DEAR DIARY-3

DEAR DIARY-3

"I enzui chiang mai..ka hre vek" nui rah rah chungin ka bulah Rintluangi a rawn ding a, dawr a thawk ve tho a ni a, ţawng zat zat reng chi, mitmeng lian lam a ni. Amah tak hi chu a lian vak bik lo. 

"Awihawm loh e..bakilh min hmuh tir a nih kha" ti mah ila "Bakilh ai mahin amah i en nasa zawk" min ti a, ka chhang buai peih tawh lo. 

Counter lam hnungchhawn zawngin ka ding a, zahzelah bakilh inchap darh deuh nuai chu ka rem ţha a, kut hi awl lo se ngaihtuahna a kal ding lutuk lo deuh ang.

"Lokal ziah ang che. Vengchhung a dawr ka nei chung pawha min tlawh i tum hauh lo hi ka dem lek lek che a ni" U Marti ţawng lang lang ka hriat leh takah chuan ka inher a, palian-a pawh counter hmaah a lo ding tawh a, ka hawi phei min hmuh rual chuan min lo nuih suk a, a la nui mawi em em zui. 

Nuih let ve ka tum zet nain keimah ni lovin U Marti thusawi zawk chuan a nuih a ti za a nih ka ring leh a, a hmel pa zet leh chang run maiah chuan eng nge a ngaihtuah hriat a harsa a, min nuih leh nuih loh takngial pawh ka hre thei lo chu a nih hi maw. 

"A thawmhnaw inbel aţang saw chuan hna zahawm ve deuh a neih ka ring" Rintluangi bawk chu a rawn phun leh sar sar tawh.  

"Chutiang ka ngaihven lo. Customer te va buaipui la a nih chu" ka ti hlak a, min ngaipawimawh lo zet hian a nui a, "Keipawn ţha ka ti ve tho alawm. Hmelţha ka ti phal lo a ni mah zawk. Hmelţha ka tih chuan a pâ loh hmel dawn lutuk a, a pâ tho sia" a ti a, kei ai mahin hmuhnawm a tih hmel zawkin ka hria. 

"U Marti ka zawh chuan lerh min ti dawn si a. Mahse, nang pa kha, i hming leh i hnathawh ka la hre dawn khawp" a ti a, a kut chal chuan silai ang deuhin a kâp vel a, ka nui ve ta var var a. 

"Remruat, kan thil eina hi va dah lawk teh. Kan lo theihnghilh a hei a rei lutuk tawh" U Martin a tih leh takah chuan hreh teh ngang mah ila counter lamah chuan lai deuhin ka phei a, palian-an min lo en ve reng avang chuan ka kawr te chu pawt marin ka kekawr ka siam ţha vel a, min hre lo tu vang mai maiin ka zak ru chem chem chu a nia. 

"In dahkhawm tawp zel a, a rimchhe hman leh nge nge ţhin. Pawisa an la vek tawh a, ti hian va dah tawp rawh" a ti a, nitin bowl ruak dah let tu ka ni chung hian min hrilh duah zel tho. 

"Ka kal phawt ang e" palian-an a tih chuan U Mart-i chuan "Nitin lo leng ziah ang che" thupe aw zet hian a ti a, an inngaizawng em maw ni tih mai tur a ni.

"Ka duh hun chatah ka lokal ţhin ang" a ti a, a aw chhum hmuk avanga ka lo ner nang nang chu rawn hmuin mit min kan khum uk a, a lungawi chiah lo ni a ngaiin ka chhuak ta daih a. 

Kan dawr piah chiah hi thingpui dawr a ni a, chhunah chuan heta mi hi kan la mai zel. A hranpain kan pack tir ve kher ngai lova, kan eizawh hnuah kan eina ruak kan dah let leh a, ka kal apiangin Faktea ka hrechhuak ziah mai. 

Thingpui dawr aţanga ka chhuah chuan kan dawr aţangin a lo chhuak ve mek a, ka en duh leh pek; mi â a ang pawh min ti se pawmpui tu an tam viau ang. 

Amah en reng chunga ka phei laiin tu emaw hian min su kat nawk a, rawl ka chhuah hauh lo nain ka thinphu chu a su dawt dawt a ni ber. 

"Ka tihpalh" a ti mawl tawp a, hmanhmawh deuhin a kal leh hlawk hlawk a, ngaihdam min dil tak tak a ang lo hial zawk. 

Palian-a kha kan dawr pan chhohna rahkâ ah a lo la ding ve reng a, thlaphan luat avanga ka awm dawm chung meuh a ka en chuan thil thleng khan a ti lawm zawk emaw tih tur hian ka en tih a hriat veleh a lo khi suk a, kan inbe tam lova, a taksa a lianin zuam ngawt chi a ni hauh lo vang. Chuti chunga hlauhna ka nei ngai lo hi mak ka inti letling zawk a, ka kum a la tlem vang nge he palian, hmel pawh nelawm lem loh ka hmuh hian nuam ka ti tlat zawk zel. 

"Nelawm loh nu, pickle hi min remchhuah pui ve rawh" Rintluangin a tih chuan ka nui deuh a, hmuh thamin a langchhuak kher lo ang. 

