DEAR DIARY-8

DEAR DIARY-8

Ţhenawmte ina len tuma ka nu a chhuah hnu lawkah kawngkhar chu tu emaw hian a rawn kik kauh kauh a, ka pa chu a ni lo phawt ang a, Zualtea a lokal leh ţalh em maw ni ti rilru nauh nauh chungin kawngkhar chu ka nam hawng a, Zonunmawia a lo ni reng mai. 

A rawn lang hlawl chuan min ţhawngin ka awmdan pawh ka sawifiah thiam lo, ka thih lohna tawkin current a kal chuai ni maiin ka hria. Kawngkhar a din hnaih angreng viau lehnghal a, nam na ila chu a tauh bur thei hial ang chu. 

"Min en reng dawn nge lut turin min sawm dawn?" a tih takah chuan zak ru tak chungin kawngkhar chu ka hawng zau a, keimah zawk din hlat pah hian "Lo lut rawh" ka ti mawl tawp a, kawngkaa a rawn pen luh rual chuan ka pawt phui leh a, chunglamah ka kalh thlap bawk. 

"I chhungte an awm nange?" ti a min zawh pahin min rawn melh zawk a, ka lo ţang ţung a, hah viau mah ila nuam ka ti tho si. 

"Ka nu a chhuak chiah a, ka pa chu pindanah" ka ti liam leh puat a, tlaiah khan engmah sawi lovin min kalsan a, tunah a rawn lang leh hlawl a, eng rilru nge maw a put ni. Faktea nen pawh kan inhmu ngei a, mahse ka hriat duh ang ka zawt chhuak thei ţhak lo. 

"Lo ţhu la" amah zawk chuan a la ti ham ham zui a, hahdam hmel taka a ţhu chu ka en hmasa leh te te a, tshirt var a ha a, ruah surin boruak a tih vawh ve deuh avangin tshirt chungah chuan leather jacket dum a ha leh tawp a, kekawr dum nen, a inchei dan chu a inhmeh kher mai. 

"Tu te inah nge chaw i ei?" tih pahin a ţhutna ep chiahah ka ţhu a, a bula ţhut em chu ka hreh ve deuh a ni. Ka hmazawn banga sana intar chu ka melh a, dar8 a ri vang tawh na a rin aiin a haw hma daih. 

"Ka ţhianpa" tih chiahin min chhang leh a, keimah zawkin "Chaw in eikhawm tihna maw?" ka lo tih leh chuan a bu nghat a, a reh zui vang vang a, kei hi chuan mipa ţawngduh ve deuh, ri phawr phawr chi ngaizawng ila kan inlaichinna pawh ninawm lamah a kal lo deuh ang. Zonunmawia hi keimah ang chiah a nih ve chuan lo leng ziah pawh ni se kan reh vang vang reng tho ang. 

"Tu nge i ţhianpa chu?" ka ti leh hram a, "Malsawmtluanga, badminton khelh hrat deuh" a ti kher a, a thusawi chu amah zawkin a lawm tih theih tur hian a nui pah a, "U Tluangtea maw? Pu Dinga fapa kha a ni em?" ka lo ti hluai a, phur deuh te pawh ka ang alawm le.

"Ni e" min en reng chunga a tih chuan ka lai leh ringawt tawh a, a ruk chuan a lo hrethiam vek maithei a ni. 

"Anni chhung chu ka hre ve lutuk alawm..an fel a nia aw" ka tih vang vang laiin ka pa a rawn chhuak a, a tum nasa em em mai lehnghal. 

A sual chhuahin kan ţhutna bawr velah chuan a vei kual sek a, hriat tham mang loh hian a phun leh sup sup zel bawk a, kan hmaa a din reng laiin a kekawr ipte aţangin zo zial kawi deuh mai hi a phawrh a, a ţan zui zat bawk a, ţul hawt lo ah tv hnuaia kan thil dah te chu "Khawiah nge a awm daih?" ti chung rengin a hai hnawk vak a, ka zak lutuk chu bo daih ka chak rum rum mai. 

Phun reng chungin a chhuak a, kawngkhar lah chu nam khar leh pawh a tum lo. A inhawng huau a, ka pa pen ri pawh rei deuh chhung chu kan hre thei a ni. 

"I pa tiraw?" ka inlengpa in a tih rual chuan "Mi ang vak lo kan awmpui a nih kha" ka lo ti vat a, ka mitah tak min en ran a, lawm lo hmel a pu deuhin ka hria. 

Ka ţhutna bula ka phone dah nghawr rawn dar dar chu ka hmet tawp a, Zualtea bawk a ni. A lo len leh ka hlau a, be tam rih lo ila a ţha zawk ang. 

"Ka vawikhat hmuhna a ni lo" a ti zawi deuh sup a, ka pa hmel hmuh tur a awm tawh lo nachungin kawngka lam chu a melh leh zeuh ţhin a, diktak chuan ka zahpui em a ni. 

Zonunmawia lah chuan ka ngaihtuahna hria ni awm hrim hian "I zahpui a ni maw?" a ti a, a landan mai bakah a aw chu a changin ka ţawng duh dan chuan a ti lawm lo tawp tih a hriat theih a ni. 

"Chutiang a ni lo" ka tih lai mekin Zualtean "In hnuai nu" a rawn ti lauh a, midang tana hriat theih khawpin ka thaw huai huai lo chauh a ni. 

