DEAR DIARY-7

DEAR DIARY-7

Kan buai zualpui a reh hnuah a ngai te bawkin dawrah ka kal leh ţan a, tu a te mai pawh chuan min hrethiamin min dimdawih thar riau a, meinei zet a min ţawngkhum hrat ber Nutei takngial pawhin huatthla la zawngin ţawngkam a nei ngai lo. 

Amaherawhchu, ka thawhpuite fel thar viau mah se hlauh ka ngah lehzual a, thil dang zawng aiin ka hma hun ka hriat lawk miah loh hi ka hlau a, mahni indemnain ka khat bawk. 

"Remruat, ka u chuan a phone number thlengin a nei vek a, thawk ho tih takah an inpawh ve viau a ni awm e. A ţawng tam lem lo a ti bawk a, chhiat in tawh laia a lokal ve te kha mak a ti lutuk ringawt" tiin Rintluangi chuan Zonunmawia chanchin min hrilh leh tawh a, ka u kan vui zana a lo lan bak kha chu kan la inhmu leh ta miah lo a, ka ngaihven em em lo thung a, ka u in rilru a la luah khat rih a ni. 

"Enteh maw..Mami chuan an nu a fak lo reng reng. In la ve deuh a nia a tia, hmanah pawh an fanu piancham lawm naah ka ute hoin an inah chaw an ei a, an nuin a lo be duh lo a, Zonunmawia hian midang a ngaihvenin a haw zel a tia, amah chauh ngaihsak turin a duh tihna a nih chu. Mami hian thil a sawi tam lem lova, mah se nangmah vang hian ka zawt nasa ţhin" a ti a, Mami a ti teh fo a, a u hmeichhia chu a nih ka ring. 

"A nih chu" ka ti ban charh a, ka chhanna chu a duhkhawp loh hmel kher mai. Lawm a zuang tawr tawr turah min ngai deuh em maw ni.

"Zonunmawia zawk hian a nupui hi a atchilh lutuk a ti bawk a, mak i ti ve em? A hmelţhat lem loh nen, a mit a ţhing ka ti teh mai a nia. Mahse anpa'n a hmangaih em avang khan awm chin tawk a hre lova, an intitaurau chho a, an inţhen zui ta a nih kha" pangngai deuh a a tih hnuah "Chuan maw" tih leh hluai pahin min awm hnaih a, "Mami chuan a nupui hian a ruk a ngaihzawng a neih char char a ring a, a hrechiang bik lo nain rei deuh chhung chu a bum an ring vek. Awii..sawi dan hrang hrang a tam mai a ti..amah tak an zawt ngam si lova" a tih zawm zat a, an unau chuan an lo va han sawi dun nasa ţhin awm em em ve mawle. 

"Chung te chu an nupa inkar thil a nia, tuman sawi nuam an ti nang. A lokal ve fo sia, i lo zawt palh hlauh ange" ka ti let zek a, a lawm loh hmel ngang mai. 

"Keichuan chhe lo ka ti ringawt a, nang angin ka enzui vung vung ngai hleinem. Ka u pawn min hauh phah ngun ve tho a, i tan liau liau alawm ka zawh ziah ni" a ti vei hlar a, "Engamah hmain a nupui hlui hi ka ngei nghal em em ringawt mai a ni. A pasalin ţhat a chhuah zual poh leh a huangtau a, a inluling ting tihna a ni mai" a ti zui barh barh bawk a, mahni lo maha hrehawm tih ruk nak laiin, ka sawi pui peih tehchiam lo. 

Tlaiah a fanu nen an rawn inkai lut leh a, eitur hi an lam khawm ve deuh ţhin niin ka hria. Ka awm lohna lam a ni hlauh thung a, a fanu te lah chu a awm ţha tawhin ka ţhutna lama lo phei tum hmel pawh a pu tawh lo va, Zonunmawia pawh chuan min ngaihsak zui lem hlei lo va, a lerh vak lo a nih ka ring ta ber. 

Kan inkawm nel ve thei ngai dawn lo a nih hi ka tih tawh hnuah amah ngei mai chu ka awmna lamah a lo phei a, a fanu a kai bet tlat bawk. Naupang ruala a kal chuan a kal muang ve deuh a, amah hi che vut vut lo chi a ni ve bawkin ka hria. 

"I lo dam em?" a ti a, a aw zangkhai vah mai chu hriat a nuam hle a, a hmel hmuh chian tuma ka dah deuh vah rual chuan kan mit a intawng chat a, ka zah viau laiin ani chuan tawitein min lo nuih a, hmuh a hrehawm loh khawp mai. 

"Aw, ka dam alawm. In dam ţha zawk em? I va reh ve" tiin pangngai deuhin ka chhang let thei a, hma ka sawn ve tawh khawp alawm. 

