DEAR DIARY-16

DEAR DIARY-16

"Vawiin chiah chu ka ai kal leh mai ta che. Zonuna pa in checkup hun a nia, a nu'n a kalpui daih awm sia, Sangsangi nen a awm nilen a ni mai. I pa hi a la nuam lo em a, kalsan chi a ni rih si lo a" ka nu'n a ti leh tawh a, ka kal nawn hreh viau a sin mawle. 

"A ngaihtuahawm vak chuang lo a, kal tawh mai la, keimah zawk ka kal zel chuan an ngaihdan a lo ni lo ve thei a" ti mah ila "Va tlawmngai leh hram mai rawh. Pi Hmangaihi pawh ka be tawh a, hna i ţan hma chu nitin kal mah la pawi a ti lo. Mahse, vawiin bak a ngai tawh lo ang" a ti a, peih lo viau mah ila aw ka pawh leh ta nge nge a. Kimkimi pawh ka hrilhfiah leh mai aniang chu. 

Pindan a luh ka tum laiin ţhutthleng sei a ka pa mu chuan "Mate, tui min han lak lawk teh" a lo ti a, ka ngei tawk a tling leh hle tawh. Hah deuha ka thawh chhuah sa, chupawh ka nu'n pocket money tur a min pek chhun ka khawl ve hram hram a, thawmhnaw nalh ve deuh hlek, tlawm deuh si ka zawng ve ang chu tih nak laiin a vaiin a lo la mek a, zu man atan a la hmang vek zui. Ka ngaihtuah chian poh leh ka thin a rim ţhin. 

"La ve mai rawh" ka ti hmak a, pindanah ka lut nghal daih bawk a, a nawm loh ve deuh avangin tukin chu a rui lo ve mial a, ka huat loh phah chuang lo. Ka pa aia mihring huat hi ka nei kher lo ang.

Ka kawr ka phelh chiah tihah ka nu a rawn lut a, ka pa ka chhan danah a lungawi lo tih ka lo hre nghal chat thei. 

"Chaw i ei hmasa dawn lo em ni?" ka lam rawn pan paha a tih chuan "Nakinah keimahin ka ei ve mai ang. Ka pa hi ka hmu peih hlawl lo. Amah vangin ka lei duh tam tak ka lei theih loh phah a" kawr dang hak pah hian ka ti a, a hma lam ka pawh mar laiin ka kawr nghawng aţangin ka nu'n ka sam a lo pawt chhuak ve a, ka pa a buaipui reng peih hi a mak ve thlawt a ni. 

"I pa i ngaihtheih loh na hi ti langsar lutuk suh aw, Zonuna hriatah sawichhe bawl bawl lo bawk la, ka bula i sawi ţhin anga a hnen a i sawi ve chuan mak a ti zawk ang che. A sual chung chung a hmangaih tlat anga i lan chuan a ngaisang sawt che ang a, ipa a zah phah bawk ang a" a ti a, a chhe zawng leh a ţha zawng ang pawhin ka sawi peih lo ve ve. A ţhatna sawi tur phei chu ka hre lo hrim hrim. 

"Ka sawi ngai lo. A chanchin sawi ringawt pawh a peihawm hleinem. Nang lah hi a thu thu hian i awm a, i mak ve ngawt mai. Hlau duk suh kan tello in a awm thei lo zawk" tiin hman aţanga sawi chhuah ka lo chak tawh chu ka sawi a, ka nu hi chu a â ve thlawt a ni. Ţhenna hun remchang a ngah tehreng nen a ngaihtuah tlat a, mahni intheihnghilh ţhakin a buaipui niin ka hria. Keichu ka tana ţha turah chuan mahni hma ka sial hreh lo a, chu chu ka mize ţha lo lai a ni. Khawvelah kan awm miau a, mahni hmasial miah lo chuan dam khawchhuah a har dawn lutuk tlat a ni. 

"Khawngaih zawk rawh. Rei a dam tawh kher lo ang, doctor te pawn a in reng chuan a tan a hlauhawm theih zia an sawi vek hnuah pawh a in lui zel sia, enkawl dam theih loh hun an la nei ang. I u a thih pawn kan inchhir em kha. Nakina kan inchhir lohna turin awm zawk teh ang" a la ti thei cheu a, a mak tak tak a ni.

"Ka inchhir awm lo emai..a sual a chhuah tak tak phei hi chuan thi mahse pawi ka ti lo hrim hrim" ka tih chuan "I ţawngkam hi fimkhur ţhin rawh. Mipa an awm loh chuan chhungkua hi a ho ania, rui thle mai mai pawh ni sela pa ber tih tur a ala dam ve hrim hrim pawh hi kan zahawm phah tih hrereng rawh" a ti a, a hmuh lohah ka ner nang mai. Miin min zahloh phah vek zawk, ka nu ngei pawh hian a hria, a hmangaih em vangin a hre lo der a,a thlavang a hauh mai mai zawk a ni. 