"Ka rawn call che kha" tih paha a lo lutin Zonunmawia a hmu thut chu a hamhaih ve deuh niin ka hria, a ding chawt a, phawk deuhin keimah zawk min en a, "Lo ţhu rawh" ka lo tih pawh chuan ka thusawi chu hre lo ang maiin "Vawi thum lai ka lo call che" a ti deuh hmuk a, ka inleng pa chu a ngaihtheih loh hmel khawp lehnghal. 

"Thil pawimawh kan lo sawi a, phone ka lo ngaihven lo reng reng" ka ti chiah chu Zonunmawia tak pawh chuan a ngaihna a hriat loh hmel khawp mai. Dawt sawi thiam vak lo mah ila ngaihţha lo deuha Zualtea a awm ai chuan tiin "Vawk chu karlehah daih maw in talh dawn a?" ka ti ta ringawt a, ka landan a danglam loh nan Zonunmawia awm zawn ka melh tlat a, ka nui hauh lo bawk.

"Talh dawn e..an rawn hauh lawk nual tawh a" a lo ti charh a, ka dawt sawi min zawm nghal thei mai chu a rukin ka nui ver ver mai. Ka nuichhuah erawh ka hlau viau tho.

"Vawksa hi chu a tui em a, hriatchian ngat phei chu an lei thur thur zel alawm. Zingkarah in zo vek ang" ka ti leh zung zung a, Zualtea chu a ngaih a ţhat hmel chiah loh a, vawk vang mai mai a phone ka la lo chu min ringhlel deuh niin ka hria. 

"Ka hre lo le..eng nge maw a an dawn ni" Zonunmawia chuan a lo ti veleh a, Zualtea lah chu ţhu ve ta mai lo chuan "Nakinah ka lo bia ang che. Ka nu'n min hmu a, a rawn chhuk thlak hmain chhoh khalh thek teh ang" tih leh kan in aţanga chhuah a rual a, kawngkhar a nam phui tur te chuan rum deuhin min melh a, a lungawi chiah lo a nih hmel khawp mai. 

"Ka thusawi kha i lo man lo ang tih ka hlau lutuk a" ka tih rualin "Engtin nge vawk kan talh dawn tih i hriat?" a lo ti ve chiah a, zawhna kan inzawt rual chiah a, kan thusawi erawh a inang lo viau thung. 

"Ka hre reng reng lo. Vawk i talh ţhin em ni a?" ka lo ti let ha a, "Talh ngai teh nang, mahse kar lehah kan talh dawn alawm" a ti a, keimah ang bawkin a bangbo ve niin ka hria. 

"Chhuanlam tur dang ka hre lo lutukin vawk kha ka sawichhuak mai mai a nih kha. In lo vulh tak tak em ni a?" ka tih chuan a kutphah min hmuh chung meuhin "Panga lai mawle" a ti a, ka lo nui ve hak mai. 

"Chuan karlehah in talh dawn bawk a?" ti a ka zawh leh chuan a lo bu nghat a, ka lo inthiam loh rilruk vei nen dawt ka sawi loh tawp chu a. 

"Nitin hna i kal a ngai awm sia, tuin nge vawk chu lo enkawl a?" mak ti deuh taka ka tih chuan "Ka nu a ni mai ang chu. A taima a, kawmthlang awl duai tur kha a ui tlat bawk a, vawk a vulh ta mai" tiin ţha deuhin min hrilh ve mial a, ka hmuh apiang hian ka nel zual deuh deuh ni maiin ka hria. A mize ngainatawm loh zet kha chu ka la hlau tho a, cho chhuah ka tum lo bur bawk. 

"Nu fel tak a ni phawt ang" ti a a der ni hauh lova ka lo fak laiin ka nu a rawn lut a, kawngkapui hnungchhawn zawnga ţhu chu tu nge a nih pawh en chiang lem hlei lovin "I pa hi hian min va han ti zak thei tak. Ka lenna ah a rawnkal a, ka pawisa dahţhat i la vek min rawn ti ringawt a" a ti hlak hlak a, mitmeiin ka lo khap vat a, a hrethiam a ni chek ang chu choka ah a lut tlang ta daih a. Zualtea emaw a ti a ni ngei ngei ang. 

Beisei loh deuhin choka aţanga a lo let leh chuan "Ehe..Zonun, Matei nen in inhria elo?" a ti a, a phawk hra a, an lo inhre ve daih chu mak ka ti fe zawk ang. 

"Aw..in vengah ka kal a, ka lo peng zawk a nih hi" a lo ti a, a landan a pangngai phian lehnghal. 

"Engtia inhria nge in nih a? A va mak teh daih ve" ka nu chuan ka bula rawn ţhut pah hian a ti a, ka u thih pawh khan a lokal reng sia, kei ai mahin a tuar thiam lo a, a mumallo rei bawk a, kan ina lo chuangkai an tam ve angreng si, a lo hmu bik lo a nih ka ring. 

"Sangsangi bakilh ho kha Matei te dawr a mi vek alawm" a tih takah chuan Zonunmawia lam chu ka hawi nghal vut a, ka nu chu awm lo se engtin maw min koh ka ti ngei ngei ang mawle. 

"A nih chu...a lo inhriat loh theih ngei mai. In inhria tih chu hria ila hmanni a i pa piancham kan lawm te khan chaw ei turin ka ko ve tur a nia" tiin ka nu chu a nui pah hak hak a, ka lo zak viau thung. 

