DEAR DIARY-14

DEAR DIARY-14

"Remruat, i duh leh hna dang zawn pahin tun thla chu kal tluan tho la, i kal tluan lo a nih pawhin hlawh ka pe tawh che a, ka hrethiam tho che" U Martin a tih lai chuan "Ka zawhna kha chhang ve la" Rintluangin a lo ti leh a, henu tê hi khawsa thei deuh ni chunga dawra a thawk leh, chapona nei hauh lovin keimahni milpuiin a awm ve zel ţhin tih ka hriat aţang khan ka ţhian pawh nise ka ngaisang ru tlat a, a pa hnathawh pawh uan nan leh midang deusawh nan a hmang ngai miah lo a, inpawh deuha kan ti ti dun hma phei kha chuan engmah ka hre lo hial a nih kha. 

"I duh chuan i bang tel thei reng alawm. Nutei leh Zira an awm a, kan awm thei mai ang. Hlawk lo deuh a dawr neih ve reng chu chhungte lakah pawh a inthlahrunawm a, keichuan ka ngaina vek cheu a, hetianga awmkhawm dul dul hi a nuam pawh ka ti. Mahse, tuna ka thil tih hi ka nu leh pa duh dan a ni sia" a ti zuai raih a, Zira hian customer a buaipui ve em em lova, kudam ah a awm tam zawk a, rit la tu atan kan hmang a ni ber. 

"U Marti chu Remruati berkher i ban tir a i mak ve e..keini ho zawng zawng aiin hna a mamawh zawk a, i hriat ve vek kha" Rintluangi chuan han ti ngial mah se "Customer an tam tawh a, va ngaihven rawh" a ti hmak a, ka tan a ding zo viau nain a thu lo ve em a ni. 

Pawisa tlang khawih neuh neuh chung hian keichu ka la ding reng a, Siami phei chu engmah sawi lovin a kal daih tawh. Rintluangi pawh thinrim deuhin a kalsawn a, ka nu hrilh ngei a ngai dawn bawk si, ka mangang ru takzet a ni. 

"I taima a, i tan chuan thawh lehnghal theihna tur dawr dang a tam ngawt ang. Lungngai lo phawt la, ka duh vang a ni lo tak tak a nia aw" a ti a, sawi lo mah se hrehawm a tih zia a hmuh theih hial a ni. 

"Ih e..tu hnenah mah ka la inhawng ngai lo. Mahse, nangchu harsatna i tawh a, pawisa puk tur te i mamawh chuan lokal tawp rawh aw. Ka theih phawt chuan ka pui che ang a, pawisa i puk duh pawhin ka neih chuan ka puk tir zel ang che" a ti dam thlap a, lu ka lo thing ve thung. 

"Chutiang em chu a ngai lo turah ngai ang. Chawlh nghal i phal tho a, vawiin bak ka lokal tawh lo ang aw" pangngai thei ang ber a lan tum chung hian ka ti a, a ruk chuan ka rilru a na ve takzet a ni. 

"I thu thu a ni mai. Ka ţhiante dawr nei ve tho an awm a, thawmhnaw dawr a ni thung a, ka lo bia anga thla thar aţanga an chhawr theih dawn che chuan ka lo hrilh ang che" a ti a, rilruah ka nu bak a awm thei lo, he hna ka hmuh tirh a a lawm zia te kha ka la hrereng a, chuti chung chuan hrehawm ka tawrh tir leh dawn tho chu a nih hi. 

"Chawhma ka awm anga chawhnuah ka haw ang" ka ti leh a, inngaihtuah harh nan hun ka mamawh rih a, chhuanlam tur ka ngaihtuah chhuah phawt loh chuan ka nu hnena sawi mam dan ka thiam lo leh palh ang. 

"Remruat hrehawm ti duh suh. Taima tan chuan thawh tur a awm ve reng alawm. Ka lo zawnpui ang che" hnung lama ka phei leh rualin Rintluangin a lo ti a, min ngaihtuah tak tak niin ka hria. 

"Ti love, kan ta a nih loh chuan ban theih reng kan ni sia lawm" ka ti chuai raih a, hrehawm ti viau mah ila a hnual zawnga ţawngkam neih ka duh bik lo. 

"Keipawh ka bang dawn. Dawr ruak zawng ila kan pahnih in kan sumdawng ve daih dawn mi?" a tih chuan "Sawi ringawt ai hian a harsa ţhin lawm. Pek lawk ţeuh angai ang a, a ruak a vang bawk si. Min ngaihtuah suh, a dang ka hmu leh mai ang" ka lo ti a, ka hmu leh vat thei angem tih phei chu ka hre lo.

