DEAR DIARY-22

DEAR DIARY-22

Pathianni chhuna ka inleng Rintluangi hnena kan chaw eikhawmna a thil thleng ka hrilh mawlh mawlh laiin ka phone chu a nghawt dat dat a, Kimkimi hming a lan chuan kan in en he haw a, "La duh suh" a tih takah chuan lukham hnuaiah ka nawr lut ta daih a. 

"Nimin piah daih a thil thleng tawh si min va hrilh har ve" vui awka taka a tih chuan "Phone ah hi chuan engmah ka sawifiah zo ve tak tak lo a, i lo len hun ka nghak alawm" ka lo ti ve tlat a, a vui zui bik lo. 

"A nutei te tih vel kha chu a ho lutuk, engahmah ngai suh. A nu leh pa an fel phawt chuan a tawk a ni mai. Midang ho zawng kha chu a seh hmehah ngai la, an telloin i awm thei" a tih chuan kan han nui leh rih a, a sawi thiam ve khawp mai. 

"Kimkimi an buaipui em em mai hi mak ka ti hauh lo. Sangsangi nu a nih bakah rei tak chhung an lo hriat tawh a nia. Kei lah an beisei loh deuhin ka lang hlawl a, Zonunan ka thlavang a hauh bawk nen, min huat chhan pawh a niin ka hria" ka ti a, uluk deuhin a lo ngaithla a, thil ţha lam sawi tur a nei vak bik lo thung. 

"Zonuna hi i hmaa a din zel chuan a ţha a ni mai. Bakah a nu leh pate chu an sual lo a ni lawm ni? I nu pawh nitin hnathawkin a kal a, vuina tur a hriat miah loh hi" a tih chuan "Sual lo e" ka lo ti var a. 

"Chu chu a tawk mai alawm. Kimkimi leh a nutei te ho tih mai mai ngaipawimawh vak duh suh. Zonuna a upa ve tawh a, a chenpuite ni lo lehnghal phei chuan an thunun thei dawn lo sa" a ti a, a thutak tluan dawn emaw ka tih laiin "Keichu mama's boy ka duh" a ti tel zauh a, nuih hak paha "Turkey ah kal rawh..i hmu ţeuh ang" ka tih chuan ner nang hian "Ka fiamthu a nih kha. Engatanmah ka ti lo, hmeichhe tan chuan Zonuna te ang hi an ţha. Chhungte thu awih leh lutuk pawh hi kei pasal atan ka duh hauh lo. A tawk chin hi a awm ve a, pasal te ber chhungte thu thu a an awm chuan kan chep lutuk ang. Chutiang te chu chik ţhin rawh aw" min ti a, khumah kan bawk dun a, min en hnai viau tawh mai.

"Chik ve bawk e..ka duh loh dan deuhin a awm ngai lo. Ka duh telh telh zawkin ka hria" ka tih chuan "Ehe..a lo hneh viau tawh che a ni maw?" ti a min fiam pahin min nek salh a, ka ţhiannu mah nise ka lai ve tho mai. 

"Ka duh ve em a sin...khawhar te ka hre ve ţan tawh a, enteh" tih hluai pahin a banah ka vuan a, hnai set sawt a en chung hian "A hmel leh a pian te, a landan zawng zawng hi ka mitah hian a in char bet aniang, hawina lam apiangah ka hmu tel zel" ka ti uang ve a, vanvadak meuh hian a nui a, ka nu'n "Thawm dim deuh rawh u" a tih hial phah a ni. 

"I sawi uar thiam hle mai. Taka dawr luah tur ka hmu ka tih kha eng nge i ngaihdan?" a ti hluai a, keipawh ka lo nui tawp ve hmak mai. A insawi angin kan pahnih a inluah ţawm tur dawr a lo zawng ve char char a, min sawi pui tura lo leng a ni pakhat. 

"Ka hre lo le..kan risk ve tawp mai dawn mi? Mahse i patea pawisa kan hman dawn chuan bungrua kan la tam vak thei lo ang a" ka ti halh a, engpawh ti dawn ila pawisa a ngai hmasa zel a, a buaithlak khawp mai. 

"Kan la thei ang..kan hmansak ţeuh ang a, a buai loh nan kan rul ţha thung ang a, mi hnuaia inhlawh reng ai chuan ti ve tawp ila a ţha zawk angem le ka tia, tun a dawr ruak ka hmuh pawh hi a lian lo nain a awmna hmunin a zir a, be tu an tam tawh lutuk. Mahse, a neitupa ber hi ka pa ţhianpa a nia, min ngaipawimawh ve a, lo inrawn rawh u an tia. Ka chhungte pawn in tih theih chuan a ţha alawm an tia" a tih chuan "An hre tawh maw?" ka lo ti ha a. 

"Hria ang chu mawle. Mi pawh an sumdawng a, an inchhir ngai hleinem. Hah deuh mah ula hah man in tel dawn a, bul in ţan hma leh in tan a ţha a ni mai an tia, ka rin ai daihin min phur pui a, sumdawn ka chak lehzual phah sawt a. Bul ţan ve tawp ila, dawr chhung mai bakah khawlaiah te kan pho chhuak ve ang a, kan kalna tur tak te pawh a lo ni maithei a sin" a ti siam siam a, ka lo pawm pui khawp mai.

