DEAR DIARY-19

DEAR DIARY-19

"Engtin nge a rawn tih a?" a ţhutna lama kal paha ka tih chuan "I dawrah Remruati a thawk em a ti. I bialpa nupui hlui a ni bawk nen, nangmah bak a ni lo ang" a ti a, Kimkimi thu rawn thawn pawh chu min hmuh tir a, Rintluangi tihdan takah an upat tawh tehreng nen an va han peih tak. 

"Ban tir rawh a rawn ti dawn a nih chu" fiamthu a ka tih chuan "A thu lo emai" a lo ti a, tlem chuan rilru a nuam bawk. 

"Nangpawn hre rawh, i mi duhzawng tak an ni emaw, nang aia khawsak sang an nih pawhin tumah in thunun tir suh. Midangte thunun tum tlat ţhin ho hi chu an fel lo tlangpui. Mipa pawn an hmangaih che a nih chuan an thuhnuaia i kun dun dun reng an phal lo ang. Bakah mipa nih vanga hmeichhe thunun tum leh lutuk chu hmeichhe tan a ţha lo ang, a hahdam dawn lo bawk a" a ti duah a, ti hian nitin kan pahnih chiahin kan awm ţhin a, kan inkawmngeih phah viau mai. 

"Kimkimi te chu i duh em kha...kha biak theihna remchang i nei alawm" nui rah rah chung hian ka ti leh a, Kimkimi te ang tawn hriat ngah tawh, lung fing chin chuan Rohlua te anga mipa rilru ţha lutuk chu an bum hneh viau ang. 

"Naa..midang chanchin sawi tur ringawt a inbiak chu ka peih lo. Anu'n min vua ang" a tih chuan ka lo nui hak hak a.

Chhuak tura a insiam lai vek chuan "Sumdawnna bul ţan dawn hian pawisa a ngai tam viau em?" tiin ka lo zawt a, min rawn en rang khawp mai. 

"I sumdawng duh em ni?" ti a min lo zawh let chuan "Aw duh tho e..mahse a hautak viau chuan ka ti thei chuang lo ang a, sumdawn ve a ka nu hi hahdam deuh a awm tir ka duh a" ka ti niah niah a, ka inrintawk loh zia a hrethiam ngei ang. 

"Hautak ve tho e..in tuak nan midang thawmhnaw lak khawm sa te zuar la, wholesale rate a pe thei ka lo zawnpui ang che.  Inah i kawl tawp ang a hun thawl i neih apiangin i zuar kual ang a, duh leh dawr hmaah te hian i chhawp chhuak ve ang a, phone hmang pawn a sumdawn theih tawh a, i taimak leh taimak loh a ni mai" a ti a, ka ngaihtuah rauh rauh hnuah "A man tlawmin la dawn mah ila pawisa tam ve deuh chu a ngai tho ang tiraw? Hmelhriat ţha an nih loh chuan bat an phal awm der si lo" tiin ka lo zawt leh a.

"Ngai tho dawn e...tihian thawk ve phawt rawh. Pindan lehlam saw an peih fel hunah doctor a rawn ţhu ve ang a, tlem a kan lun ve deuh hlek hunah chuan inpuih theih dan a awm mai ang. Ka ngaihtuahpui ang che" a ti a, a uang mang bawk si lo, dawnsawn dan ka thiam lo lek lek zawk a ni. 

"Min ngaihsak thei sia a lawmawm e" ka ti vang vang ringawt a, nelawm deuh a min lo nuih pah hian "I mizia hi ka ngaina alawm" a ti a, mak ti hmel ka pu deuh nge ni "Mahse ka ngaizawng lo che" amah bawk chuan a ti leh a, min ngaihzawn alawm maw ka hlauh ber le. Zualtea aţang khan zir chhuah ka nei a, ka ţhianţha te hi inlaichinna ka neihpui tawh lovang tiin ka intiam a, ka sim chiang ve khawp mai. 

"Doctor rawn ţhu tur chu tu nge a?" ka ti ta daih a. 

"I hre lo ang..ka cousin a nia, civil hospital ah a thawk a, opd zawh hnuah hetah a rawn ţhu ang. Ka hman ţep tawh tho a, a rawn ţhu a nih pawhin thawk tu dang lakbelh lovin kan pahnihin kan ti thei mai ang" a ti zung zung a, ka lo aw liam mai a, a ruk chuan ka khawngaih angreng hle. Rintluangin dawr a hmuh a, a patea pawisa puka kan sumdawn theih phei chuan ka thawk rei thei awm der si lo. 

