DEAR DIARY-6

DEAR DIARY-6

"I la muhil nange?" zanlai a ka ţhanharh chuan pindan chhung a lo la eng ut a, ka ţhu chhuak lai chu tukverh bula ding reng chungin ka u chuan min lo en a, sana ka en vat a, dar2 a lo ri der tawh. 

"Chhunah ka mu nasa lutuk a ka muhil thei lo a nih hi" a ti mai a, rizai ka hlim rual chuan tukverh aţanga thlifim rawn lut chuan ka taksa chu a chhem vawt sang sang a, ka intuam leh rang kher mai. 

Khum lu nghengin ka ţhu awn diai a, ka harh chiang lutuk a ka mut pawh a chhuak ta bik lo. Ka nu'n a hauh laiin ka mut san kha a ni a, ka lo hah ve bawk nen, ka muhil nghal daih a, an inhau rei em tih takngial pawh ka hre lo. 

"I chau miah lo em ni?" ka ti a, a sam sei hnalh chu thlifimin a chhem leng siau siau a, kan in hi chu thli a tam ve hrim hrim a, thlasikah phei chuan tukverh hawn ngam pawh a ni ţhin lo. 

"Chau tehreng mai..mahse ka mut a chhuak chuang si lo va" tih paha ka lama a rawn inher chu ka lo en chiang a, ţap hrep hnu te pawh a ang alawm. 

"Ka nu khan a hau rei che em?" ka tih chuan lu a thing a, a vun mai bakah a heh te chu a da lap a, miin hmelţha an tih ve theih nen, tunah chuan mi hrang ang hlak a ni tawh. 

"Kan thil tih hian min vaw let thei a nia, i nunhlui chu kalsan la rahbi thar kai tum rawh. Tun ang renga i nun chuan thil ţhain a hmuak ve dawn lo che a nia" tiin dam deuhin ka hrilh a, ka u te ang hi chu hauh nasat poh leh an pawng pawrh a, an luhluh a, dimtea kawng dik kawhhmuh chi an niin ka hre ber. 

"Ka peih lo. Diary ziah i hrat nen ngaihtuah chiang ve ţhin ta che. Mi tam tak chuan lehkhabu hi a kawm nalh nalh an thlang ţhin. A chhunga thu inziak an ngaipawimawh tehchiam lo. A kawm a mawi viau chuan a chhunga thu inziak pawh ngaihnawm leh ţha deuh turah an ngai zel alawm. Keipawh ka landan aţangin min teh a, rilru ţha te hi ka pu peih tawh lo. Ka pa zu ngawl vei a nia, ka nu a inhlawh a, mi ngaihah chuan hmeichhe khaw lo leh awm ţha duh lo, nawhchizuar ka ni. Ka nun thlak danglam mah ila ka landan aţangin min teh reng tawh dawn a, ka chhungril hi tuman an rawn chhiar dawn lo. Landan hian mi a hipin thil a tithei tawh zawk a, lehkhabu kawm hi thawm mawi kan tum viau pawn kan charna leh ţhuina hnuhma te a lang a, miin an iai telh telh zawk. Keipawh insiamţhat tum mah ila min sel nasa zual sauh ang a, min hlauhna a belhchhah ang a, min hlat lehzual ang a, ka rilru a na mai mai" a ti duah a, a thaw a pik a niang a thaw leh halh halh ţhin bawk.

"Miin chhiar peih lo mah se i tan alawm i ziah dawn. Engamah hmain tawpna an siam ringawt ngai lo" ti mah ila a kut pahnih vai meuhin "A tawp vek tawh" a ti chang fak a, thil ţha sawipui tum pawh hian a sawipui hleih theih loh ţhin. 

Khuma a rawn lawn rual chuan "Engati nge an man reng reng che a?" ka lo ti leh a, "Ka sual a" tih zawngin min chhang leh tho. 

"I sual tih chu ka hria a, a chhan alawm ka zawh che?" ka ti leh ngat a, ka aw a nem ta vak bik lo bawk nen "Ka ţhiante inchiu lai an man a nih kha" a ti nghat a, ka la duhkhawp chuang lo.

"Chu chuan eng tin nge a kan kai ve theih che?" ka lo ti a, dilchhut min ti leh tawh viau ang. 

"A chhakah ka lo nghak a, ka awm langsar sia min rawn hmu hmasaber a, Afeli ka nih miau avangin min hmu tuin min hek a nih kha. An rawn thleng rang hlawm khawp mai. Ka ţhiante pawh keimah vanga man an ni zawk mah" a tih chuan "I ţhiante ka va hmu tel ve si lo ve" ka ti a, amah chiah khan a lo awm a, midang an awm ve hauh lo.

