DEAR DIARY-24

DEAR DIARY-24

"Zawmpuii te chu fel i ti viau a ni lawm ni?" a ti a, mak a tih hmel ve deuh. 

"Aw..a fel alawm. Mahse mihring chu landan ang ngawt kan ni ngai lo a, kan landan tawp leh ţawngkam ţha phenah hian thil tam tak a awm ţhin. Ka u boral hnu khan zirchhuah ka ngah alawm. U Zawmpuii pawh a fel chu ka ti lutuk a, chutih rual chuan a mizia hriat loh lai ka ngah tho a, in chhungkaw mo a nihna a rei tawh phei chuan i hrechiang viau ang a, tlang deuhin min lo hrilh teh" ka ti deuh duah a, min en phawk tawh lutuk chu ka nuih te lam lam a za, mah se chhuna ka thu hriat zawng zawng te kha ka la theihnghilh bik lo a, fiamthu ka thawh chak hlawl lo a ni. 

"Zawmpuii chu a fel a" ban charh hian a ti leh a, ngaihtuah ve ni awm tak hian a kutţang pahnihin a hmui chu a tuai rauh rauh a, min rawn en leh ţhin a, sawi tur a hre hlawl lo chu mak ka ti zawk. 

"Nilaini zan khan piancham lawm naah i kal em?" ka tih chuan "Keimah maw?" a ti deuh ha a, a bangbo khawp mai.

"Ni e..nangmah kha" ka ti hlak a, a landanah danglam a awm em tih hriat tumin ka en ran mai bawk a, mak ti hmel a pu tih mai loh chu han danglam em em a awm lo. 

"Sangsangi leh ka pa an damlo a, piancham lawm na a kal mai mai hman ka ni hleinem" a tih chuan keimah zawkin sawi tur ka vân leh ang lawi a, U Zawmpuiin a tawrh hlau a a thusawi zawng zawng sawichhuak ngam bawk si lo leh thudik hre chak tho bawk si inkarah ka awm a, a hrehawm letling zawk khawp mai. 

Kan ngawih dun rauh rauh hnuah "Zawmpuiin sawi a nei em ni?" a ti a, a vin hran lo, thil mak deuh deuh ka sawipui a, a chiai lo lutuk te chu mak ka ti zawk. 

"Nei lo e" ka tih lai chuan tawi tein min lo nuih a, boruak reh lutuk chuan ngaih a ti ţha lo lek lek a ni. 

"Ka lo bia ang" a tih takah chuan keimah zawk ka buai leh a, "Tumaw biak i tum?" ka ti hluai a ani lahin awlsam deuh hian "Zawmpuii" a lo ti then a, a ţullo nasa ang.

"Biak kher a ngai hleinem. Eng mizia nge ka tia ka zawt mai che alawm" ka ti chul tawh a, min duh tak tak lo ti a tlanchhiat daih a chakawm rum rum mai. 

"I danglamna ka hmuh hmaih ngai lo" a ti deuh hmak a, min chik leh lutuk pawh hi a buaithlak chang a tam. 

"Ka danglam hleinem...tikhan min puh ringawt suh aw" ka ti ve kha kha a, a ngaihpawimawh loh hmel nasa ve. 

"Zawmpuii i zui hnu khan i danglam. Tleirawl inngaihzawn ang lek chu ka hman ve lo ka tih tawh kha. Ka lo sawipui ang" a ti a, rilru a buai nasa tawh. Han zawt tawp ta se Zawmpuii chuan ţawngthei min ti viau ang a, mahse Zonunan zu a in a tih aţang kha chuan mak tak maiin a thusawi kha awih loh nachin ka nei tlat a, awih chin a awm lo thei chuang bawk si lo, chutiang vel nuaih chu ka ni. 

"Sawi pui kher a ngai lovang" ka tih tak nghatah chuan "I hlau em ni?" a lo ti a, a awki chu a ngeiawm lek lek a ni. 

"Hlauh ka nei lo mah se U Zawmpuii engmah sawipui a ngai lo" ka tih veleh "A nih chuan engin nge ti danglam che sawi la" a lo ti ve khauh a, ka ngawi zui dâk a, ka danglamna ka lantir nasa deuh a nih hmel e. 

"Ka kal tawh dawn" tih paha kawngkhar hawn mai ka tum chu ka thei hauh lo. Lungawi lo deuh a a lam ka hawi chuan a lo kiai suk a, "Lock hi hawng rawh" ka ti ram hmak a, "Min fawp phawt la" a ti vel a, ka thinrimna hi fiamthuah lek a ngai ni berin ka hria.

"Zonunmawi" ka tih chuan "Eng nge Lalremruat?" a lo ti ve vat a, a hmel a nuihzatna langchhuak chu ka hmuh hmaih lo kher mai. 

