DEAR DIARY-25

DEAR DIARY-25

Zonunmawian a pa thih thu min rawn hrilh chuan thawhphan pawh awm lovin ka tho chhuak nghal a, sana pawh en lem lovin parda ka hlim a, kawl a eng ruai tawh a, phaia an kal na kha a la rei lo hle si a, a mak khawp mai. 

Ka nu kaithoin ka hrilh ve a, a insiam sawk sawk a, kei erawh chu ka kal ve na chi a ni chiah em tih ngaihtuahin ka inkhap buai a, ka nu pawh zui lovin pindanah bawk ka lut leh a. 

Zonuna ka biak chuan "Vawiinah tho an vui ang a, hna i chawlh theih loh chuan lokal duh kher lo mai rawh" a ti hlauh a, Rohlua hnenah engmah la sawi lo mah ila kal ve lo turin rilru ka siam ta ringawt a. Kan inngaizawng a ni mai a, a nupui hlui Kimkimi a awm ve dawn bawk nen, a mawi chiah lo in ka hria a ni. 

Rohlua nghah pahin Rintluangi hnenah thil awmzia ka sawi a, ka ngaihdan min pawmpui ka rin viau laiin "Hetiang chhiat tawhna thilah mawi leh mawi lo a awm hleinem. A ţhiante pawh an kal tho ang a, inţawiawm zel zawk tur alawm. Ţhiante hlut zia chu nangpawn i hriat tawh kha. A bialnu anga kal kher a ngai hleinem" a rawn ti nang nang a, ka lo thaw hak a, ka kal ngam chuang mang si lo.

"Ka zak deuh a, mi an tam dawn ropui mai bawk si a, keimah phei chuan ka kal ngam lo ang. Mi tlem deuh hunah kan pahnihin ral turin kal mai ila" ka tih chuan a lo remti ve mai a, "A na zual in tih awm pawh ka hre si lo a, a va mak teh thut ve" a rawn ti ve a. 

"Nia..keipawn ka hre bik hleinem. Kan nunna thuah hian thu kan nei lo khawp a nih hi" ka tih leh chuan "I tuar ve em?" tiin min lo zawt a.

"Tawrh vak pawh ka hre lo. A pa nen tak chuan kan inhmu tam lo em alawm. A mu deuh reng a, nu Hmangaihi chu nise hrehawm ka ti ve deuh ang a" ka lo ti a, mak tihna bak keimaha thil dang a awm âwm ka hre lo reng a ni.

"Ka u in engmah a sawi lo a, an la hre lo aniang" a tih laia Rohlua a rawn thlen takah chuan kan inbiakna chu kan ti tawp rih a, chanchin min zawt nghal a, a u kaltlangin a lo hre tawh a nih hmel. 

"Biak che ka tum a, a busy char char a, i chawlh duh chuan a pawi lo rawn tih ka tum a" a hnunga ka ţhut kai laia a tih chuan "A ngai lo, chawl mah ila ka kal ve dawn chuang lo a" ka ti a, a lo nui hawk a, engmah phei chu a sawi lo. 

Kan kal ngaiin kan kal bek bek a, Zonunmawia nen pawh kan inhmu khatin Kimkimi leh Zawmpuii te pawh an reh hmak rih a, U Tluangtea zing walk haw ka hmu leh zeuh ţhin tih lohah chuan thil thleng em em a awm lo. A pa thih aţanga kar hnih a liam hnu chuan Rintluangi nen kal ve kan tum a, Zonuna ka hrilh lawk a, a pa thih hnua ka hmuh lehna hmasaber tur a ni hauh lo nain ka zam ru angreng khawp mai, an chhungte an tam leh dawn em a. 

Innghahna hmun tur kan sawi chian tehreng nen Rintluangi chu kan inah a rawn kal ţalh a, a thil khai lai min pek pahin "Hei hi suk lohin ha tawp rawh. Secondhand a ni chuang lo a a pawi lo turah ka ngai. I thawmhnaw neih sa ka sawisel vang ni lovin nalh deuh hlek a i kal ve loh chuan nuihzat chak deuh che an awm dawn si a" a ti a, inrinni a ni bawk a Kimkimi te pawh an awm maithei. Rohlu-an zingah 'vawiin chu dawr hawng lo mai ang, ka nuam lo riau a' a rawn ti hlauh a, ni lo phei se chu kan la kal tawp nang. 

"Kan zawrh lai a niin ka hria" a thawmhnaw rawn ken en vang vang paha ka tih chuan "Ni e...ha tawp rawh. I nei nghal daih dawn nia, ka thawmhnaw rawn ken sak che ka tum a, mahse a ban i chhing vek dawn a" awmze nei deuh hian a ti a, a hmanhmawhthlak deuh tawh avangin keipawh inthlak turin pindanah ka lut zui a, ka cher nain Rintluangi ai chuan ka sang zawk a, a thawmhnaw han ha thei chi ziazang ka ni lo. 

