DEAR DIARY-15

DEAR DIARY-15

Insuk ka tleuh lai mekin Zonunmawia a lo lut a, ka lo biak lem loh avang chuan a inthiam lo deuh aniang kawngkhar kawh pahin "A inhawng sa a" a ti ban charh a, "Eng nge i lo tih dawn?" ti a ka zawh takah chuan "I hah tawh em?" a ti leh daih a, suk tur la awm ho chu enin a chek tlak a, a tam tham ve em a ni.

"Vawikhatah ti vak duh suh i hah mai mai ang" a ti a, suk tur ka dahkhawm ho chu a en leh ţhin a, 'i nupui hluiin thawmhnaw bal a khawn khawm' ka ti ţep a ni. 

"Lo in ei puar la, ka rawn let veleh kan chhuak lehnghal dawn nia" a tih chuan ka lo aw liam mai a, "Thawk rim lutuk suh aw" tih leh pahin ka biang a piai hlak a, min chhuahsan rual a a fanu a ko ri chu ka hre pha a, Kimkimi ţawng thlengin ka hre vek. 

"Apa, bazarah kan kal kawi lawk dawn mi? Naktukah ka nutei te khuaah ka nu a zin dawn a, an thil tur lei ka duh a, an harsa ve sia" a ti lang lang a, a ţawngring emai ka hriat phak loh a hlau aniang. Zonunmawia ţawng erawh ka hre pha lo thung. 

"Kan rei nang mawle. Bazar a min dah tawp chuan taxi lak a ngai leh dawn tho a, min nghak mai mai teh. Mi angin thawmhnaw inkhai leh secondhand ka en ve vak vak ngai hleinem" a ti zat zat a, thil pawimawh deuh tih tur nei lo ila chu an kal veleh chhuanlam siamin ka haw nghal daih ang mawle. 

"Remruat, i zo dawn tawh em?" Nu Hmangaihin a rawn tih chuan "Dawn lo deuh" ti a chhan pahin ka la suk loh ho dahna bal bawm chu ka kawk a, a pan hnai nghal rawk rawk a, a mal te tein a phawrh chhuak a. "Heng ho hi suk a ngai hleinem, a fai sa vek a nih hi. Jumble sale a mi tura ka dahţhat a nia. I su nual tawh tho ang a khawimaw ka lo enchhin" tih pahin ka spin tawh sa ka phawrh chhuah mek te chu uluk deuhin a en a, "I su tel nual tawh a nih hi. Sangsangi thawmhnaw bak suk tur a awm ngai lo a sin. Mahniin kan su mai zel a" a tih leh phei chuan ka thin a rim hlur mai. 

"Heng ho hi khawi a mi nge i lak? Vawiin chu pindanah kan awm tam a, ka lo enpui lawk lo che a ni aw" a ti vang vang a, ka su zo thuak tawh a, pawi ti viau mah se awmzia a awm tawh lo. 

"Khawia mi nge i lak?" ti a min zawh tak tlut tlutah chuan "Kimkimin a lo dah lawk sa a, a lakna hmun tak phei chu ka hriatpui lem lo a" ka ti a, dam deuhin ka ban bulah a rawn hmer a, lawm lo hmel a pu thung. 

"Midangin tih tur an hrilh che chuan min hrilh ve zel rawh aw. A ţul bak bak i tih tel zel chuan i hah lutuk palh ange" a ti dam diai a, thawmhnaw la suk loh ho chu a khawm sawk sawk a, bal bawm chawpin a keng chhuak ta daih a. An chhungkua an tlem nen suk tur kha a tam turu ka ti reng a ni. 

An inkawt a tlangban a awm loh avangin thawmhnaw suk fai tawh ho chu inchung zawlah ka pho a, a vaia ka pho zawh chuan chhuk leh nghalin an bathlarah ka ţhu chawl a, Zonunmawia ngawt ka ngaihtuah a, Kimkimi leh an fanu nen an inzui chhuak kher bawk nen, ngaih a ţha lo a, amah ring lo anga lan ka duh bawk si lo. Ţul hawt lovin thil ka ngaihtuah kual a, chu chuan min ti chau leh der tawh. 

Nu Hmangaihi lo chhuak ve chu ka lo nuih ringawt a, hma lam ka en leh rual chuan ka bulah a rawn ţhu a, ka thil lo tawn tawh ten a zir lo bawk nen, ka ţang nghal ţeuh mai. 

