm ve miau avangin a hriat loh theih loh. 

"An hmuh chak chuan hruai rawh..an tunu ve tho alawm a nih" Nu Hmangaihin a tih laiin Zonunmawia chuan "Rei suh ang che u" a ti hmuk a, zan ka mu tlem bawk nen, an inchhung a bengchheng bawk si, ka vai riai reng mai. 

"Rei nachhan tur a awm hleinem. Inla khirh viau zel suh. Midang ang phei chu ni ila ka la daih ang chu. Ngaihzawng i nei lehnghal" min zahpah lo tak hian a ti a, a nasa an tih chu a lo dik tak tak maithei a ni. 

Thinrim a chhang let loin "Engin nge i lokal? Thlah phei in ngai em?" a ti ta zawk a. 

"Ngai lo..scooty ka keng. Kal ang Bawihte" a ti vei hmak a, Zonunmawia nui hawk thawm chu Kimkimi tan chuan hriat a nuam kher lo maithei a ni. 

"I hah tawh em?" ka thil chan lai rawn en ve pah a a tih chuan lu ka thing mai a, "I nuam meuh nange?" ti a min zawh paha ka chal a deh chuan ka ip chawih a, ka thle sawn rang hle bawk. Ka melh nghal ran bawk a, ka awmdan avang chuan a kut la sawn vatin a nui suk a, a mi tawhna hi ngaiah ka la nei thei lo tih a hrethiam ve a nih ka ring.

"Ka ţha vek alawm" ka tih laia "Ka kut a vawh vang nge i pang a lum tlatin ka hria" a tih takah chuan che loin ka ding ren rawn a, zan khawvawtah ka awm rei a, mut ka hmu ţha lo bawk a, ka taksa a chauh lai tak a ni bawk nen khawsik chu ka nei maithei.

Kan ţawng lo hre pha vek tu Nu Hmangaihi chuan "Mama, chhuarah hian damdawi bawm a awm" tiin a lo inrawlh vat a.

"Damdawi ei rawh aw" ti a min zawh hmasak te te hnuah a kalsawn a, chhuar a hawng ri pawh ka hre vek, damdawi mum kenga a lo let leh hnuah "Ei la awm hahdam rih rawh" a ti a, tui bottle min pe tel bawk. 

Ka damdawi ei lai te chu hmuhnawm thlir tak hian min thlir ka ti mai, chik deuhin min lo ei a, ka ei zawh hnu chuan kut beng meuha min lo lawm hluai ka ring a nia, chutiang chuan ti em lovin bottle min laksak pah hian tawi tein a nui a, keipawh chu ka kawr bana ka hmui hruk pahin ka nui ve ta ringawt a. 

"Awm hahdam rih rawh..kan lo chhawr damlo palh hlauh ang che" fiamthu a a tih chuan lai deuhin ka nui a, nu Hmangaihi lah chuan phur em em hian a lo tuihnih a, Kimkimi a awm loh chuan an inchhung boruak chu a nuam khawp mai. 

Kimkimi te nufa an lo let hnu lawkah haw ka rawt a, min ngainat loh zia ka hre tawh a, awm zui zel ka chak tawh lo a ni ber. Chhuanlam tur tingin ka khua a lo sik ve ser ser bawk a, Zonunmawia te nufa pawn min hnial bik lo. 

"Thingpui tal in rawh u" Nu Hmangaihin a tih avang chuan choka ah kan inzui lut a, min ti hrehawm tham a ni lo na a professor meuh pawh chuan a nat leh nat loh min zawt reng a, ka ţhat thuin ka chhang zel a, mut hahdam ka duh thu ka sawi zeuh zeuh bawk. 

Midangin min rawn chimbuai ta lo bawk a thingpui pawh a man a siam vek a, "Marti dawr bulah khan cake kan order a, kan lam dun ang chu ka tia. I nawm loh chuan haw lamah ka lam tawh mai aniang chu" thingpui min pek paha a tih chuan "Ka lampui ang che. Chutianga na em em ka nei chuang hleinem" ka lo ti var a, ka ep chiahah a rawn ţhu ve nghal zat bawk. 