An in kan thlen chuan rin ai takin mi an lo la ţhahnem a, pawl anga ral an awm emaw tih mai tur a ni. Ka nu'n min lo dawngsawngin inchhungah min hruai lut a, min hmuh rualin Zonuna pawhin min lo pan ve vat a. 

"In va fel ve..Rintluangi te lai lai hmuh ka lo beisei hleinem" a ti deuh hlut a, ka hnungah dawmin inpui lamah min hruai phei a, puitling an lo ţhu ţhap mai bawk sia, haw leh daih a chakawm rum rum mai. 

Ţhutthleng awl pakhatah kan pathum chuan kan ţhu tlar a, kan hnaiha ţhu te ti ti chu zawm theih pawh kan nei lo. Rintluangin a pa chanchin te a zawt a, kei erawh min biakin a ruk tawkin ka chhang a, ka ngawi rei tawh khawp mai.

Ka ţhiannu hnena a pa chanchin a sawi lai chuan mi hmuh loh turin a kut ka lo vuan zeuh a, thlah leh vat mah ila kan in en a, kan innuih ringawt a, midangin min ţhut daih bawk nen, chetzia a inngaihsakna lantir mai loh chu tih theih vak a awm lo. 

Pawn a kan ţhut chhuah chuan tlemin boruak a dang deuh a, cake leh thei tui kan inchhawp a, Kimkimi leh a fanu rawn inzui chhuak chuan min ti tim leh deuh a, hetiang hi a nih reng dawn chuan hrehawm ka ti tial tial ang. Sangsangi chuan min rawn hmuh chuan min nuih var var a, kan kal hnua min hmuh hmasak ber na a ni. A ngainatawm reuh khawp mai. 

Kan piah deuh a an din tak rengah chuan biak loh tawp chu a ni thei loin ka hria a, ka lam a lo hawi reng bawk nen, "Cake lo ei ve la" ka ti ta ringawt a, sawm nawn a ngai lo chiang a sin.

"A kawm nel chakna che a rei tawh" Zonunan a lo ti ve zauh a, a fanu in ka lam a lo pan chu Kimkimi a lawm loh hmel kher mai. Ani lah chu Rintluangi nen a kan inkarah a rawn ţhu fel at a, ka cake ken lai chu a ban zui zat bawk a, tui tih hmel deuh a a eizui te chu hmuhnawm tak a ni. 

"Remruati hi nel theihin a awm lehpek nange?" tiin Rintluangi a rawn ţawngchhuak a, "Sangsangi hi chuan a nel chak a, a bulah a tawlh hrut hrut zel a, i ţhiannu hian a kawm thiam lo a" pakhat lah chuan a lo ti fiamthu a, naupang pakhat lek pawh ti lawm thiam lo nih chu hnar hmuh len a awl khawp mai. 

"I hahthlak e..chhawnchhaih ve ţhin ta che" ka ţhiannu chuan a ti hlak a, ka lo nui mai a, naupang lawm lo chi nih chuan tih vak ngaihna an awm lo a ni. 

Kimkimi inchhunga a luh hnu deuh lawkah patling han ti ila, kum60 an pel vek tawh ang tih tur pali vel an lo chhuak a, Zonuna chuan lo be sawm vatin anni chuan "Kan hawran rih mai ang che u" an ti a, an kal mai dawn maw tih laiin kan hmaah an rawn ding a, ka hriat lai reng chuan "Hei i pa a boral ta mai sia, i nu a mal tawh dawn a, inhruai leh mai te a ţha lo maw? Khalam kha min sawipui duh a nih phawt chuan i duh hun hunah min rawn be mai dawn a nia aw" an ti a, an bengvar vang a ni tih ka hria a, ka la hmuh ngai loh ţhah an nih avangin Zonuna nen hian kan inkawp tih an hre kher lo ang. 

"Inhruai leh pawh ka ti chiah lo. Ni e, kan inbe zel dawn nia. Sangsangi a awm a, kei leh Mami kan awm bawk a, ka nu chu a mal lo ang" tiin mawi deuhin a lo hnar a, "Aaa..kan chin hi a hriat loh a, chhungkaw inrawn khawm in tih tak leh min rawn be mai ang a, inthlahrung suh u" an ti a, eng eng emaw an sawi leh hnuah an kalsan ve hram a, a nuam lo duh khawp mai.

"Remruat, in va fel ve a" Nu Hmangaihin a rawn ti ta hlauh a, a tla ve dâk in ka hria.

