DEAR DIARY-21

DEAR DIARY-21

"Ţhu ngui bur suh..an inah te chuan i kal fo tawh alawm" Rohlua thawveng lutuk chu ka ngei lek lek a ni. Zonuna nu leh pate an lo haw tawh a, chaw eiah min sawm ve tlat a, amah mai ni lo a fanu pawh a hmang ţangkai khawp mai. 

"Chu chu ka buaina ber a ni lo. Buaina dang ka nei alawm. Ka ngaihtuah nasat poh leh ka thin a rim ţhin" ka tih veleh counter chu rawn bawhin min han thlek deuh a, "Eng thil nge?" tiin min zawt nghal zat mah se "I hriat ve chi loh" ka ti hmak a, diary kha chipchiar deuh a chhiar loin ka bih thuak thuak ringawt a, pawngsual chungchang ka chhiar hnu khan diktak chuan ka zam a, a chhunga thu inziak kha hriat belh chak viau mah ila ka ngam ngang lo a ni. Ka la inpeih lo a ni ber ang. Hun liam leh hret se, chipchiar deuhin ka chhiar chhuak ngam ve mai ang.

"I sawi duh loh chu ka zawt lui dawn bik lo che. Kan mimal nun hi kan sawi dun khat angreng a, mahse min han hrilh teh, Kimkim-in a la ti buai ţhin che em?" a ti ta daih a. 

"Ti buai lo ang vel a ni. Zonuna hi neih leh ngei a tum a, keichu min ngaihven hman lo a nih ka ring. Rohlu, mi nupa kar tibuai tu ka ni em? Zonuna chu dahţha ta ila, a chhungte hian hnawk min tih ruk i ring em?" ka tih mawlh mawlh lai chuan min lo en vang vang a, "Ka u zarah Zonuna chanchin hi ka hre tam ve a, a nupui hlui hi neih leh tum tlat se chu nang hi a umzui lo ang che. A bansan a, a tawp hmak tawh tihna a ni mai. Inthiam lo duh suh, nuthlawi/pathlawi ngaihzawn chuan buaina neuh neuh a tam duh an tih ţhin kha. Tawrhchhel a ngai a ni mai. I tana khuanu ruat a nih te phei chuan i pasal a la ni lo ang tih a sawi theih hleinem" tiin a eng zawngin min sawipui a, ka inngaihtuah nasat theih em avang hian ka hnual mai a hlau ţhin. 

"A lo hruai dawn che em?" ti a min zawh leh chuan ka bu zeuh a, a hahdam ve huai niin a lang. 

"A ţhat hlauh chu..nangmah chiaha i kal chuan i zam chhe leh vel emaw a nia nga, a bulah kal zel la, a hmuh phak lohah awm lo la, i tling tla ve thei mai ang" a tih chuan ka lo nui ringawt a, Kimkimi a tel ve a nih ngat chuan ka tan a nuam lo hle ang. 

Zonuna lokal hma a darthlalang a ka in en ve vel te chu Rohlua chuan min nuih ru tet tet tih ka hre reng a, a lam ka hawi apiangin pawimawh awm deuhin laptop a bih a, ka inen leh veleh min rawn enin a nui leh ţhin a, ka hnungah a ţhu a, darthlalang aţang chuan ka hmu thei tih a hre lo a ni ngei ang. 

"Ka nuihzathlak viau em ni?" a ţhutna lamah bawk inher lehin thinrim awm deuh hian ka melh a, phawk deuh tak hian min lo en let a, lem a chang chhunzawm zel te chu ka lawm ru viau nain ka nui duh lo lui ve tlat.

"Nuihzatthlak ve tho e, sana i en hnu lawkah banga darthlalang lian in ţar ţha hle hle lai a êng laiah i rawn pawm phei a nia" a ti a, ka hmu thei tih a hretawh aniang a nui huk huk a, ka awmdan engpawh hi a lawm em em reng mai a ni. 

"Nu Hmangaihi te meuh an lo haw te chuan an chhungkhat laina te pawh an lokal ve ang a, ka chul rup bik ang tih ka hlau alawm" ka tih takah chuan "Ka bialnuin lipstick min kawl tir a sin, i hnawih duh em?" a ti a, ka lo nuih var var lai chuan ipte a hai rak rak a. 

"Bialnu i nei lo emaw ka ti char char a" lipstick lak paha ka tih chuan "Zep ve deuh te a ngai ve ţhin alawm. Miin an hriat tam chuan buaina a tam mai mai ang. Min sawichhe duh tawk an awm reng bawk ang a, thlamuang deuh a ngaihzawng neih duh chuan a ruka neih a ngai" a tih chu ka pawm zawng tak a ni. Ngaihzawng chu nei mah ila mite chuan nei miah lo angah min ngai se la a nuam ber. 

