DEAR DIARY-23

DEAR DIARY-23

'Kan inpe fel chiah' ka message dawn chu ka en vang vang a, a ti tak tak dawn a nih hmel. 

'I hlau ve deuh em?' ka va tih chuan 'A hlauhawm hleinem' a rawn ti vat a, lo video call a tum chuan Rohlua a awm ve vangin ka ti tawp zel a, a hrethiam aniang a awm mekna dawr chu a thla la in min rawn thawn ta zawk a. 

'Rawn hmu ve la ka ti a nia, a nuam lutuk ringawt' a ti a, tiffin ka ei lai mekin Rohlua pawhin min chhuahsan a, ka ţhiannu chu ka call ta nge nge a. 

"I patea chuan a phal tak tak tihna mi? Kan sawi ve vak vak ringawt ang a, kan tih tak tak ka ring chiah lo a, ka thin a phu nasa lutuk" ka tih tak bawrh bawrhah chuan "I over e a" a ti a, a nui zui hak hak a. 

"Thil ţha lo deuh te ka ngaihtuah hman a" tih pahin kan dawr ep chiah chu ka melh a, "Eng nge a?" a rawn tih ve chuan ka hrilh duh lem lo a, kan inbiak zawh hnuah a patea nen a an thlalak a rawn status a, a fak nasa khawp mai. 

Ka nu lo haw chu thil awmzia ka hrilh a, a taka an tih takah chuan rin lawk ang ngeiin a inthlahrung viau mai. 

"Pawisa engmah i thawh ve mang si lo, Rintluangi te vekin an tum dawn a nih chuan dawr inţawm pawh in nih chiah loh chu" a ti a, ka ngaihdan ve tho a ni. 

"Rintluangi chu thuhran a nia, a chhungte hian min lo huphurh ka hlau" ka ti a, engmah thawh tur neih ve loh chuan inthlahrun a nain mahni insit a lo awl a ni. 

Rohlua dawr ka thlen rualin U Marti hnen aţanga a ban thu min rawn hrilh leh a, nitin min ţhawng dawt dawt reng mai. Kei erawh ka thawhna ngaiah ka thawk zui a, Zonuna pawh a pa enkawl a ngaih deuh avangin kan inhmu khat sawt khawp mai. Zantin min lo be thung a, keiin chanchin ka lo hrilh a, min phur pui ţhin viau a, kan dawr ep a dawr neitu Seni pawhin min la thlem fo mai. 

Dawr tharah pawh bungrua tlem a zawng chu a awm ve tawh a, Rintluangin nitin a nghak ţhin a, a awmna hmunin a zir bawk a a inhralh ve chang te hian phur deuhin min lo hrilh ţhin. 

"Khaw nge dawr neitu hi?" Kimkimi rawn lang hlawl chu mak ti deuhin ka lo en hau a, inrinni a ni a, Rohluan min chhuahsan loh ni tak a la ni zui. 

"Dawr piah chiaha nepnawi dawrah hian a leng, mei a zu aniang" tiin ţha deuhin ka lo chhang a, tim lem lo deuh hian a rawn pen lut a, ţhutna pawh inlak chawpin a ţhu fel at a, ani hi ka ring lo a Zonuna chu ka ring alawm ka ti rilru a, a pasal hlui nen kan inkawp a ni mai a, ka hnathawhna hmunah lehzel hi chuan rawn inlan fo lo se ka duh. 

"Tunlai chu Sangsangi khua a sik leh zeuh ţhin a, inven nan nachhawkna lei ka duh mawle" a tih chuan ka ei lo lutuk chu ka ner ru deuh sak a, damdawi dawr dang a tam tehreng nen helai berkher. 

"Eng chi nge i duh a?" ti a ka zawh chuan "I hre ve em ni?" min ti a, min nuihzat hmel em em mai lehnghal. 

"Kan neih ho chu hre ve e, min rin zawh loh leh Rohlua i lo zawt dawn nia, a lo let ţep ang" ţha deuhin ka ti leh a, "Khilamah khian ka ţhiannu te an awm a, an ina kal pahin ka rawn pengkawi a nih hi. Thil ni lo lo i lo ngaihtuah ange" a ti ta daih a, ka chhang lem lo. 

Rohlua pawhin Kimkimi a hmu chu mak ti hmel a pu deuh a, min zawh ang chiah lo zawt vein nachhawkna te chu an inpe a, kan dawr kher a a lokal chu a ţul lem lo khawp mai. Min runluih vel ţhin ni maiin ka hria a, ka hmuh laia inlak eng emaw vel hi nuam a ti riau a ni.

"Dawr inhawng ve niin ka lo hria a" ngeiawm deuh a min melh ralh pah a a tih chuan Rohlua lam ka hawi thuai a, engmah ka la hrilh hauh lo. 

