DEAR DIARY-17

DEAR DIARY-17

"Class kan la ţan dawn lo deuh a, tumah hrilh lawk loin ka lo haw a nih hi" a ti a, zahzelah a lu thak lo pui chu a hiat a hiat a, rei deuh ka nghah a ngai dawn emaw tih laia a rawn lang thut chu a mak khawp mai. 

"I nute tal chu hrilh tur che alawm. An ngaihtuah tehreng che nen" tih pahin ka pan hnai a, ţhutthlengah bag ka dah a, sam ka ţawn zui nghal bawk. Nilenga ka ţawn chuan ka lu lei a na vek zel a, ka ţawn loh phah fo mai. Inchhungah erawh chuan ka ţawn tawm reng zel thung. 

"Ka hrilh chuan lo haw an phal dawn lo a" ti a min chhan pahin ka bulah a rawn ţhu a, kan inţhen hnu reilote a ngaihzawng ka neih lehnghal vang nge, ka tim dai mai. 

"Mahni chauh a awm chu hrehawm i ti deuh a ni maw?" fiamthu ti tak deuh hian ka ti a, ka melh ralh a, ka lam a lo hawi ve lo. 

"Hrehawm em em chuang lo e. Ka lo haw ve mai mai a nih hi. Ka kal leh har lo ang" a ti a, inlaichinna kan neih ve ţhin kha a sawichhuah palh ka hlau ru khawp mai. 

"Leng reng rawh aw Zualte, keini chhung hi chuan chaw kan ei tlai thei khawp a, chaw ka chhum hmin tawh bawk a rawng kan bawl ange" tiin ka nu chu choka ah a lut a, inpui leh choka hi a in ping dang hran lo a, awm ho ang reng tho kan ni. 

"Ka lo haw chhan min zawt dawn lo mi?" zawitea a tih chuan a awki ang chiah hian "Engati nge?" ka lo ti vat a, a sawi tur awm ang chu ka ngaihruat thiam tho. 

"Mumal lo deuhin kan inthlah sia ka awm a nuam lo deuh a" a ti a, loh theih loha sawi chhuah a ngaih takah chuan "A pawi hleinem. Kei chuan ka nghak thei lutuk alawm. Hun inpe la, midang ngaihtuah lovin nangma tan chauh nung ve rih rawh" ka ti a, ka rilru diktak ka hrilh bawk. Ka tan hian a inhmang ral zo vek a, amah chiah inngaihtuah ve rih turin ka duh a ni. 

"Ţhian nei lo anga i inngaih ka hlau a, class ţan hma a ka lo haw leh chhan pawh a ni pakhat. Ka tum thut a, ka nu pawh ka hrilh loh phah a nih kha" a ti lehzel a, a rilru ang hi pu ve thei ila ka ti ţhin. Min ngaihtuah em em a, kei lahin natna bak pek let ka nei si lo, a khawngaihthlak takzet a ni. 

"Eng nge kan pathlawi-a nen a in chanchin ni reng reng a? Thla hnih pum hlum kan inhmu tawh lo a, i nu'n chanchin min lo hrilh a, hnathawh tur a zawnpui ţhin che em ni?" ti a min zawh chuan "Aw..kan zawng rei ve angreng a, hlawh tlem leh lutuk kha kan iai ve tho sia, mahse tunah chuan ţha deuh ka hmu tawh alawm" ka ti a, a bu nghat a, a lungawi hmel viau nain hrehawm tih rukna chu a la nei maithei a ni. 

"Engtik ah nge i ţan dawn?" tiin min zawt leh a, "Thlaleh aţangin a nia, ka lawm tak tak a ni. Hna zawn hi thil namai a ni lo a, diktak chuan hlawh nei lo a awm reng hi nuam ka ti lo a, mahni inchhung ngeiah pawh a lo inthlahrun theih khawp mai. Hna lah hi mamawh veleh hian a vang a" ka ti zung zung a, U Marti khan thla khawt hlawh min pe tho lo se chu kan buai ve viau ang.

"Zonuna a awm a, hna i nei leh tawh dawn bawk a, ngaihtuah lutuk i ngai tawh lo a nih chu tiraw?" a tih chuan za lo deuh hian ka nui hak a, min hriatthiam ţhin em avangin a bula awm nuam ka ti ţhin a, mahse tunah chuan min hriatthiam poh leh ka inthlahrung a, inthlah dul a hahdam deuha awm har ka ti tlat tawh. 

"Ka hmuh phakah awm reng la ka tih rualin zirlai i nia, tun chinah chuan i zirlai chiah ngaihtuah tawh rawh. Keimah chauhin thil tam tak ka paltlang tawh a, ka paltlang zel thei bawk ang. Ţhian kan nih vang ngawt a keimah chiah min ngaihsak turin ka duh lo che a, nghawrh deuha zir turin ka duh che. Nakinah hna ţha deuh i la nei anga, i nu leh pa ngaihthah si lovin i duh duh i ti thei tawh ang" ka ti ve mual mual a. 