"Ka chhuk tawh dawn...uang reng lo teh, ka nuten min lo ngaihtuah anga sin" ka ti vin hlar tawh a, mahni lo maha rilru buai sa ve nak laiin a ngaipawimawh lo lutuk hi ka ngei riau.

"Lungawi lohna i nei em?" a ti nawn leh a, a mitmeng chu a thutak leh tawhin min ngaihven tak tak pawh a ang ta deuh. 

"Nei lo ka tih tawh kha. Hriatchian duh ka nei a, ka zawt reng bawk che a, ka hriatchian tawh chuan a tawk mai alawm" mumallo zet a ka tih bawrh bawrh hnuah zawi te tak tak hian "Zu i in ngai em?" ka ti leh a, a nuih a za viau mai. 

"In ngai lo" zawi te hian a lo ti ve a, a aw hi thum lo se chu ka aw rik dan nen pawh a inang viau ang, ka tihdan a zir tihna a ni mai. A la nui vur vur zui. 

"I thutak thei miah lo hi a mak ve thlawt a ni" ka ti hluai ringawt a, tihngaihna tak pawh ka hre bik tawh lo. 

"Zawmpuii nen a in inkawm hi a ţha dawn lo in ka hre tlat tawh. Thil ka hriatchian hma chu lo be tawh suh" a ti a, a fing sia, a rukin be mah ila a hre leh tho ang. 

"Ka be lo ang" ka ti a, biak loh ka tum tak tak bawk a, dawt min lo hrilh a nih ngat chuan kei tak pawh hian ka ngei viau ang. U Tluangtea a awm alawm, a rukin ka hriat duh zawng zawng ka zawt vek mai ang. 

Lock chu a hawng ta nge nge a, hnunglam seat a ka zawrh tur dah ho chu ka ban a, Rintluangi rilru danglam ta daih chu ka phun pui mawlh mawlh reng bawk a, "In rilru a ngheh chat loh chuan in hlawhtling har ang" lo ti vein ken awlsam turin min siam fel pui a, "Min dawr ve la, ka hawn ho hi en ve hrim hrim la, pakhat tal hi lei ve rawh" ka tih chuan a nui chhuak ta hawk a, inhauh zawh hnua thawmhnaw inzawrh leh chu a awm ang lo ve em a ni. 

"Thawmhnaw ka lei thiam vak lo" a tih lai chuan "Ka thlanpui dawn che alawm. Hawh..kan inah lo kawi zawk mai rawh" ka ti leh tawh a, mipa tshirt a awm ve a, U Rinkimi pawhin "In pa zawrh rawh" a lo tih zeuh tak kha. 

"A va mak ţhin e aw" a ti ve tak nain motor aţang chuan a chhuak ve hnu hnu tho a, ka ken ngai loin min la kensak vek zui. 

Kan pahnih a kan lut hlawl chu ka nu'n mak min lo tih hmel khawp mai, phawk hra a min en chung hian "Kha, Zonun, i va bawr ve" a lo ti a, a thil ken lai chu ţhutthlengah a dah hnuk a, ka nu'n a lo en vat a. 

"Mate, hei in zawrh lai em ni ni hlawm a?" ti a min zawh chuan "A nih kha. Rohluan dawr kawtah te dah ve rawh a tia, Rintluangin in lama a kawl ho ka la kawi a nih hi. Thawmhnaw chu a hralh theih vak lo a tia a hnual ringawt lehnghal a, ei zawh nghal zel theih zawrh a duh leh tawh zawk a nih kha" ka ti a, a nuih lah chu a za em em a. 

"Rintluangi ţhin hi a, thawmhnaw te chu a zo duak duak ngai hleinem. Mi pawn an hralh theih loh ho an sale leh ţhin a nia, beidawng nghal mah ta che u" a ti a, Zonuna hak tur awm deuh tshirt chu ka zawng kual a, a dum leh var a lo awm a, a hma lam a inang lo a, a pahnih chuan a malchungah theh pheiin "Khamite pahnih kha a lian ber a nia, i ha tawk ang. Duh leh pindanah va ha chhin la, a pahnih khan lei daih rawh, a nalh dun si, a inang chuang lo bawk a" ka tih chuan ka nu nen an in nuih vur vur a, ka nu phei chuan a mal malin a en diat diat a, a fak zel bawk a, a ta tur vek a ka lei ni zawk se ţha tur. 

"I la hlawhtling dawn a nih kha" ti a min fiam pahin choka lamah a phei a, pawnah chhuak lehin bualin ah a lut a, a va in ha chhin dawn a nih hmel.