Ka awm lohna lam chhuarah pheiin ka rem pui a, ka thawh ve ţan tirh aţang tawhin remţhat ngai a awm chuan hla deuhah pawh awm ila amah pui turin min au ngei ngei ţhin. 

"U Mart-i sawn a ngaizawng chiang alawm" a tih chuan tu chanchin nge a sawi ka hrechiang lutuk tlat. 

"An inngaizawng a ni maithei bawk a" ka ti ve mial a, mi chanchin hi ka sawi ngai lo viau a sin mawle. 

"Khapa khan chutiangin a en lo. U Mart-in a endan erawh a danglam deuh. Hetiang lam hi ka hriat zawng a ni ve a, ka hmu thiam thuai zel bawk. Min ring thei ang" a ti siam siam a, ka awih lo lutuk chu ka nui ta ringawt a, kan inbe zui vak lo thung. 

In a ka haw chu ka nu leh pate inhau thawmin min lo hmuak a, kawngkhar chu khar ve thlap mah se an inhauh nasat viau chuan pawn aţangin a hriat theih vek ţhin. 

"Fanu pahnih i nei tih hria la, i ţhiante hi inchhungah zu inpui tawh suh. Hei tuna chatthla mek te hi engtia tih nge i tum?" ka nu chuan a ti tan tan a, ka pa chhanletna chu ngaithla duh lovin beng ka hup a, kan inbang ngheng chuan ka ding ta rih a. 

"I kut la sawn rawh" in neitute fapa Zualtea chu hrilhhai deuhin ka lo en ha a, ka hmazawnah tak a rawn ding run a, mit ka chhin daih avangin engtik a lokal nge a nih ka hre lo. Nike tracksuit a ha a, lukhum hmathlawk khumin headphone a awrh a, a tlai tawh tehlul nen khawiah nge maw a kal ni?

"Engmaw i saw?" ka beng hup reng chung hian ka ti a, kut lawng chauha hup ka nih avangin ţawng a hriat vek thung.

"I kut kha la sawn rawh ka ti" a tih hnuah ngeiawm zet hian "Inhnuai nu" a ti lauh a, a ngaihna hre lo viau mah ila a sawi ang chuan ka kut pahnih chu ka la thla a, chuveleh a headphone awrh lai chu la thlain thawm ka hriat loh nan ka beng hnawh phui nan a hmang ta daih a. Ka hrilhhai lutuk hmel chu enin a nui suk a, a rei lo hle thung. 

"Ka in a nih hi, ka duh duh ka lo hruai ang. Nang leh i fate hi in awm ve peih lo a nih chuan chhuak rawh u. Ka ui lo nasa che u" ţeng zeta ka pa'n a tih tak khur khurah chuan kan dinna bul lawka kawngkhar chu thlek vutin a hmel a dur thim nghal khup a, a lo haw hnua kan inhmuh hmasakber ţum nen kha chuan inthlau tak a ni. 

Eng hla mah a play loh avangin min be mah se ka la hre thei tho ang, chuti chung chuan ka lam lo hawi leh pahin "Eng hla nge i duh?" hmui phun hian a ti kher a, a thaw hawk a, phone la chhuakin min hmuh tir zui zat bawk. A hmel landan pawh a dam ta deuh alawm. 

"A rem rem a ni mai" ka tih chuan zai min ngaihthlaktir dawn emaw tih laiin ka banrekah a rawn hmer a, mak tak maiin a kutphah lum vung vung chuan thla a ti muang huai huai thei. 

"Kal ang" hmui phun bawk a ti lehin an in panna rahkâ ah chuan min chhoh pui a, hreh viau mah ila min hnuk lui dat dat a, kan inchhunga ka luh chak miau loh avangin phunnawi lovin ka zui ve zel a, an inchhunga min hnuk lut chu a chhungten min lo en duh khawp mai. 

A nu ţawng tum ang zuau zuau chu "Ni kan en liam dawn" a tih khalh a, inchung lam min pan pui leh ta zel a, an inchhung landan chu ropui le lu lo mah se an khawsak a harsa lo viau ang tih chu a hriat. An in kan luah hnua an inchhung ka luh vawi hnihna chiah a ni.

Inchung zawl kan chuan chhuah chuan ka hawi kual nghal ruai a, an sak zawm leh avangin a hnawk angreng hle. 

"Helai hmunah hian engati nge min hruai?" ka ti deuh ha a, ka zawhna pawh min chhang lem lo chuan a hmui a pet sawi zauh a, zahzel a zik mar ţalh ţalh pahin "Ka naute ţhian ho awmkhawmna a nih hi" a ti a, kil khat a pher lo inphah chu a kawk zui zat bawk. Pher chungah chuan ţhutchhan dup hmel zet a inphah tel a, a hlui deuh tawh thung. 

"I landan aţang chuan i la haw peih loh hmel a, ti rawh ţhu phei phawt ang" tih leh ka dara min kuah a rual a, ka lo la en ha a, kan inhmuh tam loh tehreng nen min nel lutuk chu mak ka ti zawk. 