"I hlim em?" a lo tih chuan a lam ka hawi a, ani pawh chuan min lo en ran a, a thutak bawk nen, chhan dan tur ka hre mai lo chu ka ang zuau a, ka chip leh ţhin a. Chu chu a hmuhin tawi tein a nui a, "Min vengthawng suh" a lo ti khauh a, ka sawi hreh ngang mai. 

"Aw..ka hlim alawm. Hlimpui tham thil tam tak ka tawng a, mahse, ka ti na che tih ka hre ran a, ka hlimna a famkim ngai chuang lo" ti a thu dik tak ka hrilh chuan a nui deuh a, a nui hmel pawh ka hmuh lohna a rei ta khawp mai. 

"Lo famkim tawh rawh se..i hlim chuan a ţha alawm. Hrehawm i tuar nasa tawh a, hlim i phu ve tawh" a ti a, ka nu chawhmeh siam rim kan hriat takah chuan "I ril a ţam tawh em?" tiin min lo zawt leh a, lu ka thing a, ka haw dawnah thil ka ei a, ka ril a ţam lo tak tak. Chu erawh sawi kher ngaiin ka hre lo, ka nu'n chau chung chungin rawng a bawl a, phur deuhin ka ei sak ngei tur a ni. 

"A nupui nen an inţhen hlen hmak theih i ring em?" ti a min zawh leh chuan "Ka hre lo" ka ti a, ka inrintawk loh em avang chuan ka aw pawh a zawi hle a, a ri chang chang chauh a ni.

"An inţhen hlen thei a nih chuan i vannei a ni mai. Duh ber te neih tluk a awm lo a, pathlawi fa nei tawh pawh nise a fel chuan a iai awm chuang loh a" a ti a, nat rukna nei reng chunga min la fuih thei zawk te hi mak ka tih rualin a puitling ka ti takzet a ni. 

"Min haw tawh lo tiraw?" ka ti phawng a, a nuih a za viau mai. 

"Ka haw ngai lo che" a tih chuan tlemin awm a nuam deuh a, inthiam lohna leh khawngaihna ka neih erawh duh duh hun a paih bo theih a ni miau lo a, keimahah hian a cham reng mai.

"Thil ka lo hawn che a" a tih chuan "Eng thil nge?" ka lo ti thuai a, a ţhutna bul leh hnung vel te, chhuat thlengin ka en kual nghal vek. 

"Inah ka dah..chaw lo ei ula ka rawn pe ang che" tih leh din a rual a, dan hman pawh a ni lo. Kan inchhung aţanga a chhuah fel hnuah pawh ka ţhutna ngaiah ka la ţhu reng a, ngaihtuahna a vak thui duh khawp mai. 

Chaw ei khamah ka intiam lawk angin Zonunmawia ka call a, Sangsangi zawkin min rawn chhang daih a, "Khawiah nge i pa?" ti a ka lo zawh chuan "Apa a damlo a" a ti a, a ngawi leh vang vang a, a rik rawk rawk reng danah a che sawm a nih ka ring. 

"A muhil alawm" a rawn ti leh a, a pa chu a ko zeuh zeuh bawk a, tlaia min thlah kha chuan a la pangngai viau kha mawle. 

"Eng nge na a?" ka tih chuan "Ka hre lo a" a ti a, "A damlo" amah bawk chuan a rawn ti leh a, a biak tlak vak loh avang chuan ka mangţha ta ringawt a, ka ngaihtuah angreng khawp mai. 

Zualtea lokal leh chuan box lian vak lo leh lehkhabu ni awm tak a rawn keng a, "Ţhu rawh" lo ti nghal vat mah ila "Ka ţhu tawh lo mai ang. Ka nu'n ka pite ina kal a rawt a, ka kalpui lawk loh chuan" a ti a, chutah a thil ken lai chu min pek pahin "Dawr kal nan i hmang ţangkai ang" a ti leh tawp a, chhuah nghal mai a tum chu "Ka lo thlah ang che" ka ti a, kan inzui chhuak a. 

Step a kan chhoh lai chuan ka kut a vuan a, a hmuh loh a nuih var var pahin a kut chu ka lo hum ve a, inkai chungin kan chho a, ţhian kan nih lai pawha kan tih fo dan a ni. Ka kut lehlamin a thil min rawn hawn ka kuah hlun bawk a, kal chak a har khawp mai. 

Step kan chuan chhuah hnuah pawh ani chuan ka kut a la vuan reng a, "Ka chhuk thla lehnghal mai ang" ka tih rual deuhthawin an garage lamah min kai phei a, helai hmunah hi chuan êng an chhi ngai lo a, a thim deuh khup zel. 

