DEAR DIARY-20

DEAR DIARY-20

Ka thawhna dawr chu tlanpelin a chhak deuhah a ding a, be lova chhuk mai ka tum chu "Tlaiah min lo nghak mai rawh" amah zawkin a tih takah chuan "Aw le" ka ti ve sap a, ka chhuak zui nghal a. 

"I va ngui ber bur ve, ka ruala i kal loh vang em ni a?" fiamthu a Rohluan a lo tih chuan "A ni maithei a ni" tih pahin za lo deuhin ka ţhen sak a, ka ţhutna lam ka pan pah bawk. 

Chhunah chuan a ngai te bawkin ka tiffin pai ka ei a, ka ei zawh hnu a tiffin ka dahţhat lai taka Kimkimi rawn lang hlawl chuan kei chauh ni lo, Rohlua thlengin a ti hamhaih khawp mai. 

"Sawi dun tur kan neiin ka hria" dawhkanah bag a rawn nghat chawrh a, ka hmaah a ding ran bawk. School ah a thawk te kha an ti ve sia, an zalen viau a nih hmel. Hna a kal daih ang chu kan tih ve pawhin a lo lang leh thut ţhin.

"Aw..sawi rawh" ka lo ti mai a, pangngai deuh a awm ka tum ve tlat. 

"Kan pahnihin" a tih leh takah chuan Rohlua ka melh zawk a, a lo buk nghat takah chuan "Midang hriat ve i duh si lo a, khawi hmunah nge kan kal ang a" ka ti a, kan dawr chhak mai a thingpui dawr lah chu kan dawr ai mahin a rem lo emaw tih tur a nia, Kimkimi pawh chu hmun remchang ngaihtuah ve ni awm takin kawngpui lam chu a thlir a, ruahman lawkna nei miah lovin a lokal tih a hriat khawp mai.

"Doctor pindan tur a kan siam nek saw a awl alawm. A hnawk deuh nain ţhutthleng a awm a, a pawimawh viau chuan va phei rawh u. Thawm engmah a hriat theih loh. Ka ngaithla ru lo ang" Rohluan a tih takah chuan "Lo kal rawh" ka ti mawl tawp a, doctor pindan tura an siamah chuan kan inzui lut a, ţhutthleng sei chu a lo awm ngei a, ka hrukfai hnuah Kimkimi chu a ţhu tharh a, "Lo ţhu la" tih paha a ţhutna bul awl lai a ben thak takah chuan amah hlat deuhah ka ţhu a, a lam ka hawi chuan ka mitah min lo en ran mai. 

"Hmeichhe fing ve pangngai deuhah ka lo ngai ţhin che a, riltu ţha leh mifel tak angah ka ngai ţhin bawk che a, mi chhungkaw ti chhe zawnga i awm duh ka ring ngai lo" tiin bul a ţan a, an inţhenna a rei tawh a, tih sual nei a ka inhre lo chuan "In chhungkua ka ti buai hleinem. Ka ti chhe lo bawk a, in inţhen chhan chu thil dang daih ;  khawvelah in awm ve tih pawh ka hriat hma a inţhen in ni. In chhungkaw ţhiat darh tu em em ah chuan min puh lo teh" chiang fek fawk hian ka lo ti a, min melh ran reng si a zam a awl ve khawp mai. 

"Nang hi awm ve miah lo la chuan kan inhruai leh daih tawh maithei. Kan nupa inkarah i ding tlat a, kan paltlang thei ngang lo che a nih hi. Ka rawn pan tawp che hi ka nasat vang leh ka zahtheih loh vang a ni bik lo. Ka mangan lutuk vang a rawn hmu che ka ti zawk. Tlawm thlak chu ka ti ve tho, mahse kan chhungkaw boruak ţha lo leh inhmuh thiam lohna kan neih te hi siamţhat vek ka duh a, ka zak lo lui a nih hi. Nangmah chiahin min pui thei tih ka hria, min pui ang tiraw?" ti a min zawh chuan ka ngawi dak a, chhan let dan tur a vang khawp mai. 

"Mak i ti deuh maithei a, mahse Zonuna hian min ti na a, amah vang hian ka kehchhia a, ani ang hian mipa dangin min la ti na ngai lo. Na lo angin ka awm lui a, mi ngaihah chuan hmeichhe chak leh chhel tak, natnain a hneh ve theih loh ka nih laiin a rukin ka ţap ve fo mai" a tih chuan "A tihnat che chuan engati nge neih leh i la tum cheu a?" ka lo ti a, keichu ni ve ila chu ka hel zak zak ang mawle. 

