DEAR DIARY-13

DEAR DIARY-13

"In purun sen ka lo puk teh ang. Tlaiah kan lei theihnghilh daih a, dawr hnaiah an nei ve bawk si lo a, dawr hlaah ka kal peih tawh lo" Rengi chuan a rawn ti lang lang a, ka nu nen a kan lo mangan nen hlauh nei hmel pawh a pu ve lo. 

"Zualtea a ţha em?" purun pawh pe lem lo chuan ka ti a, "Ka pite in a a phei kha i la hre lo em ni?" tiin min lo zawt let a, mak min ti zawk emaw tih tur hmel a pu bawk. 

Chutianga min en ran lai chuan "Eng nge a chanchin? Han be teh..khawiah nge a nu leh pa an awm?" ka ti leh sawk sawk a, ka tha khur pawh a reh hleithei der lo. 

"A va mak e aw. Biak kher a ngai em ni? Ka pi tha na a chhuak a, ţawngţai dam thei an pan alawm. Mission vengah an awm mek. Ka pi hi chu a taksa a nat hlekin ţawngţai dam thei a ti zel a, a hruai a nih kha" a tih chuan ka nu ka melh a, sana ka en leh a, ţawngţai dam thei pan hun pawh a ni tawh lo.

"A tlai tawh em hi" a thusawi ringhlel awm taka ka tih chuan "A va mak e aw. Ka be mawlh ang" a ti hlak a, a call hnuah speaker a on a, Zualtea aw ka hriat chuan ka thin a phu dawt dawt a, ka hahdam huai thung. 

"In la haw lo mi? Hei" tih paha min lo en chuan lu ka lo thing a, hmui phunin ka hming sawi lo turin ka hrilh pah bawk. 

"Hei ka mu thei lo a, biak tur dang ka nei bawk si lo, in la awm leh awm loh ka rawn zawt che u" tiin dawt var a sawi nghal zung zung thei a, a awhawm letling khawp mai. 

"Kan la awm chu a nih hi. Na nei ve lo ho chuan thingpui no thum lai kan in tawh" fiamthu deuha a rawn tih takah chuan ka kalsawn a, ka nu bulah ka ţhu hnawk mai. Na a nei lo chuan awm a ti nuam huai huai thei.

An inbiak zawh hnuah "Khawi purun chu. Naktuk a mi tur sa siam lawk ka duh a, vawiinah kan bazar reng a sin mawle kan theihnghilh chiang lutuk a" a ti leh zat zat a, choka lam kawh pahin "Va inlak rawh" ka ti a, ka ngaihsak zui lem lo. 

Rintluangi hnenah chuan "Ngah nge dawt min rawn hrilh a? Min ti hlauthawng lutuk alawm" chhuahchhal ti tih hian ka ti a, kei aia pawr mah hian "I bialpa a ni leh lo rawn tih ka tum a, phone i la thei lo a nih kha" a ti a, ka ţawngţai hman hial a sin mawle. 

"Aw le...thawhţan ah kan inhmu dawn nia" ka tih hnuah phone ka dah a, engati nge ka ţawngţai ve ringawt le? Pathian te chu thlei bik nei a ngaiin ka haw hle ţhin kha a ni sia, Zualtea a chesual emaw ka tih khan ka mangang a, tih theih dang ka nei bawk si lo, a tawpah chuan ka ngei em em ţhin Pathian hnenah a puihna ka ngen a, ka ţawngţai zawm leh pawh ka ring chuang lo. 

Thawhţan a dawr ka kal chu beisei loh deuhin Zonunmawia ka hmu a, a chanchin midang ka zawt ţhin tih a hre tawh bawk nen, lai deuh hian "I lokal elo?" ka ti mawl tawp a, hnung lam ka pan nghal a. Han u mawi ve ka tum viau na a ka thei hlawl lo. U Zonun han tih hnâp mai chu mawi ka ti thei thlawt lo a ni. A hming tluan hi a mawi a, chuvang chuan ka koh dan ngaia koh ka duh zawk. U Zonun tih ai chuan professor te pawh ka ti tawh mai ang chu. 

"I insiam vek tawh bawk sia, kan dawr aţang hian haw tawh lovin university ah i kal tlang dawn mi?" ka ti leh a, hnung lama ka phei kha min zui a, ka bag vel ka dah ţhat hnuah pawh a la awm reng sia, biak loh theih a ni lo. 

"A ni mai ang chu" tih chiahin min chhang a, ţul hlei loah chhuara lotion bur vel intlar ţhât chu ka rem ţha zui a. 

"Eng nge i an a?" tih paha ka chal a rawn deh chuan ka kut che a tawp chiang kher mai. Ka chal leh a kut a insi reng chung chuan muangchangin a lam ka hawi a, ka pang a sat leh sat loh a ngaihchan vang vang hnuah "A reh tawh e" a ti sup a, inrinni daih a ka pang sa te chu reh loh a hun tawh hleinem mawle. 

