HIS LAST LOVE-1

HIS LAST LOVE-1

(Chhungte sawi rem chawpa inneihna ang hi mizo hian kan la hmelhriat vak lo maithei a, mahse a thleng ve fo a. Hei pawh hi keiman ka lo hriat ve aţanga ziak ve mai mai ka ni e🤭)

"Chuti chuan hlim deuhin an awm ta a" nui sanga min en tu chu ner nangin ka lo en let a, a thawnthu min hrilh chu ka awih hlawl lo a ni. 

"Hlim deuhin an awm ta a ti a tawp reng reng chu a changtute hi mihring siam chawp vek. Mihring pangngai ho in thawnthu kan neih ve hi chu hlim deuhin a tawp ngai lo. Thi thei kan nia, tu emaw zawk zawk kan thi ngei ngei dawn" ka tih chuan a pen hmawrin ka chal a rawn khawng keuh a, "Thudik chu a kha a sin" ka ti leh hram a, ngati nge maw hmeichhe tam tak hian tawpna hlimawm an beisei tlat ţhin ni? Kan la inthihsan phawk phawk dawn tih an hre reng sia. 

"Awii...patil nu, i ti ho zo vek" tih pahin ka luah a beng leh pawp a, dawhkan a lehkhabu inchherchhuan rinchhanin darthlalang ka dah awn ve ngei bawk nen, ka in en lai meka min ben takah chuan ka lukhum sawi deuh bawih chu ka hmu thei. 

"Pasal kan neih ve ting tang a, kan thi hmasa a nih bawk si loh chuan hmeichhia chu pasal sun tur vek alawm kan nih. Chuvang chuan keichu pasal nei lovin ka then vel mai mai ang a, sawrkar ah ka la lut ve thei te a nih phei chuan ka pension hunah ran ka vulh ang" lukhum siam ţhat mawlh mawlh pahin ka ti duah a, ka bula ka ţhiannu ţhu chu a nui thler duai duai a, a nui ri hi a rin poh leh na tuar ri a ang ţhin a, an en duh thei khawp mai. 

"Pang pang che hian aw..pasal nei thut la ka va han ti tak. Tunlaiah nurse an tam tawh si, sawrkar a luh te chu ka beisei ngam lo hrim hrim. Ram dangah ka kal daih mai dawn mawni ka lo ti zawk a nia. Private ah hi chuan kan hlawh a tam lo a, kan hah tho bawk si" a ti a, a dik ve tho mai. 

"Ka nei lo khawp ang. Bialpa pakhat pawh la nei hawt lo hi pasal min neih tir tum ringawt suh aw. Sipai a ţan tum ve nak laia nurse min zirtir daih pawh tih tawh nak laia" ka ti tawn tawn a, ka chhungte hi ka la dem reng mai. Naupan tet aţanga sipai ngaisang, sipai officer nih tum ve ran ka ni a, ka duhthlanna chu engahmah ngai lovin pawl12 ka zawh hnuah nurse min zirtir daih a, tun thlengin ka la vui bui bui reng a, engahmah an ngai duh der lo.

"Saii, i haw thei ţep tawh em? Mahriati nen in inthlak dawn maw ka tia" wardboy in a rawn tih chuan "Dawn nang aw..Mahriati chu a chawhma alawm" ka lo ti vat a, engmah sawi lo chuan a kal veleh mai bawk a. 

"Nang hi chu i ţawng phawng phawng zel a, damlo ho pawh hian i vih te hi an hlau thei ngawt ang ka ring. Nû deuhin awm ve rawh" ka ţhiannu ve ber Nghetin a lo ti leh pek tawh a, mipa hip deuha awm ve tur hian min beisei ţhin a, keiin ka peih mang si lo, ka chet phung a sawichhuah tawh chuan kan inhnial a ni nghal zel. 

"Ngilneii duh deuh pa ka hrilh ţhin che kha i la hria em? Mi kâ aţangin nuthlawi fa pahnih nei tawh a buaipui lutuk tih kan hria a, a bialpa a ni hauh lo nain nuthlawi pawhin a neih theih a nei thei lo bik hi a rilru a na ve reuh lutuk a" a ti a, Ngilneii a tih hi amah chhang tu chiah a ni. 

"A ho mai mai e..keichu a zia i sawi aţang khan ka ngaina lo nghal. Officer pawh nise mizoram zimtea lo induh leh chapo vel ho hi engahmah ka ngai lo. Chubakah hmangaihna chu a mit a del an tih kha" ka tih chuan "Nuthlawi fa nei tawh a buaipui danah a chapo vak lo a niang. Biak a huphurhawm thei em a, vawikhat chu ka be ve tawh, mahse min chhang hmuk hmuk a, khata ţang kha chuan khawlaia kan intawh pawn ka be tawh ngai lo. Ngilneii lah hian a vei bur a, a khum lu lam bangah a thlalak a tar vel mawle. Rilru lam doctor pan pui hial a nia ka duh ni" uar fe hian a ti a, hunawl kan neih changa kan ti ti hi a ropui tehchiam ngai bik lo. Nurse nih vanga muk run reng tur tihna a ni kher lo a, bengchhen a pawi loh chang phei chuan kan nui duai duai zel. 

"Keichu tunlai a ka buaina ber chu maw..ka chhungte hi an inhrilhru ţhin" ka ti chu lungngaih hmel deuhin min lo en a, a thle bâr mai. 