A dum zawk a hak hnuah a rawn chhuak a, ka nu nen kan lo en dik a, ka nu'n "I lian em a, a hnung hi a kang deuh lo maw" a tih laiin keiin "A dik thlap..i inhmeh lutuk, lei ngei ngei rawh" ka lo ti thung a, darthlalang awm hek lo, hnunglam chu a thlek vut a, tshirt hmawr lam a pawh leh hnuah "Ka la mai ang" a ti ta nge nge a, ka nu'n a sawisel tak nain a dik lohna ka hre ve hran lo. A var pawh chu ha chhin lem lo in a pahnih chuan min dawr a, "Nang aiin U Tluangtea a te deuh hlek a, ani pawh ka zawrh ve ang" ka ti a, ka lei luih tir pawh nise ka inhralh hrim hrim chuan rilru a ti nuam suai suai mai. 

A haw tur chu motor thleng ka thlah a, lawmthu te ka hrilh ve luam a, inhnial zo chiah pawh kan ang leh tawh lo. A dawhthei sawt lutuk hi mak ka ti ve hial zawk a, ka hmuh hlima ka ngaihdan kha chu tun thlengin a hnenah takngial pawh hian ka la sawichhuak lo. 

"Keini ang chu miin min sawi neuh neuh reng a, mahse dawt ka la hrilh ngai lo che. Ka sawi a nih loh chuan tu thusawi mah awih suh" thutak deuh hian a ti a, motor ngheng a ka din at laiin ani chuan ka biang a nul hauh hauh a, a sawi zingah hian U Tluangtea chu a tel ve lo sa ang. 

"U Zawmpuii pawh maw?" ti a ka lo zawh chuan "Ni e, Zawmpuii pawh a tel. Ka sawiphak chu a awm hauh lo nain kawm tawh lo mahla a pawi lo" dam thluam hian a ti a, mak tak maiin ka lo hnial bik lo. 

"Ka duh che a, chu chu hrereng rawh. Dawt a ni lo a, ka nei duh loh tur chhai kual mai mai hman ka ni lo bawk" a tih leh chuan tawitein ka nui a, "Min duh hma daih khan ka duh tawh che" ka tih chuan a lungawi ve viau ang. 

Lo kun hniamin ka hmuiah chuan duhthaw deuhin min fawp a, khawlaia awm mah ni ila a thim china kan awm miau avangin keipawhin ka lo fawp let ve vat a, ka rinhlelhna zawng zawng te kha engtik laiin nge an bo zawh pawh ka hre lo. Amah hi ka ring tawk em a, chuvang te chu a nih ka ring. Muang ruihin min fawhna chu a tawp a, ka hmui huh hliam mai chu ka liak zauh a, ani chang ni lo in keipawh ka lungawi khawp mai. 

Min haw san hnu chuan keimahin ka phei hnak hnak a, tum loh deuh a Zothani nen kan inhmu chu remchangah lain "Thawmhnaw ka zuar a sin" ka ti a, a lo phur khawp mai. 

Min kai a, kan in lamah amah zawk chuan min pawt thla dawt dawt a, ka nu pawn a lo lawm viau mai. Zothani tak hi chu a sual loh bakah Nu Rintei te pawn in luahman an ti hniam leh tawh a, a lung a awi tawhah ka ngai. Amah tak phei chu be ngai lo mah ila Zualtea a inrawlh ka ring tlat a, a nute a rawn vau leh tawh a ni maithei, a enga pawh chu nise kan tan chuan a lawmawm hrim hrim.

Ka nu lah pek chuan "Zothan, i u a dam em?" a ti kher a, a sawi chak zawng tak a ni aniang chu "Aw dam e...nichinah pawh ka nu'n a hau a, vainu nen a an thlalak a hmufuh a, a khak zek a nih kha. Thunun an tum leh lutuk hi dik lo ka tia, mipa fa phei chu a dan a dang a, a duh loh chin a thlen hunah an la inchhir ang tih a hlauhawm" a ti zung zung a, ka pa a awm chuang lo bawk a pindan pawh pan lovin a kawr a hlip a, a nalh tih zawng deuh chu a ha kual dan dan a, zawrh peih chuan vengchhung ah pawh ka hralh theih dawn khawp hi. 

Zingah Rohlua ka lo nghak leh a, bawr deuh a min hmuh chuan a nuih a za viau mai. 

"I inhmeh kha" min ti a, dawr kan thlen hnuah dawr kawtah min pho pui a, a hnuaia phah tur thlengin a lo ngaihtuah thlap a, zak zum viau e ti lo chuan mipa hian min kawmngeih thei viau a, nilengin dawrah awm dun mah ila Rohlua pawh hian zana min lo biak zuk zuk a hrat lutuk ringawt.