"I lokal hma khan an veng hruai tuten an rawn la alawm. Damdawi vawrh ţhinah te min han ngai vel a, damdawi kher kher hi chu vawikhat pawh ka la ti chhin lo..ve lutuk hlawm hian a" a ti hlak hlak a, rizai kan inzawn a, khum lu chu a rawn ngheng ve a, ka hriat theih chinah ka u in thiamthu a sawi vawikhatna tak tak a ni. Thudik a nih ka ring bawk. 

"Vengchhung then fai hi an hna a nia, a hahthlak dawn tehreng nen, anmahni dem zawng chuan ţawng suh. Mipuite thu lak dan a inang lo ţhin si a, anni pawn hrehawm tih ruk chang an ngah ang" ka tih chuan "I hre lo a nih kha Mate, an zavai chuan ka ti lo. Mi fel tak tak chu an awm na meuh mai, mahse mi hausa hlau a, mi rethei zuam si pawh an tam ve tho a sin" a ti a, a thusawi chu dik tho mah se a thlavang hauh zawngin ka ţawng chhuak duh chuang lo. 

"Mi hausa fate nen a min man ho chang te hian min endan mai bakah min cheibawl dan thlengin a danglam a, mi fel tam tak karah hian tlem a sual deuh hlek ho hi an langsar bik a, kut ram deuh pahnih khat an awm ngei ngei bawk a, hmeichhe kutthlak hreh miah lo pawh an awm. Aaa...mi chi hrang hrang an tam, ka sawi duah peih lo" ti a a nuih tak hakah chuan za lo deuhih ka lo nui ve a, "Engpawh chu nise bo daih tawh lo la a ni mai" ka ti a, kal bo tawh lo turin a intiam vei thlap a, thei leh tak ang maw. 

Ka u nen a kan awm dun reng theih avangin rin ai daihin chawlh ka hmang nuam a, phone phei chu ka khawih ngai lo tih theih a ni. Eng eng emaw sawi dun tur kan nei reng a, Zonunmawia leh Zualtea chanchin min zawt zeuh zeuh ţhin bawk. Ka hlim viau na a a nun thlak danglam chuangchanga a ngaihdan erawh ka duh lo khawp mai. 

Dear Diary,

Hringnun hi chu lehkhabu ang a ni. A kawm hi phek dang zawng zawng aiin a chhah zawk a, hei vang hi a niang mi tam zawkin a bu chhunglam en lova pawn lam an endik hmasak zawk ţhin ni. Lehkhabu chhunga thu inziak a in an reng pawhin a tuam tu (kawm) aţangin an thlang a, a mawi ber an chhiar ţhin a, a chhunga thu awm an ngaihven ngai lo. 

Mahse chu chauh chu ka sawi tum a ni lo, nun hi chu sentence a chhinchhiahna (punctuation) kan dah ţhin ang deuh hi ni maiin ka hria. Comma (kawma) hi chu kan chauh changa reilote kan chawl hahdam lawk ţhin ang hi a ni a, chhinchhiahna dang te pawh hi buaina leh harsatna kan tawh ţhin te, thil ţha lo kan lo tih tawh te nen hian ka tehkhin ţhin. Comma chauh ni lo chhinchhiahna dang tam tak paltlang tur kan nei a, chumi hnuah chhun han a lo awm leh a, a pawi ber chu he chhun han tereuhte hi engkim  tawp naah kan ngai ţhin hi a ni. 

Chhun han (dot/full stop) zawh hnuah pawh hian paragraph thar a awm leh zel ţhin tih hi kan theihnghilh fo mai. Engmah kan la ziah lohna phek thar kan kai leh thei bawk a, mah se phek thar kan kai avang maiin kan ziah tawh hnu erawh chu a bo dawn chuang lo. Chutiang chiah chuan kan nunhlui te hian min tel pui zel dawn a, nawh reh leh theihnghilh theih a nih loh laiin hmalam kan pan san thei a, kan tihsual tawh te aţanga inzirin khang sual te kha kan hawi san hmak thei thung a ni. 

Chuvang chuan chhinchhiahna hrang hrangin min lo hmuak a nih pawhin phur sarh a kan hmachhawn a ngai a, kan chawlh sek a; chhun han hi a tawpna emaw kan tih zel chuan paragraph tharah kan kai thei ngai dawn lo va, lehkhabu ah hian phek tam tak a awm tih kan hriat reng chuan kan nunna a tawp hma chu kan ziah zawm reng thei dawn a ni. A kawm mawi loh avang ngawtin miin rawn chhiar kher duh lo mah sela, kan lehkhabu ţheuh hi uluk deuh a kan ziah a ţul tho si a ni. 