"Damlo chung chuan chhuar te kha zawn ve loh tur che a nia" a kut lak let pah hian a ti a, ka zak ngei mai. Ka hmui ka pet zauh a, U Tluangtea khan ka thlalak a thawn a ni chiang mai, ani pawh hi han sawichhuah leh kher a ţul lo e. 

"Ka nutei fate zawng zawng nen kan zawn a ka hah hleinem. Kal tawh rawh i tlai anga sin" ka ti liam puat a, sana ka melh zauh a, a la hma nasa mai. 

"Zanin inkhawm i tum em?" ti a min zawh chuan lu ka thing a, "Tluangtea te ina kal pahin ka lo peng kawi ang" a ti leh zaih tawh a, a ţhianpa hi a hmang ţangkai ve ngawt mai. 

"I duh phawt chuan le" ka tih hnuah chhuar ah polythene a rawn dah a, kan thil remna lai a nih avangin a thil dahin ţhenkhat a tauh thluk lai chuan inthiam loh hmel deuhin min lo en a, "Eng nge a?" tiin ka lo zawt daih thung. 

"Vitamin leh nachhawkna a nih hi. Ka lei loh chuan lei nachang i hre dawn lo" a ti dut dut a, thilthlawnpek ka la ngawt thei lo ang. 

"Ka duh lo..tikhan hawn leh zawk rawh. Mamawh hun in la nei dawn tho a, vitamin leh nachhawkna chu lei sual a awm thei chuang lo. Ka mamawh chuan ka lei ve mai ang" ka tih tak hmawk hmawkah chuan min ngaihtheih loh hmel tak hian a thaw hawk a, "I mamawh tih pawh i inhriat loh kha. La mai mai rawh..i duh ngang loh leh paih la" a ti leh hmuk tawh a, polythene chhunga damdawi awm chu ka tuai ka tuai ringawt. 

Ka dinna ep chiahah dingin bang a ngheng a, a kut a kuangkuah hlun bawk a, customer an la awm lo bawk nen, nuam ti lo hmasak zawkah ţangin "Engtia ei tur nge?" ka ti ta nge nge a, min rawn hnaih nghal ruak ni berin ka hria. Kar loah ka bul chetah a ding a, damdawi chu la chhuakin phur deuhin eidan tur min hrilh a, "I vun a dâng a, luhaia tluk a hlauhawm" a ti tel zauh bawk a, damdawi ţha lo ka ei ţhin vang a ni pakhat tih chu hria se taksa ti chak thei damdawi hi min lei miah lo ang. 

"Nachhawkna hi chu inven nan kawl mai mai rawh. Bag ah ak la, ka awm loh hlana i khua a lo sik hlauh chuan i ei dawn nia" a ti vei thlap a, min naupangchhe chei leh lutuk chuan nuih te lam lam a ti za alawm le.

"Customer an va awm lo ve" hawi kual vut pah a a tih chuan "Thawhţan tukah hi chuan mi an vang lutuk. Kan dawr meuh pawh a reh ruih zel" tiin ka lo hrilhfiah a, ni sakei a nia, tuman phurna an nei ngai lo. 

"A nih chu" a ti ban charh a, amahin a kal ve mai dawn maw tih laiin "Min lo thlah la" a ti hem mai a, han hnial ngawt dawn ila damdawi min pe tura lokal a ni ve tho bawk si.

"Kal rawh" tih sap pahin a nâkah ka nam a, tim daiin a hnungah ka kal ve a, U Martin min lo en reng tih hre mah ila a lam ka hawi duh lo tlat a, ka mitsir chuan chiang lo ruaiin ka hmu tho. 

Zonunmawia lah chuan a be bik chuang lem hlei lova, step ah em chuan chhuk thla ve duh lovin "Ti hian ka lo en liam ang che" ka ti tlat a, min kai lui tlat bik lo. 

A tlan liam hnua ka lut chu Nutein "I ti thei pap pap hle mai. Pakhat zawk a reh fel chiah tihah midang i nei lehnghal a nia" a lo ti lang lang a, a awki chu a ngeiawm em em mai lehnghal. 

"Ka bialpa a ni hleinem. Ţhian chauh alawm" tiin inveng ve mah ila "Ka awih lo. Eng emaw awm lo se chu Zonunmawia te ang kan dawrah a lokal reng peih lo ang. U Marti pawn i rawn thawh ve hma chuan a lokal ngai lo a ti alawm. Damchhung reilote mi pasal tana hman te chu a peih pawh i peih zawk e a" a ti hlak hlak a, ka sa ve phat mai. 