"Ka nu hnenah hian chipchiar deuhin ka la sawi lo a, pawisa tam tham deuh puk kha a remti chiah lo maithei a, nangman ţha deuh a i hrilh loh phei chuan inhnamhnawih ve a phal kher lo maithei" ka lo tih chuan "Ka hrilh mai ang. A huphurhawm vak hleinem. Bakah mi hran daih pawisa kan puk dawn lo a, ka patea a nia" a ti mai a, mahse, kan puk tam viau chuan a patea pawh a buai ve dawn tho a, rulh leh vat vat a ngaih tur thu a sawi tel pah reng tho. 

"Naktuk tlaiah U Marti dawr kawtah inhmu ila, ka patea awm lai a nia, inhmu ve hrim hrim ula ka ti deuh a. I nu chu ka dil mai ang a" a tih chuan aw ka lo pawh ve vat a, hun remchang a awm khat a, pawisa tam tham ve tak phei chu tuman min puk tir phal dawn lo a, Rintluangi patean a lo phal hlauh chuan a tih chi dawn emai. 

Zana Zonunan min lo biak chuan "Naktuk tlaiah Rintluangi te inah ka leng dawn a" ka lo ti nghal vat a, ka phur deuhin a hria aniang "A ţha alawm. Leng ve zeuh zeuh rawh" a rawn ti a, mi chu an bialpa ten an khap a ngai hial ţhin a, kei erawh rual ka pawl lo lutuk hi Zonuna ngei pawh a mangang ve ţhin. 

"Zingah ka rualin i kal ang chu tiraw? Naktuk hi kal hma deuh ka ngai a" a rawn tih chuan sana a en pah leh kher maithei a ni. 

"Aw..i kal hma dawn tho chuan kan kal rual thei ang. Rohlua ka lo hrilh ang a, a nih loh chuan min lo nghak dawn a" ka tih laia Kimkimi aw ngeiin "Apa, khawiah nge Sangsangi kawr helai a ka dah kha?" a ti lang lang chu ka hria a, ka ngawi chiang kher mai. 

"Ka nu zawt rawh" ti a a hrilh hnuah keichu "Lo hrilh hma la, a lo ring palh ang che" tiin min hrilh zui zat a, ka chhang tawh lo. 

"I la awm em?" a tih chuan "Nang hi i rintlak leh rintlak loh pawh ka hre tawh lo e a. Ngaihţha deuh a awm tum veleh thil danglam ka hre chiah" ka ti deuh nek a, a nui ri te chu ka haw nghal hlur mai. 

"Sangsangi nu a nia, a lokal reng dawn" a tih te chuan hrehawm ka ti tlat a, ka awmdan hi ka sawithiam chiah lo, kei pawh hi ka dik bik lo ang. 

"A pawi hleinem..in huat zui tur tihna a ni chuang lo a" ka tih hnuah chil ka lem khalh a, "Hmaichhanah kan sawi dawn nia" a tih takah chuan kan inbiakna chu kan ti tawp a, han thinrim ve deuh dawn pawh hian amah ber a thinrim duh ngai si lo a, ka hah thlawn mai mai zel. 

Rohlua hnen a chanchin ka hrilh hnuah ka mu a, dar10 a ri dawn tawh a, a pasal hluite inah a la awm tihna a nia. Fa an neih tawh hi chu thuhran a nia, bansan a tum loh hmel khawp mai. 

Zualtea te inkawt ka thlen chhoh chuan in neitunu nen kan intawk a, tuk danga min biak ngai loh nen "Zualtea i be ngai em?" tiin min zawt ve mial a, lu ka thing ringawt a, ţawngka in ka chhang lem lo. 

"In luahman chu a neitute hi chuan kan san ve fo a, midang in pawh luah ula a ni tho ang. Keini hian kan san har zawk a, a to mah mah in ti a nih chuan ka hnenah sawi rawh u. Zualtea chu helamah a awm lova, a hnena zualko in awmzia a nei lo" a tih chuan ka bangbo khawp mai. 

"Ka be ngai hleinem" ti mah ila "Tlema tih hniam leh deuh dan kan ngaihtuah dawn nia" a ti mai a, "Hmun phiah lah hi an dah duh dah thei ţhin si, hman zawh chuan a hmuna dah leh ţhin tur a nia" a ti zui a, kawngkapui bula hmunphiah chu a la a, inchhunga a lut chu ka en reng ringawt.

Pang depa ka phone ah a nghawr dat takah chuan phone pawh phawrh lem loin Zonuna min lo nghah ţhinna lam pan tumin ka inher a, pen hnih vel lek ka pen hman ang tihah hnunglam aţang hian hmeichhe aw in "Remruat" a rawn ti a, ka hawi let rang khawp mai. 

"I hmanhmawh tawh em?" Zualtea nau Zothanin a tih chuan "Hmanhmawh lutuk lo mah se ka ţhianpain min nghak tawh a" ka lo ti ţha ve mai a. 

