DEAR DIARY-2

DEAR DIARY-2

"Ka hman lo ang. Pawisa hi chhun hma a ngai a, ka nu'n min nghak reng tawhin ka ring. Min duhsaknaah chuan ka lawm lutuk a, mahse dawr kan khar veleh ka haw zawk ang" kan pi en ran chungin ka ti mawlh mawlh a, an pa ka zui hreh zia ka aw aţang chuan hrethiam se ka tih viau laiin Pu Sena chuan "A rei dawn hleinem. In mamawh lai tak a nih phei chuan lawmawm i ti zawk lo em ni?" a lo ti leh hmanhmawh a, tlan chhuah leh daih ka duh rum rum mai. 

"In tih tihin ti teh u. Fakte, clinic a duty ten an rawn order kha in pe tawh em?" a ti a, min ngaihsak leh tawh hauh lo. An pa a rin lutuk vang a nih ka ring. 

"Hei ka pack mek e. Remruat, i kal duh zawk em?" min ti a, ka hmelhmang leh chezia vel kha chik deuhin a en reng a, min hrethiam tu ka neihchhun a ni hialin a nia ka rin ni. 

"Aw..U Nuno-i te mi?" ka ti ve nghal zat a, Pu Sena lungawi lo hmel chu ka mit sir ralh hnuah Faktea awmna lamah ka phei a, an pa min sawmna ka hnar pawh chu kan pi chuan engahmah a ngai chuang lo. Min ngaihsak tawh hlawl lo a, a ţha phian zawk. 

"Aw, U Nuno-i leh Chhani te an la awm a, doctor chu a haw tawh. Lab ah Mawii a la awm bawk ang. Aaa..an la awm deuh vek a nih chu" a ti duah a, kan pite nupa hriat ngei tura sawi a ni bawk. 

"Ka pe ve fo tho a, khatianga sawi duah kher a ngai lo" fiamthu a tih pahin na vak lovin ka nek a, an eitur pack sa chu polythene ah ka rem lut a, Pu Sena hmu pha renga awm ai chuan a nuam daih zawk ang. 

"Hotel ah chuan keimah ka lo kal ang. Pawisa min pek belh ve tho ang tiraw Pi?" tih lang lang pahin kan pi ţhutthleng bânah a va ţhu a, a dara kut nghatin a nui vur vur bawk a, en kher lo mah ila Pu Sena chu a thinrim hmel lehzual ngawt ang ka ring. 

"I thawh ţhat chuan pe ang. Mikhual thleng thut thei reng kan nia, chuvang chuan sawisel tur awm lo se la" a ti a, an inbiak zui zel dan pawh ngaihthlak sak tawh lovin ka inkhai chhuak a, pawn ka thlen meuh chuan ka thaw nghal ham ham mai. Ka ip rei ve tawh bawk em a ni. 

"E...Remruat, i ţhianpain a tir veleh chhawng che a ni maw?" U Nuno-i te chuan an lo ti a, ka thil khai lai chu an lo ban sawk sawk a, Faktea a kal bik ţhin a, anni ho pawh hian an kawmngeihin an ngaina ve hle. 

"Hotel ah pindan tihfai ngai a tam a, a inhlawh dawn" ka tih chuan awmze nei deuh a in melh tawn chung hian an nui hak hak a, pawisa min pe nghal zel a, tunah pawh pawisa min pe mai dawn emaw ka tih laiin "Hotel hnathawk an bang ţhen leh tawh em ni?" Chhani chuan thutak deuh zawkin a lo ti a, buk nghat paha "Tlemte chiah an awm tawh. In duty chhawk ringawt pawh a buaithlak tawh a niang. Hun insiam rem a har a ni maithei" ka tih chuan a ţhiante a melh ralh a, lem fe hian min nuih ve thung a. 

"Saw hotel saw a mak tak tak a ni. Tleirawl te te an thawk a, reilote hnuah an bang leh mai zel a. Receptionist takngial pawhin rei an daih thei lo. Pu Sena nupui thinchhiat lutuk vang a ni maithei a ni. Zu a duh ve bawk sia" Mawii chuan a ti charh charh a, a chhan diktak erawh keimah hian ka hriain ka hria. Pu Senan keimah ang chiah khan a ti ve a nih ka ring. 

Pawisa min pek hnuah inthlahrung deuh hian "U Nuno, MR in an lo tlawh mial cheu em? Damdawi sample ka van duh tak" ka ti a, ka aw pawh a zawi ţha khawp mai.

"Aw, nitin deuhthaw an lokal alawm. Saw lai chhuar hnuaia parcel ah sawn kan dahkhawm ruih a, i duhzawng va hai rawh. Sample na na na chu kan ui lo lutuk" a ti a, a aw a zangkhaiin hriat a nuam takzet. 

