DEAR DIARY-5

DEAR DIARY-5

Zingkar aţangin kan dawr chu a reh lo tih theih a ni. Inrinni ah hian kan buai zual ziah a, mawng hung hman lo lek a phar buai chang lah kan ngah. Mipui an rawn lut chhuak zut reng a, nu pakhat ipte puar lutuk ak phei chuan a thil duh min rawn zawt a, kan neih loh thu ka hrilh hnua a inher na lamah chhuar a kan thil rem tlar ţhap chu a tauh thla rum rum a, hna min rawn pek belh mai mai a ni tih inhriain a inthlahrung khawp mai. 

Chhun chawlh lai chuan "Ehe...Sangsang kan va inhmu khat ve" tiin U Mart-i ber chu a phul hlut a, ka chau lutuk chuan a mi biak lehzel chu ka va ngaihven peih ta lo. Mahse, "A fanu a rawn hruai a nia" tih paha Rintluangin min sawi nawk nawk takah chuan chhuar phen aţangin ka bih dek dek a, Zonunmawia chu counter hmaah a kekawr ipte zen hlunin a ding a, U Mart-i leh hmeichhe naupang infiam vel chu hmuhnawm tih hmel taka melhin a lo nui ve suk suk a, keiin amah ka lo thlir ve dauh dauh bawk. 

"A nupui hlui a hmelchhiat nen fanu a va nei hmelţha em em" Rintluangi chuan a ti leh sar sar a, a nupui hlui thlengin a lo hre leh bik tawh nia mawle!

"Em em che hian..a nupui hlui thlengin i hre vek tawh maw?" amah melh rawm rawm chunga ka tih chuan a nui hak a, inchhuang tak hian a dak deuh vah bawk. Keiin a ruka thlir reng mai loh chu a chanchin ngaihven zui vak dan ka hre lo va, Rintluangi hi chuan a ngaihven zawng chu a hre thei lutuk tlat. 

"Instagram te hi i hre ve em? Mizo pawn kan hmang nasa tawh a, kan professor te nupa pawn an hmang ve alawm. A nupui chu hmu ve la mak i ti ngawt ang, Zonunmawia hi a chhiat loh bakah professor lai a ni ve a, duh ngat se chu kan ram a model lar ve tak tak te pawh hi a nei daih thei ang chu. Mahse maw..a nupui hlui chu a ha a kuh" a ti mauh mai a, a thutak em em mai lehnghal. 

"Ka awih lo e..i sawi uar leh tawh a nih kha. Diktak chuan Zonunmawia hi tuman 'a hmelchhe e' an tih ka ring lo. Chutiang a nih lai kara nupui ha kuh neih te chu a, a awm ang lo lutuk" ka ti hlak hlak a, ani lah chuan a chungchangah kan ţhiandunin kan inhnial mek tih hre lovin a fanu chu a pawm a, dawr thil vel chu a enkual pui a, a duat hmel takzet a ni.

"Ha kuh han tihah mawi lo lutuk chu a ni lo, mah se ha hmai pahnih langsar deuh chi ang kha a nia, lawk aw ka entir ang che" a ti a, a thil eina plate chu leiah dahin phone a phawrh a, a thai zui mual mual a, eng hmel tak pu ang maw?

"En la" a tih takah chuan rang deuhin ka en ve vat a, a hmelchhe awzawng lo. 

"I sawi uar a nih ka ring reng a, a hmelchhiat loh tawp hi. Hetiang ha hi tuman ha kuh an ti ngai lo" tih pahin phone screen chu ka kawk a, a ha hmai chu a sei deuh bik ngei a, mah se a ha dang chu a rual ţha lutuk ringawt. Amah lah chu a vun a ngoin a thianghlim a, kawr dum a hak naah phei chuan a lang fai sar mai. Zonunmawia a hmelţha em a, annu kan hmuh ţhat loh phah mai mai zawk a ni. Kan mipa duh deuh ten nupui an lo neih tawh chuan an nupuite chhiatna lai kan zawng char char zel alawm. 

"An chanchin i chhui nasa hle sia, an fanu saw i hmu ve chiah tihna mi?" ka tih chuan "Hmu chiah e..en ta che..an fanu thlalak an tarlang ve reng reng hleinem" a ti a, Zonunmawia nupui thlalak chu min enkual tir a, naupang thlalak a awm lo tak tak bawk. 

"A van mak em em..fate thlalak chu tarlan mawlh mawlh zawk awm tak a nia" ka ti ban charh a, U Marti naupang chhaih thawm kan hriat leh chuan chhuar phen aţang bawkin kan bih leh dek dek a, Zonunmawia pawh chuan kan awmna lam lo hawi ve chiahin kan mit a intawng chat a, ka biru lehnghal vat a, Rintluangi hmai ka la tauh chawrh zui. Min hmuchiang lutuk ringawt. Kan awmdan naupangchhia zet chuan nuih a tih zat viau laiin hlauhthawnna ka nei tel a, ka thinphu lah chu a la rang em em zui a. Hepa ka hmuh tawh hi chuan ka hriatthiam miah loh min ti danglam dawt tu hi a awm ţhin. Boruak eng emaw riau hian min tuam ţhin ni maiin ka hria. 