"Motor nei kha em ni? Pathlawi an tih kha a ni em?" ti a min zawh chuan nuih var var pahin ka bu nghat nghat a, mi hian thil an van hre rang ţhin tak.

"Ka nu nen a in inbia kha inchung lawk aţangin ka hmu cheu a, ka rawn chhuk nghal a, eng nge a sawi?" a tih leh chuan zep ţhen nei lem lo hian min tih dan chu ka hrilh a, ka insawithiam chuang lo bawk. 

"Keiman ka hrilh alawm" tih leh garage lama min pawh phei a rual a, henu te hi a dangdai tak tak a ni. A u nen kan nih tawh loh hnuah pawh a rual a min kal tir chang a nei a, min be siam siam reng a, a scooty ah pawh vawi thum vel lai ka chuang tawh. 

"Thil ka hrilh ang che mah se chhuak leh chi a ni tawh lo a nia" a ti a, hmeichhiain kan tih fo dan a nia, Zothani pawh a danglam bik lo. 

"Eng nge a?" ka tih chuan "Zualtea hi a mawl lutuk a, ka nu te chuan in luahman san an duh avangin in awmna khu tun aia nuam a siamţhat an duh a, siam zawh veleh lo lut leh ula, a man an san pawhin in tha a na dawn lo a, chu chu an sawi fo dan a ni. Mahse Zuala bawkin a phal lo a, in insawn chhuah a duh lo tlat a, ka nute thlengin a vau khur khur reng a" a ti duah a, anni chhungkua pawh an lo buai ru ve tho a nih hmel. 

"In luahman an san ta tho kha mak ka ti deuh a, ka nu te hek tuma sawi pawh ka ni lo. In hi siamţha loin luah man an san tho a, eng nge maw awmzia ni? ti a ka rawn ve kha rin aiin a lo thinrim a, 'inhnuai kaw tereuhte kha an phak loh khawpa sang in chhiar a, in nek chep viau chuan ka rawn haw ang a, lehkha ka zir tawh lo ang' a ti e an ti mai a, hetiang zawng hian ka nute a vau ve ziah a, in chhuah tir chuan chuti khati tih vel te a ni deuh reng a, kei lahin Zuala ka hrilh ka ti ngam tawh bawk si lo. Lo hau ve teh, inkawp tawh lo mah ula in inpawh tho a, i thu a awih deuh ang. Mipa awmchhun a nih bakah upa ber a nia, hetianga a awm chuan chhungkaw boruak a nuam lo vek zel a nia" ngenngawl zet hian a ti a, hrilh ve pawh ni ila awmzia a awm dawn chuang lo tih hrerengin "Ka lo hrilh ang" ka ti ta tho a.

Kal mai ka tum chu ka banah lo chelh lehin "Zuala aiin pathlawi i duh zawk tihna mi? Rengi chuan fa a nei tawh a tia, hmanni ah pawh a fanu nen a an lokal kha kan hmu a, i hmelchhe chuang si lo a, pathlawi neih chu a tuiawm loh e" a ti khawl khawl a, thinrim hmel a pu lo thung.

"Duhzawng a inang lo aniang" nui deuh paha ka tih chuan "Ni ve tho mai. Mahse a pasal tur chu pathlawi a nia an tih chuan mi hi an lo tui lo ve ringawt zel a, nuthlawi pawh a ni tho a, eng emaw riauah hian kan ngai a" a lo ti ve vat a, ka nuih liam san mai a, kan endan a danglam ţhin miau alawm. Sawi dik loh a nei bik miah lo. 

"I hman hunah lo leng la kan sawi leh dawn nia. Hei ka phone a ri leh tawh a, ka kal phawt mai ang" tih leh inher ka rual a, "Ka thusawi kha tumah hrilh ve suh" tiin min au zui hram a. 

"Inchungnu in min lo be khawtlai a" tih paha motor a ka ţhu lut chu min rawn hnaihin ka sam hnawk deuh chu a lo hui a, min thlek vang vang lai chuan "Kal nghal mai ang" ka lo ti leh a, khaw en lai phei chuan din rengna chi a ni lo. Zothani sawi hmangah phei chuan hria an tam tawh hmel em kha. 

Min chhan lawk lohah chuan "Kal phawt ang..duh leh kalkawngah kan ti ti dawn nia" ka ti leh a, rilru a fim meuh chuan ka ringhlel ngun lutuk hi nuam lo ka ti leh a, mahse hmeichhia hi chu kan mak khawp mai, inthunun theihna te hi mipa aiin kan nei tlem zawk emaw tih tur a ni. 

Zualtea te in kan tlanpelh dawn lai chuan Zothani bawk ka hmu leh a, min lo thlir reng nain thinrim hmel a la pu lo cheu a, Zualtean 'ani chu a â phuang a, ama ţhat ţhat hian a ţha a, hruai sual awl chi a nia' a tih fiamthu ţhin kha a nia, ka chanchin leh a thil hmuh te hi a u a hrilh loh hram ka beisei tlat a ni.

