DEAR DIARY-18

DEAR DIARY-18

"Sangsangin min lo nghakhlel ve tawh dawn a, ka lo lut kawi lo mai ang" kan inzawnah motor a ti ding a, kan veng chhung vel, a bikin kan inbawrah hian lirthei veivak a awm vak ngai lo a, min thlah changa han din vang vang chang kan ngah mai. 

"Naktuk aţang chuan Rohlua rualin ka kal ziah tawh dawn a nia, haw lamah pawh chutiang tho chu" ka tih chuan a ţhutdan siam remin steering vuan reng chung hian ka lam a lo hawi a, "Kan veng a inhnaih tho a, zingah chuan an veng kawnah ka nghak ţhin anga" ka tih zawm leh a, min en ran chungin a lo bu nghat a, a lawm nge a lungawi vak lo tih pawh a hriat theih loh. 

"Ka lungawi loh vang a ni miah lo a nia" ti a hrilh pahin keipawh chu a lam ka hawi a, a kut awl lam zawk chu ka malchungah a rawn dah a, keiin na lo te tein ka lo ben sak dat dat a, ka chet dan chu ho a ti deuh nge amah ka en leh chuan tawi tein min lo nuih a, ka nui ve ta ringawt a.

"Vawiin chu i chauh hmel riau mai, i pa a zia deuh tawh tho a zanin chu hma tawkah mu rawh. Min be kher lo mah la ka thinrim khum lo ang che" ti a ka hrilh leh lai chuan a lo nui suk a, a hmelţha zet mai chu ka en leh ţhin a, a chauh zia hai rual a ni lo. 

"Ka buaina ber zawk chu" tih chiah ka sawi hman, min melh dan avang chuan ka ngawi leh hmak a, a chal a ti chuar nang a, tun a sawi chu a fu leh chiah lo maithei a ni.

"Sawi la" amah zawk chuan a ti sawi sup a, ka hmui ro deuh chu ka liak huh hmasa te te a, ţul vak lo a aw ka then kharh paha ka malchunga a kut dah ka en chuan a kutţang a lo ti che a, hum beh chawt pah hian "Kimkimi hi i la duh em?" ka ti deuh phawng a, min ring lo ti a a thinrim phah ka hlauh nen a nuih a za viau mai.

A thinrim lo tih ka hriat chuan ka huaisen sawt aniang, "In la induh tawn reng a nih chuan nakinah keimah zawkin hrehawm ka tuar leh dawn a, i nu leh paten hruai leh an tih phei chuan keimah chiah ka bang dawn a. Mahni hma ka sial a, ka hre ve tho. Mahse, a tawpa hnutchhiah bik nih chu tuman an duh lo ang. Sangsangi a awm ve tawh kher bawk nen, in chhungte chuan in inneih leh theih an duh ber maithei a" ka ti niah niah a, amah pawh en ngam lova a kutţang ka khalh melh melh lai chuan "Chungte chu ka duhthlanna alawm..keiman thutlukna ka siam ang" a lo ti nghet charh a, min ti famkim tu a ni tawh kha, min kalsan tur anga ka ngaihtuah ringawt pawh hian ka hah vek zel. 

"Kimkimi nen kan inkarah engmah a awm tawh lo" a ti leh a, khatiang message ka dawn hnu ngat phei chuan ka hlauthawng a, awm a nuam hleithei lo. 

"Ngaihtuah buai duh tawh suh. Sangsang avang hian boruak ţha lo awm lo se ka duh a, a nih loh chuan a puitlin hun thlengin a nghawng dawn a. Kimkimi ka hmu ang a, ţha deuh a ka sawipui hnu pawha a ti buai zui che a nih chuan min hrilh zel dawn nia" a ti a, a ţawng chu a zawi na a a khauh viau thung. 

"Aw le...ka chhuk phawt ang" a kut ka thlah veleh ka bekah a dawm a, min thlah na ni awm tak hian ka biangah min fawp vang vang a, tuman min hmu em lo ang chu maw. 

"Zanah ka lo bia ang che" a tih leh chuan "A ngai lo..mu hahdam zawk rawh" ka lo ti var a, tunlai chu buaina a ngah a, amah hi an rin ber a ni bawk nen, tuma chimbuai loh a awm hahdam a chak ve ţhin ngawt ang. 

"Mut hahdam pahin ka lo bia ang che" a ti leh ţalh a, a ţawng pah chuan a kiai suk a, hmuh a nuam ţhin khawp mai. 

Keipawh lungawi deuhin ka chhuk a, beisei loh deuhin Zualtean kan in kawtah min lo la nghak zui. 

"Hna thar chu eng nge a an a?" min hmuh rual chuan a lo ti a, kei ai mahin a phur hmel zawk daih. 