Chhunah keimah chauhin ka awm a, rilru la peng thei tih tur ka zawng kual reng a, ţhian ka kawm ve tak hnu hian mak deuh maiin khawhar te ka hre ve tawh a, ka inthlak danglam nasa khawp mai. 

Zawmpuiin min lo call chuan Zonunan be suh a tih kha hrereng mah ila biak dan tawk ka thiam mai ang ka ti rilru a, khawhar lai a ni bawk nen, ka chhang ta tho a.

"I va han ţawngthei em em ve. Duhsakin thuruk ka hrilh ve che a, Zonuna te chu a fing a a pha mar vek ang ka tih kha. Anni ang chuan zu pawh langsar deuhin an in duh reng reng hleinem. Ka lo ring sual hle mai che" a rawn ti piap piap mai. 

"Eng nge awmzia ni a?" ka tih chuan "I hriat khawp kha. Khatin pawisawi lo angin awm der vek suh. Diktak chuan hmanni a chaw kan eikhawm pawh khan tuman an lawm lo che. I lokal hma aţang khan lokal suh se an ti tawh a, Zonuna pawh ka nutei te hoin phone in an hrilh lawk vek, i lokal tho a, ka khawngaih che u avangin i nu nen a in chungah ţhat ka chhuah ve hram hram a, i nu pawh awm pui a nia, awm lo ila chu kan chaw eina tifai turin a tawp thlenga a awm a ngai ang chu" a rawn ti hlawih hlawih a, a duhamin a nasa kher mai. A mizia ka hriat duh em em ka hriat phah ta chiah bawk. 

"Engmah ka sawi hleinem. I tan a pawi theih ringin min zawh pawn ka sawi lo a, piancham lawm naah i kal em ka ti ringawt alawm" ti a ka lo insawithiam ve te chuan "Chutianga tih pawh chu a ngai hleinem. A hriatthiam theih nghal vek alawm. Kei bak kawm duh tu i nei lo a, keimah min ring nghal vek ang chu. Thuruk hrilh chi i ni dawn lo riau mai, rin aiin i lo ţawngthei daih" a ti a, ţawngkam a duh tui loin min nghawr dawt dawt thei thil a sawi ţeuh tawh. Ka nu a hmuhsit zia pawh a hriat a, ţhat a lo chhuah der mai mai a ni. 

"Ka thiam loh a nih chu" harsa ti tak chung hian ka ti a, min rawn tih dan bawl bawl chu pawm dam a harin ka tha te a khur a, damdawi lei tum a lokal pawh chuan min en vang vang hnuah "I ţha em?" min ti a, buk zeuh pahin a duh ka zawt a, ka kut lehlama phone keng reng chung chuan ka laksak a, dawr tu ka nei tih hriain Zawmpuii pawh a ngawi ve rih a, kei erawh ka che buai khawp mai. A thu chhak chhuak engkim mai khan ka thauah min man ni berin ka hria. 

Pawisa ka kir dawn lai chuan ka banrekah lo hmerin "Mami, i ţha em? I khua a sik em ni?" a ti a, a kut awl lamin ka pang a rawn dek nghal zat a, nu upa lam tawh a ni a, min ngaihtuah hmel khawp mai. 

"Ka ţha alawm" ka ti a, nui lui pahin pawisa chu ka pe a, "I pang chu a sa lo a, vawt i tih viau tak leh damdawi i ei dawn nia. Khilai lawk khi kan in a nia, puan lum pawh hawh tur a awm ang" tiin an in te chu min han kawhhmuh leh rih a, ka beng leh phone ka la chuk tuah miau avangin nin hmel taka Zawmpuii thaw halh chu ka hre leh ţhin.

"Ka lawm e aw" ka tih hnuah min kalsan a, min kalsan han ti ila a kal hleithei lo a ni ber, a rawn hawi let leh ţhin a, upa lam tawh tih takah ka tha khur ho te khan a ngaih a ti ţha lo a ni. 

"Zonuna chuan a zawt leh che em ni? Engtin nge a zawh che a?" ka ti a, nuam lo ka tih bakah Zawmpuiin min ţawng khum ang hian tuman min la ţawngkhum ngai lo.

"Zawt chiah lo e...mahse min tihdanah i hrilh tih ka hria alawm. Thudik lo lo hrilh tawh suh a ti vel a, thudik vek a nih kha ka hrilh che. Nangni ang ho hi chuan ngaihdam dil leh in awlsam ang bawkin mi thuruk sawichhuah pawh in awlsam a, rintlak loh ka lo ring che a, ka thiam loh zawk a nih kha. Kei aiin i nau daih a, khin khin rual pawh i ni lo. Sawi tak ang khan tuman an lawm lo che a, Zonuna hi i nei thei chuang lo ang. In hmu tawh lo vang vang ila a ţha zawk" a ti a, phone a dah zui hmak a.