Kan inkhar hnuah Zonuna nen an in lam kan pan a, motor pakhat nen an inpel chu "Khalh thiam min ti em?" a ti ngei a, "Naupangchhia ve sia aw" zawi te a ka tih hnuah "I khalh thiam alawm" a hriat ngei tur hian ka ti a, a lawm hmel khawp mai.

"Min duh zawt em?" ti a min zawh leh pah chuan a kiai suk a, keipawh ka nui ve tho. Kan ti ti zui ve nasa viau nain kan thusawi a ho in sawichhawn tlak a vang khawp mai. 

"I fimkhur bawk a, i motor khalh a chuan chu a nuam" ka ti leh hram a. 

"Mahni thawhchhuah liau liau a kan lei thil hi chu dim a lo awl a nih hi. Kan uluk lo phal meuh ţhin lo" a tih chu dik ka lo ti ve viau mai. Pawisa hi thawhchhuah a harsa a, kan khawl ngat ngat hnua kan duhzawng tak kan han lei hi chuan kan dim em em zel a, chak deuh a bike khalh ţhin hote pawh hi anmahni thawhchhuah ngei a bike lei an vang viau ta ve ang. An awm lo tawp chu ka ti lo a, an thawhchhuah ni lo, nu leh pa ten an leisak hi a tam zawk an ni ang. 

Tualzawlah naupang ho an lo infiam a, an au khek nasain an hun hman mek chu nuam an tih zia a lang nghal vek a, motor aţanga ka chhuk chu min lo enduh hlawm angreng a, ka zam viau laiin Sangsangi a rawn tlan phei a, ka kut a vawn pah hian "Api in nautelem min lo hawn a" a ti a, a phur khawp mai. 

Ka chhan hma hauhin Zonuna u Mami chuan, "Niminah an lo haw chauh a, ka pa pawh a la chau ang. Chaw eikhawm rawt nghal chuk chuk loh tur che u a nia, karkhat vel tal tuma chimbuai loh a awm tir a ţha a sin" a ti lang lang a, ţawngring ţhang tih takah a vin nge pangngai deuhin a sawi ve satliah tih pawh a hriat loh. 

"Kei ni lovin midang bulah va sawi rawh. Ka rawt chhuah a ni hleinem" tiin a u chu a lo chhang a, chutah keichu min rawn enin, "Nangmaha i luh ngam loh leh min lo nghak la, motor hi ka'n dahţha lawk ange" a ti a, a u Mami lah chuan min enduhin a mitmu a lian angreng si, ka hlau lek lek a ni. 

"Chhungte hi kan nei mawl leh lutuk a a buaithlak. Ka pa an hrem a ni ringawt. Chim buai a ngaithei dawn si lo, ti sawn pindan a a tawm char char a ngai ang a, ka nu lo chuan tuman an ngaihven leh tak tak lo ang" a la ti hlak hlak reng a, a lungawi hlawl lo niin a lang.

Gate chhunga Kimkimi a rawn inkhalh luh takah chuan ka ţang nghal ţeuh a, nu ta na na na chu a dan a dang aniang Sangsangi pawhin ka kut a thlah thuai a, "Anu" ti chul chungin Kimkimi lam chu a pan a, scooty a hun rem hnu chuan a fanu chen turin a ţhu hniam a, a sam a chul hliau hliau a, kei ve thung chu a mitmeng thip zet mai chuan min rawn melh a, a duhtawk a rei min en hnuah Sangsangi chu a kai lut ta daih a. U Mami dinna lamah ka phei ve a, Zonuna lah chu a rei hrep lehnghal. 

"Engtin nge a rawn kal ngam zawk le? Nizanah ka nau nen an inhau hrep sia, tlawmah a la ve lo em maw ni?" a ti a, a dan ngai rengin mi chanchin chhe lam a sawi pawhin a aw chu a ring viau tho mai. 

"A va pawi ve aw...inhau miah lo in awm thei se ţha tur a nia" ka tih chuan "A ngaithei lo che alawm. Sawi chhe pah reng chung che a ka nu a fuih ţhin hi ka nau chuan a haw ber a, an inhau leh ta nge nge a nih kha. Nizanah kan nufain hetah kan riak a" min melh ralh pahin tawi tein a nui a, Zonuna nen a kan inlaichinna hi a hre vek tawh a nih hmel. 

"Motor an lo dah nual tawh a, hmun awl a tlem a, ka rei ta deuh a nih kha" a rawn ti a, chahbi ah ţhat pahin ka bulah a lo ding a, naupang ho infiamna lam a hawi chiah chu chawp leh chilhin a hmel a danglam thei, Kimkimi scooty a hmu miau a ni. 