"Ka ţhiannu nen tih ve kan tum deuh a mah se ka la tel ve lo, amahin a buaipui vek a" ka ti bah nawk a, ka zam lutuk chuan ka chhang ţha hleithei lo a ni ber. 

"I ban thut chuan Rohlua a buai deuh dawn ni maw? Nangmah thlak tu tur a zawng lawk awm si lo a" a tih leh chuan ka chhang duh ta lo.

Rohlua zawk chuan "An tih theih chuan ti rawh se. Keipawn ka phur pui a, dawr kawtah hian pho chhuak rawh te ka tia a duh lo zawk a, kan la dawr ve chur chur ang chu" a ti a, za lo deuhin ka lo nui a, ka hmaizah angreng khawp mai. Kimkimi lahin hmun leh hmunah min ţawngkhum sak sak mai chu a ni sia. 

A intiam lawk angin zanah Zonuna a lo leng a, kan inhmukhat bawk nen ka lo thlahlel khawp mai. Kimkimi hming ka lam ri lo hrim hrim a, a nupui hlui a lo ni kher kher te hi pawi tih chang ka ngah mai. 

Ka pa lah chu a vei sek a, a chang leh kan ep chiahah ţhuin tv en ni awm takin a awm a, a tum bur mai bawk si, a ti lang lem lo nain Zonuna tak pawh chuan nuam a ti lo ang. A khat tawkin meizial a dil leh ţhin a, ka nu a vin khur khur reng bawk a, kan inchhung hrehawm zia chu min hriatthiam pui tawh khawp ang. In chhunga awm reng chu nuam miau hek lo, pawnah kan chhuak ta ringawt a. 

Kawngkhar chu nam phuiin ka ngheng nghal a, "Duh leh hetah hian meizial kha zu daih rawh" ka tih chuan "I pa'n lo nei mai rawh se" a ti sam then a, inchhungah a dah daih ni awm tak a ni. 

Ka bula bang nghenga a lo din ve rual chuan "I haw hunah i mu nghal dawn mi? Nge i pa buaipui a ngai em?" ka tih chuan "Kimkimi te inah ka kal ang" a ti a, mak ka tih chu thuhran, a thusawi chuan min ti hamhaih lek lek a ni. 

"Ka nu nen a bazar kan kal hlanin Sangsangi a lo hruai daih a, i nu'n engmah a sawi lo em ni?" tiin min zawt let thek a, "Sawi nang" ka lo tih chuan "A phal lo chung a hruai a, ka lam haw ang. Ka hrilh lawk tawh a" a ti a, pawi sawiah pawh a inngai lo niin ka hria, thil tih sual a nei miau lo alawm. An fanu a nia, Sangsangi vang hian an inhmu ang a, an inhmu leh ţhin bawk ang. 

"Lo hawng teh u" ka nu'n a tih takah chuan ka kalsawn thuai a, inchhung aţangin kawngkhar a rawn nam hawng a, ka phone a keng bawk.

"Ţhutthlengah i dah tawp a, a êng reng mai. Be duh che an awm aniang" a tih lai mek chuan ka phone bawk chu a rawn nghawr leh a, Seni hming ka hmuh chuan ka hlauthawng ringawt nia!

Phone ka lak rualin ka nu chu a lut lehnghal a, kawngkhar pawh a pawt phui leh thlap a, Seni chuan "I va han la thei lo em em. Ka lo hrilh ang che i ti reng a min hrilh ngai mang si lo. Vawiin khan sawipui che ka tum a Rohlua a awm nileng bawk sia" a rawn ti lang lang a, a volume ka dah sang bawk si, a ţawng chu Zonuna pawh hian a hre pha hial maithei a ni.

"Ka ţhiannu nen dawr kan hawng ve tawp a, ka ti lo mai dawn mawnle" ka tih chuan "I hlau deuh em ni? Fimkhur chuan a hlauhawm hleinem. Ka rin zawng tak i nia, bakah pawisa i mamawh zia ka hre bawk a" a rawn ti a, henu hian ka chanchin a hre thui viau maithei. Ni lo se hetiang thil ti tur hian min sawm chawt ngam hauh lo ang. 

"Mamawh tho a, mahse ka ti ve lo mai ang" ka tih lai chuan ka bula ding pa chuan min en chik tawh khawp mai. 

"I chiang chiah maw? I inchhir ange aw" a ti a, min vau deuh niin ka hria.

"Inchhir lo ang..ka ngam lo alawm" ka ti hap a, min han thlem ngial a, kei lahin ka lo hnial fithla ţhak a, a tawpah phei chuan "I ţawng ţha ngam lo emai i bulah mi an awm aniang. Thawhţanah kan sawi dawn nia" a ti ta ringawt a.