Phone hum ngawt ngawt chung chuan ka en ngai ka en tlawk tlawk a, tih tur ber ka hriat loh hnuah ka ngaihtuah chhuah theih hmasak ber U Tluangtea ka be ta ringawt a, "I office em?" ka tih chuan "Office e...nang hna i kal em?" a rawn ti a, min hmu thei hauh lo nain ka bu nghat a, "Remruat" a rawn tih leh takah chuan "Zanah lo leng la" ka ti deuh tawp a, sawi kual chiam dan a vang em a ni. 

"Ngati nge?" a ti hu a, a nui tel velin ka hria.

"Lo leng mai mai rawh..thawmhnaw te ka zuar a" ka tih chuan "Ka lo tum ang. Ka ţhianpa a lo leng dawn em?" a ti kual vel a, "Dawn lo e...tak taka thil pawimawh deuh zawh duh che ka nei a, in inah ka lokal ngam bawk si lo a" ka ti a, "Englam nge ni a?" a lo ti thuai a, a thutak ve ta deuh a. 

"A tam mai..phone a sawi vek a theih loh a, chuvang chu alawm zanah lokal rawh ka tih" ka tih takah chuan "Lokal ngei ka tum ang" a ti ve ta nge nge a. 

Dar2 bawr velah Zonunan a lo call ve thung a, phone ka hmang ţangkai ve tawh lutuk chu keimah pawh ka in nuihzat dawn dawn alawm.

"I inhralh ţha em?" a rawn ti a, ner nak paha "Engmah ka hralh lo" ka ti chu a nuih a za viau mai. 

"Mi an tam lo em alawm. I la hralh ve mai ang. Zawmpuiin a rawn bia che em?" ti a min zawh chuan ka chhang tim deuh a, "I bia em ni?" tiin ka lo zawt let a, min hrilh duh ka rin loh nen mak tak maiin "Aw..thudik lo lo hrilh tawh suh ka ti a nih kha. Thil dang ka sawi lo" a ti a, Zawmpuii sawi dan nen a inang chiah. 

"A thin a rim hmel lutuk a" ban charh a ka tih chuan "A pawi lo. Tikhan in inhnaih tawh lo anga a ţha a ni mai. A fel viau dawn maw tih laiin a dik lo tlat" a ti a, min rawn tih dan min zawt lem lo bawk a keipawh chuan ka ngawih bo pui ve mai a, mipa hi chu an ngaih a sam deuh a, hmeichhia angin an insawi ve sep sep lo a, chuvang chu aniang Zonuna pawhin Zawmpuii min rawn tihdan a ngaihven tehchiam loh. 

"Zaninah eng nge i tih ang?" ka ti ta daih a, "Ka pa vil chawt a ni mai. Ka nu hi a chau tawh a, kum upa lam a ni tawh bawk nen, Mami a lo kal theih loh hmel bawk si a" a ti deuh duah a, a pa hi a ţawng ri hleithei tawh lo a, an vil tawp a ni ber a, a manganthlak khawp mai. 

"Umm..i lokal thei dawn lo tihna a ni maw?" ka ti vel a, a ruk tak chuan ka lawm viau zawk.

"A nih ber chu..tlaiah ka lo lam haw dawn che em?" a tih chuan ka lo aw ve mai bawk a, kan inbiak zawh hnuah dawr chhung ka phiat fai a, chhuar ka hruk leh laiin Rohlua pawh a lo thleng a, Zualtean min lo be ve hlawl lehnghal.

'I dam em?' tiin message min rawn thawn a, ka thawmhnaw zawrh an lo en avangin in lama chhan atan ka dah a, vanneihthlak deuhin pakhat chu ka hralh hram a, a duh thlu ngang aniang a la nghal hmak mai. 

"Pakhat ka hralh" zang vaha tih pahin motor ah ka ţhu lut a, khawlum avanga ka hmai lum pup pup chu ka kutphahin ka zap a, "I va inhawn tlem ve" a lo tih chuan "Nia, in lama en duh an awm takin ka ti mai mai zawk a, ni lo se chu ka riah vek ang" ka ti a, ka inbe zui lem lo. 

Lirthei a tam viau nain kan chuanna motor chhung chu a reh tlawk tlawk a ka ngaihtuahnain kil tin kil tang a hrut kual a, thinrim lai chuan thudik kan sawi châwk zek a, vawiin a Zawmpuii thu rawn sawi kha thudik vek a nih ka ring hmiah bawk. Tuman min lawm lo tih chu an awmdanah pawh a hriat theih a, ka duhzawng a nih vang maia Zonuna ka zui ve ngawt hi ka tisual maithei a ni. A pa damlohna avangin rilru mumal an la pu thei lo a, nakinah an ngaihtuah chiang ang a, Nu Hmangaihi leh U Mami te pawn fate nu nge nge an la ti maithei a, a chhungte zawng zawngin min do chuan Zonuna pawhin min neih a tum lui tlat bik lo ang. Ka inngaihtuah chian leh deuh a ngaiin ka hria a, amahah hian ka innghat tawp thei lo ang. Rintluangi nen dawr kan siam ta rau rau mahni a inenkawl thei tura ţhahnemngai deuha ka tih a ngai a ni. 