Nachhawkna leh hritlang damdawi te, pum damdawi leh antibiotic thleng hian mamawh chang a awm ţhin a, pawisa a lei zel dawn chuan pum damdawi leh antibiotic ngat phei chu a to lutuk a, kei ang mi inren tan lei ngam chi a ni ţhin lo. Eitur ka ken phei sakna polythene ah khan ka khungkhawm ruih a, ka nu a lo lawm leh viau ang. 'Doctor te enchhin tura an tih a nih avang hian a pangngai aiin a ţha bik' tih zawngin an lo hrilh tawh a, sample ka hawn chuan phur deuhin a lo dahţha thuai thuai ţhin.

Ka lak tam tehreng nen "Ka lawm lutuk aw" tih paha ka damdawi lak ka hmuh tir chuan "I va la tlem ve. Kan ui lo teh mai a nia aw, i duh hun hunah i rawn la leh dawn nia" an ti a, an hmel hmuh a nuamin ka kal tur pawh U Nuno-i chuan clinic kawt thleng min thlah thlap. 

Hlawhtling inti zet maia ka let chu kan piin "Choka ah lo lut teh" a ti ram hmarh a, a aw hlauhawm lutuk chuan ka taksa hi a ti hit chhawk thei ni maiin ka hria. Ka phut nasat vang pawh a ni maithei. 

Amah zawk chu choka ah a lut hmasa a, ka zui ve vat a, choka kan luh rualin a lo awm sa ho a chhuah tir a, min hmachhawn zawnga a din leh chiah phei chuan hlau tawh tak ka ni. Thil ţha sawi tur a nei lo tih hre ranin in ka thin a phu dawt dawt a, nghet deuhin polythene hmawr a hum a, ka thang rei loh tehreng nen engthilin nge maw lo ti danglam hman le?

"Nimin tlai khan haw tlang lovin hotel ah kan pa bulah i awm em ni?" a ti chiah reng a, a thusawi avang chuan ka nui chhuak teuh hle. 

"Aw min ko a, a ţhiante pahnih kha an pindan a hruai turin min ti a, ka duh lo a nih kha. Min endan a dik lo deuhin ka hria a, ka hlau a" ti a thudik tak ka hrilh hnuah pawh zep ţhen tlem ka la nei cheu. 

"Awihawm loh loh. Pawisa i mamawh a, tirh haw che a tum pawhin amah si chêtin i ţhu lui tlat tho a ni lawm ni?" a ti chiah chu sawi tur pawh ka hre lo. Pawisa chu ka mamawh ngei a, mah se Pu Sena chuan tunah a rawn hre ve chauh a nih kha. 

"A awm lo emai a. Min ko chho a, amah zawkin min pawt ţhu a nih kha. Chuan ka sawi ang khan min tir bawk a, ka tlanchhiatsan daih alawm kei te chuan" ka ti a, ka ţawng rin loh nan ka insum nasa hle mai. 

"Kan pa hian dawt min la hrilh ngai lo. Nangpawh" tih pahin ka awmah a rawn kawk a, a thaw zui hak a, "Mi pasal nek salh salh tur a ka rin loh ber te zinga mi i ni. I inthup thiam nge i hmel hian pawi a sawi loh em avangin ka hmu fel lutuk zawk che tih pawh ka hrethiam tawh nek love. Pawisa kha ka la let tawh lo vang, mahse naktuk aţang chuan rawnkal duh tawh suh. Ka pasal min ţawmpui tum ran tu nen chuan kan thawk dun ţha thei chuang lo vang" a ti ta mai a, a thusawi ai mah chuan min rinna chhe te mah a neih lohna hian min vaw na zawk. 

"Min hriatthiam ka lo ring a" ka ti sap a, ka hmui ro lutuk chu ka liak hnâwm a, ka dâng pawh a pasal hlaua ka tlanchhiat ţum ang chiah khan a ro huam mai. 

"I haw thei tawh ang" min kalpelh pahin a ti chhum hmak a, reilote tak tak chiah ka thang a sin mawle. Thu tam a sawi hman hauh lo vang. Midang ti thinrim tur hian thu tam sawi a ngai lo reng a sin.

Ka thawhpuite pahnih lo lut chuan min melh hrek hrek a, ban tum sa ran mah ila thil awmdan teh thut hian min ţhawngin chet nachang hre lawk lovin ngil takin ka ding khawng reng a, hmeichhe pawisawi lo te chunga rilru sual a pu ţhin a nih chuan pu Sena hi a tluang reng bik hauh lo vang. 

"Khawi i thil khai lai kha i bag ah hian khung rawh" Faktean a rawn ti ta hlauh a, ka chet hun pawh nghak lovin polythene chu ka kut aţangin a pawtthla a, ka bag ah a khung zui mawlh mawlh a.