"Nizanah Sangsangi khua a sik a, ka nu'n a va hrilh ve kha a rawn lang nghal mai sia, kei phei chuan ka nu'n a lo va hrilh tih pawh ka hre mai lo a" a tih laia a lam ka hawi chuan hmalam a en ngar a, Sangsangi chanchin pawh chu ka lo hre ve lo.

"Tunah eng nge a an a?" ti a ka zawh chuan "Tukin chu a harh angreng a" a lo ti leh mai a, ka sawi zui duh ta bik lo. A fanu a ni miau a, nu te chuan fate an ngaihtuah a, a kal nghal mai pawh a demawm hran lo. Rilru zau tak put a ngai dawn a nih hmel. 

"Min nei duh em?" a ti leh tawh a, a fiamthu emaw tiin ka melh zawk a, a lo thutak lutuk ringawt.

"Ka duh lo chu ka ti chuang lo a, mahse kan la inkawp rei lutuk lo a, kan ţhatna lai chiah kan la inhmuh tir a, inhriatchian phawt loh chuan ka ngam lo. Chumai bakah Rintluangi nen sumdawn kan tum a" ka tih lai mek chuan motor a ti ding dat a, kan hmaah motor dang tam tak a intlar a, traffic jam kan nang hman chiah chiah a nih hmel. 

"Min ring em?" ka mit a en ran chunga a tih chuan "Aw..nang chu ka ring che mah se Kimkimi hi ka ring lo" tiin ka ngaihdan diktak ka sawichhuak ta nge nge a, kei aiin a fing daih zawk a, mipa tih lawm pawh a thiam zawk ang.

"Kan sawi chian viau tawh kha" a ti a, a aw aţang chuan ho te a ka ringhlel nghal zel mai chu a lawm vak lo tih a hriat a, mahse a nih tur ang a ni vek tawh. 

"Sawi chiang tawh mah ila rilru a nuam lo ve tho zel sia lawm. Nia, ka dik bik lo a, ka pawm thlap" ka ti nawk nawk a, Zualtea nen kan inkawp lai khan a nu in min duh lo tih lohah chuan neuh neuh kan nei ngai miah lo a, Zonuna nen a kan han inkawp chiah chu eng emaw neuh neuh a awm nghal char char a, inrawlh peih a zeng an tam si, a hahthlak viau laiin a bula ka awm hi chuan ka hahdam tho bawk si, a mak vel vek a ni ber. 

Ka kut chu vuanin a hum vang vang a, "Min ring tawp mai rawh. Kimkimi nen kan inkarah engmah a awm tawh lo. Sawn nawn fo ngai lo se a ţha khawp ang" a ti charh charh a, a ning viau pawh hi a mak hran lo, naupangchhia a ni tawh lo a, a tan chuan a ninawm ve bawk ang. 

Dawr kawt a a din ruala chhuk nghal mai ka tum chu "Rintluangi te in aţanga i haw dawnah min lo hrilh rawh. Ka thlah ang che" a lo ti leh a, "Aw le" ka ti ve mai a, ka duh ang chhanna ka hmu lo chu lungdam zan lo chungin ka chhuk a, rilru kap tu ka nei reng a, thil ţullo deuh deuh ka ngaihtuah ţhin vang a ni tih hre mah ila ka sim thei chuang lo. 

"Tiffin i pai em?" bag a laptop leh lehkha pawimawh khung mawlh mawlh paha Rohluan   a tih chuan "Pai nang..tukin chu ka siam hman lo a" ka ti a.

"Pawi chuang hleinem..thingpui dawr a mi lo chah leh mai rawh aw. I ei man chu dawr pawisa aţang khan i lo pe dawn nia" a ti sam mai a, bag a ak a, kal nghal mai a tum chu "Kimkimin a lo be leh tawh che em?" tiin ka lo zawt a, a tih ziah danin min lo hek leh ka hlau a ni.

"Kha lam kha chu ngaimawh duh suh. A thu lo ka tih tawh kha. Nitin kan awm dun a, i zia ka hrechiang a, midang chuan engpawh lo sawi se ka hriatchian che chuan a tawk. I thil ei turah vawk sa an lo telh leh palh ange, dawr chhung a bengchheng ţhin a, i duhzawng chu fiah deuhin lam rawh" a ti duah a, kan han nui leh rih ţhin a, hepa hi chu a fel ve thlawt a ni. 

"E..taka Rohlu.." ka tih tak hluaiah chuan tur fein min melh a, "Engtin maw min koh?" a ti a, pawn a chhuah vek tawh hnuah a rawn let leh nal nal a, keipawn a hminga ka vawikhat kohna a niin ka hria. Mi mawl biak ka ching hi sim a ţha khawp mai. 

"Rohlu ka ti..i hming a ni lo em ni?" nuih pah hian ka lo ti a, a la meng rum nasa mai. 

"Tui chiah i la nih lai khan keichuan tui hleuh ka thiam tawh a, picnic naah ka kal zak zak tawh. Min u tawh ang che" a kutzung chal a ka chal a nam chu ka dak deuh awrh a, sawi uar viau mah se kei ai chuan a upa dawn hrim hrim a, a fel si, loh theih loh a bansan a ngaih hun chuan ka ngai ve ngawt ang. 