"Rintluangi leh Remruati pawh an awm reng alawm. Ka la buai em hi" Nutein vin deuh hlara a tih takah chuan Rintluangin a eitur la bang ho a ei sawk sawk a, keiin plate ruak ka dah ţha ve thung a, mi enthlak ruk chu a zahthlak e, amah zui ruk tumah min ngai leh vek ang. 

Kan buai leh mawp mawp a, Zonunmawia te pafa pawh an reh leh vang vang tawh a, inrinni a ni kher bawk nen, bazarah an kal ve dawn a ni maithei. 

Tlai lamah chuan thlanin min bual nasa tawh hle a, lu lei zawng zawng nen a hnawng chuap tawh a ni ber. Ka thawhpuite pawhin an taksa thlan avanga ban deuh chap tawh chu tuai thuak thuak pahin "Ka inbual chak tawh" an ti sap sap reng a, customer pakhat ka lo buaipui lai mekin hmeichhe naupang hi ka lam panin a lo tlan phei a, a thawmhnaw aţang chuan Zonunmawia fanu ngei kha a ni tih ka lo hre nghal chat a. 

Nichin khan a pa'n min hmuh ka hlauh em avangin ka lo enchiang lova, dak deuh vaha min en takah chuan chik fein ka lo en ve a, ka hmuh hnu a ang riau lehnghal. A sam a kir chiat a, dawr chhung a ni zung rawn inkap lut ruih chuan a mitmu rawng thlengin min hmuh chian tir thei vek a, a pa ang chiahin a mitmu chu a uk deuh kharh mai. 

"Nidangah ka lo en leh ang. In kawl reng tho tiraw?" hmai hnawih vel rawn en tuin a tih chuan "Kawl reng e..i duh hun hunah lokal rawh" ka ti a, counter lam ka thlek zawk a, Zonunmawia ka hmu hauh lo. 

Naupang lah chu a la ding reng a, kan thil zawrh te chu enkualin "Hei hi eng nge?" tiin min zawt a, a ţawng lah chu a fel fai fak reuh a. 

"Perfume" ka ti ringawt a, naupang hi ka chhawnchhaih thiam lem lo va, ka ngaina vak lo a ni ber. 

"Ee" a ti fan raih a, naupang tih takah kan bul vela mi chu khawih kim vek a tum emaw tih mai tur a ni. 

"Hei hi ka duh" phur tih hriat zeta tih pahin perfume bur nalh deuh pakhat hi a kawk a, a dingdihlip âk âk a, a san deuh ar reuh avang chuan a ban pha ve mai a, a la zui zat bawk. 

"Aih, a theih loh" ka lo ti vat a, perfume bur chu ka hum ve nghal chat a, naupang thlem ka thiam lo bawk nen, kan inchuh ti tih der mai. 

"Apa in a phal" a tih laiin "I pa a awm lo. Nakinah i pa nen in rawn la dawn nia, dah let leh phawt rawh" ka lo ti ve thung a, a ui ngang mai. A men deuh pur a, ka inthunun theihna hlohin an enkawl ţha vak lo a ni maw tih thlengin ka ngaihtuah hman a, nu leh pa hriatpuina tello a mi thil zawrh lai lak chawt chu a mawi tehchiam lo. 

"Buaina a awm em?" Zonunmawia aw ka hriat takah chuan ka ding zawt a ni ber. A fanu nen chuan min en tawn zak zak hnuah kan buaina chu a hrethiam ni ngei tur a ni a nui chhuak ta hawk a. 

"A lo ninhlei em?" a ti ta zawk a, hmanni a min rawn dem chiam ţum ang kha a ni leh tawh hauh lo. Mize hrang hrang a nei ni berin ka hria. 

"Aih" tih ringawtin ka chhang a, a fanu chu ka en a, pawisawi lo zet hian min lo en ve kiau a, a thil lak kha a la hum nghet hle bawk. A bur nalh vang bak a ni lo vang. 

"A tibuai che em?" dam thlup hian a ti leh a, "Tibuai lo ve, kan thil zawrh ho hi naupang tan chuan a it awm a, a khawih ringawt a nih kha, min tibuai lo tak tak a, engmah a tichhe lo bawk" ka ti duah a, a fanu harh zia han hrilhfiah chiam dan ka thiam em em lo. 

Rin loh deuhin a fanu chen tur tawk chuan a ţhu hniam a, a thil ken lai chu laksakin "I awt em ni?" a ti sup a, a aw chu a dam lutuk ringawt. Naupang tan pawh ngaihthlak a nuam viau ang. A fanu pawh chu mengkual zak zak chungin a bu nghat a, a inthlahrung ve deuh niin ka hria. 