"Pu Sena khan inbe lawk teh ang a tia, pawnah reilote an chhuak a, an rawn luh leh khan kan pi-i saw a thinrim hmel ta lutuk a. Hotel ah pawh min hruai chho chuang lo. Tih tur a tam tak tak lo a niang" a ti zung zung a, a khung zawh hnuah bag chu min ah tirin ka darah a kuah zui zat a, "Lokal rawh ka thlah ang che. Hetiang hunah chuan ţhiante tello phei chuan zam a awl emai" tih leh min kalpui a rual a, Faktea hi awm lo ta se hrehawm ka ti lehzual ngawt ang. 

Pi Awmpuii chuan melh pawh min lo melh duh lova, "Pi, ka thlah lawk aw" ka ţhianpa chuan a ti liam puat a, chhuahna kawngka bula dawhkan inhung a ţhu ka hmuh chuan ka ke pen a tawp chat mai. 

Zana ka mi hmuh pa ngei kha a ni tih ka hria, a hmel chu chiang lehzualin ka hmu leh ta chiah bawk. Ka en reng tih a hria a niang a ep chiaha ţhupain a biak mawlh mawlh lai chuan keimah zawk min rawn enin kan mit a intawng chat a, zan lam ang lo takin a mitmeng chu a dul a, a chauh hmel viau nain a landan chuan mi a hipin a itawm takzet. A vun rawng thleng chuan ka hmuchiang em em vek tawh a, a ngo vung lo a, tuman hang an ti lo thung ang. A hmui chhah  dan lah chu hmeichhiaten kan duhtawk lek ang ka ring. Ţhenkhat phei chuan fawh chakawm tawk lek an ti hial maithei a ni. A khabe leh biang vela hmul ţo chuan a ti lang upa deuh hlek a, a inhmeh viau tho si. Helai hmun a ka hmu fo mai hi mak tak a ni. A ri lo a nuih suk pahin a ţhianpa bawk chu a ngaihven leh a, min hria anga a awm ve duh hauh lo chu a mak lehzual. 

"Engati nge i din reng?" ka beng zawna Faktea rawn ţawng chuan ka awmdan zahthlak zia min hriatchhuah tir a, min thlahtu ber mah nise amah pawh ngaichang tawh lovin hmanhmawh deuhin rei tak ka lo thawh ve tawhna hmun aţang chuan ka pen chhuak a, buaina ka ngah tehreng nen, inchhawng sang aţanga ka zuanthlak daih hlau tu mai maiin ka rilru a la peng thei chu ka indem lek lek a ni. 

"I awmdan khan Pu Sena a ti lawm lo ang a, a nupui hnenah a hek che a niang.  An innei rei tawh a, an nu lawm loh zawng chu a hre dawn nasa mai sia maw. Hnathawh tur chu a awm leh mai ang. Lungngai lo phawt la, keipawn ka lo zawn pui ang che" a ti mawlh mawlh reng a, bus nghakin kan ding dun a, hrehawm ka tih a hlau khawp mai. 

"Hlawh min pe tho a a pawi chuang lo. Ban tum sa hrim hrim ka ni a, hunawl ka nei thei dawn tihna a ni mai a. Naktuk aţangin hna zawngin ka kal chhuak thei ang chu. Min ngaihtuah emai hna ka hmuh veleh eitur ka leisak dawn che nia" ka tih chuan a nui hak a, anni pawh an khawsak a harsa ve a, a pi hoin an awm a, an upa ber hian damdawi a khawih nasa ve bawk si, an buai ve fo reng a ni. 

Bus a lo thlen rualin lapaw chini kawtin vaipa a lokal ve chiah a, bus a luh mai ka tum chu Faktea chuan "La lut suh. Lungngaih lai chuan thil thlum ei a ţha an tia, lapaw chini saw ka leisak ang che" tih leh ka bag a min pawh let a rual a, vai chu an kal chak si, min kalpel daih tawh tu chu a ko let a, lapaw chini pahnih kan duh thu a hrilh zui zat a. Vaipa pawh a phur khawp mai; ka duh ber min zawt a, a pâwl da riai mai chu ka lo thlang a, ka rawng duh ber a ni. Faktea chuan ka thlan ang chiah lo thlang vein kan ţhiandun chuan hlim deuhin kan ei a, ţhiante tih lawm nan hian thil man to a lo ngai hauh lo tih ka hriat phah a ni. Thinlung aţanga chhuak duhsakna a tel phawt chuan thil man tlawm tak pawhin hlim deuhin min siamthei chu a nih hi.

Bus a ka chuan hnuah "A nih aw Fakte" tih pahin ban ka vai a, kan inhmu khat tawh awm sia, ka ngai ngawt ang.