"Ka kal a nia aw..eitur i pai loh chuan thingpui dawr kha lo be tawp la, ka rawn let hunah ka pe mai ang" a ti a, a kal hnu phei chuan a reh ruih mai. Hmanni a min thlah haw ţumin a rawn lut kawi a, ka pa a lo awm kher bawk nen, khami ni aţang kha chuan min ngaihtuah lehzual emaw tih mai tur a ni. A rilru a ţha ka tih tawh kha, tiffin ka pai hman loh ni a thil dang ka ei te hian a man min pek sak a tum ţhin a, ka duh ngai lo thung. 

Tlaia kan inkhar hma deuhin Zonuna a rawn lang hlawl a, min sawmna kha aw ka la pawh tawp si lo. Rohlua pawh a lo let leh tawh a, Zonuna a hmuh ve takah chuan awmze nei deuh hian min melh a, a nuih a zat hmel viau bawk. 

"Kan la inkhar dawn lo deuh a" ka lo ti nghal tawng a, lo luh tawp chu a hreh ve deuh aniang pawnah a ding tlat a, kei lahin lut tura sawm nachang ka lo hre pek lo a, Rohlua zawk chuan "Lo lut la..ţhutna tur pawh a tam hi. Kan inkhar thei ţep" a ti a, kei hi hetiang lamah hian ka bengvar lo tlat zel, a nachang ka hre lo ţhin a ni ber. 

Rohluan a sawm hnua a rawn lut nghal mai te chuan nuih a ti za angreng. Ka piah chiahah ţhutna a rawn hungin a ţhu zui zat a, a rim lah chu ka lo ngaina lehpek viau a, Zonuna berkher hi chu pathlawi mah nise iai lo tu an tam ngawt ta ve ang. 

"I ril a ţam em?" ti a min zawh chuan lu ka thing a, "Chhuna ka thil ei khan min la ngei a, engmah ka eichak lo" ka ti zui zat a. 

"Eng nge i ei?" a ti leh zel a, min rawn en avang chuan hmalam ka en daih a, a nuih a za ru leh viau maithei a ni. Ho te te a ka lai ţhin hi a ni chuan nuam a tia, min chhaih lui fo mai.

"Chow ka ei a, vawksa an lo telh a, a thau ka ei fu palh mawle. Te viau mah se kei anga vawksa ngaina lo tan chuan ngei nghal hlui a awl a" ka ti a, phone hmanga chah ka ni sia, min rawn chhang tu khan ka thusawi a hre fuh lo a ni ber. 

"Ka nu leh pate ka nutei te inah an riak dawn a" a tih chuan "Engati nge?" ka lo ti vat a. 

"Naktukah an kal leh tawh dawn a, ka nutei fapain a hruai ang. Sangsangin a ngen an hlauh bakah a awlsam zawk a" a tih leh chuan ka lo hrethiam nghal mai a, Zonuna nen kan inhriat hma pawn phaiah an kal zeuh zeuh tih chu kan inhriat hnu daih hian ka hria a, an kal a hun leh tawh a nih ka ring. 

"Inah tu nge awm? Sangsangi hi engtin nge ni dawn?" ka lo ti a, a la naupang si, a khawngaihthlak reuh khawp mai. 

"Tunah chuan i nu nen an awm? Ka nu leh pate awm loh hlan chuan ka u in a enkawl mai zel a, an inah a hruai phei a, Sangsangi pawn nuam a ti. Mahse tunah chuan a pasal te inah an let leh tawh sia, ka chhuah hlan chuan i nu kuta a awm mai a ngai ang" a ti duah a, pathianni a an lo len ţum pawhin ka nu chu a ngaih em kha maw. 

"Ka nu a nel tho alawm. Kei lah hna ka nei ve tawh sia, chu lo ah naupang hi ka chhawn chhaih thiam lo a, min nel vak ngai lo" ka tih chuan min lo nuih a, "Nel che tuma i bula a tawlh hrut hrut pawhin i hmu lo der tlat zel a" a ti a, Rohlua pawh a lo nui ve huk huk mai. 

"Eng nge i tih a tih pah ten pawm la, a sam te han khuih sak vel la a tawk a ni mai lawm. A nu i la ni lo ang tih pawh a sawi theih loh a, i fanu ber i nel theih loh te chuan a ţha nang" a lo ti ve a, Zonuna hmuh loh turin ka melh hrak a, nuam a ti zawk emaw tih tur a ni. 

"Ka haw miah lo a, hnawk pawh ka ti ngai lo, mahse ka chhaih thiam tlat si lo a" ka ti niah niah a, ka zak ve reuh khawp mai. 