"A nuam dawn khawpin ka hria. Mi an tam lo a, ka hna hmasa aia a hahdam chu thuhran, a ri luih luih lo bawk a" tiin phur deuhin ka lo chhang a, ka hmuh apianga inthiam lohna ka neih ţhin hi a reh hleithei lo a ni ber e. 

"I thawhpuite an fel em? In innel nghal mai ang chu tiraw?" kawngkhar ka pawh hawn laia a lo tih chuan "Thawhpui han tihah a neitupa a ni mai a, midang a chhawr tel lo. A lun vak lo bawk a, thawk tu dang awm se chu a chawi belh ang" ner nang nang pah a ka tih chuan a lo nui huk huk a, a hmel hmuh a nuam viau mai. 

"Naktukah ka kal tawh dawn a?" a tih takah chuan "A ni maw? Kal hma i va tum leh si ve, hunawl ka neih lai han ni se chu ka thlah ve thei tur che a nia" ka lo ti a, pindan kawngkhar chu hawngin luh pawh lut lovin khum lamah bag ka vawm phei a, ka khar phui leh hmak a. 

"Min thlah ve lo mah la a pawi lo, ka lo haw har tawh dawn sia i ţap palh ang" ti a min fiam chuan "I over e a(h)" ka ti hlak a, cooker ka la chhuak zui nghal a. 

"I nu hi a lo haw tlai ziah tihna mi?" tiin ka bul chetah dingin min zawt leh a, "Tlai ziah e..rawng a bawl zawh hnuah a lo haw ţhin. Ka inkhawl ang a, pawisa ka ngah hunah chuan inhlawh loin a awm ve thei tawh ang" ka ti siam siam a, tum angin awm thei ţhin lo mah ila duh thu han sam vel hi a nuam ve riau. 

"Tun aţanga i inkhawl chhoh chuan i khawl ngah thuai ang. In luahman bak chu i nu'n a tum thei anga tiraw?" dawhkan kila a ţhu chu ka melh zawk a, zawt buai lovin thingpui ka chhuang zui nghal a.

"Thei mai ang...ka la naupang tho a, ka thih hma chu inkhawl na hun ka nei tihna a ni mai a, engtik niah emaw chuan ka nu hi hahdam deuhin ka la siam dawn alawm" ka ti bawrh bawrh a, hmasawn miah lo a a ngai renga din chu ka tum bik lo. 

"A ţha khawp alawm. Tum chuan kawng a awm an tih kha, mi taima hi chu Pathian pawhin mal a sawm nge nge ţhin. Ho mai maiah hnual lo la, inbunruahna tur i duh chuan engtik hunah pawh min lo be tawp zel dawn nia" a tih lai chuan nuih var var pahin ka lo bu nghat nghat a. 

Dawr tharah chuan ka kal ve zel a, Kimkimi pawh ka block em lo nain thawm a la rawn nei leh lo. Pathianniah chuan tuk dang aiin ka tho tlai a, ka nu chawlh neih ve ni a lo ni kher nen dar9 velah min kaitho a, chaw eikham rualin inkhawm turin a insiam a. 

"Nimin tlaia i nutei te in a ka kal kawi khan chawhmeh lo hawn nan a bag ka hmang a, inkhawm reh laiin lo han dah rawh aw. Bag dang kha a chhe hlawm si a, buhfaiţham an khawn duh phei chuan an mamawh ang" a ti zung zung a, hmanhmawh deuhin min chhuahsan zui a, ka chhip a ka sam tuai chhoh pahin ka ţhu hahdam a, ka inkhawm lohna a rei ve ta hle mai. 

Ka nutei te bag ka pe haw lam chu mi tlem zawkna lam, kawngthlang lam aţangin ka haw a, kawng phei vek tho a nia, kan inpengah tawi te chhoh a ngai a, midang pumpelh duh chuan helai kawng hi a nuam ber. 

"Remruat" ti a mipa aw ngeiin min koh lauh hnuah faifuk ri ka hre zui a, U Tluangtea te in zawn a nih avangin ka dak chho a, thlang lam bathlar ah dingin min lo en ran mai. 

"Khawiah nge i kal?" a lo tih chuan "Ka nutei te inah" ka ti ve mai a, "I va haw kual peih zawk ve. Lo chho teh" a ti a, a kutin min hui pah a, "Naaa..ka duh lo, nidangah a ni mai" tiin ţang ve teh mah ila "Lo chho mai mai rawh tumah an awm lo" a ti deuh tlat a, U Tluangtea te in hi a chhawng a nia, kawngchhak lam leh thlang lam aţang hian a kal theih ve ve a, a hmun hi a rem lo viau nain an in hi a ropui hle thung. 

"Nih leh inkhawm ban hmain ka haw ang aw" ka ti a, phur lo deuhin stepah ka chho a, Zonunmawia nen a kan inlaichinna a hre ve tawh bawk nen, mi fiam a hrat ropui sia, keimah chiaha hmuh phei chu ka chak vak lo. 