"Ka hman hunah ka lo la leng ang. Chuan i bialpa kha ţhen ang che aw. Natna hrik a nih kha. I kawchhungah luh tir hlek suh" a ti lang lang a, ka hnunga ţhute nui riin a zawm a, a sawi hun lo ve bawk em alawm le. 

"I thu vek alawm" ka ti chu a lawm hmel vur vur khawp mai. Kan invai liam rualin keipawh ka ţhu ţha a, bazar chhungah la awm mah ila rilru chu in lamah a awm leh tawh a, min ban ti ringawt lovin ka nu hnenah chuan chhuanlam dang ka siam tawh mai a niang chu. 

Zodin a bus a din chuan nu pakhat hian hmeichhe naupang a rawn kai lut a, tlai lamah hi chuan bus a thawl har ţhin. Tunah pawh ţhutna awl a tlemin "Mami kan lo ţhu ve ang aw" a rawn ti a, lu ka bu nghat ringawt a. 

A nu lianin a vun a ngo suah a, an inchei danah lah mi rethei zawk zawk an ni dawn lo tih a chiang reng, naupang nen meuh a bus a chuang peih chu mak ka ti ru khawp mai. A naupang hruai lah chu a hmel a ţhain a sam sei kir chiat chu sang deuhah a ţawn sak a, a duhawm lutuk chu a hmuhnawm tham zawk alawm le. 

Ka en reng tih a hria nge ka bula ţhu nu chuan "Mitthi ralnaah ka hruai a, taxi kan phar vek tawh hnuah bus a haw a ngen tlat a" a ti a, a nui sang bawk a, nu upa lam tawh a ni nain hmuh a nuam khawp mai. 

"I fanu nge?" ti a ka zawh chuan lo nui hakin a tunu a nih thu min hrilh a, hmeichhe naupang lah chuan a mitmeng fiah kâk mai chuan min lo melh ve kiau a, hmuhnawm min tih ve hmel khawp mai, ka tarmit vang a niang. 

Sikulpuikawnah an chhuk ve a, ka pen lohna lamah an peng thung. Kein ka haw hnak hnak a, hna ka thawh tam hman loh nen ka chau riau lehnghal a. 

Kan inzawn ka thleng a, chhuk thlak nghal mai ka tum chu in neitute kawngkhar a ri rawk a, arpa lianpui lo chhuak chu tlangval pakhatin a rawn umzui a, a hmel hmu chiang lo mah ila an fapa chhuan ve em em Zualtea a nih ka ring. 

"Ka ar kha lo man ta che" vin zet a a tih takah chuan a tlankual ruai hnuah ka dinna lamah a rawn tlan tih ka hre chiah. 

"Ka duh reng reng lo ka hlauh nak laia" tih leh tlanchhiat ka rual a, Zualtea chuan min um ve zelin ar mai bakah keichu min um tel a ni ber. 

Kan in lamah ka tlan thla ta daih a, an ni pu tu chu an la ri ţak ţak reng, "I thla kha dim rawh nizanah i tih nat kha" te a tia, mihring ang chiahin a be mawlh mawlh reng a ni ber. 

Pawn lamah a lo la inkalh a, bathlar a stool hlui tawh lam chu kawngkhar zawnah ka dah a, ka lawn kai hnuah kawngka lu chunga hming intarna hnung chu ka zen a, chahbi a lo awm ngei bawk. Thui deuh thleng ban ve thei tho mah ila stool tello chuan hming intarna hnung lam thleng em em chuan ka ban thei lo. 

"Mizo nula nawlpui hi in tet em vang alawm tlem a lian ve deuh hlek ho hi an intihtheih em em ţhin ni. Tlawmah la ula, sang vak vak zel ta che u" mipa aw lo rik chhuahna lam chu ka hawi vat a, Zualtea bawk kha lo niin. Ar a pawm ţat a, a duat hmel em em mai lehnghal.

"San vaka ţhan theih chu nise kan sang luai luai ang chu. Sang vak lo mah ila ka lung a awi tho a nia" ka ti ve hmak a, min ei loh hmel deuhin a ner kual vel a, ka ngei chi a ni ve em ka la chiang chiah lo.

"Hei hi ar sual huai a ni tih i hria em?" tih paha ar a rawn lek kan chuan kawngkhar ka ngheng rawk rawk a, ka naupanlaiin arpuiin min lim nghek tawh a, khata ţang khan ar hi ka hlau vek tawh. 

"Huh! I inti no vel em ni a?" a ti vel a, a hmelah hian Zualtea a ang sia, kan la inhre ve ngai bawk si lo nen, Zualtea a nih ka ring ta tlat lo. A nu khan neet exam a paltlang tawh niin a sawi a, chutiang ve lai ni si chu hetianga mawl mang deuha a chet ka ring lo. 