"Sangsangi a awm tawh hi. Nuhrawn emaw pahrawn a hrawn ka remti dawn hauh lo. Fel viau mah se keinin kan hmangaih ang hian an hmangaih ve thei ngai lo vang. Nu hian a fa tan chuan engpawh a huam ţhin a, keipawh i rin aiin ka kal thui ngam ang. Nupa han intih taurau a, hmeichhia zawk kan tlan ve zawk ţhin hi chu thil mak a ni hran lo a, pasalte hrem nan a hmang kan tam mai. Kan tlan zawk avang hian kan inţhen hlen dawn tihna a ni lo bawk a, nang hi lo awm lo la chu kan inhruai leh daih tawh ang" a ti charh charh a, min demna awka chu ka hai lo a, nuam lo ka ti sawt  khawp mai. 

"Hetiang mi hi a ni ngai bik miah lo a, inhauh chang te chu nei ve bawk mah ila a bula ka awm miau avangin hmeichhe dangah a ţuan ngai lo. Kan inţhen hlim khan a khua a har tih hrereng mah ila hrem rih ka duh a, min ngaihsak tawk loh ţhin avangin ngaihzawng nei ang ten ka awm ka tih tawh kha. Haw leh vat turah min ngai a, mahse a rin ang ngawt a ni lo. A tello a ka awm theih zia hmuh tir ka tum luatah ka chesual palh a ni. Hmeichhe lepchiah deuh angin ka thang a, Zonuna ngei pawhin min hlat tial tial a, tun hun hi kan thlen phah a nih hi" chang fek fawk hian a ti a, a mittui tling deuh pam te chu hmu mah ila ka haider ve tlat a, engtin pawn min ti se ka haw tawh lo a, a dinhmun ka ngaihtuah chiang a, ka khawngaih tawh zawk. 

A kuta inhup pahin hnuai lam a bih a, a sam nung siau mai chuan a hmai chu a hliah nghal vek a, a insut hraih a, a chetdan chu ka en ngawt ngawt ringawt a, han thlem vak ngaihna ka hriat loh rualin lem a chang mai mai lo tih erawh ka chiang takzet a ni. 

A chhip a a sam tuai chhoh pahin a rawn dak chhuak a, ka lam hawiin a ţhut dan chu a siam rem a, "Zonunmawia hian a hmang ţangkai mai mai che a nih hi. Bum theihin awm duh mah ta che. In chhungkaw dinhmun chu kei aiin i hrechiang zawk daih ang a, nangmah hmangaih tak tak tu che zawng zawk rawh" a tih chuan tawitein ka lo nui a, a rukin ka na ve veng veng thung. 

"Kum naupangte kan nih lai aţanga inkawm tawh kan nia, hmeichhia a ngaihsak ngai lo a, a bialnu hmasaber ka nih bakah a nupui ka ni bawk a, enganga nasa pawhin bei sela a thinlung aţang hian engtikahmah min paihchhuak lo ang. A khua a har a, min koh leh a hreh ve tho bawk si, khawhar hnem atan leh min runluih nan a hmang ţangkai mai mai che a nih hi. Chhung leh khat hnai vai ho nen a chaw eikhawm kan ching a, kan inţhen hnuah pawh Sangsangi vangin ka la tel ve ziah tho a, upa zawk ten inhruai leh mai a ţhat thu an sawi fo a, Zonuna hian a hnial ngai lo. Kan la in hruai leh ang chu a ti mai zel a, kan chhungkaw zia hi mak i ti maithei a, kan inpawh a, kan inkawmngeih tlang a, kan inţhen hnua ka la tel ve zel te hi tuman min sawisel ngai lo. Kan inhriatthiam tlan mai bakah Zonuna nen ţhianţha tak kan nih ţhin avangin amah ang chiahin min ngaina ve niin ka hria" tiin kei aia a dinhmun a san zawk dan chu min hrilhfiah a, a thusawi hi ka awih vek a, mittui nen meuh chuan dawt min hrilh lo ang. Mahse, Zonuna hian min hman ţangkai mai mai ka ring lo, ka mizia leh dinhmun zawng zawng a hre vek a, a nupui hlui runluih nan mai mai chuan min hmang duh bik lovang. 

"Keimah min khawngaih lo a nih pawhin Sangsangi vang talin Zonuna hi kian san rawh" ngenngawl taka tih pahin ka kut a rawn vuan a, ka phu deuh uih nghe nghe a ni. 

"Nupui leh fanu a nei tawh a, tlangval angin a nung a nih pawhin tlangval angah lo ngai ve kher suh. Tunah rih chuan ka thusawi aiin i thusawi a awih zawk ngei ang a, bansan la, nangmah ringawt ngaihtuah lovin kan nufa a min ngaihtuah zawk turin lo hrilh rawh. A nih loh chuan i kawng ka dal zel ang a, eng hna mah i thawk rei thei tak tak ngai lovang" tiin min han vau leh rih a, a bianga mittui luang chu dim lem lo tak hian a tuai fai a, eng berin nge a lung ti chhia ka hre der lo. 