Kawngkhar a lo hawn sa diam avangin inchhungah ka pen lut a, tv hma a a lo ţhu chu ka hmu thuai a, a kut a min lo hui leh chuan ka phei ve mai a, a bulah ţhu loin a ep chiahah ka ţhu thung. 

"Engatinge i inkhawm loh a?" ti a ka zawh chuan "Nangpawh" a lo ti var a, a nuih a za viau lehnghal. 

"Keichu ka inkhawm ngai vak lo" ka tih lai chuan "Bialpa i neih vang em ni?" tiin min lo fiam lehpek a, ka tum bar a, zak angin ka awm duh bik lo. 

"Ka ţhianpa hi pa ţawngtam lo a nia, mahse nangchu a sawi ngun khawp mai che. A duh ve tak tak che a nih hmel" a tih chuan tawitein ka nui a, min bawl han tih ngawt chi lah a ni si lo, sawi tur ka hre ve hauh lo. 

Ka awih chiah lo deuhin a hria nge ni "Ka ti tak tak a nia aw" a ti leh a, "Ka hria alawm" tih bakin ka chhang lo. 

"Chipchiar deuhin min hrilh ngai lo nain i u boral hnu lawk aţang khan i chanchin min zawh a ching a, nupui neih leh lam a ngaihtuah lo aniang kan tih lai tak a ni lehnghal a, a tih chi tak tak a ni" a ti a, keini aiin a phur zawk daih niin a lang. 

"Mipa hi chu kan dan a dang deuh a, ţhianţha tak pawh ni ila hmeichhia angin a zawng zawngin kan mimal thil kan inhrilh ngai lem lo va, Zonuna pawn a tir chuan a sawi hreh deuh a, mahse a mit i la ngang aniang veng khatah kan awm tih a hriat hnu phei chuan min zawt tlut tlut mai" a ti zung zung a, a ruk a ka en dak dak ţhin lai te khan min ngaihven ve miah lo angin a awm ţhin sia, U Tluangtea hi hrechiang viau lo ila chu ka thu hriat hi ka awih lo ngei ngei ang. 

"Min nawr nasa viau lo se chu ka nau pasal neih ni pawh khan sawm ve nachang che ka hre nang" nui huk huk pah hian a ti a, remruat tu zawk a ţhianpa phenah a lo biru char char zel a, a phakar ve hle mai. 

"Nupui nei leh tur chuan in duh viau em ni a?" ti a ka zawh chuan, "Duh e mawle. A la upa vak bik lo a, a nu leh pa lah an chak lo ve zel ang a, Sangsangi nen chauh chuan an khawngaihthlak alawm. Kimkimi lah sawi lan ngam a ni tawh si lo a" tiin min lo chhang a, Zonuna sawi chuan sawi ve zel a ngai tawh dawn a nih hi maw. U Tluangtea hian a hre chiang viau tak ang. 

"A duh tawh lo em ni a?" ka lo ti ha a, he thil hi ka hriatchian chak ber a ni a, Zonuna pawhin min hrilh ngun viau nain a thusawi ka ring chiah si lo a, ka zawt hreh viau nain ka insum thei ngang lo a ni. 

"A ni mai ang chu. A zaidam viau lai hian a duh loh thlenga nawr chuan a luhlul a, a hawi let mawh khawp mai. Sangsangi vang talin ti ţhin mah ila 'hrehawm leh khawharna hre lovin ka siam thei ang' a ti tlat zel a, zep lohah chuan i chanchin min zawh fo hnuah pawh keichuan Kimkimi nei leh turin ka la nawr reng tho a, ka nawrchhuak thei lo chu a nih hi. A landan ang lo tak hian amah hi a dam a, a dawhthei a, mahse a tih tawh loh chinah chuan eng tactic pawh hmang ila awmzia a nei lo" nui vur vur chung hian a ti a, a ţawng duh em vang alawm U Tluangtea hi chuan ţhian a ngah em em. Mipa leh hmeichhia a kawm thiam ve ve a, an ngaihthlak duh zawng sawi tur a hre riau zel. Keipawh reilote awm tumin ka lut a, ka ţhu rei tawh viau mai. 

"A zei lo a nia aw" a tih te chuan kei ai mahin a nuih a za zawk a, a nuih dan a mak si, a nui chu keiin ka lo nuih veleh chhawng a, ka nel sawtin ka hria. 

"Ka uang miah lo a nia, a bialnu hmasaber Kimkimi a nei nghal a, a pathlawi hnuah lah a fanu vangin nula a chhai hman mang si lo. Nangmah i ni leh tawp a, a duh zia che hriat pui ang bawkin a zei loh zia pawh ka hriatpui. Pathlawi ah chuan a zei lo ber ang" a ti lehzel a, a ţhianpa han sawisak vel chu a nuam tih zawng tak a nih hmel. 