"Nangchu ni ila ka ţhenna a rei tawh ang mawle" ka ti a, pindan aţangin ka chhuak zui nghal a, a mutna ngaia ka pa lo la mu chuan ka thusawi kha a hre pha maithei a, ka nu ţawng emaw a zawih deuh avangin a hre kher lo ang. Lo hre mah se pawi ka ti lo, ka ninzia in hre ve reng reng rawh se. 

Ka nu pawh hrilh lem loin hna kal turin ka chhuak a, inchungte lah hi an chhungkaw zinga mi pakhat tal ka hmu ve ziah lehnghal. Zualtea chhang chiah, tleirawl college kal ve mek nen kan intawk a, a la hma nen a nalh tawh khawp mai. 

"Khawiah nge i kal dawn?" tiin amah zawkin min be hmasa a, ani hi chu englai pawn a awmdan a pangai a, midangin min biak duh loh pawn ani hi chuan a ngai ang patin min bia a, min ngaihtheih lohna ti lang ngai lo awmchhun liau liau a ni. 

"Ka nu ai ka kal lawk dawn a, hna ka la ţan lo a, min ring ve deuh aniang" ti a ka chhan chuan a nui sang a, "Ka rualin chhuak chho ve la, phurh tur ka nei chuang hleinem. Taxi hman a ngai lo anga pawisa a hek lo deuh ang" a ti zung zung a, "A ngai lo..a la tlai chhe chuang lo a, kein ka chho mai ang" ka tih pawhin "Min lo nghak rawh. Ke a kal te chu a peihawm loh emai" a ti deuh tlat a, garage lamah tlan pheiin scooty a rawn chhuak a, class kal tura chhuah a tum der tawh a nih hmel.

"I va hma em em ve" ka tih chuan "Ka ţhiannu lam kawi a ngai a, ţuan muang chi a nia, kei tal ka hma loh chuan class ah kan awm ve hman lo ang" a ti a, a mitmeng nung sarh hi hmuh a nuam ţhin ngawt mai. 

Scooty hnungah chuan tim daiin ka ţhu a, "In in a lo leng ţhin pa kha a chhiat loh kha" ti a min fiam takah chuan "I hmu mi?" ka lo ti vat a. 

"Ka u pindan ka hmang hawh rih a, kawnga kal vel pawh a hmuh theih vek alawm. Hman zanah ka hmu fuh cheu a, ka chhaih chakna che a rei tawh nen kan inhmu khat lutuk a" a ti siam siam a, "Ni ve tho mai. In a tawm chi nih phei chuan a ţulah chiah kan chhuak a, inhmuh fuh a har alawm" ka lo ti ve a.

A u chanchin min sawipui ka hlauh tehreng nen "Ka ngaihtuah lutuk a, vai rama mahni chiaha in luah a ni sia, a khua a har dawn tih ka hria a, lo ţawngţaipui ve tawp rawh" a ti a, chhan let ngaihna ka hriat miau loh avangin ngawih ka chuh a, a chesual emaw ka tih hnu kha chuan ka ţawngţai ve ngei a, ka bansan lehnghal a tih theih ang. Ka kal tumna a hla lo hlauh a, a sawi tam lutuk hman lo. 

Ding tur a ka hrilh hnuah "Hetah hian maw i chhuk ang?" ti a min zawtin a ding ve mai a, "Ni e..sawlam ah sawn ka kal thung ang a, a hla lo a, ke pawn kal chhung a rei lo" tih pahin ka kalna tur lam chu a kawk a, "Aw le..kal hma ka ngaih changin ka lo sawm ţhin dawn che nia" a ti a, kan invai liam a. 

Nu Hmangaihin tual zawlah min lo nghak a, min hmuh veleh rawn kal hnaiin gate a hawng rawk rawk a, "Rin aiin i hma daih mai" min ti a, ka luh hun pawh nghak lovin ka kut a chelh a, min kai lut a, ka nu'n min ngaihsak turin a hrilh a ni ngei ngei ang, ka kal hreh lutuk avang te khan a ngaih a ţha lo a nih ka ring. 

"Inthlahrunna tur a awm lo a nia aw. Mihring chu buaina leh harsatna tawk thei vek kan nia, i nu pawh a khaihlak chang a awm lo thei lo a, a ngaihawm viau rualin a ai i awh hi pawi tihna kan nei lo a nia" a ti chiah reng a, inchhung ka luh rualin Zonuna pawh inchung aţangin a rawn chhuk ve chiah a, kal chhuak thei turin a lo inpeih at tawh mai. 