"Zonuna hian kei aia hrechiang tu a nei lo a, keipawh ka ni tho. Mipa dangin amah ang hian min hrechiang lo. Ka duh zawng leh duh loh zawng te, ka chawhmeh ei theih loh te thlengin a hre vek a, keipawhin hriat hmaih ka nei bik lo. A laka zep i la neih theih a, thup bo theih chin i nei a nih chuan a hrechiang tawk lo che tihna a ni mai. Hmasawn lem lovin tuna in awmdan ang hian in awm reng a, a nin hnuah keimah bawk min rawn pan leh mai ang. Rilru i pek tak tak hmain ţhen rawh, i ti fuh ber ang. Ka beidawng mai mai dawn lo tih hria la, ka fanu a fahrah loh nan chuan tih hreh ka nei lo ang" a ti mawlh mawlh a, a bag aţang chuan tissue phawrhin en pawh in en lem lovin a hmai chu a dep hlek hlek a, vawiin chu nidang aiin makeup a hmang tlem deuh a, mahse a inhmeh daih zawk. Ka lo chik lem loh avangin tunah ka hmu ve chauh a nih ber chu. 

"Ka lokal chhan pakhat bawk chu kan chhungte ve ve an ţawng chhuak leh tawh a, innei leh turin min duh a, Zonuna pa te lo haw veleh a inhruai leh mai hi an duh dan a ni. A nu nen rei deuh chhung kan inbia a, Sangsangi avang ringawt pawh hian inţhen hlen an phal lo. Kan kawng i dal em lo ang chu tiraw?" mei nei deuh hian a ti leh a, Zonuna hmel kha a dik lo ka ti reng a, hei vang hi a ni thei mai angem le?

"An kal hma khan a nu te chu ka hmu ngei alawm. Zonuna nen hian in inkawp mek a ni tih hi an lo la hre lo hrim hrim a, hria se chu an khak daih tawh ang. Ka chhuah dawn khan a nu hian motor awmna thleng min um zui a, kan nupa a kan buaina a hriat loh vanga pawi a tih zia min hrilh karah inţhen hlen hauh lo turin min chah tel lawm lawm a, chuvang chuan ka chhuahsan ni pawh khan ţhen hlen tumna rilru ka pu lo. Sawi tawh ang khan inthiarfihlim hmak la, keini lam chu kan inzawm khawm leh thei a ni mai" min en ran a, a mitah chuan mittui hmuh tur a awm tawh lo a, min hua ang pawhin a awm chuang lo. 

"Fa neih tawh chuan nupa inzawmna hi a nghet a, hmeichhe ţhenkhatin mi nupa pawh ţhen an tum ngawt zel te hi an â ka ti lutuk. Zonuna pawh a tawpah chuan kan hnenah a lo let leh dawn tho a, tawrh dan i thiam deuh theih nan hun ţha i neih lai hian ţhen daih rawh. Ka haw miah lo che a nia, ka thin a rim lo bawk a, nakina i nat ka hlauhpui zawk che" a ti leh daih a,a thusawi a inkawkalh nasa khawp mai. A changin min hua angin ţawngkam a nei a, ka haw lo che a ti leh bawk si, ka hma ngai ang deuhin a ţawng leh a, he nu hi a mumal hlawl lo a nih hi. 

"Ţha deuh a ka sawi lai hian zawm ang che aw. A nih loh chuan hrehawm i ti dawn a nia, nu hian a fa tan leh a chhungkaw venhim nan chuan pawisak an nei ngai lo a, an tih theih ang ang an ti vek zel. Keipawh nu ka nia, thui deuh kal ka huam a, ka thusawi i zawm loh a nih chuan engpawh tawkna khawngaihna ka nei tawh lo ang. I hrereng dawn nia" a ti nghat nghat a, ka awmdan a danglam em em tawh lo a, min ţhawn lutuk vang nge ka chhunglam na veng veng pawh kha a awm tawh lo. 

A haw dawn thlengin "Ka lo bia ang che" a la ti a, a phone number ka la block bik loh avangin "Aw le" ka lo ti ve mai a, Zonuna leh a fanu chu a hauh na ve khawp mai.

