DEAR DIARY-9

DEAR DIARY-9

Zualtea nen a kan inzui ve ta chu rin aiin a nuam phian mai. Kan inhrechiang thawkhat tawhin kan inkarah thuruk a awm tak tak tawh lo va, kei ngat phei chuan ka nei lo tih theih a ni. Amah zawkin a lo nei a nih leh a thu a ni tawh a, huat a ka lak theih pawh ka ring lo.

Mahse, keimahah hian kim lo a awm tlat a, ka thinlunga ruak awm hi a hnawh phui zo lo nge khawhar riau chang ka nei ţhin a, a fel a, min duat em em bawk a, chuti chung chuan ka lungawina tawk ka la hmu zo chuang lo a ni ber. Ka beisei sang lutuk aniang a ka ti thla rawk zel a, nuam ka ti takzet a, a nawm dan a famkim lo thung. 

Ka ţhianpa nen kan inngaihzawn aţanga thla thumna velah chuan a nuin kan awmdan aţangin thil a hrethiam a, Zualtea a lo chhuk hlek chuan ko haw turin a naute a rawn tir nghal vat zel a, ka nu a hrilh ţum phei chuan chaw ei tui lo ţhak khawpin ka nu'n min hau a nih kha. Fate kawppui tur thlan sak ching an ni ve lo emaw ka tih vang a ni. Hre lawk ngat ila chu ka hnar fithla ţhak ang. 

"Hna ka zawng tawh mai dawn em maw ni" Zualtean a tih chuan ngawirengin ka en tawp a, aih ka ti lova, aw pawh ka ti chuang lo. 

"Eng nge i ngaihdan?" ti a min zawh chuan "Ngaihdan ka nei lo" ka lo ti a, thutlukna chu a ma siam tur a ni. 

"Ka kal peih tawh lo e.." naupangchhia zeta a tih vang vang lai chuan "I tana ţha tur chu i hre ber ang chu" ka ti leh a, keiin thutlukna ka lo siam pui chuan a hnual chang apiangin keimah min dem ang. Chu thil chu a thlen ka duh hauh lo. 

"Lokal ve mai la" ka kawnga kuah pah hian a ti leh tawh a, kan inţhut hnaih leh tawh khawp mai. 

"Ka thei lo ka tih ziah kha" ka ti hrâk a, ka sawi ngun tawh viau chung pawhin min hruai phet a tum a, ka ning lek lek ţhin. 

"Hna ka zawng mai ang" a ti a, ka chhang leh chuang lem hlei lo va. A nu leh paten an phal dawn lo tih ka chiang a, ani hian a paltlang lui thei chuang lo ang. 

Rei pawh a awm hmain a nauin a rawn ko leh tawh a, an hahthlak hlawm a nia. Lo hrai rui chiam ţhin te pawh ka ang alawm le. Tu te pawn min dodal a, Zualtea nu nui hmel ka hmuh lohna pawh a rei ta. Min be tawh ngai hauh lo bawk a, ka pa chuan a pal lui a, han tih vak ngaihna an hre lo a, kei leh ka nu chu min hlat sawt viau mai. 

"Ka atchilh chein ka hria" a nau awm loh veleh a a tih chuan ka lo nui hak a, a thutak angreng si, naupang thuawih deuh a ang lutuk ringawt. 

"I hresual a nih chu" tih pahin ka ngheng a, a darah ka lu nghatin hahdam deuhin ka ţhu a, a bulah hi chuan inveng miah lo in ka awm thei a, kan inchhung ropui lo ve tak hi ka sit ngai lo. Inthlahrung hauh lo a min siam a thiam a, min ngaihsak zia a ti lang awl lo ţhin bawk. 

"Lo inhre lo ta ila engtin nge ka awm ang le?" ka ti hial a, nuih rik suk paha ka chhip a tuai chuan mit ka chhing a, ani lehzel hi chuan min kalsan lo hram rawh se. 

"Chuvang chuan hna zawn ka duh" a ti leh tawh a, "Ka englai hi nge i duh?" ti a fiamthu a ka lo zawh chuan "I engkim hi" tih pahin ka kawng a dawmna chu a thlah a, ka darah min kuah ve thung a, a awm ka ngheng leh ti tih der tawh a, ka thinlungah hian hmun awl lai la awm reng tho mah se hetianga Zualtea angchhunga ka awm hi chuan ka thla a muang tho ţhin. 

"I nu ten lo phal lo ta se engtin nge kan tih ang?" ka tih chuan "Chutiang mi an ni lo" a ti ve ţang ţang a, an awmdan erawh a hmuh hmaih bik ka ring lo. 

💛💛💛💛💛💛💛

Hna kal tur a ka chhuak chho chu inchungnu nen kan intawk a, a inchei thlap tawh a, ani pawh vawiin chu a kal hma deuh dawn a ni maithei. 

"I kal dawn chiah mi?" a lo ti ve mial a, buk nghat paha "Kal dawn chiah" ka tih chuan "Min lo nghak rawh ka rualin i kal dawn nia" a ti a, ka zam nghal der mai. 