Rohlua a chhuak chiah chu kan dawr ep chiah a dawr neitunu a lokal a, damdawi dawr ve tho a ni a, keini aiin an rei tawh a, doctor an nei lo nain keini aiin dawr tu an ngah zawk. 

"Khawiah nge a kal dawn?" ti a min zawh pahin a lo lut a, keiin ţhutna ka lo pe thuai a.

"A chhuak ve ziah alawm. Thil dang a ti pah a, ka zawt ngai lo nain a pawimawh aniang nitin a chhuak ziah a, doctor a rawn ţhu ţep tawh bawk nen, tunlai chu a chhuak ngun lehzual a" ka ti zung zung a, kan damdawi zawrh lai te chu a enkual a, a hmel ka hmu fo nain kan inbiak vawikhatna a ni. 

"In vengah damdawi dawr a awm em?" a tih chuan "Awm ve e...ka hriatah pawh pali vel lai chu a awm. Chu ai chuan a tam maithei bawk a" ka lo ti a, ngaihţhat lohna em em ka nei hran lo. 

"Thil ţha deuh ka hria asin" zawitea a tih leh chuan "Eng nge?" ka ti vat a, counter bawh meuh hian min awm hnaih a, keipawhin beng ka chhi ran mai. 

"Dawr nghak tu ngam tlak deuh hlek i neih chuan lo sawipui la maw, damdawi a ruka zawrh chi, hlawk bawk si ka la ţhin a, ruih tur duh hi an tam a" a tih takah chuan doctor an nei lo chung pawha dawr tu a ngah em em reng nachhan chu ka hrethiam kuar mai. 

"I thawhna pa hian chutiang chu a kawl ve em?" 

"Aih, kawl lo. U Rohlua hi chuan a kawl duh lo aniang vawikhat chu a sawi tawh. Kan damdawi neih ho leh a hmanna min hrilhfiah ţumin ruih theih chi chu ka la ve lo, ka kawl ve duh lo a a ti" ka ti a, a lo chek tlak a, a ngaih ho hmel viau mai. 

"A hlawk zia a hre lo a nih chu. Kan la tlawm a, kan hralh to a, nangmah hian a rukin i kawl duh em? In venga damdawi dawrah te pawh a ruk deuhin lo zawt la, kawl duh an awm ngei ngei ang" a ti sa sa a, a hlawk zia a sawi zui chiam a, retheih phei chuan a ruka zawrh ve min ti chak rum rum mai.

"Zuar duh miah lo hnenah lo zawt ta ila min hek dawn a sin. Kan veng phei chu thu a thang chak lutuk" ka ti a, ani pawhin fimkhur a ngaih zia a lo sawi zui ve nghal zat a. 

"I kawl ve ngai em ti la, sawi zui vak lo la, i kal kual peih phei chuan hetiang lam kawl ţhin hi an tam a, i dawr fuh ho kha a khat tawkin i pe ang a, tuman an rawn hre dawn chuang lo a, dawr a thawh ai chuan a hlawk daih zawk" a ti a, a sawi thiam bawk nen, rilru dawih chi chu ni lo ila ka zuar nghal duh hial ang.

"Ka lo ngaihtuah ang. I kawl reng tihna mi?" ka tih chuan "Kawl reng e. Keipawhin lakna bik ka nei a, mah se dawrah sawn ka dah tam ngam lo. Sawi tak ang khan ruih theih chi a nih avang hian fimkhur a ngai a, damdawi dang anga dah lansarh chi pawh a ni lo. A rukin a hralh char char theih thung a, a hlawk lutuk ringawt" a ti a, amah a hmelţhain a fai veng reuh bawk si a, a landan chuan rin a ti awl lehzual.

"Damlo nachhawkna sang mamawh hoah hian doctor ten an hmang ţhin a, damdawiin canteen ah hian an kawl deuh fur ang mah se anni chu zawh ve chi an ni lo thung a, damdawi dawr man fuh bik neih tum la, tam a ngai lo. I inchhir lo viau ang" ti lehin a fak zui mawlh mawlh a, rinhlelh awma ka awm loh a, a ruka ka tih thiam chuan min manchhuah hauh loh tur thu thlengin min hrilh a, ani pawhin a kawl rukna a lo rei tawh viau mai. A rin zawng tak ka ni aniang a tana pawi tur hrerengin min rawn hrilh a, a hlawk zia a hre tawh a, neih belh zel a duh vang te pawh a ni thei bawk. Hetiangah hian tam tak chu an chetsual phah ţhin, pawisa an duh luatah fimkhur nachang an hre lo ţhin a, an man leh nge nge zel.

"Tunah chuan ka ti nghal duh lo a, ka lo hrilh leh ang che" ka tih hnu chuan phone number te kan inpe a, min chhuahsan zui nghal a. Ngawng deuh angah min ngai a, mahse ka nghawng vak bik lo. A sawi ho kha ka hmelhriat vek tawh a, a zawrh a han zawrh erawh ka ngaihtuah ngai lo. A zuar ho pawh hre lo deuh angin ka awm na a hriat a mual mual chu ka nei alawm. Ti ve duh ila chu ka tan chuan a harsa vak lo ang a, mahse thil sual hi chu thup reng theih a ni lo a, tih a hma hawtin manchhuah ka hlau nghal der. 