"Tak taka naupang chuan rilru ţha hi an hre thei lutuk..chhaih thiam lo mah la i rilru a ţhat phawt chuan a hnaih zel tho ang che" Rohlua vêk chuan a ti leh a, Sangsangi hi kan inhmuh ve chang chuan ka hnaihah a awm ve fo a, midang kianga a awm pawhin a hmuh phaka ka awm chuan ka ngaihsak phut ve ni awm hrim hian min en ţhin a, kei lahin ka melh zawk a, ka ngaihsak zui em em ngai hlei lova, fa pawh nei ila hetiang reng hi ka ni tho maithei a ni. 

Kan inkhar hnuah an in panin kan inphur chhuak a, hreh viau mah ila min nghak run reng sia, han hnial vak a nuam tawh hran lo. 

"I nu ka be tawh a, chaw ei ve nghal turin ka sawm a, i pa a ngaihtuah deuh aniang duh leh kan thlen veleh ka thlah mai ang" sana bih zawk pah hian a ti a, ka nu te chu chaw eiah a sawm chhuak thei awm lo emai. 

"A lo hmanhmawh tawh maithei a ni. Zingah rawng a bawl lawk loh phei chuan ka pa a lo thinrim leh ang a" ka ti a, amah chiah a ka nu awm tur chu ka ngaihtuah angreng khawp mai.

"Rawng a lo bawl fel leh diam tawh ang. Kan hawn tir mai dawn nia" a ti sam then a, ka nu mizia a la hrechiang lo hle mai, a hawn tir duh a nih chuan a nawr fe a ngai ang. 

Rohlua message dawn kha ka hrilh dawn em mawni ka ti rum rum a, mahse amah berin miin an ti tih vang ringawt a min ban a tum loh hmel sia, kan buai thui lo ang tiin ngawih ka chuh ta mai a ni. 

An in kan thlen chuan a lo reh ruih a, kawngkhar pawh a inkalh lo nain inchhungah chuan tumah an awm lo. A reh lutuk chu ngaih a ţha lo lek lek hial a ni. 

"Nu" ti a koh pahin choka ah ka lut a, hmuh tur an awm chuang lo. Ka hnung lawka Zonuna lo chu "An awm miah lo" tiin hawi let meuhin ka hrilh a, min chhang ve mai dawn maw tih laiin min lo fawp daih a, a chet dan chuan min ti hamhaih lek lek a ni. 

Zo deuh a min pawm chuan a darah ka lo vuan a, kitchen island ah chuan min ţhuttirin ka mal a vuan zui zat bawk a, a rimtui inkah rim chuan min zem chiai chiai a, kan inhnaih lutuk chu thaw a chham thei mai dawnin ka hria. 

"Nakinah" ti a tawp tur a ka hrilh chuan "Ka ngai tawh che a" a ti a, a kut chuan ka khabe ruh kual a rawn vuan a, ka hmui bawk a rawn fawh leh takah chuan min fawh hmasak berna ni awm hrim hian ka thinphu a rang leh dawt dawt tawh a, a hmui a chet rual chuan ka lo chhang let ve a, mitmei ven tur a awm lo bawk a kan am dun kher mai. 

"Ka bulah chuan awm la ka fawp reng che" a ti a, a nui deuh bawk a, kei lah chuan a nghawng a kut suih beh pah hian "Engmaw i sawi?" ka lo ti ve vat a. 

"Fawh reng che ka chak ka tih a nih chu" a hma aia ring deuh zawk hian a ti a, a kut chuan ka sam chu chul thuakin ka bekah a dawm a, lungawi hmel deuh a min en pah hian a kutzungpuiin ka biang chu a nul a, ka lo dawh hle hle a, ka zam takzet a, chutih rual chuan  hrehawm ka ti hauh lo thung. 

"Min en reng lo teh..i ninawm emai" tih hlak paha hnuai lam ka bih rual chuan a nui chhuak ta hawk a. 

Ka ţhutna aţanga ka chhuk tur chu min lo pui a, ka chhuk chiah tihah ka nu leh Sangsangi an rawn inkai lut a, kan vannei khawp mai. 

"Hetah chaw i ei ang maw?" tiin min rawn zawt nghal a, midang pawh en chuang lo hian "Min sawm tlat sia, ka hnathawhna hmunah lah a ţhu ve khur reng a, ei loh theih pawh a ni lo" ka tih laiin Zonuna chuan "Ei tur kan tlem emai Nu Hmingte, chawhmeh hi hawn ţhen rawh" a lo ti a, ka rin lawk ang ngeiin ka nu'n a lo hnial a, "Rawng ka bawl chawp mai ang" a ti deuh tlat a, retheih lutuk hi chuan midangte ngei tur khawpa inthlahrun a lo awl khawp mai. 