A tihziah danin Zualtea pawh a lo chhuak a, "Bike ken i phal ţhin si lo a, kal ang kawn thleng bawk em ni ka thlah dawn che" a ti zung zung a, min kuah veleh rang lutukin ka inla hrang a, mak min tih hmel khawp mai. 

"I nu rualin ka kal dawn..min sawm a" ka tih lai chuan inchungnu car chu garage aţangin a rawn tawlh chhuak zal zal a, "Ka nu ruala kal kher a ngai lo. Kalsan ang" ti a min kaih mai a tum chu ka dinna ngaiah ka ding tlat a, kan zawna a nu rawn din thleng chuan ka che sawn lo. 

"Lo lut rawh le" a tih veleh kawngkhar ka pawt hawng a, a hmaah pawh ţhu lovin a hnungah tim daiin ka ţhu a, Zualtea chuan min ngaihtuah ngang aniang a hma lam kawngkhar chu a pawt hawng ve a, mahse a nu chuan "Lut rawh i pi kalsan suh" a ti chang fak a, ka nu ni ve ta se ka hlau viau ang. 

"Tlaiah ka lo hruai ang che" a tih hnuah a nu chu a tlanchhuak a, chak deuhin tlan se thleng vat vat ila ka duh ber. 

"Kan fa u ber a nih bakah mipa awmchhun a nia, Pathian zarah lehkha zir lam hi a ti thei viau bawk a, sang deuh thlenga zir turin kan duh a, a lo len chang te hian lo tur ve ţhin rawh. Kal vat se la, zir leh vat rawh se" a tih chuan "Aw le" ka ti ban charh a, hriat loh karah ka kut ka lo hum nghet tawh kher mai bawk a. 

"I nu chu ka hrilh tawh tho a, in inbik hi chei ţhat kan duh a, kan chei chhunga awmna tur lo zawng ula, duh leh kan siam ţhat zawh hnuah in rawn lut leh anga ka tia, in luah tur in zawng ta em?" a tih phei chuan Zualtea nen a kan inkawp hi a lawm hlawl lo tih ka hriatchian phah lehzual. 

"Ka nu'n engmah min hrilh lo a, ka lo melh ve deuh dawn nia" tiin pangngai thei ang berin ka chhang a, ka chhungril a na veng veng thung. 

"I u avang pawn in chhuahsan hreh dawn tih chu kan hre tho a, chuvang tak chuan a nia kan chei zawhah in lo lut leh dawn nia ka tih nachhan chu" a ti dam thlap a, inkawp tawh suh u ti ţha ve mai mai se ţha tur. 

"I ţhianpa pawh chu lo hrilh ve rawh aw. A ma tan vek a nia, a luhlul a, a thu a duh bawk si. Nu leh pa thu lo anga awm nuam tih lai, ngaihdan hran neih hunlai a nia, tuna a thlen china a tawp ringawt chuan nakinah a la inchhir dawn a, lo thlem ve la, a nih loh chuan apa thinrimna a cho chhuak mai ang" a ti dap dap a, chhan dan tur lah chu a vang zek lehnghal a. 

"Hna chu a hmu thei tawh tho ang" ka lo tih ve chuan "Hna sang tak thawk turin kan duh alawm. Eng thil mahin a zirna a la tibuai ngai lo a, tun ţum chu eng nge maw a hriat ni? I rilru siam rawh kan tih lahin mi a chhang ţha duh ngai si lo, mipa fa hi an lo buaithlak a nih hi han ti ngawt dawn ila i u pawh in thunun thei bik lo ţhin tho kha a nia" a ti kher a, ka u a sawichhuak kher kher chuan min runin ka thinrim insum nasa lutuk chuan nghet deuhin kut ka hum a, ka chhan let loh nan ka hmui ka pet tlat bawk. 

"Ţhiante ngaih pawimawh hun lai a nia, keini aiin i thusawi a awih deuh ang. Thiam deuhin thlem la, kal tir tum rawh" a tih leh pawhin ka chhang let chuang lo. 

"I va tlai ve..Zonunmawia a lo peng kawi a sin" dawr ka luh rualin Rintluangin a lo ti nghal a, ka hmuh loh nachin pawh ka hre tawh lo. Zualtea nen a kan inkawp hnuah pawh a lokal fo a, mahse ka be ţha ngai lo a, hmuh loh der chang ka ngah. Ani ang pa ţawngtam lem lo chuan min biak luih vak ngaihna a hre bik lo aniang a reh ta vang vang a, ka theihnghilh theih ringa ka buai viau laiin chutiang chu a lo ni hauh lo, englai mahin ka theihnghilh ngai lova, mit ka chhin te hian a hmel a lo lang leh nawlh ţhin.