"Fel vak chuang lo..ka lokal ve chauh a, hei ka ţhiannu nen hian a nia" ti a lai deuha ka lo chhan chuan ka bula ţhu pa nuih a lo za viau mai. 

"Kan la buai nuai nuai reng a, tikhan awm ve reng rawh u. Chaw ei nghal daih ula" ti a min sawmna chu kan lo hnar a, Kimkimin "Nu, lokal lawk teh" tih pahin a darah a kuah a, inchhungah a luhpui ta daih a. 

Rintluangi chuan inla zei vel takin "Sangsang, dawrah min kalpui la" tih leh a kut a kaih a rual a, pakhat lah a lo phur. An kal tak hnu chuan mi an awm lo bawk a a ti a niang chu ka kut a rawn vuan a, keiin ka lo vuan let ve vat bawk a, hun hman dun kan nei khat bawk nen, sawi lo mah ila a ruk tak chuan ka ngai ve khawp mai.

"Min lo ngai tawh mi?" a tih chuan nui var var chung hian ka bu nghat nghat a, "I buai dawn sia, min lo biak loh chuan ka be buai ngam ţhin lo che a, U Mami'n a pui vek hman dawn si lo che a, nangmah chiah i ni dawn tih ka hre ve tho a" ka ti pah sap sap bawk a, ka ngai ţhin tih a hriat hnua a lungawi hmel chu hmuh a nuam kher mai. 

"Buai mah ila nang chu ka be hman reng tho che. I duh hun hunah min lo be dawn nia. I nu hnenah nupui a neih che ka dil ang ka tih lai takin hetiang hi kan ni leh ta si a" fiamthu ti tak deuha a tih chuan "I ti awm ang lo emai a. Sumdawnna bul kan ţan ve chiah a nih hi" ka lo ti deuh hlar a, na lo tein a nâkah ka nghawk pah kher bawk a, a nuih a zat ka rin nen a nui duh hauh lo. 

"Nichin a i hriat ang kha i hre zeuh zeuh reng ang. Upa lam deuh phei chu ka thunun vek thei lo a, khap sen an ni lo. Thu a kual reng a, keimah chauh chuan ka ti tawp vek thei lo" thutak deuha a tih lai chuan a kut chu ka lo hmer nghet sauh a, "Thil awm thei te chu ka hre lawk sa vek alawm. Tleirawl inngaihzawng ang maia ho te te a intihtauh khum leh inţhen sek ang te kha ka hman ve lo ti mahla nuthlawi leh pathlawi ho hi chuan neuh neuh in keng tel hnem a, inţhen reng kher lo mah ila tleirawl aia buai chang kan ngah hi" ka tih chuan insum zo lovin a nui ve ta nge nge a, fa mai bakah ken tel dang an ngah tlat alawm. 

"Ka hriat lawk vek vang a nia Zawmpuii pawh kha a thusawi la vung vak lo a a mizia ka zawh chian hmasak che. Vawi hnih chauh kan la inhmu a, a chhungte chhiatna lai a sawi nghal a, mi ţha a nih ka ring vak lo a" tiin thudik tak ka hrilh ve a, ngaihawm deuh a min lo nuih chuan ka hmu hmelţha lehzual kher mai. Pathlawi a lo ni kher hi a pawi ta ber a nih hi.

"An buai peih lo ţep tawh ang. Pawm harsa an ti rih mai mai a nih hi. An ngaina thuai ang che" a lo ti ve a, kan pahnih chauhin awm ila, duat deuhin min kuah se, chu chu ka chak ber mai. A rem mang si lo a. 

"Ka nu hi puih a ngai angem le?" ti a kawngkapui lam ka thlek chuan "Ngai lo ang..ka u fanu fel deuh a awm a" a lo ti mai a, cake vel min rawn chhawp sak tu kha a nih ia ring ve nghal mai. 

"Lokal teh" tih leh thawh a rual a, hamhaih lek lek a ka lo en lai chuan min kai tho ve a, inchhungah min kailutin inchung panna kailawnah chuan min chhoh pui ta mai a, "Inleng in la nei sia" ti mah ila "Ka nu ţhiante vek an nih tawh kha" a ti then a, hmin zan lo chungin ka zui a, a pindanah min hruai lut a. 