"Engati nge khatia min en?" ti a ka zawh takah chuan "Thu ropui deuh i sawi ve dawn maw tih pawn ho deuh deuh i sawi leh zel a, inhrilhru mai mai khel rual kan nih loh hi" a ti nang nang a, a unaunu mipa duh zet mai chanchin pawh a sawi nitin ve tho sia. 

"Inhrilhru mai mai a ni lo. Ka nu leh pate hian muk deuh a sawi an nei ţhin alawm. Nidangah chuan a hun hmain an pindanah an tawm bo hmak ngai lo. Mahse, tunhnai hian tawm bo daih an ching a, ka nu phei chuan min en leh veng veng zel a, thlahrang film a ang zawk. An awmdan hi ka hrethiam tawh lo, min kalbosan an tum em maw ni ka ti rum rum tawh" tiin ngaihţhat loh rukna ka neih reng ţhin chu ka sawichhuak ta nge nge a, tu hriat pui si lohin tunlai chu ka buai ru riau mai. 

"Ba in nei em ni?" Nghetin a lo tih chuan keimah zawkin ka melh rum ve thung a, kan chhungkaw khawsak hi a harsa hran lo a, ba vanga kan buai awm pawh ka la hre lo. 

"I mawl sia e..ka nu leh paten ba an neih duh i ring em ni? Ba nei si lovin buai rukna eng emaw chu an nei chiang alawm. An awmdan hian keimah min ti buai lehzual a, chhung inkhawm ka hman hunah ka pa ka zawt phawng mai dawn mawni?" ka ti tawp tawh a, ka unaute lahin engmah min hrilh duh bawk si lo, min en hrang bik ni berin ka hre tawh. 

"Buai ruk reng ai chuan zawt tawp rawh. A chhan an sawi hma chu ninawm khawpin zawt la, an hrilh mial maithei che a sin. I patil tak takah an ngai te a ni lo maw?" tia thu atthlak lutuk a phuh chhuah leh tâkah chuan a malpuiah ka chum ţawlh a, a tuai vat vat mai. A puam ţawlh ang chu. 

"Ka sawi dik lo chuang hleinem. Nu leh pate tan a manganpui tham khawpin alawm i khawsak. Awmdan tur ka hrilh che lahin i zawm ţha duh bawk si lo" min la ti zawk a, khawvel leh a chhunga chengte hi chu hriatthiam an har em a ni. Duhzawng leh duh dan hran ţheuh kan nei lehnghal a. 

In a ka haw pawh chu ka nu'n ngui bârin min lo en leh tawh a, rilru nat rukna nei a ang ber. 

Ka inbual zo ka inthlak lai mekin ka pindan ah a lo lut a, khum tlanga ţhu a min enreng te chu ka hre ru ve reng a, boxer leh tshirt lian hnelh hnawlh, mi pali vel tuam zo tur awm ang hi ka ha a, bata slipper chhuat bawl, tlo zet mai ka bun bawk. Ke sa nei tan a ţha an tih vangin ka lei ve a,ka ţhan san a nih loh chuan kum5 vel ka bun theih ka ring. 

"Nang hi i va nguai thei ve. Ka pa'n a lerh san che a ni lo maw?" tih paha a bula ka ţhut chuan ka mal ben a tum a, ka kutin ka lo indang hman hlauh. 

"Thil ni lo lo sawi ţhin suh. I pa te ang chu lerh pawh tum se an neihin a tlin tawh lo" a tih chuan uar zetin ka lo nui a, fate hlim nui ve pawh nur nanga en duh ka nu chuan "I nuih ve lah hian i ang vak vak a, i khabe ruh te a thlawn mai anga sin" a ti hlak a, ka nu hian fiamthu a duh a, mahse a fiamthu a ka nuih ve chuan min hau ziah tho a, a awmzia lo tak tak a ni. 

"Bialnu i neih hmain pasal nei la a ţha ang" a ti mauh mai a, ka nui leh uar uar chu 'ka uang lo a nia' ti ni awm hrim hian min lo melh khai a, ka va han nei awm lo chiang tak. 

"Mipa kalin i kal a, mipa thawmhnaw i ha a, i nuih lahin han inhup mawi ve pawh a awm lo; i ang a, i au a, thawm i chhuah huau huau a, thil ei tui loh lai i nei mang bawk si lo" a tih chuan lo pawt chat vatin "Chu min huphurh tihna a ni maw?" ka ti a, lu a thing rang khawp mai. 

"I thau mum tul ang tih ka hlau" a ti a, chu te chu nu tam tak duhthusam a niang chu. 

"Mi nute chuan an fate thau loh an hlau ţhin a nia, chubakah mipa thawmhnaw ka inbel vang ngawtin mipa ka ni tihna a ni lo. Patil ka ni tihna pawh a ni chuang lo a, patil tak tak te chuan hmeichhe thawmhnaw pawh inbel se patil an ni tho, an hmeichhiatpui an ngaizawng tho. Rilru hi alawm pawimawh zawk chu" tih pahin ka awm ka dawm ve ngial a, chuti chung pawh chuan "Aaa..ka awih lo" a ti deuh tlat a, a hahthlak khawp mai. 

"Pasal nei la i zia deuh ang. Hetiang ngawta i nun reng chuan pasal i hmu zo lo mai dawn. Mipa melh nachang i hre bawk si lo. Ka zawn sak ang che. Fate pasal tur zawn sak chu mi tih loh dan pawh a ni hleinem" a ti a, a thutak phian lehnghal. 