"In insual em lo maw?" Rohluan fiamthu a a lo tih chuan "Pathlawi ho hi eng nge i hmuh dan? An bialnu te aiin an nupui hlui te an thlang leh tho ţhin em?" tiin ka lo zawt let thek a, mak ti hmel a pu deuh a, ka ngaihchan reng takah chuan "Mihring kan inang lo a, ngaihdan hran nei vek kan nia, kan duh dan a inang lo bawk a, mipa ţhenkhat chuan an bialnu te nei lovin an nupui hlui te inrem puiin an nei leh a, ţhenkhatin an nupui hlui te aiin an ngaihzawng te an thlang zawk a, chutiang duah chu a ni mai. Chu chuan a ti tih vang ringawtin ngaihdan sawh ngheh nghal loh tur. A mihring a zirin a danglam ve ţhin a, anmahni hriat chian a fu ber ang" a ti a, a thutak ve reuh hle bawk. 

"Kimkimi hi chu a hmelţha ngawt mai" ka ti ta daih a, landan aţang ringawtin thlang dawn ta sela chuan mi tupawhin kei aiin an thlang zawk vek ang. 

"Nangpawh i hmelţha alawm. A nupui hlui landan leh i landan kha khaikhin lo la a dik a ni mai. In ţha ve ve a, in ţhat dan a in ang lo thung a" a ti a, a nui huih a, a at hmel lutuk chu keiin ka lo nuih lehchhawng a, boruak pawh a nuam leh ţan e. 

"Duhthlan tur chu nise nangmah hi ka thlang zawk ang che. Zonuna pawhin ka rilru ang chiah a pu ve" dawhkan ka hruk fai laia a lo tih chuan "Engtin nge i hriat?" ti a zawh pahin chawl meuhin a ţhutna lam chu ka thlek a, "Mipa chu kan inhmuh chiah hian inbe tam lo mah ila kan rilru put hmang kan inhriat tawn sak thei alawm" a ti a, a inrintawk loh zia a lang vek a, ka awih loh lutuk chuan puanchhia a vawm pah hian "Dawheh lutuk" ka ti a, kan nui dun ta hak hak a, Rintluangi nen tih tum dang nei lo phei ila chu a phal chen chen ka thawk duh ang mawle. 

"Eng nge min thlan zawk nachhan tur chu?" ka tih lai chuan puanchhia a rawn theh phei thut a, ka dawng hman lo teuh kher mai.

"Hmeichhe huaisar leh nasa deuh te, hmeichhe kawlhsen leh tu mitmei mah ven nachang hre lo te, ţha ber a in ngai ţhin te hi ka duh lo a, i nihna a nih ve hauh loh laiin Kimkimi kha chuan a nei vek a, a hmel chu a ţha alawm. Mahse, sawi tak ang khan ka duh thlang dawn ila chu ka thlang zawk ang che. Enkawl harsa khawpa hmeichhe huaisar chu ka duh lo" a ti ve mial a, kan inhrawn ve deuh hnu phei chuan kan inhre chiang sawtin a fel zia ka hre tial tial mai.

"I bana tattoo kha nalh ka ti" ka ti ta daih a, kan thupui thlak ka tum vang a nih piah lamah nalh ka ti tak tak bawk.

Ani pawh chuan a bana tattoo chu a en nghal vut a, Rohlua hi a hang hran lo a, a bana tattoo nalh zet mai a awm chu a vun nen pawh a inrem lutuk tlat a ni. 

"Aw...ka lawm e ti mai teh ang" a ti ban charh a, a nui zui vur vur bawk a, nuam a ti hle mai. 

"Mizo te hian tattoo hi kan la pawm chiah lo niin ka hria a, duh lo tu an la tam zawk mai bakah an sawisel peih a, chuti ni lo se chu tattoo hi ka nei ve daih tawh ang. Lerh leh khawloh vang a ni hran lo a, mihring chuan lawm zawng leh nalh tih zawng kan nei vek a, i hrethiam tho ang, ka nalh tih zawng tak a nia, taksa ah kan duh ang kan ziah tir a ni mai a, sual a nihna pawh ka hre lo. Mi tam zawkin min endan danglam nghal hmak dawn lo se chu ka taksa ah hian a awm ve daih tawh ang" ka ti duah a, a pawm hmel khawp mai. 

Tlaiah chuan a intiam angin min lo hruai ngei a, zing lam aiin a hmel hmuh pawh a nuam zawk daih a, "Vawiin lam te i chau em?" ti a min zawh ve mial chuan "Chau lo e" ka lo ti var a. 

"I nu leh pate an tluang zel em?" ti a ka zawh chuan "An tluang e..Sangsangi an ngaihtuah deuh na in ngaihtuah lo turin ka hrilh a" a ti a, ka lam rawn hawi kher lo mah se ka lo bu nghat nghat a. 