"Bazar thleng chiah a thlah dawn a nih kha. Kimkimin a nutei te thil tur a lei kawi duh sia, nghak buai loin Sangsangi nen an lo haw tlang ang" a tih chuan nuih hak pahin "Ka nghak hleinem. Thingpui in hma ka ţhu chawl lawk mai mai a nih hi" ka ti a, Zualtea nen a kan inkawp khan kan chanchin an hriat rualin a chhungte zia a dang nghal vek a, khatiang kha a thlen leh ka duh tawh lo. Ka nu thawhna te an ni lehnghal. 

"Kan fa upa ber Mami'n pasal a neih hnuah Kimkimi hi a rawn mo a, ka fanu tak tak angin ka en a, school naupang an nih lai aţang tawhin Zonuna nen hian an inkawm a, an school leh khatih hun laia kan in luah kha a inhnaih a, nitin deuhthaw a rawn leng ţhin. Kan fate ţhianţha tak te hi chu ngainat an lo awl aniang Kimkimi pawh school naupang a nih lai aţanga ngaina tawh ka ni a, ka fanu nen nen angkhat rengin ka en a, ka en hrang ngai lo. An inţhen hnu pawh hian min la rawn be reng a, a chang leh inah a lokal a, Sangsangi pawh a fanu a nihna angin a ngai ve ţhin a, 'i hmuh chak phawt chuan lokal ziah rawh. Nu leh fate hi chuan inzawmna thuk tak kan nei a, in inzawmna tih chah ka duh reng reng lo' ka ti mai zel a, Sangsangi hriatah chuan a ţhatna lai chauh kan sawi ţhin. Ka hmangaih zia a hria a, tun thlengin kan in hi a inah a la ngai a, a rawnkal fo mai. Nangpawh vawi hnih i lokal tawh a, Kimkimi a lo awm ve zel a, Zonuna rualin i lokal ţhin bawk nen, hrehawm i tih ka hlau deuh a" a ti dap dap a, hrehawm ka tih a hlau a nih chuan Zonunmawia nen a kan boruak hi  a hrethiam a nih ka ring. Zonuna tak phei chuan a hrilh dawn lo hrim hrim a, amahin ngaihdan a lo nei ve a nih hmel. 

"Fa an nei tawh a, inhmu lo a awm tawp a theih  bik loh ang a, inbiak loh pawh tum se inbiak ngei ngei a ţul chang a tam zawk dawn a, hmelma anga in en thei an ni lo alawm" ka tih chuan ka lam rawn hawiin a nui sang a, tun ang kumah pawh a la hmelţha a, a nulat lai phei chuan a hmelţha viau ang. 

"A dik alawm. Tupawh hian hrethiam tu kan mamawh a, chutiang mi kan tawn fuh chuan kan hahdam a, kalsan harsa kan ti ţhin" a lo ti a, ka pawm chiah lo nain ka sawichhuak duh lem lo. Zualtea kha min hrethiam tu ber a ni a, a bula awm kha a hahdamthlak ka tih rualin kim lo huihin ka inhre tho a, keimah ah hian ruak lai bik a awm ţhin a, mahse tunah chuan a ni tawh lo. Zonunmawia nen ka hnathawh tur zawngin kan phar buai a, ani lahin hna kal pahin buai chung chungin min zawn pui ve zel a, ka lo duh rukna a rei tawh bawk nen, kan chhuah dun tak zeuh zeuh hnu phei hi chuan ka ngaina lehzual a, keimaha ruak awm kha a hnawhkhat ka ti mai, kim bik riauin ka inhre tawh a, min ti famkim thei tu awmchhunah riak ka ngai tawh a ni. Hei hi a ni Zualtea aia a danglam zawkna chu. 

"Kimkimi hi chu a thikthu a chhia a, fa mal tih takah a nu leh pate hian kehthei dawm takmeuhin an dawm a, nang aiin upa daih mah se naupang zawk ang maia awm chang te pawh a nei ang, Zonuna ai mahin hriatthiam a ngai nasa zawk a, mihring hi chu kan tlin lohna lai inhaider sak a ngaih chang te a awm a, ani pawhin kan fel lohna lai sawi tur a hre ve ţeuh tho ang a, kan inhriat loh der sak mai loh chuan nun ho ngaihna a awm lo" a ti a, Kimkimi hi a sawi ang chiah hian a hmangaih tak tak niin ka hria. A vannei takzet a ni. 

Motor thawm kan hriat chuan inthurual awm hrim hian kan ding hluai a, gate chhungah a rawn tlan lut a, a din veleh au chul chungin Sangsangi a rawn chhuak a, lapaw chini pahnih a keng vang mai. 

"Khatiang thil kha ei nasa lutuk suh ka tih kha. Pahnih lai phei chu ei ka phal reng reng lo a nia" Nu Hmangaihin khauh deuh taka a lo tih chuan "Hei hi a u ta tur alawm" tih pahin a pawl zawk chu a lek chhuak a, ei vat loh chuan a ei tlak loh thuai ang. 