Zonunmawia chuan perfume chhin chu hawngin a hnim a, a chhin lehnghal mai dawn emaw tih laiin a fanu chu a hnim tir ve a, "A rimtui i ti em?" a ti zui zat a, naupang ang pawn a be lo, pangngai deuha a biak vang aniang a fanu ţawngkam pawh a fel fai em em ni. 

"Aw rimtui e" ti a ban mai a han tum chuan perfume chu a ban phak loh turah a lek kang a, a kut awl lamin a fanu kut a vuan bet tlat bawk.

"Ka lei ang che. Mahse heng ho hi kan ta a ni lo va, thil chhe thei vek a nih hi. Kan ta ni lo khawih kual dun dun chu a hawihhawm lo a, a chhiat palh chuan kan chawi angai bawk ang" a ti a, an pafa inzilh mawlh mawlh chu ka ngaithla kar a, chapo ve tak ni a ka lo ngaihna kha reilote chhungin a bo nghal vek. Ka ngaihtuahna kal kual velin ngaihdan dik lo min neih tir a ni. Nupui te tello a naupang enkawl ngat phei chu a har ve viau ang. 

"Hei hi kan lo la ang e" a tih chuan counter lam ka kawk zauh a, naupang chu a kal kual leh hlau ni awm takin a kai a, phun nawi lo mah ila "Kan rawn luh uk tawh hnuah ka ţhianpa dawrah ka kal leh lawk a, a thleng nawn tawh lo vang" a tih zawm leh a, tshirt var a ha a, nidang angin inchei smart lo mah se hetiang hian hmuh a nuam daih zawk. 

"A pawi lo..min tibuai hleinem" ka ti nawn leh a, ka hmaah a la ding tlat a, min hliah hneh khawp mai. 

"Hmanni a thil thleng ang pawh kha a thleng nawn lo vang" zawi deuh taka a tih hnuah a fanu chu a kalpui a, bum hmang ka nih loh zia a lo hre leh vek tawh nge, vawiin chu a danglam ka ti reng a ni. 

"Eng nge awmzia? Min hrechiang tawh tihna mi?" tiin ka au zui a, U Mart-i a lo hawi ve takah chuan ka ţawng lai chu ka tawp chawt a, midangin a rilru an lo kai peng hlauh a, min ngaihven zui lem lo. 

"Nang aia mawl nih ka duh lo a nih ka ring" a tih chuan hrethiam takin ka nui a, za vak lo va a lo nui ve chu mawi ka lo ti leh hle tawh. Hrechiang hawt lo va bum hmanga min ngaih avang khan kei aia a mawl thu ka lo hrilh a, a ngaihtuah chiang ve ta a nih ka ring. A ni lo zawnga ngaihtuahna hman hi chuan midangte rinchhiat mai a awl a, rilru fim a hmang ve taah ka ngai. 

Ka huaisenna zawng zawng sawmkhawmin "In lokal ziah dawn nia" ka ti leh hram a, "Aw le" a lo ti ve mai a, vawiin chu rin aiin a hawihhawm ve phian mai. A buaina zualpui a kiang taah ka ngai a, ka lo thawveng huai thei. 

"Ka u nen an lo inhre ţha lutuk alawm. A phone number ka lo dil sak dawn che nia. Ral aţanga thlir ngawih ngawih reng ringawt chu a hrehawm dawn emai" Rintluangin a lo ti leh tawh a, ka kham deuh hlek chu ka thaw halh a, chhang lem lovin thil dang ka tihsan ta daih a. 

"I duh lo mi? U Marti mai bakah ka u hnen aţangin lawm a chanchin ka hriat ţeuh. A thawh naah pawh sawi neuh neuh a tam a, ka hrilh duh che angem aw?" a ti vel a, a chhe lam bak a ni lo ang a, ka hre chak teh chiam lo. 

"Dawr bungrua ho hi i peih chuan hrilh la, keichuan ka ngaithla peih lo" ka ti hmak a, a huat ka rin nen, a lo la lawm phian zui. 

"Nang hi chu kawm i hrehawm ve ngawt mai" min ti a, thawveng deuhin U Marti te ţhutna lamah a phei a, keimaha ka awm chiah chu ka hahdam huai huaiin ka hria. 

Pathianniah chuan inah ka tawm chawt a, thawhţan tukah pawh ka tho hma hran lo. U Marti u in nupui a nei dawn a, an buai zual laiin a pui ve bawk si lo ; a inthlahrung ve deuh aniang ni thum chhung chu dawr kan khar ve dawn a ni. Ka hahdam ve deuh dawn tihna a ni mai. 