"Eng nge kan tih dawn?" ka tih deuh ha lai chuan ka kawngah a kuah a, ka hamhaih lutuk chu min nuih suk pahin a taksa si chetin min pawm bet a, rawn kun hniamin ka hmuiah a fawp zui zat a, ka beisei loh lutuk vang nge ka hik chhuak pup a, min fawh vang hrim hrim pawh a ni maithei bawk. Dimtea a hmui a chet takah chuan ka ngaihtuahna chu a fim ţan a, ka ţang ţeuh mai pawh chu zawi zawiin ka inthlahdul a, ka fawh let ve takah chuan min lo fawp uar sauh a, a awm a kut ka dah chuan a lungphu rang dawt dawt chu ka hrethei a, kei pawh ka bang bik lo, ka lungphu chu a rangin a ri thlengin a hre thei hial maithei a ni. Rei ngial min fawh hnuah a inla hrang a, lai deuh a hnuai lam ka bih ta daih chu ngaithei lo ni awm takin ka khabe ah a dawm a, amah ka en theih nan min kuai dak a, ka mitah tak min en chuan "Tikhan min en reng suh" ka ti hlak a, a mitmeng pa zet chu hmuh a nawm rualin min ti lai chhe zo leh vek tawh. 

"Engtin nge ka en che?" kiai suk paha a tih chuan "Tun a min en dan kha" ka lo ti vat a, a ban a ka lo vawn ve rual chuan "I hmelţha em a, en loh i har alawm" a ti vel a, a hmuh ah chuan ka nur nang a, a ruk chuan ka lawm viau tho si. Ka hmuiah bawk chuan a rawn fawp leh zauh a, a inlak hran ruala a lungawi hmel chu enin ka lo nui ve var var a. 

A pindan thlang lamah chuan bathlar nuam tak a lo awm reng a, tukverh darthlalang hlai hlup mai chu nawr tawlhin ka chhuak zui nghal a, "A nuam hle mai..hetiang hi a ni ang tih ngaihna ka hre lo..a nuam a nih hi" ka ti leh ţhin a, ka awmdan chik deuh a min en chung chuan a nui suk a, ka pindan chu nise helai hi ka awm tam berna hmun a ni ang chu. 

Tlak dal vuan chung chuan ka ding a, thlang lam a in ding thluah te, ral lehlam thleng mai a hmuhnawm ti taka ka thlir lai chuan ka hnung aţang chuan min rawn kuah hlu hlu a, a taksa lum ka nghen ve rual chuan ka chhipah a khabe a nghat a, ka lo nui var var a. 

"Pangpar ho kha inchungah leh pawnah in dah dul ringawt a, helaiah te hian dah ve la a nuam lehzual dawn a sin, boruak a ti thiang lehzual ang a" ka tih chuan "Kan inneih hunah i duh dan danin i siam danglam dawn nia" a lo ti a, a nui tih a taksa che datah chuan ka hre thei. Thil awmdan hi a mak ve ngawt mai. 

Dawr a a lokal a a ruka ka en ţhin lai khan hetianga kan inhnaih theih hi ka ring ngai miah lo a, ka cho phaka ka dah lo chu thuhran, a duhzawng ka nih ka ring lo hrim hrim. Ţha ka tih em avang khan a mit pawh a san tel ka ring ringawt a, a hna thawh ka hriat hnu ngat phei kha chuan ka beisei ngam ve lo kha a nia, tunah lem min ven him tum ni awm taka nghetin min kuah a, ka hmuh phakah, ka kuah phakah a awm ta mai chu a nia, thil tak tak hi awih a har chang a lo awm ve tho a nih hi. 

Ka kawnga a kut suih beh chu vuanin a awm ngheng chuan ka ding reng a, a thawk la ri leh a lungphu ri te chuan ka thisen kal lai thleng hian a fan raih raih thei hialin ka hria a, ka duh zia chu hria se min tih lungawi tum hian a phar buai fo lo maithei a ni. Heti chung hian ţhenkhat lah chuan ka hriat laiin a nupui hlui hruai leh chenin an sawi tho a, a hnen a ka sawi ang tak tak khan amah hian ken tel ngah lo phei se la chu kan inlaichinna chhunga chen hi nuam ka ti zual viau ang. 

"Zonun" ka ti hluai chu ka tim leh deuh a, kei aia a upa daih chung hian ka u hreh tlat a, hriatchhuah ka nei zel bawk nen, ka nuih a za tlat zel a, ka u thei ngang lo a ni. 

"I hming hi a mawi viau nangin hming dang daih pu la ka ti ngawt mai" a ban a ben thak paha ka tih chuan a lo nui hawk a, "Sawi la" ka beng zawn a tih sup pah chuan ka biangah a fawp zauh a, ka ko ngun ang a, ngaiah ka nei ve mai ang chu maw. 

"Kimkimi hi i la hmangaih em?" ka ti deuh tawl a, ka thik hauh lo nain hriat chian ve chu ka phuin ka hria. 

"Ka hmangaih ţhin" tih zawngin min chhang a, a duh tawh loh thu chiah a sawi ţhin a, a la hmangaih leh hmangaih loh ka chiang hauh lo. 