"Heta lokal tur hian vawikhat pawh ka la ko lo. Chu chu i lo hre ve mai mai dawn nia" ka ti ve ta hmak a, inhnial fiam hi chu kan nei ţhin na meuh mai, tun ang hian min la ţawngkhum ngai lova, min zuam zel loh nana chhang let ka ni. 

"Zahzum hmel deuh hi a rukin an lerh duh an tia, nangpawh ze zawi deuh angin i awm a, mipa lem vel i lo thiam ber zawk sia" nui hak hak chung hian a ti leh hram a, fiamthu anga lantir a tum a, a fiamthu lo tih erawh ka hria. 

"I tih danah hian a rukin i lo ngaizawng chiang mai. Kan inkawmngeih tawh alawm, ka lo biak dawn che nia" a awki ang chiahin ka ti ve a, a hmunphiah lai chu chawlin hmunphiah fawng humin a ding at a, a kut a no zêk bawk si nen, a kutchâng var pap danah a hum nghet viau a nih hmel. A thin a rim tihna a ni mai. 

"Awii..in ho mai mai e. Mi pa vanga nula pahnih in inhnial hi a zahthlak a nia aw. Dawr khata thawh ho chu inngeih tlang deuha awm tur" U Martin a lo ti hlauh a, dawh mai mai lova min tih ang chiaha ka tih let ve chuan a ţawngkam a thlahdah lutuk tawh lo deuh ang chu. 

"I nei thei dawn chuang lo. U Kimkimi nen an innei leh tho ang" a la ti ţalh a, lo nuih hak pah hian "Ka nei dawn ka tih lai ka hre hauh lo. Nei daih mah la engahmah ka ngai lo ang" tiin ka ţawng el a, midang chu nei se hrehawm ka ti hle awm sia. 

Chhun awl laiin Rintluangi a lokal a, "I bialpa nen chuan in tawp tak tak a mi?" a tih chuan ka lo thaw hak ringawt a, "Engati nge in inţhen a?" a ti deuh ha a, "Sawi rih lo teh ang" ka tih chuan min zawt zui bik lo. 

"Siamin a rel che a nia aw. Remruati chu ka rin dan chiahin Nutei a deusawh thiam tawp a ti. Pa te entawn tlak loh, chhungkua a inhau reng ho hi chu an chaltlai duh lutuk a ti vel a, ka khak hlak kha" a ti a, ka lo nui mai a, a duh ang chhanna a hmu lo aniang "Eitur ka la dawn..ka lak kep ang che" tih leh kal a rual a, dan pawh ka dang buai lo. 

Bakilh remna bula ka damdawi dah chu ka melh leh zeuh ţhin a, zan hmasa lama Rengi leh Zualtea inbiak dan ngaihtuah letin keimahin ka nui leh ţhin bawk a, fiamthu a thawh theih chuan a ţha lutuk, amah hrim hrim a ţhat phawt chuan ka tan chuan chu aia lawmna tur dang chu a awm chuang lo. Theih phei chu nise ţhian angin min rawn be leh bawrh bawrh se la, min kuah thuak thuak pahin thu ho deuh deuh sawi leh se ka ti ţhin a, chung berkher chu a la hlat hmel bawk si. Mahse, engtik niah emaw chuan ţhianţha tak kan la ni leh ngei ang. 

"Kha i chow ve tur. Ka patea a lo zin a, ka leisak ang che. Pawisa min pai alawm" a ti siam siam a, "Pawisa i pe nghal a mi?" tih pahin ka ta tura a tih zawk chu ka la a, a buk nghat rual chuan "Pek sak ka ngai lo. Ei zawh hunah ka pe leh dawn che nia" ka ti a, chhun thil ei man na na na chu ka nei ve alawm. 

"A ngai teuh lo mai. Ka patea cham chhung ang hi chu pawisa ka neih ve theih lai tak a nia" tiin a ţang ve tlat a, ka ţhutna bul chhuatah a plate a dah a, amah lah chu a kal daih a. A ngaihna hrelo deuh a ka hawi hu hu laiin ţhutthleng hniam nen a rawn let leh a, ka bulah a rawn ţhu ve a. Thil ei dawn chuan a sang ur a ţhut aiin a nuam zawk hrim hrim.

"I patea chu khawi a mi nge?" ti a ka zawh chuan "Lunglei, ka pa ai pawn min duat zawk. A rawn zin hi chuan pawisa min pe reng zel. Tunkar ala awm dawn a, tunkar chhung chu eitur ka leisak ang che" intithei deuh hian a ti a, kan in en a, inbe be reng ţhin mah ila vawikhat nan a tak takin kan in nuih var var a.