Phone ka dah ruala "Eng nge a? Tunge lo bia che?" awki chang angreng taka a lo tih chuan ka kut pahnih ka phone chu nghet deuhin ka hum a, ka awm zawnah ka dah a, "Eng lo a nia" zawi te hian ka ti a, ngunthluk fe a min lo thlek te chuan "Eng lo a nia" ka ti leh ţhin a, ka aw chu a ri chhuak pawhin ka hre lo. Ka phone humna kutphah lah chu a thlan deuh dap tawh a, ka zam takzet a ni. 

"Eng nge in sawi awmzia kha?" rum zet hian a lo ti leh a, amah pawh ka en ngam tawh lo a chha chu a ni. 

"Kan dawr ep chiaha mi kha a nia, damdawi dawr a nei ve a" ka tih chuan "Eng nge tih tir che a tum?" a lo ti leh a, a awki pawh a la dam chuang lo. 

"Damdawi ruih theih chi kawl ve turin min tia, Rohluq hriat lohin" ka ti chiah chu a thaw hawk a, a reh zui vang vang mai. 

"Mahse ka duh lo a" keimah bawk chuan ti lehin a hmel en tumin ka dak deuh a, thinrim mitmeng sen rum hmuh ka inrin nen a mitmeng chu a thutak hle a, min en ran mai a, lungawi lo hmel a pu bawk. Thinrimin min hau nghal tun tun se la chu keipawh ka thinrim ve maithei a, tu hnenah mah ka la pe chhuak lo a, damdawi pawh ka kutah a la awm lo tiin ka insawithiam ang a, ka hnial pang pang maithei. Mahse tuna a landan hian min ti tim a, ka zah a ni. A lang zahawm khup mai. 

"Dan phal loh thilah ka inhnamhnawih dawn lo ti rawh. Thawhţanah hrilh chiang la, a sawm lui che a nih chuan min hrilh ang che" a ti hmak a, a aw chu a vin hauh lo mah se a nghey churh thung. 

"Ka lo hrilh ang" ka ti a, tim daiin ka melh leh ţhin a, a lung a la awi loin a thutak ngal mai a, kan boruak a inthlak lawk a ni ber. Ka thil lo tih ve ţhin te kha hria se engtin tak ngai ang maw. 

"Kal ila..Sangsangi i la lam kawi dawn chuan ka thlah ang che" ka ti ve tak nain a din ngaiin a ding reng a, kei lahin ka nawr lui ngam der lo. 

"Damdawi ruih theih zuar turin a rawn ti tawp che a?" a ti nawn leh a, ka lo bu nghat a, a hrehawm duh kher mai. 

"Engati nge chutianga a tih ngawt?" a lo ti zui zat a, midang tan chuan a mak reng a ni. Damdawi, lehkha tello a hralh thiang lo zuar ve duh tura min ngai ringawt hi Zonuna tan chuan thinrimna tham a tling tlat a ni. 

"Ka hre bik lo..ka rin zawng tak i ni a tia lawm" ka ti a, hnuai lam ka bih leh tlat tawh a, "Hnaih tawh hlek suh" a ti a, a la vin ta chuang lo nain zawm loh ngam chi a ni lo. 

A motor dahna lam pana kan kal te chu "An man che chuan jail i tang thei" tih thlengin min hrilh a, "Naupang hi rin aiin an fing a, Sangsangi pawh hian a en liam mai mai lo che" awmze nei zet hian a ti leh a, ngawi rengin a banah ka kuah a, a thinrim tawh lo a, a inthlahdul tawh tih ka hriat chuan ka awm pawh a nuam ve huai mai. 

Min ngenna angin motor chhungah chuan ka ţhu lut ve rih a, "Pathianni bak hunawl i nei ve mang si lo a" a tih chuan "Eng nge a?" ka lo ti thuai a, picnic tih vel a sawi kai dawn maw ka tih laiin "I nu ai lokal leh tawh mai rawh" a ti a, a sawi hreh ve deuh nge ni a ţawng zawi viau mai.

"Kan inhmu khat i tihna a ni maw?" ka tih chuan "Umm" tih chiahin min chhang a, seat hnung nghen pah hian ka thaw hluai a, hun kan nei lo dun lutuk hi chu a buaithlak ve khawp mai. 

"Naktukah lo leng la, ka rawn hruai ang che. Zawmpuii te nupa an rawn kal maithei a" min veh thlem ve deuh niin ka hria, kei lahin Zawmpuii hming ka hriat chuan a lam ka hawi thuai a, a nuihza insum hmel chu hmu thiam lo turah min ngai em lo ang chu. 

"Min fiam a ni maw?" ka tih chuan ka lam hawiin a ţhu rem ve a, "A lokal dawn alawm" nuihza aw zet hian a lo ti leh a, ani kha a ngaihawm riau mai. A fel lutuk kha rilru ah a cham zui ve a, kei aiin upa daih mah se kawm nuam tak chu a ni. 

"Mi in rel dun tawh em?" a tih chuan bangbo deuh hian "Eng nge awmzia?" ka lo ti ha a. 