"A fel chuan kan sawm ve tawh dawn nia" ti a ka nu fiamthu a lo zawm ve chuan ka melh ralh a, boruak a dai viau nain ka sa hat hat a, tu hriatpui si loh a han laih viau ang hi ka nei khat tawh viau a sin. 

"Eng nge awmzia?" tih paha amah ka en kher a, min hrilh mai dawn emaw tih laiin "Ka haw hunah i nu i zawt dawn nia" a ti daih a, ka ngei reuh hle mai. 

"Thingpui i lo in tawh em?" ka nu'n a tih leh chuan "In lo deuh" a ti vel a, ka nu chuan min khak zui nghalin thingpui lum turin min tir a, beisei loh deuhin a lo lang hlawl a, ka hriatna hi a mâng zo vek a ni ber e. 

Thingpui ka pek lai chuan ka nu nen an lo titi a, Sangsangi hming an lam ngun khawp mai. An titi tui emai tiin ka inrawlh duh lova, tv en ang a awmin ka ngawi ran a, an thusawi chu ka ngaithla ru ve reng a, a fanu chanchin chu sawi nuam a tiin a hmangaih zia a hriattheih a ni. 

Ka pa lo haw chu a rawn khuh lut bawrh bawrh a, midang hmuh loh tura kun tlat chung hian ka lo ner nang nang a, a damloh lah hian mi aiin a zuau zawk a, na vak lo mah se na deuh angin a awm thiam ţhin. Doctor in zu in tawh lo tura an tih lawm lawm hnuah pawh a in lui zel a, a kawchhung chu a chhe tawh viau ang. Hospital ah pawh kan lut zing reng a ni. 

"Tui min han pe teh" a tih rualin ka nu lah chu a tho nghal a, ka thin a lo rim leh et et tawh. A ti der bak a ni leh lo ang. Inleng nei lo ila chu ka khak chiang viau ang. 

Pindanah an inzui lut a, ka pa lah chu a la khuh bur bur reng a, ngaihtuah chu sawi loh a khuh ri mai mai te chuan thin a ti rim hlur mai a ni. Zonunmawia pawh hian min dem maithei a ni. Mahse hetiang mi chenpui ve lo ho hi chuan engmah an hrethiam lo. Khawlaia an awmdan leh inchhunga an awmdan a danglam hlak a, 'a pa a duat lo, a ngaihsak lo' min ti ţhin tute hian ka pa hi karkhat pawh an awmpui peih lovang. 

Ka thin a rim ru ţeuh reng tih hre lo lekin Zonunmawia lah chuan "I pa chu damdawiin a hruai a va ngaih hmel ve" a lo ti a, ka melh rum ngang mai. 

"Sawi sual ka nei em?" a ti leh sup a, ngaihţhat loh hmel deuh hian ka nu te pindan lam chu a thlek leh a, mi tupawh hi kan thih daih a hlau ni berin ka hria. 

"Khuh satliah a nih chu..bakah a ti lui ve deuh ţhin a" ka ti liam satliah a, a mitmeng fing zeta min lo en ran avang chuan zam a awl khawp mai. 

"Ka haw phawt ang" tih leh din a rual a, Zualtea min lo biak laia a awm ang chiah khan min ngaichang lovin a chhuak nghal nulh a, hrilhhai deuha ka din reng lai chuan a lo lut leh a, "Theihnghilh i nei mi?" ka lo ti vat a, "Nei lo e..muttui aw" a ti a, a chhuak leh mai a, a mumallo reuh lutuk chu a lai ve deuh em mawni ka ti hial a ni. Rintluangin pathlawi zei zia a sawi chamchi a, Zonunmawia hi pathlawi ve siah chuan a zei lo ber pawl a ni maithei a ni. Kei lah mi ti zawk zawk lo chi ka ni ve bawk nen, ka beisei phak hauh lo nain min lo duh ru ve reng pawh nise engtikahmah kan inkawp lovang. Sawi chhuah ngam loh ve ve chuan inkawp ngaihna a awm lo emai bakah kan in upat hleih lutuk tlat. 

Tui no keng chunga ka nu lo chhuak chuan "Zonuna kha a haw ta daih elo?" a ti hmasaber a, kawngkhar a en a, ka lo kalh fel thlap tawh.

"Haw ta a nih kha. Engtin nge in in hriat a?" ka lo ti let a, "An inah alawm ka thawh" a ti ta mai a, "Engmaw?" ring leng lawng a ka tih chuan tui no dah turin chokaah a phei a, a va sil rak rak hnuah lo letin ka ep chiahah a ţhu a, min en nghal vang vang mai. 

"In inngaizawng ve em ni a?" khunkhan deuh taka a tih chuan ka nui hul hak a, "Chutiang te min zawh..a awmin a ang lo emai a" ka ti fiamthu hlak a, min ngaizawng se chu a reh vang vang zel lo ang, sawi tak ang khan amah phei chuan a sawichhuah ngam ka ring lo. 

"Fa a nei tawh tih i hria em?" a ti nghal pang a, lo buk nghat pah hian "A lo hruai tawh alawm" ka ti ve mai a, a fanu pawh a hmelţhat khawp kha. 