"Eng nge a rawn tih dawn?" a ti bul hmuk a, U Mami chu a en ran bawk a, ani lahin "Ka hre bik nang. Ka nute lo haw a rawn lawm ve dawn aniang chu. Lokal tur a ka sawm chhuah pawh ni hlei lo eng nge khatia min melh vak a?" a ti kha kha a, naute lakah chuan a zam bik vak lo kher mai. 

"Buaina thlen suh se, lo hrilh rawh" zawi te, chang zet si a a tih hnuah ka banrek a rawn hmer a, inchhungah min kai lut a, tu te mai pawh chuan min en duh em em vek a, ka thil tawn mek leh ka mizia a inrem loh vang nge, ka zak takzet a ni. 

Choka ah min luh tlang pui a, ka nu bula lo awm ve chu "Ka u nupui a nih hi. Zawmpuii" tiin min in hmelhriat tir a, ka hming a hrilh thlap hnuah ka nu chu a kawk zauh a, "Nu Hmingtei fanu" a ti leh sup a, Zawmpuii chu a nui sang reng a, a bula awm a nuam viau ang. Zonuna nu u fapa nupui a ni. 

"Nu Hmingtei chu fanu i nei hmelţha hle mai" a ti luam a, a naupan hmel zawk zawk tawh lo nain naupangchhe chei takin min chei bawl niin ka hria. 

"Lo pack sak la" Zawmpuii hnen a a tih chuan hrethiam takin a lo bu nghat a, "Nu Hmingte, in pa i ngaihtuah tlat sia, in pahnih a in eitur tal hawn rawh aw" a ti a, dispo container a phawrh nghal zat bawk.

"A ngai lo..tukin ah chawhmeh ka siam lawk a, heta ţanga ka hawn leh phei chuan a ţhing mai mai zawk ang" ti ve ngial mah se a suah sak lui tho a, keimah zawk tak pawh ka inthlahrung khawp mai. 

"Pi Hmangaihi te zin lai aţang tawhin Zonuna hian chawhmeh min hawn tir a ching a, an chaw ei hmain ka haw ziah si a, an kham lo ţhin maithei a ni. Suak hnem lutuk suh aw" a ti mawlh mawlh a, a inthlahrung lutuk chu khawngaihthlak zawk tak a ni.

"Chawhmeh insuah dawn rau rau chuan ei hma hian insuah ila a ţha, ei ban in suah ai ngawt chuan a  dawng tu tan a lawmawm bik" Zonuna chuan a lo ti ve khauh a, Zawmpuiin a suah zawh veleh "Nu Hmingte, i duh chuan i haw thei tawh aw" a lo ti leh a, ka nu'n a hnial pawhin "Che tur an tam alawm" a ti tlat a, ka nu bawk hi tlawm zawkah a ţang leh nge nge ţhin. Thlah a ngaih leh ngaih loh a zawh chuan a ngaih loh thu hrilhin choka aţangin hmanhmawh deuhin a chhuak a, "Pakhat i theihngilh" ti a au chul chungin Zawmpuiin a umzui a, ka nu in mi in a tifai lai te, rawng a bawl sak lai te hi ka hmu ve zeuh zeuh tawh a, hmuh a nuam zawk zawk lo khawp mai. Hei vang tak hian pawisa thawhchhuah ve thur thur a, ka nu hi hahdam deuh a siam ve ka chak a ni. 

"Hrehawm i ti em?" ti a min zawh chuan lu ka thing a, ka nu hnathawk lai ka hmu sia, ka rilru a hrehawm a hlau a nih ka ring. 

"In in a ka lokalin hrehawm ka ti ngai hleinem" tiin dawt ka hrilh a, chutah a hawi kual thuak a, tumah an awm ve lo tih a chian veleh ka hmuiah a rawn fawp zauh a, inla hrang leh vat mah se lai deuh a nuih pahin a din lohna lamah ka inher ta daih a. 

"Tunlai chu Kimkimi nen in inhau ngun riau mai. Ka hnenah a rawn vui ţhin sia, ka lo khawngaih ţhin. In inneih lai pawhin in inhau ngai mang lo a nia, inţhen hnuah in inhau reng thung a, eng nge a chhan ni a?" nutling pakhat hian a rawn ti lut a, a landan ah chuan ka nu nen an inrual vel hmel a, mahse anni chu an hahdamin taksa chei mawina tur te an nei ţha a, ka nu ai chuan a lo upa zawk daih maithei bawk. 

"Amah zawt rawh" tih chiahin a lo chhang a, eng emaw sawi tum ni awm taka a an zuau zuau lai chuan "Hei hi nu Hmingtei fanu Remruati a nih hi. Ani hi ka nutei aw" tiin Zonuna chuan a lo ţawng khalh a, ka nu hming a sawi tel zel chu mak ka tiin ka bangbo angreng hle a, kei ai mahin a nutei chu a bangbo zawk niin a lang. 