"Kan ei seng nang..a thar siam leh tho a ngai dawn a" tih pahin container a phawrh a, ka nu hawn tur a suah chhuah lai te chuan a bulah ka ding reng ringawt a, tih pui vak ngaihna ka hre lo a ni. 

"Ti hian chaw chhum bak a ngai lo ang" a ti a, container ho chu a chher chhuan a, ka nu lahin 'a ngai lo' a ti reng ringawt a, a dang thei bik chuang lo. A thil hawn tur ho bag a khung mawlh mawlh lai chuan "Ka thlah lawk ang che a reilo deuh ang" a lo ti leh a, lo hnial ve vakin awmzia a neih loh zia a hria aniang ka nu pawh chuan a remti ve hram a, taxi han hman te hi a ui tlat zel a, zanin tlai chu hahdam deuhin a haw thei dawn a nih hi. 

"Sangsangi ka kalsan dawn nia, lo inkhawm rawh u" tiin Zonunmawia chu ka beng zawnah a rawn phun sup a, buk nghat pahin Sangsangi ka en a, ka nu kut a lo hum leh tawh a, an hruai ve a beisei a nih hmel. 

"Keichu ka haw dawn a, nang chu inah hian lo awm rawh aw. Naktuk zing hma deuhah ka lokal ang" ka nu'n a tih hnuah pawh a kut chu a la thlah duh lawk lo a, an thlem ngial hnuah a kalsan ve thei chauh a ni. 

Ka nute an chhuah hnuah "Â u" tih pahin Sangsangi chuan min kai ve thung a, "Eng nge?" ka lo ti ve vat tak nain ka aw chu a rum mah mah deuhin ka hria. 

"I lo riak dawn mi?" felfai deuha a tih leh chuan "Riak dawn lo" ka ti leh tawp a, biak ve dan tur ka ngaihtuah rauh rauh a, sawi tur lah chu a vang phian lehnghal a. 

"I ril a ţam tawh em?" ka ti thla ve rawk a, min en reng chung hian lu a thing mat mat a, naupang tih takah min en hian a dak ve vah zel a, a lawmawm reuh tak tak a ni. 

"Nautelem ka ngah a sin" tiin amah bawk chuan min be hmasa leh a, ţhian a kawm tam vak si lo a a khua a har ve aniang, ni lo se nautelem tih vel mai mai a sawi lo ang. 

"A va ţha ve" ka ti a, ka nui pah bawk a, "I pa chu a rei tawh hle mai" ka tih zawm zat a, "Nautelem chu i pawm duh em?" ti a min zawh chuan lu thin pahin "Duh lo e" ka ti leh mai a, inpui lamah ka kaiphei a, "Lo ţhu lawk rawh" ti a hrilh pahin ka kut chu ka la let a, ka sawi ang chuan a ţhu ve ât a, ka che vel engkim chu a en uluk em em zel a, khua a thim hnaih dawn tawh avangin parda ka pawt phui a, chumi hnuah tv on in remote chu Sangsangi ka pe a, "I duh duh en rawh" ka ti a, a bulah ka ţhu ve nghal zat bawk. 

"Min lo tih sak" ti a a duhzawng a sawi hnuah chuan ka tihsak ve nghal mai a, tv a rin viau laiin a en tu te pahnih ve thung chu kan ngawi dun rauh rauh mai. 

Zonunmawia lo lut chu ka pan vat a, Sangsangi nen a kan lo ţhu dun min hmuh vang chuan "In lo inkawm nel ve thei tawh em?" ti a min zawh pahin ka kawngah a kuah a, Sangsangi pawn a pa chu a en ve reng nain a rawn pawh ve nghal em lo a, ka awm vang te pawh a ni maithei e. 

"Ei vat ila a ţha ang. Haw tlai thei ka ni chiah lo a" ka tih laia Kimkimi rawn lut chuan min ti hamhaih ngei mai. Nidang angin min hmuh rualin a nui tawh lo a, Zonuna a be siam siam tawh lo a, ani pawh pawhin a lo be bik lo. 

Tum burin a fanu ţhutna lam chu a pan a, a kuah nghal hlun a, chutianga an nufa ka hmuh takah chuan ka lo na veng veng mai. Kei hian mi pawi ka lo sawi palh angem aw tih te chu chawplehchilha ka rilru a rawn lut a ni. Nuam lo tihna lian tak ka nei a, mi chhungkua pawt ţhen em lo mah ila an inzawm leh theihna kawng dal tu ka lo ni reng thei a ni. 

Ngawi renga a fanu a kuah hnuah a rawn lehhawi a, a mitmeng thip zet mai chu hlauhawm tham a ni. 