Ka nu chhuah hnuah ka intifai a, inchhung ka tih fel fai zawh leh meuh chuan a tlai leh ruih tawh. In a ka awm chuan chhunah thil ka ei ngai lem lova, tunah pawh thil ei lovin ţhutthleng seiah ka mu a, tv ah chuan hmuhnawm ka zawng kual a, a vang phian lehnghal. 

Ka mutna bul chhuata ka phone dah chu a screen a rawn eng zeuh zeuh a, ka phone hi a riin ka dah khat khawp mai. Vibrate ah takngial pawh ka dah ngai lo va, ka nu'n min hauh phah fo ţhin. 

Number hlang a nih avangin phur lo deuhin ka la a, "Lalruatfeli nau i ni em?" mipa aw in a rawn tih chuan ka ţhu chhuak thuai a, thil mak tak tak rilruah a lo lut nghal a, thin a phu nghal dawt dawt thei mai. 

"Aw, ni e" ka ti chhuak thei hram a, ka aw te chu a khur titih nghal der a, ka hlauthawng takzet a ni. 

"E..i lo hruai a va ngai awm ve. Hei thu zawhfiah turin hall ah kan kawl a" a rawn ti a, 'a ruang kan chhar' an ti em lo chuan thawk khat chu a ti veng deuh a, mah se hrehawm ka tih loh phah chuang lo. 

"Kan vengah maw?" ka la ti he haw a, min chhan leh hma chuan midang hian "Remruati maw? I hman chuan hei i u hi lo hruai lawk rawh" a rawn ti a, kan ţhenawmpa a niin ka hria. 

"Eng nge awmzia ni a?" hrilhhai deuh taka ka tih chuan "Aa..duh leh nakinah amah hi i zawt dawn nia" inthlahrung hmel fe hian a ti a, keipawh chuan "Ka lokal ang" ka ti ve ta nge nge a. 

Ka inthlak sawk sawk a, ka u hian ngaihtuahna a ti kal thui thei khawp mai, ho te teah ka hlauthawng a, a bo vang vang a, in lamah thaw dep depin a chanchin kan lo ngaichang ţhin. Ka ngaihtuahna avang ringawt pawh hian ka hah ngawih ngawih ţhin. 

Hall lam panin kein ka chho a, khaw thim hnuah tal ni se ţha tur, khua a la en ut hi chuan min hmu tu an awm leh fur ang a, mi sawi kan kai leh ngei ang. Kan chhungkua hi chu miin hnunglamah min nuih ru tet tet mah se ka dem lo, nuihzat turin kan awm miau a ni. 

Ka u chu kil khatah a lo ţhu kun lap a, a sam hnawk niaih chuan a hmai a hliah bo vek a, vengchhung hruaitute pawh tlem a zawng an lo la awm a, hall chhung ka luh ve chuan nelawm takin min lo be luam hlawm a, thil sual ti lo tu tan chuan an sual bik lo a sin mawle. 

A ţhiante tello a amah chiaha a lo awm chu ka lainat deuh tlat a, ngah nge maw man ngaia a lo awm leh ţhin ni aw? Amah pawh enchiang duh lovin a kut ka la a, "Afel, haw ang" zawi sap a tih pahin na vak lo in ka pawt a, thuawih deuhin min zui ve mai bawk. 

Kan chhuah dawnah chuan patling lo awm khawm laih chu lawmthu ka hrilh a, kut an thlak lem loh chuan hetianga an man hian an tihsual tur tam tak an dang chat a, an chetdan hrechiang hawt lovin ka dem ve ringawt ngai lo. Mahse, mihring a ni ve tih hi an theihnghilh palh ka hlau tho ţhin. 

"I u hi chhuah tam tir suh u aw" an tih chuan "Aw le" tih chiahin ka chhang a, kan inkai haw hnak hnak a, in kan thlen thlengin kan inbe lo. 

Bualin ah ka luh tlang pui a, ka tih ang angin a awm tawp a ni ber e. A mize harhvang tak ţhin kha a bo vek tawh a, eng thilin nge thlak danglam kan hre lo thung. 

"Thawmhnaw fai leh inhrukna ka lo pe ang che. Inbual harh la kan ti ti dawn nia, i duh leh i mu hahdam ang a" ka tih hnuah ka chhuahsan a, a la kun ngul a, a hmel pawh ka la hmu chiang lo. 

A inthlakna tur ka pek zawh chuan kawngkhar ka pawt khar a, ka hau duh lem lo. Ka nu lo haw hunah a hau dawn tho tho a, keiin ka lo tih ve a ngai lo. Chhunglam aţanga a kalh ri ka hriat hnuah pawh ka la ding vang vang a, thil ţha lo a tih palh ka hlau a ni. Pawn aţanga thawm a hriat theih vek avangin ka ngaichang reng a, chhun reh lai a nih avangin tunah ngat phei chuan a hriatchian theih lehzual ang. Mah se, lungchhe taka ka u ţap ri ka hriat tâkah chuan a thawm ka lo ngaithla kher kher chu ka inchhir ngei mai. 