"A teuh lo mai. Ka duhzawng tak ka hmuh hma chu pasal ka nei dawn lo" ka tih chuan "Duhzawng nei ve hek lo che. Mipa leh pangpar hi angkhat rengin ka en i ti a ni lawm ni?" tiin vin hlarin min lo zawt a, a dik ve reng mai. Pangpar hi ka ngaina hlawl lo a, piang nawn leh mah ila ka ngaina chuang lo ang. Ka chhungten 'ngaihzawng nei rawh an tih emaw pasal i nei lo palh ange' an tih chang hian mipa leh pangpar chu angkhat rengin ka en ka ti ţhin a, an lo la vung lehpek a nih hmel khawp mai. 

"Ka la naupan em hi...nakinah ka la nei ve mai ang" ngaihsam zet a ka tih chuan "I pa nen a rukin kan zawn sak che a, zawn sak han ti ila chhungkaw pahnih insawirem ang deuh a ni mai ang chu" a ti a, a thusawi ka hriat rual chuan ka ding hluai a, tim daiin min lo en a, ka nu chu ni lo se ka ţhuai nasa khawp ang. 

"Engtik laiin nge in lo insawi rem a? Ka remtihna ni hauh loin, ka duh miah loh, hriat pawh ka hriat ngai loh mipa neih tir min tum maw? Pasal atan maw?" ka ti ţhat ţhat a, chhun a ka duty chau hi inkhawm zan a nih loh chuan ka mu bo daih zel a, inleng kan neih leh neih loh takngial pawh ka hre ngai lo. Chuan anni hian ka hriat miah lohin ka pasal tur an lo thlang fel hmak a nih chu. Pathian nung be lo vai ho tih awm tawk lek a ni. 

"Ka pa nen hian in phun sur sur reng a, pindanah in lut bo hmak zel a, buaina dang in nei emaw tih laiin ka pasal tur in lo thlang kual vel ţhin tihna em ni a?" ka tih leh tan tan lai chuan "Awiii..ţawngzawi deuh teh i rapthlak emai. Hrilh pawh ka la hrilh chian loh che hi mawle" a lo ti dar dar a, thawm ka dim vak nachhan tur ka hre lo emai. 

"Kei aiin in rapthlak daih zawk. Ka kum zat ngaihtuah ta che u. Min ning a nih kha, pasal nei bo vat turin min duh tihna a ni mai. Tunlaiah mi kan changchang tawh a, vai ho takngial pawn an ching tam tawh lo. Mahni fate hmelhriat loh kut a hlan tawp mai chu a theih pawh in thei ka ti. In fa ka ni ve lo aniang. Ka upa anga pasal chu ka la nei ve mai ang ka ti mawlh mawlh alawm" ka ti hlawih hlawih a, ka nu chuan phawk fe a min melh chung hian a chek tlak tlak a, thidang mai tur te pawh a ang alawm le. 

"I tana ţha tur kan ngaihtuah vang zawk a nih hi. Tunlaiah officer te hi an to tawh a sin. Miin lo ching tawh lo pawh nise, miin lo ti ve ngai miah lo pawh nise fate ţhatna tur chuan ka ti tho ang" lu thing chung meuh hian a ti a, a ţhutna aţang chuan a tho ve ta nge nge a. 

"Chu in rapthlak zia chu. Min neih tir in tum pa chu in duh leh nei rawh u. Min tirh luih vaih chuan ka thi a ni mai, ka inthat chiang khawp ang" tih leh pindan aţanga chhuah ka rual a, inthah dan tur phei chu ka hre chuang lem hlei lova. Inchiu ka hlau a, damdawi mum ka dawlh thei lo a, inchung sang aţanga zuanthlak leh inawhhlum bak duhthlan tur ka nei lo. Motor inchil tir a ni leh tawp mai. Mahse, tunah chuan ka thin a rim em a, tun ang reng ka nih chuan ka inthat hreh hauh lo ang. 

"Kha Tuaite, khawiah nge kal i tum?" inhnuai ka thlen thlak rual a ka pa'n a lo tih chuan "Ka nu nen a in thil tih ka hrechhuak tawh. In duhthlan chu eng mi pawh ni sela ka nei lovang. Ka hriat ngai miah loh mipa pasal atana neih ai chuan meidil a tlak pawh ka duh zawk. Ka inthat ang ka tihna a nih chu" tiin ka sawi ţhaih ve a, a ngaipawimawh lo nasa mai. Ham bai bai chungin an pindan kawngkhar a hawng a, muangchangin a pen lut a, ka pa awmdan chuan ka thinurna a belhchhah ti ila ka sawi sual lo khawp ang. 

"In hre vek tawh tiraw? In zep char char tiraw?" tih khar khar pahin ka unaute chu ka melh khai khai a, a laiah tak ka ding teu a, tv pawh an en zawm thei meuh lo. 

"Nu leh pa thu an hnial ngai lo. Naupan lai aţangin mipa angin i awm a, i tana ţha ber tur a nih hi. U Sangliani te pawh an inngaizawng lawk bik hleinem, chhungte insawirem na a innei an nia, an hlim em hi. Vengchhung mite pawn a tirah chuan mak an ti vek a, tunah chuan U Sangliani vanneih zia ngawt a nih hi an sawi tawh. Nu leh pa te hi chuan an thlang sual ngai lo, fate tan hian a ţha ber an duh ţhin tih hria la, i la naupang viau nain an thu hnial lovin nei tawp mai rawh" kan upa ber, Zikpui'n a tih chuan ka insehruh nghal ţeuh a, bungrua ang maiin min ngai hlawm niin ka hria. 