"Kan inkawtah khan kan awm hle hle thei lo em ni?" ka ti a, kal mai ka tum lo chu ka hnungah dingin ka koki ah a dawm a, pher awmna lam pan chuan min nawr kal dat dat a, ţhutchhan dup inphahna zawna ka din veleh min nam ţhu a, ka kalsan daih hlau ni awm takin ka bulah a rawn ţhu ve nghal zat a. 

Headphone chu phelh mai ka han tum a, mah se ka banrekah rawn hmer chawtin "Phelh suh, i inhmeh em kha" a ti zawi sup a, ka kut chu min lakthlaksak a, phone a phawrh chhuah takah chuan zai min ngaihthlak tir dawn a nih ringin ral lehlam chu ka thlir ta daih a.

"Beer i duh em?" a tih leh takah chuan a lam hawi pahin ka thaw hak a, zai pawh chu min va ngaihthlak tir har em em ve mawle. 

"I neih chuan duh e" ka tih chuan a nui deuh a, lu min buk khum nghut hnuah "Nei e" a hma aia zawi mah zawk hian a ti leh sup a, a tho nghal tharh bawk.

"I rei dawn em?" zam ru tak chunga ka tih chuan lo kun hniamin ka chhipah a dawm a, "Rei lo ang, tumah an lokal dawn lo ti hian lo awm rawh" a tih hnuah min kalsan a, beer hi zu a nih ve tho rualin zu pangngai han ti deuh kher ila; whisky tih vel hi vawikhat chu ka in tawh na a ka in chhumzawm lem lo va, beer erawh ka hmuh phawt chuan ka in thei tih theih a ni. Zualtea hmuha han in nghal mai pawh hreh viau mah ila ka nu leh pa an inhauh chang ngat phei chuan in ngei ngei ka duh ţhin. Mi fel tak a nih hmel a, mak min ti em lovang chu maw.

"Kha le" ka bula a rawn ţhut leh hnuah ka hmaah a rawn nghat a, a intur ni awm tak a ken lai aţang chuan beer rim a rawn chhuak a, a rimtui ka ti viau lo, chuti chung chuan ka in ziah tho a, ruihhlo hi chuan thil a ti thei takzet a nih hi. 

Beer chu ka lem khalh a, ka bula ţhu chuan min enreng tih hriain a lam ka hawi a, ka kutchal a ka headphone vuah lai tauh rik khap pah hian "Zai ka ngaithla dawn lo em ni?" ka ti a, hrechhuak thut ni awm takin a meng phar deuh a, a pangngai leh vat thung. 

Phone a phawrh ţha leh a, iphone ngat a hmang a, a man pawh a to viau ang. An fapa chhuan ve em em kha a nia, an duat rawn ve niin ka hria. 

"Lawk aw..ka zawng chawp dawn" a tih chuan ka lo nui hak a, buk nghat nghat pahin muangchangin ka inher a, ral lemlam bawk chu ka thlir leh a, hremhmun diktak a hun ka hman aţang hi chuan leilung mawina hian min hip em em tawh lova, chuti chung chuan ka thlir nasat ber a ni tho si. 

Headphone aţanga ri a lo chhuah pawh chuan hmalam chu ding deuhin ka la thlir a, 'Kan hringnun zinkawng kan zawh lai hian, lungngaihna tuarin awm ţhin mah ila, hmatiang hun ţha a lo thleng zel ţhin' ti a ka hriat ngai pawh ni lo te hla sak chuan min hneh nghal em em a, sap hla ropui em em mai 'Lean on me' tih kha a ni min ngaihthlak tir chu. Mizo ţawng ngeia ngaihthlak tur a awm lehzel hi a vanneihthlak a ni. He hla hian chakna min pe thei tu thu ţha tak tak a keng tel a, mizo teah hian sapţawng thiam miah lo tam tak kan awm bawk. Chung ho tan phei chuan a hlu lehzual ang. Sap hla ţha deuh deuh hi chu kan ţawng ngeiin letling zel thei se ka ti ţhin. 

'Min ko la mangan niah ţanpui i duh chuan, kan za hian ţanpuitu kan ngai e. Min pui la kei ngei pawh hi, ţanpui ka ngai fo' tih lai vel an sak lai chuan beer in leh pah chuan a lam ka hawi a, min lo nuih a, keipawh chu ka nui ve ta ringawt a. 

'Ţanpuitu i ngaih ni chuan, ka pui nang che, chawnbanin vuan zelin, chanhai riangvai a ka awm ve hun chuan, nang ngei ka ngai dawn si' tih thlenga ka ngaihthlak takah chuan ţhianţha ka chhar tih ka hria, ka ţhian ni turin inpeih sa thlap lo sela chu hetiang hla hi min ngaihthlak tir lo vang. Kan inţhianna bul kan ţan hma hawtin ţhianţha neih thlamuanthlak zia ka hre nghal a, kan inkar boruak chu a lum nuam riauin ka hre tlat bawk. 