"Ka lo zawng ang. A ruak ka lo zawng ang a, bulţan na tur chu ka patea puk kan dil dawn nia, keipawn lehkha ka zir sang biklo a, sumdawn tawp loh chu thawh tur dang ka hre biklo a" a ti a, mak tak maiin ka awm a ti nuam huai mai. A tum chuan a tih theih ka ring tlat. Rintluangi chu keimah ang a ni ve lo. A lu a zo vah a, dawr ruak pawh a hmu leh thei mai ang. Bulţan sak thei tu chhungte a nei ţha thawkhat bawk. 

"Awm ta lo la engtin nge ka awm ang le" ka ti ve ta hial a.

"Ţhian kan nih hi. A ruak kan hriat hriatah kan lut tawp anga, a aia ţha kan zawng zel dawn nia, ka patea chuan min sawihmuhna a rei tawh a, ka ngaihven duh ngai lova, mahse ka hrethiam tawh. Ban mai theih a mi hnuaia thawh reng ai chuan lian hluai lo mahse mahni a tih ve a ţha zawk, kan sumdawng daih dawn nia" a ti zung zung a, tlemin awm a nuam ta deuh. 

"Tih ve dawn pawn pawisa tam deuh a ngai nghal zel a, ka nei ve hleinem. Nei ila chu dawr ka siamna a rei tawh ang" ka tih chuan "Ka hria, keipawn ka nei chuang lo. Ka patea pawisa kan puk dawn nia ka tih tawh kha. Dawr tur remchang ruak chu zawng phawt ang. Mahse thil engmah a tih zung zung theih loh a, lo hmanhmawh chung suh aw, chanchin kan inhrilh zel dawn nia" a ti a, a duh chuan bulţan na tur chu an pe thei dawn tih ka hria, amah ber hian a rilru thlak lo se ka duh ngawt mai. Pawisa nei tan chuan dawr hawn mai mai chu a harsa miah si lova.

Customer ka buaipui hlanin a lo bo daih a, dawr dangah a kal leh tawh aniang ka tih rilruk laiin "I haw hma in ei dun lawk ang" a rawn ti a, a plate rawn ken pakhat zawk chu ka lo laksak vat a. Pawisa a pe lawk leh thlap tawh ang.

"Hetianga an bantir chhan che hi Zonunmawia vang anih iring em? U Mart-i hian a hma khan leng turin a sawm zawk ziah sia" a ti a, a ngaihtuah kual leh nasa tawh a nih hmel. 

"Ni lo ang. U Mart-i chuan Zonuna chu ţhian ang bakin a ngai hleinem. Thawk tu hlawh pek nen indaih lo a inti ve deuh aniang" ka ti a, Mizo ah hi chuan mimal thil vanga hetianga in tuar tir hi a awm ngai vak ka hre lo. An pawi kan sawi nasa lutuk te anih loh chuan.

"Keichu ka ring deuh asin. Hmu tur chein a lokal ziah bawk sia, in inbe lai vel a hmu duh tawh lo aniang. Mihring hi rin ai daih hian rilru hi alo chhe thei ania aw. En mai a fel hmel deuh te hi a rukin an sual duh lutuk" a ti zat zat a, ka awih lem lo. 

"Chupawh nise a mimal thil vang ringawt chuan min ban lo sa. Harsatna a tawk ve aniang. Ka pawm thiam vek, min ngaihtuah duh suh" ka tih takah chuan "Nia ho lutuk. Kan sumdawng daih dawn nia, hetianga dawr lian hi kan neih ve hunah leng turin kan sawm vel anga" a ti ve mai a, a nui zui uar uar bawk. 

Chawhnu lamah hreh deuhin ka insiam a, midangin min biak loh laiin Rintluangi chuan taxi stand thleng min zui a, a ngai lo ti mah ila "I hun tawnin a zir lo a, ke a i kal chuan i chau lutuk ang" a ti tlat a, ka remti lo chungin driver hnenah pawisa a pe lui a, kan inthlenga min thlah turin a hrilh bawk a, taxi a chet rual chuan lungngai lo tur leh amah nghak tawp turin min hrilh a, "Aw le" ka ti ve tak nain awm mai mai paha nghah tawp chu ka tum bik lo. Kan harsa a, hnathawk lovin thla khat lek pawh ka awm thei lo. 

Inchhung ka luh rualin ka pa hnar ri ka hre nghal a,  ţhutthlengah a lo muhil a, a mutna bawr vel chu zu rim a nam huam mai. Harsatna tawh ve te hian min thlamuan lo ve thei a nia. Damdawiina kal a duh lo lehpek tawh aniang ka nu pawh a hnathawhna lamah a kal daih. Pindanah lut tlangin khum ka bel nghal chawt a, ka inthlak peih rih lo. Ka hlawh min pek pawh chu ka en nawn peih lo. Inren a ngai dawn a, hna ka zawn lehnghal char char angai bawk ang a, Rintluangi ka ring chawt thei rih lo. A buaipui chhung khan a ni chu buai lo mahse keimah ka buai dawn. In luahman tur tal chu ka thawhchhuah hram hram a ngai.