"Zualtea i ni em?" ka ti ta khawl a, lu min buk khum nghut pahin "Nih ve mai mai hi" a ti a, ka rin aiin a mawl daih. A vun a ngoin a sam lah chu a zuah buk ve hle a, a dum hlap lo bawk. Ka thawhna hmuna ka hmuh pa ang khan a sa a ţha ve vak lova, amaherawhchu a sang ve hle thung. A mithmul dinglam chu a ziah khen tir vel a, a hmai lah chu a pilh khem deuh em maw ni, ham hrepna te pawh a ang alawm. A landan leh a nu'n a fak ţhin dan chu inpersan tak a ni tawp. 

"Ar kha khawiah nge vulh i tum? Kawmthlang lawkah in a awm bawk sia, hmun a va vang awm ve" tiin ka be mawi ve a, in neitute an nia, biak ţhat loh a nuam tlat lo a ni. 

"Ka hre lo" tih pahin dar a kan uk a, "Ka putean insual atan a tlak tawh loh a tia min hawn tir a nih hi. Nangchu i fel khawp alawm i u kha chuan min ham a" a ti a, an fa u ber leh mipa awmchhun chu a ni ve sia. 

"Ka u a lo haw maw?" ka ti he haw a, ka bag chu hai rawk rawkin phone ka phawrh chhuak nghal bawk. 

"Haw ang chu le..i nu ka pui ve a nih kha. Thil dang chu anmahni zawt rawh. Nih leh aw inhnuai nu" thawven hmel zet a a tih hnuah nui sukin kut a vai zauh a, ka lo bu nghat ringawt a, inchungte nupa hi an la upa lova,  hna ţha tak an thawk ve ve bawk. An fate pawh an la upa lutuk thei lo vang. 

Ka nu missed call a lo awm ţeuh mai. Phone ka en khat lutuk hi ka nu'n min hau fo. Hnathawhna hmunah phei chuan ka silent a, bag ah ka khung bo daih zel. Ka pa aiin in a rawn thleng hmasa a, a lawmawm letling zawk. Thu pangngai sawina hun kan nei ve tihna a ni mai. 

"Afeli a lo haw em ni? In buai deuh em ni a?" ka tih chuan ţhutthleng seiah zawi muangin a ţhu a, a thaw deuh halh bawk a, a mitmeng te chu ka hmu chuai raih mai. 

"Haw e..inchungnu min rawn angin home a dah luh mai ţhain ka hria a, i pa'n heti khawp hian min ti buai a, an pahnih chuan ka phur zo lo a ni ber. Afeli ah hian beiseina ka nei sang zawk a, tin, i pa ang lo takin kan dah luih theih ka ring bawk a, mahse a ni lo. Home ka sawi ri chiah kha tlanchhuah lehnghal a tum a, keiin a banah ka pawt bet tlat bawk a. Kan inhau hrep a, bualin a a luh tauh hlanin inchungte ka pun ta mai a nih kha. Inchungnu chawlh lai a ni hlauh  a, a fapa nen an lo chhuk a. Awii..i u han nasat zia chu, Zualtea samah a kek a, a hmai a ham tawn tawn bawk a, a tlanchhuak lui ta tho a. Afeli pawh a buluk tial tial a ni ber, i pa nen hian tulumin a luhchilh ni berin ka hria" a ti hlak hlak a, a thin a la rim hle ni ngei tur a ni a aw a vin emai.

"Hlawh ka la a" ka ti ta zawk a, ka pa pawh pawisa a la nei a, nilengin a bo vang vang a nih hmel. 

"I va la hma ve..eng nge a awmzia ni a?" pawisa ka phawrh lai chuan a lo ti chul a, a ngaih a ţhat loh hmel nasa. 

"Ka bang duh sia, ka dil a nih kha. Kan mamawhna hriain kan piin thla khat hlawh lai min pe a" ka ti a, pawisa chu a vaiin ka nu ka hlan a, a mengphar nasain thil thleng chu a hrethiam lo tih a lang reng.

"Engati nge ban i duh a? Fel lo a awm em ni?" a ti a, pawisa chu a hum a, keimah ngawt min en thung. 

"Awm love..a hahthlak em a, hlawh a ţha chuang si lo. Inhlawhna dang ka zawng ang chu ka tia" ka ti a, ka nu dawt hrilh hi nuam ka ti chiah lo. Mahse, thudik hrilh ila chu tun ai hian a hmel hmuh a hrehawm zawk ang. 