"Keipawh an ti mak chu ka ti ve deuh. Diktak chuan ka pa enkawl dik loh alawm. Ţhenawmte pawn an sawi vek, 'i pa hian mipa angin a enkawl a, Tuaite a ti reng a' an tia, kan unau lah hmeichhia vek kan ni bawk sia, an enkawl dan dik loh vang liau liau a nih laiin Saii bawkin a tuar leh dawn a, ka ngaihdan a ni vak bik lo" kan tlum ber Liantein a lo ti ve khauh a, tlemin ka inthlahdul leh ta deuh a, ka dinna erawh ka la sawn chuang lo. 

Kan unau hi hmeichhe pathum tlawng hi kan ni a, kan upa ber hi Saizikpuii niin private school pakhatah a thawk ve a, Aizawl a school ţha an sawi chuan a thawhna school hming hi a lang ve ziah a, a inchhuan phah viau nghe nghe a ni. Kei hi Saidingpuii ka ni a, private hospital ah nurse ka ni mek a, kan tlum ber Saihmingliani nen hian kum zawnin kan piang a, a ni hian hna a la nei lo a, tunah hian eng ber nge a zir ka hriatpui ve lem lo. 

"Awii..ka thinrim lutuk hi awm dan tur ber pawh ka hre lo. Ka nu leh pate hian an ti tak tak a nih chuan ka damchhungin ka ngaidam tawh lovang" ka ti a, ka unaute hmaa ding reng chung chuan kawng dawm chung meuhin ka vanvadak a, ka thaw leh halh halh ţhin bawk a, anni lah chuan an ţhutna an sawn hmak a, min ngaihsak zui duh hauh lo. 

"Nurse ka zir zawhna a la rei lo a, ka thawk ve ţan chiah tih theih a nih laiin ka hriat miah lohin thil rapthlak lutuk an lo ti reng a, ka hlawh an it miah lo te hi mak ka ti. Ka nu leh pa te ka chawm let ve thei tawh dawn ka tia ka hlim ve tehreng nen" ka ti leh a, ka ţap lek lek tawh a ni ber. 

Min ngaihsak deuh tura ka rin ka unaute berin min ngaihsak duh tak lohah chuan inchungah bawk ka chho leh a, pindana ka luh leh chuan ka nu a lo awm tawh lo. 

Khumah ka bawk hnawk a, an ti mak ka ti khawp mai. Mizo ah ngat phei chuan insawirema innei hi U Sangzuali te bak ka la hre lo. Khawsak harsa deuh hlek, chhungkaw khawsakin a zir hlawl loh avanga mi hausa, kan chhungkaw enkawl thei min neih tir tum chu nise ka hrethiam a, nu leh pate nawmsak theih nan chuan ka nei mai ang. Mahse, insawitheihna ni lo se, retheih awmzia hre miah lova seilian chho kan ni a, ka nu leh pate hian sawrkar hna an thawk ve ve a, tunah lah Zikpuii nen hna kan nei veleh tawh bawk a, hei vang tak hian an thil tih dan hi ka hrethiam lo lehzual a ni. Kan inngaihzawn loh chu thuhran, vawikhat pawh kan la inhmu lo a nia, ngaihtuah pawh ka ngaihtuah thui ngam lo. 

"I lo ţap feih feih ang chu tih nak laiin" kawngkhar a inhawn ruala Liantei thusawi ka hriat chuan ka ner nak a, ka ţap chak viau chung pawh a ka ţap thei lo hi eng nge a chhan pawh ka hre nek lo e a. 

"In lo inzep thei hlawm hle mai. In tan hian ka lo hnawk sak aniang, hrehawm ti hmel pawh in pu hlawm lo a, ka nu'n a sawi hawn hma chu engmah thleng lo angin in awm suau suau thei a" ti a ka ţawng el chuan a lo thaw hak a, kawngkhar a nam phui te te hnuah ka bulah a rawn bawk ve a, ka phone ri reng te chu ka ngaihsak peih lo. 

"Ka pa ţhianpa, Pa Chhawna kha i hria em?" ti a min zawh chuan ka hriat loh thuin ka lo chhang a, kei hi chu ka unaute ang lo takin lehkhazir nachang ka hre vak lo a, high school ka rah ve aţangin hostel ah ka awm rawt a, mi ka hre lo khawp mai. 

"A va buaithlak tak hrilhfiah dan che ka va hre awm lo ve. Pa Chhawna fapa a nia, amah tak phei chu ka hrechiang bik lo a, ka nu leh pate sawi hmangah MCS val a ni awm e" nui var var chung hian min melh ralh a, keiin ka lo ngai ho hle si. Mihring inlaichinnaah chuan nihna aia pawimawh dang a tam lutuk tlat a ni. 

"A la upa lutuk bik lo a, MCS a tlinna pawh kum te chu liam ve tawh bawk mah sela a la rei vak bik lo a ni awm e. Engti tih a hetiang thil hi ngaihtuah chhuak thei nge an nih ka hre bik lo. Ka pawm zawng a ni ve vak lo a, hrilh lo tur che a min ngen miau avangin ka hre lo awm vel mai mai a nih kha" a tih lai te chuan ka lo hui pap pap a, ka kawchhung tawt ţeuh mai hi ka hui kiang thei chuang der lo. 