"Tunlai chu ka buai deuh a, i dam chuan a ţhat chu. Inchung sanga lawn tawh loh tur aw" a tih chuan ka lo nui mai a, min fiam dan kì erawh ka hrethiam thawkhat. A nau ngeiin a nunna a lo lak ve tawh avangin kha zan pawh khan min rawn chhanchhuak a ni. A hlauthawng lutuk te kha tunah chuan a chhan ka hrethiam vek tawh. Mihring hi kan thil lo tawn tawh te hian min lo nghawng thei takzet a nih hi. Hun rei tak a awh ţhin bawk. 

"Bakilh in en dawn em?" ka tih takah chuan a nuih a lo za ve viau a, "Kum a tawp meuh chuan pawisa ai pawn bakilh kan ngah zawk ang a" a ti fiamthu a, ka zak angreng hle. Sawi tur dang ka hre miau lo alawm le. 

"Vawikhatah a vai pawh hian i lei thei ang chu" bakilh awmna ka kut ka phar pah a, a nui duh tawh hauh lo zui a. 

"Pawisa hi awlsam deuha thawh chhuah theih a ni ngai lo" a tih chuan "Ni ele..eiruk tur a awm phawt chuan awlsam deuhin a neih ţun theih alawm. Kan dawrah pawh hian eiruk tur chu awm se kan ei ru ţham ang chu" ka lo ti fiamthu ve a, ka nui hak hak chu min en ran a, min hmuh dan a danglam vek maithei a ni.

"Mi rinawm chuan chutiangin an ti ngai lo. An ban phakah inchhawp reng mah se an pawisa ni lo chu an khawih duh lo" thutak zet hian a ti a, ka pawm loh zawng tak a ni thung. 

"Khawvelah hian mi rinawm an awm lo tih theih a ni. Langsar deuh a eiruk an hreh lova, in ţha tak tak an sa a, an khawsak theih avang maiin ţhenkhat lahin an pak huam a, hei vang hian nuam lo tihna pawh an nei ngai lo. Ei ru thei chin phawt chuan an ei ru vek ang. I awih loh chuan lo chik ve chhin la, ka sawi dik zia i hre mai ang" ka ti kha kha a, ka ţawng chhung zawng chuan chik deuhin min lo en a, a hmelah chuan eng ber nge a ngaihtuah hriat theih a ni lo. 

"Mi rinawm an tam viau a sin" a tih rual chuan "An hming sawi chat theih i nei lo vang" ka lo ti vat a, sawi zawm tuma ka an zuau laia "Ka pa" a lo tih chuan hmui ka chip rang hle. 

"Keipawn hrehawm ka ti ţhin alawm. Lehkha ka zir lai chuan i ngaihdan ang chiah kha ka ngaihdan a ni ve ţhin a, 'ka pa, i thawhpuite hoin in ţha tak tak an sa thei si a, kan in hi a va chhe bik ve' ka ti fo mai. Chhanna mumal deuh ka beisei laiin ka pa chuan 'Keichuan Pathian ka hlau alawm' tih chiahin min chhang a, ka pa anga Pathian hlau tam tak an la awm a, mi rinawm loh aiin mi rinawm an tam zawk. Kan chawimawi vul chuk lo a, an langsar lo mai mai a nih hi" a ti duah a, ka tep chap a, aw ka thian kharh a, sawi ve tur pawh ka hre leh tawh lo. He pa pui hian min ţhawng nawlh nawlh reng mai chu a nih hi. Sual leh khirh deuhah ka ngai ţhin a, ka ngaihdan letling thawkin a awm zui a, ngaihdan ka lo siam hma lutuk deuh chu a ni. 

"Tunah chuan hna ţha deuh i nei tawh alawm" tih chiah ka sawi hman, ka ngawi zui hmak a, ani hian ka hnenah a hnathawh a la sawi lo hrim hrim a, a chanchin kan sawi ţhin tih a hriat phah dawn chiang lutuk. 

"Eng nge ka thawh?" tiin amah zawk chuan min zawt ta khauh a, min en chik viau mai bawk si nen, sawi tur ka hre lawk lo chuan ka kutphah thlan dap chu ka kekawrah ka tat a, i chanchin kan sawi ţhin han tih ngawt mai chu ka duh bik bawk si lo, "I hausak hmel em a, hna ţha deuh i neih ka ring deuh" ka ti ta ringawt a, a mitah pawh ka en ngam tawh lo. 

A nui hawk thawm ka hriat takah chuan ka en leh vat tho a, "Tak tak alawm" ka ti leh hram a, rin dan tawk chu a nei thiam tawh ngei ngei ang. 