Zonunmawia engmah ka la hrilh lo. A ni pawh a hnathawhna hmunah ala awm ang a, rilru nuam lo deuh a awm tir ai chuan ka hrilh rih lo mai. Saisir a mu in ka u mutna ţhin ka chul thuak a, la awm se ka nu ho in kan vaiin ţangrual ila chu ka pa laktlakloh mahse tumah kan awt bik lo ang mawle. Hna aţangin bang thut mah ila ka thla a phang lutuk lo ang a, tunah chuan mitthi a ni ve tawh a, ko vak vak mah ila a lo let tawh dawn der si lo, a manganthlak takzet a ni. 

Rawngbawl paha thawnthu ka ngaihthlak laiin Rintluangin min rawn call a, "Zonunmawia a lokal a nia aw. Zawhna a ngah rapthlak lehnghal a, U Martin a ban ka tia, an inhnial zui a nia aw" a ti nghal bawrh bawrh a, hre lo tawp mah se pawi ka ti lo a sin mawle. 

"Engtin nge an inhnial a? Vawiin chu a haw hma a lo tih daih tur che alawm" ka tih chuan "Dawt ka sawi ngai lo" a ti ve ngei a, keiin an inhnial dan ka lo zawt leh thuai bawk.

"U Marti zawkin Ms-i hnenah a chhawr duh leh duh loh ka zawh sak a, min lo chhan veleh Remruati chu ka be mai ang a tia mah se Zonunmawian a phallo a" a ti nang nang a, "Engvangin nge a lo phal loh ve ngawt a?" ka ti a, ka lungawi chiah lo tih chu a hriatthiam vek ka ring.

"Aw...i thlavang a hauh vang zawk alawm. Msi chu biaksak duh suh keiman ka ngaihtuah sak mai ang a tia. I ban tir tawh a, a der mai mai a ngaihven zui a ţul lo a ti alawm. A sawi dik lo chuang lo a" a ti a, gas off in pindan ka pan a, Zonunmawia vanga min ban a nih a rin thu a rawn sawi leh hram a, mut ka duh thu hrilhin phone ka dah zui nghal a, U Marti ai mah chuan Kimkimi a nih ka ring zawk mah. 

Ka nu a lo haw chuan chanchin ka lo hrilh a, chhuanlam tur dang ka hre lo chuan thudik tak ka sawi a, pawi a tih ka rin tehreng nen "Pathianin hna ţha deuh a pe leh mai ang che" a ti then a, pawisa ka pek chu lak pahin "I hahdam ve thei tihna a ni mai. Thla hnih thum vel chu chawl ve rih rawh" min ti a, kan harsat tur zia chu a chhut thiam ve vek tho ang. 

"Nu Hmingte, Remruati a awm em?" mut hahdam ka tum laia Zonunmawia aw ka hriat chuan ka tho nghal uaih a, sana ka en a, dar7 a lo ri vang tawh. 

"Aw..awm e..lo ţhu rawh" a tih hnuah ka nu chuan min au zui lang lang a, ka hmu hreh ngang mai. 

Ka va chhuah chuan ka nu nen an lo ţhu dun a, an ep chiahah ţhuin "I van fel ve" ka ti mawi ve a, a ruk chuan lokal lo tawp mah se pawi ka ti lo thung. Kan inhriat hnuah vawihnih lai ban ka tawk tawh a, min hmuh dan a danglam phah ka hlau a ni ber. 

Kan pahnih chiaha awm ka duh loh tehreng nen ka nu lah chu ka pa ţhianpa in an in aţanga ka pa hruai haw turin a rawn ti a, chaw eikhamah a chhuak chauh kha a ni sia, a lo rui leh hman tihna a ni mai. 

"Zonun, tikhan lo leng reng rawh aw. Ka rawn let har lo ang" a tih hnuah min chhuah san a, kawngkhar a inkhar phui veleh ka bulah rawn insawnin min kuah nghal chawt a, a ngaihna ka hre lo khawp mai. 

"Tlaiah khan in dawrah ka kal a, i lo awm si lo a" amah zawk chuan a ti a, "Ka bang daih alawm" ka lo ti mai a, min khawngaih phah ka hlau a, rilru natna ka neih ve te hi chu sawichhuah kher ka tum lo. 

"Ka pui ang che" a tih mek lai chuan a sawi zawh hma hmain "Tun ţum chu min puih ka phal sak ang che. Mahse pawisa ka duh lo a, hna ka duh. Keimah chiah chuan zawn dan ka thiam lo a, dawr nghah tur min zawnpui rawh" ka ti zung zung a. 