"Kha le a u" fel fai taka a rawn tih chuan naupang hmaah ka lai lek lek a ni. 

"Ka lawm e aw" tih pahin ka la a, a lo nui var var a, a hmel a ţhain a ngainatawm reuh khawp mai. 

"Keichu a senno a nia..ei dun ang aw" tih leh ka kut a min kaih a rual a, awmdan ka thiam chiah lo. Ka la din tlat avangin a kal zet tawh chu a rawn hawi let a, mak ti hmel a pu na in ka kut a vawnna erawh a thlah duh chuang lo.

"Luh pui rawh ka rawn lut ve nghal ang" Zonunmawian a tih takah chuan ka luh pui a, inpui lama kal lovin choka ah min kalpui a, chaw ei dawhkan kilin a ţhu tharh a. 

Lapaw chini ţawnna ka phelh fel hnuah a ta zawk chu ka hmaah a rawn nawr phei a, "Min hawn sak ve rawh" a ti ve ngei a, a ei ngun phei chuan a hawng thiam dawn lutuk tih ka hria, chuti chunga ka hawnsak a phut kher chuan nuih a ti za tlat a, rubber phelh pahin ka nui vur vur reng mai.

"Thingpui te in phawt ila muangchangin kan kal ang chu" ti a Zonunmawia ţawng ri kan hriat takah chuan thawm awmna lam chu kan hawi phei a, kan hmaa lapaw chini let bal chu a hmu aniang choka a rawn luh ve pah hian "Chawm in hautak vak dawn loh kha" a ti a, a aw a nuihzatna lang tel te chu ngaihthlak a hrehawm lem loh khawp mai. 

"In lo haw tawh tho a thingpui ka lum tawh dawn a nia. Dawr neitu kha i be vek tawh sia, kan tlai lutuk chuan ngaihsak lo min ti palh ang" ka tih chuan "Lum rawh" a ti ve mai a, chhunah hian thil an ei tam vak ngai lo aniang a hranpa a han siam bik kan nei ngai lo an ti mai a, chhang dahna bawm ka la chhuak a, thingpui ka chhuang zui nghal a. A so hun nghah mai ka tum chu "A mawi loh hmain lo ei lawk la" a lo ti a, hawn thawt tawh phei chuan dah rei chi ni hek lo, thingpui vil pahin ka ei mial mial a, Sangsangi pawn tui a tih hmel khawp mai. 

Thingpui ka siam zawh hnu chuan Nu Hmangaihi te ka va pe hmasa phawt a, chumi hnuah an pafa hmaah ka chhawp sak leh a, phone a khawih mual mual reng a, thingpui in lai chuan kan inbe tam lem lo. 

"Dawr thar, miin an la hriat mang loh a nia, min lo nghak thei dawn a nih chu. Hmanhmawh chiam duh kher suh" phone dahthlak paha a tih chuan ka lo bu zeuh a, a kalchhuah hmaa thil thleng kha ngaihtuah letin keimahin ka zak leh chem chem tawh a, ka vai riai a, beisei loh deuha a rawn sawichhuah leh tak thut avang khan awm dan tur ka thiam lo a, rilru fim lo deuhin ka fawp let ve hial a nih kha. Ka zei dawn lo nasa mai bawk si, a nuih a za ru viau maithei a ni. 

"Dawr neitu hi Kimkimi hmelhriat a ni lo tiraw?" ti a ka zawh chuan "Ni lo e" a lo ti vat a, ka duhthusam chhanna min la pe lo. 

"Nih leh i ţhian a ni lo tiraw?" ka tih leh chuan "Kan ţhiannu nau" tih zawngin min chhang leh a, diktak chuan hmeichhe ţawng duh leh ri buan buan chi, nghal ve tak nen inkawp se an inrem zawk daih ang. 

"A ţhat chu..hna neih loh ai chuan i ţhiante hnuaiah pawh nise ka thawk leh mai ang. Tun ţum chu hlawh engzat pawh nise min sawi hnawn sak tawh suh ang che" tiin ka hrilh lawk a, a beisei aia hlawh a tlem chuan amah zawk hi a phur lo nghal ringawt zel a, ka thawh awm tawk a hrethiam lo em maw ni tih ngai hialin a awm ţhin. Chuvang chuan vau lawk deuh a ngai. 

"Tlem leh lutuk a awm ve a. Hmanni a kan zawh phei kha chu zan a haw a ngaih chang te a awm an tia, 3500 vel lek hlawh tir che an tum bawk a, bus fare leh chhun thil ei man zawng zawng nen phei chuan chan a lawi i nei lo ang. Chu ai chuan thingtlanga in chhungte chawhmeh chah la, i hlawk pui zawk ang" a ti deuh duah a, tawi te te a min chhang ţhin si ka thawh luih a hlau ngang aniang a duhthaw emai. 

