DEAR DIARY-4

DEAR DIARY-4

"Remruat, engtin nge ser kha i neih a? Pickle min rem pui lai khan ka hmu vuai a, hmeichhe tan chuan ser neih hi chu a hrehawm duh e tiraw?" tih pahin Rintluangi chuan min en ran a, min zawt khawl khawl nain min nuihzat hmel a pu hauh lo thung.

"Aw..hmeichhe tan chuan ser neih a mawi lo bik a, chuvang chuan ka neih chhan ka sawi peih lo" ka ti hmak a, customer ka buaipui zui ta daih a. 

Hei hi a nia kawr ban tluan ka hak ziah nachhan pakhat chu. Ka ser khuh pha lo ka hak chuan ser ka neih chhan min zawh loh leh mak an tih thu te, a mawi loh zia te min sawi khum a, ţhenkhatin an khawih chak tlat zel bawk a. Diktak chuan he ser ka neih chhan hi ka tan sawi reng a nuam lo va, ka thil tawn tawh zinga sawi nawn leh hriatchhuah ka duh  loh ber pawl a ni. Kha zan rapthlak zet mai khan mang lam thlengin min umzui leh ţhin a, ka pa'n ka nu a vau tluk tluk a, kei lah tuiso in min kang nawn tlut tlut bawk a, hremhmun a hremna tuar nawn tlut tlut ang mai ka ni. Hremhmun ah chuan ka awm chiang alawm, tunah pawh ka din mek hi. Kawr ban tluan ka ha hi mak min ti deuh ţhin mah se zawhna ka pumpelh a, ka buaina pakhat a kiangah ngaiin ka thawveng hawk zawk. Khawlum laia miin min nuihzat ţhin hi chu ka tuar thei tawh khawp mai. 

"Hey, i va tlai ve a. Zingah i telloin dawr kan tifai ziah a nia aw" tih hlak hlak pahin Nutei chuan min melh rawm rawm a, U Mart-i cousin a ni a, lehkha a zir peih tawh lo va, hunawl hnawhkhah nan a rawn thawk ve a ni ber. U Mart-i ai mahin a inla thu zawk a, midang pawn an ngaithei lo ţhin. 

"A hun takah ka lokal ziah. I lo thawh ve na a la rei lo va, i hre lo a nih ka ring. Keichu nangni aiin ka haw tlai ziah a, zingah ka lokal tlai hlek zel bawk a, ka thawh tirh aţanga kan insawi rem dan a nih chu" ka ti a, vin ve hauh lovin fiah fai deuhin ka hrilh a ni zawk mah. Kar khat erh awrh chiah a lo la thawk a, midang ţhu hahchawl ve zauh te hi a en liam mai mai thei ngai lo. 

Kan dawr a thawk ho hi kan inpawh tehchiam lo hrim hrim a, Lalrintluangi hian tupawh a nel vek thung. A ţawng peih lutuk hi a chang chuan a hneawm lek lek zel a, mahse a mawng a zang a, tirh a nuam bawk. 

"A nih chu" a ti hlak a, a inher zui hmak a, min kalsan ta daih chu a lawmawm zawk. Ngawi rengin ka tih tur ka ti tawp zel a, customer an lokal in ţha deuhin ka lo chhawn a, tihsual ka nei ngai mang lo chung hian Nutei hian min ngaithei tlat lo. Min khak fek fek a, ka hriat laiin thu pangngai a sawi ngai lo. 

Nidang ang bawkin dawr tu kan ngah lehpek hle a, kan tih tur ang ang kan ti mawp mawp a, hunawl kan neih phawt chuan phone an bih nghal far zel a, tlai lamah chuan chhuar a kan thil rem mumal lo deuh ka rem ţha a, customer an vân tak avangin chhuar phen a ka stool dahah chuan midang hmuh loh turin ka ţhu pil leh ta daih a. 

"I bakilh zawrh lai hi a va tlo lo ve" chu aw thum zet ka hriat rual chuan ka ţhutna bul chhuar a thil inkhai a ri rum rum a, ka lungphu lah chu a su dawt dawt ni maiin ka hria.

"Awii..ka phu nasa lutuk" ka awm dawm pahin ka ti halh a, ka bula ding pa chu dak deuh vah hian ka en a, min lo melh let ve ngur chung hian a hmui a pet sawi zauh a, engahmah min ngai ve lo a ang ber. 

"Hei hi a tlo lo" zawi te, chang zet si a tih pahin bakilh a kut a rawn lek chhuak a, bakilh a keng vang bawk. Dawnfawh lem inbel zawk kha a ni tih ka hre chat a, dawnfawh erawh a awm tawh lo. 