"A nu hnen aţangin a chanchin tam tak ka hre tawh a, an chhungkua hi an sual lem lo, min duhsak zia chu nang pawn i hriat kha. An ina chaw ka ei ngai loh avangin chawhmeh kan neih loh te an hlau a, an duh loh zawngin in lo awm palh hlauh ange aw. Thawh tur a van em hi" awmze nei taka a tih chuan ka hriatthiam thu ka lo hrilh a, ka ngaihzawn a, Zonunmawia nu leh pate duh loh zawnga ka awm a hlau a ni.

"Amah hi mipa lerh leh len cheh a nih loh hmel a, chanchin sawi tur a nei vak dawn mi?" ti a ka zawh chuan "Nei ve tho e. Annu nen hian lehkha an zir lai aţanga ţhian lo ni tawh an nia, an inngaizawng chho a, nupa ah hial an insiam a, intih taurau chang chu nei ve zeuh ţhin mah se an inţhen em ngai lo va, mahse annu in a lo bum a, an nupa in kar a chhiat zel hnu, an inpawh vak tawh loh hnuah a rukin mipa dang a lo be ţhin a. Thudik chu thup reng theih ni hek lo le, Zonuna hian a hriat chhuah rual rualin a ţhen nghal an ti mai a" a ti charh charh a, rei tak ţhian an nih hnuah an inngaizawng a, an innei hial bawk a, chutiang a nih chuan Zonunmawia pawh hian a hmangaih viau awm e. 

"Mi sawi chu ka hre ve tawh a, mahse a nu ngeiin a hrilh che chuan tuna i sawi kha ka ring zawk" ka ti a, ka nu lah chuan a ţhutdan chu siamrem sauhin "Ni ang chu mawle. Hman niah Zonuna te pafa ka khawngaih zia ka sawi chhuak a, an chanchin chipchiar deuhin min hrilh alawm" zawi angreng tak hian a ti a, ka pa a muhil daih tawh a, chuti chung chuan min hrilh ru sar sar reng tho. 

"A nupui hlui chu a lokal ngai miah lo em ni? Nilengin an inah hna i thawk a, vawikhat tal i hmu tawh em?" ka tih leh chuan "Hmu e..a rawn kal ve bawk alawm. A fanu a ngai ve a, Zonuna nu leh pate pawn an lo be chhe ngai lo. An la inpawh hmel khawp mai" a ti a, a chhan sawi fak tur awm mang si lo hian ka hnual rawih rawih a, beisei ka lo nei hman nge pawh ka hre lo, an chanchin diktak ka hriat meuh chuan ka nguai nghal vek a ni ber. 

"A hmelţha em?" ka ti leh hram a, "I va han dilchhut em em ve mawle" tiin ka nu chu a nui hak hak a, ka en reng takah chuan "Hmelţha ve e. A hmaifang ţhat chu thuhran, anni chuan in enkawlna tur pawisa an nei a, an taksa enkawl nan a sum tam tak an sen phal chuan ţhat loh ngaihna a awm lo ve bawk a ni. Tunlaiah te chuan sam tan man ringawt pawh a to tawh emai" a ti bawrh bawrh a, hmanah kha chuan hmel a siamţhat theih loh an ti ţhin a, tunah chuan nungchang aiin siamţhat a awlsam tawh zawk. 

Ka nu'n min mutsan hnuah Zualtea chu ka call ta nge nge a, min chhang tawh dawn lo emaw ka tih hnuah "I inleng pa kha a haw tawh mi?" a rawn ti a, ngaihnep hmel zet hian a nui zui hawk a, midang ţawng nuaih nuaih pawh ka hre tel ve. 

"I lengchhuak em ni a?" ka tih chuan "Aw..kan veng kawna ka ţhianpa te in ka kawhhmuh che kha i la hria em?" a ti hmasa te te a, "Hria e" ka tih veleh "Khatah khan ka leng" a rawn ti a, ka ngaihbel nge a aw te chu a danglam riauin ka hre tlat pek a, ka hmuhah ngat phei chuan beer chiah a la in a, chupawh rui khawpin a in ngai lo. Ani hi a lo rui ve em mawni ka ti rilru nghal a, ka zawt dawt ngam bawk si lo chu ka hrehawm vek thei. 

"I damloh kha" zawi sapa ka tih chuan "Ka dam tawh ka tih kha. I lokal ve duh em?" ngaihsam hmel fe hian a ti a, ka duh loh thu ka hrilh zet tawh hnuah "Lo haw vat rawh aw. Kawtlaiah ka lo nghak ang che" ka ti ţha leh a, "Naa..ka lo haw lo maithei a sin. Hei mutna an siam vek tawh" a ti bul bul te chu ka ngei kher mai. 

"Riak lo ang..i nu'n a ngaihtuah em che hi. Inchung berah khan em ni in awm? Lo chhuk rawh, ka lo hruai ang che" ka ti hlak hlak a, ka aw pawh a chhum hmuk hmuk viau a ni. 

"A ngai love..i hah ang muhil tawh rawh" tih leh phone dah a rual ta mai a, tihngaihna vak ka hre lo lutuk chuan ka hmui ka pet a, ka chhip a ka sam tuai chhoh pahin thlem dan tur ka ngaihtuah neuh neuh a, engmah ngaihtuah chhuak thei lo mah ila ka call leh ta tho a, reiloah min rawn chhangin "Vawksa chu kg5 kan lo hauh ve ang aw" a ti lang lang kher a, a va han chimawm ve chiang tak. 