"Vawiin bak a ngai lo. Ka ti hek lutuk ang che. Min leisak ai i khawl daih dawn nia" ka tih chuan "Pawisa ka khawl thei lo. Bakah i bula thil ei ka duh hrim hrim a, mahni chiah a awm reng hi i ning ve lo mi? Ka fiam che leh nui miah lova min kalsawn zel chang i nei a, min fiam let ve te ka ring ţhin a nia" a ti bawrh bawrh a. Khawlum lai pawh a kawrban tluan ka ha reng te hi min fiam nan a hmang ţhin a, a lawmawm loh chang a awm ve alawm. Ka ser ţhing lutuk hliah nan a ti ka lo ni bawk nen, ka nuih theih a ring em maw ni.

"Remruat tunlai chu Zonunmawia hi a lokal reng a, U Mart-i bulah a awm vak tawh ngai si lova, engtin nge in inpawh thut theih a?" tiin min zawt ta nge nge a. Min zawh chakna a rei tawh viau ang. Thil awmdan hre nial nual mah se ka sawi ngai loh avangin chiang deuhin a hre lo a, a rin loh deuha kan inpawh zêk mai hi mak a ti a nih ka ring ber. 

"Ţhian ni tur hi chu kan inpawh vat mai" ti a ka lo chhan chuan mak tih hmel deuh hian min lo en tak tak a. 

"Sawi dikloh ka nei mi?" mit hmul kân ak a ka tih chuan "Nei lo. Min chhan duh ka ring vak lo a, ka zawh chakna che a rei tawh lutuk. Ka hlau che a ka zawt ngam lo mai mai che. Nang hi chu i mak ve a, kan inpawh viau tawh emaw tih pawn i hrang leh daih zel a. I u thih hnu phei kha chuan ţhian tak tak kan nih ve tawh ka ring a, mahse i hrang leh tho a, thil sawipui tum chein i sawi ţha duh ngai bawk si lo a, phone lah i duh hun teah bak i la duh bawk si lo" a ti a, ka ring dik lutuk chu ka nui tawp. 

"Keima lam chu duhtawk phawt teh. Nang ve hi chhungkaw chawm nan em ni hna i thawh ve a?" ka tih chuan lu a thing mat mat a, "Ni lo e..ka pa hi pastor a nia. Fa tlum ber ka nia, lehkha ka thiam loh bakah ka zir peih lo a" a ti ta mai a, mak ka tih viau laiin ani chuan inthlahrung hmel a pu a, tuman an chhungkaw chanchin an sawi loh bakah ka ngaihven zawng a ni lo a, ka lo hre lo a ni. 

"Ipa in a chawm thei awm tho che sia, ivan thawk peih hetiang dawrah lehnghal" ka lo ti a, a dinhmun a ding tam tak chuan an peih dawn lo sa. Lehkhazir peih tawh lo mahse an peih chuang lovang.

"Lehkha ka zir peih tawh loh chuan ka thawh awm tawk ka zawn ve angai a, ka pa in min chawm thei ringawt a eng hna mah min pe thei chuang hleinem. Thei pawh ni sela tling lo deuh a ka luh chuan ka tan a zahthlak dawn e. Hna ka thiam awm bawk si lo. Chutiang vel nuaih tur chu ka peih lo. Hetia ka mamawh leina tur thawh chhuah ve theih hi ka duh ber. Bakah ka pa hi mi pa ang a ni lo. Thingtlanga kan awm lai pawn ka ute hnenah mi dinhmun in hriatthiam theih nan a tia, an hunawl ah chuan mi inah te a inhlawh tir ţhin a, tunah chuan hna an nei tawh a, ka pa a pension ţep tawh bawk a, keipawh in a awm mai mai lova dawr a ka thawk duh hi a lawm zawk" a ti duah a, an chhungkua chu ka ngaichang ru khawp mai, an awhawm ka ti takzet bawk. Thildang kan sawikual zel a, rin aiin a ngainatawm daih a, a hma kha chuan tumah kha ngainat ka tum ngailo hrim hrim a, Rintluangi erawh ka biak duh loh chang pawh a min zui char char duh ţhin kha a nia, ngainat loh theih a ni lo.

"Nakinah chaw ei ah ka la sawm ang che. Chaw ilo ei ang a, i lo riak nghal dawn nia" a ti a, ka plate ruak a la a, a ei ruahna nen a chherchhuan a, "Nitin kan eidun tawh dawn nia, dawr kal a nuam sawt dawn nih hi" a ti leh a, plate ruak dahchhuak tur chuan a kal a, kum tam tak hnu a hmeichhia ţhian ka siam leh awmchhun a ni. Ngainat a nel ve ka lo tum lo ţhin te kha ka inchhir leh hnuhnawh a, tupawh ka hmusual em em vek a, min lo fiam ţhin te kha min tih el na mai mai ni a ngaih chang ka nei a, min nuihzatna mai maiah ka lo ngai tlat ţhin. Hrechiang hawt lova ngaihdan ka siam zung zung ţhin hi keipawh inenfiah nasat ka ngai ve tho mai. 