"Bialpa ka nei ka tih kha" ka tih chuan "Nei mahla ţha tih zawng te chu a neih tel theih alawm. Keichu pathlawi mah nise ka duhpui tawh zawk che. A lerh loh hmel ka ti. Tuna i bialpa hi chu a lo lerh ru zek maithei a sin" a ti a, kan inkawmngeih ve deuh tawh a, professor min duhpui luatah Zualtea a sawichhe reng mai. 

"Lerh lo ang..ka hrechiang alawm. Kawng engkima min pui ţhin tu leh ka nat hlau ber tu a nia. Natna min hnutchhiah miah lo ang" ka ti tlat a, ani hian ring lo viau mah se keichuan ka ring tawk khawp mai.

"Kan inhmu khat hle mai" rawn ti tu aw chu ka hre bel tawh khawp mai. Ka thil remţhat lai chu chawlin ka inher a, a hmel ka en ngam mai loh avangin a awm zawn chu ka en tlawk tlawk a, a ţhianpa te ina chaw a ei ţum a a lo len bak kha chu kan inah pawh a lokal leh tawh lo. Ka u boral lai bawr vela min ngaihsakna ve te kha chu khawngaihna vang chauh a nih ka rin phah a ni. 

"I lokal khat em alawm" ka tih laiin hmeichhe pakhat hi kan dinna lamah a rawn phei zân zân a, a hmel ka hmuh takah phei chuan Zonunmawia chu ka en vat a, a thlalak hi Rintluangin min hmuh tir peih em avangin a nupui hlui ngei kha a ni tih ka hria. 

"Inbihruksiak tawh lo teh ang" a ti nghat a, a nupui hlui pawh chu a rawn thleng chawpchilh ve nghal a, min en uluk kher mai. Ka chhip aţanga ka ke ler thleng a en hnu chuan ngeiawm deuhin a ner vel a, min ngaihnep hmel khawp mai. 

"Apa, he nula hi i hmelhriat em ni?" tiin Zonunmawia chu a bia a, a koh dan te chuan min ti timin ka lo zak chem chem mai. Amah tak pawh hian a ngaithei vak lo niin ka hria. 

"Nu Hmingtei fanu a nih hi" pangngai deuha a tih chuan "Nutling pui si mi in a hna a thawk kha mak ka ti reng a ni" pawisawi loh hmel tak hian a ti a, a pasal hlui chu a melh kâl a, a khat tawkin keimah min rawn en leh ţhin bawk.

"Phei teh ang..a uap emai ka awm rei peih lo" a kutin a hnar a zap vel a, ngeiawm ve tak chu a ni. 

"In inhruai leh tawh em ni a?" ka ti sa sa a, counter lam ka thlek zawk a, U Marti bulah a lo awm leh reng tawh.

"Hruai lo e..dawr kawtah khuan kan intawk a, ngati nge min bihruksan char char?" ti a min zawh chuan za lo deuhin ka nui a, kan inkawm nel dawn chauh a ka hel leh ta char char sia, a tan chuan a hrilhhaithlak ve khawp ang. 

A kut lah chu a kuangkuah hlun a, chhanna beisei deuhin min en ran mai bawk a, tun ang hian an nu nen a hmuh dun a ngaih chang a awm dawn vang alawm ka inthiarfihlim vat ni. Pa a ni tawh a, tlangval nen a inang thei lo. Ka duhna a zual zel a nih chuan ka natna pawh a zual ve zel ang.

"Thil ka hrilh ang che aw" ka tih chuan a lo bu nghat a, "Bialpa ka nei a" ka tih zawm zat a, ka nuih sang laiin ani chu a nui ve duh hauh lo. 

"Saw pa saw a mak chen chen a nia. Engati nge i la din reng a? Kal vat rawh u in fanu in a lo nghakhlel tawh ang che u" U Martin a tih vak vakah chuan customer te pawh an thawm a zawi sawt viau a, nula pahnih ka buaipui a ngaih tak avangin Zonunmawia chu a kalsawn ve mai ang ka ti deuh a nia mah se a la ding ve reng a, a lungawi lo hmel te chu ka hmuh hmaih loin mak ka ti ru takzet a ni. 

"In inchung tlangval hmel fai veng kha em ni?" customer awm lai lai chuan a lo ti a, a insum thei hlawl lo a nih hmel. A la ngaihnep hmel em em zui a. He a mize pakhat zawk hi alawm ka duh loh em em chu.

Ka chhan hmain nula pakhat zawk chuan "Hetiang lo deuh hi a nia, nakinah ka lo en leh ang" a ti a, a ţhiannu banah kuahin a kalsawn pui nghal a. 

Chu chu remchangah lain "I ring dik thei khawp alawm. A fel a sin" ka ti fel a, diktak chuan Zonunmawia ka hmuh hian hlimna bakah hlauhna ka nei tel ţhin. Ani ang a mipa vei leh duh ka la nei ngai lo a, ka mipa hmelţha tih zawng hi an piang ve lo aniang te ka tih mai mai laiin a lo lang a, mipa dang zawng zawng aia ka duh avang hian ka hlau ţhin. Duhna, hmangaihna leh natna te hi a kal kawp vek a, hei vang hian alawm kan mi hmangaih ber ten thihpui theih hial khawpa nasa natna min siamsak ţhin ni. 