"I tih dan dan le. Dawr nghah tur te a awm mai lo maw? Thingpui dawr a thawh hi chu i sawi ang khan a hahthlak a, dawr nghah tur zawng ve chhin la" tiin min sawi hmuh a, ka tum sa ran mah nise phûr awm tak hian "A ţha phian ang. Naktuk aţangin ka zawng nghal dawn nia. Nangpawh thawk nasa lutuk suh aw, i bawk sawp palh ang. I tello chuan ka awm thei dawn lo a nia" ka ti a, a nuih lah chu a za viau mai lehnghal a. Diktak chuan chhel inti ve viau mah ila ka kum naupanna leh unaua naupang zawk ka nihna hi a langchhuak ve fo mai. 

"I awm thei tawh ang..i puitling tawh alawm" fiamthu a a tih te chuan melh rum luih vak pah hian "Engtin nge keimahin buaina leh harsatna, chhungkaw innghirnghona te hi ka phurh zawh ang?" ka ti a, ka kianga awm reng tura intiam pahin a nui hak hak reng a, a bula awm a hahdamthlak phian alawm. Pawisa pawh ka nutei te ta a lo hawh rih a ni awm e, in luahman kan chhung tawh a, thawk khat chu a veng alawm.

Ka inbual fai zawh hnuah pindanah ka lut a, ka tih ziah danin diary bawk ka phawrh leh a, ka nunkawng bumboh lutuk avang hian ziah tur ka haihchham ngai lo tih theih a ni. 

Dear Diary,

A chang chuan kan hmuh tur a ruat ni miah lo thil hmuh kan nei ţhin a, a chang chuan thil hi a landan ang ngawt a ni lo ţhin bawk. A chang chuan 'ka ta' ti a koh tur neih kan duh ve ţhin a, mahni chauha khawhar taka kan awm lai ngat phei chuan a der ni hauh lova thlamuantu kan mamawh ţhin. Kan thunun zawh loh thil kan chunga a lo thlenin midangin min hriatthiam duh hauh loh chang an nei ţhin a, min ţanpui tura kan ngaih ten min ngaihsak duh loh ngat phei chuan nunkhua hi a harsa lehzual ţhin a, thlei bik nei angin kan ngaih phah fo. Kan duhthlannain awmzia a neih loh hnu; kan duhthusam ve te a thih ţhen zel chang phei chuan damkhawchhuak tur chauh pawh a beih hram hram tumin kan inpeih at tawh ţhin. A chang chuan kan tana mi pawimawh tak ten kan mittui an hmuh loh nan hlau chung chunga ruah do a ţul ţhin a, huh zawr hnâp khawpin ruah sur chu do mah ila kan natna a tleng fai ngai lo thung. Mahse, hrehawm leh buaina, natna te tawk lo ta ila thil ţha leh ţha lo kan thliar hrang thiam awm si lo. Chutiang bawkin ţhianţha leh ţha lo te pawh. Thil harsa ber hi kan tana thil ţha ber tur a nih chang a awm avangin kan mi hmangaih ngawih ngawih te leh kan ţhianţha te lak aţanga kan inlak hran a ţul chang a awm ţhin. A chang chuan natna pumpelh kan tum a, mahse kan chan tura ruat lawk sa natna te chuan min rawn zawng hmu zel tho a. Heng ho hi mihringte nuna bet tlat a ni. Midangte hriat loha kan mimal darthlalang ţheuh a kan inen chang hian a dik zia a chiang lehzual ţhin. A pawimawh ber chu natna hian tute pawh angkhatah min siam tih hi a ni. Mi hausa leh thiltithei, mi chak ber ber te pawhin lungngaihna an tawh meuh chuan mi rethei te ang bawkin hnem tu an mamawh ţhin. 

Diary ka nawr sawn a, ka mu zangthal nghal thak bawk a, mit ka chhin rualin palian-a hmel ka mitthlaah a lang ringawt nia! Vawiin khan chawhma lamah zawng ru reng mah ila chawhnu lamah kha chuan ka hmuh ka ring tawh hauh lo kha a ni a, rin loh deuhin ka hmu hlawl a, ka hmuh tur a ni ngei em ka chiang bik lo. Min chhanchhuak ngei a, chuti chung chuan ka hmuh leh ngaih anga mi ţha a ni lo maithei bawk. 

'I lo leng dawn em? Zanin chu lokal la, hna aţangin min ban a' ka bialpa, Mapuia chuan ka message chu a en nghal a, chhanna ka dawng lo thung. A chang chuan min ning tawh emaw ka ti ţhin a, inţhen ka han sawi a, rang lutukin a rawn lang leh ţhin tho bawk si, Mapuia rilru hi ka hmu tlang vek chak ţhin khawp mai. A thinlungah hian hmun ka chang ve hauh loah ka ngai hmak tawh. Engtik niah emaw chuan hawi kir lo turin ka la ţhen em em ang. 