"I nu i chhawk leh dawn mi?" a ti a, beisei loh deuh a min hmu chu mak a tih hmel ve deuh a, "Aw..ka pa a la nuam lo a" ka ti ban charh a, hriatthiam hmel tak hian a lo bu nghat a. 

"Hna kal ka ngai a, ka lo haw hma chu hetah lo awm reng la, ka thlah dawn che nia" a ti a, lawm viau mah ila inthlahrunna chin chu ka nei ve tho. 

"Keini pawh inentir turin kan chhuak dawn a, kan kalna tur thlang lawkah ka ute an awm a, Zonuna rualin kan chhuak ang a, ka ute in aţangin doctor kan nghal ang a, kan tlai maithei a ni" Nu Hmangaihin a lo ti ve zung zung a, nau ka lawm loh nen Sangsangi nen kan in awm nileng dawn chu a ni sia, mah se ka hmu miah lo. 

"Khawiah nge Sangsangi?" ka tih chuan "Darthlalang ah a in en leh tawh aniang..tunlai chu hmelţha a inti zual a" nui chunga Zonunan a lo tih chuan ka nui ve mai a, a che vel engkim mai hi a lawm a, a fanu hi chu a hmangaih ve chiang a ni. 

"Taka Remruat, Sangsangi school bang i hruai thei ang tiraw?" Nu Hmangaihi bawk chuan a lo ti leh a, a school luhna hming te min hrilh pahin "Kal lam chu kan thlah chho thei mai ang a, kan hruai hman dawn lo a" a tih zawm zat a. 

"Hruai thei mai ang, a hla hleinem" ka ti a, school a kal daih tur chu a lawmawm letling zawk. Ngaihtheih loh vang a ni lo a, naupang rilru thianghlim a nia, ka haw hauh lo bawk. Mahse naupang hi ka lawm lo ve hrim hrim. 

Sangsangi pawh a pite pindan aţangin a rawn chhuak ve hlawl a, a uniform chu a inhmehin a nui sang reng ţhin hian a ti lawmawm zual a, Zonuna kut a vawn ruala a piin a lo chhaih chuan a pa phenah a biru a, nuam a tih hmel viau tho. 

Midang an chhuah vek hnuah "Chaw ei nghal law law mai la" a ti leh tawh a, "Ka duh lo..min thlah hman turin lo haw vat la a ni mai" ka lo ti ve thung a, chaw ei kher kher chu ka ngam ngang lo a ni. 

"Lo che hah lutuk lo la aw" zawi deuh ruih a tih pahin min kuah a, kan inlen hleih angreng si, kan in upat hleih bawk nen, ka fanu a ni e pawh ti se awih lo tu aiin awih thlap tu an tam zawk ang. 

"Hah dawn lo e..nau hruai bak tih tur a awm vak hleinem" ka ti a, "Haw hma theih dan ka lo ngaihtuah dawn nia" tiin ka hmuiah a fawp a, a inla hrang leh vat thung. 

Kawngka bul thleng ka thlah a, a nu leh paten min hmuh ve hmain ka lut daih a, a motor thawm chu ka ngaithla reng a, a zawi tial tial a, a reh hmak rual chuan phone ka phawrh a. 

"Hello" Kimkimin a rawn tih chuan "Ka chhuak hman leh lo a" ka ti nghal thawr a, chanchin hrilh tumin keimah zawkin ka call hmasa a ni.

"Engtikah nge i hman ang?" ti a min zawh chuan "Nilengin ka hman lo. Nu Hmangaihi te in entir turin an kal a, Zonuna te pafa an awm bawk si lo a, a ţul ţul lo ti zung zung lo a ka len chhuah daih chuan an ngaihdan a ni lo palh ang" ka ti a, thawm dang a tam a, ani pawh a chhuak tawh a ni maithei.

"Ka chhuak chiah a mahse hei dawrah ka kawi lawk a" ka ngaihtuahna hria ni awm taka a tih chuan "Nidangah kan ti mai dawn mi?" tiin ka lo zawt thuai a. 

"A ngai lo ang..vawiin chu kan bang hma deuh dawn a, ka lo kawi mai dawn nia. Bawihtei school a kal em?" a tih chuan a kal thu ka hrilh a, "A nih chuan ka lo lam nghal mai ang. Inah khan min lo nghak tawp mai rawh" a ti a, a phurawm zawk zawk lo khawp mai. 

"Aw le" ti a phone dah mai ka tum chu "Ei chak i nei em? I neih chuan sawi la ka lo hawn ang che" dam deuh hian a ti a, "Ei chak vak pawh ka nei lo. Engmah hawn sak ka ngai lo, chhunah phei chuan thil ka ei vak ngai lo a, min ngaihtuah duh suh" ti chiam mah ila "Lunch pack ka lo hawn ang" a ti ţalh a, a tihdan hi ka hrethiam lo. Min ngaihsak deuh ang hian awm lo law law se, a nih loh pawhin min hau vak vak se ka awm a nuam zawk daih ang. 