"Tu emaw ber in rel tawh em?" a tih nawn leh chuan Kimkimi chanchin a sawi kha hrechhuak hian inthiam lo ru deuh chungin ka bu nghat a, "Ţhian in lo ni der tawh a nih chu. I lokal ve ang chu tiraw?" tiin min han sawm leh a, Zawmpuii nen a mi kan rel chu mak ti awm pawn a awm lo. 

"Mi kan rel chu mak i ti lo em ni a?" ka ti deuh hluai a, "A mak vak em ni?" ti a min zawt letin a nui liam mai a, tihngaihna vak ka hre bik lo chu ka nui ve ta ringawt a. 

"Ani pawhin i chanchin min zawt ve ţhin alawm" ka sam chul pah hian a ti a, a kut che chu ka bek zawnah a tawp a, ka bek a dawm paha a kutzungpuia ka biang a nul chuan ka lo nuih var var a, ka tana a hlut zia chu hria se a inchhuang ve viau ang.  

"Ka lokal ang" ka ti leh chiah phei chu a lungawi hmel takzet tawh. Hun ka nei mang ngai lo a, ka hun neih ve chhun hman dun pui te chu ka chak lutuk alawm.

Ka ţhutna lamah chuan lo kun hnaiin ka hmuiah a fawp zui a, a duhthaw viau nain ka tim dai thung a, helai hmunah hian tumah an lokal dawn lo tih hre mah ila khawlai leh lutuk a hetiang thil tih chu a nuam lo. 

A inla hrang hlek a, a duhtawk mai dawn maw ka tih laiin ka hriat phak tawk tur lek hian "Min fawp let ve rawh" a ti zawi sup a, uar zetin min fawp leh a, keipawh chuan ka lo chhang let ve thuai a. 

A in lak hran rual chuan keimah zawkin "Kal tawh rawh" ka lo ti a, ka nin vang a ni lo tih erawh a hrechiang khawp ang. 

Min chhan hmain a phone a ri hlauh a, a phawrh chhuah rual chuan ka lo en ve vat a, a nuih a za viau nghe nghe a ni. A nu nen chuan inbiain phone chu a dah leh thuai a, "Sangsangi chu a nu bulah a riak dawn a nih hmel. A pi ten ka nu an lo dil a, a hnial hreh lehpek a nih kha" a ti a, a ngaihdan a nih chiah loh hmel deuh.

"A nih chu" ka ti ban charh a, sawi theih ka nei ve lem lo. Ka fa a ni lo a, Zonuna lah ka pasal a la ni lo bawk a, tih theih ka neih ve lo. 

In ka thlen hnua Rintluangi nen kan inbiak pawhin "Pathlawi ngaihzawn hi tih mai mai a lo ni lo a nih hi, rin aiin a harsa daih" ka ti ta thlawt a, a rawn nui hak hak mai. 

"A chhungte nen in in hau deuh em ni?" a rawn ti teh daih a. 

"Ni lo e..i bulah chuan sawi ta mai mai ila, a nawm dan hi a buaithlak" ka ti a, ka sawithiam dan ber a ka hrilhfiah pawh chuan a nui uar uar reng a, tam tak tan chuan hriatthiam har deuh tur a ni. 

"Eng nge awmzia ni a?" a rawn ti a, a nui kur kur reng bawk. 

"Nei pawh ni ila a buaithlak tho ang. A ding lamah a fanu a awm a, a vei lamah kei ka awm a, hnung lamah a nupui hlui a awm laiin a hma lamah a chhungte an awm a, venthawn tur an tam mai bakah a fanu chungchang min han hrilh ve te hian engmah ka sawi ve ngam ngai lo a, lo sawi ve ta ila an huat zawng deuh sawichhuah palh ka hlau bawk si. Min nei duh em? te a ti teh fo a, lo nei ta pawh ni ila Sangsangi hi chu a pi leh puten an duat a, naupang na na na chu hauh a ngaih chang a awm lo thei lo a, khatiangah khan lo hau ve ta ila an lo huat pui daih thei a, ngaihtuah tur a tam ka ti. Zonuna hi ka duh a, a bula awm pawh nuam ka ti, chutih rual chuan a buaithlak" ka ti a, ka sawichhuak vek thiam lo zawk. 

"Buaithlak chang chu a awm dawn lutuk. Kimkimi a lo tel ve phei chuan a hrehawm ngawt ang ka lo ti ţhin a, innei leh a ţha ti tawk an awm phei chuan i tan a nuam lo ve dawn a, Sangsangi pawh ngaihsak dan chin tawk hriat a ngai viau ang. Fa nei lo se chu thuhran a nia, fa an neih tawh phei chuan rilru chu a buai ve duh ngawt ang. A lakah ţhat han chhuah vak ta la inlak fel tum tih vela sawi tawk che an awm ang a, i biak vak loh leh a ngaihsak lo an ti leh bawk si ang a, tunlai i nun hi chu hei ha hui ha a ni ringawt. A la ni dawn chauh lehnghal. Mahse, mi pawn pathlawi fa nei tawh te chu an nei ve fo alawm. A tirah chuan thil engkim a harsa a, a zia chho ve zel. Nangpawn tih dan i hre ve zel mai ang" a ti a, dawr kan sawi kai leh a. 