"Dawr nghah tur i duh chuan a tam ang. Kan zawng dawn nia" a ti sam et a, a ngaih ang ngawt hi a ni awm der si lo. 

"Keipawn ka zawng ve dawn tho a, mahse ka ring dawn che a nia aw" ka tih chuan min kuahna a ti nghet salh a, a pang ka ngheng chial a, tun a lumna min pek ang hi alawm hman aţang tawh a ka lo thlakhlelh ţhin chu. 

"Hahdam phawt rawh, kan la hmu mai ang" dam thlap a a tih hnuah ka inthlahdul ve theih nan ka hnungzang chu a chul a, "I fanu angin min enin ka hria" ka tih chuan a nuih a za viau mai. 

💛💛💛💛💛💛💛

Dawr nghah tur chu rin aiin a lo vang phian a, bazar lun laiah chuan kan hmu ve ngei a, mahse hlawh a tlem em avangin Zonunmawian min duh pui lo a, hunawl a neih chang apiangin min vah chhuah pui a, inzui reng ta na na na chu kan inngainatna a thuk sawtin a bula awm nuam ka ti tial tial a, ka rilru put hmang min zawt ve ngai tawh lo thung. 

Min ngaihsakna a ti lang awl lo a, hun a neih chuan a lo leng ve zeuh zeuh ţhin bawk. A chang chuan min ngaichang a, min nghak a nih te ka ring ţhin a, hmeichhia zawkin a han tharthawh leh chu ka hreh ve tho bawk si. A buai zo vek tawh a ni ber. 

Zualtea pawh a kal leh tawh a, whatsapp lamah pawh min block ta bik lo. Kan inbe ngai lo tih theih a nih laiin ţum khat chu vainu hmelţha zet mai nen a an thlalak a rawn status a, ka lo chhaih fiam a, a ţhian a nih thu min rawn hrilh vat a, ka chhang let ta lo kha a nia. A insawi ang ngeiin hmalam pan tumin a bei zel niin ka hria a, ka lawm takzet a ni. Ţhian kan ni emaw, ni lo emaw, Zualtea tan chuan a ţha ber vek ka duh a, hlim reng turin ka duh bawk. 

"Mate, vawiinah Zonuna nen in chhuak dawn em?" gas herh hniam paha ka nu'n a tih chuan hna a a kal a ngaih thu ka lo hrilh a, mi buai a nia, min puih a duh viau chung pawhin hun neih ngang loh chang a ngah mai. 

"In chhuah dawn loh chuan a ţha a ni mai. I pa hi a nuam lo zual riau a, opd a kalpui ka duh deuh a, i hreh lem loh chuan Zonuna te inah ka ai i kal mai dawn em mawni le?" inthlahrun hmel tak hian a ti a, hna ka neih loh lai a lo ni kher bawk nen, hnial chak viau mah ila pawisa lak luh nei ve rih lo tan chuan chhungte hnial zawt zawt a nuam miah lo. 

"An phal dawn mi? Pi Hmangaihi ngaihdan a lo ni lo vel ange" tiin sawi hnawn ka tum a, Zonuna nen a kan inpawh em avanga hreh lo turah min ngai niin ka hria. 

"Aw..hmanni a a damloh pawh khan hruai rawh a ti reng zawk a, ka ai i awh theih dawn chuan tunah hian Pi Hmangaihi chu ka bia ang a, a remti em em ang" a ti zung zung a, rethei viau mah ila Zonuna te ina awmpui anga kal chu ka hreh ve ngang mai. Mihring hian chapona lai kan nei vek an ti ţhin a, a lo dik a nih dawn hi.

"Be chhin la" ban charh a ka tih takah chuan phone a phawrh sawk sawk a, pi Hmangaihi chu a be ta nghal a, eng nge a rawn sawi hre thei lo mah ila ka nu'n a chhan dan hmangah chuan a remti ngei a nih hmel. 

"Pawi a ti lo a nih chu. Tih tur vak a awm lo, a tunu tê kha a ninhlei ve vak lo a, hna hahthlak thawh tur a awm lo" a ti a, ka lo thaw hak a, ka hreh khawp mai.

"Rawngbawl a ngai dawn em?" ka tih chuan "Aw, mahse a zawng zawng chuan a ngai lo a, Pi Hmangaihin tih tur chu a lo hrilh mai ang che" a ti a, a sual lo tih chu hre tho mah ila tha a za zawk zawk lo kher mai. 

"Vawiin bak a ngaih loh chuan ka kal ang" ka ti ta nge nge a, ka hmuh hreh ber hnaah a kal daih tho ang ka tih rilruk laiin "Vawiin chu chawlh a ni sia, Zonuna pawh a awm ang" ka nu'n a lo tih phei chuan ka huphurh lehzual.