"Nih leh tunah?" ding deuh a ral lehlam en paha ka tih leh chuan "Hmangaih tawh lo aniang" tih chiaha min chhan chuan ka duh khawp lo kher mai. 

"Han sawichiang deuh teh" ka ti leh hram a, "La hmangaih reng ila chu Sangsangi vang pawhin ka nei leh daih tawh ang" a ti a, a reh zui vang vang hnuah chil ka lem khalh a, "Kei ve hi" ka ti chhuak sap a, ka zam takzet a ni. 

"Ka duh takzet che" a ti a, tawi tein ka nui a, min hmangaih ve lo te pawh a ni mahna. Min hmangaih turin ka phut kher lo bawk. Hmangaihna hi chu phut chhuah theih pawh a ni lo, hriatthiam a har bawk ang ka ring. 

Inhnuaia kan chhuk chuan mi an lo tam ta vak lo a, Rintluangi leh Sangsangi pawh an lo inchhaih nui nasa mai, ani hi chuan rual pawl a thiam a, khawi hmunah pawh a leng halh vek zel mai a ni. 

"Ka nu ka va hmu ve lawk ange" ti a ka hrilh hnuah choka ah ka lut a, ka nu pawh a lo buai lem lo. 

"Haw in tum hnai deuh em ni?" a tih chuan "Aw..haw mai ka duh. Enteh maw nu, puanin i khuh tawh tho sia ralna pawisa hi ka pek leh kher a ngai em? Puan a khuh chuan a ngai tawh lo an ti ţhinin ka hria a" ka ti ru sar sar a, tleirawl lo awm ve chuan min lo nuih var var a, ka nu lah chuan "Ka hre bik miah lo. Pi Hmangaihi pe lo la, Zonuna pe mai rawh" a ti pek a, thil hriat loh leh lutuk hi chu a buaithlak ţhin ngawt mai. 

"Hei, Zonuna u fanu a nih hi. Tetei a nia, a fel teh a nia. Ka chet ve a phal mang si lo a ti hian ka awm hnawk ve ringawt a" a ti a, Tetei lah chuan "A ni bawk lo e a" a lo ti ţhin a, ka nu'n ka hming a hrilh pawhin "Ka hre daih tawh. Nizanah pawh apatean api bulah a sawi alawm" a ti a, u anga an en, hna a thawh theih tak loh avanga a fate enkawl sak tak kha a nei a, kha kha a ni thei mai angem aw ka ti rilru a, han inzawh tawp lah a ni mang bawk si lo. 

"Engtin nge a lo sawi a?" nui hak hak paha ka nu'n a tih chuan "Aa...ka sawi duh lo" a ti a, no ruak tam tak chu sil hmunah a bun ruih a, a che reng a ni ringawt. 

Kan haw tur chu thlah kan ngaih leh ngaih loh min zawt a, mah se Rintluangi nen chuan "Ke in kan haw mai ang, a hla chuang lo a" kan ti deuh tlat a, kan dawr thar pawh ka la hmu ve lo a, min kal pui a duh bawk a, awm khawmuan na hun kan nei vak tawh lo.

Sangsangi nen thui lo te min thlah a, an let leh hnu a thui pawh kan kal hmain ka ding chawt a, Rintluangin "Eng nge a?" a lo tih deuh ha chuan "Saw lai dawr kawt a mi saw Zawmpuii a nih hi. Ka hmu duh teuh lo. Hel theih se ka va ti tak aw...min ankhum leh hrep ang" ka ti sek sek a, ka enna lam chu en vein "A ho emai..lokal mai mai teh. Ka insangphek ang a, inhnial te mai mai a har lo emai. Ka chhan ang che, tuman min la hnial dang hleinem" tih leh ka bana kuah a rual a, a te zawkin min hnuk kal dat dat mai. 

Zawmpuii te thil lei zo rawn kal phei nen chuan kan intawk ta chiah reng a, an pa nen bawk an ni. Fa nei lo tih takah an nupa hian an inkawmngeih hmel khawp mai. 

"I lo va kal leh hman a ni maw? Duhsak man i awm lo ve si, ka la ngei che a nia" ka darah na lo tein min nam a, a nui hak hak bawk a, thinrim pawh a ang chiah lo. 

"I hresual a nih kha" ka tih chuan "Awii..in sawifiah duh lo mai teh. Ka hrechiang tawh che a, mahse i ngaihawm reuh tawp a nia" a ti vel a, an pain a lo tur sek chung pawhin "Min mamawh hunah ka induh ve tlat ang. Thuruk insawichhuah sak kher kher hi chu ka duh dan a ni lo ve tawp. Tupawh nise ka chhuahchhal zel a nia, mi ka rin tawh loh laklawh hi chu rin leh harsa ka ti bawk a" a ti a, kan hmaah chuan a ding tlat a, tawn tlang luih a huphurhawm khawp mai.