"Naktuk aţangin dawrah ka kal tawh dawn sia ka van peih lo tak" ka ti nang nang a, khumah lawnin ka u mu tawh chu ka kuah chung chung a, nuih hak pahin ka lamah a rawn inher a, min khan ringawt lovin min kuah let ve mial a, Afeli bula ka mut hi chuan nuam ka tiin hahdamthlak ka ti ţhin. Eng mi pawh nise ute nge nge chu kan lo thlamuanpui a nih hi. 

"Vawiin chu ka thawhna ten kalna tur an nei a, ka chawl ve thei dawn a" tiin ka thawh veleh ka nu'n min lo hrilh a, "I hahdam ve thei a ni mai alawm. Ka chawlh lai kha ni zawk se ţha tur" ka ti niah niah a, a nuih a za khawp mai. 

"Nangmah chiah i chhuak dawn a nih chu. Keichu ka nu ka lo pui nileng ang, insuk tur te a tam a, thil tui deuh deuh kan ei bawk ang a" Afeli chuan a ti vel a, nidangah lem in chhuahsan thuai thuai ka chak ţhin a, vawiin chu ka phur hlawl lo. 

"Khawngaihna ka ngah a, kawngpui thleng ka lo thlah hram ang che" tiin min fiam zui leh a, ka nu nen pawh an inmil leh tawh a, inkhak reng lovin an infiam tawn leh zak zak tawh a ni zawk mah. 

Insiam tuma pindan a ka lut te chu min zui lutin hak tur min kawh hmuh zung zung a, kei aiin nalh a hre deuh a, kan thawhna angah chuan inchei vak ngai lo mah se a sawi ang apiang ka ha a, ka mawi ve khawp chuan ka hria. 

"Khawi..i sam ka lo ţawn sak ang che. Stool saw va la la darthlalang hmaah hian ţhu rawh" a tih chuan "Muangchan chi a ni vak tawh lo a nia aw" tih pahin stool ka la a, darthlalang hmaa ka ţhut rual chuan ka samţawnna a lo pawt phelh a. 

"Ka duh pui ve ve che a, mahse Zonunmawia i tih hi ka la hmu tlat lo a, Zualtea hi duh ve rawh. I inchhir hauh lo ang" ka sam khuih pah hian a ti a, ka hmui chu ka lo hnawih mawm ve a, keimaha cham reng zawk chu Zonunmawia a ni tih chiang tawk viau mah ila ka sawi chhuak duh lem lo. 

"Dawr a ka kal hlanin lo kal bo daih suh aw" ka ti ta zawk a, darthlalang aţang chuan ka hnunga a ding chu ka en a, "Ka lo bihruksan ang che" nui chunga a tih chuan uangthuang deuhin hmui ka ti pawrh a, Afeli a awm ţhat duh chuan ka pa a sual deuh chang pawhin hrehawm ka ti lutuk ngai bik lo. 

Kan unau chuan kan inzui chhuak a, an bathlarah Zualtea a lo ding vang bawk. A mit a bui deuh lâk a, a mamawh tawk mut a hmu lo leh a ni khawp ang.

"I kal ve dawn mi Afel?" tiin ka u zawk a bia a, lu thin mat mat pahin Afeli chuan "Dawn nang..kawngpui thleng ka thlah ringawt dawn. Nizan khan i van zai rei em em ve, dar1 velah ka rawn chhuak chho a, i pindan pawn lama i zai kha ka hmu reng che" a ti duah a, Zualtea zai ve chuan nuih a ti za angreng hle. 

Ka nui hmel a hmuh takah chuan "Nih chu..nih chu, kal tawh rawh u" a ti zung zung a, tlaiah min rawn hruai lui ziah sia, zing lama min thlah a tum apianga ka lo hnial ţhin avangin tunah chuan min thlah a tum buai peih tawh lo. Min en liam ziah thung. 

"I lo zaithiam khawp kha" ka u in a tih hnuah Zualtea chu kan kal pel a, kan inhmuh theih chhung zawng a kut a vai peih a, a khua a har deuh chang phei chuan nitin ka chhuak ţhin hi a hne zia a sawi chamchi ţhin. 

"En rawh ka ţhi hi hmana ka pi min pek kha a nia, awrh ve tawh rawh. Ka pe ang che" tih leh a ţhi awrh lai phelh a rual a, "I phal tak tak maw?" ka ti ha a, ka lo la ve mai bawk a. Ka awh ve lutuk avanga ka ţah pawn min pe phal ngai lo kha a nia, a mak ve ngawt mai. 