"Ka nei awm lo emai. Ka pa te ho inbe rem vek tawh mah sela palai an lokal chuan lo hnar ang che u. Ka duh loh zawng hlirin thil an ti a, an thuneihna an lantir nasa mah mah a nih hi. Sipai a ţan ka tum lahin an remti lo a, an duh anga nurse ka zir zawh thlap tawh hnuah thiang lo tluk hial a kan ngaih thil an tih leh a" ka tih hlak hlak hnu chuan tim dai hian, "Ni tho mai. Mahse, sipaiah chuan intlar ve mahla san zawngah i tling kher lo ang. I lian vak si lo a, tlem chuan a huphurhawm ve deuh alawm" a lo ti a, thudik lo hlawm tawp a sawi bik lo. Liantei ngei pawh hi kei aiin a lian daih zawk a, ka nu leh pa te hlauh ruk ang hian lo inti pa ve pawh ni ila tu hmeichhia mahin min duh lo ang. 

"Pa Chhawna i tih chu khawi venga awm nge?" tiin ka zawt ve mial a, ka ngaihven ve ta deuh niin a hria aniang an veng awmna min lo hrilh thuai a, ka ţhiannu Ngheti te nen an veng a lo inang chiah. Ani chuan a hre khawp ang. 

"Tu nge a hming?" ka tih chuan "Nicolas" a lo ti leh a, ka ner nasa ngang mai. 

"Tlangval ţhan kin zet tawhin sap hming an han pu hi chu inhmeh lo ka ti ţhin. A hming aţang chuan ka tui lo nghal, ka sawi tawh ang khan pasal neih ai chuan thih pawh ka duh zawk" ka ti leh hlak hlak a, Liantei erawh a hawi phawk nasa tawh. 

"Nunna hi a hlu a, kan duh thu a kan lo tih tawp ve ngawt a thiang hleinem. Duh lo mah la an neih luih tir dawn tho che a, an thu angin awm phawt la, i ţhen leh vat mai dawn a nia. Intihhlum ai chuan thlawi mai kha a pawi lo zawk. Ka nute chuan an ngaihtuah vak lo che a, khawi hmunah pawh awm se a inveng thei ang an tih che kha" a tih chuan ka ei lo lutuk chu ka lo meng kual ralh a, ka mu zangthal thawk a, rilru a buai duh map map khawp mai.

Rin lawk ang ngeiin ka chhungte chuan engmah an sawi zui duh lo a, zawt ve ngial mah ila chiang lo nuaihin min chhang a, ka pa'n "Nakinah kan la sawi dun dawn nia" a tih tak hnu phei chuan zawh zui chi niin ka hre tawh lo. 

Lunghnur deuhin duty turin ka kal a, Nghetin min lo hmu chu a tih ziah danin a lo phul leh hlut a, nidang anga ka lo chhawn ţha peih lo chuan a ngaih a ti ţha lo ve deuh aniang kan inthlak zawh hnu chuan "Thil dik lo a awm em ni a?" tiin min zawt ve hial a, ka chhungten min hrilh ţha duh rih lo mah se Ngheti hi chuan a sawi ţha duh par par viau ang.

"Lokal teh" tih leh mi awm lohna lama kalpui ka rual a, kil khata inhmachhawn a kan din ran tawh hnuah pawh chuan a la hawihai angreng khawp mai. 

"In vengah Pu Chhawna fapa Nicolas tih hming pu an awm em?" chiang fek fawk a ka tih chuan "Ele....Lalhmelţha-a" a lo ti sam mai a, mak ka tihna zat chu teh ta ila a sang viau ang. 

"Lalhmelţha-a kha Nicolas maw?" ka ti hluai a, min en ran chung hian a lo bu nghat a, ka thaw halh halh a, Lalhmelţha-a a nih phei chuan ka nei duh lo lehzual. 

"Thil mak deuh a thleng a, i awih lo zawk ang. Engkim ka hrechiang vek tawh chung pawhin kei ngei pawh hian ka la awih thei chuang lo. Ka luak te hi a chhuak nghulh thei, nizan ka mu bawk si lo ka chau lutuk" ti a phun sap sap pahin ka vei tawn sek a, Ngheti lah chu mak ti hmel la pu reng chungin a ding zum zat a, thil awmzia ka han hrilh chiah chu a ang deuh pham a, sawi tur mai a hre bik lo. 

"Lalhmelţha-a, hmuh pawh ka la hmuh loh, i u Ngilneiin a vei em em pa kha min neih tir an tum ka ti a nih chu" ka ti nawn leh a, ka aw pawh a ring tawh lo. 

Thil dang sawi ta lo chuan "Ngilneii rilru a na ngawt ang" a ti sep a, ding meuh a a lam ka hawi chu hriatthiam harsa deuh hian min lo en a, "Kan veng nuthlawi fa pahnih nei tawh a buaipui lutuk ringawt te hi a rilru a na a, nupui a neih leh ngat phei chuan a tuar ve ngawt ang. In inrem thlap tawh em ni a?" tiin min lo zawt leh a. 

"Ka sawi ang kha a ni mai. Kan chhungte an insawirem tawh a, mahse dan anga palai an lo tirh ve tho a ngai dawn a, chu chu an nghak mek a nih hmel. Engtin nge ka tih ang? Ka rilru a hah emai" ka tih lai chuan "Awii...awm hle hle teh. Vei sek kher lo la..lu i ti hai alawm" a lo ti nang nang a, taksa zawi deuhin bang chu ka ngheng hnawk a, chakna engmah ka nei lo tak tak. 