"Ka lawm e" headphone chu ka pe let a, dah ţha ta mai lo chuan a nghawngah bawk a lo awrh leh a, ka ke a kham deuh tawh avangin ka tawm a, ka kuah khawm nghal hlun bawk a, ka tih ang chiaha a lo tih ve takah chuan ka nui leh rih a, kei ai chuan a upa daih ang mah se a bula ka awm hian ka thla a muang hle. 

"Hunawlah eng nge i tih ţhin?" tih paha ka lam a lo hawi chuan ka sawi zak deuh chuan chil ka lem khalh a, chhanna ngaichanga min en tak rengah chuan "Phone hi ka khawih khat a, ka khawih ve chhunah pawh youtube ah thawnthu ka ngaithla a" ka tih veleh phur deuh hian "Thlahrang a ni em? Thlahrang hi a ngaihnawm a nia" a lo ti hluai a. 

"Teuh lo mai..love story" ka tih leh takah chuan ngunthluk fe hian min thlek a, ka thil ngaihthlak chu inhmeh lo min ti deuh nge lu thin nghut pah hian a nui suk a, hmalam a hawi ta daih a. 

"Eng thawnthu ber nge i ngaihthlak a?" a tih tak thoah chuan "Channel tlawh ngun bik ka nei a, Neihfaka rilbawm hi ka tlawh zing khawp mai. Keichu mizo kan nih angin mizo ţawng dah sang deuh ţhin hi ka ngaina a, a chhiar thiam lutuk a ngaihthlak a nuam. Mahse a aw a nalh emai a hmelţha kher lo vang" ka ti ve duah a, ka thusawi duh dan chuan a nuih a ti za viau mai.

"Thawnthu hming sawi la, ka lo ngaithla ve ang" min kawm hlim tum taka a tih takah chuan ka sawi nghal mai chuan a ho vek dawn tih hriain "Pehhel deuhin a ziaktu hming tlem nen ka sawi ang a, ring chhin rawh aw" ka tih chuan phur hmel tak hian a ţhut dan a siam rem a, ka lam a lo hawi fel thlap tawh. Ka tuipui zawng tak nia a hriat min sawipui char char te chuan min ngaihsak zia a lantir chiang a ni. 

"Rin na ringawt la vung vak lo va zoram chhan duhna tak tak thinlung pu chunga pen chhuak ţhin te hi ka ngaisang a. Van Angel te angin vanram nawmna ka la chen ve thei lo, chuvang chuan harsa viau rih mah se uluk deuhin ka hringnun thawnthu ka la ziak ve zel a. A hmangaihna kha hmangaihna dik nia ka hriat ţhin avangin tuemaw zunzamin min phuar ve tawh a, mahse Adam leh Evi ten an bawhchhiat avanga mihring ten hrehawm tinreng kan hmachhawn takna khawvel, mihring rilru a danglam zung zung ţhinna khawvel, danglamna khawvel a awm kan nih miau avangin rilru a lo danglam leh thuai a, a tawp leh vek tawh. Ka pa lahin a thil tih pui tham lo ve tak tak hmangin min hnawt kiang zel a, sawi kher lo mah se tlan rawh, min tlansan rawh a ti ţhin ni maiin ka hria. Tunah pawh ka tlan chhiat mek hi" ka ti duah a, a ngaihna a hriat loh hmel khawp mai. 

"Hmangaihna nihphung leh kal kual vel dan hi chu science thiamna hmang pawn chhutchhuah a harsa a, ka zirlai hi thiam ve viau mah ila i sawi tum ber ka man lo. Hringnun lahin formula a nei bawk si lo, ka chawk chhuak thiam lo ni teh se" a tih chuan ka lo nui tat tat a, hetiang hi alawm nuam chu. 

"Ring chhin hrim hrim la, i rin dik chuan ka lo sawi ang" ka tih hnuah beer chu ka in zo a, ka dah rei a, a lo kha lehzual hman vek. 

"A ho emai a" a ti niah niah a, a nur nang a, rin dan pawh a thiam loh vang a ni reng sia. Infiam pui ka tum ve nen, a hre lo leh lutuk a a ho zo vek.  

"Engati nge min puih?" ka ti ta zawk a, ka thusawi chuan a ti danglam ve nge a hmel landan a inthlak chiang hle a, ka pa ang ri a hriat ve lai ang mai kha a ni leh tawh. 

"Ka hrethiam che alawm" a ti a, a vin hauh lo na a a ţawng chu a rum angreng hle. 

"I tawng ve tawh tihna a ni em?" ka ti ta khawl a, an chhungkua hi ka hrechiang hauh lo. Tun a kan awmna vengah hian rei deuh chhung awm ve tawh mah ila ka inkhawm ngai lo va, ka tual lim lo va, mi chanchin ka ngaihven ngai lo bawk. Eng ang pawha hausa leh khawsak ţha pawh nise ka ngaihven ve teh chiam lo. Kan tan ţangkaina an nei lo tih theih a ni a, ka pak huam peih lo. 

"Tawng tawh e" zawi te tak taka a tih chuan ka melh nghal vat a, ka awih lo lutuk hmel chu hmu thiamin a nui suk a, a lukhum hma kuai kunin hma lam a hawi leh ta daih a.