"Eng nge i ngaihtuah leh tak vung vung a?" min rawn thlek chung meuh hian a ti a, jam ah kan lo ding mek a, kan ding tih pawh ka lo hre pek lo. Ka inthing harh a, ka chauh deuh thu ka hrilh chuan "A jam ngheh hmel riau a, i duh chuan muhil rawh" aw zaidam tak hian a lo ti a, zanin tlai chu a hlim hmel te hian min ti lungawi zo tlat lo. A mak tak tak a ni, kan karah hmelma an hrang tih tur khawpin tumah an rawn inrawlh lo a, chhungten min pawt ţhen tih tur khawpin chhungte an inrawlh lo bawk a, chuti chung chuan kan buai ve em em zel a, rilru hi a chawl ngai bik lo. Min mawlh tu leh kap tu hi a awm reng a, hei hi a chhan ka hre chak khawp mai. Amah tak hi chu rinhlelhna ka nei tawh hauh lo a, ka hrechiang thawkhat a ka hriat vang a ni. Mahse, ka hriat chian ve loh a chhungte ho hian rilru an tibuai a ni ber. 

Ka duh lo chungin kan veng kawn a thingpui dawrah min luh pui a, mi an lo tam tawh lo. Chutiang bawkin eitur pawh a lo tam tawh lo a, a awmchhun kan chah a, inhmatawn in kan ţhu a, rilru buai ru tak chungin pawn lam ka thlir daih a. 

"I damlo em ni?" tih paha ka chal a rawn leh rual chuan hnung lamah ka eu dawrh a, mak ti hmel lek lek a min en chung hian a kut chu a hum a, muangchangin a la let a, ngaihzawng ka lo nei ve tawh a, buaina leh harsatna ka tawk ngai lo. Zualtea leh Zonuna ka tawn hnu a rilru tibuai tu ka nei ta fo mai hi a mak ngawt mai. 

"Lungawi lohna i nei em ni?" ngaihţhat loh hmel taka a tih chuan "Nei lo e..nilengin ka lu a na a, damdawi chu ka ei tawh a, mut hahdam ka chak" ka ti zung zung a, nuih luih har zia pawh ka hre chho ve zel e. 

"A zia lo hle mai" a ti a, chik zet a min en chuan zahzelah ka hmui ka pet a, eitur an lo chawi phei chiah chu lo la vatin ka kun ta daih a. 

Ani pawhin ngawi rengin a ei a, min be miah lo chu mak ka ti lek lek zawk. Kan inzawna a din rualin kawngkhar chu ka hawng a, ka thil zawrh lai ka khawm sawk sawk hnuah "Lo lut kawi la" ka ti mawi ve a, ka bialpa a ni miau a, ngaihsak loh tawp chu ka duh bik lo. U Tluangtea biak vat ka ngai a ni.

"Ka lo lut lo mai ang. I lungawi hunah kan inbe dawn nia" a tih lai chuan chhan tumin ka ang zuau a, sawi tur ka hre der si lo.

"A nih loh pawn i lungawi lohna min hrilh i duh hunah min lo be dawn nia. Chumi hma chu ka ti buai lo ang che" a ti a, ngaihawm deuh a a nui te chu hmuh a la nuam reng a, kan inlaichinna hria an tam lutuk hi a pawi ta ber mai. 

"Lungawi lohna ka nei miah lo a nia, zanah ka lo bia ang che" ka bungrua chu ka malchungah dahin steering a vawn lohna lam kut zawk chu ka kut pahnihin ka vuan a, "U Zawmpuii vang hian hrehawm ka ti em a, ka mood a off mai mai a nih hi. I pa chu awmpui la, zanah chanchin ka lo ngaihven ang" ka ti a, khawngaihna chin ka nei ve tho a, ka rilru a buai vang mai a hrehawm tawrh tir ve kher ka duh lo. 

Inchhung ka lut chu chhuatah thisen a lo far thluah a, ka hlau deuh nain ka thil ken lai chu ţhutthlengah ka dah sawk sawk a, chiai loin thisen chu ka chhui a, bualin ah ka chhui lut a, kawngka a inhawng huai a, ka pa'n hmai a lo phih phur phur bawk. Thawk halh pahin ka meng kual ralh a, a zurui hian duh duh a cho ve tawp zel a, a ngam loh a tawng pek aniang. 