"Sangsangi tê pawh hian a pi te a ngaih vang aniang zan mut a harsat deuh a, zanin chu ka rawn len pui dawn em maw ni ka tia" min rawn deuh chunga a tih chuan phur deuh hian "Lo len pui rawh" ka lo ti vat a. A pa a na zual deuh bawk nen, a hmuh phak lohah an awm daih bawk si a, a rilru a hah lehzual ka hlauh avangin Kimkimi rawn kal kha ka zep rih a, nakinah a pa han zia awm deuh se, phai aţanga an lo haw leh hunah muangmarin ka la sawipui ang. Nu leh pa an inrawlh tawh phei chuan ngawihsan mai mai chi a ni lo. 

"Min zawh duh i nei em?" amah zawkin a rawn tih chuan ka phu hial thei nia mawle! A ţhutna lam ka hawi a, ka hmelah a lo langchhuak em maw ni ka tih rilruk laiin "I rilru a buai hmel tlat. Lo len i phal vak lo nge min hrilh duh i nei?" a ti a, za lo deuh a nuih luih pah hian "Nei hran lo..Sangsangi chuan ka nu a nel tawh a, i lo len pui chuan a lawm zawk ngawt ang chu. Lo len pui ngei ngei rawh" ka tih nawk nawk lai chuan a lo kiai deuh suk a, ka zak leh chem chem tawh. Ka awmdan danglam hlek hi a hrethei em em reng a, min chik viau a nih ka ring. 

"Zan a kan lo len dawn tho chuan ka lo lut lo mai ang. Kan inah i nu a la awm ngei ang a, a tlai lutuk palh ang" a tih chuan "I tih dan dan a ni mai. Tukin a i awmdan ang khan awm tawh suh aw" ka lo ti zauh a. 

"Engtin nge ka awm?" bangbo deuh a a tih chuan "I ngui bur a, a chau a nih hi ka tia biak pawh ka be ţha ngam hleinem che" ka ti ta nge nge a, nuihza insum zet a min melh pahin na lo tein ka mal chu a hmer a, "A zia lo hle mai" a ti fan ruih a, an chhungkaw boruak neih mek chu a la sawi duh chuang lo. 

"Zana i lo len dawn tho chuan ka chhuk tawh dawn?" rawn deuh ti tih a ka tih chuan lo kiai sukin a bu nghat a, "Rawng lo bawl duh suh i nu ka rawn hawn tir ang" a ti a, rilru nuam deuh chuan ka chhuk ve mai a. 

Chaw ka chhuang a, a hmin veleh ka inbual a, ka inbual zawh rualin ka nu a rawn thleng ve chiah a, a inkhai bawr khawp lehnghal. 

"I lo rui lehpek tawh a ni maw? Tunlai phei chu Matein inleng a nei zeuh zeuh a, insum ve ţhin ta che. Pa ber i lo ruih bur reng chuan i fanu hi an zah lo mai anga sin" dawhkana chawhmeh dah chhuah pah hian a ti hlak hlak a, "Ka rui lo..zu ka in lo bawk. Min puh chhiat dan ngawt ngaihtuah lo khan chaw ei siam rawh ka ril a ţam. Hna chhe te i neih hi i uan pui ve em em zel a" ka nu ngaihnep hmel fe hian a ti a, ka lo chek tlak a, pindanah ka luh san a. 

Dear Diary,

Vawiin a ka inleng nen kan inkawm dan aţang khan thil hriat chian deuh ka nei a, ka hrilh theih zawng che chu maw..

Engtik niah emaw chuan min ti na tu, kan thinlung ti kehchhe vek tu a la awm ngei dawn a, mi tlaktlai lo leh ţangkaina nei miah lo angin min inngaih tir ang a, engtik lai pawha tla chhe thei rengah min in ngaihtir bawk ang. Mahse, kan chauh tawpkhawk hnuah pawh kan tho leh thei ţhin a, hliam na tak tuar chung pawhin mi hmuhah chuan hlim deuh angin kan lang thei. Chutiang ti thei khawpa thiltihtheihna nasa chu tupawhin kan nei a ni. 

Tichuan, thil chhe tawh sa chu remkhawm leh tum mah ila ngai a awh leh thei dawn chuang lo a, a chhiat dan ang ang a kalsan a ţha ber. Kan natna aţanga talchhuak tur chuan ngaihdamna a pawimawh a, min ti na tu leh kan chunga thil thleng apiang kan palzam a, kan natna leh keimahni kan in ngaihdam theih chuan kan hma lawka hlimna awm chu awlsam tein kan ban pha tawh mai dawn a ni. 

"Mate, chaw ei ang u" ka nu'n a tih takah chuan diary ka khup thawk a, a kawm chu ka en vang vang a, min pe tu ngaihtuahin tawi tein ka nui a, "Aw...ka rawn siam ang. Min lo nghak lawk rawh" ka tih hnuah phone ka phawrh a, diary a ka thuziah chu ka type chhuak leh dap a, Zualtea ka thawn ve a, tuna a natna hi a thiam loh a ni lo a, amah inngaidam a, hmalam pan turin ka duh a ni. 