"Ngaihzawng i nei tihna em ni?" a ti deuh khawl a, "A nih hi" tih tawpin a chhang leh a, ka awm ve na chi a ni loin ka hria a, chuvang chuan chhuanlam siamin zunin lam ka pan ta daih a. He inah hian awm ve pawh ni ila lokal khat deuh ho chuan kei aiin Kimkimi an zawng hmasa zel ang. A naupanlai aţanga an hriat a nih avangin an zavaia thinlungah hmun a chang thuk tawh tlat a ni. 

"Mipa hi engati nge maw in puitlin loh em em ţhin le? Nupa chu a hlim reng theih loh, inhauh chang te, in hne riau chang te a awm lo thei lo. Mi chuan fate vangin hrehawm an tuar hram hram a, nang ni pawh hian tuar ve mai ta che u" zunin aţanga ka chhuah hnuah pawh a nutei chuan a lo la zilh mawlh mawlh a, ka thawm a hriat veleh a tawp hmak thung.

Sangsangi lo lutin "Khaw nge a u kha?" a tih veleh Zonuna te dinna lamah chuan ka phei a, sawi tur ka hre lo chuan ka nuih a, anin chocolate min pe thung a, "Api in pe rawh a ti" a ti a, min nuih var var reng chung hian choka aţang chuan a chhuak a, Kimkimi lo tel ve kher chuan awm a ti nuam lo takzet a ni. A chhungte ho lah hian an lo ngaina tawhin a sawi apiang an awih a tih theih a, a ruk a min sawisel vak phei chuan min hmu mak hlawm ngawt ang. 

Zawmpuii lo lut chuan "Inpui lamah phei leh daih rawh u, hetah chuan tih tur a awm tawh chuang hleinem" a ti nain "Ka pui ang che. Choka hi nuam ka ti zawk" ka ti tlat a. An nutei ve thung chuan "Hmingtei han tihah heta rawn inhlawh ţhin kha maw? A fanu maw i nih a?" a lo ti ve thung a, zawitein ka chhang a, ka rin ang ngeiin nuam ka ti lem lo khawp mai. 

"U Zawmpui, tih tur min hrilh ve la" ngenngawl tak a ka tih laiin ani chuan Zonuna leh a nutei te chu a en daih a, "Inpui lamah lo va phei rawh u. Kan ti zung zung ang a ei vat ang u. Naupang ho ril a ţam tawh ang" a ti zung zung a, a nutei chuan min melh leh hram a, a chhuak tur pawh a hreh hmel viau mai. 

"Ka pa ka va ngaihven lawk ang a ka rawn let leh ang" ka dar a hmer zawk a, chumi hnuah "Zawmpui, lo kalsan suh aw" ti lehin Zonuna chu a chhuak a, a nutein a zui bawk. 

"I thaw huai em?" ti a uang deuh a min zawh chuan ka bu nghat a, "Nuam ka ti vak lo..ka rin aiin an lo tam a, ka hriat ngai an awm si lo a, ka zak e" ka tih chuan a nui hak hak a, a nelawm reuh khawp mai. 

"Min puih i duh ţalh leh tomato leh purun kha lo chan rawh. A tam zawk chu i nu nen khan kan ti tawh a, chaw eiah kan sawm ngial na a i pa a eisan ngam ngang lo a nih kha" a ti siam siam a, tomato silfai sa leh purun chu ka hmaah a rawn chhawp a, tih tur a lo awm kher kher chu lawmawm tak a ni. 

"Zonuna hi a hmeichhe mi vak lo a, ngaihzawng ngaihsak lo, inzir puitlin tum tlat chi a nia, ka nu sawi hmangah an rethei ţhin lutuk a, shillong a a awm ve lai pawhin a ţul chin bak pawisa an thawn ve ngai vak lo a ni awm e. Kimkimi te erawh hi chu pi leh pute aţanga hausakna in rochun zel kan tih ţhin ang hi an nia, pawisa ah an buai lo. Kan pa min hrilh dan chuan Zonuna pawh hi puih an tum nasa ţhin a, engkim tum kep vek an inhuam viau a ni awm e,mahse a lo duh lo a, Kimkimi te chhungkaw laka bat neiah a inngai ang tih a hlau aniang" a ti malh malh a, purun ka lak rual a min din hlat chuan ka lo nui hak a, mit a ti thip ţhin hi a ninawm ve bawk em a ni. 