Darthlalang ka nawh zawh rual chuan naupang nui ri ka hria a, Sangsangi a nih ka ring nghal. Pawn a chhuak kher loin darthlalang phen aţangin ka en a, rin ai daihin an lo haw hma. A nui ri leh scooty ri chu a inpawlh nawk a, a nu hnungah ţhuin a kawngah a kuah bet ve ţai a, sawi kher lo mah se an hlim zia ka lo hre ve thei hial a ni. 

Inchhungah an rawn inkai lut a, Kimkimin a thil khai lai min pek chu choka ah ka luh pui a, a insawi ang tak takin eitur a lo hawn ngei a, a tui hmel em em mai lehnghal. 

Ka dah fel hnua choka aţanga ka chhuah chuan hmuh tur an lo awm tawh lo a, Sangsangi a inthlak pui a nih ringin thingpui ka chhuang a, an ril a ţam tawh viau maithei a ni. 

Thingpui ka siam zawh hnuah pawh an rawn la lang lawk lo a, a daih hlauin no chu ka chhin a, ka nghak ran a, an tello a lo ei hmasak ka duh bik lo a ni. 

Choka a an lo luh chuan Sangsangi aiin Kimkimi chuan ka mit a la zawk a, tshirt lian hnelh hnawlh, a ta a ni lo tih hriat zel mai hi a ha a, a mal chanve thleng vel chu a khuh pha a, kekawr a ha lo emaw ka tih tawh hnuah filter lam panin a kal a, a pen pah chuan tshirt hnuaia a boxer hak chu a lang zeuh zeuh a, phalna la loin a thawmhnaw a haksak ngam chu a nia, an inpawhna a la thuk viau a nih ka rinna chuan min ti hnual a, ka awm a nuam lo ţan der tawh. 

"Ei rawh Remruat, a sat laia i ei loh chuan a tui lo hman ang. Eitur dai deuh hi tui ka ti ngai lo a, keimah ang i nih ve chuan a sat laia ei a fuh ang" a ti a, a hmazawna ţhutthleng chu pawt chhuakin ka ep chiahah a ţhu a, Kimkimi ho a dawhkan kil chu a nuam miah lo. 

"Anu, ka ei duh tawh lo" tih pahin Sangsangi chu a ţhutna aţangin a chhuk tharh a, a kal nghal mai dawn emaw tih laiin a nu bulah a ding a, a awm chu a ngheng chial a, a mitmeng fiah zet a min en kiau avang chuan ka zam lek lek a ni. 

"Va insil fai la, i nula tawh a i thiam ve vek tawh kha" awki dam deuh hian a ti a, Sangsangi sam a chul pah bawk a, an inţhenna a rei tawh nen a fanu nen a an inpawhna chu a la thuk khawp mai. 

"Sangsangi ka neih dawn hian kan buai a sin aw" a ti vang vang a, min rawn enin a nui sang mai bawk a, nuam lo ka lo ti takzet tawh thung.

"An vei tir chawp che mi?" ka tih chuan lu a thing a, "Zonuna hi lo luh ve phet a tum a, nurse hoin an phal si lo a, naute kan han nei a, kei a nau nei zo min nawr chhuak kha min buaipui a duh si, naute a kalsan hleithei bawk si lo, a phar buai vel kha tun thleng hian an la sawi ţhin" zangkhai deuh hian a ti a, Sangsangi chhip chu a biangin a nawr zeuh a, tihsual chu lo nei ve bawk mah se a fanu a hmangaihna erawh hi chu a nasain a langsar a, hmuh hmaih theih a ni lo. 

"Lokal rawh tv ka entir ang che. Nangmahin lo en rih la, i u hi thleng ka silpui lawk ang a, ka rawn en ve ang aw" phur hmel deuh a tih pahin inpui lamah Sangsangi a kai phei a, lo let leh lo tawp mah se pawi ka ti lo nasa mai. 

Kan thil eina ka khawm lai mekin a rawn lut a, "Dispo a ni tho a khawi lo la rawh..pawnah ka va paih ange" a ti a, ka pek hun pawh nghak lovin min laksak a, a chhuahpui nghal daih a. 

"No bak sil tur a awm lo. Tih fel tur dang pawh ka lo ti vek tawh a, nangchu ţhu mai mai rawh" ka tih takah chuan a ţhutna ngai bawkah a ţhu leh a, a kut pahnih chu dawhkana dahin a suih zawm a, thinrim angin a lang lo na a a bula awm a nuam lo duh kher mai. A pasal hlui ka ngaihzawn vang hian inthlahrunna chin ka nei a, ka be bawrh bawrh ngam lo. 