"Thei lem a nia, a ei aniang chu mawle" din mar paha ka tih chuan lo ner nawkin a thle buk a, a awmdan chu a chapo hmel tak tak a ni. Dan phalloh thil lei tir ang mai alawm ka nih le. Hmelţha ka tih ve nen a mizia chu ka lawm zawng a ni tehchiam lo. Lungawi lohna nei sa te pawh a ang alawm. 

"In zawrh to nen, a va thlawn hma ve" a ti leh nghut a, ka lo thaw hak ringawt a, mi hausa sa hi an inren emaw tih tur a ni. 

"In tan chuan a to vak hleinem. Bakah i duh a i lei a nia, thiam lohna ka nei lo" tih pahin ka inher hmak a, a hmel pa zet a chapona langchhuak si kha ka hmu peih hlawl lo. Ţul lo tawpin bakilh ho chu ka khawih kual dan dan a, lungawi lohna a lo nei a nih pawhin keimahah chuan rawn hrithla reng reng suh se. In lama ka buaina hi a tawk viau tawh. 

"I thawhna hmasa aţang khan engvanga bang nge i nih?" palian-a aw thum leh thuk ruih ka hriat leh takah chuan ka kut che vel chu a tawp chawt a, chhan mai ngaihna hre lo va aw ka then kharh lai chuan "I bum em ni? Engvanga ka ţhiante pan zel nge i nih?" a ti leh hluk hluk a, U Mart-i nen an inpawh tih chu ka hre ngei a, ka thawhna hmasa te kha a ţhiante ve tho an ni tih ka hre hauh lo. 

"Eng mi ah nge min ngaih? Ka zui ru che niin i hria em ni?" tiin ka zawt let a, zawi te a a nui suk ri te chu a ngeiawm lam lek lek chu a ni. Mahse awlsam tein thutlukna ka siam ve ringawt ngai lo. Hepa ka huat hma hian Pu Sena te nupain thiam chan nan eng thil nge an lo hrilh ka hriat hmasak a ngaiin ka hria. 

"Mi bum ching..mi bum tur zawng kual ţhin" ngeiawm fahran a a tih lai chuan nghet zeta ka kut hum ruh chungin ka inher a, ngen hmel zetin a dak deuh vah a, min cho zek zek a ang ber. 

"Thawmhnaw changkang deuh inbel ziah mah la kei aiin i mawl daih zawk" ka tih chuan min ngaihtheih loh hmel fein a lo rum nghut a, ka lo nui seih thung. 

"Ka pu, kei chuan" ka tih lai mek chuan min lo pawt chatin "Min pu tei vet suh" a ti hluk a, a va han thinchhe chiang tak. Misual hmuh a min hmuh vang a ni phawt ang. 

"Ţhianpa, kei chuan ka finfiah a, thudik tak ka hre phawt a nih loh chuan mi ka dem ringawt ngai lo. An chungchangah thutlukna ka siam tawp ngai lo bawk. An pawnlam landan leh miin an chanchin an sawi danin min ti chiai nghal ringawt ngai lo. Chuvang chuan min hrechiang hmasa lovin kha tiang khan min rawn puh ringawt tawh suh" ka sawi zawh chuan thawk ka la halh a, ka hmaa kei aia lian daih ding pa chu ka melh pah bawk. 

"Tu nge i nih?" nghet zet hian a ti a, a hmel landan dam ta thlup mai te chu a awihawm loh zawk. 

"Lalremruati" ka ti mawl tawp a, ka chhanna chu a duh khawp lo tih hre tho mah ila sawi belh vak tur ka hre chuang lo. 

Min kalpelin ka bakilh rem ţhat sa chu a hai rawk rawk a, "Naupang tan thil tlo tak tak a awm lo" pangngai taka tih paha a bula ka din ve chuan bakilh ţham khawm ţun chungin min lo en zawk a, "Ţawngkam nem nazawngin min bum ve thei ngai lo vang" rum ul hian a lo ti ve thung a, hawi sawn leh rang viau mah se a meng tal tap chu ka hmu hman a, eng emaw chuan a ti buai chiang a ni. 

"Zonunmawi, i va rei em em ve. Thlang vat vat la lo phei rawh thingpui a dai dawn" kan boruak hre lo fein U Mart-i chu a rawn ri bawrh bawrh a, Palian-a hming pawh ka hre ta chiah e. 'Zonunmawia' tiin ka rilruin a hming chu ka lo sawi ve a, ka ngaihdan dik zia ka hre ta chiah bawk. Mi rethei te hi buaina in min zuam bik reng reng lo, he mi hausa pa pawh hian buaina lian tak chu a nei ngei a ni. 

"Sangsangi chuan a ngen leh char char tawh tihna em ni a? In nu ko leh mai rawh ka ti ka tia lawm" nui har har chunga U Marti thusawi chu hrethiam lo zetin ka lo ding ve ran a, phun hluk paha Zonunmawia kal nghal nulh chu ka enzui leh a, a ţawngkam lah chu a chhe em em mai lehnghal. 