"An mak ka ti ve tho alawm. 3500 lek hlawh chu an tam lo ngawt ang. An hah ve dawn tho sia, chuvang chu aniang hnathawk pawh an neih mang loh" ka lo ti ve a, tunlai angah ngat phei chuan tuman 3500 lek chu an hlawh tawh lo hrim hrim ang. 

"Tun a kan kalna tur pawh hi hlawh a tlem chuan i thawk lo ang" a ti deuh hmak a, "Eng nge ka tih chuan anga?" vin lek lek a ka lo tih chuan "Aww..chawhmeh i zuar ang" nuihzat hmel fahran a a tih takah chuan a uang tih ka hre leh hnuhnawh a, nui miah lo hian min fiam thut zel a, thin a lo rim hman tawh phei chuan a buaithlak duh lutuk. 

"Chawhmeh zawrh hi a hlawk an tih chu ka hre tawh" a tih hnuah mi sawi a hriat dan min hrilh zawm a, thil dang ka lo ngaihtuah daih thung. 

Ka hmuh tirh phat aţanga ka mit la tu, dawr a a lokal apianga chhuar phen aţanga ka en ruk ţhin, ka ban phak leh cho phak ni ve lo a ka ngaih nen khan inngaizawng ang kan ni ta mai sia, ngaihtuah chiah poh leh a awihawm loh a, ka bialpa ka ţhenna a la rei lo bawk nen, hmeichhe le lo leh lepchiah deuh te pawh ka ang alawm le. Mahse, Zualtea kha sawiselna tur pakhatmah ka hre lo chungin ka thinlungin a thlan a ni miau lo a, ka laka ţhat a chhuah nasat ţhin avangin tunah pawh inthiam lohna ka la nei reng a, hmalam a pan tih ka hriat hma chu ka chanchin engmah ka hrilh duh rih lo a ni. A inpeih hunah amah zawkin min rawn be ngei ang a, chu hun chu ka nghak mek a, ka la nghak chhuak ngei dawn tih ka hre bawk. 

No ka sil hnuah hmun ka phiat chhuak vek a, chhuat ka nawt leh a, ka zawh fel hnu chuan Nu Hmangaihi hnenah "Dawr nghah tur a awm maithei a" ka ti a, thil dang ka sawi leh hma chuan "Ka hre tawh alawm. I ţhianpa in min hrilh tawh a, Sangsangi lah a chau deuh nge chhuat i nawh hlan khan a muhil a, tih tur engmah a awm rih lo. Rawngbawl a ni leh tawp a, chung te chu in rawn haw hunah i ti vek hman ang. A lo chhawr duh che a nih phei chuan i nu rilru pawh a nuam sawt dawn a, lokal rawh u a tih lai hian kal vat rawh u" a ti zung zung a, a fel ve ngawt ang. Awmpui an nei ngai lo mai mai zawk a, nei ngat se chu Nu Hmangaihi hi tuman an chhuahsan phal ka ring lo. 

"Ka pindanah ka muttir a, lo han en zeuh zeuh mai ru aw" ti a a nu hnena a chah thlap hnuah kan inzui chhuak a, interview kher ngai lo mah se ka zam angreng khawp mai. 

Motor chhungah ka ţhut luh rual chuan ka lum nghal pup mai. Tukverh darthlalang a phui vek avangin motor chhung boruak chu a uap a, rui ţhin tan phei chuan a hrehawm viau ang. 

"Thawh a lo phal hlauh a nih chuan hlawh ka nei veleh tawh dawn tihna a nia nga" a rawn ţhut luh ve ruala ka lo tih chuan min nuih liam mai a, engmah phei chu a sawi lo. 

"Ka nu nen a kan thawh theih hi chuan rilru pawh a nuam deuh a, kan hmuh tum pa hian a dawr a thawh a phal a nih chuan kei aiin ka nu a lawm zawk daih ang. I awm lo ang tih ka van hlau tak, zum zuk chi nih phei chuan mahni chauha inhai kuak a harsat chang te a awm ve a, chubakah awm lo la chuan tuna kan kalna tur ngat phei hi chu ka hre dawn lo lutuk a" ka ti siam siam a, a lam ka hawi chiah chuan lungawi hmel deuhin min lo en reng tih ka hmu ve chiah. 

"Kal tawh ta che min lo nghak rei lutuk anga sin. Haw hunah rawngbawl a ngai dawn bawk si" tih pahin a ban bulah ka nam a, a nuih a za viau mai. 