"Zonunmawi i va zakthei lo ve" a ti hrak a, a nupui hlui chu a chhang let lem lo nain min kuahna erawh a thlah thung a, keimah zawk chu ka lo tawlh hla hret bawk. 

"Eng nge i lo tih?" tiin pangngai deuhin a lo zawt let a, huat tur a awm hauh lo nain Kimkimi chuan throw pillow a ban sawk sawk a, "Chutiang i hriat ve zel a ngai lo" vin hlar a tih pahin a rawn vawm pawp a, Zonunmawia chuan a hmai a sik hmain a lo man hman hlauh a, thil rit deuh chuan vawm se a na viau ang. 

"Kimi, eng nge i lo tih ka tih chu" nuihza aw zeta a tih hnuah throw pillow bawk chu na lo tein a vawm let a, Kimkimi huat tawk a tling leh khawp ang. 

"Lerh-a, nang anga fate ngaihthah ţhak khawpa nula buaipui ţhin tumah ka la hre lo. Khaw lo leh lutuk mai, mipa nih vang ngawt a tlangval len taka leng ziai ziai ringawt mai" a tih hlaih hlaih lai chuan "Chaw i lo ei ve duh em?" a lo ti a, chu chuan Kimkimi chu a ti thinrim telh telh a ni ber. 

"Engahmah min ngai lo ang mai khan awm vel suh. I fanu i ti rethei emai i tluang lo ang. Hrehawm ti lo ang hmaka nuih vel te kha a ngai lo" a ti hlak hlak a, throw pillow bawk chuan "Hmela" tih vin vak pahin a rawn vawm leh a, a lo dawng leh hman tho na a a ngaihdan a ni chiah tawh lo aniang Kimkimi chu a pan hmawk hmawk a, a banreka vawn pahin dim lo zet hian a pawt tho a, a kalpui nghal daih a, inchung chhohna kailawn an thlen hma chu a kal pui hlawk hlawk a ni ber. 

Sangsangi lah chu naupang mah nise hrehawm a tih zia a hriat a, ka khawngaih deuh chuan Zonuna te pawh ngaihven tawh lovin ka ţhutpui leh a, Kimkimi kha a nasat hmel mai bakah a kawlh tih a hriat a, insum thei lo lek a a thinrim phei chuan a hlauhawm ngawt ang. 

"Thil dang i en duh em? Ka lo tih sak dawn che mi?" ka tih ve takah chuan lu a bu nghat a, a ţhutna aţang chuan a tho tharh a, keichu min rawn belin min ngheng chial a, tim daiin a sam ka lo chul a, nu leh paten boruak ţha lo an neih chuan fate hi an khawngaihthlak ber ţhin reng a ni. 

Kimkimi chu lo chhuk hmasa zawkah a ţang a, a mit a bui deuh lâk bakah a sen ram a, a hnar hmawr pawh nasa vak loin a sen ve bawk a, a ţap a ni tih chu en ringawt pawhin a hriat. 

Ka bula a rawn ţhut rualin Sangsangi chuan a hmai a lo khawih sak a, kei ka lo zam em em thung a, a awmdan leh landan te hian awm an ti nuam hlawl lo a ni. 

Sangsangi kutphah chu a hmui nen a tih sik pahin "I infiamna vel ka han en a, i van nei ţha em em..i pa khan min hmuh tir a, barbie lah kha a tam ropui sia" a ti a, a fanu kutphah chu a fawp zui zat a. 

"Apa'n a hau che em?" tiin a nu chu chanchin zawh nachang a hre ve a, "Hau lo e..i toys ka enkual ka tih tawh kha" a ti a, haw mai a tum tak lohah chuan chawhmeh chhuan lum ngai vel en tumin choka ah ka luhsan ta daih a. 

Bel pakhat ka chhuang a, a dang chhuan leh ka tum laiin hnung lam aţangin min rawn kuah a, "A nuam lo em?" tiin a phun sap a, min hnaih em avang chuan ka beng zawn chu a lum ham ham thei a, "Ti lo e...nichin a mi ang kha chu thil thleng thei reng a nia lawm" ka tih lai chuan ka biangah a lo fawp vang vang a, ka kawnga a kut suihbeh chu ka lo vuan bet ve a, a sana bun lai ka khawih chiah chu rang deuhin ka inher a, ka inla hrang nghal bawk. 

A kut vuan reng chung chuan ka dak deuh hlek hian ka melh zawk a, mak tih hmel deuh a min lo en ve avang chuan ka mit la sawn hnuaiin a sana bunlai chu ka bih a, a tlai lutuk tawh. 