Chaw ei lai pawn ka nu leh pate chu an la inhau a, ngawi rengin ka ei a, chaw ei a tui duh lo khawp mai. 

"In luahman an san a, rui reng lo hian inhlawhna tur te zawng ve rawh. Matei nen a kan thawhchhuah ringawt kan rin chuan chaw kan nghei thuai ang" ka nu'n a tih chuan "Keini ang chak vak tawh loh te chu tu nge min chhawr duh ang a?" a ti bawk si a, engmah ni mang si lo hian a chapo ve a, ka ngei hlur mai a ni. 

"I thawh theih tawk i zawng ve mai dawn alawm. In neitute pawh hi an mak ve reng reng, an rawn san thut a, chhuak turin min duh vang a ni maithei. In luah tur lah hi a vang ţhin bawk si" a ti chuai raih a, Zualtea nen khan lo inhre fuh kher lo ila ţha tur. An fel theih tehreng nen Zualtea nen kan inkawp hnu khan an zia a dang vek a, min ngaina tawh hlawl lo a ni ber. 

Chaw eikham rualin ka pa a chhuak a, rei a thang lehpek lo ang. Tu inah mah a leng rei peih ngai lo. Len ai chuan inchhung a awm a, an char char a duh zawk. 

"Mate, ka inrawlhna tur chu a ni hauh lo a, mahse Zonuna hi i bansan thei angem? In kal thui lutuk hma hian bansan la a ţha lo maw?" a ti dam diai a, ka che chu ka tawp chat a, ka hmaa ka nu ding chu enin "Kimkimi nen in inhmu em ni?" tiin ka zawt a, min chhang kher lo mah se a hmel landanah chuan an inhmu tih ka hre nghal.

A ngawih vang vang hnuah "Vawiin chu ka chawl a a tia, a lo awm ve reng a, a fel lutuk" a ti a, ka nu chuan en pawh min en duh lo. 

"Eng nge a sawi?" ti a ka zawh leh chuan "Inhruai an tum leh hnai a nih hmel a, Kimkimi pawhin 'thil ka tisual ve hlauh a, mahse ka tihsual aţangin ka inzir a, ka pasal leh fanu bak hlimna dang ka neih loh zia ka hrechhuak a, ka thiam tawh ang' a ti ve hial a, Zonuna chhungte lam pawhin an hnial lem lo a ni awm e. Min hnial zel a nih leh ka thuin ka haw leh mai ang a ti bawk a, Zonuna pawh hian a hmangaih a, khawngaihna chin a nei dawn tih hrereng la, ko kher lo mah se Kimkimi a haw leh chuan a lo pawm leh mai ang. I inthiarfihlim vat loh chuan nakinah hrehawm i la ti dawn a, tun hi in lak hran hun tak a ni" a ti dap dap a, ka thaw ka hip let hraih a, ka tan pawh inlakhran a har ve tawh tho tih te hi an hre lo em maw ni? Kimkimi hi an ngaihven vek zawk ni berin ka hria. Rintluangi hnenah chauh lo chuan ka buaina pawh ka thlen ngam tawh lo. 

"Thei lo ta ila?" ka tih chuan "I thei em em ang. Nangchu i u aiin i puitling a, i chhel zawk daih bawk a, Kimkimin neih leh a tum miau chuan i tel ve na tur chi a ni tawh lo" dam deuhin a ti na a ka thin a rim takzet a ni. 

"Ka u kha a zuau reng reng lo. Mi tam tak aiin a tuar a chhel daih zawk a sin. Ka dawr kal tur min thlah ţum a kawn a lo awm ve hoin an endan te kha tun thlengin ka la theihnghilh hleinem. Kan hriat loh a ţah chang a ngah a, keimahni min hmangaih avangin hrehawm kan tih a hlau a, hlim hmel a pu hram hram zawk a nih kha" ka ti hlak hlak a, chutah hmunphiah chu ka la a, chhuat phiah fai pahin "Zonuna te chungchangah pawh Kimkimi ringawt in ngaihtuah a, keichuan ka awih vek hleinem. Ka khawngaih lutuk tho a, amah a ka inchan phei chuan hrehawm ka lo ti ve ţhin. Mahse, Zonuna te ang mipa puitling leh dam lutukin a ţhen a nih chuan tihsual lian tak a nei tihna a ni mai. Tuman in ngaichang ve lo a, Kimkimi lah hmun tinah kal kualin thiamthu a sawi a, ţawngthei zawk na na na chuan in rilru a hneh mai lawm" ka tih zawm zat a, khawngaih viau mah ila ka nu thlenga a lo veh thlem chu ka haw riau. Ani ai daihin Zonunmawia hi a khawngaihthlak zawk. 