No ka sil zawha kut ka hruk hul lai chuan "Lo ţhu rawh" a ti a, kan thil ei laia ka ţhutna kha a kawk zauh a, "Zonuna hrilh suh ka ti zet nain inah ka lokal sia, Sangsangin a hrilh ngei bawk ang a, i duh chuan i hrilh thei leh si ang. Min hau hrep a i ti dawn nia" fiamthu hian a ti a, nuih luih tum ngial mah ila harsa tak a ni ringawt. 

"Miin dawt an lo hrilh ţhin a, ngaihzawng nei ang ten min chhuah a, a uire fo mai an ti bawk a, a sawi tu ka zawh lahin min hrilh duh ngai bawk si lo. Naupangchhe zawk zawk kan ni tawh lo chung hian kan inţhen hlim kha chuan Zonuna runluih nan ngaihzawng ka nei a, kan inneih lai daih aţanga inkawp kan nih thu keimah ngeiin ka hrilh ngat a, thinrim lutuk avangin ka inchhir lehna turin ka lo ţawng palh a ni ber" a ti a, min ngaina miah lo anga awm ţhin si tun ţum chu a dan a dang riau. 

"Pawl sawm kan nih laia inhria kan nia. Miin an sawi hian an lo sawi uar a, a ţhenin pawl7 an tih laiin ţhenkhatin pawl11 an tia, kan inhriat ţanna chu pawl 10 kan nih lai khan a nia, zirna vel a ţha lutuk tawh chung khan tun ang em hian kan la changkang lo a, a rei tawh viau nain ka la hre reng mai. Hmeichhe pakhat nen kan insual a, thinrim viau mah ila tharumah ka hneh si lo, Zonuna hian min rawn ţhelh a, ka insual pui nu pawh kha a thinrim ngang aniang a hnunga min dintir tawh hnuah pawh min khawih a tum ţang ţang tho a, hmeichhia kut thlak em chu a ti deuh aniang, Zonuna tihngaihna hre lo khan min tlanchhiat pui ta ringawt a. Tunlaiah chuan khatiang kha a ni tawh lo. School ah ka thawk a, naupang zingah hun ka hmang tam a, buaina neuh neuh chu nei mah se tumah an insual ngai lo" a tih chuan "School naupang in nih ve laia insual in ching chu mak ka ti daih zawk" ka lo ti a, a nui ve hak hak mai. 

"Keima thiam loh a nia. Kan inhnial mai mai a, kei aiin a lo ţawngthei daih zawk sia, ka thinin a tuar loh chinah a samah ka kek a" a ti a, keipawh ka nuih a za ve tho.

"In la upa vak chuang hleinem. Kum40 em pawh in la tling lo a, changkang lo lutuk chu a nih ka ring lo" ka tih chuan "Ni chiah e..kan changkang tawh tho nain tun ang em hi a la ni lo ka tihna a nia" a lo ti a, Sangsangin dawhkana tui bottle a hnutchhiah chu lain a in a, eng chiah nge min sawipui a tum rin zawn a har khawp mai.

"College kha shillong ah kan kal ve ve a, chhungte hlat a kan han awm takah phei chuan kan in ngaina zual sauh a, ţhian bak pelin kan inkawp chho ta kha a nia, ka bialpa hmasaber a nia, kan inkawp hnuah phei kha chuan reilote pawh hmu lo ila ka ngai em em zel a, ka thikthu a chhe ve viau zel bawk. Tun thleng hian ka la ni, ka thikthu a chhia a, hmeichhe dang bula a awm hi ka ngaithei lo ţhin" awmze nei zet a a tih chuan hmui ka chip hmak a, min sawichhan tih chu mi â ber pawn an hria ang. 

"Ka veng nasa ţhin bawk a, Tluangtea tih loh chu tumah a kawm ka phal ngai lo. I hre kher lo maithei a, a ţhianpa pakhat Sena phei chu phone a biak ringawt pawh ka phal sak lo a, kan inhauh phah ngun mai, mahse khatiang khan lo ti lo ila chu tun a a dinhmun hi a thleng pha kher lo maithei a ni" a ti a, Sangsangi tui bottle chu a khal neuh neuh a, choka lah chu a reh tlawk tlawk a, ka ep chiah ţhu chu ka en leh ţhin a, a landanah chuan thil tam tak ngaihtuah kual vel a ang ber. 

"Bansan rawh" a tih chuan "Eng maw i sawi?" ka lo ti vat a, a thusawi chu ka hrechiang hle thung. 

"In kal thui tak tak hmain bansan rawh. Nakinah hrehawm i la ti dawn tho a, tuna i bansan chuan natna i pumpelh tihna a ni mai. Thinlung a nat tawh vek vek chuan tih dam leh a harsain a theih loh tluk a nia, natna ah chuan a hlauhawm ber hial ang chu"  a ti a, an inţhen chhan tur awm ang ka rinzawn thiam ta hauh lo. 