"I hmel ka hmu leh tawh a, i hlim bawk a, rilru nuam deuhin ka kal thei tawh ang. Class kan ţan chho ang a, ka rawn haw zen zen tawh lo ang" a tih rual chuan ka kut a vawnna chu a ti nghet salh a, min hmer ngawt ngawt a ni ber. 

"Natna a thlen sak che a, i mittui hial a ti tla a nih chuan pawisak ka nei vak lo ang. Tun a ka thusawi hi Zonunmawia lo hrilh ang che" a ti a, harsa tih hmel zet hian a thaw hawk a, ka kut phei chu hmer nghet tawh tak a ni. 

"Kan ngaih hlut zawng hi a inang lo a, nang hi ka ngaih hlut ber berte zinga mi i ni. Chuvang chuan ka awm loh hunah pawh i hlutna hria la, inringtawk la, tumah inngaih hniam tir suh" a ti a, a kut awl lam chuan ka darah a beng thuk a, "Tun hi a tawpna a ni tawh ang. I duh leh min beng hrep dawn nia" a tih leh rualin ka inrin hma hauhin min fawp a, ka hamhaih lutuk chu ka din ngaiin ka ding reng a, ka thil ken lai tla thla ri chuan min ti harhin na deuhin a awmah ka nam a, a inlak hran rualin ka kut a vawnna pawh a thlah chawp chilh nghal. 

A phone êng hmangin ka thil thlauh chu a zawng a, ka ke bul lawka bawm lo let tap chu a chhar a, min hmeh bel chawt chawt hnuah a kalsawn a, an khawngkhar inkhar ri ka hriat veleh ka che ve chauh.

Ka nu pawh be lovin pindanah ka lut a, a thil min pek pakhat chu rin ang ngeiin diary a lo ni. Ka lawm zia a hria a, 'ka leisak ang che' tiin a lo intiam tawh ţhin a nih kha. Bawm chu ka hawng leh a, crossbody bag kan tih mai ţhin ang hi a lo awm a, ka rawng duh ber a la ni zui.

"Eng nge a lo hawn che a?" ka nu'n a rawn ti lut a, bag leh diary chu ka kawk a, "A va mawi em em ve. Mipa tan chuan hmeichhe duhzawng hi hriat har deuh tur a sin. A lei thiam ngawt alawm" a ti a, bag phei chu a enchikin mawi a ti viau tak tak a nih hmel. 

"Zualtea hi chu a fel bawk a nupui ţha deuh a la nei ngei ngei ang" a tih chuan ka lo bu nghat a, ka pawm zawng tak a ni. Hmeichhe vannei berah a inngaih tir thei hial ang chu. 

"Dah ţha la mu tawh rawh. Keipawh ka mu dawn" a ti a, kan in en ren rawn hnuah engmah sawi tawh lovin min chhuahsan a. 

Mut hmunah phone ka khawih ve ngei a, Zonunmawia ka ngaihtuah viau nain a fanu bawkin min lo chhang leh dawn sia, min rawn biak hun ka nghal ta ringawt a. Tih tur ber hre lova ka khawih kual vel mai mai lai chuan Zualtea message ka hmu thut a, ka hawng rang kher mai. 

'Tui deuhin mu rawh..naktuk aţang chuan ţhian chauh kan ni leh tawh ang' tih zawng a ni a, 'Aw le..nangpawh tui deuhin i mu dawn nia' tiin ka chhang a, a en nghal a, min chhang tawh lo thung. 

Dar12 rik dawn tawhah Zonunan min rawn call a, "I ţha em?" ka lo ti nghal a, a ţawng hun pawh ka nghal hman meuh lo chu a ni. 

"Aw..message ka hmu a" a ti a, a harh veleh a a chhiar turin message ka hnutchhiah tak alawm. 

"Ka rawn call khan Sangsangin min lo chhang a, a damlo a ti che a" ka tih chuan "Chu min lo ngaihtuah a ni maw?" a ti a, a aw a nuihzatna tel chu ka hriat hmaih lo nasa mai. 

"Ngaihtuah ve bawk ang chu. I eng nge na a?" ka ti a, phone a kan han inbiak hi chuan ka ngamtlak ve ţhin khawp a, hmaichhana ka sawi ngam hauh lo tur sawi chhuah chang ka ngah mai. 

"Ka lu a na deuh a, damdawi ka ei hnua ka mu zal mai mai kha ka lo muhil tlang a nih hmel" a rawn ti a, a pa damlo buaipui a ngaih bakah nitin hna a kal a ngai a, a chau ve ţhin ngawt ang. 

"I lu na chu a dam tawh em?" ka tih leh chuan "Ka ţha tawh e. I mut a chhuak tawh em?" tiin min lo zawt let a, zangthal a mu reng si kha ka bawk khup thawk a, "Ka mut a chhuak lo" ka ti zui zat a.