"Aww...ring lo la a ni mai alawm. Chutiang thu ho lam lutuk puitlingin khel khel tur a ni hleinem. A ţangkai lo emai" Rintluangin a lo tih ve te chuan "Tu nge i nih a? Ka fiamthu mai mai a nih kha, keichu ka fiamthu a sang a, mi pawi ka lo sawi leh ţhin" a ti a, a nui sang a, hrechiang viau tawh lo ila tuna a thusawi hoah hian huat tur a awm miah lo. 

"Remruati fiam chak viau mahla kan hmanhmawh tawh alawm. Saw inpa pawh a thlen thui tawh em saw. Kal teh ang Remruat" tih leh min kalpui a rual a, Zawmpuii chuan min ko zui nain ka hawi let tawh lo. Ka hlau riau tawh a, hnaih loh theih hram ka duh ber.

"Dawih suh aw...chhang let zel la, in ngam tir suh. I hlau ni a a hriat chuan a pawng pawrh tial tial mai ang. Hetiang ho hi chu an ni aiin nasa hret zel ila min hlau mai" a tih chuan ka lo aw liam vel mai mai a.

Dawr tharah chuan min kalpui a, a zim a, a lum uap churh bawk a, a man ngaihtuah phei chuan a thanat thlak viau nain a hmun a lai li ţha a, hetiang lai hmun angah hi chuan kaw tereuhte pawh a to zek zel. 

"Sam siam vel zir tel ta ila eng nge a an ang le? Dawr luah tur lian deuh hlek kan zawng leh ang a" a ti leh tawh a, ka lo chek hlak a, melh vak pah hian "Tikhan ti zel suh. A tirah thawmhnaw i tia, eitur i ti leh a, tunah sam siam i ti leh tawh a, pawisa ka thawh ve mang bawk si lo a, i rilru i thlak reng chuan ka tan a nuam miah lo a nia. Nang chuan engpawh zir duh la tih dan a awm zel a, dawr siam i duh lahin ti hian i patean a tih sak nghal che a, i rilru i thlak reng chuan eng nge ka tih ve ang a? Keimah chiahin ka ti thei hleinem" ka ti duah a, kil khata ding chung hian min en ran a, "Nih leh secondhand zuar zawk ang. Kan hralh thei zawk daih ang. Nilenga ţhut tlawk tlawk chu ninawm deuh a sin. Inhralh theih loh phei chuan ka ţhut reng hian inhralh thei deuh aiin ka hah zawk ang" a ti a, secondhand chu khai ve ila a zia deuh maithei.

"Ka hlawh lak hun lo nghak rawh. Ka lo thawh ve ang. I patea chu rul leh dawn tho mah ila engmah thawh ve loh tawp chu ka duh tawh lo" ka tihin "Hmm...i inla hrang" a ti leh bawk sia, awmdan tur thiam a har khawp mai.

"I pawisa vek chu nise ka inthlahrung dawn lo nasa. Mahse, secondhand pawh lo zuar tel dawn ila i chhungte i dil leh tho a ngai ang a, bale khat pawh a to a nia, a bain kan la thei dawn bawk si lo, bakah ba kan ngah tawh. Ka thla khat hlawh tawp ka lo thawh ve ang a, duh leh a chanve lek kan hawng ang a" ka ti a, buk nghat pah hian "Sumdawn hi a lo namai lo khawp mai. 100 dawr chu eng nge i ngaihdan?" a lo ti leh a. 

"Kan neih sa ho hi kan hralh zawh hunah duh leh kan ngaihtuah dawn nia. 100 dawr lian tak tak a tam tawh a, i beidawng leh tho maithei a ni. Kan inhralh ve zel mai dawn a, vawilehkhat a hralh nghal vek theih a ni lo a, i beidawng hma lutuk hi a buaithlak a nih hi, i rilru a nghet lo bawk si" ka tih bawrh bawrh lai chuan a lo nui kur kur a, "I va thinrim ve aw..vawiin khan Zonuna pindanah khan eng nge in tih a? A fawp lo che mi? I thinchhe riau mai in inhau a ni chiang" a ti leh vel a, ka nui duh der lo. 

Dawhkan lian vak lo inhung ve bulah chuan kan ţhu dun ran a, kan inmelh ralh a, a nui leh pat pat zel a, a rilru nghet lo lutuk hian min ti thinrim a ni ber. 

"Lalrintluang, kan dawr thawhna hluiah khan pawisa mamawh vangin kan thawk vek a, engati nge min ngaihsak bik tlat a? Ka hriatchian chakna a rei tawh mai. Dawr siam thlengin min sawihmuh a, ti hian puk chawpin min tih pui a, kei ni ila ka thei kher angem ka hre lo" ka ti khawl khawl a, hriatchian ka chakna a rei tawh tak tak a, ka zawt ngam lawk lo zawk a ni. 