"In aţangin ka lo chhuak chiah" tiin dawt ka hrilh a, "I pa hnar ri ka hre pha" a la ti zui. Ka beng aţanga phone dah sawn meuhin thawm ka ngaithla a, ka pa a hnar lo tih ka chian hnuah ka bengah bawk chuktuah lehin "Ka lokal mek tak tak a nia aw. Sarawn par ngah deuh te in zawn ka thleng tawh" ka ti thla rawk a, kan in piah lawk a nih avangin kan inbiak zawhah chhuak chauh mah ila ka thleng har lo ang. 

"Lokal kher a ngai lo i hah mai mai ang. Bakah a tlai tawh a hlauhawm" a ti deuh hmuk a, keiin duh duh hunah ka ko a, min biak a tum ve laia ka hre lo der daih kha nuam lo ka ti telh telh a, ka khawngaih bawk. 

"Ka ngaihtuah che alawm" ka ti ta nge nge a, a reh vang vang mai. 

"Ka sawi chu i hria em?" ka tih leh chuan aw a thian kharh a, "Huiham..zan khat riah chhuah pawh ka thei ve lo a nih hi. Min ngaihtuah viau phei chuan ka lo haw ang, kawtah lo ding rawh" a ti a, phone chu dah zui nghal daih mah se ka nui chhuak hak a, bike a ken tho ka rin avangin ka nu pawh hrilh lem loin ka chhuak ve thawr a, ka koh tawh phawt chuan rei rial lovin ka hnenah a lokal ţhin a, tunah pawh a tlai hauh lo ang. 

Ka hma zawnah bike a rawn ding dat a, an inkawtah a tlan lut dawn maw ka tih laiin "Chuang rawh" a ti nghal thawr a, bike a chuan inringa chhuak ka ni hauh lo. 

"Len chhuahna hun a ni tawh lo. Bike kha dah ţha la, kan inah chhuk ang" ka ti ve tlat a, street light in a chhun phak china ding a ni bawk a uluk deuhin ka en a, a hmai leh taksa lang thei chinah hliam leh duk vel ka hmu lo a, ka thaw a veng huai mai. 

"Insual buai naah te a lo tel ve aniang a ka ti hman a" helmet a phelh laia ka lo tih chuan min rawn enin za vak loin a ţhen suk a, "Chu min lo ngaihtuah viau a ni maw?" a ti ve nghal zat a, a malchungah helmet a dah a, bike aţanga chhuk tum ang pawhin a awm lo.

"Ngaihtuah ele..midang thawm ka hriat hnu phei kha chuan thil ţha lam ka ngaihtuah thei tawh reng reng hleinem. Lokal rawh kan inah chhuk ang" ka tih tak sekah chuan bike chu a hung ţha a, kan in pana kan chhuk laia min kuah takah chuan a rim danglam chu ka hre thei a, eng emaw chu a in chiang a ni. 

Thawm dim deuhin kan lut a, inpuiah pawh ţhu muang lovin thlang lam bathlar kan pan a, ţhutthleng pahnih kan kengchhuak ru zal zal bawk a, kan ţawng reng ţhin avangin ka nu leh pate pindan lo lam ka pan pui a ni. 

"In inchhung hi nuam i ti vak bik lo a ni maw?" tiin bul ka ţan a, ţhutthleng hran ve veah ţhu mah ila kan inhnaihin a thil in rim pawh ka hrechiang thei lehzual. 

A hnar tuai zauh paha "Ngati nge?" a tih chuan "Aww..in nuam deuh in nei a, nilengin inkhung chawt mah la eitur i nei reng dawn tho a, i nu leh pate zarah in duh zawng in nei thei zel bawk a, mahse nangchu sawm tu i neih apiangin i chhuak a, ţhian i ngaina si, i nu khirh zia hrereng chungin i chhuak ru ziah a, hun remchang a awm apiangin i pi te inah i kal ziah a, a tam mai, ka sawi seng lo zawk" ka ti a, ka ţawng lai te chuan min lo en ran reng a, a hma angin ka zamchhe tawh ngai bik lo. 

"Kan in ve te chu a nawm hmel ringawt a, a nuam tak tak hleinem" a ti a, a ţawng zawi viau naa ka bengah chuan a ri ring hle thung. 

"Zu i in tiraw?" ka tih leh chuan inthup ţit ţet lovin "In e" a ti mai a, a jacket ipte zenin ral lehlam chu ngawi rengin a thlir a, biak zui hreh viau mah ila "Ngati nge i in a?" ka ti ta hram a. 

"Zu hi chu ka in ve zeuh zeuh ţhin alawm" a tih chuan "Rilru hah vang pawh ni loin maw?" ka lo ti ha a. 

"Rilru hah vang pawh ni lo in" tiin ka duh ang ngeia felfaiin min chhang a, sawi tur ka hre ta mai lo chuan "Lehkha i thiam tho sia" ka ti sap a, a nuih a za khawp mai. 

"Ka in zeuh zeuh a, zu leh ka mimal nun hi zir lai nen ka kal kawp tir ngai lo. Zir lai chu a hranin a kal" a ti a, a chiang viau mai. 

"I thinrim lo tiraw? Phone ka lak loh avang te, inleng ka neih avang te khan i thin a rim miah lo tak tak tiraw?" ka sawizawh ruala a nui hawk thawm ka hriat chuan ka inchhir chawpchilh nghal der. Ka ţhian chauh a nia, ka zawhna chu a atthlak mah mah deuh chu a ni. 