"I hnar a thi em ni a?" ka tih chuan "A rawn thi ve tawp a nih hi" a ti a, hruk puan ka pek hnuah inchhungah ka luh san a, han buaipui loh tawp tum mah ila pa te na na na chu kalsan tawp a harsa ţhin. 

Ka inhralhna ka nu ka kawl tir leh a, min phur pui thiam khawp mai. Min fuih sauh sauh a, U Tluangtea pawh amah zawkin a lo zawrh a, mamawh em em vang ni lovin min dawr ve hram a, ka thlah pah chuan "Zonunan i lokal tih a hria em?" ka ti deuh thawr a, dawr thlen hma deuh a thim chinah kan ding a, "Hre nang" a ti ve mai a, a hmel ka hmu thei lo nain dawt a sawi ka ring lo. 

"A hriat loh chuan hrilh miah suh aw. Thuruk neih ka duh lo nain zanin a i lokal hi a hriat ka duh lo a nia, i thawmhnaw lei kha a hre palh a nih chuan zingkar ah exer lak pahin ka lut kawi a i ti dawn nia" ka ti hmasa te te a, "I tih dan hi sawi tur i ngah hmel riau mai. Lokal rawh dawr kawtah ţhu ang" tih leh ka ban a pawh a rual a, dawr thleng min pawt phei a, appy vawt a lei leh te te hnuah dawr sir lam, êngin a chhun phak china an ţhutthleng dawhah min ţhutpui a. 

"U Tluangte, thil zawh che ka duh a?" tim daia ka tih chuan "Kimkimi a ni em?" tiin min lo fiam a, za lo deuh a nuih pah hian "Ni lo e...thil dang zawk a nia. Zawmpuii i hria em? An pa leh Zonuna te hi cousin an nia" ka ti a, hre lo a tih ka hlauh viau laia "Hria e" a tih chuan ka au chhuak lo chauh a ni. 

"Eng mizia nge a nih? A bulah chuan ka sawi duh lo nain ka duhsak vang che ti chung rengin Zonuna a sawichhe chiam a, ka ringhlel deuh a" ka ti chu "I va fing ve" min lo ti a, ka hamhaih lek lek a ni. 

"Rinhlelh nachang i hria chu i fing ka tihna a nih chu. Thil hriatchian tum hmasa lovin Zonuna chungah thinrim nghal la chu â ka ti ngawt ang che" min ti deuh zek a, ka thinrim ve lek lek tho chu a nih kha. 

"Engtin nge a sawi?" a tih takah chuan Zawmpuii thusawi ho chu ka thiam dan tawkin ka sawi chhawng a, awmzia a neih vak lohah chuan "Awii...a thusawi ho te kha ka sawi chhawng thiam vak tawh lo" ka ti ta ringawt a.

"A awmzia ka hre tho alawm. A zia lo hle mai, Zawmpuii te nupa hi chuan zu an duh ve a, an â zo tawh a nih hi" a ti halh a, mak ka tih viau rualin Zawmpuii hmel ngaihtuah chuan a awm lo lem lo. An pa kha chu a hriat mai a, Zawmpuii chu a hriat mai loh a, en chian chuan tam tak chuan an ringhlel ang tih vel a ni.

"Kimkimi nen an inhaw hran hleinem. An tih tur hre loin an chhaih buai mai mai che a nih chu. An naupangchhia thei a nia, an kum a upa ve tawh a sin mawle" a ti vang vang a, a thusawi chuan min ţhawng angreng khawp mai.

"Ka hriatah pawh an in ţawngkhum fak fak alawm" ka tih chuan "Khatiang reng kha an ni mai. Ngaiah kan nei hlawm tawh a nih hi. An inhua emaw kan tih laiin an lo ţawng dun leh khauh zel a, tunlai khaw awmdan ang vel a ni, an chin a hriat loh" a tih chuan ka lo nui hak a, hriatchian zel ka chak viau thung. 

"In chaw eikhawm naah chuan an mo pui te an lokal em?" tiin min lo zawt let a, ka ngaihtuah ngial hnuah "Kal awm pawh ka hre lo. Naupang leh tleirawl chu an tam a, nula deuh pawh an awm" ka ti a, ka chian loh thu ka sawi tel bawk. 