"Bungrua a tam loh chuan inhralh vak a har rih a, Rohlua tih dan kha ţha ka ti. Tuna i ban nghal chuan in khawsak a buai dawn a, dawr ah hian kei ka awm ang a, nang chu i thawhna ngaiah khan la thawk rih la, dawr bungraw ţhenkhat hi a kawtah khan i pho chhuak ang a, a hmun a rem tho a, mi an tam lo a nih pawhin hralh chin chu i nei tho ang. Vawilehkhatah a hlawk nghal vak theih loh a, zawi zawi a hma kan sawn theih chuan a ţha a ni mai" a ti a, ka rilru a awm, ka sawi chhuah ngam loh a ni.

"I nuten mak min ti angem le? Pawisa ka thawh ve lo pawh inthlahrun tawh nak laiin hna aţanga bang lo zawkah ka ţang leh bawk sia, phakar min tih te a hlauhawm" ka tih chuan "Kei ai mahin an hrethiam zawk ang che. Kha lam kha chu lungkham vak lo la, in a ka kawl ho hi Zonuna nen lo lam ula, dawr kawtah chuan dah ve mai mai la" a ti a, ka zawrh tur lehzel inpek tir ai chuan tiin "Aw..naktuk tlaiah kan lo lam ang" ka ti ve ta nge nge a.

Inkhawm banah min lo hruai a, an in kan thleng chu Nu Hmangaihi chuan min lo lawm thiam lehpek khawp mai. Ani hi zawng, nu fel tak a ni ve chiang a ni. 

"Cake chu in lo lei haw ang tiraw? Mami bakah Zawmpuii te kha lokal an tum a?" a lo tih chuan kan lei thu Zonunan a lo hrilh a, "Thingpui ka chhuang mek a, kan in dawn nia. Inkhawm bana thingpui hang in hi tih ţhanah kan nei a" a ti siam siam a, Sangsangi awm lo chu a reh ve ruih mai. 

"Lo va ţhu rawh ka lo siam ang" ka tih chuan min hnial lem lo a, an choka ah hian ka che ngun tawh a, ka bel ve tawh khawp mai. 

Choka a ka lut chu Zonunan min zui lut a, a phone chu dawhkanah dahin tu emaw a call a, speaker a on nghal zat a, gas bula din pahin chaw ei dawhkan kila a ţhu chu ka melh ru zeuh zeuh a, a ring ral ţhal a, a call nawn leh nghal a. 

"Rawn ti nawn tlut tlut suh ka insiam mek" Kimkimin a rawn ti vin hlar a, a aw ka hriat rualin Zonuna chu ka en ve vat bawk. 

"Lo dah vat rawh" a ti a, phone chu a off zui nghal a, ka hriat a pawi ti miah lo chu mak ka ti angreng a, engahmah min ngai lo nge a ngaih a sam ve hrim hrim hriat hran a har khawp mai. 

Thingpui ka siam zawh rualin Zawmpuii te an lo thleng a, min hmu chu a lawm ve khawp chuan ka hria. 

"Thingpui hang in duh ve em?" ka lo tih chuan "Nakinah chhang nen law law a ni mai" a ti a, Zonuna pa hmu turin a kal nghal a. U Mami a lo thlen phei chuan a ri nghal chel chul a, vanneihthlak deuhin choka ah a awm rei lo hlauh. 

Chaw ei dawhkan kila thil ho mai mai kan lo sawi laiin Kimkimi te nufa an lo thleng a, Sangsangin a pa a bawh nghal thuak thuak a, Kimkimi erawh chu min enin a nui sak a, a ngainatawm hlawl loh a ni. 

"Remruat, lokal lawk teh" Zawmpuiin a rawn ti hlauh chu ka lawm ngei mai. Ka tho nghal tharh a, choka aţanga ka chhuah rual chuan ka darah min lo kuahin "Pangpar an nei nalh a sin. Ka enkual pui ang che" midang hriat tur chuan a ti lang lang a, inchung zawl kan thlen veleh "Kimkimi a lo tel ve dawn tih chu hria ila ka lokal miah lo ang" a ti thung. 

"I haw viau a ni maw?" ka lo tih chuan "A mizia hi ka ngei zawng tak a ni. Zonuna nu leh pate hi a be thiam sia, khawiah pawh a tla tlum vek a, hmanni ah pawh khan i hmuh ve vek kha, tupawn an duhsak vek a, lem a chang thiam leh lutuk hian min ti thinrim ţhin" a ti hlawih hlawih a, a ngei hmel viau tak tak mai.