"Naktukah i nu nge nangmah lokal ang?" 

"Ka nu a lo kal tawh ang. Ka hna a ni lo a, rokhawlhna a awm avang chauhin ka lokal a, ka nu a hman tawh tho a, i nu fel viau mah se lokal leh chu ka tan pawh a nuam bik lo alawm" ka ti a, ka fak der pawh a ni lo, Nu Hmangaihi hi chu a fel ve thlawt a ni. 

"I tih dan dan le. Kimkimi khan i hnenah sawi a nei em?" tiin min zawt nawn leh a, a ngaih a ţha thei chiah lo a nih ka ring. 

"Ka hrilh tawh che kha, in school kal lai vel min hrilh a, chupawh ho deuh deuh, sawichhawn tlak vak loh te an ni hlawm. Hmeichhe pakhat nen kan insual tih vel mai mai a ni" ka tih chuan "Thil dang a awm lo tak tak maw?" a ti leh ngat a, Kimkimi nge keimah zawk hi a rin loh pawh ka hre tawh lo e a. 

"Awm hran lo e..fa neih tawh chuan inţhen hlen a har a ti bawk a, thil dang a sawi lo hrim hrim" uar fe a ka tih chuan "Chu nu mai mai chu" a ti hluk a, inţhen tawh mah nise inţhianţha tak an nih ţhin avangin an la inbe chhe lo va, an thusawi ka sawi chhawn zel chuan an inhaw lutuk dawn a, chuvang chuan a zawng zawngin ka hrilh duh lem lo. 

"I mu rei sia i tlaivar thei tawh mai ang a" ka ti ta daih a, Kimkimi hming lam reng hi ka tan pawh thil nuam a ni hauh lo. 

"Ka muhil leh thei mai ang. I pa eng nge a an tawh a?" a rawn ti ve thung a, "A ţha" ka ti hmak a, sawichhe vak vak lo mah ila ka ngaihtheih loh zia a hre tawh ngei ang. 

"Kimkimi nen a fal a ti ti na hun in nei leh a nih pawhin a thusawi zawng zawng lo awih vek suh aw" a ti a, ka chhan let hma hmain "A falin hmu tawh lo la a ni mai" a ti leh hmuk a, a la hmangaih reng ni a ka ngaihna hian min ti buai fo mai. 

Kan inbiak zawh chuan keipawn mutthilh tumin lukham hnuaiah phone ka rawlh lut a, U Marti hnenah ka phone number a dil ngat a, Zonuna hi a pasal angin a la sawi bawk a, an inţhen tawh tih hrereng mah ila kalsan turin min ti tho a, hmeichhe nasa ve tak a nih phei chuan buaina min thlen sak ang tih ka hlau khawp mai. 

Thla thar kan chuang kai a, hna thar ka thawh ţan ni tur a lo ni leh reng tawh. Dar8 hmaa thlen hman ngei ngei a ngai a, Zonuna thawhna university awmna lam a nih avangin 'Ka rawn lam kawi ang che..ka kal hma deuh mai ang' a ti a, dar 7 ah chuan ka inpeih at tawh. A kal hma lutuk ţhin lo maithei a, hna ka ţan ni a nih avang chauh a min hruai tum a nih ka ring. Kan hun a inmil miau loh avangin tuk tin kan kal rual thei kher lo ang. 

"I insiam zawh chuan chaw lo ei rawh..hei ka khawrh sak vek tawh che a nia, chaw ei lo a kal ai chuan tlem te tal pawh rawn ei rawh" ka nu lah chuan a lo ti ve reng a, hna ka nei leh tur chu kan phur dun khawp mai. 

Chaw leh chawhmeh a sa viau chung pawhin ka nu chuan "Ei sawk sawk rawh i tlai hlauh ange. Nikhatna aţanga i tlai nghal chuan an ngaihdan a ni lo ang" a ti a, min lo tur ve sek a, dawr awmna a hla ve deuh bawk nen, traffic a lo jam zui phei chuan ka tlai maithei a ni. 

Chaw ei kham veleh ha ka nawt sawk sawk a, ka kam ka ţhuah lai chuan "Zonunan a lo call a, kawngpuiah a nghak che. 7:30 a ni leh tawh, hmanhmawh ve deuh teh" a lo ti chul a, a phili nasa ngang mai. Hna ka nei veleh mai hi a lawm tih ka hrereng. 

"Ti hian ka hman chu a ni mai" ka ti a, a dinna zawn ka thlen veleh ka phone chu min lo pe a, "Ka kal aw..a hla deuh a, ka lo haw tlai pawn min lo ngaihtuah lo la" ti a ka hrilh thlap hnuah Zualtea bag min leisak chu akin ka chhuak a, ka hmanhmawh ve deuh tawh bawk nen, step ah pawh chuan ka tlan chho hlawk hlawk mai.