"Kha i enzui leh tawh a nia" nui rah rah chunga ka bula Rintluangi lo ding chu thip fe in ka lo melh a, ka mit pawh a thip vek thei tak tak. Ani lah chuan kut hnung a suih at a, mitmeiin min chhaih pah reng bawk.

"Tukinah a chanchin ka zawt chiang a, U Mart-i sawn min hrilh ţha duh reuh lutuk" tih pahin counter lam a thlek zauh a, Zonunmawia chu U Mart-i hmaah a ţhu a, a hmel landan pawh a chang leh viau tawh. Vawiin chu a mumal lo takzet a ni. 

"Ka u thawhna hmuna an professor a lo nia, nakinah ka u pawh ka la zawt chiang ang. Pathlawi a nih saw" a ti a, chhuar nghengin thatchhe zetin a ding a, nupui pawmlai nei turah ka lo ngai char char a, a lo pathlawi ve reng chu a ni si a. 

"Ka thawhna a la rei bik lo a, ka hmuh tirh phat aţang khan hna ţha tawk tak a thawh chu ka ring sa hrim hrim a, ka u thawhnaah a thawk ve ang tih rin ngaihna ka hre lo thung a, pathlawi a nih chuan a landan saw inhip tir duh miah suh, an lerh duh teh mai a nia" a ti zat zat a, kan inhnaih a hlau nghal der niin a lang. Pu Sena te nupain bum hmang anga min lo sawi a nih chuan amah zawk sawn min hnaih duh hauh lo ang. Mahni nunna la tur ni a min ngaiin min ţanpui a, tunah bum hmang min tiin amah bum tumah min ngai leh a, nunhlui ţha lo eng emaw tak a neih rinna keimahah a lian sawt hle. 

"Fa pakhat an nei tawh a, kum5 a ni ve tawh a, kuminah sikul a lut ve chiah a, an fanu kum3 a nihin a nupui nen an inţhen a ni awm e. Kum2 zen zawn a pathlawi tawh tihna a nih chu. Pathlawi ho hi chu ka hlau riau mai a ni, hmeichhe bum an hreh si lo, hausa deuh phei chuan an pawisa hmangin hmeichhia an thlem a, natna ţha lo kai palh te a hlauhawm" a ti leh zung zung a, ka ngei zawng tak a ni. 

Ka nun a hrehawm em avangin thil reng reng a eng zawnga thlir ka tum tlat ţhin a, chutiang a nih laia kan mihring puite ngei, nupui/pasal ţhen an nih tak avang maia misual leh ţawp ber anga an ngai ţhin hi ka haw riau zel. Engamah hmain kan en tleu nghal ringawt zel a ni ber. 

"Ehh...Remruatin hruai tu a nei ve ngei" Siamin a tih chuan an lo nui dar dar a, min chhaih vel mai maiah ngaiin ka ngaihven lem lo. 

"Remruat, dawr kawtah khuan tu emawin a nghak che a nia, bawlhhlawh ka dah chhuah laiin i haw theih hun tur min lo zawt alawm" Siami bawk chuan a ti leh lang lang a, keipawh enchiang turin ka kal ve ta nge nge a, step ah pawh chhuk lovin dawr kawta ding chung chuan ka hawi kual a, reiloteah kan dawr bul parking a Zualtea ding chu ka hmu a, ka hamhaih viau laiin naupangin a nu a hmu ta ang mai hian kut a lo vai lauh lauh a, ka nui chhuak ta hawk a. Hepa tak hi chu aw. 

"I bang thei ţep tawh em?" a ti lung lung a, "Minute 10 vel chiah a ngai tawh" ka tih chuan a sana bun lai chu bih nghal vutin "Darkar chanve ka awm tawh" a ti lauh a, a nur nang bawk a, a ning thawkhat tawh tih chu a hmuh nghal mai theih vek. 

"I lokal hma lutuk a nih chu" ka tih chuan "I ban hun tak ka hre lo alawm. Phone i la thei si lo" a ti nang nang a, khawngaih viau mah ila U Mart-i ka hmai zah avangin dawrah chuan ka ko lut duh bik lo. Min nghak lawk tura ka hrilh hnuah ka luh san a, ka thawhpuite chu an lo la nui ţha mai. 

"Induh, luhlul leh ţawng mawh ve deuh emaw ka tih lai chein bialpa i lo nei ve reng a" Siami chu ţawng chhuak hmasaberah a ţang a, ka mizia ni awm a a rin a sawi te chuan nuam lo ti hmel pawh a pu chuang lo. 