"Nang chu i hlawh a tam tawh ngawt ang chu tiraw?" ka tih leh ngat phei chuan a nui chhuak ta hawk a.

"Chawm ka ngah a, i ngaih anga hausa ka ni lo maithei" a tih chuan "Tu tu nge i chawm tel a? In chungkua ngawr ngawr chu in tlem hle sia" ka lo ti a, a inkhawl ruk ka ring tho. 

"Ka cousin pakhat hi tet te aţangin kan hnenah a awm a, kan hnen aţangin nupui pawh a nei. Fa pakhat an neih hnuah inhrang an chang ve chauh a. A rem rem a inhlawh kual ţhin a nia, fa pathum an neih hnuah a hnathawh naah a chesual a, a zeng ta sia, a fate ho ka zir puitlin tir a ngai a" tiin min hrilhfiah a, a ti ţha khawp alawm. 

"A fate chu an lian tawh em?" ka tih chuan "Aw..amah hi kei aia a upat bakah nupui a nei hma a, a fa upa berin nurse a zir mek a, a zo ve ţep tawh" a ti a, mawhphurhna a la ngam chu ka chhuangin ka ngaisang thar khawp mai. 

"A nupui a la dam em? A pasal buaipui chawt a ngai awm sia, duh mah se hna a thawk thei lo ang a" ka ti a, vanduaina hi kan ta a ni miau sia, kan pumpelh thei tak tak hlawm lo a nih ber hi. 

"A uire" tih chiahin min chhang a, sawi nuam lo thil a tam ringin ka zawt zui zel ta bik lo.  

Kan kalna tur hmun kan thlen chuan motor chhunga la ţhu reng chungin dawr chu min kawhhmuh a, a awmna hmun hian a zir vak lo a, a lun lutuk lo maithei. 

"Ka rin aiin a lun lo" dawr en vang vang paha ka tih chuan "A hahdam ang a a ţha phian ang" a lo ti a, motor a dah ţhat hnua kan let leh chuan dawr kawtah tlangval pakhat a lo ding reng tawh a, "Dawr neitu i ni em?" ka tih laiin "Nangmahni hi mi?" a lo ti ve chiah a, kan han nui leh rih ţhin, inchhungah luh a rawt nghal a, ţhutna tur min kawhhmuh hnuah ka thawhna hmasa lam chanchin te min zawt a, thui deuh min zawt lo thung. 

"Damdawi hi chi hrang hrang an lo lam ţhin a, i thawh hlimah chuan i buai ve rawk rawk maithei. Damdawi hming leh kan dahna bik te hi chhinchhiah tum la, karhnih hnu velah chuan i hre kim thuak thei ang" a tih hnuah "Heng ho hi an lam zing deuh a" tih pahin a dinna hnung lawka chhuar chu min kawhhmuh a, pum damdawi ho a ni tih ka lo hre nghal mai. Min chhawr tum ni awm takin a ţawng a, chu ringawt pawh chuan awm a ti nuam khawp mai. 

"Thla khat vel chiah ala nia, thawk tu pawh ka la la lova, mahse thildang tih tel ka neih vangin chhuah zeuh zeuh angai ţhin dawn a, thawk tur pakhat tal chu ka mamawh dawn hrim hrim a" a ti a, nui sang hian Zonuna ka en a, min lawmpui ve hmel reuh lutuk. 

"Ka thawk thei dawn tihna mi?" ti a beiseina sang tak nei chunga ka zawh chuan, "Theih lohna tur chu a awm chuang lo a, mahse hei thla a tawp ţep tawh a, thla thar nghah a ngai tawh ang. Hna dang i zawng pah lo tiraw?" a ti ve thung a.

"Zawng vak lo e,  ka thawk reng thei ang" ka lo ti thuai a. Rintluangi nen a kan thil tum chu ka la hreve reng tho mah se tum dang ka nei tih a hriat chuan bang leh vat turah min ngai ang a, min chhawr duh loh phah ang tih ka hlau.

"Awle. ..i phone number dah la ka rawn be leh ang che" a ti ve deuh kher a. Hna mamawh zawk ka nih miau vangin phone number chu ka pe a, ka hawikual thuak a, dawr chhung chu a zauin a nuam reuh khawp mai. 

Kan let leh lamah chuan "Kimkimi kha khawilai thleng nge i thlah a?" ka ti a, a nu hnen aţangin hre vek tawh mah ila amah ngei hian sawi se a fiah deuh ang.