Ka haw veleh pindanah ka lut a, Zualtea diary min leisak kha ka phawrh chhuak a, kei ai ngawt chuan a lei to ngam deuh aniang a kawm pawh a mawi khawp mai. A kal hma ni chiah kha kan inhmuh tawpna ber a ni mai a, he thil min pek zan tih lohah kha chuan a hrehawm ti hmel ka hmu leh ta lo a, ka chhuak tur min hmuh fuh chang lahin min be hmasa zawkah ţangin min chhaih fiam fo a, a ruk chuan a na viau tho maithei a ni. Ka u leh Zualtea hian inanna lai tam tak an nei ngei a ni. An lungngaihna thup bo dan an thiam a, hlim ber anga kan hriat laiin lungngaihna thuk tak an pai reng tho a ni. Ka u phei chu hmeichhia tih takah rilru na taka a ţah hlawp hlawp chang a nei ţhin a, mahse ka nu nen a kan hmuhah chuan engmahin a tihbuai ve theih loh, hlim reng ţhin angin a lang thung. 

Diary chu ka keu a, a kawm chauh ni lo phek tin chu a inchei mawi a, ka ro viau ang. 

Dear Diary,

Mittuiin an mit a la tih hnâwm ve hauh loh ho hi engangin nge i ngaih? Lungngai ve ngai miah lo angin aniang chu tiraw? Rilru na lutuk a ţap ţhin te hi an chungah eng chiah nge thleng ţhin ang le? Engpawh chu nise, hlim hmel pu reng chunga an lungngaihna thup ţhin mi tam tak an awm ngei a ni. 

Diary ka khup rualin ka phone a ri a, Rintluangi hming ka hmuh chuan "I va rei ve" ka ti nghal thawr a, thawk dun tawh lo na na na chu pathianni bak inhmuhna hun kan nei tlat lo. 

"Ka inkhawm alawm mawle aw. Ka u ka rawn inthlah tir ang"

"Lo hmuah i ngai angem?"

"Ngai lo ang..vawihnih lai ka rawnkal tawh a, ka hre thei mai ang" a ti a, ka u boral ţum khan a lokal ngei a, kan chiai phili nasa bawk nen, ka nu nen tak phei chuan mumal takin an la inhmu lo. 

Inchhung a rawn luh rualin ka nu nen ka hmelhriattir a, Rintluangi lah rual pawl thiam tih takah an innel thuai a, thingpui in zawh veleh ka nu chuan inkhawm turin min chhuah san a, keini ţhiandun chuan pindan kan pan thung. 

"Ehe...U Martin a lo call che" ka phone a kawk vah a, kei tak pawhin mak ka ti khawp mai.

"Eng nge niang le?" ka tih he haw lai chuan "Bia la i hre mai ang chu" a lo ti hlak a, kan inhnial buai chhungin a lo tawp hman a,mahse a lo call leh vat a.

"U Mart" ka ti hluai a, inbiak nachhan tur kan nei lo bawk nen, Rintluangi pawh a phawk hra reng mai. 

"Kimkimi i lo hek em ni a?" a tih chuan "Engmaw?" ka ti vak a, pakhat lahin "Speaker ah dah rawh" a lo ti ve sek a, speaker ka on a, ka phone dah thlak pahin "Han sawi leh lawk teh" ka ti nawn leh a. 

"Kimkimi i lo hek em ni? Remruat a zia lo e..mi nupa inkara inrawlh hi chu a tih chi loh a sin" a rawn tih chuan Rintluangi ka melh vat a, hmui a lo ti pawrh nasa mai. 

"Ka hek awm pawh ka hre lo. Min hek a ti em ni a?" tiin ka zawt let a, rin dan erawh ka nei ru kiau thung. 

"Aw..i hek alawm. Zonuna bulah eng nge i sawi a? An nupa hi an inhau ngai miah lo a, keini ho pawh hian an awhawm kan tih loh leh an fakawm kan tia, kan fak ve fo a. Mahse i lo inrawlh a" min tih chuan tum loh deuhin ka nui chhuak hak a, phone ka awm hnaih mai bawk si, a hrepha chiang viau ang. Rintluangi lah chuan ka hriat phak tawk tur lek hian "Chutiang sawi duah kher a ngai lo. Kan fak a ti se a tawk mai alawm" a lo ti ve sek a, nuih loh a har ve bawk a ni. 

"Nuihzatthlak ka sawi em ni?" a rawn tih takah chuan "Sawi lo e" ka ti ţha ve mai a, Rintluangi nui tet tet reng chu ka nghawk pah zeuh a. 