"An lokal kher lo ang. Kimkimi leh Zawmpuii an fel lo a, an awm ve tawh naah an kal peih vak lo. Ka ţhianpa te chhung ngau ngau hi chu an fel a, midang ho hi an awhawm vak hran hleinem. Zonuna tak pawh hian a ning a, mipa a nia, a sawi a sawi ve lo zawk a. Chhungkaw inhmuhkhawm an tihah te hian a kal ngai reng reng lo. A theih chhung chu a hel zel" a ti charh charh a, "Kimkimi leh Zawmpuii te awmdan chu a hre ve em?" ka lo ti leh a, zawhna ka ngah khawp mai. Amah hrechiang ber tu a ni a, ani lo chu zawh tur dang ka nei chuang tlat lo a ni. Thutlukna siam pawh a ti awlsam sauh ang chu. 

"Hre ve e...khak an ngaih hunah a khak a, i bulah chuan chhungkaw lam sawi nuam a ti lo aniang, chhungkua a nih tawh chuan a chhe lam ngat phei chu sawi a nawm loh bakah a zahthlak ve a, a dik lo zawnga an awm chuan i hriat lohin a khak mai ang" a ti a, khak chu a khak ngei a, Zawmpuii thinrim an hla pawh ka hrechhuak uar uar mai. 

"Aaa...khak tihah khak em em pawh ni lovin vawiin ah Zawmpuii hnenah chuan thu dik lo lo hrilh tawh suh a tia, chu chu a lo hua a" tiin Zawmpuii min rawn tihdan chu ka hrilh a, a lo nui huk huk reng a, thutakah a la lem lo. 

"A va ang nasa lo zawk ve" a ti duh lek chauh a, "Fel deuhah ka ngai asin, lem a va chang thiam awm em em ve" ka lo ti ve hluai a, mihring hi an mak ngawt mai, inhriatchian a har nasa mai si. 

"Kimkimin thiam deuhin a thlem vel mai mai aniang. Kimkimi zawk hi a â lo a, in hriat a an inhnial vel pawh chu an tih ziah dan ni tho mahse i rinhlelh loh nan leh Zawmpuii i rin theih nana an tih pawh a ni thei. Tumah ring lo la a ţha a ni mai. Mi thusawi hnuhnung apiang awih zel rual pawh i nih tawh loh kha" min tih pahin ka hnungah a beng thuk a, "Zonuna i zawt fiah zel pawh i ti ţha e. Atthlak deuh a thutlukna i siam hmain i thu hriat engpawh sawi chhuak hmasa zel rawh. Mahse, an chhungte chu Zawmpuii sawi ang tak tak khan an buaithlak ve deuh ang a, a pa te lam chu sawiselna tur an awm lo. A nu unaute hi an nasa a" tiin tlang takin min hrilh a, a sawi takah chuan hmanni a chaw kan eikhawm khan 'ka ni' ti a koh a neih awm pawh ka hre lo.

"Zonuna hi an thuhnuaia dah an tum ţhin a, mi bulah lah ka fapa an tia, ka thusawi lo haw lo la, nakin zela in buai loh nan tlang deuhin ka hrilh ang che. Kimkimi te hi an hausa a, engtin pawn awm se Zonuna nutei te chuan an haw phal lo, an inţhen pawhin ka ţhianpa zawk an hau a, tunah chuan hruai leh turin an nawr reng a" a ti ta mai a, min rawn melh zawk a, sawi nuam a tih bik loh zia a hmelah a lang reng mai. 

"Ka duhsak ve bawk che sia" a ti leh ringawt ţhin a, "Ka ţhianpa tak pawh hi a rilru a buai ve alawm. A nu lah a pa vangin rawn tlak vak a ni rih lo a, nghak phawt mai rawh u. Zonunan a duh loh chuan an hruai lui dawn hauh lo a, a thinrim chu tuman an nawr lui ngam lo ang. Ti hian nghak ula, a pa dam hunah thil a fel mai ang. Rorel tur ber buaipui ngaiin a awm rih a, an khawngaihthlak ve khawp mai" a tih lai mek chuan a phone a ri a, a kekawr ipte aţang chuan phawrhin "Zonuna a nih hi sawi lai mek mekin" a ti bul bul a, an inbiak chhung chuan kan appy inna bawm ruak ka lo va paih a, ka let chu U Tluangtea pawh a lo ding uaih tawh.

"Eng nge a?" ka tih chuan "Zonuna pa damdawiin ah an hruai a, ka kal ve nghal a ngai tlat. I lokal ve duh em?" a lo ti a, a va mak teh thut ve mawle. 

"Min hrilh ve si lo a" dar kan ak pah hian ka ti a, phone pawh ka pang depah ka dah a, a la nghawr lo hrim hrim. 

"Tumah a la hrilh lo ang. I kal hreh deuh leh keimahin ka kal phawt ang a chanchin ka rawn hrilh ang che" a ti a, kan thusawi lai pawh kan sawizawm leh thei ta lo. Mahse, tu nge rin tur a rin loh tur tih chu ka chiang thawkhat tawhin ka hria.

CONT...