Kawngsir a motor ding ka hmuh rualin Zonuna pawh ka hmu tel ve nghal a, a motor chu a ngheng a, mut chhuah hmel deuh hian a lo ding a, a mitmeng dul raih ka hmuh chian takah phei chuan a chau ve hle tih ka hrethei nghal a, ka inthlahrung letling zawk.

"A va mak vung vung ve..min en reng loin lut vat rawh i tlai mai dawn" nui chung hian a lo ti a, motor kawngkhar a pawt hawng zui zat bawk. 

"Ka ruala kal kher lovin mu rih zawk la ţha mai tur a nia. I meng thei mang lo chu a nih kha" tih nang nang pahin ka ţhu lut a, chhan pawh min chhang let lem lo hian kawngkhar bawk chu a rawn nam khar leh dawp a. 

"Min lo hruai kher loh tur che a nia, khati kha chuan kalkawngah buaina kan tawk ang tih te a hlauhawm. Mutthluk palh hi a pawi thei teh mai a nia aw. Keimah pawn ka kal thei tho alawm" ka ti niah niah a, a pa a ţhat loh deuh avangin tunlai tak chu an buai a, mut an hmu ţha lo bawk nen, ka ngaihtuah ru khawp mai.

"Ka ruala i kal duh loh leh chhuk mai la, a hmunah ka lo nghak ang che" fiamthu a a tih chuan "Kal mai mai teh" ka lo ti hlak a. 

"Dar5 ah maw i haw theih ang?" ti a min zawh chuan a lam ka hawi a, min lo en ve zawk a, motor khalh tu zawk a nih avangin hmalam a en leh vat a. 

"Aw..dar5 ah kan khar ang. Ka thawhna hmasa ah kha chuan thim thleng ţhaka awm chang te kan nei a, buai zual chang phei chuan dar8 lai te kan thlen ţhin kha. Tuna ka thawhna tur hi chu dar5 thleng a nia, doctor ţhu an awm bawk si lo a, a thlak danglam mai mai lo ang" ka ti duah a, ka aw te chu a zang viau ang ka ring, Zonuna pawh hian ngaihthlak nuam a ti viau maithei a ni.

"Thawk tur ngawr ngawr chu nangmah chiah i nia nga a nuam phian ang" a tih chuan "Nuam ang..bakah damdawi ka pek lai tih lohah chuan ka ţhu ve char char thei dawn a, customer an awm reng dawn bawk silo. A nuam daih zawk ang" tiin phur tak bawkin ka hrilh a, hna ka hmu leh mai hi thinlung taka min lawmpuitu tlem te zing a pakhat a ni miau a, ka phurna pawh ka ti lang lo thei lo a ni. 

"Nuam ilo ti leh lutuk ange..ka phal miah lo a nia" fiamthu a tih pahin min rawn en a, jam a kan tan miau avangin min en lai reng chuan ka lo ner nang nang a, kan hma chiaha motor chu a tawlh riai riai a, Zonuna pawhin keimah aţangin a mit a la sawn thuai a, a nui zui ruh ruh a, mipa nelawm loh leh chapo tak ni a ka lo ngaih ţhin khan min fiam zuk zuk reng tawh chu a ni sia, pawnlam landan hi chu engmah a lo ni lo a nih hi. 

'Taxi stand in hlat vak lo bawk a haw dawnah pawh a buaithlak vak lo ang. Mahse a to ve deuh ang a, taxi hman i ui a nih leh bus i chang ang a, a service ve reng tho a, ka hman chang apiangin ka rawn hruai thei bawk che a" tiin min han hrilhfiah leh vel a, bus a service tih chu ka hre ngei a, a tam vak lo thung. 

"Nia engkim hi a rem vel vek a, ka thawhna tur ni awm tak a ni. Bus ka nang fu a nih chuan taxi aiin ka duh zawk daih, chuan man a intam hleih emai. Taxi ka hman nitin chuan pawisa a hek duh dawn lutuk" ka ti leh siam siam a, ka phur lutuk vang nge Zonuna chuan min lo en leh zauh ţhin. 

"Tukin chu i hlim hle mai" ban charh hian a ti a, ka lo nuih var var a, amah avanga he hna hi hmu ka nia, a ngaithla duh lo chung chung lawmthu ka hrilh lui ngun mai. 

A hmun kan thlen veleh motor aţang chuan ka chhuk a, dawr chu a lo inhawng tawh a, a chhung aţang chuan dawr neitupa Rohlua chuan nelawm deuhin min lo nuih a, keipawh chuan ka nuih let ve a, ka phur zual sauh bawk. 

"Lo han lut rawh..motor hi ka dah fel hnuah ka rawn lut ve ang" a tih takah chuan ka luh san a, "Nang chu a rawn thlah leh thlap tawh che a ni maw?" tiin Rohlua chuan min lo fiam nghal a, biak a nuamin a fel takzet a, kei aiin a upat hmel deuh nain kan inmil viau maithei a ni. 