Kal loh theih ni hek lo le, phur lo deuhin ka kal a, gate pawh a lo inhawng thlap tawh a, inchhung ka luh dawnah door bell ka hmet a, Nu Hmangaihi ngei chuan min lo hawn sak a. 

"Lokal rawh i va hma ve" nui sanga tih pahin kawngkhar a hawng zau a, kal nawn leh ka tum tawh loh tehreng nen kal lo thei loin ka awm leh ta phawt chu a nia. 

"Chaw kan eikham deuh chiah a" a tih chuan "Thleng sil a ngai a mi?" ti a zawh pahin choka ah ka dak lut a, ka thil hmuh avang chuan ka nui hak a, ani pawh a rawn hawi let rang nasa mai. 

Ka professor ngei mai chuan thleng a lo sil a, a kawngah apron a suih bet bawk a, amah nen a inrem lo lutuk chu nuih loh theih a ni lo. 

"I lokal tawh maw?" a ti a, tawi tein a nui a, keipawn ka lo nuih let ve vat a, a thleng sil lai berkher ka hmu chu nuam a ti chiah lo niin a lang. 

"Aw, ka lo thleng chiah. Dah rawh ka lo sil chhawk ang che" tih pahin ka pan hnai a, "Hei ka zo ţep alawm. Sil tur a tam lo a" a ti ve tlat a, a bulah ngawi rengin ka ding a, hmalam en daih mah ila min en zeuh zeuh tih ka hria, ka mit sirin ka hmu thei vek. 

"Dawr nghah tur chu ka hmuh sak tawh che" a tih takah chuan ka ngaihven nghal hle a, a lam hawi pahin "Eng dawr nge?" ka ti vat a, ka nu hrilh ve nghal a chakawm rum rum alawm le.

"Damdawi dawr" tih chiahin min chhang a, zawh chin chauh min hrilh ţhin si a tiin "Engtia i hmuh nge?" ka ti leh hram a.

"Niminah hmeichhe ho bulah thil ka ei a, kan ţhiannu nauin damdawi dawr a hawng thar a, nizanah ka be fel" a ti chiah chu ka kuah thlawp lo chauh a ni. 

"Ka thawk nghal thei tihna mi?" ka ti hlut a, ka phurna ka thup hleithei der lo, midang te aia hna mamawh zawk ka ni miau a.

"Thei lo..dawr a i kal phawt angai ang. Tlaiah ka hruai dawn che nia" a tih laiin Kimkimi a rawn lut ve hlawl a, Sangsangi a kai a, a pasal hlui ka din hnaih lutuk chu a lawm loh hmel khawp mai. 

"Hnathawk turin i lokal nge i lo leng mai mai" ngeiawm zet hian a ti a, Zonunmawia chu ka din hlat nghal a, ka awmdan chuan a ti lawm nge ni, nui chungin min rawn pan a, kan inhmachhawn ran mai. 

"Inchung lamah khian tih tur a tam mai, darthlalang nawh te a ngai a, bal chhe te a awm chuan a lang mawi lo nghal zel a, lo han nawt rawh" min ti a, an chhung zing a mi a ni tawh lo chung pawha thu min pe ngam te hi a mak khawp mai. A zakthei lo ka ti dawn nge he inchhunga luh leh tum hian theih tawp a chhuah ka ti zawk dawn pawh ka hre lo. 

"Lo inrawlh ve lo teh Kimkim, a ţul chuan keiman tih tur ka hrilh ang" Zonunmawian a lo ti hlauh a, ni lo se chu ka chhang let ang ka ti deuh a nia. 

"Awmpui in nei rau rau a nih chuan a rawn thlen rual khan tih tur sawi zung zung ta che u. A tha chhawr miah loin hlawh in lo pe ringawt ang tih te ka hlau alawm" ti a insawithiam a tum lai chuan "Chhuak rawh" a lo ti hmuk a, kut hruk hul pahin Kimkimi chu a en reng a, a hmel a dur khap a, a lawm lo hmel chu Kimkimi ngei pawh hian a hmuh hmaih ka ring lo. 

"Nang chuan i tir hreh leh dawn a, ka pui che a nih hi..a nih loh chuan a ding nileng mai dawn a sin" a ti nang nang a, pakhat lahin "I puihna ka mamawh lo ve" a ti nghut  a, apron suihna chu pawt belhin a khai zui nghal a, Sangsangi lah chuan a nu leh pate inhnial chu a lo en ve reng a, chhungkaw boruak a nawm loh chuan naupangin hrehawm an tia, an tuar ber zel a, a khawngaihthlak reuh khawp mai. 

"Remruat, inchung khi han phiat fai la, thil dang tih tur a awm lo"  a ti chiah chu rang lutukin ka phit chhuak a ni ber. 