"Na thei lo kan awm lo ang bawkin natna hi chu mitin ta a nia, tupawh mai hi natnain min la luhchilh vek lo ang tih pawh a sawi theih hleinem. A chang chuan min luhchilh tak tak hmaa sual let a ngaih chang te a awm a, pumpelh theih a ni lo. Hel kual vak vak ai chuan tuarchhuak thei tura inbuatsaih lawk a ţha zawk" ka tih chuan ngeiawm deuh hian a lo ţhen sak a, sawidik loh ka neih awm ka hre bik hauh lo. 

"Tuna i kawp mek hi ka pasal a nih hi" a ti a, min en ran a, inthiam lohna ka pai ruk reng ţhin chuan min ti tim a, a pasal hlui a nih thu sawichhuah chak viau mah ila ka sawi thei ngang lo a ni. 

"Thinrim laiin che buan buan mah ila hunin min bengdai a, ka chhungte leh Zonuna chhungte pawh an la inbe pawh reng a, kan nupa a kan inkar chhiat chhan te kan sawi dun theih chuan kan chhungte hi chuan inhruai an tih lehnghal mai ka ring" a tih chuan mak tak maiin a thusawi chuan min ti na pha ve tlat a, inbuatsaih lawk nasa viau mah ila thiam lo zawk ni a inhriatna ka neih ruk reng avangin a thusawi chu innghawng tir loh a harsa a, ka zam takzet bawk. 

"Nupui pawmlai neiin ngaihzawng an neih reng reng hian an nupuite aiin an thlang zawk ngai lo. An nupuite ţhen an hlau a, an hriat an hlau ngawih ngawih zawk ţhin. Pathlawi fa nei tawh an tih te pawh hian an nupui hluite theihnghilhin an hnungchhawn tawp thei bik lo. Nupa chu fate hian min phuar nghet lehzual a, han intlantauh san chang te hi chu awm ve bawk mah se rei a daih ngai lo. An fate vang tal pawha inrem leh an duh ţhin a, nula tan chuan mi pasal ni lai mek emaw pathlawi fa hial nei tawh ngaihzawn hi a fuh chiah lo. Keini pawh engtin nge kan awm zel dawn kan la hre lo a, Sangsangi lahin min ngai a, a damloh chang phei chuan Zonuna hian zanrei ah te min rawn kaitho a, a pi leh pute hian an duat viau nain nute hi chu tuman an khum thei tak tak lo. Tun aia a la tet deuh hlek lai phei chuan inhau hrep mah ila Sangsangi muttheih loh chang te, a nawm sam loh chang te hian a rawnkal pui vang vang zel a, in pumpelh tum viau ţhin mah ila a har thei khawp mai" a tih hnuah "I kut kha engtia i tih kan nge? Thil sain a ti kang nge acid tui an leih palh che?" tiin min zawt a, keiin rang lutukin ka kawrban, tlema tawm deuh chu ka pawtthla sawk sawk a,  hnuai lam ka bih daih bawk. 

"Kang i hua em ni? Hmeichhe tan chuan ser lian neih hi a nuam duh lo a sin aw. I tih kan hlimah khan doctor pan nghal la ţha tur" a ti a, kang ka huat meuh chuan doctor te pawn tihngaihna vak an hre bik lo ang ka ti rilru ve nain ka sawichhuak peih lem lo. 

"Eng nge min hmuh i duh chhan tak chu ni a?" tiin ka zawt ta daih a, min hmuh a duh chhan chu a sawi ţeuh tawh a, lo man thiam ve vek mah ila ka ser chungchang kher kher chu ka sawipeih thlawt lo a ni. 

"Ka sawi tawh kha. Nu ka nih angin ka fanu hi a fahrah ka phal lo a, nuhrawn a hrawn ka phal hauh lo bawk. Kan nupa inhriatthiam tawn loh ţhinna avanga ka thinrimna te kha a bo vek tawh a, Zonuna pawn a rilru ka lo tihnat tawhna te kha a tuar dam vek tawhin ka ring. A fanu hi a fahrah a phal bik lo ang a, tunhma angin awm thei dawn tawh lo mah ila Sangsangi vang ringawt pawhin kan inhruai leh thuai ang. Pawl10 kan nih lai aţang tawh khan a nuna hmeichhe awmchhun chu keimah ka ni. A hmang ţangkai mai mai che a nih hi. Mi khawhar hnem tu mai mai ni duh bik mah ta che" a ti a, pawn a thawm a awm takah chuan a ngawi ta daih a. 