"Nangmah vangin an inhau nasa a a zia lo khawp mai. Zonuna lahin an inah a va kal chilh tawh mai sia, Kimkimi nu leh pate pawh an lawm vak lo. Ka ţhiani hian a zep reng zawk a, hrehawm a tih tawpah min rawn hrilh chauh a, ka rawn zawtfiah nghal che a nih hi" a ti duah a, Zonunmawian engmah min hrilh bik reng reng hleinem. Ţha deuhin a hrilh anga an insawifel theiah ka lo ngai mai a, Kimkimi te ina a kal leh kal loh pawh ka hre lo. Ka nu lahin nuam a tih zia hlir a la sawi a, ka rin loh lam daihin thil a lo kal reng a nih chu.

"Hau rawh ka ti hleinem. Kimkimi khan min vau zawngin message min rawn thawn a, ka hmuh tir ve mai a nih kha. A hau dawn tih chu hria ila ka hmuh tir bik lo ang" ka ti ve ţang ţang a, khatianga min rawn ti hmasa tu kha Kimkimi a nia, ka thiam loh a nihna pawh ka hre lo. 

"Hmuh tir kher a ngai hleinem. Hmeichhia chu khati mai mai kha kan nia, kan thinrim kan ang hrep a, a reh veleh mai a, Zonuna i hrilh ve kher a a pawi ta a nih hi" a tih chuan "Engtin vak nge a tih a?" tiin ka lo zawt a, an hnenawm khawp mai. Min ban tir hnuah pawh boruak an nei zel chu a nia. 

"Kimkimi te inah a kal a, an buai deuh a nih hmel" a ti zawi sap a, ka hrethiam khawp mai. Zonunmawia thinrim te chu a hlauhawm zia ka hre vek tawh a, cho chhuak lo turin ka intiam thlap reng a ni. 

"A zia lo hle mai" ka ti ta ringawt a. 

"I hrilh hmain ngaihtuah chiang hmasa la ţha tur a nia. Kimkimi nu leh pa hmai pawh zah zo lovin kha message vang khan a thin a rim em em ringawt a" min dem awka deuh taka a tih chuan "Ka hrilh ni khan a chau em alawm. A pa vangin zan mu ţha thei lovin a awm rei tawh a, a chauh vangin a thin a chhe ve deuh hrim hrim aniang" ka ti a, ka ngaihdan tak sawi pawh ka ni. 

"Chupawh nise khatianga i lo ti kha a ţha lo. A pasal i chhuhsak a, i lan ang a nia, ngaihtuah la nangpawh nila i thin a rim ve tho ang. A rilru na lutukin rilru fim pawh pu lovin khatiang khan a rawn ti a nih kha" a ti daih a, an insawithiam ve khawp mai. 

"Ka lan hleinem..ka chhuhsak lo bawk. An inţhen tawh miau chuan an inkara tla zep ka ni lo. Ka lo hrilh tawh lo ang" ka ti zung zung a, mahse ka hrilh leh tho maithei. 

"Hmeichhia chu kan ţawng chak a, kan nat pawn kan ti langsar a, a dam veleh mai a. A thinrim changa maksak deuha a lo biak che pawhin lo ngai thutak tawh suh. Kha leh chen kha an lo innei ve tawh a, Kimkimi hi engtin pawn che se a awm lutuk" a tih te chuan ka ngaithla liam vel mai mai tawh a, ka chhang let tawh lo. 

"Zonuna pawh ka hrilh ang, thinrimin che buan buan tawh suh se. In lo induhtawn a nih pawhin ka ţhiannu mit ti kham lo zawngin awm rawh u. Ka hnenah i thawk ţhin a ka ngaina che a, i hmelţhat tehreng nen pathlawi mai mai chu duh mah ta che" min ti leh a, ka thaw hak ringawt a, ka chhan let tawh miau loh avangin amah chiah chuan a ţawng char char peih bik lo aniang phone a dah a, a tawp rual deuhthaw chuan ka mu zangthal nghal sawk sawk mai. 

"A va han ho chiang e aw. A thu rawn sawi te lah kha mi pangngai sawi chi pawh a ni lo. Chubakah nula senior a ni tawh a, a upa tawh ropui si. Khatianga buai buai rual kha a ni tawh lo mawle. Kan ngaihven leh buaipui zawng hi a lo ho thei khawp mai"  tih pahin Rintluangi chuan min rawn en a, ani chu ala bawkkhup reng a, phone a la ngaichang ni awm tak a ni. 

"Ni reng e..mak ka ti thei a nia aw. Ka dah san ve deuh leh ka chung en ve te pawh hi ka belchiang a, ho deuh deuh buaipui chang an nei ve tho. U Marti rawn buaina tak phei kha chu tleirawl ho buaipui tur awm vel a ni. Zonuna pawh inthunun thei lo lek a a chet ka ring lo. Message chungchang kha a va sawi anga an inchhang pawr aniang" ka ti bawrh bawrh a, ka ţhiannu pawh chuan ka thusawi chu pawm hmel zetin a lo bu nghat nghat a.