Zanriah eikham hun âwmah inchung nu a lo leng thla a, mak tak maiin ka nu hi a ngaina a, a lo leng fo. Hna a ka ban thu ka nu'n a lo sawi chuan "Hnathawh i peih tawh nange?" min ti a, lu ka thing rang lutuk ringawt. 

"A dang ka zawng ang ka lo ti mek a, ka thawhna ang hi chu a hahthlak mah mah a, tlema hahdam deuhah thawk ila inah ka nu ka awl thei bawk ang a" ka tih chuan "Thawhna tur ka hria alawm. Group ah an lo post a, thawk tu an la la lo maithei. An phone number ka pe dawn che mi?" a ti a, beisei loh lutuk a hna ruak kan hre nghal mai chu ka nu nen kan inmelh a, kan chhungril a hlimna leh lawmna inmung tup tup chu kan hrilhfiah thiam kher lovang. 

"Min lo pe la" ka tih rualin phone a phawrh a, min pe ve mai a, a awmlai la la in ka be nghal a, thawk tu tur an la la lo hlauh. 

"Ka va thawk duh ve aw" ka tih chuan "Naktukah lokal la, kan dawr te pawh i rawn hmu ve phawt ang chu" a ti a, min lo chhawn tu chu ka hmeichhiatpui a nih avangin thla lah chu a muang nghal em em ringawt a. 

"Aw le, tehreng mai, ka lokal ang" ka ti sawk sawk a, ka phur zia chu ka awah pawh a lang chhuak ngei ang. An dawr awmna min han hrilh phei chu kan veng aţangin a lo hnai em em a, taxi pawh hmang ila cheng 20 lekin kan thleng thei.

"Pathian ţhat zia hi chu aw" ka nu'n a tih laiin "Ka vannei tak tak a ni" ka lo ti ve thung. Mi rethei ten an beisei Pathian hi khawiah nge maw a awm le?

Ka pa lo haw chu kawngka a a rawn pen luh aţangin a tum nghal a, a ang leh dawn tih hre ranin pindanah ka luh san daih a, earphone vuahin ring deuhin hla ka ngaithla a, Dolly Parton hla Wildflowers tih ngei mai kha ka ngaihthlak tawh chuan suangtuahna ramah ka cheng veng veng zel. Ka nun nen ka tehkhin fo a, inhmeh ka inti ţhin. Amah hi ka ngaisang ve hrim hrim bawk a, ka ngaihthlak nasat ber pawl a ni. A hla thu te hian awmzia an nei thuk bik riauin ka hre ţhin. 

Zingah hma takah chuan eirawng ka bawl a, ka phur bawk aniang ka zai ve rât rât reng mai. Dar11 velah chhuakin hna ka dilna dawr ngei maiah chuan ka kal a, thil an zuar chikimin eitur leh makeup, bakilh thlengin a awm. Thawk tu a chhawr sa te chuan min lo en hrek hrek hlawm a, keichu counter hmaah ţhuin dawr neitu ni awm tak nen kan inhmachhawn ran a, pasal a la nei lo a nih chuan nula senior ve tak chu a ni ngei ang. Ka hlawh tur zat min hrilh chuan tlem viau mah se ka lo pawm hmak a, a mamawh tawh a niang a dawra ka thawh ve a lo remti nghal hmak bawk.

"Duh leh karleh aţangin lokal la" a tih phei chuan aw ka lo pawh vat a, ka hnar phal teuh lo mai. 

Dawrah chuan ka thawk ve ta mawp mawp a, min biak loh chuan tumah ka be ngai lo a, min nel vak hlawm lo. Afeli karkhat lai a lo haw tawh lova, chu chuan rilru a luahin hahdam tak pawn min awm tir thei lo. Ka thawhna dawr neitunu lah chu a ţawngtlemin ţul tawpah lo chuan min be ngai lova, ka sawisel hran lo, keipawh customer an awm loh chuan ka ngawi reng zel tho. 

Kawngka luh chiahah counter a awm a, chumi hnaihah chuan ka awm ve ngai lo, a hnunglam chhuar bulah ka ţhu pil daih zel a, bet deuha ţhut erawh a har ţhin. Makeup leh bakilh vel an rawn en ve reng a, ka lo enpui a, an hmuh zawh loh chuan an duhzawng kan remna bik ka hrilh zung zung ţhin.

Lotion lo thleng thar ho ka remţha mawlh mawlh a, tuna ka thawhna hi Aizawla dawr lian ber pawl a ni maithei a ni. Bazar lun zual deuh laiah phei chuan awm se tun ai hian kan buai zual ngei ang. Rilru kawm mawlh mawlh chunga lotion ka remfel zo chu zikmar pahin kan dawr neitu, U Mart-i ţhutna lam ka en kher a, amah phei chu ka hmu thei lo; mipa pakhat ruangam nalh zet mai hian a din hliah daih a, a palianin a sang kher mai. A hmel hmu lo mah ila a ruangam ringawt pawh chu hmuhnawm tham a ni.