"Remruati chu rawngbawl turin a ni maw i lokal ve..thil dang daih emaw ka tia, kan tlem zawk zawk si lo a, i nu i khawngaih deuh em ni a?" Kimkimi chuan a rawn ti lut lang lang a, inpui lama awm ho pawhin an hre pha maithei.

"Tih tur a awm tawh hleinem. Midang hian ei hmasa se Remruat, keini chu a tawp lamah kan ei daih dawn nia aw" U Zawmpuii chuan a ti sawk sawk a, lo awm ve lo ta se chu hrehawm ka ti viau ang. An chhungkaw inhmuh khawmna a tel ve tawh lo turin ka intiam nghal hmak bawk. 

"Chhungkua a chaw eikhawm mai mai tur kan ni emaw ka tia, mi hrang an lo tel ve ka ring hauh hleinem" a ti leh a, purun lah chuan men a ti hrehawmin ka mittui a tla hial a, ka bula awm ve te pahnih chu an hmel pawh ka hmu chiang thei tawh lo. 

"Remruati te chu kan chhungkaw zinga mi ang tho a nia lawm. Zonunan a lo hruai a, lo helh lutuk duh suh" ti a U Zawmpuiin ka thlavang a lo hauh avang chuan Kimkimi chu a thinrim sawt ngei ang. 

"Hrilh lawk lo pawh ka ni hleinem" Kimkimin a tih laiin U Zawmpuii chu a faten an lo ko a, keipawh purun ka zai zo chu ka kut ka silfai a, ka mit pawh ka ti huh tel a, men a hrehawm rei vak lo. 

"Kan chhungte ho hian inhruai leh ţha an ti vek a ka tia ka hrilh tawh che kha. A theih hram chuan lo in lan tawh lo la, Sangsangi pawh i khawngaih lo em ni? Nu mamawh rual lek a nih hi. Zonuna nen a kan inhriat aţangin kum tam tak a liam tawh a, thinrim a inhauh kan nei ngai mang lo. I rawn lan hnu hian kan inhau ta fo a, min chawk buai hneh khawp mai. I duh leh nasa min ti la, pawi ka ti hauh lo. Hmeichhe pangngai chu ni la i inthiarfihlim daih tawh ang a, mahse hei i lo kal ngam zel tho sia, i zakzum bik vak lo a nih hmel" a ti vel a, a ţawngkam tin te chu a ngeiawmin thawh lawk a haw nal nal a chakawm rum rum mai. 

Nu Hmangaihi lo lut chuan chawhmeh bel a hawng lawr dan dan a, "Hmingtei hi chawhmeh siam a thiam tak tak a ni. Zonuna pa pawhin a ei ve chak viau ang a mah se la ei rih lo se ka duh a, a hranpa in ka siam sak ta mai a nih kha" a ti a, a sawi hmangah chuan an rawn haw hlim hlawt a chaw ei khawm an rawt chu a duh dan a ni vak bik lo a nih hmel. Zonuna nutei leh Kimkimi te remruat a ni awm e, "Dam deuh a in lo haw thei hi a lawmawm em alawm" Kimkimi chuan a lo ti a, tlak tlum a tum nasa hle mai. 

Nu Hmangaihi lah chuan kan boruak chu hrethiam lo in min chhuahsan leh mai a, Zawmpuii lo lut leh hlawl lo se chu hrehawm ka ti viau ang. 

"Zonuna chu a putea hruai turin a kal. A hrisel vak lo a, ke in thui a kal thei lo a, Sangsangi a kal ve bawk a" a ti a, ka thil chan sa chu ka lo pe a, chaw ei lo a haw daih mai a nia ka duh ni. Zonuna lahin a chhungte nen a kan in nel a duh a, min hruai ve zel hi Kimkimi neih a tum tawh loh zia a tarlanna pakhatah ka ngai. 

"A hmang ţangkai che ka tih fo kha. Ni lo se chu a kalna tur pawh a hrilh thlap zel ang che chu" ngeiawm deuh a nui chunga Kimkimi kal chhuak chu U Zawmpuii nen kan en zui a, "Engahmah ngai suh. Hmeichhe nasa tawh vek vek hi chuan zah an hre ve lo hrim hrim. Kan pa hian a sawi ţhin a, 'ka nu hian neih a remti lo a, chhungkaw ţhiat darh zawnga a khawsak a hlau a, mahse Zonuna nu leh paten an hnial mang si lo a' a tia, ngaina lo tu an tam mai. A nasat em avangin an ti lang ngam lo mai mai a nih hi. Hmelţha vak lo chu an rilru a chhe duh an tih kha. Sangsangi lah hi a nu lamah a kal a" a ti fiamthu a, a thusawi tawp lamah phei chuan a nui pah hak hak reng a, a nu nen an inang viau nain naupang tih takah Sangsangi hi chu a rilru a thianghlim khawp mai. 