"I ngaih anga hausa ka ni lo a nia" nui suk hian a ti a, a fanu lah chuan "Apa kal tawh ang" a lo ti ve sek a, a va han hun lo tak. 

"Kan inhmu leh dawn nia" tiin a inher a, an pafa chuan ka thlir zui reng a, awm a nuam veng veng mai. 

Karkhat zen zawn kan inhmu lo leh tawh a, mi an tlem deuh chang phei chuan tih tur a vangin rilru ka kawm nasa zual sauh a, keimah chiaha ka awm ngat phei chuan ka u ngawt ka ngaihtuah ţhin. A intihhlum ringawt chhan kha ka hre chak a, mitthi tawh chu zawhna tam tak pawh zawt ila eng chhanna mah ka dawng dawn tawh chuang bawk si lo, keimah ka indem a, ka u kha ka hrechiang loah ka ngai a, a buaina takngial pawh ka hnenah a thlen ngam lo chu a nia ka ti fo a, ka awmdan chu a hrehawm ţhin tak tak a ni. 

Beisei loh deuhin inrinni tlaiah a rawn lang nawlh a, a thawmhnaw hak te chu hmuh a nuamin a hmel pawh a dam thlap mai. U Martin a lo biak lai chuan ka dinna lam a rawn hawi a, lai ru deuh chung hian ka lo nuih seih a, chhuar phenah ka ding pil leh ta daih a. 

Customer tam loh lai a ni hlauh a, ka bihrukna aţang chuan hlimthla lo hnai zel chu ka lo en reng a, Zonunmawia ni se aw ka tih lai mekin "Eng nge i an tawh a?" a rawn ti a, amah a ni tak tak mawle. Lapaw chini a la keng zui. A rawn luh hlim khan a keng hauh lo tih ka hre bawk. 

"Ka zia tawh e..chanchin min lo zawt ziah a, ka lawm lutuk a nia" dawr bungrua melh kual ruai chung hian ka ti a, a mitah ka en ngam lo a ni ber e.

"Ka hmu thei" tih chiahin min chhang a, a thil ken lai ngawt en chung hian "Eng chu maw?" ka lo ti he haw a, ka buai zo leh vek tawh. 

"I zia tawh..a lawmawm e" a ti veleh a, sawi mai tur ka vân leh viau tawh a, amah zawk chuan lapaw chini chu rawn keng hnaiin "Kha la rawh" a ti deuh sup a, a ngaihna ka hre lo ngei mai.

Hreh deuh chungin a hmel chu ka en ta nge nge a, a insawi ang khan a buai tak tak aniang a chauh hmel lutuk tlat. Mahse ka mitah chuan a lang cool ruih tho. A lan dan apiang ţha ka lo ti em em zel chu a nih hi. 

"Ka ta tur maw?" a thil ken lai kawh paha ka tih chuan a lo bu nghat a, "I ngainain ka hria a" a tih leh takah chuan hreh deuhin ka la a, hawng nghal mai lovin ka keng leh rih a, min pe tu a chhiat loh em avangin han dah ţha ngawt dawn ila a sawng tè vek dawn bawk si, a ţawnna rubber em pawh ka la pawh phelh lo a, ka ei ui nghal em em mai chu a nia. 

"Engtin nge ka ngaina tih i hriat?" ka ti kher a, kan inbiak dan hi ngaihtuah chian chuan a nuihzatthlak deuh ţhin, zawhna mawl mang te te kan inzawt a, kan inhmu lo vang vang a, kan inhmuh leh hnuah pawh zawhna bawk a ni leh a, a tawp thei ngai dawn lo a nih hi. 

"Keichu ka hriatna a ţha alawm" hlim hmel pu sarh hian a lo ti a, lapaw chini ka duh zia hi chu Faktea chiahin a hria ang, chu tah pawh a pawl kher hi ka ei chak bik ţhin lehnghal. Ka ken lai chu ka en nawn leh kher a, a lo pawl râm a, ani hi Pu Sena nen an inhriat ţhat hmel sia, Faktea a lo zawt a ni thei mai angem le? Chu erawh ka buaina tur a ni lo. Ka duhzawng min tih sak duh ringawt pawh hi a lawmawm tawk tawh viau a ni. 

"Ka ngainat zawng i hre thei hle mai" ka ti leh ta nge nge a, coffee min pe tawh a, lapaw chini a ni leh a, ka ngainat ve ve te an ni. 

"Ka fanu ang mai" a ti leh sup a, a aw chu a zawi hle nain ka bengah chuan a ri ring hle thung. Ani pui hian a fanu ang lekah min lo ngai ang tih ka hlau khawp mai. 