"Ka nuten an lo lawm ngang mai. Kan hmuh loh chhung chein i lo ţhang leh zuah tawh a an tia, ka pa phei chuan dawrah a hruai leh hman vel a nia aw" Kimkimi a rawn ti lut bawrh bawrh a, Zonunmawia pawh chu a nui ve mai a. 

"Chocolate an lei leh ang chu" a tih chuan Kimkimin "Lei e mawle..dawr neitunu in fing a ti lutuk. A ţawngkam a felfai si a ti a rawn tih nasat kha" phur zet hian a ti a, nupa hlim deuh angin ka hmu thei hial a ni. 

"Eng nge an lo leisak a?" ţhutthleng nghenchhan vuanin lehhawi meuhin a nupui hlui chu a en a, filter tui dawh pahin "Kawr leh nautelem vel. An lei nual mai, Bawihtei duhzawng te chu an hre lutuk. Keipawh a hun hma chuan min hmuh tir duh bik lo a, va en ve mah la i awih lo zawk ang, dollhouse te an lei a" a ti siam siam a, tuiin pahin keichu min melh ralh a, min lawm loh zia ţawngka a a sawichhuah kher a ngai lo. 

"Khai a..an inseng hnem lutuk ange" a lo tih te chuan "An tu hmuh hmasakber a nia, a tan chuan an neih zawng zawng pawh an phal ang chu" a ti lang lang a, hnehna chang intih hmel zet hian min en a, thil dang ka en ta daih a. 

Zonunmawia hi a fing ka ti dawn nge pawh ka hre lo, Kimkimin mi pawi a sawi lem loh chuan ka awm lai hian a be chhe ngai hauh lo a, midang bula an awm pawn a ni tho ang. Tihian kei chuan ka hmu mawi ve ve a, Kimkimi zawkin min ngainat loh zia ti lang reng lo phei se chu fel ka ti dun ngawt ang. 

Kan haw kawngah chuan "Kimkimi nen khan engati nge in inţhen a?" ka ti tawl a, a nui tak nain a sawi hreh deuh niin a lang. Mahse ka zawt laklawh tawh a, chhanna pawh ka beisei ran bawk. 

"Mit a lo var hian mitdel laia kan ngainat hi ngainat zui zel a har tawh aniang" a tih chuan "Tinge?" ka lo ti vat a. 

"Thil dik lo inthup ţhin kha kan hmu thei vek tawh a" a ti a, Kimkimin a lo bum ve ţhin a nih ka ring ta hmak bawk. 

"Fa innei tawh sia" ka tih lai mek chuan "Kan inneih ka ring tawh lo" a lo ti vat a, ka zawh tawh hnu tho mah nise "I duh tawh miah lo tihna mi?" ka ti nawn leh ngat a, hmaichhan ngeiah sawi se ka tih vang a ni. 

"Imm..ni mai" tih chiahin min chhang a, "A lung a leng ve ţhin a ngem le" ka tih chuan "Sangsangi chu a ngai ang" a ti leh tawp a, amah chu a insawi bo hmak. 

"A ngai ve lo ang che maw?" ka ti hluai a, ka thlek deuh ha bawk a, min rawn enin a nui suk a, "Ngai tawh lo ang" a ti a, sawi zel tur a vang duh khawp mai. 

"I bialpa i ţhen a, bialpa i nei ta lo tihna a ni maw?" amah zawk chuan a ti a, "Ni mai" ka ti hap a, pawn lam ka thlir ta daih a, vawiin khan ka hmu ta miah lo a, engtin nge a awm ve ang le. 

Cake an order na hmun chu kan dawr bul tak tak a lo nia, step chhuk thlak a ngai thung a, "Lo awm rawh aw ka rei lo ang" a tih hnuah min chhuahsan a, eitur kan lak ţhinna aţanga Rintluangi lo chhuak ka hmuh chuan ka tawlh zal zal a, motor awmna lam pan a a rawn chhoh chuan tukverh darthlalang ka ti chho vat a, kan dawr bul parking rem lutuk ka huat ber ţum a ni ngei ang. 