"Keipawh kan pa nen hian kan inkawm hrep hnua innei kan nia, Zonuna te chanchin hi ka hre fo ţhin alawm. Ani lah a palianin a hmel a chhe lo a, hmeichhe lamah a tla na ve aniang Kimkimi nen an inngaizawng te kha 'engtin nge a duh zawk le' ti tawk an awm ve ţhin. Thlalak ka hmu tawh alawm, tunlaiah chuan in enkawlna a ţha tawh a, a tleirawl chhuah hlim phei chuan a chhe ve reuh lutuk" a ti a, a nui kur kur reng a, a bula awm a nuam khawp mai.

Hunserh te kan hman hnuah U Zawmpuii nen bawk chuan choka ah kan lut a, "I tel ve a ngai tawh hleinem. Zawmpui, nangpawh ţhu ve rih rawh. In lo hah lutuk ang e" tiin Zonuna chuan min zui ve zel a, "Kan hah hleinem, keini chu a tawpah kan ei dawn nia, nangpawh khan la ei rih lo la, kan pa nen in pahnihin min lo nghak rawh u" a lo ti a, naupang ho kan buaipui lai chuan chaw ei tuma lo lut Zonuna nutei chu "Ka nute, lokal lawk teh" tih pahin Kimkimin a kai hrang a, U Zawmpuii chuan min rawn melh ralh a, engmah phei chu a sawi lo. Haw thuai thuai ka chak takzet a ni. 

"Zonunmawi, lokal thuai teh. Kimkimi saw a thaw a hah deuhin ka hria, a reh hlen tawh dawn emaw tih laiin ngah nge maw a lo chhuah leh ţhin ni? Rilru kap tu a nei aniang" an nutei chuan a ti lang lang a, chiai lutuk a a au vel te chuan midang a ti phawk lek a, an meng tang hra hlawm mai. 

Zonuna pawh a tlanchhuak nghal a, zui chhuak pawl an awm laiin U Zawmpuii nen erawh midang kan buaipui zui a, "A thaw a hah ţhin a, ka hmuh ve hmasak ber phei chuan phungzawl emaw ka tia, mahse a lo ni lo a, a nasat ţum phei chuan a khawngaihthlak thei lutuk. Hei vang hian a nu leh paten an duat lehzual phah a, keichu mahni inkhawngaihna a nasat lutuk vang a nih duh hmel ka ti. Ka hmu ve fo tawh a, thawhah pangngai a ang lo reng reng" tiin min hrilh pah mawlh mawlh a, ka haw ang a, an chhungkaw thil tih khawmah vawikhatmah ka tel tawh lo ang ka ti hial a ni. Sangsangi piancham kan lawm ţum khan nuam lo tihna ka nei hran lo a, khatiang reng turah khan ka ngai a, mahse a inthlau khawp mai. 

"A va han hun lo ţhin tak aw. A dam vak loh chuan lokal loh mai tur alawm. Tikhan midang a ti phawk lek a, Zonuna bawk a buai leh a, in khawngaih ve em em lo em ni a?" U Mami'n vin zet a a tih chuan Nu Hmangaihin mitmeiin a lo khap vat a, min rawn melh pah kher sia, ka awm ve avanga ţawng fimkhur tur a hrilh te pawh a ang alawm le. 

"Ti sawn zawi zawiin a reh leh mai ang a, ngaihtuahawm a nih loh hunah tu emaw berin va thlah rawh u" a ti leh hram a, keimah zawk hi min thlah tu tur chu awm se ka haw daih ang. Tunah chuan thil ka hriatchian phah ta khawp mai. A nutei khan min lawm hlawl lo a, puitling awm ve dangte pawh min hmu lo der an tam zawk a, min be chak vak lo hlawm tih ka hria, Kimkimi hi a kal kual peih a, min lo hek nasa ţhin a ni maithei bawk. 

Chauh hmel takin Kimkimi pawhin kan rualin chaw a ei ve a, an nutei khan a ţhutpui a, an induat deuh apianga U Zawmpuii te nupa lo nui ţhin chu ka hmuh hmaih bik lo. Zonuna thung chuan ka ei tlem hlauin chawhmeh min suah sak a, a nupui hlui leh a nutei an awm ve reng chung pawhin min ngaihsakna a ti lang hreh chuang lo a, an mitmei a veng teh chiam lo. 

"Kimkim, thlah i ngaih chuan sawi mai rawh aw. Zonuna a hman awm si lo a, keiman ka thlah thei che a, midang pawh an hman nual ang" U Zawmpuii pasalin a tih laia a nutei ner deuh ka hmuh rual chuan hnuai lam ka bih vat a, vawikhatmah ka kal leh tawh ngai lo ang. Kan hlim tlang viau dawn maw ka tih laiin min en hrang tu an tam zawk a, Zonuna te chhung leh U Zawmpuii te nupa chauh lo chu min ngaina tu an awm lo. 