"Sangsangi ril a ţam tawh viau ang. Nangpawn chu te chu ngaihtuah ve tur che alawm" ka tih zek hnuah pawh "Boruakin a zir lo a nih kha" a ti mai a, "Chawhmeh chhuan pahin sil tur tlem an dah hi kan sil ange" tih leh ka kawrban pawh hlim ka rual a, ka vun nalh lo lai a lo lan rual chuan ka harhchhuak nghal a, ka kawr ban pawhthlak leh theih reng kha pawt thla tawh lovin ka hnungah ka thukru ta daih a. 

"Kha vang kha mi?" a tih chuan bang bo deuh hian "Engmaw?" ka lo ti ha a, kan inhriatna a rei tawhin kha leh chen kha harsa tak chungin ka lo thup ve ţang ţang a, tunah lah keimah zawkin ka ti lang ta hluai sia. Diktak chuan miin hmai bawl te, a bawlna hnu duk leh ţhin te hi an ngaipawimawh a, bawl nasa deuh phei chuan hrehawm an ti hle ţhin a, keiphei chu ka hmai em ah ni lo mah se he thil hian ka awm a ti nuam lo ţhin a, kha thil rapthlak tak kha ka hrechhuak a, ka zak bawk. 

Zonuna lah chuan "Ka lo en chhin" a la ti tak deuh deuh a, che chang lo a ka din tak rengah chuan "Sangsangi ka va ko ang" tih leh chhuah a rual a, ka ser chu enin muangchangin ka chul a, a nalh lo ve thlawt a ni. Ka en ngun poh leh ka thinrimna a zual ţhin. 

Ka kawr ban ka pawh thlak rualin a rawn lut leh a, Sangsangi a la tello cheu. 

"Khaw nge?" ti a ka lo zawh chuan "Kimkimi nen tv an en" a ti a, fridge hnaih a ka ding chu min rawn pan hnaiin "A zahthlak hleinem. Tikhan danglam bik a inngai lovin dangdai bikah in ngai la, i hmai a ni lo hlauh a i vannei lutuk alawm. Ser hi kan put chhan a zirin a mawiin a mawi lo ve thei a" a tih lai pawh chuan ka kawrban hmawr chu ka la hum bet ţang ţang tho a, hmeichhe tan ngat phei chuan a hrehawm duh em a ni. 

A kut luma ka biang tawn tawn a a dawm chuan ka lo dak deuh a, a hmui in ka hmui a rawn tawh takah chuan nghet deuhin ka mit ka chhing a, ka kut hum chu thlahin a tshirt tlang ka vuan ve thung a, "Ser hian chhunglam mawina a hliahkhuh ngai lo" in lak hran paha a tih hnuah ka meng ve ngam chauh a ni. 

"Mi hian engah vak an lo ngai lo bawk a, an en bik emaw i tia mah se an en lo. I inhrem mai mai zawk a ni. I put reng tawh tur a nia, pawm thiam tum la, nangman i pawm phawt loh chuan midangin an pawm thei lo ang" a ti leh a, ka kal hran hnu lawkah Kimkimi te nufa an rawn lut a, chaw a ei ve dawn a nih hmel. 

"Chaw ei ang u, kan ei tlai lutuk chuan Bawihtei a khawngaihthlak" a rawn ti lut a, a fanu chu chaw ei dawhkan a kil pui nghal a. Zonunan min pui char char lo se chu inzawn chawp vek a ngai ang a, ka chaw ei siam chhung pawh a rei viau ang le. 

"Ka nu te chu an awm rei dawn em?" chang deuh taka Kimkimin a tih chuan "Ka hre lo" tih ringawtin a lo chhang a, "Naktukah an kal dawn chauh bawk a haw pahin ka tlawh kawi lawk ang" Sangsangi chawhmeh suah sak pah hian a ti leh a, chutah keichu min rawn enin "Sawi pui tur ka ngah mai" a ti kher a, hnuai lam ka bih ta daih a. 

"Min hrilh se chuan chawlh ka la anga keimah ngeiin ka hruai tur a nia" a ti lehzel a, an ep chiahah Zonuna nen kan ţhu a, nuam lo ka ti lutuk chuan ka ei sawk sawk a, ka eizawh veleh ka tho nghal nalh a, "I puar hman a mi? Hmanhmawh suh" Zonunan a lo tih chuan "Ka puar tawh lutuk..chaw ka ei tam vak ngai lo hrim hrim a" ka ti a, silhmunah ka thleng chu dahin kut ka sil zui a, Kimkimi ka ngei rualin ka inthiam lo takzet a, khawngaih nachin ka nei bawk. 