"Lapaw chini hi chu a tui alawm. A nem thep bawk si, a landan hian mi a hip mai bakah a rilru a ţhat hmel e" ka tih chuan a nui chhuak ta hawk a, ka inchhir chawpchilh nghal. Tuna ka thusawi zawh chiah kha chu Faktea emaw Zualtea bulah sawi ila a fuh zawk ngei ang. 

"Umm..a ţha ang. Chuvang chuan ei dim deuh la aw" min lo ti a, a aw aţang ringawt pawh chuan a nuih a la za tih a hriat theih alawm. 

A kal hnu chuan Rintluangi rawn lang vatin "Dawr a a lo luh hnu deuh lawk khan vaipain kan dawr a rawn kal tlang a, kha thil lei tur khan a umzui alawm. Awi..keichu ka lo hmu fuh thei sia" phur zet a tih pahin ka thil ken lai chu a kawk a, ka ngainat zawng a hre chat thei hi a mak riau, Faktea ka zawh chian ngei a ngai a ni. 

"A ngaihven ve deuh chein ka hria. A ni lo lamah lo ngai lo la, i u thih hnu hian a ngaihven riau mai che, a khawngaih che nge a duhzawng tak i ni zawk ni ang le?" a ti vang vang a, "Chutiang a ho..lo buai ve lo la a ni mai" ka ti hlak a, engkim hriat ve vek zel a tum ringawt mai. 

"Mi nuna buai lo chuan ka awm thei hleinem. Buaina tur dang a tlem em hi" a ti a, ka lo nui hak a, hetiang nun hi alawm ka awh ve ţhin chu ni. 

"Sem ţhen thei che ila ka ti khawp mai" tih pahin ka inher hmak a, Zonunmawia thil min lo ken sak chu ui deuh chungin ka hawng nghal zat bawk a, ka ei vat loh chuan a ei tlak loh mai dawn. 

"Min lo pe ve" ţi dâkin a rawn ti hram a, ka hmaah a ding leh ran tawh. Pek ve ka tum tak takah chuan a hnar leh ang lawi a!

"Ka mit a uihlit ang. Tikhan nangmahin ei puk puk rawh" a ti kher a, customer a va buaipui leh rih a, keipawh ka bang chuang lo. Reh hmak ţum kan nei khat khawp mai. 

Dawr khar hun a hnaih meuh chuan ka bulah bawk a rawn tâp leh chawt tawh a, a ngei zawng a tawng ni ngei tur a ni a ang bawrh bawrh a, a duh tawk a sawi hnuah "Nang huat deuh i nei tawh em?" min ti a, "Keimah hi" ka lo tih chuan min en duh ngang mai. 

"Engvangin?" a ti ha a, "Ka chak lo a, ka nep a, keimaha engkim hi ka haw vek" fiamthu deuh hian ka lo ti a, a nui ve duh hauh lo. 

"Ti hian ti rawh" tih pahin ka kut a la a, ka thin zawnah a dawm bet tlat a, engtak chu ti ang maw ka tih rilru lai chuan "Darthlalang hmaah ding la, tuna ka tih ang chiah hian i lung zâwnah i kut i dah dawn nia" a ti a, a ho angreng khawp mai. 

Mahse, "Nangmah leh nangmah i inbe ţhin dawn nia, 'thil tihsual i nei hauh lo chung pawha ka dem ziah ţhin che avangin min ngaidam rawh' ti la, 'ka piantirh phat aţangin ka tan i awm reng ţhin a, chuti chung chuan ka diriam ziah tho che a, mah se thil ţha leh ţha lo lo thleng ţhin te hi Pathian chuan ka tana ţha ber tur niin a sawi a, pawm thiam zel ka tum tawh ang. Thiam lohna pakhatmah i neih loh avangin tun chinah chuan ka dem tawh lo che ang a, engkima lawm thiam ka zir tawh zawk ang. Ka kalna apiangah min zui a, min puibawm zel ţhin avangin ka lawm e' i ti ţhin ang a, nangmah in en reng chungin ka sawi ang chiah hian i sawi ţhin dawn nia. Mahni kan inhmangaih phawt loh chuan tumah kan hmangaih thei ngai lo vang" a ti leh a, thutak viau mah se ka tawlh hnung a, ka ngaihdan a ni lo viau mai. 

"Khatiang duaha mahni leh mahni inbiak ka duh teuh lo mai. A zahthlak dawn bawk si" ka ti hlak a, beidawn hmel zet hian a thaw hak a, U Martin min koh tak avangin engmah a sawi zawm ta lo a, thaw a veng huai mai. 

Zualtea a nawm sam loh avangin keimahin ka haw a, an inzawn ka thlen chuan chunglam aţangin min lo ko lauh a, khua a lum tehreng nen puan luma intuam hlun chungin a pindan bathlarah a lo ding ran a, no beng nei lianpui a keng bawk. 