Kan lo ngaihchan reng laiin Mami a rawn lang hlawl a, a hawikual thuak hnuah "Ka nute an la rawn haw nange?" a ti a, an lo la haw loh thu ka hrilh lai chuan ţhutthleng pawt chhuakin dawhkan chu a rawn kil ve a, phone a phawrh zui zat bawk. 

"Ka nu Dingi te inah an la awm em maw ni le, ka lokal dawn ka ti sia, an haw hma ve deuh ka ring a" a ti nuah nuah a, Kimkimi chu hmu ang pawn a awm lo. Sangsangi a rawn luh ve erawh chuan a lo fiam nghal chul a, chu chu remchangah lain "Thingpui i duh em?" ka lo ti a, a sam lah chu a kir thur bum mai lehnghal a.

"I lum peih chuan duh tho e..parlour ah ka kal a, engmah pawh ka la ei lo. Ka sam lah hi an tisual a, kan pa takngial pawh ka la hmu ngam lo a nih hi" a ti a, uar zeta a nuih takah chuan ka lo nui ve ta ringawt a. 

"Tu nu nge lokal a? A nuam awm bik hi ka tia anu a lokal bawk sia" tiin Sangsangi chu a fiam leh rih ţhin a, Kimkimi ţhu ve chu hmu reng chungin a la be lo cheu a, hmeichhia vek kan awmkhawm nain kan boruak chu a rit churh mai. 

Sangsang leh ani an inzui chhuah takah chuan Kimkimi pawh a ding ve uaih a, "Ka han inthlak anga ka haw ang. Min tibuai tu an awm zel sia, duh ang pawn a ti ti theih loh a nih hi. Nidangah chuan pawn lamah kan inhmu tawh dawn nia" tih leh kal a rual a, an chhuah vek hnu chuan thawk pangngaiin ka thaw ve thei chauh niin ka hria. Am zetin boruak ka hip lut a, ka thaw chhuak leh ţhin a, ka taksa ţang ţeuh reng pawh ka thlah dul tial tial a. Kimkimi khan inhmuh leh a duh a nih pawhin thu ho deuh deuh a sawi leh dawn chuan ka hmu tawh lo ang. An intawn tirh vel aţanga bul a ţan leh anih ngat phei chuan ka ngaithla zo hleithei lo ang. 

Buhfai ka sil laiin Zonunmawia motor thawm ka hria a, Kimkimi thu min hrilh tam tak kha ngaihtuah zuiin thil ni thei lo pui pui ka zeldin kual a, keimah zawk hi ka hah leh vek tawh. 

Amah chiahin a rawn lut a, a nu leh pa an la tel ve lo cheu chu mak ka ti deuh a, keiai mahin U Mami chuan mak a ti zawk awm e. Mahse, Zonuna chuan "Nakin deuhah an rawn thlah ang. Traffic a jam leh nasa dawn sia, rawn phei duh lo mai rawh an ti a nih kha" a ti hmasa te te a, Sangsangi a pawm zet tawh hnuah "Eng nge i rawn tih lehpek a?" tiin Mami chu a zawt a, a melh no tehchiam lo kher mai. 

"Parlour ah ka kal a ka lo kawi a nih hi. Ka pa ka ngaihtuah ve tho sia, chhuah rau rau chuan hmu lo a haw ka hreh alawm" a ti vin hlar a, a lu a lian sa bawk nen, a sam chu a mawi lo khawp mai. 

"I sam te chu engati nge a?" Zonuna pawh chuan a ti ve hlut a, a nuih a zat hmel deuh tawh a, a melh rum vak tawh lo bawk. 

"An tisual a, khawih lehnghal chuan samin a tuar dawn si. Heti hian ka pu rih mai ang. Ka pan tawh lo chiang viau ang" a ti a, a sam chu a chul a chul a, Nu Hmangaihi pawh lo haw se a hau veleh tho ang. 

"I lo chau em?" choka a ka lut chu min zui lutin ka bulah a tap leh chawt tawh a, rawngbawl vak a ngai lo bawk nen duh chuan ka haw thei reng tawh a, Nu Hmangaihi te lo nghah chhuah ve hrim hrim ka duh deuh avanga la awm chauh ka ni. 

"Chau lo e..nang zawk?" ti a ka zawh chuan a chauh loh thu min hrilh a, "Ka han intifai anga ka lo chhuk leh vat ang" a ti a, a pindan a a luh chuan Kimkimi a lokal tih a hre ngei ang. A awm lai pawn a lokal fo a, engahmah a ngai lo ang chu maw. 

Dawhkan kila phone ka hmeh ve mual mual laiin a rawn lut a, inbual zo hlim tih takah en thuak pawhin a sam chu a la hnawng tih a hriat theih a, chimlim lutuk lo mahse "Kimkimi a lokal em?" tiin min zawt ve ngei a, ka bu nghat a, ţawngka chuan ka chhang lo. 