"I hresual a nih chu" ka tih lai a "Ka rindan alawm. Duh loh zawngah chuan mi chaldelh thiam deuh i ang a" min tih leh phei chuan ka nui ta tawp a, ka mizia hi an ngaih ang lo deuh a nih thu min hrilh fo reng a ni. 

"Nakinah lo la leng ve rawh aw. Chaw te i lo ei ang a, keipawhin ka lo la tlawh ve ang che. In nelna zel a nia" bag lak paha Rintluangin a tih chuan ka aw liam mai mai a, a tan hi chuan ka ninawm ve thei ngawt ang.

Zualtea zawn ka thleng chiah chu rei tak min hre tawh ang maiin ka darah min lo kuah nghal chawt a, ka rilţam leh ţam loh min zawh chuan a ţam loh thu leh haw tlang ka duh thu ka hrilh a, a lo remti ve mai bawk. 

Bike chuang ţhang lo tih takah a jacket ah ka ţham bet ţung a, kawng chhuk lai kan tlan thlen veleh a jacket a ka vawnna chu thlahin a hnungah ka nam leh ţang ţang a, ka âwm leh a hnungzang a insik palh ka hlau a ni. Ka tawlh zel lehnghal a, ka che buai lutuk lai chu min rawn hmu hauh lo mah se min nuih a ni tih a taksa che dawtah chuan ka hre thei. 

Kawng zawl lai chin kan thlen leh takah chuan Zonunmawia bawkin rilru a luah leh a, engati nge khatianga min rawn tih ngawt le? tih chu ka zawhna lian ber a ni. Tu emaw in an lo bum ve tawh tihna em ni dawn? tih tein ka inzawt a, Pu Sena te chuan engpawh lo sawi se, a ţhiante dawrah pawh lo thawk zel mah ila bum tu a lo nei tawh a nih loh chuan khatianga min rawn tih ngawt kha ka ring lo. A ţhianpa ber Pu Sena khan a sahuat lai hriain insawithiam nan amah zui ru a bum tum angin min lo sawi a nih ka ring ta ber. Professor ve lai lehnghalin khatianga min rawn ti duh a nih chuan chhan a awm a ni khawp ang. Ka huat phah lo va, hriatchian ka chak phah sauh zawk. Mak min ti em? Ka hriat ngai pawh ni lovin bum hmangah min puh a, chuti chung chuan hriat chian ka la chak cheu a, a hmel ţha leh pa tak vang kha em ni heti fakau a ka rilru a luah tak hi tih zawhna te chu kei ngei pawh hian ka chhang thei rih lo. 

"Inhnuai nu" Zualtean a tih takah chuan "Eng nge i sawi mek?" ka ti nghal hlut a, a thusawi pakhatmah ka lo hre der lo. 

"In ngaizawng daih ang ka ti" aw zangkhai vaha a tih chuan ka vawnna ka thlah rawk rawk a, kawng chhe lai kan zawh mek ni tur a ni kan sawt euh a, rang lutukin a jacket hmawr bawk chu ka ţham leh rawk rawk a, ka chet dan zawng zawng chu rawn hmu ve vek ni awm takin a ri meuhin a nui ta hawk hawk a. 

"Thil ni lo lo sawi suh" ka ti hlak a, ka taksa lah chu ka hmai thlengin a sa hat hat lehnghal.

"Ţhian nih ka peih leh lo. Ka bialnu ni daih la" nuihza aw zet hian a ti leh a, min fiam kual mai mai niin ka hria. 

"Hetianga i tih dawn chuan min lo hruai tawh suh" ka ti ta hmak a, a nuih a za viau mai.

"Tak taka ţhian atana ka duh chi bak i ni hleinem. Eng nge i lo ngaihtuah vung vung a?" a tih chuan ka thaw deuh huai a, an inkawt kan thleng chawpchilh nghal bawk. 

"I hriat ve chi loh" a kawr vuan ţang ţang chunga bike aţanga chhuk pah a ka tih chuan za lo zetin a lo ţhen suk a, ka nuih a za ru viau na a ka nui duh bik ţhak lo. 

Bike a dah ţhat lai chuan "Eng angin nge min hmuh?" ka ti chhuak phawng a, Siami min hmuh dan khan ka rilru a luah hneh ngang ni tur a ni Zualtea min hmuh dan hriat ka chak tlat. 

"Mihring angin" a tih chuan "Uang lo teh" ka lo ti nang nang a, "Mihring angin ka hmu che" helmet phelh paha a tih chuan ka lo chek tlak a, a sam a tuai mawlh mawlh lai a a nui suk suk te chu ka lo hmu ru ve ran a, min fiam mai mai ka tih reng kha. 