"A rawn ti leh a nih pawhin i hrilh leh dawn nia. I ngawi a nih chuan Kimkimi hian thil a chawk buai zo ang a, sawi lo thei lo dinhmunah i ding leh tho dawn. Mahse chutih hunah chuan rin i hlawh tawh kher lo ang" a ti a, keiin dik ka lo ti veleh em em a, kan ngaihdan inang lutuk te chu a mak zawk. Hmanah khan lo inhre tawh ila ţha tur. 

"Taka ka patea chu ka be tawh amaw. Tlangval a la nia, a hausa ropui sia, kan bulţan na tur chu min puktir thei dawnin ka hria" a tih takah chuan ka bawkkhup leh thawk a. 

"Engtin nge in inbiak? A ui hmel em? Nge min hman tir a inhuam?" ka ti nghal sawk sawk a. 

"A upa ve tawh a, tlem chuan a khirh deuh maithei a, mahse ka phal lo chu a ti miah lo amaw" a tih te chuan beisei nei deuhin ka lo en reng a, "Ka rin aiin pawisa a ngai hnem dawn a. Sawi ang ngawt a ni miah lo" a ti sep a, keipawhin ka huphurh lawk reng a ni. 

"Tu emaw zawk zawk hi thawmhnaw la a kan zin kual reng te a ngai dawn a, secondhand hawng ngawt dawn ila a chhia buaipui tur a tam dawn bawk si" a ti leh a, a hnual nghal der niin ka hria.

"A harsat viau dawn chuan ti lo mai ang" ka tih lahin "Kan tih ve tawp mai loh chuan thawh tur kan hriat chuan loh hi. Mi dawr a thawh reng ringawt chu hmasawn a har alawm. Hlawh a tlem a, indaih lo reng rengin kan awm dawn tihna a nia" a ti tho bawk sia, hriatthiam har tak a ni. 

"Mut hmunah te hian ka ngaihtuah nasa thei lutuk a ka tawt up up zel" a tih laia "Nang chu i pa hlawh pawh a tam dawn e. I uten hna an nei vek tawh bawk si. Thawk lo mahla nuamsa deuhin i awm thei tho ang" ka lo tih chuan "Chutiang a ni ngawt lo. Nula ve lem thawhchhuah neih loh chu a zahthlak alawm. Pawn chhuah naah kan inchei ve vawr duh sia, hna kan neih loh te chuan mahni thawhchhuah phu loh a inchei kan tih ţhin ho pawh kan tluk pha nang. Bakah in a tawm reng chuan tu mipa mahin min rawn pan tawp awm si lo a, pasal kan nei har lutuk ang" a ti duah a, keiin thingpui dawr siam thlengin ka lo ngaihtuah hman thung. 

"Dawr chu i lo hmu a nih pawhin kan luah dawn a nih chuan pawisa eng emaw zat pek lawk a ngai ang a, chu ai tam mah chu bungraw lak nan hman a ngai leh ang a, thla a thar zung zung ang a, dawr luahman chhun reng a ngai ang a, kan inhralh tam loh phei chuan kan buai viau maithei a ni. I patea pawisa kan hmang reng thei lo ang a, kan rulh char char a ngai zawk dawn a" ka ti charh charh a, keimah ang bawkin a ngaihtuahna a buai ve hmel khawp mai. 

"Loan puk tel ta ila" a tih leh chuan "Kan rilru a hah zual sauh dawn a sin. Ba rulh tur kan ngah dawn lutuk" ka lo ti ve bawk si, kan sawi kaw hleithei lo a ni ber. 

Ka nu inkhawm bang thawm kan hriat hnuah pawh pindanah kan la inkhung a, lehkhabu a ziak chhuak meuhin kan han chhut vel ţhin a, beisei kan nei chau dun kher mai. 

"U Marti dawr ang hi siam ve ta ila" ti a min han rawn leh chuan "A hlawk lo a tih kha. Bulţan nan chuan 100 dawr siam tawp mai ila..nge online shopping ang zawngin kan ti ang" ka ti a, ipik hmel zet hian a thaw hak a. 

"Hahthlak e...kan sumdawnna tur hi Kimkimi ai pawhin buaipui a ngai nasa zawk a nia aw. Lo ngaihtuah ve char char la, i bialpa nupui hlui kha ngaihven vak lo zawk rawh. Pawisa i lakluh theihna tur hi a pawimawh zawk a nia" fiamthu ti tak deuh tak hian a ti a, a putean min puk tir phal loh chuan chuti hlauh chu a ni mai. 

"A tam tham dawn sia, i putea chuan a nei daih dawn mawnle" ka ti bauh a, mi pawisa puk tir ngat phei chu kan harsat tlang a, kan puk tur lah hi a tam tham si. 

"A hausa ka tih kha..mi hausa hoin pawisa an ngah zia i la hre lo mi? Neih chu a nei ang a, a phal leh phal loh a ni mai. Mahse i sawi ang khan kan mamawh zat hi a tam tham a, kan rulh vat vat loh chuan a buai phah ang tih a hlauhawm" a tih laia "In awm em?" ti a mipa aw tih hriat lutuk kan han hriat takah chuan kan tho nghal hluai mai. 