"Ka pa'n a lo dahkham a, ka khul let leh zawk a nih kha. Thil ka dah ho thei sia, bualin ah te ka dah a, ka lo theihnghilh daih zel a, ka pa'n a lak theih tawh loh turin tikhan kawl ţha daih rawh" min ti a, kawngpui thleng chiah min thlah tum si kha taxi stand thleng min thlah a, kan unau a kan inzui chu min enduh fe fe an tam a, Afeli lah amah chiahin a let dawn bawk si, keimah zawk hian ka lo huphurh. 

"Mi lah hi an en ang hu hu zel a, atthlak lutuk" ka tih laiin "Hmelţha min ti a niang" a lo ti a, phur lo viau mah ila taxi ah min nam lut a, taxi a tlan rual chuan "Lo haw vat rawh aw" a ti lang lang a. 

💛💛💛💛💛💛💛

"I tlai a nia aw" Rintluangin a lo ti nghal a, "Vawiin chu ka phur lo teh mai a nia" tih leh ka hmaa a ding chu nam kian ka rual a, min rawn ti buai zui bik lo. Min dawr tu te thleng chuan ka hne hlei hlui thei hial a, in a haw vat vat ka chak a ni ber. Ka nufa za a kan awm ve theih lai hi chuan in a awm reng mai ka duh ţhin a, kan naupanlai pawn ka nu hnathawk a a chhuah loh ţum chuan kan unauin kan hlim thei hle a nih kha. 

An kut a awl hlekin ka thawhpuite chuan phone an hum nghal zel a, U Marti pawh a bang chuang lo. Kei hi chuan ka khawih peih ve vak lo a, silent a ka dah nileng ţhak a, kekawr ipte ah takngial pawh ka ak chhuak ngai lo. Phone ai chuan ka diary leh rilru ka kawm tam zawk awm e. 

"Remruat a lokal leh tawh a nia, Zonunmawia a lokal a nia aw" tiin phur zetin Rintluangin min rawn hrilh a, a ţawng zawi ve reuh lutuk. A tlai leh ruih tawh a, hna aţangin a bang tawh a nih ka ring. Ka ţhutna aţanga tho chhuak chuang lo hian ka bih dek dek a, dawt a sawi hauh lo. U Marti nen chuan inpawh hmel takin an ti ti a, an thusawi ngaithlak ruk tumin Rintluangi chu a phei leh den den tawh. 

Chutia ka en reng laia U Martin "Remruat" ring zeta a tih chuan ka phu nasa lutuk chu ka ţhutna aţangin ka tla lo chauh a ni ber. Kan dawr neitu zawk chu ka lo en tel ve reng reng lo va, Zonunmawia ngawt chu a ni ka lo thlir veng veng zawk ni. 

Chhuak phei ta mai lo chuan bakilh bawk a nih ringin kan rem tlar ţhâtna lamah ka phei sawk sawk a, ka lo dawngsawng dawn hrim hrim. 

"A va mak..engati nge hnung lamah i phei daih? Hetah lo phei teh" a ti hlak hlak a, a inlengpa ka enru lai kha min hmu ru a niang tih chu ka rilru luah tu ber a ni a, ka hlauthawng ngei mai. 

Zam ru deuhin ka phei zan zan a, midang chuan min lo en ţhap a, Zonunmawia pawh a bang bik lo. Kan inleng pa ţhutna bulah chuan ka ding zum zat a, kan hotunu chuan min hauh hrep a tum a nih ka ring ta ber. 

"Ngati nge phone i lak theih loh? I nu'n ka call nasa lutuk a a la thei lo reng reng a rawn tia. Engtin nge maw ka phone number te a neih theih zawk ni?" dam thlap a a tih ve mial chu le. 

"Phone ka ngaihven lo thei sia, ka thawh hlim khan i number chu min dil daih tawh alawm. Min chah duh a nei em ni?" tiin phur deuhin ka lo zawt a, ka u nen rawng an bawl der tawh a nih ka ring. 

"I u kha..." ban charha a tih hnuah a chawl dat a, U Marti meuh pawhin sawi hrehawm a tih chuan ka ngaih a ţha ta hauh lo. 

"Ka u chu engati nge? A chhuak leh tawh mi?" ka ti a, U Marti ka hnaih deuh theih nan counter chu ka kut pahnihin ka nam a, min hrilh tlang vek turin ka duh a ni. Hlauhna hlirin ka khat a, a chhuak bo leh tawh a nih ring sa mah ila hriat chian ka duh tho. 

"A inawkhlum a" a ti sap a, a thusawi chuan min deng na kher mai. Ka awm chhung hi a hit chhawk ni berin ka hria. Ka ding mar tur chu ka pai khat a, Zonunmawia chuan min lo dawm vat a, a awm nghengin ka ding a ni ber tawh. 