"Titi pui i nuam a, kawm i nuam a, mihring i ni bawk a" a ti leh tawh a, tuman titi pui nuam min la tih ngai loh avang chuan ka nui tet tet a, dawt a sawi mai mai a nih ka rin viau laiin "Mi hmuh dan che ngaipawimawh suh. Nangmah kha inringtawk la a tawk mai. I ţha ber, chu chu hrereng rawh" a ti nghet churh a, hei tak hi a nia ka tana Zualtea pawimawhna chu. Inlaichinna chuan tawp chin a nei ţhin a, inţhianţhatna chu a tawp ve ngai lo. Chuvang chuan inlaichinna neih pui ka tum lo hrim hrim. 

"Ka haw dawn" ka tih chuan "Zanah ka lokal ang" a lo ti ve nghal zat a, lu ka bu zauh a, ka haw hreh em em na ţhin kan in chu ka pan zui hnak hnak a. 

Ţhutthleng seiah ka pa a lo hnar thlurh thlurh a, a ke lehlamin chhuat a rap a, lehlam ţhutthlengah a hlang a, chhuatah jacket a let bal a, a kawr hak lai a inhlim tun a, zu rim a nam huam bawk. A mutthilh lai lehzel pawn a bengchheng a, ti hian a rawn harh anga, thinrimna ngawt a zawng leh ang a, ka pa hi chu a hahthlak a ni. 

Choka ah chawhmeh a lo awm nual a, ka nu chah a lo thleng tawh tihna a ni. A tam zawk chu a phur chhuak a nih ka ring. Bag ka dah a, mawng pawh hung lovin ka che nghal char char a, ka nu hi awl hram hram ka duh ţhin. A taksa mai bakah a rilru a hah lutuk a, kei talin ka enkawl ţhat loh chuan min dam rei pui loh ka hlau a ni. 

Ka chau lutuk chu khumah ka let hnawk a, ka pa a chhuak leh tawh a, cooker si ser ser lo chu kan inchhungah thawm dang a awm tawh lo. 

Dear Diary,

Mi ţhenkhatin ngawichawi deuh anga min hriat laiin ţhenkhat chuan titi pui nuam min ti a, ţhenkhatin luhlul min tih laiin ţhenkhat chuan nunnem tak angin min hmu leh daih a. Mi ţhenkhat chuan chapo tak angah min ngai a, ţhenkhat erawh chuan ka koki a lu nghat chung ngei a thawnthu sawi malh malh nuam an ti leh daih thung a. Mi ţhenkhat tana ka pawimawh loh laiin ţhenkhat tan ka hlu a, hetiang thil te tham te te hi ka hmuh hmaih ngai lova, midang tana hlu ve nia ka inhriat ngat phei chuan ka lawm ru hle ţhin. 

Kalkawng a kan intawh chang pawh a min biak tum miah lo an awm leh a, chutih rualin min hmuh ruala min kuah nghal mai hreh hauh lo an awm bawk. Min hmu fiah reng chung pawhin ţhenkhat chuan mahni ngaihdan tê neiin an ngaihdan chu an pawm thlap a, ţhenkhatin mi thawnthu phuahchawp hmangin ka chanchin chhe lam an lo hria a, chuvang chuan min kalsan an thlang ţhin. 

A bak zawng chu ka tlin lohna leh felhlelhna ten ti beidawngin ti thinur ţhin mah se la, an tan ninawm viau ţhin mah ila an awm hnufual a, ka rualin an kal zel tho ţhin. 

Ni e, miin min teh a, min chhiar reng ţhin a, engtikah mah min teh tling dawn lo tih hre mah se an bansan thei chuang lo. Mahse, an thu a ni a, insawi fiah a, kan dikna hmuh tir kher an ngai lo. 

Min haw tu leh hmangaihtu; he thil pahnih hi kan neih ngei ngei tur an ni. Engang pawn insawifiah ila min haw tu chuan a ngaithla lo vang a, min hmangaihtu chu midang thil sawi leh ngaihdan mai maiin a ti buai lo vang a, a ngaihsak lo bawk ang. 

Min haw tu te min teh dan leh ro min rel sak dan hi engmah a ni lo, min ti hnual tu chauh a ni ţhin. 

Vawiin lama thil thleng ngaihtuah ran chunga ka ziah zawh hnu chuan khum aţangin ka tho a, dawhkan a lehkhabu inchherchhuan karah chuan ka zep a, Zonunmawia min tih dan khan rilru a luah reng mai. Nidanga kan inhmuh chuan pangngai deuhin kan inbe ţhin a, mi bum hmang ni a min hriat hnu kha chuan min ngaihnep zia a lanchhuah tir hial a nih kha. 

Tukverh bula din pahin ka sam chu ka chhip ah ka tuai chho a, Pu Sena te nupa kha dinhmun ah ngat phei chuan kei a el phak an ni hauh lo, a thil tih dan tenawm tak avanga dawt a min lo la mawh puh duh zawk chuan thisen a ti lum ve bat bat thei a, ka rindan hi a dik a nih phawt chuan Zonunmawia hnenah tal ka dikna hi ka la sawi chhuak ve ang. A ţhianpa kha mi thianghlim a ni mawlh lo va, chu chu hreve reng reng rawh se. 