"Thawmhnaw lei a tum a, bazar thleng ka thlah" tiin ţha deuhin min lo hrilh ve mai a, ka ngawih vang vang hnuah "In innei leh dawn a nih chuan ka tan a nuam lo a, mi nupa inkar a inrawlh anga miin min hriat te ka hlau ve deuh tho a" ka ti niah niah a, sawi ringawt pawh hian nuam lo ka ti ţan der. Ka duhin ka atchilh lo chauh a ni a, mipa ţha tak hmu ve mah ila ani bawk hian ngaihzawng nei thei lovin min siam a, amah chauh ngaihtuah a, rilru zawng zawng ka pek hnuah an nu hnenah bawk a let leh mai ang tih ka hlau a ni. 

"Kan innei tawh lo ang" a ti nawn leh a, he thu hi vawi engzat nge ka sawi tir tawh ang? A tam tawh viau ang. Annu hlui chanchin hi sawichhuah fo duh lo mah ila an la inpawh em a, ka zawt leh nge nge ţhin. 

"Sangsangi vang pawn a theih tawh loh ang maw?" ka tih chuan "Kimkimi nen hian inţha ţhen tawp kan ni lo a, kan tawp dan kha ani pawn a la hre reng ang a, ţha deuh a kan inthlah lo ang bawkin inneih leh pawh a theih tawh loh alawm" a ti a, ngaih veng veng chang chu a la nei maithei a ni. 

"A zia lo hle mai. Nupa inţhen hi chu faten an tuar ber zel a, mahse Sangsangi chu a pi leh puten an duat a, a vannei alawm. Kimkimi hi i la ngai ţhin em?" ka tih chuan a nui a, ka zawhna chu atthlak a ti deuh a nih ka ring. 

"Ngai tawh lo aniang" a tih chuan "Nih leh in hmangaih vanga innei ve tho in ni ang tiraw?" ka ti leh a, "A hunlai kha chuan kan inhmangaih alawm. Ka hmangaih vangin ka nei ngei a, mahse nupa kan nih hnu khan kan thla a muang deuh nge kan in ngaihsak nep a, kan inhlat tial tial a, min bum duhna hial a neih phah bawk a, chenpui reng harsa ka tih hnuah ka ţhen ta a nih kha" a ti a, zep nei lo leh inhawng taka min ti ti pui avang chuan ka hahdam deuh huai a, rilru a nuamin a hlimawm veng veng mai. 

An in kan thlen chuan Nu Hmangaihin chanchin min lo zawt vek a, dawr neitupa nen a kan inbiak dan ka hrilh chuan "I va thawh theih hmel ve. A lawmawm lutuk alawm. I pa han dam fel se la, kan la lawm dawn nia" a ti a, ti tak tak dawn lo mah se a lawmawm tho tho. 

Buhfai ka sil laiin Zonunmawia a rawn lut a, "Ka lo pui ang che" ti ve ngial mah se "A ţullo..puih ka duh kher lo. Engvakmah ti lova hlawh lak ka duh dawn der lo a nia" ka ti hlak hlak a, ka bulah a ding a, buhfai ka sil zawh hnu a ka kalsawn pawhin min zui ve zel a, min puih chak viau mah se ka rem ti tlat lo. 

Choka a a u chiah Mami rawn lut chu ka hmu lo der a, biak dan ka thiam leh dawn si lo a, hmu anga ka awm chuan mi biak nachang hre lo min ti palh ang.

"Ka nu'n haw tawh tura a tih che kha" a lo ti a, U Mami lah chuan "Kan upa ve tawh viau chung pawh hian chhungkaw nu ber tar zur lutuk tawhin a fate ho bulah min la hek zat zat reng chu a nia. A dam rei si, a sual bawk si, ka hne teh mai a nia. Mo pawh ni ila ka kum vang hrim hrim hian tih duhdah chi ka ni ka ni vak tawh lo" a ti bawrh bawrh a, anmahni ka hnungchhawn tlat avang chuan ka hmel an hmu thei chuang lo tiin ka nui ru tet tet a, an inmil loh ve hmel khawp mai. 

"An zia hre sa a nei i nia, an sual deuh a nih pawhin tuar rawh. I la tuar chhuak ve mai ang" a lo tih sak a, a farnu chu khawngaih angin a awm duh hauh lo. 

"I u ka nia, ka upat tawh zia hi ngaihtuah ta che. Mi a enhrang lutuk leh min rel chiam zel hi ka hua alawm. He pitar hi chu vanram a kai hlawl lo ang. Diktak chuan kan indang a, an chhungkua a sawrkar hnathawk awmchhun kan pa tello in an awm thei hlei lo leh a, an in sawi khawngaihthlak thiam em avangin keimah zawk ka nem leh vat a, kan han lut leh chiah chu a hma aiin an sual zawk emaw tih tur a ni. In dan leh mai ka rawt lahin kan pain 'i duh vanga let alawm kan nih' a ti hmak zel a, sawipui theih pawh a ni lo. Ka haw hlur mai a ni" a la ti tan tan a, a lu a zoin a luruh a ring a, Zonunmawia nen chuan danglam tak an ni. Zep ţit ţet a neih loh hmel a, thinrimna neih chang pawh a in ang lungawi chi a niin ka hria.