"I neih dawn tho chuan lawm taka pawm tum tawp mai rawh. Tih tak emah chuan Lalhmelţha-a te chu tuman an iai nang. Mi duhtui Ngilneii pawhin hna a neih hma aţang daihin a vei ngar ngar tawh a nia, tunah phei chuan officer a ni tawh lehnghal. Kan tana khuanu ruat lawk sa hi hnar theih a ni ngai lo. I chhungte berin nei tur che a an duh a nih chuan a sual lo tihna a ni mai" a ti ve ngial nain "Khuanu a inrawlh reng reng lo. Ka nu leh pa te thil tih a nih hi" ka ti nghat a, tun ang renga anni ka huat hi ka la hre lo. Bakah a chapo zia sawi nasa ber ţhin tu a nia, a fak mawi chawp leh vel mai mai a ni, a fel lo tawp ang. 

Casualty a ka luh hnu lawka mipa sang ţha zet zawtin naupang a rawn pawm luh chuan kan tho dual a, a mangan hmelin hlauh nei a ang khawp mai. 

An lo buaipui thuai a, chupa lah chu naupang hnungchhawn zawng chuan a ding tlat a, "Cycle a khalh laiin a chesual" tih bak engmah a la sawi lo. A chal a sawh kak a, ka hmu ve chiah lo nain "Chilh a ngai ang" an tih chuan a nasa deuh a nih ka lo ring ve ringawt a, naupang na tuar a ngaihsak lo lutuk chu ka ngaihdan a ni lo deuh hlek a, rawnkal ve dang an awm lo nen, naupang ţap pawh ngaihsak duh lo chu tiin ka pan hnai a, a awm thleng vel lek ka ni, en mai ai pawhin a zawna ka din meuh chuan a san zia a hriat. 

"I fapa em ni?" fiah fel taka ka tih chuan min lo en ve chiah a, a mitmeng lah chu a thipin hepa hian nelawmna reng a nei lo. 

"La ni lo deuh" a ti bul hmuk a, a aw thleng chuan a nelawm lohin engti tiha rawn inhruai ve nge an nih hriatthiam a har a, a ţawngkam chu hriatthiam a har lehzual.

"Saw..a piang fel vek tawh a, a lian ar tawh bawk a, i fa a ni mai lo mi? A eng nge i nih a? Naupang saw a mangang a, na a tuar bawk a, ngaihsak ve ta che" ka ti hlak hlak a, ka ngaihdan a nih loh ve tehreng nen min chhang duh lem lo. 

Midang an rawn inrawlh takah chuan ka kal hrang a, thinrim sa ţun reng ka nih avangin a awm dan chu ka ngei angreng hle. Casualty aţanga a chhuah hnuah thlabar tih hriat zetin hmeichhe pakhat a lo tlan lut a, naupang chu a rawn buaipui ta nge nge a. 

A chal kak lai an chilh zawh thlengin ka awm a, naupang pawh a bengchheng lutuk ta lo deuh a, an khum zawna ka din lai chuan hmeichhia chuan naupang kut chu a hum a, a endanah chuan a hmangaih zia hai theih rual a ni lo. 

"I pa khan thisen a hlau a, i thisen a chhuak hnem si a, chuvang chuan a buaipui thei lo che a nih kha. Nakinah a lokal leh ang a, i bulah a awm leh char char tawh mai ang" a ti dam dap a, chhungkaw maksak tak chu an nih hi mawle. Khapa awmdan kha ka ngaihtuah let a, naupang a muttir hnu khan a en leh duh ta miah lo a nih kha. Mahse, 'ka fa a la ni lo deuh' a ti bawk si a, inlaichinna maksak tak chu an nei a ni phawt ang. 

Thawk deuh halh pahin ka kalsan a, ka buai lohna turah hian ka lo buai leh chiam zel a, ro hlu ka chhar phah ngai mang si lo. Tun a ka chunga thil thleng mek lah hi engtia han chinfel tur nge ka hre der mai bawk si lo a, insawiremna a pasal min neih tir duhna an nei hrim hrim hi mak ka ti tawp thei lo a ni ber e. 

Kan haw dawnah Ngheti nen chuan kan uniform kan thlak leh a, nurse ho hi chu kan inthlak reng mai a ni. Pheikhawk bun a ka kun kût kût lai chuan ka tukhum rawn khawih thuak pah hian "Vawiin chu i ngawichawi lutuk a nuam pawh ka ti lo. Chhungte insawiremna a pasal nei hi sawi tur an awm ve chawk a nia, tupawh hian fate tan chuan a ţha ber an duh ţheuh a, hetiang ho hian pasal an nei sual mawh lutuk. Kum a upat tak tak hmaa pasal neih hi a ţha zawk bawk a, i puitlin thei mai ang. Lungngai lutuk lo la maw...mahse, a nu leh a farnu te hi an mizia a mak teh mai a nia" a ti charh charh a, ka uksak peih lo a ni ber. 

"Ka pa hi ka hrechiang a, thutlukna a siam tawh chuan tih danglam theih a ni lo. Ka intihlum mai dawn nge ka tlanbo daih ang tih te a nih hi ka ngaihtuah vel mai mai tawh. Inţhianţhatna sawh ngheh nan a an ti a nih phei chuan lem ka ti ngawt ang" ka ti liam puat puat a, ka kekawr tlang ka ben thak thak hnu a ka din ngil leh rual chuan ka ban a lo kuah chat a, min khawngaih hmel ve tho mai. 

"Puih theih che ka chak tak tak a ni. I nei hreh ngang a nih chuan i pa chu a ngenin ngen chhin la, a rilru a thlak leh mial maithei a sin" ti a min sawi hmuh chuan ngawi rengin lu ka thing a, ka pa hi kei aia hrechiang tu an awm lo. A tih tawh chu a ti tlang tho ang. 