Motor chhungah ţhuin tukverh lam ngawt ka hawi a, kan la in be lo hrim hrim. Thil chi hrang hrang ka ngaihtuah kual a, an chhungkaw zinga tel ve chi niin ka inhre ta lo.

"Min ngaina dawn lo tih hrereng chungin engati nge min hruai ve a? Keichuan Sangsangi piancham kan lawm ni anga nuam kha a ni dawn emaw ka tia, U Zawmpuii te nupa awm lo phei se chu chaw ei hun pawh nghak lovin ka tlan haw daih ang" ka ti a, hrehawm ka tih zia a hrethiam pha kher lo ang. 

"Khatiang kha ka beisei bik lo" tih chiahin min chhang a, a lam ka hawi lai tak chuan min lo melh ve zawk a, hma lam a en leh thuai a. 

"I chhungte ho i hrechiang awm lo hle mai. Chhungkua a thil tih khawm in nei leh dawn a nih pawhin vawikhatmah min sawm ve tawh suh" ka tih lai chuan "Kan ţhahnem vak ka ring bik lo. Ka nute nen in inpawh tlan theih nan ka hruai che. Zawmpuii te chhung chiah an lokal dawn emaw ka ti ve tho a, ka hnathawhna hmun a ka awm laiin remruatna hran an lo nei a min hrilh ve lo aniang,nangmah ang bawkin mak ka ti ve" a lo ti a, Kimkimi pawh kha a beisei lawk hauh lo tih chu ka hria, mahse a chhungte ho chet phung hrim hrim khan awm a ti nuam lo a, min mawlh tu a awm tlat a, min hnawh ţup reng mai. 

"Ka nu leh pa ang vek turah ka lo ngai ţhin a, a pawi khawp mai" a tih pawh a ka chhan duh loh avang chuan "Ka thiam loh a nih kha" a ti leh a, kan in thlen hma deuhah a ding a, chhuk mai ka tum chu min pawt letin "Tihpalh ka tih kha a tawk lo em ni?" tiin ngenngawl deuh tak hian min en a, a thiam loh a ni lo tih hre tho mah ila ka lung a awi lo laklawh tlat tawh. 

"Mi tupawh hi kan chung en a, keini aia kan dah san zawk chuan an chet phung ngei viau mah ila an hmuh laiin kan lan tir ngam ngai lo. Keini aia hniam daih a kan ngaih te chu an hmuh lai ngei pawn kan ngainat loh zia kan ti lang ngam ţhin a, meinei deuh deuhin kan ţawng khum a, anmahni kha engahmah kan ngai lo. Chutiang chiah chu a ni mai ka chunga thleng chu, i chhungte ho khan min hnuai chhiah alawm. Kan inkawm nel ve anga ka tia nuam deuh a hun hman ka tum nen, chaw pawh ka ei hleithei lo chu a nih kha" ka ti tan tan a, ka thinrimna ka sawi chhuah tak chuan ka ipikna a la kiang zo chuang lo, ka sawi chhuah hma aiin ka thinrim zawk emaw tih tur a ni. Ka tawt lutuk chu a zia deuh beiseiin am zetin thawk ka la a, awmzia a nei thei der lo. Ka lungphu lah chu a rangin Zonuna ngei pawhin mak min tih hmel takzet a ni. 

"Êng awmna laia berkher i ding a, a thim chinah sawn tawlh rawh" ka tih lahin "Ka hmu thei nang che" a ti ve tlat a, ngun thluk zetin min en a, a nuih a za in ka hria. 

"Ka fiamthu miah lo a nia" bul zet a ka tih chuan "Ka hria" a lo ti leh mai a, ka malchunga ka kut dah chu a rawn vuan a, a ngawih tak rengah chuan keimah bawkin "Khatiang a nih chuan ka lokal tawh dawn lo. Ka zak tluan ţhak a, hrehawm ka ti bawk a" ka tih chuan thawk a la hawk a, ka kut ka chet rual chuan ka laksawn hlau ni awm tak hian a hum nghet sauh a, kalsan daih a har khawp mai. 

"Ka lo hau ang" a ti chiah chu a lam ka hawi nghal vat a, ani lahin tawitein min lo nuih a, "A ngai kher lo..i hauh chuan min ngaina lo zual sawt dawn a sin. Ka nu hnain a tuar bawk anga" ka tih chuan a pawm loh hmel khawp mai. 