Zanah chuan darthlalang hmaah ţhuin sana ka en zeuh zeuh a, ka phur tehchiam lo. Ka pa lah chuan a damlo der nge a damlo tak tak pawh hriat si lohin thawm a nei sek reng a, ka kham takzet a ni. Ka ţhutna hmaah Zonunmawia damdawi min leisak kha ka dah a, min hrilh ang ngeiin chaw ei khamah ka ei thlap a, min ngaihtuah tak tak nge a der mai mai ni ang tiin ka inzawt nawn tlut tlut a, a der mai mai tur chuan ka phal lo a ni. 

"Mate, hei i ţhianpa a lokal a nia" tia ka nu'n min koh takah chuang muangchangin ka tho a, ka lo rin ţhin dan anga ka phur lo hi keipawh mak ka inti. Ka boruak tawnin a zir loh em vang te pawh a nih ka ring. Ka pa lahin awngphah hnuaia ka pawisa dah thuhruk a lo la leh vek tawh a, inpuang ve mai lovin kan hriatchian hnuah pawh a ţang tlat a, tura hrai hlumah min vau leh tawh lehnghal, tlan bo daih a chakawm rum rum zel. 

Pindan aţanga ka chhuah chuan a lo ţhu fel than tawh a, tawite a nuih pahin a lo ţhutna ţhutthleng ah chuan ka ţhu ve a, kan inhlat viau thung. A sir te ve veah kan ţhu a, a lai a awl duai a, chuti chung chuan nasa lo te a a perfume rim rawn nam chu ka hip vang vang a, ka ngainat zawng tak a ni.

"Ka lo kawi zuai a" a tih chuan ka lo nui hak a, a inthlahrung ve deuh niin ka hria. 

"Lo kawi zuai pawh ni la i fel hrim hrim e" ka ti a, min ngaihpawimawh ţhin avang ringawt pawh hian ka tan chuan a hlu.

"I pa ka va ngaihven ange" tih leh ka nu chuan thawh a rual a, pindanah a lut bo nghal daih bawk. Thawm a inhriat theih vek a, min ngaihtuah loh phah a nih ka ring. 

"A damlo mi?" tiin ka pa chanchin chu min lo zawt ve vat a, "Aniang..ka hre bik lo. Rui deuhin a lo haw a, a luak a" ti a kimchang deuha ka lo hrilhfiah chuan "A zia lo hle mai. Zanin chu a ti ti peih dawn lo a ni maw?" a ti fiamthu a, U Tluangtea nen an rawn kal zan te khan ka pa chu a lo phul hlut a, mak a tih a, a nin ruk ka rin nen, chutiang chuan a awm bik hauh lo. 

"Ka rawnkal ang ti tho mah la i rawnkal ka ring vak lo a, chuvang chu a nia pindanah ka lo tawm bo daih" tiin thu dang ka sawi a, sawi zel tur lah chu a vang phian lehnghal. 

"I mitmeng a dik lo?" tih charh pahin min rawn ţhut hnaih a, hnai deuhah min en bawk a, tawlh sawnna tur a awm bawk si lo chu hnung zawngin ka eu a, ka zam em em mai lehnghal.

"Ka chau ve alawm" ka tih chuan "Ţhian i kawm ngai em?" a ti ta daih a, ka thaw huai mai. 

"Ţhu ţha la ka hrilh ang che" a awm a nam ţung paha ka tih takah chuan nui hawk chung hian a ţhu ţha a, kan insi reng tho. 

"Ţhian ka kawm vak ngai lo. Diary a ni deuh mai" ka ti a, Zualtea hming ka lam teuh kher mai. Rintluangi nen ţhiana kan insiam tak thu pawh ka sawi tel duh lem lo.

"Ţhian kawm zir rawh. I duh chuan i ţhian ka lo ni ang" inhawng taka a tih chuan ka lo nuih liam mai a, hepa hian rei deuh chhung chu min lo zirchiang ru reng tawh ang ka ring. Mihring chuan ţhian kan mamawh a, keipawhin ţhian ka mamawh ve tih thlengin a hre bek a, ka mamawh ang a hre thei lutuk ringawt. 

"Chuvang chuan mi min hmu tura i lo kal ţhin? Kan pahnih a ţhian nih i duh vang a mi?" ka ti a, thil dang a awm vak ka ring lo reng a ni. Ka beisei hran lo bawk a, ţhian chauh pawh nise min ngaihsakna hi a tak tak nise ka duh a a ni mai. 

"Min hriatchian chak ang chiah khan ka hrechiang ve chak che" zawi deuh tak hian a ti a, min hrechiang mah mah tawh ka tih laiin hriat duh a la nei cheu a nih hmel. 