Zah pawh ka hre tawh lo, tih hmasak ber tur ka hre lo va, awmdan tur ber hre lovin ka bing luk luk a, ka rilru a buai viau laiin ka ngaihtuah naah thil tam tak a lo lut zut zut a, zingah khan hlim deuhin kan inthlah tho bawk si, ka thu hriat chu awih harsa ka ti takzet a ni. 

"Eng vang nge?" tih ringawt chu keimah leh keimah ka inzawt nawn tlut tlut a, ka la che eih lo. Ka hnunga ding pa lah chuti bawk, ka din ngaiin ka ding tlawk tlawk a, ka zawhna lah chu chhan ngaihna ka hre der lo. 

Mûk zeta inngaihtuah chungin muangchangin ka tawlh sawn a, Zonunmawia taksa ka hlat rual chiah chuan ka ban bula a vawnna chu a lo thlah ve chiah a. Haw hun ka nghahhlelh tehlul nen ka hlimna zawng zawng kha thawklehkhatah lakboin a awm leh vek a, kan chhungkaw chungah awihawm loh khawpa rapthlak a thleng mek a ni. 

"Taxi koh sak ula. Rintluang, a bag te va lakpui rawh" ti a U Marti ţawng lang lang chu ka hre ruai ruai chauh tawh a, ka hamhaih a, thil thleng chuan min ţhawngin dawnsawn dan ka thiam lo a ni ber. 

"Lokal rawh" tiin Rintluangi chuan kan bag dahna lamah min kai phei a, "Haw pahin ka thlah kual mai ang. Mu leh mal pawh a neih loh kha. Taxi koh sak a ngai lo ang" Zonunmawia chuan a lo ti ve a, ţawng ring hle lo se la chu ka hre pha kher awm lo ve. 

"Awii..tu te mai pawh saw an chiai vekin ka hria. A zia lo e...ban veleh ina haw lovin ka lokal tlang ang" tih paha bag min pek chuan a chhung ka hai nghal rawk rawk a, phone ka en chiah chu missed call a lo tam nangiang mai. 

Dah let leh ka tum laiin inchungnuin min lo call a, ka lak rual rual chuan "Remruat, i u chanchin i hre tawh em?" a rawn ti a, ka hriat thu bakin ka chhang lo. 

"A ţhat chu lo haw thuai thuai rawh. Zualtea te lah an picnic daih a, ani pawh a lo haw mek a, rawn lam tur che a mi rawn tirh a ngai em?" a ti zung zung a, ani pawh a aw a dik lo. 

"Aih..ka lo haw thei mai ang" ti a ka chhan hnuah phone chu ka dah a. 

Rintluangi nen a kan chhuak phei chu counter bulah bawk ka ding leh a, ka chhehvelah chuan tu tu nge awm pawh ka hre lo. Ka chiai niin ka inhre lova, ka chawmawlhin ka â chhulh a ni mah zawk. 

Zonunmawia chu dawr chhungah a awm ve tawh lo tih hre hauh lo mah ila "Lo hruai chhuak ula" ti a pawnlam aţanga a rawn au ri chu ka bengin a la hre thei cheu a, ka inthing harh a, engkim ka hre vek tawh. Thil tak takin min deng a, ka nat zia ka sawi fiah thiam lo. Motor ri nuaih nuaih karah chuan ka u râwl ka hre tel ve zel a, a nui ri leh a ţap ri thlengin ka beng hian a hre vek a, ka ipik lutuk chu thawk pawh ka thaw ţha thei lo hial a ni. 

"Kal ang le Remruat" dam dap a tih pah hian Rintluangi chuan min hruai chhuak a, min thlamuan ve mawlh mawlh na chu a thusawi hriat ka nei bar lo. Rei vak lo hnuah kan hmaah motor a rawn ding a, chhunglam aţangin kawngkhar a rawn inhawng zui zat bawk a, kei ve chu Rintluangi min tih ang angin ka awm a ni ber mai. Motor chhunga min nam luh rual chuan ka ţhu hnawk a, ka malchungah ka bag a rawn dah a, pawn lam aţanga motor kawngkhar a nam phui dawp rual chuan ka phu deuh zawk a, ka taksa che dat chu a langsar viau maithei a ni. 

"Khawi lam nge?" a lo ti vat a, a aw chu a thumin a dam dap tawh mai. Amah pawh en lovin kan penna lam tur chu ka kawk a, a hriatthiam loh hlaua kan veng hming ka sawi lai te chuan ka aw chu a ri chhuak ţha thei lo. Ka hrilh zo chiah chu ka aw ka thian kharh a, ka nu hnem tura in thlen vat ka duh rualin ka u ka hmuh hreh takzet a ni. 