"Ka va hmu ngai lo ve, a veng chawt ţhin che a nih hmel sia nilengin a nghak ngai lo che em ni?" a ti a, a thinrim ţawng hmuk hmuk chuan ka nuih a ti za daih a, hepa hian ka rilru ang chiah a pu ve a nih loh pawhin a teuh viau ang.

"I thik ve deuh a nih chuan" ka tih lai mekin min lo pawt chat a, "Ka thik lo" a ti leh hmuk mai. 

"Aw le" tih paha ka nui deuh te chu tur khaiin min melh a, "Zanah ka lokal ang" a tih hnuah min ngaichang leh tawh lovin counter a pan a, a nupui hlui lah chuan min en leh kher a, min lawm loh zia chu hrilh chawp ka ngai bik lo. 

"Kha maw..a nupui a hlat tak tak dawn lo ti a ka hrilh lawkna chu a thlen dik chiah kha. Bialpa lo nei hman lo phei la chu hrehawm i ti khawp ang" Rintluangin a tih chuan "An inzui ngei a, mahse an inhnaih lo. Awm dun satliah hi an inhnaih tihna a ni kher lo a nia" ka lo ti ve thung a, Zualtea nen pawh nitin awmdun ţhin mah ila ţhian bak chuan ka hnaih tak tak thei lo, hrehawm ka ti zawk ţhin. 

"A nih chuan inkawp daih mai ula, mahni leh mahni hi inbum tum reng tur a ni hleinem. I mipa duh ber tlanchhiatsan i tumna lamah i ţhianţhaber i ti na ngei dawn a nih hi" tiin min sawiţhaih a, ka lo ter at mai. 

"Zualtea hi ka thlem lai ka hre hauh lo. Ţhian baka ka en theih loh thu vawi tam tak ka hrilh a, a pawi sa hleinem. Ka rilru pe ve thei lo mah ila thiam lohna ka nei lo, ka sawi lawk vek tawh" ka ti tan tan a, a rukin hrehawm ka ti takzet thung.

"A nih chuan nangmah zawk hian engatan nge i kawp a? I khawhar hnem turin nge an in inluah reng theih nan zawk?" a tih chuan thinrim deuhin ka hawi sawn a, a nih loh chuan kut ka thlak duh mai ang. 

"I mihring puite hi bungrua an ni lo a nia, Zualtea hian a duh che a, keini pawn kan hre vek. Chu chu remchanga lain hman ţangkai tum miah suh. Natna i siamsak a nih vaih chuan i inchhir viau ang" a ti ve hlak hlak a, ka ngaihven zui duh tawh lem lo. 

Tlaiah chuan a intiam ang ngeiin Zualtea a lokal leh a, dawr chhunga lo lut tawp lovin step ah a ding a, ka la haw hman chiah bawk si lo chu a dinna bulah kalin "Nghah lawk ka ngai dawn a nia aw" ka ti a, min lo hrethiam leh khawp mai. 

Ka thawhpuiten min lo fiam laih laih te chu ngaipawimawh duh lovin ka tih tur ang ang ka ti mawp mawp a, ka zawh veleh bag ka la a, U Marti ka hrilh thlap hnuah ka chhuak a, kan haw rual vek ngai lem lo va, dawr dangah hian engtin nge an tih ka hre chiah lo nain ka thawhna dawra kan kal dan hi a awlsam berin ka hria. 

"I ril a ţam em?" min hmuh ruala Zualtean a lo tih chuan "Ţam nang..haw vat a inbual ka duh. Khawlum uap churh reng hi a ninawm tak tak a ni" ka ti a, kal mai lovin ka kekawr tlang vel chu ka siamţha leh rih a, a nu thu min hrilh kha ka hre ran reng mah ila hrilh kher ka tum lova, zir zel tura nawr luih pawh ka tum chuang lo. Chhia leh ţha a hria a, a awmzel dan tur chu a thu thu a ni. 

"Ka nu khan sawi a nei em?" a ti ta chiah reng a  kan veng kan pan mek a, tunah chuan a kawngah ka kuah ve ngam tawh a, kei ai mahin a lawm zawkin ka hria. 

"Nei nang...i nu te chu thil sawi vak vak chi a ni ve hleinem" ka ti daih a, kal dun rei phei ila chu tukin a ka hriat ai tam mah kha ka hre maithei. 

"Eng emaw sawi a neih chuan min hrilh rawh aw. I zep zel chuan chinfel a harsa ve zel dawn a nia" ti a min hrilh chuan ka lo aw liam mai a, a hnenah hian eng eng nge a sawi ţhin hriat a chakawm khawp mai. 

In kan thlen chuan kawtah a nu a lo awm a, tunlai tak hi clinic ah a ţhu ngai lo a, opd zawhah inah a haw nghal mai zel a, kan in nang leh ţhin. 