"Nizanah Sangsangi a riah pui a, a lo dah zawk alawm" ka tih chuan "Ka hria alawm. A ţawngkam leh lemchan thiamna bawk a hmang ţangkai leh tawh aniang chu. Remruat, Zonuna nen a an la inbe reng te hi i ngaimawh miah lo em ni?" ti a min zawhna chu chhan ngaihna ka hre vak lo.

"A ţulah lo chuan an inbe chuang lo a" ka ti zawi sep a, "I hre lo mai mai a nih kha. An inbe reng alawm. Fa an nei tawh a inbe loin a awm theih tak tak loh. Bakah nupa a insiam khawp hial a inhmangaih te chu ngaihtuah chiang ve la, an inhmangaihna hi thawklehkhata lak bo tawp theih a ni hleinem. Kimkimi nu leh pate hian an hrechiang ang, Zonuna hian an fanu a hmangaih zia an sawi chamchi zel alawm. Hmanni ah pawh ka hrilh tawh che kha, i hmel a ţha a, pathlawi lo deuh neih tum rawh" a ti charh charh a, ka ţhatna tur a duh ve si a, Kimkimi a sawichhiat phah hrep zel. 

"Thil ţulah bak an inbe ngai lo tak tak alawm. Inbe lo a awm reng theih a ni bik lo a, U Zawmpui, Zonuna hi ka hrechiang a, dik lo deuhin thil a ti lo ang" ka ti a, ka rilru diktak ka sawi bawk.

"Ani te chu a fel alawm, a fel vang hi a nia Kimkimi pawhin a zuam em em ni. Mahse, be ţha lo se chu a nupui hlui hi hetiang em em hian an inchhungah a in luling ngam lovang. Zonunan mitmei a la hmuh a, chuvang chu alawm a inthiarfihlim duh miah loh. Hmanni a i nu haw hnak hnak ka hmuh te khan ka khawngaih lutuk a, choka te chu a inping dang daih zel sia, midang hriat loh hian a ţawngkhum nasa thei dawn lutuk a, i nu lahin i rilru nat hlauin a zep char char awm sia, ka khawngaih hluah hluah mai a ni" a ti a, thil ni thei tho a ni. U Zawmpuiin a sawi takah chuan ka nu ka ngaihtuah thar a, he inah hian Kimkimi pawh a kal fo a, an lo inţawngkhum nasa ţhin viau maithei a ni. 

"Amah aia upa a zah ve tawh lo a, keipawh min ţawngkhum nasa ţhin alawm. Fa ka nei thei lo te hi uan nan tak a hmang a" a tih chuan phawk hra hian "Fa i nei thei lo maw?" ka lo ti a, lu a buk nghat ah chuan "Hmanni a i buaipui deuh te kha i fate emaw ka tia" ka ti leh a, an pa u fate an nih thu min lo hrilh a, ka khawngaih reuh khawp mai. 

"A zia lo hle mai. Min duhsak ţhin a ka lawm lutuk. Vawiin pawh lokal ve dawn lo la chu ka kal bik miah lo ang. Ka hmu leh chak che a" ka ti a, a nui ve var var mai.

"Nang deuh i ngaihawm ţhin. Kan pa hnenah pawh kan naupangber ai pawhin a naupang a, ka kawmngeih hle tho sia ka tia, i hming ka lam fo alawm" a lo ti ve a, Zonuna leh Kimkimi bawk chu a sawi kai leh a, "An la inbia a nia. Hria angin awm suh. A rukin ka hrilh che a nih hi aw. Zonuna hian a duh lutuk che a, hmanni a in lo inzui luh aţang khan ka hria, a endan che kha a danglam bik a, hmuh hmaih theih a ni lo. Amaherawhchu, Kimkimi hi a thlah thei tak tak lo aniang nilai zan pawh khan Kimkimi te inah a riak" a tih chuan min deng na kher mai. Ka nghing deuh lawih ni hian ka hre ber. 

"A riak maw?" ka ti nawn leh ngat a, ka bing chuk chuk ni mai hian ka hria.

"Aw..Kimkimi piancham a nia, kan pa pawh a kal ve alawm. Zu kan in a, Zonuna a rui deuh a ka lo haw san, riak mai rawh se a tia. I phone number chu nei ila ka rawn hrilh nghal ang che. Mahse zawt miah suh aw..ka tan a pawi thei a nia, an mo ve tho ka nih hi" ka kut a vuan chung meuh hian ngenngawl takin a ti a, mu leh mal ka nei thei meuh lo. 

"Hrilh tur che ka ngah lutuk vang a nia inchungah ka hruai chhoh che. Nilaini zanah chuan Zonuna nen in inbe hrim hrim em?" ti a min zawh chuan lu thin ne ne pahin "Ka nu a chau deuh a ka pa ka awmpui a tia. Thawm a siam chi vak loh a ti bawk a" ka ti a, a chhuanlam lek chu lo niin. 