Nu Hmangaihi hnenah hmuh phiah awmna ka zawt a, inchung pan chhohna kailawn hnuaia bawm chu min kawhhmuhin "Khatah khan bawlhhlawh bawm nen a awm vek ang" a ti a, ka la sawk sawk a, Zonunmawia te nupa chu ka chhoh san ta daih a. 

Pindan bul vel ka phiah hnuah kawngkhar pakhat ka hawng a, inchung zawl lai ka pawh a, pangpar a tamin a mawi khawp mai. Ka enkual dan dan hnuah ka phiat a, helai hi phiat tel turin min ti hauh lo na a anmahni ka pumpelh theihna tur a nih phawt chuan nileng ţhak pawn phiat ila pawi ka ti lo. 

Inchung zawlah chuan bawlhhlawh bawm an hun tho avangin paih tura chhuk thlak vang vang a ngai bawk si lo a, ka phiat muang lui a, pot hnuai thlenga ka phiah vek hnuah inchhungah ka lut ta chauh a. 

Pindan pakhat kawngkhar lo inhawng deuh ka hmuh chuan ka pan hnai vat a, pawh phui mai ka tum laiin "A thlavang hauh na lutuk suh. Nakinah nangmah zawk hi i la inchhir mai tur a sin" ti a Kimkimi ţawng chu ka hre pha a, mawi lo viau mah se ka chungchang an sawi tlata hriatna ka neih avangin khar phui lovin ka ngaithla ru ta zawk a. 

"Marti hnenah hna aţanga ban tir turin i ti tiraw?" Zonunmawia chuan a ti ve thung a, "Teuh lo mai. A dawr a nia, ka inrawlh ve a mawi hleinem" tiin a lo pha a, ka rindan kha a dik chiah a nih hmel.

"I ţhianţha ber a nia i inrawlh khawp ang" a tih laiin "Ka inrawlh lo. Duh leh a nu leh pate pawh zawt la, an chhungkua a an sawi ho hnua thutlukna siam chauh a nih kha. Nangmahah in chan la, hlawk lo chung chungin hnathawk i chhawr lui ţeuh duh dawn bik a mi? Thil ţha lo zawng zawngah hian ka inrawlh vek bik lo" a ti tawn tawn mai. Kei takngial pawhin dawt a sawi tih ka hre thei a, amah hrechiang ber tu Zonunmawia phei chuan a thusawi chu a ring lo lehzual ngawt ang. A bum fo tawh lehnghal.

"Marti a hmingchhia a, ţul lo tawpah mi rilru a ti na a, a phenah nang i awm a, i ţhianţhaber hi hmang ţangkai fo lo tur a ka hrilh chian tawh che kha" a ti a, a vin hauh lo nain a tih tak zia a hriattheih a ni. 

"Min ringchhe lutuk a nih kha. In awmpuinu fanu hi i duh tih ka hria alawm. Marti hian i nula ni lo midang ban ta se eng he hu ah i ngai lo ang" a ti a, a ţawng duh dan chuan min chhun zar mai. Tu nula mah ka ni lo. 

"Ka nula a nih loh zia kan hre ve ve. Inrawlh ve tawh lo la a ţha a ni mai. I duh ang chiahin kan awm a, kan inţhen a, hmalam ka pan dawn. Ka sawm che a nih loh chuan lo tel ve tawh suh" a tih chuan "Engmaw i sawi kha?" nuih hak pah hian a ti a, beng ka dawh hnai a, ngeiawm zeta Zonunmawia nui hawk ri pawh ka hre thei. Min hmuh hlauin ka tawlh let leh vat a, chuti chung chuan "Ka nunah inrawlh suh ka tihna a nih chu" tham loh hmel zet a ti chu ka la hre pha a, tuna an awmdan ang reng hi a nih chuan innei leh mah se an inthen leh vat tho ang. 

"Zonunmawi, i danglam tawh khawp mai" Kimkimi chuan tham deuh chhal hian a ti a, a hmel hmu lo mah ila a aw chu a dik lo in rilru natna nei te pawh a ang ve alawm. 

"Scooty i lo keng em?" a lo ti daih a, zawt ho sawt tak a ni.

"Keng lo" a tih takah chuan "Ka thlah ang che. Sangsangi a kal ve dawn chuan a thawmhnaw kha thlak a ngai a, lo thlak sak la in zawh hunah ka thlah dawn che nia" dam deuh zawk hian a ti a, ţhian anga bulţan a nupa a insiam ta an ni a,  ka hriat tirh kha chuan Zonunmawian a ngaihsak em em mai hi ka hrethiam lo lek lek ţhin a, mahse Zualtea nen hetiang boruak kan tawn ve aţang kha chuan demna ka nei tawh ngai lo. Ţhiante tih nat hrehawm zia ka hrethiam tawh tlat a ni. 