Bang nghengin bualin chhung a ka laizawn neihchhun ţap ri chu ka ngaithla a, tui a herh haw a, a ţap nasa zual sauh bawk a. Sawm chawp ngai hauh lovin ka mittui a hnâm ve nghal a, hrehawm ka ti lutuk chu ka thaw te hi a hah thei mai dawnin ka hria. Mihring hi vanduai bik chu kan awm ngei a, tam tak hi chu kan cho chhuah a ni nachungin hlimna tem ve mang lova kan ţhanglian hi chu mi tam takin an biak Pathian bak dem tur ka hre lo. Kan hma lam hun hre vek thei khawpa thil a ti thei a nih chuan kan nausen lai khan min lo thah law law tur a nia. Kan naupan laia kan thil zir kha a dik a nih chuan mihring hi angkhat a vaivut hmanga a siam vek kan ni, kan dinhmun inthlau lutuk erawh dik ka ti lo khawp mai. Mi chhungkua ang chu ni ve ila tunah hian inhlawh lovin lehkha ka zir ve ang a, Afeli pawh hetiang teh tawp hi a ni lo vang. 

Ka u chu ţap reng chungin a khuh bawrh bawrh a, thawk a la hrawk ri pawh chiang takin ka hre pha a ni. An man avanga hetiang taka rilru na tur si chu an man hma khan inah lo haw mai tur alawm. A va'n â tak em. Sual viau mah se ka thisen zawm pui a ni a, ka lainat lo thei bik lo a ni. 

Pindanah ka luhsan a, ka ngaihtuahna a kal thuiin ka taksa thlengin a na vek thei a, khumah ka let ka let a, thil chhe ber thlenga ka ngaihtuah takah chuan ka ţhu chhuak a, ka inthing harh a, a thim zawngin ka ngaihtuah tur a ni lo tiin ka inhrilh mawlh mawlh bawk. 

Dear Diary,

Ka ngaihdanah chuan thil ngaihtuah kual vak vak hi mitin te chak lohna a ni. Taksa a ti hah chauh a ni lova, rilru thlengin a hah a, kan chau nghulh ţhin. Thil a ti thei a, a hlauhawm takzet a ni. Diktak a sawi chuan hlauh ka neih chang leh keimah leh keimah inrinhlelhna ka neih chang chuan ţahna thlen thei hial khawpa thil ngaihtuah kual vak vak ka ching ve a, mahse chu chuan min ti chak lo lehzual ţhin a ni. 

Ţhian neih loh vang pawh ni lovin malna leh khawharna ten min chenchilh chang an nei a, mahni chauhin hrehawm kan tuar ţhin. Min pui duh tu ţhian nei mah ila malna leh khawharna te, hrehawm tawrhna te hi chuan keimahni chauh min zui duh a, mimal chiah an bei ţhin. Keimahni hi a tuar tu kan ni a, keimahni vek hi a lo bengdai ţhin tu kan ni. Kan chakna lak bo tum tu lian tak an ni. 

A chang chuan thlamuan tu kan mamawh a, a chang chuan min ti chak turin thu tawi te chauh pawh kan mamawh ţhin. Mahse kan hriat reng tur chu: kan thawnthu chu miten an hriat chian theih nan engtiang pawhin thui mah se emaw kan rilru luah tu kha eng ang a nasa pawhin hrilhhre ve mah ila miin a ngaihsak duh miau loh chuan kan tumna te kha a tawpah chuan a thlawnin a luangral tho ang. 

Diktak chuan kan ngaihtuahna vak kual vel ţhin hi chu keimahni chiahin kan thunun thei ţhin. Midangte hi chuan min thlawp ang te, min puihbâwm ang te leh min chhawk tum ang tein lem an chang a, chu chu an tih theih awm chhun a ni. Kan hlawk pui lutuk ngai lova, mah se min ngaihsak tu tak tak chuan tlem te chuan min pui ve thei ţhin. Ngaihtuahna ţha lo tak tak te hneh thei tu chu keimahni chauh kan ni a, chak taka a hriatna a a lo luh pawhin kan lo tudai thei a, thil ţha leh ţha lo thliar hrangin fim kakin kan awm reng thei, chung zawng zawng chu keimahnia in nghat a ni. 

Ngaihtuahna fim hman tum tlat a, fim kâk a awm reng a har zia an sawi ţhin hi ka pawm thlap a, thudik a ni. A har ngei alawm, mahni chauh a awm a ngai a, mahni chauh a beih a ngai a ni. Thil a nihna chin baka kan ngaihtuah ţhinna hi chak hmel deuhin lang mah se a tak takah chuan ani aiin kan chak a, a khawngaihthlak zawk. 