"Ka thinrim i hlau tihna mi?" a ti a, a hmui a ti sawi zauh a, a ngeiawm thiam ve khawp mai. 

"Hlau ve bawk ang chu...ka ţhian i ni sia" ka tih chuan "Nia..i ţhian alawm ka nih" a ti deuh hmuk a, a nui zo chiah emaw tih laiin a hmel landan chu a rum leh viau tawh a, a awki pawh a ngeiawm lam lek lek chu a ni. 

"I awmdan hi a mak riau" ka hmuh chian lehzual theih nan ka thlek deuh ha a, a ngawih vang vang lai chuan phone a ri thut a, hlau hmel a pu chu mak ka ti kher mai. 

"La ta che" ringhlel ru tak hian ka ti a, ani hian zu a in lehnghal a, tihsual eng emaw a neih ka ring leh hmak tawh. 

"A ngai lo" a tih laiin phone ri a tawp a, reilote hnuah a ngai ang bawkin a rawn ri leh a, ka che phut a, ka ţhutna lam zawk a jacket iptea ak a nih miau avangin ka zen lut a, phone chu ka hum chat a, min dan a tum meuh chuan a tlai lutuk tawh. Ka chet dan chu a beisei loh tawp a ni tih a hmuh theih. 

Phone ka la chhuak chiah chu ka thlarau hi thlawk chhuak vang vang mah se mak ka ti kher lo ang. Ka ding hluai a, ka thil hmuh chuan min ţhawng takzet a ni.

"Nang hian ka phone i lo kawl reng a maw? A bo emaw ti a ka buai tehreng nen, eng nge awmzia? Engati nge ka phone i kawl daih? Ka mimal nun hi i chhui ru reng em ni a?" ka ti nghal bawrh bawrh a, ka nu leh pate muhil tawh lo sela chu ka au ring viau ta ve ang. 

A din chhuah ve lai chuan "I thil tih hi eng nge awmzia? Ka ţhian emaw ka ti che a, ka rin tehreng che nen, nang chuan ka phone thlengin min ruk sak duh a, lei lehnghal mai na tur kan nei dawn lo tih i hre vek. Rilru na deuh chunga ka u phone hmang turin min duh zawk tihna em ni?" ka lo ti hmawk hmawk a, am zeta a thawk la ri te chu ka hrethei vek a, a lung zawnah khawih kher lo mah ila a phu rang dawn tih ka hria, a thil tih sual ka manchhuak miau a ni. 

"Ka sawifiah thei" tih paha min rawn ban chuan ka tawlh hnung dawrh a, a thil tih duh dan hian min rap lek lek a ni. 

"Eng nge ka phone i ruk chhan chu ni a?" ka tih laia a na hmel chu hmuh a hrehawm kher mai. Mipa hian hmeichhia angin an natna an lanchhuah tir ve ngai loah ka lo ngai ţhin a, ka ngaihdan dik loh zia tuna Zualtea landanah hian ka chiang khawp mai. 

Phone lo ri leh chu "Chhang suh" a ti vat a, min rawn hnaih nghal ruak bawk a, bualin kawngkharah ka bet rawk rawk tawh a ni ber e, a kut a lek chhuak uaih na a "Min khawih reng reng suh" vin zeta ka tih takah chuan a thlak thla hnawk a, a thaw zui ham ham mai. 

Phone chu chhang luiin "Hello" ka ti lawi rût a, pawi tih hmel zeta Zualtea lo chhing sawk te chu ka ngei hlur mai a ni. 

"Zualtea kan va be duh ve" nutling aw tih hriat zet hian a la rawn ti zui a, mak ka ti kher mai.

"Keimah hi phone nei tu ka nia" ka tih takah chuan "Afeli nau maw?" a rawn ti a, min hmu thei hauh lo nain ka bu nghat a, Zualtean phone min chhuh a tum chuan a awmah namin rum zetin ka melh a, a thil tih hi a tlai hmaa ka hriatchhuah ngei a ngai a ni. 

"A nih chu...hemi number hi Afeli ţhiannu Pekin min pe a" a tih chuan "Aw..U Peki a nih dawn chu" ka lo ti vat a, "In remchang tawh em?" a tih leh erawh chuan ka bangbo hle mai.

"Ka va hrethiam chiah lo ve" ka tih chuan "Afelin ka pawisa a puk ţeuh a, Zualtea hnenah khan engkim ka sawi vek tawh. Tlem a zawng chu min rul tawh bawk a, mahse hei vanduaithlak deuhin kan pa a cancer a, in enkawlna tur kan mamawh ve tho si, hreh deuh chungin ka rawn dil tawp che kha a ni a, in enkawl chu ngai lo ila ka dil hauh lo ang che u ka ti a sin mawle..hriatthiam ka ngai a ni" a ti a, a hawihhawmin a inngaitlawm khawp mai. Pawisa rulh ngai zat min hrilh phei chu mak tih luatah ka meng phar nasa viau ta ve ang. 

Kan inbiak zawh hnu chuan Zualtea chu ka melh ran a, "Sawi fiah vek rawh" ka ti ram hmak a, phone humin ka kuangkuah tlat bawk.