"Ka hauh ve chuan vin lo mah ila an rilru a na bik zel a, mahse ka hau tho ang. Kan in a kan awmlai khan min hrilh vek la ţha tur a nia. Kimkimi khan sawi a nei em?" tiin min zawt let khauh a, "A la duh chein ka hria. I hnen a let leh a duh a, keichu Kimkimi tan bik phei chuan ka hnawk sak alawm" ka lo ti a, an khawsakin a zir bawk nen, a nutei te ho kha chuan kei aiin an duhsak vek ang. 

"Keiin ka lo pawm duh loh chuan tih theih an nei hlawm lo" khauh zet hian a ti a, kan ngawi dun leh vang vang a, kan awmna hmun a reh lutuk avang chuan ka lungphu ri te hi a hre pha hial maithei a ni. 

"Hau duh lo mai rawh..a pun lun zel ang a, ka nu thlengin a tuar ang" ka ti nawi niaih a, ka kun zawnga ka samin ka hmai a zar chuan a lo hui kiang vat a, keipawh chuan ka ţhutdan siam remin kan inhmachhawn ran a. 

"I nu hnain a tuar lo ang. Ka nu leh pate hi an sual hran lo a, midangin an thunun theih loh chu thuhran, sum um a mi hausa apiang be tlawn ţhin mi an ni lo. Khatiang lam kha chu lungkham duh suh" a ti dap dap a, diktak chuan ka zak a, tlawm ka inti bawk. 

"Hahdam rawh a thleng nawn tawh lo ang" ka bek a dawm pah hian a ti a, "Ka tihpalh aw" ngenngawl deuh a min en chung hian a tih zawm zat a, ngaihdam loh chi pawh a ni leh tawh lo. 

"Khawi hmunah pawh dinhmun vanga inthliarna hi a awm a, tih tawp theih a ni mang si lo. I chhungte ho pawh kha an demawm chuang hleinem. Kimkimi nei leh turin an duh che a ni mai a" ka tih chuan "A nih leh nangin nei leh turin min duh em?" tiin min lo zawt let khauh a, ka mit ah tak min en ran chungin min ngaichang a, a thutak em em mai lehnghal.

Ţawngka a ka chhan theih loh avang chuan lu ka thing ta ringawt a, chetzia a tih lan ringawt chu a duh lo aniang, "I duh nge duh lo?" a ti nawn leh ngat a. 

"Sangsangi hi chu ka khawngaih a, mahse ka bialpa i ni tawh a" ban charh a ka tih chuan zawitein a nui a, kan inawm hnaih bawk nen, ka zam chhe leh tawh khawp mai. 

"Tikhan duh tawk tawh teh ang. Midang pawh ka lo hau dawn nia, anni ho kha i hmu leh a nih pawhin an endan che a danglam tawh ang" inrintawk hmel zet hian a ti a, kei lahin ka lo ring leh thlap a, ka demawm hran lo. A mizia ka hrechiang a, mipa rintlak a nihzia nen lam ka hria. 

"Kimkimi chuan ngaihzawng a nei a, min runluih kha nuam a ti ţhin a, ka hmuh turah an inlan fo mai. Keiin ka neih ve veleh hrehawm a ti leh a, min hmangaih vang a ni hleinem" a tih chuan "A nih engvang nge ni a?" ka lo ti sap a. 

"Hmalam ka pan hi a ngaithei lo a, hmeichhe dang avanga ka hlim a phal lo bawk a, tuna ka awmdan hi hmuh nuam a ti lo. Chu zawng chu a ni mai" a ti a, an inţhen chhan tak hi hriat chian a har khawp mai. Kimkimi lah a insawithiam ropui mai sia.

"A rilru ti na tu zawk i niin ka hria a" ka tih chuan "Ni chiah lo. Aaa..a nihna chen a awm tho ang. A hunlai kha chuan kan na ve ve ang a, mahse hun a liam tam tawh alawm. Ngaihzawng a nei awl lo a, nakinah ani pawh a la hlim veleh mai ang" a ti a, amah hua ang zawng chuan ţawngkam a nei duh chuang lo. 

"A tlai tawh sia, nakinah kan sawi zawm leh dawn nia" tiin ka kut ka la sawn a, motor aţanga ka chhuk tur chu min lo dang tawh lo. 

"Ka lo bia ang che" a tih ve thlap hnuah kan invai liam a, a chhungte ho kha a kamkhat ngei dawn tih ka hria, U Mami lah mi langtlang, ri phawng phawng chi a nia, ka awm lai reng pawn a nau a khawngaih avangin a ang a, midang lokal ve ho zawk khan min huat lehzual phah ka hlau leh hnuhnawh a, thinrim laia ka sawichhuah ho kha ka la let thei tawh bawk si lo, a nih nih ni tawh mai teh se. 

CONT...