Thil chiang ta em em chu maw, kan ngaihtuahna vak kual vak ţhin leh a nihna bak bak a kan ngaihtuah ţhin hi chu thil mumal lo, awmze nei lo leh rin tlak loh tak tak te taima leh fimkhur taka kan beih letna ang chauh a ni. Ţul lo ah kan intihah a, taksa mai bakah rilruin a chhiat phah ta ţhin a ni. 

Ka u lo lut chu ka lo nuih lui a, "I harh huai em?" zangkhai thei ang berin ka lo ti a, hruk puanin a lu a tuam a, a samin a hmai a hliah tawh loh avangin a mit hnuai leh a bek duk raih pawh chu ka hmu ve ta bawk. 

Min chhang lem lovin khumah a lawn a, a lu tuamna pawh phelh lovin a mu a, a mit a chhing ta daih a. Ka nu nen a kan bulah pawh ka pa avanga a rilru nat thu chiah a sawi ţhin a, thildang a sawipui theih loh. A nui liam mai mai zel a, min fiam let hlauh ţhin. In a a awm chuan a nuam a, ka nu leh kei ngei pawh min tihlim tu ber a ni ţhin. A nui reng a, a ţawngduh a, ka nu a duatthiamin a tih ai a ti zung zung ţhin a, a ţhianten an rawn sawm chuan a bo hmak ţhin thung. A kalna chin kan hrengai lo a, kan call ngat ngat hnu ah 'Min ngaihtuah suh u' tih message kan dawng a, chuzawng chu a ni mai. Tihvak ngaihna kan hretawh lo a, ka nu pawn a zilh nasa, awmzia a awm lo a ni ber. 

"A vawt e..puan min lo sin tir teh" tham ţiak a a tih chuan ka che nghal sawk sawk a, rizaiin ka khuh hlun a, ka awl ni a ni bawk a, in ka ti fel tawh bawk nen, tih tur dang nei ta lo chu ka u bulah chuan ka inthawlh ve a, a lum duh ngei mai. 

"I taksa a va sa ve..i khua a sik em ni?" tih pahin a lam ka hawi a, kan inhmachhawn ran mai. Min chhan tak lohah chuan "Afel, engati nge an man che a?" ka ti chhuak sap a, "Ka sual a" a ti a, ka mut lohna lamah a inlet hmak bawk. 

Hnunglam min chhawn mah se ka awm hnaih a, ka kuah tho a, "Kut an thlak che em?" ka tih leh chuan "Mi fel vuak mai mai chu a na lo emai. Ka pianthar phah lem hlei lova" ngaihnep hmel zet hian a ti a, ka chhang zui ta lo. 

"In awm em?" tih ri ka hriat ruala kawngkhar ri leh ţhin chuan ka muhil chu min kai harh a, Zualtea ngei a ni. Ka mumang chu tlem a zawng ka la hria a, ka hriat theih chhun ang ang chu ngaihtuah zuiin nui var var chungin ka tho a, Afeli pawh a la muhil tui khawp mai. 

"Ka u a lo haw a sin" kawngkhar hawn pah chuan ka au a ni ber. 

"Ka kuah phawt dawn che nge lut turin min sawm dawn?" ka ţhianpain a tih chuan ka tawlh hnung rawk rawk a, kawngkaah chuan a lo pen lut ve nghal zat a.

"A lawm nan thingpui i lum thei" a ti a, a eitur lei ho chu a lek kang zauh a, polythene ah a lo khai ţun mai. 

"A va tihzia tak aw..engmah ka lo la ei lo a" ka tih chuan "I ei dawn lo tih ka hria a hei ka lei ţeuh alawm" a tih zawm zat a, hepa ţawngkam tlachham lo lutuk hi chu a. 

A thil rawn lei ho chu a mal mal a phawrhin dawhkanah ka dah a, kan inkawm rei ve tawh a , keipawn ka ngam tlak tawh viau mai. 

"I lei hnem lutuk a nih hi mawle" ka tih chuan "Lawmthu sawi a ngai lo ang" nuihza aw zeta tih pah hian ka sam chu ka bengah a rawn zep a, "Hrilh tur che ka nei a" a ti leh a, a thutak phian lehnghal. 

"Sawi la" noodles kawr cheh hawn pah hian ka lo ti liam mai a, "Hmeichhe duh ka nei a" inthlahrun hmel deuh hian a ti sup a, keipawh chuan ka lo ngaihven ta deuh a. 

"Chuan?" tih paha amah ka en chuan a hmui a liak zauh a, "Ka duh a" a ti leh ringawt a, tu hmeichhia in nge maw zam taka lo siam ni?

"I hrilh zak deuh tihna mi? Pui tur chein min duh em?" inhuam fe a ka tih chuan a nui hawk hawk a, a nuih a za hlawl lo thung. 