Ruah a rawn tlak leh siar siar takah chuan ka kut ka dah chhuak a, ruah malin ka kut a rawn far chuan ka kut phah vun te chu a vawt nghal sang sang a, ka kut a ruah mal rawn far chu hmuhnawm ti takin ka thlir a, mitthi tawh te taksa hi a vawh thler ţhin avangin ka naupanlai chuan rual mal tin te hi mitthi tawh te mittui rawn tla ah ka ngai ţhin a, an chhungte an ngai ve ang a an ţap a nih dawn hi ka ti mai zel. Ngaihdan atthlak tak tak kha ka nei ve ţhin a, khang hunlai kha a ngaihawmin thil awmzia ka hriatthiam tak tak hma, panlai hunah ngei mai khan ka kir leh chak ţhin.

Ka nu leh pa rawn inzui haw chu an inhau a ni nghal der a, ka pa chuan ka nu chawhmeh hralh bang ho te chu a pawt darh a, kut ka thlak chak et et a, min hneh dawn lo tih pawh ka hria, mahse ka pa a nihna hian min dal tlat si a ni. Nu leh pate hi rui thle mai mai mah se an ropui em a, ka pa hi thi daih se tih chang nei ve ţhin bawk mah ila kut em chu ka thlak ngam ngang lo a ni. 

Zualtea lokal chuan chaw kan lo la ei a, "I va hma ve" lo ti mah ila ngawi ngulin chhuat a chawhmeh la darh deuh nuai chu a enkual a, ka nu rilţam a khur ti tih a, tifel hmasa lovin chaw kan ei ta kha a nia, ka zak chem chem mai. 

"Ei ţeuh rawh u" tih leh ţhutthleng sei a ţhut a rual a, a aw chang zetah chuan a thil hmuh chuan a ti lungawi lo tih a lang vek. 

"Lo ei ve la..hei Matein chaw a chhum ţeuh alawm" in la hawihhawm zet maia ka pa'n a lo tih chuan "Ka puar tawh. Nangmah khan ei ţeuh rawh" a lo ti a, rin ai takin a aw a dam a, chu chuan thaw a ti veng huai mai. Sual viau mah se ka pa a ni miau a, a faten hmusit ţhin mah ila midang chuan hmusit ve lo se ka ti tho, ka maksak ve khawp mai. 

"Zualte, i nu leh pa an awm em? Zanin chu ka'n leng chho teh ang" fiah mang lova ka pa'n a tih leh chuan "Aw awm e..han leng rawh. An lo lawm viau ang" pangngai takin a lo ti leh a, ka pa pawh a phur hmel takzet a ni. 

Hmun ka tihfai hnua pindan a ka lut chu ka nu'n min zui lutin "I nutei te inah ka riak dawn a, i lokal ve duh em?" zawi te tak tak hian a ti a, Zualtea hriat a hlau a ni mahna. Lu ka thing a, a puan bah lai chu siamţhat sak pahin "Va awm thawveng rawh. I tih dan takah naktukah chuan ka pa pawh a zia tawh mai ang" ka lo ti a, a mit a la bui lak a, ka pa'n chawhmeh a sawisak hneh em avang khan a rilru a na ve a ni. A thlawn a kan neih a ni bik si lo va. 

"I pa hi chuan min sawisa hneh khawp a nih hi. Lalruatfeli lah a lo haw thei bawk si lo. Ka ipik lutuk hi ka zo lo mai dawn. I nutei bulah ka va awm hahdam teh ang" chau rau zet hian a ti a, a hmel a ngui nghiai a, a mitmeng a dul raih bawk. 

"Afeli chu a lo haw veleh mai ang, a tih ziah dan a nia, ngaihtuah lutuk duh suh" ti a ka hnem chuan "A chang chuan fa ka nei hi ka inchhir rum rum ţhin. In retheih hlauin ka thawk a, i u paw chunga inhlawh chang lah ka ngah. In a ka awm hman miau loh avangin Afeli nun a kal sual a, hau mah ila tunah chuan awmzia a nei tawh lo. A hlauh ber tur i pa lah zah tlakin a awm bawk si lo. Lo ţhen ta ila Afeli leh i pa nun a tawi phah ka hlau leh tho si a, min ti buai takzet a ni. Mahse, ka duh thu ngeia i pa hi nei ka ni a, duh reng vanga fa nei ka ni bawk. Ka inchhir ka ti ve ţhin tak nain ka duhthlanna vek a ni a, ka hring cheu a, ka enkawl zo leh si lo cheu hian min ti hrehawm ţhin tho a, engkim hi a kal dik lo zo vek tawh" a ti bawrh bawrh a, a ţah a chhuak tih ka hria, Zualtea nen a kan awm ve avangin a insum mai mai chauh a ni. Ka nu hi hmeichhia ah chuan a chhel ber pawl a ni ngei ngei ang. 