Garage lam kan pan lai chuan "Ehe" a ti hluai a, a ding zui chawt a, ka kal uk tawh pawh chu min pawt let dawrhin hma lam a en ngat ngat a, a melh lam chu ka mitin ka chhui ve a, thil danglam hmuh ka nei hran lo. 

"Lalhmelţha-a sawn eng nge a rawn tih?" a tih tak sapah chuan ka en nawn leh ngat a, thil danglam hmuh ka la nei chuang lo. 

"Saii, i pasal tur chu saw saw alawm" tih leh motor ngheng a kan hmazawn a ding chu kawh a rual ta mai a, ka hmu chiang viau tawh chung pawhin "Tu ber saw nge ka pasal tur chu?" ka ti nawn leh ngat a, a bul velah tumah an awm lo thung. 

"Motor ngheng a ding saw" zawi te tak tak hian a ti leh a, a kawk tawh lo a, a hmel chu ka hmu chiang telh telh thung a, casualty a ka luh ve lai taka naupang rawn pawm lut tu ngei kha a ni. 

Din reng theih ni hek lo le, kan scooty dahna lama kan kal ta chu ani pawhin min rawn hmu ve a, Ngheti chuan a be ve tak nain a rul tawk lek bakin a chhang lo. A mitmeng pawh chu casualty a kan inbiak lai ang bawk khan a la thip a, a pianpui ve hrim hrim a nih hmel. A vanduai khawp mai, nel bawrh bawrh tu a nei tlem viau ang. 

"Biak a huphurhawm ka tih kha. Ka hnem ve tak na chein ka huphurh pui leh tawh che" a tih sa sa chuan "Kha lamah kha chuan min ngaihtuah suh" ka lo ti halh a, min en rang khawp mai. 

"Khapa kha chu engahmah ka ngai lo. Ka hrawn huphurh lova, ka hlau ther te lo bawk. Ka huphurh ber zawk chu pasal neih hi a nia, Lalhmelţha-a kha chu a nu leh a farnu chenin ka hlauh nachhan tur ka hre lo. Ka pa'n min neih luih tir ta a nih pawhin ka duh vanga lawi lut ka nih bik loh zia an hriat tel a ngai ve tho alawm" tiin ka thlamuan let zawk a, ka ţhiannu hi ţawng thlamuan ngai lo pawh nise ka hlau lo ve hrim hrim. Intihhlum pawh rilruah chuan a awm tho, amaherawhchu, khawlum mai mai pawh hrehawm kan tih laiin ka nunna ngei ka chhah chuan hremhmun bak chan ka nei dawn bawk si lo, thawk ngaihna pawh ka hre rih lo a ni ber e. 

Zanah chuan ka pa'n an pindanah min ko lut a, ka nu nen chuan melh pawh ka melh ţha peih lo. 

"Mi fel tak a nia" ka pa'n a ti chiah chu sawi pawh a sawi zawh hmain, "Khatiang, a fel hlawl lo ang. A chapoin a luhlul hmel bawk si, a mitmeng aţang reng khan mi fel a ni lo tih a hriat vek alawm. Ih maw..ka hrilh tawp ang che u, hetiang inneihna phuahchawp lem lutuk hi ka chungah hian thlen tir ve lo ula nakinah in inchhir lo zawk ang" ka ti vin hlak hlak a, ka nu leh pa te chu an han in en ren rawn a, chutah ka nu'n "I hmu tawh em ni?" tiin min lo zawt a, kei lah chuan insum karna nei lek loin ka hmuh dan zawng zawng ka hrilh fai vek a, an mak ti hmel te chu lem ka ti zo vek tawh. 

"A tihzia hlauh a nih chu. Inhmuh tir che u kan tum lai a nia, inzawng buai vak lo a in inhriat theih mai dawn chu" ka pa chuan a ti sam then a, hnial ka tum a, ka thinrim lutuk chu ka ţawngchhuak thei lawk lo lehnghal a, ram zet a "Hetiang thil hi engati nge i tih a? A chhan pakhat tal min hrilh rawh. Min awmpui peih tawh lo em ni a?" ka tih chuan, "Ka fanu i nia, awmpui peih loh nachhan tur che ka nei hleinem" tih zawngin min chhang a, ka duhkhawp lo hle mai.

"Ka pa, ka duh lo chung pasal nei tura min nawr luih chhan hi alawm ka hriat duh chu. Vawiin a ka hmuh dan zawng zawng ka hrilh cheu a, hmeichhe dang a zui bakah fa hial an nei bawk a, chuti chung chuan nei turin min la duh tho maw?" ka aw chu a khur deuhin ka hria, ka thinrimna leh rilru natna chu a inzat vel awm e. Ka pa lah chu a ngawi leh tlat tawh a, ka nu takngial pawhin hetiang thil ka chunga an tih nachhan hi min hrilh duh lo. 

Thil dang min sawipui daih a, an chhungkaw fel zia te, Pa Chhawna nen a an inkawmngeih zia thlengin a sawi kai a, palai an lokal vat ang a ti bawk a, "Nicolas hi a naupan lai aţanga ka hriat a ni a, a landan ang a ni lo. A ţawng tlem lem lo a, lehkha a thiam bakah mi rilru ţha tak a ni. In inbelchiang ang a, in inngaina chho ve zel mai ang" ka nu'n a lo tih ve phei chuan ka thinrim, rilru na bawk si chu ka nui tawp tawh a, an pahnih a min en ngawt ngawt lai te chuan hul deuh hian ka nui hak hak reng a, ka mittui a tla thei hauh lo nain ka ţah a chhuak lutuk ringawt.