"I hre ţeuh tawh alawm. Englai ber nge hriatchian i la duh a?" ti a ka zawh chuan ka mitah tak en chung hian "A vaiin" a ti sup a, ka thawk thleng chuan a buai leh vek tawh a ni ber. Mahse, bialpa ţhen hlim ka nia, ka hnaih tur a ni rih lo. Ka duh em em, ka rilru leh thinlung zawng zawng luahkhat ţhin tu mah nise mipa dang ka hnaih nghal a nih chuan Zualtea natna ka siam belh sak mai mai ang. 

"Ka zawhna chhan let loh i la nei?" a tih chuan amah pawh en tawh lo hian "Eng ber kha nge?" ka ti liam puat a, ka phi cheng tawh a ni ber. Ka awmdan chu ka sawithiam lo, ka zam takzet tih erawh ka hria. 

"Min duh tiraw?" tiin U Tluangtea te ina kan kal zana min zawhna ngai bawk kha min zawt leh a, ka la chhang let miah lo tak alawm. 

Ka ţhu kun lup rep chu ngaithei lo ni awm takin ka khabe a dawm a, a lawm hawiin min kuai dak zui zat bawk a, a chetdanin min ti hamhaih lutuk chu ka ang deuh pham a, ka kâ aţang chuan eng thu mah a chhuak thei lo. Amah hian 'ka duh che' ti sela chu dawnsawn dan ka thiam deuh ang a, tuna a zawhna hi chu chhan ngaihna ka hre rih lo a ni. 

"Ka rindan hi a dik em?" ti a min zawh leh chuan "Min ngai ropui hle mai. I sawi loh chuan i rindan te chu engtin nge keiin ka lo hriat daih theih ang?" ka ti a, thil dang sawi se ka tih avanga sawi kual duah ka ni. Kan inhnaih bawk nen, ka thaw a chham thei mai dawnin ka hria. 

"Ka sawi zawh chiah kha..min duh tiraw?" a ti nawn leh a, mit ka chhing leh a, Zualtea hmel a rawn lan rualin rang deuhin ka meng leh a, diktak chuan ka duh tehmeuh mai, ka duh lutuk hi min ngaihven ve hma phei chuan hrehawm ka ti hial zawk ţhin a, mahse ka inthiam lo a ni. 

"Min zawh dan hmangah hian ka chhanna tur pawh rin dan i nei thiam tawh tho ang" ka tih chuan a kiai suk a, a inringtawk lutuk te chuan min ti zam letling zawk a, ka rilru put hmang chu a hrechiang a ni. Tun hnaiah chauh ni lo, dawr a rawn kal a chin aţang khan a hre daih tawh ang. 

"I sawi ngei ka hre duh" a ti a, ka nute an awm hnaih avangin a aw chu a zawi hle a, a ri chang chang chauh a ni. 

"Ka sawi thei rih lo" a aw ang chiaha zawia ka tih ve chuan min en vang vang a, ka mit aţang chuan chhui thlain ka hmuiah a tawp a, chutia ka hmui a melh takah chuan zam luat vangin ka hmui hnuai chu ka liak huh zauh a, a lo thaw hawk a. 

"I la sawi ngei ang" a ti a, tawitea nuih pahin ka khabe a dawmna chu a thlah a, a inla hrang zui nghal a, a thinrim deuh emaw ka tih laiin "Ka nawr lui lo ang che. I hun tawn mek ka hria alawm. Chhanna chu ka hria mah se i sawi theih hun ka nghak ang" a ti leh ang lawi a, ka beisei hauh lo thil chuan min ti hlim lo ka tih chuan dawt a ni ngei ang. 

Ka pa khuh ri ka hriat leh chuan "A va ninawm tak" ka ti hlak a, ka ngawi lehnghal hmak a, tum loh deuhin ka phun chhuak palh a ni. 

"Eng mi pawh nise tuna i pa lo hi chu pa dang i nei dawn lo a nia, i nei dawn tawh lo bawk" a lo ti zeuh a, a thil tih hre lek lova a thlavang a lo hauh avang chuan ka melh vak a, za lo deuh a lo nuih hawk pahin ka mal a beng thuk a, "Thingpui va lum rawh" a ti zui zat a. 

Thingpui ka chhuan hnua ka let leh chuan ka nu pawh pindan aţangin a lo chhuak ve chiah a, a mangan hmel khawp mai. Chu chu Zonunmawia pawhin a lo hmu thiam aniang "A nuam sam nange?" tiin ka nu chu a lo zawt a, ngaihsak a duh avanga a tih der ţhan em avangin keichuan a ti der a nih ka ring hmak. 