Ka haw dawnah lah "Remruati i thlah rualin min thlah ve nghal mai rawh. An veng a hnai tho a, kan drop hnuah ka nute bulah chuan min dah veleh ang a, a nih loh chuan haw na tur ka nei lo. Taxi in ka lokal" a ti zat zat a, Zonuna chuan a hnial lem lo a, chutih rualin lungawi lohna nei hmel a pu thung a, mahse engmah a sawi lo. 

Chaw eina vel kan tihfel hnuah kan vaiin kan inzui chhuak a, kawngka kan kalh fel hnuah motor a la chhuak a, kan zawna a rawn din veleh Kimkimi chuan a hma lam kawngkhar chu a hawng nghal vat a, Sangsangi a pawm a, a hnungah keimahin ka ţhu ve thung. 

"Remruat, khawiah nge i thawh mek a?" ti a Kimkimin min zawh chuan a hre tawh tho alawm tiin ka thawhna hmun ka hrilh a, "I buai vak lo em ni chaw te i rawn ei a" a tih leh chuan ka chhan hmain Zonuna a lo inrawlh a, "Nangpawn i rawn ei hman alawm. In inang reng, ngawi mai mai rawh" a ti hluk a, Kimkimi nui ri chu a ngeiawm khawp mai. 

"Ka fiam a nih kha..midang ka fiam a, nangman i haw daih a, palian pui si hi i rilru a te leh lutuk mai" a tih chuan Zonuna a lo nui ve hawk a, "Rilru te chu min ti lul lo teh. Ve pang pang che hian" a ti a, an inhnial dan naupangchhia sawt lutuk chu a nuihzatthlak duh khawp mai. Ţhianţha an nih ţhinna an la paih bo loh vang te pawh ania nge. 

Ka chhuk dawnah chuan "In ka thlen veleh ka lo be dawn che nia" a ti a, hmui phun a "Aw le" ka tih hnuah ka chhuk san a, Kimkimi leh Sangsangi te nen chiah an let dawn a, rilru a nuam duh vak lo. 

Ka nu'n chanchin min lo zawh chuan phur deuhin ka hrilh a, Kimkimi hming lam telloin a nawm na lai hlir ka hrilh a, ngaihthlak nuam a ti ve khawp mai.

"Sangsangi pawh a fel reuh a, enkawl a har lo. Pi Hmangaihi te awm loh chhung chu ka buaipui thei mai ang. Zonuna hi i duh ve tak tak niin ka hria" a tih chuan ka nuih nasat loh nan ka hmui ka pet tlat a, pathlawi fa nei tawh tih mai mai, tlangval tam tak aiin fel ka ti daih zawk. 

A insawi ang tak takin in a thlen rual chuan min lo bia a, Sangsangi thawm pawh hriat tur a awm. An pafa chauh chuan an khua a har ve ngawt ang. 

Kan inbiak zawh chuan ka ngai zui veng veng a, a mak tak tak a ni. Hetianga mipa duh leh rilru pek ka la nei ngai lo. Kan intawn hma khan bialpa chu ka nei ve ţhin ngei a, mahse ka ngaihsak ngai mang lo a, keimahah hian an cham zui ngai lo. Tun a mi erawh a dan a dang a, engahmah ka ngaih loh phone pawh ka pang depah a awm ve reng tawh. 

Dear Diary

Amah ka duhna hi ka sawi chhuak thiam chiah lo. Ka nunhlui leh a nunhlui aiin ani hi hmangaih zawk ka duh a, hun lo awm lehzel turah pawh kei hian hmangaih zual zel ila, chutiang chiah chuan ani pawhin min hmangaih ve se ka duh a, lungngaihna a neih ve theih loh nan a thinlung hi tuman an tih nat theih loh nan a ven sak ka duh a, a chhungkua, a fanu thleng hian hmangaih theih vek ka duh. Amah tawp hi ka duh tih bak sawifiah ngaihna ka hre lo takzet a ni. Tuna kan awm ang hian kan awm reng theih ka beisei tlat bawk. 

Rintluangi ka call a, a lak veleh "Ka rilru ti buai deuh tu a awm a, min lo hrilhfiah teh" ka ti tawng a, a nuih lah chu a za nghal em em mai lehnghal a. 

"Eng thil nge a?" a tih chuan "Zonunmawia a nia, a nupui hlui nen hian an la inpawh lutuk a, zanin tlai pawh khan Kimkimin throw pillow in vawihnih ngawt a vawm a, mahse a nui liam mai mai a, a ankhum mawlh mawlh laiin chaw eiah te a lo sawm daih a, a mak riau" ka ti a, a nuih a za zual sauh emaw tih tur a ni.

"I va han ngawng ve chiang tak. Engah vak a ngaih tawh loh vang zawk a nih hi. Ka sawi chu i hrethiam em? Kimkimin amahah nghawng engmah a nei tawh lo tihna" a rawn tih chuan "Ţhian ang hian an inkawm zui leh niin ka hria a" ka lo ti hram a. 