"I nu hnen aţangin kan chanchin i hria a ni tiraw?" ka tih chuan en pawh min en tawh lovin a bu nghut a, "Chanchin sawi chhawn tlak kan nei vak lo a sin mawle. Nichin lawka i rawn hriat ve ang kha a ni mai. Kan vengah i awm ve reng a nih phei chuan i la hre dawn chauh. Kan chhungkua chuan tu in mah kan luah rei ve thei hleinem" ka ti chuai raih a, kan chhungkua sawi kai hi chuan thaw a pik a, rilru a hah ngawih ngawih ţhin. Zualtea hnena ka hahdam lutuk hi mak ka inti takzet bawk.

"Hetah chuan in awm reng dawn nia" a ti zawi leh ruih a, a aw ngaihthlak a nuam a, ka nui hmel pawh ka thup bo hleithei lo. A thlamuanthlak em a ni.

"Nuam ka ti viau na a ka haw phawt ang. Ka nu amah chauh a a awm reng chuan hrehawm a lo ti lutuk palh ang" tih paha ka din chuan a lo ding ve nghal vut a, a awmdan chuan nuih a ti za angreng hle. A landan ringawtah chuan tlangval awm ţha duh lo deuh a ang a, mahse thinlung nem tak a nei chiang a ni. Eng emaw tak a tawng ve tawh bawk ang. 

Inhnuai lamah kan inzui thla a, a chhungte chu inpuiah an lo la ţhu ţhap a, tv ah eng drama emaw ni an lo en bawk. Thawm kan neih takah chuan mak tih hmel deuhin min lo en leh a, an inchhungah hian ka lut khat em bawk a ni. 

"Mampui, chaw kan ei dawn hnai aw" a nu in a lo tih leh pawh chuan "Ka thlah lawk dawn" a ti hluk a, a chhungte hmuh lai chuan min kuah lehin pawnah min chhuah pui a, ka inthlahrung zawk. 

Kan in lama ka chhuk dawnah chuan "Eng thil pawh sawi la ka ngaithla peih vek aw" zangkhai angreng deuh a tih pahin ka darah a beng thuk a, ka lo nuih var var a.

"Kan inkawmna hmasaber a nia, zahawm loh nih huamin beer kha ka in aw" ka tih chuan "Ânkhum hrep inring ranin ka sawi hmuh ve tho che" a lo ti vat a, a mak ve ngawt mai.

"Ka ankhum che i hlauh chuan engati nge min sawi hmuh?" ka ti leh a, "I dinhmun a ţhat loh hmel em a, ka hre lo le, ţhian nih ka duh aniang" mumal lo zet a tih pah hian dar a kan uk a, amah vang hian ka nui hnem ta khawp mai. A der ni hauh lova han nuih ve hi ka nei khat a sin. 

"Engpawh chu nise ka lawm e" tih nawn leh pahin a awmah ka beng ve thuk a, ka kut lo vuanin a hum a, min thlah leh vat thung. 

Mahniin ka nui thla var var a, zirlai chu pawimawh viau mah se kal tawh lo se ka ti nghal rum rum mai alawm. 

Tv hmaah ka nu leh pate an lo ţhu a, an inhau ta bik lo a nih hmel. Ka pa a ţawng bual bual reng a, ang chiam kher lo mah se a zu rui aw hrim hrim hi ka kham hluah hluah ţhin. Hah deuhin kan han haw a, chhungkaw pa ber a lo ruih phul bual mai chuan hahdamna a awm lo. Mi chuan inchhung hi hahdam nan an hmang ţhin a sin mawle. 

"I chau em? Nidang aiin i tlai a, ka ngaihtuah che alawm" ka nu'n a lo ti luam a, ka chauh loh thu hrilhin pindanah ka lut tlang a, inthlak lem lovin khumah chuan ka bawk hnawk a, pindan chhung a la fel fai emai Afeli a lo la haw lehpek lo aniang. 

Dear Diary,

Kan mihring puiten min ngaihthlak a, min hriatthiam hian kawng tam takah min pui a ni tih ka chiang khawp mai. An beng a min ngaithla ţhin tu leh an mita chiang taka min hmu ve thei tu te, an thinlung a min hriatthiamna nei ţhin te hi an hlu a, kan kehchhe mek a ni tih hmu chat ţhin tu te chuan dam deuhin kan kut min vawn sak ţhin.

An thinlung takin min vei a ni tih an mit a ti lang chhuak ţhin te, kan sawi chhuah kher loh pawh an beng a lo hre chat thei ţhin te, an lungphu ri nawn tlut tlut te hian min hriatthiam zia an au chhuah pui phawt chuan kan natna te zawi zawi a hnawt kiang thei turin nasa takin min ţanpui ţhin. 

Kan rilru natna te hi a thuk viau tawh a nih chuan chakna kan nei tlem tawh ţhin a, chutih hunah chuan chhungril a kan ţap ri hria a, dawhthei taka ngaithla tu kan mamawh a, kan thinlung kehchhe ri leh min ngaihsak a, kan hlauhna te hrethiam thei thinlung nei tu kan zawng ru ruai reng a, kan natna te hi engtiang chiaha na nge an nih min hriatthiam pui tu ngat phei chu kan tan an hlu lehzual ţhin. 