"In in upat hleih lutuk reng reng a, kum10 chuangin in inthlau a nia, mi pawn mak an ti mai ang che" a tih chuan "Min duhsak ngai hlei lo ten min rel hian engahmah ka ngai lo" ka ti hmak a, bawlhhlawh ka phiah khawm sa chu rutin bawlhhlawh bawmah ka paih a, thleng ka sil leh hnuah pindanah ka lut ta daih a. 

"Ehe..Bawihte, i lo leng dawn mi?" ka nu'a a tih tak hlutah chuan pindan aţangin ka chhuak a, kawngkapui hi kan hawn deuh reng ţhin avangin pawn a an pafa ding chu chiang deuhin an hmuh theih a, "Lo lut ta che u" phur hmel taka ka nu'n a tih leh hnuah an rawn lut ve chauh a, Sangsangi chuan min en duh lehpek khawp mai, a tih ziah dan a nia, nuam lo tihna ka nei vak tawh lo. 

"Nula rim naah pawh fate hruai zel an ngai a ni maw?" U Tluangtean a rawn ti lung lung a, bangbo zet a Zonuna ka en chuan "Kan inbia a" zawi te hian a lo ti a, a ţhianpa pawh chu lo lut ve nghalin a tlangnel khawp mai. 

"In aţanga an rawn chhuah fel hnuah engmah hre lawk sa lovin ka call a, thu khuh deuhin in veng lamah kan kal ang a tia, in in bak a ni dawn lo chiang a" tih pahin uang zetin min melh ralh a, ka lo nui duh lo ve tlat a. 

"Sangsangi ngai viau lo ila chu ka lokal ve lo ang. Ni thum lek ka hmu lo che a, i lo va lian leh tawh ve" a tih laia "Awihawm loh e" ka tih chuan Zonuna zawk a lo nui hawk a, U Tluangtean min melh rum viau thung. 

Ka nu pawh chuan Sangsangi ringawt a buaipui a, Zonuna chu a be miah lo thung a, thinrim hmel erawh a pu lo. A rilru a buai ve rih a nih ka ring. 

Thingpui te an inzawh chuan U Tluangtean min haw san a, Sangsangi lah chu ka nu mal lukhamin a muhil a, nula rim naa fate hruai chu a tih chi loh viau tak tak mai. 

"A riak thei mai ang a, i haw pui chuan a harh leh ting tang anga a khawngaihthlak emai" ka nu chuan ti ve bawk mahse a pa berin "A ti buai lutuk ang che u" a tih miau avangin a hnial lui ţalh bik lo. 

A fanu pawma a chhuak chu ka zui a, motor dahna kan thlen hma deuhin Sangsangi pawh chu a lo harh a, "In kan thlen veleh i muhil lehnghal dawn nia aw. Ka hruai leh che a nih chuan rei lo te chiah kan leng tawh ang. Ti khan a hrehawm em?" motor seat a a fanu ţhuttir paha a phun sup sup chu a rukin ka lo nuih a, a inthiam chiah lo a nih hmel. Tun aia nasa hian inthiam lo mah se a fanu chu a thlem thiam chuang lo ang. Hetiang kawngah kher hi chuan kan inang lutuk tlat. 

Kawngkhar a nem phui dawp hnuah a ngheng zui a, kan inhmachhawn ran mai. 

"Pasal neih i duh tawh em?" ti a min zawh chuan ka hamhaih kher mai. A thusawi chu ka hresual emaw ka ti hial a, "Engmaw i sawi?" ka ti ngat reng a ni. 

"Min nei duh em?" a ti leh a, thu a khuh lo ve thei mai bawk sia. 

"Chutiang ka la ngaihtuah ngai lo" ka tih chuan a hmui a pet sawi zauh a, a kal mai dawn maw ka tih laiin min rawn din hnaih a, ka tukhumah dawmin ka chal a fawp vang vang a, a thusawi kha chiang deuhin ka hria a, chu ti chung chuan a nupui nih ka duh leh duh loh min zawt nghal mai hi rin harsa ka ti. 

"Lo ngaihtuah tawh rawh" a tih lai chuan "Kimkimi vang a ni em?" ka lo ti khauh a. 

"Ni lem lo, keini ang rualah chuan nula rim fo mai hi a nuam chiah tawh lo a, Sangsangi a tel ve phei chuan i nu leh pate lakah pawh a inthlahrunawm a" a ti a, ka lo nuih laiin ani chu a thutak viau mai. 