"University awmna lam a nih vang mai mai alawm" ka tih chuan "Ka u ţhianpa a nih kha" a ti a, ka hria tih lantir nan ka lo bu zeuh a, a ţhutna bula ţhutthleng chu pawt thla deuhin ka ţhu ve nghal tharh a. 

Zonuna rawn lut ve chu Rohlua chuan ţhutthleng a lo kawh hmuh vat a, "Ka awm rei dawn lo" ti chung rengin ţhutthleng chu ka ţhutna lamah a rawn hnuk hnai hrut hrut tho a, Rohlua nuihza insum chu a khawngaihthlak zawk. 

"Kal tawh ta che..kan bula i awm ve reng te chuan i tlai duai mai tur a sin. Hun vawng dik lo deuh hi chu an ngeiawm duh a nia" ka tih laiin Rohlua "Mawiah lo leng ve rih rawh. I kalna tur a hnai tawh emai, tlai pawh tum la i tlai thei kher lo ang" a lo ti ve thung a, kan thu a inkalh nghal chat takah chuan kan in en ren rawn a, kan nui chhuak ta hak hak a. 

"Kei aia thu nei zawkin kal turin min ti sia" ti a Rohlua chhan pah chuan a sana bunlai chu a bih a, a ding nghal vut bawk. 

"Ka kalsan phawt ang che u" a ti ve tak nain a kekawr ipte zen hlun chung hian damdawi chu a melh kual a, Rohluan ka naka min rawn kheuh chuan ka phu deuh uih mai. Zonunmawia ka lo en uluk leh viau tawh a, min rawn kheuh lo se chu mit lak sawn nachang pawh ka hre leh tawp nang. 

"Zui chhuak la, motor a dahna thleng kalpui ve rawh. I zei loh lutuk chuan a ning thuai ang che" tiin ka beng bulah a rawn phun sur sur a, ka nuih a za angreng. 

"Ka lo thlah ang che" ka ti leh hnuhnawh a, a bula ka din ve rual chuan a banah ka kuah a, hetianga kan inhnaih viau hi chuan a thlamuanthlak ţhin mawle. 

"Chhunah eng nge i ei ang? Khilai deuhah khian thingpui dawr chu a awm a?" a kawhna lam chu ka en a, ka hmu pha chiah lo. 

"Rohlua khan a hria ang" ka tih chuan "A la hriat bel vak bik loh hmel. Eitur la lawk ngawt dawn ila a dai hman vek awm sia, biscuit vel kan lei mai dawn mi? Thingpui lumna leh no vel chu dawrah khan in kawl vek ang" a ti zung zung a, min ngaihtuah vei reuh lutuk chu a lawmawm rualin awm a ti nuam lo mai dawn alawm le. 

"Em em che hian..naupang angin min en suh aw. Tunah tak chuan naupang kalsan tur te pawh i ang alawm" ka tih chuan a nui ve hawk mai.

"Ka ngaihtuah che sia, nang lahin duat i duh mang si lo a" a ti niah niah a, motor a dahna pawh kan thleng thuai a, nilengin kan inhmu lo leh dawn chu a nia, bul ţan tirh vel, a nawm hunlai tak a ni bawk nen, a ngaihawm leh vung vung dawn khawp mai. 

"Dar5 hma chuan ka lo let theih ka ring a, min lo ngaichang rawh aw..chanchin ka rawn hrilh ang che. Dawr tu in neih vak loh leh bus kal dan te lo chhinchhiah a, hun bi a neih ve deuh phei chuan i tan a la ţangkai ang" a ti dam thlup a, ngaihthlak a nuam ţhin a nia. 

"Hawn thar chauh a ni sia, Rohlua kha chuan dawr tu kan la nei vak lo ang a tia, ka hahdam ting a ni mai ka tih tawh kha" ka lo ti ve bawk a, "A nuam dawn a nih chu. Bus chu thlithlai reng rawh aw. I la chhawr dawn a nia" a ti a, kawngkhar a hawn tawh hnuah pawh "Eitur leisak i duh si lo a, chhunah thil ei ngei ngei rawh aw. Ka rawn endik thlap ang" a la ti zel a, nui hak hak chung hian ka nam a, a ţhu lut ve ta hram e.

A kal ta chu a lan theih chhung zawng kut ka vei a, amahin a nui ruh ruh ang chu. A lan theih loh hnuah dawr lam panin ka chhuk hnak hnak a, Rohlua sawi ang tak takin mi an tam lo khawp mai. Hna sang tak ni lo mah se he hna ka hmu hi vannei ka inti tak tak a ni, a neitupa a fel si, ka duhna takah ka thawk ta chu a nia, min bantir a nih loh chuan ka bansan phal lo maithei a ni. 