"Ka fanu awmna chin hrelo a ka awm ţhin te hian rilru a ti hrehawm a. Khawiah nge a awm ang? Mipa a awmpui angem? A ruang kan chhar ve mai angem? zawhna a tam. Ka ţawngţai mawlh mawlh reng a, in hming lam lo hian ka ţawngţai ngai lo. Vanduai viau mah ila keini aia vanduai an awm ve zel tih ten ka inhnem a, kan rethei lutuk te hi ka khawngaih ţhin cheu a, tih theih vak ka nei silo" a ti a, mi hnem thiam lo chi ka nih avangin ka nu thusawi pawh chu ka ngaithla mawl tawp a, a rilru dam nan a sawi tur ber ka hre lova, chezia a lan tir ka thiam bawk si lo. Mahse, ka ngaihdan chiah a ni. Keipawn ka laizawn neihchhun hi a tualthi mai ang tih ka hlau ţhin.

"Afeli chu biak ka lo tum ang. Ka nutei te inah hahdam deuhin va mu la, ka biak theih veleh ka lo ko haw dawn a nia" ka ti a, a kaltur pawh kawngkapui thlengin ka thlah a, muangchanga a pen chho chhat chhat thlir chuan hnuk a ulh thei hial a, a kal liam thlengin ka thlir a, a liam veleh Zualtea bulah ka ţhu ve a. 

"Chhungkaw pa berin an mawhphurhna an hlen loh chuan a buaithlak a nih hi tiraw?" a lo ti a, min en chik lutuk chu ka zam lek lek a ni. 

"A ziaawm veleh mai ang" tih liam puat paha a ţhut lohna lama inher ka tum chuan ka darah a lo hmer a, ţhutthleng nghen chhan si chet khawpin min nawr bet a, ka chungah a thin a rim hauh lo thung. 

"Ka ţha alawm...ruih sual chang a nei a, a ruih laiin ngei viau ţhin mah ila zu a nghei hi chuan mei zuk tur a neih loh te hian ka khawngaih leh tho a" ka ti a, zawi deuh a ka ţhut awn tak diai ah chuan min dawmna chu thlahin nghenchhan ah chuan a ban a rawn kham a, kan inţhut hnaih tawh khawp mai. 

"I pa a ni miau a" a ti zawi sup a, keipawh chuan "Ka pa a ni miau a" ka lo ti nawn ve a, thisen hi chuan thil a ti thei a ni, chhungkaw inhmangaihna aia hmangaihna nghet zawk hi a lo awm hauh lo. 

"Naa..tupawh chu lo nise i tan ka awm tih hria la a ni mai" nem fahran lo a a tih chuan ka rilru a no ve ringawt nia mawle! Ngaihsakna awka ka dawng khat a, Faktea lo chu ţhianţha han tih tur pawh ka nei lo. School ka kal pui ţhinte nen kan inbe tawh ngai lova, rilru ipik lai taka hmangaihna awka ka dawng ve chuan hnuk a ti no a, ka mitah chuan mittui a tling pam tawh tih ka khawhmuh a fiah loh danah chuan ka hre thei. 

"Sawi sual ka nei em?" zawi ruih a tih pahin Zualtea chuan ngunthluk fahran hian min thlek a, ka awmdan a hmuh chuan mangan hmel zetin a meng tal tap a, "Ka hauh lai che ka hre miah lo" a ti a, ka khabe a rawn dawm nghal zat bawk. 

Min kuai dak chiah tihah chuan ka mittui chu a luang ve ta nge nge a, ka ţah khat tehlul nen, reilote chiah ka la hriat hmaah ka ţap chu a ni sia le(h)!

"Mittui hian ţangkaina a nei tlem teh a nia" zawi te tak tak a tih pahin ka biang a mittui luang ngiai ngiai chu a tuai fai a, ţap lo tura ka insum nasa lutuk chu ka hrawk a ri hrawih a, ka khabe a sai dar dar bawk a, a kut a ka biang a nul hauh hauh takah phei chuan ka hmui ka pet ta ringawt a. 

"Tun chinah chuan i lungngaih chang apiangin min lo bia la, lak kian sak che ka lo tum ţhin ang" thutak zet hian a ti a, a mitah tak en chung chuan ka nui ta seih a. A mitkhur a thuk deuh dak a, a mitmu dum leh fiah kak ah chuan ngaihsakna tak tak ka hmu a ni. Thil engkim mai hi ka chik em em zel a, Zualtea hian lem a chang hauh lo. 