Tuk ţhuan ei laiin Zikpuiin, "Nizan chu i ţah nuih a ni maw?" a ti zauh a, ka chhungte chezia ka chik bawk a ka nu'n mitmei a a lo khap vat te chu ka hmu ru ve reng a, awmzia a awm dawn loh zia hriain ka thinrimna ka lanchhuah tir peih tawh lo. Ka bing mup mup reng a, khawhawi a tawiin ka hah em em reng ringawt a. 

Thu thin ţhawng zet mai ka hriat aţanga kar khat hnuah chuan thu mak tak bawkin min deng leh a, "I pa Chhawna te chhungin chaw an lo ei dawn a, miin engmah an la hre chuang lo bawk a inpawhna zel a nia, Saii, nangpawh i duty zawh veleh lo haw rawh aw" ka pa'n a tih chuan hmui ka ti pawrh nasa mai. 

"Chhawna ti reng mai, duh leh a ţhianpa Chhawna nen chuan inchhawn dut dut reng se a ni mai alawm" kailawn a pen chhoh hlawk hlawk paha ka phun chu Liantein min lo nuih a, a mak tak tak a ni, ka beisei loh lutuk thil a thlen vang a niang tuna ka hun tawn mek hi mumang ang ruih a ni. Ka la awih hleithei lo a ni ber. 

"In eipuar lawk sain ka rawn haw ang" ka tih deuh hmak hnuah pindanah ka lut a, tlanchhiatna tur ka duh a, a vang viau bawk si. Tih tawp ka duh a, tih tawp theih dan ka hre si lo a, mi hlim thei tak ka nih vei nen ka nu leh pate hian ka hlimna zawng zawng min lak bo sak a, mei alh hluah hluah karah awm lo mah ila hremhmunah min hnuk lut ti ila a fiah ber ang. 

Chawhnu lam duty ka ni bawk a in ka thlen chuan kan mikhual tur te chu an lo awm der tawh a, mi pathum an ni a, Pu Chhawna te nupa leh an fapa luhlul hmel zet te kha an ni. Ka nu chuan min inhmelhriattir thuai a, hmaichhanah ka la hmu lo nain an thlalak chu ka hmu tawh chiang a ni. 

"I fapa kha a zia deuh tawh em? Eng nge a an tawh a?" kan mikhualpa en ran chung a ka nuih sak laiin ani chuan mitmeng dur khapin min lo melh a, min huat hmel khawp mai. 

"Tuaite, han inthlak la rawn ţhu ve rawh. Hei i pa Chhawna te pawn sawipui duh che an nei ang" ka pa'n a tih chuan ngeiawm zet hian a lo kiai suk a, ka pa min koh dan chuan a nuih a ti za a ni phawt ang. 

"A fapa chanchin ka hre duh deuh a, hmanni khan a chal kha a thi nasa angreng sia" ka ti leh kher a, nitin maia ka thinrimna inkhawl khawm ţhin chu a hmel ka hmuh leh takah hian a rawn irh chhuak ka ti mai, puitling awm ve te pawh ka zah der zo ngang lo a ni. 

Zikpuiin min kalsan pui a, inchung lama min hruai chhoh pahin "I nasa tih chu ka hria mah se Pa Chhawna te kha i vawikhat hmuhna chauh a nia, tlem chuan zah ve deuh ta che" a ti hlak hlak reng mai. 

Khuma ţhut hnawk pahin ka hui pap a, engtih mah ka phur lo. Khuk ral daih te a nia ka chak ber zawk ni. 

"Keichu lo indahţha ta ila, khupa chuan engtin nge hetiang inneihna hi a pawm mai theih zawk? Bialnu a nei lehnghal. Chu chuan ka rilru a tibuai lehzual, min hman ţangkai duhna an nei te a ni mai lo maw?" ti a ka u ka zawh chuan a hmui hnuai seh chung hian lu a thing ne ne a, ka hmaah dingin kut a kuangkuah at a, tun hi thu dengkhawng lutuk kan hriat hnua hrehawm a ti hmel ka hmuh hmasak berna a ni ngei ang. 

"Chu lam chu hriat ruk ka nei lo. Ka pa hian i tana ţha lo thei thil a ti dawn lo tih hre tawp rawh. Thutlukna nghet an siam tawh a, khawngaih viau che mah ila tih theih ka nei bik lo" a ti chuai raih a, a beidawnthlak khawp mai.

"Ka pa hian min hmangaih lo ka ti. Ka hlimna aiin a ţhianpa Chhawna hlimna a ngai pawimawh zawk a nih hi" thinrim zet a ka tih chuan min lo nuih a, "A hmangaih vang che a ti ah a in ngai ang. I pasal tur hi a sualna sawi tur an hre tlat lo a, vannei an ti zawk hial maithei che a ni. Duh lo mahla i neih tho a ngai dawn a, hetiang thil hi i chungah chauh a thleng bik lo a nia, nangmah anga hmeichhe khawngaihthlak deuh deuh hi an tam mai. A chang chuan mi dinhmun kan hriatthiam theih nan an dinhmun a kan din ve phawt a ngai ţhin a, ti kha chuan U Sangzuali pawh i dem tawh nang. A duh dan a kal ngam lo, mi dawihzep i ti tawh miah lo ang" a ti a. 

Ka inbual zawh hnuah sam huh thur bumin inhnuaiah ka chhuk a, ka landan mawi lo zet avanga ka chhungte lungawi lo hmel chu a hmuhnawm kher mai. 

CONT...(Chapter khatna ah hi chuan ninawm a tam a, a kual deuh bawk ngei ngei😂)