"I khua a sik em ni a?" dak vah a ka tih chuan "A nih hi, tlangval ţhankin tawh pawh ka khur dur dur mai alawm" a ti a, ka lo chek hlak a. 

"In la upa viau ţhin lo teh. A zia lo hle mai, eichak deuh te i nei em?" ti a ka zawh chuan "Nangmah kha" a lo ti fiamthu a, tum bur mah ila ka la hawi chho reng tho a, a sam lah chu a thur em em mai lehnghal. 

"Mu daih ta che..ngah nge bathlarah i din reng a?" ka ti ta daih a. 

"Ka lo hmuak che. Ka hruai thei si lo che a, i hah em?" a lo ti var a, khawsik chung pawn min lo hmuak hram hram chu a nia. 

"Hmuah ka ngai hleinem mawle. Ke a kal te mai mai chu ka hnehsawh lutuk. Mu leh daih rawh ka lo haw tawh hi" ka ti a, eitur eng emaw ka lo hawnsak lo chu ka inchhir angreng hle mai. 

Nidanga a tih ngai loh dan deuhin "Zanah lo chho rawh aw" a ti a, chhan pawh ka chhan hmain a nu a rawn chhuak a, kan thawm a hria nge pawh ka hre lo inchung lam a hawi chho ve nghal a.

"I lo haw der elo Nu Rinte" ka lo tih mawi ve chuan chhan pawh min chhang lovin "Lalţhazual, tukverh khar la mu lum rih rawh ka tih che kha" a ti a, a vin khawp mai. 

"Remruati ka lo hmuak alawm. Naupang angah min ngai ţhin lo teh" a lo ti hluk a, a tum zui bur a, a lungawi loh zia a hmuh theih a ni. 

"Hmuak lo mahla a lo haw thleng dawn tho tho. I natin keini bak kan buai lo. Lut ringawt rawh" a hma aia vin mah hian Nu Rintei chuan a ti leh a, thinrim taka kawtlaia a au vak vak mai chu mak ka lo ti zawk. 

An inhnial zui zel hmain ka lo inrawlh a, "Ka chhuk thla phawt dawn. Lo dam vat vat rawh aw" ti a Zualtea ka hrilh hnuah hmanhmawh deuhin ka kal nghal hlawk hlawk a, step ah te chuan en pawh en chiang mang hlei lovin ka pen thla mawp mawp a, Nu Rintei khan a fapa nen a kan inkawm hi a ngaithei vak lo niin ka hria. 

Dear Diary,

Hun lo la awm turah hian eng nge thleng zel ang? Engtin nge nitin mai hian ka hlauhna hi a pun zual deuh deuh theih le? Mihring te chuan thil ruahman lawk kan nei ţhin a, chutiang bawk chuan ka thil lo duan lawk ve ţhin ang hian ka kal theih loh ka hlau a, keimah leh keimah ka inhuat ngawih ngawih theihna tur thil a thlen zel ka hlau a, kawng harsa tak zawh a ngaih leh ka hlau bawk. 

Ka mihring puite ka hmuh chang apiang hian engtin nge hma lam panin awlsam takin an kal zung zung theih zawk le tih te, engtin nge an tum ram hi awlsam taka an thlen theih ţhin tih mai mai te ka ngaihtuah ţhin a. Kalna tur ber hre lova ka then vel mai mai lai hian ka rualpuite chuan a nuam thei ang berin nun an hmang a, engtin nge an theih zawk le? 

A chang chuan kawng dik tak ka zawh ve niin ka hre ţhin a, mahse ka hmasawn dan hi midangte nen a ka khaikhin apiangin ka chau zo leh vek ţhin. Chuvang chuan midangte nun leh ka nun khaikhin reng mai hi ka duh tawh lova, ka hnual phah ţhin avangin ngaihven lo hmak ila a ţha zawk ang. 

Kei chauh lo pawh hma lam pan duh tak tak tam tak an awm ngei ka ring. Hmalam panin muangchangin kal bek bek mah ila kan dinna ngaia din reng tawp mai ai chuan a ţha zawk tho a, taima taka kan beih fan fan chuan engtik niah emaw kan tum ram chu kan la thleng ve ngei ang.  

"Mate, Zualtea a lokal a nia" ka nu aw ka hriat rualin ka taksa chu a che zui dat dat a, min sawi na hauh lo mah se Zualtea hming a lam tel vang hrim hrim chuan ka harh chiang khawp mai. Chaw ei khama khuma ka mu mai mai kha ka lo muhil pek chu niin. 