"Nui ringawt suh..hmeichhia vangin i zam a nih kha" ka lo ti a, ka sawi zawh rual rualin chemte fawngin ka chalah a vaw fawk a, ner lui nang nang chunga ka tuai vut vut chu inrintawk hmel zet hian min lo en run a, zam nih chu a duh lo ve khawp mai. 

"Ka chal darah vaw fuh la chu ka thi nghal ang mawle" ka ti hlak a, thinrim awm takin noodles dang chu ka hawng sawk sawk a, ka dara vuanin min si chetin a ding a, a hmel hmu tawh lo mah ila min nuih tih chu a taksa che dawtah chuan ka hre thei tho. 

"Ka that phal lo che..kei ve mai mai chu i thih ai pawh ka thi duh ang" a ti vel a, a hmuh lohah ka nui leh rah rah tawh a, Afeli a lo haw bawk nen, awm a nuam veng veng mai. 

"Puih i ngai em inhnuai nu?" a ti dût dût a, a nuih a zat hmel viau bawk. 

"Ngai lo, i awm ve hian min tibuai daih zawk. Tv lo va en rawh" ti mah ila ţhutthleng a la a, ka dinna bulah chuan nuam tih hmel em em hian a ţhu a, a lays lei chu hawngin min en reng chung hian a ei a, a hmel a nuihzatna langchhuak te chu ka hmuh hmaih bik lo. Zualtea a lo len hi chuan kan inchhung boruak a nuam sawt ţhin; kan in neitute an nih avangin ka pa pawn a zah ve deuh a, a awm laiin buaina a siam ngam ngai lo. 

"I lu met ang che. A buk tawh lutuk a, tikha chuan emergengy light i zawrh duh hmel emai" ka ti a, a lu ah ka nam pah zauh a. A lo thle buk a, na deuh a nam te pawh ka ang alawm le. 

"I thu vek alawm boss" thawven hmel zet hian a ti a, dekchi ka la chhuak a, a chhunga noodles ka bun luh leh hnua ka kawrban hlim mai ka tum chu ka tawp chawt a, a thil ţhial lai chawl meuhin ka chet dan chu Zualtea pawn min lo en ran mai. 

"Chet a ti buai ve deuh ţhin a, mahse hlim lo mai ang" mumallo zet hian ka ti a, ka nui hul zui hak a, ka ban ser hi a la hmu bik hauh lo ang. 

"Hlim a ngai lo. Tikhan tel sa in a per lo zawk ang che. Sausage i kang dawn sia" tih pahin sausage, a kawr pawh vurin a la tuam deuh lûk chu a kawk a, "Keipawn kawr ban tluan hlir ka hak hi. Kan inang chiah" a lo ti leh a, ka lo chik ngai hauh lo va, a sawi takah chuan ka hmuh apiangin kawr ban tluan a ha ţhin. 

"I hria tiraw?" ka tih chuan "I sawi loh chuan hre nang. Mahse min hrilh duh suh. Tv ka en dawn" tih leh thawh a rual a, engthawl hmel zet a inpui lama a phei chu ka enzui a, ser lian tak ka nei tih a hrechiang lutuk. Engtin nge hepa hian min hriatchian em em theih zawk le? 

Eitur ka siam zo awrh ang tihah Zualtea te nula a lo lut hlawl a, inpui lama ka phei ve mek lai chuan "Lo haw rawh, i nu pawn leng chhuak suh se a tih kha. Keimah min hauh phah leh ang a" a lo ti bawrh bawrh a, an in ngam tlak a, an in vin vak vak ţhin hi chu ngaiah ka nei tawh.

"Thil ei zawhah ka lo haw ang" ngaihsam hmel fe hian a ti a, Rengi hi an nula han ti ila Zualtea pa cousin fanu a ni. 

"In in hi chu zu rim a nam huam reng mai" a tih chuan ka lo nui ringawt a, sawi sualah pawh a in ngai tawp nang. Bakah ka ti fai diam a, khawi a zu rim mah a nam lo. 

Zualtea zawk chuan "Chho rawh. In rawn lawr sek chuan ka riak nghal ang" a lo ti nghut a, Rengi pawh a chhuak lo ngam bik lo. 

"Ninawm hlawm lutuk" ti a a phun zui hluk chu "Ning reng reng suh. Inah i awm khat a, an ngai ve che a ni mai" ka ti vat a, Afeli kaitho turin pindan ah ka lut zui nghal a. 

Khuma a lo ţhu reng tawh ka hmuh chuan "Eitur ka siam peih diam tawh aw" ka ti a, ka chhuahsan leh nghal mai a, ei theih mai tura kan buatsaih lai chuan mit nuai chat chat chungin a lo phei ve a, inhmu khat viau mah se Zualtea chuan a lo fiam zuk zuk a, ka u pawn nuam a ti ve viau chuan ka hria. 