Ka inbengdaih hnu chuan inngheng rialin kan ţhudun a, tv kan en dun ran na a kan rilru ve ve kan kawm tam zawkin ka ring. Ngawih rauh rauh reng chu a ning ta deuh a nia nge meizial a ţan a, tui tih hmel zet a a han si vel te chuan ka khabe a tv remote nawr pahin ka lo nui var var a, ka mittui a tlak ve vang nge ka mit a thip ram mai. 

"Zualte, i nu'n BDS tih zawm leh i tum niin a sawi a, mahse nu te hi chuan an duhzawng min tih tir an tum deuh fur ţhin a, eng nge nih i tum?" ti a zawh pahin ka thlek ha a, en pawh min en lo hian "I nupui nih ka tum" a lo ti pek a, "Nu-i min ti tawh rawh aw" uang zet a tih pahin min rawn en zawk a, tv bawk melh lehin a nui suk suk a, remote chuan a malah ka chhu chawrh lo chauh a ni. 

"Nih leh engati nge min ngaihsak a? Kan inhre ţhang pawh a ni tawp si lo a" ka tih leh chuan "Ka ngaihsak chak che a ni mai" a ti nghut a, a aw rum lutuk avang chuan a thinrim ta mai emaw tiin a hmel chu ka en nawn leh ngat a, min lo en ve chiahin "Eng nge?" a ti thum dut a, lu ka thing ta ringawt a. 

"Ka hriatna che a rei tawh. I chut lutuk a ka pawh duh lo che a nih kha" thawven hmel zeta a tih pahin ţhutthleng nghenchhan ah bawk a ban a rawn kham leh a, phawk hrain ka lo en thung. 

"Min hriatna a rei tawh maw?" ka tih deuh ha chuan lu min buk khum nghutin za lo zet hian a kiai suk a, "Heta in lo awm hma aţangin ka hre tawh che" a tih leh phei chuan ka ding hluai lo chauh a ni. 

"In in kan luah hma in min hre tawh maw?" ka tih leh chuan hahthlak tih hmel zet hian a chek hlak a, "I hriatreng chu min zawt nawn kher lo teh" a tih hnuah pawh "Min hriatna a va han rei tawh awm em em" ka ti a, anu sawi dan hmangah phaiah a awm nasa a nih hmel sia, dawt a sawi a nih te ka ring rum rum mai. 

"Kan veng kawnah ka hmu nawlh che a, kan venga ka awm tawh phawt chuan i school bang ka chang ţhin che" a la ti zui a, awih lo lutuk a ka nuih hak hak lai chuan "Mahse ka zui ru ngai lo che" a lo ti leh a, a kum zat ka zawh chuan ţha deuhin min hrilh ve mai a, kei aia a upatna a la tam vak lo zui a. 

"Lehkha i thiam thei a ni maw?" tiin ka phun sap a, min chhang lo thung a, ka duh chena sang zir ve thei ila ka ti ngawt mai. 

A haw tur ka thlah te chuan min kai a, ka duh lo chungin min pawt chho a, ka kut awl lamin a kawrah ka ţham a, ţang nasa viau mah ila an inkawt thleng ţhakin min kai lui ta tho a. Min hmu ţhin angin a insawi ve tak nain a tam berah vawi10 vel bak a nih ka ring lo. Chawlh a nei khat dawn a, min hmuh zut reng ngaihna a awm bik lo. 

"Nangmahin i awm ngam angem?" min ngaihtuah hmel taka a tih chuan "Keimah chauhin ka riak ngun lutuk" ka lo ti vat a, kan inthlah fel takah chuan ka khua a har ve ruih mai. 

Kan inkawm chho zel a, Afeli pawh a lo haw a, a fawr bo leh ţhin a, ka nu pawh a hna hmuh thar chu thawkin a thawhna te fel zia a sawi chamchi a, ka pa'n buaina a siam chuan Zualtea ka ko a, min rawn pui vat ţhin. Zu a nghei duh miau loh avangin ka nu nen thawk chhuak reng mah ila hma kan sawn thei chuang lova, rilru hahna a kiam thei tak tak lo. 

Zonunmawia pawh dawrah a lokal zeuh zeuh a, thinrimin min tawng khum tawh ngai lo, kan inbe ngai miau lova. Bakilh a rawn lei tawh ngai lova, min hre ngai ang pawhin a awm tawh lo. Kei lahin kan dawra a lokal apiangin ka ngaihtuah zui a, mawl inti viau mah ila ka hriatna aţang hian ka dah bo thei tawh lo. Ka bialpa ngei pawh ka rilruah a cham zui mang ngai lova, ka mipa vei hmasak ber a ni hial awm e. Min ngaihdan hi a dik lo tih a hriat hunah chuan a inchhir ve ram ram maithei a ni. 

CONT..