"I ni a lokal a, kan in lamah karkhat vel lo awm teh se a tia a nghak che aw. An pa nen dawr bungraw la turin an kal leh lawk dawn. Naupang ho i awmpui a ngaih hmel" a lo ti a, keichu en pawh min en lo. 

Ka nu lo haw ve chuan "Nidang aiin ka hma a" ti a phur deuha min hrilh hnuah "Rinte, chaw eikhamah in luahman pe tur chein ka lo chho ang. Chawhmeh te pawh ka chah a, in duh ve angem?" zangkhai deuha a tih chuan "Kan ngah" a ti hmak a, a fapa ngawt chu a la en bawk. 

"Nu Hmingte, khawiah nge i zawrh dawn a?" Zualtea zawk chuan a lo ti a, "Ţhenawm velah ka zuar kual leh mai ang chu ka ti. Tam pawh an rawn thawn lo a" ka nu chuan a ti a, a inthlahrun hmel ve deuh tawh a, ka khawngaih angreng hle. 

"Min lo nghak rawh" tih leh inchhunga luh a rual a, kan in neitunu ho a awm tlan reng chu a nuam loin ka nu ka kalsan hreh bawk si, mi fel takah ka lo ngai ţhin a, ka ngaihdan dik loh zia ka hrechiang telh telh chu a nih hi. 

"Hei ka ni hian a duh ţeuh ang. Inah in dah tawh em?" Zualtea bawkin a rawn ti leh a, nu pakhat a kai bet tlat bawk a, min ţanpui phet a tum ţhin hi ka duh lo khawp mai. 

"Hralhna tur a awm mai ang" ka tih hnua ka nu kalpui mai ka tum chu "Kan duh alawm. Khawiah nge in dah a?" Zualtea ni chuan a lo ti a, a hming pawh ka la hre lo. 

"Chhunah khan inah ka rawn dah zawk a, ka la khawih danglam lo" ka nu'n a tih phei chuan "En ila a ni mai lawm. Sa kan ei ve lo a, thlai chu kan duh lutuk" a lo ti a, loh theih lohin kan hruai thla a, ka pa lo awm lo se ka tih tehreng nen a lo ţhu luau a, zu intur a nei lo aniang rui hmel a pu lo. 

Ka nu'n chawhmeh a phawrh a, Zualtea ni nen an en lai chuan ka kal hran pui a, thlang lam bathlar a kan din dun veleh thinrim tak hian "I tello pawn kan hralh thei tho alawm. I nu a thinrim hmel em kha, min puih ziah kher a ngai hleinem" ka ti hlak hlak a, ka ngaihdan a ni tawh bik lo a ni. 

"Tikhan a haw lamah midang zawrh a lei dawn tho a" a tih ve te chuan "Lei mai mai ang hmiang. A ţul a nih leh i nu khan min sawihmuh mai ang a, i lo inrawlh ve a ngai reng reng lo. A ruka Afeli ba kan rul pawh tih tawh nak laiin. Ti kha chuan i nu'n min huat phah ngei dawn a nih kha" ka la ti cheu a, lawmthu sawi chu kan hlat khawp mai. 

"Chutiang chu i duh dan a nih leh ka ni saw ka hruai haw anga nangman phur kual ang che. I nu sawn nilengin mi inah hna a thawk a, awm hmuna tlem a zawng a hralh theih takin tih thuah ka ni ka koh sak a, i tana ti ka ni lo" a ti ve ta hmak a, kan inmelh ran a, min ţanpui apiang hian a nu'n min huatna a zual sauh zel tih hria se chu min puih duhna rilru a pu hauh lo ang. 

"Aw..keiman ka zuar mai ang. In chhungkua hi chuan min dawr lo tawp mah ula a pawi lo" ka tih chuan "Eng nge maw i hriat le?" a ti hrawk a, a vin ve te chu ngaithei loin "Min vin suh. Thil thleng mek leh thleng zel thei te chu i hre vek alawm. I nu awmdan leh ka nu a chhan dan te kha i hmu a, i hre vek a ni lawm ni?" sehchilh zet hian ka ti a, ka nu hrehawm ti hmel khan min ti nain min ti thinrim ta a ni ber. 

"Keimah vangin a thinrim a in chungah a ţuan a nih kha. Ka lo hrilhfiah anga ngai a awh leh mai ang" ti ve bawk mah se "Min ngaina lo ve hrim hrim a nih kha. Kei chu min hua se pawi ka ti lo, ka nu lehzel khatianga chhan hmuk kha a ţul kher lo. A upa zawk daih lehnghal a, mi inthlahrung chi a ni bawk si" ka ti a, ka dara min vawn rual rual chuan a kut chu ka thing thla a, ka thin a rim em em ringawt mai hi a chhan ber ka hre tawh bik lo. 

"Inbual rawh..ka zawrhpui ang che" a tih lai mek a a phone ri chu a nu a nih ringin phun hluk chung hian a la chhuak a, a nu a ni awzawng lo. A phone screen ah chuan hmeichhe hming a lang kalh a, ka lo ner sawk mai. 