"Tui i in duh em?" a tih chuan chhang lem lovin a lam ka hawi a, a hmel chu chik deuhin ka en hmasa a, danglam vak a awm lo. Min lo en ve zawk a, ka en reng tih a hriat chuan bottle a rawn keng lang a, ka lo ban vat a. 

In ta mai lo chuan nghet zetin ka awm zawnah ka pawm bet a, min be lova, keipawn ka be bik lo. 

Ka hrawk ro huam reng chu ka ning ta deuh a, tui chu in tumin bottle chhin ka hawng a, ka kut khur nasa lutuk chuan chet a ti harsa in duh ang pawn ka che hleithei lo. Ka hmui zawnah ka keng kang a, a hmawr ka hmuam hreh ve tho si, motor tlan nghawr leh ka kut khur chu a inrem hlawl lo a ni. Ka che buai deuh chu a rawn hmu ve ni hmiang ka ti mai motor tlan chu a zawi tial tial a, tui te ka in hnu chuan kan penna tur lai bawk ka hrilh leh a, rin aiin a lo hre phian mai. 

Ţah chu sawi loh ka mittui takngial pawh a la tla lo chu mak ka inti hial zawk a, min thlah tupa ngei pawh chuan mak min ti viau maithei a ni. Ka nat lutuk vang nge thil thleng hi ka la awih theih tak tak loh vang zawk pawh ka hre lo. 

Kan inzawn chu hrilh chawp ngai lovin a hre nghal chat a, mipui zi nak nak ka hmuh aţang ringawt pawh chuan tuman dawt min rawn hrilh lo tih ka chiang a, ka awmdan chu a hrehawm ngei mai. Harsa ti zet hian thawk ka la lui hrak a, tui bottle dah let leh pah chuan "Ka lawm e aw" ka ti a, kawngkhar ka hawng zui zat a. 

Motor aţanga ka chhuk tur chu "Tlaivarpui tur tiraw?" tiin min lo be ding leh rih a, "A nih hmel" ka ti a, ka chhuak zui nghal a. 

Mi an lo tam tawhin nula leh tlangval tlawmngai tak tak te pawh an lo phe suau suau tawh a, keipawh chu min lo buaipui vatin nula pakhat hian "Lokal rawh lut ang" a ti a, a hmel chu ka en a, ka hriat ngai pawh a ni lo. 

In kawtah chuan thawm ngaithlain ka ding leh vang vang phawt a, kan inchhung aţanga thawm lo chhuak chu engmah ngaihnawm a awm lo. Engkim mai chuan ka u a awm tawh loh zia min hriattir vek a, lut hreh viau mah ila ka nutei lo chhuak chuan min kai lut a, chhung leh khat hnaivai ngah vak lo mah ila ka u chuan a ruang kil tu a ngah khawp mai. An ţhut bial laih a, mite tan a kan ţangkai loh tehreng nen, mi an tam lutuk chu mak ka ti zawk. 

Ka nu in min lo hmuh chuan a ţap nasa zual sauh a. Keipawh ka u an muttirna hnaihah ka ţhu a, a muhil lai hmel nizan mai a ka hmuh nen te khan a in an em vangin a fiah nan a hmai ka chul a, a lo vawt thlar a, u ka nei ve tawh lo tih ka hre ta chiah bawk.

💛💛💛💛💛💛

Kawl a en rual chuan inphih harh tumin bualin ka pan a, kan bualin hi thlang lam bathlarah daih a awm a, ţhalai rawn tlaivar ve ţhenkhat pawh an lo ding far a, zial rim a nam ram ram mai. 

Ka ţah nasat avanga ka mit kham leh thip lutuk a zia tak mialin tiin hmai chu ka phih a, hruk puan awm ta lo chu rawmawlin ka hru thuak thuak a, bualin aţanga ka chhuah ruala Zonunmawia ka hmuh chuan ka mitvai emaw ka ti hial a ni. Kawngkhar pawh khar lovin amah en chuan ka ding reng a, a chauh hmelin zanah a mu bik lo tih hriat zetin a mit a sen ram bawk. 

"Ka rawn zui che" a ti a, chhang leh coffee ni awm tak a keng a, chhang ta lem lo chuan kawngkhar chu pawt phuiin ka kalpel a, bang hrula ţhutthleng sei an dawhah chuan ka ţhu ta daih a.

Sawm ngai hauh lovin ka bulah a rawn ţhu a, Zualtea chu ka bulah zankhuain a awm ngei a, ani hi a rawnkal ve tih ka hre hauh lo. 

"Kha..a la sat ţhat lai hian in rawh. Chhang a awm bawk a, engmah ei loh chu a ţha ngai lo" a ti zung zung a, bualin a ka awm hlan khan a lo lei hman tihna em maw ni? 