"Kimkimi hi chu engtikahmah ka nei tawh lo ang ka tih ţhin kha. Nang hi ka duh che a, nupui a neih ngei che ka tum" a ti deuh khawl a, a lang tlang a, thu a khuh mawi ve vak ngai lo. A nihna ang tak hian a sawi tawp a, dawn sawn thiam a ngai viau ţhin. 

"Kan inhriatna chu rei ve tawh tho mah se kan la inkawp rei lo a, tun rum rumah chuan ka tan pawh thutlukna siam a harsa ve a" ka tih chuan "Ka hrethiam che alawm" a ti leh ang lawi a, "Tun tut tut a inneih nghal ka ti lo. Nupuia neih che ka tum ka ti zawk a nih kha. Ka duh dan chauh a kal ka tum lo a, ka rawn ve che a nih ber chu. Inţhen deuh sek, inkawp leh zel tho ang kha chu ka hman ve lo a nia aw" a tih chuan ka lo nui hak hak a, ani lah chu a thutak mai bawk sia. 

"Hmeichhia hian in hrat a, duhtu in neih ve hian ho te teah inţhen a, mipa in an han thlem cheu a, in rilru dam hnuah in inkawp leh a, khatiang khan a kual a kual zel a, mipa mah ni ila keichu ka hman ve lo" a ti mauh mai a, a nui duh mang bawk si lo a, ka nuih a za viau na a han nuih bik a ngamawm loh avangin ka insum hram hram zawk a ni. 

"Kal tawh rawh u..Sangsangi a khawngaihthlak" ka tih chuan min hnial bik lo a, "Ka thusawi kha vei run suh aw. Naupangchhe inngaihzawn an tih ang hi ka hman ve lo ka tihna ang a nih kha. I inpeih lo chung chu neih luih che ka tum lo a nia. Mahse min neih i duh chuan keichu ka inpeih reng" a ti a, a nuih a za ve tawh khawp mai. Keipawh ka nui ve ngam tawh a, an tlan ta chu ka hmuh theih chhung zawng ka thlir a, ka hmuh theih loh veleh inah ka haw a, ka nu hmuh tur a awm tawh lo. A mu daih tawh aniang, a ţha daih zawk. 

In an thlen hnuah reilote kan inbe leh a, Sangsangi pawh chhun lamah a infiam chau deuh aniang a mutthilh lehnghal thu a rawn sawi a, ka nawr lo ang che ti chung rengin pasal neih ka inpeih hun a amah hrilh vat turin min ti a, a sawi lang tello nain a nu leh paten Kimkimi hruai leh turin an ti a nih ka ring. Ni lo se chu inneih chungchang a sawi chhuak kher lo ang. 

Ka muhil thei lo chu tukverh ah ka dak a, thla êng mawi tak ka hmuh chuan ka u ka ngai thar riau a, a telloin kan nung ve mawp mawp chu a ni sia, ka hmuh phakah la awm se chu ka thil tawn mek te hi ka hrilh ve ang a, min lo lawmpui thiam leh dawn si, ka hlimna pawh a sang sawt ang ka ring. 

A boral hnua kan la khawih danglam mang loh a thawmhnaw bawm chu ka hawng a, thleh ţhat sak tumin a mal te tein ka phawrh chhuak a, bawm mawnga diary lo awm chuan ka mit a la ngang aniang ka keng kang a, ka thlek vang vang hnuah ka keu a, pen tui pawlin thil ho deuh deuh a inziak a, nui tet tet chungin ka keu zel a, 'Hmeichhe naupang kum 10 mi lek chuan a pa a laktlak loh em avangin pa ang tak takah a ngai ţhin a, mahse ani chuan fa angin a lo en ve mang si lo. Hmeichhia angin a en a, a it a, a tawpah phei chuan chu naupang chu a pawngsual ta nge nge a. Chhan tu a nei lo a, a thil tawn rapthlak tak chu tu hnenah mah a sawi ngam lo, a nep leh dawihzep vang a ni lo, ngaihsak tak tak tu a neih loh vang zawk a ni' ti a pen tui sena inziak chu ka chhiar a, ka chhiar nawn leh ţhin a, a mak a, awih a har bawk. Heta hmeichhe naupang a tih hi amah a nih ka ring hmiah a, engati nge kei tal min hrilh lo le?

Diary chu khung bo tawh loin ka malchungah ka dah a, thawmhnaw ka thleh fel zawh hnuah ka lehkhabu dahţhat ho zingah ka dah ve a, buaina hian min kiansan mawh khawp mai. Pakhat lek pawh ka chinfel hmain buaina dangin min tlakbuak lehnghal zel chu a nih hi. Hmeichhe chak tak kan tih ţhin te phenah hian an hneh tak harsatna tam tak a inphum ţhin reng a ni. 

CONT..