"Ka rin tehreng nen" ka ti leh sap a, U Zawmpuii chuan min khawngaih hmel kher mai. 

"Ka lo hrilh kher kher che a ni. Chaw kan eikhawm ni khan an chhungte nasat zia chu i hmu ve vek tawh a, min sawi chhuah sak suh aw, a nih loh chuan kan pa thlengin ka chungah a thinrim a, fa ka neih loh vanga min en hrang pawh tih tawh nak laiin an tawrhhlelhawm lutuk ang" a ti mawlh mawlh reng a, "Ka hrilh lo ang" ka ti ve tak nain Zonuna bik chu ka zawt khawp ang. 

"Khawi phone number inpe ang. I u angin min en la, kan inbe ţhin dawn nia. Keipawhin chanchin ka hriat theih apiang ka lo hrilh ţhin ang che. Ţawngka a sawi chauh chu awih a harsa ţhin a, thlalak ka neih theih phei chuan ka lo thawn tel ziah ang che" a ti a, phone number te chu kan inpe a, a thusawiin min ţhawn lutuk vanga ka tha khur deuh pawh a hmu chiang ta viau e. 

"A nupui hlui a la duhna a ti langsar kher dawn lo a nia. Kan hriat lai pawn an inbau bawng bawng zel a, an in vin vak vak zel. Kan hriat lohah pawh a ni tho ang. Mahse, an thinlung hi a inzawm ka ti mai, an inhmangaih tlat tho" a ti a, kan chhuk lamah te chuan "In thunun hram hram rawh aw. Kan pa te awmna lamah ka phei san nghal dawn che a, choka a i luh leh hunah pawh hriatthiam theih turin awm miah suh. Hre lo ang hmakin awm la, engkimah fimkhur a ngai a, a rukin kan pahnihin kan chik dawn nia" a ti sar sar a, awm lo se chu hrehawm ka ti ngawt ang. 

U Zawmpuiin min kalsan hnu a choka a luh mai ka tum chu ka thawm hriat chuan min ti ding chawt a, ka hawi kual nghal a, tumah an awm hnai lo tih ka hmuh chuan bang nghengin ka ding a, "I sual lutuk hi ka rap zawk che. I fanu aipawn hmeichhia i duh zawk a, ka hnenah i la dah phal lo khanglang zui. Thinrim ngai lo ang mai hian i awm a, i rilru a chhe ropui si" Kimkimin a ti hlak hlak chu Zonuna nui hawk thawmin a nui a, an lo inhnial leh tawh a ni phawt ang. 

"Ţawng ţawng lo khan kal vat rawh..i bialpa in a lo nghak tawh ang che" ngaihnep hmel fahran a Zonunan a tih chuan "I thik deuh em ni a? Hmeichhe lawm viau si hi mipa ka hnaih ve hlekin i thik tho zel si" a lo ti a, ngaihthlak reng chi a ni pawn ka hre lo, chuti chung chuan ka din ngaiin ka la ding reng tho a, nupa maksak tak chu an ni. 

"Min ngai hniam viau lo teh. Kha mihring kha ka thik lul lo ve" tham lo zet hian a ti leh a, U Zawmpuii nen a kan thusawi leh tuna an awmdan hi a inmil viau mai. Eng emaw chu an inkarah hian a la awm chiang a ni. 

Midang thawm ka hriat chuan pawnah ka tlanchhuak ta ringawt a, ka ding vang vang a, ka inngaihtuah harh hnuah ka lut veleh chauh a, choka a awm ho chuan min lo en ţhap mai.

"Khaw nge i kal daih?" U Mamin a lo tih chuan "U Zawmpuii nen inchunga pangpar kan han en a, a nalh hlawm em a pawna mi pawh ka en leh a" ka ti nawi niaih a, midang aia min chik bik tu a awm tih ka hre ru ran a, ka awmdan dik lo pawh a lo hmu thiam leh vek ang. Pathlawi lung fing tawh tih takah a hre leh dawn chiang sa. 

"Hawn vek rawh..an enkawl peih tak tak lo. Midang pek an ui ve em em a, ka pa dam loh hnu phei chuan tui takngial pawh an pe ngai lo ang" U Mami bawk chuan a ti leh a, mahse hmun kan neih loh thu ka hrilh a, Nu Hmangaihi pawhin "Nitin Remruati nu a lokal a, a enkawl peih lutuk alawm" a lo ti ve vat a. 

"Zawmpuii pawh thau tut tut mai loh chu beisei tur dang a la awm chuang lo a ni maw?" fiamthu ti tak deuh a Kimkimin a tih chuan ka lo ip chawi thei. Midang pawhin mak an ti ve deuh chuan ka hria.