"I runluih zel a, in boruak a chhe tial tial a nih hi" a tih chuan "Ka runluih zel ang. Ka lokal hma pawh hian kan pa hnenah 'an awmdan ang zelin ka awm ang a, an thlavang i lo hauh emaw i thinrim pui a nih chuan kan inţhen hmak ang' ka tih kha" a ti a, amah ber chu a nuih a za lehnghal a. 

"Vui reng lo khan insiam la, chaw ei hmain haw rawh. I lungawi loh apiangin lokal ţhin suh. Nangmah chiah in ngaihtuah lo in i pasal fanaute ngaihtuah tel rawh ka tih fo kha"  Nu Hmangaihin a rawn ti a.

"Tu hmeichhia mahin an tuar peih lo ang. A ţhu tum bur a, a duh dana engkim kal pui a tum a, phun peih si, ka hne a nia" a la ti hlak hlak a, a thin a rim hmel viau tak tak mai.

"Tuar ve mai rawh. Hetiang huam hian a ni lawm ni pasal i neih? A farnu nen status ah kan inkap te iti mai mai, nangpawn iti let ve tho a nih chu" a nu in a tih laiin "Ti let ve tho e" a lo ti a,  a nui zui uarh uarh a, nu Hmangaihi ngei tawk a tling viau ang. 

"Mi hi ţhatna a hneh tum tur a nia. An awm anga i awm ve chhung chu in inang tlang zel tihna a ni mai. Pasal i neih har tehreng nen, a chhungte chu eng mi pawh nise dawn sawn dan a thiam deuh tawh ang chu tih nak laiin naupang ang maiin i khawsa a, i dik bik lo reng reng" a ti a, a chhungten an lo vuipui ring a lokal chu a ni awm sia, anni lahin an lo vui pui lo nasa mai. An hau let erh zawk chu a nih hi.

"Awii...nhu kei chu ka piangthar lo aniang, ka chung a ţhat chhuah duh miah lo te chungah hi chuan ţhat ka chhuah lui peih bik lo. An awm ang ang hian awm ve zel mai ka duh" a ti dek dek a, "Sawi tawh suh..insiam la haw rawh" Nu Hmangaihin a ti vin hlar a, a lokal fuh lo ve ngawt mai. 

A nu chhuah hnu chuan "Hman zan chu innu hluiin min lo bia a, Sangsangi leh ka nu leh pate a ngaih ţhin zia a rawn sawi nasa mai. Darkar khat chuang mah kan inbia ang chu, a inchhir tawh niin ka hria" a ti a, kan inlaichinna a hre ve hauh lo nain a thusawi chuan awm a ti nuam lo ve ringawt a, ka hlauh ruk ang kha a thlen loh hram ka beisei a ni. 

"A ngai ang an duat a" a lo ti satliah a, "Thil dang pawh a sawi ţeuh mai. Inneih leh a duh thu thlengin a sawi a, Sangsangi hi nu leh pa kar ngei a seilian turin a duh a" a ti a, min hmu lo nge ka awm ve chu a pawisa vak lo tih pawh ka hrethiam lo. A nuţa nen a kan inzawmna a hre miau lo a, ka hriat ve pawi a ti lo te pawh a ni thei tho. 

"Ngaidam tawh mai la, Sangsangi hi i khawngaih ve lo mi? A piancham kan lawm ţum te khan Kimkimi nen in awm ve ve a, nuam a tih em kha" a tih laiin a nu'n a rawn ko ta hlauh a, Kimkimi hming hi an lam fo dawn a, innei tawh dawn lo mah se ngaia neih a har dawn khawp mai. 

Bai tur tur ka chhuan kai lai chuan ka bulah lokal in ka kawngah a kuah a, ka biang a fawh leh chuan ka lo nui hak a, "Min tibuai reng lo teh. Rawng ka bawl zawh vat loh chuan ka haw har lutuk dawn, nangni pawn chaw in ei tlai phah dawn a sin" ti lawm lawm mah ila min kuahna chu a ti nghet salh a, ka tim deuh nain hrehawm ka ti hauh lo. 

Ka haw tur min thlah chuan "I lo peng kawi dawn em?" ka ti a, "I pa a damloh kha. Midang a ngaithei lo palh ang zandangah ka lo leng zawk dawn nia" a ti ve tlat a, ka sawm lui duh bik lo. 