Thinrim sa nak laiin chhang lem lova a ak leh daih te chu "Chhang ta che..i hlau em ni a?" ka lo ti hmanhmawh a, rawn biak tum tu lah chu a reh zui hmak mai bawk a. 

"Hlau lo e" a tih lai chuan "Tu nge a?" ka lo ti ve vat a, "Mawimawii a nih kha, lehkha kan zir dun ţhin a" tiin ţha deuhin min hrilh a, ka la tum bar tho. 

"Inbual tawh rawh ka lo nghak ang che. Sawng ho zawng saw a nih chuan kan hralh zo vat ang" a ti leh tawh a, "Thil dang sawi daih lo teh" ka ti hlak a, a nu khan min ti thinrim a, a fapa hi a ni lo zawngin ka fuih vak dawn em maw ni ka ti rum rum mai. 

"Eng ber nge i huat?" a ti ta thlawt a, kei ngei pawn ka hre bik der lo. Rintluangi thusawi lah huat takmeuhin ka haw tawh bawk a, zawite a "I period a mi?" a tih chuan a awmah ka chum pawp a, a na bawk aniang a awm chu a dawm ve vang vang mai. 

"Min zawrhpui a ngai lo ang. Duh leh Mawimawii i tih kha lo be zawk rawh" ka ti nghat a, kan awm bo rei tawh si, ka nu a lo mangang leh tawh ang. 

"A va mak, buaipui tham loh i buaipui chuan i hah mai mai ang" tih pahin phone a phawrh a, a vin ve duh tawh hauh lo lehnghal a, a thinrim duh miau loh chuan mahni chauha thinrim reng bik a har ţhin. 

Tu emaw a call tih speaker a on hnuah chuan ka hre thei a, phone chu ka va bih vat a, Mawimawii nge chu a ni. 

"Phone la ve ţhin ta che" a rawn tih chuan zawitein ka lo nui a, "Eng nge?" ti a a zawh rualin Zualtea chu ka melh a, "Vawiin hi ka piancham tih i hre miah lo a ni maw? Nilengin ka ngaichang che a, vawikhat pawh min rawn be lo. Zaninah lawm ka tum a, ţhiante piancham hre lo ţhakin buai mah la lokal ve tho rawh aw" a rawn ti duah a, "A va zia lo ve tih tur dang ka lo nei tawh a" a tih lai chuan inchhungah ka luh san a, tun ang hi ka ni ngai miah lo a sin mawle. 

"Khawiah nge Zualtea kha? Engati nge in awm bo daih a? Anî pawh a haw chiah a nih kha" ka nu'n a lo ti nghal a, thlang lam ka kawk ringawt a, pindanah ka lut ta daih a. 

"Remruati chu a inthlak a mi?" ti a Zualtea ţawng ri te chu ka hre reng a, ka pheikhawk chiah ka thlak a, hruk puan leh thawmhnaw hakthlak pawm ţunin ka chhuak a, ka nu nen chawhmeh an lo thliar lai chu "I nauten an lo koh leh hma chein chho vat rawh" ka ti a, thlang lamah kal lehin bualin ah ka lut nghal hmak bawk. 

Sual ka inti ve tho, Zualtea berkher hi chu kei a tih nat mai mai tur a ni lo tih ka hre bawk. Kha zan khan ka rilru a buai em avangin kawng awlsam ber ni a ka ngaih lam ka pan a, ka ti sual a ni. Thutlukna ka lo siam sual palh a, kei chauh ni lo ka nu pawhin a tuar ve a, inchungnu a ngainat ve ţhin nen, tunah chuan keimah vangin a tim dai reng tawh ang a, an inchhungah pawh ţi daka a ţhut a ngai tawh ang a, ka nu hrehawm ka thlen belh sak a ni ringawt. 

Ka inbual zawhah pawh Zualtea chu a lo la awm a, ka nu'n lah chuan min lo melh rum nasa mai. 

Hrukpuan te ka zar zawh hnua an bula ka ţhut ve chuan "Nangmah vangin i pi a lo awm phei ve sia, i ni te bula i awm daih chuan i pi pawh a haw mai a ngai dawn a ni maw?" tiin ka nu'n a lo zawt a, Zualtea pi hi a awm rei viau tawh nain vawikhatmah ka la hmu lo.

"Ka awm phei kher lo ang. Naupang awmpui tur phei chuan hmeichhia an ţha zawk a, Rengi phei se a ţha ang, a ţangkai zawk ang" a tih hnuah "Kal ang le" a ti hluai a, em a chawhmeh an lo rem luh diam tawh chu min kawhhmuh hnuah kei chu min rawn enin "I phur zo ang chu tiraw?" a ti a, ka nu lam hawia a nui ruh ruh pawh chu ka hmu reng a, a tam lo viau emaw ka tih laiin em a khat ţan a, a leng lo a awm thluah bawk. 