Ani lah ka chuanna motor hrechiang tawh tih takah a hmuh rualin a rawn tlan chho a, ka ţhutna lam zawkah lokalin darthlalang nam chung meuh hian a rawn bih a, a nui ţhaw lehnghal a, a mitmeng a lian angreng si. A hlauhawm lek lek a ni. 

"Ehe...eng nge in rawn tih? I duhna takah i kal a ni lawm ni? A nuam em?" a ti lang lang chu "Midangin an hriat hmain kalsawn rawh" ka ti a, ka kut pahnih ka vai nawk nawk chung pawhin "I chhe lo ve reuh hle mai. An lo fel em? Eitur in rawn lei dawn em ni a? Keipawh kan thil eina ka dah zo chiah a" a la ti tak deuh deuh a, ka zak ve thlawt a ni. 

"A mak e..kalsawn rawh ka tih kha. Thawhţanah ka hrilh vek ang che" ka tih hnu pawhin min la chhaih zel a, Zonunmawia a lo hnaih viau tawh hnuah pawh "I duh ber motor ah i chuang thei a nia, a nuam dawn hi ka tia. Tunah chuan midang hnena a chanchin zawh vak ngai loin i hre thei tawh anga" a ti lang lang a,kei chauh min en avang leh min han fiam vel nuam a tih em avang chuan kan hnaiha ding chu a hmu ve tawh mang si lo, ka zak lutuk chu thlan fimin min bual ţan a, a hmuh ve hnu a a inthiam lo hmel chu ka en ţha peih tawh lo zawk. A nih tur ang ang a ni vek tawh. 

A tlan chhuah leh hnuah pangngai deuhin min biak zawm a, Rintluangi thusawi kha hre lo angin awm mah se a hria tih ka chiang lutuk tlat. 

"Kum engzat nge i nih tawh khah?" ka ti leh vel a, a sawi chhuah mai hlauin zawhna ho lam tak tak ka zawt nasa tawh. 

"Kum40 ka la tling bik lo ka tih tawh kha" a tih hnua a kum zat min hrilh chuan ka lo chek tlak a, ka rin aiin a la naupang na a kan inthlauhna a tam lutuk ringawt. 

"Nang ve le?" a tih chuan ţha deuhin ka lo hrilh ve mai a, naupang min ti khawp mai. 

"Pasal neih pawh i la ngaihtuah ngai lo ang a" a ti hial a, "Ngaihtuah ngai lo ang a ni. Bakah min duh tu an vang ve em a" ka ti fiamthu a, rilru chuan Zualtea a hre ve rauh rauh mai.

"Min duh mai em?" a lo ti leh tawh a, a uang tih hria a "Zonunmawi" ka tih fiam vel te chuan ka lam rawn hawi meuh hian "Engtin maw min koh?" a ti a, a hming puma ko tur em chuan kan in upat hleih ve bawk em a ni. 

"Hma lam en rawh mi i su ange" tih pahin hmalam ka kawk a, Zualtea kha ka ţhian chauh chu la ni se tuna ka hun tawn mek hi nuam ka ti viau ang le. Mahse mahni inthiamlohna ka pai ran a, ka taksa hi a ei hek zel ni maiin ka hria. Thil hlimawm tawpkhawp pawh thleng se ka hlimna a famkim thei chuangin ka ring lo. 

Ka chhuk dawnah chuan a phalna lak tum ni awm tak hian a lam ka hawi kher a, min lo nuih chuan ka nuih let ve vat a, ka tan chuan a ţha mah mah deuh chu a ni ti ila keipawh ka nu mitah chuan ka ţha ber ve tho a, mahni indahhniam lutuk ka chin ţhin hi bansan vat a ngai a ni. 

Ka nu'n chanchin min lo zawtin ka haw hma deuh chuan a ngaih a ti ţha lo a, ka khua a sik ser ser reng thu sawiin dawt ka hrilh a, diktak chuan damdawi khan min chhawk daih tawh.