"Pathian min kohna aniang" a tih chuan "Uang lo teh" ka lo ti vak a, a kut ka hmer vak bawk.

"Ka hre bik lo. Mahse, ngaih loh lamah lo ngai lo la, ka hmuh che khan ka khawngaih tlat zel che a, i u thih a ka lokal khan mi kâ aţangin in chanchin ka hrechiang lehzual a, i u an man ngun zia thleng khan an sawichhuak bawl bawl hlawm a, nang lah i inthlahrung ţhin bawk nen, eizawnna tur ka dap lai a ni ve tho bawk sia, kan intawng fuh a nih ber chu. Sumdawn pawh tih dun reng theih a ni dawn lo a, ba te kan inrulh zawh chuan dawr inluah ţawm reng chungin kan duh zawng ve ve kan zuar thei a, chutiang te chuan ka ngaihtuah ţhin a, fiamthu loin Pathianin i tana a pek cheah min ngai tawp rawh. Hmun hrang hrangah kan awm kual ţhin a, mi rethei fe fe pawh ka hmu hnem tawh, mahse ka khawngaih ang che khan tumah ka la khawngaih ngai lo a, ka rilruah an cham zui ngai lo bawk. I u ruang leh ruang bula i ţhut laia i hmel te kha chiang deuhin ka hmu a, i nu ka en leh a, chutah rui phual a i pa ţhu ka hmu leh a, khata ţang phei kha chuan thil dang ka ngaihtuah thei tawh lo. Keipawn mak ka inti ve tho a, ka chhungte leh ka patea ngei pawn a tirah chuan an remti bik lo. Pawisa tam tham deuh a hlawm a thehchhuah kha a ui ve tho a, ka hmuh hniam vang che pawh ni loin puih che ka duh tlat bawk si a, chuti a nih chuan an tia kan pahnih atana ţangkai ve ve tur angin sumdawn dun mai hi min remtih sak a, pui reng chung chein keipawn eizawnna ka nei ve tihna a ni dawn a, engpawh ti dawn ila bulţanna a ngai vek a, ti hian bul ka ţan sak che tihna a ni bawk a" tiin tlang deuhin min hrilh a, ka thin a rim hauh lo, tih nachang ka hriat miah loh tur thil a ti hi ka fak zawk. 

"Secondhand te chu ti tel chhin ila, i thawhna hmunah i zuar ve zel ang a, ba hi a chanve vel kan rulh hunah emaw kan rulh zawhah i bang ang a, tunah chuan hlawkna engmah kan la nei rih lo. Ba a a kal vek a ngai rih a,rilru hmanhmawh mi nih chuan a ninawm duh khawp mai" a ti a, lo pawm viau mah ila "Pe vek lo ila" ka ti ta tho a, min en phawk khawp mai.

"Thlakhatah chutiang zat chu kan pe ang che ti la, kan pek zat tur tuk la, a bak chu kan hlep ve thei a ni mai alawm. Thawmhnaw hi a baa lak i neih chuan i lakna zat ang kha kan dahţha zel bawk ang a" ka tih chuan ţha dawn riauin a hria a, kan insawiphur a, whatsapp ah group a siam a, ig ah page a siam bawk a, thawmhnaw zawrh zel a duh leh tawh bawk. 

"Khawimaw instagram ah hian account min lo siam ve teh" ka tih chuan "I lerh sawt riau" min ti a, min nuih vak vak hnuah min siamsak a, Zonunmawia a follow nghal te chu ţullo ti viau mah ila ka nuih liam mai a, a thlalak hnuhnung ber lah chu a rei tawhin a khawih tam hmel bik loh khawp mai. Dawr a ka thawh laia Rintluangi bawkin min entir ţum a mi kha a hnuhnung ber a la ni reng a, thlalak pali vel bak a awm lo. 

Ka nu hnenah pawh ţha deuhin ka hrilh a, ka hlawh kan chan loh tur thu ka hrilh pawhin lung lohah a la bik lo a, min hrethiam em em reng mai hi vannei ka in ti ţhin.  