"Kimkimi hian ţhian angin a en ve hleinem. Zonuna pawh hian la duh reng se chu ţhian angin a en zui thei teuh lo mai. In in ang chiah. Nangpawh Zualtea hian ţhian angin a en thei tawh dawn lo che a, ani aia duh i neih miau avangin nang chuan ţhian ang chiahin i en nghal thei mai a, chutiang chu a ni mai. Zonuna hian Kimkimi hi a duh tawh lo a, ţhian angin a en thei mai mau a nih hi" a ti duah a, a chiang khawp mai.  

"Ka fiah deuh tawh e. Inthiam lohna ka pai reng a, an chhungkaw inzawm lehna ban daidangtu ka nih te ka hlau a, miin hria se chu min sawi duh viau ang" ka tih chuan "A ho mai mai e...mi sawi mai mai te chu thihpui tham pawh a ni lo. Khatiang kha chu i tawrh ve a ngai alawm. A bikin Kimkimi hi a nasa a nia aw, hlau viau ang che. Hmuh loh dan ngaihtuah la, a theih chhung chu hel rawh" a rawn ti a, a awmdan vel kha ka ngaihtuah a, tih thinrim a hlauhawm hmel viau tak tak mai. 

"Engahmah ngai lo angin ka awm char char ang a, min kher reng peih bik lo ang. An chhungte ve vein inhruai leh ţha an tih a nih phei chuan kei chu ka inrawlh tawh lo ang. Duh viau mah ila ka kalsan tho ang. An inhruai lo a nih leh ka vannei a ni mai a, a nih loh chuan ka thlah hmak ang. Mi nupa inkar a inrawlh ka duh reng reng lo" thutak fe a ka tih chuan "Awii..i ţawng ve duah mai..a rul tawk leka min chhang ţhin si i mak ve ngawt mai. Zonuna hi i duh ve tak tak a nih hi" ka nu ang bawkin a rawn ti ve a, min hrechiang dun tak tak a ni. 

"Duh ve takzet lo la chu i ze ngai reng kha i la pu ang. Tunah chuan amah vangin i hlim a, biak pawh i nuam tawh lutuk" a rawn tih chuan ka lai lek lek a ni. 

Zingah ka nu'n ka muttui lai min rawn kaitho a  "I tlai anga sin. I kalna tur a hlat tawh tehreng nen engati nge i la mut?" a ti chul a, min sawi nawk nawk a, phak chuapa ka tho chu "Ka kal hma dawn a, Pi Hmangaihi te awm loh chhung chu zingkarah hlir ka kal ang. Chawhmeh ka siam mang lo a, ka siam chhun saw i pa nen in lo ei dawn nia" ti a min chah thlap hnuah pindan chu a chhuahsan a. 

Mut leh mai ka tum chu Zonunan min lo call a, "Ka rawn lam kawi ang che" a tih hnuah phone a dah nghal a, thawk pawh ka thaw hman hleinem mawle. 

Kawngpui ka thlen rualin ani pawh a rawn thleng ve nghal a, hnung lama ţhut ka tum chu "A hmaah hian lokal rawh" a lo ti a, glass a down vek avangin chhunglam aţanga a thil rawn sawi chu ka hrechiang khawp mai. 

"I va chauh hmel ve..nizan in mu ţha nange?" ka tih chuan min rawn melh zawk hnuah "Mu ţha e" a ti a, a ngawi leh daih a. 

"Sangsangi a mu thei em?" ka tih leh hram takah chuan "A pi te a ngai a, zan dang aiin a muhil har" a ti leh tawp a, zawh chin chiah min chhang a, kei lahin zawh belh tur ka hre vak mang si lo, kan ngawi dun rauh rauh a, a hmel lan dan hian awm a ti nuam lo a, zan a mu mang lo ang a tih theih turin a mit chu a sen deuh a, a chauh zia hai rual a ni lo. 

"Chhungkuaah buaina thleng a awm em ni?" ka ti leh a, ka ngaihtuah ve lo thei lo a, ka zawhna min chhang miah lo nain "I pa a ţha lo em ni?" ka ti hram a, "Ţha e..zan dang aia ka menrei vang mai mai" dam thlup hian a ti a, ka ngaihtuah ve zia a hriat chuan a hmel pawh hmuh a nuam leh ta deuh a, chuti chung chuan buaina eng emaw tak a awm ka la ring fan a ni. Kimkimi awm dan leh thusawi kha hrethiam lo ka ni bik lo a, ka rin dan hi a dik ngei bawk ang.

CONT..