Ka lo beisei ţhin chu Zualtea ah hian a kim vek a, reilote chiah inkawm mah ila ka thinlung hian a hre chat thei a ni. Mi tumah be lum lam ngai lo leh tu lakah mah inhawng ngai lo hian a bulah fiamthu ka thawh a, ka nui reng bawk a, ka tan chuan a hlu takzet a ni. A hming ka ziah lanna hmasaber a ni a, a ţha zawnga a hming ka thai lan zel theih ka beisei. 

"Mate, chaw ei ang u hmiang kan tlai lutuk ang e" ka nu'n a tih takah chuan diary chu lukham hnuaiah ka nawr lut a, ka ziah thui theih em avangin ni zat inziak sa ka lei ngai lo. Kum khatah bu hnih te ka lei ţhin a, ka ziah ni chu ka ziak chawp mai ţhin. 

"Naktukah i ni ten chawhmeh an lo thawn dawn a, ka hralh zawh theih loh leh i thawhna dawrah te i keng ve anga tiraw?" chaw ka khawrh mek laia ka nu'n a tih chuan "A hlui tawh awm e. Chawhmeh hi chu zawrh ţhan loh chuan chah ţeuh chi a ni lo a sin. A hlui duh lutuk a, awmzia a awm lo" ka lo ti nang nang a, ţhutna bik a nei ve lem lo va, mi ina a inhlawh loh kara a zawrh ţhin hi a ni mai a, tih chhiat palh ka hlau a ni. 

"Mi aia kan zawrh tlawm chuan an duh dawn tho tho. Chubakah chawhmeh chu thil hralh nuam ber pawl alawm" a tih tak tlatah chuan ka aw veleh ta nge nge a. 

"Taka i nu Puiin thawhna tur min hmuh sak a sin" phur deuh tak hian a ti a, keipawh ka lo ţhu ţha ve thuai thuai a. 

"Dawrah nge inah" ka tih chuan "In ah tho a nia, in dawr aţangin a hla lo a nih hmel. Lehlang thoin a nia, i nu Puii chuan kan dinhmun a lo hrilh a niang hlawh pawh mi aia min pek tam an huam a, zahthlak viau mah se kan mamawh tho sia, a lawmawm lamah ngai mai ang" a ti siam siam a, a hmel hmuh a nuamin a phur zia a lang reng. 

"Eng ang chhungkua nge an nih a?" ka tih chuan "Ka la chiang bik lo. Puii chuan mi fel deuh an nih thu a sawi a, awmpui an duh nachhan pawh chhungkaw pa ber a cancer vang a ni pakhat a, nu berin a buaipui chawt a ngai a, inchhung tihfai leh naupang pakhat buaipui a ni mai a tia, tunhma chuan awmpui an nei ngai lo a ni awm e. Tih tur a tam vak lo bawk a ka lo huphurh lo ve ringawt a" a ti leh duah a, ka pa'n a lo sawisel leh vel a, kan ngaihsak duh tak lohah chuan tum burin chaw a ei zawm a, ka nu'n thawhna nghet a neih chuan kan ziaawm chho veleh mai ang. 

"In luah man hi ba lo hram hram ila, thil dang chu tih dan a awm zel mai. In luah tur a van em hi" ka pa melh ralh chung hian ka ti a, a thil tihsual a hre lo der hmak a, a zu rui chuan chaw pawh a ei hleithei lo a ni ber. 

Ka nu leh pate inhauin ka muhil lai min kai harh a, ka mutna bul ka dap a, a lo la ruak huai mai. Ruah a sur bawk nen, Afeli ka ngaihtuah lo thei lo a, khawiah tak chuan awm ang maw. 

Ka thawh rualin lukham hnuaia ka damdawi dah ka ban a, he thil hi tunah chuan bansan har ka ti tawh. Depression ka neih nasat laiin ka nu min rawn angin doctor ka rawn a, ka damna atana damdawi min chawh kha ka addict a ni ber. A dik loh zia hria a inthiam lo ru deuh chungin ka ei a, ka ei apiangin Afeli leh ka pa dem thei ka nih bik loh zia ka inhre chiang zual ţhin. Mahse, ka dem tho si. Thil ei hma a ka hmawm nghal avangin ka damdawi ei chuan min ti chawmawlhin ka bing leh mup mup tawh a, nuam tihna pakhatmah ka nei lo, chuti chung chuan ka zawngchhang tho a, ka rilru leh ngaihtuahna a hruai kawi ve deuh hi ka zawngchhang chhan ber niin ka hria. 

"I zan leng hian kan mut vek tawh hnuah i ţhiante rui deuh deuh i rawn hruai haw a, hna kan thawh hah tehreng nen muhil hlei thei lovin min siam ziah. I rui duh a nih pawn nupui fanaute tana ninawm lo zawngin rui rawh" ka nu chuan a ti hmarh hmarh a, keipawh towel nen a chhuak si ka ding leh rih a, ka pa awmdan ka hmuh chuan ka awih lo zawk hial a ni. A la hma tehreng nen a lo rui leh chhur tawh. Zu a in nasat vang hian a kum aiin a lang upa a, a sam a ţuak nasa bawk nen, a tar bawih tawh. 