"Naktuk inrinni a nia, in hralh thei phian maithei a ni. A tlai tawh nen chaw pawh kan la chhum lo a, Zualte, nangni chu chaw in ei hma ţhin tiraw?" ti a ka nu'n a zawh leh chuan "Inkhawm zanah kan ei hma a, a nih loh chuan dar7 vel a ni tlangpui. In thum velah kan lut hman zan ang" tih pahin em bula ka ding chu min rawn pan a, "Ka lo chawi ang che" a tih takah phei chuan a ti mai mai lo tih ka hrechiang tawh. 

"Keimahin ka kal thei mai ang" ti mah ila in aţang chuan min zui chhuak a, a pa pawh a lo haw ve chiah aniang motor kawngkhar a nam phui dawp hnuah "Mampui, khawiah nge i la kal dawn? Lenchhuah a hun tawh lo a sin" a rawn ti zui a, an ngai naupangchhia mah mah deuh chu a ni. 

"Chawhmeh kan zuar lawk dawn" tih chiahin a chhang a, nuam lo ka ti leh tawh khawp mai. 

"I ţhiannu piancham lawm naah chuan kal ve tur che alawm. Tih tur dang i nei chuang lo a, i va kal lo phal zawk ve" ka ti leh tawh a, ka thik awm pawh ka hre chuang lo. Ţhian chiah kan ni a, hmeichhe dang kawp ru reng mah se ka thik kher lo ang. Mahse ka thin a rim a, ka hah rimtawng vang leh mut ka hmuh ţhat loh vang te, a nu in ka nu a hmuhsitna a lanchhuah tir nasat ţhin em vang te a nih ka ring. 

Rin aiin kan hralh thei phian a, in 6 laiah kan lut tawh a, min lo dawr vek a, ţhenkhatin min lo chhaih bawk a, "Zualtea chu i kal leh mai dawn maw tih laiin i la awm ve reng a, Remruati vang a ni ngei ngei ang" lo ti tawkte an awm a, ka hming lam tel meuh a an chhaih duh a nih chuan ka hriat loh laiin chhaih se ka ti. Mi hian min biak tum lem lova min kalpelh chang an ngah zawk a, ka awm ve tih hria anga an awm hian nuam ka ti tawh lo zawk. 

"Chaw ei khamah ti tawh ang. Mi chaw ei hun a ni dawn ţan a, a nuam chiah lo" a tih takah chuan kan inzui haw veleh mai a, kan inbe tam lo khawp mai. 

Amah zawk chuan "Afeli pawisa batna nu khan min lo be leh tawh a, an pa a ţha lo zual viau a ni awm e. Ultrasound te pawh an ti leh tawh a, a inthlahrung ve deuh nge mawni chipchiar deuhin min rawn thawn ve zel a, a pumpui a lawng/pan nasa lutuk keini doctor ni ve lo tan pawh hmuh hmaih theih a ni lo. Nangmahni ringawtin buaipui lovin a nu leh pate pawh lo hrilhhre ve tawh mai rawh u a tia" a ti charh charh a, sawi sual neih a hlauh hmel khawp mai. 

"Hlawh chu ka la ve ţep a, mahse ka nu hian a kim biai a hmuh a inbeisei leh dawn sia, loan hi duh duh huna puk theih ni se ţha tur. Puk ve ngawt dawn ila buaipui tur neuh neuh a tam awm sia, Afeli pawh eng rilru puin nge mi pawisa tam tham lutuk a lo puk reng reng ni" ka ti a, ka thinrim a la reh hleithei lo bawk nen, min tuam tu boruak chu a uap bik churhin ka hria a, ka hah ngawih ngawih mai a ni. 

"I nu hriat i duh lo leh ngei ang a, engtin nge kan tih ang?" ti a min zawh chuan ka lo thaw hak ringawt a, rilruah Zonunmawia a lo lang a, ani khan pawisa a ngah ang a, puk ţeuh ila zawi zawiin rul leh ta mai ila, mahse a lo phal kher angem tih hi ka buaina lian tak a ni.

"Pawisa tam tham zet a puk tir phal hi thil mak tak a ni" Zualtea chuan a ti khauh a, "Vawikhat a a vaia la a ni lo a, tlem tlem a a puk tling khawm ang kha a nia, lak tam deuh chang chu lo nei ve bawk mah se a hlawmin a la nghal vek bik lo a, pawisa phei chu a tam awl em alawm. Kan ba ngei ngei pawh dawr neituten an ziak pung emaw kan ti hial ţhin a nia" ka lo ti a  U Peki pawh ka zawtfiah tawh a, a lo hriatpui thlap a, "A thilphal a, keini pawn kan puk sak ţhin. Mahse anpa a hrisel lo chho a, a cancer tih an hriat hma pawn annu hian a buaipui tawp tawh a, an buai rukna a rei tawh mai. A dil cheu chuan a mangang tawpkhawkah ngai rawh u" min ti a, dawt min hrilh ka ring chiah lo. Ka phone bo ta Zualtean a kawl lai mekah hian engkim a lo thawn thlap zel bawk a, zu chu lo zuar pawh nise mi rinawm tak a nih ka ring. 