Rohlua lo luh ruala "Vawiin chu ka ţhiannu te inah ka leng kawi ve dawn a" ka tih chuan a lo lawm khawp mai a, "A ţha alawm..chhuak thawveng ve zeuh zeuh rawh" min ti a, a hun hmain min haw tir nghe nghe a ni. 

U Marti dawr kawtah dingin Rintluangi ka call a, phone a la la thei lo zui. U Marti chuan min hmu fuh lehnghal a, min hre lo der hreh deuh aniang lut turin min sawm a, hnial ve ngial mah ila "Coffee tal lo in rawh" a tih tak tlatah chuan phur lo deuhin ka lut a, ka ruala a ban tir Siami ka hmu chu ka ding chawt mai. 

"Thawh tur dang a hre si lo a, a nu'n min rawn be tlut tlut a" tiin U Marti chu a lo insawifiah a, hmeichhe pakhat cher sang zet mai lo awm ve chu keimah aia a lak a nih ka ring. Midang chu a ngai vek an la ni a, a hlawk loh avanga min ban ni a insawi si kha pakhat lek pawhin thawk tu an kiam lo. Kimkimi nen inthurualin thikthu vangin min ban tih a hriat reng mai. 

Counter hmaa ka ţhut rualin Siamin coffee min lo pe a, "I dam maw?" ti a ka lo biak te chuan ka mitah pawh en ngam lovin "Aw dam e..i dam zawk em?" a ti a, melh tur dang a zawng kual ruai a, ani pawh hi a tel ve a ni ngei ngei ang.

Rintluangi chu pawn aţangin a rawn lut a, "Kan thil eina ruak ka dah phei ve chiah a, i lo thlenna a rei tawh em?" inthiam loh hmel tak hian a ti a, ani pawh hian thil awmzia a hre daih tawh ang. 

A kalsan zuai chu bag nen a lo let lehin "Kal ang le" a ti nghal mai a, ka ţhutna ngaia ka la ţhut tak tlatah chuan "Ka haw hma dawn i rawn tih khan keipawhin U Marti hnenah haw hma ka lo dil ve nghal alawm" a ti a, coffee ka inna ruak chu counter bul lawka bawlhhlawh bawmah a vawm lut a, ka ban hnua ka kal lehna hmasaber a nia, a lo danglam viau tawh ang chu tih laiin ka thawhpuite hlir ka hmu a, min thlak tu pakhat ka hmu bawk a, an tenawm khawp mai. 

"Hmangaihna lamah i tluang zel em? Tunlai mi ho hi chu ngaihzawng te hi in nei hma tawh a" fiamthu deuh a U Martin a tih chuan "Tluang a ni mai e. Pasal ka neihsan ţep tawh zawk maithei cheu a ni" ka ti ve ngat a, Rintluangi a lo nui uar uar a, U Marti pawh za lo tih hriat deuhin a nui ve a, amah tih lawm loh hlau reng rengin ţha deuhin ka thawk ţhin a, a ţhiannu pasal hlui vang maia min ban hi ka haw riau mai. Dawt a la sawi zui. 

Dawr aţanga kan chhuah rualin Rintluangi chu ka chhal nghal a, "I hriat vek chuan i rilru a nat ka hlau a, ka hrilh lo mai mai che a nih kha. Siami kha a ban der mai mai alawm. Ka dawp chhuak vek tawh. A nu pawn phone in a be reng lo, i ban aţanga kar khat hnuah a rawn zawm lehnghal" tiin min hrilhfiah a, a hma daih aţang tawhin Kimkimi nen rem an lo ruat dun tawh a ni chiang mai. 

An in kan thlen chuan a nu leh paten min lo lawm thiam khawp a, min inhmelhriattir zung zung a, a patea chu "Pa Vul ti mai rawh...a fel teh mai a nia" a ti vel a, banga an milem tar ka hmuh rualin bible chang ka hmu tel zel a, bible ka keu lohna a rei tawh nen ka zam luatah ka chhiar chhuak dap a, 'Tumah Pathian zawng reng an awm lo' tih laiah phei chuan keimah ka inhmu lian ber a, mahse ka ngaihtuah thui duh lo. 

Thingpui te kan in a, kan in zawhah pa Vula chuan Rintluangi nen min ko hrang a, "In thil tumah hian in chiang em? Ţhahnemngai deuhin inti peih angem? Rintluangi phei chu lehkhazir lamah a hlawhchham ţhak a, rilru chak loh nak laiin a la zir peih lo zui a, eizawnna engemaw tal ngaihtuahsak ka tum rilruk lai a ni a, inti hne hne dawn a nih chuan puih che u a phur awm loh. Ba in nei ţeuh ang a, rilru hah chiah in hmabak a ni mai" tiin min sawi ţhaih hmasa te te a, kan ţhian dun chuan kan inmelh ralh a, kei tak phei chuan pawisa tam tham lutuk chu min hman tir a phal ka rin loh sa avangin beiseina ka nei sang tehchiam lo.