Afeli thih aţanga ni thumna chiah a ni a, Zualtea nen pindan kan tifai a, ka mut loh rei tawh em avangin ka chau tawngkhawng ka lo mutthilh daih ni kha a ni. Dawhkan chunga lehkhabu min remţhat sak laiin ka phone eng leh zeuh ţhin chu a hmu a, company lam aţanga ka call dawn satliah emaw tiin a ngaihven duh lawk lo. Mahse number ngai hlir aţanga call tu ka neih takah chuan ngaihţhat lohna pawh nei lem lovin a lo chhang ta mai a ni awm e. Nutlingin mangan hmel taka min biak a duh thu a sawi tak mawlh mawlhah chuan ka unaupa anga insawiin ka phone a kawl thu a hrilh tel a, ani an pa natna diktak an hriat ni, a mangang rilru mumallo ve bawk khan Afelin a pawisa a bat thu leh, a rang lama an mamawh thu a lo hrilh ta mai a ni. 

Zualtea lahin ka tawrhna hrethiamin a zep a lo ni a, 'ka lo call loh che chuan min lo call suh. Nakinah ka lo be leh ang che' ti a hrilhin phone a ti tawp a, a switch off a, ka phone chu a hawn ru ta a ni. A ţhat loh tehreng nen a bo daih kha ka nu pawn mak a ti reng a, inchungnu phei chuan Afeli ţhiante a ringhlel rum rum a nih kha. 

Ka ţhianpa, engkim ka thlenna a ni bawk a, phone zawn a ngaih tawh loh thu leh Afeli phone ka hman thu ka hrilh hnuah amah rawn ve tu nu bawk chu a be leh a, Pi Tlani a ni. Rv ah awmin zu an zuar a, an fate an la te bawk nen, pa ber a damloh chuan an eizawnna in a tuar lo thei lo a, a mangang lutuk chuan chung zawng zawng chu Zualtea a hrilh vek a, pawisa a dil mawlh mawlh reng bawk. 

Ka hriat hauh lohin a pawisa khawl sa a lo pe tawh a, a dang a ngaihtuah mek thu min hrilh bawk. Afeli kha a fel hauh lo a, ba min ţhing tu an la awm chu ka ring hrim hrim. Tuman a thlawnin ruihna tur an tumsak reng thei dawn miau lo a. Ka nu phone number an neih loh avanga keimah min rawn be pawp an ni awm e. Chupawh kan ina lo leng ve ţhin U Pekin a lo la neih avang chauhin. 

"Mimawl pa" ka ti chhuak thei hram a, ka biang a lum pap a, ka mittui tla chu ţullo ti viau mah ila ka dang hleithei der lo. 

"Ţha ni a ka hriat danin ka che ta a nih kha. Kha thil kha ka hrilh che chuan min kalsan daih ka hlau a" tiin a phun sup sup a, a aw chu a zawi kher mai. 

"Pawisa kha a tam tham a, i nunna i lak ve hlauin ka thup a nih kha" inthiam loh hmel tak hian a ti a, "I â emai" ka ti leh tawp a, sawi ţeuh ka duh a, mahse ka aw a chhuak hleithei bik lo.

"Mu leh mal i nei si lo a, kha thu khan a den leh che chuan rilru fim pu hman lo leka i chet chhuah ka hlau a ni ber. Chuan phone kha ka hawn a" a tih chuan "Nangmah chiah i inngaihtuah a nih kha" ka ti chang fak a, "A ni lo" a lo ti ve vat bawk. 

"Ka tana a zahthlak zia i hria em? Ka u ba i lo rulh hian ka tlawm ngawih ngawih zawk a sin. Min hrilh la, rulh theih dan ka zawng ve mai dawn alawm. Midang tihbuai reng ai chuan pawisa hmuh theih dan ka dap ruai mai ang chu" ka ti a, ka aw khur dar dar reng chu ka duh lo hle mai. 

"I tan rulh ngaihna a awm rih lo" a tih chuan "Ka taksa pawh hi ka hmang ţangkai ve mai ang chu" ka ti chang fak a, thinrim zeta a kut a lek chhuah uaih chuan kut min thlak mai dawn emaw tiin ka mit ka chhing a, na ka hriat mai tak loah chuan hlau ru tak chungin ka meng riai riai a, ka huaisenna neih ang ang chu sawm khawmin Zualtea hmel hmuh tum chuan ka dak deuh a, kut min thlak tum âwmin a awm tawh lo va, mahse nichin maia ka thil sawi khan a insehruh tir nangiang mai.

Ka phone kenlai chu dimlo zetin a phih thla a, min kalsan zui nghal a, kha thil kha engvanga sawichhuak nge ka nih ka hre bik lo, ka tih duh loh berte zinga mi a ni ve tho a, mahse ka ţhianţha neihchhun ni a ka ngaihin ka hriat loha ka u ba a lo rul kha ka zak a, ka thin a rim a, rethei viau mah ila tlawmah ka la a ni ber. Min hrilh hre ve se, ka remtihna thlapin ti se chu ka thin a rim kher awm lo e. Lawm na chin pawh ka nei tho a, chutih rual chuan ka zahna leh tlawm riaua ka inngaihna ten min hneh zawk a ni ber. 

Che chang lova ka dinna ngaia ka la din reng lai chuan Zualtea bawk chu a rawn lang leh a, a mitah pawh ka lo en ngam tawh lo. 