Secondhand bale te pawh chu kan han hawng veleh zel a, dawr a awm zawk Rintluangi chuan "A ţhat hmel zawk" a ti a, keipawhin ka thawhna hmunah te kengin ka buai em em reng a, Zonuna pawh min lo hruai emaw, a lo leng a nih loh chuan kan inhmu ngai mang lo tih theih a ni. Pawisa kan hmuh theihna tur thil hi ngaih pawimawh a ngai ve tho ţhin a, ka buai viau chang pawhin min la hrethiam ve zel a, mipa dang ang bawkin 'ka chawm thei che' ti ve ţhin mah se ka nu leh pa thlenga a chawm theih loh zia hrechiang ber tu ka ni ang. Keimah chiah fa an nei tawh a, pasal ka neih hnu thleng pawh a ka puih zel theih dan tur ngaihtuah char char ka ngai a, kan dinhmun a in an em avang hian min hriatthiam phah ni ten ka hre ţhin. 

Rawng ka bawl mek laia ka nu lo haw chuan "Vawiin chu Kimkimi nu leh pa te an rawn awm reng a" a rawn tih luh chuan ka lo ngaihven khawp mai. 

"Eng nge an lo tih a?" ka lo ti thuai a, "An rawn leng ve mai mai aniang..eng nge an rawn tih chiah ka hre lo. A nu kha a fel hmel viau laiin a pa kha chu a khirh ve deuh maithei a ni" a ti bawrh bawrh a, ka rilru hria ni awm takin "Zonuna a awm mang si lo a, an haw leh vat dawn emaw tih laiin an awm ve reng a, an la inpawh viau chuan ka hria" a tih zawm zat a, sawi tur a vang duh ngei mai. 

Chawhmeh vil paha phone ka khawih ve chuan Rintluangi message ka hmu a, 'Zonuna leh Kimkimi inzui ka hmu. Dawr ka khar dawn lamah a nia, Sangsangi pawh a tel' a rawn ti a, rilru a buai leh vek tawh. 

Ka nu hnenah chuan "Zonuna te nupa an inrem leh a ni lo maw?" fiamthu anga lang tur si, thutak deuh hian ka ti a, ani lah chuan "Fa neih tawh chuan inţhen a harsa ang ka tih reng kha" a ti duh lek chauh a, Zonuna chu ka be mai dawn maw ni aw ka ti rum rum a, a hming chu ka en leh vang vang ţhin a, call tumin ka tin zuau zuau a, ka tim leh ţhin bawk si. 

Bualin ah ka lut a, ka nu hriat lohin ka call ta nge nge a, phone a lak rual chuan "Aw..Remruat" a rawn ti a, motor thawm pawh hriat tur a la awm. 

"Chanchin min lo la hrilh si lo a, ka lo zawt dawn che" ka ti daih a, "Sangsangi hrawk na kha clinic ah ka kalpui a, ka haw mek chauh a" a rawn ti a, 'kan' ti lo a, 'ka' tih a hmang chu ka ngei riau mai.

"Nangmahin em ni i hruai a?" ka ti ve ngat a, min chhan hma hma chuan "Ka pa'n min lo call leh tawh a nia engtin nge ka tih dawn? An phut ve che chuan chaw chu lo eipui la a ni mai alawm" Kimkimin a ti lang lang a, ka hriat tur a sawi a nih vang aniang a ring ţha emai.

"Ka lo be leh ang che" tiin phone a ti tawp zui hmak a, tikhan an chin ka hre leh tawh chu a nia, kei lah hi thil hrechiang lo a hrehawm deuh a awm reng duh lo chi ka nia, ka fiah nghal mai zel a, vei run reng ai chuan a awlsam mai. Nidangah chuan ka rilru a nuam huai zel a, mahse tun ţum chu ka ipik zual sauh emaw tih mai tur a ni, ka vei tlat bawk. 

Rintluangin min lo biak leh chuan thil awmdan ka hrilh a, "Diktak chuan maw, ka ute ho hi chuan an inţhen hlen an ring lo a, in chungchang te hi min zawt ve ţhin a, Zonuna chu a fel lutuk a chu a tia, a nupui hlui zawk khan a thlah tawp a nih loh chuan a kalsan luih theih an ring vak lo" a ti ban charh a, a ni ve tho mai. An inah lah hmuh tur a awm ve reng a, puitling a ni tawh a, puitling leh puitling thinrim a han inhnar haw tawp lah thil tih chi a ni der mai bawk si lo. 

"Engtin nge ka tih ang?" ti a ka rawn ve chuan "Ţhen chhin rawh..a rilru enchhin ang. A nih loh chuan a nupui hlui nen an inbe chhe chuang bawk si lo a, hmanni a an ina kan kal ţum a putar ho ţawngkam te kha i tan chuan ngaihthlak a hrehawm ngawt ang. Ţhen hlen tum chuang loin reilote han ţhen chhin teh. Chuan i laka a rilru put hmang dik tak kan hre mai ang. Engkim i zawt fiah nghal zel a, a tluang purh a, thil hriatchian a har emai" a ti a, ka ngaihtuah zui vang vang a, a ţha dawn khawpin ka hria. 

CONT...