Coffee leh chhang ban pah chuan "Min thlah khan haw lovin i awm tlang tihna mi?" ka ti a, "Haw e..ka lokal leh a nih hi" a ti a, coffee awmna dispo min dawmpui pah chuan min en a, ka vawn ngheh veleh a kut chu a la sawn a. 

"Engati nge?" ka ti leh ţalh a, dilchhut ti a min khak ka rin laiin "Ţhian i mamawh ka ring a" a ti mai a, a awm ve reng pawh mak tih tawh nak laiin min ngaihtuah ni awm taka a ţawng vel te chuan min ti hamhaih lek lek a ni. 

"Ţhian ka mamawhin i hria em ni?" ka tih chuan "Hmanah khan ka lo mamawh ve tawh a" tiin ţha deuhin min chhang let ve zel a, kan inkhak deuh ni a a awmdan leh a awki ngeiawm zet te kha chu a bo hmak tawh tak tak a, mi thar hlak ang mai a ni. 

"Tinge ţhian chu i mamawh a?" ka ti lehzel a, tun a ka thil tawn mek hi chu a na em a, tumahin tawng ve lo se ka tih rilru lai mekin "Ka nau a boral ve tawh a" a ti zuai raih a, en pawh min en lovin inngaihtuah mûk hmel deuhin ral lehlam a thlir a, a nau chu a ngaihtuah ve rauh rauh maithei a ni. 

Kan mi hmangaih tak ten min han boralsan hi chuan a lo tawng ve tawh, kan dinhmun hrethiam ngei te hi sawipui an nuam lehzual bik ţhin a, keipawh hian mak tak maiin ka pawh sawt a, ka hlauh ruk ţhinna te kha a bo tawh niin ka hria. 

"Engtia boral nge?" ka ti leh hram a, "Sawi nuam i tih loh chuan min hrilh kher chuang lo la" ka ti tel zauh bawk.

"I u ang chiahin" a ti mai a, a thutak danah ka rilru nawm nan a a phuahchawp mai mai a ni lo tih a hriat a, thihna hi fiamthu na chi a ni lo tih chu kei aiin a hre chiang daih zawk ang. Thil kal tawh a ni a, a zep hranpa lem lo a nih zawk hmel. 

"A pawi hle mai" ka lo ti a, a nau leh ka u te thihdan lo inang lehzel chu a mak khawp mai. 

"Coffee kha in tawh rawh..a dai palh ang e" zaidam deuha a tih takah chuan ka nui a, tawi tein min lo nuih let ve a, a mize ţha lo lai a lanchhuah tir loh chuan a ngainatawm hle si, kha a mize hlauhawm tak kha chu cho chhuah chi vak a ni lo ang. 

"Hna ka nei si a, an vui hun chu ka nghakthleng lo mai ang aw" a banrek a sana man to hmel zet mai bih vut paha a tih chuan "A ngai reng reng lo. Lumenna a i rawn tel ve thei ringawt pawh hi a lawmawm tawk tawh alawm. Puan lum la tura pindan a ka lut lai te kha min hmu vek em?" ka ti a, ka hawichhuak mang lova, mumallo zetin ka tlaivar ţhak ti ila ka sawisual lo ber ang. Ruang kil ve tute takngial pawh ka hmu mumal lo a, ka vai riai reng a ni ber e. 

"Hmu vek e..kawngkapui lamah ka ţhu, a hnung ber kilah" a ti a, a thusawi awih leh awih lo inkar a ka awm lai chuan min lo nuih leh a, "Nimin ai chuan i zia ta deuh e" a tih leh sup takah chuan ka nui ve ta ringawt a.

"Ka u ka hmuh hnu khan ka zia deuh a, tui deuh a muhil a ang a, natna pai ru ran chungin nun a lo hmang ve reng ţhin a nih hmel a, tunah chuan a hahdam tawh ang. Hremhmun aţangin a zalen tawh alawm" ti a ka phun sep sep lai chuan ka lam a lo hawi a, ka thusawi avang chuan a bangbo deuh niin ka hria. Khawvel aia hrehawm zawk hremhmun a awm ti ţhin ho zingah a tel ve duh hmel. 

A haw dawnah chuan "Ka hman tak leh zanah ka lokal leh ang" a ti thlap a, hnial pawh tum lem lo hian "Aw le..lokal rawh ka lo thlah ang che" tih leh thawh ka rual a, inchhungah ka pen lut zui zat bawk a. 

An haw ţhen nual tawh avangin mi an lo tam vak tawh rih lova, hawi chhuak map lovin ka pen mawp mawp a, Zonunmawia chuan ka hnungah min zui ve zel a, rin lo deuhin kawngpuiah Zualtea nen kan intawk chat mai. 