"Lalremruat, ka duh che" a rawn ti thawr mai. 

Ka nui hul hak a, nuih a za hlawl lo a ni. Ka darah dawmin min chen tur tawkin a rawn kun hniam a, "Ka duh che" a tih leh rual chuan "Ţhian chiah kan ni" ka lo ti ve a, a thusawi chuan min ţhawngin ka tha te chu a khur hialin ka hria.

"Ka hria..ţhian kan ni. Mahse ka duh tho che" a tih lai chuan ka dara min vawnna chu thin thlak ka tum a, ka hlawhchham ţhak. Min vuan nghet lutuk tlat a ni. 

"Kan inhriatna a la rei lo..min duh emaw i ti mai mai a nih kha" ka tih chuan "Nikhat thil thu a induhna a pian thut theih chu ka ring bik hauh lo" tiin a ner deuh sawk a, "Mahse inţhianţhatna hian inhip tawnna a hring chhuak thei tih chu ka hria. Hun rei a ngai lo" a ti a, ka la ringhlel tho mai. Khawvela ka mi rin rin ber ka u pawn min kalsan loh tur thu a sawi hnu lawkah kumkhua atan min kalsan a, Zualtea thusawi ve hian engtik hun chhung nge a daih ve ang le?

"Ţhian nih ka duh zawk" ka tih chuan "Ka tlai tawh tiraw?" a ti chuai raih a, chhan let ka tum lai chuan "I inleng pa kha a ni em?" lo ti lehin a aw pawh a chang ta deuh a, lu thin tawp mai loh chu tih theih ka nei lo. 

"Ka la tlai lo tiraw?" tiin min zawh dan a thlak danglam a, "I rui a nih kha" ka lo tih chuan a ngaihdan a nih loh hmel kher mai. 

Ka dar a vawnna a thlah rual chuan ka khabeah a dawm lehnghal zat a, min kuai dakin ka mit a min en ran a, "Ka duh che" zawi deuh sup hian a ti leh a. Ka awmdan chu ka sawithiam lo, rilru kilkhatah Zonunmawia a awm reng a, mahse a ni chu ka cho phak rual a ni lo. Ka thlir zui vang vang ţhin ringawt pawh hi a nupui hluiin hre ngat se chu pawisawi lo ka nu pawhin a tuar tel ve maithei a, Rintluangi lahin a nasat zia a sawi chamchi reng a, ka nu lah chuti bawk. Afeli takngial pawn hnim hnai lo turin min chah a nih kha. Ka neih theih loh tur buaipui reng ai chuan ka tana engkim tih huam, ka nat leh hrehawm hlau ngawih ngawih tu hi hun ţha ka siamsak mai dawn em ni? Ka u pawn min duhpui em em a, mahse ka nat phah angem? Kan inkar a chhiat rualin kan inţhianţhatna in a tuar ve zel angem? Zawhna ka van ngah leh tawh tak. Ka rilru a insual nasa hle bawk. 

"Ţhian nih reng ka duh zawk" ka ti a, chil ka lem zui khalh a, a hmelah chuan ka thusawi a pawm loh zia a hmuh theih vek. 

"Ţhian ang chiahin ka en thei tawh lo che" a tih rualin ka hmui leh ka hmui chu a insi a ni nghal der a, ka phalna lak hmasak tum ni awm taka ka hmui hnuai a peh lai te chuan ka taksa chu a lo ţang ţeuh a, ka thaw dep dep a, ka vai riai a ni ber. Ka biang tawn tawnah dawmin min fawp zui a, ka nam kiang lova, ka chhang let lo bawk. 

"Ka duh che. I taksa hi thil tenawm tih nan i hmang ngai lo vang. Ka pui ang che, kan pahnihin hmachhawn zel ila, pawisa rulh dan pawh keiman ka ngaihtuah ang" a ti mawlh mawlh reng a, ba rulh ka ngai a, Zonunmawia theihnghilh ka duh bawk. Keimah chauh chuan engmah ka ti thei lo ngei alawm. Mi pa ngaihzawn hi thil dik a ni lo hrim hrim bawk a, mahse keimahah hian a cham zui veng veng reng tho si. Zualtean min fawh laia mit ka chhin pawh khan Zonunmawia tho a lo lang a, a hahthlak takzet a ni. 

"Chhel lutuk suh, ka pui thei lo palh ang che" nui deuh chunga a tih chuan "Chhel deuh anga lemchang leh an thil tawn avanga chhel ta an awm a, a hran hlak a ni. Keichuan lemchan chang ka ngah mai" ka tih hnuah ka thaw zui halh a, "Puih chu ka ngai ngei alawm" ka ti ve ta nge nge a. 

A ruk chuan ka inthiam lo mah se ka tih ngei a ngai a ni. Ka nu'n Afeli ba neih a hriat ka duh lo a, Zonunmawia ka lo duh ve avanga a hnathawh lai, nuam a tih em em hi bansan tir ka duh lo. Ba min rulh pui theih a, Zonunmawia ka ngaihven loh phah theihna tur a nih dawn phawt chuan a ţha e. 

A nghawnga banin ka kuah a, ka kuai kun zui zat bawk a, ka duh che ka ti ve thei lo, ka ţhian chauh ni turin ka duh tlat a ni. Mahse a hriatthiam theih nan keimah zawkin ka fawp a, hei hi ka chhanna ah ngai rawh se. 

CONT..