Kan in panna step tawntirhah chuan min pawt dingin ka dar tawn tawnah a dawm a, em ka phur bawk nen, a rem vak lo khawp mai. 

"Ka lo ngaihtuah ang. Nang chu ti hian lo awm tawp rawh. Hnaah kal la, i nu'n a hriat loh nan lo thup hram hram la, keiin vawikhata pek vek theih nan ka lo zawng ang. A khamawm tawh emai" a tih chuan "Thil ţha lo i lo ti ange aw. I pek tawh ho bik hi ka chhinchhiah zel a, dawr nghah chauh lo tih tur dang te pawh ka lo zawng ve anga, ka rul leh vek ang che" ka lo ti ve vat bawk a. 

"Rulh leh beisei a ti ka ni lo. I hahdam deuh nan a pui che ka nih hi. Nangmah chiaha hrehawm i tawrh bik ka duh lo a, i tawrh ang apiang chu ka tuar ve zel ang ka tih tawh kha. Chhuk phawt la, ngaihtuah zui duh suh" a tih hnuah "Chaw ei khama chawhmeh zawrh tur kan la ngah kha" nui chung hian a ti a, ka kal tak tak hma chuan lo kun hniamin rem lo deuh chung hian ka biang a fawp hram a, khawlaia tih atan chuan a tawk viau a ni. 

Zan dang aiin chaw kan ei tlai a, hmun ka tihfel laia kawngka in kik karh karh chu Zualtea a nih ringin ka hawng thuai a, Zonunmawia zawk a lo ni. A ţhianpa kan venga mi, U Tluangtea a lo tel ve lehnghal. 

"Eng nge in lo tih dawn?" hrilhhai ru deuha ka tih chuan "Kan lo leng dawn" an ti a, Zualtea ai pawn an upa daih tawh zawk a, pahnih lai an ni bawk si, zamawm ve duh tak chu a ni. 

"Ehe..nangni pahnih chu in lo leng a ni maw?" ka nu pawn a ti a, mak a ti ve aniang an hminga koh nachang pawh a hre lo. 

"Aw..leng ti ila kan lo lut zuai a nih hi. Naktuk ka nau man hlan a ni der tawh a, zanin chu chaw eikhawm ang u kan ti deuh a, Zonuna hian a rawn ei ve a, thlah pahin kan lo lut mai mai" U Tluangtea zawk chuan a ti zung zung a, an insawifiah nasa lutuk chu a nuihzathlak zawk. 

"Zanin chu thla a de a ni maw?" thlang lam bathlar aţanga ka pa lo lutin a tih chuan inleng te pawh zah zo lovin pindanah ka tlan lut a, hmeichhia tih takah pads ka phawrh sawk sawk a, thla a dêt hian hmeichhia in thi an nei duh an ti ţhin a, inven lawk nan a ka tih a ni. 

Ka chhuak leh chu ka lai ve deuh a, kan inlengte pawh en lovin choka ah ka phei a, ka tih hmasak chu ka ti sawk sawk a, min hmuh vek theih tho avangin Zonunmawia chuan min en reng niah ka ngai a, ka tukhum leh ka hnungzang te chu a mur chem chemin ka hria. 

"Aa..a ruih loh hi chuan a fel ve tho a, a ruih chiah hian a buaithlak ţhin a, tumah miţha leh fel famkim kan lo awm lo a nih hi maw?" ti a ka nu'n U Tluangtea a hrilh na chu ka lo inngaihbel a, bialpa nei reng chungin ka thinlungah midang ka dah daih a, ka paihchhuak thei tawh bawk si lo, inthiam lo viau ţhin mah ila ka nawr chhuak lui thei ngawt si lo a. Mite ang bawkin ka ţha famkim bik lo a, thil ka ti dik thlap ngai bik lo, movie a misual kan tih ţhin te pawh hian thawnthu ngaihnawm deuh an nei ţhin reng a ni. Keimahni ah hian ţhatna leh ţhat lohna a a dun reng niin ka hre ta ber. 

Zualtean ka inlengte a hmuh chuan ka bulah rawn ţhuin "A tlai hmain kal ang" a ti hmuk a, Zonunmawia a hmuh changa a lungawi lo ţhin hi a mak lem lo, ka endan a hrethiam miau a ni. 

"Khaw nge in kal dawn?" ti a U Tluangtean min zawh laiin Zonunmawia erawh chuan chik deuhin min lo en a, Zualtea nen a kan inkara thil awm chu hrilh tawh tho mah ila amah ngeiin a hriatchhuah tum te pawh a ang. 

"Chawhmeh kan zuar dawn a, mah se zingkarah pawh a tih theih tawh mai ang. Inrinni tukah chuan hralh pawh a nuam zawk ang a" ka ti ta daih a, Zualtea lakah inthlahrung viau mah ila inlengte kalsan daih chu a nuam chiah bik lo a ni. 

CONT..