"Khawiah nge kal i tum?" a lo ti deuh hu a, keichu min en hnuah ka piah chiaha ding pa chu a en leh a, ka ngaihbel nge a lungawi chiah lo em maw ni tih tur hmel a pu a, a hmel landan inthlak hlawk kha ka lo hmu chiang lutuk tlat a ni. 

"Ka ţhianpa hi ka thlah lawk a, i in eipuar tawh em?" tiin a zawhna chhan pah chuan ka zawt let ve nghal thek a, a bu nghat a, engmah phei chu a sawi lo. 

"Lo zu chhuk rawh..ka lo chhuk har lo ang" ka tih takah chuan thuawih deuhin a kal veleh mai a, Zonunmawia nen chuan motor dahna lamah kan inzui phei a, vanneihthlak deuhin Zualtea chanchin min zawt zui lo hlauh a, eng emaw hriat tum ranin zawhna min zawt se chu ka ngaihdan a dang leh dawrh maithei a ni. 

Motor kawngkhar hawn pah chuan "Let tawh rawh, zana lokal ka tum dawn nia" a ti nawn leh a, ka let lamah chuan ka u ţhiante ka tawk nual a, tumah biak hmasak an ngai lo, an pawr fap a, an mit a bui deuh lâk hlawm bawk a, anni ho ka hmuh apiang hian ka u ka hrechhuak ziah tawh dawn a nih hi. 

Diary a ka thu ziah ngaihtuah let rauh rauh chungin ka chhuk a, a thawnthu tawp hun pawh nghak zo lovin ama thuin a ti tawp a, han ziah belh leh hram hram se a tan pawh a ţha zawk tur hi a nia. 

Zualtea ka hmuh chuan "Ka ngawi rih ang" a lo ti nghal thawr a, englai pawha inzui chawt kan ni bawk a amah lo midang an lo tel ve ta chu hriatchian chak a ngah khawp ang. Zawhna siam zut zutna hun a ni rih lo mai mai zawk a, ni lo se chu zawhna chhan sen loh ka dawng tawh hial ang chu. 

Tukţhuan eikham hun awm vela Rintluangi rawn lang nawlh chu mak ti deuhin ka lo en a, pindanah a rawn lut tlang thawr lehnghal. 

"Chawlh ka dil a" a tih rual chuan "Tu nge rawn luh tir che?" ka lo ti ve thung a, "I nutei mawle. Nizana min lo dawng sawng tu ber kha a nia, min hmu miah lo a ni maw?" a tih leh takah chuan ani pawh hi a lo tel ve reng tih ka hre leh hnuhnawh a, ka thil tawn mek hian min ti â vek a, zan lamah kha chuan min rawn be mah se tu nge a nih ka hre kher lo ang. 

"Zonunmawia pawh ka hmu reng alawm. Ani pawh khan min hmu ve a, a mutthlu nasa mai" a tih phei chuan tawi tein ka lo nui a, puan ka bih zawh hnuah pindan aţangin kan inzui chhuak a, ka nutein mi an rawn tam leh hunah chuan puan bih zawkna hun pawh a awm lo  maithei a ti tlat a, min inthlak luih tir a ni. 

"I ti lawmawm hle mai" Rintluangi bulah chuan ka ti mawi ve a, vui hun a hnaih meuh chuan U Marti te thlengin ka hmu a, tu a te mah hi ka be mang ngai lova, ngawi rengin an bulah ka awm ve tawp zel kha a nia, chuti chung chuan an rawn kim ţhap tho a, ka u thihna hian thil tam tak min zirtir a, kei ngei pawh insiamţhat nasat ka ngai khawp mai. 

Ka u ţhiante an rawn ţah hawm hawm lai chuan insum a har takzet a ni. Afeli ui takzet tu tlem te zing a mi an ni. Chep viau mah se ţhenkhat chu a len dan ang angin an rawn inhnawh a, landan a ţawp leh fello tih hriat tak tak te pawh an awm mah se keichuan ka lo hmu mawi em em thung si a ni. 

Zanah chuan a intiam ang ngeiin Zonunmawia pawh a lokal ve leh a, ruang a awm tawh lo va, inchhung pawh a thawl ta deuh a. Nuam lo a tih hlaua a bula ka ţhu phei chu mi ţhenkhat chuan mak min ti deuh niin ka hria. 

"I lo ţha em?" zawi deuh taka a tih chuan ka bu nghat a, inbiak zuina hun a awm mang lo va, rei pawh ţhutpui lovin ka nu bulah ka phei leh thuai a, a insawi dan hmangah a lo len rei theih tho hmel a, lawmthu chu nakinah muang marin ka hrilh ţha leh mai a niang chu. 

CONT..