"Aw...zanin chu a nuam lo ve deuh a ni...engmah a la ei si lova eitur kan siam sak ange leng reng rawh aw" ka nu chuan a ti a, a hah ţhin tehreng nen, chau deuh chung pawha ka pa a buaipui hram hram ţhin hi chu thin a rim hlur zel. 

"Damdawiin a kal a ngai em? A ngaih chuan sawi hreh suh u aw" a ti leh a, a ngaihtuah tak tak niin ka hria. 

"Zanin tut tutah chuan a ngai em dawn mawni? Duh leh naktuk zingkarah i nu ka rawn bia ang a, ka chawlh theih leh opd ah ka kalpui lawk mai ang" ka nu'n a tih takah chuan a sawi zui ta bik lo. 

Thingpui kan inzawh hnu deuhah chuan "Ka haw san phawt ang che u" tih leh thawh a rual a, keipawh ka lo ding ve nghal vat a, ka nu chuan a mawiah chelh a tum ve viau tak nain naktukah a ngai te bawka hna kal a ngai leh dawn si a, a leng rei hran lo. 

Step ah kan inzui chho a, Zualtea nu kan la hmu zui a, kawtah phone a lo hmang a, 'Tunah rum rum a ngai chuang hleinem. Coaching tih vel te chu kan sawi pawn i ngaihven ngai mang si lo a' a ti lawng lawng a, Zualtea a bia tih ka hre chawpchilh ve nghal mai. A fapa tana min pawm thei mang si lo mipa dang nen a min hmu chu phone pawh dah lovin inchhungah a lut hmak a, kawngkhar lah chu a khar ring em em mai lehnghal a. Min hnawhchhuah tumna a nei tawh miah lo hi mak ka ti deuh ţhin a, awmna tur kan neih loh hlauin Zualtea zawk hian a vau em maw ni chu aw ka ti rum rum ţhin. 

"Vawiin lam te i khua a sik lo tiraw?" motor kawngkhar a pawh hawn vek tawh hnuah pawh lut mai lovin a la ding rih a, kan inchungnu kha chu engvakah a ngai ve lem lo. 

"Aw sik lo e..hmanni kha chu ka pang a lum ve mai mai a nih kha. Ka ţha vek tawh alawm. Kal tawh rawh" ka lo ti sawk sawk a, a nuih a za khawp mai. 

"I tlai lutuk chuan Sangsangin a lo ngai ang che. Keipawh naktuk kal hma ka ngai sia, chawhmeh ka siam lawk dawn" tih paha a awm a na vak lo a ka nam chuan ka kut a lo man a, a hum zui vang vang a. 

"I vawt thlar zel a, thisen i nei tlem aniang. Damdawi kha ei ţha rawh aw" a tih chuan "Tehreng mai" ka lo ti var a, ka kutphah te hi a sen ve vak ngai lo reng reng a, hna ka thawk hah bawk nen, ka da lâp tak tak reng mai. 

"Muttui aw" a ti a, ka kut chu la kanga a hmuia a chuktuah lai chuan lai deuhin ka lo nui a, ka let leh lamah chuan inchungnu ni lovin Rengi ka hmu ve thung a, ka nuih ve tak nain a tum hmuk a, biak pawh min be duh lo. Zonunmawia ka thlah chho vel kha a lo hre tawh a nih ka ring a, an zia hi a mak ve ngawt mai. Zualtea unau an fel nen midang ho hi chu an rilru a zimin an duh loh dan deuha awm chuan biak an huphurhawm hluah hluah ţhin. 

Inchhung ka luh chuan ţhu muang tawh lovin choka ah ka lut tlang a, ka nu chuan chawhmeh a lo ti lum a, ka ngei thei a nia.

"I buaipui chuk zel vang anih hi a sim duh miah loh. Ngaiah a nei tawh che a nih hi. In reng mah ila ka nat chuan min buaipui leh tho ang tih rilru a pu tawh a, i nep emai" ka ti nghal hlak hlak a, a chang leh thinrimna hlir a zawng a, a chang leh ka nu kutthlak a tum a, kan mutthilh daih hlau ni awm taka zanrei a au ruai ruai chang lah a ngah, diktak chuan ka kham ve tawk tawh a ni. Inchhung lah a kil khawr ber thlengin a hai peih a, pawisa a dahţhat ve theih bawk si lo. Kan pang a sik loh rualin a bo a ni nghal zel a, a hahthlak takzet a ni. Ka pa ka ngaithei lo hi min dem duh chuan min dem mah se pawi ka ti lo. Hetiang mihring chenpui ve lo tu chuan a hrehawm zia an hrethiam lovang. 