"Kal rawh hnathawk turin chhuak tawh rawh. Duh leh chawhmeh zuar la, duh leh mi inah pawh chuan kal rawh. Hna chhe te i nei a, ka inchhuang e i tia" tiin ka pa chuan ka nu thusawi chu a la kawi leh ta daih a, engmah ni si lo hian a chapo ve em em a, ho te teah thinrim phet a tum ţhin. Pa te zu rui sual chi nei ve ho chuan kan thinrim ţhin hi min hrethiam khawp ang. 

"Nang engmah thawk lo, chhungkaw pa ve si ţangkaina pakhatmah nei lo hian ka hnathawh hi ngainep khanglang suh. Chawhmeh hi zuar lo ila eng nge i ei ang? Mi in a inhlawh reng te hi ka peih bik i ring em ni?" ka nu chuan a ti ve tan tan a, a hah thei em a, ka pa zu rui a khak ţhin hi keichuan ka dem hran lo. 

"Chhungkaw pa ber si nupui fanaute ngaihsak duh lo, pawisa hmuh chhun ang ang zu lei nan a hmang duh i nih kha" a tih lai te chuan ka pa chu a lo ner vel a, ka nu ngainep zeta a ţawng khum lai chuan bualinah ka lut ta daih a. 

Bualin chhung rim chuan pum a ti let but a, ka uak nasa kher mai. Ka luak lo chauh a ni. Zu rim a nam huam a, tui ren ngai viau mah se bualin chhung kil tin mai chu hnar hup chungin ka leih kual a, hmanhmawh viau lo ila chu ka inbual lui thei kher lovang. Bualin pakhat chiah awmin chhungkua a inţawm a ngai a, ka pa'n a hman ve tawh chuan luh hrehawm khawp a ni ţhin. 

Ka nu thawmhnaw tlem te lo awm chu inbual zawhah ka suk sak sawk sawk a, ka tan a hlu em a, theihtawpin ka duat ve ţhin. Awm lo se chu hmanah khan ka thi daih tawh ang. Nu lian tak a ni lo va, mi nute angin thawmhnaw ţha leh man to inbel tur a nei ve lo. A neih chhun hi ka uluk sak a, incheina hun phei chu chawlhni bak a nei lo. A hnathawhin a zir lo em a, a vun leh kut te, a hmai thlengin a no ve lo va, mahse, ka damloh changa a kut thap hrup a ka hmai a chul te, ka taksa a hmeh te hian ka dampui ve sawng sawng tho ţhin. Thinlung taka min ngaihsak tu leh hmangaih tu a ni a, chu chu ka tan chuan dampui tham a ni. Nu hmangaihna thiltihtheih zia ka hriat ve theih nan a ka nu a la dam hi ka vannei takzet a ni. Nu ţha nih dawn hian hausak kher a ngai lo va, rethei te pawh ni se nu nihna hlenchhuak zo hi nu ţha chu an ni mai. 

Ka kal dawn thlengin an la inhau a, ka ngaihsak tawh lo. Ruah a sur reng a, kan veng a mawng bawk si, lirthei neih loh chuan taxi stand thlen nan pawh chhoh fe a ngai a, huphurhawm tak a ni. 

Ka nihliap hman ziah hum ran chungin ka chhuak a, inchungte bathlar a hul hliap hnuaiah chuan ding leh rihin ka ngaichang vang vang a, vanvadak meuhin ka thlir kual vel a, chhum a chhah danah chuan nilengin a sur duh hmel. Ka bag aţanga phone phawrh chhuakin dar zat ka en a, sur nasa viau mah se ka kal tho a ngai. 

Ka nihliap ka kap chiah tihah chuan kawngkhar inhawng rawkin Zualtea a rawn chhuak a, khaw awmdan chu en ve in a ner sawk a, chutah kei min rawn en lehin min huphurh pui hmel ngang mai. 

"Ka thlah mai dawn che mi?" tho phang aw zeta a tih chuan ka lo nui hak a, a aw chu rum deuh anga lang siin a dam ruih tho a, a thinrim loh zia ka hriatchian lutuk vang te pawh a ni mahna le. 

"A ngai lo ang. Taxi stand ka pawh chho ang a, tun ang hunah chuan contri pui tur an tam thei lutuk" ka lo ti a, ka hmelah chuan engmah a lanchhuah loh ka beisei. 

"Ka pa a la chhuak lo..i duh chuan motor in ka thlah thei che. I kal luih chuan i huh vek ang" ka mit a en ran chung hian a ti a, a aw zawi leh thuk ruih maiah chuan min ngaihsakna a lang chhuak a, chu chuan min ti hlim tawk em em tawh. 

"Lalţhazual, lo lut rawh chhung inkhawm kan nei dawn" a nu'n a rawn ti lang lang a, hriat tham mang loh hian a phun hluk a, a che chang eih lo. 

"Lut tawh rawh...chaw ei tui aw" ti a kal mai ka tum chu ka banrekah a lo hmer chawt a, ka hawi let leh rang nasa mai. 