"Nia kan in hi chu thawm a inhriat theih vek a, pindan chhunga ka pa a khuh bur bur reng chuan nangpawn i ngaithei bik lo ang" ka ti ta zawk a, mahse, "Kei chu min veng thawng suh. Tuna i tawrh mek ang hi ka lo paltlang vek tawh a, ka hrethiam vek a nia" a ti a, a aw chu a damin ngaihthlak a nuam a, a bula awm hi nuam ka ti telh telh mai. 

"Kal rawh le..nakinah ka rawn bia ang che" a tih hnuah lock a hawng ri khap a, keipawh chuan kawngkhar chu lo hawng ve vatin ka chhuk zui nghal a, "Ka lo en liam ang che" ka tih chuan min nuih suk pah hian a bu nghat a. 

Kan in panna step ka rap chiah tihah kan inchungnu in min ko a, khua a la thim chiah lo a, a inthuam dan aţang chuan a haw ve chiah a nih hmel. Clinic ah a ţhu leh ţan tawh a nih ka ring. 

"Kha i nu damdawi min chah hi hawn rawh. Sample a nia, Nu Rintein pawisa a ngai lo a ti ti rawh" a tih chuan a damdawi khai lai chu lak pahin "A va lawmawm ve. I lo hawn sak tam bawk sia, a lawm ngawt ang" ka ti luam a, ka pa damdawi tur a nih ka ring. 

"Zualtea i be ngai em?" a tih chuan lu ka thing vat a, ka nui hmel pawh a bo hmak ang ka ring. Min haw em em a, min la haw reng ang chu tih laiin ţha deuhin min bia a, ka nu damdawi chah a hawn sak thlap bawk a, min huat ţhinna leh kan in a a rawn ang chiam mai te kha hria ang pawhin a awm leh tawh lo. Mihring mizia leh rilru put hmang hi a lo inang lo takzet a nih hi. 

"Biak loh kha a pawi miah lo a nia. A lo biak che pawhin ţha deuha a zir theih nan lo fuih ve ţhin la, in tihsual palh ang kha thleng nawn tawh suh se aw. Thil sual hi chu tih nawn loh a ţha a nia" a ti dam thlap a, min haw ţhin deuh tu kha a ang tawh lo reng reng. 

"Aw le" ti a kal mai ka tum chu "Zualtean a theih loh pawhin nang chuan i thei ang tiraw?" a ti leh hram a, ka thin a rim ţeuh tawh. Mi hian an tana ţha tur ni a an ngaihah chuan zah an lo hre miah lo a nih hi. Mi mitmei ven nachang pawh an hre lo. 

"Thei e..ka duh hleinem, midang duh ka nei tawh alawm" ka ti ve ngat a, chutah nuih luih sang pah hian "Ka haw phawt mai ang. Kan lawm lutuk tak tak a nia aw" ka ti a, ka inher rual chuan ka tum nghal hmak a, hetiang nu leh pa a neih vang hian Zualtea hi ka khawngaih letling zawk. Hmel leh landan ngawr ngawr ah chuan a nu leh pa chhunna lai a nei maithei, mahse thil dangah chuan a chhun hlawl lo. Zualtea hi an phu lo zawk. 

Ka nu hnenah damdawi pek pahin Nu Rintei thu min chah kha ka hrilh chhawng a, kei ang lo takin ka nu chu a lawm thiam ngei mai. 

"Sual hi chu an sual hran lo mawle..Zualtea hmakhua an ngaih em avangin khati khan an che buan buan a, mi mitmei ven nachang hre lo khawpin an fapa an hmangaih tihna a ni mai" a ti a, phur deuhin pindanah a keng lut a. 

Zanah chuan kan tihdan ngaiin Zonunmawia nen reilote kan inbia a, 'Naktukah i chhuak hman angem?' tih hi number hlang aţangin ka dawng a, tu nge a nih ka zawh chuan 'Kimkimi' a rawn ti a, ka phu deuh zawk thei hial a ni. 

'Eng nge a?' ka tih chuan 'Thil sawi dun kan ngai i ti ve lo mi? I hman chuan lo chhuak la, mahse Zonuna hriattir ve a ngai lo ang' a rawn tih hnuah pawh 'Eng chungchang nge sawi dun i duh deuh a?' tiin ka zawt leh hram a. 

'A tam mai. I hriat ve ngei ngei tur thil tam tak a awm alawm' a ti a, a message mai mai pawn rilru a ti buai nghal mup thei chu a nia, chuti khawpa min hmu duh tu chu ka inhmuh tir poh aniang chu. 

CONT