"Peih lo ila pawisa puk kan dil dawn che mi? Dawr pawh ka be vek tawh a, midang pawn an dil ve nual mai. Kan hmelhriatte an nih vang chauhin min lo la nghak a, kan tih fel vat loh phei chuan midang an luah tir daih ang. A hmun a rem a, midangin min lan ka hlau a nia. Dawr chu min va enpui vat zawk mai rawh" a ti sek sek a, keichuan engmah ka sawi ve lo. 

"In ti tak tak peih dawn a nih chuan ka buaipui em em ang che u. Amaherawhchu, in pawisa mamawh zat a tam viau chuan ka pe vek thei bik lo che u ang a, tlem tlem a tih a ngai ang" a tih chuan "Kan hre ve vek. Dawr a pawisa pek lawk ngai kha min pek sak la, vai hmelhriat i ngah a, thawmhnaw tlem a zawng min lakpui la, chung ho chu kan zuar ve mai dawn alawm. Taka pate, ka ţhiannu ute hi china ah an kal ţhin a, anni pawhin a tlawmin min pe thei ang. Keini kal ve zel a ngai dawn lo a, tih dan chu a awm ve zel mai. Duh leh secondhand te pawh kan zuar anga" ka ţhiannu chuan a ti a, sawifel nghal vek a har khawp mai. 

"Zarda zuar rawh u. Kuhva hring leh zarda zuar ula in hralh thei ber ang" a u hmeichhia in a rawn ti khauh a, Rintluangi chuan "Mami kan ti mai zel a, Rinkimi a nih hi. Zonunmawia te thawh naa thawk ve kha" a ti sar sar a, a lo haw chiah a nih hmel. 

"Kuhva khawr ula in inhmeh viau ang. Zarda ngat phei chu hralh theih loh a awm hleinem. Duh leh panhnah te in khar chhawng anga. Rintluangi phei chuan thawmhnaw nalh deuh deuh zawrh a inhmeh ve lo, kuhva khawr rawh se. Mix leh pani puri tih vel zuar tel bawk ula" a lo ti leh a, a nu in a lo khap ve tak nain thil mak pui pui min zawrh tir a tum a, ţhenkhat phei chu ka hriat ngai pawh a ni lo. 

"Chutiang chuan mi a hip awm lo e. Hei mipa thawmhnaw te zuar ila lukhum tih vel te" ka tih laiin Rinkimi chuan "Mipa hip deuh tur tihna mi?" a lo ti leh kher a. 

"Aw ni ve tho..mipa hian thil an lei huai a" ka ti a, nui hak chungin puan zar bula ding Rinkimi chu a kalsawn a, thingpui no dawm chungin Zonunmawian min lo en ran mai. Chaw ei dawhkan kilin a ţhu a, thawm an nei bawk si lo, rem an ruat lawk a ni ngei ngei ang. Rinkimi lah chu a nui vak vak a, Rintluangi nen kan tim dai thung a, kawngkapui lo lamah kan ţhu a, ţhutkhawmna pindan deuh bik a ni nain tv an dahna lam nen hian parda chauhin a in ping dang a, parda lah chu an hnawl tawm daih avangin kan ţhutna aţangin choka chu thui deuh a lang thei a, hamhaih deuh a Zonuna ka en reng lai chuan "Ka insawn chiah" a lo ti a, Rintluangi rawn len ţuma a fanu nen an lokal ve khan inti bengvar fein Rinkimi hi kan sawichhuak a, kei phei chuan ka vawikhat hmuhna chiah a ni. Zonuna lah hian a lo hre ţhain Rintluangi te inah ka kal dawn tih a hre bawk a, an rawn inzui haw ni ngei tur a ni. 

"Ka nuih a za e..in thusawi ngaithlain helamah hian kan ţhu reng tawh" tiin Rinkimi chuan tv awmna lam a kawk a, "Bengchheng lo tur a min tih khan mak ka ti reng a ni" a nu chuan a lo ti ve bawk a, Rinkimi bula a din ve reng hnuah a kalsawn leh kha a nia, an sual ve khawp mai. 

"Zonuna a rawn insawn phei rualin Remruati kha ka fiam a, in sumdawnna turin in rilru a luah lutuk a kan awm ve tih pawh in hre lo a nih kha. In rilru lakpen hlauin thawm nei miah loin kan lo lut a, ka nu ţawng tur  zaizirin ka khap nghal bawk a. I lokal dawn tih ka hre lawk vek alawm Remruat" a ti lang lang a, Rintluangin a lo hrilh lawk a nih hmel. 

"Min rawn bum kual vel a ni maw? Duh leh in pahnih khan zarda leh kuhva hring chu zuar ula, mi thusawi ngaihthlak ruk hi thil mawi pawh a ni lo" Rintluangi chuan a ti hlak hlak a, a patea chuan min sawizui puiin ka ţhiannu bawk chuan thawmhnaw a ţhat ber thu a lo sawi leh a, a ţhiannu ute chu a be nghal bawk a, Rinkimin "Anih chuan dawr chhung pawh siam fe a ngai dawn a nih chu. Chhuar te..a khaina tur zawng zawng te nen" a lo tih ve laia tukverh lam ka hawi chu khua a lo thim fel der tawh. 