"Eng nge a rawn tih?" a ti bung nghut a, lawm chiah lo hmel a pu bawk. Sawi loh theih ni hek lo le, "U Marti hnen aţangin ka phone number a nei aniang. Min rawn bia a, hetah ka awm a, an chhuak vek ka lo ti mai a, an ban hma ni a ni tho sia, Sangsangi school bang pawh ka lam mai ang a tia, an nufa in an rawn haw dun alawm" tih zawng ka hrilh a, nunhlui insawichhuah sak reng hi tuman kan duh lo a, chuvang chuan thil dang chu ka hrilh tel duh ta lo. 

"I phone number chu engatan nge a tih? Thil sawi a nei em?" a ti a, thup ka neih leh neih loh hriat tum ni awm tak hian "Tlem te chu a sawi" ka tih lai te chuan mit ti zim sun hian min lo en a, a thusawi ţhenkhat kha chu a ho em a, sawichhawn leh pawh ka peih lo. Ţhenkhat erawh kha chuan amah ngei pawh hi a tih nat ka hlau a, chuvanga sawi chhawng zung zung lo chu ka ni. Nunhlui a nia ti ţhin mah ila a chang chuan kan nunhlui hian na taka min vuak chang a nei tho ţhin. 

"Thu pawimawh sawi tur a nei lo. Lo be tawh suh ang che" zawi te, khauh zet si hian a ti a, an inhmuhin an inbe chhe ngai mang si lo, an awmdan hi a mak tak tak a ni.

"Ka biak vein i haw em em a, tunah hian lokal ta thut se nangmah zawk khan ţha deuhin i lo be leh ang a, i thlah leh vel ang a" ka ti let ve salh a, "Sangsangi hmuh lai chuan ka be chhe ngai lo. A awm ve lohna hmunah chuan ţhu dun reng mah ila kan inbe vak ngai lo thung a" a ti a, a fanu hi a hlim loh a hlau a, chuvanga be ţha chu a nih hmel. 

"Chupawh nise min thlah rawh a tih loh pawn thlah i ngai em i tih chung zel kha. Sangsangi a awm ve loh pawn i zawt tho aw" ka tih takah chuan ka awm lohna lamah a inher a, "I nuih kha aw..ka hmuh loh nan i inher daih a, ka hmu hman tho a nia" ka ti a, keipawh ka thutak hleithei tawh bik lo. 

Ka dinna lamah a rawn inher leh a, nui reng chung chuan a hmui hnuai lam chu a liak a, insum a tum nasa ve hle mai. 

"I thik ve deuh em ni a?" nuihza aw deuh taka a tih chuan "Khatiang kha chu min zawt buai duh lo law law rawh. Ka thik reng reng lo" ka ti a, ka thik awm ka la hre lo tak tak reng bawk a, ka rin lutuk vang a nih ka ring. 

"Chaw ei ve nghal mai ta che" a tih leh chuan ka lo hnar lehpek a, Nu Hmangaihi te rawn haw pawh chuan min sawm a, ka nu ka ngaihtuah thu sawiin chhuanlam ka siam leh a, ka pa nun hman duh dan thlenga an hriat vek tawh avangin min chelh lui bik lo. 

Haw kawngah chuan "I nu nen hian hna inthleng daih ula" a ti hem mai a, atthlak ka ti lutuk chu ka lo nui hak a, "Engati nge?" tiin a chhan hrereng chungin ka zawt lui ngat a, kei aia u daih ka fiam ka fiam ta mai chu a nia. 

"In thlen ruala hmuh tur a i lo awm ve hian a nuam a" a ti a, nui var var chungin pawn lam ka thlir a, a hmel ka hmuh hian ka hlim ve tho tih hria se chu mak a tih loh vek pawhin a lawm viau ang. 

"Chaw kan la ei si lo a ka lo peng lo mai ang" a tih chuan sawi buai lovin ka chhuk tharh a, inchhung ka luh ruala ka thil hmuh chuan min ţhawngin ka ding chawt a, ţawng nachang pawh hre lovin ka en tlawk tlawk ringawt a. 

"Zualtea hi a lo lang hlawl a" ka nu zawkin a lo ti a, a nu nen kan inhmuhna a la rei lo a, a nau nen phei chuan tukin ah pawh kan chhuak dun a, a lo haw dawn tih an sawi lo ve ve a, a nu phei chuan be miah lo turin min la hrilh tho a nih kha. Pawisa nei tan chuan kal zung zung a harsa lo tih hre mah ila awih harsa ka la ti tho. 

Mak ka ti lutuk chuan zawh hmasa tur ber pawh ka hre lo. Kan in en ren rawn hnuah "Sawifiah ngai a tam khawp ang aw" ka ti thei hram a. 

CONT