"Ka tlai dawn a nia" ka tih takah chuan thil huphurhawm deuh ti tur ang maiin na deuhin a thaw chhuak hawk a, "Eng nge a?" ngaihţha vak lo a ka tih leh takah chuan "Khawi phone number min pe rawh" a ti bung nghut a, a zam ve deuh nge ka mitah pawh a en tawh lo. 

"I phone phawrh la" ka tih takah chuan a inher vut a, inchhung a luh hlan chuan ka kal daih mai dawn em maw ni ka tih laiin a rawn chhuak leh a, a duh naah chuan a ţuan a rang khawp mai. 

Phone number te ka pek hnu chuan "Thlah i ngai lo tak tak maw?" a ti nawn leh a, ruah baw hawk hawk chu thlirin a sam uk deuh raih chu a tuai thuak a, vun rawng êng chi chu ni lo sela a sam rawng hi a inhmeh lo ngawt ang. Mahse a vun hian a kap a, a inhmeh phian. 

"Ka ngai lo ka tih tawh kha. I nu in a lo koh leh hma chein lut rawh. Keipawh ka kal dawn" tih leh kal ka rual a, an in ka pelh hnu daiha a ka hawi let leh pawhin a dinna ngaiah a lo la ding a, za lo deuhin min lo nuih a, ka kut ka vai zauh hnuah hawi let tawh lovin ruah sur hnuaiah chuan ka pen hlawk hlawk a. 

Motor thawm ka hriat veleh rang lutukin kawngsirah ka ding tawm chawih a, a fimkhur ve deuh ka rin laiin speed ngai rengin min tlanpel a, min chil per hram. Huh hlau deuh a inthiarfihlim si kha ka kekawr hmawr lam chu a huh a, a berh bawk a, ruah sur ka nin nachhan pakhat a ni. Thli a thaw tel lehnghal a, nghet zet a nihliap fawng humin ka kal lui a, tun anga khaw nuam loah chuan nilenga mut a chakawm ţhin. 

Taxi stand ah chuan taxi pakhat chiah a lo ding a, midangin min luh khalh hlauin ka ţhu lut nghal tharh a, mi pathum lai an lo awm tawh. 

"Kan kim chiah a kal ang aw" driver in a tih rualin ka nihliap huh hluam chu a sirah ka tung a, nihliap aţanga tui farin ka pheikhawk a tih huh zual hlauin ka vuan bet tlat a, ruah a sur chuan nuam deuhin a ţhut theih ţhin loh. Ka chuanpuite ho an ti ti bawrh bawrh lai chuan pawn lam ka thlir daih a, mi ti ti lo zawm ve ai chuan suangtuahna rama chen veng veng ka duh zawk ţhin. 

Kan dawr piah deuh a a din rual chuan ka ke ka dahchhuak a, nihliap ka tihparh hnuah pawisa pe in kan dawr ka pan a. A neitu nu, U Mart-i hi nelawm vak lo chi a ni ve a, kan thawhpui pakhat nen phei chuan a ban hma in an inhau hrep nghe nghe a ni. Kei hi ka ţawngtam lova, min tirhna apiangah ka kal a, ka thawhpuiten min tirh pawn ka kal tho ţhin.

Dawr chhung ka luh rualin "Tukin khaw awmdan chu Remruati tan vanneihna a ni mai. Kawr ban tluan kan ha vek sia"  Lalrintluangin a lo ti nghal zat zat a. Chhang lovin ka nihliap ka dah ţha a, ka hnawm chuap tho mai. Ka thawmhnaw ka chul thuak thuak hnu ah a kil lamah ka kal daih a, tu bulah mah ka awm peih lo. Keimah hian ka awm a, ka rilru ka kawm mual mual zel.

Kawrban tluan ka ha ziah hi min nuihzat tawk an awm fo mai. Ka naupanlaiin ka nu leh pate nasa takin an inhau a, kum 10 bawr vel chauh ka la ni. Ka pa taksa a la chak ţha a, contract a khawih ve zeuh zeuh lai a nih bawk avangin inchhungah a in luling lehzual a, choka a ka nu awm laiin gas hnuai pawh dawh a chemte a rawn la chhuak a, chumi ka lo danna lamah chuan kan tui chhuan, so bawrh bawrh lai ngei mai chuan min buak a, khami ţum a ka mangan zia kha. Ka vun kha a pilh vek dawn emaw ka ti hial a, ka pa lah chuan min ngaihsak lovin ka nu kha chemte a vih a tum a, na tak tuar chungin ka dang hram hram zel a, kan thawm hria a mi an lo tlan luh hnuah ka nu pawn min buaipui thei chauh a ni. Kang haw chi ka lo ni kher bawk nen, tun thlengin nalh lo khawpa ser lian zet ka banah hian a awm a, ka thup bo hram hram zel. 

Ka pa hian ka thinlung hliamin miin mit a an hmuh theih loh ser min siam nual a, chu mai chu duhtawk lovin ka banah ser langsar zet min siam sak bawk. Afeli ang chiah khan ka pa hi chu thi daih se tih chang ka ngah takzet a ni. 

CONT..