"Taxi ko zawk mai rawh. Hmeichhe dang ngaihtuah reng chung chuan ka bulah awm lo law law rawh" luhlul chhuaha a tih pawhin "Sangsangi nen kan thlah ang che. Ka sawi ang chuan ti rawh keipawh ka inbual lawk dawn" a ti a, Kimkimi a rawn chhuah nghal mai hlauin ka tlan let a, inchung zawlah bawk chuan ka chhuak phei leh a. 

"Khalai kha chu phiat tel duh suh" Zonunmawia aw ka hriat rual chuan pot ka vuan a, "Pangpar ka lo hung rem a" ka ti daih bawk. 

Ka bulah rawn ţhu vein "Sangsangi hian pangpar a lawm a, kan neih ţeuh phah a nih hi. Ka nu'n a enkawl hman lutuk lo a, i duh chuan hawn ve rawh" a ti a, ka hmazawna pangpar chu a rawn khawih a, ka inbual dawn a ti ve a, a lokal leh daih sia. 

"Pangpar chu ka nu hian a duh a, kei tak chuan ka lawm tehchiam lo. Mawi tih deuh chu ka nei ve tho a, a tam zawk hi mawi ka ti lo. In ang deuh deuh a tam si" ka tih chuan "Tam khawp mai. Kan nei ţeuh chung hian hriat hran harsa ka la ti tho a, ka lawm vak bik lem lo" a ti a, pangpar a en laiin keichuan amah ka en a, a hmelţhat mai bakah amah hi a dam a, a mizia zawng zawng nen belhbawm phei chuan Kimkimi hian eng rilru pu a ţhen nge a nih ang le ka ti fo mai. 

"Pangpar aiin ka mawi zawk a nih hmel" nuihza aw deuha a tih chuan hmalam ka en vat a, ka zak chem chem mai. 

"Min zawh duh i neih chuan min zawt la" thutak deuh zawk hian a ti leh a, a chang chuan ka ngaihtuahna hi a rawn hmu tlang vek emaw tih tur a ni ţhin. 

"Keimah zawk hi engtin nge min duh a? Ka sawi awmzia chu ka englai hi nge i duh a?" ka ti bah nawk a, min en tih hre mah ila ka en ve ngam tawh lo. 

"Inchung aţanga zuan thlak i tum zan kha chuan i hmelţhatna chiah ka hmu a, engin nge a rilru ti buai ang aw ka ti fo mai. Marti dawrah ka hmu leh che a, min bihthlak i chin lai kha" a tih phei chuan hmalam pawh en tawh lovin chhak lam ka hawi daih tawh. Rintluangi nen a rukin kan en ţhin tih a hriat chuan sawi daih tawh tur a nia, ka zak ngun ta hle mai. 

"Ka belchiang che a, i hmelţhat ang bawkin i lo fel a, duh loh theih i ni hleinem" dam thlup hian a ti a, ka la awih thei chuang lo. Ka phu lo lutuk anga ka ngaih tlat vang nge, Zonunmawian min duh tlat hi ngaihtuah chian poh leh ka mak tihna a zual ţhin. 

"Kei berkher min duh chu a mak hle mai" zawi tea ka tih chuan "Duh lo che ila a mak zawk ngawt ang chu" a lo ti ve a, a din hnuah keipawh chu min pawt tho ve a, inhmachhawn ran mah ila a a âwm ngawt chu ka en a, a lo ngaithei lehpek tawh lo aniang ka khabe ah dawmin min kuai dak a, kan in en ran mai. 

"I la inthup zel dawn nge min hrilh tawh dawn?" a tih chuan hrethiam tho mah ila "Eng nge ka hrilh ang che?" tiin  ka zawt let a, ka aw zawi lutuk chu hriat a harsa viau maithei a ni. 

"Min duh em?" ka mita en ran chung hian a ti a, chil ka lem khalh a, "I hrethiam vek awm tho sia" zawi sap hian ka ti leh a, a chanchin ka ngaihven ţhin tih a hria a, engkim a hrethiam vek tawh ang. Hmeichhia ka nihna laiah ka sawi chhuak phawng hreh ve deuh a ni ber. 

"Nih leh ka bialnu angin en ta che ila pawi i ti angem?" ti a pehhel deuha min zawh chuan "Aih" ka lo ti vat a, "I duh chuan ka en ang chiah chein min en ve thei ang" ti lehin a kiai suk a, ka inphawrh ve theih nan a pehhel zawnga a sawi chu ka lawm kher mai. Ka bialpa angin ka en ve thei tihna a nih chu. 

"I pasal ang pawn min en la a pawi lo" a ti fiamthu zui a, a hlim vang nge a mitmeng te chu a de sar sar ni mai hian ka hmu a, tuna ka boruak tawn mek hi awih a harsa takzet a ni. 