"In awm em?" naupang hian a ti veleh a, "Ehe...Sangsang, eng nge i lo tih a? I va mawi em em ve i inkhawm em ni?" ka nu'n a tih tak hlutah phei chu tu nge lokal zawh chawp kher a ngai lo. 

"Mate, lo chhuak teh u. Hei Zonuna te pafa an lokal a nia" a ti zui lang lang a, Rintluangi chuan min ţhut hnaih thuaiin eng khaw sawi set set lovin ka sam a tuai mawlh mawlh a, hmui hnawih a lak chhuah ruala a kâ a an chuan ka lo ang ve nghal a, ka hmui a tlem a tah hnuah a nuai pherh a, a dangdai khawp mai. 

"A nupui hlui a inchei peih sia, ho i ti viau maithei a, mahse chul rup reng bik suh. I inchei lo lai hlir a hmu che a, chuvang chuan engtin pawn awm la Zonuna chuan a duh dawn tho tho che tihna a nia, mahse midangin an sawi chhe palh ang che. Kimkimi nen an khaikhin zel dawn cheu a, a chul bik an tih che ka duh miah lo a nia" a ti zat zat a, ka hmui lo chu min hnawihsak lem chuang lova. 

Pindan a kan chhuah chuan a fanu pawmin kawngka bulah an lo la ding a, ka nu erawh hmuh tur a awm tawh lo.

"Eng nge in lo tih?" ka ti tawl a, Sangsangi lah chu a nui sang reng mai.

"Kan ngai che a kan lokal a nih hi. Hmu lo chein kan awm thei tawh lo aniang" a ti fiamthu a, ka ţhiannu chuan a lo ei lo leh ngawt ang. 

"Lo ţhu rawh u" ka ti leh tawp a, Sangsangi chuan min en reng mah se han biak vak ngaihna ka hre lo a ni. Ka bulah a rawn ţhu a, a fanu erawh a pa mal vuanin a ding thung. 

Ka nu pawh choka aţangin a rawn phei a, "Ka zun a chhuak lutuk a, tunlai phei chu ka ip hleithei lo reng reng" tih pahin Sangsangi chu a kai a, a bulah a ţhuttir ta daih a. 

"Tluangtea te inah in kal em ni?" ti a ka nu'n a zawh chuan "Kal lo e..inkhawm ban aţangin len a ngen a, ka rawnkal pui a nih kha" a lo ti ve mai a, amah lah chu a inthuam dan aţang chuan inkhawm pawh a ang lo. 

"I inkhawm ve nange?" tiin ka lo inrawlh a, "Chawhma chiah" tih zawngin min chhang leh tawh a, Rintluangi lah chuan hmuhnawm tih hmel deuh hian min lo en a, amahin a nui leh vur vur ţhin. 

"Tukinah U Tluangtea nen kan inhmu a sin. Ka nutei te ina kal pahin an inah reilote ka lut kawi a" ka tih chuan "Eng nge i tih?" a lo ti nghal a. 

"Kawnga ka kal min lo hmu a, leng turin min sawm a" ka tih laiin "Mate, thingpui va lum rawh. In ţhian dun hian chhang te va lei ula" ka nu'n a lo ti a, "Kan in tawh tho a, ti buai duh suh u" lo ti ve bawk mah se min tir lui tho. 

Thingpui bel ka chhuankai rualin gas ka herh hniam a, dawr a kan kal hlana a lo so ka hlau a ni. Choka aţanga ka let leh lam chuan ka nu bawkin "Ka bag ah khan pawisa a awm" a lo ti leh a, an pindanah lutin a bag aţang chuan pawisa ka lachhuak a, Rintluangi ka hui zauh a, kan pahnih a pawn kan chhuak chu kan in en hau mai. 

"I hre lawk lo tak tak em?" a tih laiin keiin "Ka hmuh loh laiin ka phone i khawih em?" ka ti ve thung a, inţhawn thut nan kan lo intihder ru reng emaw kan ti ve ve a ni. Rintluangin an lokal tur hi ka hriat lawk a ring a, keiin ka zun hlan velin a rukin lokal turin a sawm a nih ka ring thung. 

"Aaa...a ho emai. Bialnute inah chuan duh duh hunah a leng thei alawm. Kan at hmel emai kal teh ang" tih leh ka bana kaih a rual a, chhang te kan lei zawh hnua kan let leh chu thingpui pawh a lo so bawrh bawrh tawh. 

Ka siam zawh hnuah an hmaah ka chhawp a, Zonuna bulah bawk chuan ka ţhu leh a, Sangsangi erawh ka nu bulah a la awm thung. An inawm nasa a, a ngai ve khawp ang. 