"A nih ber hi" U Zawmpuii chuan a ti hlak a, "In in entir ve fo a, doctor lahin dik lohna in nei lo ve ve a ti bawk sia, nupui pasal hran ve ve nei ula eng nge in an ang le?" a tih chuan Nu Hmangaihin "Kimi, rilru a awm apiang an sawi phawng phawng ngai lo. In upa ve tawh a, in ngamtlak viau mah ula khati zawng khan infiam suh u. Naupang ang maiin lawm i khawsak le..ţawngkam hi fimkhur tur" tiin a lo khap a, Kimkimi lahin "Ka ngamtlak vang alawm. Mi hran daih nise khatiangin ka fiam ngam nang" a ti ve tlat a, boruak a rit khawp mai.

"Lokal fo lo la a ţha ang. Eng thil ţha mah i rawn keng ngai lo. Vawiin hi a tawpna ni rawh se" Zonunan a tih chuan kan ngawi ţhap a, Kimkimi chuan rin lawk ang ngeiin a hnial lehpek a, a chhang tawh lo thung. 

Kan haw lamah chuan pawn lam ka hawi tlat a, "Lungawi lohna i nei em?" a ti leh ţhin a, ka neih loh thuin ka chhang mai zel a, Rintluangi te inah chuan ka kal ngei a, Zonuna luh ve ka phal lo a, keimah a lutin thawmhnaw te chu kan thliar a, "Remruat, keichu ka rin ai daihin thawmhnaw hi hralh a har. Ka phur ve tehreng nen ka hnual ţan der a nia. Hawh, U Marti dawr ang hian ti ve daih ang. Eitur vel hi zuar ve ila kan inhralh reng anga a nuam zawk ang" a ti bai bai a, ka ţhiannu ber a hnual nghal daih mai chu kan nguai rawih thei mai lawm.

"Kan thawmhnaw neih sa ho hi engtin nge kan tih ang a?" ka tih chuan "Kan zuar tho ang. Eitur kan zuar lo a nih pawhin 100 dawr tal ti ang. Hetiang ho hi chu an rawn en a, lei lo bawkin an chhuak leh a, ka peih tawh lo" a ti mauh mai a, han nawr luih chi lah a ni der mai bawk si lo, buaithlak ve tak chu a ni. 

"Kuhva zuar ru ka ti ka tia lawm" U Rinkimi lah chuan a lo ti ve sek a, "Rintluangi te chu rilru hmanhmawh chi a nia, hralh zung zung theih loh chu a zawrh peih ka ring lo reng a ni" a tih zawm zat a, kan ţhiandun chuan kan in en a, Rintluangi phei chu a thle ngawih a, khua a var lo khawp mai. 

"Aw kan neih sa hi ti ral phawt ila zawrh tur dang kan ngaihtuah mai dawn nia" ka ti ta ringawt a, a phur ve em em a min ti hnual ve zo vek. 

Zonuna hnen a thil awmdan ka sawi lai chuan a lo nui suk suk a, ka sawi zo chiah chu, "Chuan eng nge in zawrh ang a?" a lo ti a, chhan ngaihna pawh ka hre lo. Dawr nghak tu ber a beidawng tawh bawk si a, han tih ve vak ngaihna pawh ka hre lo. 

Kan in lam pana kan tlan lai chuan "Dik lo a awm tiraw?" a ti leh tawh a, zawt chak viau mah ila U Zawmpuiin a tawrh hlauin "Awm lo e" ka ti leh mai a, ka nui lui sang bawk.

"I dik miah lo" a ti leh sup a, chutah chiah chuan chhanna mumal ka pek hma chu a beidawng dawn lo tih hriain "U Zawmpuii hi khawi lam mi nge?" ka ti ta ringawt a. 

"Aizawl a piang leh seilian ka ni chu a tia, engatinge? I hmuh hnu a ang em ni?" tiin min lo zawt let a, "Ang nang aw" ka ti a, kan ngawi dun leh rauh rauh a. 

A thusawi khan min kap run a, tih dan tur chi hrang hrang ka ngaihtuah kual a, min hrilh dan ang chiah a ka sawi chhawn a, Zonuna ka zawt a nih chuan U Zawmpuiin a tuar dawn a, duhsak a min hrilh a nih phei chuan min duhsaktu ka chan a ni ringawt dawn a, a thusawi sawi chhawng leh si lo a tih dan ngaihtuah a ngai. 

A pawimawh ber chu a sawi ang khan Zonuna hi a lo awm reng em tih a ni. Kan inhriatna a rei ve tawh a, vawikhat pawh zu rim a la nam ngai lo. A thu min hrilh kha ka bengah a ri nawn tlut tlut a, a tawp a tawpah chuan rin tur zawk ka hriat theih nan "U Zawmpuii hi eng ang mizia nge? Mi rintlak a ni em?" tiin ka zawt ta nge nge a. 

CONT..