"Hmanhmawh lutuk lo la. Min nawr chung chuan min nawr bo daih mai tur a sin" uang zeta ka lo tih ve chuan rawn kun hniamin ka hmuiah a fawp a, a bialnu ka ni ringawt pawh awih a harsat tawh tehreng nen min han fawp leh ngat phei chu ka vai riai ni berin ka hria. 

"Kimkimi ka thlah lawk anga i thawhna turah chuan kan kal dawn nia" in lakhran pah hian a ti a, a nupui hlui hming a sawi zo chiah nain ka chalah a rawn fawp leh a, Kimkimi ka hriat ve tirh aţang khan an awm dun chuan ka rilru a lo nuam lo ve ringawt zel. 

"In innei leh angem?" ka ti chhuak phawng a, nuam lo a tih ka rin nen "Midang duh a nei tawh a" zawite a tih pahin tawi tein a nui a, ka sam chu huikhawmin ka bengah a zep a, a kutphah chuan ka biang a khuap zui zat a, "Keipawn ka nei tawh a" a ti leh a, a kutzungpui chuan ka hmui hnuai lam a nul a, a thusawi chuan min ti lawmin van sang taka thlawk delh delh ang mai ka ni. 

Kimkimi chungchang sawi zui pui lovin a banah ka lo vuan a, "Lo let vat rawh aw" ka ti ta zawk a. 

"Ka rei lo ang" a ti a, ka hmuiah chuan min fawp nawn leh ngat a, ka thiam dana ka lo chhan let ve chuan a duhthaw sauh a, midang an lo lang thut thei tih hriain keimah zawk chu ka tawp hmasa a, na lo tein a awmah ka nam a, min fawhna chu muang ruihin a tawp a, a inlakhran hmain ka hmui hnuai a seh kher lehnghal, a na lo hlauh zawk a. 

Sawi zui tur a vangin kan in en a, kan nui leh ringawt ţhin a, "Tih tur kan la neih kha. Va thlah vat vat la lo let leh thuai rawh" ka ti nawn leh a, ka ţawng lai te chuan hmuhnawm tih hmel deuhin min lo en a, "Tinge khatiang khan min en reng a?" ka tih chuan a hmui a seh zauh a, ka mita min en leh hnuah nui sukin hnuai lam a bih a, thil thleng mek hi a la awih chiah bik lo a nih ka ring. 

"Inhnuaiah chhuk la tv te lo zu en rawh. Ka inbual anga ka rawn chhuk ve ang" ka hnungah dawmin na lo tein min nam a, ka piah chiaha hmunphiah leh bawlhhlawh ruhna let ngât mai chu ka la sawk sawk a, thuawih deuhin ka chhuk ve mai a, Kimkimi leh Sangsangi pawh an lo inpeih at tawh. 

"I ţuan a muang ve hle a ni maw inchung i phiah chhung ringawt pawh a rei emai. Ka nu leh pate thawmhnaw bal ka la khawm vek tawh a, machine bulah ka dah. I lo su leh dawn nia" a lo ti zung zung a, inchhung hi a la inti ta tu khawp mai.

"Aw ka lo su ang" ka ti vat a, hlawh ka hmuh theih nan chuan ka tih a ngai miau a, min tir reng hi ka haw hran lo. 

Insu tura ka kal chu min umzuiin machine chhunga thawmhnaw ka dah luh lai te chuan ka bulah a ding reng a, "Zonunmawia nen a in inkarah hian eng nge awm?" ti a min zawh chuan "Engmah" tiin duhdah deuhin ka chhang a, midang duh a nei tawh a, an inneih tawh dawn chuan loh chuan pathlawi ka ngaizawng ta mai hi a pawina ka hre hran lo.

"Ka nu nen kan lo sawi dun a, Bawihtei vang tal pawha inneih leh a ţha kan tia. Eng nge i ngaih ve dan? Hmeichhia i nihna angin thutlukna min siam pui thei angem?" a ti a, thinrim hmel pawh a pu lo. 

"I tana ţha tur chu i hre ber ang chu" tih chiahin chhang mah ila "Nia, ka hria alawm. Bawihtei hi nu leh pa kar lo a ţhanlen tir ka duh lo a, bakah nangpawh hmeichhia ve tho i nia, i pasal emaw pasal hlui pawh nise hmeichhe dang a hnaih i duh bik lo ang. Ka tawrh mek hi min hriatthiam pui tum la, vawiin ni bak chu he inah hian lokal tawh suh. Hmeichhia i nih ve na angin ka ngen che a nih chu" ngenngawl deuha a tih chuan ka khawngaih ve lek lek mai. 

"Nakinah engkim ka la hrilh ang che. Midangin min tihbuai theih lohna tur hmunah kan la inhmu leh dawn nia" a ti a, zawi tein ka ban rek a rawn hmer zawk a, min chhuahsan zui nghal a.

CONT