"Tinge i lo sawi lawk loh a?" lai ru tak chunga a bana tawh zauh paha ka tih chuan "Rawn len i phal loh kan hlau a" tih pahin a nui suk suk a, awihawm loh lutuk..min ţhawn thut a chak vang mai mai. 

"Rintluangi saw i la hria em? U Marti dawrah a thawh ve ţhin kha" ti a ka zawh chuan Rintluangi en ran pah hian "Hria ang chu" a lo ti var a, ka ţhiannu chuan keimah zawk min lo en daih a, a lai ve deuh a nih hmel. 

Rui deuh taka ka pa lo haw chu "Eng nge i an tawh a?" tiin Zonuna chuan a lo be hmasa a, "Ka ţha alawm" ti a chhan pahin ka pa chu ka nu bulah a ţhu a, Sangsangi chu a chhaih zui zat a, a nel tehchiam lo tih hre mah ila a ţap lova, hmuh hrehawm pawn a awm lo. A fel reuh khawp mai. 

"Tunlai chu i lo leng khat tlat. Lo leng ziah ta che" a ti vel a, a lo len leh len loh pawh a hre tawp si lo. 

"Ka buai ve deuh ţhin a, i phal phawt chuan ka rawnkal tlut tlut ang" a ti fiamthu a, pangngai deuh a ka pa a biak theih laiin kei chu ka awm a lo nuam lo em em a, diktak chuan ka zak ve ţhin a ni. 

Ka pa thawh tum chu "Zial i zu duh em? Ka nei a sin" a lo ti leh a, ani lah chuan "A ngai lo" pawh ti mawi lem lo hian kan ţhutna lam a rawn pan a, Zonuna meizial kenlai chu a rawn ban ve thawr a, a nuam lo duh ngei mai. 

Rintluangin chaw a ei nghal dawn avangin an pafa haw tur chu ka thlah a, "Ka pa rui hi i hmu fuh thei sia" ka tih lai chuan ka sawi zawh hma hmain "Nakina i inchhir lehna turin awm suh" a ti a, step a kan chho chu ka darah min kuahin a kut lehlamin a fanu a kai a, chhungkua te pawh kan ang alawm. 

"Nang chu i puitling bik e. Ka thin a rim chang hian ka lo ang leh vak zel a, ka pa pawh ngeiawm deuha ţawngkhum chang ka ngah..mahse loh theih loh thil te hi a awm ve a, en liam harsa ka ti ţhin" ka tih chuan "Ka upa tawh alawm..ka puitlin loh ten le" a lo ti fiamthu a, min hmuh dan a danglam theih avangin ka pa chanchin chhe lam ka sawi zui lo. A chang chuan ze thup a ngai ve ţhin. 

"Naktukah Rohlua rual bawkin em ni i kal ang?" ti a motor kawngkhar hawn pah a min zawh chuan ka lo bu nghat a, a fanu chu a ţhut luh tir a, dimtein kawngkhar bawk chu a nam khar leh a. 

"Tlaiah chaw i lo ei hman angem?" a tih chuan "Engati nge?" bangbo zet hian ka lo ti a, "Ka buai rei tawh a..hun kan hmang dun khat alawm" a ti a, "Ka lo inngaihtuah ang" ka ti ta ringawt a. 

"Min lo hrilh leh la, i rawn ei theih dawn tak leh ka rawn lam haw mai dawn che nia" a ti a, rei pawh ding lovin kan invai liam a, a puitling a, a fel bawk si, a bula awm hi a nuam tak tak a ni. A landan lah chuan a mizia ka hriat hma hauh aţangin min hip nghal em em a, ka mitah chuan a ţha ber mai. 

Thawhţan tukah chuan Rohlua nen kan ţhu tum bur reng a, chhuna a chhuah leh ngei ngei a ngai a, a peih loh zia a sawi reng mai.

Ka hriat tam theih nan a damdawi inrem tlar ţhat ka en leh lai chuan "Nangnu hi, an chhui che em ni a?" a ti hlut a, a ţhutna lam ka hawi vat a, laptop bih a a nui vur vur chu ka hmuh theih chhun a ni. 

"Tihsual ka nei hleinem. Tuman min chhui lovang" ka tih ve tan tan lai chuan "Hei..ka duh nuin min lo biak phah alawm" a ti a, Kimkimi a ni tih ka hre mai, a peih zawk tak tak a ni. Zonunmawia hmelhriat te hnuaia ka thawk a nih phawt chuan a inrawlh thei zel ang. Tuna ka thawhna pawh hi Zonuna ţhiante tho an nia, Rohlua nen tak hian inhre ve vak lo mah se Kimkimin a rawn hre chat hi a mak hran lo. A nasa bawk a pawisak a nei dawn miah lo a, tunah pawh dawr neitu ber a rawn biak leh chat tawh hi, ban rawh a ti leh dawn aniang chu. 

CONT...