"Engtikah nge i kal leh dawn a?" ti a ka u in a zawh chuan "Inhnuai nu hi ka nei phawt dawn" a ti leh tawh a, fiamthu a a chhan let pah chuan min la kawk tel kher zui a, "Khati zawng khan fiamthu thawh ziah suh" fork a tin uaih paha ka tih chuan indan pawh tum lem lovin "Fiamthu a ni lo maithei a" a ti a, ţhian ang chiaha min en loh chang a nei niin hre ţhin mah ila chung ngaihdan ka neih ţhin te chu ka hnawt bo thuai zel a, a chhan chu Zualtea nen a kan inţhianţhatna hi engmahin a tih chhiat ka phal lo a ni. Ka ngaih hlut zia hi a hrethiam pha kher lovang. A tel lo chuan engmah ka ni lo ang tih theih a ni tawh. 

"Duh ka nei i tih zawh chiah kha aw lerh-a" ka ti a, ka melh rawm rawm lai chuan "I tet it et reuh nen hian i melh hi a na ve zek a" a ti a, na deuhin ka biang a piai pah kher a, "A nih vel chu a" ka ti hmak a. Min chhaih zui reng tho a, kei ka lo thinrim der thung a, kan awmdan vel chuan Afeli nuih a ti za viau mai. 

"Ka bem hlawhtlin phawt chuan ka lo lenpui ang" phur zet hian a ti a, hmeichhe chanchin ka sawipui mek a ni. Tu nge a nih ka hre ve lo va, ka dil nasat em avangin a thlalak erawh chu min hmuh tir a, a ngo lem lo nain a hmai fang a ţha reuh lutuk ringawt. Biakin kawta an thlalak dun min hmuh tir ngat phei chuan "Ehe..a va han sang em em" ka ti hluai a, pheikhawk sang bun tho mah se Zualtea bula a din chiah chuan a san zia a hriat. Mizo hmeichhiaah chuan a sang pawl tak a ni ngei ang. 

"Model a nih hi" ti a intithei zet a min hrilh laiin Afelin a rawn bih ve a, "A hmelţha lem lo e..a chal a thui si" a ti pek a, mitmeiin khap vat lo ila chu a sawichhiat sak vak ngei ang. 

"A tluk lo che" tih sup pahin Zualtea chuan min nuih suk a, a unaute leh Rengi ngei pawn hmeichhia in chhe lo an tih ţhin zia an sawi chamchi ţhin a, an chhuang em em mai hi a awm lo lem lo. Midang kâ aţanga Zualtea fakna thu ka hriat chang chuan a ţhian ka ni ringawt pawh hi ka lo inchhuang ve ţhin. 

"A duh che a nih kha" Zualtea haw hnua Afeli thusawi hmasak ber chuan min ţhawng lem lo, mi mawl ka ni lova, thil awmzia chu ka man thiam ve alawm. 

"Keiin ka duh lo thung a, kan inţhianţhatna hi engmahin ka thleng dawn lo. Bakah mipa duh deuh ka nei alawm" ka ti a, Afeli nuih var var lai chuan Zonunmawia hmel ka mitthla a, mipa ţha lutuk a chhuah phal mai hi a nupui hian eng rilru nge a put ang le?

"Tu nge ni a?" ti a min zawh chuan kimchang deuhin ka hrilh a, ka u ang reng a ngaithla tu ţha hi ka la hre lo. 

"Lo inţhen pawh nise fa hial an neih tawh chuan an nupuite hi an thlah mai mai thei ţhin lo a sin. An in hmangaih avanga innei an ni ngei dawn a, Zonunmawia pawh chuan a ţhen hlen thei tak tak dawn mi?" tiin min zawt let khauh a, ka chhanna chu "Ka hre lo" tih a ni. 

"Pathlawi ngaihzawn chu buaina a tam duh lutuk. Ţul hawt lo ah buaina i insiam chawp mai mai a ni. A nupui nen an la inpawh viau phei chuan i hlim chuang lo vang. I ngaih ang ngawt a awlsam a ni dawn lo a nia. Chhuanlam tur tingin fa an nei tawh lehnghal a" a ti a, "Mahse ka duh sia lawm" ka tih tlat phei chuan a beidawn hmel khawp mai. 

"I bialpa ve kha?" a ti ta daih a, bialpa ka nei tih ka lo theihnghilh lek lek tawh alawm. 

"Pubg bak a buaipui lo. A inkhel â ţep tawh ang. 'I tho nuam em?' tih leh 'Muttui' tih bakin kan inbe ngai lo. Ni hnih hnuah te ka en chauh a, engtinmah ka awm lo. Ka rilru pawh a na lo. Kan inkal pah vel mai mai niin ka hria" ka ti a, ka ban phakah hian ka phu tawk chu an awm ve reng a, chuti chung chuan ka cho phak rual loh khawp a sang ka duh daih a, thinlung hi tuman kan thunun thei lo chu a nih ber hi. 

CONT..