Dawr chhung ka luh rualin Rohlua chuan min lo be bawrh bawrh a, "Khaw vengah nge in awm khah?" a ti a, kan veng awmna ka hrilh chiah chu "Kan va inhnaih ve" a ti hlut a, an veng min hrilh ve a, kan inhnaih viau tak tak mai. 

"I ţhianpa kha chuan kan veng thlengin a hria ang. Ka ute nen an thawk ho a, a hrilh lo mai mai che a nih kha" a ti a, ka chhan let hma chuan damdawi lei duh an awm ve teh mial a, damdawi hming a sawi chiah chuan ka zawng kual nghal a, hmanhmawh thilah chuan hmuh a har duh kher mai. Min ngaihchan reng hnuah Rohlua chuan min kawhhmuh a, "A man zat a inziak ang. Damdawi dang pawh a inziak ang zelin i hralh dawn nia" tiin ţha deuhin min hrilhfiah zui a. 

Ka pawisa dawn chu pek mai ka tum a, mahse la lo in pawisa dahna min kawhhmuh zawk a, pawisa thlenga ka kuta a awm dawn chuan fimkhur a ngai dawn hle mai ka ti rilru neuh neuh a, keimah chiaha ka awm changin fimkhur a ngai lehzual ang. 

"Vanneihna i lo keng tel a nih dawn kha kan inhralh hma emai" a lo tih chuan "Awihawm loh" ka ti liam puat a, dawhkan hmaah chuan ka ţhu zui nghal a. Chutah nuih sang pahin a lamah ka inher a, "Ka lokal hma pawn i inhralh tawh reng kha aw" tih pahin dawhkana register chu ka lek chhuak a, vawiin ni zat a inziak a, damdawi hralh tawh leh hralh zat te a inziak a, ka manchhuak chiang lutuk chu a nui tawi tak mai. 

"Dawr ka siamna ala reilo em a ka la ziak rih mai mai nih kha" a tih chuan "Ka rawn thlen tirh khan ka hmu tawh a, ka keu lai chu nangpawn i hmuh vek kha, ziah zel tur aniang chu ka ti mai a, keipawn kan ziak ve ang" ka ti a mah se damdawi hming ka theihnghilh hman lehpek a, a inremna a mi ka en leh te te hnuah ka hralh chu ka ziak chhuak ve ngei a, ka thawhna hmasa nen chuan inang lo tak a ni.

"I hna tur hi a harsa lo a nia, damdawi kan la ngah lutuk lo bawk a i hre hma viau ang. Ka awm loh pawn an lo lam ngun deuh kan neih loh a awm chuan ilo chhinchhiah dawn nia" a tih chuan aw ka lo pawh thuai a. A ţhutna lam ka hawi leh chuan a dum vekin a inthuam tih ka hrechiah bawk. Tshirt dum, kekawr dum a ha a, a sneaker chiah a dum lo. A banah tattoo a nei a, a nalh phian lehnghal a, a sang vak lo thung. 

"Kan dawr chhak lamah khian thingpui dawr a awm a, bangah hian an phone number ka tar a, naktuk aţang chuan ka chhuahsan zeuh zeuh tawh dawn che a, i lo in bengvar ve mai dawn nia" a ti a, laptop bih ran chung hian "I duh chuan tuktin ka rualin i kal thei ang" a ti leh a, min en mang bawk si lo, min be lo emaw tih mai awl tak a ni. 

"A ngai lo..ka ti buai mai mai ang che" ka tih pawhin "Kan veng kawn thleng kein i lokal ţhin ang a, a thleng hmasa zawk zawk kan innghak ang a, kan kal dun ţhin dawn nia. Pawisa a hek lo a ni mai" a tih tak tlatah chuan ka pawm veleh ta nge nge a.

"Thingpui dawr chu vawiin bak biak an ngai lo ang. Tiffin ka pai ang a, chhunah hetah ka ei mai ang a, mahni siam ngei ei chu rilru a nuam zawk bawk ang a" ti a ka hrilh chuan "Kha chu i thu thu" a ti a, kan ti ti zui bawrh bawrh a. 

Ka danglam tawh khawp mai. Engin nge min thlak danglam ka hre lo a, ka danglam nasa tih erawh keimah ngei hian ka hrechiang. A hma a midang ngaihven ngailo leh biak hmasak tum ngai miah lo kha midang ka ti ti pui ve thei tawh a, midang tan pawh biak ka nuam ve sawt tawh ang. Ka thawhna hmasa ah kha chuan min biak loh chuan tumah ka be ngai lova, min biak lahin a rul tawk chauhin ka chhang a, tunah lem dawr neitu nen kan ti ti nghal bawrh bawrh a, mize ţha lo lai hi a lo siamţhat theih tak tak a nih hi. 