Khumah muin ka inngaihtuah rauh rauh a, a nupui hlui nen an la inbe ţha lutuk khan ngaih a ti ţha lo. Khatiang kha an nih reng chuan an la innei leh mai angem tih thlengin ka ngaihtuah a, lehlamah Zualtea a lo awm ve bawk nen, mu mai mai chungin ka hah hle ringawt a, chhanna lah ka nei mang bawk si lo. 

Zanah chuan beisei loh deuhin 'I mu tawh em?' a rawn ti a, U Tluangtea te ina kan kal hnu phei kha chuan min be nasa zual emaw tih mai tur a ni. Hunpui bawrah khan a reh ve deuh a, kum a thar a, a ngai te bawkin min rawn be leh a, heti chung hian reilote min biak loh hlek chuan ka lo ngaihtuah veng veng zel. 

'Mu mek' tih zawngin ka chhang let a, 'Tu hnenah nge ka chanchin in lo zawh ţhin a?' a rawn tih chuan ka thinphu a rang dawt dawt a, ka chhang let lo chiang hle. A hria ka tih reng kha, Rintluangi vang vek. Kan zawt lo reng reng tih ngawt chi a ni tawh mang si lo a, hui pap pap ila a zia veleh mai ang. 

"I nutei ten an chhuar hman lai kha min pe dawn a, min han zawn pui lawk rawh" ka nu lah chuan a rawn ti mauh mai a, tuna ka duh loh chuan chhuna zawn ngei ngei a ngai dawn a, a la hma tho a tiin kan inzui chhuak a, chhuar thar an neih avangin a hlui zawk min pe dawn a lo ni. 

Ka nutei te in aţanga kan zawn chhuak chiah chu ka pai nghal chawn chawn mai. A fate hoin zawn mah ila a rihna a bo chuang lo. Ka dar a na ngut ngut a, ka ţhen leh vak ţhin a, chawlh ka rawt lahin ka zawnpuite chuan "A rei mai mai" an ti tlat a, hah tak ka ni ringawt.

Dawr zawn kan thlenin dawr kawt a U Tluangtea ding ka la hmu zui a, ka kalna lam a ni kher bawk nen, a eng lai kan thlen chuan "Eheu..Remruati chu i chak hle mai" nui chung hian a ti a, kal chak sauh mah ila pa phawk tih takah fiamthu nan thla min laksak hman tho a, a ţhianpa a thawn phei chuan ka zak nawn leh dawn tihna a ni mai. 

Ka mut hle hle laia ka phone nghawr det det chu en mang hlei lovin ka chhang a, Rintluangi a lo ni. 

"Lokal vat rawh..kan in kawtah bike leh sumo an insu a, bike khalh tu hi i bialpa a niin ka hria. Kha, lo hruai ziah tu che kha. Ka ngaihven ve lawk lo a, a mi phurh phei chu a thi nghal an ti a nia aw. Awwii...ka rap lutuk keichu ka lut dawn" a rawn ti nawk nawk a, ka ţhu nghal awt a, thawm ri nuai nuai chu ka ngaithla kar a, ka kut lah chu a khur nasain tih ber tur pawh ka hre lo. 

Rei ngial ka ţhut hnuah phei chuan ka taksa pum a khur a, ka u thihni ang chiah khan hlauhna in min tuam hlup hlup a, ka mangang viau nachungin khum takngial pawh ka thawhsan thei lo. Rintluangin min lo biak a tum leh lai chuan chhang ngam tawh lovin ka kut pahnih ka suih zawm a, engtia rei nge ka ţawngţai tawh loh ka hre lo, ka mangang lutuk chu ka ţawngţai ta ringawt a. 

Zonunmawia ka hrilh ve mai dawn mawni ti rilru chunga pindan ka chhuahsan laia kan kawngkhar a rik bur phei chuan ka phu nasa lutuk chu ka tlu lo chauh a ni. Ka nu hnenah chanchin ka hrilh thei hram a, inchhunga Rengi a rawn tlan luh takah phei chuan thu lawmawm hriat ka inbeisei tawh lo. 

CONT..