"Buaipui a ngai a nih hi mawle aw. Naktuk lamah in entir se a ţha ang. Hna kal i ngai awm sia, keimah zawk hian chawlh ka dil mai ang" a la ti tak deuh deuh a, "Hna kal ngai lo mah se ka hruai lo vang. I duh leh nangmah khan buaipui vek la, ka inrawlh dawn lo hrim hrim. Amah avang hian changkan pawh ka changkang ve thei lo a, ka buaipui dawn reng reng lo" ka tih hlawih hlawih a, 'pa' tih pawn ka ko ţha peih tawh lo. Biak a ngaih chang pawhin ka mawl biak tawp zel a, keini pafa hi chu inpawh lo tak kan ni. 

"Kan thinrim viau pawhin nakin a kan inchhir lehna tura ţawng loh hram hram tur. Ipa a ni a, fa nangmah chiah kan nei tawh che a, nang lo chu buaipui tur an awm chuang lo" a ti nem diai a, kei ka thin a rim telh telh thung. Mi a ti zak ngun tawh bawk si, hetiang em em hian ka haw ngai bik lo a, mahse tunah chuan a engkim hi ka haw tawh a ni ber. A laka ka hel ta tlat mai pawh hi a cho chhuah liau liau a nih hi. 

"Ka buaipui dawn lo ka tih chu" ka ti vin tuar a, engtin pawn awm se ka en liam tawp thei ang ka ring. 

"Ţhen rawh, ţhen la kan pahnih hian indang ila hma kan sawn chak zawk ang. Tunah pawh sawn a ti der mai mai a nih saw. A luak kha chu thu hran, patling pui rum dur dur reng tur chuan nat viau a ngai. A ruih em saw, sawti khawp a rui a zu a in theih chuan a na tawk lo a ni mai. Min phut tawh reng reng suh. Ka hlawh ka pek ţhin che pawh hi sawpa tan sawn hmang miah suh ang che" ka ti buan buan a, ka thinrim lutuk chu ka thaw hlawp hlawp mai. Ka nun leh ka u nun engkim tichhe vek tu a ni. Kan chhungkua nuihzat bur a min siam tu hi ka haw ngawih ngawih a, ka nu'n a buaipui ngat phei chuan ka tha a lo na ţhin. 

Pindanah ka lut tau nghawng nghawng a, ka pindan piah chiaha ka pa mu chu "Khuh vak vak reng suh" ti a ka vin vak hnuah earphone ka vuah a, ka chhungril takah chuan inthiam lohna chu a awm ve ţhin ngei alawm, mahse, ka ning tawh em a ni. 

💛💛💛💛💛💛💛

Dawr ka thleng chiah chu Rintluangin min lo pawt hrang nghalin "Tihsual i nei em ni a? Kan inpawh ve dawn chauh a U Martin hnathawk te ban ţhen a ngai tih vel te a sawi a, nge tih sual ka nei zawk? Nutei nen in inhauh vang kha a ni angem? Awii..keichu ka rilru a hah e i ban chuan ka bang ve ang" a ti mawlh mawlh a, counter lam hawiin ka inher nghal a, U Marti a awm hauh lo. 

"A chhuak lawk a nih kha..a lo let ţep ang" Rintluangi bawk chuan lo ti lehin kan ding dun ran a, customer awmchhun pawh kan buaipui thei lo, an tam lo bawk a Nutein a buaipui vek a, min ban dawna a hriat vang aniang a phur sarh mai. 

U Marti a rawn let chuan keimah leh Siami min ko a, thla chanve em pawh la kal lo mah ila thla khat hlawh min pek chuan engkim ka hrethiam nghal vek. 

"Kan dawr ang hi in ngaih anga hlawk a ni lo a, hlep a tlem angreng hlawm a, nizanah ka nu leh pate nen kan sawikhawm a, hnathawk te ban ţhen turin min ti a, ka duh reng vanga ti ka ni lo. Keichuan thawk ho vek ila, awm dual dual zel ila ka duh ber a" a ti a, en pawh min en lovin rang deuhin mit a khap leh ţhin a, a sam a tuai zeuh zeuh bawk a, a zam ve hmel khawp mai. 

"Remruati te hi ban i tum tihna mi?" tiin Rintluangi a rawn inrawlh a, U Marti chuan, "Ni mai ang chu. Hnathawk an tam a, dawr hi ka hlawk pui vak lo a, ka nuten ban ţhen mai rawn an tia" a lo ti leh a, dawr chhung chu a reh dûk a, tuman sawi tur kan hre lo a ni ber.

"Remruati hi chuan hna a neih ngei ngei a ngai a, keimah hi ka duhthuin bang ta ila a a thawk zawm thei ang tiraw?" ti a beisei loh dan lutuk a Rintluangi a ţawngchhuah takah chuan mak ti zet hian ka en a, midang natna ka thlen a, chu natna vek chu keimahah a lo let veleh tawh dawn a nih hi ti rilru neuh neuh chungin U Marti ka en leh a, ani pawh a mitmeng a buai nak mai. 

CONT..