"Lehkhabu te hi i dah mai mai zel a, i delh chhia anga sin" tih pahin ka diary chu a la lawk a, thlanglama dawhkan inhungah chuan dim lem lo deuh hian a theh phei a, ka ui rui angreng. 

"A damlo sia a lo leng peih tho tihna em ni a?" ka tih chuan "A damlo tih pawh ka hre ve hleinem. I sawi takah chuan puanlumin a intuam hlun alawm" a lo ti a, chuti taka min kawm chak chu tiin keipawh ka tho thuai a, pindan aţanga ka chhuah pawh chuan ţhutthleng seiah a lo ţhu run a, amah a lian tawh sa bawk nen, puan lum nen phei chuan lian tham ve tak a ni. 

"Ngati nge i lo len luih a? I khuasik leh tawh mi? Thingpui ka lum ang che aw" ka ti zung zung a, a bulah pawh ţhu mai lovin choka a phei inpeih atin ka ding rih a, a mit lah chu a sen deuh ram a, engtin nge maw a lo len peih zawk ni? 

"Lo ţhu phawt teh" tih pahin a bula min awl lai chu zaizirin min kawhhmuh a, hnial buai lovin ka ţhu ve nghal mai bawk a. 

"I khawsik a reh hleithei nange?" ka tih chuan a lo bu nghat a, dar8 a pel tawh a, a nu a thin a ti rim leh maithei a ni. 

"I rawn haw lai kha nachhawkna in min chhawk lai a ni zawk a" a ti a, a lo chhuk thlak hma lawkin a khua a sik leh a ni awm e, chupawh chu pawisa lovin puan lum nen a lo leng lui tho a, a fakawm ve hrim hrim. 

"I nu'n a hria em?" ka tih chuan "Dawrah a kal" a lo ti vat a, a ţhutna lamah ka inher rang khawp mai. 

"A awm loh hlanin i lo chhuak ru maw? A hau leh hrep dawn che a sin. Tlaiah pawh a thin a rim em kha" ti vin hlak hlak mah ila a lo nui suk duh chauh a, a intithei zawk mah emaw tih theih turin alawm maw a awm le. 

"Nangmah hian chhuak ru lo thei lo in min siam a" a la ti zawk zui a, zam lo ve tak chu a ni.

"Chutiang chuan engtik laiin nge ka lo siam che a? Ka muhil daih tawh zawk a nia" inven tum taka ka tih chuan "Aww..ka ngai che alawm" a ti leh daih a, a hahthlak ve thei ngawt mai. 

"I nu'n a hriat vaih chuan keipawh min hau tel tawh ngei ngei ang" ka ti dar dar reng a, hlauh ngah sa nak laiin hlauh tur min siam belh sak mai mai zawk a ni.

"Kan chungah an ţha sia, tih lungawi loh ka hreh teh mai a nia" ka ti leh zel a, ka bula hahdam hmel taka ţhu chu ka melh leh zeuh ţhin a, a sam ka dum luih sak a, uk deuh kharh ai kha chuan a inhmeh daih zawk. 

"Ka chhan ang che. Pasalţha ah min ngai tawp rawh" te chu a la ti tak deuh deuh a. 

"An lo ko leh vat dawn tho che a, chumi hma chuan thingpui ka lum sak lawk ang che. Nachhawkna i ei tawh phei chuan in in lum la a zia mai ang" tih leh thawh ka rual a, "Khawimaw phone chu?" a tih takah chuan pindanah lutin lukham hnuaia ka dah chu ka la chhuak a, phone berkher hi chu nei lo tawp mah ila ka awm thei tho maithei a ni. 

"I u phone chu a mi i hman tak a?" ka chhuah leh laia a lo tih chuan "Ni mai e..ka phone ber a bo miau sia" ti a chhan pahin puan lum chungah ka theh thla a, a thar man tur ka tuak mai ang ka ti ve tak nain ka nu'n min hman luih tir a, ka u sim lo hman ţhin kha hman zawm a rem ti lo thung a, a thar ka hmang a, ka phone number takngial pawh ka la hre lo. Number hi chu ka hriat theih loh zawng tak a ni ve a, phone ah ka chhinchhiah ve thlap thung. 

"Kha in rawh..khawsik chung chuan lo leng tawh reng reng suh" ti a hrilh pahin a hma zawnah thingpui ka chhawp a, en tur a hre lo aniang ka phone pawh ţhutna awl laiah a lo dah a, ka nu min chah angin ka silent ta bik lo a, ka kekawr ipteah ka ak thlap zel tawh bawk.

"Khawiah nge i pa? Zan danga zai nasat theih nen zanin chu a va reh ve" nuihzat hmel tak hian a ti a, ka pa'n min hauh a hlauh em avang hian min ngaihven ru ran ţhin. 