"Keini'n kan neih nalh lohin tu nge nei nalh bik chuang ang?" U Mart-i chuan a ti lang lang a, Marintei a ni a, ka thawhpuite koh dan angin ka ko ve mai ţhin. 

"Saw lamah sawn a awm ang. Remruati a awm kha. Remruat, hei bakilh kha lo kawhhmuh rawh" ring lutuk tak maia U Mart-in a tih hnua a rawn inher chiah chu ka phu nasa teuh kher mai. Palian-a bawk kha tuna ka thawh naah a rawnkal leh tawh a nih chu. Min zui ru emaw tih mai tur a ni. 

Ka dinna lam panin a rawn pen phei pawk pawk a, a incheina smart zet mai chu a inhmehin en char char a chakawm rum rum mai. 

"Heng ho hi a nia, enkual rawh" ka bul a rawn thlen ruala ka tih chuan bakilh ho chu a melh nghal chat a, min hria angin a la awm chuang lo. Min hre lo tak tak nge min zui ru reng siin min hre lo angin a awm zawk ni ang le?

A kutphah hlau hlup maiah bakilh pathum vel hi a dah tlar a, pangpar leh bowtie inchar bet te a ni a, a duh naupangchhia ve khawp mai. 

A kutţang fai sar mai chuan a dahchhuah ho chu a khawih kual dan dan a, thlan ngaihna a hre lo ni awm tak a ni. A man zat kan bel vek avangin zawh hranpa ka ngai tawh lova, a bakilh lei tur a thlan kual lai chuan keimah zawkin "Tu ta tur nge?" ka lo ti a, "Ka fanu" tih bakin min chhang lo. Fanu a lo nei reng a nih chu(h), tlangval senior emaw tih nak laiin!

"Eng nge nalh ber?" a ti ve ngei a, a uang emaw ti a ka lo nui hak chu thutak zetin min en a, mipa hi chu an va han tlaw tak. A fanu bakilh tur pawh a thlang thiam lo chu a nia. 

"Hmeichhe naupang a nih chuan pangpar awm kha a duh ber ang. I hausak hmel tho a, lei vek mai rawh" ka tih chuan a nuih a za ve viau mai. 

"Ka hausa lo maithei" a ti a, a nuihza insum tuma a hmui hnuai a pet zauh te chu keichuan hmuhnawm ka lo ti. 

"Mi hausa apiang an inren a nih hi maw. Pakhat chiah i lei dawn chuan pangpar inbel kha lei rawh" ka ti tak nain beram lem leh dawnfawh lem telna chu a la tel a, "Heng ho hi" a tih hnuah a vai chuan a hum bo a, a fanu chuan a vanneihzia a inhria angem le?

Min hnungchhawn zet tawh hnuah "Ka pu" ka ti a, amah bak mipa an awm lo tih hriain a rawn inher vut a, hriatthiam loh hmel zeta amah leh amah a inkawh chuan ka lo bu nghat a. 

"Ka thawhna hmasaah khan ka hmu ziah che a, detective i ni em? Nang hian min zui ru em ni a?" ka ti a, a tirah chuan mak ti hmel a pu a, insiamţha leh vatin ka zawhna chhan ngaihna a hre lo lutuk chu a nui chhuak hawk a. 

"Ngah nge maw ka zui ruk ngawt ang che le? Chuan detective ka ni love" a ti deuh nghut a, a aw ri a nelawm viau loh na chu huatna a telloin ka hria. 

"Min la hria em?" ka tih chuan lu min thin khum nghutin "Hre lo" a ti hmuk a, awih lo viau mah ila "A nih chu" ka ti zuai raih a, a mi chhanchhuah tawh te chu hriat reng tur a sin mawle. 

"Ka hria che em?" ti a min zawt letin mit a ti zim sun a, uluk deuha min thlek chuan ka lai ringawt nia!

"Min hriat leh hriat loh min zawh a ngaih chuan min hre lo tihna a ni mai alawm" ka ti a, kan piin min ban ni pawn ka en reng tawh a nih kha. Min hre lo der mai mai a nih ka la ring fan. 

A bakilh lei chu min hmuh reng chungin muangchangin a inher a, keia pawh chu ngah nge maw min hriat leh hriat lohah ka lo buai ve chiam mai le? Khatiang thil a thlen hnu pawh a min hriat duh chuan loh laiin kei chuan ka mitthla ah te ka hmu a, mipa leh hmeichhia hi chu kan danglam takzet a ni. Chumai bakah nupui fanau a nei tawh. Ka hmuh tawh loh hram ka beisei tlat bawk. 

CONT