"I ţhianpa nupui hlui hi i hmu ve tawh em?" ti a min zawh pahin laptop chu ka en theih turin kuai her a, "Hna i thawk emaw tia" ka ti hluai a, ka chek zui tlak a.

"Thawk tho e..ka en pah vel a nih hi. I hmu ve tawh em?" a ti nawn leh a, "Hmaichhanah ka hmu tawh a, thlalakah pawh ka hmu tawh" ka lo ti mai a, nasa an tih hlawm em avangin Kimkimi ka hlauhna hi a reh hleithei lo. 

"Ka ţha tih chi tak a ni" a ti hap a, a tukhuma kutsuihin a ţhutna chu ka lamah a rawn inher a, amah lah chu a nui vur vur a. 

"Tleirawl lai aţangin ka star ngat ngat tawh mawle" a ti lehzel a, a thuruk ni a ngaih theih tur a sawi phawng phawng mai chu mak ka ti lek lek a ni. 

"In inhre chiang viau em ni?" ka tih lahin lu a thing tho bawk sia, "Nakinah ka la hrilh ang che" a ti a, a thil tih laiah bawk chuan a bur leh a, customer an vangin a reh tlawk tlawk a, awm tawp aiah tiin phone ka khawih ve ngei a, Kimkimi khan min lo la be leh miah lo a, Zonuna hian a khap em maw ni tih chang ka ngah mai. 

Mahse rin loh deuhin a message a lo awm a, a lo thawnna a rei tawh viau nghe nghe. 

'Ka thusawi kha i ngaithla chiang viauin ka hre sia. Ka ngaihven ru reng che a, ka sawi ang khan i awm lo a nih hmel. Engahmah min ngai lo niin ka hria. Buaina i lo tawk palh a nih pawhin min hrilh lawk lo ti miah suh' 

Ka chhiar zawh veleh phone chu bag ah ka hnawh lut rawk rawk a, pawisak a neih loh chu thuhran, an hausain thil an ti thei bawk si, a nu leh pa lahin an duat hmel ropui sia, ka nu in a tawrh phah ang tih te ka hlau a, thil thleng thei zawng zawng ka ngaihtuah leh vek tawh. 

Tlaiah Zonunan min lo hruai a, "I ngawichawi riau mai" a tih loh leh "I thawhna chu a nuam vak nange?" a ti a, a rul tawk chauhin ka chhang zel a, min biak loh vang vang hnuah chuan insum thei lo zawkah ţangin "I nu te hian Kimkimi thusawi an awih zel em?" ka ti chhuak khawl a, min rawn en rang khawp mai.

"Awih zel bik lo e" hmalam en leh pah hian a ti a, "Ka nu emaw keimah hi min hek ta se a thusawi an ring nghal hmak angem?" ka tih leh chuan "Dik lo a awm em?" tiin min lo zawt let a. 

Ka ngaihtuah vang vang a, movie leh thawnthu reng rengah hian an ngawih theih lutuk ţhin avangin an tawrh tur ni miah loh, pumpelh theih reng an tawrh phah ţhin a, 'sawi chhuah ve mai tur a nia' tiin awmhmunah ka lo thinrim ve em em zel a nih kha. 

Ka inngaihtuah chiang a, ka hun hman vek hi chan chawp a ni lo tih ka hria, ka lo ngei ngawih ngawih ţhin ang khan ka ti ve dawn lo bawk. Mahni hlimna tur chu tupawn kan um vek alawm. Keichu ka hma ka sial ka tih tawh kha. An nunhlui min hrilh tak zawng zawng te kha chu sawichhuah ngaiah ka ruat lo hrim hrim a, tun a mi hi chu thil dang daih a ni. 

"Rin aiin a jam rei daih mai. I ning tawh em?" a tih lai chuan bag ka hawng a, phone ka phawrh chhuah hnuah Kimkimi message chu ka chhiar nawn leh a, "Hei hi chhiar la, i chhiar hnuah chuan ka chanchin engpawh hria la finfiahna tello chuan awih suh ang che. Ka chanchin chhe lam a sawi a nih pawhin min zawh chian hma chu thinrim ringawt lo la, ka piangthar ve lo a, mahse dawt ka sawi ngai mang lo" ka ti charh charh a, message a chhiar zo chu a lungawi bik vak lo niin a lang. Rohlua lah chuan ţha a ti em em a, Kimkimi nen hian an inhre fuh ang tih ka hlau zawk. A thuhnuai hneh dawn lutuk. 

"A chhaih buai theih lohna tur chein block rawh. Ani pawh ka lo sawipui ang" phone min pek let pah hian a ti a, min rawn vau apiangin Zonuna ka hrilh ve zel ang tiin rilru ka siam nghet sauh sauh a, mahni chauh a hrehawm tawrh ka peih tawh bik lo a ni. 

CONT...