"Pa Sanga te inah a leng lehpek tawh aniang. In thuai thuai la haw rawh" ka tih chuan "A va mak sek e aw..damlo in vin vak vak hlawm mai" a ti bul bul a, ka nu lah chu a mu bo daih a, chhun lamah a che chau ve ţhin bawk nen, a muhil leh der tawh ang. 

Thingpui no ban a tum lai chuan a phone a ri a, ka rin ruk ang chiahin a nu ngei a ni. A be ve mai dawn maw tih laiin phone chu a ak leh hmak a, hau hrep mah ila awmzia a awm lo. A rawn call nawn tluk tluk takah phei chuan a switch off hmak a, a nu thinrimna a cho chhuak leh ngei dawn a nih hi. 

Rei loah kan kawngkhar a ri dawt dawt a, ka va hawn rual rual chuan inchhungah Nu Rintei a rawn pen lut a, a fapa nen chiah kan awm bawk si, inthlahrun a na duh ngei mai. 

"Khaw nge i nu leh pa te?" a ti nghal pang a, Zualtea bulah a ţhu zui chat a. 

"Ka pa a leng a, ka nu a mu tawh" ka ti a, ţhutthleng awl dangah ka ţhu a, min chhang lem lovin Zualtea zawk chu "Engati nge i lo chhuah daih?" a ti a, nin hmel zet hian ka ţhianpa chu a lo thaw hak a, tim daiin ka lo en ve ran bawk. 

"Ka kalna i hriat tawh hi. Ngaihţha deuhin Hazal-i te han en rawh" ngaihsam fe hian a ti a, amah vanga kan chhungkuain buaina kan tawh phah ka hlau lutuk chuan ka ngei lek lek a ni. 

An in ko haw thei leh ta chuang lo va, diktak chuan tlangval a ni ve tawh a, a kalna apianga umzui a, engkim a thunun rual a ni tawh bik lo a ni. Nu Rintei hian a ti mah mah ti tho mah ila ka dem chuang lo, fate ngaihtuah a na dawn a, Zualtea phei chu an bulah a awm khat si, an hauh na viau pawh hi a awm lo lem lo. 

"Lo ţhu phei rawh" a tih tut tut avang chuan "Engtikah nge i kal leh dawn? I zir chhunzawm zel dawn em?" tih pahin a bulah chuan ka ţhu a, "Kal vat turin min duh nge kal tawh lo turin min duh?" a lo ti vel a, puan lum a hlim rual chuan a khupah ka beng thuk a, chhan ngaihna vak ka hre lo thung. 

"I lokal ve duh em?" a tih chuan a uang emaw tiin ka hui hak a, a lam ka hawi chu a lo thutak nasa mai. 

"Eng nge ka lo tih ve ang?" tiin ka zawt let a, ţhutthleng nghenchhanah chuan a ban a rawn dah a, a kutzungchalin ka dar chu a thai pah bawk a, min chhang tawh dawn lo emaw ka tih hnuah "Tih tur a tam alawm. Lehkha i zir thei a, hna i thawh duh pawn thawh tur a awm mai ang" a ti ban deuh charh a, ka u thih hnu ngat phei chuan min ngaihtuah lehzual a, ka pa in ka rilru a tih hah ţhin avang te, ka u thihnain min nghawng nasat em avang te hian ka intihlum ve mai ang tih te a hlau ţhin a, a tello a ka awm tur chu min ngaihtuah ve deuh ni berin ka hria. 

"Keichuan ka nu ka kalsan ve thei hleinem. Ka u a awm tawh lo a, kei lehzel ka awm loh chuan hrehawm a ti lutuk ang" ka tih hnuah "Mipa duh deuh lo nei ve ta ila min lawmpui angem?" tiin zawhna atthlak lutuk ka zawt a, a hmelah danglamna hmuh tur a awm hauh lo nain ka chunga a rilru put hmang hi ka hrechiang tawh a, chuvanga zawt chu ka ni pakhat. Tih hmasak tam tak a la nei tih hrereng chung hian ka hmuh phak loh a a awm a ngai leh tur hi ka ui a, ka ngai dawn takzet. Chutih rual chuan min kalsan daih se, a rilru put hmang a danglam theih nan tal inhmu lovin awm vang vang ila ka ti tho bawk a, ka rilru a insual buai ve nasa ţhin hle. 

"Kei berin ka lawmpui loh chein" a tih laia a nui hmel te chu ka hmu lem riau a, ka khawngaih leh hnuhnawh deuh chuan ka lo sawi chhuak ta kher kher kha ka inchhir rum rum mai. 