"Payment vek kher a ngai hleinem. Thawmhnaw te chu a hlawmin an la a, an rul leh mai a, an payment vek kher ka ring lo. Hruaii u te an nih phei chuan in inhrechiang tho alawm" Rinkimi bawk chuan a ti leh a, pawisa nei tan chuan tih dan a awm zel a, ka tan chuan sawi ve tur a vang khawp mai. 

Zonunmawia nen a kan haw tur motor chhunga kan ţhu dun ran te chu ka zak ru et et a, mi pawisa puk chawp a sumdawn ve ka tum chu ka zak a ni ber. 

"Engatinge i lo luh ve kher a?" hmalam en ran chung hian ka ti a, tlawm ka inti a, ka zak lutuk chu ka thin a rim ţun mai. 

"Rinkimi khan kan inchhung pawh i la hmu lo a tia ka lo lut ve a nih kha" a ti a, a tlanchhuah rual chuan thawk ka hip let hraih a, ka pik leh mup mup tawh. 

"Ngaipawimawh vak duh suh. Rintluangi patea kha fel viau mah se vawilehkhata pawisa tam tham zet thehchhuah chu a thei bik lo ang. Beidawn nan hrim hrim ka hmu ve mai mai a nih kha. Ka inkhawl bek bek ang a, tih theih dan a la awm ve mai ang" ka ti zung zung a, kan dawr ep a damdawi zuar nu kha ka ngaihtuah rauh rauh a, ka tihsak mai dawn em maw ni tih thlengin ka ngaihtuah tawh. 

"I ril a ţam tawh em?" a lo ti daih a, "Ţam lo" tih hmak pahin pawn lam ka thlir ta daih a. 

"Puih i duh chuan---" a tih lai mek chuan ka lo pawt chat a, "Puih ka ngai lo. Pawisa phei chuan puih ka ngai miah lo a nia. I fate ni miah lo i chawm a, an pa aiawhin an zirna zawng zawng i tum vek a, tunah lah i pa damlo phaia kalpui hial a ngai bawk a, Sangsangi a hautak chho ve zel bawk ang a, pawisa hi indaih tih a awm thei lo. Rintluangi khan a patea a dilchhuak thei a nih leh ka tel ve ang a, mi hran bula thawh ai chuan ţhiante hnuaia thawh chu a nuam zawk dawn hrim hrim. Keimaha ka kal hrang duh a nih pawhin tih dan ka zawng ve mai ang" ka ti bawrh bawrh a, kan inthlen hma deuhah a ding a, ka ţawng laia ka ţang lutuk chu ka sawi duh ka sawi zawh meuh chuan ka thaw ham ham a, Zonunmawia lehzel tihbuai tel chu ka duh lo bur. Inhmuh thiam loh te a awm thei a, inţhen thei reng kan ni bawk. Inrawlh ve lo turin ka duh ber. 

"Tuna kan thil tih tum hi chu lo ngaihven ve lutuk rih suh aw. A hlawhtling kher angem tih pawh a hriat loh a, i lo tel ve a nih chuan ka zak lehzual lutuk palh ang" ka ti tawl a, a lam hawia ka inher rual chuan min lo hnaih ve a, ka kut chu lain a fawp zui vang vang a, a mitmeng lah chu a dam thluam nain engmah ka hmu thiam lo thung. 

"Puih che ka chak viau a sin" ka sam hui pah hian a lo ti a, a aw chu a zawi hle a, a ri chang chang chauh a ni ber. 

"Keimaha ka tih theih chin chu keimaha tih ka duh. Min puih zel chuan mahnia thil tih nachang ka hre lo thuai ang. Sum leh pai a min vur kher ka phut lo a, ka bulah hian awm tawp la, a bak chu keimahin ka ti vek ang" ka ti a, ka inrintawkna te chu engtik laia rawn let nge an nih ka hre lo, tuna ka thusawi tak te kha ka sawi ve ang tih pawh ka ngaihtuah pha ngai lo. 

"In ti thei mai ang. Mi tumruh leh taima te hi alawm hlawhtling ţhin chu" a lo ti a, ka va awm hnaih leh hret chuan min lo kuah a, a taksa ka sik chiah hnu chuan hahdam deuhin ka thaw hle hle a, Rintluangi te banga Bible chang intar kha ka hrechhuak ringawt lehnghal, nangni thawkrim leh phurrit phur te u tih lai vel kha rilruah a awm a, a hun lo khawp mai. Kan dawr ep chiaha dawr nei ve nu kha ka ngaihtuah chhuak leh a, thil chi hrang hrang ka ngaihtuah laia Zonunan dimtea ka hnungzang a lo chul chuan tawitein ka nui a, tluchhe vek tawh ah te ka inngai ţhin a, mahse tunah chuan hriatchhuah ka nei tawh. Tih hmasak leh hlenchhuah tur tam tak ka la nei a, ka tlukna hmuna bawksawp reng thei ka ni lo. A hma aia chak zawka tho leh a, hmalam pan tur ka ni zawk. 

CONT..