"Tak taka keini ang rualin duh kan han nei ve hi chu a hlimchhawnah kan vei vak a, rei a daih ngai lem hlei lova, inpeih fel thlap hmaa ngaihzawng kan neih chuan kan ning thuai a, kan ţhen leh vat zel" tiin ka sawi mawi leh a, a hriat lai chuan mipa dang chanchin ka sawi tawh miah lo ang. 

A haw tur chu kawngkapui thleng ka thlah a, "I dam fel hma chu min lo hruai a ngai lo a nia aw. In enkawl dam vat la, hunawl ka neih veleh hmanni a min hruai naah khan kan kal leh dawn nia" ka tih chuan a hmel hmuh pawh a nuam leh ta deuh a, ţhian dang kawm vak lova inkawm chawt kan ni a, kan inpawh viau pawh hi a mak hran lo. Zualtea anga mi ţha hi an vang viau ang, kei ngat phei chuan sawiselna tur ka hre lo a ni ber a, mahse a nu hmelah khan eng emaw danglam riau ka hmu tlat a ni.

Dawr a ka awm chu buai vanglai takin ka nu'n min rawn bia a, chaw a ei nghal tur thu min hrilh hnuah a dah lehnghal a, Zonunmawia lo lang leh thut se ka ti, a hmel chauh pawh hmu ila tlem chuan ka hahdam deuh ang. Mahse a ni pawh ka cho rual a ni chuang lo a, tihian ralkhat aţangin lo duh ve em em ila a ni mai. Mi hausa tam zawk hi chuan an fate tan an khawsak milpui deuh an duh zel tawh sia, lo fel viau pawh nise dinhmun a inthlau lutuk hi chuan mahni insitna a awm reng dawn tho tho. 

Dawr kan khar dawn ţepah a rawn lang hlawl a, a ruk chuan ka lawm a, panngai deuh anga lan ka tum tlat thung. A rukin ka lo enreng a, U Marti hnena eng emaw a sawi hnuah ka awmna lamah a lo phei a, ka hmazawna a din chuan ka lo nui sak a, a perfume rim chu ka ngainat zawng tak a ni. 

"In vengah ka kal dawn a, ka rualin i haw duh em?" a rawn ti nghal thawr a, lawm viau mah ila lu ka lo thing vat thung. 

"Ka la haw thei rih lo a, bakah ka haw dawn lo a" ka tih chuan a bangbo riauin ka hria. Thu awmze nei lo ka sawi lehpek tawh aniang. Ka bul hnaia a awm hlek tawh hi chuan ka lungphu leh chetzia te, ka ţawngkam te thleng hian thunun harsa ţhin viau mah se nuam ka tihna a bo phah chuang lo a, a hmel hmuh ka chak reng tho. 

"I haw dawn lo maw?" mak tih hmel zeta a tih takah chuan "Haw dawn e..ka thawhna hluia ka ţhianpa nen kan inhmu phawt dawn a, ka tlai deuh dawn sia min lo kalsan mai rawh" ka ti nawk nawk a, amah zui tura min sawm vawikhatna a nia, ka lo la hnial zui a, mahse pawi ka ti lo. Dawra kan inhmuh zeuh zeuh hi a tawk mai. 

"Aw..a pawi loh chu" a ti ban charh a, nidang ai mahin min din hnaih bawk nen, "Kan vengah chuan eng nge i tih dawn?" ti a ka zawh lai mekin ka kekawr iptea ka phone ah chu a nghawr der der a, ka nu a nih ringin ka phawrh chhuak thuai a, min rawn biak tum tu ka hmu chiah chu ka phu deuh uih mai. 

'Ka pasalţha' a inti kalh a, Zualtea hmel a lo lang kalh bawk a, nizan a haw hnu khan phone ka khawih leh tawh lo a, chhuna ka nu'n min lo biak kha a ni leh mai a, phone en min dil khan eng eng emaw chu a lo siam danglam chiang a ni. 

"Hello" ka tih rual rual chuan "Ka dam tawh a, hruai i ngai em?" a rawn ti var a, a khuh zui kharh kharh a, kan inman chhuak chiang lutuk chu nuih loh theih a ni lo. 

"I la dam loh tawp kha. Ka nu ber a hnathawhna hmunah chaw a ei nghal dawn sia, Faktea nen kan inhmu kawi dawn a" tiin ka lo hrilh veleh a, min si deuh thaw a ding Zonunmawia pawh hian engkim kha a lo hmuh ve vek ka ring. 

Zualtea nen kan inbiak zawha phone ka ah ţhat leh lai chuan "Ka ţhianpa te inah chaw ka ei dawn" tiin phone call ka dawn hmaa ka zawhna kha min lo chhang a, a kal nghal daih bawk a, inngaizawng ngat ila chu a thil emaw ka ti ngei ngei ang mawle. 

CONT..